Hiob
24 “Mɛni he je nɛ Ope ɔ tui be ko ɔ?
Mɛni he je nɛ nihi nɛ́ a le lɛ ɔ nɛ e ligbi ɔ?*
2 Nihi hiaa ni komɛ a bunahi kɛ yaa se;
A juɔ jijɔhi kɛ yaa a lohwehi a ní yemi he ɔmɛ.
3 A kpɔ̃ɔ bimɛ nɛ a be tsɛ ɔ a tejihi ngɛ a dɛ
Nɛ a kpɔ̃ɔ yalɔyihi hu a nahi nɛ a kɛ ya toɔ awaba.
4 A tsitsɛɛɔ ohiatsɛ kɛ jeɔ blɔ ɔ nɔ pani nya;
Zugba a nɔ nihi nɛ a be yemi kɛ bualɔ ko ɔ ya laa a he ke a na mɛ ɔ.
5 Ohiatsɛmɛ hlaa niye ní kaa nga mi teji ngɛ nga a nɔ;
A hlaa niye ní ngɛ nga kplanaa nɔ kɛ haa a bimɛ.
6 A kpaa ní ngɛ ni kpahi a ngmɔ mi*
Nɛ a ya kpɛteɔ ní ngɛ yiwutsotsɛmɛ a wai ngmɔ mi.
7 A hwɔɔ si kɛ a he gu nɛ́ a wui nɔ́ ko nɔ́ ko;
A be nɔ́ ko nɛ a kɛ maa ha a he ngɛ fĩɛ be mi.
8 Yokuhi a nɔ nyu fɔɔ mɛ kɛ hoɔ;
A kplaa tɛsahi a he ejakaa a be wehi.
9 A kpɔ̃ɔ awusa* kɛ jeɔ nyɔ nya;
Nɛ a ngɔɔ ohiatsɛmɛ a bohi ngɛ a dɛ kɛ ya toɔ awaba,
10 Enɛ ɔ haa nɛ a nyɛɛɔ kɛ a he gu nɛ́ a wui nɔ́ ko nɔ́ ko,
Nɛ hwɔ yeɔ mɛ, be nɛ a ngɛ ngma nɛ a fĩ yi tlomi nya yi tlomi nya amɛ tlooe ɔ.
11 A gboɔ dengme ngɛ tɛ gbogbohi nɛ a ngɛ yokuhi a he ɔ a kpɛ piani katakata;*
A ngãa wai kɛ jeɔ wai yiblii ɔmɛ a mi, se loloolo ɔ, kuma yeɔ mɛ.
12 Nihi nɛ a ngɛ gboe ɔ hii kɛmɛe ngɛ ma a mi;
Nihi nɛ a plaa wawɛɛ ɔ* foɔ ya kɛ biɔ yemi kɛ buami,
Se Mawu nɛ́ enɛ ɔ kaa nɔ́ nɛ sɛ.*
13 Ni komɛ ngɛ nɛ a tsɔɔ atuã kɛ siɔ la;
A yɔse we e blɔ ɔmɛ,
Nɛ a nyɛɛ we e blɔ ɔmɛ a nɔ.
14 Nɔ gbelɔ ɔ teɔ si mɔtu mla;
E gbeɔ nihi nɛ a be yemi kɛ bualɔ ɔ kɛ ohiatsɛmɛ,
Nɛ ke je jɔ ɔ, e ya juɔ.
15 Nɔ́ nɛ gba puɛlɔ hɛngmɛ ngɛ mlɛe pɛ ji kaa du nɛ bu,
E deɔ ke, ‘Nɔ ko nɔ ko be mi nae!
Nɛ e kɛ nɔ́ haa e hɛ mi.
16 Ke diblii wo ɔ, a ywiaa* nihi a sinya nɛ a sɛɔ mi;
Ke je na a, a ngaa sinya kɛ woɔ a yi ngɛ tsu mi.
A li nɔ́ nɛ ji la.
17 Ejakaa mɔtu ngɛ kaa diblii kpii kɛ ha mɛ;
A le gbeye níhi nɛ yaa nɔ ngɛ diblii kpii mi ɔ.
18 Se nyu muɔɔ mɛ kɛ yaa mlamlaamla.*
A maa gbiɛ zugba a fã nɛ ji a blɔ fa mi nɔ́ ɔ.
A be a se kpalee kɛ ya a wai ngmɔ ɔmɛ a mi hu.
19 Kaa bɔ nɛ sapu kɛ je mi la dɔmi haa nɛ snoo sileɔ ɔ,
Jã kɛ nɛ Yɔkɔ* ngɔɔ yayami peeli kɛ hoɔ!
20 E yayo* hɛ maa je e nɔ; gɔgɔ maa ye lɛ.
A be lɛ kaie hu.
Nɛ a maa ku nihi nɛ a dɛ ɔmɛ a mi kaa tso.
21 E peeɔ yosa basabasa,
Nɛ e waa yalɔyo yi mi.
22 Mawu maa ngɔ e he wami ɔ kɛ kpata nɔ nɛ he wa a hɛ mi;
A maa te si kɛ da si mohu lɛɛ, se a be nɔ mi mami ko kaa a maa hi wami mi.
23 Mawu haa nɛ a náa kã nɛ a hiɔ slɔkee,
Se e hɛngmɛ ngɛ nɔ́ fɛɛ nɔ́ nɛ a peeɔ he.
24 A woɔ a nɔ be kpiti ko, kɛkɛ a be hu.
A baa mɛ si nɛ a buaa a nya kaa bɔ nɛ a peeɔ nɔ fɛɛ nɔ ɔ;
A poɔ mɛ kɛ pueɔ he kaa bɔ nɛ a poɔ ngma* a.
25 Jehanɛ ɔ, mɛnɔ ma nyɛ ma de ke lakpatsɛ ji mi
Aloo nɔ́ nɛ i ngɛ dee ɔ pi anɔkuale?”