¿Bʼuchak ri Dios resam taj ri kʼaxkʼoliil y ri itzelal?

1. ¿Saʼ (wach) uʼanik xjeqer loq ri itzelal?

Pa ri qʼij ri Satanás xubʼij ri nabʼe raqʼubʼal (tʼoronik) xjeqer loq ri itzelal chwach ri Ulew. Rire jun ángel xʼan ruma ri Dios utz ukʼuʼx y jinta umak, pero xraj taj xkʼojiʼ pa ri qatzij (Juan 8:44). Xuʼan nim ri urayibʼal re kaqayak uqʼij rire, pero xwi ri Dios lik chi rajawaxik kaqayak uqʼij. Ri Satanás na xubʼij ta ri qatzij che ri Eva y rire na xukoj ta utzij ri Jehová. Junam ri Adán xmakunik. Ri xkiʼano xukʼam loq kʼaxkʼoliil y kamik. Chawilaʼ Génesis 3:1-6, 19.

Satanás xubʼij che ri Eva na kukoj ta utzij ri Dios; xraj taj xukʼam pa ranimaʼ ri Jehová más nim puwiʼ ronoje. Kʼiyal winaq e kʼo junam ruukʼ ri itzel ángel, y kakaj taj ri Uqʼatbʼal Tzij ri Dios. Ruma laʼ rire xuʼan che ribʼ re kataqan che ri Uwachulew. Chawilaʼ Juan 14:30 y 1 Juan 5:19.

2. ¿Kʼo nawi jun mak che chi uʼanom ri Dios?

Ronoje ri kuʼan ri Jehová jinta jun mak che. Pa kiqʼabʼ ri nabʼe winaq y ri ángeles xkʼojiʼ wi kakikoj utzij ri Dios (Deuteronomio 32:4, 5). Rire uyaʼom luwar re kaqachaʼo ri utz o ri utz taj. We kaqachaʼo re kaqaʼan ri utz, kaqakʼut che ri Dios kʼaxkaqanaʼo. Chawilaʼ Santiago 1:13-15 y 1 Juan 5:3.

3. ¿Bʼuchak ri Dios resam taj ri kʼaxkʼoliil?

Jehová kʼamajaʼ uresam ri Satanás y ri winaq itzel kikʼuʼx ri kekʼojiʼ putzal rire. ¿Bʼuchak? Re kukʼutu we jinta ri toʼbʼal ri Dios kuukʼ, ni jun gobierno, o qʼatbʼal tzij kuyaʼ utzilal chike ri winaq (Eclesiastés 7:29; 8:9). Ikʼawnaq chik 6.000 junabʼ ronoje qilom, ri qʼatbʼal tzij re ri winaq na kesam ta ri kʼaxkʼoliil, ri kamik, ri chʼaʼoj y ri yabʼiil. Chawilaʼ Romanos 9:17.

We kaqakoj qibʼ putzal ri Qʼatbʼal Tzij re ri Dios, kaqakʼam utzilal (Isaías 48:17, 18). Xa naqaj chik, ri Jehová kusachisaj kiwach konoje ri taq qʼatbʼal tzij. Xwi kekʼasiʼ chwach ri Ulew ri winaq kakikoj kibʼ putzal ri Qʼatbʼal Tzij re ri Dios (Isaías 11:9). Chawilaʼ Apocalipsis 11:15.

Wilaʼ ri video ¿Bʼuchak ri Dios resam taj ri kʼaxkʼoliil?

4. ¿Saʼ (wach) kuyaʼ pa qaqʼabʼ ri upaciencia ri Dios?

Ri winaq kakiyak uqʼij ri Dios xa ruma ri kayaʼ chike, xubʼij ri Satanás. Ruma ri upaciencia ri Dios, kʼo pa qaqʼabʼ kaqakʼutu kaqakoj qibʼ putzal ri Qʼatbʼal Tzij re ri Dios y na e ta ri qʼatbʼal tzij re ri winaq. Utz kaqakʼutu ruukʼ ri kaqaʼano ri Satanás kubʼij ri qatzij taj. Chawilaʼ Apocalipsis 12:10 y 2 Pedro 3:9.

5. ¿Saʼ (wach) uʼanik kaqakoj qibʼ putzal ri Dios?

Kaqakoj qibʼ putzal ri Dios we kaqaʼano saʼ (wach) kukʼut ri religión karaj ri Dios. Ruma laʼ, kaqatzukuj ri religión ri kukʼutu ri kʼo pa ri Biblia (Juan 4:23). Kojterej chirij ri kʼutbʼal re ri Jesús y kaqaxutuj ri qʼatbʼal tzij re ri Satanás, we kaqamin ta qibʼ pa ri política y pa ri chʼaʼoj. Chawilaʼ Juan 17:14.

Ri Satanás kuchapebʼeej ri uchuqʼabʼ re kukʼut chike ri winaq kakiʼan ri utz taj re kemakunik. We kaqaxutuj ri itzelal, ri qachbʼil y ri qafamilia laj (moqxa) kojkitzeʼej y kakiʼan kʼax chaqe (1 Pedro 4:3, 4). We kaqakʼulumaj riʼ, ¿kaqatzukuj na qachbʼil kʼaxkakinaʼ ri Dios? ¿Kaqakoj na ri utzilaj taqonik re ri Dios? We kaqaʼano, kaqakʼutu ri Satanás xubʼij ri qatzij taj. Chakuxtaj: Rire xubʼij chi ojkʼo pa kʼax mijunoq kukoj utzij ri Dios. Chawilaʼ 1 Corintios 6:9, 10 y 15:33.

Ri kʼaxnabʼal kʼuʼx re ri Dios kukubʼsaj qakʼuʼx. Rire kuresaj na ronoje ri kʼaxkʼoliil y ri itzelal. Ri winaq chi kakikʼutu chi kʼo kubʼibʼal kikʼuʼx kakiriq jun kikʼaslemaal jinta ukʼisik chwach ri Uwachulew. Chawilaʼ Juan 3:16.