1 Kronika
26 Agbo nya buli ɔmɛ a kuu ɔmɛ ji nɛ ɔmɛ nɛ: ngɛ Korabi ɔmɛ a kpɛti ɔ, Meshelemia, Kore binyumu ɔ. E je Asaf binyumu ɔmɛ a kpɛti. 2 Meshelemia binyumuhi ji nɛ ɔmɛ nɛ: Zakaria ji e kekleekle bi, Yediael ji e bi enyɔne, Zebadia ji e bi etɛne, Yatniel ji e bi eywiɛne, 3 Elam ji e bi enuɔne, Yehohanan ji e bi ekpane, Elieho Enai ji e bi kpaagone. 4 Obed Edom binyumuhi ji nɛ ɔmɛ nɛ: Shemaya ji e kekleekle bi, Yehozabad ji e bi enyɔne, Yoa ji e bi etɛne, Saka ji e bi eywiɛne, Netanel ji e bi enuɔne, 5 Amiel ji e bi ekpane, Isakar ji e bi kpaagone, nɛ Peuletai ji e bi kpaanyɔne; ejakaa Mawu jɔɔ lɛ.
6 Nɛ a fɔ binyumuhi kɛ ha e binyumu Shemaya, nɛ a ji nɔ yeli ngɛ a tsɛmɛ a we ɔ, ejakaa a ji nyumuhi katsɛmɛ. 7 Shemaya binyumuhi ji: Otni, Refael, Obed, kɛ Elzabad; nɛ e nyɛminyumuhi nɛ ji Elihu kɛ Semakia hu ji nyumuhi katsɛmɛ. 8 Ni nɛ ɔmɛ tsuo ji Obed Edom binyumuhi; a kɛ a binyumu ɔmɛ, kɛ a nyɛminyumu ɔmɛ ji nyumuhi katsɛmɛ nɛ a he su kɛ ha sɔmɔmi ní tsumi ɔ, Obed Edom we bi ɔmɛ a yibɔ ji 62. 9 Meshelemia ngɛ binyumuhi kɛ nyɛminyumuhi, nyumuhi katsɛmɛ 18. 10 Nɛ Hosa nɛ je Merari binyumu ɔmɛ a kpɛti ɔ ngɛ binyumuhi. Shimri ji a nyatsɛ, e ngɛ mi kaa pi lɛ ji kekleekle bi mohu lɛɛ, se e tsɛ ɔ hla lɛ kaa a nyatsɛ, 11 Hilkia ji nɔ enyɔne, Tebalia ji nɔ etɛne, Zakaria ji nɔ eywiɛne. Hosa binyumu ɔmɛ kɛ e nyɛminyumu ɔmɛ tsuo a yibɔ ji 13.
12 Ngɛ agbo nya buli ɔmɛ a kuu nɛ ɔmɛ a mi ɔ, nyatsɛmɛ ɔmɛ a ní tsumi ɔmɛ ngɛ kaa a nyɛmimɛ ɔmɛ a ní tsumi ɔmɛ nɔuu, a sɔmɔɔ ngɛ Yehowa we ɔ. 13 Lɔ ɔ he ɔ, a fɔ sɔ ngɛ a tsɛmɛ a we ɔmɛ a nya kɛ gba agbo slɔɔto ɔmɛ, nɔ nyafii jio, nɔmlɔ ngua jio. 14 Benɛ a fɔ sɔ ɔ, a ngɔ puje he ɔ kɛ ha Shelemia. Nɛ ngɛ e binyumu Zakaria, nɛ ji ga wolɔ nɛ ngɛ juɛmi ɔ blɔ fa mi ɔ, benɛ a fɔ sɔ ɔ, e ná yiti je. 15 Obed Edom ná woyi je, nɛ a ngɔ nito he ɔmɛ kɛ wo e binyumu ɔmɛ a dɛ. 16 Shupim kɛ Hosa ná pusinɔ he, ngɛ Shaleket Agbo ɔ nɛ ngɛ blɔ ngua a nɛ kuɔ kɛ ho ɔ kasa nya, buli a kuu ngɛ buli a kuu kasa nya; 17 Levibi ekpa ngɛ puje he; ni eywiɛ ngɛ yiti je daa ligbi, nɛ ni eywiɛ ngɛ woyi je daa ligbi; nɛ ngɛ nito he ɔmɛ ɔ, ni enyɔ ngɛ hiɛ, nɛ ni enyɔ ngɛ hiɛ; 18 nɛ ngɛ ablanaa a nɛ ngɛ pusinɔ he ɔ blɔ fa mi ɔ, ni eywiɛ ngɛ blɔ ngua a he, nɛ ni enyɔ ngɛ ablanaa a nɔ. 19 Bɔ nɛ a gba agbo nya buli nɛ a je Korabi ɔmɛ kɛ Meraribi ɔmɛ a binyumu ɔmɛ a kpɛti kɛ wo kuuhi a mi ha a ji nɛ ɔmɛ nɛ.
20 Ngɛ Levibi ɔmɛ a blɔ fa mi ɔ, Ahiya ji nɔ nɛ hyɛɔ anɔkuale Mawu ɔ we ɔ juetli to he ɔmɛ kɛ níhi nɛ a pee mɛ klɔuklɔu* ɔ a to he ɔmɛ a nɔ. 21 Ngɛ Ladan binyumu ɔmɛ, nɛ ji Gershonbi ɔmɛ a binyumu ɔmɛ nɛ a je Ladan mi, nɛ ji a tsɛmɛ a we ɔmɛ a nyatsɛmɛ kɛ ha Ladan, Gershonno ɔ a kpɛti ɔ, Yehieli 22 kɛ Yehieli binyumu ɔmɛ, Zetam kɛ e nyɛminyumu Yoel. Mɛ ji nihi nɛ a hyɛɔ Yehowa we ɔ juetli to he ɔmɛ a nɔ. 23 Ngɛ Amrambi ɔmɛ, Izharbi ɔmɛ, Hebronbi ɔmɛ, kɛ Uzielbi ɔmɛ a kpɛti ɔ, 24 Shebuel, Mose binyumu Gershom binyumu ɔ ji hɛ mi nyɛɛlɔ nɛ hyɛɔ nito he ɔmɛ a nɔ. 25 Ngɛ e nyɛminyumu ɔmɛ, nɛ ji Eliezer binyumu ɔmɛ a kpɛti ɔ, Eliezer binyumu ji Rehabia, Rehabia binyumu ji Yeshaya, Yeshaya binyumu ji Yoram, Yoram binyumu ji Zikri, nɛ Zikri binyumu ji Shelomot. 26 Shelomot nɛ ɔ kɛ e nyɛminyumu ɔmɛ ji nihi nɛ hyɛɔ níhi nɛ a pee mɛ klɔuklɔu ɔ a to he ɔmɛ tsuo a nɔ. Mɛ lɛ a hyɛɔ níhi nɛ Matsɛ David, kɛ a tsɛmɛ a we ɔmɛ a nyatsɛmɛ ɔmɛ, nimli akpehi kɛ nimli lafahi a nya dali ɔmɛ, kɛ tabo ɔ nya dali ɔmɛ pee mɛ klɔuklɔu ɔ a nɔ. 27 A pee ta yibu ní nɛ́ a ha ngɛ ta mi ɔ ekomɛ klɔuklɔu konɛ a kɛ dla Yehowa we ɔ; 28 jehanɛ hu ɔ, mɛ lɛ a hyɛɔ níhi nɛ ní nalɔ Samuel, Saul nɛ ji Kish binyumu ɔ, Abner nɛ ji Ner binyumu ɔ, kɛ Yoab nɛ ji Zeruya binyumu ɔ pee mɛ klɔuklɔu ɔ a nɔ. Nɔ́ fɛɛ nɔ́ nɛ nɔ ko maa pee lɛ klɔuklɔu ɔ, a kɛ woɔ Shelomit* kɛ e nyɛminyumu ɔmɛ a dɛ konɛ a hyɛ nɔ.
29 Ngɛ Izharbi ɔmɛ a kpɛti ɔ, a pee Kenania kɛ e binyumu ɔmɛ nikɔtɔmahi kɛ kojoli ngɛ Israel konɛ a hyɛ kpo nɔ blɔ ní tsumi ɔmɛ a nɔ.
30 Ngɛ Hebronbi ɔmɛ a kpɛti ɔ, Hashabia kɛ e nyɛminyumuhi nɛ́ a ji nyumuhi katsɛmɛ 1,700 ji nihi nɛ a hyɛɔ Israel nɔ ngɛ kpokpa a nɛ ngɛ Yordan Pa a pusinɔ he ɔ nɔ, nɛ mɛ lɛ a tsuɔ Yehowa ní tsumi ɔ tsuo, nɛ a sɔmɔɔ matsɛ ɔ. 31 Ngɛ Hebronbi ɔmɛ a kpɛti ɔ, Yeriya ji Hebronbi ɔmɛ a tsɛmɛ a we ɔ nyatsɛ ngɛ a sisi bimɛ ɔmɛ a nya. Ngɛ David matsɛ yemi jeha nɛ ji 40 ɔ mi ɔ, a hla a mi, nɛ a ná nyumuhi katsɛmɛ ngɛ a kpɛti ngɛ Yazer ngɛ Gilead. 32 Nɛ e nyɛminyumu ɔmɛ a yibɔ ji 2,700, a ji nyumuhi katsɛmɛ, nɛ a ji a tsɛmɛ a we ɔmɛ a nyatsɛmɛ. Lɔ ɔ he ɔ, Matsɛ David ngɔ mɛ kɛ da Rubenbi ɔmɛ, Gadbi ɔmɛ, kɛ Manasebi ɔmɛ a wɛtso fã a nya kaa a hyɛ a nɔ, nɛ a tsuɔ sane fɛɛ sane nɛ kɔɔ anɔkuale Mawu ɔ he kɛ sane fɛɛ sane nɛ kɔɔ matsɛ ɔ he ɔ he ní.