Yesaya
23 Munyu nɛ a tu kɛ kɔ Tiro he ji nɛ ɔ nɛ:
Nyɛ Tarshish melehi, nyɛ fo ya boboobo!
Ejakaa a kpata mele si dami he ɔ hɛ mi, nɔ ko be nyɛe maa ya lejɛ ɔ.
A je kɛ tsɔɔ mɛ ngɛ Kitim zugba a nɔ.
2 Nyɛ nihi nɛ́ nyɛ ngɛ wo nya zugba a nɔ, nyɛɛ pee dii.
Sidon jua yeli ɔmɛ nɛ a poɔ wo ɔ nɛ a kɛ nyɛ ba yeɔ jua a ha nɛ nyɛ ná ní.
3 Shihor* ngma* kɛ Nilo niba ní ɔ gu nyuhi babauu nɔ kɛ ba,
Enɛ ɔ ha nɛ e ná ní,
Nɛ e ha je ma amɛ ná he se.
4 Oo Sidon, zo nɛ gbe mo, mo wo nya ma nɛ o he wa,
Ejakaa wo ɔ de ke:
I nui kɔɔmi hyɛ, nɛ i fɔ we hyɛ,
Nɛ i lɛ́ binyumuwi kɛ biyiwi* hyɛ.”
5 Nihi maa hao ke a nu amaniɛ bɔmi nɛ kɔɔ Tiro he ɔ
Kaa bɔ nɛ a pee benɛ a nu Egipt he amaniɛ bɔmi ɔ.
6 Nyɛɛ po wo ɔ kɛ ho Tarshish ya!
Nyɛ fo ya boboobo nyɛ nihi nɛ nyɛ ngɛ wo nya zugba a nɔ.
7 Anɛ nyɛ ma nɛ a po blema lokoo nɛ bua jɔmi hyi lɛ tɔ ɔ ji nɛ ɔ lo?
Jinɛ be ko nɛ be ɔ, e nane kɛ lɛ yaa mahi nɛ a ngɛ tsitsaa nɔ konɛ e ya hi lejɛ ɔ.
8 Mɛnɔ lɛ to ga nɛ ɔ kɛ si Tiro,
Nɔ nɛ buɔ nihi matsɛ pɛɛ,
Nɛ e jua yeli ɔmɛ ji odehehi,
Nɛ a wo e jua yeli ɔmɛ a hɛ mi nyami ngɛ zugba a tsuo nɔ ɔ?
9 Yehowa tabohiatsɛ ɔ nitsɛ lɛ to ga nɛ ɔ,
Kaa e ma pue e he nɔ womi ɔ kɛ e he fɛu ɔ hɛ mi si,
Konɛ e pue nihi tsuo nɛ a wo a hɛ mi nyami ngɛ zugba a nɔ ɔ hɛ mi si.
10 Oo Tarshish biyo, moo po mi kɛ be ngɛ o zugba a nɔ kɛ ho kaa Nilo Pa a.
Lɛ si dami he ko be hu.
11 E kpa e nine mi ngɛ wo ɔ nɔ;
E mimiɛ matsɛ yemi ɔmɛ.
Yehowa fã kaa a kpata Foinike he piɛ pomi he ɔmɛ.
12 Nɛ e de ke: “Oo Sidon biyo yomiyo,
Mo nɛ a wa mo yi mi, o be nyae hu.
Tee si nɛ o po mi kɛ ho Kitim ya.
Lejɛ ɔ po ɔ, o he mi be mo jɔe.”
13 Hyɛ! Kaldeabi ɔmɛ a zugba a.
Kaldeabi ɔmɛ lɛ a ha nɛ lejɛ ɔ pee lohwe awi yeli a hi he,
Se pi Asiriabi ɔmɛ.
A ma ma yi sami mɔhi;
A hule Tiro mɔ ngua amɛ,
A hule lɛ pue si butuu.
14 Nyɛ Tarshish melehi, nyɛ fo ya boboobo,
Ejakaa a kpata nyɛ wesa he ɔmɛ a hɛ mi.
15 Jamɛ a ligbi ɔ, nihi a hɛ maa je Tiro nɔ jeha 70, kaa jeha* nɛ matsɛ kake yeɔ ɔ nɔuu. Ngɛ jeha 70 nyagbe ɔ, nɔ́ nɛ ngɛ tuutuu polɔ la a mi ɔ maa ba Tiro nɔ:
16 “Mo tuutuu polɔ nɛ nihi a hɛ je o nɔ, wo saku nɛ o ya kpa ma a mi.
Fiaa o saku ɔ saminya;
La lahi fuu,
Konɛ a kai mo.”
17 Jeha 70 nyagbe ɔ, Yehowa ma kai Tiro, nɛ e nine maa su e hiɔwo ɔ nɔ ekohu, nɛ e kɛ je ɔ mi matsɛ yemi ɔmɛ tsuo nɛ ngɛ zugba a nɔ ɔ maa bɔ ajuama. 18 Se, se nɛ e ná a kɛ hiɔ nɛ a wo lɛ ɔ ma ba pee níhi nɛ a ngɛ klɔuklɔu kɛ ha Yehowa. A kɛ be toe, nɛ a be nɔ laae hulɔ, ejakaa e hiɔwo ɔ ma ba pee nihi nɛ a ngɛ Yehowa hɛ mi ɔ a nɔ́, konɛ a ye ní nɛ a tɔ, nɛ a wo tade nɛ ngɛ fɛu.