Kwe Cwiny Jo ma Kumo
1. Pingo jo ma kumo gimito kwe cwiny?
1 Rwenyo dano me amara i to obedo gin me cwercwiny malit atika, tutwalle pi jo ma gipe ki gen me Ker-ri. (1 Tec. 4:13) Jo mapol gipenye kekengi ni: ‘Pingo dano to? Ngo mono ma timme i komgi ka guto? An tika dok abineno jona me amara muto-ni?’ Kiminiwa tam mogo piny kany me kweyo cwiny jo ma wanongogi i ticwa me pwony ma nongo gitye ka kumo pi to pa watgi nyo laremgi mo.—Ic. 61:2.
2. Ka rwod ot owacciwa ni pud etye i kumo, omyero warii ka miyo caden?
2 I Doggola ki Doggola: Rwod ot moni oromo wacciwa ni pud girwenyo ngat mo arwenya i ganggi cokcok-ki. En nyo mono pud nen calo ngat ma tye i twoyo cola? Wadi pa lato nyo pud gitye gupong i ot ka kumo? Ka kit meno, ci pe pore me rii i miyo caden. (Latit. 3:1, 7) Waromo nyutu parwa, ka dong wamiye trak, magajin, nyo brocuwa ma rwatte, ci waa mot ki mwolo. Ka dong waromo dok cen ka lime i kare ma opore wek wanywak kwede lok me kwe cwiny mapol ma a ki i Baibul.
3. Ka kare ye, ginacoya mene ma waromo nyutune bot rwod ot ma tye i kumo?
3 I kare mogo, waromo pimone ci wanongo ni watwero loko lok mapol i acakki me rwattewa. Kadi bed ni man pe obedo kare me laro lok i kom tam mogo ma pe tye atir, ento waromo kwano botgi cikke ma Baibul miyo ma dok i kom nicer. (Jon 5:28, 29) Nyo waromo nywako kwedgi ngo ma Baibul waco i kom kit ma jo muto gitye kwede. (Latit. 9:5, 10) Kwano lok kom nicer mo ma kicoyo pire i Baibul bene romo miyo kwe cwiny. (Jon 11:39-44) Gin mukene ma waromo nywakone kwedgi aye lok ma Yubu owaco i kom Jehovah ma nyutu genne i kome. (Yubu 14:14, 15) Ma peya waa, watwero miyo brocuwa me Ngo ma Timme i Komwa ka Wato?, When Someone You Love Dies, nyo trak nyo brocuwa mukene ma rwatte. Nyo waromo weko buk me Baibul Pwonyo, kun wanyutu lok mogo ma nonge i dul me 6, ci waketo yub me dok cen ka medde ki nyamone.
4. Kare mukene ango ma watye kwede me miyo kwe cwiny bot dano?
4 Kare Mukene: Ka ce kitye ka miyo pwony i kom to i Ot me Ker pi yub me yik mo, omyero waniang ka nyo gwok jo ma pe gubedo jo muye bene gibibedo tye iye? Kitwero miyo botgi bukke ma kweyo cwinygi. Jo mogo ma kipangogi apanga ma gitye ki kabedo me yubo kom lyel ki dong tyeko lok me yik gibedo ki yomcwiny me bedo ki bukke ma rwatte me amiya bot luodi ma gurwenyo danogi ma gibino botgi pi nongo konygi. I cawa mukene kwena me to ma kiketo i gajeti akwana yabo yo botwa me coyo lok me kwe cwiny macek bot lupaco ma gitye ka kumo. I nge nongo waraga mo ma kiketo iye trak, laco mo ma dakone onongo oto gucito gin ki nyare i gang pa latit kwena-ni ka gupenye ni: “Wun aye jo ma ocwalla waraga man? Dong, amito ngeyo lok mapol i kom Baibul!” Laco-ni gin ki nyare guye kwano Baibul dok gucako wire i cokke.
5. Pingo omyero wabed ma wangwa twolo me tic ki kare ma onen me kweyo cwiny jo ma kumo?
5 Latitlok 7:2 waco ni: “Bedo ber me cito i ot ka ma dano tye iye ka kumo pi to, kato ma icito i ot ma giyubo iye karama.” Ngat ma tye ka kumo pol kare ye winyo Lok pa Lubanga makato ngat ma tye i kwo me yomcwiny. Wan ducu omyero wabed ma wangwa twolo me neno kare ma tye mupore me kweyo cwiny jo ma gikumo pi to pa danogi me amara.