Myero Watute Matek me Miyo Pwoc Wabikwero Nipo i April 17
1. Kit pa laco Jabuli ango ma oporre piwa me aluba tutwalle i kare me kwer me Nipo?
1 Pi jami madwong ma Jehovah otimo pi larowa, omiyo laco Jabuli openyo ni: “Abimiyo gin ango bot Rwot [Jehovah] pi gin maber ducu ma en otiyo pira?” (Jab. 116:12) I kare-ni, lutic pa Lubanga gitye ki tyen lok mapol me miyo pwoc. Cencwari mapol i nge coyo lok man, Jehovah omiyo ki dano mic madit loyo—ginkok-ki. Kit ma watye ka yubbe me kwero Nipo me to pa Kricito i April 17, watye ki tyen lok maber me nyutu pwoc.—Kol. 3:15.
2. Watye ki tyen lok ango ma miyo wanyutu pwoc pi ginkok?
2 Mot ma Bino pi Ginkok: Pi ginkok-ki miyo ‘weko balwa’ twere. (Kol. 1:13, 14) Man miyo waworo Jehovah ma cwinywa pe ngoliwa kop. (Ibru 9:13, 14) Watwero bedo agonya dok ki tekcwiny me lok ki Jehovah i lega. (Ibru 4:14-16) Jo ma giketo niyegi i ginkok-ki gitye ki gen me nongo kwo ma pe tum!—Jon 3:16.
3. Watwero nyutu pwocwa pi ginkok nining?
3 Yo ma Wanyutu Kwede Pwocwa: Yo acel ma wanyutu kwede pwoc matut aye me nywako i Kwan me Baibul pi Kare me Nipo nino ducu kacel ki lwodo lok ma iye. Watchtower me Febuari 1, 2011 ma wi lokke tye ni “In Mono Iyubbe pi Nino ma Pire Tek Loyo Ducu i Mwaka?” kiyubo me konyowa me timo man. Watwero bene lok bot Jehovah ki cwinywa ducu i lega pi kit ma watero kwede ginkok calo mic ma pire tek. (1 Tec. 5:17, 18) Ka wabedo tye i kwer me Nipo kun walubo cik pa Yecu nongo wanyutu pwocwa. (1 Kor. 11:24, 25) Medo i kom meno, waromo lubo lanen pa Jehovah ma nyutu mar madit atika-ni ki lwongo dano mapol kit ma watwero me nywako kwedwa.—Ic. 55:1-3.
4. Gin ango ma myero obed mitiwa matek?
4 Lutic pa Jehovah ma ginyutu pwoc pe gibitero Kwer me Nipo macalo cokkewa mo me cabit ki cabit. Yub man obedo cokke ma pud dong pire tek loyo i mwaka! Kit macalo Nipo tye ka bino-ni, myero wabed ki miti me dongo ki nyutu pwocwa calo laco Jabuli ma owaco ni: ‘Pwo Jehovah, Ai kwona, wii pe omyero owil i kom mot ducu mabeco ma en omiyi.’—Jab. 103:2.