¿Saʼ (wach) ri karaj ri Dios che ri Uwachulew?

1. ¿Bʼuchak xuʼan ri Dios ri Uwachulew?

Jehová xuʼan ri Uwachulew re kekʼasiʼ ri winaq. Rire na xebʼuʼan ta ri Adán y Eva re kekʼojiʼ chikaj. Dios uʼanom chik ri ángeles re kekʼasiʼ chikaj (Job 38:4, 7). Jehová xuyaʼ ri nabʼe achi chwach ri chomalaj Uwachulew, ubʼi Edén (Génesis 2:15-17). Xuyaʼ che y ri ralkʼoʼal re kakiriq kiʼkotemal pa ri kikʼaslemaal jinta ukʼisik chwach Ulew. Chawilaʼ 1 Juan 2:17 y Hechos 17:26.

Xwi Edén jun chomalaj Uwachulew, na ronoje ta ri juyubʼ taqʼaj. Adán y Eva kakʼojiʼ kalkʼoʼal re kakinojisaj ri juyubʼ taqʼaj y kokʼil kakinimarisaj ri chomalaj Uwachulew (Génesis 1:28). Ri juyubʼ taqʼaj kikʼolibʼal re ri winaq y na kasach ta uwach. Chawilaʼ Mateo 5:5.

Wilaʼ ri video ¿Bʼuchak xuʼan ri Dios ri Uwachulew?

2. ¿Bʼuchak ri juyubʼ taqʼaj na e ta jun chomalaj Uwachulew?

Adán y Eva na xkikoj ta tzij, ruma laʼ ri Dios xebʼuresaj bʼi che ri Edén. Ri chomalaj Uwachulew sach uwach; jinta jun winaq uyijbʼam. Ruma laʼ ri Biblia kubʼij ri juyubʼ taqʼaj kʼo pa kiqʼabʼ ri winaq itzel kikʼuʼx (Job 9:24). Chawilaʼ Génesis 3:23, 24.

¿Kuʼan ta chi ri urayibʼal ri Jehová? Qatzij taj, Rire lik nim uchuqʼabʼ y ronoje ri kubʼij, kuʼano (Isaías 45:18). Chaqawach panoq, Dios kuʼan che ri kikʼaslemaal ri winaq pachaʼ ri xraj rire che rujeqebʼal loq ronoje. Chawilaʼ Romanos 8:21.

3. ¿Saʼ (wach) uʼanik kuʼan tan chik ri chomalaj Uwachulew?

Ri Jesús are taqanel pa ri Qʼatbʼal Tzij re ri Dios. Rire kuʼan che ri juyubʼ taqʼaj jun chomalaj Uwachulew. Junam kuukʼ ri ángeles kusachisaj kiwach pa ri chʼaʼoj Armagedón ri winaq tzel kakil ri Dios. Tekʼuriʼ kutzʼapij 1.000 junabʼ ri Satanás. Ri utinamit ri Dios na kasachisax ta kiwach pa ri Armagedón, ruma ri Jesús kukʼam bʼe chikiwach y kebʼuchajij, re kakiriq jun kikʼaslemaal jinta ukʼisik pa ri chomalaj Uwachulew. Chawilaʼ Apocalipsis 20:1-3 y 21:3, 4.

4. ¿Jumpa kakʼis na ri kʼaxkʼoliil?

¿Jumpa kukʼis na ri Dios ri itzelal? Ri Jesús xuyaʼo jun retalil re jumpa kakʼis na ri kʼaxkʼoliil. Ri kojtajin chi rilik woʼora kuʼan kʼax che ri kikʼaslemaal ri winaq y kukʼut chaqe ojkʼo pa ri «kʼisbʼal re taq i qʼij-i». Chawilaʼ Mateo 24:3, 7-14, 21, 22.

Pa ri 1.000 junabʼ ri Jesús kataqan loq chilaʼ chikaj puwiʼ ri juyubʼ taqʼaj, y kusachisaj ri kʼaxkʼoliil (Isaías 9:6, 7; 11:9). Jesús kuresaj ri kimak ri winaq kʼaxkakinaʼ ri Dios. Ruma rire, ri Dios kuresaj ri rijobʼik y «kubiqʼ bʼi ri kamik». Are kakʼun ri Qʼatbʼal Tzij re ri Dios «mijunoq chike ri kejeqi chupa kubʼij na ‹in yawaʼ›» (Isaías 25:8, 33:24). Chawilaʼ Hechos 24:15.

5. ¿Chinaʼ (pachin) kakʼasiʼ na pa ri chomalaj Uwachulew?

Ri winaq kakitaʼ ri Dios kekʼasiʼ pa ri chomalaj Uwachulew (1 Juan 2:17). Jesús xebʼutaq bʼi ri utijoxelabʼ re kakitzukuj ri winaq utz kikʼuʼx y kakikʼut chike re kakiʼano ri karaj ri Dios. Pa ri qʼij ojkʼo wi, Jehová kebʼutijoj kʼiyal winaq re kekʼojiʼ pa ri chomalaj Uwachulew (Sofonías 2:3). Pa ri Ja re Molbʼal Kibʼ ke ri testigos re Jehová, ri winaq kaketamaj saʼ (wach) uʼanik kuʼan jun utzilaj achijil y tat y kuʼan utzilaj ixoqil y nan. Kʼiyal winaq junam kakiyak uqʼij ri Dios y kakiriq utzilal che ri utzilaj taq tzij kuyaʼ ri Biblia. Chawilaʼ Juan 6:45.