KʼUTUNIK 08
Utz kaʼan laa ramigo ri Jehová
Jehová karaaj e ri laal ketaʼmaj laa uwach. ¿Suʼchaak nawi karaaj ketaʼmaj laa uwach? Echiriʼ kamaj laa más puwiʼ ri uchomaliil ukʼuʼx ri Dios, ronoje ri xuʼano y ri kuʼan na, lik kacha kʼuʼx laa che kaʼan laa ramigo ri Jehová. Pero ¿utz nawi kaʼan laa ramigo ri Dios? (Chila laa Santiago 2:23). ¿Saʼ kaʼan laa chaʼ kaʼan laa ramigo ri Dios? Ri Biblia kukʼut chaqe saʼ uʼanik kaqaʼano y kubʼiʼij chaqe suʼchaak ri amigoyiil ruukʼ ri Jehová lik chirajawaxik chaqe.
1. ¿Karaaj nawi ri Jehová kaʼan laa ramigo?
«Lik qibʼ alaq rukʼ ri Dios y jelaʼ Rire kaqibʼ ukʼ ralaq» (Santiago 4:8). ¿Saʼ keʼelawi waʼ chʼaʼteem? Jehová lik karaaj kaʼan laa ramigo. Mijunoq kuril uwach ri Jehová, ruma laʼ e kʼi ri kakichʼobʼ lik kʼayew kojuʼan ramigo ri Jehová. Pero e rire uyaʼom kan ri Biblia chaqe chaʼ kaqamajo ronoje ri uchomaliil ukʼuʼx y utz kojqiibʼ ruukʼ. Tobʼ ne na kaqil ta uwach ri Dios, pero we kaqil upa ri Biblia rutziij upixabʼ ri Dios, kojqiibʼ pan ruukʼ rire y kojuʼan ramigo rire.
2. ¿E nawi ri Jehová ri más utzilaj amigo kariq laa?
Jehová lik kʼax kunaʼ laa y na jinta juna chik kaʼanaw re pachaʼ kuʼan rire. E rire karaaj kariq laa kiʼkotemal. Echiriʼ kajawax toʼbʼal laa Jehová karaaj katzukuj laa rire. Ronoje rubʼiis kʼuʼx laa yaʼa laa chwach ri Dios, ma Rire lik kok iil che laa (1 Pedro 5:7). Jehová lik kuya kichuqʼabʼ, kubʼochiʼij kikʼuʼx y kebʼutoʼ ri taq ramigo (chila laa Salmo 94:18, 19).
3. ¿Saʼ kutzʼonoj ri Jehová che ri kibʼinik kisilabʼik ri taq ramigo?
Jehová kʼax kebʼunaʼ konoje ri tikaweex, pero «lik keʼek ukʼuʼx rukʼ ri tikawex jusukʼ chwach Rire» (Proverbios 3:32). Jehová karaaj ri kibʼinik kisilabʼik ri taq ramigo lik jusukʼ chwach rire y kijekʼa kiibʼ che ronoje ri na utz taj. E kʼo jujun kakichʼobʼo lik kʼayew kekʼojiʼ jusukʼ chwach rire y na utz ta kakiʼano. Pero ri Jehová lik kukʼul ukʼuʼx echiriʼ juna tikaweex kʼax kunaʼ rire y kuʼan ruchuqʼabʼ chaʼ kuʼan lik jusukʼ chwach rire (Salmo 147:11; Hechos 10:34, 35).
NIMARISAJ RI NAʼOJ LAA
Kaqamaj más puwiʼ saʼ chirajawaxik wi kaqaʼano chaʼ kojuʼan ramigo ri Jehová y kaqilo ri Jehová lik utzilaj qamigo chwach juna chik.
4. Ri Abrahán e ri ramigo ri Jehová
Chupa ri Biblia kʼo wi ri kʼutubʼal re ri Abrahán (kabʼiʼx che Abrán) kukʼut chaqe saʼ kaqaʼano chaʼ kojuʼan utzilaj ramigo ri Jehová. Chila alaaq Génesis 12:1-4 y chʼaʼta alaaq puwiʼ ri taq tzʼonobʼenik:
¿Saʼ xutzʼonoj ri Jehová che ri Abrahán?
¿Saʼ ri bʼiʼtisinik xuya ri Jehová che ri Abrahán?
¿Saʼ xuʼan ri Abrahán echiriʼ xutaʼ ri xubʼiʼij ri Jehová che?
5. Jehová kubʼiʼij chike ri taq ramigo saʼ kakiʼano
Qonoje ri oj kaqaaj taq ri qamigo kakiʼan ri utz chaqe.
¿China taq nawi ri tikaweex kechaʼ laa chaʼ kebʼuʼan amigo laa?
Chila alaaq 1 Juan 5:3 y chʼaʼta alaaq puwiʼ ri tzʼonobʼenik:
¿Saʼ karaaj ri Jehová kakiʼan ri taq ramigo?
Lik chirajawaxik kaqajalkʼatij ri qabʼinik qasilabʼik pa ri qakʼaslemaal chaʼ kaqaʼan janipa ri karaaj ri Jehová. Chila alaaq Isaías 48:17, 18 y chʼaʼta alaaq puwiʼ ri tzʼonobʼenik:
¿Suʼchaak nawi ri Jehová kutzʼonoj chike ri taq ramigo kakijalkʼatij ri kibʼinik kisilabʼik pa ri kikʼaslemaal?
Jun utzilaj amigo kukuxtaj chaqe ri kaqaʼano y jelaʼ na jinta kʼax kaqakʼulumaj y utz kojbʼin pa ri qakʼaslemaal. E mismo kuʼan ri Jehová chaqe ri oj ma oj ramigo.
6. Jehová kuya toʼbʼal chike ri taq ramigo
Echiriʼ ri taq ramigo e kʼo pa kʼaxkʼoliil Jehová lik kebʼutoʼo. Chila alaaq ri VIDEO y chʼaʼta alaaq puwiʼ ri tzʼonobʼenik:
Pa ri video xqil jun ixoq lik kapax ukʼuʼx ma xuriq jun nimalaj kʼax pa rukʼaslemaal, ¿saʼ ri toʼbʼal xuya ri Jehová che rixoq chaʼ xukuy ri kʼax?
Chila alaaq Isaías 41:10, 13 y chʼaʼta alaaq puwiʼ ri taq tzʼonobʼenik:
¿Saʼ ri bʼiʼtisinik kuya ri Jehová chike konoje ri taq ramigo?
¿Kakoj nawi laa e ri Jehová lik utzilaj amigo e laa? ¿Suʼchaak nawi kabʼiʼij laa waʼ?
Echiriʼ kajawax qatoʼik, jun utzilaj qamigo kʼo quukʼ. E mismo kuʼan ri Jehová chaqe.
7. We kaqaaj kojuʼan utzilaj ramigo ri Jehová, lik chirajawaxik kojchʼaʼt ruukʼ
Echiriʼ kojchʼaʼt ruukʼ ri qamigo lik kojqiibʼ ruukʼ. Chila alaaq Salmo 86:6, 11 y chʼaʼta alaaq puwiʼ ri taq tzʼonobʼenik:
¿Saʼ uʼanik kojchʼaʼt ruukʼ ri Jehová?
¿Saʼ ukʼulik uwach kuʼan ri Jehová echiriʼ kojchʼaʼt ruukʼ?
Echiriʼ kojchʼaʼt ruukʼ ri Jehová utz kaqaʼan jun oración y rire kukʼul uwach ruukʼ ri Biblia.
RI KAKIBʼIʼIJ JUJUN CHIK: «Lik na kanchʼij taj kinuʼan ramigo ri Dios».
¿Pachike nawi ri texto kʼo chupa ri Biblia kakʼut laa che junoq chaʼ kuʼan utzilaj ramigo ri Jehová?
RI XMAJ LAA
Jehová lik karaaj kaʼan laa ramigo y kutoʼ laa chaʼ kaqiibʼ laa ruukʼ.
Kojchʼaʼt che ri xmaj laa
¿Saʼ ri toʼbʼal kuya ri Jehová chike ri taq ramigo?
¿Suʼchaak nawi ri Jehová kutzʼonoj chike ri taq ramigo kakijalkʼatij ri kibʼinik kisilabʼik pa ri kikʼaslemaal?
¿Kabʼiʼij nawi laa e ri Jehová kutzʼonoj chike ri taq ramigo lik kʼayew kakiʼano? ¿Suʼchaak nawi kachʼobʼ laa waʼ?
KAMAJ LAA MÁS
¿Saʼ ri utzil chomaliil kariq laa chaʼ kaʼan laa ramigo ri Dios?
“Jehová, un Dios que vale la pena conocer” (La Atalaya, 15 de febrero de 2003)
Maja laa saʼ uʼanik kaʼan laa ramigo ri Dios.
Chila laa ri xuʼan ri Jehová chaʼ xutoʼ jun ixoq.
Tape laa ri kakibʼiʼij jujun taq alabʼoo y alitoo puwiʼ ri Jehová.