Kit me Cako Lok

Kit me Poko Karatac me Lwongo pi Nipo

“Watye ka poko karatac me lwongo pi yub mo ma pire tek adada. I nino dwe 14 me April, dano milion mapol i twok lobo ducu gibicokke kacel pi kwero Nipo me to pa Yecu Kricito, ki me winyo pwony me Baibul labongo cul mo. Pwony meno bilok i kom kit ma tone konyowa kwede. Karatac me lwongo man nyuto cawa ki kabedo ma yub man bitimme iye.”

Wi Lubele April 1

“Watye ka limowu me lok i kom gin mo ma kwako pol pa dano. Cokcok dano ducu, kadi bed dinigi patpat, gilego. Itamo ni Lubanga mono gamo legawa, kece lega obedo mere yo me kweyo cwinywa i kom pekkiwa keken? [Mine kare wek ogam.] Nen kong gin ma Baibul waco i kom lega. [Kwan 1 Jon 5:14.] Magajin man tito kit ma lega konyowa kwede.”

Awake! April

“Watye ka limowu me lok i kom peko mo ma dong onya i kin piny adada i kare-ni. Kwo matek ma jo mukene kato ki iye weko cwinygi tur adada ma gitamo ni myero gineke kengi. Ka ngat moni cwinye otur kit meno, itamo ni en nongo mito to ada, nyo mono mito ywe ki i can aye? [Mine kare wek ogam.] Cikke me Baibul man dong okonyo jo mapol me bedo ki neno matir. [Kwan Niyabo 21:3, 4.] Magajin man tito tyen lok adek ma pire tek mumiyo dano mo keken myero omedde ki kwo kadi bed tye ki peko i kare-ni.”