Dongo Dirowa i Tic me Pwony—Nyuto Kit me Kwano Baibul Kun Watiyo ki Buk me Baibul Pwonyo

Gin Mumiyo Pire Tek: Jo mapol pe giniang ka wawaccigi ni wakwano Baibul ki dano labongo cul mo. Giromo tamo ni meno bimiyo gidonyo i gurup mo me kwano Baibul nyo kwan mo ma kikubbe kwedgi ki ka mabor. Me ka waco mere keken ni wakwano ki dano, pingo pe inyut botgi kit ma kwanne bedo kwede? I dakika manok keken, kadi bed wutye i nyim doggola pa ngat meno, iromo nyuto bote kit ma kwano Baibul obedo gin mayot dok ma yabo wange.

Kit me Timone:

I nge tite bot rwod ot, penye ka en tye ki par i kom kwo me anyim.
Wac bote ni jo mapol bene gitye ki par ma kit meno, dok inyute lok ma tye i buk me Baibul Pwonyo. Tit bote ni buk man tye ki pwony ma niang iye yot ma nyuto gin ma Baibul pwonyo i kom kwo me anyim ki wi lok mukene, ci iwek en oyer dul ma cwinye omito.
Mi bote kopi me buk man, ci iyab dul ma en oyero-ni. Tit bote ni lapeny ma tye i acakki me dul meno kigamogi i paragraf me dul meno.
Peny rwod ot wek okwan paragraf mukwongo, ka oye. Ci ikwan lapeny me paragraf meno, dok wunyam lagamme kacel. Wuyab dok wunyam ginacoya ma kubbe ki lagam. Nyute kit ma ingolo kwede te lagam i bukki.
Wunyam paragraf ma lubo meno, ento itwero penyo rwod ot me temo miyo lagamme kun pe kwano akwana.
Pwoye ci wuyub awene ma ibidok iye ka tyeko dul meno.
Ka opore, nyut bote vidio me jw.org ma wi lokke tye ni What Happens at a Bible Study?

Tem Timo Kit Man i Dwe-ni:

Leg bot Jehovah wek ogo laa i kom tuteni me nongo latin kwan me Baibul manyen.—Pil. 2:13.
Tem nyuto kit me kwano Baibul kun itiyo ki buk me Baibul Pwonyo, nyo nyut vidio ma wi lokke tye ni What Happens at a Bible Study? olo kicel ka itye i tic me pwony.