In Mono Icung Matek pi Lok pa Lubanga?
1 I lobo man ma dano mapol pe giye lok me Baibul-li, Lukricitayo me ada gitito Lok pa Lubanga ki mit kom. Waye lok ma Yecu Kricito oloko i legane bot Jehovah ni: “Lokki en ada,” pien wangeyo atir ni “ginacoya ducu ma yam gicoyo, gicoyo pi teko pa [cwiny] pa Lubanga.” (2 Tem. 3:16; Jon 17:17) Dong waromo cung matek pi Lok pa Lubanga nining?
2 Kwan Ginacoya: Ngene kene ni Yecu onongo obedo ka kwano Lok pa Lubanga. Man okonye me tic ki Ginacoya i pwonye kare ducu. (Luka 4:16-21; 24:44-46) Ngo ma waromo timone wek wamak ginacoya mapol obed i wiwa? Omyero wakwan Baibul nino ducu dok walwod lok i kom tyeng ma nongo wanongo ni romo bedo me cuko cwiny nyo me kony tutwal i ticwa me pwony. Ka watye ka yubbe pi cokke, omyero wayab ka wakwan ginacoya ma nongo kicimogi i Baibulwa dok wayub bene lok mo me aloka i komgi. Ka watye i cokke, omyero walub ginacoya ma nongo lalok moni tye ka kwanone, ki i Baibulwa. Kwano ki dok niang tyeng me Baibul konyowa me ‘tero lok me ada i yo matir.’—2 Tem. 2:15.
3 Wek Baibul Aye Oloki: Ka watye i tic me pwony, omyero wawek Baibul aye oloki. Me labolle, ka gin mo pe ma gengowa ci omyero watemme me kwano ginacoya acel mo ki rwed ot. Ka ce en openyo lapeny mo nyo okwero lokwa mo, ci bedo ber me tic ki Baibul me mine lagam. Ka tic omake matek, ci pud waromo lok i kom tam mo ma tye i Baibul kun wawacci: “Ma peya acito, ye wek akwan boti ginacoya acel eni keken.” Ka twere, kwan ki i Baibul kun iweko en lubo ka itye ka kwanone.
4 I kare ma kinyutu ginacoya ma kwero pwony ni Lubanga obedo Triniti bot rwed ot mo acel, en owacci: “Abedo ka wot i ot legawa pi kwona ducu, ento pe amedo ki ngeyo ni man aye gin ma Baibul loko!” En otugi ye kwano Baibul cut. Yecu owacci romine biwinyo dwane. (Jon 10:16, 27) Yo maber me ngeyo lok me ada pi jo ma cwinygi leng aye me kwanone ki i Ginacoya kikome. Dong wan ducu omyero wabedu jo ma cung matek pi Lok me ada pa Lubanga!