Ka Dano Gipe Gang

1. Peko ango ma pol kare wanongo ka watye i tic me pwony i doggola ki doggola?

¹ I kabedo mapol, nongo dano gang tye ka doko tek. I ‘kare man ma dong kwo tye matek-ki’ jo mapol gitiyo pi cawa malac me nongo jami ma mitte pi kwo. (2 Tem. 3:1) Jo mukene pe gibedo i gangigi pien nongo gicito katiyo cente nyo ka mato yamo. Dong watwero tero kwena maber-ri bot jo ma kit meno nining?

2. Yo ango ma watwero neno kwede ni paci ma onongo dano gipe iye-ni kitiyogi?

² Gwok Rekod Maber: Gin me acel aye me coyo piny jo ma inongo gipe gang. Man pire tek tutwalle ka wutiyo wang ticwu tere tere. In mono icoyo nying gudu, namba me kad me wang tic, nyingi, ki dong nino dwe piny? Iromo weko ka ma twolo dong pi coyo lok mogo ka ce in nyo latit kwena mukene odok cen ka tic i paci ma onongo dano gipe iye. I agikki me kare me miyo caden, wi myero opo me miyo rekod nyo coc ma icoyogi piny-ni bot ngat ma tye ki kad me wang tic moni-ni, nikwanyo ka ce en oye ni iti paci ma onongo dano gipe iye-ni. Ti ki karatac mukene me coyo rekod pa jo ma gunyuto miti ma ibidok cen ka limogi.

3. Tam ango ma kimiyo pi konyo jo ma nongo gipeke paco?

³ Tem Cawa Mapat: Oromo bedo ni jo ma onongo gipeke gang i nino me tic-ci guromo nonge i otyeno nyo i tum pa cabit. Mono iromo keto yubbi me dok cen i kare mo ma nongo oporre? (1 Kor. 10:24) Ka pe, ci iromo miyo nying paci ma onongo dano gipe iye-ni bot latit kwena mo ma twero dok kunnu i cawa mapatte. Ka pe, ci iromo coyo waraga nyo goyo cim bot jo ma onongo gipe paco-ni. Lutit kwena ma gitye ki goro me yotkom ma pe gitwero nywako i tic me pwony i doggola ki doggola giromo bedo ki yomcwiny me konyi i yo man.

4. Ngo ma nyutu ni pire tek me dok cen i paci ma nongo dano gipe iye?

⁴ Lok acel mo ma otimme nyutu kit ma pire tek kwede me tute me nongo kom jo ma nongo gipe gang. Lutit kwena gubedo ka wire i gang mo tere tere pi mwaki adek ka dong nino mo gurwatte ki rwed ot meno. Gunongo ni en kara pi kare meno ducu, obedo ka kuro ni Lacaden mo kono obin wek emedde ki kwano Baibul kit ma onongo dong ecako woko ma peya ekobo i kabedo meno.

5. Awene ma kiromo wacci wang tic moni dong kityeko woko?

⁵ Wutyek Wang Tic Moni-ni Woko: Awene ma kiromo wacci wang tic moni dong kityeko? Pol kare, man bedo ka kiyelle matek me nongo kom ngat mo olo i gang acel acel. Twero bedo ber me royo trak nyo magajin mo macon ki diro i odi ma dano gipe iye, tutwalle i wang tic mogo ma nongo dong kitiyogi tere tere. Omyero kityek tic i wang tic moni i kine me dwe angwen keken. Ci omyero kidwok cen bot lanen lok me wang tic wek oco i rekode.

6. Pingo omyero watemme me tero lok me kwena maber-ri bot ngat acel acel?

⁶ Wamito ni jo mapol adada kit ma twere kwede gubed ki kare me pwonyo ki dok lwongo nying Jehovah wek gularre. (Rom. 10:13, 14) Man kwako wa jo ma nongo gipe gang i cawa ma nongo watye ka wot i ot ki ot. Calo lakwena Paulo, wek obed mitini ‘me tito lok me kwena maber me kica pa Lubanga kore ki kore.’—Tic 20:24.