¿Saʼ kutoʼ wi laa ri molobʼal iibʼ ke ri testigo re Jehová?

¿Kibʼiʼim nawi che laa ri testigo re Jehová kopon laa kuukʼ pa ri molobʼal iibʼ? Laj kachʼobʼ laa, we kopon laa kuya kʼix laa. Laj kachʼobʼ laa: «¿Saʼ nawi kakiʼan ri Testigo echiriʼ kakimol kiibʼ? ¿Suʼchaak nawi lik kʼo kajawax wi waʼ chike? ¿Utz nawi kineʼek ri in?». Chupa wa kʼutunik kamaj laa e ri molobʼal iibʼ ke ri testigo re Jehová kuya chuqʼabʼ laa chaʼ kaqiibʼ laa ruukʼ ri Dios y kutoʼ laa pa ri kʼaslemaal laa.

1. ¿Suʼchaak nawi kajawax wa molobʼal iibʼ chaqe?

Jun tzʼibʼaneel re ri Biblia xubʼiʼij suʼchaak lik chirajawaxik kaqamol qiibʼ, rire xubʼiʼij: «Kanyak uqʼiij ri QAJAWAL JEHOVÁ, e laʼ chikiwach konoje rutinamit kimolom kibʼ» (Salmo 26:12). Pa ri qʼiij ojkʼo wi, ri testigo re Jehová kakimol kiibʼ y waʼ lik kuya kiʼkotemal chike. Che ronoje ruwachulew, ronoje taq semana kakimol kiibʼ chaʼ kakiyak uqʼiij ri Dios, kebʼixonik y kakiʼan orar junaam. Jujun taq laaj che ri junabʼ kakimol kiibʼ pa taq nimaq molobʼal iibʼ.

2. ¿Saʼ ri kamaj laa pa ri molobʼal iibʼ?

Ronoje ri kabʼiʼx pa ri molobʼal iibʼ esaam chupa ri Biblia y lik kabʼiʼx pa saqiil wi saʼ keʼelawi (chila laa Nehemías 8:8). We kopon laa, kamaj laa más puwiʼ ri uchomaliil ukʼuʼx ri Jehová y kamaj laa más puwiʼ e ri Dios kʼax kunaʼ laa. Jelaʼ lik kacha kʼuʼx laa che kaʼan laa ramigo. Y kutoʼ laa pa ri bʼee jusukʼ chaʼ kabʼin laa chupa y kariq laa ri utz pa ri kʼaslemaal laa (Isaías 48:17, 18).

3. ¿Saʼ ri toʼbʼal kakiya che laa ri kimolom kiibʼ pa ri molobʼal iibʼ?

Jehová kubʼiʼij chaqe: «Qatzukuj kʼut suʼanik kaqatoʼ qibʼ chiqibʼil qibʼ chaʼ jelaʼ kanimar ri rutzil qakʼuʼx y ri utzilaj chak kaqaʼano» y maqaya kanoq ri molobʼal qiibʼ (Hebreos 10:24, 25). Pa ri molobʼal iibʼ ketaʼmaj laa kiwach ri tikaweex kʼax kakinaʼ kiibʼ y konoje rike kakaaj kakimajo ri kubʼiʼij ri Biblia, junaam pachaʼ ri kaʼaj ri laal. Chiriʼ kamaj wi laa ri pixabʼanik esaam chupa ri Biblia (chila laa Romanos 1:11, 12). Pa ri molobʼal iibʼ kachʼaʼt laa kuukʼ jujun taq wi kiwach tikaweex achijaabʼ, ixoqiibʼ y ri e kʼulanik. Rike kakitzijoj che laa saʼ ruʼanik kichʼijom ri taq kʼaxkʼoliil. Ruma laʼ ri Jehová karaaj kaqamol qiibʼ y na kaqaya ta kanoq ri molobʼal iibʼ.

NIMARISAJ RI NAʼOJ LAA

4. Ri molobʼal iibʼ ke ri testigo re Jehová

Ojertan rutinamit ri Dios xkimol kiibʼ chaʼ xkiyak uqʼiij ri Jehová (Romanos 16:3-5). Chila alaaq Colosenses 3:16 y chʼaʼta alaaq puwiʼ ri tzʼonobʼenik:

• Echiriʼ xkimol kiibʼ rutinamit ri Jehová, ¿saʼ ruʼanik xkiyak uqʼiij ri Jehová?

VIDEO: ¿Saʼ kaʼaniʼ chupa ri Jaa re Molobʼal iibʼ ke ri testigo re Jehová? (2:12)

• ¿Saʼ rujunimaxik ri molobʼal kiibʼ kakiʼan pa ri luwar re molobʼal iibʼ ruukʼ ri xkiʼan rutinamit ri Dios ojertan pachaʼ ri kubʼiʼij Colosenses 3:16?

• Echiriʼ kil laa ri video o ri kʼaxwach, ¿kʼo nawi kukʼul kʼuʼx laa che ri molobʼal iibʼ?

Chila alaaq 2 Corintios 9:7 y chʼaʼta alaaq puwiʼ ri tzʼonobʼenik:

• ¿Suʼchaak nawi na jinta pwaq katzʼonoxik pa ri molobʼal iibʼ ke ri testigo re Jehová?

Chila alaaq junaam ri kakʼutik pa ri molobʼal iibʼ re wa semana y chʼaʼta alaaq puwiʼ ri taq tzʼonobʼenik.

• ¿Saʼ ri kukʼul kʼuʼx laa che ri kamajik pa ri molobʼal iibʼ? Y, ¿pachike nawi ri kil laa lik kajawax che laa?

¿Etaʼam laa nawi waʼ?

Pa jw.org kariq laa pa kaʼaniʼ wi y jampa kaʼanik ri molobʼal iibʼ ke ri testigo re Jehová che ronoje ruwachulew.

1. Pa ri molobʼal qiibʼ kayaʼiʼ chʼaʼteem puwiʼ ri Biblia, kayaʼiʼ kʼambʼal naʼoj y kaqil taq video. Ronoje ri molobʼal qiibʼ kajeqerik y kakʼisik ruukʼ jun bʼiix y jun oración.

2. Ri e kʼo pa ri molobʼal iibʼ kakiya ri kʼulubʼal uwach che ri taq tzʼonobʼenik kaʼaniʼ chiriʼ.

3. Utz kebʼopon konoje ri tikaweex: ixoqiibʼ, achijaabʼ, nimaq winaq y kʼoʼmaabʼ.

4. Ri okibʼal bʼi kuukʼ ri testigo re Jehová na tojoom taj, pa ri molobʼal iibʼ na jinta pwaq katzʼonoxik.

5. Karaaj chuqʼabʼ kopon junoq pa ri molobʼal iibʼ

Qachʼobʼo pe pakiwiʼ rupamilia ri Jesús. Rike xejeqi chiriʼ Nazaret, ronoje junabʼ xebʼin oxibʼ qʼiij pa ri bʼee chwa taq ri juyubʼ chaʼ xebʼopon pa ri rocho Dios chilaʼ Jerusalén. Chila alaaq Lucas 2:39-42 y chʼaʼta alaaq puwiʼ ri taq tzʼonobʼenik:

• ¿Kachʼobʼ nawi laa e ri bʼenaam chilaʼ Jerusalén karaaj chuqʼabʼ?

• Y ri laal, ¿kʼo nawi kaqʼaten e laa chaʼ keʼek laa pa ri molobʼal iibʼ?

• Tobʼ lik kʼayew che laa, ¿utz nawi kopon laa pa ri molobʼal iibʼ? ¿Suʼchaak nawi kachʼobʼ laa waʼ?

• ¿Suʼchaak nawi lik chirajawaxik kojopon che ronoje ri taq molobʼal iibʼ?

RI XMAJ LAA

We kopon laa pa ri molobʼal iibʼ kutoʼ laa chaʼ kamaj laa más puwiʼ ri Jehová, kuya chuqʼabʼ laa chaʼ kaqiibʼ laa ruukʼ ri Dios y kayak laa uqʼiij ri Dios kuukʼ jujun chik.

Kojchʼaʼt che ri xmaj laa

• ¿Suʼchaak nawi kubʼiʼij ri Dios chaqe kojopon pa ri molobʼal iibʼ?

• ¿Saʼ ri kamaj laa pa ri molobʼal iibʼ ke ri testigo re Jehová?

• ¿Saʼ ri toʼbʼal kariq laa pa ri molobʼal iibʼ chaʼ kutoʼ laa pa ri kʼaslemaal laa?

KAMAJ LAA MÁS

¿Kuya nawi kʼix laa kopon laa pa ri molobʼal iibʼ? Kʼo jun achi jelaʼ xunaʼo, pero echiriʼ xoponik lik choom xril ri molobʼal iibʼ.

¡Lik na kasach ta chi qakʼuʼx ri utzilaj kʼuneem xkiya chaqe! (4:16)

Ketaʼmaj laa puwiʼ jun alaa lik choom xril ri molobʼal iibʼ y kil laa ronoje ri xuʼano chaʼ kopon pa ri molobʼal iibʼ.

Lik xukʼul nukʼuʼx ri molobʼal iibʼ ke ri testigo re Jehová (4:33)

Chila laa ri kakichʼobʼ ri jujun chik puwiʼ ri molobʼal iibʼ.

“¿Por qué estaría bien ir a las reuniones en el Salón del Reino?” (Chila laa pa jw.org)

Kʼo jun achi lik itzel ukʼuʼx, pero xujalkʼatij rukʼaslemaal echiriʼ xopon pa ri molobʼal iibʼ ke ri testigo re Jehová.

“No iba a ningún lado sin mi arma” (La Atalaya, 1 de julio de 2014)