MOSE WOMI ETƐNE*

1 Kɛkɛ nɛ Yehowa tsɛ Mose nɛ e kɛ lɛ tu munyu kɛ je kpe he bo tsu ɔ mi nɛ e de lɛ ke: 2 “O kɛ Israel bi ɔmɛ* nɛ tu munyu nɛ o de mɛ ke, ‘Ke nyɛ ti nɔ ko maa ngɔ we mi lohwe kɛ sã afɔle ha Yehowa a, e ngɔ na aloo to kɛ ba sã afɔle ɔ.

3 “‘Ke afɔle ɔ ji sami afɔle, nɛ e kɛ na nɛ ma sami ɔ, lɛɛ e ngɔ na ku nɛ kpa ko be e he kɛ ba. É je lɛ nitsɛ e suɔmi mi nɛ e kɛ ba Yehowa hɛ mi ngɛ kpe he bo tsu ɔ nya. 4 É ngɔ e nine kɛ fɔ lohwe ɔ nɛ a kɛ maa sã sami afɔle ɔ yi mi, nɛ a maa kplɛɛ nɔ, nɛ a kɛ ma kpata ha lɛ.

5 “‘Á gbe na ku wayoo ɔ ngɛ Yehowa hɛ mi, nɛ́ Aaron binyumu ɔmɛ nɛ a ji osɔfohi ɔ nɛ a ngɔ e muɔ ɔ kɛ fĩa afɔle sami la tɛ ɔ nɛ ngɛ kpe he bo tsu ɔ nya a he tsuo kɛ kpe. 6 Á kpɔ lohwe nɛ a kɛ maa sã sami afɔle ɔ he womi, nɛ a poo lo ɔ kpɔ nya kpɔ nya. 7 Aaron binyumu ɔmɛ nɛ a ji osɔfohi ɔ nɛ a ngɔ la kɛ wo afɔle sami la tɛ ɔ mi nɛ a to lɛ́ kɛ pue nɔ. 8 Aaron binyumu ɔmɛ nɛ a ji osɔfohi ɔ nɛ a to lohwe ɔ yi ɔ, kɛ e zɔ ɔ* kɛ lo ɔ nɛ a poo lɛ kpɔ nya kpɔ nya a ngɛ lɛ́ ɔ nɛ pueɔ si ngɛ la nɛ ngɛ afɔle sami la tɛ ɔ nɔ ɔ nɔ. 9 Á ngɔ nyu kɛ fɔ e mi ní ɔmɛ kɛ e nane ɔmɛ a he, nɛ́ osɔfo ɔ nɛ sã lɛ tsuo* ngɛ afɔle sami la tɛ ɔ nɔ kaa sami afɔle nɛ a kɛ la sãã nɛ jeɔ via liliili* ha Yehowa.

10 Ke to lɛ e kɛ maa sã sami afɔle ɔ, agbosu wayoo jio, apletsi jio, e ngɔ lohwe eku nɛ kpa ko be e he kɛ ba. 11 É gbe lohwe ɔ ngɛ afɔle sami la tɛ ɔ yiti je ngɛ Yehowa hɛ mi, nɛ́ Aaron binyumu ɔmɛ nɛ a ji osɔfohi ɔ nɛ a ngɔ e muɔ ɔ kɛ fĩa afɔle sami la tɛ ɔ he tsuo kɛ kpe. 12 É poo lɛ kpɔ nya kpɔ nya, nɛ osɔfo ɔ nɛ to lo ɔ kɛ e yi ɔ kɛ e zɔ ɔ* kɛ pue lɛ́ nɛ pueɔ si ngɛ la nɛ ngɛ afɔle sami la tɛ ɔ nɔ ɔ nɔ. 13 É ngɔ nyu kɛ fɔ e mi ní ɔmɛ kɛ e nane ɔmɛ a he, nɛ́ osɔfo ɔ nɛ ngɔ lɛ tsuo kɛ ba nɛ e ba sã ngɛ afɔle sami la tɛ ɔ nɔ. E ji sami afɔle, afɔle nɛ a sãã nɛ jeɔ via liliili* ha Yehowa.

14 “‘Se ke lohwe pɛlitsɛ nɛ e kɛ maa sã sami afɔle kɛ ha Yehowa a, lɛɛ e ngɔ lahuɛhi* aloo beleku lahuɛ bimɛ kɛ ba sã afɔle ɔ. 15 Osɔfo ɔ nɛ ngɔ kɛ ba afɔle sami la tɛ ɔ he, nɛ e tsɔ e kuɛ si,* nɛ e sã ngɛ afɔle sami la tɛ ɔ nɔ, se e muɔ ɔ lɛɛ, e tsle kɛ pue afɔle sami la tɛ ɔ he. 16 É je e niye ní kotoku ɔ nɛ e fa e he bwɔmi ɔ nɛ e sake kɛ pue afɔle sami la tɛ ɔ he ngɛ puje he je, he nɛ a kɛ la zu* pueɔ ɔ. 17 É pɛtɛ pɛli ɔmɛ a he, nɛ́ e fɛ lohwe ɔ mi, se e mi nɛ ko tsɔ enyɔ. Jehanɛ ɔ, osɔfo ɔ nɛ sã lohwe ɔ ngɛ lɛ́ nɛ pueɔ si ngɛ la nɛ ngɛ afɔle sami la tɛ ɔ nɔ ɔ nɔ. E ji sami afɔle, afɔle nɛ a kɛ la sãã nɛ jeɔ via liliili* ha Yehowa.

2 “‘Jehanɛ ɔ, ke nɔ* ko maa sã ngma afɔle ha Yehowa a, e ngɔ mamu bukɔbukɔ, nɛ e plɛ nu kɛ pue nɔ, nɛ e ngɔ ohɛ kɛ pue nɔ. 2 Lɔ ɔ se ɔ, é ngɔ kɛ ba ha Aaron binyumu ɔmɛ nɛ a ji osɔfohi ɔ, nɛ́ osɔfo ɔ nɛ e piti mamu bukɔbukɔ ɔ kɛ nu ɔ kɛ ohɛ ɔ tsuo e dɛ kɔkɔ kake, nɛ́ e sã ngɛ afɔle sami la tɛ ɔ nɔ kaa kaimi afɔle* nɛ daa si kɛ ha afɔle ɔ tsuo. E ji afɔle nɛ a kɛ la sãã nɛ jeɔ via liliili* ha Yehowa. 3 Ngma afɔle ɔ mi nɔ́ nɛ maa piɛ ɔ ji Aaron kɛ e binyumu ɔmɛ a nɔ́, e ji nɔ́ klɔuklɔu pe kulaa nɛ a náa kɛ jeɔ afɔlehi nɛ a kɛ la sãã kɛ haa Yehowa a mi.

4 “‘Ke ngma nɛ́ a sã ngɛ flɔɔnɔɔ mi nɛ o kɛ maa sã ngma afɔle ɔ, e pee abolo nɛ a bɔ lɛ lokotolokoto* nɛ masa be mi nɛ a ngɔ nu kɛ futu mi nɛ́ a kɛ mamu bukɔbukɔ lɛ pee, aloo e pee akpɔɔnɔɔ nɛ masa be mi nɛ a kɛ mamu bukɔbukɔ lɛ pee nɛ a kɛ nu kpa hɛ mi.

5 “‘Ke ngma nɛ́ a sã ngɛ kã tɛtlɛɛ mi lɛ o kɛ maa sã afɔle ɔ, e pee mamu bukɔbukɔ nɛ masa be mi nɛ a kɛ nu futu mi. 6 A ku mi tsɔwitsɔwi, nɛ a ngɔ nu kɛ pue nɔ. E ji ngma afɔle.

7 “‘Ke ngma nɛ́ a sĩ ngɛ buɛ mi lɛ o kɛ maa sã ngma afɔle ɔ, lɛɛ e pee mamu bukɔbukɔ nɛ a kɛ nu futu mi. 8 Moo ngɔ ngma afɔle nɛ a ngɔ ní nɛ ɔmɛ kɛ pee ɔ kɛ ba ha Yehowa. A kɛ ma ha osɔfo ɔ, nɛ osɔfo ɔ hu kɛ maa ba afɔle sami la tɛ ɔ he. 9 Osɔfo ɔ nɛ je ngma afɔle ɔ eko kaa kaimi afɔle* nɛ daa si kɛ ha afɔle ɔ tsuo, nɛ́ e sã ngɛ afɔle sami la tɛ ɔ nɔ kaa afɔle nɛ a kɛ la sãã nɛ jeɔ via liliili* ha Yehowa. 10 Ngma afɔle ɔ mi nɔ́ nɛ maa piɛ ɔ ji Aaron kɛ e binyumu ɔmɛ a nɔ́, e ji afɔlehi nɛ a kɛ la sãã kɛ haa Yehowa a mi nɔ́ klɔuklɔu pe kulaa.

11 “‘Masa nɛ ko hi ngma afɔle nɛ nyɛ sãã kɛ haa Yehowa a mi, nɛ nyɛ ko sã ma nɛ gbo aloo hwo kaa afɔle nɛ a kɛ la sãã ha Yehowa.

12 “‘Nyɛ ma nyɛ maa ngɔ kɛ ha Yehowa kaa afɔle nɛ a kɛ kekleekle yiblii sãã, se nyɛ ko ngɔ kɛ ba afɔle sami la tɛ ɔ he kaa afɔle nɛ jeɔ via liliili.*

13 “‘Ngma afɔle fɛɛ ngma afɔle nɛ o maa sã a, ngɔɔ ngo kɛ wo mi. Ngo ji nɔ́ nɛ kaiɔ mo somi nɛ o Mawu ɔ kɛ mo so ɔ, lɔ ɔ he ɔ, be fɛɛ be nɛ o maa sã ngma afɔle ɔ, ha nɛ ngo nɛ hi mi. Nɔ́ fɛɛ nɔ́ ko nɛ o kɛ maa sã afɔle ɔ, ngɔɔ ngo kɛ piɛɛ he.

14 “‘Ke o kɛ kekleekle yiblii maa sã ngma afɔle ha Yehowa a, o kɛ ngma ehe* nɛ a sĩ ngɛ la nɔ nɛ a gbee* nɛ ba kaa o kekleekle yiblii ngma afɔle. 15 Ngɔɔ nu kɛ pue nɔ, nɛ o ngɔ ohɛ kɛ pue nɔ. E ji ngma afɔle. 16 Osɔfo ɔ maa sã ngma nɛ a gbee* ɔ kɛ nu ɔ eko kɛ ohɛ ɔ tsuo kaa kaimi afɔle* nɛ daa si kɛ ha afɔle ɔ tsuo, nɛ́ a kɛ la sãã ha Yehowa.

3 “‘Ke tue mi jɔmi afɔle nɛ e ma sami, nɛ na lɛ e kɛ maa sã a, na eku jio, eyo jio, e ngɔ na nɛ kpa ko be e he kɛ ba Yehowa hɛ mi. 2 É ngɔ e nine kɛ fɔ lohwe nɛ e kɛ ma afɔle ɔ sami ɔ yi mi, nɛ a gbe lohwe ɔ ngɛ kpe he bo tsu ɔ hɛ mi. Aaron binyumu ɔmɛ nɛ a ji osɔfohi ɔ nɛ a ngɔ lohwe ɔ muɔ ɔ kɛ fĩa afɔle sami la tɛ ɔ he tsuo kɛ kpe. 3 É ngɔ tue mi jɔmi afɔle ɔ eko nɛ e sã kaa afɔle nɛ a kɛ la sãã ha Yehowa: e sã zɔ nɛ ha mi ní ɔmɛ a he ɔ, kɛ zɔ nɛ ngɛ mi ní ɔmɛ a he ɔ tsuo, 4 kɛ se tso mi ngmɛ enyɔ ɔmɛ kɛ zɔ nɛ ngɛ a he ɔ tsuo. É je zɔ ɔ nɛ ngɛ ko ɔ he ɔ kɛ piɛɛ se tso mi ngmɛ ɔmɛ a he. 5 Aaron binyumu ɔmɛ nɛ a sã ngɛ afɔle sami la tɛ ɔ nɔ. Á ngɔ kɛ pue sami afɔle nɛ pueɔ si ngɛ lɛ́ nɛ ngɛ la a nɔ ɔ nɔ. E ji afɔle nɛ a kɛ la sãã nɛ jeɔ via liliili* ha Yehowa.

6 “‘Ke to nɛ e kɛ maa sã tue mi jɔmi afɔle ha Yehowa a, e ngɔ to eku aloo eyo nɛ kpa ko be e he kɛ ba. 7 Ke agbosu wayoo nɛ e kɛ maa sã afɔle ɔ, lɛɛ e ngɔ kɛ ba Yehowa hɛ mi. 8 É ngɔ e nine kɛ fɔ lohwe nɛ e kɛ ma afɔle ɔ sami ɔ yi mi, nɛ́ a gbe lohwe ɔ ngɛ kpe he bo tsu ɔ hɛ mi. Aaron binyumu ɔmɛ nɛ a ngɔ e muɔ ɔ kɛ fĩa afɔle sami la tɛ ɔ he tsuo kɛ kpe. 9 É sã lohwe nɛ a kɛ ma tue mi jɔmi afɔle ɔ sami ɔ zɔ ɔ kaa afɔle nɛ a kɛ la sãã ha Yehowa. É je hlemi nɛ wo zɔ ɔ, kɛ zɔ nɛ ha mi ní ɔ he ɔ, kɛ zɔ nɛ ngɛ mi ní ɔmɛ a he ɔ tsuo, 10 kɛ se tso mi ngmɛ enyɔ ɔmɛ kɛ zɔ nɛ ngɛ a he ɔ tsuo. É je zɔ nɛ ha ko ɔ he ɔ kɛ piɛɛ se tso mi ngmɛ ɔmɛ a he. 11 Osɔfo ɔ nɛ sã ngɛ afɔle sami la tɛ ɔ nɔ kaa niye ní.* E ji afɔle nɛ a kɛ la sãã ha Yehowa.

12 “‘Ke apletsi lɛ e kɛ maa sã afɔle ɔ, lɛɛ e kɛ ba Yehowa hɛ mi. 13 É ngɔ e nine kɛ fɔ e yi mi, nɛ a gbe lohwe ɔ ngɛ kpe he bo tsu ɔ hɛ mi, nɛ Aaron binyumu ɔmɛ nɛ a ngɔ e muɔ ɔ kɛ fĩa afɔle sami la tɛ ɔ he tsuo kɛ kpe. 14 Níhi nɛ e maa sã kaa afɔle nɛ a kɛ la sãã ha Yehowa ji zɔ nɛ ha mi ní ɔmɛ a he ɔ, kɛ zɔ nɛ ngɛ mi ní ɔmɛ a he ɔ tsuo, 15 kɛ se tso mi ngmɛ enyɔ ɔmɛ kɛ zɔ nɛ ha a he ɔ tsuo. É je ko ɔ he zɔ ɔ kɛ se tso mi ngmɛ ɔmɛ hulɔ. 16 Osɔfo ɔ nɛ sã ngɛ afɔle sami la tɛ ɔ nɔ kaa niye ní,* nɛ ji afɔle nɛ a kɛ la sãã nɛ jeɔ via liliili.* Yehowa nɔ́ ji zɔ ɔ tsuo.

17 “‘Nyɛ ko ye zɔ ko zɔ ko aloo muɔ ko muɔ ko kulaa. Enɛ ɔ ji mlaa nɛ nyɛɛ kɛ nyɛ yi nɔhi tsuo maa ye nɔ kɛ maa ya neneene ngɛ nyɛ hi he ɔmɛ tsuo.’”

4 Yehowa ya nɔ nɛ e de Mose ke: 2 “De Israel bi ɔmɛ ke, ‘Ke nɔ* ko pee níhi nɛ Yehowa fã ke a ko pee ɔ eko kɛ tɔ̃ e nɔ nɛ pi kaa e je blɔ ɔ, nɔ́ nɛ a pee ji nɛ ɔ nɛ:

3 “‘Ke osɔfo nɛ a pɔ lɛ nu ɔ pee yayami nɛ e ha nɛ ma a ye fɔ ɔ, e ngɔ na ku wayoo nɛ kpa ko be e he kɛ ba ha Yehowa kaa yayami afɔle ngɛ yayami nɛ e pee ɔ he. 4 E ngɔ na ku ɔ kɛ ba kpe he bo tso ɔ nya ngɛ Yehowa hɛ mi, nɛ e ngɔ e nine kɛ fɔ na ku ɔ yi mi nɛ e gbe na ku ɔ ngɛ Yehowa hɛ mi. 5 Jehanɛ ɔ, osɔfo nɛ a pɔ lɛ nu ɔ nɛ ngɔ na ku ɔ muɔ ɔ eko kɛ ba kpe he bo tsu ɔ mi. 6 Osɔfo ɔ nɛ ngɔ e nine nguɛ kɛ sɔ muɔ ɔ mi nɛ e fĩa muɔ ɔ eko kɛ pue si si kpaago ngɛ Yehowa hɛ mi, ngɛ tsu mi pomi bo nɛ ngɛ he klɔuklɔu ɔ hɛ mi. 7 Osɔfo ɔ nɛ e ngɔ muɔ ɔ eko kɛ kpa afɔle sami la tɛ nɛ a kɛ sãã tsopa kɛ e he via nɛ ngɛ Yehowa hɛ mi ngɛ kpe he bo tsu ɔ mi ɔ koli ɔmɛ a he, nɛ́ e plɛ na ku ɔ muɔ ɔ nɛ piɛ ɔ tsuo kɛ pue afɔle sami la tɛ nɛ a kɛ sãã sami afɔle nɛ ngɛ kpe he bo tsu ɔ nya a sisi.

8 “‘Lɔ ɔ se ɔ, é je na ku ɔ nɛ a kɛ maa sã yayami afɔle ɔ zɔ ɔ tsuo, nɛ ji zɔ nɛ ha mi ní ɔmɛ a he ɔ, kɛ zɔ nɛ ngɛ mi ní ɔmɛ a he ɔ, 9 kɛ se tso mi ngmɛ enyɔ ɔmɛ kɛ zɔ nɛ ngɛ a he ɔ. E je ko ɔ he zɔ ɔ kɛ piɛɛ se tso mi ngmɛ enyɔ ɔmɛ a he. 10 É je ní nɛ ɔmɛ kaa bɔ nɛ a peeɔ na ku nɛ a kɛ sãã tue mi jɔmi afɔle ɔ. Osɔfo ɔ nɛ e sã ngɛ afɔle sami la tɛ nɛ a sãã sami afɔle ngɛ nɔ ɔ nɔ nɛ e je la su ku.

11 “‘Se na ku ɔ he womi ɔ, kɛ e lo ɔ tsuo, kɛ e yi ɔ, kɛ e nane ɔmɛ, kɛ e mi ní ɔmɛ, kɛ e fĩ ɔ, 12 nɛ ji na ku ɔ tsuo nɛ piɛ ɔ lɛɛ, é ngɔ kɛ ya sito he ɔ se he ko nɛ tsɔ, he nɛ a plɛɔ la zu* ɔ kɛ pueɔ ɔ, nɛ é kɛ pue lɛ́ nɔ nɛ e sã. Á sã ngɛ he nɛ a kɛ la zu ɔ pueɔ ɔ.

13 “‘Jehanɛ ɔ, ke Israel ma a tsuo pee yayami nɛ pi kaa a je blɔ, se a* li kaa a pee nɔ́ ko nɛ Yehowa fã ke a ko pee nɛ lɔ ɔ ha nɛ a ye fɔ, 14 nɛ lɔ ɔ se ɔ, a ba ná le kaa a pee yayami ɔ, asafo ɔ* nɛ ngɔ na ku wayoo nɛ a kɛ maa sã yayami afɔle kɛ ba kpe he bo tsu ɔ hɛ mi. 15 Nikɔtɔmahi nɛ a ngɛ asafo ɔ mi ɔ nɛ a ngɔ a nine kɛ pue na ku ɔ yi mi ngɛ Yehowa hɛ mi, nɛ́ a gbe na ku ɔ ngɛ Yehowa hɛ mi.

16 “‘Jehanɛ ɔ, osɔfo nɛ a pɔ lɛ nu ɔ nɛ e ngɔ na ku ɔ muɔ ɔ eko kɛ ba kpe he bo tsu ɔ mi. 17 Osɔfo ɔ nɛ ngɔ e nine nguɛ kɛ sɔ muɔ ɔ mi nɛ e fĩa muɔ ɔ eko kɛ pue si si kpaago ngɛ Yehowa hɛ mi, ngɛ tsu mi pomi bo ɔ hɛ mi. 18 Jehanɛ ɔ, é ngɔ muɔ ɔ eko kɛ kpa afɔle sami la tɛ nɛ ngɛ Yehowa hɛ mi ngɛ kpe he bo tsu ɔ mi ɔ koli ɔmɛ a he, nɛ é plɛ muɔ nɛ piɛ ɔ tsuo kɛ pue afɔle sami la tɛ nɛ a kɛ sãã sami afɔle nɛ ngɛ kpe he bo tsu ɔ nya a sisi. 19 É je e zɔ ɔ tsuo nɛ e sã ngɛ afɔle sami la tɛ ɔ nɔ. 20 É pee na ku ɔ kaa bɔ nɛ e pee na ku nɛ a kɛ sã yayami afɔle ɔ. Osɔfo ɔ nɛ pee lɛ jã konɛ e kɛ kpata ha mɛ, kɛkɛ ɔ, a kɛ a he yayami ɔ maa ke mɛ. 21 É ngɔ na ku ɔ kɛ ya sito he ɔ se nɛ e ya sã na ku ɔ kaa bɔ nɛ e sã kekle nɔ́ ɔ. E ji yayami afɔle kɛ ha asafo ɔ.

22 “‘Ke ganɔ ko pee níhi nɛ Yehowa e Mawu ɔ fã ke a ko pee ɔ eko kɛ tɔ̃ e nɔ nɛ pi kaa e je blɔ, nɛ lɔ ɔ ha nɛ e ye fɔ, 23 aloo e ba ná le kaa e tɔ̃ mlaa a, lɛɛ e ngɔ akpakpo wayoo nɛ kpa ko be e he kɛ ba sã afɔle. 24 É ngɔ e nine kɛ fɔ akpakpo wayoo ɔ yi mi nɛ e gbe akpakpo ɔ ngɛ Yehowa hɛ mi ngɛ he nɛ a gbeɔ lohwe nɛ a kɛ sãã sami afɔle ɔ ngɛ ɔ. E ji yayami afɔle. 25 Osɔfo ɔ nɛ ngɔ e nine nguɛ kɛ sɔ lohwe ɔ muɔ ɔ mi nɛ e kɛ kpa afɔle sami la tɛ nɛ a kɛ sãã sami afɔle ɔ koli ɔmɛ a he, nɛ́ e plɛ muɔ nɛ piɛ ɔ kɛ pue afɔle sami la tɛ nɛ a kɛ sãã sami afɔle ɔ sisi. 26 É sã e zɔ ɔ tsuo ngɛ afɔle sami la tɛ ɔ nɔ kaa bɔ nɛ a sãã zɔ nɛ a kɛ sãã tue mi jɔmi afɔle ɔ. Osɔfo ɔ kɛ ma kpata ha lɛ ngɛ e yayami ɔ he, nɛ a kɛ maa ke lɛ.

27 “‘Ke zugba a nɔ bi ɔmɛ a kpɛti nɔ ko* pee níhi nɛ Yehowa fã ke a ko pee ɔ eko kɛ tɔ̃ e nɔ nɛ pi kaa e je blɔ, nɛ lɔ ɔ ha nɛ e ye fɔ, 28 aloo e ba ná le kaa e pee yayami ɔ, lɛɛ e ngɔ apletsi yo wayoo nɛ kpa ko be e he kɛ ba sã afɔle ngɛ yayami nɛ e pee ɔ he. 29 É ngɔ e nine kɛ fɔ lohwe nɛ a kɛ maa sã yayami afɔle ɔ yi mi, nɛ e gbe lohwe ɔ ngɛ he nɛ a gbeɔ lohwe nɛ a kɛ sãã sami afɔle ɔ ngɛ ɔ. 30 Osɔfo ɔ nɛ ngɔ e nine nguɛ kɛ sɔ muɔ ɔ mi nɛ e kɛ kpa afɔle sami la tɛ nɛ a kɛ sãã sami afɔle ɔ koli ɔmɛ a he, nɛ e plɛ muɔ nɛ piɛ ɔ tsuo kɛ pue afɔle sami la tɛ ɔ sisi. 31 É je zɔ ɔ tsuo kaa bɔ nɛ a jeɔ lohwe nɛ a kɛ sãã tue mi jɔmi afɔle ɔ zɔ ɔ, nɛ osɔfo ɔ nɛ sã ngɛ afɔle sami la tɛ ɔ nɔ kaa afɔle nɛ jeɔ via liliili* ha Yehowa. Osɔfo ɔ kɛ ma kpata ha lɛ, nɛ a kɛ e he yayami ɔ maa ke lɛ.

32 “‘Se ke jijɔ bi nɛ e kɛ maa sã yayami afɔle ɔ, lɛɛ e ngɔ jijɔ bi eyo nɛ kpa ko be e he kɛ ba. 33 É ngɔ e nine kɛ fɔ lohwe nɛ a kɛ maa sã yayami afɔle ɔ yi mi, nɛ e gbe lohwe ɔ kaa yayami afɔle ngɛ he nɛ a gbeɔ lohwe nɛ a kɛ sãã sami afɔle ɔ ngɛ ɔ. 34 Osɔfo ɔ nɛ ngɔ e nine nguɛ kɛ sɔ lohwe ɔ muɔ ɔ mi nɛ e kɛ kpa afɔle sami la tɛ nɛ a kɛ sãã sami afɔle ɔ koli ɔmɛ a he, nɛ e plɛ muɔ nɛ piɛ ɔ tsuo kɛ pue afɔle sami la tɛ ɔ sisi. 35 É je e zɔ ɔ tsuo kaa bɔ nɛ a jeɔ agbosu wayoo nɛ a kɛ sãã tue mi jɔmi afɔle ɔ zɔ ɔ, nɛ osɔfo ɔ kɛ pue afɔle nɛ a kɛ la sãã ha Yehowa a nɔ, nɛ e sã ngɛ afɔle sami la tɛ ɔ nɔ. Osɔfo ɔ nɛ e kɛ kpata ha lɛ ngɛ yayami nɛ e pee ɔ he, nɛ a kɛ maa ke lɛ.

5 “‘Ke nɔ* ko na nɔ́ yaya ko nɛ ya nɔ, loo e le he nɔ́ ko nɛ e nu adafi fiami kaa a ngɛ hlae nɛ nɔ ko nɛ ba de nɔ́ nɛ e le ngɛ sane ɔ he,* nɛ e ya de we ɔ, e pee yayami. E maa tloo nɔ́ nɛ maa je mi kɛ ba a.

2 “‘Aloo ke nɔ* ko ta nɔ́ ko nɛ he tsɔ we he, nga mi lohwe nɛ he tsɔ we gbogboe jio, we mi lohwe nɛ he tsɔ we gbogboe jio, lohwe tsɔwi nɛ a nyɛɛɔ kutuu nɛ a he tsɔ we ɔ eko gbogboe jio, nɔ ɔ he tsɔ we, nɛ ke e li po e yeɔ fɔ. 3 Aloo ke alini, nɔ ko li nɛ e he sa adesa he nɔ́ ko nɛ he tsɔ we he, nɛ ji nɔ́ saisaa ko nɛ he tsɔ we, nɛ lɔ ɔ wo e he mu, nɛ e ba ná le ɔ, e yeɔ fɔ.

4 “‘Aloo ke nɔ* ko ye oya kɛ kã kita kaa e maa pee nɔ́ ko, nɔ́ kpakpa jio, nɔ́ yaya jio, ke e li po, nɛ lɔ ɔ se ɔ, e ba na kaa e he sɔ tsɔ kɛ kã kita a, e yeɔ fɔ.*

5 “‘Ke e pee ní nɛ ɔmɛ eko nɛ lɔ ɔ ha nɛ e ye fɔ ɔ, lɛɛ e jaje e yayami ɔ. 6 Jehanɛ hu ɔ, é ba sã fɔ yemi afɔle ha Yehowa ngɛ e tɔmi ɔ he. É ngɔ jijɔ bi eyo aloo apletsi yo wayoo kɛ ba sã yayami afɔle ɔ. Kɛkɛ ɔ, osɔfo ɔ ma kpata ha lɛ ngɛ e yayami ɔ he je.

7 “‘Ke e be nyɛe maa ngɔ jijɔ kɛ ba a, e ngɔ lahuɛ* enyɔ aloo beleku lahuɛ bimɛ enyɔ kɛ ba ha Yehowa ngɛ e yayami ɔ he kaa fɔ yemi afɔle. A kɛ kake maa sã yayami afɔle nɛ a kɛ kake hu maa sã sami afɔle. 8 É ngɔ lahuɛ ɔmɛ kɛ ba ha osɔfo ɔ. Osɔfo ɔ nɛ ngɔ nɔ́ nɛ e kɛ maa sã yayami afɔle ɔ kekle, nɛ́ e tsɔ e kuɛ si,* se e yi ko je nya. 9 E fĩa lohwe nɛ a kɛ maa sã yayami afɔle ɔ muɔ ɔ eko kɛ pue afɔle sami la tɛ ɔ he, se muɔ nɛ maa piɛ ɔ lɛɛ e plɛ kɛ pue afɔle sami la tɛ ɔ sisi. E ji yayami afɔle. 10 É ngɔ kake ɔ nɛ piɛ ɔ kɛ sã sami afɔle kaa bɔ nɛ a peeɔ daa a, nɛ osɔfo ɔ ma kpata ha lɛ ngɛ yayami nɛ e pee ɔ he, nɛ a kɛ maa ke lɛ.

11 “‘Ke e be nyɛe maa ngɔ lahuɛ* enyɔ aloo beleku lahuɛ bimɛ enyɔ kɛ ba a, lɛɛ e ngɔ mamu bukɔbukɔ lita enyɔ* kɛ ba kaa yayami afɔle. É ko ngɔ nu kɛ piɛɛ he, nɛ e ko ngɔ ohɛ hu kɛ pue nɔ, ejakaa e ji yayami afɔle. 12 É ngɔ kɛ ba ha osɔfo ɔ, nɛ osɔfo ɔ nɛ e piti e dɛ kɔkɔ kake kaa kaimi afɔle* nɛ daa si kɛ ha afɔle ɔ tsuo, nɛ e sã ngɛ afɔle sami la tɛ ɔ nɔ ngɛ afɔlehi nɛ a kɛ la sãã ha Yehowa a nɔ. E ji yayami afɔle. 13 Osɔfo ɔ ma kpata ha lɛ ngɛ yayami nɛ e pee, nɛ ji yayamihi nɛ a wo a ta a saisaa ko he, nɛ a kɛ maa ke lɛ. Afɔle ɔ nɔ́ nɛ maa piɛ ɔ maa pee osɔfo ɔ nɔ́, kaa bɔ nɛ a peeɔ ngma afɔle ɔ.”

14 Yehowa ya nɔ nɛ e kɛ Mose tu munyu, nɛ e de lɛ ke: 15 “Ke nɔ* ko yi anɔkuale nɛ e pee yayami kɛ si Yehowa ní klɔuklɔu ɔmɛ, nɛ pi nɛ e je blɔ ɔ, e ngɔ agbosu nɛ kpa ko be e he kɛ ba ha Yehowa kaa fɔ yemi afɔle. Á da shekel* nɛ a po fɔ si ngɛ he klɔuklɔu ɔ* nɔ kɛ tsɔɔ agbosu ɔ jua ngɛ sika hiɔ shekel mi. 16 É wo kpatami nɔ́ ngɛ yayami nɛ e pee kɛ si he klɔuklɔu ɔ he, nɛ e ngɔ kpatami nɔ́ ɔ mi mi dlami enuɔ mi kake kɛ piɛɛ he. É kɛ ha osɔfo ɔ, nɛ osɔfo ɔ nɛ e ngɔ agbosu nɛ a kɛ maa sã fɔ yemi afɔle ɔ kɛ kpata ha lɛ, nɛ a kɛ e he yayami ɔ maa ke lɛ.

17 “Ke nɔ* ko pee níhi nɛ Yehowa fã ke a ko pee ɔ eko kɛ tɔ̃ e nɔ nɛ e li po ɔ, e yeɔ fɔ, nɛ e maa tloo nɔ́ nɛ maa je mi kɛ ba a. 18 É ngɔ agbosu nɛ kpa ko be e he, nɛ e he jua ngɛ kaa nɔ́ nɛ a po ngɔ fɔ si ɔ kɛ ba ha osɔfo ɔ nɛ e kɛ sã fɔ yemi afɔle. Kɛkɛ ɔ, osɔfo ɔ kɛ ma kpata ha lɛ ngɛ yayami nɛ e ji blɔ nɛ e pee ɔ he je, nɛ a kɛ maa ke lɛ. 19 E ji fɔ yemi afɔle. Ngɛ anɔkuale mi ɔ, e ye fɔ akɛnɛ e tɔ̃ Yehowa nɔ ɔ he je.”

6 Yehowa ya nɔ nɛ e de Mose ke: 2 “Ke nɔ* ko pee níhi nɛ nyɛɛ se nɛ ɔmɛ eko ɔ, e pee yayami, nɛ e yi Yehowa anɔkuale. Ke nɔ ko tu nɔ́ ko kɛ wo e nyɛmi dɛ, aloo e ngɔ nɔ́ ko kɛ ha e nyɛmi ɔ kaa e hyɛ nɔ ha lɛ nɛ e nyɛmi ɔ yi lɛ anɔkuale, aloo e ju lɛ, aloo e fia lɛ ojo, 3 aloo e na nɔ́ ko nɛ laa nɛ e tui anɔkuale, aloo e kã lakpa kita ngɛ ní nɛ ɔmɛ eko he ɔ, nɔ́ nɛ é pee ji nɛ ɔ nɛ: 4 Ke e pee yayami nɛ ɔmɛ eko nɛ e ye fɔ ɔ, e kpale nɔ́ nɛ e ju ɔ, aloo nɔ́ nɛ e kpɔ̃ pani nya a, aloo nɔ́ nɛ e fia ojo kɛ ngɔ ɔ, aloo nɔ́ nɛ a tu ngɔ wo e dɛ ɔ, aloo nɔ́ nɛ laa nɛ e na a, 5 aloo nɔ́ fɛɛ nɔ́ nɛ e kã lakpa kita ngɛ he ɔ, nɛ́ e to nane mi pɛpɛɛpɛ, nɛ e ngɔ nane mi tomi nɔ́ ɔ mi dlami enuɔ mi kake kɛ piɛɛ he. E kɛ ha nɔtsɛ ɔ ligbi nɛ a maa bu lɛ fɔ ɔ. 6 É ngɔ agbosu nɛ kpa ko be e he, nɛ e he jua kɛ jua nɛ a po fɔ si ɔ sɔ kɛ ba ha Yehowa kaa fɔ yemi afɔle, nɛ́ osɔfo ɔ kɛ sã fɔ yemi afɔle ɔ. 7 Osɔfo ɔ kɛ ma kpata ha lɛ ngɛ Yehowa hɛ mi, nɛ nɔ́ fɛɛ nɔ́ ko nɛ e pee nɛ lɔ ɔ ha nɛ e ye fɔ ɔ, a kɛ maa ke lɛ.”

8 Yehowa ya nɔ nɛ e kɛ Mose tu munyu nɛ e de lɛ ke: 9 “Fã Aaron kɛ e bimɛ ɔmɛ nɛ o de mɛ ke, ‘Sami afɔle ɔ he mlaa ji nɛ ɔ nɛ: Sami afɔle ɔ nɛ hi la a nɔ ngɛ afɔle sami la tɛ ɔ nɔ nyɔnyɔɔnyɔ kɛ ya si je nanɛɛ, nɛ la a nɛ hi tsoe ngɛ afɔle sami la tɛ ɔ nɔ. 10 Osɔfo ɔ nɛ wo e we osɔfo tade nɛ a kɛ klala kpakpa kpɛ ɔ, nɛ e wo tagajami nɛ a kɛ klala kpakpa kpɛ ɔ. Jehanɛ ɔ, e je sami afɔle ɔ la zu* ɔ ngɛ la tɛ ɔ mi kɛ pue afɔle sami la tɛ ɔ kasa nya. 11 Jehanɛ ɔ, e je e tade ɔmɛ nɛ e wo tade kpahi nɛ e muɔɔ la zu ɔ kɛ ya sito he ɔ se he ko nɛ tsɔ. 12 Á ha nɛ la a nɛ ya nɔ nɛ e hi tsoe ngɛ afɔle sami la tɛ ɔ nɔ. E ko gbo. Osɔfo ɔ nɛ ngɔ lɛ́ kɛ wo mi daa mɔtu, nɛ e to sami afɔle ɔ kɛ pue nɔ, nɛ e sã lohwe ɔ nɛ a kɛ maa sã tue mi jɔmi afɔle ɔ zɔ ɔ ngɛ nɔ. 13 Á ha nɛ la a nɛ ya nɔ nɛ e hi tsoe ngɛ afɔle sami la tɛ ɔ nɔ daa. E ko gbo.

14 “‘Jehanɛ ɔ, ngma afɔle ɔ he mlaa ji nɛ ɔ nɛ: Aaron bimɛ ɔmɛ lɛ a kɛ maa ba afɔle sami la tɛ ɔ hɛ mi ngɛ Yehowa hɛ mi. 15 A ti nɔ kake nɛ́ piti ngma* mamu bukɔbukɔ nɛ a kɛ maa sã ngma afɔle ɔ dɛ kɔkɔ kake kɛ nu ɔ eko kɛ ohɛ ɔ nɛ ngɛ ngma afɔle ɔ nɔ ɔ tsuo, nɛ é sã kaa kaimi afɔle* nɛ daa si kɛ ha afɔle ɔ tsuo nɛ jeɔ via liliili* ha Yehowa ngɛ afɔle sami la tɛ ɔ nɔ. 16 Nɔ́ nɛ maa piɛ ɔ, Aaron kɛ e bimɛ ɔmɛ nɛ a ye. A ye lɛ kaa abolo nɛ masa be mi ngɛ he ko nɛ ngɛ klɔuklɔu. A ye ngɛ yale ɔ nɛ kpe he bo tsu ɔ ngɛ mi ɔ mi. 17 Á ko ngɔ nɔ́ ko nɛ masa ngɛ mi kɛ wo mi kɛ sã. I kɛ ha mɛ kaa a blɔ fa mi nɔ́ ngɛ afɔlehi nɛ a kɛ la sãã kɛ haa mi ɔ mi. E ji nɔ́ ko nɛ ngɛ klɔuklɔu pe kulaa kaa bɔ nɛ yayami afɔle ɔ kɛ fɔ yemi afɔle ɔ ngɛ ɔ. 18 Aaron binyumu ɔmɛ pɛ nɛ́ a ye. E ji a blɔ fa mi nɔ́ nɛ a ma ná daa ngɛ afɔlehi nɛ a kɛ la sãã ha Yehowa a mi nyɛ yi nɔhi tsuo. Nɔ́ fɛɛ nɔ́ nɛ maa sa afɔle ɔmɛ a he ɔ maa pee klɔuklɔu.

19 Yehowa kɛ Mose tu munyu ekohu nɛ e de lɛ ke: 20 “Ligbi nɛ a maa pɔ Aaron nu ɔ, afɔle nɛ Aaron kɛ e binyumu ɔmɛ maa sã ha Yehowa ji nɛ ɔ nɛ: á ngɔ mamu bukɔbukɔ lita enyɔ* kɛ ba kaa ngma afɔle nɛ́ a maa sã daa, á ngɔ e mi fã kɛ sã afɔle mɔtu, nɛ́ a ngɔ e mi fã kɛ sã afɔle gbɔkuɛ. 21 Á ngɔ nu kɛ futu mi nɛ a sã ngɛ kã tɛtlɛɛ nɔ. Á ngɔ ngma nɛ a kɛ nu futu mi saminya nɛ a sã a kɛ ba kaa ngma afɔle nɛ a ku mi tsɔwitsɔwi nɛ jeɔ via liliili* ha Yehowa. 22 Nɔ nɛ a maa pɔ lɛ nu ngɛ Aaron bimɛ ɔmɛ a kpɛti nɛ e ma ba ye e se ɔ nɛ́ e sã afɔle ɔ. E ji mlaa nɛ maa hi si kɛ ya neneene: Á sã lɛ tsuo nɛ e je la su ku ha Yehowa. 23 Ngma afɔle fɛɛ ngma afɔle nɛ osɔfo ɔ maa sã a, e sã lɛ tsuo. A ko ye eko.”

24 Yehowa kɛ Mose tu munyu ekohu nɛ e de lɛ ke: 25 “De Aaron kɛ e binyumu ɔmɛ ke, ‘Yayami afɔle ɔ he mlaa ji nɛ ɔ nɛ: Á gbe lohwe nɛ a kɛ maa sã yayami afɔle ɔ ngɛ Yehowa hɛ mi ngɛ he nɛ a gbeɔ lohwe nɛ a kɛ sãã sami afɔle ɔ ngɛ ɔ. E ji nɔ́ klɔuklɔu pe kulaa. 26 Osɔfo nɛ maa sã yayami afɔle ɔ nɛ ye e blɔ fa mi nɔ́. É ye ngɛ he ko nɛ ngɛ klɔuklɔu ngɛ yale ɔ nɛ kpe he bo tsu ɔ ngɛ mi ɔ mi.

27 “‘Nɔ́ fɛɛ nɔ́ ko nɛ maa sa afɔle ɔ he ɔ maa pee klɔuklɔu, nɛ ke muɔ ɔ eko fĩa pue nɔ ko tade mi ɔ, a fɔ tade ɔ he ngɛ he ko nɛ ngɛ klɔuklɔu. 28 Á ywia buɛ nɛ a hoo lo ɔ ngɛ mi ɔ. Se ke akɔblee buɛ lɛ a kɛ hoo ɔ, lɛɛ á sa buɛ ɔ mi nɛ a ngɔ nyu kɛ fɔ mi.

29 “‘Nyumuhi nɛ a ngɛ sɔmɔe kaa osɔfohi ɔ pɛ nɛ́ a ye. E ji nɔ́ ko nɛ ngɛ klɔuklɔu pe kulaa. 30 Se yayami afɔle fɛɛ yayami afɔle nɛ a maa ngɔ muɔ ɔ eko kɛ ya kpe he bo tsu ɔ mi nɛ a kɛ ma kpata ngɛ he klɔuklɔu ɔ, a ko ye lo ɔ eko. A kɛ la nɛ sã.

7 “‘Fɔ yemi afɔle ɔ he mlaa ji nɛ ɔ nɛ: E ji nɔ́ ko nɛ ngɛ klɔuklɔu pe kulaa. 2 Á gbe lohwe nɛ a kɛ maa sã fɔ yemi afɔle ɔ ngɛ he nɛ a gbeɔ lohwe nɛ a kɛ sãã sami afɔle ɔ ngɛ ɔ, nɛ́ a ngɔ e muɔ ɔ kɛ fĩa afɔle sami la tɛ ɔ he tsuo kɛ kpe. 3 Osɔfo ɔ* nɛ ngɔ zɔ ɔ tsuo, kɛ hlemi nɛ wo zɔ ɔ, kɛ zɔ nɛ ha e mi ní ɔmɛ a he ɔ, 4 kɛ e se tso mi ngmɛ enyɔ ɔmɛ kɛ a he zɔ ɔ kɛ ba. É je ko ɔ he zɔ ɔ kɛ se tso mi ngmɛ ɔmɛ hulɔ. 5 Osɔfo ɔ nɛ sã ngɛ afɔle sami la tɛ ɔ nɔ kaa afɔle nɛ a kɛ la sãã ha Yehowa. E ji fɔ yemi afɔle. 6 Nyumuhi nɛ a ngɛ sɔmɔe kaa osɔfohi ɔ pɛ nɛ́ a ye. Á ye ngɛ he ko nɛ ngɛ klɔuklɔu. E ji nɔ́ ko nɛ ngɛ klɔuklɔu pe kulaa. 7 Yayami afɔle ɔ he mlaa a nɔuu nɛ a kɛ ma tsu ní ngɛ fɔ yemi afɔle ɔ blɔ fa mi; lo ɔ maa pee osɔfo nɛ e kɛ ma kpata a nɔ́.

8 “‘Ke osɔfo ɔ sã sami afɔle ha nɔ ko ɔ, lohwe nɛ e kɛ sã sami afɔle ɔ he womi ɔ maa pee e nɔ́.

9 “‘Ngma afɔle fɛɛ ngma afɔle nɛ a maa sã ngɛ flɔɔnɔɔ mi, aloo a maa sã ngɛ buɛ mi, aloo a maa sã ngɛ kã tɛtlɛɛ nɔ ɔ maa pee osɔfo nɛ e maa sã afɔle ɔ nɔ́. E peeɔ e nɔ́. 10 Se ngma afɔle fɛɛ ngma afɔle nɛ a kɛ nu futu mi, loo nɔ́ nɛ a kɛ nu futuu we mi ɔ maa pee Aaron binyumu ɔmɛ tsuo a nɔ́; á gba lɛ fiee.

11 “‘Jehanɛ ɔ, ke nɔ ko ma tue mi jɔmi afɔle sami ha Yehowa a, e he mlaa ji nɛ ɔ nɛ: 12 Ke e ma afɔle ɔ sami nɛ e kɛ na Mawu si ɔ, e ngɔ ní nɛ ɔmɛ kɛ piɛɛ e we afɔle ɔ he kɛ ba: abolo nɛ masa be mi nɛ a bɔ lɛ lokotolokoto* nɛ a ngɔ nu kɛ futu mi, kɛ akpɔɔnɔɔ nɛ masa be mi nɛ a kɛ nu kpa hɛ mi, kɛ abolo nɛ a bɔ lɛ lokotolokoto nɛ a kɛ mamu bukɔbukɔ nɛ a ngɔ nu kɛ futu mi saminya a lɛ pee. 13 Jehanɛ hu ɔ, é ngɔ abolo nɛ masa ngɛ mi nɛ a bɔ lɛ lokotolokoto kɛ piɛɛ níhi nɛ e kɛ ma tue mi jɔmi afɔle ɔ sami kɛ na Mawu si ɔ he kɛ ba. 14 É je abolo slɔɔto ɔmɛ eko fɛɛ eko* mi kakaaka kaa afɔle nɛ ngɛ klɔuklɔu ha Yehowa; e maa pee osɔfo nɛ e ma fĩa lohwe nɛ a kɛ sã tue mi jɔmi afɔle ɔ muɔ ɔ nɔ́. 15 Á ye lohwe nɛ a kɛ sã tue mi jɔmi afɔle kɛ na Mawu si ɔ lo ɔ ligbi nɛ a kɛ sã afɔle ɔ nɔuu. E ko si eko nɛ je nɛ na yi.

16 “‘Ke nɔ ko ba sã tue mi jɔmi afɔle ɔ, si womi ko nɔ e ngɛ yee jio, e tsui mi faa nɛ e je jio, á ye lo ɔ ligbi nɛ e ba sã afɔle ɔ, nɛ ke eko piɛ ɔ, a ye e nɔ jena. 17 Se ligbi etɛne ɔ, ke lohwe nɛ a kɛ sã afɔle ɔ lo ɔ eko piɛ ɔ, á ngɔ la kɛ sã. 18 Ke nɔ ko ye lohwe nɛ a kɛ sã tue mi jɔmi afɔle ɔ lo ɔ eko ngɛ ligbi etɛne ɔ nɔ ɔ, Mawu bua be nɔ nɛ sã afɔle ɔ he jɔe. Nɛ e be jɔɔmi ko náe hulɔ. E ji tɔmi, nɛ nɔ* nɛ maa ye lo ɔ eko ɔ maa tloo lɛ nitsɛ e yayami. 19 Ke lo ko sa nɔ́ saisaa ko nɛ he tsɔ we he ɔ, á ko ye. Á ngɔ la kɛ sã. Nɔ fɛɛ nɔ ko nɛ e he tsɔ ɔ ma nyɛ maa ye lo nɛ he tsɔ ɔ.

20 “‘Se nɔ fɛɛ nɔ* nɛ e he tsɔ we nɛ maa ye lo nɛ a kɛ sã tue mi jɔmi afɔle ha Yehowa a eko ɔ, á gbe jamɛ a nɔ ɔ.* 21 Ke nɔ* ko he sa nɔ́ ko nɛ he tsɔ we he, adesa he nɔ́ ko nɛ he tsɔ we jio, lohwe nɛ e he tsɔ we jio, níhi nɛ a ngɛ tai nɛ a he tsɔ we ɔ eko jio, nɛ nɔ ɔ ye lo nɛ a kɛ sã tue mi jɔmi afɔle ha Yehowa a eko ɔ, á gbe jamɛatsɛ ɔ.’”*

22 Yehowa ya nɔ nɛ e kɛ Mose tu munyu nɛ e de lɛ ke: 23 “De Israel bi ɔmɛ ke, ‘Nyɛ ko ye na ku ko aloo agbosu ko aloo apletsi ko he zɔ ko. 24 Ke lohwe ko gbo lɛ nitsɛ e gbenɔ, aloo lohwe kpa ko nɛ gbe lɛ ɔ, nyɛ ma nyɛ maa ngɔ e zɔ ɔ kɛ pee ní kpahi, se nyɛ ko ye kɔkɔɔkɔ. 25 Ejakaa nɔ fɛɛ nɔ ko nɛ maa ye lohwe nɛ a kɛ sã afɔle nɛ a kɛ la sãã ha Yehowa a zɔ ɔ, a maa gbe lɛ.*

26 “‘Nyɛ ko ye muɔ ko muɔ ko ngɛ nyɛ hi he ɔmɛ, lohwe pɛlitsɛ muɔ jio, lohwe kpahi a muɔ jio. 27 Nɔ fɛɛ nɔ* nɛ maa ye muɔ saisaa ko ɔ, á gbe lɛ.’”*

28 Yehowa ya nɔ nɛ e kɛ Mose tu munyu nɛ e de lɛ ke: 29 “De Israel bi ɔmɛ ke, ‘Nɔ fɛɛ nɔ nɛ e maa sã tue mi jɔmi afɔle ha Yehowa a, e ngɔ tue mi jɔmi afɔle ɔ fã ko kɛ ba ha Yehowa. 30 Lɛ nitsɛ é hɛɛ lohwe ɔ zɔ ɔ kɛ e gugue ɔ ngɛ e dɛ mi kɛ ba kaa afɔle nɛ a kɛ la sãã ha Yehowa. E maa fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi. 31 Osɔfo ɔ maa sã zɔ ɔ ngɛ afɔle sami la tɛ ɔ nɔ, se lohwe ɔ gugue ɔ lɛɛ, e maa pee Aaron kɛ e binyumu ɔmɛ a nɔ́.

32 “‘Nyɛɛ ngɔ lohwe nɛ nyɛɛ kɛ maa sã tue mi jɔmi afɔle ɔ hiɔ nane ɔ kɛ ha osɔfo ɔ kaa e blɔ fa mi nɔ́ nɛ ngɛ klɔuklɔu. 33 Aaron binyumu ɔmɛ a ti nɔ nɛ maa ngɔ lohwe nɛ a kɛ sã tue mi jɔmi afɔle ɔ muɔ ɔ kɛ zɔ ɔ kɛ ya Mawu hɛ mi ɔ, lohwe ɔ hiɔ nane ɔ maa pee e nɔ́. 34 I ngɔ lohwe nɛ Israel bi ɔmɛ kɛ maa sã fɔ̃mi afɔle ɔ gugue, kɛ lohwe ɔ nɛ a kɛ maa sã tue mi jɔmi afɔlehi ɔ nane nɛ ji blɔ fa mi nɔ́ klɔuklɔu ɔ kɛ ngɛ osɔfo Aaron kɛ e binyumu ɔmɛ hae kaa a nɔ́. E ji mlaa nɛ fɔɔ si kɛ ha Israel bi ɔmɛ kɛ yaa neneene.

35 “‘Ligbi nɛ e kɛ osɔfo ɔmɛ, nɛ ji Aaron kɛ e binyumu ɔmɛ ba konɛ a ba sɔmɔ kaa osɔfohi ha Yehowa a, enɛ ɔ ji a blɔ fa mi nɔ́ nɛ a je ngɛ Yehowa afɔlehi nɛ a kɛ la sãã a mi kɛ ha mɛ. 36 Yehowa fã ke a ngɔ blɔ fa mi nɔ́ nɛ ɔ ngɛ Israel bi ɔmɛ a dɛ kɛ ha mɛ ngɛ ligbi nɛ e pɔ mɛ nu ɔ nɔ. E ji mlaa nɛ maa hi si kɛ ya neneene, a yi nɔhi tsuo.’”

37 Sami afɔle ɔ, ngma afɔle ɔ, yayami afɔle ɔ, fɔ yemi afɔle ɔ, osɔfo womi afɔle ɔ, kɛ tue mi jɔmi afɔle ɔ he mlaa ji nɛ ɔ nɛ. 38 Jã ji bɔ nɛ Yehowa fã Mose ngɛ Sinai Yoku ɔ nɔ ligbi nɛ e fã Israel bi ɔmɛ kaa a ngɔ a we afɔlehi kɛ ba ha Yehowa ngɛ Sinai nga a nɔ ɔ nɛ.

8 Yehowa ya nɔ nɛ e kɛ Mose tu munyu nɛ e de lɛ ke: 2 “Ngɔɔ Aaron kɛ e binyumu ɔmɛ, tade ɔmɛ, nɔ pɔmi nu ɔ, na ku nɛ a kɛ maa sã yayami afɔle ɔ, agbosu enyɔ ɔmɛ, kɛ kɛtɛ* kɛ e mi abolo nɛ masa be mi ɔ, 3 nɛ o ha nɛ ma a tsuo nɛ a bua a he nya ngɛ kpe he bo tsu ɔ nya.”

4 Kɛkɛ nɛ Mose pee kaa bɔ nɛ Yehowa fã lɛ ɔ, nɛ ma a ba bua a he nya ngɛ kpe he bo tsu ɔ nya. 5 Jehanɛ ɔ, Mose de ma a tsuo ke: “Nɔ́ nɛ Yehowa fã ke waa pee ji nɛ ɔ nɛ.” 6 Lɔ ɔ he ɔ, Mose ngɔ Aaron kɛ e binyumu ɔmɛ kɛ ba nɛ e kɛ nyu fɔ a he ha mɛ. 7 Lɔ ɔ se ɔ, e wo tade klɔii ɔ ha Aaron, nɛ e fi mlɛ mi fimi nɔ́* ɔ ha lɛ, nɛ e wo tade klɔii nɛ kɔni be he ɔ ha lɛ, nɛ e wo efɔd ɔ ha lɛ, nɛ e ngɔ efɔd ɔ mlɛ mi fimi nɔ́ ɔ kɛ fi e mlɛ mi nɛ e muɛ* lɛ bɔ nɛ sa. 8 Lɔ ɔ se ɔ, e wo gugue nɔ hami nɔ́ ɔ ha lɛ, nɛ e ngɔ Urim ɔ kɛ Tumim ɔ kɛ wo gugue nɔ hami nɔ́ ɔ mi. 9 Kɛkɛ nɛ Mose ngɔ osɔfo pɛɛ ɔ kɛ bu e yi, nɛ e ngɔ sika tsu nɔ́ pɛtɛpɛtɛ nɛ ngɛ tsɛ̃e, nɛ ji he nɔ jɔɔmi okadi klɔuklɔu* ɔ kɛ wo pɛɛ ɔ hɛ mi kaa bɔ nɛ Yehowa fã lɛ ɔ.

10 Jehanɛ ɔ, Mose ngɔ nɔ pɔmi nu ɔ nɛ e pɔ bo tsu ɔ kɛ níhi tsuo nɛ ngɛ mi ɔ nu, nɛ e pee mɛ klɔuklɔu. 11 Lɔ ɔ se ɔ, e fĩa eko kɛ pue afɔle sami la tɛ ɔ nɔ si kpaago, nɛ e pɔ afɔle sami la tɛ ɔ kɛ e he ní ɔmɛ tsuo, kɛ kã a kɛ nɔ́ nɛ a kɛ kã a maa nɔ ɔ nu kɛ pee mɛ klɔuklɔu. 12 Nyagbe ɔ, e plɛ nɔ pɔmi nu ɔ eko kɛ pue Aaron yi mi, nɛ e pɔ lɛ nu kɛ pee lɛ klɔuklɔu.

13 Jehanɛ ɔ, Mose ngɔ Aaron binyumu ɔmɛ kɛ ba nɛ e wo tade klɔiihi ha mɛ, nɛ e ngɔ mlɛ mi fimi níhi kɛ fi nɔ, nɛ e ngɔ yi fimi níhi kɛ fi a yi kaa bɔ nɛ Yehowa fã lɛ ɔ.

14 Kɛkɛ nɛ e ngɔ na ku nɛ a kɛ maa sã yayami afɔle ɔ kɛ ba, nɛ Aaron kɛ e binyumu ɔmɛ ngɔ a nine kɛ pue na ku ɔ nɛ a kɛ maa sã yayami afɔle ɔ yi mi. 15 Mose gbe na ku ɔ nɛ e ngɔ e nine nguɛ kɛ sɔ muɔ ɔ mi, nɛ e kɛ kpa koli ɔmɛ nɛ a ngɛ afɔle sami la tɛ ɔ kɔ̃ nya eywiɛ ɔmɛ a he, nɛ e tsukɔ afɔle sami la tɛ ɔ he,* se e kpa muɔ ɔ nɛ piɛ ɔ kɛ pue afɔle sami la tɛ ɔ sisi bɔ nɛ pee nɛ e pee lɛ klɔuklɔu konɛ a sã kpatami afɔle ngɛ nɔ. 16 Lɔ ɔ se ɔ, Mose ngɔ zɔ nɛ ngɛ mi ní ɔmɛ a he ɔ tsuo, kɛ zɔ nɛ ngɛ ko ɔ he ɔ, kɛ se tso mi ngmɛ enyɔ ɔmɛ kɛ zɔ nɛ ngɛ a he ɔ, nɛ e sã ngɛ afɔle sami la tɛ ɔ nɔ. 17 Kɛkɛ nɛ Mose ha nɛ a kɛ la sã na ku ɔ nɛ piɛ ɔ, e he womi ɔ, e lo ɔ, kɛ e fĩ ɔ ngɛ sito he ɔ se kaa bɔ nɛ Yehowa fã lɛ ɔ.

18 Jehanɛ ɔ, e ngɔ agbosu nɛ a kɛ maa sã sami afɔle ɔ kɛ ba, nɛ Aaron kɛ e binyumu ɔmɛ ngɔ a nine kɛ pue agbosu ɔ yi mi. 19 Kɛkɛ nɛ Mose gbe agbosu ɔ, nɛ e fĩa e muɔ ɔ kɛ pue afɔle sami la tɛ ɔ he tsuo. 20 Mose poo agbosu ɔ kpɔ nya kpɔ nya, nɛ e sã e yi ɔ, e kpɔ nya amɛ, kɛ e zɔ ɔ.* 21 Mose ngɔ nyu kɛ fɔ mi ní ɔ kɛ nane ɔmɛ a he, nɛ e sã agbosu ɔ tsuo ngɛ afɔle sami la tɛ ɔ nɔ. E ji sami afɔle nɛ jeɔ via liliili.* E ji afɔle nɛ a kɛ la sã ha Yehowa kaa bɔ nɛ Yehowa fã Mose ɔ.

22 Kɛkɛ nɛ e ngɔ agbosu enyɔne ɔ, nɛ ji osɔfo womi agbosu ɔ kɛ ba, nɛ Aaron kɛ e binyumu ɔmɛ ngɔ a nine kɛ pue agbosu ɔ yi mi. 23 Mose gbe agbosu ɔ nɛ e ngɔ e muɔ ɔ eko kɛ kpa Aaron hiɔ nɔ tue ɔ nya, nɛ e ngɔ eko kɛ kpa e hiɔ nine nguɛ gɔleku ɔ he, nɛ e ngɔ eko kɛ kpa e hiɔ nane nguɛ gɔleku ɔ he. 24 Lɔ ɔ se ɔ, Mose ngɔ Aaron binyumu ɔmɛ kɛ ba hɛ mi, nɛ e ngɔ muɔ ɔ eko kɛ kpa a hiɔ nɔ tue ɔmɛ a nya, nɛ e ngɔ eko kɛ kpa a hiɔ nine nguɛ gɔleku ɔmɛ a he, nɛ e ngɔ eko kɛ kpa a hiɔ nane nguɛ gɔleku ɔmɛ hu a he; se muɔ nɛ piɛ ɔ, Mose fĩa kɛ pue afɔle sami la tɛ ɔ he tsuo.

25 Kɛkɛ nɛ e ngɔ zɔ ɔ, kɛ hlemi nɛ wo zɔ ɔ, kɛ zɔ nɛ ngɛ mi ní ɔ he ɔ tsuo, kɛ zɔ nɛ ngɛ ko ɔ he ɔ, kɛ se tso mi ngmɛ enyɔ ɔmɛ kɛ a he zɔ ɔ, kɛ hiɔ nane ɔ. 26 E je abolo nɛ masa be mi nɛ a bɔ lɛ lokotolokoto* kake, abolo nɛ a bɔ lɛ lokotolokoto nɛ a kɛ nu kpa hɛ mi kake, kɛ akpɔɔnɔɔ kake ngɛ kɛtɛ* kɛ e mi abolo nɛ masa be mi nɛ ngɛ Yehowa hɛ mi ɔ mi. Kɛkɛ nɛ e kɛ pue hiɔ nane ɔ kɛ zɔ ɔmɛ a nɔ. 27 Lɔ ɔ se ɔ, e ngɔ lɛ tsuo kɛ wo Aaron kɛ e binyumu ɔmɛ a dɛ mi, nɛ e fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi. 28 Kɛkɛ nɛ Mose ngɔ ní ɔmɛ ngɛ a dɛ nɛ e sã ngɛ afɔle sami la tɛ ɔ nɔ ngɛ sami afɔle ɔ nɔ. Ní nɛ ɔmɛ ji osɔfo womi afɔle nɛ jeɔ via liliili.* E ji afɔle nɛ a kɛ la sã ha Yehowa.

29 Kɛkɛ nɛ Mose ngɔ lohwe ɔ gugue ɔ nɛ e fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi. Lɔ ɔ ba pee Mose blɔ fã mi nɔ́ nɛ e ná kɛ je osɔfo womi agbosu ɔ mi kaa bɔ nɛ Yehowa fã lɛ ɔ.

30 Nɛ Mose ngɔ nɔ pɔmi nu ɔ eko, kɛ muɔ nɛ ngɛ afɔle sami la tɛ ɔ nɔ ɔ hu eko nɛ e fĩa kɛ pue Aaron kɛ e tade ɔmɛ, kɛ e binyumu ɔmɛ nɛ a piɛɛ e he ɔ, kɛ mɛ hu a tade ɔmɛ a nɔ. Lɔ ɔ he ɔ, e pee Aaron kɛ e tade ɔmɛ kɛ e binyumu ɔmɛ kɛ a tade ɔmɛ klɔuklɔu.

31 Kɛkɛ nɛ Mose de Aaron kɛ e binyumu ɔmɛ ke: “Nyɛɛ hoo lo ɔ ngɛ kpe he bo tsu ɔ nya, nɛ nyɛɛ ye e kɛ abolo nɛ ngɛ osɔfo womi kɛtɛ* ɔ mi ɔ ngɛ lejɛ ɔ kaa bɔ nɛ a fã mi ke ma de nyɛ ɔ, ‘Aaron kɛ e binyumu ɔmɛ nɛ a ye.’ 32 Ke lo ɔ kɛ abolo ɔ eko piɛ ɔ, nyɛɛ ngɔ la kɛ sã. 33 Nyɛ ko je kpe he bo tsu ɔ nya ligbi kpaago, kɛ ya si ligbi nɛ osɔfo womi ɔ maa ba nyagbe, ejakaa ligbi kpaago nɛ a kɛ maa wo nyɛ osɔfo ɔ nɛ.* 34 Yehowa lɛ fã ke waa pee nɔ́ nɛ wa pee mwɔnɛ ɔ bɔ nɛ pee nɛ wa kɛ kpata ha nyɛ. 35 Nyɛɛ hi kpe he bo tsu ɔ nya nyɔ kɛ pia ligbi kpaago, nɛ́ nyɛɛ pee níhi nɛ Yehowa fã nyɛ ke nyɛɛ pee ɔ, konɛ nyɛ ko gbo; ejakaa jã nɛ a fã mi ke ma de nyɛ.”

36 Aaron kɛ e binyumu ɔmɛ pee nɔ́ fɛɛ nɔ́ nɛ Yehowa fã kɛ gu Mose nɔ ke a pee ɔ.

9 Ngɛ ligbi kpaanyɔne ɔ nɔ ɔ, Mose tsɛ Aaron kɛ e binyumu ɔmɛ, kɛ Israel nikɔtɔma amɛ. 2 E de Aaron ke: “Ngɔɔ na bi nɛ kpa ko be e he nɛ o kɛ maa sã yayami afɔle, kɛ agbosu nɛ kpa ko be e he nɛ o kɛ maa sã sami afɔle ɔ kɛ ba Yehowa hɛ mi. 3 Se mo de Israel bi ɔmɛ ke, ‘Nyɛɛ ngɔ akpakpo nɛ e ye jeha kake nɛ kpa ko be e he kɛ ba sã yayami afɔle, nɛ nyɛɛ ngɔ na bi nɛ e ye jeha kake kɛ agbosu wayoo nɛ e ye jeha kake, nɛ kpa ko be a he kɛ ba sã sami afɔle, 4 nɛ nyɛɛ ngɔ na ku kɛ agbosu nɛ a kɛ maa sã tue mi jɔmi afɔlehi kɛ ba sã afɔle ngɛ Yehowa hɛ mi, nɛ nyɛɛ ngɔ ngma* nɛ a kɛ nu futu mi kɛ ba sã ngma afɔle, ejakaa Yehowa ma je e he kpo kɛ tsɔɔ nyɛ mwɔnɛ ɔ.’”

5 Lɔ ɔ he ɔ, a ngɔ níhi nɛ Mose fã mɛ ke a kɛ ba a kɛ ba kpe he bo tsu ɔ hɛ mi. Nɛ ma a tsuo ba da si ngɛ Yehowa hɛ mi. 6 Nɛ Mose de mɛ ke: “Nɔ́ nɛ Yehowa fã nyɛ ke nyɛɛ pee ji nɛ ɔ nɛ, bɔ nɛ pee nɛ Yehowa nɛ je e hɛ mi nyami ɔ kpo kɛ tsɔɔ nyɛ.” 7 Kɛkɛ nɛ Mose de Aaron ke: “Yaa afɔle sami la tɛ ɔ he nɛ o ya sã mo nitsɛ o yayami afɔle kɛ mo nitsɛ o sami afɔle, nɛ́ o kɛ kpata kɛ ha mo nitsɛ o he kɛ o we ɔ; nɛ́ o ngɔ ma a we afɔle ɔ kɛ ba nɛ o kɛ ba kpata ha mɛ kaa bɔ nɛ Yehowa fã a.”

8 Oya nɔuu nɛ Aaron ho afɔle sami la tɛ ɔ he ya, nɛ e ya gbe na bi nɛ e kɛ maa sã yayami afɔle kɛ ha lɛ nitsɛ e he ɔ. 9 Kɛkɛ nɛ Aaron binyumu ɔmɛ ngɔ muɔ ɔ kɛ ha lɛ, nɛ e ngɔ e nine nguɛ kɛ sɔ muɔ ɔ mi nɛ e kɛ kpa afɔle sami la tɛ ɔ koli ɔmɛ a he, nɛ e plɛ muɔ nɛ piɛ ɔ kɛ pue afɔle sami la tɛ ɔ sisi. 10 Aaron sã zɔ ɔ kɛ se tso mi ngmɛ ɔmɛ kɛ zɔ nɛ ha ko ɔ he nɛ a je ngɛ yayami afɔle ɔ mi ɔ ngɛ afɔle sami la tɛ ɔ nɔ kaa bɔ nɛ Yehowa fã Mose ɔ. 11 Nɛ e sã lo ɔ kɛ lohwe ɔ he womi ɔ ngɛ sito he ɔ se.

12 Kɛkɛ nɛ Aaron gbe lohwe nɛ a kɛ maa sã sami afɔle ɔ, nɛ Aaron binyumu ɔmɛ ngɔ muɔ ɔ kɛ ha lɛ, nɛ e fĩa kɛ pue afɔle sami la tɛ ɔ he tsuo. 13 A ngɔ sami afɔle ɔ lo ɔ kpɔ nya kpɔ nya amɛ kɛ e yi ɔ kɛ ha lɛ, nɛ e sã ngɛ afɔle sami la tɛ ɔ nɔ. 14 Lɔ ɔ se ɔ, e fɔ lohwe ɔ mi ní ɔmɛ kɛ e nane ɔmɛ a he, nɛ e sã kɛ piɛ sami afɔle ɔ nɛ ngɛ afɔle sami la tɛ ɔ nɔ ɔ he.

15 Kɛkɛ nɛ e ngɔ ma bi ɔmɛ afɔle ɔ kɛ ba, nɛ e ngɔ apletsi nɛ ma a kɛ ba konɛ a kɛ ba sã yayami afɔle ɔ, nɛ e gbe nɛ e kɛ sã yayami afɔle kaa kekle nɔ́ ɔ. 16 Nɛ e ngɔ sami afɔle ɔ kɛ ba nɛ e pee lɛ kaa bɔ nɛ mlaa a tsɔɔ kaa a pee ɔ.

17 Jehanɛ ɔ, e ngɔ ngma afɔle ɔ kɛ ba, nɛ e piti eko kɛ wo e dɛ mi kɛ piɛɛ sami afɔle nɛ a sãã mɔtu ɔ he nɛ e sã ngɛ afɔle sami la tɛ ɔ nɔ.

18 Lɔ ɔ se ɔ, e gbe na ku ɔ kɛ agbosu ɔ nɛ ma a kɛ ba konɛ a kɛ sã tue mi jɔmi afɔle ha mɛ ɔ. Kɛkɛ nɛ Aaron binyumu ɔmɛ ngɔ muɔ ɔ kɛ ha lɛ, nɛ e fĩa muɔ ɔ kɛ pue afɔle sami la tɛ ɔ he tsuo. 19 Se na ku ɔ zɔ ɔ, kɛ agbosu ɔ hlemi nɛ wo zɔ ɔ, kɛ zɔ nɛ ha mi ní ɔmɛ a he ɔ, kɛ se tso mi ngmɛ ɔmɛ, kɛ ko ɔ he zɔ ɔ lɛɛ, 20 a ngɔ lɛ* tsuo kɛ pue gugue ɔmɛ a nɔ, nɛ lɔ ɔ se ɔ, e sã lɛ tsuo ngɛ afɔle sami la tɛ ɔ nɔ. 21 Se Aaron fɔ̃ lohwe ɔmɛ a gugue ɔ kɛ a hiɔ nane ɔ kɛ ya kɛ ba kaa fɔ̃mi afɔle ngɛ Yehowa hɛ mi kaa bɔ nɛ Mose fã ke a pee ɔ.

22 Kɛkɛ nɛ Aaron wo e nine nɔ kɛ tsɔɔ ma a nɛ e jɔɔ mɛ, nɛ e kple si kɛ je he nɛ e sã yayami afɔle ɔ, kɛ sami afɔle ɔ, kɛ tue mi jɔmi afɔle ɔ ngɛ ɔ. 23 Nyagbe ɔ, Mose kɛ Aaron sɛ kpe he bo tsu ɔ mi nɛ a je kpo nɛ a jɔɔ ma a.

Jehanɛ ɔ, Yehowa hɛ mi nyami ɔ je kpo nɛ ma a tsuo na, 24 kɛkɛ nɛ la je Yehowa ngɔ nɛ e ba sã sami afɔle ɔ kɛ zɔ nɛ ngɛ afɔle sami la tɛ ɔ nɔ ɔ. Benɛ ma a tsuo na nɔ́ nɛ ɔ, a he ose nɛ a ngɔ a hɛ mi kɛ bu si.

10 Pee se ɔ, Aaron binyumuhi nɛ ji Nadab kɛ Abihu wo a la jemi ní ɔmɛ, nɛ a je la ngɔ wo a mi nɛ a ngɔ tsopa kɛ e he via kɛ pue nɔ. Kɛkɛ nɛ a bɔni afɔle nɛ a be he blɔ kaa a sãã, nɛ́ Mawu fã we mɛ kaa a sã a sami ngɛ Yehowa hɛ mi. 2 Kɛkɛ nɛ la je Yehowa ngɔ nɛ e ba sã mɛ nɛ a gbo ngɛ Yehowa hɛ mi. 3 Kɛkɛ nɛ Mose de Aaron ke: “Nɔ́ nɛ Yehowa de ji nɛ ɔ nɛ, ‘E sa nɛ ni nɛmɛ nɛ a ngɛ ye kasa nya a nɛ́ a na kaa i ngɛ klɔuklɔu, nɛ́ ma a tsuo nɛ wo ye hɛ mi nyami.’” Kɛkɛ nɛ Aaron pee dii.

4 Lɔ ɔ he ɔ, Mose tsɛ Mishael kɛ Elizafan nɛ a ji Aaron tsɛ wayo Uziel binyumuhi ɔ nɛ e de mɛ ke: “Nyɛɛ ba hiɛ ɔ, nyɛ ba muɔɔ nyɛ nyɛmimɛ ɔmɛ kɛ je he klɔuklɔu ɔ hɛ mi kɛ ho sito he ɔ se ya.” 5 Lɔ ɔ he ɔ, a ba nɛ a ba wo gbogboe ɔmɛ kɛ a he tade klɔii ɔmɛ kɛ ho sito he ɔ se ya kaa bɔ nɛ Mose de mɛ ɔ.

6 Kɛkɛ nɛ Mose de Aaron kɛ e binyumu kpa amɛ nɛ ji Eleazar kɛ Itamar ke: “Nyɛ ko ngmɛɛ nyɛ yi bwɔmi he kɛ pue nyɛ nɔ, nɛ nyɛ ko gba nyɛ tadehi hulɔ, bɔ nɛ pee nɛ nyɛ ko ba gbo nɛ Mawu mi mi nɛ ba fu ma a tsuo. Nyɛ nyɛmimɛ ɔmɛ nɛ ji Israel we ɔ tsuo ma fo ni nɛmɛ nɛ Yehowa kɛ la gbe mɛ ɔ a he ya. 7 Nyɛ ko je kpe he bo tsu ɔ nya kɛ ya he ko, ke pi jã a, nyɛ ma gbo, ejakaa Yehowa nɔ pɔmi nu ɔ ngɛ nyɛ nɔ.” Lɔ ɔ he ɔ, a pee nɔ́ nɛ Mose de mɛ ɔ.

8 Kɛkɛ nɛ Yehowa de Aaron ke: 9 “Ke mo aloo o binyumu ɔmɛ nɛ a piɛɛ o he ɔ ma kpe he bo tsu ɔ mi ɔ, nyɛ ko nu wai aloo dã kpa ko nɛ nya wa bɔ nɛ pee nɛ nyɛ ko gbo. E ji mlaa nɛ fɔɔ si kɛ ha nyɛ yi nɔhi tsuo. 10 Enɛ ɔ ma ha nɛ nyɛ maa na slɔɔto nɛ ngɛ nɔ́ klɔuklɔu kɛ nɔ́ nɛ be klɔuklɔu, kɛ nɔ́ nɛ he tsɔ kɛ nɔ́ nɛ he tsɔ we a kpɛti, 11 konɛ nyɛɛ tsɔɔ Israel bi ɔmɛ blɔ tsɔɔmihi tsuo nɛ Yehowa kɛ ha mɛ kɛ gu Mose nɔ ɔ.”

12 Kɛkɛ nɛ Mose kɛ Aaron kɛ e binyumuhi nɛ a piɛ, nɛ ji Eleazar kɛ Itamar a tu munyu nɛ e de mɛ ke: “Nyɛɛ ngɔ nɔ́ nɛ a kɛ sã ngma afɔle nɛ a kɛ la sãã ha Yehowa a mi nɔ́ nɛ piɛ ɔ nɛ nyɛ kɛ sã abolo nɛ masa be mi, nɛ nyɛɛ ye ngɛ afɔle sami la tɛ ɔ he, ejakaa e ji nɔ́ ko nɛ ngɛ klɔuklɔu pe kulaa. 13 Nyɛɛ ye ngɛ he ko nɛ ngɛ klɔuklɔu, ejakaa e ji o blɔ fa mi nɔ́, nɛ e ji o binyumu ɔmɛ hu a blɔ fa mi nɔ́ nɛ a ná ngɛ afɔlehi nɛ a kɛ la sãã ha Yehowa a mi, ejakaa jã nɛ a fã mi ke ma de nyɛ. 14 Jehanɛ hu ɔ, o kɛ o binyumu ɔmɛ kɛ o biyi ɔmɛ nyɛɛ ye lohwe nɛ a kɛ sã fɔ̃mi afɔle ɔ gugue ɔ kɛ e nane nɛ ji afɔle klɔuklɔu ɔ ngɛ he ko nɛ he tsɔ, ejakaa a kɛ ní nɛ ɔmɛ ha mo kaa o blɔ fa mi nɔ́ kɛ o binyumu ɔmɛ hu a blɔ fa mi nɔ́ ngɛ tue mi jɔmi afɔlehi nɛ Israel bi ɔmɛ maa sã a mi. 15 Á ngɔ lohwe ɔ nane nɛ ji afɔle klɔuklɔu ɔ kɛ e gugue nɛ a kɛ maa sã fɔ̃mi afɔle ɔ kɛ piɛɛ zɔ nɛ a kɛ maa sã afɔle nɛ a kɛ la sãã a he kɛ ba, nɛ́ a fɔ̃ fɔ̃mi afɔle ɔ kɛ ya kɛ ba ngɛ Yehowa hɛ mi. E maa pee o blɔ fa mi nɔ́ kɛ o binyumuhi nɛ a piɛɛ o he ɔ hu a blɔ fa mi nɔ́ daa kaa bɔ nɛ Yehowa fã a.”

16 Kɛkɛ nɛ Mose hla apletsi nɛ a kɛ ba sã yayami afɔle ɔ lo nɛ piɛ ɔ hluu, nɛ e na kaa a sã lɛ tsuo. Lɔ ɔ he ɔ, e mi mi fu Aaron binyumuhi nɛ piɛ ɔ, nɛ ji Eleazar kɛ Itamar, nɛ e bi si ke: 17 “Mɛni he je nɛ nyɛ yi lohwe nɛ a kɛ sã yayami afɔle ɔ lo ɔ ngɛ he klɔuklɔu ɔ? Anɛ nyɛ li kaa e ji nɔ́ nɛ ngɛ klɔuklɔu pe kulaa nɛ Mawu kɛ ha nyɛ konɛ nyɛɛ da mi kɛ ha ma a ngɛ a yayami ɔmɛ a he je, nɛ nyɛ kɛ kpata ha mɛ ngɛ Yehowa hɛ mi lo? 18 Hyɛ! A ngɔɛ e muɔ ɔ kɛ bɛ he klɔuklɔu ɔ. Jinɛ e sa kaa nyɛ ko ye ngɛ he klɔuklɔu ɔ kaa bɔ nɛ a fã mi ɔ.” 19 Aaron ha Mose heto ke: “Hyɛ! Mwɔnɛ ɔ, a kɛ a yayami afɔle kɛ a sami afɔle ɔ ba Yehowa hɛ mi, se kɛ̃ ɔ, ní nɛ ɔmɛ ba ye nɔ. Kaa i ye lohwe nɛ a kɛ sã yayami afɔle ɔ eko mwɔnɛ ɔ, anɛ Yehowa bua ko jɔ he lo?” 20 Benɛ Mose nu munyu nɛ ɔ, e nu lɛ sisi.

11 Kɛkɛ nɛ Yehowa de Mose kɛ Aaron ke: 2 “Nyɛ de Israel bi ɔmɛ ke, ‘Zugba a nɔ lohwehi* nɛ nyɛ ma nyɛ maa ye ji nɛ ɔmɛ nɛ: 3 Lohwe fɛɛ lohwe nɛ e nane kokloto mi gba nɛ blɔ ngɛ kpɛ nɛ e gɔleɔ nɔ́ nɛ e yeɔ nɛ e kpale taa ekohu ɔ, nyɛ ma nyɛ maa ye.

4 “‘Se lohwehi nɛ a gɔleɔ nɔ́ nɛ a yeɔ nɛ a kpale taa ekohu aloo nɛ a nane kokloto mi gba nɛ e sɛ nɛ nyɛɛ ye ji nɛ ɔ nɛ: afukpɔngɔ, e gɔleɔ nɔ́ nɛ e yeɔ nɛ e kpale taa ekohu se e nane kokloto mi gba we. E he tsɔ we ha nyɛ. 5 Jehanɛ hu ɔ, nyɛ ko ye tɛ sa nɔ kpi, ejakaa e gɔleɔ nɔ́ nɛ e yeɔ nɛ e kpale taa ekohu, se e nane kokloto mi gba we. E he tsɔ we ha nyɛ. 6 Nyɛ ko ye alɔngɔ hulɔ, ejakaa e gɔleɔ nɔ́ nɛ e yeɔ nɛ e kpale taa ekohu, se e nane kokloto mi gba we. E he tsɔ we ha nyɛ. 7 Kpotoo hu nyɛ ko ye, ejakaa e nane kokloto mi gba nɛ blɔ ngɛ kpɛ, se e gɔle we nɔ́ nɛ e ye ɔ nɛ́ e taa ekohu. E he tsɔ we ha nyɛ. 8 Nyɛ ko ye ekoeko lo, nɛ nyɛ ko ta a gbogboe he hulɔ. A he tsɔ we ha nyɛ.

9 “‘Lohi nɛ a hiɔ nyu mi nɛ nyɛ ma nyɛ maa ye ji nɛ ɔmɛ nɛ: Lo fɛɛ lo nɛ e ngɛ se ngmo kɛ toto, wo mi lo jio, pa mi lo jio, nyɛ ma nyɛ maa ye. 10 Se lo fɛɛ lo* nɛ ngɛ wo mi kɛ pa mi nɛ e be se ngmo kɛ toto, lohi nɛ a ngɛ nyu mi nɛ a nyɛɛɔ kutuu jio, lo* kpahi nɛ a ngɛ nyu mi ɔ a kpɛti eko jio, a ji ní hiɔmi níhi kɛ ha nyɛ. 11 Ee, á pee nyɛ ní hiɔmi níhi, nyɛ ko ye ekoeko lo, nɛ nyɛɛ hiɔ a gbogboehi. 12 Nɔ́ fɛɛ nɔ́ ko nɛ ngɛ nyu mi nɛ e be se ngmo kɛ toto ɔ, e ji nɔ́ hiɔmi nɔ́ kɛ ha nyɛ.

13 “‘Lohwehi nɛ a teɔ nɛ nyɛɛ hiɔ ji nɛ ɔmɛ nɛ; nyɛ ko ye, ejakaa a ji ní hiɔmi níhi: kɔle, pa nɔ kayo, okpoku yumu, 14 papalotsui tsutsu, kɛ papalotsui yumu slɔɔtohi tsuo, 15 kuakualabite slɔɔtohi tsuo, 16 duguma, klomi, pa nɔ lahuɛ, kayo slɔɔtohi tsuo, 17 klomi wayo, pa nɔ dɔkɔdɔkɔ, klomi tuegagatsɛ, 18 omiɔhɔɔ, dɔkɔdɔkɔ nyagagatsɛ, okpoku, 19 aklawa, abanga slɔɔtohi tsuo, sapɔ, kɛ apani.* 20 Lohwe tsɔwi tsuo nɛ a ngɛ pɛli nɛ a kɛ a nane eywiɛ nyɛɛɔ ɔ ji ní hiɔmi níhi ha nyɛ.

21 “‘Ngɛ lohwe tsɔwi nɛ a ngɛ pɛli nɛ a kɛ a nane eywiɛ nyɛɛɔ ɔ tsuo a blɔ fa mi ɔ, nyɛ ma nyɛ maa ye ní nɛmɛ nɛ a ngɛ nane gagaa enyɔ kɛ piɛɛ eywiɛ ɔ he nɛ a kɛ tuɔ ngɛ zugba a. 22 Ní nɛmɛ nɛ nyɛ ma nyɛ maa ye ji nɛ ɔmɛ nɛ: baalɛ slɔɔtohi nɛ a hiaa blɔ kɛ jeɔ he kake kɛ yaa he kpa, baalɛ kpahi nɛ a yeɔ, apã,* kɛ tukpɛtukpɛ.* 23 Lohwe tsɔwi kpahi tsuo nɛ a ngɛ pɛli nɛ a nyɛɛɔ kutuu nɛ a ngɛ nane eywiɛɛywiɛ ɔ, a ji ní hiɔmi níhi ha nyɛ. 24 Ke nyɛ ta lohwe nɛ ɔmɛ a he ɔ, nyɛ he be tsɔe. Nɔ fɛɛ nɔ nɛ maa ta eko gbogboe he ɔ, e he be tsɔe kɛ yaa si gbɔkuɛ. 25 Nɔ fɛɛ nɔ nɛ e ma wo lohwe nɛ ɔmɛ eko gbogboe nɔ ɔ, é fɔ e tade ɔmɛ a he; e he be tsɔe kɛ yaa si gbɔkuɛ.

26 “‘Lohwe fɛɛ lohwe nɛ e nane kokloto mi gba se blɔ be kpɛ, nɛ́ e gɔle we nɔ́ nɛ e ye ɔ nɛ e kpale taa ekohu ɔ, e he tsɔ we ha nyɛ. Nɔ fɛɛ nɔ nɛ maa ta a he ɔ, e he be tsɔe. 27 Ngɛ lohwe nane eywiɛɛywiɛtsɛmɛ a kpɛti ɔ, eko fɛɛ eko nɛ e kɛ e dɛ mi nyɛɛɔ ɔ, e he tsɔ we ha nyɛ. Nɔ fɛɛ nɔ nɛ maa ta a gbogboe he ɔ, e he be tsɔe kɛ yaa si gbɔkuɛ. 28 Nɔ fɛɛ nɔ nɛ ma wo eko gbogboe nɔ ɔ, é fɔ e tade ɔmɛ a he. E he be tsɔe kɛ yaa si gbɔkuɛ. A he tsɔ we ha nyɛ.

29 “‘Lohwehi nɛ a nyɛɛɔ kutuu ngɛ zugba a nɔ nɛ a he tsɔ we ha nyɛ ji nɛ ɔmɛ nɛ: kɔkue kpalomɛ, kɔkue, akɔtɔku slɔɔtohi tsuo, 30 tsunyɛ,* ve,* angmlɔ, zia mi akɔtɔku, kɛ akpasi.* 31 Lohwehi nɛ a nyɛɛɔ kutuu nɛ ɔmɛ a he tsɔ we ha nyɛ. Nɔ fɛɛ nɔ nɛ maa ta a gbogboe he ɔ he be tsɔe kɛ yaa si gbɔkuɛ.

32 “‘Nɔ́ fɛɛ nɔ́ nɛ lohwe nɛ ɔmɛ eko gbogboe maa sa he ɔ he be tsɔe, ní hoomi nɔ́ nɛ a kɛ tso pee jio, tade jio, lohwe he womi jio, kpekpe bo jio. Nɔ́ fɛɛ nɔ́ ko nɛ a kɛ hooɔ ní, nɛ́ a gbogboe maa sa he ɔ, á kɛ wo nyu mi. E he be tsɔe kɛ yaa si gbɔkuɛ loko e he ma tsɔ. 33 Ke a gbogboe nɔ zu buɛ mi ɔ, nyɛɛ ywia lɛ. Nɔ́ fɛɛ nɔ́ nɛ ngɛ mi ɔ he be tsɔe. 34 Niye ní fɛɛ niye ní nɛ buɛ nɛ ɔ mi nyu ma pue nɔ ɔ he be tsɔe, nɛ nɔ́ fɛɛ nɔ́ ko nɛ a nuɔ nɛ ngɛ buɛ nɛ ɔ mi ɔ hu he be tsɔe. 35 Nɔ́ fɛɛ nɔ́ ko nɛ a gbogboe maa nɔ nɔ ɔ, nɔ́ ɔ he be tsɔe. Flɔɔnɔɔ jio, la tɛ jio, á ywia lɛ wɔtsɔwɔtsɔ. A he tsɔ we, nɛ a he be tsɔe ha nyɛ. 36 Ke lohwe nɛ ɔmɛ eko gbogboe nɔ nyu hɛngmɛ aloo vu nɛ a toɔ nyu ngɛ mi ɔ mi ɔ, nyu ɔ maa ya nɔ nɛ e he ma tsɔ, se nɔ fɛɛ nɔ nɛ maa ta a gbogboe he ɔ he be tsɔe. 37 Ke a gbogboe nɔ wu nɛ a yaa du nɔ ɔ, e wui he mu. 38 Se ke a kɛ wu nɛ a yaa du wo nyu mi nɛ lohwe nɛ ɔmɛ eko gbogboe ya nɔ nɔ ɔ, wu ɔ he tsɔ we.

39 “‘Jehanɛ ɔ, ke lohwe nɛ a yeɔ ɔ eko gbo ɔ, nɔ fɛɛ nɔ nɛ maa ta e gbogboe ɔ he ɔ he be tsɔe kɛ yaa si gbɔkuɛ. 40 Nɔ fɛɛ nɔ nɛ maa ye lohwe gbogboe ɔ lo ɔ eko ɔ, é fɔ e tade ɔmɛ a he. E he be tsɔe kɛ yaa si gbɔkuɛ. Nɔ fɛɛ nɔ nɛ ma wo lohwe ɔ gbogboe ɔ nɔ ɔ, é fɔ e tade ɔmɛ a he. E he be tsɔe kɛ yaa si gbɔkuɛ. 41 Lohwehi nɛ a he tsɔ we nɛ a nyɛɛɔ kutuu ngɛ zugba a nɔ ɔ, a ji ní hiɔmi níhi. Nyɛ ko ye. 42 Lohwe fɛɛ lohwe nɛ e sãã si, kɛ lohwe fɛɛ lohwe nɛ e kɛ nane eywiɛ nyɛɛɔ, aloo lohwehi nɛ a nyɛɛɔ kutuu ngɛ zugba a nɔ nɛ a ngɛ nane babauu ɔ, nyɛ ko ye, ejakaa a ji ní hiɔmi níhi. 43 Nyɛ ko ha nɛ lohwehi nɛ a nyɛɛɔ kutuu nɛ ɔmɛ eko nɛ wo nyɛ he mu,* nɛ nyɛ ko ha nɛ a ble nyɛ nɛ́ lɔ ɔ nɛ ba wo nyɛ he mu. 44 Ejakaa imi ji Yehowa nyɛ Mawu ɔ nɛ, nyɛɛ tsu nyɛ he nɛ nyɛɛ pee klɔuklɔu, ejakaa i ngɛ klɔuklɔu. Lɔ ɔ he ɔ, nyɛ ko ha nɛ lohwehi nɛ a nyɛɛɔ kutuu ngɛ zugba a nɔ ɔ eko nɛ wo nyɛ he mu.* 45 Ejakaa imi ji Yehowa nɔ nɛ e nyɛɛ nyɛ hɛ mi kɛ je* Egipt zugba a nɔ ɔ nɛ, konɛ ma kɛ tsɔɔ nyɛ kaa Mawu ji mi. Nyɛɛ pee klɔuklɔu ejakaa i ngɛ klɔuklɔu.

46 “‘Mlaa nɛ kɔɔ lohwehi nɛ a teɔ, kɛ lohwehi* nɛ a ngɛ nyu mi, kɛ lohwehi* nɛ a nyɛɛɔ kutuu ngɛ zugba a nɔ ɔ a he ji nɛ ɔ nɛ, 47 bɔ nɛ pee nɛ slɔɔto nɛ hi lohwehi nɛ a he tsɔ we kɛ lohwehi nɛ a he tsɔ a kpɛti, kɛ lohwehi nɛ nyɛ ma nyɛ maa ye kɛ lohwehi nɛ e sɛ nɛ nyɛɛ ye ɔ a kpɛti.’”

12 Yehowa ya nɔ nɛ e de Mose ke: 2 “De Israel bi ɔmɛ ke, ‘Ke yo ko ngɔ hɔ nɛ e fɔ binyumu ɔ, e he be tsɔe ligbi kpaago kaa bɔ nɛ ke e ku nine ɔ, e he tsɔ we ɔ. 3 Ngɛ ligbi kpaanyɔne ɔ nɔ ɔ, á po jokuɛ ɔ.* 4 Akɛnɛ muɔ be ngɛ e he he je ɔ, e maa ya nɔ maa tsu e he ligbi 33. É ko ta nɔ́ ko nɛ ngɛ klɔuklɔu he, nɛ e ko ba he klɔuklɔu ɔ hulɔ kɛ yaa si be nɛ e kɛ maa tsu e he ɔ maa ba nyagbe.

5 “‘Ke e fɔ biyo ɔ, e he be tsɔe ligbi 14 kaa bɔ nɛ ke e ku nine ɔ, e he be tsɔe ɔ. Akɛnɛ muɔ be ngɛ e he he je ɔ, e maa ya nɔ maa tsu e he ligbi 66. 6 Ke ligbi abɔ nɛ e kɛ maa tsu e he ngɛ binyumu aloo biyo nɛ e fɔ ɔ he ɔ ba nyagbe ɔ, é ngɔ agbosu wayoo nɛ e ye jeha kake* nɛ a kɛ maa sã sami afɔle, kɛ beleku lahuɛ bi aloo lahuɛ* nɛ a kɛ maa sã yayami afɔle kɛ ba ha osɔfo ɔ ngɛ kpe he bo tsu ɔ nya. 7 Osɔfo ɔ kɛ maa ba Yehowa hɛ mi, nɛ e kɛ ma ba kpata ha lɛ, nɛ e he ma tsɔ ngɛ muɔ nɛ be ngɛ e he ɔ he je. Mlaa nɛ fɔɔ si ha yo nɛ e fɔ binyumu aloo biyo ji nɛ ɔ nɛ. 8 Se ke e be nyɛe nɛ e maa ngɔ jijɔ kɛ ba a, lɛɛ e ngɔ lahuɛ* enyɔ aloo beleku lahuɛ bimɛ enyɔ kɛ ba. Á ngɔ kake kɛ sã sami afɔle, nɛ a ngɔ kake kɛ sã yayami afɔle. Osɔfo ɔ nɛ e kɛ kpata ha lɛ, kɛkɛ ɔ, e he ma tsɔ.’”

13 Yehowa ya nɔ nɛ e kɛ Mose kɛ Aaron tu munyu nɛ e de mɛ ke: 2 “Ke nɔ́ fu nɔ ko, aloo nɔ́ ko nɛ ngɛ kaa pa nɛ hɛ mi gbli, aloo loholoho ba e he womi nɔ, nɛ́ e ma nyɛ maa pee kpiti* ɔ, á ngɔ lɛ kɛ ba ha osɔfo Aaron aloo e binyumu ɔmɛ nɛ a ji osɔfohi ɔ a kpɛti nɔ kake. 3 Osɔfo ɔ nɛ hyɛ he womi nɔ hiɔ nɛ ngɛ e he womi ɔ nɔ ɔ. Ke bwɔmi nɛ ngɛ he nɛ he womi nɔ hiɔ ɔ ngɛ ɔ pee futaa, nɛ lejɛ ɔ lo ɔ nɔ mi ɔ, lɛɛ kpiti nɛ pue lɛ ɔ nɛ. Osɔfo ɔ nɛ hyɛ he womi nɔ hiɔ ɔ, nɛ́ e ha nɛ a le kaa nɔ ɔ he tsɔ we. 4 Se ke loholoho nɛ́ ngɛ e he womi nɔ ɔ ngɛ futaa, nɛ lejɛ ɔ lo ɔ nɔɛ mi, nɛ lejɛ ɔ bwɔmi ɔ pee we futaa a, lɛɛ osɔfo ɔ nɛ tsi hiɔtsɛ ɔ nya ligbi kpaago. 5 Ngɛ ligbi kpaagone ɔ nɔ ɔ, osɔfo ɔ nɛ hyɛ lɛ. Ke e na kaa he womi nɔ hiɔ ɔ ngɛ he nɛ e ngɛ ɔ nɔuu, nɛ e hɛ́ si ngɛ e he womi ɔ nɔ ɔ, osɔfo ɔ nɛ́ e kpale tsi e nya ligbi kpaago.

6 “Ngɛ ligbi kpaagone ɔ nɔ ɔ, osɔfo ɔ nɛ hyɛ lɛ ekohu. Ke he womi nɔ hiɔ ɔ fani, nɛ e hɛ́ si ngɛ e he womi nɔ ɔ, osɔfo ɔ nɛ ha nɛ á le kaa e he tsɔ; e ji pa nɛ e hɛ mi gbli kɛkɛ. Nyumu ɔ nɛ fɔ e tade ɔmɛ a he nɛ́ e he nɛ tsɔ. 7 Se ke e kɛ e he ya tsɔɔ osɔfo ɔ, nɛ osɔfo ɔ ha nɛ a le kaa e he tsɔ, nɛ lɔ ɔ se ɔ, nɔ́ nɛ ngɛ kaa pa nɛ e hɛ mi gbli ɔ* ha e he womi nɔ ɔ, lɛɛ é ya na osɔfo ɔ ekohu.* 8 Osɔfo ɔ nɛ hyɛ hiɔ ɔ, nɛ ke nɔ́ nɛ ngɛ kaa pa nɛ e hɛ mi gbli ɔ ha e he womi nɔ ɔ, osɔfo ɔ nɛ ha nɛ á le kaa e he tsɔ we. Kpiti ji lɔ ɔ nɛ.

9 “Ke kpiti pue nɔ ko ɔ, á ngɔ lɛ kɛ ba osɔfo ɔ ngɔ, 10 nɛ́ osɔfo ɔ nɛ hyɛ lɛ. Ke nɔ́ nɛ fu nɔ ɔ ngɛ e he womi nɔ ɔ ngɛ futaa, nɛ lɔ ɔ ha nɛ lejɛ ɔ bwɔmi ɔ pee futaa, nɛ nɔfu nɔ́ ɔ pee pa a, 11 lɛɛ kpiti nɛ se kɛɔ lɛ ngɛ e he womi nɔ ɔ nɛ. Osɔfo ɔ nɛ ha nɛ á le kaa e he tsɔ we. Osɔfo ɔ nɛ ko tsi e nya, ejakaa e he tsɔ we. 12 Ke kpiti ɔ pue e he womi nɔ tsuo, nɛ osɔfo ɔ na kaa kpiti ɔ ha e he kɛ je e yi kɛ ba ma si, 13 nɛ osɔfo ɔ hyɛ lɛ nɛ e na kaa kpiti ɔ pue e he womi ɔ nɔ tsuo ɔ, osɔfo ɔ nɛ ha nɛ á le kaa e he tsɔ.* E he womi ɔ nɔ tsuo pee futaa, lɔ ɔ he ɔ, e he tsɔ. 14 Se be fɛɛ be nɛ e he womi nɔ maa pee pa a, e he be tsɔe. 15 Ke osɔfo ɔ na pa a, é ha nɛ á le kaa e he tsɔ we. Pa a he tsɔ we. Kpiti ji lɔ ɔ nɛ. 16 Se ke pa a gbo ɔ, é kpale kɛ ba osɔfo ɔ ngɔ. 17 Osɔfo ɔ nɛ hyɛ lɛ. Ke lejɛ ɔ pee futaa a, osɔfo ɔ nɛ ha nɛ á le kaa nɔ nɛ e nu he womi nɔ hiɔ ɔ he tsɔ. E he tsɔ.

18 “Ke tslɔɔ fu nɔ ko he womi nɔ nɛ e jɔ, 19 se he nɛ tslɔɔ ɔ fu ɔ kpale fu nɛ e pee futaa, aloo lejɛ ɔ pee loholoho tsutsu nɛ́ futaa bɔɔ ngɛ mi ɔ, é ngɔ e he kɛ ya tsɔɔ osɔfo ɔ. 20 Osɔfo ɔ nɛ hyɛ hiɔ ɔ, nɛ ke lejɛ ɔ nɔ lo mi nɛ lɔ ɔ ha nɛ bwɔmi ɔ pee futaa a, osɔfo ɔ nɛ ha nɛ á le kaa e he tsɔ we. Kpiti lɛ e je e he kpo ngɛ tslɔɔ ɔ mi ɔ nɛ. 21 Se ke osɔfo ɔ hyɛ hiɔ ɔ nɛ e na kaa bwɔmi futaa be lejɛ ɔ, nɛ lejɛ ɔ nɔɛ lo mi, nɛ e fani ɔ, lɛɛ osɔfo ɔ nɛ e kpale tsi e nya ligbi kpaago. 22 Ke hiɔ ɔ ha e he womi nɔ ɔ, osɔfo ɔ nɛ ha nɛ á le kaa e he tsɔ we. Kpiti ji lɔ ɔ nɛ. 23 Se ke loholoho ɔ ngɛ he kake nɛ e hɛ́ si ɔ, lɛɛ tslɔɔ ɔ nɛ e wo nyu kɛkɛ, osɔfo ɔ nɛ́ ha nɛ á le kaa e he tsɔ.

24 “Aloo ke la pa doku ngɛ nɔ ko he, nɛ loholoho futaa nɛ tsutsu bɔɔ ngɛ mi aloo loholoho futaa ba he nɛ pa doku ɔ ngɛ ɔ, 25 osɔfo ɔ nɛ hyɛ hiɔ ɔ. Ke bwɔmi nɛ ngɛ loholoho ɔ mi ɔ pee futaa, nɛ lejɛ ɔ nɔ lo mi ɔ, lɛɛ kpiti nɛ e je e he kpo ngɛ pa doku ɔ mi ɔ nɛ. Osɔfo ɔ nɛ ha nɛ á le kaa e he tsɔ we. Kpiti nɛ pue lɛ ɔ nɛ. 26 Se ke osɔfo ɔ hyɛ hiɔ ɔ nɛ e na kaa bwɔmi futaa be loholoho ɔ mi, nɛ lejɛ ɔ nɔɛ lo mi, nɛ hiɔ ɔ fani ɔ, lɛɛ osɔfo ɔ nɛ tsi e nya ligbi kpaago. 27 Ngɛ ligbi kpaagone ɔ nɔ ɔ, osɔfo ɔ nɛ hyɛ lɛ, nɛ ke hiɔ ɔ ha si ngɛ e he womi nɔ ɔ, osɔfo ɔ nɛ ha nɛ á le kaa e he tsɔ we. Kpiti nɛ pue lɛ ɔ nɛ. 28 Se ke loholoho ɔ ngɛ he kake, nɛ e hɛ́ si ngɛ e he womi nɔ, se mohu e fani ɔ, lɛɛ e ji pa doku nɛ e fu kɛkɛ. Osɔfo ɔ nɛ ha nɛ á le kaa e he tsɔ, ejakaa e ji pa doku nɛ e wo nyu kɛkɛ.

29 “Ke nɔ́ ko pue nyumu ko aloo yo ko yi mi aloo e kpɛni he ɔ, 30 osɔfo ɔ nɛ́ hyɛ he womi nɔ hiɔ ɔ. Ke lejɛ ɔ nɔ lo mi, nɛ lejɛ ɔ bwɔmi ɔ hɛɛ kungwɔ zɔ su, nɛ bwɔmi ɔ ngɛ dleledlele ɔ, osɔfo ɔ nɛ ha nɛ á le kaa jamɛatsɛ ɔ he tsɔ we; he womi nɔ hiɔ nɛ peeɔ yi sisi aloo kpɛni bwɔmi ji lɔ ɔ nɛ. Kpiti nɛ pue ɔ yi loo kpɛni ji lɔ ɔ nɛ. 31 Se ke osɔfo ɔ na kaa he nɛ nɔ́ ɔ pue ɔ nɔɛ lo mi, nɛ bwɔmi yumu hu be lejɛ ɔ, osɔfo ɔ nɛ tsi hiɔtsɛ ɔ nya ligbi kpaago. 32 Ngɛ ligbi kpaagone ɔ nɔ ɔ, osɔfo ɔ nɛ hyɛ he womi nɔ hiɔ ɔ. Ke he womi nɔ hiɔ ɔ hɛ́ si, nɛ bwɔmi nɛ hɛɛ kungwɔ zɔ su be lejɛ ɔ, nɛ lejɛ ɔ hu nɔɛ lo mi ɔ, 33 nɔ nɛ nɔ́ ɔ pue e he ɔ nɛ e ha nɛ a sɛ e yi ɔ aloo e kpɛni ɔ ha lɛ, se a ko sɛ he nɛ nɔ́ ɔ pue ɔ. Jehanɛ ɔ, osɔfo ɔ nɛ tsi hiɔtsɛ ɔ nya ligbi kpaago.

34 “Ngɛ ligbi kpaagone ɔ nɔ ɔ, osɔfo ɔ nɛ hyɛ he nɛ nɔ́ ɔ pue ɔ ekohu. Ke he womi nɔ hiɔ nɛ peeɔ yi sisi kɛ kpɛni bwɔmi ɔ hɛ́ si ngɛ e he womi nɔ, nɛ lejɛ ɔ hu nɔɛ lo mi ɔ, osɔfo ɔ nɛ ha nɛ á le kaa e he tsɔ, nɛ́ e fɔ e tade ɔmɛ a he nɛ́ e he nɛ tsɔ. 35 Se ke a tsu e he, nɛ lɔ ɔ se ɔ, he womi nɔ hiɔ ɔ ha si ngɛ e he womi nɔ ɔ, 36 osɔfo ɔ nɛ hyɛ lɛ ekohu, nɛ ke he womi nɔ hiɔ ɔ ha si ngɛ e he womi nɔ ɔ, e he pa hia we kaa osɔfo ɔ nɛ hyɛ kaa bwɔmi nɛ hɛɛ kungwɔ zɔ su ngɛ lejɛ ɔ; jamɛatsɛ ɔ he tsɔ we. 37 Se ke e hyɛ lɛ nɛ e na kaa he womi nɔ hiɔ ɔ hɛ́ si, nɛ bwɔmi yumu puɛ ngɛ lejɛ ɔ, lɔ ɔ tsɔɔ kaa he womi nɔ hiɔ ɔ jɔ. E he tsɔ. Osɔfo ɔ nɛ ha nɛ á le kaa e he tsɔ.

38 “Ke loholoho pue nyumu ko loo yo ko he womi nɔ nɛ loholoho ɔ ngɛ futaa a, 39 osɔfo ɔ nɛ hyɛ hiɔ ɔ. Ke loholoho nɛ pue e he womi nɔ ɔ ngɛ futaa a, lɛɛ e ji ngmo kɛkɛ nɛ pue e he womi nɔ. Jamɛatsɛ ɔ he tsɔ.

40 “Ke bwɔmi ta nyumu ko yi mi, nɛ e yi mi kpa a, e he tsɔ. 41 Ke bwɔmi ɔ ta e hɛ nya, nɛ lejɛ ɔ kpa a, e he tsɔ. 42 Se ke pa nɛ e tsuɔ nɛ futaa bɔɔ ngɛ mi pee e yi mi he nɛ kpa a aloo e hɛ nya a, lɛɛ kpiti nɛ e je e he kpo ngɛ e yi mi aloo e hɛ nya a nɛ. 43 Osɔfo ɔ nɛ hyɛ lɛ. Ke e na kaa nɔfu nɔ́ nɛ ngɛ e yi mi he nɛ he womi nɔ hiɔ ɔ ngɛ ɔ tsuɔ nɛ futaa bɔɔ ngɛ mi, aloo nɔfu nɔ́ nɛ ngɛ e hɛ nya he nɛ kpa a tsuɔ nɛ futaa bɔɔ ngɛ mi, nɛ e ngɛ kaa kpiti ngɛ e he womi nɔ ɔ, 44 lɛɛ kpititsɛ ji lɛ. E he tsɔ we, nɛ hiɔ ɔ nɛ ngɛ e yi mi ɔ he je ɔ, osɔfo ɔ nɛ ha nɛ á le kaa e he tsɔ we. 45 Nɔ nɛ kpiti ngɛ e he ɔ, e wo tade gbagbɛ, e ngmɛɛ e yi bwɔmi he kɛ pue e nɔ. É ngɔ nɔ́ kɛ ha e nya nɔ bwɔmi nɔ, nɛ́ e hi dee kɛ ngmlaa ke, ‘Ye he tsɔ we, ye he tsɔ we!’ 46 Be abɔ nɛ hiɔ ɔ ngɛ e he ɔ, e he tsɔ we. Akɛnɛ e he tsɔ we he je ɔ, é tsɔ e he banee. É hi sito he ɔ se.

47 “Ke kpiti sɛ tade ko mi ɔ, tade nɛ a kɛ lohwe he bwɔmi lɛ pee jio, tade nɛ a kɛ klala lɛ pee jio, 48 kpa nɛ a kɛ lo klala a mi jio, lohwe he bwɔmi kpa nɛ a kɛ lo tade ɔ mi jio, loo nɔ́ saisaa nɛ a kɛ lohwe he womi pee mi jio, 49 ke hiɔ ɔ ha nɛ nɔ́ ko nɛ hɛɛ kungwɔ zɔ su nɛ ba mumu su bɔɔ ngɛ mi, loo nɔ́ ko nɛ tsuɔ sɛ bo ɔ, loo lohwe he womi ɔ, kpa nɛ a kɛ lo tade ɔ, loo nɔ́ saisaa ko nɛ a kɛ lohwe he womi pee mi ɔ, lɛɛ kpiti lɛ e sɛ ní nɛ ɔmɛ a mi ɔ nɛ. Á kɛ ya tsɔɔ osɔfo ɔ. 50 Osɔfo ɔ nɛ hyɛ hiɔ ɔ, nɛ e tsi níhi nɛ hiɔ ɔ sɛ a mi ɔ a nya ligbi kpaago. 51 Ke e hyɛ hiɔ ɔ ngɛ ligbi kpaagone ɔ nɔ nɛ e na kaa e ha si ngɛ tade ɔ, aloo kpa nɛ a kɛ lo tade ɔ mi, aloo lohwe he womi ɔ mi ɔ, (ngɛ nɔ́ fɛɛ nɔ́ nɛ a kɛ lohwe he womi ɔ peeɔ ɔ tsuo se ɔ), kpiti nɛ́ sãã nɔ ji lɔ ɔ nɛ, nɔ́ ɔ he tsɔ we. 52 É sã tade ɔ aloo lohwe he bwɔmi kpa nɛ a kɛ lo tade ɔ, loo kpa nɛ a kɛ lo klala a, aloo nɔ́ saisaa nɛ a kɛ lohwe he womi pee nɛ hiɔ ɔ sɛ mi ɔ, ejakaa kpiti nɛ sãã nɔ ji lɔ ɔ nɛ. Á sã nɔ́ ɔ ngɛ la mi.

53 “Se ke osɔfo ɔ hyɛ nɛ hiɔ ɔ hɛ́ si ngɛ tade ɔ, aloo kpa nɛ a kɛ lo tade ɔ, aloo nɔ́ saisaa ko nɛ a kɛ lohwe he womi pee ɔ mi ɔ, 54 lɛɛ osɔfo ɔ nɛ fã nɛ a fɔ nɔ́ nɛ hiɔ ɔ sɛ mi ɔ he, nɛ́ e kpale tsi nɔ́ ɔ nya ligbi kpaago. 55 Ke a fɔ nɔ́ nɛ hiɔ ɔ sɛ mi ɔ he saminya ta a, osɔfo ɔ nɛ hyɛ nɔ́ ɔ. Ke e ngɛ kaa bɔ nɛ e ngɛ ɔ nɔuu, nɛ hiɔ ɔ hɛ́ si po ɔ, nɔ́ ɔ he tsɔ we. Nyɛɛ sã nɔ́ ɔ ngɛ la mi, ejakaa hiɔ ɔ ye nɔ́ ɔ mi blɔ aloo e kpo nɔ blɔ.

56 “Se ke a fɔ he saminya nɛ osɔfo ɔ hyɛ nɛ e na kaa nɔ́ nɛ sɛ mi ɔ ngɛ laae ɔ, lɛɛ e hía lejɛ ɔ kɛ je tade ɔ, loo lohwe he womi ɔ, loo kpa nɛ a kɛ lo tade ɔ mi. 57 Se ke a na kaa nɔ́ ɔ je kpo ngɛ tade ɔ mi ngɛ he kpa, aloo ngɛ kpa nɛ a kɛ lo tade ɔ mi, aloo e je kpo ngɛ nɔ́ saisaa ko nɛ a kɛ lohwe he womi pee ɔ mi ɔ, lɛɛ e ngɛ si hae ji lɔ ɔ nɛ. Á sã nɔ́ saisaa ko nɛ hiɔ ɔ sɛ mi ɔ ngɛ la mi. 58 Se ke a fɔ he, nɛ nɔ́ nɛ sɛ tade ɔ, loo kpa nɛ a kɛ lo tade ɔ, aloo nɔ́ saisaa ko nɛ a kɛ lohwe he womi pee ɔ mi ɔ je kulaa a, lɛɛ á fɔ he si enyɔne, nɛ e he ma tsɔ.

59 “Kpiti he mlaa nɛ fɔɔ si nɛ a maa da nɔ kɛ tsɔɔ kaa tade nɛ a kɛ lohwe he bwɔmi lo, aloo klala, aloo kpa nɛ a kɛ lo tade, aloo nɔ́ saisaa ko nɛ a kɛ lohwe he womi pee ɔ he tsɔ loo e he tsɔ we ji nɛ ɔ nɛ.”

14 Yehowa ya nɔ nɛ e kɛ Mose tu munyu nɛ e de lɛ ke: 2 “Ke a kɛ kpititsɛ ko maa ba osɔfo ɔ ngɔ ɔ, mlaa nɛ́ osɔfo ɔ kɛ ma tsu ní ngɛ ligbi nɛ a maa tsɔɔ kaa e he tsɔ ɔ nɔ ji nɛ ɔ nɛ. 3 Osɔfo ɔ nɛ ya sito he ɔ se nɛ e ya hyɛ lɛ. Ke kpititsɛ ɔ kpiti ɔ jɔ ɔ, 4 osɔfo ɔ nɛ fã lɛ nɛ e ngɔ lohwe pɛlitsɛmɛ hɛ ngmengmlee enyɔ nɛ a he tsɔ, kɛ seda tso, kɛ bo tsutsu, kɛ hisopo kɛ ba nɛ́ a kɛ tsu e he ha lɛ. 5 Osɔfo ɔ nɛ fã nɛ a gbe lohwe pɛlitsɛ ɔ kake ngɛ zu buɛ nɛ pa mi nyu ngɛ mi ɔ nya. 6 Se é ngɔ lohwe pɛlitsɛ hɛngmengmletsɛ ɔ, kɛ seda tso ɔ, kɛ bo tsutsu ɔ, kɛ hisopo ɔ, nɛ́ e ngɔ mɛ tsuo kɛ wo pa mi nyu nɛ a gbe lohwe pɛlitsɛ ɔ ngɛ nɔ ɔ mi. 7 Jehanɛ ɔ, é fĩa nyu ɔ kɛ pue nɔ nɛ ngɛ e he tsue ngɛ kpiti ɔ he ɔ nɔ si kpaago nɛ́ e ha nɛ a le kaa e he tsɔ, nɛ́ e ngmɛɛ lohwe pɛlitsɛ hɛngmengmletsɛ ɔ he nɛ e te kɛ ho nga mi ya.

8 “Nɔ nɛ ngɛ e he tsue ɔ nɛ e fɔ e tade ɔmɛ a he, nɛ́ e sɛ e he bwɔmi tsuo nɛ e ngɔ nyu kɛ du e he, kɛkɛ ɔ, e he ma tsɔ. Lɔ ɔ se ɔ, e ma nyɛ maa ba sito he ɔ, se e hi e bo tsu ɔ se ligbi kpaago. 9 Ngɛ ligbi kpaagone ɔ nɔ ɔ, é sɛ e yi bwɔmi, kɛ e kpɛni, kɛ e hɛngmɛ se bwɔmi tsuo. Ke e sɛ e he bwɔmi ɔ tsuo ta a, é fɔ e tade ɔmɛ a he, nɛ́ e ngɔ nyu kɛ du e he, kɛkɛ ɔ, e he ma tsɔ.

10 “Ngɛ ligbi kpaanyɔne ɔ nɔ ɔ, é ngɔ agbosu wayoo enyɔ nɛ kpa ko be a he, kɛ jijɔ yo wayoo nɛ kpa ko be e he nɛ e ye jeha kake, kɛ mamu bukɔbukɔ nɛ a kɛ nu futu mi lita ekpa kɛ fa* kɛ ba kaa ngma* afɔle, nɛ́ e ngɔ nu lita mi dlami etɛ mi kake* kɛ piɛɛ he. 11 Osɔfo ɔ nɛ e ha nɛ a le kaa nɔ ɔ he tsɔ ɔ nɛ́ e ngɔ nɔ nɛ ngɛ e he tsue ɔ kɛ níhi nɛ a kɛ maa sã afɔle ɔ kɛ ba Yehowa hɛ mi ngɛ kpe he bo tsu ɔ nya. 12 Osɔfo ɔ nɛ ngɔ agbosu wayoo enyɔ ɔmɛ a kpɛti kake kɛ nu lita mi dlami etɛ mi kake ɔ, nɛ́ e kɛ sã fɔ yemi afɔle, nɛ́ e fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi. 13 Jehanɛ ɔ, é gbe agbosu wayoo ɔ ngɛ he nɛ a pɔɔ lohwe nɛ a kɛ sãã yayami afɔle kɛ sami afɔle ɔ gbemi ngɛ ɔ, ngɛ he ko nɛ ngɛ klɔuklɔu, ejakaa fɔ yemi afɔle ɔ peeɔ osɔfo ɔ nɔ́, kaa bɔ nɛ yayami afɔle ɔ hu ji e nɔ́ ɔ. E ji nɔ́ ko nɛ ngɛ klɔuklɔu pe kulaa.

14 “Jehanɛ ɔ, osɔfo ɔ nɛ ngɔ lohwe nɛ a kɛ sã fɔ yemi afɔle ɔ muɔ ɔ eko kɛ kpa nɔ nɛ ngɛ e he tsue ɔ hiɔ nɔ tue ɔ nya, nɛ e ngɔ eko kɛ kpa e hiɔ nine nguɛ gɔleku ɔ he, nɛ́ e ngɔ eko kɛ kpa e hiɔ nane nguɛ gɔleku ɔ hu he. 15 Osɔfo ɔ nɛ ngɔ nu lita mi dlami etɛ mi kake ɔ nɛ e plɛ eko kɛ wo lɛ nitsɛ e muɔ dɛ kɔkɔ mi. 16 Jehanɛ ɔ, osɔfo ɔ nɛ ngɔ e hiɔ nine nguɛ kɛ sɔ nu nɛ ngɛ e muɔ dɛ kɔkɔ mi ɔ mi, nɛ́ e fĩa nu ɔ si kpaago ngɛ Yehowa hɛ mi. 17 Lɔ ɔ se ɔ, osɔfo ɔ nɛ ngɔ nu nɛ piɛ ngɛ e dɛ kɔkɔ mi ɔ eko kɛ kpa nɔ nɛ ngɛ e he tsue ɔ hiɔ nɔ tue ɔ nya, nɛ e ngɔ eko kɛ kpa e hiɔ nine nguɛ gɔleku ɔ he, nɛ e ngɔ eko kɛ kpa e hiɔ nane nguɛ gɔleku ɔ hu he ngɛ hehi nɛ e kɛ fɔ yemi afɔle ɔ muɔ ɔ kpa a nɔuu. 18 Osɔfo ɔ nɛ ngɔ nu nɛ piɛ ngɛ e dɛ kɔkɔ mi ɔ kɛ pue nɔ nɛ ngɛ e he tsue ɔ yi mi, nɛ́ osɔfo ɔ nɛ kpata ha lɛ ngɛ Yehowa hɛ mi.

19 “Osɔfo ɔ nɛ sã yayami afɔle ɔ nɛ́ e kɛ kpata ha nɔ nɛ ngɛ e he tsue ɔ, nɛ lɔ ɔ se ɔ, é gbe lohwe nɛ a kɛ maa sã sami afɔle ɔ. 20 Osɔfo ɔ nɛ sã sami afɔle ɔ kɛ ngma afɔle ɔ ngɛ afɔle sami la tɛ ɔ nɔ nɛ́ e kɛ kpata ha lɛ, kɛkɛ ɔ, e he ma tsɔ.

21 “Se ke ohiatsɛ ji lɛ nɛ e be nɔ́ ko tsɔ ɔ, lɛɛ é ngɔ agbosu wayoo kake kɛ ba kaa fɔ yemi afɔle nɛ́ a fɔ̃ kɛ ya kɛ ba, nɛ a kɛ kpata ha lɛ. É ngɔ mamu bukɔbukɔ lita enyɔ* nɛ a kɛ nu lita mi dlami etɛ mi kake futu mi, 22 kɛ lahuɛ* enyɔ aloo beleku lahuɛ bimɛ enyɔ kɛ ba. E ngɔ nɔ́ nɛ e ma nyɛ ma ha kɛ ba. A kɛ kake maa sã yayami afɔle, nɛ a kɛ kake ɔ hu maa sã sami afɔle. 23 Ngɛ ligbi kpaanyɔne ɔ nɔ ɔ, é ngɔ ní ɔmɛ kɛ ba ha osɔfo ɔ ngɛ kpe he bo tsu ɔ nya ngɛ Yehowa hɛ mi konɛ osɔfo ɔ nɛ ngɔ kɛ tsu e he ha lɛ.

24 “Osɔfo ɔ nɛ ngɔ agbosu wayoo nɛ a kɛ maa sã fɔ yemi afɔle ɔ kɛ nu lita mi dlami etɛ mi kake ɔ, nɛ́ e fɔ̃ kɛ ya kɛ ba kaa fɔ̃mi afɔle ngɛ Yehowa hɛ mi. 25 Jehanɛ ɔ, osɔfo ɔ nɛ e gbe agbosu wayoo nɛ a kɛ maa sã fɔ yemi afɔle ɔ, nɛ́ e ngɔ e muɔ ɔ eko kɛ kpa nɔ nɛ ngɛ e he tsue ɔ hiɔ nɔ tue ɔ nya, nɛ́ e ngɔ eko kɛ kpa e hiɔ nine nguɛ gɔleku ɔ he, nɛ́ e ngɔ eko kɛ kpa e hiɔ nane nguɛ gɔleku ɔ hu he. 26 Osɔfo ɔ nɛ e ngmɛ nu ɔ eko kɛ wo lɛ nitsɛ e muɔ dɛ kɔkɔ mi. 27 Lɔ ɔ se ɔ, e ngɔ e hiɔ nine nguɛ kɛ sɔ nu nɛ ngɛ e muɔ dɛ kɔkɔ mi ɔ mi, nɛ́ e fĩa si kpaago ngɛ Yehowa hɛ mi. 28 Osɔfo ɔ nɛ e ngɔ nu nɛ ngɛ e dɛ mi ɔ eko kɛ kpa nɔ nɛ ngɛ e he tsue ɔ hiɔ nɔ tue ɔ nya, nɛ́ e ngɔ eko kɛ kpa e hiɔ nine nguɛ gɔleku ɔ he, nɛ́ e ngɔ eko kɛ kpa e hiɔ nane nguɛ gɔleku ɔ hu he ngɛ hehi nɛ e kɛ fɔ yemi afɔle ɔ muɔ ɔ kpa a nɔuu. 29 Lɔ ɔ se ɔ, osɔfo ɔ nɛ e ngɔ nu nɛ piɛ ngɛ e dɛ mi ɔ kɛ pue nɔ nɛ ngɛ e he tsue ɔ yi mi, nɛ́ e kɛ kpata ha lɛ ngɛ Yehowa hɛ mi.

30 “É ngɔ lahuɛ* ɔ kake aloo beleku lahuɛ bi kake kɛ ba. É ngɔ nɔ́ nɛ e ma nyɛ ma ha kɛ ba. 31 É ngɔ nɔ́ nɛ e nine maa su nɔ kɛ ba. Á ngɔ kake kɛ sã yayami afɔle nɛ a ngɔ kake ɔ nɛ maa piɛ ɔ kɛ sã sami afɔle kɛ piɛɛ ngma afɔle ɔ he. Osɔfo ɔ nɛ́ kɛ kpata ha nɔ nɛ ngɛ e he tsue ɔ ngɛ Yehowa hɛ mi.

32 “Mlaa nɛ fɔɔ si ha nɔ nɛ kpiti pue lɛ se nɔ́ ko be e dɛ tsɔ nɛ e kɛ maa tsu e he ji nɛ ɔ nɛ.”

33 Kɛkɛ nɛ Yehowa de Mose kɛ Aaron ke: 34 “Ke nyɛ ya su Kanaan zugba nɛ i kɛ ngɛ nyɛ hae kaa nyɛ weto ní ɔ nɔ, nɛ i ngmɛ blɔ nɛ kpiti pue we ko he ngɛ nyɛ zugba a nɔ ɔ, 35 wetsɛ ɔ nɛ ba de osɔfo ɔ ke, ‘Nɔ́ ko fu ja ngɛ ye we ɔ he kaa hiɔ yaya.’ 36 Osɔfo ɔ nɛ e fã nɛ a je níhi nɛ a ngɛ we ɔ mi ɔ kpo loko e ba hyɛ nɔ́ ɔ, ke pi jã a, e ma de ke níhi nɛ a ngɛ we ɔ mi ɔ tsuo he tsɔ we. Lɔ ɔ se ɔ, osɔfo ɔ nɛ ba we ɔ mi nɛ e ba hyɛ we ɔ. 37 É hyɛ nɔ́ nɛ fu ja a, nɛ ke we ɔ gbogbo ɔmɛ a he pee kaa kungwɔ zɔ su nɛ́ ba mumu su bɔɔ ngɛ mi, aloo a pee tsutsu nɛ lejɛ ɔ nɔ mi ɔ, 38 osɔfo ɔ nɛ je kpo ngɛ we ɔ mi kɛ ya we ɔ agbo ɔ nya nɛ e nga we ɔ nya ligbi kpaago.

39 “Ligbi kpaagone ɔ nɔ ɔ, osɔfo ɔ nɛ kpale nɛ e ya hyɛ we ɔ. Ke nɔ́ nɛ fu ja a ha si ngɛ gbogbo ɔmɛ a he ɔ, 40 osɔfo ɔ nɛ fã nɛ a kpɔ tɛhi nɛ́ nɔ́ ɔ fu ja ngɛ a he ɔ, nɛ́ a ya sake ngɔ pue ma a se he ko nɛ he tsɔ we. 41 Osɔfo ɔ nɛ ha nɛ a ngmla gbogbo ɔmɛ a he saminya, nɛ́ a ngɔ zu ɔ kɛ ya pue ma a se ngɛ he ko nɛ he tsɔ we. 42 Lɔ ɔ se ɔ, á ngɔ tɛ kpahi kɛ wo he nɛ a je tɛ ɔmɛ ngɛ ɔ, nɛ́ e ha nɛ a ngɔ zu kpa kɛ sá we ɔ he.

43 Ke a je tɛ ɔmɛ ngɛ gbogbo ɔmɛ a mi, nɛ a ngmla zu nɛ a kɛ sá gbogbo ɔmɛ a he, nɛ a kpale sá we ɔ he, se kɛ̃ ɔ, nɔ́ nɛ fu ja a kpale ba ekohu ɔ, 44 lɛɛ osɔfo ɔ nɛ e ya we ɔ mi nɛ e ya hyɛ. Ke nɔ́ nɛ fu ja a ha si ngɛ we ɔ mi ɔ, lɛɛ kpiti nɛ sãã nɔ nɛ sɛ we ɔ mi ɔ nɛ. We ɔ he tsɔ we. 45 É ha nɛ a hule we ɔ kɛ pue si, nɛ á muɔɔ tɛ ɔmɛ, tso ɔmɛ kɛ zu nɛ a kɛ sá we ɔ he ɔ tsuo, nɛ́ a kɛ ho ma a se ya nɛ a kɛ ya pue he ko nɛ he tsɔ we. 46 Nɔ fɛɛ nɔ nɛ e maa sɛ we ɔ mi be mi nɛ a nga we ɔ nya a, e he be tsɔe kɛ yaa si gbɔkuɛ. 47 Nɔ fɛɛ nɔ nɛ e maa hwɔ we ɔ mi ɔ, é fɔ e tade ɔmɛ a he, nɛ nɔ fɛɛ nɔ nɛ e maa ye ní ngɛ we ɔ mi ɔ, é fɔ e tade ɔmɛ a he.

48 “Se ke a sá we ɔ he ekohu nɛ lɔ ɔ se ɔ, osɔfo ɔ ba nɛ e ba na kaa nɔ́ nɛ fu ja a kpale we kɛ bɛ ɔ, osɔfo ɔ nɛ e ha nɛ a le kaa we ɔ he tsɔ, ejakaa nɔ́ nɛ fu ja a je. 49 É ngɔ lohwe pɛlitsɛmɛ enyɔ, seda tso, bo tsutsu, kɛ hisopo kɛ tsu we ɔ he akɛnɛ we ɔ he tsɔ we ɔ he je.* 50 Osɔfo ɔ nɛ gbe lohwe pɛlitsɛ ɔ kake ngɛ zu buɛ nɛ pa mi nyu ngɛ mi ɔ nya. 51 Lɔ ɔ se ɔ, é ngɔ seda tso ɔ, kɛ hisopo ɔ, kɛ bo tsutsu ɔ, kɛ lohwe pɛlitsɛ hɛngmengmletsɛ ɔ tsuo kɛ sɔ lohwe pɛlitsɛ nɛ a gbe ngɛ pa mi nyu ɔ nɔ ɔ muɔ ɔ mi, nɛ́ e kɛ fĩa we ɔ he si kpaago. 52 É ngɔ lohwe pɛlitsɛ ɔ muɔ ɔ, pa mi nyu ɔ, lohwe pɛlitsɛ hɛngmengmletsɛ ɔ, seda tso ɔ, hisopo ɔ, kɛ bo tsutsu ɔ kɛ tsu we ɔ he akɛnɛ we ɔ he tsɔ we ɔ he je.* 53 Jehanɛ ɔ, e ngɔ lohwe pɛlitsɛ hɛngmengmletsɛ ɔ kɛ ya ma a se nɛ e ya ngmɛɛ e he nɛ e sɛ nga, nɛ́ e kɛ kpata ha we ɔ nɛ we ɔ he nɛ tsɔ.

54 “Mlaa nɛ ɔ fɔɔ si ha he womi nɔ hiɔhi tsuo, yi sisi hiɔ aloo kpɛni bwɔmi hiɔ, 55 kpiti nɛ pue ɔ tade loo we he, 56 kɛ nɔfu nɔ́, kɛ nɔ́ ko nɛ ngɛ kaa pa nɛ e hɛ mi gbli, kɛ loholoho ji nɛ ɔ nɛ, 57 bɔ nɛ pee nɛ a le ke ji nɔ́ ko he tsɔ we aloo e he tsɔ. Kpiti he mlaa ji nɛ ɔ nɛ.”

15 Yehowa ya nɔ nɛ e kɛ Mose kɛ Aaron tu munyu nɛ e de mɛ ke: 2 “Nyɛɛ kɛ Israel bi ɔmɛ nɛ tu munyu nɛ nyɛ de mɛ ke, ‘Ke hiɔ ha nɛ nyu ngɛ bee ngɛ nyumu ko nyumu tso* mi ɔ, nyu nɛ ngɛ bee ngɛ e he ɔ ha e he tsɔ we. 3 E he tsɔ we ngɛ nyu nɛ ngɛ bee ngɛ e he ɔ he je. Nyu ɔ ya nɔ nɛ e be ngɛ e he jio, e ha e nyumu tso mi tsi jio, loloolo ɔ, e he tsɔ we.

4 “‘Sa fɛɛ sa nɛ nɔ nɛ nyu ɔ ngɛ bee ngɛ e he ɔ maa hwɔ nɔ ɔ he be tsɔe, nɛ nɔ́ fɛɛ nɔ́ nɛ e maa hi nɔ ɔ hu he be tsɔe. 5 Ke nɔ ko ta e sa a he ɔ, e fɔ e tade ɔmɛ a he, nɛ́ e ngɔ nyu kɛ du e he. E he be tsɔe kɛ yaa si gbɔkuɛ. 6 Nɔ fɛɛ nɔ nɛ e maa hi nɔ́ ko nɛ nɔ nɛ nyu ngɛ bee ngɛ e he ɔ hi nɔ ɔ nɔ ɔ, e fɔ e tade ɔmɛ a he, nɛ́ e ngɔ nyu kɛ du e he. E he be tsɔe kɛ yaa si gbɔkuɛ. 7 Nɔ fɛɛ nɔ nɛ maa ta nyumu ko nɛ hiɔ ha nɛ nyu ngɛ bee ngɛ e he ɔ he ɔ, e fɔ e tade ɔmɛ a he, nɛ e ngɔ nyu kɛ du e he. E he be tsɔe kɛ yaa si gbɔkuɛ. 8 Ke nɔ nɛ hiɔ ha nɛ nyu ngɛ bee ngɛ e he ɔ la lada pue nɔ ko nɛ e he tsɔ nɔ ɔ, jamɛ a nɔ ɔ nɛ e fɔ e tade ɔmɛ a he, nɛ e ngɔ nyu kɛ du e he. E he be tsɔe kɛ yaa si gbɔkuɛ. 9 Lohwe nɔ himi sɛ̃ fɛɛ lohwe nɔ himi sɛ̃ nɛ nɔ nɛ hiɔ ha nɛ nyu ɔ ngɛ bee ngɛ e he ɔ maa hi nɔ ɔ he be tsɔe. 10 Nɔ fɛɛ nɔ nɛ maa ta nɔ́ ko nɛ nɔ nɛ nyu ngɛ bee ngɛ e he ɔ hi nɔ ɔ he ɔ he be tsɔe kɛ yaa si gbɔkuɛ, nɛ nɔ fɛɛ nɔ nɛ ma wo jamɛ a ní ɔmɛ a nɔ ɔ, é fɔ e tade ɔmɛ a he, nɛ́ e ngɔ nyu kɛ du e he. E he be tsɔe kɛ yaa si gbɔkuɛ. 11 Ke nɔ nɛ nyu ngɛ bee ngɛ e he ɔ ngɔɛ nyu kɛ fɔ we e dɛ nɛ e ta nɔ ko he ɔ, jamɛ a nɔ ɔ nɛ e fɔ e tade ɔmɛ a he, nɛ e ngɔ nyu kɛ du e he. E he be tsɔe kɛ yaa si gbɔkuɛ. 12 Ke nɔ nɛ nyu ngɛ bee ngɛ e he ɔ ta zu buɛ ko he ɔ, a ywia lɛ, nɛ ke e ta nɔ́ fɛɛ nɔ́ ko nɛ a kɛ tso pee he ɔ, a ngɔ nyu kɛ fɔ he.

13 “‘Ke nyu nɛ ngɛ bee ngɛ nɔ ɔ he ɔ kpa bemi nɛ e he tsɔ ɔ, e mlɛ* ligbi kpaago loko e tsu e he, nɛ́ e fɔ e tade ɔmɛ a he, nɛ e ngɔ pa mi nyu kɛ du e he, nɛ e he ma tsɔ. 14 Ligbi kpaanyɔne ɔ nɔ ɔ, é ngɔ lahuɛ* enyɔ aloo beleku lahuɛ bimɛ enyɔ kɛ ba Yehowa hɛ mi ngɛ kpe he bo tsu ɔ nya nɛ e kɛ ba ha osɔfo ɔ. 15 Osɔfo ɔ nɛ e ngɔ lohwe ɔmɛ kɛ sã afɔle. É ngɔ kake kɛ sã yayami afɔle, nɛ e ngɔ kake ɔ nɛ piɛ ɔ kɛ sã sami afɔle, nɛ́ e kɛ kpata ha lɛ ngɛ Yehowa hɛ mi ngɛ nyu nɛ be ngɛ e he ɔ he je.

16 “‘Jehanɛ ɔ, ke nyumu ko he nyu be ngɛ e he ɔ, e ngɔ nyu kɛ du e he tsuo. E he be tsɔe kɛ yaa si gbɔkuɛ. 17 Tade fɛɛ tade kɛ lohwe he womi fɛɛ lohwe he womi nɛ nyumu ɔ he nyu ɔ maa sɛ mi ɔ, é fɔ he. Nɔ́ ɔ he be tsɔe kɛ yaa si gbɔkuɛ.

18 “‘Ke nyumu kɛ yo ná bɔmi nɛ nyumu ɔ he nyu be ɔ, a ngɔ nyu kɛ du a he. A he be tsɔe kɛ yaa si gbɔkuɛ.

19 “‘Ke muɔ be ngɛ yo ko he ɔ, e he be tsɔe ligbi kpaago akɛnɛ e ku nine ɔ he je. Nɔ fɛɛ nɔ nɛ e maa ta e he ɔ he be tsɔe kɛ yaa si gbɔkuɛ. 20 Nɔ́ fɛɛ nɔ́ nɛ e maa hwɔ nɔ be mi nɛ e ku nine ɔ he be tsɔe, nɛ nɔ́ fɛɛ nɔ́ nɛ e maa hi nɔ ɔ hu he be tsɔe. 21 Nɔ fɛɛ nɔ nɛ maa ta e sa he ɔ, é fɔ e tade ɔmɛ a he nɛ́ e ngɔ nyu kɛ du e he. E he be tsɔe kɛ yaa si gbɔkuɛ. 22 Nɔ fɛɛ nɔ nɛ e maa ta nɔ́ saisaa ko nɛ e hi nɔ ɔ he ɔ, é fɔ e tade ɔmɛ a he, nɛ e ngɔ nyu kɛ du e he. E he be tsɔe kɛ yaa si gbɔkuɛ. 23 Ke e hi sa aloo nɔ́ kpa ko nɔ ɔ, nɔ fɛɛ nɔ nɛ e maa ta jamɛ a nɔ́ ɔ he ɔ he be tsɔe kɛ yaa si gbɔkuɛ. 24 Ke nyumu ko kɛ lɛ ná bɔmi nɛ yo ɔ nine kumi muɔ ɔ sɛ nyumu ɔ he ɔ, nyumu ɔ he be tsɔe ligbi kpaago, nɛ sa fɛɛ sa nɛ nyumu ɔ maa hwɔ nɔ ɔ hu he be tsɔe.

25 “‘Ke muɔ be ngɛ yo ko he be kɛkɛɛ be mi nɛ e nine kumi be sui lolo, aloo muɔ ɔ be ngɛ e he be kɛkɛɛ pe bɔ nɛ e beɔ daa a, e he be tsɔe ligbi ɔmɛ tsuo nɛ muɔ ɔ ngɛ bee ngɛ e he ɔ kaa bɔ nɛ e he be tsɔe ke e ku nine ɔ. 26 Sa fɛɛ sa nɛ yo ɔ maa hwɔ nɔ ke muɔ ɔ ngɛ bee ngɛ e he ɔ he be tsɔe kaa bɔ nɛ sa nɛ e maa hwɔ nɔ ke e ku nine ɔ hu he be tsɔe ɔ, nɛ nɔ́ fɛɛ nɔ́ nɛ e maa hi nɔ ɔ he be tsɔe kaa bɔ nɛ e baa ke e ku nine ɔ. 27 Nɔ fɛɛ nɔ nɛ e maa ta ní ɔmɛ a he ɔ he be tsɔe. É fɔ e tade ɔmɛ a he nɛ e ngɔ nyu kɛ du e he. E he be tsɔe kɛ yaa si gbɔkuɛ.

28 “‘Se ke muɔ ɔ kpa bemi ngɛ e he ɔ, e mlɛ* ligbi kpaago, nɛ lɔ ɔ se ɔ, e he ma tsɔ. 29 Ngɛ ligbi kpaanyɔne ɔ nɔ ɔ, e ngɔ lahuɛ* enyɔ loo beleku lahuɛ bimɛ enyɔ kɛ ba ha osɔfo ɔ ngɛ kpe he bo tsu ɔ nya. 30 Osɔfo ɔ nɛ e ngɔ kake kɛ sã yayami afɔle, nɛ e ngɔ kake ɔ nɛ piɛ ɔ kɛ sã sami afɔle, nɛ́ e kɛ kpata ha lɛ ngɛ Yehowa hɛ mi ngɛ muɔ nɛ be ngɛ e he nɛ ha nɛ e he tsɔ we ɔ he je.

31 “‘Lɔ ɔ he ɔ, nyɛ ha nɛ Israel bi ɔmɛ nɛ a je a he kɛ je níhi nɛ be hae nɛ a he nɛ tsɔ ɔ a he, bɔ nɛ pee nɛ a ko ngɔ a he mu ɔ kɛ ble ye bo tsu nɛ ngɛ a kpɛti ɔ, nɛ a ba gbo ngɛ a he mu ɔ mi.

32 “‘Mlaa nɛ fɔɔ si ha nyumu nɛ hiɔ ha nɛ nyu ngɛ bee ngɛ e he, kɛ nyumu nɛ e he tsɔ we akɛnɛ nyumu he nyu be ngɛ e he, 33 kɛ yo nɛ e ku nine, kɛ nyumu loo yo nɛ nyu loo muɔ ngɛ bee ngɛ e he, kɛ nyumu nɛ e kɛ yo nɛ he tsɔ we ná bɔmi ji nɛ ɔ nɛ.’”

16 Benɛ Aaron binyumu enyɔ ɔmɛ hɛ mɛ kɛ su Yehowa he ngɛ blɔ nɛ sɛ nɔ nɛ a gbo ɔ se ɔ, Yehowa kɛ Mose tu munyu. 2 Yehowa de Mose ke: “De o nyɛminyumu Aaron ke é ko ba he klɔuklɔu ɔ ngɛ tsu mi pomi bo ɔ se ngɛ Daka a nya nɔ́ ɔ hɛ mi be saisaa ko kɛkɛ, bɔ nɛ pee nɛ e ko gbo ejakaa ma je ye he kpo ngɛ bɔku mi ngɛ Daka a nya nɔ ɔ nɔ.

3 Ke Aaron ma he klɔuklɔu ɔ, níhi nɛ e kɛ ba ji nɛ ɔmɛ ɔ nɛ: na ku wayoo nɛ a kɛ maa sã yayami afɔle, kɛ agbosu nɛ a kɛ maa sã sami afɔle. 4 É wo klala tade klɔii nɛ ngɛ klɔuklɔu ɔ, nɛ e wo klala tagajami ɔ kɛ tsi e hehi nɛ e sɛ nɛ a naa a nɔ, nɛ e ngɔ klala mlɛ mi fimi nɔ́ ɔ kɛ fi e mlɛ mi, nɛ e ngɔ osɔfo pɛɛ nɛ a kɛ klala pee ɔ kɛ bu e yi. A ji tadehi nɛ a ngɛ klɔuklɔu. E ngɔ nyu kɛ du e he nɛ e wo tade ɔmɛ.

5 “É ngɔ akpakpo wayoo enyɔ nɛ a kɛ maa sã yayami afɔle kɛ agbosu kake nɛ a kɛ maa sã sami afɔle ngɛ Israel ma a dɛ.

6 “Aaron nɛ e ngɔ na ku nɛ e kɛ maa sã yayami afɔle ha lɛ nitsɛ e he ɔ kɛ ba, nɛ é kɛ kpata ha e kɛ e we ɔ.

7 “Lɔ ɔ se ɔ, é ngɔ akpakpo enyɔ ɔmɛ kɛ ba da Yehowa hɛ mi ngɛ kpe he bo tsu ɔ nya. 8 Aaron nɛ fɔ̃ akpakpo enyɔ ɔmɛ a nɔ sɔ.* Sɔ ɔ ma je akpakpo ɔ kake ha Yehowa, nɛ e ma je kake kɛ ha Azazel.* 9 Aaron nɛ ngɔ akpakpo nɛ sɔ ɔ maa nɔ e nɔ kaa Yehowa nɔ́ ɔ kɛ ba, nɛ́ e kɛ ba sã yayami afɔle. 10 Se akpakpo nɛ sɔ ɔ maa nɔ e nɔ kaa Azazel nɔ́ ɔ lɛɛ, á ngɔ jamɛ a akpakpo ɔ hɛ ngmengmle kɛ ba da Yehowa hɛ mi nɛ a pee kpatami kusumi ɔ kɛ pue e nɔ, nɛ á ngɔ lɛ kɛ ho nga a nɔ ya kɛ ya ha Azazel.

11 “Aaron nɛ ngɔ na ku nɛ e kɛ maa sã yayami afɔle kɛ ha lɛ nitsɛ e he ɔ kɛ ba nɛ́ e kɛ ba kpata ha e kɛ e we ɔ. Lɔ ɔ se ɔ, e gbe na ku ɔ nɛ e kɛ maa sã yayami afɔle ha lɛ nitsɛ e he ɔ.

12 “Jehanɛ ɔ, é ngɔ la jemi nɔ́ ɔ nɛ e je la ngɛ afɔle sami la tɛ nɛ ngɛ Yehowa hɛ mi ɔ mi nɛ́ e hyi, nɛ e piti tsopa kɛ e he via bukɔbukɔ dɛ kɔkɔ enyɔ kɛ piɛɛ he kɛ ba tsu mi pomi bo ɔ se. 13 Lɔ ɔ se ɔ, é ngɔ tsopa kɛ e he via a kɛ pue la a nɔ ngɛ Yehowa hɛ mi, nɛ tsopa kɛ e he via a la su ku ɔ maa ha Daka a nya nɔ nɛ ngɛ Odase daka a nɔ ɔ nɔ, bɔ nɛ pee nɛ e ko gbo.

14 “É ngɔ na ku ɔ muɔ ɔ eko nɛ e ngɔ e nine nguɛ kɛ sɔ mi nɛ e kɛ fĩa nya nɔ́ ɔ hɛ mi ngɛ puje he blɔ, nɛ e ngɔ e nine nguɛ kɛ fĩa muɔ ɔ eko kɛ pue nya nɔ́ ɔ hɛ mi si kpaago.

15 “Lɔ ɔ se ɔ, é gbe akpakpo nɛ e kɛ maa sã yayami afɔle ha ma a, nɛ e ngɔ e muɔ ɔ kɛ ba bo tsu ɔ mi, nɛ e pee e muɔ ɔ kaa bɔ nɛ e pee na ku ɔ muɔ ɔ pɛpɛɛpɛ. E fĩa kɛ pue nya nɔ́ ɔ hɛ mi.

16 “É kɛ kpata ha he klɔuklɔu ɔ ngɛ mu níhi nɛ Israel bi ɔmɛ pee, kɛ a tɔmi ɔmɛ, kɛ a yayami ɔmɛ a he je, nɛ e pee jã nɔuu ha kpe he bo tsu ɔ nɛ ngɛ a kpɛti ɔ ngɛ mu níhi nɛ Israel bi ɔmɛ pee ɔ he je.

17 “Ke e sɛ he klɔuklɔu ɔ nɛ e yaa kpata a, nɔ kpa ko nɛ ko hi kpe he bo tsu ɔ mi kɛ yaa si be nɛ e maa ba. E ma kpata ha lɛ nitsɛ e he kɛ e we ɔ, nɛ e ma kpata ha Israel ma a tsuo hulɔ.

18 “Lɔ ɔ se ɔ, é ba afɔle sami la tɛ nɛ ngɛ Yehowa hɛ mi ɔ he nɛ e ba kpata ha afɔle sami la tɛ ɔ. É ngɔ na ku ɔ muɔ ɔ eko kɛ akpakpo ɔ muɔ ɔ eko nɛ e kɛ kpa afɔle sami la tɛ ɔ koli ɔmɛ a he tsuo. 19 Jehanɛ ɔ, é ngɔ e nine nguɛ kɛ sɔ muɔ ɔ mi nɛ e fĩa eko kɛ pue afɔle sami la tɛ ɔ nɔ si kpaago nɛ e tsu he nɛ e pee lɛ klɔuklɔu ngɛ mu níhi nɛ Israel bi ɔmɛ pee ɔ he.

20 “Ke e kpata ha he klɔuklɔu ɔ kɛ kpe he bo tsu ɔ kɛ afɔle sami la tɛ ɔ ta a, é ngɔ akpakpo hɛngmengmletsɛ ɔ kɛ ba. 21 Aaron nɛ ngɔ e nine enyɔ ɔmɛ tsuo kɛ pue akpakpo ɔ yi mi nɛ e jaje Israel bi ɔmɛ a tɔmi ɔmɛ kɛ a tue gbomi ɔmɛ kɛ a yayami ɔmɛ tsuo kɛ pue e yi mi, nɛ́ e ngɔ akpakpo ɔ kɛ ha nyumu ko nɛ a hla lɛ kaa é ngɔ kɛ ho ɔ,* nɛ́ jamɛ a nɔ ɔ nɛ ngɔ akpakpo ɔ kɛ ho nga a nɔ ya. 22 É ngɔ akpakpo ɔ kɛ ho nga a nɔ ya, nɛ́ akpakpo ɔ nɛ ngɔ a yayami ɔmɛ tsuo kɛ ho nga kplanaa a nɔ ya.

23 “Jehanɛ ɔ, Aaron nɛ sɛ kpe he bo tsu ɔ mi nɛ e je klala tadehi nɛ e wo kɛ ya he klɔuklɔu ɔ, nɛ́ e kɛ pue lejɛ ɔ. 24 É ngɔ nyu kɛ du e he ngɛ he ko nɛ ngɛ klɔuklɔu nɛ e wo e tade ɔmɛ; lɔ ɔ se ɔ, e je kpo kɛ ba nɛ e ba sã lɛ nitsɛ e sami afɔle ɔ kɛ ma a sami afɔle ɔ nɛ e kɛ kpata ha lɛ nitsɛ e he kɛ ma a hulɔ. 25 É sã lohwehi nɛ e kɛ maa sã yayami afɔle ɔ zɔ ɔmɛ nɛ a je la su ku ngɛ afɔle sami la tɛ ɔ nɔ.

26 “Nɔ nɛ e ya ngmɛɛ akpakpo ɔ he kɛ ha Azazel ɔ nɛ fɔ e tade ɔmɛ a he, nɛ́ e ngɔ nyu kɛ du e he. Lɔ ɔ se ɔ, e ma nyɛ maa ba sito he ɔ.

27 “Na ku nɛ a kɛ sã yayami afɔle ɔ, kɛ akpakpo nɛ a kɛ sã yayami afɔle ɔ nɛ a kɛ a muɔ ɔ ba he klɔuklɔu ɔ nɛ a kɛ ba kpata a, á ngɔ kɛ ya sito he ɔ se, nɛ́ a ya sã a he womi ɔmɛ kɛ a lo ɔmɛ kɛ a fĩ ɔ ngɛ la mi. 28 Nɔ nɛ e ma ya sã ní nɛ ɔmɛ ɔ, é fɔ e tade ɔmɛ a he nɛ e ngɔ nyu kɛ du e he. Lɔ ɔ se ɔ, e ma nyɛ maa ba sito he ɔ.

29 “Enɛ ɔ maa pee mlaa nɛ fɔɔ si ha nyɛ kɛ yaa neneene: Ngɛ nyɔhiɔ kpaagone ɔ we ligbi nɛ ji nyɔngma a nɔ ɔ, nyɛɛ wa nyɛ he yi mi.* Nyɛ ko tsu nɔ́ ko nɔ́ ko, Israel fɔfɔɛ jio, ma se no nɛ e ba ngɛ nyɛ kpɛti jio. 30 Ngɛ jamɛ a ligbi ɔ nɔ ɔ, a ma kpata ha nyɛ konɛ a kɛ tsu nyɛ he. Nyɛ he ma tsɔ ngɛ nyɛ yayami ɔmɛ tsuo a he ngɛ Yehowa hɛ mi. 31 E ji hejɔɔmi ligbi nɛ nyɛɛ kɛ maa jɔɔ nyɛ he kulaa, nɛ́ nyɛɛ kɛ maa wa nyɛ he* yi mi. E ji mlaa nɛ fɔɔ si kɛ yaa neneene.

32 Osɔfo nɛ a maa pɔ lɛ nu nɛ́ a maa wo lɛ* osɔfo nɔkɔtɔma konɛ e sɔmɔ ngɛ e tsɛ ɔ nane mi ɔ maa sã kpatami afɔle, nɛ e maa wo klala tade ɔmɛ nɛ ji tade klɔuklɔu ɔmɛ. 33 E ma kpata ha jami he klɔuklɔu ɔ, kɛ kpe he bo tsu ɔ, kɛ afɔle sami la tɛ ɔ; nɛ e ma kpata ha osɔfo ɔmɛ kɛ nimli asafo ɔ tsuo. 34 Enɛ ɔ maa pee mlaa nɛ fɔɔ si ha nyɛ kɛ yaa neneene. Á kpata ha Israel bi ɔmɛ ngɛ a yayami ɔmɛ tsuo a he si kake daa jeha.”

Enɛ ɔ he ɔ, e pee kaa bɔ nɛ Yehowa fã Mose ɔ pɛpɛɛpɛ.

17 Yehowa ya nɔ nɛ e de Mose ke: 2 “O kɛ Aaron kɛ e binyumu ɔmɛ kɛ Israel bi ɔmɛ tsuo nɛ tu munyu nɛ o de mɛ ke, ‘Nɔ́ nɛ Yehowa fã ke a pee ji nɛ ɔ nɛ:

3 “‘“Ke Israel no ko gbe na ku aloo agbosu wayoo aloo apletsi ngɛ sito he ɔ, aloo e gbe lohwe ɔ ngɛ sito he ɔ se, 4 mohu pe nɛ e kɛ maa ba kpe he bo tsu ɔ nya nɛ́ e kɛ ba ha ngɛ lejɛ ɔ kaa afɔle ha Yehowa ngɛ Yehowa bo tsu klɔuklɔu ɔ hɛ mi ɔ, á bu jamɛatsɛ ɔ kaa e ye muɔ he fɔ. E pue muɔ si, lɔ ɔ he ɔ, á gbe jamɛ a nɔ ɔ.* 5 Bɔ nɛ pee nɛ Israel bi ɔmɛ nɛ á ko gbe a lohwehi ngɛ nga a nɔ hu, mohu ɔ, á kɛ ba Yehowa ngɔ ngɛ kpe he bo tsu ɔ nya nɛ a kɛ ba ha osɔfo ɔ. Á kɛ ní nɛ ɔmɛ nɛ sã tue mi jɔmi afɔlehi ha Yehowa. 6 Osɔfo ɔ nɛ fĩa muɔ ɔ ngɛ Yehowa afɔle sami la tɛ ɔ nɔ ngɛ kpe he bo tsu ɔ nya, nɛ́ e sã zɔ ɔ nɛ e je via liliili* ha Yehowa. 7 Lɔ ɔ he ɔ, á ko sã afɔlehi ha daimoniohi nɛ a ngɛ kaa apletsi* nɛ a kɛ mɛ ngɛ ajuama bɔe ɔ hu. Enɛ ɔ maa pee mlaa nɛ fɔɔ si daa ha nyɛ, nyɛ yi nɔhi tsuo.”’

8 “Mo de mɛ ke, ‘Israel fɔfɔɛ fɛɛ Israel fɔfɔɛ loo ma se no fɛɛ ma se no nɛ ngɛ nyɛ kpɛti nɛ maa sã sami afɔle aloo afɔle kpa ko 9 nɛ́ e kɛ be kpe he bo tsu ɔ nya bae nɛ e ba sã kɛ ha Yehowa a, á gbe lɛ.*

10 “‘Israel fɔfɔɛ ko aloo ma se no ko nɛ e ngɛ nyɛ kpɛti nɛ e maa ye muɔ saisaa ko ɔ, bɔ fɛɛ bɔ nɛ ji ɔ, ma je ye hɛ kɛ pi jamɛ a nɔ ɔ* nɛ e ye muɔ ɔ, nɛ ma gbe lɛ.* 11 Ejakaa he lo ɔ wami* ngɛ muɔ ɔ mi, nɛ imi nitsɛ i kɛ ha ngɛ afɔle sami la tɛ ɔ nɔ konɛ nyɛ kɛ kpata ha nyɛ he,* ejakaa wami* nɛ ngɛ muɔ ɔ mi ɔ he je nɛ a kɛ kpataa a nɛ. 12 Enɛ ɔ he je nɛ i de Israel bi ɔmɛ ke: “Nyɛ ti nɔ ko nɔ* ko nɛ ko ye muɔ, nɛ ma se no nɛ ngɛ nyɛ kpɛti ɔ hu ko ye muɔ” ɔ nɛ.

13 “‘Ke Israel no ko loo ma se no ko nɛ ngɛ nyɛ kpɛti ya da de nɛ e gbe pu mi lohwe* aloo lohwe pɛlitsɛ nɛ́ e maa ye ɔ, e plɛ e muɔ ɔ kɛ pue si, nɛ e ngɔ zu kɛ ha nɔ. 14 Ejakaa he lo fɛɛ he lo wami* ji e muɔ, akɛnɛ wami* ngɛ muɔ ɔ mi he je. Lɔ ɔ he ɔ, i de Israel bi ɔmɛ ke: “Nyɛ ko ye he lo ko he lo ko muɔ, ejakaa he lo fɛɛ he lo wami* ji e muɔ. Nɔ fɛɛ nɔ nɛ maa ye muɔ ɔ, a maa gbe lɛ.” 15 Ke lohwe ko gbo lɛ nitsɛ e gbenɔ aloo lohwe ko tsɔtslɔɔ e mi ɔ, nɔ fɛɛ nɔ* nɛ e maa ye jamɛ a lo ɔ, Israel no jio, ma se no jio, é fɔ e tade ɔmɛ a he nɛ e ngɔ nyu kɛ du e he. E he be tsɔe kɛ yaa si gbɔkuɛ loko e he ma tsɔ. 16 Se ke e fɔ we e tade ɔmɛ a he, nɛ e du we e he* ɔ, e maa tloo nɔ́ nɛ maa je mi kɛ ba a.’”

18 Yehowa ya nɔ nɛ e kɛ Mose tu munyu nɛ e de lɛ ke: 2 “O kɛ Israel bi ɔmɛ nɛ tu munyu nɛ o de mɛ ke, ‘Imi ji Yehowa nyɛ Mawu ɔ nɛ. 3 Nyɛ ko pee nyɛ ní kaa bɔ nɛ Egipt bi nɛ nyɛ ya hi a zugba a nɔ ɔ peeɔ a ní ɔ, nɛ nyɛ ko pee nyɛ ní kaa bɔ nɛ Kanaan bi nɛ i kɛ nyɛ yaa a zugba a nɔ ɔ hu peeɔ a ní ɔ, nɛ nyɛ ko kase a kusumi ɔmɛ hulɔ. 4 Nyɛɛ ye ye fami ɔmɛ a nɔ, nɛ nyɛɛ ye ye mlaa amɛ hu a nɔ nɛ nyɛɛ nyɛɛ ngɛ a nya. Imi ji Yehowa nyɛ Mawu ɔ nɛ. 5 Nyɛɛ ye ye mlaa amɛ kɛ ye fami ɔmɛ a nɔ; nɔ fɛɛ nɔ nɛ e maa pee jã a, e yi ma ná wami. Imi ji Yehowa.

6 “‘Nyɛ ti nɔ ko nɔ ko nɛ ko ya e weku no tutuutu he nɛ e kɛ lɛ ya ná bɔmi.* Imi ji Yehowa. 7 O kɛ o tsɛ nɛ kó ná bɔmi, nɛ o kɛ o nyɛ nɛ kó ná bɔmi. O nyɛ ji lɛ, lɔ ɔ he ɔ, o kɛ lɛ nɛ kó ná bɔmi.

8 “‘O kɛ o tsɛ yo nɛ kó ná bɔmi. E ji hɛ mi si puemi ha o tsɛ ɔ.*

9 “‘O kɛ o nyɛmiyo nɛ kó ná bɔmi, o tsɛ biyo jio, o nyɛ biyo jio, a fɔ o kɛ lɛ ngɛ we kake mi jio, a fɔ lɛ ngɛ we kpa mi jio.

10 “‘O kɛ o binyumu biyo aloo o biyo e biyo nɛ kó ná bɔmi, ejakaa e maa pee hɛ mi si puemi kɛ ha mo.

11 “‘O kɛ o tsɛ biyo nɛ e kɛ yo kpa fɔ ɔ nɛ kó ná bɔmi, ejakaa o nyɛmiyo ji lɛ.

12 “‘O kɛ o tsɛ nyɛmiyo nɛ kó ná bɔmi, ejakaa e ji o tsɛ ɔ weku no tutuutu.

13 “‘O kɛ o nyɛ nyɛmiyo nɛ kó ná bɔmi, ejakaa e ji o nyɛ ɔ weku no tutuutu.

14 “‘O kɛ o tsɛ nyɛminyumu e yo nɛ kó ná bɔmi nɛ o kɛ pue o tsɛ nyɛminyumu ɔ hɛ mi si,* ejakaa o tsɛ ɔ nyɛminyumu yo ji lɛ.

15 “‘O kɛ o binyumu e yo nɛ kó ná bɔmi. O binyumu ɔ yo ji lɛ, lɔ ɔ he ɔ, o kɛ lɛ nɛ ko ná bɔmi.

16 “‘O kɛ o nyɛminyumu e yo nɛ kó ná bɔmi, ejakaa e ji hɛ mi si puemi ha o nyɛminyumu ɔ.*

17 “‘O kɛ yo kɛ e biyo nɛ kó ná bɔmi. O kɛ e binyumu biyo kɛ e biyo biyo nɛ kó ná bɔmi. A ji e weku li tutuutu; e ji yakayaka ní peepee.*

18 “‘Koo ngɔ yo nɛ o ngɔ e nyɛmiyo hu kɛ piɛɛ he kaa e hunoyo nɛ́ o kɛ lɛ nɛ ná bɔmi be mi nɛ e nyɛmiyo ɔ ngɛ je mi.

19 “‘Ke yo ko ku nine ɔ, koo ya e he nɛ o kɛ lɛ ya ná bɔmi ejakaa e he tsɔ we.

20 “‘O kɛ nɔ kpa* e yo nɛ kó ná bɔmi, nɛ́ o ko ba wo o he mu.

21 “‘Koo ngmɛ blɔ nɛ a ngɔ o bimɛ ɔmɛ eko kɛ sã afɔle ha Molek. Koo pee jã kɛ gbe o Mawu ɔ biɛ ɔ he guɛ. Imi ji Yehowa.

22 Nyumu kɛ nyumu* nɛ kó ná bɔmi kaa bɔ nɛ nyumu kɛ yo náa bɔmi ɔ. E ji ní hiɔmi ní.

23 “‘Nyumu kɛ lohwe nɛ kó ná bɔmi nɛ e kɛ ba wo e he mu; nɛ yo nɛ ko ngɔ e he kɛ ha lohwe nɛ e kɛ lɛ nɛ ná bɔmi, ejakaa e kɛ adebɔ su kɔ we.

24 “‘Nyɛ ko pee ní nɛ ɔmɛ eko kɛ wo nyɛ he mu, ejakaa níhi nɛ je mahi nɛ i ngɛ mɛ fiee ngɛ nyɛ hɛ mi ɔ pee kɛ wo a he mu ji nɛ ɔmɛ nɛ. 25 Enɛ ɔ he ɔ, zugba a nɔ wo mu, nɛ ma ngɔ tue gblami kɛ ba e nɔ ngɛ e tɔmi ɔ he je, nɛ zugba a maa vie nihi nɛ a ngɛ e nɔ ɔ. 26 Se nyɛɛ lɛɛ, nyɛɛ ye ye mlaa amɛ kɛ ye fami ɔmɛ a nɔ. Nyɛ ti nɔ ko nɛ ko pee ní hiɔmi ní nɛ ɔmɛ eko, Israel fɔfɔɛ jio, ma se no nɛ e ngɛ nyɛ kpɛti jio. 27 Nihi nɛ a hi zugba nɛ nyɛ yaa nɔ ɔ nɔ ɔ pee ní hiɔmi ní nɛ ɔmɛ tsuo, nɛ amlɔ nɛ ɔ, zugba a nɔ wo mu. 28 Kɛkɛ ɔ, akɛnɛ nyɛ wui zugba a nɔ mu he je ɔ, zugba a be nyɛ viee kaa bɔ nɛ e maa vie mahi nɛ a ngɛ e nɔ loko nyɛ yaa a. 29 Ke nɔ ko pee ní hiɔmi ní nɛ ɔmɛ eko ɔ, á gbe jamɛ a nɔ ɔ.* 30 Nyɛɛ ye fami nɛ i fã nyɛ ɔ nɔ. Nyɛ ko kase kusumihi nɛ a hiɔ nɛ ni nɛmɛ nɛ a hi zugba a nɔ kekle ɔ pee ɔ, nɛ́ nyɛ ko ble nyɛ he. Imi ji Yehowa nyɛ Mawu ɔ nɛ.’”

19 Yehowa ya nɔ nɛ e kɛ Mose tu munyu nɛ e de lɛ ke: 2 “O kɛ Israel asafo ɔ tsuo nɛ tu munyu nɛ o de mɛ ke, ‘Nyɛɛ pee nyɛ he klɔuklɔu, ejakaa imi Yehowa nyɛ Mawu ɔ, i ngɛ klɔuklɔu.

3 “‘Nyɛ ti nɔ fɛɛ nɔ nɛ bu e tsɛ kɛ e nyɛ,* nɛ nyɛɛ ye ye hejɔɔmi ligbi ɔmɛ. Imi ji Yehowa nyɛ Mawu ɔ nɛ. 4 Nyɛ ko je ye se nɛ nyɛ ya nyɛɛ mawuhi nɛ se nami ko be a he ɔmɛ a se, nɛ nyɛ ko pee dade amagahi hulɔ. Imi ji Yehowa nyɛ Mawu ɔ nɛ.

5 “‘Jehanɛ se hu ɔ, ke nyɛ maa sã tue mi jɔmi afɔle ha Yehowa a, nyɛɛ sã afɔle ɔ bɔ nɛ Mawu bua maa jɔ nyɛ he. 6 Ligbi nɛ nyɛ maa sã afɔle ɔ, nyɛɛ ye ngɛ jamɛ a ligbi ɔ nɔ kɛ e nɔ jena, se ke eko piɛ kɛ ya si ligbi etɛne ɔ, nyɛɛ sã ngɛ la mi. 7 Se ke nɔ ko ye eko ngɛ ligbi etɛne ɔ nɔ ɔ, e ji tɔmi, nɛ Mawu bua be he jɔe. 8 Nɔ nɛ maa ye eko ɔ maa tloo nɔ́ nɛ maa je mi kɛ ba a, ejakaa e gbe Yehowa nɔ́ klɔuklɔu he guɛ. Á gbe jamɛ a nɔ ɔ.*

9 “‘Ke nyɛ kpa nyɛ ngmɔ ní ngɛ nyɛ zugba a nɔ ɔ, nyɛ ko kpa nɔ́ nɛ ngɛ ngmɔ ɔ tue ɔ tsuo, nɛ nyɛ ko muɔɔ nɔ́ nɛ maa piɛ ngɛ ní kpami ɔ se ɔ* hulɔ. 10 Jehanɛ hu ɔ, nyɛ ko muɔɔ nyɛ wai ngmɔ ɔmɛ a nɔ́ ní nɛ maa piɛ ɔ, nɛ nyɛ ko muɔɔ wai yiblii nɛ maa gbɛ fia a hulɔ. Nyɛɛ je he kɛ ha ohiatsɛmɛ* kɛ nibwɔhi nɛ a ngɛ nyɛ kpɛti ɔ. Imi ji Yehowa nyɛ Mawu ɔ nɛ.

11 “Nyɛ ko ju, nyɛ ko sisi nɔ, nɛ nyɛɛ kɛ nyɛ sibi ko ye ngɛ blɔ nɛ dɛ nɔ. 12 Nyɛ ko ngɔ ye biɛ kɛ kã lakpa kita nɛ́ nyɛ ko ba gbe nyɛ Mawu ɔ biɛ ɔ he guɛ. Imi ji Yehowa. 13 Nyɛ ko fia nyɛ nyɛmimɛ ojo, nɛ nyɛ ko ju hulɔ. Nyɛ ko ha nɛ apaatsɛ hiɔwo nɛ tlɔ nyɛ dɛ kɛ ya si je nanɛɛ.

14 “‘Koo gbiɛ tuekpokutsɛ, nɛ koo ngɔ nɔ́ ko kɛ fɔ hɛ yuyuilɔ blɔ mi hulɔ. Moo ye o Mawu ɔ gbeye. Imi ji Yehowa.

15 Nyɛɛ ye dami sane ngɛ nyɛ kojomi mi. Nyɛ ko hyɛ ohiatsɛ hɛ mi, nɛ nyɛ ko na sikatsɛ kaa e he hia pe ni kpahi. Ke nyɛ ngɛ nyɛ nyɛmimɛ kojoe ɔ, nyɛɛ ye dami sane.

16 “‘Koo pee o he nɔ he guɛ gbelɔ kɛ hi yae kɛ hi bae ngɛ o ma mi bi ɔmɛ a kpɛti. Koo ngɔ o nyɛmi wami* kɛ wo oslaa mi.* Imi ji Yehowa.

17 “‘Koo nyɛ o nyɛmi ngɛ o tsui mi. Bɔ fɛɛ bɔ nɛ ji ɔ, kã o nyɛmi ɔ hɛ mi bɔ nɛ pee nɛ o kɛ lɛ tsuo nɛ ko tɔ̃ tɔmi kake ɔ nɔuu.

18 “‘Koo ye lue ha mo nitsɛ o he, nɛ koo ngɔ o ma mi bi ɔmɛ a he abofu kɛ wo o mi. Suɔ o nyɛmi nɔmlɔ kaa bɔ nɛ o suɔ mo nitsɛ o he ɔ. Imi ji Yehowa.

19 “‘Nyɛɛ ye ye mlaa amɛ a nɔ: Nyɛ ko ha nɛ nyɛ we mi lohwehi nɛ a kuɔ lohwe kpahi nɛ pi a henɔ nɛ a kɛ mɛ nɛ fɔ. Nyɛ ko du wu munomuno enyɔ kɛ futu ngɛ ngmɔ kake mi, nɛ nyɛ ko wo tade nɛ a kɛ kpa slɔɔto enyɔ lo kɛ futu.

20 Jehanɛ hu ɔ, ke nyumu ko kɛ yo ko ná bɔmi, nɛ yo ɔ ji mawayo nɛ a bi e si ha nɔ ko, se a kpɔ̃ we lɛ aloo e yi e he lolo ɔ, á gbla a tue, se a ko gbe mɛ nɛ a gbo, ejakaa mawayo ɔ yi e he lolo. 21 Nyumu ɔ nɛ ngɔ agbosu nɛ a kɛ maa sã fɔ yemi afɔle ba ha Yehowa ngɛ kpe he bo tsu ɔ nya. 22 Osɔfo ɔ nɛ ngɔ agbosu ɔ kɛ sã fɔ yemi afɔle ngɛ Yehowa hɛ mi konɛ e kɛ kpata ha lɛ ngɛ e yayami ɔ he je, nɛ a maa ngɔ yayami nɛ e pee ɔ kɛ ke lɛ.

23 “‘Ke nyɛ ba su zugba a nɔ nɛ nyɛ du tso nɛ woɔ yiblii ɔ, nyɛɛ bu e yiblii ɔ kaa nɔ́ ko nɛ he tsɔ we, nɛ nyɛɛ yu nyɛ he ngɛ he.* Nyɛɛ yu nyɛ he ngɛ tso ɔ he jeha etɛ. Nyɛ ko ye e yiblii. 24 Se ngɛ jeha eywiɛne ɔ mi ɔ, e yiblii ɔmɛ tsuo maa pee klɔuklɔu, nɛ e maa pee bua jɔmi be ha nyɛ ngɛ Yehowa hɛ mi. 25 Kɛkɛ ɔ, ngɛ jeha enuɔne ɔ mi ɔ, nyɛ ma nyɛ maa ngɔ e yiblii ɔ kɛ piɛɛ nyɛ ngmɔ ní nɛ nyɛ ma kpa a he nɛ nyɛɛ ye. Imi ji Yehowa nyɛ Mawu ɔ nɛ.

26 “‘Nyɛ ko ye lo ko lo ko nɛ muɔ ngɛ mi.

“‘Nyɛ ko klaa, nɛ nyɛ ko tsu kunya hulɔ.

27 “‘Nyɛ ko sɛ* nyɛ tue si bwɔmi, nɛ nyɛ ko poo nyɛ kpɛni bwɔmi nya nɛ́ nyɛ kɛ puɛ lɛ.

28 “‘Nyɛ ko poopoo nyɛ he ha kɛ ha nɔ* ko nɛ e gbo, nɛ nyɛ ko ngma ní ngɛ nyɛ he womi nɔ hulɔ. Imi ji Yehowa.

29 “‘Koo ha nɛ o biyo nɛ pee tuutuu polɔ nɛ o kɛ pue e hɛ mi si, ke pi jã a, a kɛ tuutuu pomi maa wo zugba a nɔ mu, nɛ yakayaka ní peepee ma hyi zugba a nɔ.

30 “‘Nyɛɛ ye ye hejɔɔmi ligbi ɔmɛ, nɛ nyɛɛ ngɔ bu kɛ ha ye jami he ɔ.* Imi ji Yehowa.

31 “‘Nyɛ ko ya hla yemi kɛ buami ngɛ ní peeli a ngɔ, nɛ nyɛ ko ya klaali a ngɔ hulɔ, ke pi jã a, a maa wo nyɛ he mu. Imi ji Yehowa nyɛ Mawu ɔ nɛ.

32 “‘Moo bu nɔ nɛ e yi mi puɛ mua, nɛ́ o wo nɔ nɛ bwɔ hɛ mi nyami, nɛ o ye o Mawu ɔ gbeye. Imi ji Yehowa.

33 “‘Ke ma se no kɛ mo ba ngɛ o zugba a nɔ ɔ, koo pee lɛ basabasa. 34 Ma se no nɛ e kɛ mo ngɛ o zugba a nɔ ɔ, o kɛ lɛ nɛ hi si kaa o ma mi no; ó suɔ lɛ kaa bɔ nɛ o suɔ mo nitsɛ o he ɔ, ejakaa mo hu o ya to nubwɔ ngɛ Egipt zugba a nɔ hyɛ. Imi ji Yehowa o Mawu ɔ nɛ.

35 “‘Ke nyɛ ngɛ nɔ́ ko kami loo nɔ́ ko jiɔmi, aloo nyu nɔ́ ko susue ɔ, nyɛ ko ngɔ susumi nɔ́ nɛ dɛ kɛ tsu ní. 36 Nyɛɛ ngɔ sɛnihi nɛ a da, sɛni tɛhi nɛ a da, níhi nɛ a gbli a susumi níhi nɛ a da,* kɛ níhi nɛ a kɛ susuɔ nyu níhi nɛ a da* kɛ tsu ní. Imi ji Yehowa nyɛ Mawu ɔ nɛ e je nyɛ kɛ je Egipt zugba a nɔ ɔ nɛ. 37 Lɔ ɔ he ɔ, nyɛɛ ye ye mlaa amɛ tsuo a nɔ, nɛ nyɛɛ ngɔ ye fami ɔmɛ kɛ tsu ní, nɛ nyɛɛ nyɛɛ ngɛ a nya. Imi ji Yehowa.’”

20 Yehowa ya nɔ nɛ e kɛ Mose tu munyu nɛ e de lɛ ke: 2 “De Israel bi ɔmɛ ke, ‘Ke Israel no ko aloo ma se no ko nɛ ngɛ Israel ngɔ e bi kɛ ha Molek ɔ, bɔ fɛɛ bɔ nɛ ji ɔ, á gbe lɛ. Nihi nɛ a ngɛ zugba a nɔ ɔ nɛ a fiaa lɛ tɛ nɛ e gbo. 3 Imi nitsɛ ma je ye hɛ kɛ pi jamɛ a nɔ ɔ, nɛ ma gbe lɛ,* ejakaa e ngɔ e bimɛ ɔmɛ eko kɛ ha Molek, nɛ lɔ ɔ he ɔ, e ble ye he klɔuklɔu ɔ, nɛ e gbe ye biɛ klɔuklɔu ɔ he guɛ. 4 Ke nɔ ko kɛ e bi ha Molek nɛ nihi nɛ a ngɛ zugba a nɔ ɔ je blɔ nɛ a ma a hɛ kɛ fɔ nɔ nɛ a gbi jamɛatsɛ ɔ, 5 lɛɛ bɔ fɛɛ bɔ nɛ ji ɔ, imi nitsɛ ma je ye hɛ kɛ pi jamɛatsɛ ɔ kɛ e weku. Ma gbe* jamɛ a nɔ ɔ kɛ nihi nɛ a piɛɛ e he nɛ a kɛ Molek bɔ ajuama a tsuo.

6 “‘Nɔ* nɛ e maa je ye se nɛ e maa ya ní peeli kɛ klaali a ngɔ ɔ,* ma je ye hɛ kɛ pi jamɛ a nɔ ɔ* kokooko, nɛ ma gbe lɛ.*

7 “‘Nyɛɛ tsu nyɛ he nɛ nyɛɛ pee klɔuklɔu, ejakaa imi ji Yehowa nyɛ Mawu ɔ nɛ. 8 Nyɛɛ ye ye mlaa amɛ a nɔ nɛ nyɛɛ nyɛɛ ngɛ a nya. Imi ji Yehowa, nɔ nɛ ngɛ nyɛ he tsue ɔ nɛ.

9 “‘Ke nɔ ko gbiɛ e tsɛ aloo e nyɛ ɔ, bɔ fɛɛ bɔ nɛ ji ɔ, á gbe lɛ. Akɛnɛ e gbiɛ e tsɛ aloo e nyɛ he je ɔ, lɛ nitsɛ e muɔ maa tloo lɛ.

10 “‘Jehanɛ ɔ, ke nɔ ko kɛ nɔ ko yo ya puɛ gba a, bɔ fɛɛ bɔ nɛ ji ɔ, á gbe nɔ nɛ e kɛ nɔ ɔ yo ɔ puɛ gba a. Á gbe nyumu gba puɛlɔ ɔ kɛ yo gba puɛlɔ ɔ tsuo. 11 Nɔ nɛ e kɛ e tsɛ yo maa hwɔ si ɔ, e pue e tsɛ ɔ hɛ mi si.* Bɔ fɛɛ bɔ nɛ ji ɔ, á gbe mɛ ni enyɔ ɔmɛ tsuo. Mɛ nitsɛmɛ a muɔ maa tloo mɛ. 12 Ke nɔ ko kɛ e binyumu e yo ná bɔmi ɔ, bɔ fɛɛ bɔ nɛ ji ɔ, á gbe mɛ ni enyɔ ɔmɛ tsuo. A bɔ musu. Mɛ nitsɛmɛ a muɔ maa tloo mɛ.

13 “‘Ke nyumu kɛ nyumu ná bɔmi kaa bɔ nɛ nyumu kɛ yo náa bɔmi ɔ, mɛ ní enyɔ ɔmɛ tsuo a pee ní hiɔmi ní. Bɔ fɛɛ bɔ nɛ ji ɔ, á gbe mɛ. Mɛ nitsɛmɛ a muɔ maa tloo mɛ.

14 “‘Ke nyumu ko kɛ yo ko kɛ e nyɛ tsuo ná bɔmi ɔ, e ji yakayaka ní peepee.* A kɛ la nɛ sã nyumu ɔ kɛ yi ɔmɛ tsuo, bɔ nɛ pee nɛ yakayaka ní peepee nɛ ko tsa nɔ ngɛ nyɛ kpɛti.

15 “‘Ke nyumu ko kɛ lohwe ná bɔmi ɔ, bɔ fɛɛ bɔ nɛ ji ɔ, á gbe lɛ, nɛ́ a gbe lohwe ɔ hulɔ. 16 Ke yo ko ya lohwe saisaa ko he nɛ́ e kɛ lohwe ɔ nɛ ná bɔmi ɔ, nyɛɛ gbe yo ɔ kɛ lohwe ɔ tsuo. Bɔ fɛɛ bɔ nɛ ji ɔ, á gbe mɛ. Mɛ nitsɛmɛ a muɔ maa tloo mɛ.

17 “‘Ke nyumu ko kɛ e nyɛmiyo, nɛ ji e tsɛ biyo aloo e nyɛ biyo ná bɔmi, nɛ e na e he, nɛ yo ɔ hu na e he ɔ, e ji zo nɔ́. Á gbe mɛ* ngɛ a ma mi bi ɔmɛ a hɛ mi. E pue e nyɛmiyo ɔ hɛ mi si.* É tloo nɔ́ nɛ maa je mi kɛ ba a.

18 “‘Ke nyumu ko kɛ yo nɛ ku nine ná bɔmi ɔ, nyumu ɔ kɛ yo ɔ tsuo bui yo ɔ muɔ ɔ. Á gbe* mɛ ni enyɔ ɔmɛ tsuo.

19 “‘O kɛ o nyɛ nyɛmiyo aloo o tsɛ nyɛmiyo nɛ ko ná bɔmi, ejakaa ke o pee jã a, lɔ ɔ ma ha nɛ́ o pue o weku no tutuutu ɔ hɛ mi si. Nyɛ ni enyɔ ɔmɛ tsuo nyɛ maa tloo nɔ́ nɛ maa je mi kɛ ba a. 20 Ke nɔ ko kɛ e tsɛ nyɛminyumu e yo aloo e nyɛ nyɛminyumu e yo ná bɔmi ɔ, e pue e tsɛ nyɛminyumu ɔ aloo e nyɛ nyɛminyumu ɔ hɛ mi si.* Á tloo nɔ́ nɛ maa je mi kɛ ba a. Á gbe mɛ, nɛ́ a ko ba fɔ. 21 Ke nɔ ko kɛ e nyɛminyumu e yo ná bɔmi ɔ, e ji ní hiɔmi ní. E pue e nyɛminyumu ɔ hɛ mi si.* Á gbe mɛ, nɛ́ a ko ba fɔ.

22 “‘Nyɛɛ ye ye mlaa amɛ kɛ ye fami ɔmɛ a nɔ, nɛ nyɛɛ nyɛɛ ngɛ a nya, bɔ nɛ pee nɛ zugba nɛ i kɛ nyɛ yaa nɔ konɛ nyɛ ya hi nɔ ɔ nɛ ko vie nyɛ. 23 Nyɛ ko kase je mahi nɛ i ngɛ mɛ fiee ngɛ nyɛ hɛ mi ɔ a kusumi ɔmɛ; ejakaa a peeɔ ní nɛ ɔmɛ tsuo, nɛ lɔ ɔ ha nɛ a he peeɔ mi tai. 24 Lɔ ɔ he nɛ i de nyɛ ke: “Nyɛ ma ya ngɔ a zugba a, nɛ ma kɛ ha nyɛ kaa nyɛ weto ní. E ji zugba nɛ nyɔ nyu kɛ hwo ngɛ bee ngɛ nɔ. Imi ji Yehowa nyɛ Mawu ɔ, nɔ nɛ e je nyɛ kɛ je je ma amɛ a kpɛti ɔ” nɛ. 25 Nyɛ ha nɛ slɔɔto nɛ hi lohwe nɛ he tsɔ kɛ lohwe nɛ he tsɔ we a kpɛti, nɛ́ slɔɔto nɛ hi lohwe pɛlitsɛ nɛ he tsɔ we kɛ lohwe pɛlitsɛ nɛ he tsɔ a kpɛti. Nyɛ ko ngɔ lohwe ko aloo lohwe pɛlitsɛ ko aloo lohwe saisaa ko nɛ sãã si ngɛ zugba, nɛ́ i je ngɛ lohwehi a kpɛti kaa nyɛɛ bu lɛ kaa e he tsɔ we ɔ kɛ wo nyɛ* he mu. 26 Nyɛɛ pee klɔuklɔu ha mi, ejakaa imi Yehowa a, i ngɛ klɔuklɔu. I ngɛ nyɛ jee kɛ je je ma amɛ a kpɛti konɛ nyɛ ba pee ye nɔ́.

27 “‘Nyumu fɛɛ nyumu aloo yo fɛɛ yo nɛ e ji ní peelɔ aloo klalɔ ɔ,* bɔ fɛɛ bɔ nɛ ji ɔ, á gbe lɛ. Ni ɔmɛ nɛ a fiaa lɛ tɛ nɛ e gbo. Lɛ nitsɛ e muɔ maa tloo lɛ.’”

21 Yehowa ya nɔ nɛ e de Mose ke: “O kɛ Aaron bimɛ nɛ ji osɔfo ɔmɛ nɛ tu munyu nɛ o de mɛ ke, ‘Nyɛ ti nɔ ko nɛ ko ble e he ngɛ nɔ* ko nɛ e gbo ngɛ e ma mi bi ɔmɛ a kpɛti ɔ he je. 2 Se e weku no tutuutu lɛɛ, e ma nyɛ maa pee jã. E nyɛ jio, e tsɛ jio, e binyumu jio, e biyo jio, e nyɛminyumu jio. 3 E ma nyɛ ma ble e he ngɛ e nyɛmiyo tutuutu nɛ e ji yomiyo nɛ e sɛ we gba si himi mi lolo ɔ he. 4 E ko ble e he, nɛ e ko wo e he mu hulɔ ngɛ yo ko nɛ e ji e ma mi bi ɔmɛ a ti nɔ ko yo he. 5 Osɔfo ɔmɛ nɛ a ko sɛ a yi kpalokpalo, a ko poo a kpɛni bwɔmi nya, nɛ a ko poo a he ha hulɔ. 6 Á pee klɔuklɔu ha a Mawu ɔ. Á ko wo a Mawu ɔ biɛ ɔ he mu, ejakaa mɛ lɛ a sãã Yehowa afɔlehi nɛ a kɛ la sãã a, nɛ ji a Mawu ɔ abolo* ɔ. Lɔ ɔ he ɔ, e sa kaa a pee klɔuklɔu. 7 Á ko ngɔ tuutuu yo, aloo yo nɛ nɔ ko kɛ lɛ ná bɔmi, aloo yo nɛ e huno kɛ lɛ po gba mi, ejakaa osɔfo ji nɔ ko nɛ ngɛ klɔuklɔu ha e Mawu ɔ. 8 Nyɛ Israel bi, nyɛɛ bu osɔfo kaa e ngɛ klɔuklɔu, ejakaa lɛ nɛ e kɛ nyɛ Mawu ɔ abolo ɔ haa. Nyɛɛ na osɔfo kaa e ngɛ klɔuklɔu, ejakaa imi Yehowa nɛ́ i pee nyɛ klɔuklɔu ɔ, i ngɛ klɔuklɔu.

9 “‘Jehanɛ hu ɔ, ke osɔfo ko biyo pee e he tuutuu polɔ kɛ wo e he mu ɔ, e wo e tsɛ ɔ he mu. Á sã biyo ɔ ngɛ la mi.

10 “‘Osɔfo nɛ a ngɔ nɔ pɔmi nu ɔ kɛ pue e yi mi, nɛ a wo lɛ osɔfo nɔkɔtɔma* ngɛ e nyɛmimɛ ɔmɛ a kpɛti konɛ e wo osɔfo tade ɔmɛ ɔ, e ko ngmɛɛ e yi bwɔmi he kɛ pue e nɔ, nɛ e ko gba e tadehi hulɔ. 11 É ko hɛ lɛ kɛ su gbogboe* ko he; e ko ble e he ngɛ e tsɛ loo e nyɛ po he. 12 É ko je jami he ɔ, nɛ e ko wo e Mawu ɔ jami he ɔ he mu hulɔ, ejakaa he nɔ jɔɔmi okadi, nɛ ji e Mawu ɔ nɔ pɔmi nu ɔ ngɛ e nɔ. Imi ji Yehowa.

13 “‘É ngɔ yomiyo kaa e yo. 14 E ko ngɔ yalɔyo,* aloo yo nɛ e huno kɛ lɛ po gba mi, aloo yo nɛ nɔ ko kɛ lɛ ná bɔmi, aloo tuutuu yo; mohu ɔ, e ngɔ yomiyo ngɛ e ma mi bi ɔmɛ a kpɛti kaa e yo. 15 É ko wo e nina* he mu ngɛ e ma mi bi ɔmɛ a kpɛti, ejakaa imi ji Yehowa, nɔ nɛ ngɛ e he tsue ɔ nɛ.’”

16 Yehowa ya nɔ nɛ e kɛ Mose tu munyu nɛ e de lɛ ke: 17 “De Aaron ke, ‘O nina* ko nɛ kpa ngɛ e he nɛ ko hɛ lɛ kɛ su afɔle sami la tɛ ɔ he nɛ e ngɔ e Mawu ɔ abolo ɔ kɛ ha ngɛ a yi nɔhi tsuo a mi. 18 Ke kpa ngɛ nɔ ko he ɔ, e ko hɛ lɛ kɛ su afɔle sami la tɛ ɔ he: hɛ yuyuilɔ, aloo glɔtsɛ, aloo nɔ nɛ e je kpa ngɛ e hɛ mi,* aloo nɔ nɛ e nane kake loo e nine kake ka pe kake, 19 aloo nɔ nɛ e nane loo e nine ku, 20 kpotsɛ* aloo nɔmlɔ kpiti kulaa,* nɔ ko nɛ e ngɛ hɛngmɛ hiɔ, aloo nɔ nɛ yili pue e he, aloo nɔ nɛ kó ngɛ e he, aloo nɔ nɛ e sungmɛ mi wu* ywia. 21 Aaron nina* ko nɛ kpa ngɛ e he nɛ ko hɛ lɛ kɛ su afɔle sami la tɛ ɔ he nɛ e ya sã Yehowa afɔle nɛ a kɛ la sãã a. Akɛnɛ kpa ngɛ e he he je ɔ, e ko hɛ lɛ kɛ su afɔle sami la tɛ ɔ he nɛ e ngɔ e Mawu ɔ abolo ɔ kɛ ha. 22 E ma nyɛ maa ye e Mawu ɔ abolo nɛ ngɛ klɔuklɔu pe kulaa a, kɛ abolo nɛ ngɛ klɔuklɔu ɔ eko. 23 Se akɛnɛ e je kpa he je ɔ, e ko hɛ lɛ kɛ su tsu mi pomi bo ɔ he, nɛ e ko hɛ lɛ kɛ su afɔle sami la tɛ ɔ he hulɔ, bɔ nɛ pee nɛ e ko wo ye jami he ɔ he mu, ejakaa imi ji Yehowa, nɔ nɛ ngɛ a he tsue ɔ nɛ.’”

24 Lɔ ɔ he ɔ, Mose de Aaron kɛ e binyumu ɔmɛ kɛ Israel bi ɔmɛ tsuo ní nɛ ɔmɛ.

22 Yehowa ya nɔ nɛ e kɛ Mose tu munyu nɛ e de lɛ ke: 2 “De Aaron kɛ e bimɛ ɔmɛ ke, a hyɛ nɛ hi ngɛ* Israel bi ɔmɛ a ní klɔuklɔu ɔmɛ a he, bɔ nɛ pee nɛ a ko pue ye biɛ klɔuklɔu ɔ hɛ mi si kɛ gu níhi nɛ a ngɛ a he tsue ha mi ɔ nɔ. Imi ji Yehowa. 3 Mo de mɛ ke, ‘Nyɛ yi nɔhi tsuo ɔ, ke nyɛ nina ko hɛ lɛ kɛ su ní klɔuklɔuhi nɛ Israel bi ɔmɛ tsu he ha Yehowa a he be mi nɛ jamɛ a nɔ ɔ he tsɔ we ɔ, á gbe jamɛ a nɔ ɔ* kɛ je ye hɛ mi. Imi ji Yehowa. 4 Ke kpiti pue Aaron nina ko, aloo e he nyu ngɛ bee ɔ, é ko ye ní klɔuklɔu ɔ eko kɛ yaa si be nɛ e he ma tsɔ. Ke nɔ ko ta gbogboe* he nɛ e kɛ ble e he, nɛ nɔ kpa hu ya ta jamɛatsɛ ɔ he ɔ, e ko ye ní klɔuklɔu ɔ eko, nɛ ke nyumu ko he nyu be ngɛ e he hu ɔ, é ko ye eko. 5 Ke nɔ ko ta lohwehi nɛ a he tsɔ we nɛ a nyɛɛɔ kutuu ɔ eko he, aloo e ta nɔ ko nɛ si fɔfɔɛ ko he je ɔ, e he tsɔ we he ɔ, eko ye ní klɔuklɔu ɔ eko. 6 Nɔ* nɛ maa ta ní nɛ ɔmɛ eko he ɔ, e he be tsɔe kɛ yaa si gbɔkuɛ, nɛ e ko ye níhi nɛ a he tsɔ ɔ eko, mohu ɔ, é ngɔ nyu kɛ du e he. 7 Ke pu nɔ si ɔ, e he ma tsɔ, nɛ lɔ ɔ se ɔ, e ma nyɛ maa ye níhi nɛ a he tsɔ ɔ eko, ejakaa e ji e niye ní. 8 Jehanɛ ɔ, e ko ye lohwe ko nɛ lɛ nitsɛ e gbo, aloo lohwe ko nɛ lohwe kpa ko tsɔtslɔɔ e mi nɛ́ e kɛ ba wo e he mu. Imi ji Yehowa.

9 “‘Á ye ye fami ɔ nɔ, bɔ nɛ pee nɛ lɔ ɔ nɛ ko ha nɛ a pee yayami nɛ a ba gbo akɛnɛ a ble ní klɔuklɔu ɔmɛ ɔ he je. Imi ji Yehowa, nɔ nɛ e ngɛ a he tsue ɔ nɛ.

10 “‘Nɔ fɛɛ nɔ nɛ e be he blɔ ɔ,* é ko ye nɔ́ ko nɛ ngɛ klɔuklɔu. Ma se no nɛ ngɛ osɔfo ko ngɔ, aloo apaatsɛ nɛ kó ye nɔ́ ko nɛ ngɛ klɔuklɔu. 11 Se ke osɔfo ko he nɔ* ko kɛ lɛ nitsɛ e sika a, jamɛ a nɔ ɔ ma nyɛ maa ye eko. Nyɔguɛhi nɛ a fɔ ngɛ osɔfo ɔ we ɔ mi ɔ hu ma nyɛ maa ye e niye ní ɔ eko. 12 Ke osɔfo ko biyo gba nɔ ko nɛ pi osɔfo ji lɛ ɔ,* é ko ye nike ní klɔuklɔuhi nɛ a kɛ ba a eko. 13 Se ke osɔfo ko biyo ba pee yalɔyo* aloo e huno kɛ lɛ po gba mi se e be bi, nɛ e kpale kɛ ba e tsɛ ɔ we ɔ mi nɛ e kɛ lɛ ba ngɛ kaa be nɛ e ji yiheyo ɔ, e ma nyɛ maa ye e tsɛ ɔ niye ní ɔ eko. Se nɔ ko nɛ be he blɔ* ɔ lɛɛ, é ko ye eko.

14 “‘Jehanɛ hu ɔ, ke nɔ ko li e he be nɛ e ye nɔ́ ko nɛ ngɛ klɔuklɔu ɔ, é ngɔ nɔ́ ɔ mi dlami enuɔ mi kake kɛ piɛɛ he kɛ ba ha osɔfo ɔ. 15 Lɔ ɔ he ɔ, á ko ble ní klɔuklɔuhi nɛ Israel bi ɔmɛ kɛ ba ke Yehowa a, 16 nɛ́ a ba ná tue gblami ngɛ fɔ nɛ a ye akɛnɛ a ye Israel bi ɔmɛ a ní klɔuklɔu ɔ he je; ejakaa imi ji Yehowa, nɔ nɛ ngɛ a he tsue ɔ nɛ.’”

17 Yehowa ya nɔ nɛ e kɛ Mose tu munyu nɛ e de lɛ ke: 18 “O kɛ Aaron kɛ e bimɛ ɔmɛ kɛ Israel bi ɔmɛ tsuo nɛ tu munyu nɛ o de mɛ ke, ‘Ke Israel nyumu ko aloo ma se no ko nɛ ngɛ Israel ma a mi maa sã sami afɔle ha Yehowa konɛ e kɛ ye e si womi komɛ a nɔ, aloo afɔle ɔ ji afɔle nɛ je tsui mi faa a, 19 é ngɔ na ku nɛ kpa ko be e he, kɛ agbosu wawi, aloo apletsihi kɛ ba sã afɔle ɔ konɛ Mawu nɛ ná e he bua jɔmi. 20 Nyɛ ko ngɔ lohwe ko nɛ kpa ngɛ e he kɛ ba sã afɔle, ejakaa ke nyɛ pee jã a, Mawu bua be nyɛ he jɔe.

21 “‘Ke nɔ ko maa sã tue mi jɔmi afɔle ha Yehowa konɛ e kɛ ye e si womi ko nɔ aloo afɔle ɔ ji afɔle nɛ je tsui mi faa a, é ngɔ lohwe nɛ kpa ko be e he ngɛ e na amɛ a kpɛti aloo ngɛ e to ɔmɛ a kpɛti kɛ ba, bɔ nɛ pee nɛ Mawu bua nɛ jɔ e he. É pee lohwe nɛ kpa ko kpa ko be e he. 22 Nyɛ ko ngɔ lohwe nɛ e hɛngmɛ yu, aloo nɔ́ nɛ e nane ku, aloo nɔ́ nɛ nɔ́ ko po lɛ, aloo nɔ́ nɛ jatɔ ngɛ e he, aloo nɔ́ nɛ e je sakpa, aloo nɔ́ nɛ he womi nɔ hiɔ kpa ko pue e he kɛ ba sã afɔle; nyɛ ko ngɔ ní nɛ ɔmɛ eko kɛ ba ha Yehowa, nɛ nyɛ ko ngɔ lohwe ko kaa kikɛ kɛ sã afɔle ngɛ afɔle sami la tɛ ɔ nɔ ha Yehowa. 23 Nyɛ ma nyɛ maa ngɔ na ku aloo jijɔ nɛ e nane kake ka pe e nane kpa amɛ aloo e nane kake ngɛ kpiti pe e nane kpa amɛ kɛ ba sã afɔle nɛ jeɔ tsui mi faa, se ke nyɛɛ kɛ sã si womi afɔle ɔ, Mawu bua be he jɔe. 24 Nyɛ ko ngɔ lohwe nɛ e sungmɛ mi wu* plaa, aloo nɔ́ nɛ e sungmɛ mi wu ywia, aloo lohwe nɛ a tsɔ e sungmɛ mi wu, aloo nɔ́ nɛ a po e sungmɛ mi wu kɛ ba ha Yehowa, nɛ nyɛ ko ngɔ lohwehi kaa kikɛ nɛ ɔ kɛ sã afɔle ngɛ nyɛ zugba a nɔ. 25 Nyɛ ko ngɔ lohwehi kaa kikɛ nɛ ɔ eko ngɛ ma se no ko dɛ kɛ ba ha nyɛ Mawu ɔ kaa niye ní, ejakaa tɔ̃tɔ̃mi ngɛ a he; a je kpa. Mawu bua be he jɔe.’”

26 Yehowa ya nɔ nɛ e kɛ Mose tu munyu nɛ e de lɛ ke: 27 “Ke a fɔ na ku aloo agbosu aloo apletsi ɔ, e maa ya nɔ nɛ e kɛ e nyɛ ɔ maa hi si ligbi kpaago, se ke a kɛ sã afɔle kɛ je ligbi kpaanyɔne ɔ nɔ kɛ yaa a, Mawu bua maa jɔ he; e ji afɔle nɛ a kɛ la sãã ha Yehowa. 28 Nyɛ ko gbe na kɛ e bi aloo jijɔ kɛ e bi tsuo ngɛ ligbi kake nɔ.

29 “Ke nyɛ ngɛ sina afɔle sãe ha Yehowa a, nyɛɛ sã afɔle ɔ bɔ nɛ Mawu bua maa jɔ nyɛ he. 30 Á ye afɔle ɔ jamɛ a ligbi ɔ nɔuu. Nyɛ ko si eko nɛ je nɛ na yi. Imi ji Yehowa.

31 “Nyɛɛ ye ye kita amɛ a nɔ, nɛ nyɛ kɛ tsu ní. Imi ji Yehowa. 32 Nyɛ ko gbe ye biɛ klɔuklɔu ɔ he guɛ, mohu ɔ, nyɛ tsɔ ye biɛ ɔ he ngɛ Israel bi ɔmɛ a kpɛti. Imi ji Yehowa, nɔ nɛ e ngɛ nyɛ he tsue ɔ nɛ. 33 Imi nɛ i je nyɛ kɛ je Egipt zugba a nɔ kɛ tsɔɔ kaa imi ji nyɛ Mawu ɔ nɛ. Imi ji Yehowa.”

23 Yehowa ya nɔ nɛ e kɛ Mose tu munyu nɛ e de lɛ ke: 2 “O kɛ Israel bi ɔmɛ nɛ tu munyu nɛ o de mɛ ke, ‘Gbijlɔhi nɛ Yehowa fã nyɛ ke nyɛɛ ye ɔ ji kpehi nɛ a ngɛ klɔuklɔu nɛ nyɛ tsuo nyɛ ma bua nyɛ he nya. Nyɛɛ fia gbijlɔ nɛ ɔmɛ a he adafi. Ye gbijlɔhi ji nɛ ɔmɛ nɛ:

3 “‘Nyɛ tsu ní ligbi ekpa, se ligbi kpaagone ɔ ji hejɔɔmi ligbi nɛ nyɛ maa jɔɔ nyɛ he kulaa, e ji kpe klɔuklɔu. Nyɛ ko tsu ní tsumi ko kulaa. E ji hejɔɔmi ligbi ha Yehowa ngɛ he fɛɛ he nɛ nyɛ maa hi.

4 “‘Yehowa gbijlɔhi nɛ a ji kpe klɔuklɔuhi nɛ e sa kaa nyɛɛ fia a he adafi ngɛ behi nɛ a to ɔmɛ a nya ji nɛ ɔmɛ nɛ: 5 Kekleekle nyɔhiɔ ɔ we ligbi 14 ɔ gbɔkuɛ* ji Yehowa Hetsɔmi ɔ nɛ.

6 “‘Nyɔhiɔ nɛ ɔ we ligbi 15 ɔ ji Abolo Nɛ Masa Be Mi Gbijlɔ nɛ a yeɔ ha Yehowa a nɛ. Nyɛɛ ye abolo nɛ masa be mi ligbi kpaago. 7 Ngɛ kekleekle ligbi ɔ nɔ ɔ, nyɛɛ pee kpe klɔuklɔu. Nyɛ ko tsu ní tsumi kpakpataa ko. 8 Se nyɛɛ sã afɔle nɛ a kɛ la sãã ha Yehowa ligbi kpaago. Nyɛɛ pee kpe klɔuklɔu ngɛ ligbi kpaagone ɔ nɔ. Nyɛ ko tsu ní tsumi kpakpataa ko.’”

9 Yehowa ya nɔ nɛ e kɛ Mose tu munyu nɛ e de lɛ ke: 10 “O kɛ Israel bi ɔmɛ nɛ tu munyu nɛ o de mɛ ke, ‘Ke nyagbenyagbe nɛ nyɛ ya su zugba nɛ i kɛ ngɛ nyɛ hae ɔ nɔ nɛ nyɛ kpa e nɔ ní ɔ, nyɛɛ ngɔ kekleekle yiblii nɛ nyɛ ma kpa a yi tlomi kake kɛ ba ha osɔfo ɔ. 11 Osɔfo ɔ nɛ fɔ yi tlomi ɔ kɛ ya kɛ ba ngɛ Yehowa hɛ mi konɛ Mawu bua nɛ jɔ nyɛ he. Hejɔɔmi Ligbi ɔ nɔ jena a, osɔfo ɔ nɛ fɔ kɛ ya kɛ ba. 12 Ligbi nɛ nyɛ ma ha nɛ a fɔ yiblii nɛ a fi lɛ yi tlomi ɔ, nyɛɛ ngɔ agbosu nɛ ye jeha kake nɛ kpa ko be e he kɛ sã sami afɔle ha Yehowa. 13 Á ngɔ mamu bukɔbukɔ lita eywiɛ kɛ fã* nɛ a kɛ nu futu mi kɛ sã e he ngma* afɔle ɔ. Á kɛ sã afɔle nɛ a kɛ la sãã ha Yehowa. E ji afɔle nɛ jeɔ via liliili.* Á ngɔ wai lita kake* kɛ sã e he dã afɔle ɔ. 14 Nyɛ ko ye abolo, aloo ngma nɛ a sĩ, aloo ngma ehe kɛ ya si jamɛ a ligbi ɔ nɛ nyɛ maa ngɔ nyɛ Mawu ɔ afɔle ɔ kɛ ba a. E ji mlaa nɛ fɔɔ si ha nyɛ nɛ nyɛ maa ye nɔ nyɛ yi nɔhi tsuo ngɛ he fɛɛ he nɛ nyɛ maa hi.

15 “‘Nyɛɛ kane hejɔɔmi ligbi kpaago kɛ je Hejɔɔmi Ligbi nɛ nyɛ ngɔ nyɛ yiblii nɛ a fi lɛ yi tlomi nya kɛ sã fɔmi afɔle ɔ we jena a nɔ. E sa nɛ e pee otsi kpaago pɛpɛɛpɛ. 16 Nyɛɛ kane ligbi 50 kɛ ya si Hejɔɔmi Ligbi kpaagone ɔ we jena, lɔ ɔ se ɔ, nyɛɛ ngɔ ngma ehe kɛ ba sã ngma afɔle ha Yehowa. 17 Nyɛɛ ngɔ abolo enyɔ kɛ je nyɛ hi he ɔmɛ kɛ ba kaa fɔmi afɔle. Á ngɔ mamu bukɔbukɔ lita eywiɛ kɛ fã* kɛ pee. Á ngɔ masa kɛ futu kɛ sã kaa kekleekle yiblii ha Yehowa. 18 Nyɛɛ ngɔ jijɔ ku wawi kpaago nɛ a ye jeha kakaaka, kɛ na ku wayoo kake, kɛ agbosu enyɔ kɛ piɛɛ abolo ɔmɛ a he kɛ ba. Á kɛ sã sami afɔle ha Yehowa. Á kɛ piɛɛ ngma afɔle ɔ kɛ dã afɔle ɔ he kɛ sã afɔle nɛ a kɛ la sãã nɛ jeɔ via liliili* ha Yehowa. 19 Nyɛɛ ngɔ apletsi wayoo kake nɛ e ye jeha kake kɛ sã yayami afɔle, nɛ nyɛɛ ngɔ jijɔ ku wawi enyɔ nɛ a ye jeha kakaaka kɛ sã tue mi jɔmi afɔle. 20 Osɔfo ɔ nɛ ngɔ mɛ kɛ piɛɛ abolo nɛ a kɛ kekleekle yiblii pee ɔ he, nɛ e fɔ kɛ ya kɛ ba ngɛ Yehowa hɛ mi kaa fɔmi afɔle kɛ piɛɛ jijɔ ku wawi enyɔ ɔmɛ a he. Á pee Yehowa níhi nɛ a ngɛ klɔuklɔu nɛ́ a kɛ ma ha osɔfo ɔ. 21 Nyɛɛ fia adafi ngɛ ligbi nɛ ɔ nɔ kaa nyɛ maa pee kpe klɔuklɔu. Nyɛ ko tsu ní tsumi kpakpataa ko. E ji mlaa nɛ fɔɔ si ha nyɛ ngɛ nyɛ hi he ɔmɛ nyɛ yi nɔhi tsuo.

22 “‘Ke nyɛ ngɛ nyɛ zugba a nɔ ní kpae ɔ, nyɛ ko kpa nɔ́ nɛ ngɛ ngmɔ ɔ tue ɔ tsuo kɛ pi si, nɛ ke nyɛ kpa ní ɔ, nɔ́ nɛ maa piɛ ɔ hu nyɛ ko kpale ya muɔɔ. Nyɛɛ je he kɛ ha ohiatsɛmɛ* kɛ nibwɔhi nɛ a ngɛ nyɛ kpɛti ɔ. Imi ji Yehowa nyɛ Mawu ɔ nɛ.’”

23 Yehowa ya nɔ nɛ e kɛ Mose tu munyu nɛ e de lɛ ke: 24 “De Israel bi ɔmɛ ke, ‘Nyɔhiɔ kpaagone ɔ we kekleekle ligbi ɔ, nyɛɛ jɔɔ nyɛ he kulaa, e ji kpe klɔuklɔu, e ji kaimi be nɛ a ma kpa titimati kɛ tsɔɔ kaa be ɔ su. 25 Nyɛ ko tsu ní tsumi kpakpataa ko. Nyɛɛ sã afɔle nɛ a kɛ la sãã ha Yehowa.’”

26 Yehowa ya nɔ nɛ e kɛ Mose tu munyu nɛ e de lɛ ke: 27 “Se nyɔhiɔ kpaagone ɔ we ligbi nyɔngma a ji Kpatami Ligbi. Nyɛɛ pee kpe klɔuklɔu, nɛ nyɛɛ wa nyɛ he yi mi,* nɛ nyɛɛ sã afɔle nɛ a kɛ la sãã ha Yehowa. 28 Nyɛ ko tsu ní tsumi ko kulaa ngɛ ligbi nɛ ɔ nɔ, ejakaa e ji kpatami ligbi nɛ a ma kpata ha nyɛ ngɛ Yehowa nyɛ Mawu ɔ hɛ mi. 29 Á gbe* nɔ fɛɛ nɔ* nɛ e be e he yi mi wae* ngɛ ligbi nɛ ɔ nɔ ɔ. 30 Nɛ ma kpata nɔ fɛɛ nɔ* nɛ e ma tsu ní tsumi ko ngɛ ligbi nɛ ɔ nɔ ɔ hɛ mi kɛ je e ma mi bi ɔmɛ a kpɛti. 31 Nyɛ ko tsu ní tsumi ko kulaa. E ji mlaa nɛ fɔɔ si ha nyɛ nyɛ yi nɔhi tsuo ngɛ he fɛɛ he nɛ nyɛ maa hi. 32 E ji hejɔɔmi ligbi nɛ nyɛɛ kɛ maa jɔɔ nyɛ he kulaa. Nyɛɛ wa nyɛ he* yi mi nyɔhiɔ ɔ we ligbi nɛ ji nɛɛ ɔ gbɔkuɛ. Nyɛɛ ye nyɛ hejɔɔmi ligbi ɔ kɛ je gbɔkuɛ kɛ ya si gbɔkuɛ kpa.”

33 Yehowa ya nɔ nɛ e kɛ Mose tu munyu nɛ e de lɛ ke: 34 “De Israel bi ɔmɛ ke, ‘Nyɔhiɔ kpaagone ɔ we ligbi 15 ɔ ji Gbahi A Sisi Himi Gbijlɔ* nɛ a kɛ ligbi kpaago maa ye ha Yehowa. 35 Nyɛɛ pee kpe klɔuklɔu ngɛ kekle ligbi ɔ nɔ, nɛ nyɛ ko tsu ní tsumi kpakpataa ko. 36 Nyɛɛ sã afɔle nɛ a kɛ la sãã kɛ ha Yehowa ligbi kpaago. Ngɛ ligbi kpaanyɔne ɔ nɔ ɔ, nyɛɛ pee kpe klɔuklɔu, nɛ́ nyɛɛ sã afɔle nɛ a kɛ la sãã ha Yehowa. E ji kpe klɛdɛɛ. Nyɛ ko tsu ní tsumi kpakpataa ko.

37 “‘Gbijlɔ nɛ ɔmɛ ji Yehowa gbijlɔhi nɛ nyɛɛ fia adafi kaa a ji kpe klɔuklɔuhi nɛ́ a kɛ maa sã afɔle nɛ́ a kɛ la sãã ha Yehowa: sami afɔle, ngma afɔle, kɛ dã afɔle kaa bɔ nɛ a to kaa á sã daa ligbi ɔ. 38 Nyɛɛ ngɔ ní nɛ ɔmɛ kɛ piɛɛ níhi nɛ nyɛɛ kɛ ba haa Yehowa ngɛ hejɔɔmi ligbi ɔmɛ a nɔ ɔ he. Nyɛɛ ngɔ kɛ piɛɛ nyɛ nike ní ɔmɛ, kɛ afɔlehi nɛ nyɛ wo he si nɛ nyɛ sãã a, kɛ afɔlehi nɛ nyɛ jeɔ nyɛ tsui mi faa kɛ sãã nɛ́ e sa kaa nyɛ kɛ ha Yehowa a he. 39 Se nyɔhiɔ kpaagone ɔ we ligbi 15 ɔ, ke nyɛ kpa nyɛ niba ní ngɛ zugba a nɔ ɔ, nyɛɛ ye Yehowa gbijlɔ ɔ ligbi kpaago. Kekleekle ligbi ɔ, nyɛɛ jɔɔ nyɛ he kulaa, nɛ ligbi kpaanyɔne ɔ hu nyɛɛ jɔɔ nyɛ he kulaa. 40 Kekleekle ligbi ɔ, nyɛɛ ngɔ tsohi nɛ a ngɛ fɛu a yiblii, kɛ tã kɔnihi,* kɛ tsohi nɛ a ngɛ kusuu a kɔnihi, kɛ tsohi* nɛ a ngɛ dɔgba amɛ* a mi, nɛ́ nyɛ nya ngɛ Yehowa nyɛ Mawu ɔ hɛ mi ligbi kpaago. 41 Daa jeha a, nyɛɛ ye gbijlɔ nɛ ɔ kɛ ha Yehowa ligbi kpaago. E ji mlaa nɛ fɔɔ si ha nyɛ nyɛ yi nɔhi tsuo. Nyɛɛ ye ngɛ nyɔhiɔ kpaagone ɔ mi. 42 Nyɛɛ hi gbahi a sisi ligbi kpaago. Israel fɔfɔɛhi tsuo nɛ a hi gbahi a sisi, 43 bɔ nɛ pee nɛ yi nɔhi nɛ a maa ba hwɔɔ se ɔ tsuo nɛ a le kaa be nɛ i je Israel bi ɔmɛ kɛ je Egipt zugba a nɔ ɔ, i ha nɛ a hi gbahi a sisi. Imi ji Yehowa nyɛ Mawu ɔ nɛ.’”

44 Lɔ ɔ he ɔ, Mose tu Yehowa gbijlɔ ɔmɛ a he munyu kɛ tsɔɔ Israel bi ɔmɛ.

24 Yehowa ya nɔ nɛ e kɛ Mose tu munyu nɛ e de lɛ ke: 2 “Mo fã Israel bi ɔmɛ nɛ a ba ha mo oliv nu nɛ́ a kɛ oliv nɛ a gbee lɛ pee nɛ e mi tsɔ ngleinglei nɛ a kɛ maa wo kane ɔmɛ a mi nɛ a su, bɔ nɛ pee nɛ kane ɔmɛ nɛ a ya nɔ nɛ a hi tsoe be fɛɛ be. 3 Aaron nɛ e to blɔ nya konɛ kane ɔmɛ nɛ a ngɛ tsu mi pomi bo ɔ nɛ ngɛ Odase daka nɛ ngɛ kpe he bo tsu ɔ hɛ mi ɔ nɛ a hi tsoe ngɛ Yehowa hɛ mi be fɛɛ be kɛ je gbɔkuɛ kɛ ya si mɔtu. E ji mlaa nɛ fɔɔ si ha nyɛ nyɛ yi nɔhi tsuo. 4 É to kane ɔmɛ pɛpɛɛpɛ ngɛ kane tso nɛ a kɛ sika tsu ngmingmiingmi pee ɔ nɔ ngɛ Yehowa hɛ mi be fɛɛ be.

5 “Ngɔɔ mamu bukɔbukɔ nɛ́ o kɛ sã abolo 12 nɛ a bɔ mɛ lokotolokoto.* Ngɔɔ mamu bukɔbukɔ ɔ lita eywiɛ kɛ fã* kɛ pee abolo ɔ eko fɛɛ eko. 6 Moo to abolo ɔ ngɛ a bi a nɔ ngɛ kuu enyɔ mi. Nyɛɛ to kakaaka ekpa ngɛ kuu kake mi ngɛ okplɔɔ nɛ a kɛ sika tsu ngmingmiingmi pee ɔ nɔ ngɛ Yehowa hɛ mi. 7 Ngɔɔ ohɛ ngmingmiingmi kɛ fɔ abolo nɛ a to ngɛ a bi a nɔ ngɛ kuu enyɔ mi ɔ eko fɛɛ eko nɔ. E maa pee abolo nɛ a kɛ ma ha kaa kaimi afɔle* nɛ daa si kɛ ha afɔle ɔ tsuo, ngɛ afɔle nɛ a kɛ la sãa ha Yehowa a mi. 8 Ngɛ Hejɔɔmi Ligbi fɛɛ Hejɔɔmi Ligbi nɔ ɔ, é to abolo ɔ ngɛ Yehowa hɛ mi. E ji somi nɛ maa hi i kɛ Israel bi ɔmɛ wa kpɛti kɛ ya neneene. 9 E maa pee Aaron kɛ e binyumu ɔmɛ a nɔ́, nɛ a maa ye ngɛ he ko nɛ ngɛ klɔuklɔu, ejakaa e ji nɔ́ ko nɛ ngɛ klɔuklɔu pe kulaa nɛ a je kɛ je afɔlehi nɛ a kɛ la sãã ha Yehowa a mi kɛ ha lɛ, e ji mlaa nɛ maa hi si kɛ ya neneene.”

10 Nyumu ko ngɛ Israel bi ɔmɛ a kpɛti nɛ́ e nyɛ ji Israel no se e tsɛ ɔ lɛɛ Egipt no ji lɛ. Ligbi ko ɔ, kunɔ sɛ Israel yo ɔ binyumu ɔ kɛ Israel nyumu ko a kpɛti ngɛ sito he ɔ. 11 Israel yo ɔ binyumu ɔ bɔni Biɛ ɔ* he guɛ gbemi, nɛ e bɔni biɛ ɔ gbiɛmi. Enɛ ɔ he ɔ, a ngɔ lɛ kɛ ba ha Mose. Mamoo e nyɛ ji Shelomit, nɛ ji Dibri nɛ je Dan wɛtso ɔ mi ɔ biyo ɔ. 12 A tsi e nya ngɛ he ko kɛ ya si be nɛ Yehowa yi mi kpɔ mwɔmi ngɛ sane ɔ he ɔ pee heii.

13 Kɛkɛ nɛ Yehowa de Mose ke: 14 “Nyɛɛ ngɔ nɔ nɛ e gbiɛ ye biɛ ɔ kɛ ba sito he ɔ se, nɛ́ nihi tsuo nɛ a nu nɔ́ nɛ e de ɔ nɛ a ngɔ a nine kɛ pue e yi mi, nɛ́ Israel ma a tsuo nɛ a fiaa lɛ tɛ. 15 De Israel bi ɔmɛ ke, ‘Ke nɔ ko gbiɛ e Mawu ɔ, lɛ nitsɛ e yayami maa tloo lɛ. 16 Lɔ ɔ he ɔ, nɔ nɛ e maa gbe Yehowa biɛ ɔ he guɛ ɔ, bɔ fɛɛ bɔ nɛ ji ɔ, á gbe lɛ. Bɔ fɛɛ bɔ nɛ ji ɔ, Israel ma a tsuo nɛ a fiaa lɛ tɛ. Ke nɔ ko gbe Biɛ ɔ he guɛ ɔ, ma se no nɛ e ba ngɛ Israel bi ɔmɛ a kpɛti jio, Israel no jio, á gbe lɛ.

17 “‘Ke nɔ ko gbe nɔmlɔ* ɔ, bɔ fɛɛ bɔ nɛ ji ɔ, á gbe lɛ. 18 Nɔ fɛɛ nɔ ko nɛ e maa fia we mi lohwe ko nɔ́ nɛ e ma gbo ɔ,* é to nane mi. Á ngɔ wami kɛ to wami* nane mi. 19 Ke nɔ ko plaa e nyɛmi nɔmlɔ ɔ, á pee lɛ kaa bɔ nɛ e pee e nyɛmi ɔ. 20 Á ku wu kɛ to wu nɛ a ku nane mi, nɛ a kɛ hɛngmɛ nɛ to hɛngmɛ nane mi, nɛ a kɛ lungu nɛ to lungu nane mi. Plaami nɛ e plaa e nyɛmi ɔ, á plaa lɛ jamɛ a plaami ɔ nɔuu. 21 Ke nɔ ko fia lohwe nɔ́ nɛ e gbe lɛ ɔ, é to nane mi, se ke nɔ ko fia nɔmlɔ nɔ́ nɛ e gbe lɛ ɔ, lɛ hu á gbe lɛ.

22 “‘Ke nɔ ko tɔ̃ ɔ, ma se no nɛ e ba ngɛ nyɛ kpɛti jio, Israel no jio, mlaa kake ɔ nɔuu lɛ á kɛ tsu ní, ejakaa imi ji Yehowa nyɛ Mawu ɔ nɛ.’”

23 Jehanɛ ɔ, Mose kɛ Israel bi ɔmɛ tu munyu nɛ a ngɔ nɔ nɛ gbiɛ Mawu biɛ ɔ kɛ ba sito he ɔ se, nɛ a fiaa lɛ tɛ. Lɔ ɔ he ɔ, Israel bi ɔmɛ pee kaa bɔ nɛ Yehowa fã Mose ɔ.

25 Yehowa ya nɔ nɛ e kɛ Mose tu munyu ngɛ Sinai Yoku ɔ nɔ nɛ e de lɛ ke: 2 “O kɛ Israel bi ɔmɛ nɛ tu munyu nɛ o de mɛ ke, ‘Ke nyagbenyagbe nɛ nyɛ ya su zugba nɛ i kɛ ngɛ nyɛ hae ɔ nɔ ɔ, nyɛ ha nɛ zugba a nɛ jɔɔ e he ha Yehowa. 3 Nyɛɛ ngɔ jeha ekpa kɛ du ní ngɛ nyɛ zugba a nɔ, nɛ nyɛ kɛ sua nyɛ wai tso ɔmɛ a he, nɛ nyɛ kɛ bua ngmɔ ní ɔmɛ a nya. 4 Se jeha kpaagone ɔ, nyɛ ha nɛ zugba a nɛ jɔɔ e he kulaa; e ji he jɔɔmi be ha Yehowa. Nyɛ ko du ní ngɛ nyɛ ngmɔ ɔmɛ a nɔ, nɛ nyɛ ko sua nyɛ wai tso ɔmɛ a he hulɔ. 5 Ke nyɛ kpa nyɛ ngmɔ ní ɔmɛ ta a, ngma nɛ ma pue si ngɛ ní kpami ɔ se nɛ maa puɛ ngɛ lɛ nitsɛ e dɛ he ɔ, nyɛ ko ya kpa, nɛ wai yiblii nɛ maa wo ngɛ wai tso nɛ a sua we he nɔ ɔ, nyɛ ko ya kpa. Jamɛ a jeha a, nyɛ ha nɛ zugba a nɛ jɔɔ e he kulaa. 6 Se nɔ́ nɛ maa puɛ ngɛ zugba a nɔ ngɛ he jɔɔmi be ɔ mi ɔ, nyɛ ma nyɛ maa ye. Nyɛɛ kɛ nyɛ nyɔguɛ nyumuhi, nyɛ nyɔguɛ yihi, nyɛ we apaatsɛmɛ ɔmɛ, kɛ nibwɔhi nɛ a kɛ nyɛ ngɛ ɔ tsuo ma nyɛ maa ye. 7 We mi lohwehi kɛ nga mi lohwehi nɛ a ngɛ nyɛ zugba a nɔ ɔ tsuo hu ma nyɛ maa ye. Nyɛ ma nyɛ maa ye nɔ́ fɛɛ nɔ́ nɛ maa puɛ ngɛ zugba a nɔ ɔ.

8 “‘Nyɛɛ kane hejɔɔmi jeha kpaago, nɛ ji jeha kpaago kɛ bɔ he kpaago, kɛkɛ ɔ, lɛ tsuo maa pee jeha 49. 9 Lɔ ɔ se ɔ, nyɛ kpa bɛ ɔ wawɛɛ ngɛ nyɔhiɔ kpaagone ɔ we ligbi nyɔngma a nɔ ngɛ Kpatami Ligbi ɔ nɔ. Nyɛ kpa bɛ ɔ nɛ a nu ngɛ nyɛ zugba a nɔ tsuo. 10 Nyɛɛ pee jeha 50 ɔ klɔuklɔu, nɛ nyɛɛ fia he yemi ngɛ zugba a nɔ ɔ he adafi kɛ tsɔɔ nihi tsuo nɛ a ngɛ zugba a nɔ ɔ. E maa pee Heyemi Jeha ha nyɛ, nɛ nyɛ ti nɔ fɛɛ nɔ maa kpale ya ngɔ e weto ní, nɛ nɔ fɛɛ nɔ maa kpale kɛ ho e weku li a ngɔ ya. 11 Jeha 50 ɔ maa pee Heyemi Jeha ha nyɛ. Nyɛ ko du ní, nɛ ngma nɛ pue si nɛ e puɛ ngɛ lɛ nitsɛ e dɛ he ɔ hu nyɛ ko ya kpa, nɛ nyɛ ko bua wai yiblii nɛ wo ngɛ wai tsohi nɛ nyɛ sua we a he nɔ ɔ nya. 12 Ejakaa e ji Heyemi Jeha. E sa nɛ e pee klɔuklɔu ha nyɛ. Nyɛ ma nyɛ maa ye niba níhi nɛ a puɛ ngɛ mɛ nitsɛmɛ a dɛ he ngɛ zugba a nɔ ɔ pɛ.

13 “‘Nyɛ ti nɔ fɛɛ nɔ nɛ kpale ya ngɔ e weto ní ngɛ Heyemi Jeha a mi. 14 Ke o jua nɔ́ ko ha o nyɛmi aloo o he nɔ́ ko ngɛ e dɛ ɔ, mo ko sisi lɛ. 15 Ke o ma he nɔ́ ko ngɛ o nyɛmi dɛ ɔ, moo hyɛ jeha abɔ nɛ pue mi ngɛ Heyemi Jeha a se nɛ o kɛ he, nɛ́ lɛ hu e hyɛ jeha abɔ nɛ piɛ nɛ a kɛ ma kpa ngmɔ ní nɛ e kɛ jua. 16 Ke jeha nɛ piɛ ɔ hiɛ ɔ, e ma nyɛ ma ha nɛ nɔ́ ɔ he jua a nɛ ya hiɔwe, se ke jeha nɛ piɛ ɔ pi ɔ, lɛɛ e ha nɛ nɔ́ ɔ he jua nɛ ba si, ejakaa niba ní nɛ a ma ná ngɛ zugba a nɔ ɔ hiɛmi nɔ nɛ e maa da kɛ jua. 17 Nyɛ ti nɔ ko nɛ ko sisi e nyɛmi. Nyɛɛ ye nyɛ Mawu ɔ gbeye, ejakaa imi ji Yehowa, nyɛ Mawu ɔ nɛ. 18 Ke nyɛ ye ye mlaa amɛ a nɔ, nɛ nyɛɛ kɛ ye fami ɔmɛ hu tsu ní ɔ, nyɛ maa hi si slɔkee ngɛ zugba a nɔ. 19 Zugba a maa ba ní, nɛ nyɛ maa ye, nɛ nyɛ maa tɔ, nɛ nyɛ maa hi si slɔkee.

20 “‘Se eko ɔ, nyɛ ma bi ke: “Ke wa du we ní nɛ wa kpa we ní ɔ, mɛni wa maa ye ngɛ jeha kpaagone ɔ mi?” 21 Ma jɔɔ nyɛ nɛ zugba a maa ba ní ngɛ jeha ekpane ɔ mi, nɛ e maa su nyɛ yemi jeha etɛ. 22 Kɛkɛ ɔ, jeha kpaanyɔne ɔ mi ɔ, nyɛ ma du ní, se nyɛ maa hi niba ní nɛ ngɛ momo ɔ yee kɛ yaa si jeha nɛɛne ɔ. Nyɛ maa hi niba ní momo ɔ yee kɛ yaa si be nɛ nyɛ ngmɔ ɔmɛ maa ba ní.

23 “‘Nyɛ ko jua zugba a nɛ e ba plɛ pee nɔ kpa nɔ́ kulaa, ejakaa ye nɔ́ ji zugba a nɛ. Ngɛ ye hɛ mi ɔ, nibwɔhi kɛ ma se bi ji nyɛ. 24 Ngɛ nyɛ zugba a nɔ tsuo ɔ, nyɛɛ ngmɛ blɔ nɛ zugbatsɛmɛ nɛ a kpale kpɔ̃ a zugbahi.

25 “‘Ke o nyɛmi ko ba pee ohiatsɛ nɛ e jua e weto ní ko ɔ, e weku no tutuutu nɛ e ngɛ he blɔ kaa e kpɔ̃ɔ lɛ ɔ nɛ ba he nɔ́ nɛ e nyɛmi ɔ jua a. 26 Ke nɔ nɛ jua nɔ́ ɔ be nɔ ko nɛ ma kpɔ̃ nɔ́ nɛ e jua a, se lɛ nitsɛ e ba pee niatsɛ nɛ e ma nyɛ ma kpɔ̃ nɔ́ nɛ e jua a, 27 é hyɛ jeha abɔ nɛ pue mi kɛ je be nɛ e jua nɔ́ ɔ, nɛ́ e bu nya, nɛ́ e je jeha nɛ be ɔ sika a ngɛ mi nɛ e ngɔ sika nɛ maa piɛ ɔ kɛ ha nɔ nɛ e jua nɔ́ ɔ kɛ ha a. Kɛkɛ ɔ, e ma nyɛ maa kpale kɛ ho e weto ní ɔ nɔ ya.

28 “‘Se ke nɔ́ ko be e dɛ nɛ e ma nyɛ nɛ e kɛ ma kpɔ̃ nɔ́ nɛ e jua a, nɔ́ ɔ maa hi nɔ nɛ e jua nɔ́ ɔ kɛ ha a dɛ kɛ yaa si be nɛ Heyemi Jeha a maa su, kɛkɛ nɔ nɛ e jua nɔ́ ɔ kɛ ha a maa kpale nɔ́ ɔ kɛ ha lɛ ngɛ Heyemi Jeha a mi, nɛ e maa kpale kɛ ho e weto ní ɔ nɔ ya.

29 “‘Jehanɛ ɔ, ke nɔ ko jua we nɛ ngɛ ma nɛ a fia gbogbo kɛ wo he mi ɔ, e ngɛ he blɔ kaa e ma nyɛ ma kpɔ̃ e we ɔ kɛ je be nɛ e jua we ɔ kɛ yaa si e we jeha. He blɔ nɛ e ngɛ kaa e ma nyɛ ma kpɔ̃ nɔ́ ɔ maa hi si jeha mluku. 30 Se ke a kpɔ̃ we we ɔ ngɛ jeha kake mi ɔ, we nɛ e ngɛ ma nɛ a fia gbogbo kɛ wo he mi ɔ maa pee nɔ nɛ he ɔ weto ní kulaa e yi nɔhi tsuo. Ke Heyemi Jeha a su ɔ, á ko ngmɛɛ he. 31 Se wehi nɛ a ngɛ hehi nɛ a fiɛ gbogbo kɛ wui a he ɔ lɛɛ, a bu mɛ kaa a piɛɛ zugbahi nɛ a ngɛ ma a se ɔ a he. A ngɛ he blɔ nɛ a kɛ ma kpɔ̃ we ɔ be fɛɛ be, nɛ ke Heyemi Jeha a su ɔ, á kpale kɛ ha nɔtsɛ ɔ.

32 “‘Levi bi ɔmɛ a wehi nɛ ngɛ a ma amɛ a mi ɔ lɛɛ, Levi bi ɔmɛ ngɛ he blɔ kaa a ma kpɔ̃ mɛ be fɛɛ be. 33 Ke Levi no ko kpɔ̃ we e weto ní ɔ, á kpale Levi no ɔ we nɛ e jua ngɛ ma a mi ɔ kɛ ha lɛ ngɛ Heyemi Jeha a mi, ejakaa Levi bi ɔmɛ a wehi nɛ ngɛ ma amɛ a mi ɔ ji a weto ní ngɛ Israel bi ɔmɛ a kpɛti. 34 Se zugbahi nɛ lohwehi yeɔ ní ngɛ nɔ nɛ bɔle Levi bi ɔmɛ a ma amɛ lɛɛ, á ko jua, ejakaa e ji a weto ní kɛ yaa neneene.

35 “‘Ke o nyɛmi ko nɛ ngɛ o kasa nya ba pee ohiatsɛ nɛ e nyɛ we e he hyɛmi ɔ, moo ye bua lɛ kaa bɔ nɛ o maa ye bua nubwɔ kɛ ma se no ɔ, bɔ nɛ pee nɛ e kɛ mo tsuo nɛ hi wami mi. 36 Ko he hekpa, nɛ koo gu e nɔ kɛ ná o he hulɔ. Moo ye o Mawu ɔ gbeye, nɛ́ o nyɛmi ɔ kɛ mo tsuo nɛ hi wami mi. 37 Ke o pa lɛ sika a, koo ngɔ kɛ hekpa, nɛ ke o ha lɛ niye ní ɔ, koo gu lɔ ɔ nɔ kɛ ná o he. 38 Imi ji Yehowa, nyɛ Mawu nɛ je nyɛ kɛ je Egipt zugba a nɔ konɛ ma ngɔ Kanaan zugba a kɛ ha nyɛ nɛ ma kɛ tsɔɔ nyɛ kaa imi ji nyɛ Mawu ɔ nɛ.

39 “‘Ke o nyɛmi ko nɛ ngɛ o kasa nya ba pee ohiatsɛ nɛ e jua e he kɛ ha mo ɔ, koo nyɛ e nɔ nɛ e tsu nyɔguɛhi a ní tsumi. 40 O kɛ lɛ nɛ hi si kaa apaatsɛ aloo ma se no. É sɔmɔ mo kɛ ya si Heyemi Jeha a. 41 Lɔ ɔ se ɔ, mo ha nɛ e kɛ e bimɛ* nɛ a ho; e kpale kɛ ho e weku li a ngɔ ya. É kpale kɛ ho e nɛmɛ ɔmɛ a zugba nɔ ya. 42 Ejakaa a ji ye nyɔguɛhi nɛ́ i je mɛ kɛ je Egipt zugba a nɔ. Á ko jua a he kaa bɔ nɛ a juaa nyɔguɛ ɔ. 43 Koo wa lɛ yi mi. Moo ye o Mawu ɔ gbeye. 44 Nihi nɛ a je ma se ɔ ji ni nɛmɛ nɛ a maa pee o nyɔguɛ nyumuhi kɛ o nyɔguɛ yihi, mɛ ji nihi nɛ o ma he kaa o nyɔguɛ nyumuhi kɛ o nyɔguɛ yihi. 45 Jehanɛ hu ɔ, nyɛ ma nyɛ ma he nibwɔhi nɛ a kɛ nyɛ ngɛ ɔ a bimɛ, kɛ a weku li nɛ a fɔ mɛ ngɛ nyɛ zugba a nɔ ɔ kaa nyɛ nyɔguɛhi konɛ a ba pee nyɛ níhi. 46 Nyɛ ma nyɛ ma si mɛ ha nyɛ bimɛ kaa gbosi ní konɛ a pee nyɛ bimɛ ɔmɛ a sɔmɔli kulaa. Nyɛ ma nyɛ ma ha nɛ a tsu ní ha nyɛ, se nyɛ ko wa nyɛ nyɛmimɛ Israel bi ɔmɛ yi mi.

47 “‘Se ke nubwɔ ko aloo ma se no ko nɛ kɛ nyɛ ngɛ ba ná ní, se nyɛ nyɛmi ko nɛ e ngɛ e kasa nya ba pee ohiatsɛ nɛ e jua e he kɛ ha nubwɔ aloo ma se no nɛ e kɛ nyɛ ngɛ, aloo nubwɔ ɔ weku no ko ɔ, 48 e ngɛ he blɔ kaa e kpɔ̃ɔ e he ngɛ e he juami ɔ se. E nyɛmimɛ ɔmɛ a ti nɔ ko ma nyɛ maa kpale kpɔ̃ lɛ. 49 E tsɛ nyɛminyumu, aloo e tsɛ nyɛminyumu bi, aloo nɔ kpa ko nɛ e ji e weku no tutuutu hu ma nyɛ ma kpɔ̃ lɛ ekohu.

“Aloo ke lɛ nitsɛ e ba ná ní ɔ, e ma nyɛ ma kpɔ̃ e he ekohu. 50 E kɛ nɔ nɛ e jua e he ha lɛ ɔ nɛ bu akɔtaa. Á hyɛ jeha nɛ pue mi kɛ je be nɛ e jua e he ɔ, kɛ jeha nɛ piɛ nɛ Heyemi Jeha a maa su. Jeha nɛ piɛ nɛ Heyemi Jeha a maa su ɔ nɛ maa tsɔɔ sika nɛ e maa wo kɛ kpɔ̃ e he. É hyɛ bɔ nɛ a woɔ apaatsɛmɛ hiɔ ha ngɛ jamɛ a be ɔ mi ɔ nɔ nɛ e kɛ lɛ nɛ pee akɔtaa a. 51 Ke jeha nɛ piɛ ɔ hiɛ ɔ, kpɔmi sika nɛ e maa wo ɔ daa si ngɛ jeha abɔ nɛ piɛ ɔ nɔ. 52 Se ke jeha nɛ piɛ nɛ Heyemi Jeha a maa su ɔ pi ɔ, lɛ nitsɛ é bu akɔtaa nɛ e da jeha nɛ piɛ ɔ nɔ kɛ wo kpɔmi sika a. 53 É ya nɔ nɛ e sɔmɔ lɛ kaa apaatsɛ daa jeha. Nyɛɛ hyɛ nɛ e ko wa lɛ yi mi. 54 Se ke e nyɛ we nɛ e da blɔ nya tomi nɛ ɔ nɔ kɛ kpɔ̃ e he ekohu ɔ, lɛɛ ke e su Heyemi Jeha a, e kɛ e bimɛ* nɛ a ya faa.

55 “‘Ejakaa imi nitsɛ ye nyɔguɛhi ji Israel bi ɔmɛ ɔ nɛ. A ji ye nyɔguɛhi nɛ i je mɛ kɛ je Egipt zugba a nɔ. Imi ji Yehowa nyɛ Mawu ɔ nɛ.

26 “‘Nyɛ ko pee mawuhi nɛ se nami ko be a he, nɛ nyɛ ko pee amaga nɛ a hlɔ loo wɔ titima kɛ ha nyɛ he, nɛ nyɛ ko ngɔ tɛ nɛ a kpɛ́ níhi ngɛ nɔ kɛ ba nyɛ zugba a nɔ nɛ́ nyɛ ba kplã si ha lɛ; ejakaa imi ji Yehowa nyɛ Mawu ɔ nɛ. 2 Nyɛɛ ye ye hejɔɔmi ligbi ɔmɛ, nɛ́ nyɛɛ ngɔ bu kɛ ha ye jami he ɔ.* Imi ji Yehowa.

3 “‘Ke nyɛ ya nɔ nɛ nyɛ nyɛɛ ngɛ ye blɔ tsɔɔmi ɔmɛ a nya, nɛ nyɛ ye ye kita amɛ a nɔ nɛ nyɛɛ kɛ tsu ní ɔ, 4 ma ha nɛ hiɔmi maa nɛ ha nyɛ ngɛ be nya, nɛ zugba a maa ba ní, nɛ tsohi nɛ a ngɛ zugba a nɔ ɔ maa wo yiblii. 5 Nyɛ maa hi ngma* mi sae kɛ ya si be nɛ nyɛ ma kpa wai yiblii, nɛ nyɛ maa hi wai yiblii kpae kɛ ya si ní dumi be, nɛ nyɛ maa ye ní nɛ nyɛ maa tɔ, nɛ nyɛ maa hi si slɔkee ngɛ nyɛ zugba a nɔ. 6 Ma ha nɛ tue mi jɔmi maa hi zugba a nɔ, nɛ nyɛ maa hwɔ si nɛ́ nɔ ko be nyɛ he gbeye woe, nɛ ma fiee lohwe awi yeli ngɛ zugba a nɔ, nɛ ta hwumi klaate be bee ngɛ nyɛ zugba a nɔ. 7 Nyɛ maa fiee nyɛ he nyɛli ɔmɛ, nɛ a maa nɔɔ si ngɛ nyɛ hɛ mi ngɛ klaate nya. 8 Nyɛ ti ni enuɔ maa fiee nimli 100, nɛ nihi 100 maa fiee nimli 10,000, nɛ nyɛ he nyɛli ɔmɛ maa nɔɔ si ngɛ nyɛ hɛ mi ngɛ klaate nya.

9 “‘Ma jɔɔ nyɛ,* nɛ ma ha nɛ nyɛ ma fɔ nɛ nyɛ he maa hiɛ babauu, nɛ somi nɛ i kɛ nyɛ so ɔ, ma ye nɔ. 10 Be mi nɛ nyɛ ngɛ jeha nɛ be ɔ niba ní yee nɛ e tɛ lolo ɔ, e ma bi nɛ nyɛ je lɔ ɔ ngɛ e to he, bɔ nɛ pee nɛ nyɛɛ na blɔ ha niba ní ehe ɔ. 11 Ma ma ye bo tsu ɔ ngɛ nyɛ kpɛti, nɛ i* be nyɛ kuae. 12 Ma hi nyɛ kpɛti nɛ ma pee nyɛ Mawu, nɛ nyɛ hu nyɛ maa pee ye we bi. 13 Imi ji Yehowa nyɛ Mawu ɔ, nɔ nɛ je nyɛ kɛ je Egipt zugba a nɔ bɔ nɛ pee nɛ nyɛ ko pee a nyɔguɛhi hu ɔ nɛ. I ku nyɛ kuɛpã tso ɔ nɛ i ha nɛ nyɛ wo nyɛ yi nɔ kɛ nyɛɛ.

14 “‘Se ke nyɛ bui mi tue aloo nyɛ yi kita nɛ ɔmɛ tsuo a nɔ, 15 nɛ nyɛ kua ye blɔ tsɔɔmi ɔmɛ, nɛ ye fami ɔmɛ a he peeɔ nyɛ* tai, nɛ lɔ ɔ ha nɛ nyɛ yi ye kita amɛ tsuo kɛ ye somi ɔ nɔ ɔ, 16 imi hu ma pee nyɛ níhi nɛ nyɛɛ se nɛ ɔmɛ: ma ngɔ haomi kɛ hwlɔmi yaya kɛ asla nɛ nya wa kɛ gbla nyɛ tue, nɛ nyɛ hɛngmɛ ma puɛ, nɛ nyɛ ma gbɔjɔ. Nyɛ ma gbo dengme kɛ du ní se nyɛ be nɔ́ ko náe, ejakaa nyɛ he nyɛli ɔmɛ ma ba ye. 17 Ma je ye hɛ kɛ pi nyɛ, nɛ nyɛ he nyɛli maa ye nyɛ nɔ kunimi, nɛ ni nɛmɛ nɛ sume nyɛ sane ɔ maa naa nyɛ nɔ, nɛ nyɛ maa tu fo be mi nɛ nɔ ko fiee we nyɛ.

18 “‘Ke nyɛ bui mi tue ngɛ ní nɛ ɔmɛ tsuo a se ɔ, ma gbla nyɛ tue si kpaago ngɛ nyɛ yayami ɔmɛ a he. 19 Ma ku nyɛ he nɔ womi ɔ nya, nɛ ma ha nɛ nyɛ hiɔwe maa pee kaa dade,* nɛ nyɛ zugba a hu maa pee kaa akɔblee.* 20 Nyɛ ma gbo yaka dengme, ejakaa nyɛ zugba a be ní bae, nɛ tsohi nɛ a ngɛ nyɛ zugba a nɔ ɔ hu be yiblii woe.

21 “‘Nɛ ke nyɛ ya nɔ nɛ nyɛ te si kɛ wo mi, nɛ nyɛ bui mi tue ɔ, ma fiaa nyɛ ní si kpaago ngɛ nyɛ yayami ɔmɛ a nya. 22 Ma ha nɛ nga mi lohwe awi yeli maa sɛ nyɛ kpɛti, nɛ a maa gbe nyɛ bimɛ ɔmɛ nɛ a ma kpata nyɛ we mi lohwe ɔmɛ a hɛ mi, nɛ nyɛ nɔ ma gbɔ, nɛ nyɛ gbɛjegbɛ ɔmɛ maa fɔ si gu.

23 “‘Ke ní nɛ ɔmɛ tsuo a se ɔ, nyɛ kplɛɛ we ye tsɔsemi nɔ, nɛ nyɛ ya nɔ nɛ nyɛ te si kɛ wo mi ɔ, 24 lɛɛ imi hu ma te si kɛ wo nyɛ, nɛ imi nitsɛ ma fiaa nyɛ ní si kpaago ngɛ nyɛ yayami ɔmɛ a he. 25 Akɛnɛ nyɛ yi somi ɔ nɔ he je ɔ, ma ngɔ lue yemi klaate kɛ ba nyɛ nɔ. Ke nyɛ bua nyɛ he nya ngɛ nyɛ ma amɛ a mi ɔ, ma ha nɛ hiɔ ma ba sɛ nyɛ kpɛti, nɛ a maa ngɔ nyɛ kɛ wo he nyɛlɔ ko dɛ mi. 26 Ke i puɛ nɔ́ nɛ haa nɛ nyɛ náa niye ní* ɔ, yihi nyɔngma maa sã abolo ngɛ flɔɔnɔɔ kake pɛ mi, nɛ nyɛ abolo ɔ, a kɛ sɛni lɛ maa ngmɛ, nɛ nyɛ maa ye ní se nyɛ be tɔe.

27 “‘Ke enɛ ɔ tsuo se nyɛ bui mi tue nɛ nyɛ ya nɔ nɛ nyɛ te si kɛ wo mi ɔ, 28 imi hu ma te si kɛ wo nyɛ wawɛɛ, nɛ imi nitsɛ ma gbla nyɛ tue si kpaago ngɛ nyɛ yayami ɔmɛ a he, 29 nɛ nyɛ maa ye nyɛ binyumuhi, kɛ nyɛ biyihi a lo. 30 Ma puɛ nyɛ jami hehi nɛ ya hiɔwe ɔmɛ,* nɛ ma poo níhi nɛ nyɛ sãã tsopa kɛ e he via ngɛ a nɔ ɔ kɛ pue si, nɛ ma to nyɛ gbogboe ɔmɛ kɛ pue nyɛ we amagahi nɛ a he ngɛ tai* nɛ wami be a mi ɔmɛ a nɔ, nɛ ma* je nyɛ he konɛ nyɛɛ na kaa i hiee jamɛ a ní ɔmɛ. 31 Ma kpata nyɛ ma amɛ a hɛ mi, nɛ ma ha nɛ nyɛ jami he ɔmɛ hu maa fɔ si gu, nɛ i be nyɛ we afɔle ɔmɛ a he via liliili* ɔ nue. 32 Imi nitsɛ ma ha nɛ zugba a maa fɔ si gu, nɛ e maa pee nyɛ he nyɛli nɛ a ngɛ lejɛ ɔ nyakpɛ. 33 Ma gbɛ nyɛ kɛ fia je ma amɛ a mi, nɛ ma hia klaate kɛ nyɛɛ nyɛ se, nɛ nyɛ zugba a maa fɔ si gu, nɛ a ma kpata nyɛ ma amɛ a hɛ mi.

34 “‘Ke nyɛ ngɛ nyɛ he nyɛli ɔmɛ a zugba a nɔ ɔ, nyɛ zugba a maa jɔɔ e he ejakaa e jɔɔ we e he gblee. Jamɛ a be ɔ mi ɔ, zugba a maa jɔɔ e he, ejakaa e jɔɔ we e he gblee. 35 Ke zugba a fɔɔ si gu ɔ, e maa jɔɔ e he, ejakaa be nɛ nyɛ ngɛ zugba a nɔ́ ɔ, nyɛ ha we nɛ e jɔɔ e he.

36 “‘Ni nɛmɛ nɛ a yi ná wami ɔ lɛɛ, ma ha nɛ sawale maa nu mɛ ngɛ a he nyɛli ɔmɛ a zugba amɛ a nɔ, nɛ ba nɛ kɔɔhiɔ ngɛ lɛ fiae pɛmi pɛ po maa wo mɛ fo. A maa tu fo kaa nɔ́ nɛ nɔ ko kɛ klaate nyɛɛ a se, nɛ a maa nɔɔ si be mi nɛ nɔ ko fiee we mɛ. 37 A ma tɛ a sibi a nane se nɛ a maa nɔɔ a sibi a nɔ kaa nihi nɛ a ngɛ klaate nya fo tue, pohu nɔ ko fiee we mɛ. Nyɛ be nyɛe maa da nyɛ he nyɛli a nya. 38 Nyɛ hɛ mi ma kpata ngɛ je ma amɛ a kpɛti, nɛ nyɛ he nyɛli ɔmɛ a zugba a maa mii nyɛ. 39 Nyɛ ti nihi nɛ maa piɛ ɔ, a maa ngmɛɛ nyɛ he nɛ nyɛ maa sa ngɛ nyɛ he nyɛli ɔmɛ a zugba a nɔ ngɛ nyɛ yayami ɔmɛ a he je. Ee, a maa sa ngɛ a tsɛmɛ ɔmɛ a tɔmi ɔmɛ a he je. 40 Kɛkɛ ɔ, a maa jaje mɛ nitsɛmɛ a yayami, kɛ a tsɛmɛ ɔmɛ hu a yayami kɛ anɔkuale nɛ a tsɛmɛ ɔmɛ yi ɔ, nɛ a maa kplɛɛ nɔ kaa a yi mi anɔkuale ejakaa a te si kɛ wo mi. 41 Nɛ imi hu i te si kɛ wo mɛ, nɛ i ha nɛ a ngɔ mɛ kɛ ho a he nyɛli a zugba nɔ ya.

“‘Eko ɔ, jamɛ a be ɔ mi ɔ, a maa ba a he si,* nɛ a maa wo a yayami ɔ he hiɔ. 42 Nɛ ma kai somi nɛ i kɛ Yakob so ɔ, kɛ somi nɛ i kɛ Isak so ɔ, nɛ ma kai somi nɛ i kɛ Abraham so ɔ, nɛ ma kai zugba a. 43 Be mi nɛ a be zugba a nɔ ɔ, zugba a maa fɔ si gu nɛ e maa jɔɔ e he, ejakaa e jɔɔ we e he gblee. Jamɛ a be ɔ mi nɔuu ɔ, a maa hi a yayami ɔmɛ a he hiɔ woe, ejakaa a kua ye fami ɔmɛ, nɛ ye blɔ tsɔɔmi ɔmɛ hu a* yi nɔ. 44 Ngɛ enɛ ɔ tsuo se ɔ, be mi nɛ a ngɛ a he nyɛli ɔmɛ a zugba a nɔ ɔ, i be mɛ kuae kulaa, nɛ i be a he ngmɛɛe kɛ fɔ si hluu kaa a hɛ mi ma kpata pɛsɛpɛsɛ hulɔ, ejakaa ke i pee jã a, lɔ ɔ maa tsɔɔ kaa i yi somi nɛ i kɛ mɛ so ɔ nɔ, imi ji Yehowa a Mawu ɔ nɛ. 45 Ngɛ a he je ɔ, ma kai somi nɛ i kɛ a nɛmɛ ɔmɛ nɛ i je mɛ kɛ je Egipt zugba a nɔ ngɛ je ma amɛ a hɛ mi ɔ so ɔ, konɛ ma kɛ tsɔɔ kaa a Mawu ji mi. Imi ji Yehowa.’”

46 Blɔ tsɔɔmihi kɛ famihi kɛ mlaahi nɛ Yehowa kɛ ha Israel bi ɔmɛ kɛ gu Mose nɔ ngɛ Sinai Yoku ɔ nɔ ji nɛ ɔmɛ nɛ.

27 Yehowa ya nɔ nɛ e kɛ Mose tu munyu nɛ e de lɛ ke: 2 “O kɛ Israel bi ɔmɛ nɛ tu munyu nɛ o de mɛ ke, ‘Ke nɔ ko wo si klɛdɛɛ ko kaa e maa ngɔ nɔ ko kɛ ha Yehowa, nɛ tsɔɔ kaa e maa wo sika nɛ a po fɔ si ngɛ nɔ ɔ* he ɔ, 3 nyumu nɛ e ye kɛ je jeha 20 kɛ ya si 60 he jua nɛ pee sika hiɔ shekel* 50 kaa bɔ nɛ a po fɔ si ngɛ he klɔuklɔu ɔ.* 4 Se ke yo ɔ, e he jua nɛ pee shekel 30. 5 Ke nɔ ɔ ye kɛ je jeha 5 kɛ ya si jeha 20 nɛ e ji nyumu ɔ, e he jua nɛ pee shekel 20, se ke e ji yo ɔ, e he jua nɛ pee shekel 10. 6 Ke nɔ ɔ ye kɛ je nyɔhiɔ kake kɛ ya si jeha enuɔ nɛ e ji nyumu ɔ, e he jua nɛ pee sika hiɔ shekel enuɔ, se ke e ji yo ɔ, e he jua nɛ pee sika hiɔ shekel etɛ.

7 “‘Ke nɔ ɔ ye jeha 60 kɛ se nɛ e ji nyumu ɔ, e he jua nɛ pee shekel 15, se ke e ji yo ɔ, e he jua nɛ pee shekel 10. 8 Se ke nɔ nɛ wo si ɔ ji ohiatsɛ posoposo nɛ́ e be nyɛe maa wo sika nɛ a po fɔ si ɔ, é ya da osɔfo ɔ hɛ mi nɛ osɔfo ɔ nɛ wo e he jua. Osɔfo ɔ nɛ wo jua a bɔ nɛ nɔ nɛ ngɛ si ɔ woe ɔ ma nyɛ ma ha.

9 “‘Ke lohwe nɛ́ a kɛ sãã afɔle nɛ nɔ ɔ wo si kaa e kɛ ma ha Yehowa a, lohwe fɛɛ lohwe nɛ e kɛ ma ha Yehowa a maa pee klɔuklɔu. 10 E sɛ nɛ e ngɔ lohwe kpa kɛ to nane mi, nɛ e ko ngɔ lohwe kpakpa kɛ tsake lohwe yaya, nɛ e ko ngɔ lohwe yaya hu kɛ tsake lohwe kpakpa. Se ke e ngɔ lohwe kpa kɛ tsake ɔ, kekle lohwe ɔ kɛ lohwe nɛ e kɛ tsake ɔ tsuo maa pee ní klɔuklɔu. 11 Ke e ji lohwe nɛ he tsɔ we nɛ a be nyɛe nɛ a kɛ sã afɔle ha Yehowa a, lɛɛ e ngɔ lohwe ɔ kɛ ba da osɔfo ɔ hɛ mi. 12 Jehanɛ ɔ, osɔfo ɔ nɛ hyɛ kaa lohwe ɔ hi loo e hí, nɛ́ e da lɔ ɔ nɔ kɛ tsɔɔ e he jua. Jua nɛ osɔfo ɔ maa tsɔɔ ɔ, jã nɛ a maa jua lɛ. 13 Se ke e ba lɛ kaa e suɔ nɛ e maa kpale kpɔ̃ lohwe ɔ, lɛɛ é ngɔ lohwe ɔ he jua a mi dlami enuɔ mi kake kɛ piɛɛ e he jua a he.

14 “‘Jehanɛ hu ɔ, ke nɔ ko jɔɔ e we nɔ ha Yehowa kaa nɔ́ ko nɛ ngɛ klɔuklɔu ɔ, osɔfo ɔ nɛ hyɛ kaa we ɔ hi loo e hí, nɛ́ e da lɔ ɔ nɔ kɛ tsɔɔ e he jua. Jua nɛ osɔfo ɔ maa tsɔɔ ɔ, jã nɛ a maa jua lɛ. 15 Se ke e ba lɛ kaa nɔ nɛ e jɔɔ e we ɔ nɔ ɔ suɔ nɛ e kpɔ̃ e we ɔ ekohu ɔ, lɛɛ é ngɔ we ɔ he jua a mi dlami enuɔ mi kake kɛ piɛɛ e he jua a he, kɛkɛ ɔ, e maa pee e nɔ́.

16 “‘Ke nɔ ko jɔɔ zugba nɛ e ngɛ ɔ eko nɔ kɛ ha Yehowa a, a hyɛ wu nɛ a ma du ngɛ zugba a nɔ ɔ hiɛmi nɛ a kɛ wo he jua: barli wu homa* susumi nɔ́ kake he jua ji sika hiɔ shekel 50. 17 Ke e jɔɔ e zugba a nɔ ngɛ Heyemi Jeha a mi ɔ, lɛɛ bɔ nɛ e he jua a ji ɔ, jã pɛ lɛ e maa hi. 18 Ke e jɔɔ e zugba a nɔ ngɛ Heyemi Jeha a se ɔ, lɛɛ osɔfo ɔ nɛ hyɛ jeha nɛ piɛ loko Heyemi Jeha kpa maa su ɔ nɛ e kɛ wo he jua. Osɔfo ɔ nɛ hyɛ jeha abɔ nɛ piɛ loko Heyemi jeha maa su ɔ nɛ e kɛ je nɔ. 19 Se ke e ba lɛ kaa nɔ nɛ e jɔɔ zugba a nɔ ɔ suɔ nɛ e maa kpale kpɔ̃ zugba a, lɛɛ é ngɔ zugba a he jua a mi dlami enuɔ mi kake kɛ piɛɛ e he jua a he, kɛkɛ ɔ, e maa kpale ba pee e nɔ́. 20 Ke e ba lɛ kaa e kpɔ̃ we zugba a nɛ a jua kɛ ha nɔ kpa a, e be he blɔ kaa e kpɔ̃ɔ hu. 21 Ke a ngmɛɛ zugba a he ngɛ Heyemi Jeha a mi ɔ, e ma ba pee nɔ́ ko nɛ ngɛ klɔuklɔu ha Yehowa. E maa pee zugba nɛ a kɛ ha Mawu kulaa. E maa pee osɔfo ɔmɛ a weto ní.

22 “‘Ke nɔ ko he zugba, se pi lɛ nitsɛ e weto ní, nɛ e jɔɔ nɔ ha Yehowa a, 23 osɔfo ɔ nɛ hyɛ jeha abɔ nɛ piɛ nɛ Heyemi Jeha a maa su ɔ nɛ e kɛ tsɔɔ e he jua. É wo he hiɔ jamɛ a ligbi ɔ nɔuu. E ji nɔ́ ko nɛ ngɛ klɔuklɔu ha Yehowa. 24 Ngɛ Heyemi Jeha a mi ɔ, zugba a maa pee nɔ nɛ a he ngɛ e dɛ, nɛ ji zugbatsɛ ɔ nɔ́ ekohu.

25 “‘Á ngɔ shekel nɛ a po fɔ si ngɛ he klɔuklɔu ɔ kɛ tsɔɔ nɔ́ fɛɛ nɔ́ he jua. Shekel ɔ jiɔmi ji gera* 20.

26 “‘Se lohwehi a kekleekle bimɛ ɔmɛ lɛɛ, nɔ ko nɛ ko jɔɔ nɔ, ejakaa a fɔ mɛ kaa kekleekle bimɛ ha Yehowa. Na jio, jijɔ jio, e ji Yehowa nɔ́ momo. 27 Ke lohwe ɔ ji lohwe nɛ e he tsɔ we, nɛ e kpɔ̃ ngɛ jua nɛ a tsɔɔ ɔ nya a, é ngɔ e he jua a mi dlami enuɔ mi kake kɛ piɛɛ he. Se ke a kpɔ̃ we lohwe ɔ, lɛɛ á jua lɛ ngɛ jua nɛ a tsɔɔ nya.

28 “‘Se nɔ́ saisaa ko nɛ nɔ ko ngɛ nɛ e jɔɔ nɔ kulaa* ha Yehowa a, á ko jua aloo á ko kpɔ̃ ekohu, adesa jio, lohwehi jio, e zugba jio. Nɔ́ fɛɛ nɔ́ ko nɛ a jɔɔ nɔ kulaa a, e ji nɔ́ ko nɛ ngɛ klɔuklɔu pe kulaa ha Yehowa. 29 Jehanɛ hu ɔ, nɔ saisaa nɛ a maa bu lɛ gbenɔ fɔ nɛ a ma je e he gbi kaa a kpata e hɛ mi ɔ, a ko kpɔ̃ lɛ. Bɔ fɛɛ bɔ nɛ ji ɔ, á gbe lɛ.

30 “‘Zugba a mi dlami nyɔngma mi kake fɛɛ mi dlami nyɔngma mi kake ɔ, Yehowa nɔ́, ngmɔ niba ní jio, tso yiblii jio. E ji nɔ́ ko nɛ ngɛ klɔuklɔu ha Yehowa. 31 Ke nɔ ko suɔ kaa e ma kpɔ̃ e nɔ́ ko mi dlami nyɔngma mi kake ekohu ɔ, é ngɔ nɔ́ ɔ he jua a mi dlami enuɔ mi kake kɛ piɛɛ he. 32 Nyɛ lohwehi a mi dlami nyɔngma mi kake fɛɛ mi dlami nyɔngma mi kake ɔ, na jio, to jio, nɔ́ fɛɛ nɔ́ ko nɛ beɔ ngɛ to hyɛlɔ tso sisi ɔ, lohwe* nyɔngmane ɔ nɛ pee nɔ́ ko nɛ ngɛ klɔuklɔu ha Yehowa. 33 É ko hyɛ kaa e hi aloo e hí, nɛ e ko tsake lɛ hulɔ. Se ke e ba lɛ kaa e suɔ nɛ e tsake ɔ, lɛɛ kekle lohwe ɔ kɛ nɔ́ nɛ a kɛ ma tsakemi ɔ tsuo nɛ pee níhi nɛ a ngɛ klɔuklɔu. E be he blɔ kaa e kpɔ̃ɔ hu.’”

34 Kitahi nɛ Yehowa kɛ ha Israel bi ɔmɛ kɛ gu Mose nɔ ngɛ Sinai Yoku ɔ nɔ ji nɛ ɔmɛ nɛ.