Kit me Lweny ki Par

PAR twero bedo calo yec mapek ma nurowa. (Car. 12:25) Tika nino mo iwinyo ni keroni otum woko pi par? Tika i kare mogo iwinyo calo pe itwero kanyone? Ka tye kit meno, ci pe itye keni. Jo mapol i kinwa dong gubedo ki par dok cwinygi otur pi tyen lok mapatpat. Me labolle, jo mogo gitye ka gwoko watgi mo ma kome lit, mogo gurwenyo danogi me amara i to, dok mukene gitye ka deno can pi peko ma poto atura. Ento ngo ma twero konyowa me kanyo par ma watye kwede?a

Watwero nongo pwony mapol i kom kit me lweny ki par ka wangiyo labol pa Kabaka Daudi. En okato ki i pekki madongo i kwone, kun bene i kare mogo okemme ki to. (1 Cam. 17:34, 35; 18:10, 11) Daudi obedo ki kero me lweny ki par nining? Watwero lubo lanenne nining?

KIT MA DAUDI OLWENYO KWEDE KI PAR

Daudi okato ki i pekki mapatpat lawang acel. Me labolle, nen kong gin mutimme i kare ma en tye ka ngwec me laro kwone ki i cing Kabaka Caulo ma mito neke woko. I nino mo ma Daudi ki jone gudwogo cen ki i dog lweny, gubedo ki ur me niang ni lumonegi guyako jamigi, guwango gangigi dok gumako mongi ki lutinogi woko. Daudi odok iye nining? Baibul wacciwa ni Daudi ki jone, “Gucako wo ki koko, nio ka tek me koko otum woko.” Medo i kom par pa Daudi, jone ma en genogi “gubedo ka lok pi cele woko ki got.” (1 Cam. 30:1-6) Daudi onongo dong tye ka kemme ki pekki adek mapatpat lawang acel: Jo gange onongo kwogi tye ka mading, en onongo tye ki lworo ni lumonye gibineke woko, dok bene Kabaka Caulo onongo pud tye ka yenye me aneka. Go kong par madit ma Daudi obedo kwede ya!

Gin ango ma Daudi otimo i nge meno? Cutcut “Daudi olimo tekcwiny ki bot Rwot [Jehovah] Lubangane.” Daudi otimo man nining? Wangeyo ni Daudi onongo kare ducu lego bot Jehovah pi kony dok kwanyo kare me tam i kom kit ma Jehovah okonye kwede i kare mukato angec. (1 Cam. 17:37; Jab. 18:2, 6) Daudi oniang ni mitte tutwal ni epeny tira ki bot Jehovah i kom ngo ma myero etim. I nge Daudi nongo tira ki bot Jehovah, en olubo tira meno cutcut. Macalo adwogine, Jehovah ogoyo laane i kom en kacel ki jone, oweko gularo jo me gangigi kacel ki jamigi ma kiyako. (1 Cam. 30:7-9, 18, 19) Tika ineno jami adek ma Daudi otimo? En olego bot Jehovah pi kony, otamo matut i kom kit ma Jehovah okonye kwede i kare ma kato angec, dok olubo tira pa Jehovah. Watwero lubo lanen pa Daudi nining? Nen kong yo adek mapatpat.

LUB LANEN PA DAUDI KA ITYE KI PAR

1. Legi. I cawa mo keken ka wacako winyo ni par onurowa woko, watwero lega bot Jehovah pi kony ki ryeko. Twero weko wawinyo maber ka watito ki Jehovah jami ducu ma tye ka keliwa par. Nyo watwero waco lega mo macek lalingling ka meno aye gin ma twere i cawa meno. Ka walego kony ki bot Jehovah, wanyuto ni wagene kit ma Daudi otimo kwede, i kare ma owaco ni: “Rwot [Jehovah] aye gotta, en cel gogona matek, en lalarra; en Lubangana, ki gotta, aringo alaro bote.” (Jab. 18:2) Lega tika ada tiyo? Laminwa mo ma nyinge Kahlia ma tye lapainia owaco ni: “I nge lega, awinyo ni atye ki kuc. Lega bene konya me tam kit ma Jehovah tamo kwede ki me genne matek.” Ada, lega obedo gin ma Jehovah ominiwa ma konyowa me lweny ki par.

2. Tam matut. Ka itamo i kom jami ma otimme i kwoni, tika itamo i kom pekki mogo ma ibedo ki kero me kanyone pi kony pa Jehovah keken? Ka watamo i kom kit ma Jehovah ogwokowa kacel ki luticce mukene i kare ma okato angec, wabedo ki wic ma opye mot dok genwa i kome medde. (Jab. 18:17-19) Laelda mo ma nyinge Joshua owaco ni, “Acoyo piny legana mapol ma Lubanga otyeko gamogi. Man konya weko wiya po i kom kare ma alego Jehovah pi gin moni ci en omina gin meno kikome.” Ada, ka watamo i kom gin ma Jehovah dong otimo piwa, wanongo teko me medde ki lweny ki parwa.

3. Lub tira. Ma peya wamoko tamwa i kom gin ma myero watim, mitte ni wanong tira maber loyo ki i Lok pa Lubanga. (Jab. 19:7, 11) Jo mapol ginongo ni ka gutimo kwed i kom wang ginacoya moni ci gitwero niang maber kit ma ginacoya meno gudo kwede kwogi. Laelda mo ma nyinge Jarrod otito ni: “Timo kwed konya me niang jami mapol madok i kom tyeng moni ki me niang gin ma Jehovah tye ka wacone bota. Man konya me ye tira meno dok me bedo atera me lubone.” Ka wayenyo tira pa Jehovah ki i Ginacoya dok walubo tira meno cutcut, man konyowa me lweny ki par.

JEHOVAH BIKONYI ME KANYONE

Daudi oniang ni wek ebed ki kero me lweny ki par, mitte ni enong kony ki bot Jehovah. En obedo ki pwoc madit adada pi kony ma Jehovah omine ma oweko en owaco ni: “Pi teko pa Lubangana miyo apye akalo wi cel. En aye Lubanga ma oruka ki tek.” (Jab. 18:29, 32) Watwero winyo ni pekkiwa tye calo cel mabor adada ma pe watwero kalone. Ento ki kony pa Jehovah, watwero kalo peko mo keken ma nen calo cel mabor! Ada, ka walego Jehovah pi kony, watamo i kom jami ducu ma Jehovah otimo me konyowa i kare ma okato angec, dok walubo tirane, ci watwero bedo ki gen ni en biminiwa teko ma wamito me lweny ki parwa!