Yecu En Anga?

Yecu tye i kin jo ma gingene loyo i tekwaro pa dano. Jo mapol gingeyo nying Yecu, ento pe gingeyo jami mapol madok i kome, dok gitye ki tam mapatpat i kom anga ma Yecu obedo. Baibul kono waco gin ango i kom Yecu?

1. Yecu en anga?

Yecu obedo lamalaika matek adada ma bedo i polo. Lubanga Jehovah aye ocweye i kare ma peya ocweyo gin mo keken. Pi tyen lok meno, kilwonge ni “latin kayo me ginaketa ducu.” (Jo Kolocai 1:15) Baibul lwongo Yecu ni ‘Wod pa Lubanga acel keken’ pien Yecu keken aye obedo ngat ma Jehovah kikome aye ocweyo. (Jon 3:16) Yecu otiyo macok ki Wonne Jehovah, kun konye me cweyo jami mukene-ni ducu. (Kwan Carolok 8:30.) Yecu pud tye ka medde ki nongo mit pa bedo ki wat macok ki Jehovah. En tiyo macalo “Lok,” nyo lalok pa Lubanga, kun tero kwena ki tira pa Lubanga bot dano ki lumalaika.—Jon 1:14.

2. Pingo Yecu obino i lobo?

Mwaki makato 2,000 angec, Jehovah otimo tango. En otiyo ki cwiny mere maleng me nako kwo pa Yecu ki i polo ci oketo i i anyaka mo ma peya ongeyo laco ma nyinge Maliam. I yo ma kit man, kinywalo Yecu macalo dano. (Kwan Luka 1:34, 35.) Jehovah ocwalo Yecu i lobo me bedo Meciya ma kiciko pire nyo Kricito, ki me laro dano.a Jami ducu ma Jehovah otito con i Baibul madok i kom Meciya ocobbe i kom Yecu. Man okonyo dano me ngeyo ni Yecu aye obedo “Kricito ma Lubanga oyero, Wod pa Lubanga makwo.”—Matayo 16:16.

3. Yecu tye kwene i kare-ni?

I kare ma Yecu oto macalo dano, Lubanga ocere macalo lamalaika ci en odok cen i polo. Ki kunnu, “Lubanga omiye dit ma malo twatwal.” (Jo Pilipi 2:9) I kare-ni, Yecu obedo lamalaika ma tye ki twero madit adada. Jehovah keken aye tye ki twero madit loyo Yecu.

4. Yecu pe obedo Lubanga Won Twer Ducu

Baibul pwonyo ni kadi bed Yecu obedo lamalaika ma tye ki twero madwong i polo, en pud mine i te twero pa Lubangane ki Wonne, Jehovah. Pingo watwero waco kit meno? Tuk VIDIO me neno gin ma Baibul pwonyo ma nyuto kit ma Yecu pat kwede ki Lubanga won twero ducu.

VIDIO: Tika Yecu Kricito Obedo Lubanga? (3:22)

Ginacoya magi konyowa me niang apokapoka ma tye i kin Jehovah ki Yecu. Kwangi ki acel acel, ci wunyam lapeny magi ma lubo-ni.

Kwan Luka 1:30-32.

• Lok ma lamalaika-ni owaco nyuto nining ni Yecu ki Lubanga “Mamalo Twal” Jehovah gipat?

Kwan Matayo 3:16, 17.

• I kare me batija pa Yecu, dwan ma owinnye ki i polo-ni owaco ningo?

• Itamo ni meno obedo dwan anga?

Kwan Jon 14:28.

• Anga ma mwakane dit loyo dok tye ki twero madwong? Wego nyo wode?

• Yecu olwongo Jehovah ni Wonne. Meno pwonyowa gin ango?

Kwan Jon 12:49.

• Tika Yecu onongo ye ni en ki Wonne gubedo dano acel? In itamo ningo?

5. Ngo ma moko ni Yecu aye onongo obedo Meciya?

VIDIO: Yecu Ocobo Lok pa Lunebi (3:03)

Kwan lok pa lunebi me Baibul magi, ci wunyam lapeny ma lubo:

Kwan Mika 5:2 me pwonyo ka ma onongo myero kinywal Meciya iye.b

• Tika ka ma kinywalo iye Yecu ocobo lok pa lanebi man?—Matayo 2:1.

Kwan Jabuli 34:20 ki Jekaria 12:10 me neno lok pa lunebi ma onongo tito pi to pa Meciya.

• Tika lok pa lunebi magi ocobbe?—Jon 19:33-37.

• Tika itamo ni twere ni Yecu oketo yub con wek jami magi ocobbe?

• Man moko gin ango boti i kom ngat ma Yecu obedo?

WOT WIYE WIYE

Yecu obedo lamalaika ma tye ki twero madit. En obedo Wod pa Lubanga dok Meciya.

Ngo ma ipwonyo?

• Pingo kilwongo Yecu ni “latin kayo me ginaketa ducu”?

• Tic ango ma onongo Yecu timo ma peya en obino i lobo?

• Wangeyo nining ni Yecu aye obedo Meciya?

TIM KWED

Pwony lok madok i kom tic pa Yecu macalo Meciya.

“Tika Lok pa Lunebi Madok i kom Meciya Nyuto ni Yecu Aye Obedo Meciya?” (Pwony ma tye i jw.org)

Nen kong ka ce Baibul pwonyo ni Lubanga odoko won Yecu i kit yo acel ma laco doko kwede wego.

“Pingo Kilwongo Yecu ni Wod pa Lubanga?” (Pwony ma tye i jw.org)

Nen kong pingo pwony me Triniti pe a ki i Baibul.

“Tika Yecu Aye Lubanga?” (Wi Lubele me April 1, 2009)

Nen kong kit ma kwo pa dako mo olokke kwede i kare me en otimo kwed ci oniang gin ma Baibul pwonyo i kom Yecu.

“Dako ma Lajudaya Ongiyo Niyene Odoco” (Awake!, Mai 2013)