Ti ki Kabedowa me Intanet me Pwonyo Lutinoni
1. Pingo kiyubo ka ma wi lokke tye ni “Lutino” (“Children”) i Kabedowa me Intanet?
1 Kabedowa me Intanet me jw.org, kiyubo pi dano ma mwakagi patpat. Kabedowa me Intanet tye ki ka ma wi lokke wacci “Lutino” (“Children”), [me nongone cit i Pwony me Baibul > Lutino (Bible Teachings > Children)] ma konyo lutino matino ki lunyodogi me dongo watgi ki Jehovah kacel ki jo me odigi. (Nwo. 6:6, 7) Itwero tic ki kabedo man me pwonyo lutinoni nining?
2. I yo ma nining ma itwero yero kwede ngec ma rwatte ki mwaka pa latinni?
2 Lok Pwony-nyi ma Lubbe ki Miti pa Latinni: Latin acel acel tye ki miti mapat pat. (1 Kor. 13:11) I yo ma nining ma itwero yero kwede ngec ma rwatte ki mwaka pa latinni? Penye kekeni ni: ‘Ngo ma twero tugo miti pa lutinona? Dok gibiniang maber nining? Gitwero keto tamgi i pwony pi kare ma romene?’ Pi lutino ma gitye ki mwaka adek dwogo kwede piny, waromo nyamo kwedgi ododo ma tye i te wi lok me “Pwonya me Baibul” (“My Bible Lessons”) i Kabedowa me Intanet. Jo me ot mukene ginongo mit pa ododo me Baibul i te wi lok me “Pwony Lutinoni” (“Teach Your Children”). Iromo bene tic ki yo magi.
3. Lunyodo gitwero tic ki ododo kacel ki jami me atima ma nonge i te wi lok me “Gin me Atima i Woro pi Jo me Ot” (“Family Worship Projects”) nining?
3 Gin me Atima i Woro pi Jo me Ot: Jami magi tye calo gin tic ma konyo wegi odi wek gukwan ki lutinogi. Gwel ka ma wacci “Kwany” (“Download”), ci ikwan “Ngec pi Lunyodo” (“Parents’ Guide”) pi gin me atima acel acel, pi nongo ngec i kit me tic ki ododo ki jami me atima. Ti ki cal, me laporre cal ma myero lutino guwer, me pwonyo lutino matino. Kony lutino madito me cobo jami me akwana. Jami ducu me atima gia ki i ododo nyo pwony acel moni me Baibul, wek lutino ma mwakagi patpat gunywak i woro pi jo me ot kacel.
4. Ngo ma twero nonge ka ma wi lokke tye ni “Dok Larem Jehovah” (“Become Jehovah’s Friend”)?
4 Dok Larem Jehovah: Vidio, wer, ki jami mogo ma tye i bute man me Kabedowa me Intanet konyo lunyodo me dongo Lok pa Lubanga i cwiny lutinogi. (Deut. 31:12) Vidio me katun acel acel tye ki pwony ma pire tek. Jami me atima calo tuko me yenyo jami mogo ma i cal, nyuto ni pwony magi pigi tego. Kit macalo lutino gimaro wer—dok wer konyogi me po i gin ma gupwonyo—wer me Ker ki wer ma kicoyo tutwalle pi lutino kiketo i kabedo acel meno kare ki kare.
5. Pingo mitte ni lunyodo gupeny pi kony pa Jehovah pi pwonyo lutinogi lok me ada?
5 Lunyodo, Jehovah mito ni wucob ticwu macalo mego ki wego maber. Peny Jehovah wek okonyi ki pwonyo lutino-ni ki lok ada. (Lungol. 13:8) Ki cwak pa Jehovah, itwero pwonyo lutinoni wek gunong ‘ryeko ma terogi i larre pi ye i kom Yecu Kricito.’—2 Tem. 3:15; Car. 4:1-4.