Yesaya
10 Musu tloo nihi nɛ a kɛ blɔ tsɔɔmi yaya haa,
Nihi nɛ daa nɛ ɔ, a woɔ mlaahi nɛ a mi wa,
2 Konɛ ohiatsɛmɛ a nine nɛ ko su níhi nɛ e sa kaa a ná ngɛ mlaa nya a nɔ,
Nɛ́ a ko ye dami sane kɛ ha ye we bi ɔmɛ a kpɛti nihi nɛ a ní ngɛ mɔbɔ ɔ,
A ngɔɔ yalɔyihi kɛ peeɔ kaa ta yibu ní,
Nɛ a ngɔɔ awusahi* kɛ peeɔ kaa níhi nɛ a ha!
3 Mɛni nyɛ maa pee ngɛ kojomi* ligbi ɔ nɔ,
Benɛ hɛ mi kpatami maa je tsitsaa kɛ ba a?
Mɛnɔ ngɔ lɛ nyɛ maa tu fo kɛ ya bi yemi kɛ buami ngɛ,
Nɛ jije nyɛ ma si nyɛ ní babauu* ɔ ngɛ?
4 Nɔ́ pɛ nɛ maa ba ji, nyɛ ma sɔ̃ si ngɛ nihi nɛ a wo mɛ tsu ɔ a kpɛti,
Aloo nyɛ maa nɔ ngɛ nihi nɛ a gbe mɛ pue si ɔ a kpɛti.
Enɛ ɔmɛ tsuo a he je ɔ, ngmɛɛ we e mi mi fumi ɔ he,
Mohu ɔ, e kpa e nine mi loloolo konɛ e fia mɛ nɔ́.
5 “Hyɛ! Asiriano ɔ,
Lɛ ji tso nɛ ma kɛ je ye mi mi fumi ɔ kpo
Kɛ dɛma tso nɛ ngɛ a dɛ mi kɛ ha ye kojomi ɔ!
6 Ma tsɔ lɛ nɛ e ya tua je ma ko nɛ kua hemi kɛ yemi ɔ,
E ya tua nihi nɛ a wo ye mi mi la a;
Ma fã lɛ konɛ e muɔɔ ta yibu ní babauu nɛ e ha ní fuu,
Nɛ́ e naa a nɔ kaa mɔsɔ ngɛ gbɛjegbɛ ɔmɛ a nɔ.
7 Se e be gbae kɛ ba blɔ nɛ ɔ nɔ,
Nɛ e tsui be ga ko toe ngɛ blɔ nɛ ɔ nɔ;
Ejakaa e ngɛ e tsui mi kaa e ma kpata nihi a hɛ mi,
Kaa e maa poo je mahi babauu kɛ fɔ he, pi nihi bɔɔ ko.
8 Ejakaa e deɔ ke,
‘Anɛ ye ma nikɔtɔma amɛ ɔ, pi matsɛmɛ ji mɛ tsuo lo?
9 Anɛ Kalno be kaa Karkemish lo?
Anɛ Hamat be kaa Arpad lo?
Anɛ Samaria be kaa Damasko lo?
10 Ye nine su matsɛ yemihi nɛ amagahi nɛ se nami be a he ngɛ a mi ɔ nɔ,
A we amaga amɛ hiɛ kulaa pe Yerusalem kɛ Samaria ní ɔmɛ!
11 Anɛ i be Yerusalem kɛ e wɔ ɔmɛ hu pee
Kaa bɔ nɛ i pee Samaria kɛ e mawuhi nɛ se nami be a he ɔ lo?’
12 “Ke Yehowa gbe e ní tsumi ɔ tsuo nya ngɛ Zion Yoku ɔ nɔ kɛ Yerusalem ɔ, e maa* gbla Asiria matsɛ ɔ tue ngɛ e nɔ buimi tsui ɔ kɛ e kokotii peemi, kɛ e he nɔ womi hɛngmɛ ɔ he je. 13 Ejakaa e deɔ ke,
‘Ma pee nɔ́ nɛ ɔ kɛ ye nine si wami,
Kɛ ye juɛmi, ejakaa i ji juɛmitsɛ.
Ma je ma amɛ a huzu ɔmɛ,
Nɛ ma ha a juetli ɔmɛ,
Nɛ ma ba nihi nɛ a ngɛ a mi ɔ si kaa he walɔ.
14 Ye nine maa su ma amɛ a níhi a nɔ
Kaa nɔ ko nɛ e kɛ e nine wo lohwe pɛlitsɛ tsu mi;
Nɛ ma bua zugba a tsuo nya
Kaa nɔ ko nɛ e ngɛ hluihi nɛ a kua nya buae!
Nɔ ko be e pɛli mi fiae, aloo e pa e nya mi, aloo e pɛ fifi.’”
15 Anɛ gbiɛ ma wo e he nɔ ngɛ nɔ nɛ ngɔɔ lɛ kɛ poɔ nɔ́ ɔ nɔ lo?
Anɛ sau ma wo e he nɔ ngɛ nɔ nɛ ngɔɔ lɛ kɛ poɔ nɔ́ ɔ nɔ lo?
Anɛ dɛma tso ma nyɛ maa fɔ̃ nɔ nɛ hɛɛɔ lɛ ɔ lo?
Aloo tso ma nyɛ ma wo nɔ nɛ hɛɛɔ lɛ ɔ nɔ lo?
16 Enɛ ɔ he ɔ, anɔkuale Nyɔmtsɛ ɔ, Yehowa tabohiatsɛ ɔ
Ma ha nɛ e nihi nɛ a kle ɔ maa flaa kanyakanya,
Nɛ e ma ha nɛ la ko maa tso ngɛ e hɛ mi nyami ɔ sisi.
17 Israel La a maa pee la nɛ ngɛ tsoe,
Nɛ e Nɔ Klɔuklɔu ɔ maa pee la lilɛ;
E maa tso nɛ e maa sã e hu ɔmɛ kɛ e mio tso ɔmɛ ngɛ ligbi kake mi.
18 E ma kpata e hue tso ɔ kɛ e abɔɔ kɛ mi tsohi nɛ woɔ yiblii ɔ a hɛ mi nyami ɔ hɛ mi kulaa;*
E maa pee kaa bɔ nɛ hiɔ haa nɛ hiɔtsɛ gbɔjɔɔ ɔ.
19 E hue tso ɔ mi tsohi nɛ maa piɛ ɔ
Be hiɛe kulaa, nɛ jokuɛ nyumuyo ma nyɛ maa kane mɛ.
20 Jamɛ a ligbi ɔ, Israelbi nɛ piɛ ɔ
Kɛ Yakob we ɔ mi bimɛ nɛ a yi ná wami ɔ
Be a he ngɔe kɛ kpasa nɔ nɛ fia mɛ nɔ́ ɔ hu;
Mohu ɔ, a kɛ a he ma kpasa Yehowa,
Israel Nɔ Klɔuklɔu ɔ ngɛ anɔkuale yemi mi.
21 Nihi nɛ a maa piɛ ɔ pɛ lɛ a maa kpale a se,
Yakob sisi bimɛ nɛ maa piɛ ɔ maa kpale kɛ ya Mawu He Walɔ ɔ ngɔ.
22 Oo Israel, e ngɛ mi kaa o we bi ɔmɛ
A he hiɛ kaa wo nya zia* mohu lɛɛ,
Se a kpɛti nihi nɛ a maa piɛ ɔ pɛ lɛ a maa kpale a se kɛ ba.
A ma nya si kaa a ma kpata a hɛ mi kulaa,
Nɛ dami sane yemi maa ha a nɔ.*
23 Ee, hɛ mi kpatami nɛ Nyɔmtsɛ Matsɛ Yehowa tabohiatsɛ ɔ ma nya si ɔ,
A ma tsu he ní ngɛ zugba a nɔ tsuo.
24 Enɛ ɔ he ɔ, nɔ́ nɛ Nyɔmtsɛ Matsɛ Yehowa tabohiatsɛ ɔ ngɛ dee ji nɛ ɔ nɛ: “Ye we bi nɛ nyɛ ngɛ Zion, Asiriano ɔ nɛ jinɛ e ngɔɔ tso kɛ fiaa nyɛ, nɛ e woɔ e dɛma tso ɔ nɔ kɛ ba tuaa nyɛ kaa bɔ nɛ Egipt pee ɔ, nyɛ ko ye gbeye ngɛ e he je. 25 Ejakaa e be kɛe kulaa nɛ kojomi ɔ maa ba nyagbe; ma ngɔ ye we abofu ɔ kɛ kple a nɔ nɛ a hɛ mi ma kpata. 26 Yehowa tabohiatsɛ ɔ ma je kpa kɛ wo a he, kaa bɔ nɛ e pee Midian benɛ e ye e nɔ kunimi ngɛ Oreb tɛsa a he ɔ. Nɛ e dɛma tso ɔ maa hi wo ɔ yi nɔ, nɛ e ma wo nɔ kaa bɔ nɛ e pee benɛ e ye Egipt nɔ kunimi ɔ.
27 Jamɛ a ligbi ɔ, e tlomi ɔ maa je o konɔ,
Nɛ e kuɛpã tso ɔ maa je o kuɛ,
Nɛ kuɛpã tso ɔ maa ku ngɛ nu ɔ he je.”
28 E ba Aiyat,
E gu Migron kɛ be;
E ngɔ e tlomi ɔmɛ kɛ ya ma Mikmash.
29 A po pa a ngɛ pa pomi he ɔ;
A hwɔ Geba kɛ ya si be nɛ je na;
Rama he do blibliibli, Saul ma nɛ ji Gibea tu fo.
30 Oo Galim biyo, kpa ngmlaa nɛ o ké!
Oo Laisha, ta tue!
Oo Anatot, o ní ngɛ mɔbɔ!
31 Madmena tu fo kɛ je.
Nihi nɛ a ngɛ Gebim ɔ hla he ko nɛ a ya sa we ngɛ.
32 Mwɔnɛ ligbi nɛ ɔ, e maa da si ngɛ Nob.
E huanya e kɔ̃ ɔ kɛ tsɔɔ Zion biyo ɔ yoku ɔ,
Yerusalem yoku wayo ɔ.
33 Hyɛ! anɔkuale Nyɔmtsɛ ɔ, Yehowa tabohiatsɛ ɔ
Ngɛ tso kɔnihi suae kɛ ngɛ si puee gbiagbia;
E ngɛ tsohi nɛ a ka pe kulaa a pooe kɛ pue si,
Nɛ e ngɛ nihi nɛ a woɔ a he nɔ ɔ si bae.
34 E ngɔ ní tsumi dade* kɛ ngɛ hue tso nɛ mi ti pooe kɛ ngɛ si puee,
Nɛ he walɔ ko maa tsɛ̃ Lebanon kɛ fia si.