Ezekiel
12 Yehowa kɛ mi tu munyu ekohu nɛ e de mi ke: 2 “Nɔmlɔ bi, atuã tsɔli a kpɛti lɛ o ngɛ ɔ nɛ. A ngɛ hɛngmɛ se a hyɛ we nɔ́, nɛ a ngɛ tue se a nui nɔ́, ejakaa a ji atuã tsɔli. 3 Se mo, nɔmlɔ bi, mo bua níhi nɛ o kɛ maa ya nyɔguɛ tso mi ɔ a nya. Kɛkɛ ɔ, ke je na a, be mi nɛ a ngɛ mo hyɛe ɔ, moo ho nyɔguɛ tso mi ya. Moo je o we ɔ mi be mi nɛ a ngɛ mo hyɛe ɔ kɛ ho nyɔguɛ tso mi ya ngɛ he kpa. E ngɛ mi kaa a ji atuã tsɔli mohu lɛɛ, se eko ɔ, a ma yɔse. 4 Ke je na a, mo je ní ɔmɛ nɛ o bua nya nɛ o kɛ maa ya nyɔguɛ tso mi ɔ kpo be mi nɛ a ngɛ mo hyɛe ɔ, kɛkɛ ɔ, ke je jɔ ɔ, moo je ngɛ mɛ tsuo a hɛ mi kaa nɔ ko nɛ a ngɔ lɛ kɛ yaa nyɔguɛ tso mi.
5 “Be mi nɛ a ngɛ mo hyɛe ɔ, moo gbu puɔ ngɛ gbogbo ɔ mi, nɛ o kɛ o tlomi ɔmɛ nɛ gu lejɛ ɔ kɛ je kpo. 6 Be mi nɛ a ngɛ mo hyɛe ɔ, ngɔɔ o tlomi ɔmɛ kɛ fɔ̃ o konɔ nɛ́ o kɛ je kpo kɛ gu diblii ɔ mi. Ngɔɔ nɔ́ kɛ ha o hɛ mi konɛ o ko hyɛ zugba, ejakaa i kɛ mo maa pee okadi kɛ ha Israel we ɔ.”
7 I pee kaa bɔ nɛ a fã mi ɔ pɛpɛɛpɛ. Benɛ je na a, i je ye tlomi ɔmɛ kpo kaa tlomi nɛ a kɛ yaa nyɔguɛ tso mi, nɛ benɛ je jɔ ɔ, i kɛ ye nine gbu puɔ ngɛ gbogbo ɔ mi. Nɛ benɛ diblii wo ɔ, i wo ye tlomi ɔmɛ kɛ fɔ̃ ye konɔ nɛ i tloo kɛ je kpo ngɛ a hɛ mi.
8 Benɛ je na a, Yehowa kɛ mi tu munyu ekohu nɛ e de mi ke: 9 “Nɔmlɔ bi, anɛ Israel we ɔ nɛ́ a ji atuã tsɔli ɔ, bi we mo ke, ‘Mɛni o ngɛ pee ɔ lo?’ 10 Mo de mɛ ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Munyu nɛ ɔ kɔɔ ganɔ nɛ ngɛ Yerusalem ɔ kɛ Israel we ɔ tsuo nɛ a ngɛ ma a mi ɔ a he.”’
11 “Mo de ke, ‘I ji okadi kɛ ha nyɛ. Kaa bɔ nɛ i pee ɔ, jã pɛpɛɛpɛ lɛ a maa pee mɛ. A maa nuu mɛ, nɛ a maa ngɔ mɛ kɛ ho nyɔguɛ tso mi ya. 12 Ganɔ ɔ nɛ ngɛ a kpɛti ɔ maa tloo e tlomi ɔmɛ ngɛ e konɔ nɛ e ma gu diblii ɔ mi kɛ je. E maa gbu puɔ ngɛ gbogbo ɔ mi nɛ e kɛ e tlomi ɔmɛ maa gu lejɛ ɔ kɛ je kpo. E kɛ nɔ́ maa ha e hɛ mi konɛ e ko hyɛ zugba.’ 13 Ma ngɔ ye ya a kɛ bu e nɔ, nɛ ma nu lɛ kɛ wo ye ya a mi. Nɛ ma ngɔ lɛ kɛ ba Babilon, ngɛ Kaldeabi ɔmɛ a zugba a nɔ; se e be nae; nɛ e ma gbo ngɛ lejɛ ɔ. 14 Nɛ nihi nɛ a bɔle lɛ ɔ tsuo, kɛ nihi nɛ a yeɔ kɛ buaa lɛ kɛ e tabuli ɔmɛ tsuo ɔ, ma gbɛ mɛ kɛ fĩa; nɛ ma hia klaate kɛ fiee a se. 15 Ke i gbɛ mɛ kɛ fĩa je ma amɛ a kpɛti kɛ zugba a nɔ ɔ, a ma ná le kaa imi ji Yehowa. 16 Se ma si a kpɛti nihi bɔɔ ko nɛ́ klaate, hwɔ kɛ gbenɔ hiɔ be mɛ gbee, konɛ a ya de je ma amɛ nɛ́ a maa ya a kpɛti ɔ a ní hiemi ní peepee ɔmɛ tsuo; kɛkɛ ɔ, a maa le kaa imi ji Yehowa.”
17 Yehowa kɛ mi tu munyu ekohu nɛ e de mi ke: 18 “Nɔmlɔ bi, o kɛ he domi blibliibli nɛ ye o we abolo ɔ, nɛ o kɛ gbeye yemi kɛ tsui yemi nɛ nu o nyu ɔ. 19 Mo de ni ɔmɛ nɛ a ngɛ zugba a nɔ ɔ ke, ‘Nɔ́ nɛ Nyɔmtsɛ Matsɛ Yehowa ngɛ nihi nɛ a ngɛ Yerusalem ngɛ Israel zugba a nɔ ɔ dee ji nɛ ɔ nɛ: “A kɛ tsui yemi maa ye a we abolo ɔ, nɛ a kɛ gbeye yemi maa nu a nyu ɔ, ejakaa a zugba a nɔ maa fɔ si gu ngɛ yiwutso ní nɛ nihi nɛ a ngɛ zugba a nɔ pee ɔ he je. 20 A ma kpata mahi nɛ nihi ngɛ a mi ɔ a hɛ mi, nɛ zugba a maa pee zugba nɛ se nami be he; nɛ a maa le kaa imi ji Yehowa.”’”
21 Yehowa kɛ mi tu munyu ekohu nɛ e de mi ke: 22 “Nɔmlɔ bi, mɛni abɛ lɛ a buɔ ngɛ Israel ke, ‘Ligbi ɔmɛ beɔ kɛ hoɔ, nɛ nina ko bɛ mi’ ɔ? 23 Enɛ ɔ he ɔ, mo de mɛ ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Ma ha nɛ abɛ nɛ ɔ se maa po nɛ a kɛ be ní tsue hu ngɛ Israel.”’ Se de mɛ ke, ‘Ligbi ɔmɛ su tã, nɛ nina fɛɛ nina maa ba mi.’ 24 Ejakaa lakpa nina kɛ klaami nɛ a kɛ sisiɔ nɔ ɔ tsuo se maa po ngɛ Israel we ɔ. 25 ‘“Ejakaa imi Yehowa nitsɛ ma tu munyu. Munyu fɛɛ munyu nɛ ma tuɔ maa ba mi nɛ e be se kpɛe. Nyɛ atuã tsɔli, ngɛ nyɛ be nɛ ɔmɛ a mi ɔ, nɔ́ fɛɛ nɔ́ nɛ ma de ɔ maa ba mi,” Nyɔmtsɛ Matsɛ Yehowa lɛ de.’”
26 Yehowa kɛ mi tu munyu ekohu nɛ e de mi ke: 27 “Nɔmlɔ bi, nɔ́ nɛ Israelbi ɔmɛ* ngɛ dee ji nɛ ɔ nɛ, ‘Nina nɛ e na a be mi bae piɔ, nɛ gbami nɛ e ngɛ gbae ɔ kɔɔ hwɔɔ se lokoo he.’ 28 Enɛ ɔ he ɔ, de mɛ ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “‘Ye munyu ɔmɛ ekoeko be se kpɛe; nɔ́ fɛɛ nɔ́ nɛ i de ɔ maa ba mi,’ Nyɔmtsɛ Matsɛ Yehowa lɛ de.”’”