“Tin Dong Wuyer Ngat ma Wubitiyo Bote”

1. Gin ango ma omyero watim wek wabed ki yomcwiny me ada, dok pingo? (Icaya 48:​17, 18)

WONWA me polo marowa matek adada, dok en mito ni wan wanong mit pa kwo i lobo i kare-ni kacel ki i anyim. (Latit. 3:​12, 13) En ocweyowa ki kero me timo jami mogo me aura adada. Ento, en pe ocweyowa ki kero me lone kekenwa nyo kero me moko piwa kenwa gin maber ki gin marac. (Latit. 8:9; Jer. 10:23) Jehovah ngeyo ni ka wek wan wabed ki yomcwiny me ada, omyero wati pire dok walub cik ma igi lac me Baibul i kwowa.—Kwan Icaya 48:​17, 18.

2. Gin ango ma Catan mito ni waye iye, ento Jehovah odok i goba meno nining?

² Catan mito ni waye ni watwero bedo ki yomcwiny kadi bed pe watiyo pi Jehovah. Dok en owaco ni, dano gitwero keto gamente ma meggi kun gilone kengi ki yomcwiny. (Acak. 3:​4, 5) Me moko ni lok pa Catan meno obedo goba, Jehovah oye ki dano me lone kengi pi kare mo. Yot adada me neno ni loc pa dano pe onyako nyige dok okelo pekki mapol i kare-ni. Ki tungcel, Baibul tito pi co ki mon mapol ma gubedo ki yomcwiny pien gutiyo pi Jehovah. Ngat acel i kingi ma obedo ki yomcwiny madwong loyo obedo Yecu Kricito. I pwony man, wabinyamo pingo Yecu oyero me tic pi Jehovah. Dok bene wabinyamo pingo omyero wawor Wonwa Jehovah. I agikkine, wabineno wiye wiye tyen lok mapatpat mumiyo wayero me tic pi Jehovah.

TYEN LOK MUMIYO YECU OYERO ME TIC PI JEHOVAH

3. Gin ango ma onongo Catan mito miyone ki Yecu, ento tam ango ma Yecu omoko?

³ I kare ma Yecu tye i lobo, en onyuto ka maleng ni eyero me tic pi Jehovah. Me labolle, ma pe orii i nge nongo batija, Catan owaco ki Yecu ni ebimiyo bote ker ducu ma i lobo-ni ka Yecu oryebbe piny ci owore kicel keken. Yecu ogamo lok pa Catan meno ni: “Nyik icit cen, Catan, pien yam gicoyo ni, ‘Wor Rwot [Jehovah] Lubangani, dok bene iti pire keken.’” (Mat. 4:​8-10) Pingo Yecu omoko tam ma kit meno? Kong dong wanenu tyen lok mogo.

4-5. Tyen lok mapatpat ango ma omiyo Yecu oyero me tic pi Jehovah?

⁴ Tyen lok ma pire tek loyo ma omiyo Yecu oyero me tic pi Jehovah aye—mar matut pi Wonne. (Jon 14:31) Medo i kom meno, Yecu oyero me tic pi Jehovah pien meno onongo gin ma atir me atima. (Jon 8:​28, 29; Yabo 4:11) Yecu onongo ngeyo ni Jehovah aye obedo Lacwec, dok watwero geno Jehovah pien ominiwa jami mabeco mapol. (Jab. 33:4; 36:9; Yak. 1:17) Kare ducu Jehovah oloko lok ada bot Yecu dok jami ducu ma Yecu onongo tye kwede, Jehovah aye ma omine. (Jon 1:14) Ki tungcel, kit pa Catan pat adada ki kit pa Jehovah. Catan okelo bal ki to, dok en lagoba ma wor ma paro pire kene. (Jon 8:44) Yecu onongo ngeyo apokapoka ma tye i kin Jehovah ki Catan maber adada. Dong, en onongo pe mito bedo calo Catan ki jemo i kom Jehovah.—Pil. 2:​5-8.

⁵ Tyen lok mukene ma omiyo Yecu oyero me tic pi Jehovah aye pi jami mabeco ma bicobbe macalo adwogi me gwoko gennene bot Jehovah. (Ibru 12:2) Yecu onongo ngeyo ni ka egwoko gennene, ci ebilonyo nying Wonne dok ebiweko twerre me kwanyo bal ki to ma Catan okelo.

TYEN LOK MUMIYO OMYERO WAWOR JEHOVAH

6-7. (a) Pingo jo mapol i kare-ni pe gitiyo pi Jehovah? (b) Pingo Jehovah opore me nongo worowa?

⁶ Pol pa dano i kare-ni pe gitiyo pi Jehovah pien pe gingeyo kit mogo mabeco ma Jehovah tye kwede, dok pe gingeyo jami mabeco mapol ma Jehovah otimo pigi. Jo me kare-ni girom aroma ki jo me Atene ma lakwena Paulo otito kwena botgi. Gin bene onongo pe gingeyo Lubanga.—Tic 17:​19, 20, 30, 34.

⁷ Paulo otito ki jo ma i Atene ni Lubanga me ada “miyo kwo ki dano ducu wa ki yweyo ki jami ducu.” Paulo omedo ni: “Wakwo i en, wawoto i en, wabedo i en.” Lubanga aye obedo Lacwec, ma “ocweyo rok ducu nia ki i kom dano acel wek gubed i wi lobo,” pi meno, opore ni omyero wawor En kene.—Tic 17:​25, 26, 28.

8. Gin ango ma Jehovah pe bitimone matwal, dok en onyuto nining ni emarowa matek?

⁸ Pien Jehovah obedo Lacwec dok en keken aye tye ki twero me loyo polo ki lobo, en twero timo gin mo keken ma iye mito. Ka cwinye mito, ci Jehovah onongo twero diyo dano me tic pire. Ento Jehovah pe bitimo meno matwal. Me ka meno, en oketo jami ma nyuto ni etye ada dok ni emaro wan ducu ki acel acel. En mito ni jo mapol gubed lureme matwal. (1 Tem. 2:​3, 4) Meno aye tyen lok ma omiyo Jehovah opwonywa lok i kom yubbe ki kit ma bicobbe kwede. En bene ominiwa tic me pwonyo jo mukene lok i kom yubbe. (Mat. 10:​11-13; 28:​19, 20) Dok pi wan ma wayero me tic pi Jehovah, en oketo kacokke ma watwero wore iye dok ocimo luelda me gwokowa.—Tic 20:28.

9. I yo ma nining ma Jehovah nyuto ni emaro dano ducu?

⁹ Jehovah nyuto marre ki miyo jami mabeco kadi wa bot jo ma pe giye ni Lubanga tye ada. Tam kong i kom lok man: Pi mwaki alip mapol, dano bilion mapol guyero me timo gin ma gitamo ni ber nyo rac i wangi me ka bedo luwiny bot Lubanga. Kadi bed kit meno, Jehovah onyuto marre ki minigi jami ma mitte me nongo mit pa kwogi. (Mat. 5:​44, 45; Tic 14:​16, 17) Jehovah oweko twere pigi me bedo ki lurem, wadigi ma marogi, nywalo lutino, dog tic mabeco, ki dong nongo mit pa kwo. (Jab. 127:3; Latit. 2:24) Jami magi moko ka maleng ni Jehovah maro dano ducu. (Nia 34:6) Kong dong wapo wiwa i kom tyen lok mogo ma oweko wayero me tic pi Jehovah ki dong mot mabeco ma en miyo ki jo ma tiyo pire keken.

TYEN LOK MUMIYO WAYERO ME TIC PI JEHOVAH

10. (a) Tyen lok ma pire tek ango ma omiyo iyero me tic pi Jehovah? (Matayo 22:37) (b) Ngeyo ni Jehovah niang in maber dok tye atera me timmi kica, weko iwinyo nining? (Jabuli 103:​13, 14)

¹⁰ Calo Yecu, wan bene watiyo pi Jehovah pien Wamare matek. (Kwan Matayo 22:37.) Wat i kinwa ki Jehovah dongo ka wapwonyo lok i kom kite mapatpat. Me labolle, tam kong i kom kica ma Jehovah tye kwede. I kare ma Luicrael gukwero bedo luwiny bote, en obako doge botgi ni: “Wulokke wudwog cen, ngat acel acel owek kit marac woko.” (Jer. 18:11) Jehovah niang ni watye ki roc dok wiye po ni wan wabedo apwa mamwa. (Kwan Jabuli 103:​13, 14.) Ka itamo i kom kare ma Jehovah otimmi kica, tika man pe mini miti me tic pire pi naka?

11. Tyen lok mukene ango ma omiyo wayero me tic pi Wonwa me polo?

¹¹ Gin mukene ma tugo cwinywa me tic pi Jehovah aye pien wangeyo ni meno obedo gin ma atir me atima. (Mat. 4:10) Dok bene wangeyo ni ka wagwoko gennewa bot Jehovah ci wabicobo jami mabeco mapol. Ka watiyo pi Jehovah ki gen, walonyo nyinge, wanyuto ni Catan lagoba, dok wayomo cwiny Wonwa me polo. Dok ka ngat moni oyero me tic pi Jehovah i kare-ni en bedo ki gen me nongo kwo ma pe tum!—Jon 17:3.

12-13. Gin mutimme i kom Jane ki Pam pwonyowa gin ango?

¹² Kadi bed pud watino, watwero pwonnye me maro Jehovah ki cwinywa ducu dok marwa pire dongo medde ameda ka wawoto ki teggi. Nen kong labol pa Jane ki laminne Pam.a Jane onongo tye ki mwaka 11 dok Pam onongo tye ki mwaka 10 i kare ma gucako kwano Baibul. Kadi bed lunyodogi onongo gipe ki miti me kwano Baibul, gin guye ni Jane ki Pam gitwero kwano Baibul ki Lucaden. Ento bene guketo cik ni omyero Jane ki Pam gubed ka cito i kanica kacel ki jo me pacogi i tum cabit ducu. Jane owaco ni, “Jami ma Lucaden gupwonyowa kwede ki i Baibul okonyowa me loyo lyeto me donyo i tim tarwang kacel ki tic ki yadi calo jayi.”

¹³ I kare ma Jane ki Pam onongo dong gitwero moko tam pigi kengi, gin gudyero kwogi bot Jehovah ci gunongo batija. Lacen, gin aryo ducu gucako tic macalo painia. Dok i kare ma lunyodogi gutii woko, Jane ki Pam gugwokogi kun bene gimedde ki tic macalo painia. Gin mutimme man oweko Jane owaco ni: “Apwonyo ni Jehovah gwoko lureme dok ma lubbe ki 2 Temceo 2:​19, ‘[Jehovah] ngeyo jo ma gin jone kikome.’” Labongo akalakala mo, wangeyo ni Jehovah gwoko jo ma guyero me tic pire pien gimare!

14. Lokwa ki jami ma watimo konyo me lonyo nying Jehovah nining? (Nen bene cal.)

¹⁴ Watye ki miti madwong ni dano myero guniang ni lok maraco mapol ma guwinyo i kom Lubanga pe tye ada. Tam kong i kom labol man: Itye ki laremi mo ma imaro adada, en lakica, maro dano, dok cinge yot. Ci nino mo iwinyo ka ngat mo kok i kome ni en kite rac dok lakwor. In ibidok iye nining? Ngene kene ni ibigengo ngeye. I yo acel-lu, ka Catan ki jo ma gilubbe gibalo nying Jehovah ki nyayo lok goba i Kome, wadok iye ki tito lok ada i kom Jehovah ki mit kom. (Jab. 34:1; Ic. 43:10) Lokwa ki jami ma watimo nyuto ni wamito tic pi Jehovah ki cwinywa ducu.

15. Adwogi mabeco ango ma lakwena Paulo onongo i nge timo alokaloka i kwone? (Jo Pilipi 3:​7, 8)

¹⁵ Watye atera me timo alokaloka i kwowa wek wayom cwiny Jehovah nyo wamed cawawa i tic pire. Me labolle, lakwena Paulo onongo tye ki rwom madit adada i dini pa Lujudaya, ento en oweko dini meno wek edok lalub kor Kricito dok eti pi Jehovah. (Gal. 1:14) Macalo adwogine, en onongo yomcwiny madwong i ticce pi Jehovah dok en tye ka loc kacel ki Kricito i polo. Paulo pe okoko ange mo keken pi tam ma en omoko me tic pi Jehovah, dok wan bene pe wabikoko ange mo keken wa acel.—Kwan Jo Pilipi 3:​7, 8.

16. Pwony ango ma wanongo ki i gin mutimme i kwo pa Julia? (Nen bene cal.)

¹⁶ Ka waketo tic pi Jehovah obedo gin ma pire tek loyo i kwowa, ci wabedo ki kwo maber i kare-ni ki bene i anyim. Nen kong gin mutimme i kom lamego mo ma nyinge Julia. Ma peya en opwonyo ada, Julia obedo ka wer i ot lega nicakke ma en pud tidi. Lawer mo ma okwano wer i rwom ma lamal oneno diro me wer ma Julia tye kwede ci ocako pwonye. Ma pe orii, Julia oywek dok onongo wero i nyim lwak mapol adada. I kare ma en tye i cukul me kwano wer, latin kwan lawote mo ocako tite lok i kom Lubanga dok otitte ni Lubanga tye ki nyinge, Jehovah. Ma pe orii, Julia ocako kwano Baibul tyen kiryo cabit ki cabit. Lacen, en omoko tamme me keto tic pi Jehovah mukwongo i kwone me ka tute matek me doko lawer muywek. Moko tam meno pe obedo yot. En owaco ni, “Dano mapol gubedo ka wacca ni atye ka lanyo dirona me wer. Ento onongo amoko tamma me keto tic pi Jehovah mukwongo i kwona.” I kare-ni, en dong winyo nining pi tam meno ma en omoko mwaki 30 angec-ci? Julia otito ni, “I kare-ni atye ki wic ma opye mot, dok ageno ni Jehovah bicobo jami ducu ma cwinya mito i lobo manyen.”—Jab. 145:16.

MEDDE KI TIC PI JEHOVAH

17. (a) Gin ango ma jo ma peya gumoko tamgi myero gunge, dok pingo? (b) Ngeyo ni watye ka kwo i kare me agikki myero ogud wan ma wayero me tic pi Lubanga nining?

¹⁷ Watye ka kwo i kare ma agikki me lobo man dong cok adada. Lakwena Paulo ocoyo ni: “Odong kare manok mo, ci ngat ma bino ca bibino woko oyotoyot ma pe bigalle.” (Ibru 10:37) Lok man myero ogudwa nining? Pi jo ma peya gumoko tamgi, omyero gunge ni kare ma odong pi dano me yero me tic pi Jehovah nok adada, dok mitte ni gumok tamgi oyotoyot. (1 Kor. 7:29) Dok pi wan ma dong watyeko moko tamwa me tic pi Jehovah, omyero wange ni bimitte ni wacir pekki, ento pekki magi bibedo pi “kare manok mo.”

18. Jehovah ki Yecu gicuko cwinywa me timo gin ango?

¹⁸ Yecu pe ocuko cwiny dano me doko lulub kore keken, ento bene me medde ki lubo kore. (Mat. 16:24) Pi meno, ka dong watiyo pi Jehovah pi mwaki mapol, ci omyero wamedde ki moko tamwa pe me ilo cingwa woko. Omyero watute matek me medde ki cung i tam ma wamoko me tic pi Jehovah. Timo man pe romo bedo yot, ento watwero bedo ki yomcwiny dok wanongo mot mapol i tic pi Jehovah, kadi wa i kare-ni!—Jab. 35:27.

19. Gin ango ma wapwonyo ki i gin mutimme i kom Richard?

¹⁹ Jo mogo gitamo ni ka giyero me tic pi Jehovah ci pe gibibango raa. Ka mwakani pud tidi, tika iwinyo ni tic pi Jehovah tek tutwal? Omego mo matidi ma nyinge Richard owaco ni: “Onongo awinyo ni pe atye ka bango raa pien atye Lacaden pa Jehovah. Lutino luwota ma adongo kwedgi onongo ginongo mit pa cito i gang myel, winye ki anyira, kacel ki tuko vidio me tim gero, kun nongo an mere pol kare atye i cokke kacel ki tic me pwony.” Tam ma kit man ogudo Richard nining? En owaco ni, “Acako kwo kwo laiye kiryo dok pi kare manok abango raa mo olo. Ento tim magi ducu pe okella kit yomcwiny mo keken marii. Dok ma pe orii, acako tamo pi adwogi mabeco ma bino pi lubo tira me Baibul ci amoko tamma me dwogo cen ka tic pi Jehovah ki cwinya ducu. Cakke i kare meno, Jehovah ogamo legana ducu.”

20. Omyero wamok tamwa me timo gin ango?

²⁰ Laco jabuli owero ki yomcwiny ni: ‘Dano ma iyero, ka ikelo cok boti tye ki yomcwiny me bedo i dyekal me kabedoni maleng.’ (Jab. 65:4) Dong, omyero wamoku tamwa me medde ki tic pi Jehovah. Calo Yocwa, wan bene wawaco ni: “An gira ki jo ma i oda ducu wabitiyo bot [Jehovah].”—Yoc. 24:15.