PWONY ME ANYAMA ME 41
Kit me Konyo Latin Kwan me Baibul me Dongo Nio wa i Batija—Bute me Acel
“Dong wutyeko nyuto ka maleng ni wun wubedo waraga ma oa ki bot Kricito, ma wan wakelo.”—2 KOR. 3:3.
WER 78 “Pwonyo Lok pa Lubanga”
GIN MA WABINYAMOa
Tika tye gin mo ma yomo cwiny jo ducu me kacokke ma loyo neno ka latin kwan me Baibul ma gimaro onongo batija? (Nen paragraf 1)
1. I yo ma nining ma 2 Jo Korint 3:1-3 konyowa kwede me bedo ki pwoc pi mot me kwano Baibul ki dano nio wa i batija? (Nen cal ma tye i pok ngeye.)
IWINYO nining me neno ka latin kwan me Baibul ma oa ki i wang tic pa kacokkewu onongo batija? Labongo akalakala mo, man weko ibedo ki yomcwiny. (Mat. 28:19) Dok ka in aye ikwano ki latit kwena manyen-ni, ibedo ki yomcwiny makato me neno ka en nongo batija! (1 Tec. 2:19, 20) Lutit kwena magi ma gunongo batija nyen-ni gin kikomgi aye ‘gubedo waraga me pakowa,’ pe pi jo ma gukwano kwedgi keken ento pi kacokke ducu.—Kwan 2 Jo Korint 3:1-3.
2. (a) Lapeny ma pire tek ango ma omyero wanyam, dok pingo? (b) Anga ma obedo latin kwan me Baibul? (Nen lok ma i tere piny.)
2 Pud dong tye me yomcwiny me neno ni pi mwaki angwen mukato-ni, wel lutino kwanb ma kikwano kwedgi Baibul dwe ki dwe i wi lobo-ni ducu romo 10,000,000 kulu. Dok i mwaki angwen magi ducu, dano ma romo 280,000 gunongo batija mwaka ki mwaka macalo Lucaden pa Jehovah dok gudoko lulub kor Yecu Kricito manyen. Watwero konyo lutino kwan me Baibul milion mapol magi nining wek gunong batija? Kit macalo Jehovah pud tye ka diyo cwinye kun miyo kare ki dano me doko lupwonnye pa Kricito, wamito ni watim jami ducu ma watwero me konyogi wek gudong nio wa i nongo batija. Kare dong odic woko!—1 Kor. 7:29a; 1 Pet. 4:7.
3. Ngo ma wabinyamo i pwony man madok i kom kwano Baibul ki lutino kwanwa?
3 Kit macalo pire tek adada me loko dano i kare-ni, Lukiko Madit gupenyo jang gang kal mapatpat gin ango ma watwero timo wek wakony lutino kwanwa me Baibul me dongo nio wa i batija. I pwony man ki ma lubo, wabineno gin ma waromo pwonyo ki bot lupainia, lumiconari, ki luneno me adwol ma gitye ki ngec.c (Car. 11:14; 15:22) Gutito gin ma lupwonye me Baibul kacel ki lutino kwangi giromo timone wek kwangi onyak nyige. I pwony man, wabinyamo jami abic ma lutino kwan ducu myero gutim wek gudong nio wa i batija.
WUKWAN CABIT DUCU
Peny latin kwan ka wutwero bedo piny ka nyamo lok me Baibul (Nen paragraf 4-6)
4. Gin ango ma omyero waniang iye ka odok i kom kwano Baibul ki dano ki i nyim doggolagi?
4 Omegiwa ki lumegiwa mapol gitye ka kwano Baibul ki dano pi dakika manok nok, mogo bene ki i nyim doggola pa rwod ot. Kadi bed man obedo yo maber me dongo miti pa dano i kom Baibul, kodi nyamo lok meno pol kare bedo macek tutwal dok i cabit mogo gikeng kwan woko. Me medde ki dongo miti pa ngat meno, omege ki lumege mogo gipenyo pi namba cimme ci gibedo ka goyo cim nyo cwalo mecej bote me nywako kwede lok mogo macego cego me Baibul. Nywako lok ma kit meno twero medde pi dwe mapol labongo rwod ot meno doko latin kwan me Baibul ma twero dongo. Ento, tika latin kwan meno bidongo nio wa i dyero kwone ki nongo batija ka en pe jalo cawa ki kero muromo pi kwano Lok pa Lubanga? Ngene kene ni pe.
5. Ngo ma Yecu owaco i Luka 14:27-33 ma watwero tic kwede me konyo lutino kwanwa me Baibul?
5 I nino mo acel, Yecu omiyo labol me tito gin ma mitte me doko lapwonnyene. En oloko i kom ngat ma mito gero ot ma wiye bor ki kabaka ma mito cito i lweny. Yecu owaco ni ngat ma mito gedo omyero kong ‘obed piny ka kwano wel lim ma mitte’ me tyeko gero ot ma wiye bor dok kabaka meno myero ‘kong obed piny ka poro lok’ me neno ka ce wel monnye twero cobo tic ma gimito cobone. (Kwan Luka 14:27-33.) I yo acel-lu bene, Yecu onongo ngeyo ni ngat ma mito doko lapwonnyene myero ongi ki diro gin ma myero en otim wek olub kore. Pi tyen lok meno, mitte ni wacuk cwiny lutino kwanwa me Baibul me kwan kwedwa cabit ducu. Watwero timo meno nining?
6. Ngo ma watwero tute me timone wek latin kwanwa odong?
6 Cak ki medo kare ma wutero ka kwan. Gwok nyo wutwero nyamo wang Baibul makato acel kare ducu ka icito ka limme. Ka rwod ot dong ongi ki kwan pi cawa malac, penye ka ce tye ka mo ma wutwero bedo iye wek wumedde ki kwanwu. Lagamme binyuto ka ce en tero kwanne me Baibul calo gin ma pire tek. Lacen, me konyo latin kwanni wek odong oyotoyot, itwero penye ka en tye atera me kwan kiryo cabit ducu. Ento, myero wutim gin makato kwano Baibul kicel nyo kiryo cabit ducu.
YUBBE PI KWANWU KARE DUCU
Yubbe maber pi kwanwu ducu, dok inyut ki latin kwanni kit me yubbe (Nen paragraf 7-9)
7. Lapwony twero yubbe maber nining pi kwan ki latin kwanne kare ducu?
7 Macalo lapwony, myero iyubbe maber adada pi kwanwu me Baibul kare ducu. Iromo cakone ki kwano pwony ma wubinyamo kacel ki ginacoya ma tye iye. Ket lok ma pire tek ma i pwony man i wi. Tam i kom wi lok madit me pwony meno, wi lok matino, lapeny, ginacoya ma kiketo ni “kwan,” cal, ki vidio mogo ma twero konyo me tito pwony meno. I nge meno, tam i kom latin kwanni ki kit ma ibitite kwede ngec meno i yo ma niang iye yot wek en oket i tic i kwone.—Nek. 8:8; Car. 15:28a.
8. Lok pa lakwena Paulo ma kicoyo i Jo Kolocai 1:9, 10 pwonyowa gin ango ka odok i kom lega pi lutino kwanwa me Baibul?
8 Ka itye ka yubbe, leg bot Jehovah pi latin kwanni ki jami ma en mito. Peny Jehovah wek okonyi me miyo pwonyi kun itiyo ki Baibul i yo ma gudo cwiny latin kwanni. (Kwan Jo Kolocai 1:9, 10.) Pennye kekeni ka ce tye pwony mogo ma twero bedo tek pi latin kwanni me niang iye nyo ma en twero kwerone woko. Wi myero opo ni yubbi tye me konye wek odong nio wa i batija.
9. Lapwony twero konyo latin kwanne nining me yubbe pi kwanne? Tit kong.
9 Watye ki gen ni ka latin kwan me Baibul kwano kare ki kare, man bikonye me bedo ki pwoc pi jami ducu ma Jehovah ki Yecu gutimo dok bibedo ki miti me pwonyo jami mapol. (Mat. 5:3, 6) Ento, wek en onong adwogi maber ki i kwanne, latin kwan myero oket cwinye i kom gin ma en tye ka pwonyone. Me konye timo meno, tite kit ma pire tek kwede me yubbe pi kwanne ducu, kun kwano ka ma wubinyamo con dok lwodo kit ma pwony meno gude kwede. In macalo lapwony, itwero konye nining me yubbe? Yub pwony acel mo kacel ki latin kwanni me nyutte kit me timone.d Tite kit me nongo lagam pi lapeny ma tye, dok inyute ni ngolo te lok ma pigi tego bikonye wek wiye opo i kom lagam. I nge meno, penye ni omi lagam kun pe kwano akwana. Ka en otimo meno, ci ibingeyo ka ce en oniang lok ma wutye ka nyamo-ni. Ento tye dok gin mukene ma iromo cuko cwiny latin kwanni me timone.
PWONY LATIN KWAN ME KUBBE KI JEHOVAH NINO DUCU
Pwony latin kwanni me Baibul kit me lok ki Jehovah (Nen paragraf 10-11)
10. Pingo pire tek me kwano Baibul nino ducu, dok ngo ma myero latin kwan otim wek onong adwogi maber ki i kwanne me Baibul pire kene?
10 Medo i kom kwan ki lapwonye, latin kwan bene nongo adwogi maber ka en timo jami mukene pire kene nino ducu. Mitte ni en obed ka kubbe ki Jehovah. I yo ma nining? En timo man ki winyo Jehovah kun bene loko kwede. En twero winyo Lubanga ki kwano Baibul nino ducu. (Yoc. 1:8; Jab. 1:1-3) Nyutte kit me tic ki “Yub me Kwano Baibul” ma kiketo i jw.org.e Ngene kene ni, wek ikonye me nongo adwogi maber ki i kwanne me Baibul, myero icuk cwinye me lwodo lok i kom gin ma en tye ka pwonyo ki i Baibul i kom Jehovah ki dok kit ma en twero keto kwede pwony meno i tic i kwone.—Tic 17:11; Yak. 1:25.
11. Latin kwan twero pwonnye me lega maber nining, dok pingo pire tek ni en oleg bot Jehovah nino ducu?
11 Cuk cwiny latin kwanni me lok ki Jehovah i lega nino ducu. Leg lega ma a ki i cwinyi ka itye ka cako kwanwu ki dok i agikkine, kun ilego pi latin kwanni. Ka en woto ki winyo legani, en bipwonyo kit me lego lega ma a ki i cwinye kun lego bot Lubanga Jehovah i nying Yecu Kricito. (Mat. 6:9; Jon 15:16) Go kong kit ma kwano Baibul nino ducu (winyo Jehovah) ki lega (lok ki Jehovah) bikonyo kwede latin kwanni me nyikke cok ki Lubanga! (Yak. 4:8) Ka en timo meno nino ducu, ci bikonye me dongo nio wa i dyere ki nongo batija. Ngo mukene ma bikonye?
KONYE ME MAKO LIREM MACOK KI JEHOVAH
12. Lapwony twero konyo latin kwanne nining me dongo wat macok ki Jehovah?
12 Gin ma latin kwan pwonyo ki i kwanne me Baibul pe myero ogak i wiye keken ento bene ogud cwinye. Pingo? Pien cwinywa—ma kwako bene mitiwa ki kit ma wawinyo kwede—aye weko watimo jami. Yecu opwonyo dano jami mapol dok onongo gimaro nongo pwony ki bote. Ento dano gulube pien pwonye bene onongo gudo cwinygi. (Luka 24:15, 27, 32) Latin kwanni myero onen Jehovah macalo Ngat ma tye ada, ma en twero mako kwede lirem, kun nene macalo Wonne, Lubangane, ki Lareme. (Jab. 25:4, 5) I kare me kwanwu me Baibul, tir tam pa latin kwanni i kom kit mabeco ma Lubangawa tye kwede. (Nia 34:5, 6; 1 Pet. 5:6, 7) Labongo paro pi pwony ma wutye ka nyamone, konye me keto cwinye i kom kit dano ma Jehovah obedo. Kony latin kwan me bedo ki pwoc pi kit mabeco pa Jehovah—calo marre ki kicane. Yecu otito ni “cik madit dok mukwongo” aye me ‘maro Jehovah Lubangani.’ (Mat. 22:37, 38) Tute me dongo mar pi Lubanga i cwiny latin kwanni.
13. Mi labol i kom kit me konyo latin kwan wek opwony lok i kom kit pa Jehovah.
13 I lokki ki latin kwanni, tite pingo imaro Jehovah. Man twero konyo latin kwanni me niang ni omyero en odong watte pire kene ki Lubanga. (Jab. 73:28) Me labolle, tika tye lok mo nyo wang Baibul mo i buk kwanwu ma nyuto gin mo i kom Jehovah—calo marre, ryekone, ngolo kop atir, nyo tekone—ma ogudo cwinyi? Nywak meno ki latin kwanni, dok iwek en onge ni man tyen lok acel ma oweko in imaro Wonwa me polo. Tye dok gin mukene ma lutino kwan me Baibul ducu myero gutim wek gudong nio wa i batija.
CUK CWINYE ME BEDO KA WOT I COKKE
Cuk cwiny latin kwanni me cako wot i cokke cutcut ka twere! (Nen paragraf 14-15)
14. Ngo ma Jo Ibru 10:24, 25 tittiwa i kom cokke ma twero konyo latin kwan me dongo?
14 Wan ducu wamito ni lutino kwanwa gudong nio wa i batija. Yo acel ma pire tek ma watwero konyogi kwede aye ki cuko cwinygi me cito i cokke. Lupwonye ma ludiro giwaco ni lutino kwan ma gicako cito i cokke cutcut gidongo oyotoyot. (Jab. 111:1) Lupwonye mogo gitito bot lutino kwangi ni gibinongo nucu pa pwonygi me Baibul ki i kwangi ki nucune ginongo ki i cokke. Kwan Jo Ibru 10:24, 25 kacel ki latin kwanni, dok ititte adwogi maber ma en binongo ka obino i cokke. Nyute vidio ma wiye tye ni Ngo ma Timme i Ot me Ker?f Kony latin kwanni wek olok wot i cokke cabit ki cabit odok gin ma pire tek i kwone.
15. Ngo ma waromo timone me cuko cwiny latin kwan wek obed ka wot i cokke kare ki kare?
15 Ngo ma itwero timone ka latin kwanni peya oo i cokke mo nyo cito i cokke kicel kicel? Ki mit kom, nywak kwede gin mo ma ipwonyo cokcok-ki ki i cokke. Meno twero tugo cwinye me cito i cokke makato lwonge alwonga. Mi bote Wi Lubele nyo Yub me Cokke me Kwowa ki Ticwa ma kitye ka nyamone i cokke. Nyutte gin ma kibinyamo i cokke me cabit ma lubo, dok ipenye bute mene ma en tye ki miti me niang iye. Gin ma latin kwanni bineno dok biwinyo i cokke mukwongo ma en ocito iye bigudo cwinye makato gin mo keken ma en oneno dok owinyo i cokke pa dini mukene-ni ducu. (1 Kor. 14:24, 25) En birwatte ki jo mukene ma en twero poro lanengi maber dok ma gibikonye me dongo nio wa i batija.
16. Gin ango ma mitte me kwano Baibul ki dano i yo ma weko gidongo nio wa i batija, dok ngo ma wabinyamo i pwony ma lubo man?
16 I yo ma nining ma watwero kwan ki lutino kwanwa me Baibul wek gudong nio wa i batija? Watwero konyo latin kwan me neno kit ma kwanne pire tek kwede ki cuko cwinye me bedo ka kwan cabit ducu kun bene yubbe pi kwanne kare ducu. Mitte bene ni wacuk cwinye me kubbe ki Jehovah nino ducu ki me dongo wat macok Kwede. Wamito ni wacuk cwiny latin kwanwa me bedo ka wot i cokke. (Nen bok ma i pot karatac 12 ma wiye tye ni “Gin ma Lutino Kwan Myero Gutim Wek Gudong Nio wa i Batija.”) Ento, kit ma pwony ma lubo man bititone kwede, tye jami abic mukene ma lupwonye me Baibul gitwero timo me konyo lutino kwangi me dongo nio wa i batija.
WER 76 In Iwinyo Nining?
a Pwonyo ngat moni gin mo, te lokke ni ikonye me “tam, winyo, nyo timo jami i yo manyen nyo mapat.” Ginacoyawa pi mwaka 2020, Matayo 28:19, opoyo wiwa i kom kit ma pire tek kwede me kwano Baibul ki dano ki dok pwonyogi me doko lulub kor Yecu Kricito ma gunongo batija. I pwony man ki ma lubo, wabineno kit ma watwero dongo kwede dirowa i tiyo tic ma pire tek man.
b LOK MA KITITO TERE: Iromo lwongo ngat moni ni latin kwan me Baibul ka inyamo lok me Baibul kwede kare ki kare, dok kwanwu woto kore ki kore. Itwero cako kwano ngat moni ni latin kwan ka dong ikwano kwede tyen aryo i nge nyute yubwa me kwano Baibul ki dano, dok bene ka itye ki gen ni kwanwu bimedde.
c Pwony aryo-ni bene tye ki tam ma kikwanyo ki i pwony ma lubbe aluba ma wiye tye ni “Kwano Baibul ki Lutino Kwan i Yo ma Weko Gidongo” ma obedo ka kati i Ticwa Me Ker cakke i Julai 2004 me o i Mai 2005.
d Nen vidio me dakika angwen ma wi lokke tye ni Kit me Pwonyo Lutino Kwanwa me Yubbe. I JW Library®, cit i MEDIA > OUR MEETINGS AND MINISTRY > IMPROVING OUR SKILLS.
e Cit i BIBLE TEACHINGS > BIBLE STUDY TOOLS
f I JW Library®, cit i MEDIA > OUR MEETINGS AND MINISTRY > TOOLS FOR THE MINISTRY.