MOSE WOMI ENYƆNE*

1 Jehanɛ ɔ, Israel binyumuhi nɛ a piɛɛ Yakob he kɛ ba Egipt ɔ a biɛhi ji nɛ ɔmɛ nɛ; a ti nɔ fɛɛ nɔ ngɔ e weku kɛ ba: 2 Reuben, Simeon, Levi, kɛ Yuda; 3 Isakar, Zebulun, kɛ Benyamin; 4 Dan kɛ Naftali; Gad kɛ Asher. 5 Nihi* tsuo nɛ a fɔ kɛ ha Yakob* ɔ ji nimli* 70, se Yosef lɛɛ e ngɛ Egipt momo. 6 Pee se ɔ, Yosef ba gbo, nɛ e nyɛminyumu ɔmɛ tsuo kɛ jamɛ a yi nɔ ɔ tsuo hu ba gbo. 7 Israel bi ɔmɛ* ba fɔ nɛ a he ba bɔni hiɛmi babauu, a he ngɛ wae wawɛɛ nitsɛ, nɛ a yibɔ ɔ hu ngɛ hɛ mi yae mlamlaamla, nɛ lɔ ɔ ha nɛ a ba hyi zugba a nɔ tɔ.

8 Be komɛ a se ɔ, matsɛ ehe ko ba ye Egipt nɔ, se lɛɛ e li Yosef. 9 Lɔ ɔ he ɔ, e de e we bi ɔmɛ ke: “Nyɛɛ hyɛ! Israel bi ɔmɛ a he hiɛ pe wɔ nɛ a he hu wa pe wɔ. 10 Nyɛ ha nɛ waa to a he ga. Ke pi jã a, a maa ya nɔ maa hiɛ babauu, nɛ ke ta ko ba te si ɔ, a ma ya piɛɛ wa he nyɛli ɔmɛ a he nɛ a maa hwu kɛ si wɔ, nɛ a maa je ma a mi.”

11 Lɔ ɔ he ɔ, a hla ní tsumi kpakpataa nɔ hyɛli* kɛ da a nya konɛ a ngɔ ní tsumi nɛ he wa kɛ wa mɛ yi mi. Kɛkɛ nɛ Israel bi ɔmɛ ma ma nguahi nɛ́ a kɛ maa pee nito hehi, nɛ ji Pitom kɛ Rameses kɛ ha Farao. 12 Se be abɔ nɛ a ngɛ mɛ yi mi wae ɔ, jã nɔuu nɛ a he ngɛ hiɛe nɛ jã nɔuu nɛ a ngɛ gbɛe kɛ ngɛ fĩae, lɔ ɔ he ɔ, sawale nu mɛ ngɛ Israel bi ɔmɛ a he je. 13 Enɛ ɔ he ɔ, Egipt bi ɔmɛ nyɛ Israel bi ɔmɛ a nɔ kɛ wo nyɔguɛ si himi mi nɛ a ha nɛ a tsu ní tsumi nɛ he wa. 14 A haa nɛ a tsuaa zu kɛ peeɔ mɔta kɛ bliikisi, nɛ a tsuɔ ní tsumi nɛ he wa. A tsuɔ nyɔguɛ ní tsumi nɛ he wa slɔɔtohi ngɛ nga a nɔ, nɛ enɛ ɔ ha nɛ si himi ɔ mi ba wa ha mɛ. Ee, a ha nɛ a tsu ní ngɛ si fɔfɔɛhi nɛ a mi wa mi, nɛ a tsu nyɔguɛhi a ní tsumi slɔɔtohi tsuo.

15 Pee se ɔ, Egipt matsɛ ɔ kɛ Hebri fɔlɔyihi nɛ a biɛ ji Shifra kɛ Pua a tu munyu, 16 nɛ e de mɛ ke: “Ke nyɛ ngɛ Hebri yi ɔmɛ fɔe ɔ, nyɛɛ hyɛ jokuɛ ɔ nɛ a fɔ ɔ,* ke e ji nyumu ɔ, nyɛɛ gbe lɛ; se ke e ji yo ɔ, lɛɛ e hi wami mi.” 17 Se fɔlɔyi ɔmɛ yeɔ anɔkuale Mawu ɔ gbeye, nɛ a pee we nɔ́ nɛ Egipt matsɛ ɔ de mɛ ɔ. Mohu ɔ, a baa binyumu ɔmɛ a yi. 18 Be komɛ a se ɔ, Egipt matsɛ ɔ tsɛ fɔlɔyi ɔmɛ nɛ e bi mɛ ke: “Mɛni he je nɛ nyɛ baa binyumu ɔmɛ a yi ɔ?” 19 Fɔlɔyi ɔmɛ de Farao ke: “Hebri yi ɔmɛ be kaa Egipt yi ɔmɛ. Mɛɛ lɛɛ a ngɛ he wami, nɛ loko fɔlɔyo ko maa su a ngɔ ɔ, a fɔ momo.”

20 Lɔ ɔ he ɔ, Mawu pee fɔlɔyi ɔmɛ kpakpa, nɛ Israel bi ɔmɛ ya nɔ nɛ a he hiɛ, nɛ a he wa wawɛɛ nitsɛ. 21 Nɛ akɛnɛ fɔlɔyi ɔmɛ yeɔ anɔkuale Mawu ɔ gbeye he je ɔ, e ha nɛ a ná mɛ nitsɛmɛ a wekuhi pee se. 22 Nyagbenyagbe ɔ, Farao fã e we bi ɔmɛ tsuo ke: “Nyɛ sake binyumu fɛɛ binyumu nɛ Hebri bi ɔmɛ ma fɔ ɔ kɛ fɔ Nilo Pa a mi, se nyɛɛ baa a biyi ɔmɛ tsuo a yi.”

2 Maa pee jamɛ a be ɔ mi ɔ, nyumu ko nɛ je Levi we ɔ mi ɔ ngɔ yo ko ngɛ Levi wɛtso ɔ mi. 2 Yo ɔ ba ngɔ hɔ nɛ e fɔ binyumu. Benɛ e na bɔ nɛ jokuɛ ɔ he ngɛ fɛu ha a, e ngɔ lɛ kɛ laa nyɔhiɔ etɛ. 3 Benɛ e nyɛ we nɛ e ngɔ lɛ kɛ laa hu ɔ, e ngɔ ngɔwu kɛtɛ* nɛ e ngɔ amã kɛ kpa he, nɛ e ngɔ jokuɛ ɔ kɛ fɔ mi nɛ e ngɔ kɛtɛ* ɔ kɛ ya ma glãhi nɛ a ngɛ Nilo Pa a nya a mi. 4 Se jokuɛ ɔ nyɛmiyo ya da si ngɛ he ko banee konɛ e hyɛ nɔ́ nɛ maa ba jokuɛ ɔ nɔ.

5 Benɛ Farao biyo ɔ kple kɛ ba konɛ e ba du ngɛ Nilo Pa a mi ɔ, e mawayi ɔmɛ ngɛ si slaae ngɛ Nilo Pa a he. Nɛ e hɛngmɛ gba kɛtɛ* ɔ nɔ ngɛ glã amɛ a mi. Oya nɔuu nɛ e tsɔ e nyɔguɛ yo ɔ kaa e ya wo kɛ ba. 6 Benɛ e bli nya a, e na jokuɛ nyumuyo ɔ, nɛ jokuɛ nyumuyo ɔ ngɛ ya foe. E mi mi sã lɛ ngɛ jokuɛ ɔ he, nɛ e de ke: “Hebri bi ɔmɛ a bimɛ ɔmɛ eko ji nɛ ɔ nɛ.” 7 Kɛkɛ nɛ jokuɛ ɔ nyɛmiyo ɔ ba de Farao biyo ɔ ke: “Ma ya tsɛ binyɛ ko ngɛ Hebri bi ɔmɛ a kpɛti kɛ ba konɛ e hyɛ jokuɛ ɔ nɔ ha mo lo?” 8 Farao biyo ɔ de lɛ ke: “Yaa!” Oya nɔuu nɛ yoyo ɔ ho nɛ e ya tsɛ jokuɛ ɔ nyɛ ɔ kɛ ba. 9 Kɛkɛ nɛ Farao biyo ɔ de lɛ ke: “Ngɔɔ jokuɛ nɛ ɔ kɛ ho nɛ o ya hyɛ e nɔ ha mi, nɛ ma wo mo hiɔ.” Lɔ ɔ he ɔ, yo ɔ ngɔ jokuɛ ɔ nɛ e ya hyɛ e nɔ. 10 Benɛ jokuɛ ɔ ba wa a, e ngɔ lɛ kɛ ba ha Farao biyo ɔ, nɛ jokuɛ ɔ ba pee Farao biyo ɔ binyumu. E wo lɛ biɛ ke Mose* nɛ e de ke: “Akɛnɛ i je lɛ kɛ je nyu mi ɔ he je.”

11 Jehanɛ ɔ, benɛ Mose ba wa a,* e je kpo kɛ ya e nyɛminyumu ɔmɛ a ngɔ konɛ e ya hyɛ ní tsumi kpakpataa nɛ a ngɛ tsue ɔ, nɛ e hɛngmɛ gba Egipt no ko nɔ nɛ e ngɛ Hebri no ko, nɛ ji e nyɛminyumu ɔmɛ a kpɛti nɔ kake gbee. 12 Lɔ ɔ he ɔ, e hyɛ hiɛ kɛ hiɛ, nɛ benɛ e nɛ nɔ ko ɔ, e gbe Egipt no ɔ nɛ e ngɔ lɛ kɛ laa ngɛ zia a mi.

13 Se e nɔ jena a, e je kpo nɛ e ya na Hebri nyumuhi enyɔ nɛ a kɛ a sibi ngɛ kunɔ nɔe. Lɔ ɔ he ɔ, e bi nɔ nɛ e nɔ́ dɛ ɔ ke: “Mɛni he je nɛ o fia o nyɛmi ɔ nɔ́ ɔ?” 14 Benɛ Mose de jã a, e de ke: “Mɛnɔ hla mo kaa nɔ yelɔ kɛ kojolɔ ngɛ wa nɔ? Anɛ o ngɛ hlae nɛ o gbe mi kaa bɔ nɛ o gbe Egipt no ɔ lo? Jehanɛ ɔ lɛɛ Mose ye gbeye nɛ e de ke: “Akuanyɛ, sane ɔ je kpo!”

15 Kɛkɛ nɛ Farao nu sane ɔ he nɛ e ka kaa e maa gbe Mose; se Mose tu fo kɛ je Farao ngɔ kɛ ho Midian zugba a nɔ ya, nɛ e ya hi si ngɛ vu ko he. 16 Jamɛ a be ɔ mi ɔ, Midian osɔfo ɔ ngɛ biyihi kpaago, nɛ a ba konɛ a ba sa nyu kɛ wo lohwehi a nyu numi ní ɔmɛ a mi kɛ ha a tsɛ ɔ to ɔmɛ nɛ a nu. 17 Se kaa bɔ nɛ e pɔɔ bami ɔ, to hyɛli ɔmɛ ba nɛ a ba fie mɛ. Kɛkɛ nɛ Mose te si nɛ e ba ye bua yi ɔmɛ* nɛ e ha a to ɔmɛ nyu. 18 Benɛ a kpale kɛ ba a tsɛ Reuel* ngɔ ngɛ we ɔ mi ɔ, e kpa ngmlaa kɛ bi mɛ ke: “Kɛ e ba lɛ kɛɛ nɛ mwɔnɛ ɔ nyɛ ba we mi mla kikɛ nɛ ɔ?” 19 A he nɔ ke: “Egipt no ko kpɔ̃ wɔ kɛ je to hyɛli ɔmɛ a dɛ nɛ e sa nyu po kɛ ha wɔ, nɛ e ha to ɔmɛ nyu.” 20 E de e biyi ɔmɛ ke: “Nɛ jije e ngɛ? Mɛni he je nɛ nyɛ je nyumu ɔ he ngɛ lejɛ ɔ? Nyɛ ya tsɛ lɛ kɛ ba konɛ e kɛ wɔ nɛ ba ye ní.” 21 Lɔ ɔ se ɔ, Mose kplɛɛ kaa e kɛ nyumu ɔ maa hi si, nɛ nyumu ɔ ngɔ e biyo Zipora kɛ ha Mose gba. 22 Pee se ɔ, Zipora fɔ binyumu, nɛ Mose wo lɛ biɛ ke Gershon,* ejakaa e de ke, “I ba to nubwɔ ngɛ ma se zugba nɔ.”

23 Be babauu* se ɔ, Egipt matsɛ ɔ ba gbo, se akɛnɛ Israel bi ɔmɛ ngɛ nyɔguɛ yemi mi he je ɔ, a ya nɔ nɛ a kɛmɛ, nɛ a fo ya kɛ jaje a haomi ɔmɛ. Nyɔguɛ yemi mi nɛ a ngɛ he je ɔ, a fo ya kɛ hla yemi kɛ buami, nɛ a ya fomi ɔ ya su anɔkuale Mawu ɔ ngɔ. 24 Pee se ɔ, Mawu nu a kɛmɛmi ɔ, nɛ Mawu kai somi nɛ e kɛ Abraham, Isak, kɛ Yakob so ɔ. 25 Lɔ ɔ he ɔ, Mawu ngɔ e juɛmi kɛ ba Israel bi ɔmɛ a nɔ, nɛ e na a nɔ́ nami ɔ.

3 Mose ba plɛ e ngatsɛ Yetro, Midian osɔfo ɔ to ɔmɛ a nɔ hyɛlɔ. Benɛ e ngɛ to ɔmɛ kpakae ngɛ nga a nɔ kɛ yaa pusinɔ he je ɔ, e ya pã si ngɛ Horeb nɛ ji anɔkuale Mawu ɔ yoku ɔ he. 2 Kɛkɛ nɛ Yehowa bɔfo ko je e he kpo kɛ tsɔɔ lɛ ngɛ la lilɛ ko mi ngɛ mio tso ko mi. Benɛ e ngɛ hyɛe ɔ, e na kaa mio tso ɔ ngɛ tsoe, se kɛ̃ ɔ, mio tso ɔ sɛ̃. 3 Lɔ ɔ he ɔ, Mose de ke: “Ma ya lejɛ ɔ nɛ ma ya hyɛ nyakpɛ nɔ́ nɛ ɔ, konɛ ma hyɛ nɔ́ he je nɛ mio tso ɔ sɛ̃ ɔ.” 4 Benɛ Yehowa na kaa e yaa nɛ e ya hyɛ ɔ, Mawu tsɛ lɛ kɛ je mio tso ɔ mi ke: “Mose! Mose!” kɛkɛ nɛ e he nɔ ke: “I ngɛ hiɛ ɔ.” 5 Kɛkɛ nɛ Mawu de ke: “Koo ba o hɛ mi hu. Je o tokota amɛ ngɛ o nane, ejakaa he nɛ o daa si ngɛ ɔ ji zugba klɔuklɔu.”

6 E ya nɔ nɛ e de ke: “Imi ji o tsɛ ɔ Mawu ɔ, nɛ ji Abraham Mawu ɔ, Isak Mawu ɔ, kɛ Yakob Mawu ɔ nɛ.” Kɛkɛ nɛ Mose ngɔ e hɛ mi kɛ laa, ejakaa e ye gbeye kaa e maa hyɛ anɔkuale Mawu ɔ. 7 Yehowa de hu ke: “Ngɛ anɔkuale mi ɔ, i na ye we bi ɔmɛ nɛ a ngɛ Egipt ɔ a haomi ɔ, nɛ i nu ya nɛ a ngɛ foe ngɛ nihi nɛ a nyɛɔ a nɔ kaa a tsu ní ɔ a he je; i le a nɔ́ nami ɔ tsuo. 8 Ma kple si kɛ ya, nɛ ma ya kpɔ̃ mɛ ngɛ Egipt bi ɔmɛ a dɛ, nɛ ma ngɔ mɛ kɛ je* jamɛ a zugba a nɔ kɛ ya zugba kpakpa ko nɛ e kle nɔ, zugba nɛ nyɔ nyu kɛ hwo ngɛ bee ngɛ nɔ, nɛ ji Kanaan bi, Hit bi, Amor bi, Periz bi, Hiv bi kɛ Yebus bi ɔmɛ a kpokpa a nɔ. 9 Jehanɛ ɔ hyɛ! Israel bi ɔmɛ a ya fomi ɔ ba su ye ngɔ, nɛ i na bɔ nɛ Egipt bi ɔmɛ kɛ yi mi wami ngɛ a nɔ nyɛe ha a hulɔ. 10 Lɔ ɔ he ɔ, ba nɛ ma tsɔ mo kɛ ya Farao ngɔ, nɛ o ya ngɔ ye we bi, nɛ ji Israel bi ɔmɛ kɛ je Egipt.”

11 Se Mose bi anɔkuale Mawu ɔ ke: “Mɛnɔ ji mi nɛ́ ma ya Farao ngɔ nɛ ma ya ngɔ Israel bi ɔmɛ kɛ je Egipt?” 12 Benɛ e de jã a, Mawu de ke: “Ma ha nɛ o maa na kaa i piɛɛ o he, nɛ enɛ ɔ ji okadi nɛ maa tsɔɔ kaa imi lɛ i tsɔ mo: Ke o ya ngɔ ma a kɛ je Egipt se ɔ, nyɛ ma ba sɔmɔ* anɔkuale Mawu ɔ ngɛ yoku nɛ ɔ nɔ.”

13 Se Mose de anɔkuale Mawu ɔ ke: “Ke i ya Israel bi ɔmɛ a ngɔ nɛ i ya de mɛ ke, ‘Nyɛ nɛmɛ ɔmɛ a Mawu ɔ tsɔ mi nyɛ ngɔ,’ nɛ a bi mi ke, ‘Kɛ a tsɛɛ lɛ kɛɛ?’ ɔ, mɛni ma de mɛ?” 14 Lɔ ɔ he ɔ, Mawu de Mose ke: “Ma Plɛ Ye He Kɛ Pee Nɔ́ Nɛ I Suɔ Kaa Ma Plɛ Ye He Kɛ Pee.”* Nɛ e de hu ke: “Nɔ́ nɛ o de Israel bi ɔmɛ ji nɛ ɔ nɛ, ‘Ma Plɛ Ye He Kɛ Pee tsɔ mi nyɛ ngɔ.’” 15 Kɛkɛ nɛ Mawu kpale de Mose ke:

“Nɔ́ nɛ o de Israel bi ɔmɛ ji nɛ ɔ nɛ, ‘Yehowa, nyɛ nɛmɛ ɔmɛ a Mawu ɔ, nɛ ji Abraham Mawu ɔ, Isak Mawu ɔ, kɛ Yakob Mawu ɔ tsɔ mi nyɛ ngɔ.’ Enɛ ɔ ji ye biɛ kɛ yaa neneene, nɛ kikɛ ji bɔ nɛ yi nɔhi tsuo ma kai mi. 16 Jehanɛ ɔ, yaa nɛ o ya bua Israel ma nikɔtɔma amɛ a nya nɛ o de mɛ ke, ‘Yehowa nyɛ nɛmɛ Abraham, Isak, kɛ Yakob a Mawu ɔ je e he kpo kɛ tsɔɔ mi, nɛ e de ke: “I ngɔ ye juɛmi kɛ ba nyɛ nɔ, nɛ i na nɔ́ nɛ a ngɛ nyɛ pee ngɛ Egipt ɔ. 17 Lɔ ɔ he ɔ, i de ke, ma je nyɛ kɛ je nɔ́ nɛ nyɛ ngɛ nae ngɛ Egipt bi ɔmɛ a dɛ mi ɔ mi, nɛ ma ngɔ nyɛ kɛ ho Kanaan bi, Hit bi, Amor bi, Periz bi, Hiv bi, kɛ Yebus bi ɔmɛ a zugba a nɔ ya, zugba nɛ nyɔ nyu kɛ hwo ngɛ bee ngɛ nɔ ɔ.”’

18 “Bɔ fɛɛ bɔ nɛ ji ɔ, a maa bu o gbi tue, nɛ o kɛ Israel ma nikɔtɔma amɛ maa ya Egipt matsɛ ɔ ngɔ. Nyɛ de lɛ ke: ‘Yehowa, Hebri bi ɔmɛ a Mawu ɔ kɛ wɔ tu munyu. Lɔ ɔ he ɔ, wa kpa mo pɛɛ, ha nɛ waa hia blɔ ligbi etɛ kɛ ya nga a nɔ konɛ wa ya sã afɔle kɛ ha Yehowa, wa Mawu ɔ.’ 19 Se imi nitsɛ i le saminya kaa Egipt matsɛ ɔ be nyɛ blɔ ngmɛe nɛ nyɛɛ je, ja nine ko nɛ he wa nyɛ e nɔ. 20 Lɔ ɔ he ɔ, ma kpã ye nine mi nɛ ma ngɔ nyakpɛ ní tsumihi nɛ ma tsu ngɛ Egipt ɔ kɛ fia Egipt nɔ́, nɛ lɔ ɔ se ɔ, e maa wo nyɛ blɔ kɛ ho. 21 Ma ha nɛ nyɛ hɛ mi maa ba nyami ngɛ Egipt bi ɔmɛ a hɛ mi, nɛ ke nyɛ yaa a, nyɛ be jee kɛ nyɛ dɛ gu kɔkɔɔkɔ. 22 Yo fɛɛ yo nɛ́ e bi e kpɔ mi no, kɛ yo nɛ e ba to e we ɔ mi ɔ sika hiɔ kɛ sika tsu níhi kɛ bo* nɛ nyɛɛ kɛ ma dla nyɛ binyumu ɔmɛ kɛ nyɛ biyi ɔmɛ a he ha mɛ; nyɛ ma kpakpaa Egipt bi ɔmɛ a he níhi.”

4 Mose he nɔ ke: “Se ke a he we mi yi nɛ a bui ye gbi tue ɔ hu nɛɛ? Ejakaa a ma de ke, ‘Yehowa je we e he kpo kɛ tsɔɔ we mo.’” 2 Kɛkɛ nɛ Yehowa bi lɛ ke: “Mɛni lɛ ngɛ o dɛ mi ɔ?” E ha heto ke: “Tso.” 3 E de lɛ ke: “Sake tso ɔ kɛ fɔ zugba.” Lɔ ɔ he ɔ, e sake tso ɔ kɛ fɔ zugba, nɛ tso ɔ plɛ pee sinɔ, nɛ Mose tu fo kɛ je sinɔ ɔ he. 4 Jehanɛ ɔ, Yehowa de Mose ke: “Kpã o nine mi nɛ o nu sinɔ ɔ hlemi.” Lɔ ɔ he ɔ, e kpã e nine mi nɛ e nu sinɔ ɔ hlemi, nɛ sinɔ ɔ plɛ pee tso ngɛ e dɛ mi. 5 Kɛkɛ nɛ Mawu de ke: “Enɛ ɔ ma ha nɛ a he ye kaa Yehowa, a nɛmɛ ɔmɛ a Mawu ɔ, nɛ ji Abraham Mawu ɔ, Isak Mawu ɔ, kɛ Yakob Mawu ɔ je e he kpo kɛ tsɔɔ mo.”

6 Yehowa kpale de lɛ ekohu ke: “I kpa mo pɛɛ, ngɔɔ o nine kɛ wo o tade ɔ he nɛ e dɔ kɛ fɔ nɔ ngɛ o gugue mi ɔ mi.” Lɔ ɔ he ɔ, e ngɔ e nine kɛ wo e tade ɔ he nɛ e dɔ kɛ fɔ nɔ ɔ mi. Benɛ e je e nine ɔ, hyɛ, kpiti pue e nine ɔ he kaa snoo! 7 Kɛkɛ nɛ e de lɛ ke: “Kpale ngɔ o nine kɛ wo o tade ɔ he nɛ e dɔ kɛ fɔ nɔ ngɛ o gugue mi ɔ mi.” Lɔ ɔ he ɔ, e kpale ngɔ e nine kɛ wo e tade ɔ mi. Benɛ e je e nine ɔ ngɛ e tade ɔ mi ɔ, e nine ɔ kpale ba da kaa bɔ nɛ e ngɛ sa a! 8 E de lɛ ke: “Ke a he we mo yi aloo a bui kekle okadi ɔ, lɛɛ a maa kplɛɛ okadi enyɔne ɔ nɔ kokooko. 9 Ke loloolo ɔ, a he we okadi enyɔ nɛ ɔmɛ tsuo yi, nɛ a kua kaa a maa bu o gbi tue ɔ, yaa yɛ nyu bɔɔ ngɛ Nilo Pa a mi nɛ o plɛ kɛ pue zugba gbigbli nɔ, nɛ nyu ɔ nɛ o ya yɛ ngɛ Nilo Pa a mi ɔ ma plɛ pee muɔ ngɛ zugba gbigbli ɔ nɔ.”

10 Jehanɛ ɔ, Mose de Yehowa ke: “Yehowa, i kpa mo pɛɛ, ye nya mi tsɔ we kɛ munyu tumi, kɛ je blema a, ye nya mi tsɔ we, nɛ kɛ je be nɛ o kɛ o sɔmɔlɔ ɔ bɔni munyu tumi kɛ ba si amlɔ nɛ ɔ hu tsakemi ko bɛ, ejakaa ye munyu tumi ngɛ blɛuu,* nɛ ye lilɛ hu jiɔ.” 11 Yehowa bi lɛ ke: “Mɛnɔ lɛ bɔ nya kɛ ha nɔmlɔ? Mɛnɔ lɛ e haa nɛ nɔ peeɔ mumui aloo e peeɔ tuekpokutsɛ? Mɛnɔ lɛ e haa nɛ nɔ hɛngmɛ hyɛɛ nɔ́ saminya loo e hɛngmɛ yuɔ? Anɛ pi imi Yehowa lo? 12 Lɔ ɔ he ɔ, amlɔ nɛ ɔ, moo ya, nɛ ma piɛɛ o he be mi nɛ o ngɛ munyu tue ɔ,* nɛ ma tsɔɔ mo nɔ́ nɛ e sa kaa o de.” 13 Se e de ke: “Yehowa, i kpa mo pɛɛ, moo tsɔ nɔ kpa nɛ o suɔ.” 14 Kɛkɛ nɛ Yehowa mi mi fu Mose wawɛɛ, nɛ e de ke: “Nɛ o nyɛminyumu Aaron, Levi no ɔ hu nɛɛ? I le kaa e le munyu tumi saminya. Amlɔ nɛ ɔ, e ngɛ blɔ nɔ kɛ ma hiɛmɛ nɛ ɔ nɛ e kɛ mo nɛ ba kpe. Ke e na mo ɔ, e tsui ma nya. 15 Lɔ ɔ he ɔ, o kɛ lɛ nɛ tu munyu nɛ o ngɔ munyu ɔmɛ kɛ wo e nya, nɛ ma piɛɛ o kɛ lɛ tsuo nyɛ he be mi nɛ nyɛ ngɛ munyu tue ɔ, nɛ ma tsɔɔ nyɛ nɔ́ nɛ nyɛɛ pee. 16 E maa tu munyu kɛ tsɔɔ ni ɔmɛ ha mo, nɛ e maa pee o munyu tulɔ, nɛ o maa pee kaa Mawu kɛ ha lɛ.* 17 Nɛ o maa ngɔ tso nɛ o hɛɛ ngɛ o dɛ mi nɛ ɔ kɛ pee okadihi.”

18 Lɔ ɔ he ɔ, Mose kpale e se kɛ ho e ngatsɛ Yetro ngɔ ya, nɛ e ya de lɛ ke: “I kpa mo pɛɛ, i suɔ nɛ ma kpale kɛ ho ye nyɛmimɛ ɔmɛ nɛ a ngɛ Egipt ɔ a ngɔ ya, konɛ ma ya hyɛ kaa a ngɛ wami mi loloolo lo.” Yetro de Mose ke: “Yaa ngɛ tue mi jɔmi mi.” 19 Lɔ ɔ se ɔ, Yehowa de Mose ngɛ Midian ke: “Moo kpale kɛ ho Egipt ya, ejakaa nihi nɛ a ngɛ hlae nɛ a gbe mo* ɔ, mɛ tsuo a gbo.”

20 Kɛkɛ nɛ Mose ngɔ e yo ɔ kɛ e binyumu ɔmɛ kɛ hi teji nɔ, nɛ e kpale kɛ yaa Egipt zugba a nɔ. Jehanɛ se hu ɔ, Mose wo tso ɔ nɛ anɔkuale Mawu ɔ de lɛ ke e hɛɛ ɔ. 21 Kɛkɛ nɛ Yehowa de Mose ke: “Ke o kpale o se kɛ ya Egipt ɔ, hyɛ nɛ o pee nyakpɛ níhi tsuo nɛ i ha mo he wami kaa o pee ɔ ngɛ Farao hɛ mi. Se ma ngmɛ blɔ nɛ e maa kplii e tsui, nɛ e be hae nɛ a ho. 22 Mo de Farao ke, ‘Nɔ́ nɛ Yehowa ngɛ dee ji nɛ ɔ nɛ: “Israel ji ye binyumu, ye bitɛte. 23 I ngɛ mo dee ke, Ha nɛ ye binyumu ɔ nɛ ho nɛ́ e ya sɔmɔ mi. Se ke o kua kaa o ma ha nɛ e ho ɔ, ma gbe o binyumu ɔ, o bitɛte ɔ.”’”

24 Jehanɛ ɔ, Yehowa kɛ lɛ kpe ngɛ blɔ ɔ nɔ ngɛ nibwɔhi a to he ɔ, nɛ e ngɛ hlae nɛ e maa gbe lɛ. 25 Nyagbe ɔ, Zipora wo tɛ ko nɛ nya ba,* nɛ e po e binyumu ɔ, nɛ e ha nɛ e bi ɔ mɔmlɔtɔ ɔ sa e* nane he, nɛ e de ke: “Akɛnɛ o ji muɔ ayɛflo huno kɛ ha mi ɔ he je.” 26 Lɔ ɔ he ɔ, Mawu ngmɛɛ e he. Kɛkɛ nɛ Zipora de ke, “o ji muɔ ayɛflo huno,” ngɛ nɔ pomi ɔ he je.

27 Kɛkɛ nɛ Yehowa de Aaron ke: “Yaa nga a nɔ nɛ o kɛ Mose nɛ ya kpe.” Lɔ ɔ he ɔ, e ya nɛ e kɛ lɛ ya kpe ngɛ anɔkuale Mawu ɔ yoku ɔ nɔ, nɛ e fĩɔ e nya he* kɛ fɔ lɛ. 28 Nɛ Mose de Aaron níhi tsuo nɛ Yehowa, nɔ nɛ e tsɔ lɛ ɔ de ɔ, kɛ okadihi tsuo nɛ Mawu fã lɛ ke e pee ɔ. 29 Lɔ ɔ se ɔ, Mose kɛ Aaron ya nɛ a ya bua Israel ma nikɔtɔma amɛ tsuo a nya. 30 Aaron de mɛ munyuhi tsuo nɛ Yehowa kɛ Mose tu ɔ, nɛ e pee okadi ɔmɛ ngɛ ni ɔmɛ a hɛ mi. 31 Kɛkɛ nɛ ni ɔmɛ he ye. Benɛ a nu kaa Yehowa ngɔ e juɛmi kɛ ba Israel bi ɔmɛ a nɔ, nɛ e na a haomi ɔmɛ ɔ, a kplã si nɛ a ngɔ a hɛ mi kɛ bu si.

5 Lɔ ɔ se ɔ, Mose kɛ Aaron ya Farao ngɔ nɛ a ya de lɛ ke: “Nɔ́ nɛ Yehowa, Israel Mawu ɔ de ji nɛ ɔ nɛ, ‘Ha nɛ ye we bi ɔmɛ nɛ a ho nɛ a ya ye gbijlɔ kɛ ha mi ngɛ nga a nɔ.’” 2 Se Farao bi mɛ ke: “Mɛnɔ ji jamɛ a Yehowa a nɛ e sa kaa ma bu e gbi tue nɛ ma ha nɛ Israel nɛ ho ɔ? I li Yehowa ko, nɛ jehanɛ se hu i be hae nɛ Israel nɛ ho.” 3 Se a de lɛ ke: “Hebri bi ɔmɛ a Mawu ɔ kɛ wɔ tu munyu. Wa kpa mo pɛɛ, wa suɔ nɛ waa hia blɔ ligbi etɛ kɛ ya nga a nɔ nɛ wa ya sã afɔle kɛ ha Yehowa, wa Mawu ɔ; ke pi jã a, e maa ngɔ hiɔ kɛ ba wa nɔ aloo e maa ngɔ klaate kɛ gbe wɔ.” 4 Egipt matsɛ ɔ ha mɛ heto ke: “Mose kɛ Aaron, mɛni he je nɛ nyɛ ngɛ ni ɔmɛ ngɔe kɛ ngɛ a ní tsumi ɔ he jee ɔ? Nyɛɛ kpale kɛ ho nyɛ ní tsumi ɔ he ya!” 5 Nɛ Farao ya nɔ nɛ e de ke: “Hyɛ bɔ nɛ nyɛ we bi ɔmɛ a he hiɛ ha, nɛ nyɛ ngɛ hlae nɛ a je ní tsumi ɔ he nɛ a ya jɔɔ a he.”

6 Jamɛ a ligbi ɔ nɔuu ɔ, Farao fã ní tsumi ɔ nya nikɔtɔma amɛ kɛ ní tsumi ɔ nɔ hyɛli ɔmɛ ke: 7 “Nyɛ ko ha ni ɔmɛ nga nɛ a kɛ pee bliikisi ɔ hu. Nyɛ ha nɛ mɛ nitsɛmɛ a ya nɛ a ya bua nga nya. 8 Se nyɛ ha nɛ á po bliikisi abɔ nɛ a pooɔ daa a nɔuu. Nyɛ ko gbɔ nɔ kɛ ha mɛ, ejakaa a ngɛ hejɔ pee.* Lɔ ɔ he je nɛ a ngɛ ngmlaa kpae ke, ‘Wa suɔ nɛ waa je, wa suɔ nɛ wa ya sã afɔle kɛ ha wa Mawu ɔ!’ nɛ. 9 Nyɛ ha nɛ a tsu ní wawɛɛ pe kekle ɔ po. Nyɛ ko ha mɛ deka, bɔ nɛ pee nɛ a ko bu lakpa munyuhi tue.”

10 Lɔ ɔ he ɔ, ní tsumi ɔ nya nikɔtɔma amɛ kɛ ní tsumi ɔ nɔ hyɛli ɔmɛ ho nɛ a ya de Israel bi ɔmɛ ke: “Nɔ́ nɛ Farao de ji nɛ ɔ nɛ, ‘I be nyɛ nga hae hu. 11 Nyɛɛ ya nɛ nyɛ ya hla nyɛ nitsɛmɛ nyɛ nga ngɛ he saisaa nɛ nyɛ maa na eko ngɛ, se a be nyɛ ní tsumi ɔ nɔ gbɔe kɔkɔɔkɔ.’” 12 Kɛkɛ nɛ ni ɔmɛ gbɛ fĩa Egipt zugba a nɔ tsuo konɛ a ya bua nga* nya nɛ́ a kɛ pee bliikisi. 13 Nɛ ní tsumi ɔ nya nikɔtɔma amɛ ya nɔ nɛ a de ke: “Nyɛ ti nɔ fɛɛ nɔ nɛ e gbe e daa ligbi ní tsumi ɔ nya kaa bɔ nɛ e peeɔ be nɛ a haa nyɛ nga a.” 14 Jehanɛ se hu ɔ, a fiaa ní tsumi ɔ nɔ hyɛli nɛ a ji Israel bi nɛ Farao ní tsumi ɔ nya nikɔtɔma amɛ hla a kpa. A bi mɛ ke: “Mɛni he je nɛ nyɛ pui bliikisi abɔ nɛ jinɛ nyɛ pooɔ daa a? Hiɛ ɔ jã, nɛ mwɔnɛ ɔ hu jã nɔuu.”

15 Lɔ ɔ he ɔ, Israel bi nɛ a hyɛɛ ní tsumi ɔ nɔ ɔ ya Farao ngɔ nɛ a ngɔ a haomi ɔ kɛ ya fɔ e hɛ mi, nɛ a bi lɛ ke: “Mɛni he je nɛ o ngɛ o sɔmɔli ɔmɛ pee kikɛ nɛ ɔ? 16 A ha we o sɔmɔli ɔmɛ nga hu, se kɛ̃ ɔ, a ngɛ wɔ dee ke, ‘Nyɛɛ po bliikisi! A ngɛ o sɔmɔli ɔmɛ kpa fiae, se tɔmi ɔ je mo nitsɛ o we bi ɔmɛ.” 17 Se Farao de mɛ ke: “Nyɛ ngɛ hejɔ pee,* nyɛ ngɛ hejɔ pee!* Lɔ ɔ he je nɛ nyɛ ngɛ dee ke, ‘Wa suɔ nɛ waa je, wa suɔ nɛ wa ya sã afɔle ha Yehowa’ a nɛ. 18 Esɔ nɛ nyɛɛ kpale kɛ ho nɛ nyɛ ya tsu ní! A be nyɛ nga hae, se kɛ̃ ɔ, nyɛɛ po bliikisi abɔ nɛ nyɛ pooɔ daa a.”

19 Kɛkɛ nɛ Israel bi nɛ a hyɛɛ ní tsumi ɔ nɔ ɔ na kaa fami nɛ ji: “Nyɛ ko gbɔ bliikisi abɔ nɛ nyɛ pooɔ daa ligbi ɔ nɔ kɔkɔɔkɔ” ɔ ha nɛ a sɛ haomi ngua mi. 20 Lɔ ɔ se ɔ, benɛ a je kpo kɛ je Farao ngɔ ɔ, a ba ná Mose kɛ Aaron nɛ a daa si ngɛ lejɛ ɔ ngɛ mɛ mlɛe. 21 Oya nɔuu nɛ a de mɛ ke: “Yehowa nɛ e hyɛ nyɛ nɛ e kojo nyɛ, ejakaa nyɛ ha nɛ wa he pee Farao kɛ e sɔmɔli ɔmɛ tai* nɛ nyɛ ngɔ klaate kɛ wo a dɛ konɛ a kɛ gbe wɔ.” 22 Kɛkɛ nɛ Mose sɔle kɛ ha Yehowa nɛ e de lɛ ke: “Yehowa, mɛni he je nɛ o hao nimli nɛ ɔmɛ ɔ? Mɛni he je nɛ o tsɔ mi ɔ? 23 Kɛ je be nɛ i ya Farao hɛ mi nɛ i ya tu munyu ngɛ o biɛ mi ɔ, e wa nimli nɛ ɔmɛ yi mi wawɛɛ pe kekle ɔ po, se o kpɔ̃ we o we bi ɔmɛ hulɔ.”

6 Kɛkɛ nɛ Yehowa de Mose ke: “Amlɔ nɛ ɔ, o maa na nɔ́ nɛ ma pee Farao. I kɛ nine si wami maa nyɛ e nɔ nɛ e ma ha nɛ ye we bi ɔmɛ maa ho, nɛ i kɛ nine si wami maa nyɛ e nɔ nɛ e maa fiee mɛ kɛ je e zugba a nɔ.”

2 Kɛkɛ nɛ Mawu de Mose ke: “Imi ji Yehowa. 3 Be ko nɛ be ɔ, i jeɔ ye he kpo kɛ tsɔɔ Abraham, Isak, kɛ Yakob kaa Mawu Ope, se ye biɛ Yehowa a lɛɛ, i ha we nɛ a kɛ lɔ ɔ nɛ le mi. 4 Jehanɛ se hu ɔ, i kɛ mɛ so kaa ma ngɔ Kanaan zugba a, nɛ ji zugba nɛ a hi nɔ kaa nibwɔhi ɔ kɛ ha mɛ. 5 Amlɔ nɛ ɔ, imi nitsɛ i nu Israel bi ɔmɛ nɛ Egipt bi ɔmɛ ngɔ mɛ nyɔguɛ ɔ a kɛmɛmi ɔ, nɛ i kai ye somi ɔ.

6 “Enɛ ɔ he ɔ, de Israel bi ɔmɛ ke: ‘Imi ji Yehowa, nɛ ma je nyɛ ngɛ Egipt bi ɔmɛ a tlomi ɔmɛ a sisi, nɛ ma kpɔ̃ nyɛ kɛ je nyɛ nyɔguɛ yemi ɔ sisi, nɛ ma ngɔ kɔni si wami* kɛ je nyɛ, nɛ ma gbla Egipt bi ɔmɛ a tue wawɛɛ. 7 Nɛ ma ngɔ nyɛ kɛ pee ye we bi, nɛ ma pee nyɛ Mawu, nɛ nyɛ maa le kokooko kaa imi ji Yehowa nyɛ Mawu ɔ nɛ́ e ngɛ nyɛ jee kɛ ngɛ Egipt bi ɔmɛ a tlomi ɔmɛ a sisi jee ɔ nɛ. 8 Nɛ ma ngɔ nyɛ kɛ ba zugba a nɛ i kã he kita* kaa ma ngɔ kɛ ha Abraham, Isak, kɛ Yakob ɔ nɔ; nɛ ma ngɔ zugba a kɛ ha nyɛ, nɛ e ma ba pee nyɛ nɔ́. Imi ji Yehowa.’”

9 Pee se ɔ, Mose ngɔ sɛ gbi nɛ ɔ kɛ ha Israel bi ɔmɛ, se a bui Mose tue akɛnɛ a kɔni mi jɔ̃ nɛ a ngɛ nɔ́ nae wawɛɛ ngɛ nyɔguɛ tso mi ɔ he je.

10 Kɛkɛ nɛ Yehowa de Mose ke: 11 “Yaa nɛ o ya de Farao, Egipt matsɛ ɔ kaa e wo Israel bi ɔmɛ blɔ kɛ je e zugba a nɔ kɛ ho.” 12 Se Mose ha Yehowa heto ke: “Hyɛ! Israel bi ɔmɛ bui mi tue; kɛ e maa pee kɛɛ nɛ Farao maa bu mi tue, be mi nɛ munyu tumi he wa ha mi kikɛ ɔ?”* 13 Se Yehowa kpale de Mose kɛ Aaron famihi nɛ e sa kaa a fã Israel bi ɔmɛ kɛ Farao, nɛ ji Egipt matsɛ ɔ, bɔ nɛ pee nɛ a ngɔ Israel bi ɔmɛ kɛ je Egipt zugba a nɔ.

14 Israel bi ɔmɛ a tsɛmɛ ɔmɛ a we ɔ nyatsɛmɛ ji nɛ ɔmɛ nɛ: “Reuben, Israel bitɛte ɔ binyumuhi ji Hanok, Palu, Hezron, kɛ Karmi. Ni nɛ ɔmɛ ji Reuben weku ɔmɛ ɔ nɛ.

15 Simeon binyumuhi ji Yemuel, Yamin, Ohad, Yakin, Zohar, kɛ Shaul, nɛ ji Kanaan yo ɔ binyumu ɔ. Ni nɛ ɔmɛ ji Simeon weku ɔmɛ ɔ nɛ.

16 Levi binyumu ɔmɛ a biɛhi ngɛ wekuhi nɛ a je mi ɔ a nya ji nɛ ɔ nɛ: Gershon, Kohat, kɛ Merari. Jeha abɔ nɛ Levi ye ji jeha 137.

17 Gershon binyumuhi ji, Libni kɛ Shimei ngɛ a wekuhi a nya.

18 Kohat binyumuhi ji, Amram, Izar, Hebron, kɛ Uziel. Jeha abɔ nɛ Kohat ye ji jeha 133.

19 Merari binyumuhi ji Mahli kɛ Mushi.

Ni nɛ ɔmɛ ji Levi bi ɔmɛ a wekuhi ngɛ wekuhi nɛ a je mi ɔmɛ a nya.

20 Jehanɛ ɔ, Amram ngɔ Yokebed, e tsɛ ɔ nyɛmiyo ɔ kaa e yo. Yokebed fɔ Aaron kɛ Mose kɛ ha lɛ. Jeha abɔ nɛ Amram ye ji jeha 137.

21 Izar binyumuhi ji Kora, Nefeg, kɛ Zikri.

22 Uziel binyumuhi ji Mishael, Elzafan, kɛ Sitri.

23 Jehanɛ ɔ, Aaron ngɔ Elisheba, Aminadab biyo ɔ, nɛ ji Nashon nyɛmiyo ɔ kaa e yo. Elisheba fɔ Nadab, Abihu, Eleazar, kɛ Itamar kɛ ha lɛ.

24 Kora binyumuhi ji Asir, Elkana, kɛ Abiasaf. Kora bi ɔmɛ a weku ɔmɛ ji nɛ ɔmɛ nɛ.

25 Eleazar, Aaron binyumu ɔ ngɔ Putiel biyi ɔmɛ a kpɛti nɔ kake kaa e yo. Yo ɔ fɔ Finehas kɛ ha lɛ.

Ni nɛ ɔmɛ ji Levi bi a tsɛmɛ ɔmɛ a weku ɔmɛ a nyatsɛmɛ ɔmɛ ɔ nɛ, ngɛ a wekuhi a nya.

26 Aaron kɛ Mose nɛ ɔ nɛ Yehowa de mɛ ke: “Nyɛɛ ngɔ Israel bi ɔmɛ kɛ je Egipt zugba a nɔ kuu nya kuu nya”* a nɛ. 27 Mɛ ji nihi nɛ a kɛ Farao, nɛ ji Egipt matsɛ ɔ tu munyu konɛ a ngɔ Israel bi ɔmɛ kɛ je Egipt ɔ nɛ. Jamɛ a Mose ɔ kɛ Aaron ɔ ji nɛ ɔ nɛ.

28 Jamɛ a ligbi ɔ, benɛ Yehowa kɛ Mose tu munyu ngɛ Egipt zugba a nɔ ɔ, 29 Yehowa de Mose ke: “Imi ji Yehowa. De Farao, nɛ ji Egipt matsɛ ɔ nɔ́ fɛɛ nɔ́ nɛ i ngɛ mo dee ɔ.” 30 Kɛkɛ nɛ Mose de Yehowa ke: “Hyɛ! munyu tumi he wa ha mi,* kɛ e maa pee kɛɛ nɛ Farao maa bu mi tue?”

7 Kɛkɛ nɛ Yehowa de Mose ke: “Hyɛ, i pee mo kaa Mawu* kɛ ha Farao, nɛ mo nitsɛ o nyɛminyumu Aaron ma ba pee o gbalɔ. 2 Nɔ́ fɛɛ nɔ́ nɛ ma fã mo ɔ, mo de o nyɛminyumu Aaron, nɛ e kɛ Farao maa tu munyu, nɛ e ma ha nɛ Israel bi ɔmɛ maa je e zugba a nɔ kɛ ho. 3 Imi lɛɛ ma ngmɛ blɔ nɛ Farao maa kplii e tsui, nɛ ma pee okadihi kɛ nyakpɛ níhi babauu ngɛ Egipt zugba a nɔ. 4 Se Farao be mo tue bue, nɛ ma je he wami nɛ ngɛ ye nine mi ɔ kpo kɛ tsɔɔ Egipt. Ma gbla Egipt tue wawɛɛ nɛ ma je ye ma kpekpemi ɔ,* ye we bi, nɛ ji Israel bi ɔmɛ kɛ je Egipt zugba a nɔ. 5 Nɛ ke i kpã ye nine mi nɛ i ta Egipt he nɛ i je Israel bi ɔmɛ kɛ je a kpɛti ɔ, Egipt bi ɔmɛ ma ná maa le kaa imi ji Yehowa.” 6 Mose kɛ Aaron pee níhi nɛ Yehowa fã mɛ ke a pee ɔ; a pee jã pɛpɛɛpɛ. 7 Mose ye jeha 80 nɛ Aaron ye jeha 83 benɛ a kɛ Farao ya tu munyu ɔ.

8 Jehanɛ ɔ, Yehowa de Mose kɛ Aaron ke: 9 “Ke Farao de nyɛ ke, ‘Nyɛɛ pee nyakpɛ nɔ́ ko’ ɔ, lɛɛ mo de Aaron ke: ‘Mo sake o tso ɔ kɛ fɔ si ngɛ Farao hɛ mi.’ Tso ɔ ma plɛ pee sinɔ ngua.” 10 Lɔ ɔ he ɔ, Mose kɛ Aaron ya Farao ngɔ nɛ a pee kaa bɔ nɛ Yehowa fã mɛ ɔ pɛpɛɛpɛ. Aaron sake e tso ɔ kɛ fɔ si ngɛ Farao kɛ e sɔmɔli ɔmɛ a hɛ mi, nɛ tso ɔ plɛ pee sinɔ ngua. 11 Se Farao tsɛ ní leli ɔmɛ kɛ kunya yeli ɔmɛ kɛ ba, nɛ Egipt wɔnɔ ɔmɛ hu pee jã nɔuu kɛ a kunya yemi ɔ.* 12 A ti nɔ fɛɛ nɔ sake e tso ɔ kɛ fɔ si nɛ tso ɔmɛ plɛ pee sinɔ nguahi; se Aaron tso ɔ mii a tso ɔmɛ. 13 Loloolo ɔ, Farao kplii e tsui, nɛ kaa bɔ nɛ Yehowa de ɔ, e bui mɛ tue.

14 Kɛkɛ nɛ Yehowa de Mose ke: “Farao kplii e tsui. E kua kaa e maa wo ni ɔmɛ blɔ kɛ ho. 15 Yaa Farao ngɔ mɔtu. Hyɛ! E ngɛ kpo jee kɛ yaa pa a he! Yaa da si ngɛ Nilo Pa a nya nɛ́ o kɛ lɛ ya kpe; ngɔɔ tso ɔ nɛ e plɛ pee sinɔ ɔ nɛ́ o hɛɛ ngɛ o dɛ mi. 16 De lɛ ke, ‘Yehowa, Hebri bi ɔmɛ a Mawu ɔ tsɔ mi o ngɔ, nɛ e de ke: “Wo ye we bi ɔmɛ blɔ kɛ ho konɛ a ya sɔmɔ mi ngɛ nga a nɔ,” se o bui tue kɛ ba si amlɔ nɛ ɔ. 17 Nɔ́ nɛ Yehowa ngɛ dee ji nɛ ɔ nɛ: “Enɛ ɔ nɛ o kɛ maa le kaa imi ji Yehowa. Ma ngɔ tso ɔ nɛ ngɛ ye dɛ mi ɔ kɛ fia Nilo Pa a mi, nɛ nyu ɔ ma plɛ pee muɔ. 18 Nɛ lohi nɛ a ngɛ Nilo Pa a mi ɔ ma gbo nɛ Nilo Pa a maa je fu, nɛ Egipt bi ɔmɛ be nyɛe maa nu Nilo Pa a mi nyu.”’”

19 Kɛkɛ nɛ Yehowa de Mose ke: “De Aaron ke, ‘Wo o tso ɔ nɛ o kpã o nine mi ngɛ Egipt nyu ɔmɛ a nɔ, ngɛ pa amɛ a nɔ, ngɛ nyu dɔ ɔmɛ* a nɔ, ngɛ hehi nɛ nyu daa amɛ a nɔ, kɛ Egipt nyu tomi he ɔmɛ tsuo a nɔ, bɔ nɛ pee nɛ a plɛ pee muɔ.’ Muɔ maa hi Egipt zugba a nɔ tsuo, ngɛ níhi nɛ a kɛ tso kɛ tɛ pee nɛ a ngɔɔ nyu kɛ woɔ a mi ɔ po a mi.” 20 Oya nɔuu nɛ Mose kɛ Aaron pee kaa bɔ nɛ Yehowa fã mɛ ɔ pɛpɛɛpɛ. E wo tso ɔ nɔ nɛ e kɛ fia Nilo Pa a mi ngɛ Farao kɛ e sɔmɔli ɔmɛ a hɛ mi, nɛ nyu nɛ ngɛ pa a mi ɔ tsuo plɛ pee muɔ. 21 Nɛ lohi nɛ a ngɛ pa a mi ɔ gbo, nɛ pa a bɔni fu jemi, nɛ Egipt bi ɔmɛ nyɛ we nɛ a nu Nilo Pa a mi nyu ɔ hu, nɛ muɔ da Egipt zugba a nɔ he fɛɛ he.

22 Se Egipt wɔnɔ ɔmɛ gu a zi mi* ní peepee ɔmɛ a nɔ kɛ pee jã nɔuu, nɛ lɔ ɔ ha nɛ Farao ya nɔ nɛ e kplii e tsui, nɛ kaa bɔ nɛ Yehowa de ɔ, e bui mɛ tue. 23 Kɛkɛ nɛ Farao kpale kɛ ho e we mi ya, nɛ enɛ ɔ hu pue we e tsui nɔ. 24 Lɔ ɔ he ɔ, Egipt bi ɔmɛ tsuo ya ngɛ si tsuae ngɛ Nilo Pa a he tsuo konɛ a ná nyu nɛ a nu, ejakaa a nyɛ we nɛ á nu Nilo Pa a mi nyu ɔ eko. 25 Benɛ Yehowa ha nɛ Nilo Pa a pee muɔ se ɔ, ligbi kpaago sɔuu ba be.

8 Kɛkɛ nɛ Yehowa de Mose ke: “Yaa Farao ngɔ nɛ o ya de lɛ ke, ‘Nɔ́ nɛ Yehowa ngɛ dee ji nɛ ɔ nɛ: “Wo ye we bi ɔmɛ blɔ kɛ ho konɛ a ya sɔmɔ mi. 2 Ke loloolo ɔ, o kplɛɛ we kaa o maa wo mɛ blɔ kɛ ho ɔ, ma ngɔ ovɔnɔhi kɛ hao o zugba a tsuo. 3 Nɛ Nilo Pa a ma hyi tɔ kɛ ovɔnɔhi babauu, nɛ a maa je kpo kɛ ba nɛ a ma ba sɛ o we ɔ mi, a maa sɛ tsu nɛ o hwɔɔ mi ɔ mi, a maa ba o sa a nɔ, a ma ba sɛ o sɔmɔli ɔmɛ a we ɔmɛ a mi, nɛ a maa sɛ o ma mi bi ɔmɛ a kpɛti, a maa sɛ o flɔɔnɔɔ ɔmɛ, kɛ o tsesihi nɛ a pɔtɔɔ mamu ngɛ a mi ɔ mi. 4 Ovɔnɔ ɔmɛ maa ha mo, o ma mi bi ɔmɛ, kɛ o sɔmɔli ɔmɛ tsuo.”’”

5 Pee se ɔ, Yehowa de Mose ke: “De Aaron ke, ‘Kpã o nine mi nɛ o ngɔ o tso ɔ kɛ tsɔɔ pa amɛ a nɔ, Nilo nyu dɔ ɔmɛ, kɛ hehi nɛ nyu daa si ngɛ ɔ, nɛ́ o ha nɛ ovɔnɔhi nɛ a je kpo kɛ ba Egipt zugba a nɔ.’” 6 Lɔ ɔ he ɔ, Aaron kpã e nine mi ngɛ Egipt nyu ɔmɛ a nɔ, nɛ ovɔnɔhi bɔni kpo jemi nɛ a ba ha Egipt zugba a nɔ. 7 Se wɔnɔ ɔmɛ pee jã nɔuu kɛ gu a zi mi* ní peepee ɔmɛ a nɔ, nɛ mɛ hu a ha nɛ ovɔnɔhi je kpo kɛ ba Egipt zugba a nɔ. 8 Kɛkɛ nɛ Farao tsɛ Mose kɛ Aaron nɛ e de mɛ ke: “Nyɛ kpa Yehowa pɛɛ nɛ e je ovɔnɔ ɔmɛ kɛ je i kɛ ye we bi ɔmɛ wa kpɛti, ejakaa i suɔ nɛ ma ha nɛ nyɛ we bi ɔmɛ nɛ a ho konɛ a ya sã afɔle kɛ ha Yehowa.” 9 Kɛkɛ nɛ Mose de Farao ke: “I kpa mo pɛɛ nɛ o tsɔɔ mi be nɛ o maa suɔ kaa ma kpa pɛɛ ha mo konɛ a je ovɔnɔ ɔmɛ kɛ je o kɛ o sɔmɔli ɔmɛ kɛ o ma mi bi ɔmɛ nyɛ kpɛti, kɛ o we ɔmɛ a mi. Ní nɛmɛ nɛ a ngɛ Nilo Pa a mi ɔ pɛ lɛ a ma si.” 10 Kɛkɛ nɛ Farao de ke: “Hwɔɔ.” Lɔ ɔ he ɔ, Mose de ke: “E maa ba mi kaa bɔ nɛ o de ɔ, bɔ nɛ pee nɛ o le kaa nɔ ko be nɛ e ngɛ kaa Yehowa wa Mawu ɔ. 11 Ovɔnɔ ɔmɛ maa jɔɔ mo haomi, a maa je o we ɔmɛ a mi, nɛ a maa jɔɔ o sɔmɔli ɔmɛ kɛ o ma mi bi ɔmɛ hu haomi. Ní nɛmɛ nɛ a ngɛ Nilo Pa a mi ɔ pɛ lɛ a ma si.”

12 Lɔ ɔ he ɔ, Mose kɛ Aaron je Farao ngɔ kɛ ho, nɛ Mose ya kpa Yehowa pɛɛ ngɛ ovɔnɔ ɔmɛ nɛ e ngɔ kɛ ba Farao nɔ ɔ he. 13 Kɛkɛ nɛ Yehowa pee kaa bɔ nɛ Mose bi ɔ, nɛ ovɔnɔ ɔmɛ bɔni gbomi ngɛ we ɔmɛ a mi, kpo ɔmɛ a nɔ, kɛ ngmɔ ɔmɛ a nɔ. 14 A bua a nya glekugleku nɛ́ e hí kanemi, nɛ zugba a nɔ bɔni fu jemi. 15 Benɛ Farao na kaa a ná mumi womi he bɔɔ ɔ, e kplii e tsui, nɛ kaa bɔ nɛ Yehowa de ɔ, e bui mɛ tue.

16 Jehanɛ ɔ, Yehowa de Mose ke: “De Aaron ke, ‘Wo o tso ɔ nɔ nɛ o kɛ fia zugba a nɔ tabo zu ɔ, nɛ e maa pee pwɔmihi* ngɛ Egipt zugba a nɔ tsuo.’” 17 Nɛ a pee jã. Aaron kpã e nine mi nɛ e kɛ tso ɔ nɛ ngɛ e dɛ mi ɔ fia zugba a nɔ tabo zu ɔ, nɛ pwɔmihi ba ha nimli kɛ lohwehi tsuo. Zugba a nɔ tabo zu ɔ tsuo plɛ pee pwɔmihi ngɛ Egipt zugba a tsuo nɔ. 18 Wɔnɔ ɔmɛ ka kaa a maa pee jã nɔuu konɛ á gu a zi mi ní peepee ɔmɛ a nɔ kɛ ha nɛ pwɔmihi nɛ ba, se a nyɛ we. Nɛ pwɔmi ɔmɛ ba ha nimli kɛ lohwehi tsuo. 19 Lɔ ɔ he ɔ, wɔnɔ ɔmɛ de Farao ke: “Enɛ ɔ lɛɛ Mawu he wami ji nɛ ɔ nɛ!”* Se Farao ya nɔ nɛ e kplii e tsui, nɛ kaa bɔ nɛ Yehowa de ɔ, e bui mɛ tue.

20 Kɛkɛ nɛ Yehowa de Mose ke: “Tee si mɔtu mla nɛ o ya da si ngɛ Farao hɛ mi. Hyɛ! E ngɛ kpo jee kɛ ma nyu ɔ he! De lɛ ke, ‘Nɔ́ nɛ Yehowa de ji nɛ ɔ nɛ: “Wo ye we bi ɔmɛ blɔ kɛ ho konɛ a ya sɔmɔ mi. 21 Se ke o ha we nɛ ye we bi ɔmɛ nɛ a ho ɔ, ma ha nɛ pwɔlwɛhi* ma ba hao o kɛ o tsɔli ɔmɛ, kɛ o ma mi bi ɔmɛ, nɛ a maa sɛ o we ɔmɛ a mi; nɛ Egipt we ɔmɛ a mi ma hyi tɔ kɛ pwɔlwɛhi, nɛ pwɔlwɛ ɔmɛ maa ha zugba a nɔ nɛ a* be nane mami he po nae. 22 Bɔ fɛɛ bɔ nɛ ji ɔ, jamɛ a ligbi ɔ, ma jé Goshen zugba a, he nɛ ye we bi ɔmɛ ngɛ ɔ kɛ je mi. Pwɔlwɛ ko be lejɛ ɔ yae, nɛ kɛ gu nɔ́ nɛ ɔ nɔ ɔ, nyɛ maa le kaa imi, Yehowa, i ngɛ hiɛmɛ nɛ ɔ ngɛ zugba a nɔ. 23 Nɛ ma ha nɛ slɔɔto maa ba ye we bi ɔmɛ kɛ o ma mi bi ɔmɛ a kpɛti. Ma pee okadi nɛ ɔ hwɔɔ.”’”

24 Yehowa pee jã, nɛ pwɔlwɛhi babauu nitsɛ ba sɛ Farao we ɔ kɛ e sɔmɔli ɔmɛ a we ɔmɛ a mi, nɛ a ba Egipt zugba a tsuo nɔ. Pwɔlwɛ ɔmɛ kpata zugba a tsuo hɛ mi. 25 Nyagbe ɔ, Farao tsɛ Mose kɛ Aaron nɛ e de mɛ ke: “Nyɛɛ ya nɛ nyɛ ya sã afɔle kɛ ha nyɛ Mawu ɔ ngɛ zugba nɛ ɔ nɔ.” 26 Se Mose de ke: “E dɛ blɔ kaa wa maa pee jã, ejakaa níhi nɛ waa kɛ maa sã afɔle kɛ ha Yehowa wa Mawu ɔ maa pee níhi nɛ Egipt bi ɔmɛ hiɔ. Anɛ ke wa ngɔ níhi nɛ Egipt bi ɔmɛ hiɔ kɛ sã afɔle ngɛ a hɛ mi ɔ, a be wɔ tɛ fiaae lo? 27 Wa maa hia blɔ ligbi etɛ kɛ ya nga a nɔ, nɛ wa ma ya sã afɔle kɛ ha Yehowa, wa Mawu ɔ ngɛ lejɛ ɔ, kaa bɔ nɛ e de wɔ ɔ pɛpɛɛpɛ.”

28 Jehanɛ ɔ, Farao de ke: “Ma wo nyɛ blɔ kɛ ho konɛ nyɛ ya sã afɔle kɛ ha Yehowa nyɛ Mawu ɔ ngɛ nga a nɔ. Se nyɛɛ hyɛ nɛ nyɛ ko ya tsitsaa. Nyɛ kpa pɛɛ kɛ ha mi.” 29 Kɛkɛ nɛ Mose de ke: “Amlɔ nɛ ɔ, i ngɛ o ngɔ jee kɛ yaa. Ma ya kpa Yehowa pɛɛ, nɛ hwɔɔ ɔ, pwɔlwɛ ɔmɛ maa je Farao, e sɔmɔli ɔmɛ, kɛ e ma mi bi ɔmɛ a kpɛti. Se Farao nɛ kpa wɔ sisimi,* nɛ e ko de ke e be wɔ blɔ hae nɛ wa ya sã afɔle ha Yehowa.” 30 Kɛkɛ nɛ Mose je Farao ngɔ kɛ ho, nɛ e ya kpa Yehowa pɛɛ. 31 Lɔ ɔ he ɔ, Yehowa pee kaa bɔ nɛ Mose de ɔ, nɛ pwɔlwɛ ɔmɛ je Farao, e sɔmɔli ɔmɛ, kɛ e ma mi bi ɔmɛ a kpɛti. Kake po píɛ. 32 Se Farao kpale kplii e tsui, nɛ e ha we nɛ Israel bi ɔmɛ nɛ a ho.

9 Lɔ ɔ he ɔ, Yehowa de Mose ke: “Yaa Farao ngɔ nɛ o ya de lɛ ke, ‘Nɔ́ nɛ Yehowa, Hebri bi ɔmɛ a Mawu ɔ de ji nɛ ɔ nɛ: “Wo ye we bi ɔmɛ blɔ kɛ ho konɛ a ya sɔmɔ mi. 2 Se ke o kplɛɛ we kaa o ma ha nɛ a ho, nɛ o ya nɔ nɛ o tsi a nya a, 3 hyɛ! Yehowa ma wo e nine nɔ ngɛ o lohwe ɔmɛ nɛ a ngɛ nga a nɔ ɔ a nɔ. Hiɔ nɛ nya wa nitsɛ maa fia okpɔngɔ ɔmɛ, teji ɔmɛ, afukpɔngɔ ɔmɛ, na amɛ, kɛ to ɔmɛ. 4 Nɛ Yehowa ma ha nɛ slɔɔto maa ba Israel bi ɔmɛ a lohwe ɔmɛ kɛ Egipt bi ɔmɛ a lohwe ɔmɛ a kpɛti kokooko, nɛ Israel bi ɔmɛ a lohwe ko lohwe ko be gboe.”’” 5 Jehanɛ se hu ɔ, Yehowa to be pɔtɛɛ ko, nɛ e de ke: “Hwɔɔ ɔ, imi Yehowa, ma pee nɔ́ nɛ ɔ ngɛ zugba a nɔ.”

6 E nɔ jena a, Yehowa pee kaa bɔ nɛ e de ɔ, nɛ Egipt bi ɔmɛ a lohwe slɔɔto ɔmɛ tsuo bɔni gbomi, se Israel bi ɔmɛ lɛɛ a lohwe kake po gbo we. 7 Benɛ Farao tsɔ e tsɔli ɔmɛ nɛ a ya bi si ɔ, hyɛ! Israel bi ɔmɛ a lohwe kake ngmelu po gbo we. Ngɛ enɛ ɔ tsuo se ɔ, Farao kplii e tsui, nɛ e ha we nɛ ni ɔmɛ nɛ́ a ho.

8 Kɛkɛ nɛ Yehowa de Mose kɛ Aaron ke: “Nyɛ piti flɔɔnɔɔ mi la zu kɛ wo nyɛ dɛ mi, nɛ́ Mose nɛ e fɔ la zu ɔ kɛ wo kɔɔhiɔ mi ngɛ Farao hɛ mi. 9 Nɛ e maa pee bunyuku ngɛ Egipt zugba a nɔ tsuo, nɛ e maa pee tslɔɔ yaya nɛ e maa fuu nimli kɛ lohwehi nɛ a ngɛ Egipt zugba a nɔ ɔ tsuo.”

10 Lɔ ɔ he ɔ, a piti flɔɔnɔɔ mi la zu nɛ a ya da Farao hɛ mi, nɛ Mose fɔ la zu ɔ kɛ wo kɔɔhiɔ mi nɛ e pee tslɔɔ yaya, nɛ e fuu nimli kɛ lohwehi tsuo. 11 Tslɔɔ ɔ he je ɔ, wɔnɔ ɔmɛ nyɛ we nɛ a da Mose hɛ mi, ejakaa tslɔɔ ɔ fuu wɔnɔ ɔmɛ kɛ Egipt bi ɔmɛ tsuo. 12 Se Yehowa ngmɛ blɔ nɛ Farao kplii e tsui, nɛ e bui mɛ tue kaa bɔ nɛ Yehowa de Mose ɔ.

13 Kɛkɛ nɛ Yehowa de Mose ke: “Tee si mɔtu mla nɛ o ya da Farao hɛ mi, nɛ o de lɛ ke, ‘Nɔ́ nɛ Yehowa, Hebri bi ɔmɛ a Mawu ɔ de ji nɛ ɔ nɛ: “Wo ye we bi ɔmɛ blɔ kɛ ho konɛ a ya sɔmɔ mi. 14 Ejakaa amlɔ nɛ ɔ, ma ngɔ haomihi kɛ ba o kɛ o sɔmɔli ɔmɛ kɛ o ma mi bi ɔmɛ nyɛ nɔ, bɔ nɛ pee nɛ o na kaa nɔ ko be nɛ e ngɛ kaa imi ngɛ zugba a nɔ tsuo. 15 Jinɛ i ko kpã ye nine mi nɛ i ko ngɔ hiɔ nɛ kpataa nɔ hɛ mi kɛ ko fia o kɛ o ma mi bi ɔmɛ momoomo. Jinɛ i ko bɛɛ nyɛ* kɛ je zugba a nɔ. 16 Se yi mi tomi tutuutu he je nɛ i ha nɛ o ngɛ wami mi ji: nɛ́ ma je ye he wami kpo kɛ tsɔɔ mo, bɔ nɛ pee nɛ ma ha nɛ a jaje ye biɛ ɔ ngɛ zugba a nɔ tsuo. 17 Anɛ loloolo ɔ, o ngɛ o he nɔ woe ngɛ ye we bi ɔmɛ a nɔ nɛ o ha we nɛ a ho lo? 18 Hwɔɔ maa pee be nɛ ɔ mi ɔ, ma ha nɛ gbiɛ ngo ngu babauu maa nɛ kɛ pue si. Gbiɛ ngo ngu nɛ eko nɛ́ kaa jã hyɛ ngɛ Egipt kɛ je be nɛ a to ma a sisi kɛ ba si amlɔ nɛ ɔ. 19 Enɛ ɔ he je ɔ, moo tsɔ konɛ a ya ngɔ o lohwe ɔmɛ tsuo kɛ nɔ́ fɛɛ nɔ́ nɛ o ngɛ ngɛ nga a nɔ ɔ kɛ ba wo tsu mi. Adesa fɛɛ adesa kɛ lohwe fɛɛ lohwe nɛ e maa tlɔ nga a nɔ nɛ́ a kɛ lɛ be we mi bae ɔ, gbiɛ ngo ngu ɔ maa nɛ kɛ pue e nɔ nɛ e ma gbo.”’”

20 Farao sɔmɔli ɔmɛ a kpɛti ni nɛmɛ nɛ a ye Yehowa munyu ɔ gbeye ɔ ngɔ a sɔmɔli ɔmɛ kɛ a lohwe ɔmɛ kɛ ba a wehi a mi amlɔ nɔuu, 21 se ni nɛmɛ nɛ a kɛ Yehowa munyu ɔ tsu we ní ɔ ngmɛɛ a sɔmɔli ɔmɛ kɛ a lohwe ɔmɛ a he ngɛ nga a nɔ.

22 Jehanɛ ɔ, Yehowa de Mose ke: “Wo o nine nɔ kɛ tsɔɔ hiɔwe, konɛ gbiɛ ngo ngu ɔ nɛ e nɛ kɛ pue Egipt zugba a tsuo nɔ. É nɛ ngɔ pue adesahi kɛ lohwehi kɛ nga nɔ tsohi tsuo nɛ a ngɛ Egipt zugba a nɔ ɔ a nɔ.” 23 Lɔ ɔ he ɔ, Mose wo e tso ɔ nɔ kɛ tsɔɔ hiɔwe, nɛ Yehowa ha nɛ hiɔwe si, nɛ gbiɛ ngo ngu kɛ la* nɛ kɛ pue zugba a nɔ, nɛ Yehowa ha nɛ gbiɛ ngo ngu ɔ ya nɔ nɛ e nɛ kɛ pue Egipt zugba a nɔ. 24 Gbiɛ ngo ngu nɛ, nɛ la kpɛ plamplam ngɛ gbiɛ ngo ngu ɔ mi. E nɛ wawɛɛ nitsɛ; eko nɛ́ kaa jã a hyɛ ngɛ zugba a nɔ kɛ je be nɛ a po Egipt ma a. 25 Gbiɛ ngo ngu ɔ gbe nɔ́ fɛɛ nɔ́ ngɛ nga a nɔ ngɛ Egipt zugba a nɔ he fɛɛ he, kɛ je adesahi a nɔ kɛ ya si lohwehi a nɔ. E kpata huhi tsuo, kɛ nga nɔ tsohi tsuo a hɛ mi. 26 Goshen zugba a nɔ, nɛ ji he nɛ Israel bi ɔmɛ ngɛ ɔ pɛ nɛ gbiɛ ngo ngu ɔ nɛ́ ngɛ.

27 Lɔ ɔ he ɔ, Farao tsɔ nɛ a ya tsɛ Mose kɛ Aaron kɛ ba nɛ e de mɛ ke: “Jehanɛ ɔ lɛɛ, i pee yayami. Dalɔ ji Yehowa, i kɛ ye ma a lɛ wa tɔ̃. 28 Mo kpa Yehowa pɛɛ konɛ hiɔwe simi ɔ kɛ gbiɛ ngo ngu ɔ se nɛ po. Kɛkɛ ɔ, ma ha nɛ nyɛ maa ho, nɛ i be nyɛ nya tsie hu.” 29 Lɔ ɔ he ɔ, Mose de lɛ ke: “Ke i je kpo ngɛ ma a mi nɔuu pɛ ɔ, ma gbɛ ye dɛ mi ngɛ Yehowa hɛ mi. Hiɔwe simi ɔ ma kpa, nɛ gbiɛ ngo ngu ɔ be nɛe hu, konɛ o na kaa Yehowa nɔ́ ji zugba a nɛ. 30 Se o kɛ o sɔmɔli ɔmɛ lɛɛ, i le momo kaa lɔ ɔ se po ɔ, nyɛ be Yehowa Mawu gbeye yee.”

31 Jehanɛ ɔ, flaks* ɔmɛ kɛ barli* ɔmɛ ku kɛ pue si, ejakaa barli ɔmɛ gba, nɛ flaks ɔmɛ hu wo mɔmɔ. 32 Se hwiit ɔmɛ kɛ spɛlt* ɔmɛ lɛɛ a ku we kɛ pue si, ejakaa a kpɛɔ se kɛ duɔ mɛ.* 33 Kɛkɛ nɛ Mose je Farao ngɔ, nɛ e je ma a mi, nɛ e ya gbɛ e dɛ mi ngɛ Yehowa hɛ mi, nɛ hiɔwe simi ɔ kɛ gbiɛ ngo ngu ɔ se po, nɛ hiɔmi ɔ kpa nɛmi ngɛ zugba a nɔ. 34 Benɛ Farao na kaa hiɔmi ɔ, gbiɛ ngo ngu ɔ, kɛ hiɔwe simi ɔ se po ɔ, e pee yayami ekohu nɛ e kɛ e sɔmɔli ɔmɛ a kplii a tsui. 35 Nɛ Farao ya nɔ nɛ e kplii e tsui, nɛ e ha we nɛ Israel bi ɔmɛ nɛ a ho, kaa bɔ nɛ Yehowa de Mose ɔ.

10 Kɛkɛ nɛ Yehowa de Mose ke: “Yaa Farao ngɔ, ejakaa i ngmɛ blɔ nɛ e kɛ e sɔmɔli ɔmɛ kplii a tsui, konɛ ma pee okadi nɛ ɔmɛ nɛ Farao nitsɛ nɛ e na kɛ e hɛngmɛ. 2 Jehanɛ hu, i pee jã bɔ nɛ pee nɛ o jaje bɔ nɛ i hao Egipt wawɛɛ ha, kɛ okadihi nɛ i pee ngɛ a kpɛti ɔ kɛ tsɔɔ o bimɛ kɛ o bibimɛ; nɛ nyɛ ma ná maa le kaa imi ji Yehowa.”

3 Lɔ ɔ he ɔ, Mose kɛ Aaron ya Farao ngɔ nɛ a ya de lɛ ke: “Nɔ́ nɛ Yehowa, Israel bi ɔmɛ a Mawu ɔ de ji nɛ ɔ nɛ, ‘Kɛ yaa si mɛni be nɛ o ma kua kaa o maa ba o he si kɛ ha mi? Wo ye we bi ɔmɛ blɔ kɛ ho konɛ a ya sɔmɔ mi. 4 Ejakaa ke o ya nɔ nɛ o kua kaa o ma ha nɛ ye we bi ɔmɛ nɛ a ho ɔ, lɛɛ hwɔɔ ɔ, ma ngɔ baalɛhi kɛ ba o zugba a nɔ. 5 Nɛ a maa ha zugba a hɛ mi, nɛ nɔ ko be nyɛe maa na zugba lo ɔ. A maa ye níhi nɛ gbiɛ ngo ngu ɔ puɛ we mɛ nɛ a piɛ ha mo ɔ, nɛ a maa ye o tso ɔmɛ tsuo nɛ a ngɛ wae ngɛ nga a nɔ ɔ. 6 O we ɔmɛ a mi, o sɔmɔli ɔmɛ a we ɔmɛ a mi, kɛ Egipt bi ɔmɛ tsuo a we ɔmɛ a mi ma hyi tɔ kɛ baalɛhi. A he maa hiɛ bɔ nɛ o tsɛmɛ ɔmɛ kɛ o nɛmɛ ɔmɛ nɛ́ eko hyɛ kɛ je be nɛ a hi zugba nɛ ɔ nɔ hluu kɛ ba si mwɔnɛ ɔ.’” Kɛkɛ nɛ e plɛ e he nɛ e je Farao ngɔ.

7 Kɛkɛ nɛ Farao sɔmɔli ɔmɛ bi lɛ ke: “Kɛ yaa si mɛni be nɛ nyumu nɛ ɔ maa ya nɔ maa hao wɔ?* Ha nɛ nimli nɛ ɔmɛ nɛ a ho konɛ a ya sɔmɔ Yehowa, a Mawu ɔ. Anɛ loloolo ɔ, o nɛ kaa Egipt hɛ mi kpata lo?” 8 Lɔ ɔ he ɔ, a kpale ya ngɔ Mose kɛ Aaron kɛ ba Farao ngɔ, nɛ e de mɛ ke: “Nyɛɛ ya, nyɛ ya sɔmɔ Yehowa nyɛ Mawu ɔ. Se mɛnɔmɛ ji ni nɛmɛ nɛ a maa ya a?” 9 Kɛkɛ nɛ Mose de ke: “Waa kɛ wa bimɛ tsɔwi ɔmɛ, wa nimowi ɔmɛ kɛ yimowi ɔmɛ, wa binyumu ɔmɛ, wa biyi ɔmɛ, wa jijɔ ɔmɛ, kɛ wa na amɛ tsuo maa ya, ejakaa wa ma ya ye gbijlɔ kɛ ha Yehowa.” 10 E de mɛ ke: “Ke i ha nɛ nyɛɛ kɛ nyɛ bimɛ ɔmɛ nyɛ ho ligbi ko ɔ, lɛɛ Yehowa kɛ nyɛ ngɛ niinɛ! E ngɛ heii kaa nyɛ to kaa nyɛ maa pee nɔ́ yayami ko. 11 Dɛbi! Nyɛ kpɛti nyumu ɔmɛ pɛ nɛ a maa ya nɛ a ma ya sɔmɔ Yehowa, ejakaa lɔ ɔ ji nɔ́ nɛ o bi.” Kɛkɛ nɛ a fiee mɛ kɛ je Farao hɛ mi.

12 Jehanɛ ɔ, Yehowa de Mose ke: “Kpã o nine mi ngɛ Egipt zugba a nɔ konɛ baalɛhi nɛ a ba, nɛ a ba pue Egipt zugba a nɔ nɛ a ye zugba a nɔ huhi tsuo, nɔ́ fɛɛ nɔ́ nɛ gbiɛ ngo ngu ɔ puɛ we ɔ.” 13 Amlɔ nɔuu nɛ Mose wo e tso ɔ nɔ ngɛ Egipt zugba a nɔ, nɛ Yehowa ha nɛ puje he kɔɔhiɔ ko fia ngɛ zugba a nɔ jamɛ a ligbi ɔ tsuo nyɔ kɛ pia. Benɛ je ke e naa a, puje he kɔɔhiɔ ɔ ngɔ baalɛhi kɛ ba. 14 Nɛ baalɛ ɔmɛ ba Egipt zugba a tsuo nɔ, nɛ a ha Egipt zugba a nɔ tsuo. Nɔ́ nɛ ɔ nya wa wawɛɛ nitsɛ; baalɛhi bɛ babauu kaa jã gblee, nɛ jã kɛ̃ nɛ a be bae babauu jã hu. 15 A ha zugba a hɛ mi tsuo, nɛ zugba a nɔ yu tuu kɛ baalɛhi; a ye zugba a nɔ huhi tsuo kɛ tsohi nɛ gbiɛ ngo ngu ɔ puɛ we ɔ a nɔ yiblii ɔmɛ tsuo; a si we ba mumu kake po ngɛ tso ɔmɛ a nɔ aloo ngɛ nga a nɔ hu ɔmɛ a nɔ ngɛ Egipt zugba a nɔ tsuo.

16 Lɔ ɔ he ɔ, Farao tsɛ Mose kɛ Aaron nɔuu nɛ e de mɛ ke: “I pee yayami kɛ si Yehowa nyɛ Mawu ɔ, nɛ nyɛ hu i pee nyɛ yayami. 17 Amlɔ nɛ ɔ, i kpa nyɛ pɛɛ, nyɛɛ ngɔ ye yayami ɔ kɛ ke mi si kake nɛ ɔ pɛ. Nyɛ kpa Yehowa nyɛ Mawu ɔ pɛɛ nɛ́ e je haomi nɛ e puɛɔ ní nɛ ɔ kɛ je ye nɔ.” 18 Lɔ ɔ he ɔ, e* je Farao ngɔ kɛ ho, nɛ e ya kpa Yehowa pɛɛ. 19 Kɛkɛ nɛ Yehowa ha nɛ kɔɔhiɔ ɔ plɛ e yi, nɛ e tsake kɛ pee pusinɔ he kɔɔhiɔ nɛ nya wa nitsɛ, nɛ e muɔɔ baalɛ ɔmɛ kɛ ya wo Wo Tsu ɔ mi. Baalɛ kake ngmelu po piɛ́ ngɛ Egipt zugba a tsuo nɔ. 20 Se Yehowa ngmɛ blɔ nɛ Farao kplii e tsui, nɛ e ha we nɛ Israel bi ɔmɛ nɛ a ho.

21 Kɛkɛ nɛ Yehowa de Mose ke: “Wo o nine nɔ kɛ tsɔɔ hiɔwe konɛ diblii nɛ wo ngɛ Egipt zugba a nɔ, diblii kpii nitsɛ.” 22 Amlɔ nɔuu nɛ Mose wo e nine nɔ kɛ tsɔɔ hiɔwe, nɛ diblii kpii wo ngɛ Egipt zugba a tsuo nɔ ligbi etɛ. 23 A nɛ a sibi, nɛ a ti nɔ ko nɔ ko ti si kɛ ji he nɛ e ngɛ ɔ ligbi etɛ, se la ngɛ Israel bi ɔmɛ tsuo a hi he ɔmɛ. 24 Kɛkɛ nɛ Farao tsɛ Mose nɛ e de lɛ ke: “Nyɛɛ ho nɛ nyɛ ya sɔmɔ Yehowa. Se nyɛ jijɔ ɔmɛ kɛ nyɛ na amɛ pɛ nɛ nyɛ ko ngɔ kɛ ho. Nyɛ bimɛ ɔmɛ po ma nyɛ maa piɛɛ nyɛ he kɛ ho.” 25 Se Mose de lɛ ke: “Mo nitsɛ hu o ma ha wɔ* lohwehi nɛ wa ma ya gbe kɛ sã afɔlehi kɛ ha Yehowa wa Mawu ɔ. 26 Waa kɛ wa lohwe ɔmɛ hu maa ho. Wa be lohwe* kake po he jee, ejakaa wa maa ngɔ ekomɛ kɛ ya ja Yehowa wa Mawu ɔ, nɛ wa li a kpɛti nɔ́ nɛ waa kɛ ma ya sã afɔle kɛ ha Yehowa lolo, ja wa ya su lejɛ ɔ.” 27 Lɔ ɔ he ɔ, Yehowa ngmɛ blɔ nɛ Farao kplii e tsui, nɛ e kua kaa e ma ha nɛ a ho. 28 Farao de Mose ke: “Jee ye hɛ mi kɛ ho! Hyɛ nɛ e hi nɛ o ko ka kaa o ma ba na ye hɛ mi ekohu, ejakaa ligbi nɛ o maa na ye hɛ mi ɔ, o ma gbo.” 29 Kɛkɛ nɛ Mose de lɛ ke: “Yoo i nu, kaa bɔ nɛ o de ɔ, i be o hɛ mi bae hu.”

11 Kɛkɛ nɛ Yehowa de Mose ke: “E piɛ haomi kake nɛ ma ngɔ kɛ ba Farao kɛ Egipt nɔ. Lɔ ɔ se ɔ, e maa wo nyɛ blɔ kɛ je hiɛmɛ nɛ ɔ kɛ ho. Ke e maa wo nyɛ blɔ kɛ ho ɔ, pe e maa fiee nyɛ kɛ je hiɛmɛ nɛ ɔ kɛ ho. 2 Jehanɛ ɔ, de Israel bi ɔmɛ ke, nyumu ɔmɛ kɛ yi ɔmɛ tsuo nɛ a bi a kpɔ mi bi ɔmɛ sika hiɔ níhi kɛ sika tsu níhi.” 3 Nɛ Yehowa ha nɛ Israel bi ɔmɛ a hɛ mi ba nyami ngɛ Egipt bi ɔmɛ a hɛ mi. Jehanɛ se hu ɔ, Mose ba pee nɔ ko nɛ a buɔ lɛ saminya ngɛ Egipt zugba a nɔ ngɛ Farao sɔmɔli ɔmɛ kɛ ma a mi bi ɔmɛ a kpɛti.

4 Kɛkɛ nɛ Mose de ke: “Nɔ́ nɛ Yehowa de ji nɛ ɔ nɛ, ‘Maa pee nyɔ mi kpɛti ɔ, ma je kpo kɛ sɛ Egipt ma a mi, 5 nɛ Egipt zugba a nɔ bitɛte fɛɛ bitɛte ma gbo, kɛ je Farao nɛ e hii si ngɛ e matsɛ sɛ ɔ nɔ ɔ bitɛte nɔ kɛ ya si mawayo nɛ e ngɛ wɛ tɛ he ɔ bitɛte, kɛ lohwe fɛɛ lohwe kekleekle bi nɔ. 6 Ya fomi boboobo nɛ a nui eko hyɛ, nɛ́ a be eko kaa jã nue hu gblee maa pɛ ngɛ Egipt zugba a nɔ tsuo. 7 Se gbe kake po be huãe* kɛ wo Israel bi ɔmɛ, kɛ je nimli a nɔ kɛ ya si lohwehi a nɔ, konɛ nyɛɛ na kaa Yehowa ma nyɛ ma ha nɛ a na slɔɔto nɛ ngɛ Egipt bi ɔmɛ kɛ Israel bi ɔmɛ a kpɛti.’ 8 Nɛ o sɔmɔli ɔmɛ tsuo ma kple kɛ ba ye ngɔ kokooko nɛ a ma ba kplã si nɛ a kɛ a hɛ mi ma bu si ha mi, nɛ a ma de ke, ‘Ho, o kɛ nihi nɛ a nyɛɛ o se ɔ tsuo.’ Nɛ lɔ ɔ se ɔ, ma je.” Kɛkɛ nɛ e kɛ abofu nɛ e nya wa je Farao ngɔ.

9 Lɔ ɔ se ɔ, Yehowa de Mose ke: “Farao be mo tue bue, bɔ nɛ pee nɛ ye nyakpɛ ní ɔmɛ nɛ a hiɛ ngɛ Egipt zugba a nɔ.” 10 Mose kɛ Aaron pee nyakpɛ ní nɛ ɔmɛ tsuo ngɛ Farao hɛ mi, se Yehowa ngmɛ blɔ nɛ Farao kplii e tsui, nɛ e ha we nɛ Israel bi ɔmɛ nɛ a je e zugba a nɔ kɛ ho.

12 Jehanɛ ɔ, Yehowa de Mose kɛ Aaron ngɛ Egipt zugba a nɔ ke: 2 “Nyɔhiɔ nɛ ɔ maa pee nyɔhiɔ ɔmɛ a sisije kɛ ha nyɛ. E maa pee kekleekle nyɔhiɔ ngɛ jeha a mi kɛ ha nyɛ. 3 Nyɛɛ tu munyu kɛ tsɔɔ Israel ma a tsuo, nɛ nyɛ de mɛ ke, ‘Ngɛ nyɔhiɔ nɛ ɔ we ligbi nyɔngmane ɔ nɔ ɔ, a ti nɔ fɛɛ nɔ nɛ e ngɔ jijɔ kake kɛ ha e tsɛ we ɔ, we fɛɛ we nɛ e ná jijɔ kake. 4 Se ke we ɔ mi bimɛ ɔmɛ a he pi nɛ a ma nyɛ maa ye jijɔ mluku ɔ, lɛɛ a kɛ wetsɛ nɛ e we ɔ tsa a nɔ́ ɔ nɔ ɔ* nɛ gba jijɔ ɔ ngɛ a we ɔ mi ngɛ ni ɔmɛ* a hiɛmi nya. Á hyɛ a yibɔ, nɛ á hyɛ lo abɔ nɛ a ti nɔ fɛɛ nɔ ma nyɛ maa ye. 5 Nyɛɛ ngɔ jijɔ ku nɛ kpa ko be e he, nɛ e ye jeha kake. Nyɛ ma nyɛ maa ngɔ agbosu wawi ɔmɛ aloo apletsi ɔmɛ eko. 6 Nyɛɛ hyɛ e nɔ kɛ ya si nyɔhiɔ nɛ ɔ we ligbi 14 ɔ nɔ, nɛ weku fɛɛ weku ngɛ Israel ɔ nɛ́ a gbe jijɔ ɔ ke du ngɛ bue.* 7 Á ngɔ muɔ ɔ eko kɛ kpa wehi nɛ a maa ye lo ɔ ngɛ a mi ɔ a sinya tso enyɔ ɔmɛ kɛ a yiti tso ɔmɛ a he.

8 “‘Á ye lo ɔ ngɛ jamɛ a nyɔ ɔ mi. E sa nɛ a sã ngɛ la nɔ, nɛ a ngɔ abolo nɛ masa be mi, kɛ ba nɛ dooɔ kɛ ye. 9 Nyɛ ko ye lo ɔ eko mumu aloo nɔ́ nɛ a kɛ nyu hoo, se nyɛɛ sã lo ɔ ngɛ la nɔ. Nyɛɛ sã e yi ɔ, kɛ e nane ɔmɛ, kɛ e mi ní ɔmɛ tsuo. 10 Nyɛ ko si eko nɛ je nɛ na yi, se ke je na eko yi ɔ, nyɛɛ ngɔ la kɛ sã. 11 Nɛ bɔ nɛ e sa nɛ nyɛɛ ye lo ɔ ha ji nɛ ɔ nɛ, nyɛɛ ye be mi nɛ nyɛ fĩ nyɛ mlɛ mi,* nɛ́ tokota ngɛ nyɛ nane, nɛ́ dɛma tso ngɛ nyɛ dɛ mi; nyɛɛ ye lo ɔ mlamlaamla. E ji Hetsɔmi nɛ a maa ye ha Yehowa. 12 Ejakaa ma be ngɛ Egipt zugba a nɔ jamɛ a nyɔ ɔ mi, nɛ ma fia kekleekle bi fɛɛ kekleekle bi nɛ e ngɛ Egipt zugba a nɔ ɔ nɔ́, kɛ je nɔmlɔ nɔ kɛ ya si lohwe nɔ; nɛ ma kojo Egipt mawu ɔmɛ tsuo. Imi ji Yehowa. 13 Muɔ ɔ maa pee nyɛ we okadi ngɛ wehi nɛ nyɛ ngɛ a mi ɔ a he; nɛ ma na muɔ ɔ, nɛ ma tsɔ nyɛ he kɛ be, nɛ haomi ɔ be nyɛ nɔ bae nɛ e ba kpata nyɛ hɛ mi benɛ ma fia Egipt zugba a nɔ ɔ.

14 “‘Ligbi nɛ ɔ maa pee kaimi ligbi kɛ ha nyɛ. Nyɛɛ ye lɛ kaa gbijlɔ kɛ ha Yehowa ngɛ nyɛ yi nɔhi tsuo. Nyɛɛ ye gbijlɔ nɛ ɔ, nɛ e maa pee mlaa kɛ ya neneene. 15 Nyɛɛ ye abolo nɛ masa be mi ligbi kpaago. Ngɛ kekleekle ligbi ɔ nɔ ɔ, nyɛ je masa a kɛ je nyɛ we ɔmɛ a mi, ejakaa kɛ je kekleekle ligbi ɔ nɔ kɛ ya si ligbi kpaagone ɔ nɔ ɔ, nɔ fɛɛ nɔ nɛ e maa ye nɔ́ ko nɛ masa ngɛ mi ɔ, á gbe* jamɛ a nɔ ɔ.* 16 Ngɛ kekleekle ligbi ɔ nɔ ɔ, nyɛ maa pee kpe klɔuklɔu, nɛ ngɛ ligbi kpaagone ɔ nɔ ɔ, nyɛɛ pee kpe klɔuklɔu ekohu. Nyɛ ko tsu ní tsumi ko ngɛ ligbi nɛ ɔmɛ a nɔ. Nɔ́ nɛ nɔ fɛɛ nɔ* maa ye pɛ nɛ nyɛ ma nyɛ maa hoo.

17 “‘E sa nɛ nyɛɛ ye Abolo Nɛ Masa Be Mi Gbijlɔ ɔ, ejakaa ligbi nɛ ɔ nɔ tutuutu nɛ ma je nyɛ ma kpekpemi ɔ* kɛ je Egipt zugba a nɔ ɔ nɛ. Nyɛɛ ye ligbi nɛ ɔ kaa gbijlɔ ngɛ nyɛ yi nɔhi tsuo, nɛ e maa pee mlaa nɛ ngɛ kɛ yaa neneene. 18 Ngɛ kekleekle nyɔhiɔ ɔ mi ɔ, ngɛ nyɔhiɔ ɔ we ligbi 14 ɔ we gbɔkuɛ ɔ, nyɛɛ ye abolo nɛ masa be mi kɛ ya si nyɔhiɔ ɔ we ligbi 21 ɔ we gbɔkuɛ. 19 Á ko na masa ngɛ nyɛ we ɔmɛ a mi ligbi kpaago, ejakaa ke nɔ ko ye nɔ́ ko nɛ masa ngɛ mi ɔ, nubwɔ ji lɛ jio, Israel no ji lɛ jio, á gbe* jamɛ a nɔ ɔ.* 20 Nyɛ ko ye nɔ́ ko nɛ masa ngɛ mi. Nyɛɛ ye abolo nɛ masa be mi ngɛ nyɛ we ɔmɛ tsuo a mi.’”

21 Amlɔ nɔuu nɛ Mose tsɛ Israel nikɔtɔma amɛ nɛ e de mɛ ke: “Nyɛɛ ya nɛ nyɛ ya hla lohwehi* kɛ ha nyɛ weku ɔmɛ, nɛ nyɛɛ gbe mɛ kɛ ha Hetsɔmi ɔ. 22 Lɔ ɔ se ɔ, nyɛɛ ngɔ hisopo* tsohi nɛ a fĩ kɛ bla kɛ sɔ muɔ nɛ ngɛ tsesi mi ɔ mi, nɛ nyɛɛ ngɔ muɔ ɔ kɛ kpa sinya a yiti tso ɔ kɛ sinya tso enyɔ ɔmɛ a he; nyɛ ti nɔ ko nɛ e kó je kpo kɛ je e we ɔ mi kɛ ya si mɔtu. 23 Kɛkɛ ɔ, ke Yehowa be ngɛ Egipt bi ɔmɛ a kpɛti konɛ e hao mɛ, nɛ e na muɔ ɔ ngɛ sinya a yiti tso ɔ kɛ sinya tso enyɔ ɔmɛ a he ɔ, bɔ fɛɛ bɔ nɛ ji ɔ, Yehowa maa tsɔ sinya a he kɛ be, nɛ e be blɔ ngmɛe nɛ haomi nɛ kɛ gbenɔ baa a* nɛ sɛ nyɛ we ɔmɛ a mi.

24 “Nyɛɛ ye gbijlɔ nɛ ɔ, ejakaa e ji blɔ tsɔɔmi nɛ maa hi si kɛ ha nyɛɛ kɛ nyɛ bimɛ kɛ ya neneene. 25 Ke nyɛ ya su zugba a nɛ Yehowa maa ngɔ kɛ ha nyɛ kaa bɔ nɛ e de nyɛ ɔ nɔ ɔ, nyɛɛ ye gbijlɔ nɛ ɔ. 26 Nɛ ke nyɛ bimɛ ɔmɛ bi nyɛ ke, ‘Mɛni he je nɛ nyɛ yeɔ gbijlɔ nɛ ɔ?’ 27 nyɛ de mɛ ke, ‘E ji Hetsɔmi ɔ he afɔle nɛ a sãã ha Yehowa, nɔ nɛ e tsɔ Israel bi ɔmɛ a we ɔmɛ a he kɛ be ngɛ Egipt benɛ e hao Egipt bi ɔmɛ, nɛ́ e si wa we ɔmɛ ɔ.’”

Kɛkɛ nɛ ni ɔmɛ kplã si nɛ a ngɔ a hɛ mi kɛ bu si. 28 Lɔ ɔ he ɔ, Israel bi ɔmɛ ya nɛ a ya pee kaa bɔ nɛ Yehowa fã Mose kɛ Aaron ɔ pɛpɛɛpɛ. A pee jã a pɛ.

29 Kɛkɛ nɛ nyɔ mi kpɛti ɔ, Yehowa gbe kekleekle bimɛ tsuo nɛ a ngɛ Egipt zugba a nɔ ɔ, kɛ je Farao nɛ e hii si ngɛ e matsɛ sɛ ɔ nɔ ɔ kekleekle bi nɔ kɛ ya si nyɔguɛ nɛ a wo lɛ tsu* ɔ kekleekle bi nɔ, kɛ lohwehi a kekleekle bimɛ tsuo a nɔ. 30 Farao kɛ e sɔmɔli ɔmɛ tsuo kɛ Egipt bi kpa amɛ tsuo te si jamɛ a nyɔ ɔ mi, nɛ Egipt bi ɔmɛ fo ya boboobo, ejakaa we ko be nɛ nɔ ko gbo we ngɛ mi. 31 Nɛ nyɔ ɔ mi nɔuu ɔ, e tsɛ Mose kɛ Aaron nɛ e de mɛ ke: “Nyɛɛ te si nɛ nyɛɛ je ye we bi ɔmɛ a kpɛti, nyɛɛ kɛ Israel bi kpa amɛ tsuo. Nyɛɛ ho nɛ nyɛ ya sɔmɔ Yehowa kaa bɔ nɛ nyɛ de ɔ. 32 Nyɛɛ ngɔ nyɛ to ɔmɛ kɛ nyɛ na amɛ hu kɛ ho kaa bɔ nɛ nyɛ de ɔ. Se nyɛɛ sɔle nɛ imi hu Mawu nɛ jɔɔ mi.”

33 Kɛkɛ nɛ Egipt bi ɔmɛ bɔni Israel bi ɔmɛ pɛɛ kpami kaa a je a zugba a nɔ esɔesɔ, nɛ a de ke, “ke pi jã a, lɛɛ wɔ tsuo wa ma gbo!” 34 Lɔ ɔ he ɔ, Israel bi ɔmɛ ngɔ a mamu nɛ́ a pɔtɔ nɛ́ e gbo we lolo ɔ, kɛ tsesihi nɛ́ a pɔtɔɔ mamu ngɛ a mi ɔ, nɛ a fĩ kɛ wo a bohi a mi, nɛ a kɛ fɔ a konɔ. 35 Israel bi ɔmɛ pee nɔ́ nɛ Mose de mɛ ɔ, nɛ a bi Egipt bi ɔmɛ sika hiɔ kɛ sika tsu níhi kɛ bohi* hulɔ. 36 Yehowa ha nɛ ni ɔmɛ a hɛ mi ba nyami ngɛ Egipt bi ɔmɛ a hɛ mi, lɔ ɔ he ɔ, a ha mɛ níhi nɛ a bi ɔ, nɛ a kpakpaa Egipt bi ɔmɛ a he níhi.

37 Kɛkɛ nɛ Israel bi ɔmɛ hia kɛ je Rameses kɛ yaa Sukot, nyumuhi maa pee 600,000 nɛ a ngɛ nyɛɛe, a kane we jokuɛwi kɛ piɛɛ he. 38 Nɛ futufututsɛmɛ babauu* hu piɛɛ a he kɛ ho. A kɛ a tohi kɛ a nahi hu ho; a kɛ lohwehi babauu nitsɛ ho. 39 A ngɔ ma a nɛ a kɛ je Egipt kɛ ba a kɛ sã abolo lokotolokoto nɛ masa be mi. Ma a gbo we, ejakaa a fiee mɛ kpatakpata kɛ je Egipt, nɛ lɔ ɔ he ɔ, a to we niye ní ko kulaa he blɔ nya nɛ a maa ye.

40 Be abɔ nɛ Israel bi ɔmɛ, nihi nɛ a ya hi Egipt ɔ kɛ hi si kaa nibwɔhi ɔ peeɔ jeha 430. 41 Ngɛ jeha 430 ɔ nyagbe, ngɛ jamɛ a ligbi ɔ nɔ tutuutu ɔ, Yehowa ma kpekpemi ɔ* tsuo je Egipt zugba a nɔ. 42 Jamɛ a nyɔ ɔ ji nyɔ nɛ a maa ye kaa gbijlɔ kɛ kai jemi nɛ Yehowa je mɛ kɛ je Egipt zugba a nɔ ɔ. E sa nɛ Israel bi ɔmɛ tsuo nɛ a kai jamɛ a nyɔ ɔ kaa gbijlɔ kɛ ha Yehowa, a yi nɔhi tsuo.

43 Kɛkɛ nɛ Yehowa de Mose kɛ Aaron ke, “Hetsɔmi ɔ he mlaa ji nɛ ɔ nɛ: Nubwɔ ko kó ye Hetsɔmi niye ní ɔ eko. 44 Se ke nɔ ko ngɛ nyɔguɛ nɛ e ngɔ sika kɛ he lɛ ɔ, e sa nɛ e po lɛ. Lɔ ɔ se loko e ma nyɛ maa ye eko. 45 Nɔ ko nɛ e ba to nyɛ, kɛ nɔ ko nɛ nyɛ bɔ lɛ apaa ko ye niye ní ɔ eko. 46 Nihi tsuo nɛ a maa ye jijɔ bi ɔ nɛ́ a bla kɛ ye ngɛ we kake mi. Nyɛ ko ngɔ lo ɔ eko kɛ je kpo kɛ ya we ɔ se, nɛ nyɛ ko ku e wu ɔmɛ eko mi. 47 Israel ma a tsuo nɛ a ye Hetsɔmi ɔ. 48 Ke nubwɔ ko kɛ nyɛ ngɛ nɛ e suɔ kaa e maa ye Hetsɔmi ɔ kɛ ha Yehowa a, e sa nɛ e po nyumu fɛɛ nyumu nɛ e ngɛ e we ɔ mi ɔ. Kɛkɛ ɔ, e ma nyɛ maa ye Hetsɔmi ɔ, nɛ e ma ba pee kaa Israel no. Se nyumu nɛ a pui lɛ ko ye niye ní ɔ eko. 49 Israel no, kɛ nubwɔ nɛ e ngɛ nyɛ kpɛti ɔ tsuo ɔ, mlaa kake lɛ maa fɔ si ha mɛ.”

50 Lɔ ɔ he ɔ, Israel bi ɔmɛ tsuo pee kaa bɔ nɛ Yehowa fã Mose kɛ Aaron ɔ pɛpɛɛpɛ. A pee jã a pɛ. 51 Jamɛ a ligbi ɔ nɔ tutuutu nɛ Yehowa ngɔ Israel ma kpekpemi ɔ* tsuo kɛ je Egipt zugba a nɔ ɔ nɛ.

13 Jehanɛ hu ɔ, Yehowa kɛ Mose tu munyu nɛ e de lɛ ke: 2 “Kekleekle binyumu fɛɛ kekleekle binyumu* ngɛ Israel bi ɔmɛ a kpɛti ɔ, pee lɛ klɔuklɔu* kɛ ha mi. Kekleekle binyumu nɛ a ma fɔ ɔ, adesa bi jio, lohwe bi jio, ye nɔ́ ji lɛ.”

3 Kɛkɛ nɛ Mose de ni ɔmɛ ke: “Nyɛ kai kikɛmɛ a ligbi nɛ ɔ nɛ nyɛ je Egipt nyɔguɛ yemi sisi* ɔ, ejakaa Yehowa kɛ kɔni si wami lɛ je nyɛ kɛ je hiɛmɛ nɛ ɔ nɛ. Lɔ ɔ he ɔ, nyɛ ko ye nɔ́ ko nɛ masa ngɛ mi. 4 Nyɛ ngɛ hiɛmɛ nɛ ɔ jee mwɔnɛ ɔ ligbi nɛ ɔ, ngɛ Abib* nyɔhiɔ ɔ mi. 5 Ke Yehowa ngɔ nyɛ kɛ ya su Kanaan bi, Hit bi, Amor bi, Hiv bi, kɛ Yebus bi ɔmɛ a zugba nɛ nyɔ nyu kɛ hwo ngɛ bee ngɛ nɔ, nɛ́ e kã nyɛ nɛmɛ ɔmɛ kita kaa e kɛ ma ha nyɛ ɔ nɔ ɔ, nyɛɛ ye gbijlɔ nɛ ɔ ngɛ nyɔhiɔ nɛ ɔ mi. 6 Nyɛɛ ye abolo nɛ masa be mi ligbi kpaago, nɛ ngɛ ligbi kpaagone ɔ nɔ ɔ, nyɛɛ ye gbijlɔ kɛ ha Yehowa. 7 Nyɛɛ ye abolo nɛ masa be mi ligbi kpaago ɔ tsuo; nɛ a kó na nɔ́ ko nɛ masa ngɛ mi ngɛ nyɛ dɛ, nɛ a kó na masa ngɛ nyɛ huza amɛ* tsuo hu a nɔ. 8 Mo de o bimɛ ngɛ jamɛ a ligbi ɔ nɔ ke, ‘I ngɛ nɔ́ nɛ ɔ pee ngɛ nɔ́ nɛ Yehowa pee ha mi benɛ i je Egipt ɔ he je.’ 9 Nɛ nɔ́ nɛ ɔ nɛ pee okadi kɛ ha mo ngɛ o nine he, nɛ e pee kaimi nɔ́ ngɛ o hɛ nya,* konɛ Yehowa mlaa a nɛ e hi o nya daa, ejakaa Yehowa kɛ kɔni si wami lɛ je mo kɛ je Egipt. 10 Moo ye mlaa nɛ ɔ nɔ daa jeha ngɛ be nɛ a to ɔ mi.

11 “Ke Yehowa ngɔ mo kɛ ba Kanaan bi ɔmɛ a zugba a nɛ e kã kita kaa e kɛ ma ha o kɛ o nɛmɛ ɔmɛ nɔ ɔ, 12 moo ngɔ bitɛte fɛɛ bitɛte,* kɛ lohwehi nɛ o ná a hu a kekleekle bi fɛɛ kekleekle bi nɛ e ji eku kɛ ha Yehowa. Yehowa níhi ji nyumu ɔmɛ. 13 Ngɔɔ jijɔ kɛ kpɔ̃ teji kekleekle bi fɛɛ teji kekleekle bi, se ke o kpɔ̃ we lɛ ɔ, lɛɛ moo ku e kuɛ. Mo kpɔ̃ bitɛte fɛɛ bitɛte nɛ e ngɛ o binyumu ɔmɛ a kpɛti ɔ.

14 “Ke hwɔɔ se o bimɛ ɔmɛ bi mo ke, ‘Nɔ́ nɛ ɔ sisi ji mɛni?’ ɔ, mo de mɛ ke, ‘Yehowa kɛ kɔni si wami je wɔ kɛ je Egipt ngɛ nyɔguɛ yemi mi.* 15 Benɛ Farao kplii e tsui nɛ e kplɛɛ we kaa e ma ha nɛ waa ho ɔ, Yehowa gbe kekleekle bi fɛɛ kekleekle bi ngɛ Egipt zugba a nɔ, kɛ je adesa kekleekle bi nɔ kɛ ya si lohwe kekleekle bi nɔ. Lɔ ɔ he je nɛ i ngɔ kekleekle binyumuhi* tsuo kɛ ngɛ afɔle sãe kɛ ngɛ Yehowa hae, nɛ i kpɔ̃ ye bimɛ ɔmɛ a kpɛti kekleekle binyumu fɛɛ kekleekle binyumu ɔ nɛ.’ 16 E sa nɛ enɛ ɔ nɛ e pee okadi ngɛ o nine he nɛ e pee yi fimi nɔ́ ngɛ o hɛ nya,* ejakaa Yehowa kɛ kɔni si wami lɛ je wɔ kɛ je Egipt.”

17 Jehanɛ ɔ, benɛ Farao ha nɛ ni ɔmɛ ho ɔ, e ngɛ mi kaa Filisti bi ɔmɛ a zugba a nɔ blɔ ɔ kɛ we mohu lɛɛ, se Mawu kɛ mɛ ya gui lejɛ ɔ. Ejakaa Mawu de ke: “Ke ni ɔmɛ kɛ ta ya kpe ɔ, eko ɔ, a ma tsake a juɛmi nɛ a maa kpale a se kɛ ho Egipt ya.” 18 Lɔ ɔ he ɔ, Mawu ha nɛ ni ɔmɛ ya lɔgɔ si kɛ gu nga nɔ blɔ nɛ́ e ngɛ Wo Tsu ɔ he ɔ. Se benɛ Israel bi ɔmɛ maa je ɔ, a to a he blɔ nya kaa ta buli kɛ je* Egipt zugba a nɔ kɛ ho. 19 Mose ngɔ Yosef wu ɔmɛ hu kɛ je, ejakaa Yosef ha nɛ Israel bi ɔmɛ kã lɛ kita veveeve, nɛ e de mɛ ke: “Mawu ma kai nyɛ kokooko, lɔ ɔ he ɔ, ke nyɛ yaa a, nyɛɛ ngɔ ye wu ɔmɛ kɛ je hiɛmɛ nɛ ɔ kɛ ho.” 20 A hia kɛ je Sukot, nɛ a ya to si ngɛ Etam, ngɛ nga a nya.

21 Piani ɔ, Yehowa nyɛɛɔ a hɛ mi ngɛ bɔku titima ko mi nɛ e kɛ tsɔɔ mɛ blɔ, nɛ ke je jɔ ɔ, e nyɛɛɔ a hɛ mi ngɛ la titima ko mi konɛ e ha mɛ la, bɔ nɛ pee nɛ a nyɛ nɛ a hia blɔ piani kɛ nyɔ mi. 22 Bɔku titima a ji ni ɔmɛ a hɛ mi piani, nɛ jã kɛ̃ nɛ la titima a hu ji a hɛ mi nyɔ mi.

14 Jehanɛ ɔ, Yehowa de Mose ke: 2 “De Israel bi ɔmɛ ke a kpale a se nɛ a ya to si ngɛ Pihahirot hɛ mi, ngɛ Migdol kɛ wo ɔ a kpɛti, ngɛ he nɛ a ma nyɛ maa na Baal Zefon. Nyɛɛ to si nɛ nyɛɛ ngɔ nyɛ hɛ mi kɛ tsɔɔ Baal Zefon ngɛ wo ɔ nya. 3 Kɛkɛ ɔ, Farao ma de ngɛ Israel bi ɔmɛ a he ke, ‘A juɛmi gbɛ nɛ a ngɛ lalaalo woe ngɛ zugba a nɔ. A li he nɛ a maa gu ngɛ nga a nɔ.’ 4 Ma ngmɛ blɔ nɛ Farao maa kplii e tsui, nɛ e maa fiee a se, nɛ ma ye Farao kɛ e tabo ɔ tsuo nɔ kunimi kɛ wo ye hɛ mi nyami; nɛ Egipt bi ɔmɛ maa na kaa imi ji Yehowa niinɛ.” Lɔ ɔ he ɔ, a pee jã.

5 Pee se ɔ, a ya bɔ Egipt matsɛ ɔ amaniɛ kaa ni ɔmɛ tu fo kɛ je. Amlɔ nɔuu nɛ Farao kɛ e sɔmɔli ɔmɛ a juɛmi tsake ngɛ ni ɔmɛ a he, nɛ a de ke: “Mɛni wa pee nɛ ɔ? Mɛni he je nɛ wa ngmɛɛ Israel bi ɔmɛ nɛ a ngɛ wɔ sɔmɔe kaa nyɔguɛhi ɔ a he ɔ?” 6 Lɔ ɔ he ɔ, Farao pee e ta zugba lɛ ɔmɛ klaalo, nɛ e ngɔ e we bi ɔmɛ kɛ piɛɛ e he. 7 E ngɔ ta zugba lɛhi nɛ a hi saminya 600 kɛ Egipt ta zugba lɛ kpa amɛ tsuo, nɛ tatsɛmɛ ngɛ eko fɛɛ eko mi. 8 Lɔ ɔ he ɔ, Yehowa ngmɛ blɔ nɛ Farao, Egipt matsɛ ɔ kplii e tsui, nɛ e fiee Israel bi ɔmɛ a se benɛ Israel bi ɔmɛ yaa kɛ kã a.* 9 Egipt bi ɔmɛ fiee a se, nɛ benɛ a to si ngɛ wo ɔ he ngɛ Pihahirot kasa nya, nɛ a hɛ mi tsɔɔ Baal Zefon ɔ, Farao we okpɔngɔ ta zugba lɛ ɔmɛ tsuo kɛ e we okpɔngɔ nɔ hili ɔmɛ kɛ e tabo ɔ miɔ nɛ a maa su a he.

10 Benɛ Farao ná Israel bi ɔmɛ ta a, a wo a hɛ nɔ nɛ a na Egipt bi ɔmɛ nɛ a ngɛ a se fiee. Israel bi ɔmɛ ye gbeye nɛ a fo ya boboobo kɛ tsɛ Yehowa. 11 A bi Mose ke: “Anɛ yɔkɔhi nɛ a be Egipt ɔ he je nɛ o ngɔ wɔ kɛ ba nga nɛ ɔ nɔ nɛ wa ba gbo ngɛ hiɛmɛ nɛ ɔ lo? Mɛni o pee wɔ nɛ ɔ? Mɛni he je nɛ o ngɔ wɔ kɛ je Egipt ɔ? 12 Anɛ pi nɔ́ nɛ ɔ tutuutu nɛ wa de mo ngɛ Egipt kaa, ‘Ngmɛɛ wa he nɛ wa sɔmɔ Egipt bi ɔmɛ’ ɔ lo? Ejakaa afani nɛ wa ma sɔmɔ Egipt bi ɔmɛ mohu pe nɛ wa ma gbo ngɛ nga nɛ ɔ nɔ.” 13 Kɛkɛ nɛ Mose de ni ɔmɛ ke: “Nyɛ ko ye gbeye. Nyɛɛ da si kpɛii nɛ nyɛɛ hyɛ bɔ nɛ Yehowa ma plɛ kɛ he nyɛ yi wami ha mwɔnɛ ɔ. Ejakaa Egipt bi ɔmɛ nɛ nyɛ ngɛ mɛ hyɛe mwɔnɛ ɔ, nyɛ be mɛ nae hu gblegbleegble. 14 Yehowa nitsɛ maa hwu ha nyɛ, nyɛɛ lɛɛ nyɛɛ pee dii.”

15 Jehanɛ ɔ, Yehowa de Mose ke: “Mɛni he je nɛ o ngɛ mi tsɛe kpamisaa a? De Israel bi ɔmɛ ke a te si nɛ a ma blɔ nɔ. 16 Moo lɛɛ mo wo o tso ɔ nɔ, nɛ o kpã o nine mi ngɛ wo ɔ nɔ nɛ e mi nɛ gba, konɛ Israel bi ɔmɛ nɛ a gu wo ɔ kpɛti kɛ ho ngɛ zugba gbigbli nɔ. 17 Imi lɛɛ ma ngmɛ Egipt bi ɔmɛ blɔ nɛ a kplii a tsui, bɔ nɛ pee nɛ a nyɛɛ Israel bi ɔmɛ a se; kɛkɛ ɔ, ma ye Farao tabo ɔ, kɛ e ta zugba lɛ ɔmɛ, kɛ e we okpɔngɔ nɔ hili ɔmɛ tsuo a nɔ kunimi kɛ wo imi nitsɛ ye hɛ mi nyami. 18 Nɛ ke i ye Farao, kɛ e ta zugba lɛ ɔmɛ, kɛ e we okpɔngɔ nɔ hili ɔmɛ a nɔ kunimi kɛ wo ye hɛ mi nyami ɔ, Egipt bi ɔmɛ ma ná maa le kaa imi ji Yehowa.”

19 Kɛkɛ nɛ anɔkuale Mawu ɔ bɔfo ɔ nɛ e ngɛ Israel ma kpekpemi ɔ hɛ mi nyɛɛe ɔ je kɛ ho a se ya, nɛ bɔku titima nɛ e ngɛ a hɛ mi ɔ je kɛ ho a se ya nɛ e ya da a se. 20 Lɔ ɔ he ɔ, e ba je Egipt bi ɔmɛ a tabo ɔ kɛ Israel bi ɔmɛ a kpɛti. Bɔku titima a he fã wo diblii, nɛ e he fã ngɛ kpɛe kaa la nyɔ ɔ mi. Lɔ ɔ he ɔ, Egipt bi ɔmɛ sui Israel bi ɔmɛ a he nyɔ ɔ mi tsuo.

21 Jehanɛ ɔ, Mose kpã e nine mi ngɛ wo ɔ nɔ; nɛ Yehowa ha nɛ puje he kɔɔhiɔ ko nɛ e nya wa fia nyɔ ɔ mi tsuo nɛ e tsɛ̃ wo ɔ kɛ ya se, nɛ nyu ɔ mi gba, nɛ wo ɔ sisi pee zugba gbigbli. 22 Lɔ ɔ he ɔ, nyu ɔ pee kaa gbogbo ngɛ Israel bi ɔmɛ a hiɔ nɔ kɛ a muɔ nɔ, nɛ a nyɛɛ zugba gbigbli nɔ kɛ gu wo ɔ kpɛti. 23 Egipt bi ɔmɛ fiee a se, nɛ Farao we okpɔngɔ ɔmɛ tsuo, e ta zugba lɛ ɔmɛ, kɛ e we okpɔngɔ nɔ hili ɔmɛ nyɛɛ a se kɛ ya sɛ wo ɔ mi. 24 Mɔtu hwɔɔmi be ɔ,* Yehowa hyɛ Egipt bi ɔmɛ a tabo ɔ kɛ gu la kɛ bɔku titima a mi, nɛ e ha nɛ Egipt bi ɔmɛ a tabo ɔ juɛmi gbɛ. 25 E ya nɔ nɛ e hiaa Egipt bi ɔmɛ a ta zugba lɛ ɔmɛ a nane ɔmɛ, nɛ lɔ ɔ ha nɛ a nyɛ we nɛ a nyɛɛ saminya. Kɛkɛ nɛ Egipt bi ɔmɛ de ke: “Nyɛ ha nɛ waa tu Israel bi ɔmɛ a nya fo, ejakaa Israel bi ɔmɛ a he je ɔ, Yehowa kɛ Egipt ngɛ hwue.”

26 Kɛkɛ nɛ Yehowa de Mose ke: “Kpã o nine mi ngɛ wo ɔ nɔ konɛ nyu ɔ nɛ e ba ha Egipt bi ɔmɛ, a ta zugba lɛ ɔmɛ, kɛ a we okpɔngɔ nɔ hili ɔmɛ a nɔ.” 27 Oya nɔuu nɛ Mose kpã e nine mi ngɛ wo ɔ nɔ, nɛ benɛ je ke e naa a, wo ɔ kpale ba tsa kaa bɔ nɛ e ngɛ ha sa a. Benɛ Egipt bi ɔmɛ ngɛ fo tue kɛ ngɛ wo ɔ mi jee ɔ, Yehowa tsɛ̃ Egipt bi ɔmɛ kɛ wo wo ɔ mi. 28 Nyu ɔ kpale e se ba ha ta zugba lɛ ɔmɛ, kɛ okpɔngɔ nɔ hili ɔmɛ, kɛ Farao tabo ɔ nɛ a nyɛɛ Israel bi ɔmɛ a se kɛ sɛ wo ɔ mi ɔ tsuo a nɔ. A kpɛti nɔ kake ngmelu po yi ná we wami.

29 Se Israel bi ɔmɛ lɛɛ a nyɛɛ zugba gbigbli nɔ kɛ gu wo ɔ kpɛti, nɛ nyu ɔ pee kaa gbogbo ngɛ a hiɔ nɔ kɛ a muɔ nɔ. 30 Lɔ ɔ he ɔ, Yehowa kpɔ̃ Israel bi ɔmɛ kɛ je Egipt bi ɔmɛ a dɛ mi jamɛ a ligbi ɔ, nɛ Israel bi ɔmɛ na Egipt bi ɔmɛ nɛ a gbo kɛ pueɔ si ngɛ wo ɔ nya. 31 Israel bi ɔmɛ na he wami* ngua nɛ Yehowa kɛ tsu ní kɛ si Egipt bi ɔmɛ ɔ hulɔ, nɛ a ye Yehowa gbeye, nɛ a he Yehowa kɛ e sɔmɔlɔ Mose ye.

15 Jamɛ a be ɔ mi ɔ, Mose kɛ Israel bi ɔmɛ la la nɛ ɔ kɛ ha Yehowa:

“Ma la kɛ ha Yehowa, ejakaa e hɛ mi ba nyami wawɛɛ.

E tsɛ̃ okpɔngɔ kɛ e nɔ hilɔ ɔ kɛ wo wo ɔ mi.

 2 Ye he wami kɛ ye nyɛ́mi ji Yah,* akɛnɛ e ji ye yi wami helɔ ɔ he je.

Ye Mawu ji nɛ ɔ nɛ, nɛ ma je e yi; lɛ ji ye tsɛ ɔ Mawu, nɛ ma wo e hɛ mi nyami.

 3 Yehowa ji tatsɛ nɛ e he wa. E biɛ ji Yehowa.

 5 Nyu nɛ pee hamahama a ha a nɔ; a mu kɛ ho nyu ɔ sisi ya kaa tɛ.

 9 He nyɛlɔ ɔ de ke: ‘Ma fiee a se! Ma ya ná mɛ!

Ma dla ta yibu ní kɛ yaa si be nɛ ye tsui maa nɔ ye mi!*

Ma hia ye klaate ɔ! Ye nine maa ye a nɔ kunimi!’

11 Oo Yehowa, mawu ɔmɛ a kpɛti mɛnɔ lɛ e ngɛ kaa mo?

Mɛnɔ ngɛ kaa mo, mo nɛ́ o ngɛ klɔuklɔu pe kulaa a?

O ji Mawu nɛ e sa kaa a ye mo gbeye nɛ a la yi jemi lahi kɛ ha mo, mo nɛ́ o peeɔ nyakpɛ ní ɔ.

12 O kpã o hiɔ nine mi, nɛ zugba a mii mɛ.

Kanaan bi ɔmɛ tsuo a tsui maa ku.

16 Gbeye kɛ sawale maa nu mɛ.

18 Yehowa maa ye matsɛ kɛ ya neneene kɛ neneene.

20 Kɛkɛ nɛ gbalɔyo Miriam, nɛ ji Aaron nyɛmiyo ɔ wo akasawa, nɛ yi ɔmɛ tsuo wo akasawahi nɛ a fia, nɛ a do kɛ nyɛɛ e se. 21 Miriam he nyumu ɔmɛ a la a nɔ ke:

“La kɛ ha Yehowa, ejakaa e hɛ mi ba nyami wawɛɛ.

E tsɛ̃ okpɔngɔ kɛ e nɔ hilɔ ɔ kɛ wo wo ɔ mi.”

22 Pee se ɔ, Mose nyɛɛ Israel bi ɔmɛ a hɛ mi kɛ je Wo Tsu ɔ he, nɛ a je kɛ ho Shur nga a nɔ ya, a nyɛɛ ligbi etɛ ngɛ nga a nɔ, se a nɛ́ nyu. 23 A ba su Mara,* se a nyɛ we nɛ a nu nyu nɛ ngɛ Mara a, ejakaa nyu ɔ dooɔ. Lɔ ɔ he je nɛ e wo nyu ɔ biɛ ke Mara a nɛ. 24 Lɔ ɔ he ɔ, ni ɔmɛ tu munyu huitihuiti kɛ si Mose ke: “Mɛni wa maa nu?” 25 Mose kpa ngmlaa kɛ tsɛ Yehowa, nɛ Yehowa tsɔɔ lɛ blɔ kɛ ya tso ko he. Benɛ e sake tso ɔ kɛ fɔ nyu ɔ mi ɔ, nyu ɔ ba ngɔ.

Mawu ngɔ blɔ tsɔɔmi kɛ nɔ́ nɛ e maa da nɔ kɛ kojo mɛ ɔ kɛ ha mɛ ngɛ lejɛ ɔ, nɛ Mawu ka mɛ ngɛ lejɛ ɔ. 26 E de mɛ ke: “Ke nyɛ maa bu Yehowa nyɛ Mawu ɔ gbi tue sisiisi, nɛ nyɛ maa pee nɔ́ nɛ da ngɛ e hɛ mi, nɛ nyɛ maa ye e kita amɛ a nɔ, nɛ nyɛɛ kɛ e blɔ tsɔɔmi ɔmɛ tsuo ma tsu ní ɔ, lɛɛ i be hiɔhi nɛ i kɛ ba Egipt bi ɔmɛ a nɔ ɔ eko ngɔe kɛ ba nyɛ nɔ, ejakaa imi Yehowa lɛ i ngɛ nyɛ tsae.”

27 Lɔ ɔ se ɔ, a ba su Elim, he nɛ nyu hɛngmɛ 12 kɛ tã 70 ɔmɛ ngɛ ɔ. Lɔ ɔ he ɔ, a to si ngɛ lejɛ ɔ ngɛ nyu ɔ he.

16 Benɛ a je Elim ɔ, Israel asafo ɔ tsuo ba su Sin nga a nɛ ngɛ Elim kɛ Sinai a kpɛti ɔ nɔ. A ya su lejɛ ɔ ngɛ nyɔhiɔ enyɔne ɔ we ligbi 15 ɔ nɔ, be nɛ a je Egipt zugba a nɔ ɔ se.

2 Kɛkɛ nɛ Israel asafo ɔ tsuo bɔni munyu huitihuiti tumi kɛ bɔni Mose kɛ Aaron simi ngɛ nga a nɔ. 3 Israel bi ɔmɛ ya nɔ nɛ a de mɛ ke: “Kaa pe wa gbo ngɛ Yehowa nine nɔ ngɛ Egipt zugba a nɔ be mi nɛ wa hii si ngɛ pɔ buɛhi kɛ a mi lohi a he, nɛ́ wa yeɔ ní nɛ wa tɔɔ ɔ, jinɛ wa ko suɔ. Amlɔ nɛ ɔ, nyɛ ngɔ wɔ kɛ ba nga nɛ ɔ nɔ konɛ nyɛ ba ha nɛ hwɔ nɛ gbe asafo nɛ ɔ tsuo.”

4 Kɛkɛ nɛ Yehowa de Mose ke: “Ma ha nɛ abolo maa nɛ kɛ je hiɔwe kɛ ha nyɛ, nɛ daa ligbi ɔ, nɔ fɛɛ nɔ nɛ e ya muɔɔ bɔ nɛ e ma nyɛ maa ye, konɛ ma kɛ ka mɛ nɛ ma hyɛ kaa a maa nyɛɛ ngɛ ye mlaa amɛ a nya loo a be jã pee. 5 Se ngɛ ligbi ekpane ɔ nɔ ɔ, nɔ́ nɛ a ma bua nya konɛ a kɛ pee niye ní ɔ hiɛmi nɛ hi kaa nɔ́ nɛ a muɔɔ ngɛ ligbi kpa amɛ a nɔ ɔ totoe enyɔ.”

6 Lɔ ɔ he ɔ, Mose kɛ Aaron de Israel bi ɔmɛ tsuo ke: “Gbɔkuɛ mi ɔ, nyɛ ma ná maa le kaa Yehowa lɛ e je nyɛ kɛ je Egipt zugba a nɔ ɔ nɛ. 7 Mɔtu ɔ, nyɛ maa na Yehowa hɛ mi nyami ɔ, ejakaa Yehowa nu munyu huitihuiti nɛ nyɛ tu kɛ si lɛ ɔ. Mɛnɔmɛ ji wɔ nɛ nyɛ ngɛ munyu huitihuiti tue kɛ ngɛ wɔ sie ɔ?” 8 Mose ya nɔ nɛ e de ke: “Ke Yehowa ha nyɛ lo nɛ nyɛ ye gbɔkuɛ nɛ e ha nyɛ abolo nɛ nyɛ ye mɔtu nɛ nyɛ tɔ ɔ, nyɛ maa na kaa Yehowa nu munyu huitihuiti ɔmɛ nɛ nyɛ tu kɛ si lɛ ɔ. Se wɔɔ lɛɛ mɛnɔmɛ ji wɔ? Pi wɔ nɛ nyɛ tu munyu huitihuiti ɔmɛ kɛ si, se mohu ɔ, Yehowa.”

9 Kɛkɛ nɛ Mose de Aaron ke: “De Israel asafo ɔ tsuo ke, ‘Nyɛɛ hɛ nyɛ kɛ ba Yehowa hɛ mi ejakaa e nu nyɛ munyu huitihuiti ɔmɛ.’” 10 Benɛ Aaron kɛ Israel asafo ɔ tsuo tu munyu ta nɔuu pɛ ɔ, a plɛ a he nɛ a ngɔ a hɛ mi kɛ tsɔɔ nga a nɔ, nɛ hyɛ! Yehowa hɛ mi nyami ɔ je kpo ngɛ bɔku ɔ mi.

11 Yehowa kɛ Mose tu munyu ekohu nɛ e de lɛ ke: 12 “I nu Israel bi ɔmɛ a munyu huitihuiti ɔmɛ. De mɛ ke, ‘Ke du ngɛ bue ɔ,* nyɛ maa ye lo, nɛ mɔtu ɔ, nyɛ maa ye abolo nɛ nyɛ maa tɔ, nɛ nyɛ ma ná maa le kaa imi ji Yehowa nyɛ Mawu ɔ nɛ.’”

13 Lɔ ɔ he ɔ, jamɛ a gbɔkuɛ ɔ, bebeehi* ba nɛ a ba ha sito he ɔ, nɛ mɔtu ɔ, bɔ́ nɛ ngɛ sito he ɔ tsuo. 14 Benɛ bɔ́ ɔ gbli ɔ, a na ní nyafinyafi komɛ nɛ a ngɛ wɛsɛwɛsɛ nɛ a pueɔ si ngɛ nga a nɔ. Ní ɔmɛ ngɛ kpɔbikpɔbi ngɛ zugba kaa snoo. 15 Benɛ Israel bi ɔmɛ na a, a bɔni a sibi bimi ke, “Mɛni ji nɛ ɔ?” ejakaa a li nɔ́ nɛ e ji. Mose de mɛ ke: “Abolo nɛ Yehowa kɛ ha nyɛ nɛ nyɛɛ ye ji nɛ ɔ nɛ. 16 Mlaa nɛ Yehowa wo ngɛ he ji nɛ ɔ nɛ, ‘Nɔ fɛɛ nɔ nɛ e muɔɔ niye ní ɔ bɔ nɛ e ma nyɛ maa ye. Nɔ fɛɛ nɔ nɛ e hyɛ nimli* abɔ nɛ a ngɛ e bo tsu mi nɛ e muɔɔ niye ní ɔ susumi nɔ́ nɛ ji omer* kake kɛ ha a ti nɔ fɛɛ nɔ.’” 17 Israel bi ɔmɛ pee jã; a ti ni komɛ muɔɔ fuu, nɛ ni komɛ hu muɔɔ bɔɔ pɛ. 18 Benɛ a ngɔ susumi nɔ́ nɛ ji omer kɛ susu ɔ, nɔ nɛ e muɔɔ fuu ɔ, e nɔ́ ɔ bi nɔ, nɛ nɔ nɛ e muɔɔ bɔbɔyoo ɔ hu e nɔ́ ɔ su pɛpɛɛpɛ. A ti nɔ fɛɛ nɔ muɔɔ bɔ nɛ e ma nyɛ maa ye.

19 Kɛkɛ nɛ Mose de mɛ ke: “Nɔ ko nɔ ko kó si eko nɛ je nɛ na yi.” 20 Se a bui Mose tue. Benɛ a ti ni komɛ si eko nɛ je na yi ɔ, e wo gɔgɔ nɛ e ngɛ fu jee, nɛ Mose mi mi fu mɛ. 21 Daa mɔtu ɔ, a ya muɔɔ. A ti nɔ fɛɛ nɔ muɔɔ bɔ nɛ e ma nyɛ maa ye. Ke pu ɔ nya wa a, kɛkɛ e sile.

22 Ngɛ ligbi ekpane ɔ nɔ ɔ, a muɔɔ abolo ɔ kɛ bɔ he enyɔ. A muɔɔ susumi nɔ́ nɛ ji omer enyɔ kɛ ha nɔ fɛɛ nɔ. Lɔ ɔ he ɔ, ganɔ ɔmɛ nɛ a ngɛ asafo ɔ mi ɔ tsuo ba nɛ a ba bɔ Mose amaniɛ. 23 Kɛkɛ nɛ e de mɛ ke: “Jã ji bɔ nɛ Yehowa de. Hwɔɔ maa pee ligbi nɛ nyɛ maa jɔɔ nyɛ he kulaa,* e ji hejɔɔmi ligbi klɔuklɔu kɛ ha Yehowa. Nyɛɛ sã nɔ́ nɛ nyɛ maa sã, nɛ nyɛɛ hoo nɔ́ nɛ nyɛ maa hoo; lɔ ɔ se ɔ, nyɛɛ ngɔ nɔ́ nɛ e maa piɛ ɔ kɛ fɔ si kɛ ya si mɔtu.” 24 Lɔ ɔ he ɔ, a ngɔ kɛ to kɛ ya si mɔtu, kaa bɔ nɛ Mose fã a pɛpɛɛpɛ, nɛ e ji fu, nɛ e wui gɔgɔ hulɔ. 25 Kɛkɛ nɛ Mose de ke: “Nyɛɛ ye lɔ ɔ mwɔnɛ ɔ, ejakaa mwɔnɛ ɔ ji hejɔɔmi ligbi nɛ wa maa ye kɛ ha Yehowa. Mwɔnɛ ɔ, nyɛ be niye ní ɔ eko nae ngɛ zugba a nɔ. 26 Nyɛ maa muɔɔ niye ní ɔ ligbi ekpa, se ngɛ ligbi kpaagone ɔ nɛ ji Hejɔɔmi Ligbi ɔ nɔ ɔ, nyɛ be eko nae.” 27 Se ligbi kpaagone ɔ nɔ ɔ, ni ɔmɛ a ti ni komɛ je kpo kaa a yaa muɔɔ niye ní ɔ eko, se a ya nɛ́ eko.

28 Lɔ ɔ he ɔ, Yehowa de Mose ke: “Kɛ yaa si mɛni be nɛ nyɛ ma kua kaa nyɛ maa ye ye kita amɛ kɛ ye mlaa amɛ a nɔ? 29 Nyɛ ná nɛ nyɛɛ le kaa Yehowa ngɔ Hejɔɔmi Ligbi ɔ kɛ ha nyɛ. Lɔ ɔ he je nɛ e haa nyɛ ligbi enyɔ nya abolo ngɛ ligbi ekpane ɔ nɔ ɔ nɛ. Nɔ fɛɛ nɔ nɛ e hi he nɛ e ngɛ ɔ; nɔ ko nɔ ko nɛ e kó ya he ko ngɛ ligbi kpaagone ɔ nɔ.” 30 Lɔ ɔ he ɔ, ni ɔmɛ ye Hejɔɔmi Ligbi ɔ* ngɛ ligbi kpaagone ɔ nɔ.

31 Israel bi ɔmɛ wo abolo ɔ biɛ ke “mana.”* E ngɛ futafuta kaa korianda wu, nɛ e ngɔmi ngɛ kaa keeki pɛtɛpɛtɛhi nɛ a kɛ hwo wo mi. 32 Kɛkɛ nɛ Mose de mɛ ke: “Mlaa nɛ Yehowa wo ji nɛ ɔ nɛ, ‘Nyɛɛ muɔɔ mana a omer susumi nɔ́ kake, nɛ nyɛ kɛ to, nyɛ yi nɔhi tsuo, bɔ nɛ pee nɛ a ba na abolo nɛ i kɛ ha nyɛ nɛ nyɛ ye ngɛ nga a nɔ benɛ i je nyɛ kɛ je Egipt zugba a nɔ kɛ ma a.’” 33 Lɔ ɔ he ɔ, Mose de Aaron ke: “Ngɔɔ buɛ, nɛ o ngɔ mana omer susumi nɔ́ kake kɛ wo mi, nɛ o ngɔ kɛ ma Yehowa hɛ mi, nɛ nyɛ kɛ to, nyɛ yi nɔhi tsuo.” 34 Lɔ ɔ he ɔ, Aaron ngɔ kɛ ya ma Odase Yemi Nɔ́ ɔ hɛ mi kaa bɔ nɛ Yehowa fã Mose ɔ, bɔ nɛ pee nɛ a baa yi. 35 Israel bi ɔmɛ ye mana jeha 40 kɛ ya si be nɛ a ba su zugba ko nɛ nimli ngɛ nɔ ɔ nɔ. A ye mana a hluu kɛ ya si be nɛ a ba su Kanaan zugba a huzu ɔ nya. 36 Susumi nɔ́ nɛ ji efa* mi dlami nyɔngma mi kake ji susumi nɔ́ nɛ ji omer kake.

17 Israel asafo ɔ tsuo je Sin nga a nɔ, nɛ benɛ a yaa a, a ngɛ si toe ngɛ blɔ ɔ nɔ ngɛ Yehowa fami nya kɛ ya si be nɛ a ya to si ngɛ Refidim. Se nyu be nɛ ni ɔmɛ maa nu.

2 Lɔ ɔ he ɔ, ni ɔmɛ kɛ Mose bɔni pɛmi nɛ a ngɛ dee ke: “Ha wɔ nyu nɛ waa nu.” Se Mose de mɛ ke: “Mɛni he je nɛ nyɛɛ kɛ mi ngɛ pɛe ɔ? Mɛni he je nɛ nyɛ hii Yehowa kae ɔ?” 3 Se kuma ye ni ɔmɛ wawɛɛ ngɛ lejɛ ɔ, nɛ a ya nɔ nɛ a tu munyu huitihuiti kɛ si Mose nɛ a bi lɛ ke: “Mɛni he je nɛ o ngɔ wɔ kɛ je Egipt kɛ ba hiɛ ɔ konɛ kuma nɛ ba gbe waa kɛ wa bimɛ ɔmɛ kɛ wa lohwe ɔmɛ ɔ?” 4 Nyagbe ɔ, Mose kɛ ngmlaa bi Yehowa ke: “Kɛ ma pee nimli nɛ ɔmɛ kɛɛ? A miɔ nɛ a maa fiaa mi tɛ!”

5 Kɛkɛ nɛ Yehowa de Mose ke: “Moo sɛ ni ɔmɛ a hlami, nɛ o ngɔ Israel nikɔtɔma amɛ ekomɛ kɛ piɛɛ o he, nɛ́ o wo o tso ɔ nɛ o kɛ fia Nilo Pa a mi ɔ. Hɛɛ tso ɔ ngɛ o dɛ mi, nɛ́ o pue blɔ. 6 Hyɛ! Ma ya da si ngɛ o hɛ mi ngɛ tɛ sa nɛ ngɛ Horeb ɔ nɔ. Ngɔɔ tso ɔ kɛ fia tɛ sa a, nɛ nyu maa je tɛ sa a mi, nɛ ni ɔmɛ maa nu.” Mose pee jã ngɛ Israel ma nikɔtɔma amɛ a hɛ mi. 7 Lɔ ɔ he ɔ, e wo lejɛ ɔ biɛ ke Masa* kɛ Meriba,* ejakaa Israel bi ɔmɛ je pɛ kɛ wo Mose ngɛ lejɛ ɔ, nɛ a ka Yehowa hulɔ nɛ a bi ke: “Anɛ Yehowa ngɛ wa kpɛti aloo e be?”

8 Kɛkɛ nɛ Amalek bi ɔmɛ ba konɛ a kɛ Israel bi ɔmɛ nɛ ba hwu ta ngɛ Refidim. 9 Kɛkɛ nɛ Mose de Yoshua ke: “Moo hla nyumu ɔmɛ ekomɛ nɛ a je kpo nɛ a kɛ Amalek bi ɔmɛ nɛ ya hwu. Hwɔɔ ɔ, ma ya da kpongu ɔ yi mi, nɛ ma hɛɛ anɔkuale Mawu ɔ tso ɔ ngɛ ye dɛ mi.” 10 Kɛkɛ nɛ Yoshua pee kaa bɔ nɛ Mose de lɛ ɔ pɛpɛɛpɛ, nɛ e kɛ Amalek bi ɔmɛ hwu ta. Nɛ Mose, Aaron, kɛ Hur kuɔ kɛ ya kpongu ɔ yi mi.

11 Ke Mose nine ngɛ hiɔwe ɔ, Israel bi ɔmɛ yeɔ kunimi, se ke e nine ba si nɔuu pɛ kɛkɛ Amalek bi ɔmɛ bɔni kunimi yemi. 12 Benɛ Mose nine gbo ɔ, a wo tɛ ba ha lɛ, nɛ e hi nɔ. Kɛkɛ nɛ Aaron kɛ Hur pɛtɛ e nine ɔmɛ a he kɛ ya si be nɛ pu ɔ nɔ si, bɔ nɛ pee nɛ e nine nɛ ko gbo. Nɔ kake ngɛ e hiɔ nɔ, nɛ nɔ kake hu ngɛ e muɔ nɔ. 13 Lɔ ɔ he ɔ, Yoshua ngɔ klaate kɛ ye Amalek kɛ e we bi ɔmɛ a nɔ kunimi.

14 Jehanɛ ɔ, Yehowa de Mose ke: “Ngmaa nɔ́ nɛ ɔ kɛ wo womi ɔ mi nɛ e pee kaimi nɔ́, nɛ o ti mi kɛ ha Yoshua ke, ‘Ma kpata Amalek hɛ mi kulaa ngɛ hiɔwe sisi nɛ a be lɛ kaie hu.’” 15 Kɛkɛ nɛ Mose ma afɔle sami la tɛ nɛ e wo lɛ biɛ ke Yehowa-nisi,* 16 nɛ e de ke: “Akɛnɛ Amalek te si kɛ si* Yah matsɛ sɛ ɔ he je ɔ, Yehowa kɛ Amalek bi ɔmɛ maa hwu a yi nɔhi tsuo.”

18 Jehanɛ ɔ, Mose ngatsɛ Yetro, nɛ ji Midian osɔfo ɔ nu níhi tsuo nɛ Mawu pee ha Mose kɛ e ma Israel bi ɔmɛ kɛ bɔ nɛ Yehowa plɛ kɛ je Israel kɛ je Egipt ɔ he. 2 Benɛ Mose wo e yo Zipora blɔ kɛ ho e ngatsɛ Yetro ngɔ ya a, Yetro he lɛ atuu, 3 e kɛ e binyumuhi enyɔ ɔmɛ tsuo. Mose wo e binyumu ɔmɛ a ti nɔ kake biɛ ke Gershom,* ejakaa e de ke, “I ba plɛ pee nubwɔ ngɛ ma se zugba nɔ,” 4 nɛ e wo nɔ kake ɔ hu biɛ ke Eliezer,* ejakaa e de ke, “Ye tsɛ ɔ Mawu ɔ, nɔ nɛ e kpɔ̃ mi kɛ je Farao klaate ɔ nya a ji ye yemi kɛ bualɔ.”

5 Lɔ ɔ he ɔ, Mose ngatsɛ Yetro ngɔ Mose binyumu ɔmɛ kɛ e yo ɔ kɛ ba Mose ngɔ ngɛ nga a nɔ ngɛ he nɛ e to si ngɛ ɔ, ngɛ anɔkuale Mawu ɔ yoku ɔ he. 6 Kɛkɛ nɛ e ngɔ sɛ kɛ mane Mose ke: “Imi o ngatsɛ Yetro, i ngɔ o yo ɔ kɛ o binyumuhi enyɔ ɔmɛ kɛ ma o ngɔ.” 7 Oya nɔuu nɛ Mose je kpo nɛ e kɛ e ngatsɛ ɔ ya kpe, nɛ e fĩɔ e nya he* kɛ nga lɛ. A bi bɔ nɛ a sibi a he mi ngɛ ha, kɛkɛ nɛ a sɛ bo tsu ɔ mi.

8 Mose bɔ e ngatsɛ ɔ níhi tsuo nɛ Yehowa pee Farao kɛ Egipt ngɛ Israel he je, e bɔ lɛ haomihi tsuo nɛ ba a nɔ ngɛ blɔ ɔ nɔ, kɛ bɔ nɛ Yehowa plɛ kɛ kpɔ̃ mɛ ha a hulɔ. 9 Yetro nya ngɛ ní kpakpahi tsuo nɛ Yehowa pee kɛ ha Israel, kɛ jemi nɛ e je mɛ kɛ je Egipt ɔ* he je. 10 Kɛkɛ nɛ Yetro de ke: “A je Yehowa, nɔ nɛ e kpɔ̃ nyɛ kɛ je Egipt, kɛ Farao dɛ mi ɔ yi, nɔ nɛ e kpɔ̃ ni ɔmɛ kɛ je Egipt nɔ yemi ɔ sisi ɔ. 11 Amlɔ nɛ ɔ, i ná le kaa Yehowa kle pe mawu kpa amɛ tsuo, ngɛ nɔ́ nɛ e pee ni nɛmɛ nɛ a wo a he nɔ ngɛ e we bi ɔmɛ a nɔ ɔ he je.” 12 Kɛkɛ nɛ Mose ngatsɛ Yetro ngɔ sami afɔle, kɛ afɔle kpahi kɛ ba ha Mawu, nɛ Aaron kɛ Israel ma nikɔtɔma amɛ tsuo ba nɛ a kɛ Mose ngatsɛ ɔ ba ye ní ngɛ anɔkuale Mawu ɔ hɛ mi.

13 E nɔ jena a, Mose hi si kaa bɔ nɛ e pɔɔ peemi ɔ, konɛ e kojo ni ɔmɛ, nɛ ni ɔmɛ ba ngɛ Mose hɛ mi dae kɛ je mɔtu kɛ ya si gbɔkuɛ. 14 Benɛ Mose ngatsɛ ɔ na níhi tsuo nɛ Mose ngɛ pee ha ni ɔmɛ ɔ, e bi lɛ ke: “Mɛni o ngɛ pee nɛ ɔ? Mɛni he je nɛ mo pɛ o hiɔ si ngɛ hiɛmɛ nɛ ɔ nɛ ni ɔmɛ tsuo ba daa si ngɛ o hɛ mi kɛ jeɔ mɔtu kɛ ya siɔ gbɔkuɛ ɔ?” 15 Mose de e ngatsɛ ɔ ke: “Ejakaa ni ɔmɛ baa ye ngɔ nɛ a ba hlaa Mawu blɔ tsɔɔmi. 16 Ke sane ko te si ngɛ nɔ ko kɛ e nyɛmi a kpɛti ɔ, a kɛ baa ye ngɔ, nɛ i kojoɔ nɛ i haa nɛ a leɔ anɔkuale Mawu ɔ kojomi ɔmɛ kɛ e mlaa amɛ.”

17 Mose ngatsɛ ɔ de lɛ ke: “Nɔ́ nɛ o ngɛ pee ɔ hí. 18 Pɔ maa tɔ o kɛ nimli nɛ ɔmɛ nɛ a piɛɛ o he ɔ tsuo nyɛ he, ejakaa tlomi nɛ ɔ kle pe mo, nɛ mo nɔ kake too o be nyɛe maa tloo. 19 Amlɔ nɛ ɔ, bu mi tue. Ma wo mo ga, nɛ Mawu maa piɛɛ o he. Moo pee ni ɔmɛ a nane mi dalɔ ngɛ anɔkuale Mawu ɔ hɛ mi, nɛ́ o ngɔ a sane ɔmɛ kɛ ba ha anɔkuale Mawu ɔ. 20 Moo bɔ mɛ kɔkɔ nɛ o ha nɛ a le blɔ tsɔɔmi ɔmɛ kɛ mlaa amɛ, nɛ o tsɔɔ mɛ bɔ nɛ e sa kaa a ba a je mi ha, kɛ ní tsumi nɛ e sa kaa a tsu. 21 Moo hla ni ɔmɛ a kpɛti nyumuhi nɛ a bɔɔ mɔde, nɛ́ a yeɔ Mawu gbeye, nyumuhi nɛ a ma nyɛ maa fĩa kɛ fɔ a nɔ, nyumuhi nɛ a sume kaa a maa sisi nihi kɛ ná ní, nɛ o ngɔ mɛ kɛ da ni ɔmɛ a nya. Nihi nɛ a maa hyɛ nimli akpehi a nɔ, nihi nɛ a maa hyɛ nimli lafahi a nɔ, nihi nɛ a maa hyɛ nimli nyingmi enuɔhi a nɔ, kɛ nihi nɛ a maa hyɛ nimli nyɔngmahi a nɔ. 22 Be fɛɛ be nɛ sane ko maa te si ngɛ ni ɔmɛ a kpɛti ɔ, á kojo, nɛ́ a ngɔ sanehi nɛ a he wa a kɛ ba o ngɔ, se sanehi nɛ a he wɛ ɔ lɛɛ á tsu he ní. Ha nɛ a ye bua mo kɛ tloo tlomi ɔ konɛ e pee gbɔjɔɔ kɛ ha mo. 23 Ke o pee enɛ ɔ, nɛ jã ji bɔ nɛ Mawu fã mo ɔ, lɛɛ o ma nyɛ maa da pɔtɔtɔɛ ɔ nya, nɛ nɔ fɛɛ nɔ maa ya we mi kɛ bua jɔmi.”

24 Amlɔ nɔuu nɛ Mose bu e ngatsɛ ɔ tue, nɛ e pee níhi nɛ e de lɛ ɔ tsuo. 25 Mose hla nyumuhi nɛ a bɔɔ mɔde ngɛ Israel tsuo, nɛ e ngɔ mɛ kɛ da ni ɔmɛ a nya, kaa nimli akpehi a nya dali, nimli lafahi a nya dali, nimli nyingmi enuɔhi a nya dali, kɛ nimli nyɔngmahi a nya dali. 26 Lɔ ɔ he ɔ, ke sane ko te si ɔ, a kojoɔ. Sanehi nɛ a he wa a, a ngɔɔ kɛ ba haa Mose, se sanehi nɛ a he wɛ ɔ lɛɛ a kojoɔ. 27 Lɔ ɔ se ɔ, Mose ya je e ngatsɛ ɔ blɔ, nɛ e je kɛ ho e ma mi* ya.

19 Benɛ Israel bi ɔmɛ je Egipt zugba a nɔ ɔ, a ba su Sinai nga a nɔ ngɛ nyɔhiɔ etɛne ɔ mi.* 2 A je Refidim nɛ a ba Sinai nga a nɔ, nɛ a ba to si ngɛ nga a nɔ. Israel bi ɔmɛ to si ngɛ lejɛ ɔ, ngɛ yoku ɔ hɛ mi.

3 Kɛkɛ nɛ Mose kuɔ kɛ ya anɔkuale Mawu ɔ ngɔ, nɛ Yehowa tsɛ lɛ kɛ je yoku ɔ nɔ nɛ e de lɛ ke: “Nɔ́ nɛ ó de Yakob we ɔ, nɛ ji Israel bi ɔmɛ ji nɛ ɔ nɛ, 4 ‘Nyɛ nitsɛmɛ nyɛ na nɔ́ nɛ i pee Egipt bi ɔmɛ, bɔ nɛ pee nɛ ma hɛɛ nyɛ ngɛ kɔle pɛli nɔ nɛ ma ngɔ nyɛ kɛ ba ye ngɔ. 5 Amlɔ nɛ ɔ, ke nyɛ maa bu ye gbi tue sisiisi, nɛ nyɛ maa ye ye somi ɔ nɔ ɔ, lɛɛ bɔ fɛɛ bɔ nɛ ji ɔ, nyɛ maa pee ye weto ní klɛdɛɛ* ngɛ je ma amɛ tsuo a kpɛti, ejakaa ye nɔ́ ji zugba a tsuo. 6 Nyɛ ma ba pee osɔfohi nɛ a ji matsɛmɛ, kɛ je ma klɔuklɔu kɛ ha mi.’ Níhi nɛ ó de Israel bi ɔmɛ ji nɛ ɔ nɛ.”

7 Lɔ ɔ he ɔ, Mose ya nɛ e ya bua ma nikɔtɔma amɛ a nya, nɛ e de mɛ níhi tsuo nɛ Yehowa fã lɛ ɔ. 8 Lɔ ɔ se ɔ, ni ɔmɛ tsuo a nya sɔ kɛ ha heto ke: “Níhi tsuo nɛ Yehowa de ɔ, wa maa pee.” Amlɔ nɔuu nɛ Mose ya de Yehowa nɔ́ nɛ ni ɔmɛ de ɔ. 9 Kɛkɛ nɛ Yehowa de Mose ke: “Hyɛ! i ma o ngɔ ngɛ bɔku kpii mi, konɛ ke i kɛ mo ngɛ munyu tue ɔ, ni ɔmɛ nɛ a nu nɛ a ná mo hu o mi hemi kɛ yemi be fɛɛ be.” Kɛkɛ nɛ Mose de Yehowa nɔ́ nɛ Israel bi ɔmɛ de ɔ.

10 Jehanɛ ɔ, Yehowa de Mose ke: “Yaa ni ɔmɛ a ngɔ nɛ o ya tsu a he mwɔnɛ ɔ kɛ hwɔɔ, nɛ́ o ha nɛ a fɔ a tade ɔmɛ a he. 11 Á dla a he kɛ ha ligbi etɛne ɔ, ejakaa ngɛ ligbi etɛne ɔ nɔ ɔ, Yehowa ma kple kɛ ba Sinai Yoku ɔ nɔ, nɛ ni ɔmɛ tsuo maa na lɛ. 12 Moo wo huzu kɛ bɔle yoku ɔ nɛ o de ni ɔmɛ ke, ‘Nyɛɛ hyɛ nɛ e hi nɛ nyɛ ko kuɔ yoku ɔ; nyɛ ko be e huzu ɔ he. Nɔ fɛɛ nɔ nɛ e maa ta yoku ɔ he ɔ, a maa gbe lɛ. 13 Nɔ ko nɔ ko nine ko ta jamɛ a nɔ ɔ he, se mohu ɔ, á fiaa lɛ tɛ aloo á gbɔ lɛ nɔ́ nɛ e gbo.* Nɔmlɔ jio, lohwe jio, e be wami mi hie.’ Se ke titimati* ɔ pɛ ɔ, a ma nyɛ maa hɛ kɛ su yoku ɔ he.”

14 Kɛkɛ nɛ Mose kple yoku ɔ kɛ ya ni ɔmɛ a ngɔ, nɛ e tsukɔ a he, nɛ a fɔ a tade ɔmɛ a he. 15 E de ni ɔmɛ ke: “Nyɛ dla nyɛ he kɛ ha ligbi etɛne ɔ. Nyumu ko kɛ e yo kó ná bɔmi.”*

16 Ligbi nɛ ji etɛne ɔ mɔtu ɔ, hiɔwe si, nɛ oslabai gba, nɛ bɔku kpii wo ngɛ yoku ɔ nɔ, nɛ titimati ko pɛ wawɛɛ nitsɛ, nɛ nihi nɛ a ngɛ sito he ɔ tsuo a he bɔni domi blibliibli. 17 Jehanɛ ɔ, Mose ngɔ ni ɔmɛ kɛ je sito he ɔ konɛ a kɛ anɔkuale Mawu ɔ nɛ ya kpe, nɛ a ya da yoku ɔ sisi. 18 Sinai Yoku ɔ tsuo je la su ku, ejakaa Yehowa kple kɛ ba yoku ɔ nɔ ngɛ la mi; nɛ la su ku ɔ ngɛ hiɔwe yae kaa flɔɔnɔɔ mi la su ku, nɛ yoku ɔ tsuo ngɛ mimiɛɛe wawɛɛ nitsɛ. 19 Benɛ titimati ɔ pɛmi ɔ nya ngɛ wae wawɛɛ ɔ, Mose tu munyu, nɛ anɔkuale Mawu ɔ ha lɛ heto.*

20 Kɛkɛ nɛ Yehowa kple kɛ ba Sinai Yoku ɔ yi mi. Nɛ Yehowa tsɛ Mose kaa e ba yoku ɔ yi mi, nɛ Mose kuɔ kɛ ho. 21 Jehanɛ ɔ, Yehowa de Mose ke: “Kple nɛ o ya bɔ ni ɔmɛ kɔkɔ kaa a ko ka kaa a maa hɛ mɛ kɛ su Yehowa he nɛ a hyɛ lɛ, ke pi jã a, a ti nihi fuu a hɛ mi ma kpata. 22 Mo ha nɛ osɔfo ɔmɛ nɛ a pɔɔ Yehowa he sumi ɔ nɛ a tsu a he, konɛ Yehowa ko fia mɛ nɔ́.”* 23 Kɛkɛ nɛ Mose de Yehowa ke: “Ni ɔmɛ be nyɛe maa ba Sinai Yoku ɔ he, ejakaa o bɔ wɔ kɔkɔ momo, nɛ o de ke, ‘Moo wo huzu kɛ bɔle yoku ɔ, nɛ o pee lɛ klɔuklɔu.’” 24 Se Yehowa de ke: “Yaa, kple kɛ ho, nɛ o kpale kuɔ kɛ ba. Mo ha nɛ Aaron nɛ piɛɛ o he kɛ ba, se ko ha nɛ osɔfo ɔmɛ kɛ ni ɔmɛ nɛ a ka kaa a maa kuɔ kɛ ba Yehowa ngɔ, bɔ nɛ pee nɛ ma ko gbe mɛ.” 25 Lɔ ɔ he ɔ, Mose kple kɛ ya ni ɔmɛ a ngɔ, nɛ e ya de mɛ.

20 Kɛkɛ nɛ Mawu de ní nɛ ɔmɛ tsuo:

2 Imi ji Yehowa o Mawu ɔ, nɔ nɛ e je mo kɛ je Egipt zugba a nɔ, kɛ je nyɔguɛ yemi* mi ɔ nɛ. 3 Ko ná mawu kpahi ngɛ ye se.*

4 “Koo pee amaga ko kɛ ha o he, nɛ koo pee níhi nɛ a ngɛ hiɔwe aloo níhi nɛ a ngɛ zugba a nɔ, aloo níhi nɛ a ngɛ nyu mi ɔ ekoeko henɔ. 5 Ko kplã si ha mɛ, nɛ ko ha nɛ a plɛ o yi mi nɛ o sɔmɔ mɛ, ejakaa imi Yehowa o Mawu ɔ, i ji Mawu nɛ i suɔ kaa a ja mi pɛ, nɛ i ngɔɔ tsɛmɛ nɛ a nyɛɔ mi ɔ a tɔmi he tue gblami kɛ baa bimɛ, kɛ yi nɔ etɛne kɛ yi nɔ eywiɛne a nɔ, 6 se i jeɔ suɔmi nɛ se pui kpo kɛ tsɔɔ ni nɛmɛ nɛ a suɔ mi nɛ a yeɔ ye kita amɛ a nɔ ɔ kɛ ya siɔ yi nɔ nɛ ji akpe ɔ nɔ.

7 “Koo ngɔ Yehowa o Mawu ɔ biɛ ɔ kɛ tsu ní ngɛ blɔ nɛ sɛ nɔ, ejakaa Yehowa be hae nɛ nɔ nɛ ngɔɔ e biɛ ɔ kɛ tsuɔ ní ngɛ blɔ nɛ sɛ nɔ ɔ nɛ ye e he.

8 “Mo kai Hejɔɔmi Ligbi ɔ, nɛ o ha nɛ e hi klɔuklɔu. 9 Ngɔɔ ligbi ekpa kɛ tsu ní nɛ o kɛ pee o níhi tsuo, 10 se ligbi kpaagone ɔ ji hejɔɔmi ligbi ha Yehowa o Mawu ɔ. Ko tsu ní tsumi ko, mo nitsɛ jio, o binyumu jio, o biyo jio, o nyɔguɛ jio, o mawayo jio, o lohwe jio, nubwɔ nɛ e ngɛ o hi he ɔ* jio. 11 Ejakaa Yehowa bɔ hiɔwe kɛ zugba kɛ wo kɛ níhi tsuo nɛ ngɛ a mi ɔ ngɛ ligbi ekpa mi, nɛ e bɔni e he jɔɔmi ngɛ ligbi kpaagone ɔ nɔ. Lɔ ɔ he je nɛ Yehowa jɔɔ Hejɔɔmi Ligbi ɔ, nɛ e pee lɛ klɔuklɔu ɔ nɛ.

12 “Buu o tsɛ kɛ o nyɛ, konɛ o se nɛ kɛ ngɛ zugba a nɛ Yehowa o Mawu ɔ kɛ ngɛ mo hae ɔ nɔ.

13 “Koo gbe nɔmlɔ.

14 “Ko puɛ gba.

15 “Koo ju.

16 “Koo ye lakpa odase kɛ si o nyɛmi.

17 “O hɛ ko kɔ̃ o nyɛmi ko we nɔ. Mo ko ná o nyɛmi ko yo he akɔnɔ, nɛ jã kɛ̃ nɛ o hɛ ko kɔ̃ e nyɔguɛ, loo e mawayo, loo e na ku, loo e teji, loo nɔ́ fɛɛ nɔ́ ko nɛ ji o nyɛmi ɔ nɔ́ ɔ nɔ.”

18 Jehanɛ ɔ, ni ɔmɛ tsuo nu hiɔwe simi ɔ, nɛ a na oslabai nɛ e ngɛ gbae ɔ, nɛ a nu titimati* ɔ pɛmi ɔ, nɛ a na nɛ yoku ɔ ngɛ la su ku jee; benɛ a na nɔ́ nɛ ɔ, a he do blibliibli nɛ a ya da si ngɛ se lokoo. 19 Lɔ ɔ he ɔ, a de Mose ke: “Mo nitsɛ o kɛ wɔ nɛ tu munyu, nɛ wa maa bu mo tue, se ko ha nɛ Mawu kɛ wɔ nɛ tu munyu, ke pi jã a, wa ma gbo.” 20 Lɔ ɔ he ɔ, Mose de ni ɔmɛ ke: “Nyɛ ko ye gbeye, ejakaa anɔkuale Mawu ɔ ba konɛ e ba ka nyɛ, bɔ nɛ pee nɛ nyɛɛ ya nɔ nɛ nyɛɛ ye lɛ gbeye nɛ nyɛ ko pee yayami.” 21 Lɔ ɔ he ɔ, ni ɔmɛ ya nɔ nɛ a da si ngɛ se lokoo, se Mose hɛ lɛ kɛ su bɔku yumu ɔ he ngɛ he nɛ anɔkuale Mawu ɔ ngɛ ɔ.

22 Kɛkɛ nɛ Yehowa de Mose ke: “Mo de Israel bi ɔmɛ ke, ‘Nyɛ nitsɛmɛ nyɛ na kaa i kɛ nyɛ tu munyu kɛ je hiɔwe. 23 Nyɛ ko pee sika hiɔ mawuhi nɛ nyɛ ja mɛ kɛ piɛɛ ye he, nɛ nyɛ ko pee sika tsu mawuhi kɛ ha nyɛ he. 24 Moo ngɔ zu kɛ puɛ afɔle sami la tɛ kɛ ha mi, nɛ o sã o sami afɔle ɔmɛ, o tue mi jɔmi afɔle ɔmɛ, o to ɔmɛ, kɛ o na amɛ ngɛ nɔ. He fɛɛ he nɛ ma hla kaa a ja mi ngɛ* ɔ, ma ba o ngɔ nɛ ma ba jɔɔ mo. 25 Ke o maa ngɔ tɛ kɛ pee afɔle sami la tɛ kɛ ha mi ɔ, koo ngɔ tɛhi nɛ a ngɔ ní tsumi dadehi kɛ kó kɛ pee. Ejakaa ke o ngɔ tsisel kɛ ta he ɔ, o maa wo he mu. 26 Nɛ koo kuɔ atlakpe kɛ ya ye we afɔle sami la tɛ ɔ nɔ, konɛ o hehi nɛ e sɛ kaa a naa a nɛ ba je kpo ngɛ la tɛ ɔ nɔ.’

21 “Mlaahi nɛ ó wo mɛ ji nɛ ɔmɛ nɛ:

2 “Ke o he Hebri no nyɔguɛ ɔ, e ma sɔmɔ mo jeha ekpa, se ngɛ jeha kpaagone ɔ mi ɔ, o ngmɛɛ e he nɛ e ho faa, e ko wo nɔ́ ko nɔ́ ko. 3 Ke lɛ nɔ kake nɛ e ba a, lɛ nɔ kake nɛ e kpale kɛ ho. Ke e kɛ e yo nɛ ba a, lɛɛ e kɛ e yo ɔ nɛ a kpale kɛ ho. 4 Ke e nyɔmtsɛ ɔ ha lɛ yo nɛ e kɛ lɛ fɔ binyumuhi aloo biyihi ɔ, yo ɔ kɛ e bimɛ ɔmɛ maa pee e nyɔmtsɛ ɔ níhi, nɛ lɛ nɔ kake too e maa ho. 5 Se ke nyɔguɛ ɔ kua ke e be jee, nɛ e de ke: ‘I suɔ ye nyɔmtsɛ ɔ, ye yo ɔ, kɛ ye bimɛ ɔmɛ, lɔ ɔ he ɔ, i sume nɛ ma ye ye he’ ɔ, 6 e nyɔmtsɛ ɔ nɛ e ngɔ lɛ kɛ ba anɔkuale Mawu ɔ hɛ mi. Lɔ ɔ se ɔ, é ngɔ lɛ kɛ ba sinya a nya loo sinya tso ɔ he, nɛ́ e nyɔmtsɛ ɔ nɛ ngɔ abui kɛ gbu e tue, konɛ e pee e nyɔmtsɛ ɔ nyɔguɛ e wami be tsuo.

7 “Ke nɔ ko jua e biyo kaa nyɔguɛ ɔ, biyo ɔ be e he yee kaa bɔ nɛ nyumu nyɔguɛ maa ye e he ɔ. 8 Ke e nyɔmtsɛ ɔ bua jɔɛ e he, nɛ e sume kaa e maa ngɔ lɛ kaa e yo kpa, se e ngɛ hlae nɛ e jua lɛ kɛ ha nɔ kpa a,* e be he blɔ nɛ e juaa lɛ kɛ haa ma je li, ejakaa ke e pee jã a, e sisi nyɔguɛ ɔ. 9 Ke e ngɔ lɛ kɛ ha e binyumu ɔ, lɛɛ é ha lɛ biyo blɔ nya ní. 10 Ke e ya ngɔ yo kpa a, e sɛ nɛ e gbɔ e kekle yo ɔ nya mi ngma, e heha ní, kɛ e gba si himi blɔ nya nɔ́ ɔ nɔ.* 11 Ke e pee we ní etɛ nɛ ɔmɛ ha we nyɔguɛ ɔ, lɛɛ e ma nyɛ maa je faa nɛ e be sika ko woe.

12 “Nɔ fɛɛ nɔ nɛ maa fia nɔ ko nɔ́ nɛ e ma gbo ɔ, á gbe lɛ. 13 Se ke pi nɛ e je blɔ, nɛ anɔkuale Mawu ɔ ngmɛ blɔ nɛ e ba jã a, ma tsɔɔ nyɛ he ko nɛ e ma nyɛ maa tu fo kɛ ya. 14 Ke nɔ ko mi mi fu e nyɛmi nɔmlɔ nɛ e je blɔ nɛ e gbe lɛ ɔ, á gbe lɛ, ke e ma bi nɛ a gbla lɛ kɛ je ye we afɔle sami la tɛ ɔ he po. 15 Nɔ fɛɛ nɔ nɛ e maa fia e tsɛ loo e nyɛ nɔ́ ɔ, á gbe lɛ.

16 “Ke nɔ ko ju nɔmlɔ nɛ e ya jua lɛ, aloo a na nɔ nɛ e ju ɔ ngɛ e dɛ ɔ, á gbe lɛ.

17 “Nɔ fɛɛ nɔ nɛ e maa gbiɛ e tsɛ loo e nyɛ* ɔ, á gbe lɛ.

18 “Ke nyumuhi ngɛ pɛe nɛ nɔ kake fia e nyɛmi tɛ aloo kɔ̃,* nɛ e gbo we se e tlɔ sa mi ɔ, nɔ́ nɛ a pee ji nɛ ɔ nɛ: 19 Ke e nyɛɔ nɛ e teɔ si nɛ e kɛ tso nyɛɛɔ ngɛ kpo nɔ ɔ, lɛɛ a be nɔ nɛ e fia lɛ nɔ́ ɔ tue gblae. Be nɛ nɔ nɛ plaa a nyɛ we ní tsumi, kɛ ya si be nɛ e ma ná he wami kɛ pi si ɔ he hiɔ pɛ nɛ é wo.

20 Ke nɔ ko ngɔ tso kɛ fia e nyɔguɛ nyumu aloo e nyɔguɛ yo nɛ e gbo ngɛ e nine nɔ ɔ, a gbla jamɛatsɛ ɔ tue kɛ to nane mi. 21 Se ke nyɔguɛ ɔ hi si ligbi kake loo ligbi enyɔ loko e gbo ɔ, lɛɛ a ko gbla nyɔmtsɛ ɔ tue kɛ to nane mi, ejakaa e nyɔmtsɛ ɔ je sika kɛ he lɛ.

22 “Ke nyumuhi ngɛ kunɔ nɔe nɛ a he ya si yohɔyo ko nɛ e fɔ be mi nɛ e sui e fɔmi be,* se gbenɔ* ko ji mi kɛ bɛ ɔ, nɔ nɛ e he si lɛ ɔ nɛ e wo hiɔ nɛ yo ɔ huno ɔ ma bɔ lɛ ɔ; é wo kɛ gu kojoli ɔmɛ a nɔ. 23 Se ke gbenɔ ko je mi kɛ ba a, lɛɛ á ngɔ wami kɛ to wami nane mi,* 24 á ngɔ hɛngmɛ kɛ to hɛngmɛ nane mi, á ngɔ lungu kɛ to lungu nane mi, á ngɔ nine kɛ to nine nane mi, á ngɔ nane kɛ to nane nane mi, 25 á ngɔ la sami kɛ to la sami nane mi, á ngɔ plaami kɛ to plaami nane mi, nɛ á ngɔ kɔ̃ kɛ to kɔ̃ nane mi.

26 “Ke nyumu ko fia e nyɔguɛ nyumu loo e nyɔguɛ yo hɛngmɛ nɔ́ nɛ e pɛ ɔ, e ha nɛ e nyɔguɛ ɔ nɛ e ho faa kɛ to e hɛngmɛ ɔ nɛ pɛ ɔ nane mi. 27 Nɛ ke e fia e nyɔguɛ nyumu loo e nyɔguɛ yo nɔ́ nɛ e lungu hia a, e ha nɛ e nyɔguɛ ɔ nɛ e ho faa kɛ to e lungu ɔ nɛ e hia a nane mi.

28 “Ke na si nɔ ko koli, nyumu jio, yo jio, nɛ nɔ ɔ gbo ɔ, a fiaa na a tɛ nɛ e gbo, a ko ye e lo; se natsɛ ɔ lɛɛ a ko gbla e tue. 29 Se ke na ko pɔɔ nɔ koli simi nɛ a bɔ natsɛ ɔ kɔkɔ se e hyɛ we lɛ saminya, nɛ e gbe nyumu ko loo yo ko ɔ, a fiaa na a tɛ, nɛ a gbe natsɛ ɔ hulɔ. 30 Ke a tsɔɔ lɛ nɔ́ nɛ e ha kɛ kpɔ̃ e he* ɔ, e ha nɔ́ fɛɛ nɔ́ nɛ a tsɔɔ kaa e ha kaa kpɔmi nɔ́ ɔ, konɛ e* yi nɛ ná wami. 31 Binyumu nɛ na a si jio, biyo nɛ e si jio, a kɛ natsɛ ɔ nɛ ye ngɛ mlaa nɛ ɔ nɔuu nya. 32 Ke na a ya si nyɔguɛ nyumu loo nyɔguɛ yo ɔ, natsɛ ɔ nɛ ha nyɔguɛ ɔ nyɔmtsɛ ɔ shekel* 30, nɛ a fiaa na a tɛ nɛ e gbo.

33 “Ke nɔ ko bli muɔ ko nya kɛ fɔ si, aloo e tsua muɔ nɛ e bu we nya nɛ na aloo teji ya nɔ mi ɔ, 34 nɔ nɛ tsua muɔ ɔ nɛ e to nane mi. E wo lohwetsɛ ɔ hiɔ, nɛ́ e ngɔ lohwe gbogboe ɔ. 35 Ke nɔ ko na plaa nɔ kpa na nɛ e gbo ɔ, a jua na hɛngmengmletsɛ ɔ nɛ a gba sika a, nɛ a gba na gbogboe ɔ hulɔ. 36 Aloo ke a ná le kaa na a pɔɔ nɔ koli simi se natsɛ ɔ hyɛ we lɛ saminya a, natsɛ ɔ nɛ e ngɔ na kɛ to na nane mi, nɛ e ngɔ na gbogboe ɔ.

22 “Ke nɔ ko ya ju na loo jijɔ nɛ e gbe loo e jua a, é ngɔ na enuɔ kɛ to na kake ɔ nane mi, nɛ́ e ngɔ jijɔ eywiɛ kɛ to jijɔ kake ɔ nane mi.

2 (“Ke a na julɔ ko nɛ e ngɛ nɔ ko sinya ywiae nɛ́ e sɛ mi, nɛ a fia lɛ nɔ́ nɛ e gbo ɔ, nɔ ko yi e muɔ he fɔ. 3 Se ke pu je loko nɔ́ nɛ ɔ ya nɔ ɔ, lɛɛ a ye e muɔ he fɔ.)

“Julɔ ɔ nɛ e to nane mi. Ke e be nɔ́ ko ɔ, lɛɛ a jua lɛ kɛ wo níhi nɛ e ju ɔ he hiɔ. 4 Ke a na lohwe nɛ e ju ɔ ngɛ e dɛ, nɛ lohwe ɔ ngɛ wami mi ɔ, na jio, teji jio, jijɔ jio, e to nane mi kɛ bɔ he enyɔ.

5 “Ke nɔ ko je e lohwehi kpo konɛ a ya ye ní ngɛ nga a nɔ aloo wai ngmɔ mi, nɛ e ngmɛɛ a he nɛ a ya ye ní ngɛ nɔ kpa ngmɔ mi ɔ, e ngɔ lɛ nitsɛ e ngmɔ nɛ hi pe kulaa aloo e wai ngmɔ nɛ hi pe kulaa kɛ to nane mi.

6 “Ke nɔ ko tsɔ la nɛ la a ya sã mio tsohi, nɛ e sã ngma* nɛ a fĩ yi tlomi nya aloo ngma nɛ a poo we lolo, loo ngmɔ ko ɔ, nɔ nɛ e tsɔ la a nɛ e to níhi nɛ sã a nane mi.

7 “Ke nɔ ko ha e nyɛmi sika loo níhi ke e kɛ to ha lɛ, nɛ a ju ní ɔmɛ ngɛ e nyɛmi ɔ we ɔ mi ɔ, ke a na julɔ ɔ, julɔ ɔ nɛ to nane mi kɛ bɔ he enyɔ. 8 Ke a nɛ julɔ ɔ, a ngɔ wetsɛ ɔ kɛ ba anɔkuale Mawu ɔ hɛ mi, konɛ a hyɛ kaa lɛ nɛ e ju e nyɛmi ɔ ní ɔmɛ lo.* 9 Be fɛɛ be nɛ nɔ ko maa po nɔ kpa nya kaa e na nɔ́ ko ngɛ e dɛ nɛ pi e nɔ́, na jio, teji jio, jijɔ jio, tade jio, nɔ́ fɛɛ nɔ́ nɛ maa laa a, ni enyɔ ɔmɛ tsuo nɛ a ngɔ sane ɔ kɛ ya anɔkuale Mawu ɔ hɛ mi. Nɔ nɛ Mawu ma de ke e ye fɔ ɔ nɛ́ e to e nyɛmi ɔ nane mi kɛ bɔ he enyɔ.

10 “Ke nɔ ko ngɔ e teji, loo na, loo jijɔ, loo we mi lohwe kpa ko kɛ ya ha e nyɛmi konɛ e hyɛ nɔ ha lɛ, nɛ lohwe ɔ gbo, loo e plaa, loo a kpaka lɛ kɛ je be mi nɛ nɔ ko nɛ ɔ, 11 nɔ nɛ a ngɔ ní ɔmɛ kɛ ha a nɛ e kã Yehowa kita ngɛ nɔtsɛ ɔ hɛ mi kaa e nine tɛ e nyɛmi ɔ ní ɔmɛ a he, nɛ́ nɔtsɛ ɔ nɛ e kplɛɛ nɔ. Nɔ nɛ a kɛ ní ɔmɛ ha kaa e hyɛ nɔ ɔ nɛ ko to nane mi. 12 Se ke a ju lohwe ɔ ngɛ e dɛ ɔ, lɛɛ e to nɔtsɛ ɔ nane mi. 13 Ke lohwe awi yelɔ ko lɛ e tsɔtslɔɔ e mi ɔ, é ngɔ lohwe nɛ a tsɔtslɔɔ e mi ɔ kɛ ba kaa odase. É ko to lohwe nɛ lohwe awi yelɔ tsɔtslɔɔ e mi ɔ nane mi.

14 “Se ke nɔ ko ya ba lohwe ngɛ e nyɛmi dɛ, nɛ e plaa loo e gbo be mi nɛ nɔtsɛ ɔ be lejɛ ɔ, nɔ nɛ e ya ba lohwe ɔ nɛ e to nane mi. 15 Ke nɔtsɛ ɔ ngɛ lejɛ ɔ, lɛɛ e ko to nane mi. Ke e ya hai ɔ, lɛɛ sika nɛ e kɛ ya hai ɔ ji nɔ́ nɛ e kɛ to nane mi ɔ nɛ.

16 “Jehanɛ ɔ, ke nyumu ko mlɔɔ yomiyo ko nɛ a bi we e si lolo nɛ e kɛ lɛ hwɔ ɔ, e wo e he ní tsumi sika a nɛ e pee e yo. 17 Ke yo ɔ tsɛ ɔ kplɛɛ we kaa e kɛ lɛ ma ha nyumu ɔ po ɔ, e sa nɛ e wo yo he ní tsumi nya sika a.

18 “Koo ngmɛ yo kunya yelɔ blɔ nɛ e hi wami mi.

19 “Nɔ fɛɛ nɔ nɛ e kɛ lohwe maa hwɔ ɔ, bɔ fɛɛ bɔ nɛ ji ɔ, á gbe lɛ.

20 “Nɔ fɛɛ nɔ nɛ e maa sã afɔle ha mawu kpa ko ngɛ Yehowa se ɔ, á kpata e hɛ mi.

21 “Nyɛ ko pee nubwɔ basabasa, nɛ nyɛ ko wa lɛ yi mi hulɔ, ejakaa nyɛ hu nyɛ ya hi Egipt zugba a nɔ kaa nibwɔhi.

22 “Nyɛ ko wa yalɔyo* aloo awusa* yi mi. 23 Ke nyɛ wa lɛ yi mi nɛ e fo ya kɛ tsɛ mi ɔ, bɔ fɛɛ bɔ nɛ ji ɔ, ma bu e ya fomi ɔ tue; 24 nɛ ye mi mi maa wo la, nɛ ma ngɔ klaate kɛ gbe nyɛ, nɛ nyɛ yi ɔmɛ maa pee yalɔyihi,* nɛ nyɛ bimɛ ɔmɛ maa pee bimɛ nɛ a be tsɛmɛ.

25 “Ke o pa sika ha ohiatsɛ* ngɛ ye we bi ɔmɛ a kpɛti, nɛ ji nɔ ko nɛ e kɛ nyɛ ngɛ ɔ, koo pee o ní kaa sika palɔ.* Ko he lɛ hekpa.

26 “Ke o nyɛmi ba pa sika ngɛ o dɛ nɛ o ngɔ e bo kaa awaba tomi nɔ́* ɔ, o kpale kɛ ya ha lɛ loko pu nɛ nɔ si. 27 Ejakaa lɔ ɔ pɛ ji e he hami nɔ́, bo nɛ e kɛ maa ha e he; mɛni nɛ e maa ha kɛ hwɔ si? Ke e fo ya kɛ tsɛ mi ɔ, ma bu lɛ tue kokooko, ejakaa ye mi mi sãã mi ngɛ nɔ he.*

28 “Koo gbiɛ Mawu,* nɛ koo gbiɛ ganɔ* ko ngɛ o ma mi bi ɔmɛ a kpɛti.

29 “Koo to tsle kaa o maa ngɔ o ngmɔ ní babauu, kɛ o wai* nɛ hiɛ kɛ be nɔ ngɛ o wai ngami he* ɔ eko kɛ sã afɔle. Ngɔɔ o binyumu ɔmɛ a kpɛti tɛte ɔ kɛ ha mi. 30 Bɔ nɛ o pee o na kɛ o jijɔ a kekleekle bi ji nɛ ɔ nɛ: E hi e nyɛ kasa mi ligbi kpaago. Ngɛ ligbi kpaanyɔne ɔ nɔ ɔ, ngɔɔ lɛ kɛ ba ha mi.

31 “Nyɛɛ pee nyɛ he ni klɔuklɔuhi ha mi, nɛ nyɛ ko ye nga mi lohwe nɛ lohwe awi yelɔ ko tsɔtslɔɔ e mi ɔ lo. Nyɛ sake kɛ fɔ he ha gbe ɔmɛ.

23 “Koo gbɛ lakpa munyu kɛ fĩa. Koo piɛɛ yiwutsotsɛ he kɛ ye lakpa odase kɛ gbe nɔ he guɛ. 2 Koo nyɛɛ nihi fuu a se kɛ pee yayami, nɛ koo piɛɛ nihi fuu a he kɛ ye lakpa odase* kɛ plɛ dami sane hɛ mi kɛ bu si. 3 Ke ohiatsɛ kɛ nɔ ko ná sane ɔ, koo ye sane ɔ ha ohiatsɛ ɔ akɛnɛ e ji ohiatsɛ ɔ he je.

4 “Ke o na o he nyɛlɔ na loo teji nɛ e laa a, mo kpaka lɛ kɛ ya ha lɛ. 5 Ke o na o he nyɛlɔ teji nɛ e tlɔ zugba kɛ e se mi tlomi ɔ, koo be e he nɛ o ho. Moo ye bua lɛ nɛ e wo lohwe ɔ nɔ.

6 “Ke a ngɛ ohiatsɛ nɛ ngɛ nyɛ kpɛti ɔ sane yee ɔ, ko plɛ e sane ɔ hɛ mi kɛ bu si.

7 “Moo yu o he kɛ je munyu nɛ a poɔ kɛ fɔɔ nɔ nɔ ɔ* he kulaa, nɛ koo gbe dalɔ, kɛ nɔ nɛ e yi fɔ, ejakaa i be yiwutsotsɛ nguɔ woe.

8 “Ko he nyɔ mi ní, ejakaa nyɔ mi ní hemi yuɔ nɔ nɛ hyɛɛ nɔ́ saminya po hɛngmɛ, nɛ e ma nyɛ ma ha nɛ dalɔ nɛ e tsake e nya.

9 “Koo wa ma se no yi mi. Nyɛ le bɔ nɛ ma se si himi ngɛ ha, ejakaa nyɛ hu nyɛ ya to nubwɔ ngɛ Egipt zugba a nɔ hyɛ.

10 “Mo du ní, nɛ o bua ngmɔ ní ɔ nya ngɛ o zugba a nɔ jeha ekpa. 11 Se ngɛ jeha kpaagone ɔ mi ɔ, ko du ní ngɛ nɔ. Ha nɛ e fɔ si gu, konɛ ohiatsɛmɛ nɛ a ngɛ nyɛ kpɛti ɔ nɛ a ya kpɛte e mi ní nɛ a ye, konɛ nɔ́ nɛ maa piɛ ɔ, pu mi lohwehi hu nɛ a ye. Bɔ nɛ nyɛɛ pee nyɛ wai ngmɔ ɔmɛ kɛ oliv ngmɔ ɔmɛ ha ji nɛ ɔ nɛ.

12 “Mo tsu ní ligbi ekpa; se ngɛ ligbi kpaagone ɔ nɔ ɔ, ko tsu ní, bɔ nɛ pee nɛ o na kɛ o teji ɔ nɛ a jɔɔ a he, nɛ o mawayo ɔ bi kɛ nubwɔ hu nɛ a jɔɔ a he.

13 “Nyɛɛ hyɛ saminya nɛ nyɛɛ pee níhi tsuo nɛ i de nyɛ ɔ. Nyɛ ko tsɛ mawu kpahi a biɛ; a ko nu a biɛ tete po ngɛ nyɛ nya.

14 “Daa jeha a, nyɛɛ ye gbijlɔ si etɛ ha mi. 15 Nyɛɛ ye Abolo Nɛ Masa Be Mi Gbijlɔ ɔ. Nyɛɛ ye abolo nɛ masa be mi ligbi kpaago ngɛ Abib* nyɔhiɔ ɔ mi kaa bɔ nɛ i fã nyɛ ɔ. Nyɛɛ ye ngɛ be nɛ i to ɔ mi, ejakaa jamɛ a be ɔ nɛ nyɛ je Egipt. Nɔ ko nɔ ko nɛ ko ba ye hɛ mi kɛ e dɛ gu. 16 Jehanɛ ɔ, nyɛɛ ye Nikpami Gbijlɔ* ɔ, nyɛɛ ye ke nyɛ kpa nyɛ ngmɔ ɔmɛ a nɔ kekleekle yiblii ɔ; kɛ Níhi A Nya Buami Gbijlɔ* ɔ hulɔ ngɛ jeha a nyagbe. Nyɛɛ pee enɛ ɔ be mi nɛ nyɛ bua níhi nɛ nyɛ gbo dengme kɛ ná kɛ je nyɛ ngmɔ ɔmɛ a nɔ ɔ nya a. 17 Daa jeha a, nyumuhi nɛ a ngɛ nyɛ kpɛti ɔ tsuo nɛ́ a ba anɔkuale Nyɔmtsɛ Yehowa hɛ mi si etɛ.

18 Koo ngɔ nɔ́ ko nɛ masa ngɛ mi kɛ piɛɛ muɔ nɛ o kɛ maa sã afɔle ha mi ɔ he. Jehanɛ hu ɔ, zɔ nɛ nyɛɛ kɛ sãã afɔle ha mi ngɛ gbijlɔ yemi behi a mi ɔ, je nɛ ko na yi.

19 “Ngɔɔ kekleekle yiblii nɛ hi pe kulaa nɛ o ná kɛ je o ngmɔ ɔ mi ɔ kɛ ba Yehowa, o Mawu ɔ we ɔ.

“Koo ngɔ apletsi nyɛ nyɔ nyu kɛ hoo e bi.

20 “I ngɛ bɔfo ko tsɔe kɛ sɛ o hlami, nɛ́ e bu o he ngɛ blɔ ɔ nɔ, nɛ́ e ngɔ mo kɛ ya he nɛ i dla kɛ to ɔ. 21 Bu lɛ tue, nɛ o pee nɔ́ nɛ e ma de mo ɔ. Ko tsɔ atuã kɛ si lɛ. Ejakaa e kɛ o tɔmi ɔmɛ be mo kee akɛnɛ ye biɛ ngɛ e nɔ* ɔ he je. 22 Se ke o bu e gbi tue nɛ o pee nɔ́ fɛɛ nɔ́ nɛ ma de mo ɔ, i kɛ o he nyɛli ɔmɛ maa to ní, nɛ ma te si kɛ wo ni nɛmɛ nɛ a teɔ si kɛ woɔ mo ɔ. 23 Ejakaa ye bɔfo ɔ maa sɛ o hlami nɛ e maa ngɔ mo kɛ ya he nɛ Amor bi, Hit bi, Periz bi, Kanaan bi, Hiv bi, kɛ Yebus bi ɔmɛ ngɛ ɔ, nɛ ma kpata a hɛ mi. 24 Ko kplã si ha a mawu ɔmɛ, nɛ ko ha nɛ a plɛ o yi mi nɛ o sɔmɔ mɛ, nɛ koo kase a kusumi ɔmɛ. Mohu ɔ, mo kpata a hɛ mi nɛ o ku a wɔ titima amɛ kɛ pue si. 25 Nyɛ sɔmɔ Yehowa, nyɛ Mawu ɔ, nɛ e maa jɔɔ nyɛ niye ní kɛ nyɛ nyu nɔ. Ma je hiɔ kɛ je nyɛ kpɛti. 26 Yo ko mi be sanee ngɛ nyɛ zugba a nɔ, nɛ a be yosa ko hu nae ngɛ nyɛ kpɛti, nɛ ma ha nɛ nyɛ wami se maa kɛ.

27 “Ma ha nɛ ye he gbeye maa nu mɛ loko nyɛ maa su lejɛ ɔ, nɛ ma ha nɛ basabasa maa te si ngɛ mahi tsuo nɛ nyɛɛ kɛ maa kpe ɔ a kpɛti, nɛ ma ha nɛ nyɛ maa ye nyɛ he nyɛli ɔmɛ tsuo a nɔ kunimi, nɛ a maa tu nyɛ nya fo.* 28 Ma ha nɛ a maa ye gbeye* loko nyɛ maa su lejɛ ɔ, nɛ lɔ ɔ ma ha nɛ Hiv bi, Kanaan bi, kɛ Hit bi ɔmɛ maa tu nyɛ nya fo. 29 I be mɛ fiee kɛ je nyɛ hɛ mi ngɛ jeha kake mi, bɔ nɛ pee nɛ zugba a nɛ ko fɔ si gu, nɛ lohwe awi yeli a he ko ba hiɛ kɛ wo nyɛ. 30 Ma fiee mɛ kɛ je nyɛ hɛ mi bɔɔbɔɔbɔɔ kɛ ya si be nɛ nyɛ maa ngɔ zugba a.

31 “Ma ha nɛ nyɛ huzu ɔ maa je Wo Tsu ɔ he kɛ ya si Filisti bi ɔmɛ a wo ɔ he, kɛ je nga kplanaa a nɔ kɛ ya pi Pa a;* ejakaa ma ngɔ zugba a nɔ bi ɔmɛ kɛ wo nyɛ dɛ, nɛ nyɛ maa fiee mɛ kɛ je nyɛ hɛ mi. 32 Nyɛɛ kɛ mɛ aloo a mawu ɔmɛ nɛ ko so. 33 A ko hi nyɛ zugba a nɔ bɔ nɛ pee nɛ a ko ba ha nɛ nyɛɛ pee yayami kɛ si mi. Ke nyɛ sɔmɔ a mawu ɔmɛ ɔ, bɔ fɛɛ bɔ nɛ ji ɔ, e maa pee klama ha nyɛ.”

24 Jehanɛ ɔ, Yehowa de Mose ke: “O kɛ Aaron, kɛ Nadab, kɛ Abihu, kɛ Israel ma nikɔtɔma amɛ a kpɛti nihi 70 nɛ kuɔ yoku ɔ kɛ ba ye ngɔ, nɛ nyɛ kplã si ngɛ se lokoo. 2 Mose nɔ kake pɛ nɛ́ e hɛ lɛ kɛ su imi Yehowa ye he, se ni kpa amɛ nɛ a piɛ ɔ lɛɛ a ko ba, ma a nɛ ko piɛɛ e he kɛ kuɔ yoku ɔ.”

3 Kɛkɛ nɛ Mose ba nɛ e ba de Israel bi ɔmɛ níhi nɛ Yehowa de ɔ tsuo, kɛ e kojomi ɔmɛ tsuo, nɛ ni ɔmɛ tsuo kɛ gbi kake he nɔ ke: “Nɔ́ fɛɛ nɔ́ nɛ Yehowa de ɔ, wa maa pee.” 4 Lɔ ɔ he ɔ, Mose ngma níhi nɛ Yehowa de ɔ tsuo. Kɛkɛ nɛ mɔtu mla a, e te si nɛ e ma afɔle sami la tɛ ngɛ yoku ɔ sisi, nɛ e ma titima 12 ngɛ Israel wɛtso 12 ɔmɛ a nya. 5 Lɔ ɔ se ɔ, e tsɔ Israel nihewi ɔmɛ ekomɛ, nɛ a ya sã sami afɔlehi, nɛ a ngɔ nahi kɛ sã tue mi jɔmi afɔlehi kɛ ha Yehowa. 6 Kɛkɛ nɛ Mose ngɔ muɔ ɔ fã kɛ wo tsesihi a mi, nɛ e ngɔ fã a nɛ piɛ ɔ kɛ fĩa afɔle sami la tɛ ɔ nɔ. 7 Kɛkɛ nɛ e ngɔ somi womi ɔ, nɛ e wo e gbi nɔ kɛ kane kɛ tsɔɔ ni ɔmɛ. Nɛ a de ke: “Nɔ́ fɛɛ nɔ́ nɛ Yehowa de ɔ, wa maa pee, nɛ wa maa bu lɛ tue.” 8 Lɔ ɔ he ɔ, Mose ngɔ muɔ ɔ kɛ fĩa ni ɔmɛ a nɔ nɛ e de ke: “Somi nɛ Yehowa kɛ nyɛ so ngɛ munyu nɛ ɔmɛ a nya a he muɔ ji nɛ ɔ nɛ.”

9 Mose kɛ Aaron, Nadab kɛ Abihu, kɛ Israel ma nikɔtɔmahi 70 ɔmɛ kuɔ kɛ ho, 10 nɛ a na Israel Mawu ɔ. Nɔ́ ko kaa safiro tɛ nɛ a to ngɛ e nane si, nɛ e mi tsɔ heii kaa bɔ nɛ hiɔwe ngɛ ɔ. 11 E* yí Israel ma nikɔtɔmahi nɛ bumi ngɛ a he ɔ awi, nɛ a na anɔkuale Mawu ɔ ngɛ nina mi, nɛ a ye ní nɛ a nu ní.

12 Jehanɛ ɔ, Yehowa de Mose ke: “Moo kuɔ yoku ɔ kɛ ba ye ngɔ nɛ o ba hi lejɛ ɔ. Ma ngɔ tɛ tɛtlɛɛ ɔmɛ nɛ́ ma ngma mlaa a kɛ kita a ngɛ nɔ ɔ kɛ ha mo, konɛ a kɛ tsɔɔ ma a ní.” 13 Lɔ ɔ he ɔ, Mose kɛ e tsɔlɔ Yoshua pue blɔ, nɛ Mose kuɔ anɔkuale Mawu ɔ yoku ɔ. 14 Se e de ma nikɔtɔma amɛ ke: “Nyɛɛ mlɛ wɔ ngɛ hiɛ ɔ kɛ yaa si be nɛ wa maa kpale kɛ ba. Aaron kɛ Hur piɛɛ nyɛ he. Nɔ fɛɛ nɔ nɛ ngɛ sane ko nɛ e suɔ kaa a ye ha lɛ ɔ ma nyɛ maa ya a ngɔ.” 15 Kɛkɛ nɛ Mose kuɔ yoku ɔ be mi nɛ bɔku ɔ ha yoku ɔ nɔ ɔ.

16 Yehowa hɛ mi nyami ɔ hi Sinai Yoku ɔ nɔ, nɛ bɔku ɔ ha nɔ ligbi ekpa. Ngɛ ligbi kpaagone ɔ nɔ ɔ, e tsɛ Mose kɛ je bɔku ɔ mi. 17 Ngɛ Israel bi ɔmɛ nɛ a ngɛ hyɛe ɔ a hɛ mi ɔ, Yehowa hɛ mi nyami ɔ ngɛ kaa la nɛ ngɛ tsoe gegeege ngɛ yoku ɔ yi mi. 18 Kɛkɛ nɛ Mose sɛ bɔku ɔ mi nɛ e kuɔ kɛ ya yoku ɔ yi mi. Nɛ Mose hi yoku ɔ nɔ nyɔ kɛ pia ligbi 40.

25 Kɛkɛ nɛ Yehowa de Mose ke: 2 “De Israel bi ɔmɛ nɛ a ke mi ní; nɔ fɛɛ nɔ nɛ e maa ta e tsui he kaa e maa ke mi nɔ́ ko ɔ, ke e kɛ ba a, nyɛ sɔle. 3 Níhi nɛ o ngɔ ngɛ a dɛ ji nɛ ɔmɛ nɛ: sika tsu, sika hiɔ, akɔblee, 4 kpã bluu, lohwe he bwɔmi nɛ hɛɛ alamua tu su,* bo tsutsu, klala kpakpa, apletsi he bwɔmi, 5 agbosu he womihi nɛ a wo lɛ tsopa tsutsu, pa mi gbe he womihi, akasia tso, 6 nu nɛ a kɛ maa wo kane ɔmɛ a mi, balsam nɛ a kɛ maa pee nɔ pɔmi nu, kɛ tsopa kɛ e he via, 7 kɛ oniks* tɛhi kɛ tɛ kpahi nɛ a maa ma ngɛ efɔd ɔ kɛ gugue nɔ hami nɔ́ ɔ nɔ. 8 Á pee jami he kɛ ha mi, nɛ ma hi a kpɛti. 9 Moo pee bo tsu ɔ kɛ e mi ní ɔmɛ tsuo, moo hyɛ e henɔ nɛ i kɛ ngɛ mo tsɔɔe ɔ nɔ, nɛ o pee lɛ jã pɛpɛɛpɛ.

10 “Á ngɔ akasia tso kɛ pee daka, nɛ e kami nɛ pee kɔni fã* enyɔ kɛ fã, nɛ e blimi nɛ pee kɔni fã kake kɛ fã, nɛ e hiɔwe yami nɛ pee kɔni fã kake kɛ fã. 11 Lɔ ɔ se ɔ, ngɔɔ sika tsu ngmingmiingmi kɛ ha he. O kɛ ha e mi kɛ e he tsuo, nɛ́ o ngɔ sika tsu kɛ wo zã kɛ bɔle e nya a tsuo kɛ kpe. 12 Nɛ́ o ngɔ sika tsu kɛ pee ga eywiɛ kɛ wo e nane eywiɛ ɔmɛ a yi nɔ, enyɔ nɛ hi kasa hiɛ nɛ enyɔ hu nɛ hi kasa hiɛ. 13 Moo hlɔ akasia tsohi nɛ o ngɔ sika tsu kɛ ha a he. 14 Ngɔɔ tso ɔmɛ kɛ hɔɔ ga amɛ nɛ a ngɛ Daka a kasa he ɔmɛ a mi, konɛ a kɛ hɛɛ Daka a. 15 Tso ɔmɛ nɛ a hi ga amɛ nɛ a ngɛ Daka a he ɔ mi; a ko je tso ɔmɛ ngɛ ga amɛ a mi. 16 Ngɔɔ Odase Yemi Nɔ́ ɔ nɛ ma kɛ ha mo ɔ kɛ wo Daka a mi.

17 “Ngɔɔ sika tsu ngmingmiingmi kɛ pee e nya nɔ́ ɔ, e kami nɛ pee kɔni fã enyɔ kɛ fã, nɛ e blimi nɛ pee kɔni fã kake kɛ fã. 18 Moo ngɔ sika tsu kɛ pee kerub enyɔ; nɛ o ngɔ hamle kɛ kó sika tsu kɛ pee kerubhi kɛ ma nya nɔ́ ɔ nɔ hiɛ kɛ hiɛ. 19 Moo pee kerub enyɔ ɔmɛ kɛ ma nya nɔ́ ɔ nɔ hiɛ kɛ hiɛ; kerub kake nɛ e hi nya nɔ́ ɔ nɔ hiɛ, nɛ kake hu nɛ e hi hiɛ. 20 Kerub ɔmɛ nɛ a gbɛ a pɛli enyɔ ɔmɛ a mi kɛ ya hiɔwe, nɛ́ a pɛli ɔmɛ nɛ ha nya nɔ́ ɔ nɔ, nɛ́ a hɛ mi nɛ tsɔɔ a sibi. Kerub ɔmɛ nɛ a ma a yi si kɛ hi nya nɔ́ ɔ nɔ hyɛe. 21 Moo ngɔ nya nɔ́ ɔ kɛ bu Daka a nya, nɛ́ o ngɔ Odase Yemi Nɔ́ ɔ nɛ ma kɛ ha mo ɔ kɛ wo Daka a mi. 22 Ma je ye he kpo kɛ tsɔɔ mo ngɛ lejɛ ɔ, nɛ i kɛ mo maa tu munyu kɛ je daka a nya nɔ́ ɔ yi mi. Ma tu munyu kɛ je kerub enyɔ ɔmɛ nɛ a ngɛ Odase daka a nɔ ɔ a kpɛti, nɛ ma tsɔɔ mo níhi tsuo nɛ ma fã mo kaa o de Israel bi ɔmɛ ɔ.

23 “Jehanɛ hu ɔ, ngɔɔ akasia tso kɛ pee okplɔɔ, e kami nɛ e pee kɔni fã enyɔ, nɛ e blimi nɛ e pee kɔni fã kake, nɛ e hiɔwe yami nɛ e pee kɔni fã kake kɛ fã. 24 Ngɔɔ sika tsu ngmingmiingmi kɛ ha he, nɛ o ngɔ sika tsu kɛ wo zã kɛ bɔle e nya a kɛ kpe. 25 Moo pee kla nɛ́ e blimi ji dɛ mi blimi kake* kɛ wo okplɔɔ ɔ he kɛ kpe, nɛ o ngɔ sika tsu kɛ wo zã kɛ bɔle kla a nya kɛ kpe. 26 Ngɔɔ sika tsu kɛ pee ga eywiɛ kɛ wo okplɔɔ ɔ kɔ̃ nya eywiɛ ɔmɛ ngɛ he nɛ nane eywiɛ ɔmɛ ngɛ ɔ. 27 Ga amɛ nɛ a hi kla a kasa nya haa, konɛ a ngɔ tsohi nɛ a kɛ maa hɛɛ okplɔɔ ɔ kɛ hɔɔ a mi. 28 Moo hlɔ akasia tsohi nɛ o ngɔ sika tsu kɛ ha a he konɛ a kɛ hɛɛ okplɔɔ ɔ.

29 “Moo pee okplɔɔ ɔ he kãhi, kɛ e kplu wawi kɛ nguahi, kɛ e tsesihi nɛ a kɛ ma plɛ da afɔlehi. Ngɔɔ sika tsu ngmingmiingmi kɛ pee. 30 Ngɔɔ hɛ mi mami abolo ɔ kɛ ma okplɔɔ ɔ nɔ ngɛ ye hɛ mi daa.

31 “Ngɔɔ sika tsu ngmingmiingmi kɛ pee kane tso. Moo ngɔ hamle kɛ kó sika tsu kɛ pee kane tso ɔ. E sisi ɔ, e kpɛti tso ɔ, e kɔni ɔmɛ, e kplu ɔmɛ, e kpɔ ɔmɛ, kɛ e mɔmɔ ɔmɛ nɛ a tsa, konɛ e pee nɔ́ mluku kake. 32 Kane tso ɔ nɛ hi kɔni ekpa; kɔni etɛ nɛ hi kane tso ɔ hiɛ, nɛ etɛ hu nɛ hi hiɛ. 33 Moo pee kplu etɛ nɛ a ngɛ kaa almond mɔmɔhi ngɛ kɔni etɛ ɔmɛ a he ngɛ kane tso ɔ kasa fã kake, o pee kpɔhi kɛ mɔmɔhi hu kɛ wo he, nɛ́ ke kpɔ kake ba a kɛkɛ mɔmɔ kake hu ba; nɛ́ kplu etɛ nɛ a ngɛ kaa almond mɔmɔhi nɛ hi kɔni etɛ ɔmɛ a he ngɛ kane tso ɔ kasa fã kake ɔ hulɔ, o pee kpɔhi kɛ mɔmɔhi hu kɛ wo he, nɛ́ ke kpɔ kake ba a kɛkɛ mɔmɔ kake hu ba. Bɔ nɛ kɔni ekpa amɛ ma plɛ kɛ gba ngɛ kane tso ɔ kpɛti ji nɛ ɔ nɛ. 34 Kplu eywiɛ nɛ a ngɛ kaa almond mɔmɔhi nɛ hi kane tso ɔ kpɛti, nɛ kpɔhi kɛ mɔmɔhi hu nɛ a hi he, ke kpɔ kake ba a kɛkɛ mɔmɔ kake hu ba. 35 Kpɔ nɛ hi kekle kɔni enyɔ ɔmɛ nɛ a ngɛ kpɛti tso ɔ he ɔ sisi, nɛ kpɔ nɛ hi kɔni enyɔ ɔmɛ nɛ a nyɛɛ se ɔ sisi, nɛ kpɔ nɛ hi kɔni enyɔ nɛ nyɛɛ se ɔ hu sisi. Ha nɛ kpɔhi nɛ a hi kɔni ekpa amɛ eko fɛɛ eko sisi ngɛ kpɛti tso ɔ he. 36 Á ngɔ hamle kɛ kó sika tsu ngmingmiingmi kɛ pee kane tso mluku ɔ, e kpɔ ɔmɛ kɛ e kɔni ɔmɛ konɛ e pee nɔ́ mluku kake. 37 Moo pee kane kpaago ngɛ kane tso ɔ he, konɛ ke a su kane ɔmɛ ɔ, a kpɛ ngɛ kane tso ɔ hɛ mi blɔ. 38 Ngɔɔ sika tsu ngmingmiingmi kɛ pee abɛɛlehi kɛ la jemi níhi. 39 Ngɔɔ sika tsu ngmingmiingmi talɛnt* kake kɛ pee kane tso ɔ kɛ ní nɛ ɔmɛ tsuo. 40 Moo hyɛ nɛ o pee ní nɛ ɔmɛ a henɔ kaa bɔ nɛ a je kɛ tsɔɔ mo ngɛ yoku ɔ nɔ ɔ.

26 “Ngɔɔ klala kpakpa nɛ a lo, kpã bluu, lohwe he bwɔmi nɛ hɛɛ alamua tu su,* kɛ bo tsutsu kɛ pee bo tsu ɔ he bo nyɔngma. Moo pee kerub okadihi kɛ wo mi. 2 Bo tsu ɔ he bo ɔ kami nɛ pee kɔni fã* 28, nɛ e blimi nɛ pee kɔni fã 4. Bo tsu ɔ he bo ɔmɛ tsuo a kami kɛ a blimi nɛ sɔ. 3 Moo kpɛ bo tsu ɔ he bo ɔ enuɔ kɛ tsa a sibi a nya nɛ e pee bo kake, nɛ́ o kpɛ bo tsu ɔ he bo enuɔ nɛ piɛ ɔ kɛ tsa a sibi a nya, nɛ lɔ ɔ hu nɛ e pee bo kake. 4 Moo ngɔ kpã bluu kɛ pee gahi kɛ wo bo tsu ɔ he bohi nɛ a tsa a kake nya, nɛ o pee jã nɔuu ngɛ bohi nɛ a tsa a kake ɔ nɛ piɛ ɔ hu nya, ngɛ he nɛ a maa kpe a nya ngɛ ɔ. 5 Moo pee ga 50 kɛ wo bo tsu ɔ he bo ɔ kake nya, nɛ o pee ga 50 kɛ wo bo tsu ɔ he bo kaketsɛ ɔ hu nya konɛ a hɛ mi nɛ kpee a sibi. 6 Ngɔɔ sika tsu kɛ pee gbowe 50, nɛ o ngɔ gbowe ɔmɛ kɛ la gahi nɛ a ngɛ bo tsu ɔ he bo ɔmɛ a nya a mi, konɛ bo tsu ɔ nɛ e pee nɔ́ mluku kake.

7 “Jehanɛ ɔ, ngɔɔ apletsi he bwɔmi kɛ pee bo tsu ɔ he bo nɛ a kɛ ma bu bo tsu ɔ nɔ. Moo pee bo tsu ɔ he bo 11. 8 Ha nɛ bo tsu ɔ he bo ɔ eko fɛɛ eko kami nɛ pee kɔni fã 30, nɛ e blimi nɛ pee kɔni fã 4. Bo tsu ɔ he bo 11 ɔmɛ tsuo a kami kɛ a blimi nɛ sɔ. 9 Ngɔɔ bo tsu ɔ he bo ɔ enuɔ kɛ tsa a sibi a nya, nɛ́ o ngɔ ekpa nɛ piɛ ɔ hu kɛ tsa a sibi a nya, nɛ o dɔ ekpane ɔ mi kɛ fɔ nɔ ngɛ bo tsu ɔ nya. 10 Moo pee ga 50 ngɛ bo tsu ɔ he bo wuyaa a kake nyagbe he ɔ nya, nɛ o pee ga 50 ngɛ bo tsu ɔ he bo wuyaa kaketsɛ ɔ hu nya; he nɛ a ma tsa ngɛ ɔ. 11 Moo pee akɔblee gbowe 50, nɛ o ngɔ gbowe ɔmɛ kɛ la ga amɛ a mi kɛ tsa bo enyɔ ɔmɛ, nɛ e pee nɔ́ mluku kake. 12 Bo tsu ɔ he bo ɔmɛ nɛ a piɛ ɔ nɛ a kpla si. Bo tsu ɔ he bo ɔ nɛ piɛ ngɛ se ɔ fã nɛ́ e kpla si ngɛ bo tsu ɔ se. 13 Bo tsu ɔ he bo nɛ piɛ nɛ ma kpla si ngɛ bo tsu ɔ he ɔ kami nɛ pee kɔni fã kake ngɛ hiɛ kɛ hiɛ, konɛ e ha he.

14 “Moo ngɔ agbosu he womihi nɛ a wo lɛ tsopa tsutsu kɛ pee bo tsu ɔ nɔ hami nɔ́, nɛ́ o ngɔ pa mi gbe he womihi kɛ pee nɔ hami nɔ́ nɛ o kɛ ha lɔ ɔ hu nɔ.

15 “Ngɔɔ akasia tso nɛ e da tlɔmɔɔ kɛ pee bo tsu ɔ si mami tsohi. 16 Si mami tso ɔmɛ eko fɛɛ eko kami nɛ e pee kɔni fã nyɔngma, nɛ e blimi nɛ e pee kɔni fã kake kɛ fã. 17 Si mami tso ɔmɛ eko fɛɛ eko nɛ e hi kpɔ* enyɔ; kpɔ ɔmɛ nɛ a hi a sibi a hanɔ. Moo pee bo tsu ɔ he si mami tso ɔmɛ tsuo jã. 18 Moo pee bo tsu ɔ he si mami tso 20 ngɛ bo tsu ɔ kasa fã nɛ tsɔɔ woyi je ɔ.

19 “Moo pee sika hiɔ nɔ dami nɔ́ 40 kɛ wo si mami tso 20 ɔmɛ a sisi: nɔ dami nɔ́ enyɔ nɛ hi si mami tso ɔ kake sisi kɛ ha e sisi kpɔ enyɔ ɔmɛ. Moo pee nɔ dami nɔ́ enyɔ kɛ wo si mami tsohi nɛ a nyɛɛ se ɔ eko fɛɛ eko sisi kɛ ha a sisi kpɔ enyɔ ɔmɛ. 20 Moo pee si mami tso 20 kɛ ha bo tsu ɔ kasa fã nɛ tsɔɔ yiti je ɔ, 21 nɛ o ngɔ sika hiɔ kɛ pee a nɔ dami nɔ́ 40, nɔ dami nɔ́ enyɔ nɛ hi si mami tso kake sisi. Moo pee nɔ dami nɔ́ enyɔ kɛ wo si mami tso ɔmɛ nɛ piɛ ɔ eko fɛɛ eko sisi. 22 Bo tsu ɔ se he nɛ tsɔɔ pusinɔ he je ɔ lɛɛ, moo pee si mami tso ekpa ngɛ lejɛ ɔ. 23 Moo pee si mami tso enyɔ nɛ a kɛ maa pee kɔ̃ nya tsohi ngɛ bo tsu ɔ se kɔ̃ nya enyɔ ɔmɛ. 24 Mo ha nɛ á bɔ he enyɔ kɛ je sisi kɛ ya hiɔwe, nɛ́ a ya pi kekle ga a. Moo pee tso enyɔ ɔmɛ tsuo jã. Lɔ ɔmɛ lɛ a maa pee kɔ̃ nya tso enyɔ ɔmɛ ɔ nɛ. 25 Moo pee si mami tso kpaanyɔ kɛ a he sika hiɔ nɔ dami nɔ́ 16, nɛ o pee nɔ dami nɔ́ enyɔ kɛ wo si mami tso ɔ kake sisi. Moo pee nɔ dami nɔ́ enyɔ ngɛ si mami tsohi nɛ a nyɛɛ se ɔ eko fɛɛ eko sisi.

26 “Moo ngɔ akasia tso kɛ pee tso tlaatlaa, nɛ o ngɔ enuɔ kɛ bia* si mami tso ɔmɛ a mi ngɛ bo tsu ɔ kasa kake, 27 nɛ tso tlaatlaa enuɔ nɛ bia si mami tso ɔmɛ a mi ngɛ bo tsu ɔ kasa kake ɔ hulɔ, nɛ tso tlaatlaa enuɔ nɛ bia si mami tso ɔmɛ a mi ngɛ bo tsu ɔ he nɛ tsɔɔ pusinɔ he je ngɛ bo tsu ɔ se ɔ. 28 Tso tlalaa nɛ bia si mami tso ɔmɛ a mi ngɛ kpɛti ɔ, ha nɛ e je kɔ̃ nya kake kɛ ya si kɔ̃ nya kake.

29 “Ngɔɔ sika tsu kɛ ha si mami tso ɔmɛ a he, nɛ o ngɔ sika tsu kɛ pee gahi nɛ a kɛ tso tlaatlaa amɛ maa hɔɔ a mi, nɛ́ o ngɔ sika tsu kɛ ha tso tlaatlaa amɛ a he. 30 Moo pee bo tsu ɔ kaa bɔ nɛ e henɔ nɛ a kɛ tsɔɔ mo ngɛ yoku ɔ nɔ ɔ ngɛ ɔ.

31 “Ngɔɔ kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo kɛ pee tsu mi pomi bo. Moo pee kerub okadihi kɛ wo mi. 32 Ngɔɔ kɛ kpla akasia titima eywiɛ nɛ a kɛ sika tsu ha a he ɔ he. Ngɔɔ sika tsu kɛ pee a gbowe ɔmɛ. Nɛ o ngɔ a titima amɛ kɛ ma sika hiɔ nɔ dami nɔ́ eywiɛ ɔmɛ a nɔ. 33 Ngɔɔ tsu mi pomi bo ɔ kɛ kpla gbowe ɔmɛ a sisi, nɛ o ngɔ Odase daka a kɛ ma tsu ɔ mi blɔ ngɛ tsu mi pomi bo ɔ se. Tsu mi pomi bo ɔ maa po He Klɔuklɔu ɔ kɛ He Klɔuklɔu Pe Kulaa a a kpɛti. 34 Ngɔɔ nya nɔ́ ɔ kɛ bu Odase daka a nya ngɛ He Klɔuklɔu Pe Kulaa a.

35 “Ngɔɔ okplɔɔ ɔ kɛ ma tsu mi pomi bo ɔ hɛ mi, nɛ o ngɔ kane tso ɔ kɛ ma okplɔɔ ɔ hɛ mi ngɛ bo tsu ɔ woyi je; nɛ okplɔɔ ɔ nɛ hi yiti je. 36 Ngɔɔ kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo, nɛ́ o lo mɛ kɛ bla kɛ pee patesia* ngɛ bo tsu ɔ nya. 37 Ngɔɔ akasia tso enuɔ kɛ pee patesia a* titimahi, nɛ o ngɔ sika tsu kɛ ha a he. Ngɔɔ sika tsu kɛ pee a gbowe ɔmɛ, nɛ o ngɔ akɔblee kɛ pee a nɔ dami nɔ́ enuɔ ɔmɛ.

27 “Ngɔɔ akasia tso kɛ pee afɔle sami la tɛ; e kami nɛ e pee kɔni fã* enuɔ, nɛ e blimi hu nɛ e pee kɔni fã enuɔ. Afɔle sami la tɛ ɔ nɛ e hi kɔ̃ nya eywiɛ nɛ a sɔ, nɛ e hiɔwe yami nɛ e pee kɔni fã etɛ. 2 Moo pee kolihi ngɛ e kɔ̃ nya eywiɛ ɔmɛ a nɔ; moo pee koli ɔmɛ kɛ afɔle sami la tɛ ɔ tsuo kɛ bla, nɛ o ngɔ akɔblee kɛ ha afɔle sami la tɛ ɔ he. 3 Moo pee gogahi nɛ a kɛ maa muɔɔ la zu* ngɛ afɔle sami la tɛ ɔ mi, nɛ́ o pee sofihi, tsesihi, fɔɔkihi, kɛ la jemi níhi; ngɔɔ akɔblee kɛ pee ní nɛ ɔmɛ tsuo. 4 Ngɔɔ akɔblee kɛ pee lo tsukɔmi dade kɛ wo afɔle sami la tɛ ɔ mi, nɛ o ngɔ akɔblee kɛ pee ga eywiɛ ngɛ nɔ ngɛ e kɔ̃ nya eywiɛ ɔmɛ. 5 Ngɔɔ lo tsukɔmi dade ɔ kɛ wo afɔle sami la tɛ ɔ nya kla a sisi, nɛ́ e kple kɛ sɛ mi kɛ ya su afɔle sami la tɛ ɔ kpɛti je. 6 Moo hlɔ akasia tsohi kɛ ha afɔle sami la tɛ ɔ, nɛ o ngɔ akɔblee kɛ ha a he. 7 A kɛ tso ɔmɛ maa hɔɔ ga amɛ a mi ngɛ afɔle sami la tɛ ɔ hiɛ kɛ hiɛ, konɛ a kɛ wo afɔle sami la tɛ ɔ nɔ. 8 Moo pee afɔle sami la tɛ ɔ nɛ blɔ nɛ hi mi kaa daka. Moo pee lɛ kaa bɔ nɛ Mawu kɛ tsɔɔ mo ngɛ yoku ɔ nɔ ɔ.

9 “Moo po yale kɛ wo bo tsu ɔ he. Bo nɛ a kɛ klala kpakpa lo nɛ e ma kpla si ngɛ yale ɔ fã nɛ tsɔɔ woyi je ɔ, ha nɛ e kami nɛ pee kɔni fã 100. 10 Yale ɔ nɛ hi titima 20 kɛ akɔblee nɔ dami nɔ́ 20. Ngɔɔ sika hiɔ kɛ pee titima amɛ a gbowe ɔmɛ kɛ a mi lami ní ɔmɛ.* 11 Bo nɛ e ma kpla si ngɛ yiti je ɔ hu kami nɛ pee kɔni fã 100. Moo pee e titima 20 nɛ o ngɔ akɔblee kɛ pee a nɔ dami nɔ́ 20, nɛ o ngɔ sika hiɔ kɛ pee titima amɛ a gbowe ɔmɛ kɛ a mi lami ní ɔmɛ.* 12 Bo nɛ e kami ji kɔni fã 50 nɛ́ e kpla si ngɛ yale ɔ pusinɔ he je, kɛ e he titima nyɔngma kɛ nɔ dami nɔ́ nyɔngma. 13 Yale ɔ fã nɛ tsɔɔ puje he blɔ ɔ blimi nɛ e pee kɔni fã 50. 14 Bo nɛ e ma kpla si ngɛ yale ɔ kasa fa kake ɔ, e kami nɛ pee kɔni fã 15, kɛ e he titima etɛ kɛ nɔ dami nɔ́ etɛ. 15 Ngɛ yale ɔ kasa fa kake ɔ hu, bo nɛ e kami ji kɔni fã 15 nɛ é kpla si ngɛ lejɛ ɔ, kɛ e he titima etɛ kɛ nɔ dami nɔ́ etɛ.

16 “Ngɔɔ kpã bluu, lohwe he bwɔmi nɛ hɛɛ alamua tu su,* bo tsutsu, kɛ klala kpakpa nɛ a lo, nɛ́ o lo mɛ kɛ bla kɛ pee yale ɔ nya patesia* nɛ e kami ji kɔni fã 20 kɛ wo yale ɔ nya blɔ, nɛ́ o pee titima eywiɛ kɛ a nɔ dami nɔ́ eywiɛ. 17 Ngɔɔ sika hiɔ kɛ pee nɔ́ mi lami níhi kɛ gbowehi kɛ wo titimahi tsuo nɛ a bɔle yale ɔ he ɔ he; se a nɔ dami ní ɔmɛ lɛɛ ngɔɔ akɔblee kɛ pee. 18 Yale ɔ kami nɛ e pee kɔni fã 100, e blimi nɛ e pee kɔni fã 50, nɛ́ e hiɔwe yami nɛ e pee kɔni fã 5. Moo ngɔ klala kpakpa nɛ a lo kɛ pee, nɛ a nɔ dami ní ɔmɛ lɛɛ, ngɔɔ akɔblee kɛ pee. 19 Ngɔɔ akɔblee kɛ pee bo tsu ɔ he plɛɛkohi kɛ yale ɔ he plɛɛkohi tsuo, kɛ níhi tsuo nɛ a kɛ ma sɔmɔ ngɛ bo tsu ɔ mi ɔ.

20 “Mo fã Israel bi ɔmɛ nɛ a ba ha mo oliv nu kpakpa nɛ e mi tsɔ ngleinglei nɛ a kɛ maa wo kane ɔmɛ a mi nɛ a su, bɔ nɛ pee nɛ kane ɔmɛ nɛ a hi tsoe be fɛɛ be. 21 Aaron kɛ e bimɛ ɔmɛ nɛ a to blɔ nya kɛ hyɛ nɛ kanehi nɛ a ngɛ kpe he bo tsu ɔ mi, ngɛ tsu mi pomi bo ɔ hɛ mi ngɛ Odase daka a kasa nya a nɛ a hi tsoe ngɛ Yehowa hɛ mi kɛ́ je gbɔkuɛ kɛ ya si mɔtu. E ji mlaa nɛ ngɛ kɛ yaa neneene nɛ Israel bi ɔmɛ maa ye nɔ a yi nɔhi tsuo.

28 “Moo hla o nyɛminyumu Aaron kɛ e binyumu ɔmɛ ngɛ Israel bi ɔmɛ a kpɛti, nɛ́ Aaron nɛ sɔmɔ mi kaa osɔfo; Aaron kɛ e bimɛ nɛ ji Nadab, Abihu, Eleazar, kɛ Itamar. 2 Moo kpɛ tadehi nɛ a ngɛ klɔuklɔu ha o nyɛminyumu Aaron, konɛ e hɛ mi nɛ ba nyami nɛ e he nɛ hi fɛu. 3 O kɛ ni nɛmɛ nɛ a le nguɛ nya ní tsumi saminya a tsuo,* ni nɛmɛ nɛ i kɛ ye mumi nɛ haa nɔ juɛmi ɔ wo a mi ɔ nɛ tu munyu. Mɛ lɛ a maa kpɛ Aaron tadehi nɛ́ ma ha nɛ e pee klɔuklɔu ɔ ha lɛ, konɛ e sɔmɔ mi kaa osɔfo.

4 “Tadehi nɛ a maa kpɛ ɔ ji nɛ ɔmɛ nɛ: gugue nɔ hami nɔ́, efɔd, tade klɔii nɛ kɔni be he, tade tsɛkitsɛki klɔii, yi fimi nɔ́, kɛ mlɛ mi fimi nɔ́. Á kpɛ ní klɔuklɔu nɛ ɔmɛ kɛ ha o nyɛminyumu Aaron kɛ e binyumu ɔmɛ, konɛ Aaron nɛ sɔmɔ mi kaa osɔfo. 5 Nihi nɛ a le nguɛ nya ní tsumi saminya a nɛ́ a ngɔ sika tsu, kpã bluu, lohwe he bwɔmi nɛ hɛɛ alamua tu su,* bo tsutsu, kɛ klala kpakpa kɛ kpɛ tade ɔmɛ.

6 “Á ngɔ sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo kɛ pee efɔd ɔ, nɛ́ a lo níhi kɛ wo mi. 7 Á pee bo tsɔwi enyɔ kɛ fɔ e konɔ hiɛ kɛ hiɛ nɛ a kɛ kpe efɔd ɔ nya enyɔ ɔmɛ. 8 Mlɛ mi fimi nɔ́ nɛ a lo,* nɛ a kɛ maa fi efɔd ɔ nɔ konɛ e muɛ* lɛ bɔ nɛ sa a hu, á ngɔ ní nɛ ɔmɛ nɔuu kɛ pee: sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo.

9 “Ngɔɔ oniks* tɛ enyɔ nɛ o kpɛ́ Israel binyumu ɔmɛ a biɛhi ngɛ a nɔ, 10 biɛ ekpa nɛ hi tɛ kake nɔ, nɛ biɛ ekpa nɛ piɛ ɔ nɛ hi tɛ kake ɔ hu nɔ ngɛ a fɔmi nya. 11 Ha nɛ a kpɛ́ Israel binyumu ɔmɛ a biɛhi ngɛ tɛ enyɔ ɔmɛ a nɔ kaa bɔ nɛ a kpɛ́ɔ nɔ́ ngɛ nɔ́ nya sɔumi nɔ́ nɔ ɔ. Lɔ ɔ se ɔ, ó sile sika tsu kɛ bɔle tɛ ɔmɛ. 12 Moo ma tɛ enyɔ ɔmɛ ngɛ bo tsɔwi ɔmɛ nɛ a ngɛ efɔd ɔ konɔ ɔ nɔ nɛ a pee kaimi tɛhi kɛ ha Israel bi ɔmɛ. Biɛ ɔmɛ maa hi Aaron konɔ hiɛ kɛ hiɛ ngɛ Yehowa hɛ mi kaa kaimi nɔ́. 13 Ngɔɔ sika tsu kɛ bɔle mɛ 14 nɛ́ o ngɔ kɔsɔkɔsɔ kpã enyɔ nɛ a kɛ sika tsu ngmingmiingmi lɛ tslɔ kɛ tsa nɔ́ tɛtlɛɛ ɔmɛ.

15 “Ha nɛ nɔ nɛ e loɔ ní kɛ woɔ bo mi nɛ e pee kojomi gugue nɔ hami nɔ́ ɔ. Á pee lɛ kaa efɔd ɔ. Á ngɔ sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo kɛ pee. 16 Ke a ku mi enyɔ ɔ, e kami kɛ e blimi nɛ sɔ, e kami nɛ pee nine mi blimi kake,* nɛ e blimi hu nɛ pee nine mi blimi kake. 17 Moo to tɛhi ngɛ nɔ; tɛ ɔmɛ nɛ a hi zã eywiɛ mi. Kekle zã a mi tɛ ɔmɛ ji rubi, topaz, kɛ emerald. 18 Zã enyɔne ɔ mi tɛ ɔmɛ ji tɛkuɔis, safiro, kɛ yaspi. 19 Zã etɛne ɔ mi tɛ ɔmɛ ji leshem tɛ,* agate, kɛ ametisto. 20 Zã eywiɛne ɔ mi tɛ ɔmɛ ji krisolito, oniks,* kɛ yade. Moo ngɔ sika tsu kɛ bɔle eko fɛɛ eko he. 21 Tɛ ɔmɛ kɛ Israel binyumuhi 12 ɔmɛ a biɛ ɔmɛ a hiɛmi nɛ sɔ. Mo kpɛ́ a biɛ ɔmɛ kakaaka ngɛ tɛ ɔmɛ a nɔ kaa bɔ nɛ a kpɛ́ɔ nɔ́ ngɛ nɔ́ nya sɔumi nɔ́ nɔ ɔ. Biɛ ɔmɛ eko fɛɛ eko nɛ da si kɛ ha wɛtso 12 ɔmɛ a kpɛti kake.

22 “Ngɔɔ sika tsu ngmingmiingmi kɛ pee kɔsɔkɔsɔ nɛ a tslɔ kaa kpã kɛ wo gugue nɔ hami nɔ́ ɔ nya tsuo kɛ kpe. 23 Ngɔɔ sika tsu kɛ pee gugue nɔ hami nɔ́ ɔ he ga enyɔ, nɛ o ngɔ ga enyɔ ɔmɛ kɛ wo gugue nɔ hami nɔ́ ɔ yi nɔ kɔ̃ nya enyɔ ɔmɛ a mi. 24 Ngɔɔ sika tsu kpã enyɔ ɔmɛ kɛ hɔɔ ga enyɔ ɔmɛ nɛ a ngɛ gugue nɔ hami nɔ́ ɔ kɔ̃ nya amɛ a mi. 25 Ngɔɔ kpã enyɔ ɔmɛ a nya enyɔ ɔmɛ kɛ hɔ nɔ́ tɛtlɛɛ enyɔ ɔmɛ a nya, nɛ a kɛ mɛtɛ bo tsɔwi ɔ nɛ ngɛ efɔd ɔ konɔ ɔ nɔ kɛ ma e hɛ mi je. 26 Ngɔɔ sika tsu kɛ pee ga enyɔ kɛ wo gugue nɔ hami nɔ́ ɔ sisi kɔ̃ nya enyɔ ɔmɛ ngɛ e mi blɔ, nɛ a hɛ mi nɛ tsɔɔ efɔd ɔ. 27 Moo ngɔ sika tsu kɛ kpale pee ga enyɔ ngɛ efɔd ɔ hɛ mi, ngɛ mlɛ mi fimi nɔ́* nɛ a lo ɔ yi nɔ bɔɔ, ngɛ he nɛ e kɛ efɔd ɔ tsa ngɛ ɔ. 28 Ngɔɔ kpã bluu kɛ wo gugue nɔ hami nɔ́ ɔ nya ga amɛ a mi, nɛ o kɛ muɔ efɔd ɔ nya ga a, nɛ e nu gugue nɔ hami nɔ́ ɔ kɛ da si ngɛ efɔd ɔ nɔ ngɛ mlɛ mi fimi nɔ́* nɛ a lo ɔ yi nɔ.

29 “Ke Aaron ma He Klɔuklɔu ɔ, e kpla Israel binyumu ɔmɛ a biɛhi nɛ ngɛ kojomi gugue nɔ hami nɔ́ ɔ nɔ ɔ kaa kaimi nɔ́ ngɛ Yehowa hɛ mi daa. 30 Ngɔɔ Yurim ɔ kɛ Tumim* ɔ kɛ wo kojomi gugue nɔ hami nɔ́ ɔ mi, nɛ́ ke Aaron ma Yehowa hɛ mi ɔ, a hi e gugue* nɔ. Aaron nɛ e kpla nɔ́ nɛ a maa da nɔ kɛ kojo Israel bi ɔmɛ ɔ ngɛ e gugue* nɔ ngɛ Yehowa hɛ mi daa.

31 “Ngɔɔ kpã bluu ngmingmiingmi kɛ pee efɔd ɔ sisi tade klɔii nɛ kɔni be he ɔ. 32 Mo je kuɛ mi puɔ ngɛ e kpɛti. Ha nɛ bo lolɔ nɛ e lo e kuɛ mi ɔ kɛ kpe. E kuɛ mi ɔ nɛ e hi kaa dade tade kuɛ mi bɔ nɛ pee nɛ e ko gba. 33 Ngɔɔ kpã bluu, lohwe he bwɔmi nɛ hɛɛ alamua tu su, kɛ bo tsutsu kɛ pee pomegranet,* nɛ o ngɔ sika tsu kɛ pee ngmlɛhi kɛ wo e nya fiami ɔ nya tsuo kɛ kpe. Sika tsu ngmlɛhi nɛ a hi pomegranet ɔmɛ a kpɛ. 34 Ha nɛ sika tsu ngmlɛ ɔmɛ kɛ pomegranet ɔmɛ nɛ a nyɛɛ a sibi a se ngɛ tade klɔii nɛ kɔni be he ɔ nya fiami ɔ nya kɛ kpe. Ke sika tsu ngmlɛ kake ba a, kɛkɛ pomegranet kake nyɛɛ se. 35 Aaron nɛ e wo kɛ sɔmɔ. Ke e yaa Yehowa hɛ mi ngɛ jami he ɔ, á nu ngmlɛ ɔmɛ a pɛmi, nɛ ke e ngɛ kpo jee hu á nu ngmlɛ ɔmɛ a pɛmi bɔ nɛ pee nɛ e ko gbo.

36 “Ngɔɔ sika tsu ngmingmiingmi kɛ pee nɔ́ pɛtɛɛ nɛ ngɛ tsɛ̃e, nɛ o kpɛ́ ní ngɛ nɔ kaa bɔ nɛ nɔ ko ma kpɛ́ nɔ́ ngɛ nɔ́ nya sɔumi nɔ́ nɔ ɔ. Mo kpɛ́ ngɛ nɔ ke: ‘Klɔuklɔu ji Yehowa.’ 37 Ngɔɔ kpã bluu kɛ fi lɛ kɛ wo yi fimi nɔ́ ɔ he; é hi e hɛ nya ngɛ yi fimi nɔ́ ɔ he. 38 E hi Aaron hɛ nya, konɛ ke nɔ ko tɔ̃ Mawu nɔ ngɛ ní klɔuklɔuhi nɛ Israel bi ɔmɛ jɔɔ nɔ kaa nike ní klɔuklɔu nɛ a kɛ sãã afɔle ɔ a he ɔ, tɔmi ɔ nɛ e tloo Aaron. E hi e hɛ nya be fɛɛ be, bɔ nɛ pee nɛ Yehowa bua nɛ e jɔ a he.

39 “Ngɔɔ kpã kpakpa kɛ lo tade tsɛkitsɛki klɔii, nɛ o ngɔ klala kpakpa kɛ pee yi fimi nɔ́, nɛ o lo mlɛ mi fimi nɔ́.

40 “Moo kpɛ tade klɔiihi, mlɛ mi fimi níhi, kɛ osɔfo pɛɛ kɛ ha Aaron binyumu ɔmɛ hulɔ konɛ a hɛ mi nɛ ba nyami nɛ a he nɛ pee fɛu. 41 Moo ngɔ tade ɔmɛ kɛ wo o nyɛminyumu Aaron kɛ e binyumu ɔmɛ, nɛ o pɔ mɛ nu, nɛ o wo mɛ osɔfohi,* nɛ o pee mɛ klɔuklɔu, nɛ a sɔmɔ mi kaa osɔfohi. 42 Jehanɛ hu ɔ, moo ngɔ klala kpakpa kɛ kpɛ tagajami ha mɛ nɛ a wo kɛ ha a he. E kami nɛ e hi kɛ je a mlɛ mi kɛ ya si a fiɔ mi. 43 Ke Aaron kɛ e binyumu ɔmɛ yaa kpe he bo tsu ɔ mi, aloo a yaa afɔle sami la tɛ ɔ he ngɛ he klɔuklɔu ɔ nɛ a ya sɔmɔ ɔ, á wo ní nɛ ɔmɛ, bɔ nɛ pee nɛ a ko tɔ̃ nɛ a ko ba gbo. E ji mlaa nɛ e maa hi si daa kɛ ha e kɛ e nina* nɛ maa ba a tsuo.

29 “Nɔ́ nɛ o maa pee kɛ pee mɛ klɔuklɔu konɛ a sɔmɔ kaa osɔfohi kɛ ha mi ji nɛ ɔ nɛ: Ngɔɔ na ku wayoo kake kɛ agbosu enyɔ nɛ kpa ko be a he, 2 nɛ o ngɔ hwiit mamu bukɔbukɔ kɛ pee abolo nɛ masa be mi, kɛ abolo nɛ masa be mi nɛ a bɔ lɛ lokotolokoto* nɛ a ngɔ nu kɛ futu, kɛ akpɔɔnɔɔ nɛ masa be mi nɛ a kɛ nu kpa hɛ mi. 3 Ngɔɔ kɛ wo kusii* mi, nɛ a hi kusii ɔ mi nɛ o kɛ ba. Nɛ o kɛ na ku ɔ kɛ agbosu enyɔ ɔmɛ nɛ piɛɛ he.

4 “Ngɔɔ Aaron kɛ e binyumu ɔmɛ kɛ ba kpe he bo tsu ɔ nya, nɛ o ngɔ nyu kɛ fɔ a he ha mɛ. 5 Lɔ ɔ se ɔ, ngɔɔ ní ɔmɛ, nɛ ji tade klɔii ɔ, kɛ efɔd ɔ sisi tade klɔii nɛ kɔni be he ɔ, kɛ efɔd ɔ, kɛ gugue nɔ hami nɔ́ ɔ kɛ wo Aaron, nɛ o fi mlɛ mi fimi nɔ́ nɛ a lo ɔ ngɛ e mlɛ mi nɛ e muɛ* lɛ bɔ nɛ sa. 6 Ngɔɔ yi fimi nɔ́ ɔ kɛ fi e yi, nɛ o fi he nɔ jɔɔmi he okadi klɔuklɔu* ɔ kɛ wo yi fimi nɔ́ ɔ he; 7 nɛ o ngɔ nɔ pɔmi nu ɔ, nɛ́ o plɛ kɛ pue e yi mi nɛ o pɔ lɛ nu.

8 “Lɔ ɔ se ɔ, ngɔɔ Aaron binyumu ɔmɛ kɛ ba nɛ o ba wo mɛ tade klɔii ɔmɛ, 9 nɛ o fi mlɛ mi fimi ní ɔmɛ ha Aaron kɛ e binyumu ɔmɛ, nɛ o bu osɔfo pɛɛ ɔmɛ ha mɛ; nɛ osɔfo yemi maa pee a nɔ́. Enɛ ɔ ji mlaa nɛ ngɛ kɛ yaa daa. Bɔ nɛ o maa pee ha kɛ wo Aaron kɛ e binyumu ɔmɛ osɔfohi konɛ a sɔmɔ* ji nɛ ɔ nɛ.

10 “Lɔ ɔ se ɔ, ngɔɔ na ku ɔ kɛ ya kpe he bo tsu ɔ hɛ mi, nɛ́ Aaron kɛ e binyumu ɔmɛ nɛ a ngɔ a nine kɛ pue na ku ɔ yi mi. 11 Moo gbe na ku ɔ ngɛ Yehowa hɛ mi, ngɛ kpe he bo tsu ɔ nya. 12 Ngɔɔ o nine nguɛ kɛ sɔ na ku ɔ muɔ ɔ mi, nɛ o ngɔ kɛ kpa afɔle sami la tɛ ɔ koli ɔmɛ a he, nɛ o plɛ muɔ nɛ maa piɛ ɔ tsuo kɛ pue afɔle sami la tɛ ɔ sisi. 13 Lɔ ɔ se ɔ, moo ngɔ zɔ nɛ ha mi ní ɔmɛ a he ɔ tsuo, kɛ ko ɔ he zɔ ɔ, kɛ se tso mi ngmɛ enyɔ ɔmɛ kɛ zɔ nɛ ha a he ɔ, nɛ o sã nɛ e je la su ku ngɛ afɔle sami la tɛ ɔ nɔ. 14 Se na ku ɔ lo ɔ, kɛ e he womi ɔ, kɛ e fi ɔ lɛɛ, ngɔɔ la kɛ sã ngɛ sito he ɔ se. E ji yayami afɔle.

15 “Lɔ ɔ se ɔ, ngɔɔ agbosu ɔ kake, nɛ Aaron kɛ e binyumu ɔmɛ nɛ a ngɔ a nine kɛ pue agbosu ɔ yi mi. 16 Moo gbe agbosu ɔ, nɛ o ngɔ e muɔ ɔ nɛ o kɛ fĩa afɔle sami la tɛ ɔ he tsuo. 17 Moo poo agbosu ɔ kpɔ nya kpɔ nya, nɛ o fɔ e mi ní ɔmɛ kɛ e nane ɔmɛ a he, nɛ o to lɛ kpɔ nya kpɔ nya kɛ ya si e yi ɔ. 18 Moo sã agbosu mluku ɔ tsuo nɛ e je la su ku ngɛ afɔle sami la tɛ ɔ nɔ. E ji sami afɔle kɛ ha Yehowa, afɔle nɛ jeɔ via liliili.* E ji afɔle nɛ a kɛ la sãã ha Yehowa.

19 “Lɔ ɔ se ɔ, ngɔɔ agbosu enyɔne ɔ, nɛ Aaron kɛ e binyumu ɔmɛ nɛ a ngɔ a nine kɛ pue agbosu ɔ yi mi. 20 Moo gbe agbosu ɔ, nɛ o ngɔ e muɔ ɔ eko kɛ kpa Aaron hiɔ nɔ tue ɔ nya, kɛ e binyumu ɔmɛ a hiɔ nɔ tue ɔmɛ a nya, nɛ o ngɔ kɛ kpa a hiɔ nine gɔleku ɔmɛ a he, kɛ a hiɔ nane gɔleku ɔmɛ a he, nɛ o ngɔ muɔ ɔ kɛ fĩa afɔle sami la tɛ ɔ he tsuo. 21 Jehanɛ ɔ, ngɔɔ muɔ nɛ ngɛ afɔle sami la tɛ ɔ nɔ ɔ eko, kɛ nɔ pɔmi nu ɔ eko, nɛ o fĩa kɛ pue Aaron kɛ e tade ɔmɛ, kɛ e binyumu ɔmɛ kɛ a tade ɔmɛ a nɔ, bɔ nɛ pee nɛ Aaron kɛ e tade ɔmɛ, kɛ e binyumu ɔmɛ kɛ a tade ɔmɛ nɛ a pee klɔuklɔu.

22 “Jehanɛ ɔ, ngɔɔ agbosu ɔ zɔ ɔ, e hlemi nɛ wo zɔ ɔ, zɔ nɛ ha mi ní ɔmɛ a he ɔ, ko ɔ he zɔ ɔ, se tso mi ngmɛ enyɔ ɔmɛ kɛ zɔ nɛ ha a he ɔ, kɛ e hiɔ nane ɔ, ejakaa e ji osɔfo womi agbosu. 23 Jehanɛ se hu ɔ, wo abolo lukutuu, kɛ abolo nɛ a bɔ lɛ lokotolokoto nɛ a ngɔ nu kɛ kpa he, kɛ akpɔɔnɔɔ ngɛ kusii nɛ a kɛ abolo nɛ masa be mi woɔ mi nɛ ngɛ Yehowa hɛ mi ɔ mi. 24 Ngɔɔ lɛ tsuo kɛ wo Aaron kɛ e binyumu ɔmɛ a dɛ mi, nɛ o fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi. 25 Lɔ ɔ se ɔ, ngɔɔ ní ɔmɛ ngɛ a dɛ nɛ o kɛ pue sami afɔle ɔ nɔ, nɛ o sã ngɛ afɔle sami la tɛ ɔ nɔ, kaa afɔle nɛ jeɔ via liliili* ngɛ Yehowa hɛ mi. E ji afɔle nɛ a kɛ la sãã ha Yehowa.

26 “Lɔ ɔ se ɔ, osɔfo womi agbosu nɛ a kɛ sã afɔle ha Aaron ɔ, ngɔɔ e gugue, nɛ o fɔ̃ kɛ ya kɛ ba ngɛ Yehowa hɛ mi kaa fɔ̃mi afɔle, nɛ e maa pee o blɔ fa mi nɔ́. 27 Ngɔɔ agbosu ɔ gugue ɔ nɛ a kɛ sã fɔ̃mi afɔle ɔ, kɛ e nane nɛ a fɔ̃ kɛ ya kɛ ba nɛ a kɛ ha kaa blɔ fa mi nɔ́ klɔuklɔu nɛ a je ngɛ osɔfo womi agbosu nɛ́ a kɛ sã afɔle ha Aaron kɛ e binyumu ɔmɛ ɔ he ɔ, nɛ́ o pee lɛ klɔuklɔu. 28 E maa pee Aaron kɛ e binyumu ɔmɛ a nɔ́, nɛ e maa pee mlaa nɛ Israel bi ɔmɛ maa ye nɔ kɛ ya neneene, ejakaa e ji blɔ fa mi nɔ́ klɔuklɔu, nɛ e maa pee blɔ fa mi nɔ́ klɔuklɔu nɛ Israel bi ɔmɛ kɛ ma ha. E ji blɔ fa mi nɔ́ klɔuklɔu nɛ a kɛ ma ha Yehowa ngɛ a tue mi jɔmi afɔle ɔmɛ a mi.

29 “Ke a pɔ Aaron binyumu ɔmɛ nu nɛ a wo mɛ osɔfohi ngɛ e se ɔ, a ma ba wo Aaron tade klɔuklɔu ɔmɛ. 30 E binyumu ɔmɛ a ti nɔ nɛ a maa wo lɛ osɔfo ngɛ e se, nɛ e maa ba kpe he bo tsu ɔ mi, nɛ e ma ba sɔmɔ ngɛ he klɔuklɔu ɔ maa wo e tade ɔmɛ ligbi kpaago.

31 “Ngɔɔ osɔfo womi agbosu ɔ lo ɔ nɛ o hoo ngɛ he ko nɛ ngɛ klɔuklɔu. 32 Aaron kɛ e binyumu ɔmɛ maa ye agbosu ɔ lo ɔ kɛ abolo nɛ ngɛ kusii ɔ mi ɔ ngɛ kpe he bo tsu ɔ nya. 33 A ye níhi nɛ a kɛ kpata ha mɛ, nɛ a kɛ wo mɛ osɔfohi,* nɛ a kɛ pee mɛ klɔuklɔu ɔ. Se e sɛ nɛ nɔ ko nɛ e be he blɔ kaa e yeɔ ɔ* nɛ e ye, ejakaa a ji ní klɔuklɔuhi. 34 Ke osɔfo womi agbosu ɔ lo ɔ nɛ a kɛ sã afɔle ɔ kɛ abolo ɔ eko piɛ nɛ je na yi ɔ, ngɔɔ la kɛ sã nɔ́ nɛ e piɛ ɔ. E sɛ nɛ a ye, ejakaa e ji nɔ́ klɔuklɔu.

35 “Moo pee ní nɛ ɔmɛ kɛ ha Aaron kɛ e binyumu ɔmɛ kaa bɔ nɛ i fã mo ke o pee ɔ. Moo ngɔ ligbi kpaago kɛ wo mɛ osɔfohi.* 36 Daa ligbi ɔ, ngɔɔ na ku kɛ sã yayami afɔle kɛ kpata kɛ ha a yayami. Sãã kpatami afɔle ɔ konɛ afɔle sami la tɛ ɔ nɛ e pee klɔuklɔu, nɛ o pɔ afɔle sami la tɛ ɔ nu kɛ pee lɛ klɔuklɔu. 37 Moo ngɔ ligbi kpaago kɛ sã kpatami afɔle kɛ ha afɔle sami la tɛ ɔ, nɛ o tsu he konɛ e pee afɔle sami la tɛ nɛ e ngɛ klɔuklɔu pe kulaa. Nɔ fɛɛ nɔ nɛ e maa pɛtɛ afɔle sami la tɛ ɔ he ɔ, e sa nɛ e pee nɔ ko nɛ e ngɛ klɔuklɔu.

38 “Nɔ́ nɛ o kɛ maa sã afɔle ngɛ afɔle sami la tɛ ɔ nɔ ji nɛ ɔ nɛ: daa ligbi ɔ, ngɔɔ agbosu enyɔ nɛ a ye jeha kake kɛ sã afɔle, nɛ o pee jã daa. 39 Ngɔɔ agbosu ɔ kake kɛ sã afɔle mɔtu, nɛ o ngɔ kake ɔ hu kɛ sã afɔle ke du ngɛ bue.* 40 Ngɔɔ mamu bukɔbukɔ lita enyɔ* nɛ́ a kɛ nu lita kake* futu, kɛ wai lita kake nɛ a kɛ maa sã dã afɔle kɛ piɛɛ kekle agbosu wayo ɔ he. 41 Ke du ngɛ bue* ɔ, ngɔɔ agbosu wayo enyɔne ɔ kɛ sã afɔle. Ngɔɔ mamu bukɔbukɔ kɛ dã kɛ piɛɛ he kaa bɔ nɛ o pee mɔtu nɔ́ ɔ. Moo sã lɛ kaa afɔle nɛ jeɔ via liliili,* afɔle nɛ a ngɔ la kɛ sã kɛ ha Yehowa. 42 E pee sami afɔle nɛ a maa sã daa ngɛ kpe he bo tsu ɔ nya ngɛ Yehowa hɛ mi, ngɛ he nɛ ma je ye he kpo kɛ tsɔɔ mo ngɛ nɛ i kɛ mo maa tu munyu ɔ. Nyɛɛ pee enɛ ɔ nyɛ yi nɔhi tsuo.

43 “Ma je ye he kpo kɛ tsɔɔ Israel bi ɔmɛ ngɛ lejɛ ɔ, nɛ ye hɛ mi nyami ɔ maa pee lejɛ ɔ klɔuklɔu. 44 Ma pee kpe he bo tsu ɔ kɛ afɔle sami la tɛ ɔ klɔuklɔu, nɛ ma pee Aaron kɛ e binyumu ɔmɛ klɔuklɔu bɔ nɛ pee nɛ a sɔmɔ mi kaa osɔfohi. 45 Ma hi Israel bi ɔmɛ a kpɛti, nɛ ma pee a Mawu. 46 Bɔ fɛɛ bɔ nɛ ji ɔ, a maa le kaa imi ji Yehowa a Mawu ɔ, nɔ nɛ e je mɛ kɛ je Egipt zugba a nɔ kɛ ba konɛ e kɛ mɛ nɛ hi si ɔ. Imi ji Yehowa, a Mawu ɔ nɛ.

30 “Moo pee afɔle sami la tɛ nɛ a kɛ maa sã tsopa kɛ e he via; ó ngɔ akasia tso kɛ pee. 2 É hi kɔ̃ nya eywiɛ nɛ́ a sɔ, e kami nɛ e pee kɔni fã kake,* e blimi nɛ e pee kɔni fã kake, nɛ e hiɔwe yami nɛ e pee kɔni fã enyɔ. Koli ɔmɛ kɛ afɔle sami la tɛ ɔ nɛ e pee nɔ́ mluku kake. 3 Ngɔɔ sika tsu ngmingmiingmi kɛ ha he: e yi mi, kɛ e he tsuo, kɛ e koli ɔmɛ a he, nɛ o ngɔ sika tsu kɛ wo zã kɛ bɔle e nya a kɛ kpe. 4 Jehanɛ hu ɔ, ngɔɔ sika tsu kɛ pee ga enyɔ kɛ wo he ngɛ zã a sisi ngɛ hiɛ kɛ hiɛ konɛ a ngɔ tsohi kɛ hɔɔ a mi kɛ hɛɛ. 5 Moo hlɔ akasia tsohi nɛ o ngɔ sika tsu kɛ ha a he. 6 Ngɔɔ afɔle sami la tɛ ɔ kɛ ma tsu mi pomi bo nɛ e ngɛ Odase daka a kasa nya a hɛ mi ngɛ he nɛ ma je ye he kpo kɛ tsɔɔ mo ngɛ ɔ. E hi Odase daka a kɛ e nya nɔ́ ɔ hɛ mi.

7 “Daa mɔtu ke Aaron ngɛ kane ɔmɛ a he ní tsue ɔ, e sã tsopa kɛ e he via nɛ e je la su ku ngɛ afɔle sami la tɛ ɔ nɔ. 8 Jehanɛ hu ɔ, ke Aaron su kane ɔmɛ be nɛ du ngɛ bue* ɔ, e sã tsopa kɛ e he via a. E ji tsopa kɛ e he via sami afɔle nɛ nyɛ maa sã daa ngɛ Yehowa hɛ mi nyɛ yi nɔhi tsuo. 9 Nyɛ ko sã tsopa kɛ e he via nɛ mlaa ngmɛ́ blɔ ngɛ nɔ, nɛ nyɛ ko sã sami afɔle, loo ngma afɔle, loo dã afɔle ngɛ nɔ hulɔ. 10 Aaron nɛ ngɔ lohwe ɔ nɛ a kɛ maa sã yayami afɔle ɔ muɔ ɔ eko kɛ pue afɔle sami la tɛ ɔ koli ɔmɛ a nɔ konɛ e kɛ tsu he. E pee jã si kake daa jeha nɛ e kɛ kpata kɛ ha afɔle sami la tɛ ɔ ngɛ nyɛ yi nɔhi tsuo a mi. E ji nɔ́ klɔuklɔu pe kulaa ha Yehowa.”

11 Kɛkɛ nɛ Yehowa de Mose ke: 12 “Be fɛɛ be nɛ o maa kane nyumuhi nɛ a ngɛ Israel bi ɔmɛ a kpɛti ɔ, a ti nɔ fɛɛ nɔ nɛ e wo kpɔmi nɔ́ kɛ ha Yehowa ngɛ e wami* he je ke a ngɛ ni ɔmɛ kanee ɔ. Á pee jã bɔ nɛ pee nɛ haomi ko nɛ ko ba a nɔ be mi nɛ a ngɛ a biɛhi ngmae ɔ. 13 Nɔ́ nɛ nihi tsuo nɛ a ngma a biɛ ɔ kɛ maa ba ji nɛ ɔ nɛ: shekel* fã kaa bɔ nɛ a po fɔ si ngɛ he klɔuklɔu ɔ.* Gera* nyingmi enyɔ peeɔ shekel kake. Nike ní nɛ a kɛ ma ha Yehowa ji shekel fã. 14 Nɔ fɛɛ nɔ nɛ a ngma e biɛ nɛ e ye kɛ je jeha 20 kɛ yaa a, e ngɔ Yehowa nike ní ɔ kɛ ha lɛ. 15 Ke nyɛɛ kɛ nike ní nɛ a kɛ ma kpata ha nyɛ wami ɔ* ma Yehowa ha mi ɔ, niatsɛmɛ nɛ a ko ha kɛ be nɔ, nɛ ohiatsɛmɛ hu nɛ a ko ha nɔ́ nɛ e sui shekel* fã a. 16 Ngɔɔ sika hiɔ nɛ Israel bi ɔmɛ kɛ maa ba kaa kpatami nɔ́ ɔ, nɛ o kɛ ha nɛ a kɛ tsu kpe he bo tsu ɔ mi sɔmɔmi ní tsumi ɔ, konɛ e pee kaimi nɔ́ ngɛ Yehowa hɛ mi kɛ ha Israel bi ɔmɛ, nɛ nyɛ kɛ pee kpatami nɔ́ kɛ ha nyɛ wami.”*

17 Yehowa ya nɔ nɛ e de Mose ke: 18 “Pee akɔblee kã nɛ a kɛ ma fɔ dɛ, kɛ nɔ́ nɛ a kɛ kã a maa ma nɔ, nɛ o kɛ ma kpe he bo tsu ɔ kɛ afɔle sami la tɛ ɔ a kpɛti, nɛ o yɛ nyu kɛ wo mi. 19 Aaron kɛ e binyumu ɔmɛ ma fɔ a dɛ kɛ a nane he ngɛ lejɛ ɔ. 20 Ke a yaa kpe he bo tsu ɔ mi, aloo a yaa afɔle sami la tɛ ɔ he nɛ a ya sɔmɔ, nɛ́ a sã afɔlehi nɛ a kɛ la sãã nɛ jee la su ku kɛ haa Yehowa a, a ngɔ nyu kɛ fɔ a dɛ kɛ a nane he bɔ nɛ pee nɛ a ko gbo. 21 Á fɔ a dɛ kɛ a nane he bɔ nɛ pee nɛ a ko gbo, nɛ enɛ ɔ maa pee mlaa kɛ ha mɛ kɛ maa ya daa. Aaron kɛ e nina nɛ a ye nɔ a yi nɔhi tsuo.”

22 Yehowa ya nɔ nɛ e de Mose ke: 23 “Enɛ ɔ se ɔ, ngɔɔ tsopahi kɛ a he via nɛ a jeɔ via pe kulaa a: mimɛ kpɔ susumi nɔ́ 500, nɛ o ngɔ sinamon nɛ e jeɔ via nɛ e hiɛmi ngɛ kaa lɔ ɔ fã, nɛ ji susumi nɔ́ 250, nɛ o ngɔ kalamo nɛ e jeɔ via susumi nɔ́ 250, 24 nɛ o ngɔ kasia nɛ e hiɛmi ji susumi nɔ́ 500 kaa bɔ nɛ a po fɔ si ngɛ he klɔuklɔu ɔ,* nɛ o ngɔ oliv nu maa pee lita eywiɛ* kɛ piɛɛ he. 25 Ngɔɔ kɛ pee nɔ pɔmi nu klɔuklɔu, nɛ́ á futu lɛ saminya.* E pee nɔ pɔmi nu klɔuklɔu.

26 “Ngɔɔ kɛ pɔ níhi nɛ nyɛɛ se nɛ ɔmɛ nu: kpe he bo tsu ɔ kɛ Odase daka a, 27 kɛ jehanɛ se hu okplɔɔ ɔ kɛ e he níhi tsuo, kane tso ɔ kɛ e he níhi tsuo, afɔle sami la tɛ nɛ a kɛ maa sã tsopa kɛ e he via a, 28 afɔle sami la tɛ nɛ a kɛ maa sã sami afɔle ɔ kɛ e he níhi tsuo, kɛ kã a, kɛ nɔ́ nɛ a kɛ kã a maa ma nɔ ɔ. 29 Ha nɛ a he nɛ tsɔ konɛ a pee klɔuklɔu pe kulaa. E sa nɛ nɔ fɛɛ nɔ nɛ e maa pɛtɛ ní nɛ ɔmɛ a he ɔ nɛ e pee nɔ ko nɛ e ngɛ klɔuklɔu. 30 Moo pɔ Aaron kɛ e binyumu ɔmɛ nu nɛ o ha nɛ a he nɛ tsɔ, nɛ a sɔmɔ mi kaa osɔfohi.

31 “O kɛ Israel bi ɔmɛ nɛ tu munyu nɛ o de mɛ ke: ‘Enɛ ɔ maa pee nɔ pɔmi nu klɔuklɔu kɛ ha mi nyɛ yi nɔhi tsuo. 32 A ko ngɔ kɛ kpa adesa ko he womi nɔ, nɛ nyɛ ko futu níhi kɛ pee e henɔ ko hulɔ. E ji nɔ́ ko nɛ ngɛ klɔuklɔu. É ya nɔ nɛ e pee nɔ́ klɔuklɔu kɛ ha nyɛ. 33 Nɔ fɛɛ nɔ nɛ e maa pee nu nɛ ɔ henɔ ko, loo e ma kpa eko ha nɔ ko nɛ́ e be he blɔ kaa e kpaa a,* á gbe* lɛ.’”

34 Kɛkɛ nɛ Yehowa de Mose ke: “Ngɔɔ tsopa kɛ e he via nɛ ɔmɛ, nɛ o ha nɛ a hiɛmi nɛ sɔ fiee: stakte,* onitsa, galbanum nɛ jeɔ via, kɛ ohɛ ngmingmiingmi. 35 Ngɔɔ kɛ pee tsopa kɛ e he via; nɛ́ á futu lɛ saminya.* Ngo nɛ hi mi, e mi nɛ tsɔ, nɛ e hi klɔuklɔu. 36 Moo wɛɛ eko bukɔbukɔ kaa mamu nɛ o ngɔ eko kɛ ma Odase daka a hɛ mi ngɛ kpe he bo tsu ɔ mi, he nɛ ma je ye he kpo kɛ tsɔɔ mo ngɛ ɔ. E pee nɔ́ klɔuklɔu pe kulaa kɛ ha nyɛ. 37 Nyɛ ko ngɔ níhi nɛ nyɛɛ kɛ pee tsopa kɛ e he via nɛ ɔ kɛ pee eko kɛ ha nyɛ he. Nyɛɛ bu lɛ kaa nɔ́ ko nɛ e ngɛ klɔuklɔu kɛ ha Yehowa. 38 Nɔ fɛɛ nɔ nɛ e maa pee nu ɔ henɔ ko ngɛ e he via a he je ɔ, á gbe* lɛ.”

31 Yehowa ya nɔ nɛ e kɛ Mose tu munyu nɛ e de lɛ ke: 2 “Hyɛ, i hla Bezalel,* nɛ ji Hur binyumu Uri bi ɔ kɛ je Yuda wɛtso ɔ mi. 3 I kɛ ye mumi ɔ maa wo e mi, nɛ ma ha lɛ juɛmi, nɔ́ sisi numi, kɛ nile nɛ́ ma ha nɛ e tsu ga ní tsumi slɔɔtohi tsuo. 4 Nɛ ma ha nɛ e le ní tɛnimi, nɛ́ e pee sika tsu, sika hiɔ, kɛ akɔblee níhi, 5 nɛ́ e pee tɛhi nɛ a he jua wa he ní tsulɔ, nɛ́ e pee nɔ́ fɛɛ nɔ́ nɛ a kɛ tso peeɔ ɔ. 6 Jehanɛ hu ɔ, i hla Oholiab, nɛ ji Ahisamak nɛ e je Dan wɛtso ɔ mi ɔ binyumu ɔ konɛ e ye bua lɛ, nɛ ma ha nihi tsuo nɛ a le ga ní tsumi* ɔ juɛmi* konɛ a nyɛ nɛ a pee nɔ́ fɛɛ nɔ́ nɛ i fã mo ke o pee ɔ: 7 kpe he bo tsu ɔ, Odase daka a kɛ nya nɔ́ nɛ ngɛ nya a, kɛ nɔ́ fɛɛ nɔ́ nɛ ngɛ bo tsu ɔ mi ɔ, 8 okplɔɔ ɔ kɛ e he ní ɔmɛ, sika tsu ngmingmiingmi kane tso ɔ kɛ e he ní ɔmɛ tsuo, afɔle sami la tɛ nɛ a kɛ maa sã tsopa kɛ e he via a, 9 afɔle sami la tɛ nɛ a kɛ maa sã sami afɔle ɔ kɛ e he ní ɔmɛ tsuo, kã a kɛ nɔ́ nɛ a kɛ kã a maa ma nɔ ɔ, 10 tadehi nɛ a lo saminyawiiwi, osɔfo Aaron tade klɔuklɔu ɔmɛ, kɛ e bimɛ ɔmɛ a tadehi nɛ a kɛ ma sɔmɔ kaa osɔfohi ɔ, 11 nɔ pɔmi nu ɔ, kɛ tsopa kɛ e he via nɛ a kɛ maa ma jami he ɔ. A maa pee nɔ́ fɛɛ nɔ́ nɛ i fã mo ke o pee ɔ.”

12 Yehowa ya nɔ nɛ e de Mose ke: 13 “O kɛ Israel bi ɔmɛ nɛ tu munyu nɛ o de mɛ ke, ‘Bɔ fɛɛ bɔ nɛ ji ɔ, nyɛɛ ye ye hejɔɔmi ligbi ɔmɛ, ejakaa e ji okadi nɛ ngɛ i kɛ nyɛ wa kpɛti nyɛ yi nɔhi tsuo, bɔ nɛ pee nɛ nyɛɛ na kaa imi Yehowa lɛ i ngɛ nyɛ klɔuklɔu pee ɔ nɛ. 14 Nyɛɛ ye Hejɔɔmi Ligbi ɔ, ejakaa e ngɛ klɔuklɔu kɛ ha nyɛ. Nɔ fɛɛ nɔ nɛ e maa wo he mu ɔ, á gbe lɛ. Ke nɔ ko tsu ní ngɛ jamɛ a ligbi ɔ nɔ ɔ, á gbe* jamɛ a nɔ ɔ* kɛ je e ma mi bi ɔmɛ a kpɛti. 15 Nyɛ tsu ní ligbi ekpa, se ligbi kpaagone ɔ ji hejɔɔmi ligbi nɛ nyɛɛ kɛ maa jɔɔ nyɛ he kulaa. E ji ligbi klɔuklɔu ha Yehowa. Nɔ fɛɛ nɔ nɛ e ma tsu ní ngɛ Hejɔɔmi Ligbi ɔ nɔ ɔ, á gbe lɛ. 16 Israel bi ɔmɛ nɛ á ye Hejɔɔmi Ligbi ɔ; á ye Hejɔɔmi Ligbi ɔ a yi nɔhi tsuo. E ji somi nɛ e ngɛ kɛ yaa daa. 17 E ji okadi nɛ maa hi si daa ngɛ i kɛ Israel bi ɔmɛ wa kpɛti, ejakaa Yehowa ngɔ ligbi ekpa kɛ bɔ hiɔwe kɛ zugba, nɛ ngɛ ligbi kpaagone ɔ nɔ ɔ, e gbe e ní tsumi ɔ nya nɛ e jɔɔ e he.’”

18 Benɛ e kɛ Mose tu munyu ta ngɛ Sinai Yoku ɔ nɔ pɛ ɔ, e ha Mose Odase tɛ tɛtlɛɛ enyɔ, nɛ ji tɛ tɛtlɛɛhi nɛ Mawu kɛ e nine nguɛ ngma ní ngɛ a nɔ.

32 Jehanɛ ɔ, ni ɔmɛ na kaa Mose se ya kɛ ngɛ yoku ɔ nɔ nɛ e kple we si kɛ bɛ. Lɔ ɔ he ɔ, a kpe kɛ wo Aaron he nɛ a de lɛ ke: “Tee si nɛ o pee mawu ha wɔ nɛ e nyɛɛ wa hɛ mi, ejakaa wa li nɔ́ nɛ ya pee Mose nɛ ɔ, nyumu nɛ e nyɛɛ wa hɛ mi kɛ je* Egipt zugba a nɔ ɔ.” 2 Kɛkɛ nɛ Aaron de mɛ ke: “Nyɛ je sika tsu tue nya níhi nɛ ngɛ nyɛ yi ɔmɛ, nyɛ binyumu ɔmɛ, kɛ nyɛ biyi ɔmɛ a tue mi ɔ kɛ ba ha mi.” 3 Lɔ ɔ he ɔ, ni ɔmɛ tsuo je sika tsu tue nya níhi nɛ ngɛ a tue mi ɔ kɛ ba ha Aaron. 4 Kɛkɛ nɛ e ngɔ sika tsu ní ɔmɛ ngɛ a dɛ, nɛ e sile nɛ e ngɔ ní tsumi dade kɛ tsu he ní, nɛ e kɛ pee na bi amaga. Kɛkɛ nɛ a bɔni demi ke: “Israel ma, nyɛ Mawu ɔ nɛ e nyɛɛ nyɛ hɛ mi kɛ je* Egipt zugba a nɔ ɔ ji nɛ ɔ nɛ.”

5 Benɛ Aaron na nɔ́ nɛ ɔ, e puɛ afɔle sami la tɛ ngɛ amaga a hɛ mi. Kɛkɛ nɛ Aaron de kɛ ngmlaa ke: “Hwɔɔ ɔ, a maa ye gbijlɔ ha Yehowa.” 6 Lɔ ɔ he ɔ, e nɔ jena mɔtu mla a, a te si nɛ a bɔni sami afɔlehi kɛ tue mi jɔmi afɔlehi sami. Lɔ ɔ se ɔ, ni ɔmɛ hi si nɛ a ye ní nɛ a nu ní. Kɛkɛ nɛ a te si nɛ a je a hɛja.

7 Jehanɛ ɔ, Yehowa de Mose ke: “Kple kɛ ho, ejakaa o we bi ɔmɛ nɛ o nyɛɛ a hɛ mi kɛ je* Egipt zugba a nɔ ɔ wo a he mu. 8 Piɔ pɛ ɔ, a gba kɛ je blɔ nɛ i fã mɛ kaa a nyɛɛ nɔ ɔ nɔ. A pee na bi amaga kɛ ha a he, nɛ a ngɛ si kplãe ha lɛ, nɛ a ngɛ afɔle sãe kɛ ngɛ lɛ hae nɛ a ngɛ dee ke, ‘Israel ma, nyɛ Mawu ɔ nɛ e nyɛɛ nyɛ hɛ mi kɛ je Egipt zugba a nɔ ɔ ji nɛ ɔ nɛ.’” 9 Yehowa ya nɔ nɛ e de Mose ke: “I na kaa nimli nɛ ɔmɛ a tue mi ti.* 10 Lɔ ɔ he ɔ, ha nɛ i kɛ ye we abofu ɔ nɛ kple a nɔ nɛ ma kpata a hɛ mi, nɛ́ ma ha nɛ mo mohu o pee ma ngua.”

11 Kɛkɛ nɛ Mose kpa Yehowa e Mawu ɔ pɛɛ* nɛ e de lɛ ke: “Oo Yehowa, mɛni he je nɛ o mi mi fu o we bi nɛ o ngɔ o he wami kpetekpleenyɛ kɛ kɔni si wami kɛ je mɛ kɛ je Egipt zugba a nɔ ɔ? 12 Ke o pee jã a, Egipt bi ɔmɛ ma de ke, ‘Benɛ e nyɛɛ e we bi ɔmɛ a hɛ mi kɛ yaa a, e hɛɛ a he juɛmi yaya. E ngɛ hlae nɛ e ya gbe mɛ ngɛ yoku ɔmɛ a nɔ nɛ́ e kpata a hɛ mi ngɛ zugba a nɔ.’ Ha nɛ o mi mi fumi ɔ nya nɛ ba si. Mo tsake juɛmi nɛ o pee kaa o ma kpata o we bi ɔmɛ a hɛ mi ɔ.* 13 Mo kai o sɔmɔli Abraham, Isak kɛ Israel nɛ o ngɔ mo nitsɛ o he kɛ kã mɛ kita ke: ‘Ma ha nɛ nyɛ nina* maa hiɛ kaa hiɔwe dodoehi, nɛ ma ngɔ zugba nɛ ɔ tsuo nɛ i wo si kaa ma ngɔ kɛ ha nyɛ nina a* kɛ ha mɛ konɛ e pee a nɔ́ kɛ ya neneene’ ɔ.”

14 Lɔ ɔ he ɔ, Yehowa tsake juɛmi nɛ e pee kaa e ma kpata e we bi ɔmɛ a hɛ mi ɔ.*

15 Kɛkɛ nɛ Mose plɛ e he nɛ e kple si kɛ je yoku ɔ nɔ kɛ e dɛ mi Odase tɛ tɛtlɛɛ enyɔ ɔmɛ. A ngma ní ngɛ tɛ tɛtlɛɛ ɔmɛ a hɛ mi kɛ a se tsuo. 16 Mawu lɛ e pee tɛ tɛtlɛɛ ɔmɛ, nɛ Mawu lɛ e ngma* níhi nɛ a ngma ngɛ tɛ tɛtlɛɛ ɔmɛ a nɔ ɔ nɛ. 17 Benɛ Yoshua nu nɛ ni ɔmɛ ngɛ ngmlaa kpae ngɛ sito he ɔ, e de Mose ke: “Ngmlaa ko ngɛ pɛe kaa nɔ́ nɛ a ngɛ ta hwue ngɛ sito he ɔ.” 18 Se Mose de ke:

19 Benɛ e piɛ bɔɔ nɛ Mose maa su sito he ɔ, nɛ́ e na na bi ɔ kɛ ni ɔmɛ nɛ a ngɛ doe ɔ pɛ kɛkɛ nɛ e mi mi fu wawɛɛ, nɛ e sake tɛ tɛtlɛɛ ɔmɛ nɛ e hɛɛ ngɛ e dɛ mi ɔ kɛ fia si, nɛ e ywia mɛ ngɛ yoku ɔ sisi. 20 E ngɔ na bi nɛ a pee ɔ, nɛ e sã ngɛ la mi, nɛ e wɛɛ lɛ bukɔbukɔ; nɛ e kɛ fĩa nyu ɔ hɛ mi nɛ e ha nɛ Israel bi ɔmɛ nu nyu ɔ. 21 Nɛ Mose bi Aaron ke: “Kɛ nimli nɛ ɔmɛ pee kɛ plɛ o yi mi kɛɛ loko o ngɔ yayami agbo kaa kikɛ kɛ ba a nɔ ɔ?” 22 Aaron ha lɛ heto ke: “Ye nyɔmtsɛ, o mi mi nɛ ko fu. Mo nitsɛ o le kaa nimli nɛ ɔmɛ a bua jɔ yayami peemi he. 23 Lɔ ɔ he ɔ, a de mi ke, ‘Pee mawu ha wɔ nɛ e nyɛɛ wa hɛ mi, ejakaa wa li nɔ́ nɛ ya pee Mose nɛ ɔ, nyumu nɛ e nyɛɛ wa hɛ mi kɛ je* Egipt zugba a nɔ ɔ.’ 24 Lɔ ɔ he ɔ, i de mɛ ke, ‘Nɔ fɛɛ nɔ nɛ e ngɛ sika tsu ɔ, e je nɛ e kɛ ba ha mi.’ Kɛkɛ nɛ i sake kɛ pue la a mi, nɛ nɔ́ nɛ je mi kɛ ba ji na bi nɛ ɔ nɛ.”

25 Mose na kaa Aaron nine kpi ni ɔmɛ a he, ejakaa e ngmɛ mɛ blɔ nɛ a pee nɔ́ nɛ a suɔ, nɛ lɔ ɔ ha nɛ a pue a hɛ mi si ngɛ a he nyɛli ɔmɛ a hɛ mi. 26 Kɛkɛ nɛ Mose ya da sito he ɔ agbo ɔ nya nɛ e de ke: “Mɛnɔmɛ lɛ a fĩ Yehowa se? Jamɛatsɛmɛ ɔmɛ nɛ a ba ye ngɔ!” Kɛkɛ nɛ Levi bi ɔmɛ tsuo ba bua a he nya ngɛ e ngɔ. 27 Jehanɛ ɔ, e de mɛ ke: “Nɔ́ nɛ Yehowa Israel Mawu ɔ de ji nɛ ɔ nɛ, ‘Nyɛ ti nɔ fɛɛ nɔ nɛ e wo e klaate nɛ e ya gu sito he ɔ agbo ɔmɛ tsuo a nya, nɛ e gbe e nyɛminyumu, e kpɔ mi no, kɛ e huɛ nɛ nyu bi ngɛ e kɛ lɛ a kpɛti.’” 28 Levi bi ɔmɛ pee nɔ́ nɛ Mose de ɔ. Lɔ ɔ he ɔ, a gbe nyumuhi maa pee 3,000 jamɛ a ligbi ɔ. 29 Kɛkɛ nɛ Mose de ke: “Nyɛ je nyɛ he banee* ha Yehowa mwɔnɛ ɔ, ejakaa nyɛ ti nɔ fɛɛ nɔ te si kɛ wo lɛ nitsɛ e binyumu kɛ e nyɛminyumu; mwɔnɛ ɔ, e maa jɔɔ nyɛ.”

30 E nɔ jena nɔuu ɔ, Mose de ni ɔmɛ ke: “Nyɛ pee yayami agbo, amlɔ nɛ ɔ, ma kuɔ yoku ɔ kɛ ya Yehowa ngɔ nɛ ma ya kpa lɛ pɛɛ kaa alini e kɛ nyɛ yayami ɔ maa ke nyɛ lo.” 31 Lɔ ɔ he ɔ, Mose kpale kɛ ya Yehowa ngɔ nɛ e ya de lɛ ke: “Nimli nɛ ɔmɛ pee yayami agbo! A pee sika tsu mawu kɛ ha a he! 32 Se amlɔ nɛ ɔ, ke o suɔ ɔ, ngɔɔ a yayami ɔ kɛ ke mɛ; ke pi jã a, lɛɛ moo gbɛ* ye biɛ ngɛ o womi ɔ mi.” 33 Se Yehowa de Mose ke: “Nɔ fɛɛ nɔ nɛ e pee yayami kɛ si mi ɔ, ma gbɛ* e biɛ ngɛ ye womi ɔ mi. 34 Moo ya, nɛ o ya nyɛɛ ni ɔmɛ a hɛ mi kɛ ya he nɛ i tsɔɔ mo ɔ. Hyɛ! Ye bɔfo ɔ maa nyɛɛ o hɛ mi kɛ ya, nɛ ligbi nɛ ma ha nɛ a maa bu akɔtaa a, ma gbla a tue ngɛ a yayami ɔ he je.” 35 Kɛkɛ nɛ Yehowa kɛ haomi bɔni ni ɔmɛ a nɔ bami, ejakaa a pee na bi, nɛ ji na bi nɛ Aaron pee ɔ.

33 Yehowa ya nɔ nɛ e de Mose ke: “Ngɔɔ nihi nɛ o nyɛɛ a hɛ mi kɛ je* Egipt zugba a nɔ ɔ kɛ je hiɛ ɔ nɛ nyɛ tsa nyɛ blɔ hiami ɔ nɔ kɛ ho. Nyɛɛ ho zugba nɛ i wo Abraham, Isak, kɛ Yakob si nɛ i de mɛ ke, ‘Ma ngɔ kɛ ha nyɛ nina’ a* nɔ ya. 2 Ma tsɔ bɔfo kɛ nyɛɛ nyɛ hɛ mi, nɛ ma fiee Kanaan bi, Amor bi, Hit bi, Periz bi, Hiv bi kɛ Yebus bi ɔmɛ kɛ je zugba a nɔ. 3 Nyɛɛ ho* zugba nɛ nyɔ nyu kɛ hwo ngɛ bee ngɛ nɔ ɔ nɔ ya. Se i be nyɛ he piɛɛe kɛ ya, ejakaa nyɛ ji nimli nɛ a tue mi ti,* nɛ eko ɔ, ma ya kpata nyɛ hɛ mi ngɛ blɔ ɔ nɔ.”

4 Benɛ ni ɔmɛ nu munyu yobu nɛ ɔ, a bɔni aywilɛho yemi, nɛ a ti nɔ kake ngmelu po wui e june níhi. 5 Yehowa de Mose ke: “De Israel bi ɔmɛ ke, ‘Nyɛ ji nimli nɛ a tue mi ti.* Ma nyɛ ma sɛ nyɛ kpɛti nɛ́ ma kpata nyɛ hɛ mi ngɛ hɛngmɛfia mi. Enɛ ɔ he ɔ, amlɔ nɛ ɔ nɛ i ngɛ nɔ́ nɛ ma pee nyɛ ɔ he susue ɔ, nyɛ ko wo nyɛ june ɔmɛ.’” 6 Lɔ ɔ he ɔ, kɛ je Horeb Yoku ɔ he kɛ yaa a, Israel bi ɔmɛ wui* a june ní ɔmɛ.

7 Jehanɛ ɔ, Mose jé e bo tsu ɔ nɛ e ya ma ngɛ sito he ɔ se tsitsaa, nɛ e wo lɛ biɛ ke kpe he bo tsu. Nɔ fɛɛ nɔ nɛ e suɔ kaa e ma bi Yehowa ní ɔ, e yaa kpe he bo tsu ɔ nɛ ngɛ sito he ɔ se ɔ mi. 8 Ke Mose je kpo kɛ yaa bo tsu ɔ mi pɛ ɔ, ni ɔmɛ tsuo teɔ si nɛ a daa si ngɛ mɛ nitsɛmɛ a bo tsu ɔmɛ a nya, nɛ a hii Mose kuɛ se mi hyɛe hluu kɛ ya siɔ be nɛ e ya sɛɔ bo tsu ɔ mi. 9 Ke Mose ya sɛ bo tsu ɔ mi pɛ ɔ, bɔku titima a kpleɔ si kɛ ba daa bo tsu ɔ nya nɛ Mawu kɛ Mose tuɔ munyu. 10 Ke ni ɔmɛ tsuo na bɔku titima a nɛ daa si ngɛ kpe he bo tsu ɔ nya a, a ti nɔ fɛɛ nɔ teɔ si nɛ e maa e yi si ngɛ lɛ nitsɛ e bo tsu nya. 11 Yehowa kɛ Mose tuɔ munyu hɛ mi kɛ hɛ mi kaa bɔ nɛ nɔ kɛ e nyɛmi tuɔ munyu ɔ. Ke Mose kpale kɛ ya sito he ɔ, Nun binyumu Yoshua, nɛ ji Mose sɔmɔlɔ kɛ e tsɔlɔ ɔ ji kpo ngɛ bo tsu ɔ mi.

12 Kɛkɛ nɛ Mose de Yehowa ke: “Hyɛ, o ngɛ mi dee ke, ‘Nyɛɛ nimli nɛ ɔmɛ a hɛ mi kɛ ho,’* se o tsɔɔ we mi nɔ nɛ o maa tsɔ kɛ piɛɛ ye he kɛ ya. Jehanɛ hu ɔ, o de mi ke, ‘I le mo kɛ o biɛ,* nɛ o hɛ mi ba nyami ngɛ ye hɛ mi.’ 13 I kpa mo pɛɛ, ke ye hɛ mi ba nyami ngɛ o hɛ mi niinɛ ɔ, lɛɛ mo ha nɛ ma le o blɔ ɔmɛ, konɛ ma le mo, nɛ ye hɛ mi nɛ e ya nɔ nɛ e ba nyami ngɛ o hɛ mi. Mo kai hu kaa o we bi ji ma nɛ ɔ nɛ.” 14 Lɔ ɔ he ɔ, Mawu* de lɛ ke: “Imi nitsɛ i* kɛ mo maa ya, nɛ ma ha nɛ o he mi nɛ jɔ mo.” 15 Kɛkɛ nɛ Mose de lɛ ke: “Ke mo nitsɛ o* kɛ wɔ be yae ɔ, lɛɛ ko ha nɛ waa je hiɛ ɔ. 16 Kɛ a ma plɛ kɛ le kaa i kɛ o we bi ɔmɛ wa hɛ mi ba nyami ngɛ o hɛ mi kɛɛ? Anɛ pi ja o kɛ wɔ ya loko i kɛ o we bi ɔmɛ maa je ekpa ngɛ ni kpahi nɛ a ngɛ zugba a nɔ ɔ tsuo a he lo?”

17 Yehowa ya nɔ nɛ e de Mose ke: “Ma pee nɔ́ nɛ o bi nɛ ɔ hu kɛ ha mo, ejakaa o hɛ mi ba nyami ngɛ ye hɛ mi, nɛ i le mo kɛ o biɛ.” 18 Kɛkɛ nɛ Mose de lɛ ke: “I kpa mo pɛɛ, ha nɛ ma na o hɛ mi nyami ɔ.” 19 Se e de Mose ke: “Ma ha nɛ o na ye kpakpa peemi ɔ tsuo, nɛ ma jaje ye biɛ Yehowa a ngɛ o hɛ mi; nɛ nɔ nɛ i suɔ nɛ ma wo e hɛ mi nyami ɔ, ma wo e hɛ mi nyami, nɛ nɔ nɛ i suɔ kaa ma na lɛ mɔbɔ ɔ, ma na lɛ mɔbɔ.” 20 Se e kpale de lɛ ke: “O be nyɛe maa na ye hɛ mi, ejakaa nɔ ko nɔ ko be nyɛe maa na mi nɛ e maa hi wami mi.”

21 Yehowa ya nɔ nɛ e de ke: “Blɔ ngɛ ye kasa nya ngɛ hiɛ ɔ. Moo da tɛ sa a nɔ. 22 Ke ye hɛ mi nyami ɔ bee ɔ, ma ngɔ mo kɛ wo puɔ ko mi ngɛ tɛ sa a mi, nɛ ma ngɔ ye nine kɛ bu o nɔ kɛ ya si be nɛ ma be kɛ ho. 23 Lɔ ɔ se ɔ, ma je ye nine ngɛ o nɔ, nɛ o maa na ye kuɛ se mi. Se ye hɛ mi lɛɛ, o be nae.”

34 Kɛkɛ nɛ Yehowa de Mose ke: “Mo nitsɛ mo kó tɛ tɛtlɛɛ enyɔ kaa bɔ nɛ kekle ní ɔmɛ ngɛ ɔ. Ma kpale ngma níhi nɛ i ngma ngɛ kekle tɛ tɛtlɛɛ enyɔ ɔmɛ nɛ o ywia a nɔ ɔ kɛ pue lɔ ɔmɛ hu a nɔ. 2 Mo dla o he, ejakaa hwɔɔ mɔtu ɔ, o maa kuɔ kɛ ya Sinai Yoku ɔ nɔ, nɛ o ma ya da si ngɛ yoku ɔ yi mi ngɛ ye hɛ mi. 3 Se nɔ ko nɛ ko piɛɛ o he kɛ kuɔ kɛ ya, nɛ nɔ ko nɛ́ ko hi yoku ɔ nɔ he ko he ko hulɔ. Tohi loo nahi po nɛ a ko ye ní ngɛ yoku ɔ hɛ mi.”

4 Lɔ ɔ he ɔ, Mose kó tɛ tɛtlɛɛ enyɔ kaa kekle ní ɔmɛ, nɛ e te si mɔtu mla nɛ e kuɔ kɛ ho Sinai Yoku ɔ nɔ ya kaa bɔ nɛ Yehowa fã lɛ ɔ. E hɛɛ tɛ tɛtlɛɛ enyɔ ɔmɛ ngɛ e dɛ mi. 5 Kɛkɛ nɛ Yehowa kple si kɛ ba ngɛ bɔku ɔ mi nɛ e ba da Mose kasa nya nɛ e jaje e biɛ Yehowa a. 6 Yehowa ba be ngɛ Mose hɛ mi nɛ e de ke: “Yehowa, Yehowa, Mawu mɔbɔ nalɔ nɛ e mi mi sãã lɛ,* nɛ e mi mi fu we mla, nɛ e suɔmi nɛ se pui ɔ kɛ e we anɔkuale yemi ɔ hiɛ babauu ɔ. 7 E jeɔ e suɔmi nɛ se pui ɔ kpo kɛ tsɔɔ nimli akpehi, nɛ e ngɔɔ tɔmi kɛ tue gbomi kɛ yayami kɛ kee, se e be hae nɛ ni nɛmɛ nɛ a yeɔ fɔ ɔ nɛ a ye a he kɔkɔɔkɔ. E ngɔɔ tsɛmɛ a tɔmi he tue gblami kɛ baa a bimɛ, kɛ a bibimɛ, kɛ yi nɔ etɛne kɛ eywiɛne tsuo a nɔ.”

8 Mose he sɔ nɛ e kplã si ngɛ zugba nɛ e kɛ e hɛ mi bu si. 9 Kɛkɛ nɛ Mose de ke: “Oo Yehowa, e ngɛ mi kaa wa ji nihi nɛ wa tue mi ti* mohu lɛɛ, se amlɔ nɛ ɔ, ke ye hɛ mi ba nyami ngɛ o hɛ mi ɔ, lɛɛ i kpa mo pɛɛ Yehowa, moo hi wa kpɛti nɛ o kɛ wɔ nɛ ya. Ngɔɔ wa tɔmi ɔmɛ kɛ wa yayami ɔmɛ kɛ ke wɔ, nɛ o ngɔ wɔ kɛ pee mo nitsɛ o ma.” 10 Kɛkɛ nɛ e de Mose ke: “Amlɔ nɛ ɔ, i kɛ nyɛ ngɛ soe: Ma pee nyakpɛ níhi nɛ a pee we* eko hyɛ ngɛ zugba a nɔ tsuo, loo ngɛ je ma amɛ tsuo a kpɛti ngɛ o we bi ɔmɛ tsuo a hɛ mi, nɛ nihi nɛ a bɔle nyɛ ɔ tsuo maa na Yehowa ní tsumi, ejakaa nɔ́ nɛ ma pee ɔ ngɛ nyakpɛ.

11 “Moo bu nɔ́ nɛ i ngɛ mo fãe mwɔnɛ ɔ ke o pee ɔ tue. I ngɛ Amor bi ɔmɛ, Kanaan bi ɔmɛ, Hit bi ɔmɛ, Periz bi ɔmɛ, Hiv bi ɔmɛ, kɛ Yebus bi ɔmɛ fiee ngɛ o hɛ mi. 12 Nyɛɛ hyɛ nɛ hi nɛ nyɛɛ kɛ nihi nɛ a ngɛ zugba a nɔ he nɛ nyɛ yaa a nɛ ko so somi ko, ke pi jã a, e maa pee klama kɛ ha nyɛ. 13 Nyɛɛ hule a we afɔle sami la tɛ ɔmɛ, nɛ nyɛɛ ywia a wɔ titima amɛ, nɛ nyɛɛ poo a wɔ tso* ɔmɛ ngɔ pue he. 14 Nyɛ ko kplã si ha mawu kpa ko, ejakaa Yehowa ji Mawu nɛ e suɔ* kaa a ja lɛ pɛ.* Ee, e ji Mawu nɛ e suɔ nɛ a ja lɛ pɛ. 15 Nyɛɛ hyɛ nɛ hi nɛ nyɛɛ kɛ nihi nɛ a ngɛ zugba a nɔ ɔ nɛ ko so somi ko, ejakaa ke a kɛ a mawu ɔmɛ ngɛ ajuama bɔe, nɛ a ngɛ afɔle sãe kɛ ngɛ a mawu ɔmɛ hae ɔ, a ti nɔ ko maa fɔ nyɛ nine nɛ nyɛɛ kɛ lɛ ma ya ye e we afɔle sami ní ɔ eko. 16 Kɛkɛ ɔ, bɔ fɛɛ bɔ nɛ ji ɔ, nyɛ maa ngɔ a biyi ɔmɛ ekomɛ kɛ ha nyɛ binyumu ɔmɛ, nɛ a biyi ɔmɛ kɛ a mawu ɔmɛ maa bɔ ajuama, nɛ a ma ha nɛ nyɛ binyumu ɔmɛ hu kɛ a mawu ɔmɛ ma ya bɔ ajuama.

17 “Nyɛ ko sile dade kɛ pee mawuhi.

18 “Nyɛɛ ye Abolo Nɛ Masa Be Mi Gbijlɔ ɔ. Nyɛɛ ye abolo nɛ masa be mi kaa bɔ nɛ i fã nyɛ ɔ; nyɛɛ pee enɛ ɔ ligbi kpaago ngɛ be nɛ i to ɔ mi ngɛ Abib* nyɔhiɔ ɔ mi, ejakaa Abib nyɔhiɔ ɔ mi nɛ nyɛ je Egipt.

19 “Kekleekle binyumu fɛɛ kekleekle binyumu ɔ,* ye nɔ́. We mi lohwehi tsuo piɛɛ he, na jio, jijɔ jio. A kekleekle bimɛ nɛ a ji ekuhi ɔ, ye níhi. 20 Moo ngɔ jijɔ kɛ kpɔ̃ teji kekleekle bi. Se ke o kpɔ̃ we lɛ ɔ, lɛɛ moo ku e kuɛ. Bitɛte fɛɛ bitɛte nɛ e ngɛ o binyumu ɔmɛ a kpɛti ɔ, mo kpɔ̃ lɛ. Nɔ ko nɔ ko nɛ ko ba ye hɛ mi kɛ e dɛ gu.

21 “Nyɛ tsu ní ligbi ekpa, se ngɛ ligbi kpaagone ɔ nɔ ɔ, nyɛɛ jɔɔ nyɛ he.* Ngmɔ humi kɛ ní kpami be po, nyɛɛ jɔɔ nyɛ he.

22 “Nyɛɛ ngɔ kekleekle hwiit nɛ nyɛ ma kpa ngɛ hwiit kpami be ɔ mi ɔ kɛ ye Otsihi Gbijlɔ ɔ, kɛ Níhi A Nya Buami Gbijlɔ* ɔ ngɛ jeha a nyagbe.

23 “Daa jeha a, nyumuhi nɛ a ngɛ nyɛ kpɛti ɔ tsuo nɛ́ a ba anɔkuale Nyɔmtsɛ Yehowa, Israel Mawu ɔ hɛ mi si etɛ. 24 Ejakaa ma fiee je ma amɛ kɛ je o hɛ mi, nɛ ma ha nɛ o huzu ɔ mi ma bli, nɛ ke o yaa* Yehowa o Mawu ɔ hɛ mi si etɛ ngɛ jeha a mi ɔ, nɔ ko hɛ be kɔ̃e ngɛ o zugba a he.

25 “Koo ngɔ nɔ́ ko nɛ masa ngɛ mi kɛ piɛɛ muɔ nɛ o kɛ maa sã afɔle kɛ ha mi ɔ he. Ko ha nɛ je nɛ na afɔle nɛ o maa sã ngɛ Hetsɔmi gbijlɔ ɔ nɔ ɔ yi.

26 “Moo ngɔ o ngmɔ ɔmɛ a mi kekleekle yiblii nɛ hi pe kulaa a kɛ ba Yehowa, o Mawu ɔ we ɔ.

“Koo ngɔ apletsi nyɛ nyɔ nyu kɛ hoo e bi.”

27 Yehowa ya nɔ nɛ e de Mose ke: “Moo ngma munyu nɛ ɔmɛ kɛ fɔ si, ejakaa kɛ gu munyu nɛ ɔmɛ a nɔ ɔ, i kɛ mo kɛ Israel ngɛ soe.” 28 Nɛ e kɛ Yehowa hi lejɛ ɔ nyɔ kɛ pia ligbi 40. E yi ní nɛ e nui nyu hulɔ. Nɛ Mawu* ngma somi munyu ɔmɛ, nɛ ji Kita Nyɔngma Amɛ* ngɛ tɛ tɛtlɛɛ ɔmɛ a nɔ.

29 Lɔ ɔ se ɔ, Mose kple si kɛ je Sinai Yoku ɔ nɔ. E hɛɛ Odase tɛ tɛtlɛɛ enyɔ ɔmɛ ngɛ e dɛ mi. Benɛ Mose kple si kɛ je yoku ɔ nɔ ɔ, e li kaa e hɛ mi ngɛ kpɛe akɛnɛ e kɛ Mawu ya tu munyu ɔ he je. 30 Benɛ Aaron kɛ Israel bi ɔmɛ na Mose ɔ, mɛ tsuo a na kaa e hɛ mi ngɛ kpɛe, lɔ ɔ he ɔ, a ye gbeye kaa a maa su e he.

31 Se Mose tsɛ mɛ, lɔ ɔ he ɔ, Aaron kɛ Israel ganɔ ɔmɛ tsuo ba Mose ngɔ, nɛ Mose kɛ mɛ tu munyu. 32 Lɔ ɔ se ɔ, Israel bi ɔmɛ tsuo ba e ngɔ, nɛ e ngɔ kitahi tsuo nɛ Yehowa kɛ ha lɛ ngɛ Sinai Yoku ɔ nɔ ɔ kɛ ha mɛ. 33 Ke Mose kɛ mɛ tu munyu ta a, e ngɔɔ hɛ mi hami nɔ́ kɛ haa e hɛ mi. 34 Se be fɛɛ be nɛ Mose maa ya Yehowa ngɔ ngɛ kpe he bo tsu ɔ mi konɛ e kɛ lɛ nɛ ya tu munyu ɔ, e jeɔ hɛ mi hami nɔ́ ɔ ngɛ e hɛ mi kɛ ya siɔ be nɛ e maa je kpo. Lɔ ɔ se ɔ, e jeɔ lejɛ ɔ kɛ yaa Israel bi ɔmɛ a ngɔ nɛ e ya deɔ mɛ kitahi nɛ Mawu kɛ ha lɛ ɔ. 35 Ke Israel bi ɔmɛ na kaa Mose hɛ mi ngɛ kpɛe ɔ, e kpaleɔ ngɔɔ hɛ mi hami nɔ́ ɔ kɛ haa e hɛ mi kɛ ya siɔ be nɛ e maa kpale kɛ ya sɛ kpe he bo tsu ɔ mi ekohu konɛ e kɛ Mawu* nɛ ya tu munyu.

35 Pee se ɔ, Mose bua Israel asafo ɔ tsuo nya, nɛ e de mɛ ke: “Níhi nɛ Yehowa fã ke waa pee ji nɛ ɔ nɛ: 2 Nyɛ tsu ní ligbi ekpa, se ligbi kpaagone ɔ maa pee ligbi klɔuklɔu ha nyɛ, e ji hejɔɔmi ligbi nɛ nyɛɛ kɛ maa jɔɔ nyɛ he kulaa kɛ ha Yehowa. Nɔ fɛɛ nɔ nɛ e ma tsu ní ngɛ jamɛ a ligbi ɔ nɔ ɔ, á gbe lɛ. 3 Nyɛ ko slɛ la ngɛ nyɛ hi he ɔmɛ ngɛ Hejɔɔmi Ligbi ɔ nɔ.”

4 Jehanɛ ɔ, Mose de Israel asafo ɔ tsuo ke: “Nɔ́ nɛ Yehowa fã ke waa pee ji nɛ ɔ nɛ, 5 ‘Nyɛɛ ngɔ níhi nɛ nyɛ ngɛ ɔ eko kɛ ba ke Yehowa. Nɔ fɛɛ nɔ nɛ e tsui suɔ ɔ, é ba ke Yehowa ní: sika tsu, sika hiɔ, akɔblee, 6 kpã bluu, lohwe he bwɔmi nɛ hɛɛ alamua tu su,* bo tsutsu, klala kpakpa, apletsi he bwɔmi, 7 agbosu he womihi nɛ a wo lɛ tsopa tsutsu, pa mi gbe he womihi, akasia tso, 8 nu nɛ a kɛ maa wo kane ɔmɛ a mi, balsam nɛ a kɛ maa pee nɔ pɔmi nu, kɛ tsopa kɛ e he via, 9 oniks* tɛhi, kɛ tɛ kpahi nɛ a maa ma ngɛ efɔd ɔ kɛ gugue nɔ hami nɔ́ ɔ nɔ.

10 “‘Nguɛ nya ní tsuli ɔmɛ* tsuo nɛ a ngɛ nyɛ kpɛti ɔ, a ba nɛ a ba pee nɔ́ fɛɛ nɔ́ nɛ Yehowa fã ke a pee ɔ; 11 bo tsu ɔ kɛ e he níhi tsuo, e he hami nɔ́ ɔ, e gbowe ɔmɛ, e si mami tso ɔmɛ, e mi biami tso ɔmɛ, e titima amɛ, kɛ nɔ dami ní ɔmɛ; 12 Daka a kɛ e tso ɔmɛ, nya nɔ́ ɔ, kɛ tsu mi pomi bo nɛ a kɛ maa tsi níhi a hɛ mi ɔ; 13 okplɔɔ ɔ kɛ e tso ɔmɛ kɛ e he ní ɔmɛ tsuo kɛ hɛ mi mami abolo ɔ; 14 kane tso ɔ nɛ a kɛ kane ɔ maa ma nɔ ɔ kɛ e he ní ɔmɛ kɛ e kane ɔmɛ, kɛ nu nɛ a kɛ maa wo kane ɔmɛ a mi ɔ; 15 afɔle sami la tɛ nɛ a kɛ maa sã tsopa kɛ e he via a kɛ e tso ɔmɛ; nɔ pɔmi nu ɔ kɛ tsopa kɛ e he via a; patesia* nɛ a kɛ maa wo bo tsu ɔ nya a; 16 afɔle sami la tɛ nɛ a maa sã sami afɔle ngɛ nɔ ɔ, kɛ e we lo tsukɔmi dade nɛ a kɛ akɔblee pee ɔ, e tso ɔmɛ kɛ e he ní ɔmɛ tsuo; e kã a kɛ nɔ́ nɛ a kɛ kã a maa ma nɔ ɔ; 17 bohi nɛ a ma kpla si ngɛ yale ɔ he ɔ, e titima amɛ kɛ nɔ dami ní ɔmɛ; patesia* nɛ a kɛ maa wo yale ɔ nya a; 18 bo tsu ɔ plɛɛko ɔmɛ, kɛ yale ɔ plɛɛko ɔmɛ kɛ a kpã amɛ; 19 tadehi nɛ a lo saminyawiiwi nɛ a kɛ ma sɔmɔ ngɛ jami he ɔ, osɔfo Aaron tade klɔuklɔu ɔmɛ, kɛ e bimɛ ɔmɛ a tadehi nɛ a kɛ ma sɔmɔ kaa osɔfohi ɔ.’”

20 Enɛ ɔ he ɔ, Israel asafo ɔ tsuo je Mose hɛ mi kɛ ho. 21 Kɛkɛ nɛ nihi tsuo nɛ e ta a tsui he ɔ ngɔ a nike ní ɔmɛ kɛ ba ha Yehowa konɛ a kɛ pee bo tsu ɔ, kɛ níhi tsuo nɛ a kɛ ma sɔmɔ ngɛ lejɛ ɔ, kɛ tade klɔuklɔu ɔmɛ. 22 A ya nɔ nɛ a kɛ ní ɔmɛ ba, nyumuhi kɛ yihi tsuo je a tsui mi nɛ a ngɔ gahi nɛ a maa ngɛ tade gugue nɔ, tue nya níhi, nguɛ níhi, kɛ june ní kpahi kɛ sika tsu ní slɔɔtoslɔɔtohi tsuo kɛ ba. Mɛ tsuo a ngɔ a sika tsu afɔle ɔmɛ* kɛ ba ha Yehowa. 23 Nɛ nihi tsuo nɛ a ngɛ kpã bluu, lohwe he bwɔmi nɛ hɛɛ alamua tu su, bo tsutsu, klala kpakpa, apletsi he bwɔmi, agbosu he womihi nɛ a wo lɛ tsopa tsutsu, kɛ pa mi gbe he womihi ɔ ngɔ kɛ ba. 24 Nihi tsuo nɛ a ngɛ sika hiɔ kɛ akɔblee ɔ ngɔ kɛ ba ke Yehowa, nɛ nihi tsuo nɛ a ngɛ akasia tso nɛ a kɛ ma nyɛ ma tsu ní tsumi ɔ eko ɔ hu ngɔ kɛ ba.

25 Yihi tsuo nɛ a le nguɛ nya ní tsumi ɔ ngɔ a nine kɛ lo níhi, nɛ a ngɔ níhi nɛ a lo ɔ kɛ ba: kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa. 26 Yihi tsuo nɛ a le nguɛ nya ní tsumi ɔ je a tsui mi nɛ a ngɔ apletsi he bwɔmi kɛ tslɔ kpa.

27 Ganɔ ɔmɛ ngɔ oniks tɛhi kɛ tɛ kpahi nɛ a maa ma ngɛ efɔd ɔ kɛ gugue nɔ hami nɔ́ ɔ nɔ, 28 kɛ balsam nu, kɛ nu nɛ a kɛ maa wo kane ɔmɛ a mi, kɛ nɔ́ nɛ a kɛ maa pee nɔ pɔmi nu, kɛ nɔ́ nɛ a kɛ maa pee tsopa kɛ e he via a kɛ ba. 29 Nyumuhi kɛ yihi tsuo nɛ a tsui suɔ ɔ ngɔ níhi kɛ ba konɛ a kɛ ba tsu ní tsumi nɛ Yehowa fã Mose kaa a tsu ɔ; Israel bi ɔmɛ je a tsui mi faa nɛ a kɛ ní nɛ ɔmɛ ba sã afɔle ha Yehowa.

30 Kɛkɛ nɛ Mose de Israel bi ɔmɛ ke: “Hyɛ, Yehowa hla Bezalel, nɛ ji Hur binyumu Uri bi ɔ kɛ je Yuda wɛtso ɔ mi. 31 Mawu ngɔ e mumi ɔ kɛ wo e mi, nɛ e ha lɛ juɛmi, nɔ́ sisi numi, kɛ nile nɛ́ ma ha nɛ e tsu ga ní tsumi slɔɔtohi tsuo, 32 konɛ e le ní tɛnimi, nɛ e pee sika tsu, sika hiɔ, kɛ akɔblee níhi, 33 nɛ́ e pee tɛhi nɛ a he jua wa he ní tsulɔ, nɛ e pee nɔ́ fɛɛ nɔ́ nɛ ga ní tsulɔ kɛ tso peeɔ ɔ. 34 E kɛ wo Bezalel tsui mi kaa e tsɔɔ ni kpahi ní tsumi ɔ, e kɛ Oholiab, nɛ ji Ahisamak nɛ e je Dan wɛtso ɔ mi ɔ binyumu ɔ. 35 E ha mɛ ga ní tsumi he nile* nɛ́ ma ha nɛ a tsu níhi tsuo nɛ ga ní tsulɔ tsuɔ ɔ, nɛ́ a ngɔ kpã bluu, lohwe he bwɔmi nɛ hɛɛ alamua tu su, bo tsutsu kɛ klala kpakpa kɛ lo níhi. Nyumu nɛ ɔmɛ ma tsu ní tsumi fɛɛ ní tsumi, kɛ ga ní tsumihi tsuo.

36 “Bezalel, Oholiab kɛ nɔ fɛɛ nɔ nɛ e le nguɛ nya ní tsumi* ɔ maa pee kpe he bo tsu ɔ he ní ɔmɛ tsuo kaa bɔ nɛ Yehowa fã ke a pee ɔ. Yehowa ha mɛ juɛmi konɛ a nyɛ nɛ a kɛ tsu ní tsumi ɔ saminya.”

2 Kɛkɛ nɛ Mose tsɛ Bezalel kɛ Oholiab kɛ nɔ fɛɛ nɔ nɛ e le nguɛ nya ní tsumi nɛ Yehowa ha lɛ nile ɔ,* nɛ ji nɔ fɛɛ nɔ nɛ e je e tsui mi nɛ e ngɔ e he kɛ ha faa kaa e ma tsu ní ɔ. 3 Kɛkɛ nɛ a ngɔ nike ní nɛ Israel bi ɔmɛ kɛ ba konɛ a kɛ tsu ní tsumi klɔuklɔu ɔ tsuo ngɛ Mose dɛ. Se daa mɔtu ɔ, Israel bi ɔmɛ jeɔ a tsui mi nɛ a ngɔɔ nike ní kɛ ba haa lɛ.

4 Lɔ ɔ he ɔ, benɛ a je ní tsumi klɔuklɔu ɔ sisi ɔ, nihi nɛ a le nguɛ nya ní tsumi ɔ tsuo bɔni bami setsɔsetsɔ, 5 nɛ a ba ngɛ Mose dee ke: “Níhi nɛ ni ɔmɛ kɛ ngɛ bae ɔ hiɛ pe nɔ́ nɛ wa hia nɛ waa kɛ ma tsu ní tsumi nɛ Yehowa fã ke wa tsu ɔ.” 6 Lɔ ɔ he ɔ, Mose fã ke a fia adafi ngɛ sito he ɔ tsuo ke: “Nyumuhi kɛ yihi, nyɛ ko ngɔ níhi nɛ nyɛɛ kɛ ngɛ bae kaa nike ní klɔuklɔu ɔ kɛ ba hu.” Enɛ ɔ he ɔ, a tsi ni ɔmɛ a nya kaa a ko ngɔ nɔ́ ko nɔ́ ko kɛ ba hu. 7 Níhi nɛ a kɛ ba a maa su kɛ ní tsumi ɔ tsuo tsumi, nɛ e hiɛ pe jã po.

8 Nguɛ nya ní tsuli ɔmɛ tsuo ngɔ klala kpakpa nɛ a lo, kpã bluu, lohwe he bwɔmi nɛ hɛɛ alamua tu su,* kɛ bo tsutsu kɛ lo bo tsu ɔ he bo nyɔngma, nɛ a ngɔ kɛ pee bo tsu ɔ; nɛ e* lo kerubhi kɛ wo a mi. 9 Bo tsu ɔ he bo ɔ eko fɛɛ eko kami ji kɔni fã* 28, nɛ e blimi ji kɔni fã 4. Bo tsu ɔ he bo ɔmɛ tsuo a kami kɛ a blimi sɔ fiee. 10 Kɛkɛ nɛ Bezalel kpɛ bo tsu ɔ he bo ɔ enuɔ kɛ tsa a sibi a nya, nɛ e kpɛ bo tsu ɔ he bo enuɔ nɛ piɛ ɔ hu kɛ tsa a sibi a nya. 11 Lɔ ɔ se ɔ, e ngɔ kpã bluu kɛ pee gahi ngɛ bo tsu ɔ he bo ɔ kake nya, ngɛ he nɛ a maa kpe a nya ngɛ ɔ. E pee jã nɔuu kɛ wo bo tsu ɔ he bo nɛ e ngɛ nyagbe kulaa a hu nya, ngɛ he nɛ a maa kpe a nya ngɛ ɔ. 12 E pee ga 50 kɛ wo bo tsu ɔ he bo kake nya, nɛ e pee ga 50 kɛ wo bo tsu ɔ he bo kake ɔ hu nya ngɛ he nɛ a maa kpe a nya ngɛ ɔ, konɛ ga amɛ a hɛ mi nɛ kpee a sibi. 13 Lɔ ɔ se ɔ, e ngɔ sika tsu kɛ pee gbowe 50, nɛ e ngɔ gbowe ɔmɛ kɛ la gahi nɛ a ngɛ bo tsu ɔ he bo ɔmɛ a nya a mi, konɛ bo tsu ɔ nɛ pee nɔ́ mluku kake.

14 Lɔ ɔ se ɔ, e ngɔ apletsi he bwɔmi kɛ pee bo tsu ɔ he bo nɛ a kɛ ma bu bo tsu ɔ nɔ. E pee bo tsu ɔ he bo 11. 15 Bo tsu ɔ he bo ɔ eko fɛɛ eko kami ji kɔni fã 30, nɛ e blimi ji kɔni fã 4. Bo tsu ɔ he bo 11 ɔmɛ tsuo a kami kɛ a blimi sɔ fiee. 16 Kɛkɛ nɛ e ngɔ bo tsu ɔ he bo enuɔ kɛ kpe a sibi a nya, nɛ e ngɔ ekpa a nɛ piɛ ɔ hu kɛ kpe a sibi a nya. 17 Lɔ ɔ se ɔ, e pee ga 50 ngɛ bo tsu ɔ he bo nɛ e ngɛ nyagbe kulaa a nya, ngɛ he nɛ a maa kpe a nya ngɛ ɔ, nɛ e pee ga 50 ngɛ bo tsu ɔ he bo kake ɔ hu nya, ngɛ he nɛ a maa kpe a nya ngɛ ɔ. 18 Nɛ e pee akɔblee gbowe 50 konɛ a kɛ la bo tsu ɔ he bo enyɔ ɔmɛ a mi kɛ kpe, konɛ bo tsu ɔ he bo ɔ nɛ pee nɔ́ mluku kake.

19 E ngɔ agbosu he womihi nɛ a wo lɛ tsopa tsutsu kɛ pee bo tsu ɔ nɔ hami nɔ́, nɛ e ngɔ pa mi gbe he womihi kɛ pee nɔ hami nɔ́ konɛ a kɛ ha lɔ ɔ hu nɔ.

20 Kɛkɛ nɛ e ngɔ akasia tso kɛ pee bo tsu ɔ si mami tsohi nɛ a daa si tlɔmɔɔ ɔ. 21 Si mami tso ɔmɛ eko fɛɛ eko kami ji kɔni fã nyɔngma, nɛ e blimi ji kɔni fã kake kɛ fã. 22 Si mami tso ɔmɛ eko fɛɛ eko ngɛ sisi kpɔ* enyɔ; kpɔ ɔmɛ ngɛ a sibi a hanɔ. Jã ji bɔ nɛ e pee bo tsu ɔ he si mami tso ɔmɛ tsuo. 23 Lɔ ɔ he ɔ, e pee bo tsu ɔ he si mami tsohi nɛ a kɛ maa ma bo tsu ɔ kasa fã nɛ tsɔɔ woyi je ɔ, e pee si mami tso 20 ngɛ woyi je. 24 Kɛkɛ nɛ e pee sika hiɔ nɔ dami nɔ́ 40 nɛ a kɛ wo si mami tso 20 ɔmɛ a sisi. A kɛ nɔ dami nɔ́ enyɔ wo si mami tso kake sisi kɛ ha e sisi kpɔ enyɔ ɔmɛ, nɛ a kɛ nɔ dami nɔ́ enyɔ wo si mami tso fɛɛ si mami tso nɛ nyɛɛ se ɔ sisi kɛ ha a sisi kpɔ enyɔ ɔmɛ. 25 Bo tsu ɔ kasa fã nɛ tsɔɔ yiti je ɔ hu, e pee si mami tso 20, 26 kɛ a sika hiɔ nɔ dami nɔ́ 40 ngɛ lejɛ ɔ. Nɔ dami nɔ́ enyɔ ngɛ si mami tso kake sisi, nɛ nɔ dami nɔ́ enyɔ ngɛ si mami tso kpa amɛ eko fɛɛ eko sisi.

27 Se bo tsu ɔ se he nɛ tsɔɔ pusinɔ he je ɔ lɛɛ, e pee si mami tso ekpa ngɛ lejɛ ɔ. 28 E pee si mami tso enyɔ nɛ a kɛ pee kɔ̃ nya tsohi ngɛ bo tsu ɔ se kɔ̃ nya enyɔ ɔmɛ. 29 Kɔ̃ nya tso ɔmɛ bɔ he enyɔ kɛ je sisi kɛ ya hiɔwe, nɛ a ya pi kekle ga a. Jã nɛ e pee kɔ̃ nya tso enyɔ ɔmɛ tsuo. 30 Lɔ ɔ he ɔ, si mami tso ɔmɛ tsuo a yibɔ ji kpaanyɔ, kɛ a he sika hiɔ nɔ dami nɔ́ 16, nɔ dami nɔ́ enyɔ ngɛ si mami tso ɔ eko fɛɛ eko sisi.

31 Jehanɛ ɔ, e ngɔ akasia tso kɛ pee tso tlaatlaa. E ngɔ enuɔ kɛ bia si mami tso ɔmɛ a mi ngɛ bo tsu ɔ kasa kake, 32 nɛ e ngɔ tso tlaatlaa enuɔ kɛ bia si mami tsohi nɛ a ngɛ bo tsu ɔ kasa kake ɔ mi hulɔ, nɛ e ngɔ tso tlaatlaa enuɔ kɛ bia si mami tsohi nɛ a ngɛ bo tsu ɔ se ɔ mi, he nɛ tsɔɔ pusinɔ he je ɔ. 33 Kɛkɛ nɛ e pee kpɛti tso tlalaa a, nɛ e ha nɛ e bia si mami tso ɔmɛ a mi kɛ je kɔ̃ nya hiɛ kɛ ya si kɔ̃ nya hiɛ. 34 E ngɔ sika tsu kɛ ha si mami tso ɔmɛ a he, nɛ e ngɔ sika tsu kɛ pee ga amɛ konɛ a ngɔ tso tlaatlaa amɛ kɛ hɔɔ a mi, nɛ e kɛ sika tsu ha tso tlaatlaa amɛ a he.

35 Jehanɛ ɔ, e ngɔ kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo kɛ pee tsu mi pomi bo. E lo kerubhi kɛ wo mi. 36 Nɛ e ngɔ akasia tso kɛ pee e titima eywiɛ, nɛ e ngɔ sika tsu kɛ ha a he, nɛ e ngɔ sika tsu kɛ pee gbowehi, nɛ e ngɔ sika hiɔ kɛ pee titima amɛ a nɔ dami nɔ́ eywiɛ. 37 Lɔ ɔ se ɔ, e ngɔ kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo, nɛ e lo mɛ kɛ bla kɛ pee bo tsu ɔ nya patesia,* 38 nɛ e pee e titima enuɔ, kɛ a gbowehi. E ngɔ sika tsu kɛ ha a yi mi ɔmɛ, kɛ a mi lami ní ɔmɛ* a he, se a nɔ dami nɔ́ enuɔ ɔmɛ lɛɛ akɔblee lɛ e kɛ pee.

37 Jehanɛ ɔ, Bezalel ngɔ akasia tso kɛ pee Daka a. E kami ji kɔni fã* enyɔ kɛ fã, e blimi ji kɔni fã kake kɛ fã, nɛ e hiɔwe yami ji kɔni fã kake kɛ fã. 2 E ngɔ sika tsu ngmingmiingmi kɛ ha e mi kɛ e he tsuo, nɛ e ngɔ sika tsu kɛ wo zã kɛ bɔle e nya a. 3 Lɔ ɔ se ɔ, e kɛ sika tsu pee ga eywiɛ kɛ wo e nane eywiɛ ɔmɛ a yi nɔ, enyɔ ngɛ kasa hiɛ, nɛ enyɔ hu ngɛ kasa hiɛ. 4 Jehanɛ ɔ, e hlɔ akasia tsohi nɛ e ngɔ sika tsu kɛ ha a he. 5 Kɛkɛ nɛ e ngɔ tso ɔmɛ kɛ hɔɔ ga amɛ nɛ a ngɛ Daka a kasa he ɔmɛ a mi konɛ a kɛ hɛɛ Daka a.

6 E ngɔ sika tsu ngmingmiingmi kɛ pee e nya nɔ́ ɔ. E kami ji kɔni fã enyɔ kɛ fã, nɛ e blimi ji kɔni fã kake kɛ fã. 7 Jehanɛ ɔ, e kɛ hamle kó sika tsu kɛ pee kerub enyɔ ngɛ daka a nya nɔ́ ɔ nɔ hiɛ kɛ hiɛ. 8 Kerub ɔ kake ngɛ daka a nya nɔ́ ɔ nɔ ngɛ hiɛ, nɛ kake hu ngɛ hiɛ. E pee kerub ɔmɛ ngɛ daka a nya nɔ́ ɔ hiɛ kɛ hiɛ tsuo. 9 Kerub enyɔ ɔmɛ gbɛ a pɛli ɔmɛ a mi kɛ ya hiɔwe, nɛ a kɛ a pɛli ɔmɛ ha nya nɔ́ ɔ nɔ. A plɛ a hɛ mi kɛ tsɔɔ a sibi, nɛ a ma a yi si kɛ ngɛ nya nɔ́ ɔ nɔ hyɛe.

10 Jehanɛ ɔ, e ngɔ akasia tso kɛ pee okplɔɔ ɔ. E kami ji kɔni fã enyɔ, e blimi ji kɔni fã kake, nɛ e hiɔwe yami ji kɔni fã kake kɛ fã. 11 E ngɔ sika tsu ngmingmiingmi kɛ ha he, nɛ e ngɔ sika tsu kɛ wo zã kɛ bɔle e nya a. 12 Lɔ ɔ se ɔ, e pee kla nɛ e blimi ngɛ kaa dɛ mi blimi* kɛ bɔle lɛ, nɛ e ngɔ sika tsu kɛ wo zã kɛ bɔle kla a nya kɛ kpe. 13 Jehanɛ ɔ, e ngɔ sika tsu kɛ pee ga eywiɛ kɛ wo kɔ̃ nya eywiɛ ɔmɛ, ngɛ he nɛ nane eywiɛ ɔmɛ ngɛ ɔ. 14 Ga amɛ nɛ a kɛ tso ɔmɛ maa hɔɔ a mi kɛ hɛɛ okplɔɔ ɔ ngɛ kla a kasa nya haa. 15 Kɛkɛ nɛ e hlɔ akasia tsohi nɛ a kɛ maa hɛɛ okplɔɔ ɔ, nɛ e ngɔ sika tsu kɛ ha a he. 16 Lɔ ɔ se ɔ, e ngɔ sika tsu ngmingmiingmi kɛ pee níhi nɛ́ a kɛ maa ma okplɔɔ ɔ nɔ ɔ; okplɔɔ ɔ kãhi, e kplu wawi, e tsesihi, kɛ e kplu nguahi nɛ a kɛ ma plɛ dã afɔlehi.

17 Jehanɛ ɔ, e ngɔ sika tsu ngmingmiingmi kɛ pee kane tso ɔ. E ngɔ hamle kɛ kó sika tsu kɛ pee kane tso ɔ. E sisi ɔ, e kpɛti tso ɔ, e kplu ɔmɛ, e kpɔ ɔmɛ, kɛ e mɔmɔ ɔmɛ. E ha nɛ lɛ tsuo tsa kɛ pee nɔ́ mluku kake. 18 Kɔni ekpa ngɛ kane tso ɔ he. Kɔni etɛ ngɛ kane tso ɔ hiɛ, nɛ etɛ hu ngɛ hiɛ. 19 E pee kplu etɛ nɛ a ngɛ kaa almond mɔmɔhi ngɛ kɔni etɛ ɔmɛ a he ngɛ kane tso ɔ kasa fã kake, e pee kpɔhi kɛ mɔmɔhi hu kɛ wo he, ke kpɔ kake ba a kɛkɛ mɔmɔ kake hu ba, nɛ e pee kplu etɛ nɛ a ngɛ kaa almond mɔmɔhi ngɛ kasa fã kake ɔ hulɔ, e pee kpɔhi kɛ mɔmɔhi hu kɛ wo he, ke kpɔ kake ba a kɛkɛ mɔmɔ kake hu ba. Bɔ nɛ e pee kɔni ekpa amɛ nɛ a gba ngɛ kane tso ɔ kpɛti tso ɔ he ha ji nɛ ɔ nɛ. 20 E pee kplu eywiɛ nɛ a ngɛ kaa almond mɔmɔhi ngɛ kane tso ɔ kpɛti tso ɔ he, e pee kpɔhi kɛ mɔmɔhi hu kɛ wo he, ke kpɔ kake ba a kɛkɛ mɔmɔ kake hu ba. 21 Kpɔ ngɛ kekle kɔni enyɔ ɔmɛ nɛ a ngɛ kpɛti tso ɔ he ɔ sisi, nɛ kpɔ ngɛ kɔni enyɔ nɛ a nyɛɛ se ɔ hu a sisi, nɛ kpɔ ngɛ kɔni enyɔ nɛ a nyɛɛ lɔ ɔ hu se ɔ sisi. Bɔ nɛ e pee kɔni ekpa amɛ nɛ a ngɛ kane tso ɔ kpɛti tso ɔ he ha ji nɛ ɔ nɛ. 22 E kɛ hamle kó sika tsu ngmingmiingmi kɛ pee kane tso mluku ɔ, e kpɔ ɔmɛ, kɛ e kɔni ɔmɛ, nɛ e pee nɔ́ mluku kake. 23 Kɛkɛ nɛ e ngɔ sika tsu ngmingmiingmi kɛ pee e kane kpaago ɔmɛ kɛ e we abɛɛle ɔmɛ kɛ e la jemi ní ɔmɛ. 24 E ngɔ sika tsu ngmingmiingmi talɛnt* kake kɛ pee kane tso ɔ kɛ e he ní ɔmɛ tsuo.

25 Jehanɛ ɔ, e ngɔ akasia tso kɛ pee afɔle sami la tɛ nɛ a kɛ maa sã tsopa kɛ e he via a. E pee lɛ kɔ̃ nya eywiɛ. E kami ji kɔni fã kake, e blimi ji kɔni fã kake, nɛ e hiɔwe yami ji kɔni fã enyɔ. E pee e kɛ e koli ɔmɛ tsuo nɔ́ mluku kake. 26 E ngɔ sika tsu ngmingmiingmi kɛ ha he; e yi mi ɔ kɛ e he ɔ tsuo kɛ e koli ɔmɛ a he, nɛ e ngɔ sika tsu kɛ wo zã kɛ bɔle e nya a. 27 E ngɔ sika tsu kɛ pee ga enyɔ kɛ wo he ngɛ zã a sisi ngɛ hiɛ kɛ hiɛ konɛ a ngɔ tsohi kɛ hɔɔ a mi kɛ hɛɛ. 28 Lɔ ɔ se ɔ, e hlɔ akasia tsohi nɛ e ngɔ sika tsu kɛ ha a he. 29 Jehanɛ ɔ, e pee nɔ pɔmi nu klɔuklɔu ɔ kɛ tsopa kɛ e he via ngmingmiingmi ɔ, nɛ a futu lɛ saminya.*

38 E ngɔ akasia tso kɛ pee afɔle sami la tɛ nɛ a maa sã sami afɔle ngɛ nɔ. E ngɛ kɔ̃ nya eywiɛ nɛ a sɔ, e kami ji kɔni fã* enuɔ, e blimi ji kɔni fã enuɔ, nɛ e hiɔwe yami ji kɔni fã etɛ. 2 Nɛ e pee kolihi ngɛ e kɔ̃ nya eywiɛ ɔmɛ a nɔ. Koli ɔmɛ kɛ afɔle sami la tɛ ɔ tsuo bla kɛ pee nɔ́ mluku kake. Lɔ ɔ se ɔ, e ngɔ akɔblee kɛ ha he. 3 Jehanɛ ɔ, e pee afɔle sami la tɛ ɔ he ní ɔmɛ tsuo, goga amɛ, sofi ɔmɛ, tsesi ɔmɛ, fɔɔki ɔmɛ, kɛ la jemi ní ɔmɛ. Akɔblee lɛ e kɛ pee ní ɔmɛ tsuo. 4 Jehanɛ ɔ, e ngɔ akɔblee kɛ pee lo tsukɔmi dade kɛ wo kla a sisi, kɛ yaa afɔle sami la tɛ ɔ kpɛti je. 5 E pee ga eywiɛ ngɛ e kɔ̃ nya eywiɛ ɔmɛ ngɛ lo tsukɔmi dade nɛ a kɛ akɔblee pee ɔ kasa nya konɛ a kɛ tso ɔmɛ nɛ hɔɔ mi. 6 Lɔ ɔ se ɔ, e hlɔ akasia tsohi nɛ e kɛ akɔblee ha a he. 7 E ngɔ tso ɔmɛ kɛ hɔɔ ga amɛ nɛ a ngɛ afɔle sami la tɛ ɔ kɔ̃ nya amɛ a mi konɛ a kɛ hɛɛ. E pee afɔle sami la tɛ ɔ kaa daka, nɛ blɔ ngɛ mi.

8 Jehanɛ ɔ, e pee akɔblee kã a, kɛ akɔblee kã a nɔ dami nɔ́ ɔ. E ngɔ yihi nɛ́ a to a he blɔ nya nɛ́ a tsuɔ ní ngɛ kpe he bo tsu ɔ nya a, a we ahuhuɛhi* kɛ pee.

9 Kɛkɛ nɛ e pee yale ɔ. E ngɔ klala kpakpa nɛ a lo kɛ pee bo nɛ́ e kami ji kɔni fã 100 kɛ kpla yale ɔ kasa fã nɛ tsɔɔ woyi je ɔ. 10 E ngɔ akɔblee kɛ pee titima 20 kɛ nɔ dami nɔ́ 20, nɛ e ngɔ sika hiɔ kɛ pee titima amɛ a gbowe ɔmɛ kɛ a mi lami ní ɔmɛ.* 11 Jehanɛ hu ɔ, bo nɛ e kami ji kɔni fã 100 kplaa si ngɛ yiti je. E ngɔ akɔblee kɛ pee a titima 20 kɛ a nɔ dami nɔ́ 20 ɔmɛ. E ngɔ sika hiɔ kɛ pee titima amɛ a gbowe ɔmɛ kɛ a mi lami ní ɔmɛ.* 12 Se bo nɛ e kpla si ngɛ pusinɔ he je ɔ lɛɛ e kami ji kɔni fã 50. Titima nyɔngma kɛ a nɔ dami nɔ́ nyɔngma lɛ ngɛ lejɛ ɔ. E kɛ sika hiɔ lɛ pee a gbowe ɔmɛ kɛ a mi lami ní ɔmɛ.* 13 Nɔ́ nɛ ngɛ puje he blɔ ɔ hu blimi ji kɔni fã 50. 14 Bo nɛ e kami ji kɔni fã 15 kplaa si ngɛ yale ɔ nya blɔ kasa kake, nɛ titima etɛ kɛ nɔ dami nɔ́ etɛ ngɛ lejɛ ɔ. 15 Bo nɛ e kami ji kɔni fã 15 kplaa si ngɛ yale ɔ nya blɔ kasa kake ɔ hulɔ, nɛ titima etɛ kɛ nɔ dami nɔ́ etɛ hu ngɛ lejɛ ɔ. 16 Klala kpakpa nɛ́ a lo nɛ a kɛ pee bohi nɛ ngɛ yale ɔ he ɔ tsuo. 17 Akɔblee nɛ a kɛ pee titima amɛ a nɔ dami ní ɔmɛ, nɛ a kɛ sika hiɔ pee gbowe ɔmɛ kɛ a mi lami ní ɔmɛ.* A kɛ sika hiɔ ha titima amɛ a yi mi ɔmɛ, nɛ a ngɔ sika hiɔ kɛ pee yale ɔ titima amɛ tsuo a mi lami ní ɔmɛ.

18 Kpã bluu, lohwe he bwɔmi nɛ hɛɛ alamua tu su,* bo tsutsu, kɛ klala kpakpa nɛ́ a lo nɛ a kɛ pee yale ɔ nya patesia a.* E kami ji kɔni fã 20, nɛ e hiɔwe yami ji kɔni fã 5. E hiɔwe yami kɛ yale ɔ he bo ɔmɛ nɛ a kplaa si ɔ a hiɔwe yami sɔ. 19 Akɔblee nɛ e kɛ pee titima eywiɛ ɔmɛ kɛ a nɔ dami nɔ́ eywiɛ ɔmɛ. E kɛ sika hiɔ lɛ pee a gbowe ɔmɛ, nɛ e ngɔ sika hiɔ kɛ ha titima amɛ a yi mi ɔmɛ kɛ a mi lami ní ɔmɛ* a he. 20 Akɔblee nɛ e kɛ pee bo tsu ɔ plɛɛko ɔmɛ, kɛ plɛɛkohi tsuo nɛ a bɔle yale ɔ.

21 Níhi nɛ a kɛ pee bo tsu ɔ, nɛ ji Odase bo tsu ɔ nɛ Mose fã Levi bi ɔmɛ nɛ a bu nya a ji nɛ ɔ nɛ. Osɔfo Aaron binyumu Itamar lɛ e ha mɛ blɔ tsɔɔmi nɛ a kɛ pee. E ji a blɔ nya ní tsumi. 22 Bezalel nɛ ji Hur binyumu Uri bi ɔ nɛ e je Yuda wɛtso ɔ mi ɔ lɛ e pee níhi tsuo nɛ Yehowa fã Mose ke e pee ɔ. 23 Oholiab, nɛ ji Ahisamak nɛ e je Dan wɛtso ɔ mi ɔ binyumu ɔ piɛɛ e he. E ji ga ní tsulɔ; e loɔ ní kɛ woɔ bo mi, e loɔ kpã bluu kɛ lohwe he bwɔmi nɛ hɛɛ alamua tu su, kɛ bo tsutsu, kɛ klala kpakpa.

24 Sika tsu nɛ a kɛ tsu he klɔuklɔu ɔ ní tsumi ɔ tsuo jiɔmi kɛ sika tsu nɛ a kɛ sã fɔ̃mi afɔle ɔ jiɔmi sɔ. Lɛ tsuo jiɔmi ji talɛnt* 29 kɛ shekel* 730 kaa bɔ nɛ a po fɔ si ngɛ he klɔuklɔu ɔ.* 25 Nimli asafo ɔ mi nihi nɛ a ngma a biɛ ɔ a sika hiɔ ɔ jiɔmi ji talɛnt 100 kɛ shekel 1,775 kaa bɔ nɛ a po fɔ si ngɛ he klɔuklɔu ɔ.* 26 Shekel fã nɛ a ti nɔ fɛɛ nɔ kɛ ba a jiɔmi ji shekel nɛ a po fɔ si ngɛ he klɔuklɔu ɔ* kɛ ha nyumuhi nɛ a ye jeha 20 kɛ yaa a, nimli nɛ ɔmɛ tsuo a yibɔ ji 603,550.

27 Sika hiɔ nɛ a sile kɛ pee nɔ dami níhi ngɛ he klɔuklɔu ɔ kɛ sika hiɔ nɛ a sile kɛ pee tsu mi pomi bo ɔ nɔ dami ní ɔmɛ ɔ jiɔmi ji talɛnt 100; a ngɔ sika hiɔ talɛnt 100 kɛ pee nɔ dami níhi 100, nɔ dami nɔ́ ɔ eko fɛɛ eko ɔ, a kɛ sika hiɔ talɛnt kake lɛ pee. 28 E ngɔ sika hiɔ shekel 1,775 ɔ kɛ pee titima amɛ a gbowe ɔmɛ, nɛ e ngɔ sika hiɔ ɔ eko kɛ ha a yi mi ɔmɛ, nɛ e ngɔ mɛ kɛ kpe a sibi a nya.

29 Akɔblee nɛ a kɛ ba kaa nike ní* ɔ hiɛmi ji talɛnt 70 kɛ shekel 2,400. 30 E ngɔ enɛ ɔ kɛ pee kpe he bo tsu ɔ nya nɔ dami ní ɔmɛ, kɛ akɔblee afɔle sami la tɛ ɔ kɛ e we akɔblee lo tsukɔmi dade ɔ, kɛ afɔle sami la tɛ ɔ he ní ɔmɛ tsuo, 31 yale ɔ he nɔ dami ní ɔmɛ, yale ɔ nya nɔ dami ní ɔmɛ, kɛ bo tsu ɔ he plɛɛko ɔmɛ tsuo, kɛ yale ɔ he plɛɛko ɔmɛ tsuo.

39 A ngɔ kpã bluu, lohwe he bwɔmi nɛ hɛɛ alamua tu su,* kɛ bo tsutsu kɛ pee tadehi nɛ a lo saminyawiiwi nɛ́ a kɛ ma sɔmɔ ngɛ he klɔuklɔu ɔ. A pee Aaron tade klɔuklɔu ɔmɛ kaa bɔ nɛ Yehowa fã Mose ɔ pɛpɛɛpɛ.

2 E ngɔ sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo kɛ pee efɔd ɔ. 3 A ngɔ hamle kɛ kó sika tsu nɛ e pee pɛtɛpɛtɛ, nɛ Bezalel poo lɛ kaa kpa, nɛ e lo kɛ piɛɛ kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa a he kɛ wo efɔd ɔ mi. 4 A pee bo tsɔwi enyɔ kɛ fɔ e konɔ hiɛ kɛ hiɛ nɛ a kpɛ kɛ tsa efɔd ɔ nya enyɔ ɔmɛ. 5 Mlɛ mi fimi nɔ́* nɛ a lo nɛ a kɛ maa fi efɔd ɔ nɔ konɛ e muɛ* lɛ bɔ nɛ sa a hu, jamɛ a ní ɔmɛ nɔuu nɛ a kɛ pee; sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo. A pee lɛ kaa bɔ nɛ Yehowa fã Mose ɔ pɛpɛɛpɛ.

6 Lɔ ɔ se ɔ, a to oniks* tɛ ɔmɛ nɛ a sile sika tsu kɛ bɔle mɛ, nɛ a kpɛ́ Israel binyumu ɔmɛ a biɛhi ngɛ a nɔ kaa bɔ nɛ a kpɛ́ɔ nɔ́ ngɛ nɔ́ nya sɔumi nɔ́ nɔ ɔ. 7 E ma tɛ ɔmɛ ngɛ bo tsɔwi ɔmɛ nɛ a ngɛ efɔd ɔ konɔ ɔ nɔ kaa kaimi tɛhi kɛ ha Israel bi ɔmɛ kaa bɔ nɛ Yehowa fã Mose ɔ pɛpɛɛpɛ. 8 Lɔ ɔ se ɔ, e pee gugue nɔ hami nɔ́ ɔ nɛ e lo ní kɛ wo mi kaa bɔ nɛ a pee efɔd ɔ. Sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo nɛ e kɛ pee. 9 Ke a ku mi enyɔ ɔ, e kami kɛ e blimi sɔ. A pee gugue nɔ hami nɔ́ ɔ nɛ ke a ku mi enyɔ ɔ, e kami ji nine mi blimi kake, nɛ e blimi hu ji nine mi blimi kake.* 10 A to tɛhi ngɛ nɔ; tɛ ɔmɛ ngɛ zã eywiɛ mi. Kekle zã a mi tɛ ɔmɛ ji rubi, topaz, kɛ emerald. 11 Zã enyɔne ɔ mi tɛ ɔmɛ ji tɛkuɔis, safiro, kɛ yaspi. 12 Zã etɛne ɔ mi tɛ ɔmɛ ji leshem tɛ,* agate kɛ ametisto. 13 Zã eywiɛne ɔ mi tɛ ɔmɛ ji krisolito, oniks* kɛ yade. A ngɔ sika tsu kɛ bɔle eko fɛɛ eko he. 14 Tɛ ɔmɛ a hiɛmi kɛ Israel binyumuhi 12 ɔmɛ a biɛ ɔmɛ a hiɛmi sɔ. A kpɛ́ biɛ ɔmɛ kakaaka ngɛ tɛ ɔmɛ a nɔ kaa bɔ nɛ a kpɛ́ɔ nɔ́ ngɛ nɔ́ nya sɔumi nɔ́ nɔ ɔ. Biɛ ɔmɛ eko fɛɛ eko daa si ha wɛtso 12 ɔmɛ a kpɛti kake.

15 Lɔ ɔ se ɔ, a ngɔ sika tsu ngmingmiingmi kɛ pee kɔsɔkɔsɔ nɛ́ a tslɔ kaa kpã kɛ wo gugue nɔ hami nɔ́ ɔ nya tsuo kɛ kpe. 16 A ngɔ sika tsu kɛ pee nɔ́ tɛtlɛɛ enyɔ kɛ sika tsu ga enyɔ, nɛ a ngɔ ga enyɔ ɔmɛ kɛ wo gugue nɔ hami nɔ́ ɔ yi nɔ kɔ̃ nya enyɔ ɔmɛ a mi. 17 Lɔ ɔ se ɔ, a ngɔ sika tsu kpã enyɔ ɔmɛ kɛ hɔɔ ga enyɔ ɔmɛ nɛ a ngɛ gugue nɔ hami nɔ́ ɔ kɔ̃ nya enyɔ ɔmɛ a mi. 18 Jehanɛ ɔ, a ngɔ kpã enyɔ ɔmɛ a nya enyɔ ɔmɛ kɛ hɔ nɔ́ tɛtlɛɛ enyɔ ɔmɛ a nya, nɛ a kɛ mɛtɛ bo tsɔwi ɔ nɛ ngɛ efɔd ɔ konɔ ɔ nɔ kɛ ma e hɛ mi je. 19 Lɔ ɔ se ɔ, a ngɔ sika tsu kɛ pee ga enyɔ, nɛ a kɛ wo gugue nɔ hami nɔ́ ɔ sisi kɔ̃ nya enyɔ ɔmɛ a mi ngɛ e mi blɔ, nɛ a hɛ mi tsɔɔ efɔd ɔ. 20 Kɛkɛ nɛ a ngɔ sika tsu kɛ kpale pee ga enyɔ ngɛ efɔd ɔ hɛ mi, ngɛ mlɛ mi fimi nɔ́* nɛ a lo ɔ yi nɔ bɔɔ, ngɛ he nɛ e kɛ efɔd ɔ tsa ngɛ ɔ. 21 Nyagbe ɔ, a ngɔ kpa bluu kɛ hɔɔ gugue nɔ hami nɔ́ ɔ nya ga amɛ a mi, nɛ a kɛ muɔ efɔd ɔ nya ga amɛ, nɛ e nu gugue nɔ hami nɔ́ ɔ kɛ da si ngɛ efɔd ɔ nɔ ngɛ mlɛ mi fimi nɔ́* nɛ a lo ɔ yi nɔ, kaa bɔ nɛ Yehowa fã Mose ɔ pɛpɛɛpɛ.

22 Lɔ ɔ se ɔ, e kɛ kpã bluu ngmingmiingmi pee efɔd ɔ sisi tade klɔii nɛ kɔni be he ɔ kaa bɔ nɛ ní lolɔ loɔ ní kɛ woɔ bo mi ɔ. 23 A je kuɛ mi puɔ kɛ wo tade klɔii nɛ kɔni be he ɔ he ngɛ e kpɛti, kaa bɔ nɛ dade tade kuɛ mi ngɛ ɔ. A fia e kuɛ mi ɔ bɔ nɛ pee nɛ e ko gba. 24 Lɔ ɔ se ɔ, a lo kpã bluu, lohwe he bwɔmi nɛ hɛɛ alamua tu su, kɛ bo tsutsu kɛ bla, nɛ a kɛ pee pomegranet kɛ wo tade klɔii nɛ kɔni be he ɔ nya fiami ɔ nya. 25 A ngɔ sika tsu ngmingmiingmi kɛ pee ngmlɛhi kɛ wo pomegranet ɔmɛ a kpɛti ngɛ tade klɔii nɛ kɔni be he ɔ nya fiami ɔ nya kɛ kpe. Sika tsu ngmlɛ ɔmɛ ngɛ pomegranet ɔmɛ a kpɛti; 26 a ha nɛ ngmlɛ ɔmɛ kɛ pomegranet ɔmɛ nyɛɛ a sibi a se ngɛ tade klɔii nɛ kɔni be he nɛ a kɛ ma sɔmɔ ɔ nya fiami ɔ nya kɛ kpe, kaa bɔ nɛ Yehowa fã Mose ɔ pɛpɛɛpɛ. Ke ngmlɛ kake ba a, kɛkɛ pomegranet kake nyɛɛ se.

27 A ngɔ klala kpakpa kɛ pee tade klɔii kɛ ha Aaron kɛ e binyumu ɔmɛ, 28 nɛ a ngɔ klala kpakpa kɛ pee yi fimi nɔ́, kɛ osɔfo pɛɛ nɛ ngɛ fɛu, nɛ a ngɔ klala kpakpa nɛ a lo kɛ pee tagajami, 29 nɛ a ngɔ klala kpakpa nɛ a lo, kpã bluu, lohwe he bwɔmi nɛ hɛɛ alamua tu su, kɛ bo tsutsu, nɛ a lo mɛ kɛ bla kɛ pee mlɛ mi fimi nɔ́ ɔ, kaa bɔ nɛ Yehowa fã Mose ɔ pɛpɛɛpɛ.

30 Nyagbe ɔ, a ngɔ sika tsu ngmingmiingmi kɛ pee nɔ́ pɛtɛɛ nɛ ngɛ tsɛ̃e, nɛ ji he nɔ jɔɔmi he okadi klɔuklɔu* ɔ, nɛ a kpɛ́ ní ngɛ nɔ kaa bɔ nɛ nɔ ko ma kpɛ́ nɔ́ ngɛ nɔ́ nya sɔumi nɔ́ nɔ ɔ. A kpɛ́ ngɛ nɔ ke: “Klɔuklɔu ji Yehowa.” 31 A ngɔ kpã bluu kɛ fi lɛ kɛ wo yi fimi nɔ́ ɔ he kaa bɔ nɛ Yehowa fã Mose ɔ pɛpɛɛpɛ.

32 Lɔ ɔ he ɔ, a gbe bo tsu ɔ, nɛ ji kpe he bo tsu ɔ he ní tsumi ɔ tsuo nya, nɛ Israel bi ɔmɛ pee nɔ́ fɛɛ nɔ́ nɛ Yehowa fã Mose ɔ. A pee jã a pɛ.

33 Kɛkɛ nɛ a ngɔ bo tsu ɔ kɛ ba ha Mose, bo tsu ɔ kɛ e mi ní ɔmɛ tsuo: e gbowe ɔmɛ, e si mami tso ɔmɛ, e tso tlaatlaa amɛ, kɛ e titima amɛ kɛ e nɔ dami ní ɔmɛ; 34 e we agbosu he womihi nɛ a wo lɛ tsopa tsutsu ɔ, e pa mi gbe he womihi, tsu mi pomi bo nɛ a kɛ maa tsi níhi a hɛ mi ɔ; 35 Odase daka a, kɛ e tso ɔmɛ nɛ a hlɔ ɔ, kɛ odase daka a nya nɔ ɔ; 36 okplɔɔ ɔ, kɛ e he ní ɔmɛ tsuo kɛ hɛ mi mami abolo ɔ; 37 kane tso nɛ a kɛ sika tsu ngmingmiingmi pee ɔ, kɛ e kane ɔmɛ, kɛ kane ɔmɛ nɛ a ngɛ zã mi ɔ, kɛ kane tso ɔ he ní ɔmɛ tsuo, kɛ nu nɛ a kɛ maa wo kane ɔmɛ a mi ɔ; 38 sika tsu afɔle sami la tɛ ɔ, nɔ pɔmi nu ɔ, tsopa kɛ e he via a, bo tsu ɔ nya patesia a;* 39 akɔblee afɔle sami la tɛ ɔ kɛ e we lo tsukɔmi dade nɛ a kɛ akɔblee pee ɔ, e tso ɔmɛ, e he ní ɔmɛ tsuo, kã a, kɛ nɔ́ nɛ a kɛ kã a maa ma nɔ ɔ; 40 bo nɛ ma kpla si ngɛ yale ɔ he ɔ, yale ɔ titima amɛ kɛ a nɔ dami ní ɔmɛ, yale ɔ nya patesia a,* yale ɔ kpã amɛ kɛ e plɛɛko ɔmɛ, kɛ níhi tsuo nɛ a kɛ ma sɔmɔ ngɛ bo tsu, nɛ ji kpe he bo tsu ɔ mi ɔ; 41 tadehi nɛ a lo mɛ saminyawiiwi nɛ a kɛ ma sɔmɔ ngɛ jami he ɔ, osɔfo Aaron tade klɔuklɔu ɔmɛ, kɛ e bimɛ ɔmɛ a tadehi nɛ a kɛ ma sɔmɔ kaa osɔfohi ɔ.

42 Israel bi ɔmɛ tsu ní tsumi ɔ tsuo kaa bɔ nɛ Yehowa fã Mose ɔ pɛpɛɛpɛ. 43 Benɛ Mose ba hyɛ ní nɛ a tsu ɔ tsuo ɔ, e na kaa a pee kaa bɔ nɛ Yehowa fã a pɛpɛɛpɛ, nɛ Mose jɔɔ mɛ.

40 Kɛkɛ nɛ Yehowa de Mose ke: 2 “Ngɛ kekleekle nyɔhiɔ ɔ we kekleekle ligbi ɔ nɔ ɔ, moo ma bo tsu ɔ, nɛ ji kpe he bo tsu ɔ. 3 Ngɔɔ Odase daka a kɛ ma mi, nɛ o ngɔ tsu mi pomi bo ɔ kɛ kpla si nɛ e tsi Daka a hɛ mi. 4 Ngɔɔ okplɔɔ ɔ kɛ ba ma mi, nɛ o to ní ɔmɛ ngɛ nɔ saminyayoo, nɛ o ngɔ kane tso ɔ hu kɛ ba ma mi, nɛ o su e kane ɔmɛ. 5 Jehanɛ ɔ, ngɔɔ sika tsu afɔle sami la tɛ nɛ a kɛ maa sã tsopa kɛ e he via a kɛ ma Odase daka a hɛ mi, nɛ o wo patesia a* ngɛ bo tsu ɔ nya.

6 “Ngɔɔ afɔle sami la tɛ nɛ a kɛ maa sã sami afɔle ɔ kɛ ma bo tsu ɔ, nɛ ji kpe he bo tsu ɔ nya, 7 nɛ o ngɔ kã a kɛ ma kpe he bo tsu ɔ kɛ afɔle sami la tɛ ɔ a kpɛti, nɛ o ngɔ nyu kɛ wo mi. 8 Jehanɛ ɔ, moo po yale kɛ bɔle lɛ, nɛ o ngɔ yale ɔ nya patesia a* kɛ wo nya. 9 Lɔ ɔ se ɔ, ngɔɔ nɔ pɔmi nu ɔ nɛ o pɔ bo tsu ɔ kɛ nɔ́ fɛɛ nɔ́ nɛ ngɛ mi ɔ nu, nɛ o ha nɛ bo tsu ɔ kɛ nɔ́ fɛɛ nɔ́ nɛ ngɛ mi ɔ he nɛ tsɔ, konɛ e pee klɔuklɔu. 10 Moo pɔ afɔle sami la tɛ nɛ a kɛ maa sã sami afɔle ɔ, kɛ e he nɔ́ fɛɛ nɔ́ nu, nɛ o ha nɛ afɔle sami la tɛ ɔ he nɛ tsɔ, konɛ e pee afɔle sami la tɛ nɛ e ngɛ klɔuklɔu pe kulaa. 11 Moo pɔ kã a kɛ nɔ́ nɛ a kɛ kã a maa ma nɔ ɔ hu nu nɛ o pee mɛ klɔuklɔu.

12 Jehanɛ ɔ, ngɔɔ Aaron kɛ e bimɛ ɔmɛ kɛ ba kpe he bo tsu ɔ nya, nɛ o ngɔ nyu kɛ fɔ a he. 13 Ngɔɔ tade klɔuklɔu ɔ kɛ wo Aaron, nɛ o pɔ lɛ nu nɛ o pee lɛ klɔuklɔu, konɛ e sɔmɔ mi kaa osɔfo. 14 Lɔ ɔ se ɔ, ngɔɔ e binyumu ɔmɛ kɛ ba, nɛ o ngɔ tade klɔii ɔmɛ kɛ wo mɛ. 15 Moo pɔ mɛ nu kaa bɔ nɛ o pɔ a tsɛ ɔ nu ɔ, konɛ a sɔmɔ mi kaa osɔfohi. A nu pɔmi ɔ ma ha nɛ a maa pee osɔfohi kɛ maa ya neneene, a yi nɔhi tsuo.”

16 Mose pee níhi tsuo nɛ Yehowa fã lɛ kaa e pee ɔ. E pee jã a pɛ.

17 Jeha enyɔne ɔ we kekleekle nyɔhiɔ ɔ we kekleekle ligbi ɔ nɔ ɔ, a ma bo tsu ɔ. 18 Benɛ Mose ngɛ bo tsu ɔ mae ɔ, e ngɔ si mami tso ɔmɛ a nɔ dami ní ɔmɛ kɛ pue si, nɛ e ngɔ si mami tso ɔmɛ kɛ wo a mi, nɛ e ngɔ tso tlaatlaa amɛ kɛ bia a mi, nɛ e ma titima amɛ. 19 Mose ngɔ bo tsu ɔ nɔ bo ɔ kɛ ha tso ɔmɛ a nɔ, nɛ e kpale ngɔ e nɔ hami nɔ́ ɔ kɛ ha nɔ, kaa bɔ nɛ Yehowa fã lɛ ɔ pɛpɛɛpɛ.

20 Lɔ ɔ se ɔ, e ngɔ Odase Yemi Nɔ́ ɔ kɛ wo Daka a mi, nɛ e ngɔ tso ɔmɛ kɛ hɔɔ Daka a he ga amɛ a mi, nɛ e ngɔ Daka a nya nɔ́ ɔ kɛ bu nya. 21 Mose ngɔ Daka a kɛ ba wo bo tsu ɔ mi, nɛ e ngɔ tsu mi po mi bo ɔ kɛ kpla si, nɛ e tsi Odase daka a hɛ mi kaa bɔ nɛ Yehowa fã lɛ ɔ pɛpɛɛpɛ.

22 Lɔ ɔ se ɔ, Mose ngɔ okplɔɔ ɔ kɛ ma kpe he bo tsu ɔ mi ngɛ bo tsu ɔ yiti je ngɛ tsu mi pomi bo ɔ hɛ mi, 23 nɛ e to abolo ɔ kɛ pue a sibi a nɔ ngɛ Yehowa hɛ mi, kaa bɔ nɛ Yehowa fã lɛ ɔ pɛpɛɛpɛ.

24 E ngɔ kane tso ɔ kɛ ma kpe he bo tsu ɔ mi ngɛ okplɔɔ ɔ hɛ mi, ngɛ bo tsu ɔ woyi je. 25 Mose su kane ɔmɛ ngɛ Yehowa hɛ mi, kaa bɔ nɛ Yehowa fã lɛ ɔ pɛpɛɛpɛ.

26 Lɔ ɔ se ɔ, Mose ngɔ sika tsu afɔle sami la tɛ ɔ kɛ ma kpe he bo tsu ɔ mi ngɛ tsu mi pomi bo ɔ hɛ mi, 27 konɛ a sã tsopa kɛ e he via ngɛ nɔ, kaa bɔ nɛ Yehowa fã lɛ ɔ pɛpɛɛpɛ.

28 Kɛkɛ nɛ e wo bo tsu ɔ nya patesia a.*

29 Mose ngɔ afɔle sami la tɛ nɛ a kɛ maa sã sami afɔle ɔ kɛ ma bo tsu ɔ, nɛ ji kpe he bo tsu ɔ nya, konɛ e sã sami afɔle ɔ kɛ ngma afɔle ɔ ngɛ nɔ, kaa bɔ nɛ Yehowa fã lɛ ɔ pɛpɛɛpɛ.

30 Jehanɛ ɔ, e ngɔ kã a kɛ ma kpe he bo tsu ɔ kɛ afɔle sami la tɛ ɔ a kpɛti, nɛ e ngɔ nyu kɛ wo mi konɛ osɔfo ɔmɛ nɛ a kɛ fɔ a dɛ kɛ a nane he. 31 Mose kɛ Aaron kɛ Aaron binyumu ɔmɛ fɔɔ a dɛ kɛ a nane he ngɛ lejɛ ɔ. 32 Be fɛɛ be nɛ a maa ya kpe he bo tsu ɔ mi, aloo a maa ya afɔle sami la tɛ ɔ he ɔ, a fɔɔ a dɛ kɛ a nane he, kaa bɔ nɛ Yehowa fã Mose ɔ pɛpɛɛpɛ.

33 Nyagbe ɔ, e po yale ɔ kɛ wo bo tsu ɔ kɛ afɔle sami la tɛ ɔ he, nɛ e ngɔ yale ɔ nya patesia a* kɛ wo nya.

Kɛkɛ nɛ Mose gbe ní tsumi ɔ nya. 34 Nɛ bɔku ɔ ba ha kpe he bo tsu ɔ nɔ, nɛ Yehowa hɛ mi nyami ɔ hyi bo tsu ɔ mi tɔ. 35 Mose nyɛ we nɛ e sɛ kpe he bo tsu ɔ mi, ejakaa bɔku ɔ ha bo tsu ɔ nɔ, nɛ Yehowa hɛ mi nyami ɔ hyi bo tsu ɔ mi tɔ.

36 Be fɛɛ be nɛ bɔku ɔ ma wo e he nɔ ngɛ bo tsu ɔ nɔ ɔ, Israel bi ɔmɛ tsaa a blɔ hiami ɔ nɔ. Jã nɛ a pee ngɛ a blɔ hiami ɔ mi tsuo. 37 Se ke bɔku ɔ wo we e he nɔ ɔ, a mlɛɔ kɛ ya siɔ be nɛ e ma wo e he nɔ. 38 Ejakaa ngɛ Israel bi ɔmɛ a blɔ hiami ɔ mi tsuo ɔ, mɛ tsuo a naa kaa Yehowa bɔku ɔ hiiɔ bo tsu ɔ nɔ piani, nɛ la hiiɔ bo tsu ɔ nɔ nyɔ mi.