Kit me Yubbe pi Cokke me Ticwa
1. Cokke me Ticwa kiketo pi tyen lok ango, dok waromo limo adwogi maber ki iye nining?
1 Cokke me Ticwa kiyubo wek ticwa me pwony onyak nyige. Jami ma pigi tego ma kinyamogi i cokke man obedo tito kwena maber me Ker-ri, loko dano me doko lupwonye, ki dok tito pi nino me ngolo kop pa Lubanga ma dong tye cokki. (Mat. 28: 19, 20; Mar. 13:10; 2 Pet. 3:7) Walimo adwogi maber ki i cokke man ma pire tekki ka ce wayubbe maber dok wabedo atera me miyo lagam.
2. Waromo yubbe pi winyo pwony nining?
2 Pwony: Ka ma pwony a ki iye pol kare nongo kinyutu woko i ngec ma kimiyo pi lalok. Iromo wot wiye wiye i pwony ma kimiyo kacel ki ginacoya ma kicimogi, dok bene tam i kom kit ma iromo tic kwede ki ngec man i ticci me pwony.
3. Ngo ma waromo timone me yubbe pi pwony ma kitiyo iye ki lapeny ki lagam?
3 Nyamo Lok ma Kitiyo iye ki Lapeny ki Lagam: Pwony man kibitimone calo pwony me Watchtower, ki cakone ki lok macek ka dok dolo tere ki lok macek. Ngol te lok ma pigi tego i paragraf acel acel, dok bene yubbe me miyo lagam macek cek i komgi.
4. Wan waromo yubbe pi nyamo lok kacel ki lwak nining?
4 Nyamo Lok Kacel ki Lwak: Pwony man kibimiyone calo pwony atir, ento lalok bipenyo lwak me miyo lagamgi. Ka ingolo te lok ma pigi tego kun i kwano ginacoya ma kicimogi, ci ibibedo ki kare me miyo lagam ka ce kipenyo lapeny. Omego ma bimiyo pwony man bitute matek me nyamo lok ma pigi tego ki lwak.
5. Ngo ma bikonyowa me nongo adwogi maber ki i lapor?
5 Lapor: Bute mukene bibedo ki lapor ma nyutu kit ma kitwero tic kwede ki ngec ma kinyamogi-ni i wang ticwa. Bimitte ni luelda, lutit kwena mucwiny nyo painia gunyut lapor meno. Ka itye ka yubbe pi pwony man tam i kom kit ma kibimiyone kwede. Ka kityeko nyutu lapor i kit me miyo buk, tam i kom kit ma iromo ketone kwede i tic i yo ma megi kun i loko yo me pwonyi bot wegi odi mapat pat. Nen ni ibino ki magajin nyo bukke ma kibitic kwede i kare me nyutu lapor. Bedo ber ka wutemo nyutu lapor magi i otyeno ma tye me Worowu macalo Jo me Ot.
6. Omyero wayubbe pi Cokke me Ticwa pi tyen lok ango?
6 Yub me Cokke me Ticwa bedo mit ka wayubbe dok watamo i kom pwony mabeco ma kibimiyogi ma pud peya wacito i cokke. Ka watimo kit meno ci wabibedo ki kero me cuko cwinywa kekenwa. (Rom. 1:11, 12) Ka wakwanyo kare me yubbe pi Cokke me Ticwa, ci wabibedo ma nongo wayubbe maber me cobo tic ma kiminiwa.—2 Tem. 3:17.