Nong Yomcwiny i Tic ma Itiyo
1. Mit komwa twero balle woko ki i tic me pwony nining?
1 Kicweyo dano wek “onong yomcwiny i tic ma en tiyo.” (Latit. 2:24) Ento ka pe waneno adwogi mabeco ki i ticwa me pwony, tur cwiny twero gengowa ki bedo ma cwinywa yom dok balo mit komwa woko. Ngo ma twero konyowa ki medde ki neno matir?
2. Pingo myero wabed ki neno mupore i kom kit ma dano dok kwede i kom kwena ma watero botgi?
2 Bed ki Neno Mupore: Wi myero opo ni kadi bed jo ma guye lwongo pa Yecu gubedo nok, ento Yecu ocobo ticce me pwony maber. (Jon 17:4) I carolok ma Yecu oloko i kom laco kodi, en otito ni pol pa dano pe gibijolo kwena me Ker-ri, ma kiporo ki kodi-ni. (Mat. 13:3-8, 18-22) Ento meno pe juko tutewa me cobo tic mapol.
3. Watwero “nyako nyig” kadi bed dano manok keken aye guye lokwa nining?
3 Kit ma Wanyako Nyig Mapol: Ma lubbe ki lapor pa Yecu-ni, jo ma giye kwena me Ker-ri ‘ginyako nyig.’ (Mat. 13:23) Ka kal otwi ci oteggi, nyige manyak pe bedo kal ma twi atwiya, ento nyako nyige manyen. Pi man nyig manyak pi tic pa Lakricitayo-ni pe obedo latit kwena manyen, ento obedo tito kwena me Ker-ri bot jo mapol. Man kelo “yomcwiny” ki yengo kadi bed dano guye lokwa nyo pe guye. Watye ka nywako i tic me lonyo nying Jehovah wek obed maleng. (Ic. 43:10-12; Mat. 6:9) Watye ka nongo yomcwiny pi mot me bedo lutic kacel ki Lubanga. (1 Kor. 3:9) “Pwoc ma wamiyo ki dogwa” obedo nyig ma yomo cwiny Jehovah.—Ibru 13:15, 16.
4. Adwogi ango ma pe watwero ngeyone, ma romo bino ki i ticwa me pwony?
4 Medo i kom meno, i kare mukene ticwa twero bedo ki adwogi maber ento pe waneno. Twero bedo ni jo mogo ma guwinyo lok pa Yecu pe gudoko lupwonnyene cutcut nio ka en ocobo ticce me pwony i lobo. Rom aroma bene ki coyo kodi me Ker ma wacoyo-ni, pe oromo rwako lwite i cwiny dano cutcut, ento lacen en twero doko latit kwena ma nongo pe wangeyo. Adada, ticwa me pwony-nyi tye ki adwogi mabeco mapol. Pi meno omyero wamedde ki “nyako nyig” kun wanyuto ka maleng ni wan aye lupwonnye pa Yecu.—Jon 15:8.