Kit me Tic ki Jami ma Kimako i Dwan
1. Medo i kom jami akwana, ngo mabeco mukene ma watye kwede?
1 Jo mapol dong gitye ka nongo mit pa tic ki jw.org me kwano lok me ada ma yomo cwiny dano dok ma tye atir. (Latit. 12:10) Ento, tika dong itemo tic ki jami ma kimako i dwan? Man twero bedo me kony ka wamito winyo jami mapol ma nonge i kabedowa me Intanet. I yo ango ma jami ma kimako i dwan twero konyowa kwede?
2. I yo ango ma waromo tic ki jami ma kimako i dwan pi kwan piwa kenwa nyo woro pi jo me ot?
2 Pi Kwan Piwa Kenwa nyo Woro pi Jo me Ot: Winyo dwan ma kimako me Baibul, magajin, nyo bukkewa ka watye i cafari nyo ka timo tic mogo ma paco konyowa me tic maber ki cawawa. (Ep. 5:15, 16) Waromo weko worowa pi jo me ot bedo mamit ka wawinyo jami ma kimako i dwan kun walubo kwanne ki i buk. Bedo ka winyo jami ma kimako i dwan i kare me kwanwa piwa kenwa konyowa ka wamito dongo rwom me kwanwa nyo pwonyo leb manyen.
3. Angagi ki i wang ticwa ma gitwero nongo adwogi maber ki jami ma kimako i dwan?
3 Pi Ticwa me Pwony: Dano ma i wang ticwa ma gitamo ni pe gitye ki cawa me kwan giromo ye winyo jami ma kimako i dwan. Nyo waromo rwatte ki jo ma giloko leb mukene ma giromo bedo ki miti me winyo lok me kwena me Ker-ri “i leb tugi kikome.” (Tic 2:6-8) I kabedo mukene winyo lok obedo kit me tekwarogi. Me labolle, i kaka pa Hmong ma gia ki i lobo China, dano gitito jami ma kwako tekwarogi bot yalwak ma anyim macalo ododo, dok wigi pe wil i kom jami magi. I lobo Afrika bene, kaki mapol gitiyo ki ododo me miyo pwony.
4. Lapeny ango ma waromo penye kwede ka wamito konyo jo me wang ticwa?
4 I wang ticwu, mono itwero nongo adwogi maber ka ituko jami ma kimako i dwan i leb pa rwod ot? Tika tye ngat mo ma romo nongo adwogi maber ki i buk ma kimako i dwan ka wacwalo bote i e-mail? Mono watwero kwanyo buk ma kimako i dwan ci wakobo i CD ka dong wamiyo bot rwod ot ma onyuto miti, kacel ki buk meno kikome? Bukke, brocuwa, magajin nyo trak ducu ma wakwanyo ki i Intanet, ma wamiyo bot dano i ticwa me pwony myero wakwan. Jami ma kimako i dwan kiyubo piwa pi kwan piwa kenwa ki me pito kodi me ada me Ker-ri.—1 Kor. 3:6.