Hiob
41 “Anɛ o ma nyɛ maa ngɔ gbowe kɛ kpa kɛ nu Leviatan* lo
Aloo o kɛ kpa ma nyɛ maa fĩ e lilɛ kɛ muɔ si lo?
3 Anɛ e ma kpa mo pɛɛ si abɔ lo,
Aloo e kɛ mo maa tu munyu blɛuu lo?
4 Anɛ e kɛ mo maa so,
Konɛ o ngɔ lɛ kɛ pee o nyɔguɛ kɛ ya neneene lo?
5 Anɛ o kɛ lɛ ma fiɛ kaa bɔ nɛ a kɛ lohwe pɛlitsɛ fiɛɔ ɔ lo
Aloo o kɛ kpa maa fĩ lɛ kɛ ha o biyihi tsɔwi ɔmɛ lo?
6 Anɛ jua yeli maa ngɔ nɔ́ ko kɛ ba tsake lɛ lo?
Anɛ a ma gba mi kɛ ha jua yeli lo?
7 Anɛ o kɛ akplɔ ma nyɛ maa gbɔɔgbɔɔ e he womi ɔ lo
Aloo o kɛ lo gbemi akplɔhi ma nyɛ maa gbɔɔgbɔɔ e yi lo?
8 Moo ngɔ o nine kɛ ta e he;
O ma kai ta nɛ ya nɔ ɔ, nɛ o be jã pee hu kɔkɔɔkɔ!
9 Hɛnɔkami nɛ nɔ ko ma ná kaa e maa nu lɛ ɔ maa pee yaka.
Ke o hɛngmɛ gba e nɔ kɛkɛ po ɔ, o tsui maa po.*
10 Nɔ ko be nɛ e ma nyɛ maa ka kaa e maa wo e hɛ mi la.
Lɔ ɔ, mɛnɔ tutuutu lɛ ma nyɛ maa da ye hɛ mi?
11 Mɛnɔ lɛ sɛ hlami ha mi nɔ́ ko nɛ́ lɔ ɔ he je ɔ, e sa nɛ ma to lɛ nane mi?
Nɔ́ fɛɛ nɔ́ nɛ ngɛ hiɔwe sisi ɔ, ye níhi.
12 Ma ya nɔ ma tu e nanehi,
E he wami ngua a kɛ e nɔmlɔ tso ɔ nɛ a pee lɛ saminyayoo ɔ he munyu.
13 Mɛnɔ ma nyɛ ma je e he womi nɛ ti ɔ?
Mɛnɔ ma nyɛ maa sɛ e nya nɛ e bli mi ɔ mi?
14 Mɛnɔ ma nyɛ ma bli e nya* sinya amɛ?
E lungu ɔmɛ tsuo he ngɛ gbeye.
15 E ngɛ totohi ngɛ e se mi nɛ a to mɛ ngɛ zãhi a mi*
Nɛ a sɔu a nya kɛ bla.
16 A tsa a sibi kpɛkpɛtɛɛ
Bɔ nɛ kɔɔhiɔ po be nyɛe maa gu a kpɛti.
17 A mɛtɛ a sibi a he wawɛɛ;
A du a sibi a he saminya nɛ́ a be nyɛe ma gba a kpɛti.
18 Ke e fli e gugwɔ mi ɔ, e kpɛɔ la,
Nɛ e hɛngmɛhi ngɛ kaa mɔtu la.
19 Oslabai gbami jeɔ e nya mi;
Nɛ la lilɛhi jeɔ kpo ngɛ mi.
20 Lasuku jeɔ kpo ngɛ e gugwɔ mi,
Kaa flɔɔnɔɔ nɛ a kɛ go slɛ la ngɛ mi.
21 Ke e wo mumu ɔ, e haa nɛ hã sɛɔ,*
nɛ la lilɛhi tuɔ kɛ jeɔ e nya mi.
22 He wami ngɛ e kuɛ mi wawɛɛ,
Nihi tsuo nɛ a kɛ lɛ kpeɔ ɔ, gbeye pueɔ a nɔ.
23 E he lo ɔ nɛ kuu kɛ fɔ a sibi a nɔ ɔ mɛtɛ a sibi wawɛɛ;
A he wa wawɛɛ kaa nɔ́ nɛ dade a kɛ pee nɛ́ be hie kpɔmi.
24 E tsui he wa kaa tɛ,
Ee, e he wa kaa wɛ tɛ.
25 Ke e wó e he nɔ ɔ, katsɛmɛ tete po yeɔ gbeye;
Bɔ nɛ e hosoɔ e he ha a, haa nɛ nihi nuɔ sawale.
26 Klaate fɛɛ klaate nɛ maa sa e he ɔ be nyɛe maa pee lɛ nɔ́ ko;
Nɛ akplɔ loo kɛ̃ɛ̃ mi bi loo ta hwumi nɔ́ ko be nyɛe maa pee lɛ nɔ́ ko nɔ́ ko.
27 Dade ngɛ kaa nga ha lɛ,
Nɛ akɔblee hu ngɛ kaa tso nɛ sa kɛ ha lɛ.
28 Kɛ̃ɛ̃ mi bi ko be nyɛe maa wo lɛ fo;
Amlami tɛ ngɛ kaa nga gbigbli kɛ ha lɛ.
29 Tsokpoti ngɛ kaa nga gbigbli ha lɛ,
Nɛ ke e nu akplɔ pɛmi he ɔ, e muɔɔ.
30 Totohi nɛ ngɛ e mi si ɔ ngɛ kaa buɛ kokoehi nɛ a nya ba;
E guɔ mɔsɔ mi nɛ e siɔ okadi ngɛ e se kaa ngma fiaami tso.
31 E haa nɛ nyu nɛ mi kuɔ fiaa kaa nyu ngɛ buɛ mi;
E klɛɔ wo ɔ mi kaa nu buɛ.
32 E haa nɛ nyu nɛ ngɛ e se ɔ fiaa hwɔli ke e ngɛ silee ɔ.
Nɔ ko ma susu kaa nyu nɛ mi kuɔ ɔ puɛ mua.
33 Nɔ́ ko nɔ́ ko be je nɛ ɔ mi nɛ ngɛ kaa lɛ,
Bɔ nɛ a bɔ lɛ ha a, e yi nɔ́ ko nɔ́ ko gbeye.
34 Nɔ́ fɛɛ nɔ́ ko nɛ woɔ e he nɔ ɔ, e hyɛɔ lɛ too.
Lɛ ji lohwe awi yeli ɔmɛ tsuo a matsɛ.”