“Wutim Kuman me Po Pira”
Kwero Nipo me To pa Yecu Bibedo i April 2
1. Pingo nino dwe 2 me April mwaka 2007, obedo nino ma pire tek atika?
1 I nino dwe 2 me April mwaka 2007, dano milion mapol ma i kabedo mapat pat i but lobo ducu gibigure ka kwero Nipo me to pa Yecu macalo gitum. Yecu oto kun cwako kor loc pa Wonne me polo, man onyuto atir ka maleng lok goba pa Catan Larac ni dano tiyo pi Lubanga pien gimito gin mo ki bote. (Yubu 2:1-5) Cam pa Rwot me Otyeno poyo wiwa ni Yecu ‘omiyo kwone me koko jo mapol’ ki tone calo dano ma pe ki roc kacel ki bal mo. (Mat. 20:28) Pi meno, Yecu ociko lupwonnyene ni: “Wutim kuman me po pira.” (Luka 22:19) Tika pwoc pi mic pa Lubanga ma pire tek-ki dong omiyo icako yubbe me po pi mar man madit atika ma onen i tic-ci?—Jon 3:16.
2. Watwero yubo cwinywa pi kwero Nipo nining?
2 Bed ma Iyubo Cwinyi: Bedo ka tamo jami ma otimme i kare me agikki me kwo pa Yecu macalo dano, bikonyowa me yubo cwinywa pi kwero nino man me Nipo. (Ejira 7:10) Pi konyowa me timo man, kiketo yub mo ma kite dok pat me kwano Baibul i latin buk me Examining the Scriptures—2007 ki 2007 Calendar. Yub me kwan man rwatte arwata ki jami mogo ma obedo ka timme i kare me to pa Yecu ma lubbe ki kalenda ma watiyo kwede i kare-ni. Cawa kacel ki nino dwe ma kiloko pire i Baibul-li jenge i kom kalenda pa Lujudaya, ma ninogi onongo cakke i otyeno i nge poto ceng ka tum wa i otyeno i nge poto ceng me orwone. Apokapoka ma tye-ni kitamo pire dok kitiyo kwede i kare me goyo yub me kwano Baibul pi kare me Nipo. Bedo ki ngec man i kare me kwano Baibul, ki dok lega kun nongo walwodo lok i kom mar matut pa Lubanga bikonyowa me nongo adwogi maber ki i yub me kwero Nipo.
3. Watwero konyo jo ma gunyuto miti ki jo ma dong gugiko tic me pwony woko me nongo ber pa Nipo nining?
3 Lwong Jo Mukene Wek Gubin: Karatac ma kiluto i Ticwa Me Ker me Febuari tito pi yub me rweyo dano pi nino man ma pire tek-ki. In mono dong ityeko yubbe me tic matek pi rweyo dano? In tika dong icoyo nying jo ma imito lwongogi, dok icako dong lok botgi? I nino me Nipo, cak yubbe wek io con ka jolo jo ma ilwongogi kacel ki jo mukene ma bene gunyuto miti. Iromo bedo kacel kwedgi, wek inen ni gubedo ki Baibul kacel ki buk wer. Nyutgi bene bot jo mukene me kacokke. I nge yub man kwany kare me gamo lapenygi. Lwonggi me bino ka winyo pwony ma kite dok pat ma kiyubo pi lwak ma kibimiyone i April 15. Luelda tutwalle omyero gubed ki miti me neno ni jo ma yam onongo gubedo jo me kacokke ento dong gugiko tic me pwony woko gunongo karatac me lwongo pi kwero Nipo-ni ki dok me bino ka winyo pwony ma kite dok pat ma kiyubo pi lwak.
4. Wan watwero konyo dano wek gudong i yo me cwiny i nge kwero Nipo nining?
4 Kony Jo ma Gunyuto Miti Nyen ki ma Gugiko Tic Woko Wek Gudong: Lalok ma bimiyo pwony me Nipo bilok manok i kom yub ma watye kwede me kwano Baibul ki dano kun cuko cwiny jo ma gunyuto miti nyen me medde ki nongo ngec i kom Jehovah. Iromo tic ki lok meno macalo yo me medo kony i yo me cwiny bot jo ma ilwongogi. Ka onongo peya gucako kwano Baibul, nen ni ilimogi cutcut i nge nino me Nipo dok inyut botgi kit me kwano Baibul. Dok bene omyero gubed ka bino i cokke ducu wek gudong i yo me cwiny. (Ibru 10:24, 25) Me timo man, omyero icuk cwinygi me cako bino i cokke kare ducu. Luelda myero guket yub me limo Lukricitayo ma gugiko tic me pwony woko ento gubino i kwero Nipo, wek gukonyogi me tam matek i kom pwony ma guwinyo. Man twero cuko cwinygi me cako timo jami ma mitte ma lubbe ki kacokke doki.
5. Adwogi maber ango ma kwero Nipo oromo kelone botwa?
5 Yub me Nipo miniwa kare me lwodo lok i kom ngo ma Jehovah gin ki Yecu gutimo piwa. Lwodo lok man konyowa me dongo mar matut i komgi dok gudo wa kit me kwowa bene. (2 Kor. 5:14, 15; 1 Jon 4:11) Man aye obedo kare ma omyero wan wacak yubbe iye kacel ki yubo jo ma gitye ki miti, pi nino man ma pire tek ma biminiwa kare me “yweko lok me to pa Rwot.”—1 Kor. 11:26.