PWONY ME ANYAMA ME 15
WER 30 Wora, Lubangana, ki Larema
“Bedo Cok ki Lubanga Aye Ber” Piwa!
“Ki tung bota, bedo cok ki Lubanga aye ber.”—JAB. 73:28.
GIN MA WABIPWONYO
Wabinyamo kit ma waromo dongo kwede wat macok ki Jehovah ki dong adwogi mabeco ma wanongo pi timo meno.
1-2. (a) Gin ango ma omyero watim me dongo lirem macok ki ngat moni? (b) Gin ango ma wabinyamo i pwony man?
TAM kong i kom laremi mo ma imaro adada. Wat i kin in ki en ocako dongo nining? Twero bedo ni onongo wumaro bedo kacel, ipwonyo jami mapol ki bote, dok iniang jami ma en maro ki jami ma en pe maro. Ineno kite mogo mamwonya ma in bene imito dongone. Jami magi odongo mar ma itye kwede pi laremi man.
2 Me dongo lirem macok ki ngat moni, mitte ni itute matek dok wucwal cawa malac kacel. I yo acel-lu, mitte ni wacwal cawa malac me ngeyo Jehovah ki me dongo marwa pire ka wek wat i kinwa odong matek. Pwony man binyamo kit ma watwero dongo kwede wat macok ki Lubanga kacel ki adwogi mabeco ma wanongo ka watimo meno. Mukwongo, kong dong wanenu pingo pire tek me nyiko cok ki Laremwa, Jehovah.
3. Pingo omyero wabed ka lwodo adwogi mabeco ma bino ka wadongo wat macok ki Jehovah? Mi lapor.
3 Pire tek adada ni wabed ka lwodo pingo bedo ki wat macok ki Jehovah obedo gin maber piwa. (Jab. 63:6-8) Pingo timo meno pire tek? Tam kong i kom lapor man: Cik me yotkom waco ni camo wit cam mapatpat, ryeyo ler, nongo yweyo muromo, kacel ki mato pii muromo ber pi yotkomwa. Ento jo mapol pe giketo cwinygi ka timo jami magi, dok man omiyo komgi pe tye mayot kit ma omyero obed kwede. Ento, jo ma gibedo ka lwodo kit ma timo jami magi gwoko kwede yotkomgi, pol kare gilubo tam pa ludaktari man. I yo acel-lu, wangeyo ni pire tek me bedo lurem Jehovah, ento ngeyone keken pe romo. Omyero wabed ka lwodo kit ma nyiko cok ki Jehovah ber kwede dok man bicuko cwinywa me medde ameda ki dongo wat macok ki Lubanga.—Jab. 119:27-30.
4. Kit ma kitito kwede i Jabuli 73:28, gin ango ma omyero wabed ka timone?
4 Kwan Jabuli 73:28. Laco Jabuli 73 onongo obedo Lalevi ma kicimo me tic macalo lawer i ot pa Jehovah. En onongo nen calo dong otiyo pi Jehovah pi mwaki mapol. Ento, en onongo ngeyo ni pire tek adada ni ebed ka poyo wiye ni “bedo cok ki Lubanga aye ber” pi en, dok onongo mito ni jo mukene gunge ni bedo ki wat macok ki Lubanga ber pigi bene. Adwogi mabeco ango ma wanongo ka wadongo wat macok ki Jehovah?
“BEDO COK KI LUBANGA” KELO YOMCWINY
5. (a) Pingo nyiko cok ki Jehovah kelliwa yomcwiny? (b) Ma lubbe ki Carolok 2:6-16, mi labol mapatpat ma nyuto kit ma ryeko pa Jehovah gwokowa dok keliwa adwogi mabeco i kwowa.
5 Yomcwinywa medde ka wat i kinwa ki Jehovah woto ki dongo. (Jab. 65:4) Tye tyen lok mapol ma miyo wabedo ki yomcwiny. Me labolle, ka wakwano lok ma mege ma tye i Baibul dok walubo, ci wapwonnye wadoko jo maryek. Pwony mapatpat ma wanongo ki bot Jehovah gwokowa ki i jami ma twero balo watwa kwede nyo keto kwowa ka mading. (Kwan Carolok 2:6-16.) Man aye tyen lok mumiyo Baibul waco ni: “Dano ma dong onongo ryeko tye ki yomcwiny, ki dano ma dong olimo niang matut bedo kit meno.”—Car. 3:13.
6. Gin ango ma oweko laco jabuli orwenyo yomcwiny ma en onongo tye kwede?
6 Ki lok ada, kadi wa lurem Jehovah bene i kare mogo gikemme ki cwercwiny. Laco Jabuli 73 orwenyo yomcwinye i kare ma ocako tamo pi jami mogo ma pe tye atir. En ocako bedo ki tam ni jo maraco kwogi tye mayot kadi bed pe giworo Jehovah dok meno okelo cwercwiny madwong bot laco jabuli man. En bene onongo tye ki miti me bedo ki jami ma jo maraco magi gitye kwede. En obedo ki tam ni jo maraco magi gitwero nongo gin mo keken ma cwinygi mito, komgi tye mayot, dok pe gideno can. (Jab. 73:3-7, 12) Jami magi maraco ma en oneno-ni oweko en ocako tam ni tic pi Jehovah konye pe. Cwinye ocwer matek ma oweko en oloko ki kiniga ni: “Abedo ma cwinya leng mere nono, dok alwoko cinga ma pe abalo.”—Jab. 73:13.
7. Gin ango ma watwero timone ka cwercwiny onurowa? (Nen bene cal.)
7 Kadi bed laco jabuli man onongo cwinye tye ka cwer, en bene otute matek me bedo ki neno ma atir. En ‘ocito i ot maleng pa Lubanga,’ ka ma Jehovah okonye me loko nenone ki iye. (Jab. 73:17-19) Jehovah ma obedo Laremwa macok ngeyo ka cwinywa tye ka cwer. Ka watye ki cwer cwiny, watwero lega bot Jehovah me konyowa ngeyo gin me atima. Tira ma nonge i Lokke kacel ki cuko cwiny ma a ki bot omege ki lumege biminiwa kero me medde ki tic pi Jehovah. Kadi bed cwercwiny onurowa adada, Jehovah pud twero konyowa me bedo ki wic ma opye mot.—Jab. 94:19.a
Lalevi ma ocoyo Jabuli 73, tye ocung i “ot maleng pa Lubanga” (Nen paragraf 7)
“BEDO COK KI LUBANGA” MINIWA GEN DOK WEKO WABEDO KI TYEN LOK ME KWO
8. I yo mukene ango ma bedo cok ki Lubanga ber piwa?
8 Bed cok ki Lubanga weko wanongo adwogi mabeco aryo man. Mukwongo, wabedo ki kwo maber i kare-ni ka watye ki wat macok ki Lubanga. Me aryo, miniwa gen ma kome pi anyim mamwonya. (Jer. 29:11) Kong dong wanyamo adwogi mabeco magi kore ki kore.
9. Bedo ki wat macok ki Jehovah konyowa nining me bedo ki yomcwiny?
9 Wat macok ki Jehovah weko wabedo ki tyen lok me kwo. Jo mapol i kare-ni giwaco ni Lubanga pe. Pi meno, pe giniang tyen lok mumiyo dano gitye i lobo dok giye ni i anyim kodi pa dano birweny woko. Ento, kwano Baibul okonyo wan me moko ni Lubanga “tye ada, dok bene ni en miyo bakacic bot jo ma yenye.” (Ibru 11:6) Kadi wa i kare-ni, kwowa opong ki yomcwiny pien watye ka timo tic ma kicweyowa me timone—tic pi Wonwa me polo, Jehovah.—Nwo. 10:12, 13.
10. Cikke ango ma tye ka kuro jo ma gigeno Jehovah? (Jabuli 37:29)
10 Jo mapol i kare-ni gipe ki gen ma kome pi anyim mamwonya. Jami ma pire tek loyo i kwogi obedo mere tic, nyomme, nywalo lutino, ki dong gwoko cente ma romo konyogi ka gutii woko. Pe gitamo pi Lubanga kulu. Ki tungcel, lutic pa Jehovah giketo gengi ducu i kome. (Jab. 25:3-5; 1 Tem. 6:17) Wageno bene cikkene ducu ma en ociko pi anyim mamwonya. Tye bene jami mabeco mapol ma watye ka kuro cobbene, tutwalle woro Jehovah pi naka i Paradic.—Kwan Jabuli 37:29.
11. Nyiko cok ki Lubanga gudowa nining, dok man weko en winyo nining?
11 Tye adwogi mabeco mukene mapol ma wanongo pien watye lurem Lubanga. Me labolle, Jehovah ocikke me timiwa kica ka wangut i kom balwa. (Ic. 1:18) Pi meno, cwinywa pe myero obed ka pidowa tutwal pi bal ma watimo i kare mukato angec. (Jab. 32:1-5) Dok cwinywa bene bedo yom ka wayomo cwiny Jehovah. (Car. 23:15) Labongo akalakala mo, tye mot mabeco mapol ma wanongo pien watye lurem Jehovah. Kong dong wanyamu jami mogo ma watwero timone me nyiko cok ki Lubanga.
KIT ME MEDDE KI “BEDO COK KI LUBANGA”
12. Jami ango ma dong itimo me bedo cok ki Lubanga?
12 Ma peya wanongo batija macalo Lucaden pa Jehovah, watimo alokaloka mapol wek wadok lurem Jehovah. Wapwonyo lok ada i kom Lubanga kacel ki Yecu Kricito, wangut i kom balwa, wanyuto ni watye ki niye matek i kom Lubanga dok watute ki kerowa ducu me timo mitine. Dong, me medde ki nyiko cok ki Lubanga, omyero wamedde ameda ki timo jami magi ducu.—Kol. 2:6.
13. Jami adek mene ma twero konyowa me medde ki bedo cok ki Jehovah?
13 Timo jami mene ma bikonyowa me medde ki nyiko cok ki Jehovah? (1) Omyero wamedde ki kwan piwa kenwa kare ki kare dok wakwan Baibul nino ducu. Ka watye ka kwano Baibul, omyero pe wakwan ki miti me nongo ngec keken i kom Lubanga. Me ka meno, omyero watute me pwonyo kit ma Lubanga tamo kwede ki jami ma en mito ni watim, dok wakwo ma lubbe ki mitine. (Ep. 5:15-17) (2) Omyero wajing niyewa ki lwodo yo mapatpat ma Lubanga nyuto kwede ki mare piwa ki acel acel. (3) Omyero bene wamedde ki dago jami ma cwero cwiny Jehovah dok wakwer mako lirem ki jo maraco.—Jab. 1:1; 101:3.
14. Ma lubbe ki 1 Jo Korint 10:31, jami ango ma waromo timogi i kwowa me nino ducu wek wayom cwiny Jehovah? (Nen bene cal.)
14 Kwan 1 Jo Korint 10:31. Pire tek ni watim jami ma wangeyo ni biyomo cwiny Jehovah calo, cito i tic me pwony nyo cokke i Ot me Ker. Ento timo meno keken pe romo, omyero watim makato. Jami ma watimo i kwowa me nino ducu omyero oyom cwiny Jehovah. Me labolle, ka wanywako jami me kom ma watye kwede ki jo mukene dok watute me loko lok ada kun bene wabedo lugen i jami ducu, wayomo cwiny Jehovah matek. (2 Kor. 9:7; Ibru 13:18) Jehovah bene mito ni wanyut pwoc pi mic me kwo ma en ominiwa. Pi meno, wagwokke ki cam nyo mat mukato olajo, dok watimo jami ma mitte me gwoko yotkomwa. Ka Jehovah neno ni watye ka tute matek me yomo cwinye i jami ducu ma watimo, marre piwa bene dongo.—Luka 16:10.
Dwoyo mutoka i yo maber, gwoko yotkomwa ki ryeyo ler, camo wit cam mapatpat, kacel ki nywako jamiwa ki jo mukene yomo cwiny Jehovah (Nen paragraf 14)
15. Jehovah mito ni water jo mukene nining?
15 Jehovah nyuto cwiny me kica bot dano ducu, kadi bed gitiyo pire nyo pe. (Mat. 5:45) En bene mito ni wanyuto cwiny me kica bot jo mukene. Me labolle, Baibul cikowa ni omyero wagwokke ki ‘loko lok marac i kom ngat mo, wawek da, dok wanyut woro bot dano ducu i kare ducu.’ (Tito 3:2) Pi meno, pe wabedo ki tam ni wan waber waloyo jo mukene pien pe gingeyo Jehovah. (2 Tem. 2:23-25) Wamedde ki nyiko cok ki Jehovah ka wanyuto cwiny me kica bot dano ducu.
PUD ITWERO MEDDE KI NYIKO “COK KI LUBANGA” KADI BED IROCO
16. Laco Jabuli 73 ocako winyo nining i nge tic pi Jehovah pi kare mo?
16 I kare mogo, itwero winyo ni Jehovah pe tye cok kwedi pi gin mo marac ma gwok itimo. Ento wi myero opo i kom laco Jabuli 73. En owaco ni: “Tyena ogwangnge onongo dong acok poto tyena onongo dong cok cer mada.” (Jab. 73:2) En oye ni onongo etye ki “keccwiny” pi ‘kwiya piny’ “macalo lee” tim i nyim Jehovah. (Jab. 73:21, 22) Tika en otamo ni dong Jehovah pe bimare dok pe bitimme kica pi gorone?
17. (a) Gin ango ma laco jabuli otimo kadi wa i kare ma cwinye otur adada? (b) Pwony ango ma watwero nongone ki i gin mutimme i kwone? (Nen bene cal.)
17 Ka onongo laco jabuli obedo ki tam ni Jehovah okwere woko, ci en nen calo owinyo kit meno pi kare manok mo keken. Kadi wa i kare ma cwinye otur adada, en onongo ngeyo ni omyero emedde ki bedo cok ki Jehovah. Pi meno, en ocoyo ni: ‘Kare ducu ibedo kweda [Jehovah]; in ibedo ka mako cinga lacuc bene. Itela ki tam ma ibedo ka miya, i agikki bene ibijola ki deyo.’ (Jab. 73:23, 24) Wan bene omyero waleg Jehovah me miniwa kero ka wawinyo calo niyewa tye ka doko goro pi roc ma watye kwede. (Jab. 73:26; 94:18) Kadi bed watimo bal madit, pud watwero dwogo cen bot Jehovah ki gen ni en tye “atera me timiwa kica.” (Jab. 86:5, NWT) Pire tek adada me nyiko cok ki Lubanga, tutwalle ka wawinyo ni cwinywa otur pi gorowa.—Jab. 103:13, 14.
Ka wawinyo ni niyewa tye magoro, ci omyero wanyikke cok ki Jehovah ki nywako i timo jami me cwiny (Nen paragraf 17)
‘BED COK KI LUBANGA’ PI NAKA
18. Pingo watwero nyiko cok ki Jehovah pi naka?
18 Watwero medde ki nyiko cok ki Jehovah pi naka. Pe wabigiko medde ki pwonyo lok i kome. Baibul tito ni kit ma Jehovah timo ki jami, ryekone, kacel ki ngecce “tere pe tatte.”—Rom. 11:33.
19. Gen ango ma lok pa Jabuli miniwa?
19 Jabuli 79:13, waco ni: “Wan lwakki, ma wan romini ma ikwayowa-ni, wabimiyo pwoc boti nakanaka; wabipako nyingi nakanaka, wan ki likwayowa ducu.” Ka wat i kin in ki Lubanga woto ki dongo, in bene iromo bedo ki gen ni Jehovah bigoyo laane i komi pi naka dok ibiwaco ni: “Lubanga aye miya tekcwiny, dok en aye lonyona ma abigwoko matwal.”—Jab. 73:26.
WER 32 Cung Tung Bot Jehovah!
a Twero mitte ni jo ma gitye ka lweny ki two par, cwercwiny nyo two wic gunong kony ki bot ludaktar. Pi ngec mukene matut, nen Wi Lubele, Nam. 1 2023.