Yesaya

Jaje ye we bi ɔmɛ a we atuã tsɔmi ɔ kɛ tsɔɔ mɛ,

Jaje Yakob we ɔ tɔmi ɔ kɛ tsɔɔ mɛ.

 2 A hlaa ye se blɔ daa ligbi,

Nɛ a suɔ kaa a maa le ye blɔ ɔmɛ,

A peeɔ a he kaa a ji ma nɛ peeɔ dami ní

Nɛ́ a kua we a Mawu ɔ dami sane yemi ɔ.

A biɔ dami kojomi kɛ jeɔ ye ngɔ,

Nɛ a suɔ kaa a maa hɛ kɛ su Mawu he:

Ejakaa ligbi nɛ nyɛ ngɛ hwɔ hae ɔ, nyɛ ya di níhi nɛ nyɛ bua jɔ he* ɔ se,

Nɛ nyɛ wa nyɛ we apaatsɛmɛ ɔmɛ yi mi.

 4 Ke nyɛ ngɛ hwɔ hae ɔ, pɛ kɛ kunɔ lɛ nyɛɛ kɛ gbeɔ nya,

Nɛ nyɛɛ kɛ yiwutso fiaa kɔ̃.

 5 Hwɔ nɛ i ke nyɛɛ ha a, kikɛ nɛ e sa nɛ e hi lo?

Anɛ e sa kaa e pee ligbi nɛ nɔ ko maa wa lɛ nitsɛ e he* yi mi,

Nɛ e maa ma e yi si kaa go,

Nɛ e kɛ kpekpe kɛ lazu maa pee e sa lo?

Lɔ ɔ ji nyɛ je pãhi nɛ a wo nihi ngɛ yiwutso mi ɔ,

Nɛ nyɛɛ pɛne kpa nɛ ngɛ kuɛpã tso ɔ he ɔ,

Konɛ nihi nɛ a ngɛ mɛ yi mi wae ɔ nɛ a ye a he,

Nɛ nyɛɛ ku kuɛpã tso fɛɛ kuɛpã tso mi enyɔ;

 7 Nɛ nyɛ ha nihi nɛ hwɔ ngɛ mɛ yee ɔ nyɛ niye ní ɔ eko,

Nɛ nyɛɛ ngɔ ohiatsɛmɛ kɛ nihi nɛ a be hi he kɛ ba nyɛ we mi,

Nɛ́ ke nyɛ na nɔ ko nɛ e hɛɛ e he gu ɔ, nyɛ ha lɛ heha nɔ́,

Nɛ nyɛ ko plɛ nyɛ se kɛ wo nyɛ nitsɛmɛ nyɛ nyɛmi.

 8 Kɛkɛ ɔ, nyɛ la a ma kpɛ kaa makɛ la,

Nɛ nyɛ ma ná tsami mlamlaamla.

Nyɛ dami ɔ maa nyɛɛ nyɛ hɛ mi,

Nɛ Yehowa hɛ mi nyami ɔ maa hi nyɛ se nɛ e maa po nyɛ he piɛ.

 9 Kɛkɛ ɔ, nyɛ ma tsɛ, nɛ Yehowa ma he nɔ;

Nyɛ ma fo ya kɛ bi lɛ yemi kɛ buami, nɛ e ma de ke, ‘I ngɛ hiɛ ɔ!’

Ke nyɛ je kuɛpã tso ɔ kɛ je nyɛ kpɛti,

Nɛ nyɛ kpa nihi nine tsɔɔmi, nɛ nyɛ kpa munyu yaya tumi,

10 Ke o ngɔ nɔ́ nɛ mo nitsɛ o* suɔ ɔ kɛ ha nihi nɛ hwɔ ngɛ mɛ yee

Nɛ o ha nɛ nihi nɛ a ngɛ yi mi wami sisi* ɔ tsui nɔ a mi ɔ,

Lɛɛ o la a ma kpɛ ngɛ diblii mi po,

Nɛ o diblii maa pee kaa piani katakata.

11 Yehowa maa tsɔɔ mo blɔ be fɛɛ be

Nɛ e ma ha nɛ o* maa tɔ ngɛ nga kplanaa po nɔ;

E maa wo o wuhi a mi he wami,

Nɛ o ma ba pee kaa abɔɔ nɛ ná nyu fuu,

Kaa pa nɛ nyu tɛ mi gblegbleegble.

12 O he je ɔ, a maa kpale po blema mahi nɛ a hɛ mi kpata a,

Nɛ o maa fia yi nɔhi nɛ be ɔ a sisi tomi ɔmɛ ekohu.

A ma tsɛ mo ke gbogbohi nɛ a ku pue si ɔ a* dlalɔ,

Nɔ nɛ dlaa blɔhi konɛ nihi nɛ a ma wehi ngɛ he.

13 Ke He Jɔɔmi ligbi ɔ he je nɛ o kpa níhi nɛ o bua jɔ he* ɔmɛ a se dimi ngɛ ye ligbi klɔuklɔu ɔ nɔ,

Nɛ o deɔ ke He Jɔɔmi ligbi ɔ ngɛ bua jɔmi nɛ e ji ligbi klɔuklɔu kɛ ha Yehowa kɛ ligbi nɛ e sa kaa a wo hɛ mi nyami,

Nɛ o wo e hɛ mi nyami mohu pe nɛ o maa di níhi nɛ mo nitsɛ o suɔ ɔ se, nɛ́ o maa tu munyuhi nɛ se nami be he ɔ,

14 Lɛɛ, o bua maa jɔ wawɛɛ ngɛ Yehowa mi,

Nɛ ma ha nɛ o maa ye zugba a hehi nɛ ya hiɔwe ɔ nɔ.

Ma ha nɛ o maa ye ní ngɛ o nɛnɛ Yakob gbosi ní ɔ mi,*

Ejakaa Yehowa nya lɛ de.”