KʼUTUNEM 6
¿Kʼo nawi jun qʼij kekʼastaj loq ri e kaminaq?
1. ¿Saʼ (wach) ri utzilaj taq tzij kʼolik che ri e kaminaq?
Pa ri qʼij xkʼojiʼ ri Jesús wara chwach Ulew, ri rachbʼil Lázaro xkamik. Betania kʼo wi ri rochoch ri Lázaro, xa naqaj che ri tinamit Jerusalén. 4 qʼij ukamik xoponik ri Jesús. Jesús xopon pa kʼo wi ri jul junam ruukʼ ri Marta y ri María, e ranabʼ kan ri kaminaq. Lik e kʼi ri winaq xebʼoponik. Jesús xukʼastajisaj ri Lázaro. Chʼobʼo pe ri kiʼkotemal chike ri Marta y ri María Chawilaʼ Juan 11:21-24, 38-44.
Marta retaʼam chik ri utzilaj taq tzij pakiwiʼ ri e kaminaq. Rire retaʼam ri Jehová kebʼuwalisaj loq ri e kaminaq re kekʼasiʼ chwach Ulew. Chawilaʼ Juan 11:24.
2. ¿Saʼ (wach) kiʼanom ri e kaminaq?
Ri Dios xubʼij che ri Adán: «At qʼanatal ruukʼ pukʼ ulew y kattzelej na pa pukʼ ulew» (GÉNESIS 3:19)
Qonoje ri yoj, winaq, xojʼanik che ri ukʼaj ri ulew (Génesis 2:7; 3:19). Jinta chaqe jun uxlabʼixel (tewal) kakʼasiʼ kanoq we kojkamik. We kakam, ri qatijil (qachʼakul) jinta kakʼasiʼ kanoq; ronoje kakamik. We kojkamik, kasach uwach ri qatzatzaqʼor y qachʼobʼonik. Lázaro kʼastajinaq chubʼi jinta xubʼij puwiʼ ri kamik. Ri e kaminaq jinta chik kakichʼobʼo y jinta chik kakinaʼo. Chawilaʼ Eclesiastés 9:5, 6, 10.
¿Qatzij nawi, ri Dios kebʼutaq pa aʼ ri winaq re yabʼal ke pa kʼax we kekamik? ¡Qatzij taj! Ruma laʼ, ri Biblia kubʼij ri e kaminaq jinta chik kakichʼobʼo y jinta chik kakinaʼo. Ri kakikʼutu puwiʼ ri aʼ, qatzij taj. Kuʼan chʼul che ri ubʼi ri Jehová. Ri Dios tzel karilo ri kakichʼobʼo ri winaq puwiʼ ri aʼ. Chawilaʼ Deuteronomio 12:31.
Wilaʼ ri video ¿Saʼ (wach) kiʼanom ri e kaminaq?
3. ¿Utz kojchʼaw kuukʼ ri e kaminaq?
Ri e kaminaq na kechʼaw ta chik y na ketan ta chik (Salmo 115:17). Pero, e kʼo itzel ángeles kechʼaw kuukʼ ri winaq y kakiʼan che kibʼ pachaʼ jun winaq kaminaq chik (2 Pedro 2:4). Ruma laʼ, Jehová lik tzel karilo we kojchʼawik kuukʼ ri e kaminaq. Chawilaʼ Deuteronomio 18:10, 11.
4. ¿Chinaʼ (je pachinoq) ri kekʼastaj loq?
Kʼiyal winaq e kaminaq kekʼastaj loq y kekʼasiʼ chwach Ulew chaqawach panoq. Junam kekʼastaj loq jujun winaq na xketamaj ta uwach ri Jehová y xkiʼan itzelal. Chawilaʼ Hechos 24:15.
Ri kekʼastaj loq kaketamaj na ri qatzij puwiʼ ri Dios, kakikoj kubʼibʼal kikʼuʼx che ri Jesús y kakikoj utzij (Apocalipsis 20:11-13). We kakiʼano, kakiriq jun kikʼaslemaal jinta ukʼisik chwach Ulew. Chawilaʼ Juan 5:28, 29.
5. ¿Saʼ (wach) kukʼut chaqe puwiʼ ri Jehová ri kʼastajibʼal?
Ri kʼastajibʼal are kʼutbʼal re ri kʼaxnabʼal ukʼuʼx y unimal rutzil ukʼuʼx ri Jehová. Mantyox che ri Dios xutaq loq ri Ukʼajol. Rire xuyaʼ ri ukʼaslemaal quma ri yoj, ruma laʼ qetaʼam ri e kaminaq kekʼastaj loq chaqawach panoq. ¿Chinaʼ (je pachinoq) kawaj kawil uwach pa ri kʼastajibʼal? Chawilaʼ Juan 3:16 y Romanos 6:23.