Hiob
5 I kpa mo pɛɛ, mo tsɛ nɛ o hyɛ kaa nɔ ko ngɛ nɛ e ma he mo nɔ lo?
Ni klɔuklɔu ɔmɛ a kpɛti mɛnɔ ngɔ lɛ o maa ya?
2 Ejakaa mi mi la maa gbe kuasia,
Nɛ hɛkɔ maa gbe nɔ nɛ e sisimi yi ɔ.
3 I na kuasia ko nɛ e ye manye kaa tso nɛ sipoku ngɛ zu mi sɛe.
Se tlukaa, a gbiɛ e sihi he ɔ.
4 E bimɛ be slɔkee,
A pueɔ a hɛ mi si ngɛ ma agbo ɔ nya, nɛ nɔ ko be nɛ ma he a yi wami.
5 Ní nɛ e kpa a hu, nɔ nɛ hwɔ ngɛ lɛ yee ɔ ba yeɔ,
E ba woɔ ní nɛmɛ nɛ a ngɛ mio ɔmɛ a kpɛ po kɛ piɛɔ he,
Nɛ a kpɔ̃ɔ̃ níhi nɛ kuasia kɛ e bimɛ ɔmɛ ngɛ ɔ ngɛ a dɛ.
6 Ejakaa pi bunyuku mi nɛ ní yayahi puɛɔ kɛ jeɔ,
Nɛ pi zu mi hu nɛ haomi puɛɔ kɛ jeɔ.
7 Kaa bɔ nɛ la lilɛ teɔ kɛ yaa hiɔwe ɔ,
Jã nɔuu kɛ̃ nɛ nɔmlɔ adesa hu, bɔ fɛɛ bɔ nɛ ji ɔ, haomi maa ba e nɔ.
8 Se kaa imi ji mo ɔ, jinɛ i ko kpa Mawu pɛɛ,
Nɛ i ko tu ye sane ɔ kɛ ko wo Mawu dɛ.
9 Nɔ nɛ peeɔ ní nguanguahi nɛ wa juɛmi sui he,
Nyakpɛ níhi nɛ wa be nyɛe maa kane ɔ.
10 E haa nɛ hiɔmi nɛɔ kɛ pueɔ zugba a nɔ,
Nɛ e haa nɛ ngmɔ ní ɔmɛ náa nyu.
11 E woɔ nimli guhi a nɔ,
Nɛ e heɔ nihi nɛ a hao ɔ a yi wami.
12 E haa nɛ nihi nɛ a toɔ ga a, a ga tsɔmi ɔ peeɔ yaka,
Enɛ ɔ haa nɛ a nine nya ní tsumi ɔmɛ yi manye.
13 E haa nɛ nihi nɛ a ngɛ juɛmi ɔ nɔɔ klama nɛ mɛ nitsɛmɛ a tsɔ̃ ɔ mi.
Bɔ nɛ pee nɛ a yi mi tomi ɔmɛ nɛ a pee yaka.
14 Ke je na po, mɛɛ lɛɛ diblii bɔle mɛ kɛ kpe,
Piani nɛ la ngɛ po, a hii si tataae kaa nɔ́ nɛ diblii mi lɛ a ngɛ nyɛɛe.
15 E heɔ nihi a yi wami kɛ jeɔ a lilɛ nɛ ngɛ kaa klaate ɔ nya,
E heɔ ohiatsɛ yi wami kɛ jeɔ nɔ nɛ e he wa a dɛ mi,
16 Bɔ nɛ pee nɛ nimli guhi nɛ́ a ná hɛnɔkami,
Se nihi nɛ a pee we nɔ́ nɛ da a lɛɛ, e ma má a nya.
17 Hyɛ! Nɔ nɛ Mawu kãa e hɛ mi ɔ ngɛ bua jɔmi;
Enɛ ɔ he ɔ, ke Ope ɔ ngɛ mo tsɔsee ɔ, ko kua!
18 E plaa nɔ, se lɛ nɔuu kɛ̃ e fĩɔ pa amɛ a nɔ;
E kuɔ nɔ, se lɛ nɔuu kɛ̃ e kɛ e nine tsaa.
19 E ma he o yi wami kɛ je amanehluhi ekpa mi,
Nɛ kpaagone ɔ po lɛɛ, e be mo awi yee.
20 Ke hwɔ ba a, e ma kpɔ̃ mo kɛ je gbenɔ dɛ mi,
Nɛ ke ta ba a, e ma kpɔ̃ mo kɛ je klaate he wami nya.
21 E maa bu o he kɛ je lilɛ nɛ fiaa nɔ kaa kpa a he,
Nɛ o be gbeye yee ke hɛ mi kpatami ba.
22 Hɛ mi kpatami kɛ hwɔ a he maa pee mo muɔ,
Nɛ o be lohwe awi yeli nɛ a ngɛ zugba a nɔ gbeye yee.
23 Ejakaa tɛhi nɛ a ngɛ nga mi ɔ be mo awi yee,*
Nɛ nga mi lohwe awi yeli kɛ mo maa hi si ngɛ tue mi jɔmi mi.
24 O maa na kaa o bo tsu ɔ ngɛ slɔkee,*
Nɛ ke o ya hyɛ o lohwehi a ní yemi he ɔ, o maa na kaa nɔ́ ko nɔ́ ko laa we.
25 O bimɛ maa hiɛ babauu,
Nɛ o sisi bimɛ maa hiɛ kaa nga ngɛ zugba a nɔ.
26 Loko o ma gbo ɔ, o maa hi he wami loloolo,
Kaa ngma* nɛ́ a bua nya nɛ́ a fĩ yi tlomi nya ngɛ ngma kpami be mi.
27 Hyɛ! Wa hla níhi a mi, nɛ wa na kaa e ji anɔkuale.
Moo bu tue nɛ o kplɛɛ nɔ.”