Yesaya
38 Jamɛ a be ɔ mi ɔ, Hezekia ba nu hiɔ, nɛ e miɔ nɛ e ma gbo. Gbalɔ Yesaya, Amoz binyumu ɔ ba nɛ e ba de lɛ ke, “Nɔ́ nɛ Yehowa ngɛ dee ji nɛ ɔ nɛ: ‘Moo ngɔ blɔ tsɔɔmi kɛ ha o we ɔ, ejakaa o ma gbo; o be he wami náe.’” 2 Kɛkɛ nɛ Hezekia plɛ e hɛ mi kɛ tsɔɔ gbogbo ɔ, nɛ e bɔni sɔlemi ha Yehowa ke: 3 “Oo Yehowa, i kpa mo pɛɛ, i kpa mo pɛɛ nɛ o kai bɔ nɛ i kɛ anɔkuale yemi kɛ ye tsui tsuo nyɛɛ ngɛ o hɛ mi, nɛ i pee nɔ́ nɛ da ngɛ o hɛ mi ɔ.” Nɛ Hezekia bɔni ya fomi wawɛɛ.
4 Kɛkɛ nɛ Yehowa de Yesaya ke: 5 “Kpale o se nɛ o ya de Hezekia ke, ‘Nɔ́ nɛ Yehowa, o nɛnɛ David Mawu ɔ ngɛ dee ji nɛ ɔ nɛ: “I nu o sɔlemi ɔ. I na o hɛ mi vonyu ɔ. Hyɛ, ma ngɔ jeha 15 kɛ piɛɛ o wami he,* 6 nɛ ma kpɔ̃ o kɛ ma nɛ ɔ ngɛ Asiria matsɛ ɔ dɛ, nɛ ma fã ma nɛ ɔ he. 7 Okadi nɛ Yehowa kɛ ngɛ mo hae konɛ o na kaa Yehowa ma ha nɛ munyu nɛ e tu ɔ maa ba mi ji nɛ ɔ nɛ: 8 Ma ha nɛ nini nɛ ngɛ kplee ngɛ Ahaz atlaakpe ɔ nɔ ɔ maa ya e se nane hiami nyɔngma. Lɔ ɔ he ɔ, nini ɔ ya e se nane hiami nyɔngma kɛ ba atlaakpe* ɔ nɛ e kple momo ɔ nɔ.
9 Yuda Matsɛ Hezekia ngma munyu nɛ ɔ benɛ e nu hiɔ nɛ e ná tsami ɔ.
10 I de ke: “Ma gu Yɔkɔ* agbo ɔmɛ a mi
Ngɛ ye nihe mi.
Ye wami ligbi nɛ piɛ ɔ ma bɔ mi.”
11 I de ke: “I be Yah nae hu, i be Yah nae hu ngɛ hɛ kali a zugba a nɔ.
I be adesa nae hu
Ke i ya piɛɛ nihi nɛ a ngɛ he nɛ nɔ́ ko nɔ́ ko yɛ nɔ ngɛ ɔ a he ɔ.
12 A hia ye hi he ɔ, nɛ a je kɛ je ye he kɛ ho
Kaa to hyɛlɔ bo tsu.
I koklo ye wami kaa bɔ nɛ bo lolɔ kokloɔ bo ɔ;
E po mi ngɔ fɔ he kaa bɔ nɛ a poɔ bo nɛ a lo ta nya kpa ngɛ tso he ɔ.
Benɛ je ngɛ jɔe nɛ je ngɛ nae ɔ, ye wami ngɛ nyagbe bae.
13 I bɔɔ mɔde nɛ i peeɔ kpoo kɛ ya siɔ mɔtu.
E yaa nɔ nɛ e kuɔ ye wuhi tsuo a mi kaa jata
Benɛ je ngɛ jɔe nɛ je ngɛ nae ɔ, o ha nɛ i ngɛ nyagbe bae.
14 I ngɛ ya foe kaa nga nɔ odangmɔdangmɔ loo adlɔba;
I ngɛ kɛmɛe kaa beleku lahuɛ.
I hyɛ hiɔwe hluu nɛ pɔ tɔ ye hɛngmɛ:
‘Oo Yehowa, i ngɛ haoe wawɛɛ;
Moo ye bua mi!’*
15 Mɛni ma de?
E kɛ mi tu munyu, nɛ e pee nɔ́ nɛ e de ɔ.
16 Oo Yehowa, ní nɛ ɔmɛ* lɛ haa nɛ adesa fɛɛ adesa hiɔ wami mi,
Nɛ a mi lɛ ye mumi ɔ náa wami ngɛ.
O ma ha nɛ ma ná he wami ekohu, nɛ o maa baa ye wami yi.
17 Hyɛ! Ngɛ tue mi jɔmi nane mi ɔ, i* ye aywilɛho wawɛɛ;
Se o mɛtɛ ye he,
O je mi kɛ je hɛ mi kpatami muɔ ɔ mi.
O sake ye he yayami ɔ tsuo ngɔ pue o se.*
18 Ejakaa Yɔkɔ* be nyɛe maa wo o hɛ mi nyami,
Gbenɔ be nyɛe ma je o yi.
Nihi nɛ a kpleɔ kɛ yaa muɔ ɔ mi ɔ be nyɛe maa ngɔ a hɛ kɛ fɔ o we anɔkuale yemi ɔ nɔ.
19 Nihi nɛ a ngɛ wami mi, nihi nɛ a ngɛ wami mi ɔ pɛ lɛ a ma nyɛ ma je o yi,
Kaa bɔ nɛ ma nyɛ ma pee mwɔnɛ ɔ.
Tsɛ ma nyɛ ma ha nɛ e bi nɛ e ná o we anɔkuale yemi ɔ he nile.
20 Oo Yehowa, mo he ye yi wami,
Nɛ waa kɛ kpa sakuhi maa fia ye la amɛ
Ngɛ Yehowa we ɔ wa wami ligbi ɔmɛ tsuo.’”
21 Lɔ ɔ se ɔ, Yesaya de ke: “Nyɛɛ ngɔ fig gbigbli nɛ a nyɛ nɔ kɛ pee keeki kɛ ba nɛ a kɛ ba to tslɔɔ ɔ nɔ, konɛ e ná he wami.” 22 Hezekia bi ke: “Mɛni okadi lɛ maa tsɔɔ kaa ma kuɔ kɛ ya Yehowa we ɔ?”