Wek Kodi Odong Maber Myero Kiony Pii i Tere

1. Gin ango ma myero waony iye pii wek odong?

¹ Kodi ma kipito i poto myero kiony pii i tere wek odong. Man rom aroma ki kodi me ada ma kipito i cwiny dano me wang ticwa. (1 Kor. 3:6) Dok cen ka lim rom aroma ki onyo pii i te kodi, dok watiyo ki Lok pa Lubanga wek gumok matek dok gudong i ada.

2. Waromo yubbe me konyo rwod ot wek onyam lok ka wadok cen ka lim nining?

² Peny Lapeny: Ka watye ka yubo pwonywa, myero wayub bene lapeny ma tugo miti ma wabigamone ka wadok cen ka lim. Peny lapeny man ka wutye ka dolo te lokwu i rwattewu mukwongo, dok iket yub me dok cen ka lim. Jo mapol gunongo ni tic ki ngec ma tye i buk me Baibul Pwonyo okonyogi me cako kwan ki dano.

3. Jami ango ma itwero coyogi piny ka itye ka coyo gin mutimme i lim mukwongo?

³ Gwok Rekod: I nge weko ot pa ngat moni, co rekod cutcut. Co nying dano-nu, ki nying kabedone. Bedo ber bene ka icoyo nino dwe ki cawa ma iloko kwede, gin ma wuloko, ki buk mo ma iweko bote. Mono en otito pi dinine? En tye ki jo me ode? Tika oloko i kom mitine ki par-re? Ngec ma kit meno bikonyi me yubo lok mupore ma wubinyamo nino ma idok ka limme. Co piny bene nino ma wumoko me dok iye ki lapeny ma wubinyamo.

4. Pingo myero wadi cwinywa ma wadok cen bot jo ma gunyuto miti?

⁴ Di Cwinyi: Catan pe bijuko tutene me “kwanyo lok” ma kicoyo i cwiny ngat moni woko. (Mar. 4:14, 15) Pi meno, pe omyero i il cingi woko ka i nge dok cen pe inongo ngat ma onyuto miti-ni. Mono itwero cwalo waraga bote nyo coyo coc mo manok ci iweko i te doggolane? Painia mo acel onongo ocako kwan ki dako mo ki i nyim doggola-ne ento lacen pe obedo ka nonge paco, ci ocoyo waraga bote. I kare ma painia-ni ononge paco, dakoni cwinye obedo yom mada pi miti ma kinyutu i kome. Ka watye ka onyo pii i te kodi me ada, wanongo yomcwiny ma bino pi neno ka gidongo maber, gitegi, ki dong “ginyako nyiggi mukene pyeradek, mukene pyerabicel, mukene miya.”—Mar. 4:20.