Mi Magajin ma Tito Lok me Caden i Kom Ada
1. Tic pa Watchtower ki Awake! obedo ngo?
1 Magajin me The Watchtower Announcing Jehovah’s Kingdom kacel ki lawote Awake!, gubedo jami tic ma pigi tego i tic me pwonyo lok kom Ker-ri ki me loko dano wek gudok lupwonnye. (Mat. 24:14; 28:19, 20) Cwinywa yom me tic ki magajin magi ma gibino i karegi kikome-ni i yowa mapat pat me tito pi Ker-ri.
2. Kit alokaloka ango ma kibedo ka timone i Watchtower ki Awake!, dok pingo?
2 I mwaki mukato angec, kibedo ka loko nen pa magajin magi i ditgi kacel ki lok ma tye i igi ki yo ma watiyo kwedgi me terogi bot dano. Alokaloka magi ducu kibedo ka timone wek magajin magi obed ma ywayo miti pa dano kun tiyo maber, wek kwena me Ker-ri ogud cwiny ‘jo ducu ci gunong larre dok gunge lok me ada.’—1 Tem. 2:4.
3. Wabitic nining ki magajin magi i tic me pwony?
3 Cakke i Januari mwaka 2006, dirowa me tic ki yo mapat pat me nyutu Awake! ma kati kicel dwe ki dwe, otyeko dongo. Dong wabicako tic ki kit yo acel-li me nyutu The Watchtower Announcing Jehovah’s Kingdom acel ki i kom aryo ma bikati dwe ki dwe-ni i tic me pwony. Kit me nyutu magajin acel acel bikati i pot karatac me agikki i Ticwa Me Ker. Pol kare Ticwa Me Ker loko i kom pwony acel i kin pwony ma gukwongo me magajin moni, ento i kine mukene kiloko i kom pwony mukene ma gitye i dyere ma nongo kwako miti pa jo mapol. Waromo tic maber ki tam ma kimiyo me nyutu magajin-ni ka ce wakwano dok waniang i kom pwony moni-ni maber kun watiyo ki lok ma mewa wek tam meno obed ma rwatte ki kwo me wang ticwa.
4. Pingo romo bedo ber me tic ki yo mukene mapatte ki ma kimiyo i Ticwa Me Ker me nyutu magajin moni?
4 Kadi bed ni Ticwa Me Ker nongo omiyo yo aryo mapat pat me nyuto magajin acel acel, bed agonya me tic ki tam mukene bene. Tyen lok acel mumiyo itwero timo meno aye ni, romo bedo ni pwony acel ki i kin aryo-ni nongo rwatte ki kwo me wang ticwu. Nyo romo bedo ni iwinyo ni itwero tic ki pwony mo ma inongo oyomo cwinyi aye dok maber makato.
5. Ma nongo peya iyubo kit me nyutu magajin moni, omyero kong itim ngo?
5 Yubo Kit me Nyutune: Mukwongo, omyero kong ikwan iniang pwony moni ma iyero me tic kwede-ni maber. Pe iromo ngeyo pwony ducu ma tye i magajin moni ka nongo peya icako tic kwede i tic me pwony. Ento ka ce iyero me tic ki pwony moni, ci omyero ilok iye ki cwiny ducu dok ki yamo komi. Itwero timo meno maber ka ce itye ki ngec muromo i kom pwony ma imito tic kwede-ni.
6. Watwero yubo kit me nyutu magajin i yo ma megwa nining?
6 Me aryone, ka itye ka yubo kit me cako loki, wek obed i yo ma twero tic bot jo mapol. Ti ki lapeny ma tugo miti ma kubbe ki pwony moni-ni i cako loki. Kare ducu omyero ijenge i Lok pa Lubanga pi gudo cwiny dano. (Ibru 4:12) Yer ginacoya ma rwatte ki lok ma tye, ber ka obedo tyeng ma kicimo nyo kiketo i pwony ma ibitiyo kwede-ni. Tam i kom kit me kubo ginacoya moni-ni ki pwony ma tye.
7. Waromo dongo diro me nyutu magajin nining?
7 I Kare mo Keken ma Onen: Wek yo me nyutu magajin moni oti maber, omyero kiti kwede bene. Nywak kacel ki kacokke i miyo caden ki magajin i Ceng Abicel. Mi magajin bot jo ma nongo kong gugamo bukkewa mogo. Kare ducu mi magajin bot latin kwanni me Baibul ki bot jo mukene ma nongo gitye ka ce idok cen ka lim. Itwero miyo magajin bot jo ma nongo itye ka lok kwedgi ka icito ka wilo wil, itye i cafari, nyo itye ka kuro me neno dakta. Dong diro me nyutu magajin-ni ka ce itye ka miyogi i dwe moni.
8. Watchtower ki Awake! dok gipat nining?
8 Magajin me Watchtower ki Awake! dok gipat mada. Giilo Jehovah malo macalo Laloc ma loyo polo ki lobo. (Tic 4:24) Magajin magi gikweyo cwiny dano ki lok me kwena maber me Ker pa Lubanga dok bene gicuko cwiny dano me keto niye i kom Yecu Kricito. (Mat. 24:14; Tic 10:43) Medo i kom meno, gitito pi jami ma tye ka timme i lobo ki kit ma tye ka cobo kwede lok pa lunebi me Baibul. (Mat. 25:13) Dong, kony jo me wang ticwu me nongo ber pa magajin magi ki yubbe me miyone i kare mo keken ma onen!
9. Watwero cibo guti me dok cen ka lim nining?
9 Ka ce imiyo magajin mo, nyo wunyamo lok me cwiny ki ngat mo, yub lapeny nyo lok mo ma bimiyo idok cen ka lim nyo biweko wubimedde ki boko lok me cwiny mukene doki. Ka wacoyo kodi me lok me ada ki mit kom, ci watwero bedo ki gen ni Jehovah biyabo cwiny jo ma gitye ki miti me ada me ngeye ki tic Pire bene.—1 Kor. 3:6.