Ginkok​—‘Mot Maber’ Mua ki Bot Won

1. Gin ango maber ma dong twere botwa pi ginkok?

GINKOK pa Yecu Kricito weko watwero nongo mot mapol. Me labolle, yub me ginkok yabo yo pi likwayi pa Adam ducu ma kitgi atir wek gudok lutino pa Lubanga i anyim. Mot mukene bene tye ni watwero bedo ki yomcwiny pi naka. Medo i kom meno, ginkok bene kubbe ki gin mo ma pire tek adada bot dano ducu ma gitye i polo ki i lobo kany.​—Jo Ibru 1:8, 9.

2. (a) Yecu opwonyo lupwonnyene me lega pi gin ango ma pire tek ma kwako polo ki lobo? (Nen cal ma tye i pot karatac man.) (b) Gin ango ma wabinyamo i pwony man?

² Mwaki aryo angec ma peya Yecu oto, en opwonyo lupwonnyene me lega ni: ‘Wonwa ma tye i polo, giwor nyingi maleng. Ker meri obin; giti gin ma imito i lobo kit ma gitiyo i polo.’ (Matayo 6:9, 10) Kong dong wanenu kit ma ginkok kubbe kwede ki lonyo nying Jehovah, Ker pa Lubanga ki dong timo miti pa Lubanga.

“GIWOR NYINGI MALENG”

3. Nying Jehovah cung pi gin ango? Catan obalo nying Jehovah nining?

³ Me acel, Yecu olego pi lonyo nying Jehovah, nyo ni kite calo gin maleng. Nying Jehovah cung pi Jehovah kikome, ki nga ma en obedo. En aye obedo ngat matek ki dok ma kite atir loyo ducu ki i polo kacel ki lobo. Yecu bene olwonge ni “Won Maleng.” (Jon 17:11) Jehovah leng, dok Jami ducu ma en timo kacel ki cikke ducu tye atir. Ento ki i poto me Eden, Catan okelo pyem i kom twero ma Jehovah tye kwede me keto cik pi dano. En oloko lok goba i kom Jehovah dok obalo nying Lubanga.​—Acakki 3:1-5.

4. Yecu otero nying Lubanga calo gin maleng nining?

⁴ Kitungcel Yecu onongo maro nying Jehovah adada dok otimo jami ducu ma twere me lonyo nying Jehovah. (Jon 17:25, 26) En otimo nining? I ticce ki pwonye, Yecu okonyo jo mukene me niang ni cik pa Jehovah tye atir ki dok ni jami ducu ma Jehovah waccigi tye pi ber bedogi. (Kwan Jabuli 40:8-10.) Kadi bed ni Catan oweko en odeno can dok oto to malit, Yecu pud ogwoko gennene nio wa i agikki. En onyuto ni ngat ma pe ki roc twero bedo lagen bot Jehovah.

5. Watwero tero nying Jehovah calo gin maleng nining?

⁵ Watwero nyuto nining ni wamaro nying Jehovah? I kitwa. Jehovah mito ni wabed jo maleng. (Kwan 1 Petero 1:15, 16.) Man te lokke ni myero wawor en keken dok wabed luwiny bote ki cwinywa ducu. Kadi kitye ka unowa, watute ki tekwa me kwo ma lubbe ki yo ma Jehovah pwonyowa kwede. Ka wakwo ma lubbe ki kit ma Jehovah mito ci waketo deyo i kom nyinge. (Matayo 5:14-16) Wanyuto ni cikke tye atir dok ni Catan lagoba. Wan watimo bal pien watye ki roc. Ento ka watimo bal, myero wangut dok watute matek pe me timo gin mo ma lano nying Jehovah.​—Jabuli 79:9.

6. Pingo Jehovah nenowa calo jo ma kitgi atir kadi bed ni pud watye ki roc?

⁶ Jehovah timo kica i kom balwa ka watye ki niye i kom ginkok kadi bed watye i kin jo ma kiwirogi nyo i kin “romi mukene.” En jolo jo ma gudyero kwogi bote wek gudok jo ma wore. En lwongo Lukricitayo ma kiwirogi ma kitgi atir ni lutinone ki dok “romi mukene” ma kitgi atir ni lureme. (Jon 10:16; Jo Roma 5:1, 2; Yakobo 2:21-25) Pi meno, ginkok weko wabedo ki wat maber ki Wonwa dok walonyo nyinge kadiwa i kare-ni.

“KER MERI OBIN”

7. Mot ango ma dong twere pi ginkok?

⁷ I lega pa Yecu macalo lapor-ri, en owaco ni: “Ker meri obin.” Ginkok kubbe ki Ker pa Lubanga nining? Ker nyo gamente pa Lubanga tye ki dano ma romo 144,000 ma kiyerogi ki i kin jo ma i lobo. Ginkok oweko dong kitwero cero jo magi me kwo i polo. (Niyabo 5:9, 10; 14:1) Gibibedo kabaka ki lulamdog kun giloyo lobo gin ki Yecu pi mwaka alip acel. I kare meno, Jehovah bitic ki Kerre me loko lobo wek odok paradic ki dok me kwanyo roc woko ki i kom dano. I agikkine, lutic pa Jehovah ma gitye i polo kacel ki ma i lobo gibidoko jo me ot acel. (Niyabo 5:13; 20:6) Yecu bityeko Catan kacel ki jami maraco ma en okelo ducu.​—Acakki 3:15.

8. (a) Yecu okonyo lupwonnyene nining me niang kit ma Ker-ri pire tek kwede? (b) Watwero cwako Ker-ri nining i kare-ni?

⁸ Yecu okonyo lupwonyene me niang kit ma Ker pa Lubanga pire tek kwede. En otimo man nining? Cutcut i nge batijane, Yecu ocako tito “kwena maber me Ker pa Lubanga” ka mo keken ma en cito iye. (Luka 4:43) En owaco ki lupwonyene ni gubed lucadenne “wa i agikki lobo ducu.” (Tic pa Lukwena 1:6-8) I kare-ni, tic me tito kwena me Ker-ri tye ka konyo dano me pwonyo lok madok i kom ginkok ki me bedo i te loc me Ker pa Lubanga. Wanyuto ni wan luwiny i te Ker-ri ki konyo jo ma kiwirogi i tic me tito kwena maber i wi lobo-ni lung.​—Matayo 24:14; 25:40.

“GITI GIN MA IMITO”

9. Pingo watwero bedo labongo akalakala ni Jehovah bicobo yubbe pi dano?

⁹ Ngo ma onongo Yecu tye ka wacone i kare ma owacci: “Giti gin ma imito”? Ka Jehovah owaco ni gin moni bitimme, ci bitimme ada. (Icaya 55:11) Jemo pa Catan pe twero gengo Jehovah ki cobo yubbe. Miti pa Jehovah pi lobo onongo tye ningo? En onongo mito ni lobo opong ki likwayi pa Adam gin ki Kawa dok ma nongo gipe ki roc. (Acakki 1:28) Ka onongo Adam gin ki Kawa guto labongo nywal, kono yub pa Lubanga ni lobo myero opong ki lutinogi-ni pe ocobbe. Pi meno, Jehovah ominigi kare wek kong gunywal lutino. Ginkok biweko jo ducu ma gitye ki niye gibedo labongo roc dok gikwo pi naka. Jehovah maro dano dok mito ni gubed ki kwo maber kit ma en onongo oyubo kwede con.

10. Ginkok bikelo adwogi maber ango bot jo muto?

¹⁰ Dano bilion mapol ma guto ma pe gubedo ki kare me ngeyo lok ada madok i kom Jehovah kono? Jehovah mito ni dano gukwo pi naka. Pi meno, en bicero kadi wa jo ma guto. Ginkok weko twere me cero jo muto. Gibipwonyogi ki lok ada i kom Jehovah dok gibikwo pi naka. (Tic pa Lukwena 24:15) Jehovah aye Wang it me kwo. Ka Jehovah ocero jo muto, ci en bidoko Wongi. (Jabuli 36:9) I lega ma tye macalo lapor-ri, Yecu owaco ni Jehovah obedo ‘Wonwa ma tye i polo.’ (Matayo 6:9) Jehovah omiyo bot Yecu tic ma pire tek adada i cero jo muto. Yecu owaco ni: “An nicer ki kwo.”​—Jon 6:40, 44; 11:25.

11. Miti pa Lubanga tye ningo pi ‘lwak dano mapol ata-ni’?

¹¹ Yecu bene owaco ni: ‘Dano ma tiyo gin ma Lubanga mito, en aye omera, ki lamera, ki maa.’ (Marako 3:35) Obedo miti pa Lubanga ni dano ma gia ki i rok ki kaka ki leb mapat pat ducu gudok jo ma wore. Kitito ni gitye “lwak dano mapol ata, ma ngat mo pe romo kwano welgi.” Gitye ki niye i kom ginkok dok gimito bedo luwiny bot Lubanga. Gipakke kun giwaco ni: “Laro dano tye bot Lubangawa ma obedo i wi komker, ki bot Latin romo!”​—Niyabo 7:9, 10.

12. Lega pa Yecu-ni pwonyowa gin ango madok i kom yub pa Jehovah pi dano?

¹² Dong wapwonyo jami mapol madok i kom Jehovah kacel ki yubbe pi dano ki i lega pa Yecu ma omiyo macalo lapor-ri. Me acel, myero watim jami ducu ma watwero me lonyo nying Jehovah ki keto deyo i kom nying meno. (Icaya 8:13) Ginkok pa Yecu twero laro kwowa i anyim dok bene lonyo nying Lubanga. Ki lok ada, nying Yecu gonye ni “Jehovah en aye Lalar.” Me aryo, Jehovah bitic ki Kerre me kelo adwogi maber bot dano ma luwiny kun tiyo ki ginkok. Ki me adek, watye ki gen ni pe tye gin mo ma twero gengo Jehovah ki cobo mitine.​—Jabuli 135:6; Icaya 46:9, 10.

NYUT BOT JEHOVAH NI ITYE KI PWOC PI GINKOK

13. Pingo wanongo batija?

¹³ Yo acel ma pire tek ma watwero nyutone ni watye ki pwoc madit pi ginkok aye ka wadyero kwowa bot Jehovah kun wanongo batija. Ka watimo meno, ci wanyuto ni watye ki niye i kom ginkok dok ni “wan jo pa Rwot [Jehovah].” (Jo Roma 14:8) Ka wanongo batija, wakwayo Jehovah ni ‘owek wadok jo ma cwinywa leng.’ (1 Petero 3:21) Jehovah gamo kwacwa meno ki tic ki ginkok wek wanong adwogi mabeco. Dok wabedo ki gen ni en biminiwa jami ducu ma ocikke pire.​—Jo Roma 8:32.

14. Pingo Jehovah ocikowa ni myero wamar jo mukene?

¹⁴ Mar aye doro jami ducu ma Jehovah timo. Mitine tye ni jo ma giwore bene gulub kite dok gumarre i kingi (1 Jon 4:8-11) Ka wamaro jo mukene, ci wanyuto ka maleng ni wamito bedo ‘litino pa Wonwa ma tye i polo.’ (Matayo 5:43-48) Cik aryo ma pigi tek loyo, en aye, me acel me maro Jehovah, ki me aryo, maro jo mukene. (Matayo 22:37-40) Yo acel ma wanyuto kwede ki mar bot jo mukene en aye me tittigi kwena maber me Ker pa Lubanga. Ka walubo cik pa Jehovah me maro jo mukene tutwalle utmegiwa, ci marwa pi Jehovah bibedo ‘matek.’​—1 Jon 4:12, 20.

GINKOK WEKO WANONGO MOT KI BOT JEHOVAH

15. (a) Mot ango ma dong watye ka nongone ki bot Jehovah i kare-ni? (b) Mot ango ma wabinongo i anyim?

¹⁵ Jehovah ocikke botwa ni pien watye ki niyewa i kom ginkok, balwa dong gityeko ‘jwayone woko.’ En twero timiwa kica pi balwa ducu. (Kwan Tic pa Lukwena 3:19-21.) Kit ma wanyamo kwede con, ginkok miyo twere bot Jehovah me koko jo mogo wek gudok litinone i polo. Man obedo jo ma kiwirogi. (Jo Roma 8:15-17) En bene lwongo ‘romi mukene-ni’ wek gubed i kin jo me ode ma i lobo. Ka dong gudoko jo ma gipe ki roc, ci dok gibitemogi me agikki. Ka gubedo lugen bot Jehovah, ci Jehovah bikokogi me bedo lutinone bene. (Jo Roma 8:20, 21; Niyabo 20:7-9) Jehovah bimedde ki maro lutinone ducu. Ginkok bimedde ki keligi mot mapol pi naka. (Jo Ibru 9:12) Jehovah ominiwa mot man ma pire tek tutwal-li, dok pe tye ngat mo ma twero kwanyone ki botwa.

16. Ginkok gonyowa nining?

¹⁶ Ka wangut pi balwa, pe tye gin mo keken ma Larac-ci twero timone me gengowa me doko jo me ot pa Jehovah. Yecu oto “kicel keken” pi naka. Ginkok bitic pi naka. (Jo Ibru 9:24-26) Adam okelo to, ento ginkok pa Yecu bikeliwa kwo ma pe tum. Ginkok twero gonyowa ki i lobo man marac pa Catan-ni ki bene ki i lworo to.​—Jo Ibru 2:14, 15.

17. Mar pa Jehovah gudi nining?

¹⁷ Cikke pa Lubanga cobbe kare ducu. Kit macalo cik pa Jehovah ma doro ginacweya pe lokke-ni, Jehovah bene pe bilokke. Kadi ki ngo wang ma en ocobo cikkene. (Malaki 3:6) Jehovah miniwa jami mapol makato mic me kwo. En onyutiwa mar. “Man omiyo wangeyo mar ma Lubanga tye kwede i komwa, dok waye ni marowa. Lubanga aye mar.” (1 Jon 4:16) Cikkene ducu bicobbe kakare. Cokcok-ki, lobo bidoko paradic mamwonya adada. Dano ducu gibilubo kit pa Jehovah dok gibimaro luwotgi. Ci jone ducu ma gitye i polo ki i lobo kany gibiwaco ni: “Pak ki deyo ki ryeko ki pwoc, ki woro ki twero ki teko obed bot Lubangawa nakanaka. Amen.”​—Niyabo 7:12.