Omyero Wamedde Anyim ki Mit Kom i Tic me Pwony
1 Nicakke i mwaka 1992, Lucaden pa Jehovah gubedo ka tic ki mit kom pi cawa makato bilion acel kulu i tic me tito pi Ker-ri i wi lobo ducu ki loko dano me doko lupwonnye mwaka ki mwaka. Cwinywa pud dong yom atika me bedo i kin jo mutiyo tic man ma mwonya-ni ya!—Mat. 28:19, 20.
2 Adada, pwoc ki pak ducu cito bot Jehovah ma okonyowa i yo ducu i ticwa me pwony i kare man ma ‘piny tye marac-ci.’ (2 Tem. 3:1) Ngo ma mitte ki tung botwa ka ce wamito ni wamedde anyim ki mit kom i nywako i tic man ma pire tek-ki?
3 Gin ma Kelo Mit Kom: Mar matut pi Lubanga ki luwotwa, kacel ki miti ma watye kwede me cobo dyerewa, cuko cwinywa i timo tic me Ker-ri. (Mat. 22:37-39; 1 Jon 5:3) Mar miyo wajalle me tiyo tic me pwony-nyi matek.—Luka 9:23.
4 Tute Matek me Medde Anyim ki Mit Kom: Lamonewa Larac-ci tye ka tute matek me kweyo mit komwa i tic me pwony-nyi woko. Cwiny manok ma jo me wang ticwa tye kwede, jami me lobo-ni ma wiro tamwa, lyeto ma wanongo i yenyo yo me kwo, ki paro pi yot komwa gubedo jami mogo ma en tiyo kwede me turo cwinywa.
5 Pi meno, omyero wati matek me medde anyim ki mit kom. Pire tek me dongo ‘marwa ma yam wabedo kwede mukwongo ca.’ Meno kwako kwano kacel ki lwodo Lok pa Lubanga ma obedo Baibul-li kare ki kare, kun bene watiyo ki cam me cwiny ma a ki bot “lagwok ot ma lagen.”—Yabo. 2:4; Mat. 24:45; Jab. 119:97.
6 Kit ma lok pa lunebi me Baibul nyutu kwede, nino pa Jehovah me tyeko jo ma pe gilwore tye ka nyiko cok adada. (2 Pet. 2:3; 3:10) Pi meno, wamedde wunu anyim ki mit kom i nywako i tic me tito pi Ker-ri kacel ki loko dano me doko lupwonnye kun warumo twok lobo ducu!