¿China xyaʼw re ri kʼaslemaal?

Ri Biblia kubʼiʼij «Lal [Jehová] xʼanaw la re ronoje ri kʼolik» (Apocalipsis 4:11). ¿Kakoj nawi laa ri kubʼiʼij ri Biblia? E kʼo jujun tikaweex kakichʼobʼo xojwinaqir qatukel y na jinta junoq xyaʼw re ri qakʼaslemaal. Pero, we xojwinaqir qatukel, ri qakʼaslemaal na jinta kʼo kajawax wi. Ri Biblia kubʼiʼij e ri Jehová xʼanaw re ronoje ri kʼolik. We qatziij ri kubʼiʼij ri Biblia, ri qakʼaslemaal lik kʼo kajawax wi.a Chila laa ri kubʼiʼij ri Biblia pachaʼ taj xwinaqir ri kʼaslemaal.

1. ¿Saʼ uʼanik xwinaqir ri kaaj uleew?

Ri Biblia kubʼiʼij: «Che rujeqebʼal lo ronoje, ri DIOS xuʼan ruwakaj yey ruwachulew» (Génesis 1:1). Rachijaabʼ kʼo kʼi kinaʼoj, kabʼiʼx chike científico, kakibʼiʼij ruwakaaj y ruwachulew kʼo jeqebʼal lo re. ¿Saʼ uʼanik xuʼan ri Dios ri kaaj uleew? Ri Dios xuchapabʼeej «ri Ruxlabʼixel», ruchuqʼabʼ, chaʼ xuʼan ronoje ri kʼo chwach ruwakaaj y ruwachulew (Génesis 1:2).

2. ¿Suʼchaak nawi xuʼan ri Dios Ruwachulew?

Jehová «xuʼan ruwachulew re kaʼan jeqeʼem chwach, na xuʼan taj chaʼ e laʼ na jinta kakʼojiʼ chwach» (Isaías 45:18). E Rire xʼanaw re Ruwachulew jun luwar lik choom y utz kojkʼojiʼ chwach. Dios xuʼan Ruwachulew y na kasach ta uwach (chila laa Isaías 40:28 y 42:5). E rachijaabʼ lik kʼo kʼi kinaʼoj kakibʼiʼij e Ruwachulew na kajunimax ta ruukʼ juna chik luwar. Rike na kilom ta juna chik luwar pa kejeqi wi ri tikaweex, xew Ruwachulew.

3. ¿Suʼchaak nawi taq ri tikaweex na e junaam taj kuukʼ rawaj?

Echiriʼ ri Jehová xukʼis uʼanik Ruwachulew xuʼano xel lo tikoʼn chwach Ruwachulew y xebʼuʼan rawaj. Tekʼuchiriʼ «xuʼan kʼu ri DIOS ri tikawex, jelaʼ xuʼan che pachaʼ Rire» (chila laa Génesis 1:27). ¿Suʼchaak nawi na oj ta junaam kuukʼ rawaj? Ma taq rawaj na kakikʼut ta ri rutzil kikʼuʼx y na utz ta kakiʼan jusukʼ che kiibʼ. Pero, ri Dios xojuʼano pachaʼ rire. Ruma laʼ ri oj tikaweex kaqakʼut ri rutzil qakʼuʼx y kaqaʼan jusukʼ che qiibʼ. Ri oj tikaweex utz kojchʼaʼt pa jujun chik chʼaʼteem y ronoje ri kaqilo lik kʼo uchomal, ruma laʼ kukiʼkotisaj ri qanimaʼ y echiriʼ kaqata ri música lik kakiʼkot ri qanimaʼ. E taq rawaj na kakiyak ta uqʼiij ri Dios, pero ri oj tikaweex utz kaqayak uqʼiij ri Dios.

NIMARISAJ RI NAʼOJ LAA

Woʼora kaqilo jujun kʼutubʼal re e ri Dios xʼanaw re ronoje ri kʼolik. Kaqamaj ronoje ri tzʼibʼital chupa ri Biblia puwiʼ ri kaaj uleew lik qatziij y kaqamaj ronoje ri utz kakiʼan ri tikaweex kuqʼalajisaj ruukʼ ri Dios petinaq wi.

4. Konoje ri kʼo kikʼaslemaal kʼo xʼanaw ke

Ri tikaweex kayak kiqʼiij kuma ri jujun chik ma ri kakiʼano junaam ruukʼ ri ʼanatal chilaʼ chikaaj y wara chwachulew, pero ronoje waʼ xex ʼanatal wi. ¿China nawi che kaya wi ri yakbʼal qʼiij che ronoje ri ʼanatalik? Chila alaaq ri VIDEO y chʼaʼta alaaq puwiʼ ri tzʼonobʼenik:

VIDEO: ¿Utz nawi kaqakoj ri Dios kʼolik? (2:43)

• ¿Saʼ taq ri ʼanatal chilaʼ chikaaj y wara chwachulew kiʼanom ke taq ri tikaweex?

Ronoje jaa ʼanatal ruma jun tikaweex. Pero, ¿china nawi ʼanayom re ronoje ri kʼo chilaʼ chikaaj y ri kʼo wara chwachulew? Chila alaaq Hebreos 3:4 y chʼaʼta alaaq puwiʼ ri taq tzʼonobʼenik:

• ¿Saʼ ri kukʼul kʼuʼx laa che ronoje ri ʼanatal chilaʼ chikaaj y wara chwachulew?

• ¿Kakoj nawi laa ronoje ri kʼo chwach ri kaaj uleew kʼo junoq xʼanaw re? ¿Suʼchaak nawi kakoj laa waʼ?

¿Etaʼam laa nawi waʼ?

Pa jw.org kariq laa ri taq wuuj y taq video kechʼaʼt puwiʼ waʼ. Tzukuj laa pa kubʼiʼij wi «¿Lo diseñó alguien?» y «Opiniones sobre el origen de la vida».

«Ma ronoje jaa ʼanatal ruma juna achi, pero ri ʼanayom re ronoje ri kʼolik e ri Dios».

5. Lik utz kaqakubʼaʼ qakʼuʼx che ri kubʼiʼij ri Biblia puwiʼ ri ʼanatalik

VIDEO: ¿Kʼo nawi junoq xʼanaw re ri kaaj uleew? (xa chʼaqaap che ri video) (3:51)

• ¿Saʼ kukʼut ri Biblia? ¿Xʼaniʼ nawi Ruwachulew y ronoje ri kʼo chwach xa pa 6 qʼiij o xukʼam bʼi más tiempo?

• ¿Qatziij nawi ri kubʼiʼij ri Biblia puwiʼ ronoje ri ʼanatalik chwach ri kaaj uleew? ¿Suʼchaak nawi kachʼobʼ laa waʼ?

Chila alaaq Génesis 1:1 y chʼaʼta alaaq puwiʼ ri tzʼonobʼenik:

• Rachijaabʼ kʼo kʼi kinaʼoj kakibʼiʼij ri kaaj uleew kʼo jeqebʼal re. ¿Ri kakibʼiʼij rike junaam nawi ruukʼ ri kubʼiʼij ri Biblia?

E kʼo jujun tikaweex kakichʼobʼo e ri Dios xujeq ri kʼaslemaal, tekʼuchiriʼ ri kʼaslemaal xujalkʼatij riibʼ utukel. Chila alaaq Génesis 1:21, 25, 27 y chʼaʼta alaaq puwiʼ ri taq tzʼonobʼenik:

• ¿Kubʼiʼij nawi ri Biblia e ri Dios xa jun uwach ri kʼaslemaal xuʼano, tekʼuchiriʼ ri kʼaslemaal xujalkʼatij riibʼ utukel? O, ¿kakoj nawi laa e ri Dios xebʼuʼan konoje rawaj, konoje ri tikaweex y ronoje ri kʼo wara chwachulew?

6. Ri oj tikaweex na oj ta junaam kuukʼ rawaj

Ri oj tikaweex na oj ta junaam kuukʼ rawaj. Chila alaaq Génesis 1:26 y chʼaʼta alaaq puwiʼ ri tzʼonobʼenik:

• Ri Dios xojuʼano pachaʼ rire, ruma laʼ kaqakʼut chike konoje ri tikaweex ri kʼaxnabʼal qakʼuʼx y ri rutzil qakʼuʼx. We ri Dios xojuʼano pachaʼ rire, ¿saʼ kukʼut chaqe puwiʼ ri uchomaliil ri Jehová?

RI XMAJ LAA

Jehová xuʼan ri kaaj uleew y ronoje ri kʼolik.

Kojchʼaʼt che ri xmaj laa

• Ri kukʼut ri Biblia, ¿saʼ uʼanik xjeqer lo ri kaaj uleew?

• ¿Kukʼut nawi ri Biblia e ri Dios xa jun uwach ri kʼaslemaal xuʼano tekʼuchiriʼ xujalkʼatij riibʼ utukel? O, ¿e nawi ri Dios xuʼan ronoje ri kʼolik?

• ¿Suʼchaak nawi na oj ta junaam kuukʼ rawaj?

KAMAJ LAA MÁS

Chila laa jujun kʼutubʼal re kukʼut chaqe kʼo jun xʼanaw re ronoje ri kʼolik.

“¿Qué nos enseña la naturaleza?” (¡Despertad!, septiembre de 2006)

Chila laa ri video, ruqaaw kukʼut che ruchʼutiʼn e ri Dios xʼanaw re ronoje ri kʼolik.

Ronoje ri kʼolik Jehová xʼanaw re (2:37)

Chila laa we ri Biblia kukʼutu xa xojwinaqir qatukel.

“¿Creó Dios los distintos tipos de seres vivos mediante la evolución?” (Chila laa pa jw.org)

Chila laa ri kakibʼiʼij ri kʼo kʼi kinaʼoj puwiʼ ri kʼaslemaal.

El origen de la vida. Cinco cuestiones dignas de análisis (Folleto)