La
Kɛ ha la nɔ hyɛlɔ ɔ. La nɛ David po.
109 Oo Mawu, i jeɔ o yi, koo pee dii.
2 Ejakaa yiwutsotsɛ kɛ nɔ sisilɔ kɛ a nya tuɔ munyu kɛ siɔ mi.
A kɛ lakpa lilɛ tuɔ ye he munyu;
3 A bɔleɔ mi kɛ ninyɛ munyuhi,
Nɛ a tuaa mi yaka gu.
4 A teɔ si kɛ woɔ mi kɛ toɔ suɔmi nɛ i jeɔ kpo kɛ tsɔɔ mɛ ɔ nane mi;
Se i yaa nɔ nɛ i sɔleɔ.
5 A peeɔ mi yayami kɛ toɔ kpakpa nane mi,
Nɛ a nyɛɔ mi kɛ toɔ suɔmi nɛ i jeɔ kpo kɛ tsɔɔ mɛ ɔ nane mi.
6 Moo hla yiwutsotsɛ ko nɛ e ye e nɔ;
Nɔ nya polɔ* ko nɛ e da si ngɛ e hiɔ nɔ, nɛ e po e nya.
7 Ke a kojo lɛ ɔ, a bu lɛ fɔ;*
A bu e sɔlemi po kaa yayami.
8 Ha e ligbi ɔmɛ nɛ a pee kpiti;
Ha nɛ nɔ kpa nɛ ngɔ e nɔ hyɛmi ní tsumi ɔ.
10 E bimɛ* nɛ a pee nihi nɛ a baa ní kɛ kpaa si,
Nihi nɛ a jeɔ a we doku ɔmɛ a mi kɛ ya hlaa niye ní.
11 Nɔ nɛ paa lɛ nɔ́ ɔ nɛ e kpɔ̃ e níhi tsuo ngɛ e dɛ,*
Nɛ nibwɔhi nɛ a ha e weto ní.
12 Nɔ ko nɔ ko nɛ ko je mi mi jɔmi* kpo kɛ tsɔɔ lɛ,
Nɛ e bimɛ nɛ a ji awusahi ɔ hu, nɔ ko nɔ ko nɛ ko na mɛ mɔbɔ.
13 Ha nɛ a kpata e sisi bimɛ a hɛ mi;
A gbɛ* a biɛ nɛ́ yi nɔ nɛ maa nyɛɛ se ɔ ko ba le a biɛ tete po.
14 Yehowa nɛ kai e nɛmɛ ɔmɛ a tɔmi ɔ,
Nɛ e ko gbɛ* e nyɛ ɔ yayami ɔ.
15 Yehowa hɛ nɛ hi nɔ́ nɛ a pee ɔ nɔ be fɛɛ be;
Nɛ e ko ha nɛ a kai mɛ ngɛ zugba a nɔ hu.
16 Ejakaa e kaii we kaa e ma je mi mi jɔmi* kpo,
Mohu ɔ, e ya nɔ nɛ e fiee nɔ nɛ a waa lɛ yi mi, ohiatsɛ, kɛ nɔ nɛ e tsui kuɔ ɔ se
Konɛ e gbe lɛ.
17 E suɔ nɔ gbiɛmi, lɔ ɔ he ɔ, gbiɛmi nɔuu lɛ ba e nɔ;
E sume nɔ jɔɔmi, lɔ ɔ he ɔ, e ná we jɔɔmi ko.
18 Gbiɛmi ha e he kaa tade.
Nɛ a plɛ kɛ wo e nɔmlɔ tso ɔ mi kaa nyu,
Kɛ wo e wu ɔmɛ a mi kaa nu.
19 E gbiɛmi ɔ nɛ pee kaa bo nɛ e kɛ ha e he,
Kɛ mlɛ mi fimi nɔ́ nɛ e kɛ fĩɔ e mlɛ mi be fɛɛ be.
20 Enɛ ɔ ji hiɔwo nɛ Yehowa kɛ haa nɔ nɛ teɔ si kɛ woɔ mi,
Kɛ nihi nɛ a tuɔ munyu yayahi kɛ siɔ mi ɔ* nɛ.
21 Se mo Nyɔmtsɛ Matsɛ Yehowa,
Moo je ngmlaa ha mi ngɛ o biɛ ɔ he je.
Mo kpɔ̃ mi, ejakaa o suɔmi nɛ se pui ɔ hi.
22 Ejakaa ohiatsɛ kɛ nɔ nɛ be yemi kɛ bualɔ ji mi,
Nɛ a ngɔ nɔ́ kɛ gbɔ ye tsui.
23 I bee kɛ yaa kaa nini nɛ ngɛ laae;
A huanya mi kɛ fɔ he kaa baalɛ.
24 Hwɔ hami sɔuu ha nɛ ye nakutso ɔmɛ a mi jɔ;
I flãã, nɛ i ta he lo.*
25 I ba pee a we ahlua bɔmi nɔ́.
Ke a na mi ɔ, a mimiɛɔ a yi.
26 Oo Yehowa ye Mawu, moo ye bua mi;
Ngɔɔ o suɔmi nɛ se pui ɔ kɛ he ye yi wami.
27 Ha nɛ a le kaa nɔ́ nɛ ɔ, o nine ngɛ mi;
Oo Yehowa, ha nɛ a le kaa mo lɛ o tsu nɔ́ nɛ ɔ.
28 Ye he nyɛli ɔmɛ maa gbiɛ mi, se moo lɛɛ moo jɔɔ mi.
Ke a te si kɛ wo mi ɔ, a hɛ mi nɛ pue si,
Se ha nɛ o sɔmɔlɔ ɔ nɛ nya.
29 Nihi nɛ a teɔ si kɛ woɔ mi ɔ, ha nɛ hɛ mi si puemi nɛ ha a he;
A zo ɔ nɛ ha a he kaa tade klɔii.*
30 I kɛ ye nya ma je Yehowa yi wawɛɛ;
Ma je e yi ngɛ nimli babauu a hɛ mi.
31 Ejakaa e maa da ohiatsɛ hiɔ nɔ,
Konɛ e he e yi wami kɛ je nihi nɛ a buɔ lɛ* fɔ ɔ a dɛ mi.