La
La. La nɛ Kora binyumu ɔmɛ po. Kɛ ha la nɔ hyɛlɔ ɔ; ngɛ Mahalat* blɔ nɔ; á la nɛ a he nɔ. Ezrahino Heman Maskil.*
88 Oo Yehowa, ye Mawu nɛ heɔ ye yi wami,
Ke je na a, i foɔ ya kɛ tsɛɔ mo,
Nɛ ke je jɔ ɔ, i baa o hɛ mi.
2 Ha nɛ ye sɔlemi nɛ su o ngɔ,
Mo ta tue ha ya nɛ i foɔ kɛ biɔ yemi kɛ buami ɔ.*
4 A bu mi kɛ piɛɛ nihi nɛ yaa muɔ* mi ɔ a he momo;
I ba pee nyumu nɛ e ní ngɛ mɔbɔ,*
5 A si mi ngɛ gbogboehi a kpɛti
Kaa nihi nɛ a gbe mɛ nɛ a pueɔ si ngɛ yɔkɔ mi,
Nihi nɛ o kaii we mɛ hu,
Kɛ nihi nɛ a be o nine nɔ hu.
6 O ngɔ mi kɛ wo muɔ nɛ mi kuɔ wawɛɛ mi,
Ngɛ hehi nɛ wo diblii, ngɛ muɔ voo nɛ kle agbo mi.
7 O we abofu ɔ jiɔ ngɛ ye nɔ,
Nɛ o ha nɛ o we oslɔke ɔmɛ nɛ a nya wa a kuɔ kɛ pueɔ ye nɔ. (Sela)
8 O fiee nihi nɛ a le mi ɔ kɛ je ye he kɛ ho tsitsaa ya;
O ha nɛ ye he pee mɛ tai.
A sa ye yi, nɛ i nyɛ we nɛ ma tu fo.
9 Ye haomi ɔ ha nɛ ye hɛngmɛ nɔ pee kusuu.
Oo Yehowa, i tsɛɔ mo ligbi ɔ tsuo;
Mo lɛ i woɔ ye nine nɔ nɛ i sɔleɔ kɛ haa.
10 Anɛ o maa pee nyakpɛ ní kɛ ha gbogboehi lo?
Nihi nɛ a gbo nɛ a be he wami ko ɔ ma nyɛ maa te si nɛ a je o yi lo? (Sela)
11 Anɛ a maa jaje o suɔmi nɛ se pui ɔ ngɛ yɔkɔ mi lo?
Nɛ o we anɔkuale yemi ɔ, anɛ a maa jaje ngɛ hɛ mi kpatami muɔ ɔ* mi lo?
12 Anɛ a maa le o nyakpɛ ní ɔmɛ ngɛ diblii mi,
Aloo o dami ɔ ngɛ nihi nɛ a kai we mɛ hu ɔ a zugba a nɔ lo?
13 Se kɛ̃ ɔ, Oo Yehowa, i foɔ ya kɛ pueɔ o nɔ kɛ biɔ yemi kɛ buami,
Daa mɔtu ɔ, ye sɔlemi ɔ ba suɔ o hɛ mi.
14 Oo Yehowa, mɛni he je nɛ o kua mi ɔ?*
Mɛni he je nɛ o ngɔ o hɛ mi kɛ laa mi ɔ?
15 Kɛ je ye nihe mi tɔɔ ɔ,
I haoɔ, nɛ ye hɛ mi miɔ nɛ ma kpata;
Ní gbeyegbeyehi nɛ o haa nɛ a baa ye nɔ ɔ ha nɛ peepee ta ye he.
16 O we abofu nɛ nya wa a ngɛ mi gbee;
O he gbeye miɔ nɛ e gbe mi.
17 Ligbi ɔ tsuo ɔ, o he gbeye bɔleɔ mi kɛ kpeɔ kaa nyu;
E jeɔ hehi tsuo kɛ ba saa ye yi.*
18 O fiee ye huɛmɛ kɛ nihi nɛ i kɛ mɛ bɔɔ ɔ kɛ je ye he kɛ ho tsitsaa ya;
Nɛ diblii lɛ i kɛ bɔɔ.