YOSHUA

1 Ngɛ Yehowa sɔmɔlɔ Mose gbenɔ se ɔ, Yehowa de Nun binyumu Yoshua,* nɛ ji Mose sɔmɔlɔ ɔ ke: 2 “Ye sɔmɔlɔ Mose gbo. Amlɔ nɛ ɔ, tee si nɛ o po Yordan Pa a, o kɛ ma nɛ ɔ tsuo, nɛ nyɛɛ ho zugba a nɛ i kɛ ngɛ mɛ, nɛ ji Israel ma a hae ɔ nɔ ya. 3 He fɛɛ he nɛ nyɛɛ kɛ nyɛ nane maa ma a, ma ngɔ kɛ ha nyɛ kaa bɔ nɛ i wo Mose si ɔ. 4 Nyɛ zugba a maa je nga a nɔ kɛ ya si Lebanon kɛ jehanɛ hu, kɛ je pa ngua a nɛ ji Yufrate ɔ he, Hit bi ɔmɛ a zugba a tsuo kɛ ya si Wo Ngua* a he ngɛ pusinɔ he je. 5 Nɔ ko nɔ ko be nyɛe maa te si kɛ wo mo o wami ligbi ɔmɛ tsuo. Bɔ nɛ i piɛɛ Mose he ɔ, jã kɛ̃ nɛ ma piɛɛ o he. I be mo sie, nɛ i be mo kuae hulɔ. 6 Moo pee kã nɛ o he nɛ wa, ejakaa mo lɛ o ma ha nɛ ma nɛ ɔ nine maa su zugba nɛ i kã a nɛmɛ ɔmɛ kita kaa i kɛ ma ha mɛ ɔ nɔ.

7 “Moo lɛɛ moo pee kã nɛ o he nɛ wa kɛkɛ, nɛ o ye Mlaahi tsuo nɛ ye sɔmɔlɔ Mose fã mo ɔ nɔ sisiisi. Ko gba kɛ je he kɛ ya hiɔ nɔ loo muɔ nɔ, konɛ o pee o ní ngɛ juɛmi mi ngɛ he fɛɛ he nɛ o maa ya. 8 Mlaa womi nɛ ɔ nɛ ko je o nya mi, moo kane nɛ o pue o yi mi tɛ ngɛ he* nyɔ kɛ pia, konɛ o ye níhi tsuo nɛ a ngma ngɛ mi ɔ nɔ sisiisi; ja jã loko níhi nɛ o peeɔ ɔ maa ye manye, nɛ o maa pee o ní ngɛ juɛmi mi. 9 Anɛ i fã we mo kaa o pee kã nɛ o he nɛ wa lo? Koo nu sawale, nɛ koo ye gbeye hulɔ, ejakaa Yehowa o Mawu ɔ piɛɛ o he ngɛ he fɛɛ he nɛ o maa ya.”

10 Kɛkɛ nɛ Yoshua fã ma nikɔtɔma amɛ ke: 11 “Nyɛɛ nyɛɛ sito he ɔ tsuo nɛ nyɛ fã ni ɔmɛ ke, ‘Nyɛ hla niye ní kɛ to, ejakaa ngɛ ligbi etɛ mi ɔ, nyɛ maa po Yordan Pa a kɛ ya ngɔ zugba nɛ Yehowa nyɛ Mawu ɔ kɛ ngɛ nyɛ hae kaa nyɛ nɔ́ ɔ.’”

12 Nɛ Yoshua de Ruben bi ɔmɛ, Gad bi ɔmɛ, kɛ Manase wɛtso fã a ke: 13 “Nyɛ kai nɔ́ nɛ Yehowa sɔmɔlɔ Mose fã nyɛ ɔ: ‘Yehowa nyɛ Mawu ɔ ngɛ nyɛ he jɔmi hae, nɛ e ngɔ zugba nɛ ɔ kɛ ha nyɛ. 14 Nyɛ yi ɔmɛ, nyɛ bimɛ ɔmɛ, kɛ nyɛ lohwe ɔmɛ maa hi zugba nɛ Mose kɛ ha nyɛ ɔ nɔ ngɛ Yordan Pa a he ngɛ hiɛ ɔ,* se nyɛ tatsɛmɛ tsuo nɛ nyɛ he wa a, nyɛ bua nyɛ he nya kɛ ha ta kɛ sɛ nyɛ nyɛmimɛ ɔmɛ a hlami kɛ po mi kɛ ho. Nyɛɛ ye bua mɛ 15 kɛ ya si be nɛ Yehowa ma ha nyɛ nyɛmimɛ ɔmɛ he jɔmi kaa bɔ nɛ e ha nyɛ he jɔmi ɔ, nɛ́ mɛ hu a ma ya ngɔ zugba nɛ Yehowa nyɛ Mawu ɔ kɛ ngɛ mɛ hae ɔ. Lɔ ɔ se ɔ, nyɛɛ kpale kɛ ya zugba nɛ a kɛ ha nyɛ kaa nyɛɛ hi nɔ ɔ nɔ, zugba nɛ Yehowa sɔmɔlɔ Mose kɛ ha nyɛ ngɛ Yordan Pa a puje he je ɔ.’”

16 A ha Yoshua heto ke: “Wa maa pee níhi tsuo nɛ o fã wɔ ɔ, nɛ he fɛɛ he nɛ o maa tsɔ wɔ ɔ, wa maa ya. 17 Bɔ nɛ wa bu nɔ́ fɛɛ nɔ́ nɛ Mose de ɔ tue ɔ, jã kɛ̃ nɛ wa maa bu mo tue. Yehowa o Mawu ɔ nɛ piɛɛ o he kɛkɛ kaa bɔ nɛ e piɛɛ Mose he ɔ. 18 Nɔ fɛɛ nɔ nɛ e maa te si kɛ wo o fami, nɛ e be nɔ́ fɛɛ nɔ́ nɛ o ma fã lɛ ɔ tue bue ɔ, a gbe lɛ. Moo lɛɛ moo pee kã nɛ o he nɛ wa kɛkɛ.”

2 Kɛkɛ nɛ Nun binyumu Yoshua tsɔ nyumuhi enyɔ nigii kɛ je Shitim kaa ma si kpali. E de mɛ ke: “Nyɛɛ ya nɛ nyɛ ya kpá zugba a si, titli ɔ, Yeriko.” Lɔ ɔ he ɔ, a ho, nɛ a ya sɛ tuutuu yo ko nɛ a tsɛɛ lɛ Rahab we mi, nɛ a hi lejɛ ɔ. 2 A ya bɔ Yeriko matsɛ ɔ amaniɛ ke: “Hyɛ! Israel nyumuhi ba hiɛ ɔ nyɔ nɛ ɔ mi konɛ a ba kpá zugba a si.” 3 Kɛkɛ nɛ Yeriko matsɛ ɔ tsɔ nɛ a kɛ sɛ gbi ya ha Rahab ke: “Je nyumu ɔmɛ nɛ a ba nɛ a ba ngɛ o we ɔ mi ɔ kpo, ejakaa a ba konɛ a ba kpá zugba a tsuo si.”

4 Se yo ɔ ngɔ nyumu enyɔ ɔmɛ kɛ laa. Kɛkɛ nɛ e de ke: “Ee, nyumu ɔmɛ ba ye ngɔ, se i li he nɛ a je. 5 Nɛ benɛ du bu nɛ e piɛ bɔɔ nɛ a ma nga ma a agbo ɔ, nyumu ɔmɛ je kpo. I li he nɛ a ho, se ke nyɛ fiee a se esɔesɔ ɔ, nyɛ ma ya ná mɛ.” 6 (Se e ngɔ mɛ kɛ ho tsu ɔ yi mi ya, nɛ e kɛ mɛ ya laa ngɛ flaks* tsohi nɛ́ a to kɛ pue si mi ngɛ tsu ɔ yi mi.) 7 Lɔ ɔ he ɔ, nyumu ɔmɛ fiee a se kɛ gu Yordan Pa a nya blɔ ngɛ pa pomi he ɔmɛ, nɛ benɛ nihi nɛ a ngɛ ni ɔmɛ a se fiee ɔ je kpo pɛ ɔ, a nga ma a agbo ɔ.

8 Loko nyumu ɔmɛ maa hwɔ si ɔ, e kuɔ kɛ ya a ngɔ ngɛ tsu ɔ yi mi. 9 E de nyumu ɔmɛ ke: “I le kaa Yehowa maa ngɔ zugba a kɛ ha nyɛ, nɛ nyɛ he sawale nu wɔ. Zugba a nɔ bi ɔmɛ tsuo a tsui po ngɛ nyɛ he je, 10 ejakaa wa nu bɔ nɛ Yehowa ha nɛ Wo Tsu ɔ mi nyu ɔ gbli ngɛ nyɛ hɛ mi benɛ nyɛ je Egipt ɔ, kɛ nɔ́ nɛ nyɛ pee Amor bi ɔmɛ a matsɛmɛ enyɔ ɔmɛ, nɛ ji Sihon kɛ Og ɔ, nihi nɛ nyɛ kpata a hɛ mi ngɛ Yordan Pa a se ɔ.* 11 Benɛ wa nu he ɔ, wa tsui po,* nɛ nɔ fɛɛ nɔ kã nya ta* ngɛ nyɛ he je, ejakaa Yehowa nyɛ Mawu ɔ ji Mawu nɛ ngɛ hiɔwe kɛ zugba a nɔ. 12 Amlɔ nɛ ɔ, i kpa nyɛ pɛɛ nɛ nyɛɛ ngɔ Yehowa kɛ kã mi kita kaa akɛnɛ i je suɔmi nɛ se pui kpo kɛ tsɔɔ nyɛ he je ɔ, nyɛ hu nyɛ ma je suɔmi nɛ se pui kpo kɛ tsɔɔ ye tsɛ we ɔ; nɛ́ nyɛ ha mi okadi ko nɛ tsɔɔ kaa nyɛ maa ye nyɛ munyu nɔ.* 13 Nyɛ ko gbe ye tsɛ kɛ ye nyɛ, ye nyɛminyumu ɔmɛ kɛ ye nyɛmiyi ɔmɛ, kɛ a nihi tsuo, nɛ́ nyɛ he wa yi wami* kɛ je gbenɔ dɛ mi.”

14 Kɛkɛ nɛ nyumu ɔmɛ de lɛ ke: “Wa maa ngɔ wa wami kɛ ha ngɛ nyɛ wami he!* Ke o de we nɔ ko nɔ́ he je nɛ wa ba hiɛ ɔ, lɛɛ wa ma je suɔmi nɛ se pui kpo kɛ tsɔɔ mo, nɛ wa maa ye mo anɔkuale ke Yehowa ngɔ zugba a kɛ ha wɔ ɔ.” 15 Lɔ ɔ se ɔ, e ngɔ kpã kɛ kple mɛ si kɛ gu saflɛ mi, ejakaa e we ɔ ngɛ ma a gbogbo ɔ kasa he. Ngɛ anɔkuale mi ɔ, e ngɛ gbogbo ɔ nɔ. 16 Kɛkɛ nɛ e de mɛ ke: “Nyɛɛ ho yoku ɔmɛ a nɔ ya nɛ nyɛ ya laa ngɛ lejɛ ɔ ligbi etɛ, konɛ nihi nɛ a ngɛ nyɛ se fiee ɔ nɛ a ko na nyɛ. Kɛkɛ ɔ, ke nihi nɛ a ngɛ nyɛ se fiee ɔ kpale kɛ ba a, nyɛ ma nyɛ ma pue blɔ.”

17 Nyumu ɔmɛ de lɛ ke: “Wa maa ye kita nɛ o ha nɛ wa kã a nɔ ke o pee níhi nɛ nyɛɛ se nɛ ɔmɛ: 18 moo fi kpã tsutsuu nɛ ɔ kɛ wo saflɛ nɛ wa gu mi kɛ kple si ɔ he ke wa ba su zugba a nɔ. Mo bua o tsɛ, o nyɛ, o nyɛminyumu ɔmɛ, kɛ o tsɛ ɔ we ɔ tsuo nya kɛ wo we ɔ mi. 19 Kɛkɛ ɔ, ke nɔ ko gu o we ɔ sinya amɛ a mi kɛ je kpo kɛ ya kpo ɔ nɔ ɔ, e muɔ maa tloo lɛ nitsɛ, nɛ wa maa ye wa he. Se ke nɔ́ yaya ko pee nɔ ko nɛ maa hi o ngɔ ngɛ o we ɔ mi ɔ,* e muɔ maa tloo wɔ. 20 Se ke o de nɔ ko nɔ́ he je nɛ wa ba hiɛ ɔ, lɛɛ wa maa ye wa he ngɛ o kita a nɛ o ha nɛ wa kã a he.” 21 E he nɔ ke: “E ba mi kaa bɔ nɛ nyɛ de ɔ.”

Kɛkɛ nɛ e wo mɛ blɔ nɛ a pue blɔ. Pee se ɔ, e fi kpã tsutsuu ɔ kɛ wo saflɛ ɔ he. 22 Lɔ ɔ he ɔ, a je nɛ a ho yoku ɔmɛ a nɔ ya, nɛ a hi lejɛ ɔ ligbi etɛ, kɛ ya si be nɛ nihi nɛ a ngɛ mɛ fiee ɔ kpale kɛ ba. Nihi nɛ a ngɛ a se fiee ɔ hla mɛ ngɛ gbɛjegbɛ fɛɛ gbɛjegbɛ nɔ, se a nɛ mɛ. 23 Lɔ ɔ se ɔ, nyumu enyɔ ɔmɛ kple si kɛ je yoku ɔmɛ a nɔ, nɛ a po pa a, nɛ a ba Nun binyumu Yoshua ngɔ. A bɔ lɛ níhi tsuo nɛ ba a nɔ ɔ. 24 Kɛkɛ nɛ a de Yoshua ke: “Yehowa ngɔ zugba a tsuo kɛ wo wa dɛ. Ngɛ anɔkuale mi ɔ, zugba a nɔ bi ɔmɛ tsuo a tsui po ngɛ wa he je.”

3 Kɛkɛ nɛ Yoshua te si mɔtu mla, nɛ e kɛ Israel bi ɔmɛ* tsuo je Shitim kɛ ba Yordan Pa a nya. A hwɔ lejɛ ɔ nyɔ ɔ mi loko a po pa a.

2 Ligbi etɛ se ɔ, ma nikɔtɔma amɛ nyɛɛ sito he ɔ tsuo, 3 nɛ a fã ni ɔmɛ ke: “Ke nyɛ na kaa Levi osɔfo ɔmɛ tloo Yehowa nyɛ Mawu ɔ somi daka a pɛ ɔ, nyɛɛ je he nɛ nyɛ ngɛ ɔ nɛ nyɛɛ nyɛɛ se. 4 Se nyɛ ha nɛ blɔ maa pee kɔni fã 2,000* nɛ hi nyɛɛ kɛ daka a nyɛ kpɛti; nyɛ ko hɛ nyɛ kɛ su he, konɛ nyɛɛ na he nɛ e sa kaa nyɛɛ gu, ejakaa nyɛ gui blɔ nɛ ɔ nɔ hyɛ.”

5 Jehanɛ ɔ, Yoshua de ni ɔmɛ ke: “Nyɛɛ tsu nyɛ he, ejakaa Yehowa maa pee nyakpɛ níhi ngɛ nyɛ kpɛti hwɔɔ.”

6 Kɛkɛ nɛ Yoshua de osɔfo ɔmɛ ke: “Nyɛ wo somi daka a nɛ nyɛɛ sɛ ni ɔmɛ a hlami.” Lɔ ɔ he ɔ, a wo somi daka a, nɛ a sɛ ni ɔmɛ a hlami.

7 Kɛkɛ nɛ Yehowa de Yoshua ke: “Mwɔnɛ ligbi nɛ ɔ, ma bɔni o nɔ womi ngɛ Israel tsuo hɛ mi, konɛ a ná nɛ a le kaa ma piɛɛ o he kaa bɔ nɛ i piɛɛ Mose he ɔ. 8 Moo ngɔ fami nɛ ɔ kɛ ha osɔfo ɔmɛ nɛ a tloo somi daka a: ‘Ke nyɛ su Yordan Pa a he ɔ, nyɛɛ sɛ nyu ɔ mi nɛ nyɛɛ da si.’”

9 Nɛ Yoshua de Israel bi ɔmɛ ke: “Nyɛɛ ba hiɛ ɔ nɛ nyɛ ba bu Yehowa nyɛ Mawu ɔ munyu ɔmɛ tue.” 10 Kɛkɛ nɛ Yoshua de ke: “Kɛ gu enɛ ɔ nɔ ɔ, nyɛ maa le kaa Mawu hɛ kalɔ ngɛ nyɛ kpɛti, nɛ bɔ fɛɛ bɔ nɛ ji ɔ, e maa fiee Kanaan bi ɔmɛ, Hit bi ɔmɛ, Hiv bi ɔmɛ, Periz bi ɔmɛ, Girgash bi ɔmɛ, Amor bi ɔmɛ, kɛ Yebus bi ɔmɛ kɛ je nyɛ hɛ mi. 11 Hyɛ! Zugba a tsuo Nyɔmtsɛ ɔ somi daka a ngɛ nyɛ hlami sɛe kɛ yaa Yordan Pa a mi. 12 Amlɔ nɛ ɔ, nyɛɛ hla nyumuhi 12 kɛ je Israel wɛtso ɔmɛ a mi, nyumu kake kɛ ha wɛtso fɛɛ wɛtso, 13 nɛ ke osɔfo ɔmɛ nɛ a tloo Yehowa, zugba a tsuo Nyɔmtsɛ ɔ Daka a kɛ a nane ma Yordan Pa a mi pɛ ɔ, nyu ɔ nɛ beɔ kɛ jeɔ yiti je kɛ baa a maa da si, nɛ e maa pee kaa gbogbo.”

14 Lɔ ɔ he ɔ, benɛ ni ɔmɛ je a bo tsu ɔmɛ a mi nɛ a ma Yordan Pa a pomi pɛ ɔ, osɔfo ɔmɛ nɛ a tloo somi daka a sɛ ni ɔmɛ a hlami. 15 Benɛ osɔfo ɔmɛ nɛ a tloo Daka a su Yordan Pa a he nɛ a ngɔ a nane kɛ ma nyu ɔ mi pɛ ɔ (jamɛ a be ɔ mi ɔ, Yordan Pa a hyiɔ kɛ beɔ nɔ ngɛ ní kpami ligbi ɔmɛ a mi tsuo), 16 nyu nɛ beɔ kɛ jeɔ pa a yiti je kɛ baa a da si. E te si da si kaa gbogbo ngɛ tsitsaa ngɛ Adam, nɛ ji ma nɛ e kɛ Zaretan he kɛ we ɔ, be mi nɛ nyu ɔ nɛ e kpleɔ kɛ yaa Araba a Wo ɔ, nɛ ji Ngo Wo* ɔ blɔ ɔ lɛɛ e be kɛ ho ɔ. Nyu ɔ da si, nɛ ni ɔmɛ po pa a ngɛ Yeriko hɛ mi. 17 Be mi nɛ osɔfo ɔmɛ nɛ a tloo Yehowa somi daka a ya nɔ nɛ a da si ngɛ zugba gbigbli nɔ ngɛ Yordan Pa a kpɛti ɔ, Israel ma a tsuo po mi ngɛ zugba gbigbli nɔ kɛ ya si be nɛ ma a tsuo po Yordan Pa a ta.

4 Benɛ ma a tsuo po Yordan Pa a ta pɛ ɔ, Yehowa de Yoshua ke: 2 “Hlaa nyumuhi 12 kɛ je ni ɔmɛ a kpɛti, nyumu kake kɛ je wɛtso fɛɛ wɛtso mi, 3 nɛ o fã mɛ ke: ‘Nyɛ wo tɛ 12 kɛ je Yordan Pa a kpɛti ngɛ he nɛ osɔfo ɔmɛ a nane ma si ngɛ ɔ, nɛ́ nyɛ kɛ ho, nɛ nyɛ kɛ ya ma si ngɛ he nɛ nyɛ maa hwɔ nyɔ mi ɔ.’”

4 Lɔ ɔ he ɔ, Yoshua tsɛ nyumuhi 12 nɛ́ e hla mɛ kɛ je Israel bi ɔmɛ a kpɛti ɔ, nyumu kake kɛ je wɛtso fɛɛ wɛtso mi, 5 nɛ Yoshua de mɛ ke: “Nyɛɛ sɛ Yehowa nyɛ Mawu ɔ Daka a hlami kɛ ho Yordan Pa a kpɛti ya, nɛ nyɛ ti nɔ fɛɛ nɔ nɛ e wo tɛ kake kɛ fɔ e konɔ, ngɛ Israel bi ɔmɛ a wɛtso ɔmɛ a yibɔ nya, 6 konɛ e pee okadi ngɛ nyɛ kpɛti. Ke pee se nɛ nyɛ bimɛ* ɔmɛ bi nyɛ ke, ‘Mɛni nyɛɛ kɛ tɛ nɛ ɔmɛ ngɛ pee?’ ɔ, 7 nyɛ de mɛ ke: ‘Ejakaa Yordan Pa a mi nyu ɔ da si ngɛ Yehowa somi daka a hɛ mi. Benɛ Daka a po Yordan Pa a, Yordan Pa a mi nyu ɔ da si. Tɛ nɛ ɔmɛ maa pee kaimi nɔ́ kɛ ha Israel ma a kɛ ya neneene.’”

8 Lɔ ɔ he ɔ, Israel bi ɔmɛ pee kaa bɔ nɛ Yoshua fã a pɛpɛɛpɛ. A wo tɛ 12 kɛ je Yordan Pa a kpɛti kaa bɔ nɛ Yehowa fã Yoshua a, ngɛ Israel bi ɔmɛ a wɛtso ɔmɛ a yibɔ nya. A ngɔ tɛ ɔmɛ kɛ ho he nɛ a maa hwɔ nyɔ mi ɔ ya, nɛ a kɛ mɛ ma si ngɛ lejɛ ɔ.

9 Jehanɛ hu ɔ, Yoshua ngɔ tɛ 12 kɛ ma si ngɛ Yordan Pa a kpɛti ngɛ he nɛ osɔfo ɔmɛ nɛ a tloo somi daka a ngɔ a nane kɛ ma a, nɛ tɛ ɔmɛ ngɛ lejɛ ɔ kɛ ba si mwɔnɛ ligbi nɛ ɔ.

10 Osɔfo ɔmɛ nɛ a tloo Daka a ya nɔ nɛ a da si ngɛ Yordan Pa a kpɛti kɛ ya si be nɛ a gbe nɔ́ fɛɛ nɔ́ nɛ Yehowa fã Yoshua kaa e de ni ɔmɛ ke a pee ɔ nya, ngɛ níhi tsuo nɛ Mose fã Yoshua a nya. Jamɛ a be ɔ mi tsuo ɔ, ni ɔmɛ kɛ oya yemi po pa a. 11 Benɛ ni ɔmɛ tsuo po pa a ta pɛ ɔ, Yehowa Daka a kɛ osɔfo ɔmɛ hu po mi ngɛ ni ɔmɛ a hɛ mi. 12 Nɛ Ruben bi ɔmɛ, Gad bi ɔmɛ, kɛ Manase wɛtso fã a bua a he nya kɛ ha ta, nɛ a po pa a ngɛ Israel bi kpa amɛ a hɛ mi kaa bɔ nɛ Mose fã mɛ ɔ pɛpɛɛpɛ. 13 Ta buli maa pee 40,000 nɛ a dla a he kɛ ha ta a po mi ngɛ Yehowa hɛ mi kɛ ho Yeriko nga kplanaa a nɔ ya.

14 Jamɛ a ligbi ɔ, Yehowa wo Yoshua nɔ ngɛ Israel tsuo hɛ mi, nɛ a je bumi nɛ mi kuɔ kpo kɛ tsɔɔ lɛ* e wami ligbi ɔmɛ tsuo, kaa bɔ nɛ a je bumi nɛ mi kuɔ kpo kɛ tsɔɔ Mose ɔ.

15 Kɛkɛ nɛ Yehowa de Yoshua ke: 16 “Fã osɔfo ɔmɛ nɛ a tloo Odase daka a ke á je Yordan Pa a mi.” 17 Lɔ ɔ he ɔ, Yoshua fã osɔfo ɔmɛ ke: “Nyɛɛ je Yordan Pa a mi.” 18 Benɛ osɔfo ɔmɛ nɛ a tloo Yehowa somi daka a je Yordan Pa a kpɛti, nɛ́ osɔfo ɔmɛ a nane ma zugba gbigbli nɔ ɔ, Yordan Pa a mi nyu ɔ bɔni bemi ekohu, nɛ e hyi kɛ be nɔ kaa sa a.

19 Ni ɔmɛ je Yordan Pa a mi ngɛ kekleekle nyɔhiɔ ɔ we ligbi nyɔngmane ɔ nɔ, nɛ a ba to si ngɛ Gilgal ngɛ Yeriko puje he huzu ɔ nɔ.

20 Tɛ 12 ɔmɛ nɛ a ngɔ kɛ je Yordan Pa a mi ɔ lɛɛ, Yoshua ha nɛ a kɛ mɛ ma si ngɛ Gilgal. 21 Kɛkɛ nɛ e de Israel bi ɔmɛ ke: “Hwɔɔ se ɔ, ke nyɛ bimɛ ɔmɛ bi nyɛ ke, ‘Mɛni tɛ nɛ ɔmɛ tsɔɔ?’ ɔ, 22 nyɛɛ tsɔɔ nyɛ bimɛ ɔmɛ nya ke: ‘Israel po Yordan Pa a ngɛ zugba gbigbli nɔ 23 benɛ Yehowa nyɛ Mawu ɔ ha nɛ Yordan Pa a mi nyu ɔ gbli ngɛ wa hɛ mi kɛ ya si be nɛ wa po pa a, kaa bɔ nɛ Yehowa nyɛ Mawu ɔ pee Wo Tsu ɔ benɛ e ha nɛ e gbli ngɛ wa hɛ mi kɛ ya si be nɛ wa po ɔ. 24 E pee enɛ ɔ konɛ zugba a nɔ mahi tsuo nɛ a le bɔ nɛ Yehowa nine si wa ha, konɛ nyɛ hu nyɛɛ ye Yehowa nyɛ Mawu ɔ gbeye be fɛɛ be.’”

5 Benɛ Amor bi ɔmɛ a matsɛmɛ nɛ a ngɛ Yordan Pa a pusinɔ he je* ɔ tsuo, kɛ Kanaan bi ɔmɛ a matsɛmɛ ɔmɛ nɛ a ngɛ wo ɔ he ɔ tsuo nu kaa Yehowa ha nɛ Yordan Pa a mi nyu ɔ gbli ngɛ Israel bi ɔmɛ a hɛ mi kɛ ya si be nɛ a po pa a, a tsui po,* nɛ a kã nya ta* ngɛ Israel bi ɔmɛ a he je.

2 Jamɛ a be ɔ mi ɔ, Yehowa de Yoshua ke: “Ngɔɔ tɛ nɛ he wa kɛ pee hahi nɛ o po Israel nyumu ɔmɛ ekohu, si enyɔne.” 3 Lɔ ɔ he ɔ, Yoshua ngɔ tɛ kɛ pee hahi nɛ e po Israel nyumu ɔmɛ ngɛ Gibeat Haaralot.* 4 Nɔ́ he je nɛ Yoshua po mɛ ɔ ji: Nihi nɛ a je Egipt ɔ a kpɛti nyumu ɔmɛ tsuo, nɛ ji nyumuhi nɛ a hwuɔ ta* a tsuo gbo ngɛ nga a nɔ ngɛ a blɔ hiami ɔ mi be nɛ a je Egipt se ɔ. 5 Ni ɔmɛ tsuo nɛ a je Egipt ɔ lɛɛ, a po mɛ momo, se ni ɔmɛ tsuo nɛ a fɔ mɛ ngɛ nga a nɔ ngɛ a blɔ hiami ɔ mi benɛ a je Egipt se ɔ lɛɛ, a pui mɛ. 6 Israel bi ɔmɛ nyɛɛ ngɛ nga a nɔ jeha 40 kɛ ya si benɛ ma a tsuo gbo ta, nɛ ji nyumuhi nɛ a hwuɔ ta nɛ a je Egipt nɛ a bui Yehowa gbi tue ɔ. Yehowa kã mɛ kita kaa e be hae nɛ a na zugba nɛ Yehowa kã a nɛmɛ ɔmɛ kita kaa e kɛ ma ha wɔ ɔ gblegbleegble, zugba nɛ nyɔ nyu kɛ hwo ngɛ bee ngɛ nɔ ɔ. 7 Lɔ ɔ he ɔ, e ha nɛ a binyumu ɔmɛ ba ye a nane mi. Mɛ ji nihi nɛ Yoshua po mɛ ɔ nɛ; a ji mɔmlɔtɔtsɛmɛ ejakaa a pui mɛ ngɛ blɔ hiami ɔ mi.

8 Benɛ a po ma a tsuo ta a, a hi he nɛ a ngɛ ɔ ngɛ sito he ɔ kɛ ya si benɛ a ná he wami ekohu.

9 Kɛkɛ nɛ Yehowa de Yoshua ke: “Mwɔnɛ ɔ, i kpɛne Egipt he guɛ gbemi ɔ kɛ je o nɔ.” Lɔ ɔ he ɔ, a wo lejɛ ɔ biɛ ke Gilgal* kɛ ba si mwɔnɛ ligbi nɛ ɔ.

10 Israel bi ɔmɛ ya nɔ nɛ a to si ngɛ Gilgal, nɛ nyɔhiɔ ɔ we ligbi 14 ɔ gbɔkuɛ ɔ, a ye Hetsɔmi ɔ ngɛ Yeriko nga kplanaa a nɔ. 11 Nɛ Hetsɔmi ɔ nɔ jena a, a bɔni zugba a nɔ niba ní yemi, a ye abolo nɛ masa be mi, kɛ ngma* nɛ a sã ngɛ ligbi nɛ ɔ nɔuu nɔ. 12 Kɛkɛ nɛ ligbi nɛ a ye zugba a nɔ niba ní ɔ eko ɔ we jena a, mana a se po; Israel bi ɔmɛ nɛ mana hu, se a bɔni Kanaan zugba a nɔ niba ní yemi jamɛ a jeha a.

13 Benɛ Yoshua su Yeriko he haa a, e wo e yi nɔ nɛ e na nyumu ko nɛ daa si ngɛ e hɛ mi kɛ e dɛ mi klaate. Yoshua nyɛɛ kɛ su e he, nɛ e bi lɛ ke: “O ngɛ wa blɔ fa mi, aloo o ngɛ wa he nyɛli ɔmɛ a blɔ fa mi?” 14 E he nɔ ke: “Dɛbi, mohu ɔ, i ba kaa Yehowa tabo ɔ nyatsɛ.” Kɛkɛ nɛ Yoshua kplã si nɛ e ngɔ e hɛ mi kɛ bu zugba, nɛ e je bumi kpo kɛ tsɔɔ lɛ, nɛ e bi lɛ ke: “Mɛni ye nyɔmtsɛ ɔ ngɛ nɛ e ma de e sɔmɔlɔ ɔ?” 15 Yehowa tabo ɔ nyatsɛ ɔ ha Yoshua heto ke: “Je o tokota a ngɛ o nane, ejakaa he nɛ o daa si ngɛ ɔ ngɛ klɔuklɔu.” Oya nɔuu nɛ Yoshua pee jã.

6 Jamɛ a be ɔ mi ɔ, Israel bi ɔmɛ a he je ɔ, a ngmɛ Yeriko ma a nya kpɛii; nɔ ko ji kpo, nɛ nɔ ko sɛ we mi.

2 Kɛkɛ nɛ Yehowa de Yoshua ke: “Hyɛ, i ngɔ Yeriko kɛ e matsɛ ɔ kɛ e tatsɛmɛ nɛ a he wa a kɛ wo o dɛ. 3 Nyɛ nyumuhi nɛ nyɛ hwuɔ ta a tsuo, nyɛ si ako kɛ bɔle ma a, nyɛɛ bɔle ma a si kake. Nyɛɛ pee jã ligbi ekpa. 4 Ha nɛ osɔfohi kpaago nɛ a hɛɛ titimati* kpaago ngɛ Daka a hɛ mi. Se ngɛ ligbi kpaagone ɔ nɔ ɔ, nyɛ si ako kɛ bɔle ma a si kpaago, nɛ́ osɔfo ɔmɛ nɛ a kpa titimati ɔmɛ. 5 Ke a kpa titimati ɔ nɛ nyɛ nu e pɛmi ɔ* pɛ ɔ, ni ɔmɛ tsuo nɛ a he ta ose wawɛɛ. Kɛkɛ ɔ, ma a gbogbo ɔ maa nɔ si butuu, nɛ ni ɔmɛ nɛ a sɛ ma a mi, nɔ fɛɛ nɔ nɛ ya e hɛ mi tɛɛ.”

6 Lɔ ɔ he ɔ, Nun binyumu Yoshua tsɛ osɔfo ɔmɛ kɛ kpe nɛ e de mɛ ke: “Nyɛ wo somi daka a, nɛ́ osɔfohi kpaago nɛ a hɛɛ titimati kpaago ngɛ Yehowa Daka a hɛ mi.” 7 Lɔ ɔ se ɔ, e de ni ɔmɛ ke: “Nyɛɛ ya nyɛ hɛ mi nɛ nyɛ si ako kɛ bɔle ma a, nɛ́ tabohi nɛ a hɛɛ ta hwumi ní ɔ nɛ a sɛ Yehowa Daka a hlami.” 8 Nɛ kaa bɔ nɛ Yoshua de ni ɔmɛ ɔ, osɔfo kpaago ɔmɛ nɛ́ a hɛɛ titimati kpaago ɔmɛ ngɛ Yehowa hɛ mi ɔ ya a hɛ mi nɛ a kpa titimati ɔmɛ, nɛ Yehowa somi daka a nyɛɛ a se. 9 Nɛ tabo ɔmɛ nɛ a hɛɛ ta hwumi níhi ɔ sɛ osɔfo ɔmɛ nɛ a ngɛ titimati ɔmɛ kpae ɔ a hlami, nɛ sekpɛ tabo ɔ nyɛɛ Daka a se be mi nɛ a ngɛ nɔ yae nɛ a ngɛ titimati ɔmɛ kpae ɔ.

10 Jehanɛ ɔ, Yoshua fã ni ɔmɛ ke: “Nyɛ ko kpa ngmlaa, nɛ nyɛ ko ha nɛ a nu nyɛ gbi hulɔ. Munyu kake po nɛ ko je nyɛ nya kɛ ya si ligbi nɛ ma de nyɛ ke, ‘Nyɛ kpa ngmlaa!’ Kɛkɛ ɔ, nyɛ kpa ngmlaa.” 11 E ha nɛ a kɛ Yehowa Daka a bɔle ma a, a kɛ bɔle ma a si kake, nɛ lɔ ɔ se ɔ, a kpale kɛ ba sito he ɔ, nɛ a ba hwɔ lejɛ ɔ.

12 E nɔ jena mɔtu ɔ, Yoshua te si mla, nɛ osɔfo ɔmɛ wo Yehowa Daka a, 13 nɛ osɔfohi kpaago nɛ a hɛɛ titimati kpaago nyɛɛ Yehowa Daka a hɛ mi, nɛ a ya nɔ nɛ a kpa titimati ɔmɛ. Tabo ɔmɛ nɛ a hɛɛ ta hwumi níhi ɔ sɛ a hlami, nɛ sekpɛ tabo ɔ nyɛɛ Yehowa Daka a se be mi nɛ a ya nɔ nɛ a ngɛ titimati ɔmɛ kpae ɔ. 14 Ligbi enyɔne ɔ, a si ako kɛ bɔle ma a si kake, nɛ lɔ ɔ se ɔ, a kpale kɛ ba sito he ɔ. Jã nɛ a pee ligbi ekpa.

15 Ligbi kpaagone ɔ, benɛ je na pɛ ɔ, a te si mla, nɛ a si ako kɛ bɔle ma a jã kɛ̃ si kpaago. Jamɛ a ligbi ɔ pɛ nɛ a si ako kɛ bɔle ma a si kpaago. 16 Nɛ ngɛ si kpaagone ɔ nɔ ɔ, osɔfo ɔmɛ kpa titimati ɔmɛ, nɛ Yoshua de ni ɔmɛ ke: “Nyɛ kpa ngmlaa, ejakaa Yehowa ngɔ ma a kɛ ha nyɛ! 17 Á kpata ma a kɛ nɔ́ fɛɛ nɔ́ nɛ ngɛ mi ɔ hɛ mi; Yehowa nɔ́ ji lɛ tsuo. Rahab, nɛ ji tuutuu yo ɔ pɛ nɛ e ma nyɛ maa hi wami mi, e kɛ nihi tsuo nɛ a piɛɛ e he ngɛ e we ɔ mi ɔ, ejakaa e ngɔ tsɔli ɔmɛ nɛ wa tsɔ ɔ kɛ laa. 18 Se nyɛɛ yu nyɛ he ngɛ níhi nɛ e sa kaa a kpata hɛ mi ɔmɛ a he, konɛ nyɛ ko ná nɔ́ ko nɛ e sa kaa a kpata hɛ mi ɔ he akɔnɔ nɛ́ nyɛɛ ngɔ, nɛ́ lɔ ɔ nɛ ba ha nɛ Israel sito he ɔ nɛ plɛ pee nɔ́ ko nɛ a ma kpata hɛ mi kɛ gu haomi nɛ nyɛɛ kɛ maa ba nɔ ɔ nɔ.* 19 Se sika hiɔ ɔ, kɛ sika tsu ɔ, kɛ akɔblee kɛ dade ní ɔmɛ tsuo lɛɛ a ngɛ klɔuklɔu kɛ ha Yehowa. Á ngɔ kɛ ya Yehowa juetli to he ɔ.”

20 Kɛkɛ nɛ benɛ a kpa titimati ɔmɛ ɔ, ni ɔmɛ kpa ngmlaa. Benɛ ni ɔmɛ nu titimati ɔ pɛmi ɔ nɛ́ a he ta ose nɛ nya wa a pɛ ɔ, gbogbo ɔ nɔ si butuu. Lɔ ɔ se ɔ, ni ɔmɛ sɛ ma a mi, nɔ fɛɛ nɔ ya e hɛ mi tɛɛ, nɛ a ngɔ ma a. 21 A ngɔ klaate kɛ kpata níhi tsuo nɛ ngɛ ma a mi ɔ hɛ mi, nyumuhi kɛ yihi, jokuɛwi kɛ nikɔtɔmahi, nahi, jijɔhi, kɛ tejihi.

22 Yoshua de nyumu enyɔ ɔmɛ nɛ a ya kpa ma a si ɔ ke: “Nyɛɛ ya tuutuu yo ɔ we ɔ mi nɛ nyɛ ya je yo ɔ kɛ e we bi ɔmɛ tsuo kpo, kaa bɔ nɛ nyɛ kã lɛ kita a.” 23 Lɔ ɔ he ɔ, nihewi ma si kpali ɔmɛ ya we ɔ mi nɛ a ya je Rahab kpo, e kɛ e tsɛ, e nyɛ, e nyɛminyumu ɔmɛ, kɛ e we bi ɔmɛ tsuo; ee, a je e weku ɔ tsuo kpo, nɛ a ngɔ mɛ kɛ ba he ko ngɛ Israel sito he ɔ se slɔkee.

24 Kɛkɛ nɛ a kɛ la sã ma a kɛ nɔ́ fɛɛ nɔ́ nɛ ngɛ mi ɔ. Se sika hiɔ ɔ, sika tsu ɔ, kɛ akɔblee kɛ dade ní ɔmɛ lɛɛ, a ngɔ kɛ ya wo Yehowa we ɔ juetli to he ɔ. 25 Rahab nɛ ji tuutuu yo ɔ kɛ e tsɛ we mi bi ɔmɛ kɛ e we bi ɔmɛ pɛ ji nihi nɛ Yoshua baa a yi; nɛ e ngɛ Israel kɛ ba si mwɔnɛ ligbi nɛ ɔ, ejakaa e ngɔ tsɔli ɔmɛ nɛ Yoshua tsɔ ke a ya kpa Yeriko ma a si ɔ kɛ laa.

26 Jamɛ a be ɔ mi ɔ, Yoshua kã kita nɛ ɔ:* “Nɔ fɛɛ nɔ nɛ e maa ka kaa e maa ma Yeriko ma nɛ ɔ ekohu ɔ, á gbiɛ lɛ ngɛ Yehowa hɛ mi. Ke e fia e sisi tomi ɔ, e kɛ e kekleekle bi ma tsɔ, nɛ ke e ma e we agbo ɔmɛ ɔ, e kɛ e binakutso ma tsɔ.”

27 Lɔ ɔ he ɔ, Yehowa kɛ Yoshua hi si, nɛ e he biɛ ngɛ zugba a nɔ tsuo.

7 Se Israel bi ɔmɛ yi anɔkuale ngɛ níhi nɛ e sa kaa a kpata hɛ mi ɔ blɔ fa mi, ejakaa Zera binyumu Zabdi binyumu Karmi binyumu Akan nɛ je Yuda wɛtso ɔ mi ɔ muɔɔ níhi nɛ e sa kaa a kpata hɛ mi ɔ eko. Enɛ ɔ he ɔ, Yehowa mi mi wo la kɛ si Israel bi ɔmɛ.

2 Kɛkɛ nɛ Yoshua tsɔ nyumuhi kɛ je Yeriko kɛ ho Ai nɛ kɛ Betaven kɛ we, nɛ e ngɛ Betel puje he je ɔ ya, nɛ e de mɛ ke: “Nyɛɛ kuɔ kɛ ho nɛ nyɛ ya kpa zugba a si.” Lɔ ɔ he ɔ, nyumu ɔmɛ kuɔ kɛ ho nɛ a ya kpa Ai si. 3 Benɛ a kpale kɛ ba Yoshua ngɔ ɔ, a de lɛ ke: “E he hia we kaa ni ɔmɛ tsuo nɛ a kuɔ kɛ ya. Nyumuhi maa pee akpe enyɔ loo akpe etɛ kɛkɛ ma nyɛ maa ye Ai nɔ kunimi. Ko gba ni ɔmɛ tsuo a nya kaa a ya, ejakaa nihi nɛ a ngɛ lejɛ ɔ a he pi.”

4 Lɔ ɔ he ɔ, nyumuhi maa pee 3,000 kuɔ kɛ ho lejɛ ɔ ya, se a tu Ai nyumu ɔmɛ a nya fo. 5 Ai nyumu ɔmɛ gbe nyumuhi 36, nɛ a fiee a se kɛ je ma a agbo ɔ se hluu kɛ ya si Shebarim,* nɛ a ya nɔ nɛ a gbe mɛ ngɛ yoku ɔ kplemi he ɔ. Lɔ ɔ he ɔ, ni ɔmɛ a tsui po, nɛ a kã nya ta.*

6 Kɛkɛ nɛ Yoshua gba e tade ɔ, nɛ e ngɔ e hɛ mi kɛ bu zugba ngɛ Yehowa Daka a hɛ mi kɛ ya si gbɔkuɛ, e kɛ Israel ma nikɔtɔma amɛ, nɛ a ya nɔ nɛ a muɔɔ zu kɛ pue a yi mi. 7 Yoshua de ke: “Ao, Nyɔmtsɛ Matsɛ Yehowa, mɛni he je nɛ o kɛ nimli nɛ ɔmɛ tsuo po Yordan Pa a kɛ ba konɛ o kɛ wɔ nɛ ba wo Amor bi ɔmɛ a dɛ nɛ a kpata wa hɛ mi ɔ? Wa hi Yordan Pa a se* po jinɛ e hi! 8 Oo Yehowa, i kpa mo pɛɛ, amlɔ nɛ ɔ nɛ Israel tu fo* ngɛ e he nyɛli ɔmɛ a hɛ mi nɛ ɔ, mɛni ma de? 9 Ke Kanaan bi ɔmɛ kɛ nihi tsuo nɛ a ngɛ zugba a nɔ ɔ nu he ɔ, a maa bɔle wɔ nɛ a ma tsu wa biɛ ngɛ zugba a nɔ, nɛ mɛni o maa pee ngɛ o biɛ ngua a he?”

10 Yehowa ha Yoshua heto ke: “Tee si! Mɛni he je nɛ o ngɔ o hɛ mi kɛ bu si ɔ? 11 Israel pee yayami. A tɔ̃ ye somi ɔ nɛ i fã mɛ kaa a ye nɔ ɔ nɔ. A muɔɔ níhi nɛ e sa kaa a kpata hɛ mi ɔ eko, a ju, nɛ a kɛ laa ngɛ mɛ nitsɛmɛ a níhi a mi. 12 Enɛ ɔ he ɔ, Israel bi ɔmɛ be nyɛe nɛ a da a he nyɛli ɔmɛ a hɛ mi. A maa kpale a se, nɛ a maa tu a he nyɛli ɔmɛ a nya fo, ejakaa a ba pee nɔ́ ko nɛ e sa kaa a kpata hɛ mi. I be nyɛ he piɛɛe hu kɛ yaa si be nɛ nyɛ ma kpata nɔ́ nɛ e sa kaa a kpata hɛ mi ɔ hɛ mi ngɛ nyɛ kpɛti. 13 Tee si nɛ o tsu ni ɔmɛ a he! De mɛ ke, ‘Hwɔɔ ɔ, nyɛɛ tsu nyɛ he, ejakaa nɔ́ nɛ Yehowa, Israel Mawu ɔ ngɛ dee ji nɛ ɔ nɛ: “Oo Israel, nɔ́ nɛ e sa kaa a kpata hɛ mi ɔ ngɛ nyɛ kpɛti. Nyɛ be nyɛe nɛ nyɛɛ da nyɛ he nyɛli ɔmɛ a hɛ mi kɛ yaa si be nɛ nyɛ ma je nɔ́ nɛ e sa kaa a kpata hɛ mi ɔ kɛ je nyɛ kpɛti. 14 Hwɔɔ mɔtu ɔ, nyɛ ba da si wɛtso nya wɛtso nya, nɛ wɛtso nɛ Yehowa maa hla a maa hɛ lɛ kɛ ba weku nya weku nya, nɛ weku nɛ Yehowa maa hla a maa hɛ lɛ kɛ ba we nya we nya, nɛ we nɛ Yehowa maa hla a mi nyumu ɔmɛ maa hɛ mɛ kɛ ba kakaaka. 15 Nɛ a kɛ la maa sã nɔ nɛ a maa na kaa nɔ́ nɛ e sa kaa a kpata hɛ mi ɔ ngɛ e dɛ ɔ, e kɛ e níhi tsuo, akɛnɛ e tɔ̃ Yehowa somi ɔ nɔ, nɛ e ha nɛ hɛ mi si puemi ba Israel nɔ ɔ he je.”’”

16 Lɔ ɔ he ɔ, e we jena mɔtu ɔ, Yoshua te si mla, nɛ e ha nɛ Israel hɛ lɛ kɛ ba wɛtso nya wɛtso nya, nɛ a hla Yuda wɛtso ɔ. 17 E ha nɛ Yuda weku ɔmɛ hɛ mɛ kɛ ba, nɛ a hla Zera bi ɔmɛ a weku ɔ, nɛ lɔ ɔ se ɔ, e ha nɛ Zera bi ɔmɛ a weku ɔ mi nyumu ɔmɛ hɛ mɛ kɛ ba kakaaka, nɛ a hla Zabdi. 18 Nyagbe ɔ, e ha nɛ Zabdi we ɔ mi nyumu ɔmɛ hɛ mɛ kɛ ba kakaaka, nɛ a hla Zera binyumu Zabdi binyumu Karmi binyumu Akan nɛ je Yuda wɛtso ɔ mi ɔ. 19 Kɛkɛ nɛ Yoshua de Akan ke: “Ye binyumu, i kpa mo pɛɛ nɛ o wo Yehowa, Israel Mawu ɔ hɛ mi nyami, nɛ o jaje o yayami ɔ kɛ tsɔɔ lɛ. I kpa mo pɛɛ, mo de mi nɔ́ nɛ o pee. Koo ngɔ kɛ laa mi.”

20 Akan ha Yoshua heto ke: “Ngɛ anɔkuale mi ɔ, imi lɛ i pee yayami kɛ si Yehowa, Israel Mawu ɔ nɛ, nɛ nɔ́ nɛ i pee ji nɛ ɔ nɛ. 21 Benɛ i na Shinar odehehi a tade ko nɛ ngɛ fɛu, kɛ sika hiɔ shekel* 200, kɛ sika tsu kpɔ nɛ e jiɔmi ji shekel 50 ngɛ ta yibu ní ɔ mi ɔ, ye hɛ kɔ ní ɔmɛ a nɔ, lɔ ɔ he ɔ, i muɔɔ mɛ. Amlɔ nɛ ɔ, i kɛ laa ngɛ zu mi ngɛ ye bo tsu ɔ mi, nɛ sika a ngɛ sisi.”

22 Amlɔ nɔuu ɔ, Yoshua tsɔ tsɔli, nɛ a tu fo kɛ ho bo tsu ɔ mi ya, nɛ a ya na kaa e ngɔ tade ɔ kɛ laa ngɛ e bo tsu ɔ mi, nɛ sika a ngɛ sisi. 23 Lɔ ɔ he ɔ, a je ní ɔmɛ kɛ je bo tsu ɔ mi, nɛ a kɛ ba ha Yoshua kɛ Israel bi ɔmɛ tsuo, nɛ a ngɔ kɛ pue Yehowa hɛ mi. 24 Kɛkɛ nɛ Yoshua kɛ Israel bi ɔmɛ tsuo nɛ a piɛɛ e he ɔ ngɔ Akan nɛ je Zera weku ɔ mi ɔ, kɛ sika hiɔ ɔ, kɛ odehehi a tade ɔ, kɛ sika tsu kpɔ ɔ, kɛ e binyumu ɔmɛ, kɛ e biyi ɔmɛ, kɛ e na amɛ, e teji ɔmɛ, e to ɔmɛ, e bo tsu ɔ, kɛ e nɔ́ fɛɛ nɔ́, nɛ a kɛ mɛ ho Akor Dɔgba a mi ya. 25 Yoshua de ke: “Mɛni he je nɛ o kɛ haomi ba wa nɔ ɔ?* Yehowa kɛ haomi maa ba o nɔ mwɔnɛ ligbi nɛ ɔ.” Kɛkɛ nɛ Israel bi ɔmɛ tsuo fiaa lɛ tɛ, nɛ lɔ ɔ se ɔ, a sã mɛ. Lɔ ɔ he ɔ, a fiaa mɛ tsuo tɛ. 26 Nɛ a to tɛ babauu kɛ pue e nɔ, nɛ e ngɛ kɛ ba si mwɔnɛ ligbi nɛ ɔ. Kɛkɛ nɛ Yehowa we abofu nɛ nya wa a nya ba si. Lɔ ɔ he je nɛ a tsɛɛ lejɛ ɔ ke Akor* Dɔgba kɛ ba si mwɔnɛ ligbi nɛ ɔ nɛ.

8 Kɛkɛ nɛ Yehowa de Yoshua ke: “Koo ye gbeye, nɛ koo nu sawale hulɔ. Ngɔɔ nyumuhi nɛ a hwuɔ ta a tsuo kɛ kuɔ kɛ ho kɛ ya tua Ai. Hyɛ, i ngɔ Ai matsɛ ɔ, e we bi ɔmɛ, e ma a, kɛ e zugba a kɛ wo o dɛ. 2 Moo pee Ai kɛ e matsɛ ɔ kaa bɔ nɛ o pee Yeriko kɛ e matsɛ ɔ, se ma a ta yibu ní ɔmɛ kɛ e lohwe lɛlɛɛ ɔmɛ lɛɛ, nyɛ ma nyɛ maa ha kɛ ha nyɛ he. Moo wo ka ngɛ ma a se je.”

3 Lɔ ɔ he ɔ, Yoshua kɛ nyumuhi nɛ a hwuɔ ta a tsuo kuɔ kɛ ya tua Ai. Yoshua hla tatsɛmɛ nɛ a he wa 30,000 nɛ e wo mɛ blɔ kɛ ho nyɔ mi. 4 E ngɔ fami nɛ ɔ kɛ ha mɛ ke: “Hyɛ, nyɛɛ wo ka ngɛ ma a se je. Nyɛɛ kɛ ma a he nɛ ko kɛ tsɔ, nɛ nyɛ tsuo nyɛɛ pee klaalo. 5 I kɛ nihi nɛ a piɛɛ ye he ɔ tsuo maa su ma a he, nɛ ke a ba tua wɔ kaa kekle ɔ, wa maa tu a nya fo. 6 Ke a je kpo kɛ ba fiee wa se ɔ, wa maa gbla mɛ kɛ je ma a mi, ejakaa a ma de ke, ‘A ngɛ wa nya fo tue kaa kekle ɔ.’ Nɛ wa maa tu a nya fo. 7 Kɛkɛ ɔ, nyɛɛ te si kɛ je ka womi he ɔ, nɛ nyɛ ba ngɔ ma a; Yehowa nyɛ Mawu ɔ maa ngɔ ma a kɛ wo nyɛ dɛ. 8 Ke nyɛ ngɔ ma a pɛ ɔ, nyɛɛ mɛ he la. Nyɛɛ pee kaa bɔ nɛ Yehowa de ɔ. Hyɛ, famihi nɛ i kɛ ngɛ nyɛ hae ji nɛ ɔ nɛ.”

9 Kɛkɛ nɛ Yoshua wo mɛ blɔ kɛ ho, nɛ a si ako kɛ ho ka womi he ɔ ya; a ya laa a he ngɛ Betel kɛ Ai a kpɛti, kɛ yaa Ai pusinɔ he je, be mi nɛ Yoshua hwɔ ni ɔmɛ a ngɔ jamɛ a nyɔ ɔ mi.

10 Yoshua te si mɔtu mla nɛ e bua tabo ɔmɛ a nya,* lɔ ɔ se ɔ, e kɛ Israel nikɔtɔma amɛ nyɛɛ a hɛ mi kɛ ho Ai ya. 11 Nyumuhi nɛ a hwuɔ ta nɛ a piɛɛ e he ɔ tsuo kuɔ kɛ ho nɛ a ya a hɛ mi kɛ ya su ma a nya. A to si kɛ yaa Ai yiti je, nɛ dɔgba a ngɛ a kɛ Ai a kpɛti. 12 Jamɛ a be ɔ mi ɔ, e ngɔ nyumuhi maa pee 5,000, nɛ e ha nɛ a ya wo ka ngɛ Betel kɛ Ai a kpɛti, kɛ yaa ma a pusinɔ he je. 13 Lɔ ɔ he ɔ, ta buli ɔmɛ hiɛhiɛɛ ya to si ngɛ ma a yiti je, nɛ sekpɛ tabo ɔ ngɛ ma a pusinɔ he je, nɛ jamɛ a nyɔ ɔ mi ɔ, Yoshua ya dɔgba a kpɛti.

14 Nɛ benɛ Ai matsɛ ɔ na nɔ́ nɛ ɔ pɛ ɔ, e kɛ ma a mi nyumu ɔmɛ kɛ oya yemi je kpo mɔtu mla konɛ a kɛ Israel bi ɔmɛ ya hwu ta ngɛ he ko nɛ hɛ mi tsɔɔ nga kplanaa a. Se e li kaa a wo e he ka ngɛ ma a se je. 15 Benɛ Ai nyumu ɔmɛ ba tua mɛ ɔ, Yoshua kɛ Israel tsuo tu fo kɛ gu gbɛjegbɛ nɛ yaa nga a nɔ ɔ nɔ. 16 Kɛkɛ nɛ a tsɛ nihi tsuo nɛ a ngɛ ma a mi ɔ kaa a fiee a se; nɛ benɛ a ngɛ Yoshua se fiee ɔ, a gbla mɛ kɛ je ma a mi. 17 Nyumu ko nyumu ko píɛ ngɛ Ai kɛ Betel nɛ e ji kpo kɛ nyɛɛ we Israel se. A si ma a nya kɛ fɔ si gbajaa, nɛ a fiee Israel se.

18 Jehanɛ ɔ, Yehowa de Yoshua ke: “Ngɔɔ akplɔ nɛ ngɛ o dɛ ɔ kɛ tsɔɔ Ai, ejakaa ma ngɔ kɛ wo o dɛ.” Lɔ ɔ he ɔ, Yoshua ngɔ akplɔ nɛ ngɛ e dɛ ɔ kɛ tsɔɔ ma a. 19 Benɛ e kpã e nine mi pɛ ɔ, ka woli ɔmɛ te si esɔesɔ kɛ je he nɛ a ngɛ ɔ, nɛ a tu fo kɛ ya sɛ ma a mi, nɛ a ngɔ ma a. A mɛ ma a he la amlɔ nɔuu.

20 Benɛ Ai nyumu ɔmɛ plɛ a se ɔ, a na nɛ la su ku ngɛ ma a mi jee kɛ ngɛ hiɔwe yae, nɛ a ná we he wami ko nɛ a kɛ maa tu fo kɛ gu he ko he ko. Kɛkɛ nɛ nihi nɛ a ngɛ fo tue kɛ yaa nga a nɔ ɔ plɛ a hɛ mi kɛ kpee nihi nɛ a ngɛ a se fiee ɔ. 21 Benɛ Yoshua kɛ Israel tsuo na kaa ka woli ɔmɛ ngɔ ma a, nɛ́ a na kaa ma a la su ku ɔ ngɛ tee ɔ, a plɛ a se nɛ a tua Ai nyumu ɔmɛ. 22 Nɛ ni kpa amɛ je kpo kɛ je ma a mi kɛ ba konɛ a kɛ mɛ nɛ ba kpe, lɔ ɔ he ɔ, Ai nyumu ɔmɛ tlɔ kpɛ, nɛ Israel bi ɔmɛ a ti ni komɛ ngɛ hiɛ, nɛ ni komɛ hu ngɛ hiɛ, nɛ a gbe mɛ kɛ ya si benɛ nɔ ko píɛ nɛ e yi ná wami aloo e tu fo kɛ je. 23 Se a nu Ai matsɛ ɔ hɛ ngmengmle nɛ a kɛ lɛ ba Yoshua hɛ mi.

24 Benɛ Israel gbe Ai ma a mi bi ɔmɛ tsuo ta ngɛ nga a nɔ ngɛ he nɛ a fiee a se kɛ ya a, nɛ́ a ti nɔ fɛɛ nɔ gbo ngɛ klaate nya a, Israel tsuo kpale kɛ ho Ai ya nɛ a kɛ klaate ya gbe nihi nɛ a ngɛ mi ɔ. 25 Nihi tsuo nɛ a gbo jamɛ a ligbi ɔ, kɛ je nyumu nɔ kɛ ya si yo nɔ ɔ, a yibɔ ji 12,000, nihi tsuo nɛ a ngɛ Ai ɔ. 26 Yoshua ngɔɛ e nine nɛ́ e kɛ kpã akplɔ ɔ mi ɔ kɛ fɔɛ si kɛ ya si be nɛ e kpata nihi nɛ a ngɛ Ai ɔ tsuo a hɛ mi. 27 Se Israel ngɔ jamɛ a ma a lohwe ɔmɛ kɛ e ta yibu ní ɔmɛ kɛ ha a he kaa bɔ nɛ Yehowa fã Yoshua a.

28 Kɛkɛ nɛ Yoshua sã Ai, nɛ e pee lɛ ma doku kɛ yaa neneene kaa bɔ nɛ e ji kɛ ba si mwɔnɛ ligbi nɛ ɔ. 29 E sɛu Ai matsɛ ɔ ngɛ tso nɔ kɛ ya si gbɔkuɛ, nɛ benɛ pu ɔ miɔ nɛ e maa nɔ si ɔ, Yoshua fã ke a je e gbogboe ɔ ngɛ tso ɔ nɔ. Nɛ a ngɔ gbogboe ɔ kɛ ya fɔ ma a agbo ɔ nya nɛ a to tɛ glekuu nitsɛ kɛ pue e nɔ, nɛ e ngɛ lejɛ ɔ kɛ ba si mwɔnɛ ligbi nɛ ɔ.

30 Jamɛ a be ɔ mi nɛ Yoshua ma afɔle sami la tɛ ngɛ Ebal Yoku ɔ nɔ kɛ ha Yehowa, Israel Mawu ɔ nɛ, 31 kaa bɔ nɛ Yehowa sɔmɔlɔ Mose fã Israel bi ɔmɛ ɔ, kɛ jehanɛ hu ɔ, kaa bɔ nɛ a ngma ngɛ Mose Mlaa womi ɔ mi ke: “Nyɛɛ ngɔ tɛ mluku nɛ a kɛ ní tsumi dade ko tɛ he kɛ ma afɔle sami la tɛ” ɔ. A sã sami afɔlehi kɛ tue mi jɔmi afɔlehi ngɛ nɔ kɛ ha Yehowa.

32 Kɛkɛ nɛ e ngma Mlaa a nɛ Mose ngma ngɛ Israel bi ɔmɛ a hɛ mi ɔ eko ngɛ tɛ ɔmɛ a nɔ ngɛ lejɛ ɔ. 33 Israel tsuo, a nikɔtɔma amɛ, ma nɔ hyɛli ɔmɛ, kɛ a kojoli ɔmɛ daa si ngɛ Daka a hiɛ kɛ hiɛ ngɛ Levi osɔfo ɔmɛ nɛ a tloo Yehowa somi daka a hɛ mi. Nibwɔ ɔmɛ kɛ ma bi ɔmɛ tsuo ngɛ lejɛ ɔ. A kpɛti nihi fã da Gerizim Yoku ɔ hɛ mi, nɛ nihi fã nɛ piɛ ɔ hu da Ebal Yoku ɔ hɛ mi (kaa bɔ nɛ Yehowa sɔmɔlɔ Mose fã be ko nɛ be ɔ), konɛ a jɔɔ Israel bi ɔmɛ. 34 Lɔ ɔ se ɔ, e wo e gbi nɔ kɛ kane mlaa a mi munyu ɔmɛ tsuo, jɔɔmi ɔmɛ kɛ gbiɛmi ɔmɛ ngɛ níhi tsuo nɛ a ngma ngɛ Mlaa womi ɔ mi ɔ nya. 35 Munyuhi tsuo nɛ Mose fã a ekoeko be nɛ Yoshua wo we e gbi nɔ kɛ́ kane ngɛ Israel asafo ɔ tsuo, kɛ yi ɔmɛ kɛ jokuɛwi ɔmɛ, kɛ nibwɔ ɔmɛ nɛ a ngɛ* a kpɛti ɔ a hɛ mi.

9 Matsɛmɛ nɛ a ngɛ Yordan Pa a pusinɔ he je ngɛ yoku ɔmɛ a nɔ, kɛ Shefela a, kɛ Wo Ngua a* nya a tsuo, kɛ Lebanon hɛ mi ɔ nu nɔ́ nɛ ba a. Matsɛmɛ nɛ ɔmɛ ji Hit bi, Amor bi, Kanaan bi, Periz bi, Hiv bi, kɛ Yebus bi ɔmɛ a matsɛmɛ. 2 Benɛ a nu nɔ́ nɛ ɔ, mɛ tsuo a bɔni a he nya buami konɛ a hwu kɛ si Yoshua kɛ Israel.

3 Nihi nɛ a ngɛ Gibeon ɔ hu nu nɔ́ nɛ Yoshua pee Yeriko kɛ Ai ɔ. 4 Lɔ ɔ he ɔ, a kɛ ga tsu ní nɛ a ngɔ niye ní kɛ wo kotoku momohi a mi, nɛ a ngɔ lohwe he womi wai tɔ momohi nɛ a gba nɛ a kpɛ kɛ piɛɛ he kɛ fɔ a teji ɔmɛ a nɔ; 5 jehanɛ hu ɔ, a wo tokota momohi nɛ a kpɛ ngɛ a nane, nɛ a wo tade momohi. Abolo nɛ piɛɛ a niye ní ɔ he ɔ tsuo gbli nɛ e ngɛ pipliie. 6 Kɛkɛ nɛ a ho Yoshua ngɔ ya ngɛ sito he ɔ ngɛ Gilgal nɛ a ya de e kɛ Israel nyumu ɔmɛ ke: “Wa je zugba ko nɛ ngɛ tsitsaa nɔ. Amlɔ nɛ ɔ, nyɛɛ kɛ wɔ nɛ so.” 7 Se Israel nyumu ɔmɛ de Hiv bi ɔmɛ ke: “Eko ɔ, nyɛ ngɛ wa kasa nya haa. Lɔ ɔ he ɔ, kɛ e maa pee kɛɛ nɛ waa kɛ nyɛ maa so?” 8 A ha Yoshua heto ke: “Wa ji o sɔmɔli.”*

Kɛkɛ nɛ Yoshua bi mɛ ke: “Mɛnɔmɛ ji nyɛ, nɛ jije nyɛ je kɛ ba?” 9 Kɛkɛ nɛ a de lɛ ke: “O sɔmɔli ɔmɛ je zugba ko nɛ ngɛ tsitsaa nɔ kɛ ba, ngɛ bumi nɛ wa ngɛ kɛ ha Yehowa o Mawu ɔ biɛ ɔ he je, ejakaa wa nu bɔ nɛ e he biɛ ha a, kɛ níhi tsuo nɛ e pee ngɛ Egipt ɔ, 10 kɛ níhi tsuo nɛ e pee Amor bi ɔmɛ a matsɛmɛ enyɔ ɔmɛ nɛ a ngɛ Yordan Pa a se* ɔ, nɛ ji Heshbon Matsɛ Sihon, kɛ Bashan Matsɛ Og nɛ e hi Ashtarot ɔ. 11 Lɔ ɔ he ɔ, wa ma nikɔtɔma amɛ, kɛ nihi tsuo nɛ a ngɛ wa zugba a nɔ ɔ de wɔ ke: ‘Nyɛɛ ngɔ niye ní kɛ to nyɛ he kɛ ha blɔ hiami ɔ, nɛ nyɛɛ kɛ mɛ ya kpe. Nyɛ de mɛ ke: “Wa maa pee nyɛ sɔmɔli; amlɔ nɛ ɔ, nyɛɛ kɛ wɔ nɛ so.”’ 12 Ligbi nɛ wa je wa we ɔmɛ a mi kɛ ma nyɛ ngɔ ɔ, la ngɛ abolo nɛ ɔ nɛ wa ngɔ kaa wa blɔ nɔ niye ní ɔ he. Amlɔ nɛ ɔ, nyɛ nitsɛmɛ nyɛ na kaa e gbli nɛ e ngɛ pipliie. 13 Nɛ benɛ wa ngɔ wai kɛ wo lohwe he womi wai tɔ nɛ ɔmɛ a mi ɔ, a ngɛ ehe, se amlɔ nɛ ɔ, a gba. Nɛ wa tade ɔmɛ kɛ tokota amɛ pee momo ngɛ blɔ ɔ kɛmi ɔ sɔuu he je.”

14 Kɛkɛ nɛ nyumu ɔmɛ ngɔ* a niye ní ɔ eko, se a bi we Yehowa juɛmi. 15 Lɔ ɔ he ɔ, Yoshua kɛ mɛ ye ngɛ tue mi jɔmi mi, nɛ e kɛ mɛ so kaa e ma ha nɛ a hi wami mi, nɛ ganɔ ɔmɛ ngɛ́ asafo ɔ mi ɔ kã mɛ kita jã nɔuu.

16 Benɛ a kɛ mɛ so somi ɔ we ligbi etɛ nyagbe ɔ, a nu kaa a ngɛ a kasa nya haa, ngɛ a kpɔ ɔ mi. 17 Kɛkɛ nɛ Israel bi ɔmɛ pue blɔ nɛ a ba a ma amɛ a mi ngɛ ligbi etɛne ɔ nɔ; a ma amɛ ji Gibeon, Kefira, Beerot, kɛ Kiriat Yearim. 18 Se Israel bi ɔmɛ tua we mɛ, ejakaa asafo ɔ mi ganɔ ɔmɛ ngɔ Yehowa, Israel Mawu ɔ kɛ kã mɛ kita. Lɔ ɔ he ɔ, asafo ɔ tsuo bɔni munyu huitihuiti tumi kɛ ngɛ ganɔ ɔmɛ sie. 19 Kɛkɛ nɛ ganɔ ɔmɛ tsuo de asafo ɔ tsuo ke: “Akɛnɛ waa kɛ Yehowa, Israel Mawu ɔ kã mɛ kita he je ɔ, wa be he blɔ kaa wa yeɔ mɛ awi. 20 Nɔ́ nɛ wa maa pee ji nɛ ɔ nɛ: Wa ma ha nɛ a hi wami mi, konɛ abofu ko nɛ ko ba wa nɔ ngɛ kita nɛ wa kã mɛ ɔ he je.” 21 Nɛ ganɔ ɔmɛ de hu ke: “Á hi wami mi, se á pee lɛ́ nya buali kɛ nyu sali kɛ ha asafo ɔ tsuo.” Si nɛ ganɔ ɔmɛ wo mɛ ji nɛ ɔ nɛ.

22 Jehanɛ ɔ, Yoshua tsɛ mɛ, nɛ e de mɛ ke: “Mɛni he je nɛ nyɛ sisi wɔ nɛ nyɛ de ke, ‘Wa je he ko nɛ kɛ nyɛ he kɛ wawɛɛ,’ be mi nɛ nyɛ ngɛ wa kpɛti nɔuu ɔ? 23 Kɛ je amlɔ nɛ ɔ kɛ yaa a, a gbiɛ nyɛ. Nyɛ ma tsu nyɔguɛhi a ní tsumi kaa lɛ́ nya buali kɛ nyu sali kɛ ha ye Mawu ɔ we ɔ daa.” 24 A ha Yoshua heto ke: “Wa pee jã, ejakaa a de o sɔmɔli ɔmɛ heii kaa Yehowa o Mawu ɔ fã e sɔmɔlɔ Mose kaa e ngɔ zugba a tsuo kɛ ha nyɛ, nɛ́ e kpata zugba a nɔ bi ɔmɛ tsuo a hɛ mi ngɛ nyɛ hɛ mi. Nyɛ he je ɔ, wa ye gbeye ngɛ wa wami he,* nɛ lɔ ɔ he je nɛ wa pee jã a nɛ. 25 Amlɔ nɛ ɔ, wa ngɛ o dɛ mi. Nɔ́ fɛɛ nɔ́ nɛ o susu kaa e hi, nɛ e da a, moo pee wɔ.” 26 Nɛ jã nɛ e pee mɛ; e he a yi wami kɛ je Israel bi ɔmɛ a dɛ mi, nɛ a gbi mɛ. 27 Se jamɛ a ligbi ɔ, Yoshua pee mɛ lɛ́ nya buali kɛ nyu sali kɛ ha asafo ɔ kɛ Yehowa afɔle sami la tɛ ɔ ngɛ he nɛ e* maa hla a, nɛ a pee jã kɛ ba si mwɔnɛ ligbi nɛ ɔ.

10 Benɛ Yerusalem Matsɛ Adonizedek nu kaa Yoshua ngɔ Ai nɛ́ e kpata hɛ mi, nɛ e pee Ai kɛ e matsɛ ɔ kaa bɔ nɛ e pee Yeriko kɛ e matsɛ ɔ, kɛ bɔ nɛ nihi nɛ ngɛ Gibeon ɔ kɛ Israel so tue mi jɔmi somi, nɛ a ngɛ a kpɛti ɔ pɛ ɔ, 2 e tsui po wawɛɛ nitsɛ, ejakaa Gibeon ji ma ngua kaa matsɛmɛ a ma amɛ eko. E kle pe Ai, nɛ nyumuhi nɛ a ngɛ mi ɔ tsuo ji tatsɛmɛ. 3 Lɔ ɔ he ɔ, Yerusalem Matsɛ Adonizedek tsɔ nɛ a kɛ sɛ gbi nɛ ɔ ya ha Hebron Matsɛ Hoham, Yarmut Matsɛ Piram, Lakish Matsɛ Yafia, kɛ Eglon Matsɛ Debir ke: 4 “Nyɛ ba ye bua mi, nɛ wa ya tua Gibeon, ejakaa e kɛ Yoshua kɛ Israel bi ɔmɛ so tue mi jɔmi somi.” 5 Kɛkɛ nɛ Amor bi ɔmɛ a matsɛmɛ enuɔ ɔmɛ nɛ ji, Yerusalem matsɛ ɔ, Hebron matsɛ ɔ, Yarmut matsɛ ɔ, Lakish matsɛ ɔ, kɛ Eglon matsɛ ɔ kɛ a tabo ɔmɛ bua a he nya, nɛ a si ako, nɛ a ya sa Gibeon yi konɛ a kɛ lɛ nɛ hwu ta.

6 Kɛkɛ nɛ Gibeon nyumu ɔmɛ tsɔ nɛ a kɛ sɛ gbi ya ha Yoshua ngɛ Gilgal sito he ɔ ke: “Ko kua o nyɔguɛ ɔmɛ.* Moo ba esɔ! Mo ba kpɔ̃ wɔ nɛ o ye bua wɔ! Amor bi ɔmɛ a matsɛmɛ ɔmɛ tsuo nɛ a ngɛ yoku ɔmɛ a nɔ ɔ kpe kɛ wo wa he.” 7 Lɔ ɔ he ɔ, Yoshua kɛ nyumuhi nɛ a hwuɔ ta a tsuo, kɛ tatsɛmɛ nɛ a he wa a kuɔ kɛ je Gilgal.

8 Kɛkɛ nɛ Yehowa de Yoshua ke: “Koo ye mɛ gbeye, ejakaa i kɛ mɛ wo o dɛ. A ti nɔ ko nɔ ko be nyɛe maa da o hɛ mi.” 9 Benɛ Yoshua si ako nyɔnyɔɔnyɔ kɛ je Gilgal ɔ, e ya tua mɛ tlukaa. 10 Yehowa ha nɛ a jija ngɛ Israel hɛ mi, nɛ a gbe a kpɛti nihi fuu ngɛ Gibeon, nɛ a fiee a se kɛ ya gu blɔ nɛ kuɔ kɛ yaa Bet Horon ɔ nɔ, nɛ a fiaa mɛ ní kɛ pue si hluu kɛ ya si Azeka kɛ Makeda. 11 Benɛ a ngɛ Israel nya fo tue nɛ a su Bet Horon si kplemi he ɔ, Yehowa ha nɛ gbiɛ ngo ngu nguanguahi je hiɔwe ba pue a nɔ hluu kɛ ya si Azeka, nɛ a hɛ mi kpata. Ngɛ anɔkuale mi ɔ, gbiɛ ngo ngu ɔ gbe nihi fuu pe nihi nɛ Israel bi ɔmɛ gbe kɛ klaate.

12 Ligbi nɛ Yehowa ye Amor bi ɔmɛ a nɔ kunimi ngɛ Israel bi ɔmɛ a hɛ mi ɔ, jamɛ a ligbi ɔ, Yoshua de Yehowa ngɛ Israel hɛ mi ke:

13 Lɔ ɔ he ɔ, pu ɔ da si kpɛii, nɛ nyɔhiɔ ɔ nyɛɛ we kɛ ya si be nɛ ma a ye lue ngɛ a he nyɛli ɔmɛ a nɔ. A ngma nɔ́ nɛ ɔ ngɛ Yashar womi ɔ mi. Pu ɔ da si kpɛii ngɛ hiɔwe kpɛti, nɛ e yi esɔ kɛ ya nɔɛ si maa pee ligbi mluku. 14 Ligbi ko kaa jã bɛ hyɛ, eko sɛ we enɛ ɔ hlami, nɛ eko bɛ ngɛ e se hulɔ kaa Yehowa bu adesa ko tue kaa kikɛ nɛ ɔ, ejakaa Yehowa ngɛ hwue ha Israel.

15 Lɔ ɔ se ɔ, Yoshua kɛ Israel tsuo kpale kɛ ho sito he ɔ ya ngɛ Gilgal.

16 Jamɛ a be ɔ mi ɔ, matsɛmɛ enuɔ ɔmɛ tu fo nɛ a ya laa ngɛ Makeda tɛ puɔ ɔ mi. 17 Kɛkɛ nɛ a ya bɔ Yoshua amaniɛ ke: “A na matsɛmɛ enuɔ ɔmɛ nɛ a ya laa ngɛ Makeda tɛ puɔ ɔ mi.” 18 Lɔ ɔ he ɔ, Yoshua de ke: “Nyɛ kpɛne tɛ nguahi kɛ tsi tɛ puɔ ɔ nya, nɛ nyɛ ha nɛ nyumuhi nɛ a bu a he. 19 Se nyɛ ni nɛmɛ nɛ nyɛ piɛ ɔ lɛɛ nyɛ ko da si. Nyɛɛ fiee nyɛ he nyɛli ɔmɛ a se nɛ nyɛɛ fiaa mɛ ní kɛ je a se. Nyɛ ko ngmɛ mɛ blɔ nɛ a sɛ a ma amɛ a mi, ejakaa Yehowa nyɛ Mawu ɔ ngɔ mɛ kɛ wo nyɛ dɛ.”

20 Yoshua kɛ Israel bi ɔmɛ gbe a kpɛti nihi fuu kɛ pue si, nɛ́ lɔ ɔ ji kaa a kpata a hɛ mi ta, nɛ a ti ni nɛmɛ nɛ a yi ná wami, nɛ́ a ku kɛ ya sɛ mahi nɛ a fia gbogbo kɛ wo a he ɔ mi ɔ pɛ nɛ a piɛ. 21 Lɔ ɔ se ɔ, ni ɔmɛ tsuo kpale a se kɛ ba Yoshua ngɔ slɔkee ngɛ sito he nɛ ngɛ Makeda a. Nɔ ko nɔ ko kɛ́ kaa e maa tu munyu ko kɛ si* Israel bi ɔmɛ. 22 Kɛkɛ nɛ Yoshua de ke: “Nyɛ bli tɛ puɔ ɔ nya, nɛ nyɛ je matsɛmɛ enuɔ ɔmɛ kpo kɛ je tɛ puɔ ɔ mi kɛ ba ha mi.” 23 Lɔ ɔ he ɔ, a ngɔ matsɛmɛ enuɔ nɛ ɔmɛ kɛ je tɛ puɔ ɔ mi kɛ ba ha lɛ: Yerusalem matsɛ ɔ, Hebron matsɛ ɔ, Yarmut matsɛ ɔ, Lakish matsɛ ɔ, kɛ Eglon matsɛ ɔ. 24 Benɛ a ngɔ matsɛmɛ nɛ ɔmɛ kɛ ba ha Yoshua a, e tsɛ Israel nyumu ɔmɛ tsuo nɛ e de nyumuhi nɛ a hwɔɔ ta a a nyatsɛmɛ ɔmɛ nɛ a kɛ lɛ ya a ke: “Nyɛɛ ba nyɛ hɛ mi. Nyɛɛ ngɔ nyɛ nane kɛ ma matsɛmɛ nɛ ɔmɛ a kuɛ se.” Lɔ ɔ he ɔ, a ba a hɛ mi nɛ a ngɔ a nane kɛ ma a kuɛ se. 25 Kɛkɛ nɛ Yoshua de mɛ ke: “Nyɛ ko ye gbeye, nɛ nyɛ ko nu sawale hulɔ. Nyɛɛ pee kã, nɛ nyɛ he nɛ wa, ejakaa nɔ́ nɛ Yehowa maa pee nyɛ he nyɛli tsuo nɛ nyɛ ngɛ hwue kɛ si mɛ ɔ ji nɛ ɔ nɔ.”

26 Kɛkɛ nɛ Yoshua fiaa mɛ ní, nɛ e gbe mɛ, nɛ e ngɔ mɛ kɛ kpla si ngɛ tso enuɔ nɔ, nɛ a ya nɔ nɛ a kpla si ngɛ tso ɔmɛ a nɔ kɛ ya si gbɔkuɛ. 27 Benɛ pu nɔ si ɔ, Yoshua fã ke a je mɛ ngɛ tso ɔmɛ a nɔ nɛ a sake mɛ kɛ wo tɛ puɔ nɛ a ya laa ngɛ mi ɔ mi. Nɛ a ngɔ tɛ nguahi kɛ tsi tɛ puɔ ɔ nya, nɛ a ngɛ kɛ ba si mwɔnɛ ligbi nɛ ɔ.

28 Yoshua ngɔ Makeda jamɛ a ligbi ɔ, nɛ e kɛ klaate gbe mɛ. E kpata e matsɛ ɔ kɛ nɔ fɛɛ nɔ* nɛ ngɛ mi ɔ hɛ mi, nɛ e ha we nɛ nɔ ko nɔ ko yi nɛ ná wami. E pee Makeda matsɛ ɔ kaa bɔ nɛ e pee Yeriko matsɛ ɔ.

29 Lɔ ɔ se ɔ, Yoshua kɛ Israel tsuo je Makeda kɛ ho Libna ya, nɛ a kɛ Libna ya hwu. 30 Yehowa ngɔ ma a kɛ e matsɛ ɔ hu kɛ wo Israel dɛ, nɛ a fiaa nɔ fɛɛ nɔ* nɛ ngɛ ma a mi ɔ klaate, nɛ a ha we nɛ nɔ ko nɔ ko yi nɛ ná wami ngɛ ma a mi. Lɔ ɔ he ɔ, a pee matsɛ ɔ kaa bɔ nɛ a pee Yeriko matsɛ ɔ.

31 Lɔ ɔ se ɔ, Yoshua kɛ Israel tsuo je Libna kɛ ho Lakish ya, nɛ a ya to si ngɛ lejɛ ɔ, nɛ a kɛ lɛ ya hwu. 32 Yehowa ngɔ Lakish kɛ wo Israel dɛ, nɛ a ngɔ ma a ngɛ ligbi enyɔne ɔ nɔ. A fiaa nɔ fɛɛ nɔ* nɛ ngɛ ma a mi ɔ klaate, kaa bɔ nɛ a pee Libna a.

33 Kɛkɛ nɛ Gezer Matsɛ Horam kuɔ kɛ ho konɛ e ya ye bua Lakish, se Yoshua fiaa e kɛ e we bi ɔmɛ ní kɛ pue si kɛ ya si benɛ a ti nɔ ko píɛ ngɛ wami mi.

34 Kɛkɛ nɛ Yoshua kɛ Israel tsuo je Lakish kɛ ho Eglon ya, nɛ a ya to si ngɛ lejɛ ɔ, nɛ a kɛ lɛ ya hwu. 35 A ngɔ ma a jamɛ a ligbi ɔ, nɛ a fiaa mɛ klaate. A kpata nɔ fɛɛ nɔ* nɛ ngɛ ma a mi ɔ hɛ mi jamɛ a ligbi ɔ, kaa bɔ nɛ a pee Lakish ɔ.

36 Kɛkɛ nɛ Yoshua kɛ Israel tsuo kuɔ kɛ je Eglon kɛ ho Hebron ya, nɛ a kɛ lɛ ya hwu. 37 A ngɔ ma a, nɛ a fiaa nɔ fɛɛ nɔ* nɛ ngɛ ma a mi ɔ, e matsɛ ɔ kɛ nihi nɛ a ngɛ mahi nɛ bɔle lɛ ɔ a mi ɔ klaate, a ha we nɛ nɔ ko nɔ ko yi nɛ ná wami. E kpata ma a, kɛ nɔ fɛɛ nɔ* nɛ ngɛ mi ɔ hɛ mi kaa bɔ nɛ e pee Eglon ɔ.

38 Nyagbenyagbe ɔ, Yoshua kɛ Israel tsuo plɛ a he, nɛ a ngɔ a hɛ mi kɛ tsɔɔ Debir, nɛ a kɛ lɛ ya hwu. 39 E ngɔ ma a, kɛ e matsɛ ɔ, kɛ mahi nɛ bɔle lɛ ɔ tsuo, nɛ a fiaa mɛ klaate kɛ pue si, nɛ a kpata nɔ fɛɛ nɔ* nɛ ngɛ mi ɔ hɛ mi, nɛ a ha we nɛ nɔ ko nɔ ko yi nɛ ná wami. E pee Debir kɛ e matsɛ ɔ kaa bɔ nɛ e pee Libna kɛ e matsɛ ɔ.

40 Yoshua ye zugba a tsuo nɛ ngɛ yoku ɔmɛ a nɔ ɔ, Negeb ɔ, Shefela a, kɛ kɔ̃ ɔmɛ, kɛ a matsɛmɛ ɔmɛ tsuo a nɔ kunimi, nɛ e ha we nɛ nɔ ko nɔ ko yi nɛ ná wami. E kpata nɔ́ fɛɛ nɔ́ nɛ woɔ mumi ɔ hɛ mi kaa bɔ nɛ Yehowa, Israel Mawu ɔ fã a. 41 Yoshua ye a nɔ kunimi kɛ je Kadesh Barnea kɛ ya si Gaza, kɛ Goshen zugba a tsuo kɛ ya si Gibeon tɔɔ. 42 Yoshua ye matsɛmɛ nɛ ɔmɛ tsuo kɛ a zugba amɛ a nɔ kunimi ngɛ be kake mi, ejakaa Yehowa, Israel Mawu ɔ ji nɔ nɛ e ngɛ hwue kɛ ha Israel. 43 Kɛkɛ nɛ Yoshua kɛ Israel tsuo kpale kɛ ba sito he ɔ ngɛ Gilgal.

11 Benɛ Hazor Matsɛ Yabin nu he pɛ ɔ, e tsɔ nɛ a kɛ sɛ gbi ya ha Madon Matsɛ Yobab, kɛ Shimron matsɛ ɔ, kɛ Akshaf matsɛ ɔ, 2 kɛ matsɛmɛ nɛ a ngɛ yiti je yoku ɔmɛ a nɔ ɔ, ni nɛmɛ nɛ a ngɛ nga a nɔ* ngɛ Kineret woyi je ɔ, ni nɛmɛ nɛ a ngɛ Shefela a, kɛ ni nɛmɛ nɛ a ngɛ Dor kɔ̃ ɔmɛ a mi kɛ yaa pusinɔ he je ɔ, 3 Kanaan bi nɛ a ngɛ puje he je kɛ pusinɔ he je ɔ, Amor bi ɔmɛ, Hit bi ɔmɛ, Periz bi ɔmɛ, Yebus bi ɔmɛ nɛ a ngɛ yoku ɔmɛ a nɔ ɔ, kɛ Hiv bi ɔmɛ nɛ a ngɛ Hermon yoku ɔ sisi ngɛ Mizpa zugba a nɔ ɔ. 4 Lɔ ɔ he ɔ, a je kpo kɛ ba kɛ a tabo ɔmɛ tsuo, a he hiɛ babauu nitsɛ kaa wo nya zia, a kɛ okpɔngɔhi babauu nitsɛ kɛ ta zugba lɛhi hu ba. 5 Matsɛmɛ nɛ ɔmɛ tsuo pee nya kake nɛ a ba kpe, nɛ mɛ tsuo a ba to si ngɛ Merom nyu ɔ he konɛ a kɛ Israel nɛ ba hwu.

6 Kɛkɛ nɛ Yehowa de Yoshua ke: “Koo ye mɛ gbeye, ejakaa hwɔɔ be nɛ ɔ mi ɔ, ma gbe mɛ tsuo kɛ ha Israel. Nyɛɛ poo a we okpɔngɔ ɔmɛ a nane se pani, nɛ nyɛɛ ngɔ la kɛ sã a ta zugba lɛ ɔmɛ.” 7 Kɛkɛ nɛ Yoshua kɛ nyumu ta hwuli ɔmɛ tsuo ya tua mɛ tlukaa ngɛ Merom nyu ɔ he. 8 Yehowa ngɔ mɛ kɛ wo Israel dɛ, nɛ a ye a nɔ kunimi, nɛ a fiee a se hluu kɛ ya si Sidon Ngua a kɛ Misrefot Maim kɛ Mizpa Dɔgba a mi kɛ yaa puje he je, nɛ a fiaa mɛ ní kɛ pue si hluu kɛ ya si benɛ a ti nɔ ko nɔ ko píɛ ngɛ wami mi. 9 Kɛkɛ nɛ Yoshua pee mɛ kaa bɔ nɛ Yehowa de lɛ ɔ; e poo a we okpɔngɔ ɔmɛ a nane se pani, nɛ e ngɔ la kɛ sã a ta zugba lɛ ɔmɛ.

10 Jehanɛ hu ɔ, Yoshua kpale e se, nɛ e ya ngɔ Hazor, nɛ e ngɔ klaate kɛ gbe e matsɛ ɔ, ejakaa sa a, Hazor ji matsɛ yemi nɛ ɔmɛ tsuo a yi. 11 A ngɔ klaate kɛ gbe nɔ fɛɛ nɔ* nɛ ngɛ ma a mi ɔ, nɛ a kpata a hɛ mi. A si we nɔ́ ko nɔ́ ko nɛ woɔ mumi. Kɛkɛ nɛ e ngɔ la kɛ sã Hazor. 12 Yoshua ngɔ matsɛmɛ nɛ ɔmɛ a ma amɛ tsuo, nɛ e kɛ klaate ye a matsɛmɛ ɔmɛ tsuo a nɔ kunimi. E kpata a hɛ mi kaa bɔ nɛ Yehowa sɔmɔlɔ Mose fã a. 13 Se Israel sɛ̃ mahi nɛ ngɛ a kpongu ɔmɛ a nɔ ɔ ekoeko, ja Hazor pɛ; lɛ pɛ ji ma nɛ Yoshua sã. 14 Israel bi ɔmɛ ha ma nɛ ɔmɛ a ta yibu ní kɛ a lohwe ɔmɛ tsuo kɛ ha a he. Se a ngɔ klaate kɛ gbe adesa fɛɛ adesa kɛ ya si be nɛ a kpata nɔ fɛɛ nɔ hɛ mi. A si we nɔ ko nɔ ko nɛ woɔ mumi. 15 Mose fã Yoshua kaa bɔ nɛ Yehowa fã e sɔmɔlɔ Mose ɔ pɛpɛɛpɛ, nɛ jã pɛ nɛ Yoshua pee. Níhi tsuo nɛ Yehowa fã Mose ɔ, Yoshua si we ekoeko.

16 Yoshua ngɔ zugba nɛ ɔmɛ tsuo: yoku ɔ nɔ zugba amɛ, Negeb tsuo, Goshen zugba a tsuo, Shefela a, Araba a, kɛ Israel yoku ɔmɛ kɛ a Shefela a,* 17 kɛ je Halak Yoku nɛ kuɔ kɛ yaa Seir ɔ, hluu kɛ ya si Baal Gad, ngɛ Lebanon Dɔgba a mi, ngɛ Hermon Yoku ɔ sisi, nɛ e nuu a matsɛmɛ ɔmɛ tsuo, nɛ e ye a nɔ kunimi, nɛ e gbe mɛ. 18 Yoshua gba ta kɛ wo matsɛmɛ nɛ ɔmɛ a he be saii. 19 Ma ko ma ko kɛ Israel bi ɔmɛ so we tue mi jɔmi somi, ja Hiv bi ɔmɛ nɛ a ngɛ Gibeon ɔ pɛ. A kɛ ta ye ni kpa amɛ tsuo a nɔ kunimi. 20 Yehowa lɛ ngmɛ blɔ nɛ a kplii a tsui konɛ a gba ta kɛ wo Israel, bɔ nɛ pee nɛ e kpata a hɛ mi nɛ mɔbɔ nami ko kulaa be mi. E biɔ nɛ a kpata a hɛ mi kaa bɔ nɛ Yehowa fã Mose ɔ.

21 Jamɛ a be ɔ mi ɔ, Yoshua bɛɛ Anak bi ɔmɛ kɛ je yoku ɔmɛ a nɔ, kɛ je Hebron, Debir, Anab, kɛ Yuda yoku ɔmɛ a nɔ tsuo, kɛ Israel yoku ɔmɛ a nɔ tsuo. Yoshua kpata a kɛ a ma amɛ a hɛ mi. 22 Anak bi ɔmɛ a ti nɔ ko píɛ ngɛ Israel bi ɔmɛ a zugba a nɔ; a tlɔ Gaza, Gat, kɛ Ashdod pɛ. 23 Lɔ ɔ he ɔ, Yoshua ye zugba a tsuo nɔ kaa bɔ nɛ Yehowa wo Mose si ɔ, nɛ Yoshua kɛ ha Israel bi ɔmɛ kaa a weto ní ngɛ a blɔ fami nɔ́ nɛ e sa kaa a ná a nya, konɛ a gba kɛ ha a wɛtso ɔmɛ. Nɛ ta se po ngɛ zugba a nɔ.

12 Jehanɛ ɔ, zugba a nɔ matsɛmɛ nɛ Israel bi ɔmɛ ye a nɔ kunimi, nɛ ji nihi nɛ Israel bi ɔmɛ ngɔ a weto ní ngɛ Yordan puje he je, kɛ je Arnon Dɔgba a* mi kɛ ya si Hermon Yoku ɔ nɔ, kɛ Araba a tsuo kɛ yaa puje he je ɔ ji nɛ ɔmɛ nɛ: 2 Amor bi ɔmɛ a matsɛ Sihon, nɔ nɛ hi Heshbon nɛ e ye nɔ kɛ je Aroer nɛ ngɛ Arnon Dɔgba a* nya a, kɛ jehanɛ se hu kɛ je dɔgba a kpɛti, kɛ Gilead fã hluu kɛ ya si Yabok Dɔgba a* mi, nɛ ji Amon bi ɔmɛ a huzu ɔ. 3 Jehanɛ hu ɔ, e ye nɔ ngɛ Araba hluu kɛ ya si Kineret Wo ɔ* he, kɛ yaa puje he je, hluu kɛ ya si Araba Wo ɔ, Ngo Wo ɔ,* ngɛ puje he blɔ kɛ yaa Bet Yeshimot, kɛ jehanɛ se hu kɛ yaa woyi je ngɛ Pisga yoku ɔ sisi.

4 A ngɔ Bashan Matsɛ Og zugba a hulɔ. E ji Refaim bi ɔmɛ nɛ a piɛ ɔ a ti nɔ kake nɛ e hi Ashtarot kɛ Edrei, 5 nɛ e ye nɔ ngɛ Hermon Yoku ɔ nɔ, ngɛ Saleka, kɛ Bashan tsuo, hluu kɛ ya si Geshur bi ɔmɛ kɛ Maakat bi ɔmɛ a huzu ɔ nya, kɛ Gilead fã, kɛ ya si Heshbon Matsɛ Sihon zugba a nya.

6 Yehowa sɔmɔlɔ Mose kɛ Israel bi ɔmɛ ye a nɔ kunimi, nɛ lɔ ɔ se ɔ, Yehowa sɔmɔlɔ Mose ngɔ a zugba a kɛ ha Reuben bi ɔmɛ, Gad bi ɔmɛ, kɛ Manase wɛtso fã a kaa a weto ní.

7 Ni nɛ ɔmɛ ji zugba a nɔ matsɛmɛ nɛ Yoshua kɛ Israel bi ɔmɛ ye a nɔ kunimi ngɛ Yordan Pa a pusinɔ he je, kɛ je Baal Gad ngɛ Lebanon Dɔgba a mi, hluu kɛ ya si Halak Yoku ɔ nɛ kuɔ kɛ yaa Seir ɔ he, nɛ lɔ ɔ se ɔ, Yoshua ngɔ a zugba a kɛ ha Israel wɛtso ɔmɛ kaa a weto ní ngɛ a blɔ fami nɔ́ nɛ e sa kaa a ná a nya, 8 ngɛ yoku ɔmɛ a nɔ, ngɛ Shefela a, ngɛ Araba a, ngɛ yoku ɔmɛ a he, ngɛ nga a nɔ, kɛ jehanɛ se hu ɔ, ngɛ Negeb ɔ. Lejɛ ɔ nɛ Hit bi ɔmɛ, Amor bi ɔmɛ, Kanaan bi ɔmɛ, Periz bi ɔmɛ, Hiv bi ɔmɛ, kɛ Yebus bi ɔmɛ hi. Matsɛmɛ ɔmɛ ji nɛ ɔ nɛ:

13 Jehanɛ ɔ, Yoshua ba bwɔ nɛ e jeha ya hɛ mi. Lɔ ɔ he ɔ, Yehowa de lɛ ke: “O bwɔ nɛ o jeha ya hɛ mi; se zugba nɛ piɛ nɛ a maa ngɔ* ɔ hiɛ. 2 Zugba nɛ piɛ ɔ ji nɛ ɔ nɛ: Filisti bi ɔmɛ a kpokpa a tsuo, kɛ Geshur bi ɔmɛ tsuo a nɔ́ ɔ, 3 (kɛ je Nilo ɔ kɔni* ɔ nɛ ngɛ Egipt puje he blɔ* ɔ kɛ ya si Ekron huzu ɔ nya ngɛ yiti je, he nɛ be ko nɛ be ɔ, a le lɛ kaa e ji Kanaan bi a zugba a) kɛ Filisti bi ɔmɛ a nyɔmtsɛmɛ enuɔ ɔmɛ a nɔ́ ɔ: Gaza, Ashdod, Ashkelon, Gat, kɛ Ekron; kɛ Avim bi ɔmɛ a nɔ́ ɔ 4 kɛ ya si woyi je; kɛ Kanaan bi ɔmɛ a zugba a tsuo; kɛ Meara nɛ ji Sidon bi ɔmɛ a nɔ́ ɔ, hluu kɛ ya si Afek, kɛ jehanɛ hu kɛ ya si Amor bi ɔmɛ a huzu ɔ nya; 5 kɛ Gebal bi ɔmɛ a zugba a, kɛ Lebanon tsuo kɛ yaa puje he blɔ, kɛ je Baal Gad ngɛ Hermon Yoku ɔ sisi kɛ ya si Lebo Hamat;* 6 kɛ nihi tsuo nɛ a ngɛ yoku ɔmɛ a nɔ kɛ je Lebanon kɛ ya si Misrefot Maim; kɛ Sidon bi ɔmɛ tsuo. Ma fiee mɛ kɛ je Israel bi ɔmɛ a hɛ mi. Nɔ́ nɛ e sa kaa o pee kɛkɛ ji, o ngɔ kɛ ha Israel kaa weto ní kaa bɔ nɛ i fã mo ɔ. 7 Jehanɛ ɔ, mo gba zugba nɛ ɔ kaa weto ní kɛ ha wɛtso nɛɛ ɔmɛ kɛ Manase wɛtso fã a.”

8 Wɛtso fã nɛ piɛ ɔ, kɛ Ruben bi ɔmɛ kɛ Gad bi ɔmɛ ngɔ a weto ní nɛ Mose kɛ ha mɛ ɔ ngɛ Yordan Pa a puje he je kaa bɔ nɛ Yehowa sɔmɔlɔ Mose ngɔ kɛ ha mɛ ɔ: 9 kɛ je Aroer nɛ ngɛ Arnon Dɔgba a* nya a, kɛ ma a nɛ ngɛ dɔgba a kpɛti ɔ, kɛ Medeba yoku nɛ e yi mi fɔɔ si tɛtlɛɛ ɔ tsuo hluu kɛ ya si Dibon tɔɔ; 10 kɛ Amor bi ɔmɛ a Matsɛ Sihon nɛ e ye nɔ ngɛ Heshbon ɔ ma amɛ tsuo, kɛ ya si Amon bi ɔmɛ a huzu ɔ nya; 11 kɛ jehanɛ hu ɔ, Gilead kɛ Geshur bi ɔmɛ kɛ Maakat bi ɔmɛ a zugba a, kɛ Hermon Yoku ɔ tsuo, kɛ Bashan tsuo, hluu kɛ ya si Saleka tɔɔ; 12 Og nɛ ngɛ Bashan ɔ, nɔ nɛ e ye nɔ ngɛ Ashtarot kɛ Edrei ɔ matsɛ yemi he ɔmɛ tsuo. (E ji Refaim bi nɛ a piɛ ɔ a ti nɔ kake.) Mose ye a nɔ kunimi nɛ e fiee mɛ. 13 Se Israel bi ɔmɛ fiee we Geshur bi ɔmɛ kɛ Maakat bi ɔmɛ, ejakaa Geshur kɛ Maakat ngɛ Israel bi ɔmɛ a kpɛti kɛ ba si mwɔnɛ ligbi nɛ ɔ.

14 Levi bi ɔmɛ a wɛtso ɔ pɛ nɛ e ha we mɛ weto ní. Afɔlehi nɛ a kɛ la sãã ha Yehowa, Israel Mawu ɔ ji a weto ní kaa bɔ nɛ e wo mɛ si ɔ.

15 Kɛkɛ nɛ Mose ha Ruben bi ɔmɛ weto ní ngɛ a weku ɔmɛ a nya, 16 Nɛ a zugba a je Aroer nɛ ngɛ Arnon Dɔgba a* nya a, kɛ ma nɛ ngɛ dɔgba a kpɛti ɔ, kɛ yoku nɛ e yi mi fɔɔ si tɛtlɛɛ nɛ ngɛ Medeba kasa nya a tsuo; 17 kɛ Heshbon kɛ mahi nɛ a bɔle lɛ ɔ tsuo nɛ a ngɛ yoku nɛ e yi mi fɔɔ si tɛtlɛɛ ɔ nɔ ɔ, Dibon, Bamot Baal, Bet Baalmeon, 18 Yahaz, Kedemot, Mefaat, 19 Kiriataim, Sibma, kɛ Zeretshahar nɛ ngɛ dɔgba a yoku ɔ nɔ, 20 Bet Peor, Pisga yoku ɔ he, Bet Yeshimot, 21 mahi tsuo nɛ a ngɛ yoku nɛ e yi mi fɔɔ si tɛtlɛɛ ɔ nɔ ɔ, kɛ Amor bi ɔmɛ a Matsɛ Sihon nɛ e ye nɔ ngɛ Heshbon ɔ matsɛ yemi he ɔmɛ tsuo. Mose ye e kɛ Midian bi ɔmɛ a ganɔhi Evi, Rekem, Zur, Hur, kɛ Reba, nɛ a ji matsɛmɛ nɛ a ngɛ Sihon sisi nɛ a hi zugba a nɔ ɔ a nɔ kunimi. 22 Israel bi ɔmɛ kɛ klaate gbe Beor binyumu Balaam, nɛ ji klaalɔ ɔ kɛ piɛɛ nihi nɛ a gbe mɛ ɔ a he ɔ. 23 Ruben bi ɔmɛ a huzu ji Yordan Pa a; nɛ zugba nɛ ɔ ji Ruben bi ɔmɛ a weto ní ngɛ a weku ɔmɛ a nya, kɛ ma amɛ kɛ a hi he ɔmɛ.

24 Jehanɛ se hu ɔ, Mose ngɔ weto ní kɛ ha Gad wɛtso ɔ, nɛ ji Gad bi ɔmɛ ngɛ a weku ɔmɛ a nya, 25 nɛ a zugba a ji Yazer, kɛ Gilead ma amɛ tsuo, kɛ Amon bi ɔmɛ a zugba a fã, kɛ ya si Aroer nɛ hɛ mi tsɔɔ Raba a; 26 kɛ jehanɛ se hu kɛ je Heshbon kɛ ya si Ramat Mizpa kɛ Betonim, kɛ jehanɛ hu kɛ je Mahanaim kɛ ya si Debir huzu ɔ nya; 27 nɛ ngɛ dɔgba a mi ɔ, Bet Haran, Betnimra, Sukot, kɛ Zafon, nɛ ji Heshbon Matsɛ Sihon matsɛ yemi he ɔmɛ nɛ piɛ ɔ, nɛ Yordan Pa a ji e huzu kɛ je Kineret Wo ɔ* nyagbe he nɛ ba si wawɛɛ ɔ, ngɛ Yordan Pa a puje he je. 28 Enɛ ɔ ji Gad bi ɔmɛ a weto ní ngɛ a weku ɔmɛ a nya, kɛ ma amɛ kɛ a hi he ɔmɛ.

29 Jehanɛ hu ɔ, Mose ngɔ weto ní kɛ ha Manase wɛtso fã a, e kɛ ha Manase wɛtso fã a ngɛ a weku ɔmɛ a nya. 30 Nɛ a zugba a je Mahanaim kɛ ya gu Bashan tsuo, Bashan Matsɛ Og matsɛ yemi he ɔmɛ tsuo, kɛ Yair nɛ ngɛ Bashan ɔ bo tsu kɔpe ɔmɛ tsuo, mahi 60. 31 Nɛ e ngɔ Gilead fã, kɛ Ashtarot kɛ Edrei, Og nɛ ngɛ Bashan ɔ matsɛ yemi he ɔmɛ ɔ kɛ ha Manase binyumu Makir binyumu ɔmɛ, e kɛ ha Makir binyumu ɔmɛ fã ngɛ a weku ɔmɛ a nya.

32 Gbosi níhi nɛ Mose kɛ ha mɛ ngɛ Moab nga kplanaa nɔ ngɛ Yordan Pa a se, ngɛ Yeriko puje he ɔ ji nɛ ɔmɛ nɛ.

33 Se Levi bi ɔmɛ a wɛtso ɔ lɛɛ, Mose ha we mɛ weto ní ko. Yehowa, Israel Mawu ɔ ji a blɔ fa mi nɔ́ kaa bɔ nɛ e wo mɛ si ɔ.

14 Enɛ ɔ ji weto ní nɛ Israel bi ɔmɛ a nine su nɔ ngɛ Kanaan zugba a nɔ. Osɔfo Eleazar kɛ Nun bi Yoshua kɛ a tsɛmɛ ɔmɛ a weku ɔmɛ a nyatsɛmɛ ɔmɛ lɛ a gba weto ní ɔ kɛ ha mɛ. 2 A fɔ̃ sɔ* kɛ gba weto ní ɔ kɛ ha mɛ, kaa bɔ nɛ Yehowa gu Mose nɔ kɛ fã kaa a pee ha wɛtso nɛɛ kɛ fã a. 3 Mose ha wɛtso enyɔ kɛ fã a a weto ní ngɛ Yordan Pa a se* momo, se Levi bi ɔmɛ lɛɛ, e ha we mɛ weto ní ngɛ a kpɛti. 4 A bu Yosef sisi bimɛ ɔmɛ kaa wɛtso enyɔ, Manase kɛ Efraim. Levi wɛtso ɔ lɛɛ a ha we mɛ zugba a eko. Se a ha mɛ mahi nɛ a maa hi mi kɛ lohwehi a ní yemi hehi kɛ ha a lohwe ɔmɛ kɛ he nɛ a kɛ a níhi ma pue. 5 Lɔ ɔ he ɔ, Israel bi ɔmɛ gba zugba a kaa bɔ nɛ Yehowa fã Mose ɔ pɛpɛɛpɛ.

6 Kɛkɛ nɛ Yuda nyumu ɔmɛ ba Yoshua ngɔ ngɛ Gilgal, nɛ Yefune nɛ je Keniz ɔ binyumu Kaleb de lɛ ke: Mo nitsɛ o le nɔ́ nɛ Yehowa de kɛ kɔ i kɛ mo wa he kɛ tsɔɔ anɔkuale Mawu nɔmlɔ Mose ngɛ Kadesh Barnea. 7 Benɛ Yehowa sɔmɔlɔ Mose tsɔ mi kɛ je Kadesh Barnea ke ma ya slaa zugba a, jamɛ a be ɔ, i ye jeha 40. I ba bɔ lɛ nɔ́ nɛ i ya na a pɛpɛɛpɛ.* 8 Ye nyɛmimɛ ɔmɛ nɛ a kɛ mi ya a ha nɛ ma a tsui po,* se imi lɛɛ, i kɛ ye tsui tsuo nyɛɛ Yehowa ye Mawu ɔ se. 9 Jamɛ a ligbi ɔ, Mose kã kita nɛ e de ke: ‘Zugba nɛ o kɛ o nane nyɛɛ nɔ ɔ maa pee o kɛ o bimɛ nyɛ weto ní kɛ ya neneene, ejakaa o kɛ o tsui tsuo nyɛɛ Yehowa ye Mawu ɔ se.’ 10 Jehanɛ ɔ, kaa bɔ nɛ Yehowa wo si ɔ, e baa ye yi jeha 45 nɛ ɔ, kɛ je be nɛ Yehowa wo Mose si benɛ Israel bi ɔmɛ nyɛɛ nga a nɔ ɔ; I ngɛ wami mi loloolo kɛ ba si mwɔnɛ ɔ, nɛ i ye jeha 85. 11 Nɛ bɔ nɛ i ngɛ he wami benɛ Mose tsɔ mi ɔ, jã kɛ̃ nɛ i ngɛ mwɔnɛ ɔ. He wami nɛ i ngɛ jamɛ a be ɔ, jamɛ a he wami ɔ nɔuu nɛ i ngɛ amlɔ nɛ ɔ nɛ ma nyɛ kɛ hwu ta nɛ ma kɛ pee ní kpahi hulɔ. 12 Lɔ ɔ he ɔ, ngɔɔ yoku ɔmɛ a nɔ zugba amɛ nɛ Yehowa wo he si ɔ kɛ ha mi. E ngɛ mi kaa jamɛ a ligbi ɔ, o nu kaa a ke Anak bi ngɛ lejɛ ɔ, nɛ a ngɛ ma nguahi nɛ a fia gbogbo kɛ wo he. Se bɔ fɛɛ bɔ nɛ ji ɔ,* Yehowa maa piɛ ye he, nɛ ma fiee mɛ* kaa bɔ nɛ Yehowa wo si ɔ.

13 Kɛkɛ nɛ Yoshua jɔɔ Yefune binyumu Kaleb, nɛ e ngɔ Hebron kɛ ha lɛ kaa e weto ní. 14 Lɔ ɔ he je nɛ Hebron ba pee Yefune nɛ je Keniz ɔ binyumu Kaleb weto ní kɛ ba si mwɔnɛ ɔ nɛ, ejakaa e nyɛɛ Yehowa, Israel Mawu ɔ se kɛ e tsui tsuo. 15 Be ko nɛ be ɔ, Hebron biɛ ji Kiriat Arba (Arba ji nɔmlɔ ngua ngɛ Anak bi ɔmɛ a kpɛti). Nɛ ta se po ngɛ zugba a nɔ.

15 Zugba nɛ a ha* Yuda wɛtso ɔ ngɛ a wekuhi a nya a huzu ɔ ya gu Edom, Zin nga kplanaa a nɔ, kɛ ya be ngɛ Negeb woyi je. 2 Woyi je huzu ɔ je Ngo Wo ɔ* nyagbe he ɔ, kɛ je wo ɔ nya ngɛ wo ɔ woyi je. 3 Nɛ e tsa nɔ ngɛ woyi je ɔ kɛ kuɔ kɛ ho Akrabim ya, nɛ e po mi kɛ ho Zin ya, nɛ e kuɔ kɛ je woyi je ɔ kɛ ho Kadesh Barnea ya, nɛ e be kɛ ya gu Hezron, nɛ e kuɔ kɛ ya be ngɛ Adar, nɛ e lɔgɔ si kɛ ya gu Karka. 4 Huzu ɔ ya gu Azmon, nɛ e tsa nɔ kɛ ho Egipt Dɔ* ɔ mi ya, nɛ e ya pi Wo ɔ. Huzu ɔ nɛ ngɛ woyi je ɔ ji nɛ ɔ nɛ.

5 Huzu ɔ nɛ ngɛ puje he je ɔ je Ngo Wo ɔ* nya kɛ ya si he nɛ Yordan Pa a kɛ e nya wo Ngo Wo ɔ mi ngɛ ɔ. Nɛ huzu ɔ nɛ ngɛ yiti je ɔ je wo ɔ nya he nɛ Yordan Pa a kɛ e nya wo Ngo Wo ɔ mi ngɛ ɔ. 6 Huzu ɔ kuɔ kɛ ya gu Bet Hogla, nɛ e po mi kɛ gu Bet Araba yiti je, nɛ e kuɔ kɛ ho Ruben binyumu Bohan tɛ ɔ he ya. 7 Huzu ɔ kuɔ kɛ ya gu Debir ngɛ Akor Dɔgba a mi, nɛ e lɔgɔ kɛ gu yiti je kɛ ya Gilgal ngɛ he nɛ a kuɔ kɛ yaa Adumim ɔ hɛ mi ngɛ dɔ ɔ woyi je, nɛ huzu ɔ po mi kɛ gu Enshemesh nyu ɔmɛ a he, nɛ e ya gbe nya ngɛ Enrogel. 8 Huzu ɔ kuɔ kɛ ya gu Hinom Binyumu ɔ Dɔgba a nya kɛ be ngɛ Yebus bi ɔmɛ a yoku ɔ kasa he ngɛ woyi je, nɛ ji Yerusalem, nɛ huzu ɔ kuɔ kɛ gu yoku ɔ nɛ e hɛ mi tsɔɔ Hinom Dɔgba a pusinɔ he je ɔ yi mi ngɛ Refaim Dɔgba a yiti je ɔ nyagbe he ɔ. 9 Huzu ɔ je yoku ɔ yi mi kɛ ya Neftoa nyu hɛngmɛ ɔ he, nɛ e tsa nɔ kɛ ya gu mahi nɛ a ngɛ Efron yoku ɔ nɔ ɔ a he; nɛ e be kɛ ho Baala, nɛ ji, Kiriat Yearim ya. 10 Huzu ɔ lɔgɔ si kɛ je Baala pusinɔ he je kɛ ho Seir Yoku ɔ nɔ ya, nɛ e po mi kɛ gu Yearim Yoku ɔ, nɛ ji Kesalon ɔ he ngɛ yiti je, nɛ e kple kɛ ho Bet Shemesh ya, nɛ e po mi kɛ ya Timna. 11 Huzu ɔ tsa nɔ kɛ gu Ekron yoku ɔ he ngɛ yiti je kɛ ho Shikeron ya, nɛ e po mi kɛ ho Baala Yoku ɔ nɔ ya, nɛ e tsa nɔ kɛ ho Yamnia ya, nɛ e ya gbe nya ngɛ wo ɔ nya.

12 Pusinɔ he je huzu ɔ ji Wo Ngua a* nya. Enɛ ɔ ji Yuda sisi bimɛ ɔmɛ a huzu ɔmɛ tsuo a nya, ngɛ a wekuhi a nya.

13 Yefune binyumu Kaleb lɛɛ, Yoshua ha lɛ e blɔ fa mi nɔ́ ngɛ Yuda sisi bimɛ ɔmɛ a kpɛti kaa bɔ nɛ Yehowa fã Yoshua a, e ha lɛ Kiriat Arba (Arba ji Anak tsɛ), nɛ ji Hebron. 14 Lɔ ɔ he ɔ, Kaleb fiee Anak binyumuhi etɛ ɔmɛ, mɛ ji: Sheshai, Ahiman, kɛ Talmai, nɛ a ji Anak sisi bimɛ ɔ. 15 Lɔ ɔ se ɔ, e je lejɛ ɔ nɛ e kuɔ kɛ ya tua nihi nɛ a ngɛ Debir ɔ. (Be ko nɛ be ɔ, a tsɛɛ Debir ke Kiriat Sefer.) 16 Kɛkɛ nɛ Kaleb de ke: “Nyumu nɛ ma kpata Kiriat Sefer hɛ mi nɛ e maa ngɔ ma a, ma ngɔ ye biyo Aksa kɛ ha lɛ nɛ e ngɔ lɛ kaa e yo.” 17 Nɛ Otniel, Kaleb nyɛminyumu Kenaz binyumu ɔ ya ngɔ ma a. Enɛ ɔ he ɔ, e ngɔ e biyo Aksa kɛ ha lɛ, nɛ e ngɔ lɛ kaa e yo. 18 Benɛ Aksa yaa we mi ɔ, e wo e huno ɔ yi mi kaa e ya bi e tsɛ* ɔ nɛ e ha lɛ zugba. Kɛkɛ nɛ Aksa kple si ngɛ e teji ɔ nɔ.* Kaleb bi lɛ ke: “Mɛni o ngɛ hlae?” 19 E de lɛ ke: “I kpa mo pɛɛ nɛ o jɔɔ mi, ejakaa o ha mi zugba ngɛ woyi je;* ngɔɔ Gulot Maim* hu kɛ piɛɛ he ha mi.” Lɔ ɔ he ɔ, e ha lɛ Yiti Je Gulot kɛ Dɔ Si Je Gulot.

20 Weto ní nɛ Yuda wɛtso ɔ ná ngɛ a wekuhi a nya ji nɛ ɔ nɛ.

21 Mahi nɛ Yuda wɛtso ɔ ná ngɛ woyi je kɛ yaa Edom huzu ɔ nɔ ɔ ji nɛ ɔ nɛ: Kabzeel, Eder, Yagur, 22 Kina, Dimona, Adada, 23 Kedesh, Hazor, Itnan, 24 Zif, Telem, Bealot, 25 Hazor Hadata, Keriot Hezron, nɛ ji, Hazor, 26 Amam, Shema, Molada, 27 Hazar Gada, Heshmon, Betpelet, 28 Hazar shual, Beersheba, Biziotia, 29 Baala, Iyim, Ezem, 30 Eltolad, Kesil, Horma, 31 Ziklag, Madmana, Sansana, 32 Lebaot, Shilhim, Ain, kɛ Rimon; mahi 29 kɛ a he kɔpehi.

33 Mahi nɛ a ngɛ Shefela a ji nɛ ɔ nɛ: Eshtaol, Zora, Ashna, 34 Zanoa, Enganim, Tapua, Enam, 35 Yarmut, Adulam, Soko, Azeka, 36 Shaaraim, Aditaim, Gedera, kɛ Gederotaim;* mahi 14 kɛ a he kɔpehi.

37 Zenan, Hadasha, Migdalgad, 38 Dilean, Mizpa, Yokteel, 39 Lakish, Bozkat, Eglon, 40 Kabon, Lamam, Kitlish, 41 Gederot, Betdagon, Naama kɛ Makeda; mahi 16 kɛ a he kɔpehi.

42 Libna, Eter, Ashan, 43 Ifta, Ashna, Nezib, 44 Keila, Akzib, kɛ Maresha; mahi nɛɛ kɛ a he kɔpehi.

45 Ekron, kɛ mahi nɛ bɔle lɛ ɔ* kɛ e he kɔpehi; 46 kɛ je Ekron pusinɔ he je kɛ kpokpahi tsuo nɛ ngɛ e kasa nya a kɛ a he kɔpehi.

47 Ashdod, kɛ mahi nɛ bɔle lɛ ɔ* kɛ e he kɔpehi; Gaza kɛ e he mahi kɛ kɔpehi; a zugba a tsa nɔ kɛ ya si Egipt Dɔ ɔ, Wo Ngua a* kɛ e nya ma amɛ.

48 Mahi nɛ ngɛ yoku ɔmɛ a nɔ ji, Shamir, Yatir, Soko, 49 Dana, Kiriat Sana nɛ ji Debir, 50 Anab, Eshtemoa, Anim, 51 Goshem, Holon, kɛ Gilo; mahi 11 kɛ a he kɔpehi.

52 Arab, Duma, Eshan, 53 Yanim, Bet Tapua, Afeka, 54 Humta, Kiriat Arba nɛ ji Hebron, kɛ Zior; mahi nɛɛ kɛ a he kɔpehi.

55 Maon, Karmel, Zif, Yuta, 56 Yezreel, Yokdeam, Zamoa, 57 Kain, Gibea, kɛ Timna; mahi nyɔngma kɛ a he kɔpehi.

58 Halhul, Betzur, Gedor, 59 Maarat, Betanot, kɛ Eltekon; mahi ekpa kɛ a he kɔpehi.

60 Kiriat Baal nɛ ji Kariat Yearim, kɛ Raba; mahi enyɔ kɛ a he kɔpehi.

61 Mahi nɛ ngɛ nga kplanaa a nɔ ji Bet Araba, Midin, Sekaka, 62 Nibshan, Ngo Ma a, kɛ Engedi; mahi ekpa kɛ a he kɔpehi.

63 Se Yebus bi ɔmɛ nɛ a ngɛ Yerusalem ɔ lɛɛ, Yuda bi ɔmɛ nyɛ we nɛ a fiee mɛ kɛ je. Lɔ ɔ he ɔ, Yebus bi ɔmɛ kɛ Yuda bi ɔmɛ ya nɔ nɛ a hi Yerusalem kɛ ba si mwɔnɛ ɔ.

16 Zugba nɛ a fɔ̃ sɔ* nɛ a ha Yosef sisi bimɛ ɔ je Yordan nɛ ngɛ Yeriko kasa nya a kɛ ya si Yeriko nyu ɔmɛ a he ngɛ pusinɔ he je, nɛ e po mi kɛ gu nga kplanaa nɛ ngɛ Yeriko hɛ mi ɔ nɔ kɛ kuɔ kɛ ho Betel yoku ɔmɛ a nɔ ya. 2 E tsa nɔ kɛ je Betel nɛ ngɛ Luz kasa nya a nɛ e po mi kɛ ho Arki bi ɔmɛ a huzu ɔ nɔ ya ngɛ Atarot, 3 nɛ e kple kɛ gu Yaflet bi ɔmɛ a huzu ɔ nya ngɛ pusinɔ he je kɛ ya si Dɔ Si Je Bet Horon huzu ɔ nya, nɛ e tsa nɔ kɛ je Gezer nɛ e ya gbe nya ngɛ wo ɔ nya.

4 Lɔ ɔ he ɔ, Yosef sisi bimɛ nɛ ji Manase kɛ Efraim ɔ ngɔ a zugba a. 5 Zugba nɛ Efraim sisi bimɛ ɔmɛ ná ngɛ a wekuhi a nya a ji nɛ ɔ nɛ: A zugba a huzu ɔ je Atarot Adar puje he je kɛ ya si Yiti Je Bet Horon. 6 nɛ huzu ɔ tsa nɔ kɛ ya su wo ɔ nya. Yiti je huzu ɔ je sisi ngɛ Mikmeta, nɛ e bɔle si kɛ ya gu puje he blɔ kɛ ho Tanat Shiloh ya, nɛ e po mi ngɛ puje he je kɛ ho Yanoa ya. 7 Nɛ e je Yanoa kɛ ya gu Atarot kɛ Naara kɛ ho Yeriko ya, nɛ e tsa nɔ kɛ ya su Yordan Pa a nya. 8 Huzu ɔ je Tapua nɛ e tsa nɔ kɛ gu pusinɔ he je kɛ ho Kana Dɔ ɔ mi ya nɛ e ya gbe nya ngɛ wo ɔ nya. Weto ní nɛ Efraim wɛtso ɔ ná ngɛ a weku ɔmɛ a nya ji nɛ ɔ nɛ; 9 Lɔ ɔ se ɔ, a ha Efraim bi ɔmɛ ma kpahi kɛ a he kɔpehi ngɛ Manase bi ɔmɛ a weto ní ɔ mi.

10 Se a fiee we Kanaan bi ɔmɛ nɛ a ngɛ Gezer a, nɛ Kanaan bi ɔmɛ ya nɔ nɛ a hi Efraim bi ɔmɛ a kpɛti kɛ ba si mwɔnɛ ɔ, nɛ a nyɛ a nɔ konɛ a tsu ní tsumi nɛ he wa.

17 Sɔ* ɔ nɛ a fɔ̃ ɔ hla Manase wɛtso ɔ, ejakaa lɛ ji Yosef bitɛte. Akɛnɛ Gilead tsɛ Makir, nɛ ji Manase bitɛte ɔ, tatsɛ kpanaa ji lɛ he je ɔ, a ha lɛ Gilead kɛ Bashan. 2 Manase sisi bimɛ nɛ piɛ ɔ hu, a fɔ̃ sɔ nɛ a ha mɛ zugba a eko kaa a blɔ fa mi nɔ́ ngɛ a weku ɔmɛ a nya; mɛ ji Abiezer bimɛ, Helek bimɛ, Asriel bimɛ, Shekem bimɛ, Hefer bimɛ, kɛ Shemida bimɛ. Nimli nɛ ɔmɛ ji Yosef binyumu Manase sisi bimɛ, nɛ ji a binyumuhi ngɛ a weku ɔmɛ a nya. 3 Se Zelofehad be binyumuhi, biyihi sɔuu nɛ e fɔ. Zelofehad nɛ ɔ tsɛ ji Hefer, Hefer tsɛ ji Gilead, Gilead tsɛ ji Makir, nɛ Makir tsɛ ji Manase. Zelofehad biyi ɔmɛ a biɛhi ji: Mala, Noa, Hogla, Milka, kɛ Tirza. 4 Lɔ ɔ he ɔ, a ya osɔfo Eleazer, Nun binyumu Yoshua, kɛ ganɔ ɔmɛ a ngɔ nɛ a ya de mɛ ke: “Yehowa lɛ fã Mose kaa e ha wɔ weto ní ngɛ wa nyɛminyumu ɔmɛ a kpɛti.” Lɔ ɔ he ɔ, ngɛ Yehowa fami nya a, e ha mɛ weto ní ngɛ a tsɛ ɔ nyɛminyumu ɔmɛ a kpɛti.

5 Manase ná zugba kpahi nyɔngma, e slo Gilead kɛ Bashan zugba a nɛ ngɛ Yordan Pa a se* ɔ, 6 ejakaa Manase biyi ɔmɛ ná weto ní kaa bɔ nɛ e binyumu ɔmɛ ná a, nɛ Gilead zugba a ba pee Manase sisi bimɛ nɛ piɛ ɔ a weto ní.

7 Manase huzu ɔ je Asher kɛ ya si Mikmetat nɛ́ e hɛ mi tsɔɔ shekem ɔ, nɛ e tsa nɔ kɛ gu woyi je* kɛ ho Entapua bi ɔmɛ a zugba a nɔ ya. 8 Tapua zugba a ba pee Manase nɔ́, se Tapua ma a nɛ ngɛ Manase huzu ɔ nya a lɛɛ e ji Efraim bi ɔmɛ a nɔ́. 9 Huzu ɔ kple kɛ ho Kana Dɔ ɔ mi ya, ngɛ dɔ ɔ woyi je. Efraim ma komɛ ngɛ Manase ma amɛ a kpɛti, nɛ Manase huzu ɔ ngɛ dɔ ɔ yiti je, nɛ e ya gbe nya ngɛ wo ɔ nya. 10 Efraim zugba a ngɛ kɛ yaa woyi je, nɛ Manase nɔ́ ɔ ngɛ kɛ yaa yiti je, nɛ wo ɔ ji e huzu. A* kɛ Asher wo huzu ngɛ yiti je, nɛ a kɛ Isakar hu wo huzu ngɛ puje he je.

11 A ha Manase ma nɛ ɔmɛ ngɛ Isakar kɛ Asher zugba a mi: Bet Shan kɛ mahi nɛ bɔle lɛ ɔ,* Ibleam kɛ mahi nɛ bɔle lɛ ɔ, nihi nɛ a ngɛ Dor kɛ mahi nɛ bɔle lɛ ɔ, nihi nɛ a ngɛ Endor kɛ mahi nɛ bɔle lɛ ɔ, nihi nɛ a ngɛ Taanak kɛ mahi nɛ bɔle lɛ ɔ, kɛ nihi nɛ a ngɛ Megido kɛ mahi nɛ bɔle lɛ ɔ, mahi etɛ nɛ a ngɛ yoku nɔ.

12 Se Manase sisi bimɛ ɔmɛ nyɛ we nɛ a ngɔ ma nɛ ɔmɛ; Kanaan bi ɔmɛ ya nɔ nɛ a hi zugba nɛ ɔmɛ a nɔ. 13 Benɛ Israel bi ɔmɛ a he ba wa a, a fiee we Kanaan bi ɔmɛ kɛ je zugba a nɔ kulaa, se mohu a nyɛ a nɔ nɛ a tsu ní tsumi nɛ he wa.

14 Yosef sisi bimɛ ɔmɛ de Yoshua ke: Mɛni he je nɛ a fɔ̃ sɔ nɛ a ha wɔ* zugba kake pɛ, nɛ o po zugba fã kake kɛ ha wɔ kaa wa weto ní ɔ? Wa he hiɛ wawɛɛ nitsɛ, ejakaa Yehowa jɔɔ wɔ kɛ ba si mwɔnɛ ɔ. 15 Se Yoshua de mɛ ke: “Ke nyɛ he hiɛ wawɛɛ nɛ Efraim yoku ɔ nɔ zugba a be nyɛ kpee ɔ, lɛɛ nyɛɛ kuɔ kɛ ya Periz bi ɔmɛ, kɛ Refaim bi ɔmɛ a zugba a nɔ, nɛ nyɛ ya gba hue ɔ, nɛ nyɛɛ hi lejɛ ɔ.” 16 Kɛkɛ nɛ Yosef sisi bimɛ ɔmɛ de ke: Yoku ɔ nɔ zugba a klee we ha wɔ, nɛ Kanaan bi nɛ a ngɛ Bet Shan kɛ mahi nɛ bɔle lɛ ɔ* a mi kɛ nihi nɛ a ngɛ Yezreel Dɔgba a mi ɔ tsuo ngɛ ta zugba lɛhi kɛ a he dadehi. 17 Lɔ ɔ he ɔ, Yoshua de Yosef we ɔ nɛ ji Efraim kɛ Manase ke: “Nyɛ he hiɛ wawɛɛ, nɛ nyɛ he wa saminya. Tsa pi zugba nɛ nyɛ ngɛ nɔ amlɔ nɛ ɔ pɛ nɛ nyɛ ma ná, 18 mohu ɔ, yoku ɔ nɔ zugba amɛ hu maa pee nyɛ nɔ́. E ngɛ mi kaa hue ngɛ lejɛ ɔ mohu lɛɛ, se nyɛɛ gba hue ɔ tsuo, nɛ lejɛ ɔ maa pee nyɛ zugba a nyagbe he. E ngɛ mi kaa Kanaan bi ɔmɛ a he wa nɛ a ngɛ ta zugba lɛhi kɛ a he dadehi* mohu lɛɛ, se nyɛ maa fiee mɛ kɛ je zugba a nɔ.

18 Kɛkɛ nɛ Israel ma a tsuo bua a he nya ngɛ Shilo, nɛ a ma kpe he bo tsu ɔ ngɛ lejɛ ɔ, ejakaa amlɔ nɛ ɔ, a ngɔ zugba a ta. 2 Se e piɛ Israel wɛtso kpaago nɛ a ha we mɛ weto ní ɔ eko lolo. 3 Lɔ ɔ he ɔ, Yoshua de Israel bi ɔmɛ ke: “Mɛni be po nyɛ maa to tsle kɛ ya si loko nyɛ ma ya ngɔ zugba a nɛ Yehowa, nyɛ nɛmɛ a Mawu ɔ ngɔ ha nyɛ ɔ? 4 Nyɛɛ hla nyumuhi etɛ kɛ je wɛtso fɛɛ wɛtso mi ha mi nɛ ma tsɔ mɛ, nɛ a ya kpa zugba a tsuo nɔ, nɛ a susu nɛ a kadi huzu ɔmɛ kɛ fɔ womi nɔ ngɛ a weto ní ɔmɛ a nya. Lɔ ɔ se ɔ, a kpale kɛ ba ye ngɔ. 5 Á gba zugba a mi kpaago kɛ ha a he. Yuda maa ya nɔ maa hi e zugba a nɔ kɛ yaa woyi je, nɛ Yosef we ɔ maa ya nɔ maa hi e zugba a nɔ kɛ yaa yiti je. 6 Se nyɛɛ lɛɛ, nyɛ gba zugba a mi kpaago, nɛ nyɛ kadi huzu ɔmɛ kɛ fɔ womi nɔ, nɛ nyɛɛ ngɔ ba ha mi. Lɔ ɔ se ɔ, ma fɔ̃ sɔ* ngɛ hiɛ ɔ ha nyɛ ngɛ Yehowa wa Mawu ɔ hɛ mi. 7 Se Levi bi ɔmɛ lɛɛ a be zugba a eko náe, ejakaa osɔfo nɛ a maa ye ha Yehowa a ji a weto ní. Gad, Ruben, kɛ Manase wɛtso fã a lɛɛ, a nine su a weto ní nɛ Yehowa sɔmɔlɔ Mose kɛ ha mɛ ɔ nɔ momo ngɛ Yordan Pa a puje he je.”

8 Benɛ nyumu ɔmɛ pee klaalo kaa a maa je ɔ, Yoshua fã nihi nɛ a yaa kadi zugba a huzu ɔ kɛ fɔ womi nɔ ɔ ke: “Nyɛɛ ya nɛ nyɛ ya kpa zugba a nɔ, nɛ nyɛ kadi huzu ɔmɛ ngɛ womi nɔ, nɛ nyɛɛ kpale kɛ ba ye ngɔ. Lɔ ɔ se ɔ, ma fɔ̃ sɔ ngɛ hiɛ ɔ ha nyɛ ngɛ Yehowa wa Mawu ɔ hɛ mi ngɛ Shilo. 9 Kɛkɛ nɛ nyumu ɔmɛ ho nɛ a ya kpa zugba a tsuo nɔ, nɛ a gba mi kpaago nɛ a kɛ mahi kadi huzu ɔmɛ, nɛ a ngma kɛ wo womi mi. Lɔ ɔ se ɔ, a kpale kɛ ba Yoshua ngɔ ngɛ ma a sito he ɔ ngɛ Shilo. 10 Nɛ Yoshua fɔ̃ sɔ ha mɛ ngɛ Yehowa hɛ mi ngɛ Shilo. Lejɛ ɔ nɛ Yoshua gba zugba a kɛ ha Israel bi ɔmɛ ngɛ, nɛ wɛtso fɛɛ wɛtso ná e nɔ́.

11 Sɔ nɛ a fɔ̃ ɔ jé Benyamin wɛtso ɔ ngɛ a weku ɔmɛ a nya. A zugba a ngɛ Yuda sisi bimɛ kɛ Yosef sisi bimɛ a zugba a kpɛti. 12 Yiti je huzu ɔ je sisi ngɛ Yordan Pa a nya, nɛ e kuɔ kɛ gu Yeriko yoku ɔ he ngɛ yiti je, nɛ e kuɔ kɛ ho yoku ɔ pusinɔ he je ya, nɛ e tsa nɔ kɛ ho Betaven nga kplanaa a nɔ ya. 13 Huzu ɔ tsa nɔ kɛ je lejɛ ɔ nɛ e ya gu Luz (lɔ ɔ nɔuu ji Betel), ngɛ Luz yoku ɔ he ngɛ woyi je; huzu ɔ kple kɛ gu Atarot Adar ngɛ yoku ɔ nɛ ngɛ Dɔ Si Je Bet Horon ɔ he. 14 Nɛ huzu ɔ tsa nɔ kɛ je pusinɔ he je nɛ e lɔgɔ si kɛ gu yoku ɔ nɛ e hɛ mi tsɔɔ Bet Horon ɔ woyi je; nɛ e ya gbe nya ngɛ Kiriat Baal (lɔ ɔ nɔuu ji Kiriat Yearim), nɛ ji Yuda bi ɔmɛ a ma a mi. Pusinɔ he je huzu ɔ ji nɛ ɔ nɛ.

15 Woyi je huzu ɔ je Kiriat Yearim nyagbe he ɔ, nɛ e tsa nɔ kɛ ho pusinɔ he je ya, nɛ e po mi kɛ ho Neftoa nyu hɛngmɛ ɔmɛ a he ya. 16 Huzu ɔ kple kɛ gu yoku ɔ nɛ e hɛ mi tsɔɔ Hinom Binyumu ɔ Dɔgba a nyagbe he ɔ, ngɛ Refaim Dɔgba a yiti je, nɛ e kple kɛ gu Hinom Dɔgba a mi kɛ gu Yebus bi ɔmɛ a yoku ɔ kasa he ngɛ woyi je, nɛ e ma e yi si kɛ ho Enrogel ya. 17 Huzu ɔ je yiti je nɛ e tsa nɔ kɛ gu Enshemesh kɛ ho Gelilot nɛ ngɛ Adumim yoku ɔ hɛ mi ɔ he ya, nɛ e kple kɛ ho Ruben binyumu Bohan tɛ ɔ he ya. 18 Nɛ e tsa nɔ kɛ gu yoku ɔ nɛ ngɛ yiti je nɛ e hɛ mi tsɔɔ Araba a kasa he, nɛ e kple kɛ ho Araba ya. 19 Nɛ huzu ɔ tsa nɔ kɛ ho Bet Hogla yoku ɔ yiti je ya, nɛ e ya gbe nya ngɛ Ngo Wo ɔ nya ngɛ yiti je ngɛ Yordan Pa a woyi je. Woyi je huzu ɔ ji nɛ ɔ nɛ. 20 Nɛ Yordan Pa a ji a huzu ngɛ puje he je. Enɛ ɔ ji Benyamin sisi bimɛ ɔmɛ a weto ní ngɛ a wekuhi a nya, ngɛ a huzu ɔmɛ tsuo a nya.

21 Mahi nɛ Benyamin wɛtso ɔ ná ngɛ a weku ɔmɛ a nya ji nɛ ɔ nɛ: Yeriko, Bet Hogla, Emek Keziz, 22 Bet Araba, Zemaraim, Betel, 23 Avim, Para, Ofra, 24 Kefaramoni, Ofni, kɛ Geba; mahi 12 kɛ a he kɔpehi.

25 Gibeon, Rama, Beerot, 26 Mizpa, Kefira, Moza, 27 Rekem, Irpeel, Tarala, 28 Zela, Haelef, Yebus (lɔ ɔ nɔuu ji Yerusalem), Gibea, kɛ Kiriat Yearim; mahi 14 kɛ a he kɔpehi.

Enɛ ɔ ji Benyamin sisi bimɛ ɔmɛ a weto ní ngɛ a wekuhi a nya.

19 Sɔ enyɔne ɔ nɛ a fɔ̃ ɔ jé Simeon wɛtso ɔ ngɛ a weku ɔmɛ a nya. A weto ní ngɛ Yuda wɛtso ɔ nɔ́ ɔ mi. 2 A weto ní ɔ ji Beersheba, Sheba, Molada, 3 Hazar Shual, Bala, Ezem, 4 Eltolad, Betul, Horma, 5 Ziklag, Bet Markabot, Hazar Susa, 6 Bet Lebaot kɛ Sharuhen. Mahi 13 kɛ a he kɔpehi; 7 Ain, Rimon, Eter kɛ Ashan. Mahi eywiɛ kɛ a he kɔpehi; 8 kɛ kɔpehi tsuo nɛ a bɔle ma nɛ ɔmɛ hluu kɛ ya si Baalat Beer (lɔ ɔ nɔuu ji Rama) nɛ ngɛ woyi je ɔ. Weto ní nɛ Simeon wɛtso ɔ nine su nɔ ngɛ a weku ɔmɛ a nya ji nɛ ɔ nɛ. 9 Weto ní nɛ Yuda sisi bimɛ ɔmɛ ná a mi eko nɛ a je kɛ ha Simeon sisi bimɛ ɔmɛ ɔ nɛ, ejakaa weto ní nɛ Yuda sisi bimɛ ɔmɛ ná a kle tsɔ ha mɛ. Lɔ ɔ he ɔ, Simeon sisi bimɛ ɔmɛ ná a blɔ fami nɔ́ ngɛ Yuda weto ní ɔ mi.

10 Sɔ etɛne ɔ jé Zebulun sisi bi ɔmɛ ngɛ a weku ɔmɛ a nya nɛ a zugba a huzu ɔ ho hluu kɛ ya si Sarid. 11 Huzu ɔ kuɔ kɛ gu pusinɔ he je kɛ ho Mareal ya, nɛ e be ngɛ Dabeshet, nɛ e ya su dɔgba* nɛ ngɛ Yokneam hɛ mi ɔ. 12 Nɛ e je Sarid kɛ gu puje he je kɛ ho Kislot Tabor huzu ɔ he ya, nɛ e tsa nɔ kɛ ho Daberat ya nɛ lɔ ɔ se ɔ, e kuɔ kɛ ho Yafia ya. 13 E tsa nɔ kɛ je lejɛ ɔ kɛ gu puje he je kɛ ho Gat Hefer kɛ Etkazin ya, nɛ e po mi kɛ ya Rimon, nɛ e tsa nɔ kɛ ho Nea ya. 14 Huzu ɔ lɔgɔ si ngɛ yiti je kɛ ho Hanaton ya, nɛ e ya gbe nya ngɛ Iftahel Dɔgba a mi, 15 kɛ Kata, Nahalal, Shimron, Idala kɛ Betlehem. Mahi 12 kɛ a he kɔpehi. 16 Weto ní nɛ Zebulun sisi bimɛ ɔmɛ a nine su nɔ ngɛ weku ɔmɛ a nya ji nɛ ɔ nɛ. A ma amɛ kɛ a he kɔpe ɔmɛ ji nɛ ɔ nɛ.

17 Sɔ eywiɛne ɔ nɛ a fɔ̃ ɔ jé Isakar sisi bimɛ ɔmɛ ngɛ a weku ɔmɛ a nya. 18 Nɛ a huzu ɔ ngɛ kɛ ya su Yezreel, Kesulot, Shunem, 19 Hafaraim, Shion, Anaharat, 20 Rabit, Kishion, Ebez, 21 Remet, Enganim, Enhada kɛ Betpazez. 22 Huzu ɔ tsa nɔ kɛ ya su Tabor, Shahazuma kɛ Bet Shemesh, nɛ e ya pi Yordan Pa a. Mahi 16 kɛ a he kɔpehi. 23 Weto ní nɛ Isakar wɛtso ɔ ná ngɛ a weku ɔmɛ a nya ji nɛ ɔ nɛ. A ma amɛ kɛ a he kɔpehi ji nɛ ɔ nɛ.

24 Sɔ enuɔne ɔ nɛ a fɔ̃ ɔ jé Asher wɛtso ɔ ngɛ a weku ɔmɛ a nya. 25 A huzu ɔ ji Helkat, Hali, Beten, Akshaf, 26 Alam Melek, Amad kɛ Mishal. E ya su Karmel kɛ Shihor Libnat ngɛ pusinɔ he je. 27 E dɔ e yi kɛ ho Betdagon ya ngɛ puje he je nɛ e ya su Zebulun kɛ Iftahel Dɔgba a mi ngɛ yiti je, e ho Betemek kɛ Neyel ya nɛ e tsa nɔ kɛ ho Kabul nɛ ngɛ muɔ nɔ je ɔ ya, 28 nɛ e ya gu Ebron, Rehob, Hamon kɛ Kana hluu kɛ ya su Sidon Ngua a he tɔɔ. 29 Huzu ɔ dɔ e yi kɛ gu Rama nɛ e tsa nɔ hluu kɛ ya su Tiro ma nɛ a fia gbogbo kɛ wo he ɔ he. E kpale dɔ e yi kɛ ho Hosa ya nɛ e nya ya ta ngɛ wo ɔ nya ngɛ Akzib, 30 Uma, Afek kɛ Rehob kpokpa amɛ a nɔ. Mahi 22 kɛ a he kɔpehi. 31 Weto ní nɛ Asher wɛtso ɔ ná ngɛ a weku ɔmɛ a nya ji nɛ ɔ nɛ. A ma amɛ kɛ a he kɔpe ɔmɛ ji nɛ ɔmɛ nɛ.

32 Sɔ ekpane ɔ nɛ a fɔ̃ ɔ jé Naftali sisi bimɛ ɔmɛ ngɛ a weku ɔmɛ a nya. 33 A huzu ɔ je sisi ngɛ Helef kɛ ya gu Zaananim tso ngua a he, nɛ e ho Adaminekeb kɛ Yabneel ya, nɛ e tsa nɔ hluu kɛ ya su Lakum, nɛ e ya gbe nya ngɛ Yordan Pa a nya. 34 Huzu ɔ dɔ e yi kɛ gu Aznot Tabor ngɛ pusinɔ he je nɛ e tsa nɔ kɛ je lejɛ ɔ kɛ ho Hukok ya, nɛ e ya su Zebulun ngɛ woyi je kɛ Asher ngɛ pusinɔ he je, kɛ jehanɛ hu Yuda ngɛ Yordan Pa a puje he je. 35 Mahi nɛ a fia gbogbo kɛ wo a he ɔmɛ ji Zidim, Zer, Harmat, Rakat, Kineret, 36 Adama, Rama, Hazor, 37 Kedesh, Edrei, Enhazor, 38 Yiron, Migdalel, Horem, Betanat kɛ Bet Shemesh. Mahi 19 kɛ a he kɔpehi. 39 Weto ní nɛ Naftali wɛtso ɔ ná ngɛ a weku ɔmɛ a nya ji nɛ ɔ nɛ. A ma amɛ kɛ a he kɔpehi ji nɛ ɔmɛ nɛ.

40 Sɔ kpaagone ɔ nɛ a fɔ̃ ɔ jé Dan wɛtso ɔ ngɛ a weku ɔmɛ a nya. 41 Nɛ a zugba a huzu ɔ ji Zora, Eshtaol, Irshemesh, 42 Shaalbim,* Aiyalon, Itla, 43 Elon, Timna, Ekron, 44 Elteke, Gibeton, Baalat, 45 Yehud, Beneberak, Gatrimon, 46 Meyarkon kɛ Rakon, nɛ huzu ɔ hɛ mi tsɔɔ Yopa. 47 Se Dan bi ɔmɛ a zugba a klee we kulaa ha mɛ. Lɔ ɔ he ɔ, a kuɔ kɛ ho nɛ a kɛ Leshem* ya hwu, a ye ma a nɔ kunimi, nɛ a kɛ klaate kpata nihi nɛ a ngɛ mi ɔ hɛ mi. A ngɔ ma a nɛ a hi mi, nɛ a tsake ma a biɛ nɛ ji Leshem ɔ nɛ a kɛ a nɛ̃ biɛ nɛ ji Dan ɔ wo ma a, enɛ ɔ he ɔ, a tsɛ ma a ke Dan. 48 Weto ní nɛ Dan wɛtso ɔ ná ngɛ a weku ɔmɛ a nya ji nɛ ɔ nɛ. A ma amɛ kɛ a he kɔpe ɔmɛ ji nɛ ɔ nɛ.

49 Enɛ ɔ he ɔ, a gbe zugba a nɛ a gba ngɛ e huzu ɔmɛ a nya nɛ a kɛ ha mɛ kaa a weto ní ɔ gbami nya. Lɔ ɔ se ɔ, Israel bi ɔmɛ ha Nun binyumu Yoshua weto ní ngɛ a kpɛti. 50 Ngɛ Yehowa fami nya a, a ha lɛ ma nɛ e bi kaa a kɛ ha lɛ nɛ ji Timnat Sera, nɛ ngɛ Efraim yoku ɔmɛ a nɔ ɔ. E po ma a nɛ e hi mi.

51 Enɛ ɔmɛ ji weto ní nɛ osɔfo Eleazar, Nun binyumu Yoshua kɛ Israel wɛtso ɔmɛ a tsɛmɛ a we ɔmɛ a nyatsɛmɛ ɔmɛ fɔ̃ sɔ* kɛ dla ngɛ Yehowa hɛ mi ngɛ Shilo ngɛ kpe he bo tsu ɔ nya. Enɛ ɔ he ɔ, a gbe zugba a gbami nya.

20 Kɛkɛ nɛ Yehowa de Yoshua ke: 2 “De Israel bi ɔmɛ ke, ‘Nyɛɛ hla wesa he mahi kɛ ha nyɛ he kaa bɔ nɛ i gu Mose nɔ kɛ fã nyɛ ɔ, 3 konɛ nɔ ko nɛ pi nɛ e je blɔ aloo e li e he be nɛ e gbe nɔ ko* ɔ nɛ tu fo kɛ ya lejɛ ɔ. Nɛ a maa pee wesa he mahi kɛ ha nyɛ ngɛ muɔ he lue yelɔ ɔ dɛ mi. 4 É tu fo kɛ ya ma nɛ ɔmɛ eko mi nɛ e ya da si ngɛ ma a agbo ɔ nya nɛ e jaje bɔ nɛ e ba lɛ ha a ngɔ tsɔɔ ma nikɔtɔma amɛ. Lɔ ɔ se ɔ, a ma he lɛ kɛ ba ma a mi nɛ a ma ha lɛ he ko nɛ e hi, nɛ e kɛ mɛ maa hi si. 5 Ke muɔ he lue yelɔ ɔ tu fo kɛ nyɛɛ e se ɔ, a kó je nɔ nɛ gbe nɔ ɔ kɛ ha lɛ, ejakaa pi nɛ e je blɔ* nɛ e gbe nɔ ɔ, nɛ nɔ ɔ he abofu ko hu be e mi momo. 6 É hi jamɛ a ma a mi kɛ ya si be nɛ a kɛ lɛ maa da ma a hɛ mi nɛ́ a maa ye e sane ɔ, nɛ lɔ ɔ se ɔ, e maa ya nɔ maa hi lejɛ ɔ kɛ yaa si be nɛ osɔfo nɔkɔtɔma nɛ ngɛ sɔmɔe ngɛ jamɛ a be ɔ mi ɔ ma gbo. Kɛkɛ ɔ, nɔ nɛ gbe nɔ ɔ ma nyɛ maa kpale e se kɛ ya ma nɛ e tu fo kɛ je mi ɔ mi, nɛ́ e ho e we mi ya.’”

7 Lɔ ɔ he ɔ, a pee ma nɛ ɔmɛ klɔuklɔu* kaa wesa he mahi; Kedesh nɛ ngɛ Galilea ngɛ Naftali yoku ɔmɛ a nɔ ɔ, Shekem nɛ ngɛ Efraim yoku ɔmɛ a nɔ ɔ kɛ Kiriat Arba (lɔ ɔ nɔuu ji Hebron) nɛ ngɛ Yuda yoku ɔmɛ a nɔ ɔ. 8 Ngɛ Yordan kpokpa a nɛ ngɛ Yeriko puje he je ɔ, a hla Bezer nɛ ngɛ nga a nɔ ngɛ yoku nɛ yi mi fɔɔ si tɛtlɛɛ ɔ nɔ ɔ kɛ je Ruben wɛtso ɔ mi, Ramot nɛ ngɛ Gilead ɔ kɛ je Gad wɛtso ɔ mi kɛ Golan nɛ ngɛ Bashan ɔ kɛ je Manase wɛtso ɔ mi.

9 Ma nɛ ɔmɛ ji mahi nɛ a hla kɛ ha Israel bi ɔmɛ tsuo kɛ nihi nɛ a je ma se nɛ a ngɛ a kpɛti ɔ, konɛ ke nɔ ko li e he be nɛ e gbe nɔ ko* ɔ, e tu fo kɛ ya lejɛ ɔ konɛ muɔ he lue yelɔ ɔ ko gbe lɛ be mi nɛ a kɛ lɛ ba da we ma a hɛ mi lolo nɛ́ a ye e sane ɔ.

21 Levi bi ɔmɛ a tsɛmɛ a we ɔmɛ a nyatsɛmɛ ɔmɛ ba osɔfo Eleazer, Nun binyumu Yoshua kɛ Israel bi ɔmɛ a tsɛmɛ a we ɔmɛ a nyatsɛmɛ ɔmɛ a ngɔ, 2 nɛ a kɛ mɛ ba tu munyu ngɛ Shilo ngɛ Kanaan zugba a nɔ nɛ a de mɛ ke: “Yehowa gu Mose nɔ kɛ fã kaa, a ha wɔ mahi nɛ waa hi a mi kɛ a he lohwehi a ní yemi hehi kɛ ha wa lohwe ɔmɛ.” 3 Enɛ ɔ he ɔ, ngɛ Yehowa fami nya a, Israel bi ɔmɛ ha Levi bi ɔmɛ ma nɛ ɔmɛ kɛ a he lohwehi a ní yemi hehi kɛ je mɛ nitsɛmɛ a weto ní ɔmɛ a mi.

4 Sɔ nɛ a fɔ̃ ɔ jé Kohat bi ɔmɛ a weku ɔ, nɛ a da sɔ nɛ a fɔ̃ ɔ nɔ kɛ ha Levi bi ɔmɛ nɛ a ji osɔfo Aaron sisi bi ɔmɛ ɔ mahi 13 kɛ je Yuda wɛtso ɔ, Simeon wɛtso ɔ kɛ Benyamin wɛtso ɔ mi.

5 Kohat bi ɔmɛ nɛ piɛ ɔ, a fɔ̃ sɔ* nɛ a ha mɛ mahi nyɔngma kɛ je Efraim wɛtso ɔ, Dan wɛtso ɔ kɛ Manase wɛtso fã a mi.

6 Gershon bi ɔmɛ hu, a fɔ̃ sɔ nɛ a ha mɛ mahi 13 kɛ je Isakar wɛtso ɔ, Asher wɛtso ɔ, Naftali wɛtso ɔ kɛ Manase wɛtso fã a nɛ ngɛ Bashan ɔ mi.

7 Merari bi ɔmɛ hu, a ha mɛ mahi 12 ngɛ a weku ɔmɛ a nya kɛ je Ruben wɛtso ɔ, Gad wɛtso ɔ kɛ Zebulun wɛtso ɔ mi.

8 Enɛ ɔ he ɔ, kaa bɔ nɛ Yehowa fã Mose ɔ, Israel bi ɔmɛ fɔ̃ sɔ nɛ a ha Levi bi ɔmɛ ma nɛ ɔmɛ kɛ a he lohwehi a ní yemi hehi.

9 A jé ma nɛ ɔmɛ nɛ́ a wo a biɛ tã a kɛ je Yuda wɛtso ɔ kɛ Simeon wɛtso ɔ mi kɛ ha mɛ, 10 nɛ a kɛ ha Aaron binyumu ɔmɛ nɛ a je Kohat weku ɔ mi nɛ a ji Levi bi ɔ, ejakaa mɛ lɛ kekleekle sɔ nɛ a fɔ̃ ɔ jé. 11 A ha mɛ Kiriat Arba (Anak tsɛ ji Arba), lɔ ɔ nɔuu ji Hebron nɛ ngɛ Yuda yoku ɔmɛ a nɔ ɔ kɛ e he lohwehi a ní yemi hehi. 12 Se a kɛ ma a he zugba amɛ kɛ e he kɔpe ɔmɛ ha Yefune binyumu Kaleb kaa e weto ní.

13 Osɔfo Aaron binyumu ɔmɛ hu, a ngɔ Hebron nɛ ji wesa he ma nɛ́ nɔ ko nɛ gbe nɔ maa tu fo kɛ ya mi ɔ kɛ e he lohwehi a ní yemi hehi kɛ ha mɛ. Lɔ ɔ se ɔ, a ha mɛ ma nɛ ɔmɛ hu kɛ piɛɛ he: Libna kɛ e he lohwehi a ní yemi hehi, 14 Yatir kɛ e he lohwehi a ní yemi hehi, Eshtemoa kɛ e he lohwehi a ní yemi hehi, 15 Holon kɛ e he lohwehi a ní yemi hehi, Debir kɛ e he lohwehi a ní yemi hehi, 16 Ain kɛ e he lohwehi a ní yemi hehi, Yuta kɛ e he lohwehi a ní yemi hehi kɛ Bet Shemesh kɛ e he lohwehi a ní yemi hehi. A je mahi nɛɛ kɛ je wɛtso enyɔ nɛ ɔmɛ a mi.

17 Mahi nɛ a ha mɛ kɛ je Benyamin wɛtso ɔ mi ji: Gibeon kɛ e he lohwehi a ní yemi hehi, Geba kɛ e he lohwehi a ní yemi hehi, 18 Anatot kɛ e he lohwehi a ní yemi hehi kɛ Almon kɛ e he lohwehi a ní yemi hehi. Mahi eywiɛ.

19 Mahi tsuo nɛ a ha osɔfo Aaron sisi bimɛ ɔmɛ ji mahi 13 kɛ a he lohwehi a ní yemi hehi.

20 Kohat weku ɔ mi bi ɔmɛ nɛ piɛ nɛ a ji Levi bi ɔ hu, a fɔ̃ sɔ nɛ a ha mɛ mahi kɛ je Efraim wɛtso ɔ mi. 21 A ha mɛ Shekem nɛ ngɛ Efraim yoku ɔmɛ a nɔ nɛ ji wesa he ma nɛ́ nɔ ko nɛ́ gbe nɔ maa tu fo kɛ ya mi ɔ kɛ e he lohwehi a ní yemi hehi. Lɔ ɔ se ɔ, a ha mɛ ma nɛ ɔmɛ hu kɛ piɛɛ he: Gezer kɛ e he lohwehi a ní yemi hehi, 22 Kibzaim kɛ e he lohwehi a ní yemi hehi kɛ Bet Horon kɛ e he lohwehi a ní yemi hehi. Mahi eywiɛ.

23 Mahi nɛ a ha mɛ kɛ je Dan wɛtso ɔ mi ji: Elteke kɛ e he lohwehi a ní yemi hehi, Gibeton kɛ e he lohwehi a ní yemi hehi, 24 Aiyalon kɛ e he lohwehi a ní yemi hehi, Gatrimon kɛ e he lohwehi a ní yemi hehi. Mahi eywiɛ.

25 Mahi nɛ a ha mɛ kɛ je Manase wɛtso fã a mi ji: Taanak kɛ e he lohwehi a ní yemi hehi kɛ Gatrimon kɛ e he lohwehi a ní yemi hehi. Mahi enyɔ.

26 Mahi tsuo kɛ a he lohwehi a ní yemi hehi nɛ Kohat weku ɔ nɛ piɛ ɔ a nine su nɔ ji nyɔngma.

27 A ha Gershon bi ɔmɛ nɛ a je Levi weku ɔ mi ɔ Golan nɛ ngɛ Bashan, nɛ ji wesa he ma nɛ́ nɔ ko nɛ́ gbe nɔ maa tu fo kɛ ya mi ɔ kɛ e he lohwehi a ní yemi hehi kɛ je Manase wɛtso fã a mi. Lɔ ɔ se ɔ, a ha mɛ ma nɛ ɔ hu kɛ piɛɛ he, Beeshtera kɛ e he lohwehi a ní yemi hehi. Mahi enyɔ.

28 Mahi nɛ a ha mɛ kɛ je Isakar wɛtso ɔ mi ji: Kishion kɛ e he lohwehi a ní yemi hehi, Daberat kɛ e he lohwehi a ní yemi hehi, 29 Yarmut kɛ e he lohwehi a ní yemi hehi kɛ Enganim kɛ e he lohwehi a ní yemi hehi. Mahi eywiɛ.

30 Mahi nɛ a ha mɛ kɛ je Asher wɛtso ɔ mi ji: Mishal kɛ e he lohwehi a ní yemi hehi, Abdon kɛ e he lohwehi a ní yemi hehi, 31 Helkat kɛ e he lohwehi a ní yemi hehi kɛ Rehob kɛ e he lohwehi a ní yemi hehi. Mahi eywiɛ.

32 Mahi nɛ a ha mɛ kɛ je Naftali wɛtso ɔ mi ji: Kedesh nɛ ngɛ Galilea nɛ ji wesa he ma nɛ́ nɔ ko nɛ́ gbe nɔ maa tu fo kɛ ya mi ɔ kɛ e he lohwehi a ní yemi hehi. Lɔ ɔ se ɔ, a ha mɛ ma nɛ ɔmɛ hu kɛ piɛɛ he: Hamot Dor kɛ e he lohwehi a ní yemi hehi kɛ Kartan kɛ e he lohwehi a ní yemi hehi. Mahi etɛ.

33 Mahi tsuo nɛ a ha Gershon weku ɔ ji mahi 13 kɛ a he lohwehi a ní yemi hehi.

34 A ha Merari weku ɔ nɛ ji Levi bi ɔmɛ nɛ piɛ ɔ mahi ngɛ Zebulun wɛtso ɔ mi. Ma nɛ ɔmɛ ji: Yokneam kɛ e he lohwehi a ní yemi hehi, Karta kɛ e he lohwehi a ní yemi hehi, 35 Dimna kɛ e he lohwehi a ní yemi hehi kɛ Nahalal kɛ e he lohwehi a ní yemi hehi. Mahi eywiɛ.

36 Mahi nɛ a ha mɛ kɛ je Ruben wɛtso ɔ mi ji: Bezer kɛ e he lohwehi a ní yemi hehi, Yahaz kɛ e he lohwehi a ní yemi hehi, 37 Kedemot kɛ e he lohwehi a ní yemi hehi kɛ Mefaat kɛ e he lohwehi a ní yemi hehi. Mahi eywiɛ.

38 Mahi nɛ a ha mɛ kɛ je Gad wɛtso ɔ mi ji: Ramot nɛ ngɛ Gilead nɛ ji wesa he ma nɛ́ nɔ ko nɛ́ gbe nɔ maa tu fo kɛ ya mi ɔ kɛ e he lohwehi a ní yemi hehi. Lɔ ɔ se ɔ, a ha mɛ ma nɛ ɔmɛ hu kɛ piɛɛ he: Mahanaim kɛ e he lohwehi a ní yemi hehi, 39 Heshbon kɛ e he lohwehi a ní yemi hehi kɛ Yazer kɛ e he lohwehi a ní yemi hehi. Ma nɛ ɔmɛ tsuo peeɔ mahi eywiɛ.

40 Mahi tsuo nɛ a fɔ̃ sɔ nɛ a ha Merari weku ɔ, nɛ ji Levi weku ɔ mi bi ɔmɛ nɛ piɛ ɔ ji mahi 12.

41 Mahi tsuo nɛ Levi bi ɔmɛ ná ngɛ Israel bi ɔmɛ a weto ní ɔ mi ji mahi 48 kɛ a he lohwehi a ní yemi hehi. 42 Lohwehi a ní yemi hehi piɛɛ ma nɛ ɔmɛ eko fɛɛ eko he; jã nɛ mɛ tsuo a ngɛ.

43 Lɔ ɔ he ɔ, Yehowa ngɔ zugba a tsuo nɛ e kã Israel bi ɔmɛ a nɛmɛ ɔmɛ kita kaa e kɛ ma ha mɛ ɔ kɛ ha Israel bi ɔmɛ, nɛ a ngɔ nɛ a hi nɔ. 44 Jehanɛ hu ɔ, Yehowa ha nɛ a tue mi jɔ mɛ ngɛ he fɛɛ he kaa bɔ nɛ e kã a nɛmɛ ɔmɛ kitã a, nɛ a he nyɛli ɔmɛ a kpɛti nɔ ko nɔ ko nyɛ we nɛ e da a hɛ mi. Yehowa ngɔ a he nyɛli ɔmɛ tsuo ngɔ wo a dɛ. 45 Ní kpakpahi tsuo nɛ Yehowa wo Israel bi ɔmɛ si kaa e ma ha mɛ ɔ, kake ngmelu po be nɛ bɛ mi; lɛ tsuo ba mi.

22 Kɛkɛ nɛ Yoshua tsɛ Ruben bi ɔmɛ, Gad bi ɔmɛ kɛ Manase wɛtso fã a 2 nɛ e de mɛ ke: “Nyɛ pee níhi tsuo nɛ Yehowa tsɔlɔ Mose fã nyɛ ke nyɛɛ pee ɔ, nɛ níhi nɛ i fã nyɛ ɔ hu, nyɛ pee lɛ tsuo pɛpɛɛpɛ. 3 Nyɛ kua we nyɛ nyɛmimɛ ɔmɛ kɛ je be nɛ be ɔ tsuo kɛ ba si mwɔnɛ ligbi nɛ ɔ, nɛ nyɛ ye Yehowa nyɛ Mawu ɔ kita amɛ tsuo a nɔ. 4 Amlɔ nɛ ɔ, Yehowa nyɛ Mawu ɔ ha nɛ nyɛ nyɛmimɛ ɔmɛ a he mi jɔ mɛ kaa bɔ nɛ e wo mɛ si ɔ. Lɔ ɔ he ɔ, nyɛ ma nyɛ maa kpale kɛ ya nyɛ bo tsu ɔmɛ a mi jehanɛ ɔ ngɛ zugba nɛ Yehowa tsɔlɔ Mose kɛ ha nyɛ kaa nyɛɛ hi nɔ ɔ nɔ ngɛ Yordan Pa a se.* 5 Nyɛɛ hyɛ saminya nɛ nyɛɛ ye kita kɛ mlaa nɛ Yehowa tsɔlɔ Mose wo nyɛ ɔ nɔ, lɔ ɔmɛ ji, nɛ́ nyɛ maa suɔ Yehowa nyɛ Mawu ɔ, nɛ nyɛ maa nyɛɛ ngɛ e blɔ ɔmɛ tsuo a nɔ, nɛ nyɛ maa ye e kita amɛ tsuo a nɔ, nɛ nyɛ maa mɛtɛ e he kɛ nɛ nyɛ ma sɔmɔ lɛ kɛ nyɛ tsui tsuo kɛ nyɛ klaa* tsuo.”

6 Kɛkɛ nɛ Yoshua jɔɔ mɛ nɛ e wo mɛ blɔ, nɛ a ho a bo tsu ɔmɛ a mi ya. 7 Mose ha Manase wɛtso fã a weto ní ngɛ Bashan, nɛ wɛtso fã nɛ piɛ ɔ kɛ a nyɛmimɛ ɔmɛ hu, Yoshua ha mɛ zugba ngɛ Yordan Pa a Pusinɔ he je. Lɔ ɔ se ɔ, Yoshua wo mɛ blɔ kɛ ho a bo tsu ɔmɛ a mi ya, nɛ e jɔɔ mɛ 8 nɛ e de mɛ ke: “nyɛɛ kpale kɛ ho nyɛ bo tsu ɔmɛ a mi ya kɛ ní babauu, kɛ lohwehi babauu nitsɛ, kɛ sika hiɔ kɛ sika tsu, akɔblee kɛ dade, kɛ tadehi babauu nitsɛ. Nyɛɛ kɛ nyɛ nyɛmimɛ ɔmɛ nɛ dla níhi nɛ nyɛ ha ngɛ nyɛ he nyɛli ɔmɛ a dɛ ɔ.”

9 Lɔ ɔ se ɔ, Ruben bi ɔmɛ, Gad bi ɔmɛ kɛ Manase wɛtso fã a hia kɛ je Israel bi kpa amɛ a he ngɛ Shilo ngɛ Kanaan zugba a nɔ, nɛ a kpale kɛ ba Gilead zugba a, nɛ ji zugba nɛ Yehowa fã Mose ke e kɛ ha mɛ kaa a weto ní nɛ́ a hi nɔ ɔ nɔ. 10 Benɛ Ruben bi ɔmɛ, Gad bi ɔmɛ kɛ Manase wɛtso fã a ba su Yordan Pa a he ngɛ Kanaan zugba a nɔ ɔ, a ma afɔle sami la tɛ ko ngɛ Yordan Pa a nya. E kle wawɛɛ nitsɛ. 11 Pee se ɔ, Israel bi kpa amɛ nu nɔ́ nɛ ba a he nɛ a de ke: “Nyɛɛ hyɛ! Ruben bi ɔmɛ, Gad bi ɔmɛ kɛ Manase wɛtso fã a ya ma afɔle sami la tɛ ngɛ Kanaan zugba a huzu ɔ nya ngɛ Yordan Pa a nya, ngɛ zugba a fã, he nɛ ji Israel bi ɔmɛ a nɔ́ ɔ mi. 12 Benɛ Israel bi ɔmɛ nu he ɔ, Israel asafo ɔ tsuo bua a he nya ngɛ Shilo konɛ a kɛ mɛ nɛ ya hwu ta.

13 Kɛkɛ nɛ Israel bi ɔmɛ tsɔ osɔfo Eleazar binyumu Finehas kɛ ho Ruben bi ɔmɛ, Gad bi ɔmɛ kɛ Manase wɛtso fã a ngɔ ya ngɛ Gilead zugba a nɔ, 14 ganɔhi nyɔngma piɛɛ e he, a hla ganɔ kake kɛ je Israel wɛtso ɔmɛ a tsɛmɛ a we ɔmɛ eko fɛɛ eko mi, a kpɛti nɔ fɛɛ nɔ ji e tsɛmɛ a we ɔmɛ a nyatsɛ ngɛ Israel bi akpehi abɔ* a kpɛti. 15 Benɛ a ba su Ruben bi ɔmɛ, Gad bi ɔmɛ kɛ Manase wɛtso fã a ngɔ ɔ, a de mɛ ke:

16 “Nɔ́ nɛ Yehowa asafo ɔ tsuo ngɛ dee ji nɛ ɔ nɛ: ‘Mɛni he je nɛ nyɛ yi Israel Mawu ɔ anɔkuale ɔ? Mwɔnɛ ligbi nɛ ɔ, nyɛ je Yehowa se nɛ nyɛ tsɔ Yehowa hɛ mi atuã, ejakaa nyɛ ma afɔle sami la tɛ kɛ ha nyɛ he. 17 Anɛ tɔmi nɛ wa tɔ̃ ngɛ Peor pí ha wɔ lo? Anɛ nyɛ hɛ je haomi nɛ ba Yehowa asafo ɔ nɔ lo? Loloolo ɔ, wa ngɛ nɔ́ nɛ je yayami nɛ ɔ mi kɛ ba a mi nɔ́ nae. 18 Anɛ mwɔnɛ ɔ hu nyɛ maa kpale kɛ je Yehowa se lo? Ke nyɛ tsɔ Yehowa hɛ mi atuã mwɔnɛ ɔ, lɛɛ hwɔɔ ɔ, e mi mi ma fu Israel asafo ɔ tsuo. 19 Ke ji kaa zugba a nɛ a kɛ ha nyɛ ɔ nɔ tsɔ we ɔ, lɛɛ nyɛɛ po mi kɛ ba zugba nɛ ji Yehowa nɔ́ ɔ nɔ, he nɛ Yehowa bo tsu ɔ ngɛ ɔ, nɛ nyɛɛ kɛ wɔ nɛ ba hi lejɛ ɔ, se nyɛ ko tsɔ Yehowa hɛ mi atuã, nɛ nyɛ ko ha nɛ wa ba plɛ atuã tsɔli akɛnɛ nyɛ ma afɔle sami la tɛ kɛ piɛɛ Yehowa wa Mawu ɔ afɔle sami la tɛ ɔ he ɔ he je. 20 Benɛ Zera binyumu Akan yi Yehowa anɔkuale kɛ kɔ níhi nɛ e sa nɛ a kpata a hɛ mi ɔmɛ a he ɔ, anɛ Mawu mi mi fu we Israel asafo ɔ tsuo lo? Nɛ pi lɛ nɔ kake too pɛ nɛ e gbo ngɛ e tɔmi ɔ he je. Ni kpahi hu gbo.

21 Kɛkɛ nɛ Ruben bi ɔmɛ, Gad bi ɔmɛ kɛ Manase wɛtso fã a ha Israel bi akpehi abɔ* a nyatsɛmɛ ɔmɛ heto ke: 22 Yehowa, mawuhi a Mawu!* Yehowa, mawuhi a Mawu! E le nɔ́ he je nɛ wa pee nɔ́ nɛ ɔ, nɛ Israel hu maa le. Ke wa tsɔ atuã nɛ wa yi Yehowa anɔkuale ɔ, lɛɛ mwɔnɛ ligbi nɛ ɔ, nyɛɛ kɛ wa he nɛ ko ke wɔ. 23 Ke wa ma afɔle sami la tɛ konɛ wa kɛ kpale kɛ je Yehowa se, nɛ́ waa sã sami afɔlehi, ngma afɔlehi kɛ tue mi jɔmi afɔlehi ngɛ nɔ ɔ, lɛɛ Yehowa nɛ gbla wa tue. 24 Pi jã kulaa, yi mi tomi kpa ko he je nɛ wa pee nɔ́ nɛ ɔ nɛ, ejakaa wa susu kaa hwɔɔ se ko ɔ, nyɛ bimɛ ɔmɛ ma ba de wa bimɛ ɔmɛ ke: “Mɛni nyɛɛ kɛ Yehowa Israel Mawu ɔ ngɛ peemi? 25 Yehowa kɛ Yordan Pa a to huzu ngɛ waa kɛ nyɛ Ruben bi ɔmɛ kɛ Gad bi ɔmɛ wa kpɛti. Nyɛ be blɔ fami nɔ́ ko ngɛ Yehowa mi. Nɛ nyɛ bimɛ ɔmɛ maa tsi wa bimɛ ɔmɛ blɔ konɛ a ko ja Yehowa.’*

26 “Enɛ ɔ he ɔ, wa de ke, ‘bɔ fɛɛ bɔ nɛ ji ɔ, nyɛ ha nɛ waa ma afɔle sami la tɛ, pi nɛ a maa sã sami afɔle aloo afɔle kpa ko ngɛ nɔ, 27 se mohu, konɛ e pee odase ngɛ waa kɛ nyɛ kɛ wa sisi bimɛ* nɛ maa ba ngɛ wa se ɔ wa kpɛti, kaa wa maa ya nɔ nɛ wa ma sɔmɔ Yehowa nɛ wa maa sã sami afɔlehi, tue mi jɔmi afɔlehi kɛ afɔle kpahi, konɛ hwɔɔ se ɔ, nyɛ bimɛ ɔmɛ nɛ a ko ba de wa bimɛ ɔmɛ ke: “Nyɛ be blɔ fami nɔ́ ko ngɛ Yehowa mi.”’ 28 Enɛ ɔ he ɔ, wa de ke, ke hwɔɔ se ko nɛ a de waa kɛ wa sisi bimɛ ɔmɛ* jã a, wa ma de ke: “Nyɛɛ hyɛ Yehowa afɔle sami la tɛ ɔ henɔ nɛ wa nɛmɛ ɔmɛ pee, pi nɛ a maa sã sami afɔle loo afɔle kpa ko ngɛ nɔ, mohu ɔ, konɛ e pee odase ngɛ waa kɛ nyɛ wa kpɛti.”’ 29 Wa be suɔe kɔkɔɔkɔ kaa wa ma si Yehowa wa Mawu ɔ afɔle sami la tɛ ɔ nɛ ngɛ e bo tsu ɔ hɛ mi ɔ, nɛ wa ya ma afɔle sami la tɛ kpa ko, konɛ waa sã sami afɔlehi, ngma afɔlehi kɛ afɔle kpa ko ngɛ nɔ kɛ tsɔ Yehowa hɛ mi atuã nɛ waa je e se.

30 Benɛ osɔfo Finehas, ma a mi ganɔ ɔmɛ kɛ Israel bi akpehi abɔ* a nyatsɛmɛ nɛ piɛɛ e he ɔ nu nɔ́ nɛ Ruben, Gad kɛ Manase sisi bimɛ ɔmɛ de ɔ, a tsui nɔ a mi. 31 Enɛ ɔ he ɔ, osɔfo Eleazar binyumu Finehas de Ruben, Gad kɛ Manase sisi bimɛ ɔmɛ ke: “Wa ná le mwɔnɛ ɔ kaa Yehowa ngɛ wa kpɛti, ejakaa nyɛ pee we nɔ́ ko nɛ tsɔɔ kaa nyɛ yi Yehowa anɔkuale. Nyɛ he Israel bi ɔmɛ a yi wami kɛ je Yehowa dɛ.”

32 Kɛkɛ nɛ osɔfo Eleazar binyumu Finehas kɛ ganɔ ɔmɛ je Ruben bi ɔmɛ kɛ Gad bi ɔmɛ a zugba a nɔ ngɛ Gilead, nɛ a kpale kɛ ba Kanaan zugba a nɔ, nɛ a ba bɔ Israel bi ɔmɛ amaniɛ. 33 Israel bi ɔmɛ a bua jɔ amaniɛ nɛ a ba bɔ mɛ ɔ he. Kɛkɛ nɛ Israel bi ɔmɛ je Mawu yi, nɛ a de we hu kaa a kɛ Ruben bi ɔmɛ kɛ Gad bi ɔmɛ ma ya hwu ta nɛ́ a kpata zugba nɛ a ngɛ nɔ ɔ hɛ mi.

34 Enɛ ɔ he ɔ, Ruben bi ɔmɛ kɛ Gad bi ɔmɛ wo afɔle sami la tɛ* ɔ biɛ, ejakaa a de ke, “e ji odase ngɛ wa kpɛti kaa Yehowa ji anɔkuale Mawu ɔ nɛ.”

23 Be saii se benɛ Yehowa ha nɛ Israel bi ɔmɛ a he mi jɔ mɛ kɛ je a he nyɛli nɛ bɔle mɛ ɔ a dɛ, nɛ Yoshua hu wa nɛ e piɛ bɔɔ nɛ e ma gbo ɔ, 2 Yoshua tsɛ Israel bi ɔmɛ tsuo, ma nikɔtɔma amɛ, ma hɛ mi nyɛɛli ɔmɛ, kojoli ɔmɛ kɛ ma nɔ hyɛli ɔmɛ nɛ e de mɛ ke: “I bwɔ, nɛ e piɛ bɔɔ nɛ ma gbo. 3 Nyɛ nitsɛmɛ nyɛ na níhi tsuo nɛ Yehowa nyɛ Mawu ɔ pee je ma nɛ ɔmɛ tsuo ngɛ nyɛ he je, ejakaa Yehowa nyɛ Mawu ɔ ji nɔ nɛ ngɛ hwue ha nyɛ ɔ nɛ. 4 Nyɛɛ hyɛ, i fɔ̃ sɔ* nɛ i ngɔ je ma amɛ nɛ piɛ ɔ a zugba a ngɔ ha nyɛ wɛtso ɔmɛ kaa nyɛ weto ní, jehanɛ ɔ, i ngɔ je ma amɛ nɛ i kpata a hɛ mi kɛ je Yordan Pa a nya kɛ ya si Wo Ngua a* he ngɛ pusinɔ he je ɔ a zugba a hu ngɔ ha nyɛ. 5 Yehowa nyɛ Mawu ɔ ji nɔ nɛ ya nɔ nɛ e tsitsɛɛ a yi se kɛ je nyɛ hɛ mi, nɛ e fiee mɛ* ha nyɛ, nɛ nyɛ ngɔ a zugba a kaa bɔ nɛ Yehowa nyɛ Mawu ɔ wo nyɛ si ɔ.

6 “Enɛ ɔ he ɔ, nyɛɛ pee kã wawɛɛ nɛ nyɛɛ bu nɔ́ fɛɛ nɔ́ nɛ a ngma ngɛ Mose Mlaa womi ɔ mi ɔ tue nɛ́ nyɛ kɛ tsu ní nɛ nyɛ ko gba kɛ je he kɛ ya hiɔ nɔ loo muɔ nɔ, 7 nyɛɛ kɛ je ma amɛ nɛ piɛ ngɛ nyɛ kpɛti ɔ nɛ ko bɔ kɔkɔɔkɔ. Nyɛ ko wo a mawu ɔmɛ a biɛ tã po, nyɛɛ kɛ a biɛ nɛ ko kã kita hulɔ, nɛ nyɛ ko sɔmɔ mɛ aloo nyɛ kplã si kɛ ha mɛ kɔkɔɔkɔ. 8 Mohu ɔ, nyɛɛ mɛtɛ Yehowa nyɛ Mawu ɔ he, kaa bɔ nɛ nyɛ pee kɛ ba si mwɔnɛ ligbi nɛ ɔ. 9 Yehowa maa fiee je ma nguahi nɛ a he wa kɛ je nyɛ hɛ mi, ejakaa nɔ ko nɔ ko nyɛ we nɛ e da si ngɛ nyɛ hɛ mi kɛ ba si mwɔnɛ ligbi nɛ ɔ. 10 Nyɛ kpɛti nɔ kake pɛ maa wo nihi akpe fo, ejakaa Yehowa nyɛ Mawu ɔ ngɛ hwue ha nyɛ kaa bɔ nɛ e wo nyɛ si ɔ. 11 Enɛ ɔ he ɔ, nyɛ hɛ nɛ hi nyɛ he nɔ be fɛɛ be* nɛ nyɛɛ suɔ Yehowa nyɛ Mawu ɔ.

12 Se ke nyɛ kpale nyɛ se nɛ nyɛɛ kɛ nyɛ he ya mɛtɛ nihi nɛ piɛ ngɛ je ma amɛ nɛ piɛ ngɛ nyɛ kpɛti ɔ a he nɛ nyɛɛ kɛ mɛ sɛ gba si himi mi nɛ nyɛɛ kɛ mɛ bɔ ɔ, 13 lɛɛ, nyɛ ná nɛ nyɛɛ le kaa Yehowa nyɛ Mawu ɔ be je ma nɛ ɔmɛ fiee* ha nyɛ hu. A maa pee kaa klama ha nyɛ kɛ kpã nɛ́ a kɛ ngɛ nyɛ se mi fiaae kɛ miohi ngɛ nyɛ hɛngmɛ mi kɛ yaa si be nɛ nyɛ hɛ mi ma kpata kulaa kɛ je zugba kpakpa nɛ ɔ nɛ Yehowa nyɛ Mawu ɔ kɛ ha nyɛ ɔ nɔ.

14 “Amlɔ nɛ ɔ, nyɛɛ hyɛ, e piɛ bɔɔ nɛ ma gbo,* nɛ nyɛ le kɛ nyɛ tsui tsuo kɛ nyɛ klaa* tsuo kaa, ní kpakpahi tsuo nɛ Yehowa nyɛ Mawu ɔ wo nyɛ si kaa e maa pee ha nyɛ ɔ, kake ngmelu po be nɛ e bɛ mi. Lɛ tsuo ba mi ha nyɛ pɛpɛɛpɛ. Ekoeko be nɛ bɛ mi. 15 Se kaa bɔ nɛ ní kpakpahi tsuo nɛ Yehowa nyɛ Mawu ɔ wo si kaa e maa pee ha nyɛ ɔ tsuo ba mi ɔ, jã nɔuu kɛ̃ nɛ Yehowa nyɛ Mawu ɔ maa ngɔ ní yayahi tsuo nɛ e wo he si ɔ* kɛ ba nyɛ nɔ nɛ e ma kpata nyɛ hɛ mi kɛ je zugba kpakpa nɛ ɔ nɛ Yehowa nyɛ Mawu ɔ kɛ ha nyɛ ɔ nɔ. 16 Ke nyɛ ku somi nɛ Yehowa nyɛ Mawu ɔ fã nyɛ ke nyɛɛ ye nɔ ɔ mi, nɛ nyɛ ya sɔmɔ mawu kpahi nɛ nyɛ kplã si kɛ ha mɛ ɔ, lɛɛ, Yehowa mi mi ma fu nyɛ wawɛɛ nɛ nyɛ hɛ mi ma kpata oya nɔuu kɛ je zugba kpakpa nɛ e kɛ ha nyɛ ɔ nɔ.”

24 Yoshua bua Israel wɛtso ɔmɛ tsuo a nya ngɛ Shekem, nɛ e tsɛ Israel ma nikɔtɔma amɛ, ma hɛ mi nyɛɛli ɔmɛ, kojoli ɔmɛ kɛ ma nɔ hyɛli ɔmɛ kɛ ba, nɛ a ba da anɔkuale Mawu ɔ hɛ mi. 2 Yoshua de ma a tsuo ke: “Nɔ́ nɛ Yehowa Israel Mawu ɔ de ji nɛ ɔ nɛ, ‘Blema a, nyɛ nɛmɛ ɔmɛ hi Pa a* se, lejɛ ɔ nɛ Tera nɛ ji Abraham kɛ Nahor a tsɛ ɔ hi, nɛ a sɔmɔ mawu kpahi.

3 “‘Pee se ɔ, i ngɔ nyɛ nɛ̃ Abraham kɛ je Pa a* se, nɛ i ha nɛ e ya kpa Kanaan zugba a tsuo nɔ nɛ i ha nɛ e nina* hiɛ babauu. I ha lɛ Isak; 4 nɛ i ngɔ Yakob kɛ Esau kɛ ha Isak. Pee se ɔ, i ngɔ Seir Yoku ɔ kɛ ha Esau kaa e nɔ́; nɛ Yakob kɛ e bimɛ ɔmɛ lɛɛ a ya hi Egipt. 5 Pee se ɔ, i tsɔ Mose kɛ Aaron, nɛ i ngɔ haomihi kɛ ba Egipt bi ɔmɛ a nɔ, lɔ ɔ se ɔ, i je nyɛ kɛ je lejɛ ɔ. 6 Benɛ i je nyɛ tsɛmɛ ɔmɛ kɛ je Egipt kɛ ma, nɛ a ba su wo ɔ nya a, Egipt bi ɔmɛ kɛ ta zugba lɛhi kɛ okpɔngɔ nɔ hili fiee a se hluu kɛ ba si Wo Tsu ɔ he. 7 Kɛkɛ nɛ a bɔni ngmlaa kpami kɛ bɔni imi Yehowa tsɛmi, lɔ ɔ he ɔ, i ha nɛ diblii wo ngɛ nyɛɛ kɛ Egipt bi ɔmɛ nyɛ kpɛti, nɛ i ha wo ɔ ha a nɔ, nɛ nyɛ nitsɛmɛ nyɛ na nɔ́ nɛ i pee ngɛ Egipt ɔ kɛ nyɛ hɛngmɛ. Lɔ ɔ se ɔ, nyɛ hi nga a nɔ jehahi* babauu.

8 “‘Nɛ i kɛ nyɛ ba Amor bi ɔmɛ nɛ a ngɛ Yordan Pa a se* ɔ a zugba a nɔ, nɛ a kɛ nyɛ hwu ta, se i ngɔ mɛ kɛ wo nyɛ dɛ mi bɔ nɛ pee nɛ nyɛɛ ngɔ a zugba a, nɛ i kpata a hɛ mi kɛ je nyɛ hɛ mi. 9 Kɛkɛ nɛ Zipor binyumu Balak nɛ ji Moab matsɛ ɔ te si nɛ e kɛ Israel hwu ta. Nɛ e tsɔ Beor binyumu Balaam konɛ e ba gbiɛ nyɛ. 10 Se i bui Balaam tue. Lɔ ɔ he ɔ, e jɔɔ nyɛ si abɔ, nɛ i kpɔ̃ nyɛ kɛ je e dɛ mi.

11 “‘Nɛ nyɛ po Yordan Pa a kɛ ba Yeriko. Yeriko ma hɛ mi nyɛɛli ɔmɛ,* Amor bi ɔmɛ, Periz bi ɔmɛ, Kanaan bi ɔmɛ, Hit bi ɔmɛ, Girgash bi ɔmɛ, Hiv bi ɔmɛ, kɛ Yebus bi ɔmɛ kɛ nyɛ ba hwu ta, se i ngɔ mɛ kɛ wo nyɛ dɛ. 12 Lɔ ɔ he ɔ, i ha nɛ a ye gbeye* loko nyɛ su a ngɔ, nɛ lɔ ɔ ha nɛ a tu fo kɛ je nyɛ hɛ mi, kaa bɔ nɛ i pee Amor matsɛmɛ enyɔ ɔmɛ ɔ. Tsa pi nyɛ klaate loo nyɛ akplɔ nɛ ha nɛ nyɛ ye kunimi. 13 I ha nyɛ zugba nɛ́ nyɛ gbo we he dengme ko kɛ mahi nɛ pi nyɛ nɛ nyɛ to a sisi nɛ nyɛ hi a mi. Nɛ nyɛ ngɛ wai kɛ oliv tsohi nɛ́ pi nyɛ nɛ́ nyɛ du ɔ a nɔ yiblii yee.

14 “Enɛ ɔ he ɔ, nyɛɛ ye Yehowa gbeye nɛ nyɛ sɔmɔ lɛ kɛ tsui nɛ mi tsɔ* kɛ ngɛ anɔkuale yemi mi, nɛ nyɛ jé mawu ɔmɛ nɛ nyɛ nɛmɛ ɔmɛ sɔmɔ ngɛ Pa a* se kɛ Egipt ɔ kɛ pue he, nɛ́ nyɛ sɔmɔ Yehowa. 15 Amlɔ nɛ ɔ, ke nyɛ sume kaa nyɛ ma sɔmɔ Yehowa a, lɛɛ nyɛɛ tsɔɔ nɔ nɛ nyɛ ma sɔmɔ, ke ji mawu ɔmɛ nɛ nyɛ nɛmɛ ɔmɛ sɔmɔ ngɛ Pa a* se ɔ jio, aloo mawu ɔmɛ nɛ Amor bi ɔmɛ nɛ nyɛ ngɛ a zugba a nɔ sɔmɔɔ mɛ ɔ jio. Se imi kɛ ye we ɔ lɛɛ, wa ma sɔmɔ Yehowa.”

16 Kɛkɛ nɛ ni ɔmɛ ha heto ke: “Wa be Yehowa se jee nɛ́ wa ya sɔmɔ mawu kpahi kɔkɔɔkɔ. 17 Yehowa wa Mawu ɔ ji nɔ nɛ je wɔ kɛ wa tsɛmɛ ɔmɛ kɛ je nyɔguɛ yemi we mi ngɛ Egipt zugba a nɔ, nɛ e pee nyakpɛ ní nguanguahi ngɛ wa hɛ mi, lɛ ji nɔ nɛ e bu wa he ngɛ blɔhi tsuo nɛ wa nyɛɛ nɔ ɔ nɔ kɛ mahi tsuo nɛ wa gu a kpɛti kɛ be ɔ a he. 18 Yehowa fiee ni ɔmɛ tsuo nɛ́ Amor bi ɔmɛ nɛ a hi zugba a nɔ loko wa ba a hu piɛɛ he ɔ kɛ je. Lɔ ɔ he ɔ, wɔ hu wa ma sɔmɔ Yehowa, ejakaa lɛ ji wa Mawu.”

19 Kɛkɛ nɛ Yoshua de ni ɔmɛ ke: “Nyɛ be nyɛe ma sɔmɔ Yehowa, ejakaa e ji Mawu nɛ ngɛ klɔuklɔu; e ji Mawu nɛ e suɔ kaa a ja lɛ pɛ. E kɛ nyɛ tue gbomi* ɔmɛ kɛ nyɛ he yayami ɔmɛ be nyɛ kee. 20 Ke nyɛ kua Yehowa nɛ nyɛ ya sɔmɔ ma se mawuhi ɔ, lɛ hu e ma je e hɛ kɛ pi nyɛ nɛ e ma kpata nyɛ hɛ mi, e ngɛ mi kaa e pee ní kpakpahi ha nyɛ mohu lɛɛ.”

21 Se ni ɔmɛ de Yoshua ke: “Dɛbi, wa ma sɔmɔ Yehowa!” 22 Enɛ ɔ he ɔ, Yoshua de mɛ ke: “Nyɛ nitsɛmɛ nyɛ ye he odase kaa, nyɛ hla kaa nyɛ ma sɔmɔ Yehowa.” Kɛkɛ nɛ a de ke: “Wɔ nitsɛmɛ lɛ wa ye he odase.”

23 Nɛ Yoshua de mɛ ke: “Ke jã a, lɛɛ nyɛ je ma se mawu ɔmɛ nɛ a ngɛ nyɛ kpɛti ɔ kɛ je, nɛ́ nyɛ sɔmɔ Yehowa Israel Mawu ɔ kɛ nyɛ tsui tsuo.” 24 Ni ɔmɛ de Yoshua ke: “Wa ma sɔmɔ Yehowa wa Mawu ɔ, nɛ wa maa bu e gbi tue!”

25 Lɔ ɔ he ɔ, Yoshua kɛ ni ɔmɛ so somi ko jamɛ a ligbi ɔ, nɛ e wo mlaa nɛ e kɛ fami hu ha mɛ ngɛ Shekem. 26 Kɛkɛ nɛ Yoshua ngma munyu nɛ ɔmɛ kɛ wo Mawu Mlaa womi ɔ mi, nɛ e ngɔ tɛ agbo ko kɛ ma tso ngua nɛ ngɛ Yehowa jami he ɔ sisi.

27 Yoshua ya nɔ nɛ e de ni ɔmɛ ke: “Nyɛɛ hyɛ! Tɛ nɛ ɔ maa ye odase kɛ si wɔ, ejakaa e nu nɔ́ fɛɛ nɔ́ nɛ Yehowa de wɔ ɔ, nɛ e maa ye odase kɛ si nyɛ, konɛ nyɛ ko kua Yehowa nyɛ Mawu ɔ.” 28 Kɛkɛ nɛ Yoshua wo ni ɔmɛ blɔ, nɛ nɔ fɛɛ nɔ kpale kɛ ho e zugba nɔ ya.

29 Enɛ ɔ se ɔ, Nun binyumu Yoshua, nɛ ji Yehowa sɔmɔlɔ ɔ gbo benɛ e ye jeha 110. 30 Nɛ a pu lɛ ngɛ zugba kpɔ nɛ ji e weto ní ɔ nɔ ngɛ Timnat Sera, nɛ ngɛ Efraim yoku ɔmɛ a nɔ ngɛ Gaash yoku ɔ yiti je. 31 Israel bi ɔmɛ ya nɔ nɛ a sɔmɔ Yehowa ngɛ Yoshua wami ligbi ɔmɛ tsuo a mi kɛ benɛ nikɔtɔmahi nɛ a hi si ngɛ Yoshua gbenɔ se nɛ́ a le níhi tsuo nɛ Yehowa pee ha Israel bi ɔmɛ ɔ hu ngɛ wami mi ɔ.

32 A pu Yosef wuhi nɛ́ Israel bi ɔmɛ kɛ je Egipt kɛ ba a ngɛ Shekem, ngɛ zugba nɛ Yakob kɛ sika hiɔ 100 he ngɛ Shekem tsɛ Hamor binyumu ɔmɛ a dɛ ɔ nɔ. Nɛ e ba pee Yosef bimɛ ɔmɛ a gbosi ní.

33 Aaron bi Eleazar hu ba gbo, nɛ a pu lɛ ngɛ e binyumu Finehas Kpongu ɔ nɛ a kɛ ha lɛ ngɛ Efraim yoku ɔmɛ a nɔ ɔ nɔ.