KʼUTUNIK 09
E ri laal kaqiibʼ laa ruukʼ ri Dios ruma ri oración
Ri oración lik kʼi ri toʼbʼal kuya pa ri kʼaslemaal laa. Kutoʼ laa chaʼ kabʼin laa pa ri bʼee jusukʼ y kutoʼ laa chaʼ kariq laa ri kʼulubʼal uwach che ri taq tzʼonobʼenik kaʼan laa. Ri oración kuya bʼochibʼal kʼuʼx laa y kuya chuqʼabʼ laa. Echiriʼ kaʼan laa ri oración laa, kaqiibʼ laa ruukʼ ri Jehová. Pero, ¿saʼ uʼanik kaʼan laa orar ri Jehová? ¿Kuta nawi ri Jehová ronoje ri oración? ¿Saʼ lik chirajawaxik wi kaʼan laa chaʼ ri Dios kuta ronoje ri oración kaʼan laa? Qilaʼ pe.
1. ¿China nawi che kaqaʼan wi ri qa-oración? ¿Saʼ ri kaqabʼiʼij chupa ri qa-oración?
Ri Jesús xukʼutu xew kaqaʼan orar ri Qaqaaw Jehová kʼo chilaʼ chikaaj. E mismo xuʼan rire. Jesús xubʼiʼij: «Ekʼu riʼix echiriʼ kixchʼaʼt rukʼ ri Dios utz jewaʼ taq ri kibʼiʼij: Qaqaw Dios, Lal kʼo la chilaʼ chikaj...» (Mateo 6:9). Echiriʼ kaqaʼan ri qa-oración che ri Jehová lik kojqiibʼ ruukʼ ri Dios y kojuʼan ramigo.
Echiriʼ kaqaʼan ri qa-oración, utz kojchʼaʼt puwiʼ ronoje ri kaqaaj y utz kaqabʼiʼij che rire ronoje ri kʼo pa qanimaʼ. Pero, we kaqatzʼonoj che ri Dios ri na kukʼul ta ukʼuʼx, riʼ na kuya taj. Ri Biblia kubʼiʼij «kubʼul qakʼuʼx rukʼ ri Dios ma qetaʼam we ri kaqatzʼonoj che e chirij janipa ri karaj Rire, kojuta kʼu riʼ» (1 Juan 5:14). Jesús xukʼutu saʼ uʼanik kaqaʼan orar (chila laa Mateo 6:9-13). Lik utz kaqabʼiʼij che ri Dios ri kubʼisoj qanimaʼ, pero masach chi qakʼuʼx ri tyoxinik kaqaya che rire y kaqatzʼonoj che kebʼutoʼ ri jujun chik tikaweex.
2. ¿Saʼ uʼanik kaqaʼan ri qa-oración?
Ri Biblia kubʼiʼij: «¡Chitzijoj pa oración che Rire [Dios] ronoje ri kʼayewal ix k’owi!» (Salmo 62:8). Ronoje ri kaqabʼiʼij che ri Dios lik chirajawaxik kel lo pa qanimaʼ. Echiriʼ kaqaʼan ri qa-oración utz kojchʼaʼt pa qanimaʼ o kojchʼaʼt ko, ri Dios kuta ri qa-oración. Utz kaqaʼan ri qa-oración kojtakʼiʼik, kojtzʼuyiʼik o kojxukiʼik, pero e más chirajawaxik kaqakʼutu lik nim uqʼiij ri Jehová chiqawach ri oj. Utz kojchʼaʼt ruukʼ ri Dios xaqi tobʼ luwar y xaqi tobʼ hora.
3. ¿Saʼ rukʼulik uwach ri qa-oración kuʼan ri Dios?
Jujun taq wi rukʼulik uwach kuʼano. Ruukʼ Rutziij Upixabʼ, ri Biblia, ri Dios kukʼul uwach ri qatzʼonobʼenik. Pa Salmo 19:7 kubʼiʼij, echiriʼ junoq kuril upa ri Biblia «kuya unaʼoj ri na jinta kʼo retaʼam» (chila laa Santiago 1:5). Echiriʼ kaqariq kʼaxkʼoliil pa ri qakʼaslemaal, ri oración kuya utzil chomal pa qanimaʼ y na kasach ta qanaʼoj ruma ri kʼaxkʼoliil. Laj e ri Dios kuʼan chike taq ri qa-hermano kojkitoʼo echiriʼ kʼo kajawax chaqe.
NIMARISAJ RI NAʼOJ LAA
Qilaʼ saʼ kaʼan laa chaʼ jelaʼ ri Dios kukʼul ukʼuʼx ri oración kaʼan laa y saʼ uʼanik kutoʼ laa pa ri kʼaslemaal laa.
4. Lik chirajawaxik kʼo kaqaʼano chaʼ jelaʼ ri Dios kuta ri qa-oración
¿Saʼ chirajawaxik kaqaʼano chaʼ jelaʼ ri Dios kuta ri qa-oración? Chila alaaq ri VIDEO.
Ri Jehová karaaj xew che rire kaqaʼan wi ri qa-oración. Chila alaaq Salmo 65:2 y chʼaʼta alaaq puwiʼ ri taq tzʼonobʼenik:
¿Kachʼobʼ nawi laa e ri Dios lik kacha ukʼuʼx che kuxikinaj echiriʼ kaʼan laa orar? ¿Suʼchaak nawi kachʼobʼ laa waʼ?
We kaqaaj e ri Dios kuxikinaj ri qa-oración, lik chirajawaxik kaqaʼan jusukʼ che ri qabʼinik qasilabʼik pa ri qakʼaslemaal. Chila alaaq Juan 9:31 y 1 Pedro 3:12, y chʼaʼta alaaq puwiʼ ri tzʼonobʼenik:
¿Saʼ lik chirajawaxik kaqaʼano chaʼ jelaʼ ri Dios kuta ri qa-oración?
Kaʼibʼ mutzaʼj soldado jujun taq wi ri kitinamit chi kijujunal kakitzʼonoj che ri Dios kuya pa kiqʼabʼ ri chʼaʼoj. ¿Kachʼobʼ nawi laa e ri Dios kukʼul uwach ri ki-oración?
5. Echiriʼ kaqaʼan ri qa-oración ri kaqabʼiʼij lik chirajawaxik kel lo pa qanimaʼ
E kʼi ri tikaweex kʼutum chike kakibʼiʼij ukʼiyal laaj ri mismo chʼaʼteem pa ri ki-oración y jujun chik kakiwererej chʼaʼteem. Pero, ¿kukʼul nawi ukʼuʼx ri Dios wa taq oración? Chila alaaq Mateo 6:7 y chʼaʼta alaaq puwiʼ ri tzʼonobʼenik:
¿Saʼ kaqaʼano chaʼ na kaqabʼiʼij ta «ukʼiyal laaj» ri mismo chʼaʼteem pa ri qa-oración?
Utz kaʼan laa waʼ ronoje taq qʼiij, chʼobʼo laa puwiʼ ronoje ri choom kʼo pa ri kʼaslemaal laa echiriʼ kʼamajaʼ kaʼan laa orar. Tekʼuchiriʼ tyoxij laa che ri Dios ronoje ri uyaʼom che laa. We kaʼan laa waʼ, ri chʼaʼteem kabʼiʼij laa ronoje taq qʼiij lik jujun taq wi y jelaʼ na kawererej ta laa ri mismo chʼaʼteem pa ri oración laa.
Ri taat karaaj e rukʼajool kubʼiʼij che ruqaaw ri kʼo pa ranimaʼ. E mismo karaaj ri Jehová kaqaʼan ri oj, ri kaqabʼiʼij che rire lik kel lo pa qanimaʼ.
6. Ri oración e jun sipanik kuya ri Dios chaqe
¿Saʼ ruʼanik kuya chuqʼabʼ laa ri oración echiriʼ laal kʼo laa pa kʼaxkʼoliil? Chila alaaq ri VIDEO.
Ri Biblia kubʼiʼtisij chaqe e ri oración kuya utzil chomal pa qanimaʼ. Chila alaaq Filipenses 4:6, 7 y chʼaʼta alaaq puwiʼ ri taq tzʼonobʼenik:
Ri oración na karesaj ta ronoje ri kʼaxkʼoliil pa ri qakʼaslemaal, pero ¿saʼ qatoʼik kuʼano?
¿Saʼ kaʼaj laa kabʼiʼij laa che ri Dios echiriʼ kaʼan laa ri oración?
¿Etaʼam laa nawi waʼ?
Ri chʼaʼteem amén e keʼelawi «jelaʼ kʼu riʼ» o «qatziij wi». E rojertan kabʼiʼxik «amén» kʼisbʼal re juna oración (1 Crónicas 16:36).
7. Chesaj laa tiempo che kaʼan laa ri oración
Laj na jamal ta qawach y lik kʼo kaqaʼano y kasach chi qakʼuʼx kaqaʼan ri qa-oración. ¿Lik nawi xok iil ri Jesús che ri oración? Chila alaaq Mateo 14:23 y Marcos 1:35, y chʼaʼta alaaq puwiʼ ri taq tzʼonobʼenik:
¿Saʼ ruʼanik xuʼan ri Jesús xresaj tiempo che uʼanik ri oración?
Y ri laal, ¿saʼ ruʼanik kesaj laa tiempo che uʼanik ri oración?
RI KAKIBʼIʼIJ JUJUN CHIK: «Tobʼ china che kaqaʼan wi orar, Dios kuta ronoje ri qa-oración».
¿Saʼ kabʼiʼij laa?
RI XMAJ LAA
Echiriʼ kaqaʼan orar ronoje ri kaqabʼiʼij lik chirajawaxik kel lo pa qanimaʼ y jelaʼ kojqiibʼ ruukʼ ri Dios. Ri oración kuya chaqe utzil chomal pa qanimaʼ y kuya qachuqʼabʼ chaʼ kaqaʼan ronoje ri kutzʼonoj ri Jehová chaqe.
Kojchʼaʼt che ri xmaj laa
¿China nawi che kaqaʼan wi ri oración?
¿Saʼ ruʼanik kaqaʼan orar?
¿Saʼ kojutoʼ wi ri oración?
KAMAJ LAA MÁS
Chila laa ri kʼulubʼal uwach che ri taq tzʼonobʼenik kakiʼan ri tikaweex puwiʼ ri oración.
“Siete preguntas sobre la oración” (La Atalaya, 1 de octubre de 2010)
Chila laa suʼchaak chirajawaxik kaʼan laa ri oración y saʼ uʼanik kaʼan laa chi utz ri oración laa.
Chila pe laa ri kubʼiʼij ri Biblia china che kaqaʼan wi ri qa-oración.
Chila laa ri video kʼo jun bʼiix chupa, waʼ kukʼut chaqe pa kaqaʼan wi ri qa-oración.