EZRA

1 Ngɛ Persia Matsɛ Sirus nɔ yemi ɔ we kekleekle jeha a mi ɔ, bɔ nɛ pee nɛ munyu nɛ Yehowa tu kɛ gu Yeremia nɔ ɔ nɛ e ba mi ɔ, Yehowa ha nɛ Persia Matsɛ Sirus ná suɔmi ɔ kaa e maa fiɛɛ munyu nɛ ɔ ngɛ e nɔ yemi he ɔmɛ tsuo, nɛ e ngma kɛ fɔ si ke:

2 “Nɔ́ nɛ Persia Matsɛ Sirus de ji nɛ ɔ nɛ, ‘Yehowa, nɛ ji hiɔwe Mawu ɔ ngɔ zugba a nɔ matsɛ yemi ɔmɛ tsuo kɛ ha mi, nɛ e tsɔ mi kaa ma ya ma we ha lɛ ngɛ Yerusalem, ngɛ Yuda. 3 E we bi ɔmɛ a ti nɔ fɛɛ nɔ nɛ e ngɛ nyɛ kpɛti ɔ, e Mawu ɔ nɛ piɛɛ e he, nɛ́ e kuɔ kɛ ya Yerusalem ngɛ Yuda, nɛ́ e kpale ya ma Yehowa, Israel Mawu ɔ we ɔ; lɛ ji anɔkuale Mawu ɔ nɛ́ e we ɔ hi Yerusalem ɔ* nɛ. 4 Nɔ fɛɛ nɔ nɛ ji nubwɔ, nɛ e suɔ nɛ e kpale ɔ, he fɛɛ he nɛ e ngɛ ɔ, e kpɔ mi bi ɔmɛ* nɛ́ a ye bua lɛ kɛ sika hiɔ kɛ sika tsu, kɛ níhi nɛ a ngɛ kɛ lohwe lɛlɛɛhi, kɛ afɔle nɛ je tsui mi faa kɛ ha anɔkuale Mawu ɔ we ɔ nɛ ngɛ Yerusalem ɔ.’”

5 Kɛkɛ nɛ Yuda bi ɔmɛ kɛ Benyamin bi ɔmɛ a tsɛmɛ a we ɔmɛ a nyatsɛmɛ ɔmɛ, kɛ osɔfo ɔmɛ, kɛ Levi bi ɔmɛ—nɔ fɛɛ nɔ nɛ anɔkuale Mawu ɔ ha nɛ e ná suɔmi ɔ—dla e he, konɛ a kuɔ kɛ ya nɛ́ a kpale ya ma Yehowa we ɔ nɛ́ e hi Yerusalem ɔ ekohu. 6 A kpɔ mi bi ɔmɛ tsuo ye bua mɛ* kɛ sika hiɔ kɛ sika tsu níhi, kɛ níhi nɛ a ngɛ, lohwe lɛlɛɛhi, kɛ ní kpahi nɛ a he jua wa, e slo nike níhi tsuo nɛ je tsui mi faa kɛ ha Mawu we ɔ.

7 Jehanɛ hu ɔ, Matsɛ Sirus je Yehowa we ɔ ní ɔmɛ nɛ Nebukadnezar ya muɔɔ kɛ je Yerusalem nɛ e kɛ ya pue e mawu ɔ we ɔ mi ɔ kpo. 8 Persia Matsɛ Sirus ha nɛ juetli nɔ hyɛlɔ Mitredat hyɛ nɛ a je ní ɔmɛ kpo, nɛ Mitredat kane ní ɔmɛ, nɛ e kɛ wo Yuda ganɔ Sheshbazar* dɛ.

9 Ní ɔmɛ ji: sika tsu kpluhi nɛ a pee mɛ kaa kusii* 30, sika hiɔ kpluhi nɛ a pee mɛ kaa kusii 1,000, kplu kpahi 29, 10 sika tsu kplu nyafinyafihi 30, sika hiɔ kplu nyafinyafihi 410, kɛ ní kpahi 1,000. 11 Sika tsu kɛ sika hiɔ ní ɔmɛ tsuo a yibɔ ji 5,400. Sheshbazar ngɔ ní nɛ ɔmɛ tsuo kɛ kuɔ kɛ ba benɛ nihi nɛ a nuu mɛ nyɔguɛ kɛ ho Babilon ya a kpale kɛ ba Yerusalem ɔ.

2 Nihi nɛ a ngɛ kpokpa a nɔ* nɛ a je nyɔguɛ tso mi kɛ ba, nɛ ji nihi nɛ Babilon Matsɛ Nebukadnezar nuu mɛ nyɔguɛ kɛ ho Babilon ya, nɛ́ pee se ɔ, a kpale a se kɛ ba Yerusalem kɛ Yuda nɛ a ti nɔ fɛɛ nɔ ho lɛ nitsɛ e ma mi ya ji nɛ ɔmɛ nɛ, 2 mɛ ji nihi nɛ a kɛ Zerubabel, Yeshua, Nehemia, Seraya, Reelaya, Mordekai, Bilshan, Mispar, Bigvai, Rehum, kɛ Baanah ba a nɛ.

Israel nyumu ɔmɛ a yibɔ ji nɛ ɔmɛ nɛ: 3 Parosh binyumu ɔmɛ, 2,172; 4 Shefatia binyumu ɔmɛ, 372; 5 Arah binyumu ɔmɛ, 775; 6 Pahat Moab binyumu ɔmɛ nɛ a ji Yeshua kɛ Yoab a sisi bimɛ ɔ, 2,812; 7 Elam binyumu ɔmɛ, 1,254; 8 Zatu binyumu ɔmɛ, 945; 9 Zakai binyumu ɔmɛ, 760; 10 Bani binyumu ɔmɛ, 642; 11 Bebai binyumu ɔmɛ, 623; 12 Azgad binyumu ɔmɛ, 1,222; 13 Adonikam binyumu ɔmɛ, 666; 14 Bigvai binyumu ɔmɛ, 2,056; 15 Adin binyumu ɔmɛ, 454; 16 Ater binyumu ɔmɛ nɛ a ji Hezekia ninahi, 98; 17 Bezai binyumu ɔmɛ, 323; 18 Yora binyumu ɔmɛ, 112; 19 Hashum binyumu ɔmɛ, 223; 20 Gibar binyumu ɔmɛ, 95; 21 Betlehem binyumu ɔmɛ, 123; 22 Netofa nyumu ɔmɛ, 56; 23 Anatot nyumu ɔmɛ, 128; 24 Azmavet binyumu ɔmɛ, 42; 25 Kiriat Yearim, Kefira, kɛ Beerot a binyumu ɔmɛ, 743; 26 Rama kɛ Geba a binyumu ɔmɛ, 621; 27 Mikmas nyumu ɔmɛ, 122; 28 Betel kɛ Ai nyumu ɔmɛ, 223; 29 Nebo binyumu ɔmɛ, 52; 30 Magbish binyumu ɔmɛ, 156; 31 Elam kaketsɛ ɔ binyumu ɔmɛ, 1,254; 32 Harim binyumu ɔmɛ, 320; 33 Lod, Hadid, kɛ Ono a binyumu ɔmɛ, 725; 34 Yeriko binyumu ɔmɛ, 345; 35 Senaa binyumu ɔmɛ, 3,630.

36 Osɔfo ɔmɛ ji: Yedaya nɛ je Yeshua we ɔ mi ɔ binyumu ɔmɛ, 973; 37 Imer binyumu ɔmɛ, 1,052; 38 Pashur binyumu ɔmɛ, 1,247; 39 Harim binyumu ɔmɛ, 1,017.

40 Levi bi ɔmɛ ji: Yeshua kɛ Kadmiel a binyumu ɔmɛ nɛ a je Hodavia weku ɔ mi ɔ, 74. 41 Lali ɔmɛ ji: Asaf binyumu ɔmɛ, 128. 42 Agbo nya buli ɔmɛ a binyumu ɔmɛ ji: Shalum binyumu ɔmɛ, Ater binyumu ɔmɛ, Talmon binyumu ɔmɛ, Akub binyumu ɔmɛ, Hatita binyumu ɔmɛ, kɛ Shobai binyumu ɔmɛ, mɛ tsuo a yibɔ ji 139.

43 Sɔlemi we ɔ sɔmɔli ɔmɛ* ji: Ziha binyumu ɔmɛ, Hasufa binyumu ɔmɛ, Tabaot binyumu ɔmɛ, 44 Keros binyumu ɔmɛ, Siaha binyumu ɔmɛ, Padon binyumu ɔmɛ, 45 Lebana binyumu ɔmɛ, Hagaba binyumu ɔmɛ, Akub binyumu ɔmɛ, 46 Hagab binyumu ɔmɛ, Salmai binyumu ɔmɛ, Hanan binyumu ɔmɛ, 47 Gidel binyumu ɔmɛ, Gahar binyumu ɔmɛ, Reaya binyumu ɔmɛ, 48 Rezin binyumu ɔmɛ, Nekoda binyumu ɔmɛ, Gazam binyumu ɔmɛ, 49 Uza binyumu ɔmɛ, Pasea binyumu ɔmɛ, Besai binyumu ɔmɛ, 50 Asna binyumu ɔmɛ, Meunim binyumu ɔmɛ, Nefusim binyumu ɔmɛ, 51 Bakbuk binyumu ɔmɛ, Hakufa binyumu ɔmɛ, Harhur binyumu ɔmɛ, 52 Bazlut binyumu ɔmɛ, Mehida binyumu ɔmɛ, Harsha binyumu ɔmɛ, 53 Barkos binyumu ɔmɛ, Sisera binyumu ɔmɛ, Temah binyumu ɔmɛ, 54 Nezia binyumu ɔmɛ, kɛ Hatifa binyumu ɔmɛ.

55 Salomo sɔmɔli ɔmɛ a binyumu ɔmɛ ji: Sotai binyumu ɔmɛ, Soferet binyumu ɔmɛ, Peruda binyumu ɔmɛ, 56 Yaala binyumu ɔmɛ, Darkon binyumu ɔmɛ, Gidel binyumu ɔmɛ, 57 Shefatia binyumu ɔmɛ, Hatil binyumu ɔmɛ, Pokeret Hazebaim binyumu ɔmɛ, kɛ Ami binyumu ɔmɛ.

58 Sɔlemi we ɔ sɔmɔli ɔmɛ* tsuo, kɛ Salomo sɔmɔli ɔmɛ a binyumu ɔmɛ a yibɔ ji 392.

59 Nihi nɛ a kuɔ kɛ je Tel Mela, Tel Harsha, Kerub, Adon, kɛ Imer kɛ ho, se a nyɛ we nɛ a tsɔɔ a tsɛmɛ ɔmɛ a we kɛ he nɛ a je, kaa a ji Israel bi loo a pi Israel bi ji: 60 Delaya binyumu ɔmɛ, Tobia binyumu ɔmɛ, kɛ Nekoda binyumu ɔmɛ, 652. 61 Nɛ ngɛ osɔfo ɔmɛ a binyumu ɔmɛ a kpɛti ɔ: Habaya binyumu ɔmɛ, Hakoz binyumu ɔmɛ kɛ Barzilai binyumu ɔmɛ. Barzilai nɛ ɔ lɛ e ngɔ yo ngɛ Gilead no Barzilai biyi ɔmɛ a kpɛti nɛ a kɛ a biɛ wo lɛ ɔ nɛ. 62 Nimli nɛ ɔmɛ hla níhi nɛ a ngma kɛ fɔ si ngɛ a he konɛ a le a weku kpa, se a nɛ, lɔ ɔ he ɔ, a kɛ mɛ piɛɛ we osɔfo ɔmɛ* a he. 63 Amlaalo ɔ* de mɛ ke a be nyɛe maa ye ní klɔuklɔu pe kulaa a eko, kɛ yaa si be nɛ a maa na osɔfo nɛ ma nyɛ maa ngɔ Urim kɛ Tumim kɛ hla níhi a mi.

64 Asafo ɔ tsuo yibɔ ji 42,360, 65 e slo a nyɔguɛ nyumuhi kɛ a nyɔguɛ yihi nɛ a yibɔ ji 7,337; a ngɛ nyumuhi kɛ yihi nɛ a ji lali 200 hulɔ. 66 A we okpɔngɔ ɔmɛ a yibɔ ji 736, a teji okpɔngɔ ɔmɛ a yibɔ ji 245, 67 a we afukpɔngɔ ɔmɛ a yibɔ ji 435, nɛ a teji ɔmɛ a yibɔ ji 6,720.

68 Benɛ a ba su Yehowa we ɔ ngɛ Yerusalem ɔ, a tsɛmɛ a we ɔmɛ a nyatsɛmɛ ɔmɛ a ti ni komɛ je a tsui mi faa nɛ a ngɔ níhi kɛ ha, konɛ a kɛ kpale ma anɔkuale Mawu ɔ we ɔ* ngɛ he nɛ e hi sa a. 69 Ngɛ a nyɛmi nya a, a ha sika tsu drakma* 61,000, sika hiɔ mina* 5,000, kɛ osɔfohi a tade klɔii 100 konɛ a kɛ wo ní tsumi ɔ juetli to he ɔ. 70 Nɛ osɔfo ɔmɛ, Levi bi ɔmɛ, ma bi ɔmɛ a ti ni komɛ, lali ɔmɛ, agbo nya buli ɔmɛ, kɛ sɔlemi we ɔ sɔmɔli ɔmɛ* hi a ma amɛ a mi, nɛ Israel bi nɛ piɛ ɔ tsuo* hi a ma amɛ a mi.

3 Benɛ nyɔhiɔ kpaagone ɔ su nɛ́ Israel bi ɔmɛ* ngɛ a ma amɛ a mi ɔ, a pee kake kɛ bua a he nya ngɛ Yerusalem. 2 Yeshua, nɛ ji Yehozadak binyumu ɔ kɛ e nyɛmimɛ osɔfo ɔmɛ, kɛ Zerubabel, nɛ ji Shealtiel binyumu ɔ, kɛ e nyɛminyumu ɔmɛ te si nɛ a ma Israel Mawu ɔ afɔle sami la tɛ ɔ, konɛ a nyɛ nɛ a sã sami afɔlehi ngɛ nɔ kaa bɔ nɛ a ngma ngɛ anɔkuale Mawu ɔ sɔmɔlɔ Mose Mlaa a mi ɔ.

3 Ngɛ gbeye nɛ a ye nihi nɛ a ngɛ zugbahi nɛ bɔle mɛ ɔ nɔ ɔ tsuo se ɔ, a ma afɔle sami la tɛ ɔ ngɛ he nɛ e hi sa a, nɛ a bɔni sami afɔlehi nɛ ji mɔtu kɛ gbɔkuɛ afɔlehi sami ngɛ nɔ ha Yehowa. 4 Lɔ ɔ se ɔ, a ye Gbahi A Sisi Himi* Gbijlɔ ɔ kaa bɔ nɛ a ngma a, nɛ daa ligbi ɔ, a sãã sami afɔlehi abɔ nɛ a tsɔɔ kaa a sã daa ligbi ɔ pɛpɛɛpɛ. 5 Lɔ ɔ se ɔ, a sã sami afɔle nɛ a sãã daa a, kɛ afɔlehi nɛ a sãã ngɛ nyɔhiɔ ehe ɔmɛ a nɔ, kɛ ní nɛmɛ nɛ a sãã ngɛ behi nɛ a yeɔ Yehowa gbijlɔhi tsuo nɛ a ngɛ klɔuklɔu ɔ mi, kɛ ní nɛmɛ nɛ nihi je a suɔmi mi nɛ a kɛ ha Yehowa kaa afɔle nɛ je tsui mi faa a hulɔ. 6 Kɛ je nyɔhiɔ kpaagone ɔ we kekleekle ligbi ɔ nɔ ɔ, a bɔni sami afɔlehi sami ha Yehowa, be mi nɛ a fiɛ Yehowa sɔlemi we ɔ sisi tomi ɔ lolo.

7 A ha tɛ gbali ɔmɛ kɛ ga ní tsuli ɔmɛ sika, nɛ a ha Sidon bi ɔmɛ kɛ Tiro bi ɔmɛ nɛ a ngɔ seda tsohi kɛ gu wo ɔ nɔ kɛ je Lebanon kɛ ba Yopa kaa bɔ nɛ Persia Matsɛ Sirus fã mɛ ɔ, niye ní, dã kɛ nu.

8 Benɛ a ba su anɔkuale Mawu ɔ we ɔ ngɛ Yerusalem ngɛ jeha enyɔne ɔ we nyɔhiɔ enyɔne ɔ mi ɔ, Zerubabel, nɛ ji Shealtiel binyumu ɔ, kɛ Yeshua, nɛ ji Yehozadak binyumu ɔ, kɛ a nyɛminyumu ɔmɛ nɛ piɛ ɔ, kɛ osɔfo ɔmɛ kɛ Levi bi ɔmɛ, kɛ nihi tsuo nɛ a je nyɔguɛ tso mi kɛ ba Yerusalem ɔ je ní tsumi ɔ sisi; a ha nɛ Levi bi nɛ a ye kɛ je jeha 20 kɛ yaa a hyɛ Yehowa we ɔ he ní tsumi ɔ nɔ. 9 Lɔ ɔ he ɔ, Yeshua, kɛ e binyumu ɔmɛ kɛ e nyɛminyumu ɔmɛ, kɛ Kadmiel kɛ e binyumu ɔmɛ, nɛ a ji Yuda binyumuhi ɔ pee kake konɛ a hyɛ nihi nɛ a ngɛ ní tsue ngɛ anɔkuale Mawu ɔ we ɔ a nɔ, nɛ Henadad binyumu ɔmɛ, a binyumu ɔmɛ kɛ a nyɛminyumu ɔmɛ, nɛ a ji Levi bihi ɔ hu piɛɛ a he.

10 Benɛ tsu mali ɔmɛ fia Yehowa we ɔ sisi tomi ɔ ta a, osɔfo ɔmɛ nɛ a wo osɔfo tade nɛ a hɛɛ titimati ɔmɛ, kɛ Levi bi ɔmɛ, nɛ ji Asaf binyumu ɔmɛ nɛ a hɛɛ ayawa amɛ ɔ te si nɛ a da si konɛ a je Yehowa yi kaa bɔ nɛ Israel Matsɛ David tsɔɔ kaa a pee ɔ. 11 A bɔni Yehowa yi jemi; a pee kake kɛ la kɛ je e yi nɛ a na lɛ si, “ejakaa e hi, nɛ suɔmi nɛ se pui nɛ e ngɛ kɛ ha Israel ɔ ngɛ kɛ yaa neneene.” Kɛkɛ nɛ ni ɔmɛ tsuo wo a gbi nɔ kɛ je Yehowa yi wawɛɛ, ejakaa a fia Yehowa we ɔ sisi tomi ɔ. 12 Osɔfo ɔmɛ, Levi bi ɔmɛ, kɛ a tsɛmɛ a we ɔmɛ a nyatsɛmɛ ɔmɛ a ti nihi fuu, nɛ ji nimowi nɛ a na blema we ɔ fo ya boboobo benɛ a na nɛ a fia we nɛ ɔ sisi tomi ɔ, se ni kpahi fuu kpa ngmlaa wawɛɛ kɛ bua jɔmi. 13 Lɔ ɔ he ɔ, ni ɔmɛ nyɛ we nɛ a le slɔɔto nɛ ngɛ bua jɔmi ngmlaa nɛ a ngɛ kpae ɔ kɛ ya nɛ a ngɛ foe ɔ a kpɛti, ejakaa ni ɔmɛ ngɛ ngmlaa kpae wawɛɛ, nɛ nihi ngɛ he nue ngɛ tsitsaa lokoo.

4 Benɛ Yuda bi ɔmɛ kɛ Benyamin bi ɔmɛ a he nyɛli ɔmɛ nu kaa nihi nɛ a kpale kɛ je nyɔguɛ tso mi kɛ ba a ngɛ sɔlemi we mae ha Yehowa, Israel Mawu ɔ, 2 oya nɔuu nɛ a ya su Zerubabel kɛ a tsɛmɛ a we ɔmɛ a nyatsɛmɛ ɔmɛ a he nɛ a de mɛ ke: “Nyɛ ha nɛ waa kɛ nyɛ nɛ ma we ɔ; ejakaa wɔ hu wa jaa nyɛ Mawu ɔ,* nɛ wa sãã afɔle kɛ haa lɛ kɛ je Asiria Matsɛ Esar-hadon nɛ ngɔ wɔ kɛ ba hiɛ ɔ yi nɔ.” 3 Se Zerubabel kɛ Yeshua, kɛ Israel bi ɔmɛ a tsɛmɛ a we ɔmɛ a nyatsɛmɛ ɔmɛ nɛ a piɛ ɔ de mɛ ke: “Nyɛ be he blɔ nɛ nyɛ piɛɛɔ wa he kɛ maa we kɛ haa wa Mawu ɔ, ejakaa wɔ pɛ lɛ wa maa ma we kɛ ha Yehowa Israel Mawu ɔ, kaa bɔ nɛ Matsɛ Sirus nɛ ji Persia matsɛ ɔ fã wɔ ɔ.”

4 Kɛkɛ nɛ zugba a nɔ bi ɔmɛ ya nɔ nɛ a jɔ̃ Yuda bi ɔmɛ a kɔni mi, nɛ a wo a he gbeye konɛ a kpa we ɔ mami. 5 Nɛ kɛ je Persia Matsɛ Sirus yi nɔ hluu kɛ ya si Persia Matsɛ Darius nɔ yemi ɔ mi ɔ, a bɔ ga woli apaa kɛ wo a he konɛ a puɛ a yi mi tomi ɔ. 6 Ngɛ Ahazuerus nɔ yemi ɔ sisije ɔ, a ngma womi kɛ po nihi nɛ a ngɛ Yuda kɛ Yerusalem ɔ a nya. 7 Nɛ ngɛ Persia Matsɛ Artaherhes be ɔ mi ɔ, Bishlam, Mitredat, Tabeel kɛ ni kpahi nɛ a piɛɛ e he ɔ ngma sɛ womi kɛ ya ha Matsɛ Artaherhes; a tsɔɔ sɛ womi ɔ sisi kɛ ya Aram gbi mi, nɛ a kɛ Aram ningma okadihi lɛ ngma.*

8 * Rehum, nɛ ji amlaalo nane mi dalɔ nɔkɔtɔma a, kɛ Shimshai, nɛ ji womi ngmalɔ ɔ ngma sɛ womi kɛ si Yerusalem bi ɔmɛ kɛ ya ha Matsɛ Artaherhes ke: 9 (Sɛ womi ɔ je nimli nɛ ɔmɛ a ngɔ: Rehum, nɛ ji amlaalo nane mi dalɔ nɔkɔtɔma a, kɛ Shimshai, nɛ ji womi ngmalɔ ɔ, kɛ ni kpahi nɛ a piɛɛ a he ɔ, nɛ ji kojoli ɔmɛ, kɛ amlaalo tsɔwi ɔmɛ, womi ngmali ɔmɛ,* Erek bi ɔmɛ, Babilon bi ɔmɛ, nihi nɛ a ngɛ Susa, nɛ ji Elam bi ɔmɛ, 10 kɛ mahi nɛ a piɛ nɛ Asenapar, nɛ ji nɔmlɔ ngua nɛ hɛ mi ngɛ nyami ɔ ngɔ mɛ kɛ ho nyɔguɛ tso mi ya, nɛ́ e ha nɛ a hi Samaria ma amɛ a mi ɔ, kɛ nihi nɛ a piɛ nɛ a ngɛ kpokpa nɛ ngɛ Pa a Se* ɔ nɔ ɔ, nɛ amlɔ nɛ ɔ, 11 sɛ womi nɛ a kɛ mane lɛ ɔ mi munyu ji nɛ ɔ nɛ.)

“O sɔmɔli, nɛ ji nyumuhi nɛ a ngɛ kpokpa nɛ ngɛ Pa a Se ɔ nɔ ɔ ngɛ mo Matsɛ Artaherhes sɛ womi nɛ ɔ ngmae: Amlɔ nɛ ɔ, 12 wa ngɛ hlae nɛ matsɛ ɔ nɛ e le kaa Yuda bi ɔmɛ nɛ a je o ngɔ nɛ a kuɔ kɛ ba wa ngɔ ngɛ hiɛ ɔ ba su Yerusalem. A kpale ba ngɛ atuã tsɔli kɛ yiwutsotsɛmɛ a ma a poe, nɛ e piɛ bɔɔ nɛ a maa gbe gbogbo ɔmɛ a fiami nya, nɛ a ngɛ sisi tomi ɔmɛ hu dlae. 13 Amlɔ nɛ ɔ, wa ngɛ hlae nɛ matsɛ ɔ nɛ le kaa ke a kpale po ma nɛ ɔ nɛ a fia e gbogbo ɔmɛ ta a, a be tó nɛ a heɔ ngɛ ni kakaakahi a dɛ, kɛ tó nɛ a heɔ ngɛ tlomihi a he, kɛ gbɛjegbɛ nɔ tó woe hu, nɛ enɛ ɔ ma ha nɛ níhi nɛ matsɛmɛ ɔmɛ náa kɛ toɔ juetli to he ɔmɛ ɔ ma bɔ mɛ. 14 Akɛnɛ wa náa wa hiɔwo kɛ jeɔ matsɛ we ɔ,* nɛ́ e sɛ nɛ waa hyɛ nɛ nɔ́ yaya ko nɛ ba o matsɛ yemi ɔ nɔ he je ɔ, wa ngma mo sɛ womi nɛ ɔ konɛ wa kɛ wo matsɛ ɔ tue nɔ ngɛ nɔ́ nɛ ɔ he, 15 konɛ a hla o nɛmɛ ɔmɛ a yi nɔ sanehi womi ɔ mi, nɛ o maa na ngɛ yi nɔ sanehi womi ɔ mi kaa ma nɛ ɔ ji atuã tsɔli a ma, nɛ a yeɔ matsɛmɛ kɛ kpokpahi* awi, nɛ kɛ je blema lokoo nɛ nihi nɛ a ngɛ mi ɔ haa nɛ nihi tsɔɔ nɔ yeli a hɛ mi atuã. Enɛ ɔ he je nɛ a kpata ma nɛ ɔ hɛ mi ɔ nɛ. 16 Wa ngɛ hlae nɛ matsɛ ɔ nɛ le kaa ke a kpale po ma nɛ ɔ, nɛ a fia e gbogbo ɔmɛ ta a, o be nyɛe maa ye* kpokpa nɛ ngɛ Pa a Se ɔ nɔ hu.”

17 Matsɛ ɔ tsɔ nɛ a kɛ sɛ gbi ya ha Rehum, nɛ ji amlaalo nane mi dalɔ nɔkɔtɔma a, kɛ Shimshai, nɛ ji womi ngmalɔ ɔ, kɛ ni kpahi nɛ a piɛɛ a he nɛ a ngɛ Samaria kɛ kpokpa nɛ piɛ nɛ ngɛ Pa a Se ɔ nɔ ɔ ke:

“I biɔ nyɛ! Amlɔ nɛ ɔ, 18 womi nɛ nyɛ tsɔ nɛ a kɛ ba ha wɔ ɔ, a kane nɛ e mi tɛ̃* ngɛ ye hɛ mi. 19 I fã, nɛ a hla níhi a mi, nɛ a na kaa kɛ je blema lokoo nɛ ma nɛ ɔ teɔ si kɛ woɔ matsɛmɛ, nɛ nihi tsɔɔ atuã, nɛ a peeɔ basabasa ngɛ lejɛ ɔ. 20 Matsɛmɛ nɛ a ngɛ he wami nɛ a ye Yerusalem nɔ be ko nɛ be ɔ ye kpokpa nɛ ngɛ Pa a Se ɔ tsuo nɔ, nɛ nihi wo tó nɛ a heɔ ngɛ ni kakaakahi a dɛ, kɛ tó nɛ a heɔ ngɛ tlomihi a he, kɛ gbɛjegbɛ nɔ tó ha mɛ. 21 Amlɔ nɛ ɔ, nyɛ fã nɛ nyumu nɛ ɔmɛ nɛ a kpa ní ɔ tsumi, konɛ a ko kpale po ma a hu kɛ yaa si be nɛ fami ko maa je ye ngɔ kɛ ba. 22 Nyɛɛ hyɛ nɛ hi nɛ nyɛ ko ma nyɛ hɛ kɛ fɔ nɔ́ nɛ ɔ nɔ, bɔ nɛ pee nɛ nɔ́ ngua ko ko bɔ matsɛ ɔ.”

23 Jehanɛ ɔ, benɛ a kane womi nɛ Matsɛ Artaherhes ngma a ngɛ Rehum, kɛ Shimshai, nɛ ji womi ngmalɔ ɔ, kɛ nihi nɛ piɛɛ a he ɔ a hɛ mi ɔ, oya nɔuu nɛ a ho Yuda bi ɔmɛ a ngɔ ya ngɛ Yerusalem, nɛ a ya kpa mɛ ní ɔ tsumi pani nya. 24 Jamɛ a be ɔ mi nɛ a kpa Mawu we ɔ nɛ ngɛ Yerusalem ɔ he ní tsumi; nɛ e tlɔ jã kɛ ya si Persia Matsɛ Darius nɔ yemi ɔ we jeha enyɔne ɔ mi.

5 Kɛkɛ nɛ gbalɔ Hagai, kɛ gbalɔ Zakaria, nɛ ji Ido bibi ɔ gba kɛ tsɔɔ Yuda bi ɔmɛ nɛ a ngɛ Yuda kɛ Yerusalem ɔ ngɛ Israel Mawu ɔ nɛ e kɛ mɛ ngɛ ɔ biɛ mi. 2 Jamɛ a be ɔ mi nɛ Shealtiel binyumu Zerubabel, kɛ Yehozadak binyumu Yeshua bɔni Mawu we ɔ nɛ ngɛ Yerusalem ɔ mami ekohu ɔ nɛ; nɛ Mawu gbali ɔmɛ kɛ mɛ ngɛ, nɛ a fĩ a se. 3 Jamɛ a be ɔ mi ɔ, Tatenai, nɛ ji amlaalo nɛ hyɛɛ kpokpa nɛ ngɛ Pa a Se* ɔ nɔ, kɛ Shetar Bozenai, kɛ nihi nɛ piɛɛ a he ɔ ba a ngɔ nɛ a ba bi mɛ ke: “Mɛnɔ lɛ e fã nyɛ ke nyɛɛ ma we nɛ ɔ, nɛ́ nyɛɛ gbe tsu nɛ ɔ* mami nya?” 4 Kɛkɛ nɛ a bi mɛ ke: “Kɛ a tsɛɛ nyumuhi nɛ a ngɛ tsu nɛ ɔ mae ɔ kɛɛ?” 5 Se Mawu hɛngmɛ ngɛ Yuda bi ɔmɛ a nikɔtɔma amɛ a he, lɔ ɔ he ɔ, ni ɔmɛ kpa we mɛ ní ɔ tsumi, ejakaa ni ɔmɛ to a yi mi kaa a maa ngma sɛ womi kɛ ya ha Darius, nɛ a maa mlɛ kɛ yaa si a nine maa su heto nɔ kɛ je e ngɔ ngɛ sane nɛ ɔ he.

6 Sɛ womi nɛ Tatenai, nɛ ji amlaalo nɛ hyɛɛ kpokpa nɛ ngɛ Pa a Se ɔ nɔ, kɛ Shetar Bozenai, kɛ nihi nɛ a piɛɛ e he ɔ, kɛ kpokpa nɛ ngɛ Pa a Se ɔ nɔ amlaalo tsɔwi ɔmɛ ngma konɛ a kɛ ya ha Matsɛ Darius ɔ mi munyu ɔmɛ ji nɛ ɔ nɛ; 7 a tsɔ nɛ a kɛ sɛ womi ɔ ya ha lɛ, nɛ nɔ́ nɛ a ngma ji nɛ ɔ nɛ:

“Kɛ ya ha Matsɛ Darius:

“Tue mi jɔmi ha mo! 8 Wa ngɛ hlae nɛ matsɛ ɔ nɛ e le kaa wa ya Mawu ngua a we ɔ ngɛ Yuda kpokpa a nɔ,* nɛ a kɛ tɛ nguanguahi lɛ ngɛ we ɔ mae, nɛ a kɛ tsohi ngɛ gbogbo ɔmɛ a mi woe. Ni ɔmɛ kɛ hɛdɔ ngɛ ní ɔ tsue, nɛ a mɔde bɔmi ɔ ha nɛ ní tsumi ɔ ngɛ nɔ yae saminya. 9 Kɛkɛ nɛ wa bi a nikɔtɔma amɛ ke: ‘Mɛnɔ lɛ e fã nyɛ ke nyɛɛ ma we nɛ ɔ, nɛ́ nyɛɛ gbe tsu nɛ ɔ* mami nya?’ 10 Jehanɛ hu ɔ, wa bi mɛ a biɛhi, bɔ nɛ pee nɛ wa nyɛ nɛ waa ngma nyumuhi nɛ a nyɛɛ a hɛ mi ɔ a biɛ, konɛ wa ha nɛ o le.

11 “Heto nɛ a ha wɔ ji nɛ ɔ nɛ: ‘Wa ji hiɔwe kɛ zugba Mawu ɔ sɔmɔli, nɛ wa kpale ngɛ e we ɔ nɛ Israel matsɛ ngua ko ma nɛ e gbe nya jehahi babauu nɛ be ɔ mae ekohu. 12 Se akɛnɛ wa tsɛmɛ ɔmɛ wo hiɔwe Mawu ɔ mi mi la he je ɔ, e ngɔ mɛ kɛ wo Babilon Matsɛ Nebukadnezar, nɛ ji Kaldea no ɔ dɛ, nɛ e hule we nɛ ɔ, nɛ e nuu ni ɔmɛ nyɔguɛ kɛ ho Babilon ya. 13 Se kɛ̃ ɔ, ngɛ Babilon Matsɛ Sirus nɔ yemi ɔ we kekleekle jeha a mi ɔ, Matsɛ Sirus fã ke a kpale ma Mawu we nɛ ɔ ekohu. 14 Jehanɛ hu ɔ, Matsɛ Sirus je Mawu we ɔ sika tsu kɛ sika hiɔ kplu ɔmɛ kpo kɛ je Babilon jami he ɔ. Kplu nɛ ɔmɛ lɛ Nebukadnezar muɔɔ ngɛ sɔlemi we ɔ ngɛ Yerusalem kɛ ba Babilon jami he ɔ nɛ. A ngɔ kplu ɔmɛ kɛ ha nyumu ko nɛ a tsɛɛ lɛ ke Sheshbazar,* nɔ nɛ Sirus pee lɛ amlaalo ɔ. 15 Sirus de lɛ ke: “Ngɔɔ kplu nɛ ɔmɛ. Yaa, ngɔɔ mɛ kɛ ya pue sɔlemi we ɔ nɛ ngɛ Yerusalem ɔ, nɛ́ o ha nɛ a kpale ma Mawu we ɔ ngɛ he nɛ e hi sa a.” 16 Kɛkɛ nɛ Sheshbazar nɛ ɔ ba, nɛ e ba fia Mawu we ɔ nɛ ngɛ Yerusalem ɔ sisi tomi ɔmɛ; nɛ a ngɛ ní tsumi ɔ nɔ kɛ ba si amlɔ nɛ ɔ, se a gbi nya.’

17 “Amlɔ nɛ ɔ, ke matsɛ ɔ suɔ ɔ, e ha nɛ a hla níhi a mi ngɛ matsɛ ɔ juetli to he ɔ ngɛ Babilon, kaa a maa na kaa Matsɛ Sirus fã ke a kpale ma Mawu we ɔ nɛ ngɛ Yerusalem ɔ lo; nɛ bɔ nɛ matsɛ ɔ maa ma e juɛmi nya si ngɛ sane nɛ ɔ he ha a, e tsɔ nɛ a ba de wɔ.”

6 Jamɛ a be ɔ mi nɛ Matsɛ Darius fã, nɛ a hla níhi a mi ngɛ we ɔ nɛ a kɛ yi nɔ sane womi ɔmɛ toɔ ngɛ mi ɔ mi, ngɛ juetli to he ɔ nɛ ngɛ Babilon ɔ. 2 Nɛ a na womi kpo ko ngɛ mɔ ngua a nɛ ngɛ Ekbatana a mi ngɛ Media kpokpa a nɔ, nɛ a ngma munyu nɛ nyɛɛ se nɛ ɔ ngɛ nɔ:

3 “Ngɛ Matsɛ Sirus nɔ yemi ɔ we kekleekle jeha a mi ɔ, Matsɛ Sirus kɛ fami ha ngɛ Mawu we ɔ nɛ ngɛ Yerusalem ɔ he ke: ‘Á kpale ya ma we ɔ konɛ a nyɛ nɛ a sã afɔlehi ngɛ lejɛ ɔ, nɛ́ a fia e sisi tomi ɔmɛ; e hiɔwe yami nɛ pee kɔni fã 60,* nɛ e mi blimi nɛ pee kɔni fã 60. 4 Á ngɔ tɛ nguanguahi nɛ a to mɛ pue a sibi a nɔ etɛ, kɛ tsohi nɛ a to kɛ fia gbogbo ɔ; nɛ́ a ngɔ sika ngɛ matsɛ we ɔ kɛ wo a he hiɔ. 5 Jehanɛ hu ɔ, Mawu we ɔ mi sika tsu kɛ sika hiɔ kplu ɔmɛ nɛ Nebukadnezar muɔɔ kɛ je sɔlemi we ɔ nɛ ngɛ Yerusalem kɛ ba Babilon ɔ, á kpale kɛ ho, konɛ a kɛ ya to a to he ngɛ Mawu we ɔ nɛ ngɛ Yerusalem ɔ.’

6 “Lɔ ɔ he ɔ, amlɔ nɛ ɔ, mo Tatenai, nɛ ji amlaalo nɛ hyɛɛ kpokpa nɛ ngɛ Pa a Se* ɔ nɔ, Shetar Bozenai, kɛ nihi nɛ a piɛɛ nyɛ he ɔ, nɛ a ji kpokpa nɛ ngɛ Pa a Se ɔ nɔ amlaalo tsɔwi ɔmɛ—nyɛ nane ko ma lejɛ ɔ. 7 Nyɛ ko tsi Mawu we ɔ ní tsumi ɔ nya. Yuda bi ɔmɛ a we amlaalo ɔ, kɛ Yuda bi ɔmɛ a ma nikɔtɔma amɛ maa kpale ma Mawu we ɔ ngɛ he nɛ e hi sa a. 8 Jehanɛ hu ɔ, nɔ́ nɛ i ngɛ fãe nɛ nyɛɛ pee ha Yuda bi ɔmɛ a ma nikɔtɔma nɛ ɔmɛ konɛ a kɛ kpale ma Mawu we ɔ ekohu ji nɛ ɔ nɛ: Hiɔ nɛ a ma bɔ ngɛ ní tsumi ɔ he ɔ, a je ní ngɛ matsɛ ɔ juetli to he ɔ, nɛ ji tó nɛ a tsu ngɛ kpokpa nɛ ngɛ Pa a Se ɔ nɔ ɔ mi eko kɛ ha nyumu nɛ ɔmɛ oya nɔuu nɛ a kɛ tsa ní tsumi ɔ nɔ, nɛ nɔ ko nɛ ko tsi a nya. 9 Nɛ nɔ́ fɛɛ nɔ́ nɛ e he maa hia a—na kuhi nɛ a wɛ kɛ agbosuhi, kɛ jijɔ bimɛ nɛ a kɛ maa sã sami afɔle ha hiɔwe Mawu ɔ, hwiit, ngo, wai, kɛ nu kaa bɔ nɛ osɔfo ɔmɛ nɛ a ngɛ Yerusalem ɔ maa tsɔɔ ɔ—nyɛ ha mɛ daa ligbi nɛ nyɛ ko kpa, 10 konɛ a nyɛ nɛ a ya nɔ nɛ a sã afɔlehi nɛ maa sa hiɔwe Mawu ɔ hɛ mi, nɛ́ a sɔle kɛ ha matsɛ ɔ kɛ e binyumu ɔmɛ nɛ́ a se nɛ kɛ. 11 Jehanɛ hu ɔ, i kɛ fami ngɛ hae kaa nɔ fɛɛ nɔ nɛ ma tɔ̃ mlaa nɛ ɔ nɔ ɔ, a ma je tso ngɛ e we ɔ yi mi kɛ ma si, nɛ a ma wo e nɔ kɛ ya hiɔwe, nɛ a maa sɛu lɛ ngɛ nɔ,* nɛ a maa ngɔ e we ɔ kɛ pee ma bi a niase yami he* ngɛ tɔmi nɛ ɔ nɛ e tɔ̃ ɔ he je. 12 Nɛ Mawu, nɔ nɛ e ha nɛ e biɛ ɔ ngɛ lejɛ ɔ nɛ́ e kpata matsɛ fɛɛ matsɛ, kɛ ma fɛɛ ma nɛ e be fami nɛ ɔ nɔ yee, nɛ́ e maa bɔ mɔde kaa e ma puɛ Mawu we ɔ nɛ ngɛ Yerusalem ɔ hɛ mi. Imi Darius lɛ i kɛ fami nɛ ɔ ngɛ hae. Á tsu he ní oya nɔuu.”

13 Kɛkɛ nɛ Tatenai, nɛ ji amlaalo nɛ hyɛɛ kpokpa nɛ ngɛ Pa a Se ɔ nɔ, kɛ Shetar Bozenai, kɛ nihi nɛ a piɛɛ a he ɔ pee nɔ́ fɛɛ nɔ́ nɛ Matsɛ Darius fã ke a pee ɔ oya nɔuu. 14 Nɛ Yuda bi ɔmɛ a ma nikɔtɔma amɛ ya nɔ nɛ a ma we ɔ, nɛ ní tsumi ɔ ya hɛ mi, nɛ gbami nɛ gbalɔ Hagai kɛ Zakaria, nɛ ji Ido bibi ɔ gba a wo mɛ he wami; a gbe we ɔ mami nya ngɛ Israel Mawu ɔ fami nya, kɛ Sirus, kɛ Darius, kɛ Persia Matsɛ Artaherhes a fami nya. 15 Ngɛ Matsɛ Darius nɔ yemi ɔ we jeha ekpane ɔ mi, ngɛ Adar* nyɔhiɔ ɔ we ligbi etɛne ɔ nɔ ɔ, a gbe we ɔ mami nya.

16 Kɛkɛ nɛ Israel bi ɔmɛ, osɔfo ɔmɛ, Levi bi ɔmɛ, kɛ nihi nɛ a piɛ nɛ a je nyɔguɛ tso mi kɛ ba a bli Mawu we ɔ nya* kɛ bua jɔmi. 17 Nɛ a ha na ku 100, agbosu 200, jijɔ bimɛ 400, kaa a kɛ bli Mawu we nɛ ɔ nya, nɛ a ha akpakpo 12 ngɛ Israel wɛtso ɔmɛ a yibɔ nya, kaa a kɛ sã yayami afɔle ha Israel tsuo. 18 Nɛ a hla osɔfo ɔmɛ ngɛ a kuu ɔmɛ a nya, kɛ Levi bi ɔmɛ ngɛ a kuu ɔmɛ a nya kɛ ha Mawu sɔmɔmi ní tsumi ɔ ngɛ Yerusalem kaa bɔ nɛ a ngma ngɛ Mose womi ɔ mi ɔ.

19 Nɛ nihi nɛ a je nyɔguɛ tso mi kɛ ba a ye Hetsɔmi ɔ ngɛ kekleekle nyɔhiɔ ɔ we ligbi nɛ ji 14 ɔ nɔ. 20 Osɔfo ɔmɛ kɛ Levi bi ɔmɛ tsuo tsu a he, nɛ mɛ tsuo a he tsɔ; a gbe lohwe ɔmɛ nɛ a kɛ maa ye Hetsɔmi ɔ kɛ ha nihi tsuo nɛ a je nyɔguɛ tso mi kɛ ba a, kɛ a nyɛmimɛ osɔfo ɔmɛ, kɛ mɛ nitsɛmɛ hu a he. 21 Lɔ ɔ se ɔ, Israel bi ɔmɛ nɛ a kpale kɛ je nyɔguɛ tso mi kɛ ba a, kɛ nɔ fɛɛ nɔ nɛ ba piɛɛ a he nɛ́ e jé e he kɛ je ma amɛ nɛ a ngɛ zugba a nɔ ɔ a ní peepeehi nɛ a he tsɔ we ɔ a he konɛ e ja Yehowa Israel Mawu ɔ,* ye ní ɔ eko. 22 Jehanɛ hu ɔ, a kɛ bua jɔmi ye Abolo Nɛ Masa Be Mi Gbijlɔ ɔ ligbi kpaago, ejakaa Yehowa ha nɛ a nyá, nɛ jehanɛ ɔ hu, e ha nɛ Asiria matsɛ ɔ ná a he bua jɔmi, nɛ e ye bua mɛ* ngɛ anɔkuale Mawu ɔ, nɛ ji Israel Mawu ɔ we ɔ he ní tsumi ɔ mi.

7 Ní nɛ ɔmɛ a se benɛ Persia Matsɛ Artaherhes ngɛ nɔ yee ɔ, Ezra* kpale kɛ ba. E tsɛ ji Seraya, Seraya tsɛ ji Azaria, Azaria tsɛ ji Hilkia, 2 Hilkia tsɛ ji Shalum, Shalum tsɛ ji Zadok, Zadok tsɛ ji Ahitub, 3 Ahitub tsɛ ji Amaria, Amaria tsɛ ji Azaria, Azaria tsɛ ji Merayot, 4 Merayot tsɛ ji Zerahia, Zerahia tsɛ ji Uzi, Uzi tsɛ ji Buki, 5 Buki tsɛ ji Abishua, Abishua tsɛ ji Finehas, Finehas tsɛ ji Eleazar, Eleazar tsɛ ji Aaron, nɛ ji osɔfo nɔkɔtɔma a. 6 Ezra nɛ ɔ kuɔ kɛ je Babilon kɛ ba. E ji womi ngmalɔ,* nɛ e le Mose Mlaa a nɛ Yehowa, Israel Mawu ɔ kɛ ha a saminya.* Matsɛ ɔ ha lɛ nɔ́ fɛɛ nɔ́ nɛ e bi ɔ, ejakaa Yehowa, e Mawu ɔ nine ngɛ e nɔ.

7 Israel bi ɔmɛ a kpɛti ni komɛ, osɔfo ɔmɛ, Levi bi ɔmɛ, lali ɔmɛ, agbo nya buli ɔmɛ, kɛ sɔlemi we ɔ sɔmɔli ɔmɛ* kuɔ kɛ ho Yerusalem ya ngɛ Matsɛ Artaherhes nɔ yemi ɔ we jeha kpaagone ɔ mi. 8 Nɛ Ezra ba Yerusalem ngɛ matsɛ ɔ nɔ yemi ɔ we jeha kpaagone ɔ we nyɔhiɔ enuɔne ɔ mi. 9 E je Babilon ngɛ kekleekle nyɔhiɔ ɔ we kekleekle ligbi ɔ nɔ, nɛ e ya su Yerusalem ngɛ nyɔhiɔ enuɔne ɔ we kekleekle ligbi ɔ nɔ, ejakaa e Mawu ɔ nine nɛ hi ɔ ngɛ e nɔ. 10 Ezra dla e tsui* kaa e maa kase Yehowa Mlaa a, nɛ e kɛ ma tsu ní, nɛ e maa tsɔɔ Israel bi ɔmɛ famihi kɛ kojomihi nɛ ngɛ Mlaa a mi ɔ.

11 Sɛ womi nɛ Matsɛ Artaherhes ngma kɛ ha Ezra, nɛ e ji osɔfo kɛ womi ngmalɔ nɛ e le Yehowa mlaa amɛ, kɛ e fami ɔmɛ nɛ e kɛ ha Israel ɔ saminya a* mi munyu ji nɛ ɔ nɛ:

12 * “Artaherhes, matsɛmɛ a matsɛ ɔ, kɛ ya ha Ezra, nɛ e ji osɔfo kɛ nɔ nɛ e hyɛɛ Mawu nɛ ngɛ hiɔwe ɔ Mlaa a nɔ nɛ e ngmaa a: Tue mi jɔmi babauu ha mo. Amlɔ nɛ ɔ, 13 i fã kaa Israel bi ɔmɛ, kɛ a we osɔfo ɔmɛ, kɛ Levi bi ɔmɛ a ti nɔ fɛɛ nɔ nɛ ngɛ ye nɔ yemi ɔ mi, nɛ́ e suɔ kaa e kɛ mo maa ya Yerusalem ɔ nɛ e ya. 14 Ejakaa matsɛ ɔ kɛ e ga woli kpaago ɔmɛ ngɛ mo tsɔe kaa o ya hla níhi a mi nɛ o hyɛ kaa a kɛ o Mawu ɔ Mlaa a nɛ ngɛ o dɛ ɔ ngɛ ní tsue ngɛ Yuda kɛ Yerusalem lo, 15 nɛ́ o ngɔ sika hiɔ kɛ sika tsu nɛ matsɛ ɔ kɛ e ga woli ɔmɛ je a tsui mi faa nɛ a kɛ ha Israel Mawu ɔ, nɔ nɛ e hi he ngɛ Yerusalem ɔ, 16 kɛ sika hiɔ tsuo, kɛ sika tsu nɛ o nine maa su nɔ* ngɛ Babilon kpokpa a nɔ* ɔ tsuo, kɛ nike ní nɛ ni ɔmɛ kɛ osɔfo ɔmɛ maa je a tsui mi faa nɛ a kɛ ma ha ngɛ a Mawu ɔ we ɔ nɛ ngɛ Yerusalem ɔ he ɔ kɛ ya. 17 Ngɔɔ sika nɛ ɔ kɛ he na kuhi, agbosuhi, jijɔ bihi, kɛ a he ngma afɔlehi kɛ a he dã afɔlehi oya nɔuu, nɛ́ o ngɔ ní nɛ ɔmɛ kɛ ya sã afɔle ngɛ nyɛ Mawu ɔ we nɛ ngɛ Yerusalem ɔ afɔle sami la tɛ ɔ nɔ.

18 “Nɛ nɔ́ fɛɛ nɔ́ nɛ o kɛ o nyɛminyumu ɔmɛ nyɛ suɔ kaa nyɛ maa pee ngɛ nyɛ Mawu ɔ suɔmi nya a, nyɛɛ kɛ sika hiɔ kɛ sika tsu nɛ maa piɛ ɔ ma nyɛ maa pee. 19 Nɛ kplu ɔmɛ tsuo nɛ a kɛ ngɛ mo hae kɛ ha sɔmɔmi ngɛ o Mawu ɔ we ɔ, moo ngɔ kɛ ya pue Mawu hɛ mi ngɛ Yerusalem. 20 Nɛ ní kpahi nɛ a he maa hia ngɛ o Mawu ɔ we ɔ nɛ e biɔ nɛ o ha a, mo je sika ngɛ matsɛ ɔ juetli to he ɔ kɛ tsu he ní.

21 “Imi Matsɛ Artaherhes, i fã juetli nɔ hyɛli ɔmɛ tsuo nɛ a ngɛ kpokpa a nɛ ngɛ Pa a Se ɔ nɔ* ɔ kaa nɔ́ fɛɛ nɔ́ nɛ Ezra, nɛ ji osɔfo, kɛ nɔ nɛ hyɛɛ Mawu nɛ ngɛ hiɔwe ɔ Mlaa a nɔ nɛ e ngmaa a ma bi ngɛ nyɛ dɛ ɔ, nyɛɛ pee oya nɔuu, 22 nyɛ ha kɛ ya su sika hiɔ talɛnt* 100, hwiit kor* 100, wai bat 100, nu bat* 100, kɛ ngo abɔ nɛ e he maa hia. 23 Nɔ́ fɛɛ nɔ́ nɛ Mawu nɛ ngɛ hiɔwe ɔ fã ke a pee ngɛ e we ɔ he ɔ, ha nɛ a kɛ hɛdɔ nɛ pee, konɛ abofu ko ba matsɛ ɔ nɔ yemi he ɔ kɛ e binyumu ɔmɛ a nɔ. 24 I ngɛ nyɛ lemi hae hu kaa nɔ ko nɛ ko he tó ngɛ ni kakaakahi a dɛ, kɛ ngɛ tlomihi a he, kɛ gbɛjegbɛ nɔ tó ngɛ osɔfo ɔmɛ kɛ Levi bi ɔmɛ, la fiali ɔmɛ, sinya nya buli ɔmɛ, sɔlemi we ɔ sɔmɔli ɔmɛ,* kɛ Mawu we nɛ ɔ he ní tsuli ɔmɛ a ti nɔ ko dɛ.

25 “Nɛ mo Ezra, ngɛ juɛmi nɛ o ná kɛ je o Mawu ɔ ngɔ ɔ nya a,* moo hla sane yeli kɛ kojoli konɛ a kojo nihi tsuo nɛ a ngɛ kpokpa nɛ ngɛ Pa a Se ɔ nɔ, nɛ ji nihi tsuo nɛ a le o Mawu ɔ mlaa a; nɛ nɔ fɛɛ nɔ nɛ e li mlaa amɛ ɔ, nyɛɛ tsɔɔ lɛ. 26 Nɛ nɔ fɛɛ nɔ nɛ e be o Mawu ɔ Mlaa a kɛ matsɛ ɔ mlaa a nɔ yee ɔ, a kojo lɛ oya nɔuu, ke e ma bi nɛ a gbe lɛ jio, a je lɛ we jio, a po hiɔ ha lɛ jio, aloo wo lɛ tsu jio, á pee jã.”

27 Á je Yehowa, wa nɛmɛ a Mawu ɔ yi, nɔ nɛ e ngɔ kɛ wo matsɛ ɔ tsui mi kaa e ha nɛ Yehowa we ɔ nɛ e ngɛ Yerusalem ɔ nɛ́ pee fɛu ɔ! 28 E je suɔmi nɛ se pui kpo kɛ tsɔɔ mi ngɛ matsɛ ɔ, kɛ e ga woli ɔmɛ, kɛ matsɛ ɔ ma nikɔtɔmahi nɛ a nɔ kuɔ ɔ tsuo a hɛ mi. Lɔ ɔ he ɔ, i pee kã,* ejakaa Yehowa ye Mawu ɔ nine ngɛ ye nɔ, nɛ i bua Israel nyumuhi nɛ a ji hɛ mi nyɛɛli* ɔ a nya, konɛ a kɛ mi nɛ kuɔ kɛ ho.

8 Jehanɛ ɔ, nihi nɛ a kɛ mi kuɔ kɛ je Babilon kɛ ho benɛ Matsɛ Artaherhes ngɛ nɔ yee ɔ a tsɛmɛ a we ɔmɛ a nyatsɛmɛ nɛ a ngma a biɛhi weku nya weku nya ji nɛ ɔmɛ nɛ: 2 ngɛ Finehas binyumu ɔmɛ a kpɛti ɔ, Gershom; ngɛ Itamar binyumu ɔmɛ a kpɛti ɔ, Daniel; ngɛ David binyumu ɔmɛ a kpɛti ɔ, Hatush; 3 ngɛ Shekania binyumu ɔmɛ kɛ Parosh binyumu ɔmɛ a kpɛti ɔ, Zakaria, nɛ nyumuhi 150 nɛ a ngma a biɛ piɛɛ e he; 4 ngɛ Pahat Moab binyumu ɔmɛ a kpɛti ɔ, Elieho Enai, nɛ ji Zerahia binyumu ɔ, nɛ nyumuhi 200 piɛɛ e he; 5 ngɛ Zatu binyumu ɔmɛ a kpɛti ɔ, Shekania, nɛ ji Yahaziel binyumu ɔ, nɛ nyumuhi 300 piɛɛ e he; 6 ngɛ Adin binyumu ɔmɛ a kpɛti ɔ, Ebed, nɛ ji Yonatan binyumu ɔ, nɛ nyumuhi 50 piɛɛ e he; 7 ngɛ Elam binyumu ɔmɛ a kpɛti ɔ, Yeshaya, nɛ ji Atalia binyumu ɔ, nɛ nyumuhi 70 piɛɛ e he; 8 ngɛ Shefatia binyumu ɔmɛ a kpɛti ɔ, Zebadia, nɛ ji Mikael binyumu ɔ, nɛ nyumuhi 80 piɛɛ e he; 9 ngɛ Yoab binyumu ɔmɛ a kpɛti ɔ, Obadia, nɛ ji Yehiel binyumu ɔ, nɛ nyumuhi 218 piɛɛ e he; 10 ngɛ Bani binyumu ɔmɛ a kpɛti ɔ, Shelomit, nɛ ji Yosifia binyumu ɔ, nɛ nyumuhi 160 piɛɛ e he; 11 ngɛ Bebai binyumu ɔmɛ a kpɛti ɔ, Zakaria, nɛ ji Bebai binyumu ɔ, nɛ nyumuhi 28 piɛɛ e he; 12 ngɛ Azgad binyumu ɔmɛ a kpɛti ɔ, Yohanan, nɛ ji Hakatan binyumu ɔ, nɛ nyumuhi 110 piɛɛ e he; 13 ngɛ Adonikam binyumu ɔmɛ a kpɛti ɔ, ni nɛmɛ nɛ a ji sekpɛtsɛmɛ nɛ a kpale a se kɛ ba a, a biɛhi ji nɛ ɔmɛ nɛ: Elifelet, Yeyel, kɛ Shemaya, nɛ nyumuhi 60 piɛɛ a he; 14 ngɛ Bigvai binyumu ɔmɛ a kpɛti ɔ, Utai kɛ Zabbud, nɛ nyumuhi 70 piɛɛ a he.

15 I bua a nya ngɛ pa a nɛ beɔ kɛ baa Ahava a he, nɛ wa to si ngɛ lejɛ ɔ ligbi etɛ. Se benɛ i hyɛ ni ɔmɛ kɛ osɔfo ɔmɛ a kpɛti ɔ, i nɛ́ Levi bi ɔmɛ a ti nɔ ko ngɛ lejɛ ɔ. 16 Lɔ ɔ he ɔ, i tsɔ nɛ a ya tsɛ Eliezer, Ariel, Shemaya, Elnatan, Yarib, Elnatan, Natan, Zakaria, kɛ Meshulam, nɛ a ji hɛ mi nyɛɛli ɔ, kɛ Yoyarib kɛ Elnatan, nɛ a ji ní tsɔɔli ɔ kɛ ba. 17 Kɛkɛ nɛ i tsɔ mɛ Ido nɛ e ji hɛ mi nyɛɛlɔ ngɛ he ko nɛ a tsɛɛ ke Kasifia a ngɔ. I de mɛ kaa a ya de Ido kɛ e nyɛminyumu ɔmɛ, nɛ a ji sɔlemi we ɔ sɔmɔli* nɛ a ngɛ Kasifia a kaa a ha wɔ nihi konɛ a ba sɔmɔ ngɛ wa Mawu ɔ we ɔ. 18 Akɛnɛ wa Mawu ɔ nine nɛ e hi ɔ ngɛ wa nɔ he je ɔ, a kɛ Mahli binyumu ɔmɛ a kpɛti nɔ kake nɛ e hɛ mi kã si nɛ a tsɛɛ lɛ ke Sherebia a, kɛ e binyumu ɔmɛ kɛ e nyɛminyumu ɔmɛ ba, mɛ tsuo a peeɔ nyumuhi 18. Mahli ji Levi bibi, nɛ Levi tsɛ ji Israel; 19 nɛ a kɛ Hashabia hu ba, nɛ Yeshaya nɛ e je Merari bi ɔmɛ a kpɛti ɔ, kɛ e nyɛminyumu ɔmɛ, kɛ a binyumu ɔmɛ hu piɛɛ e he, mɛ tsuo a peeɔ nyumuhi 20. 20 Nɛ a tsɔ sɔlemi we ɔ sɔmɔli* 220 kɛ ba. A ji sɔlemi we ɔ sɔmɔli nɛ David kɛ ma nikɔtɔma amɛ hla mɛ kaa a sɔmɔ Levi bi ɔmɛ ɔ a nina; a ngma mɛ tsuo a biɛ kɛ wo womi mi.

21 Kɛkɛ nɛ i fiɛɛ kaa a ha hwɔ ngɛ Ahava pa a he konɛ waa ba wa he si ngɛ wa Mawu ɔ hɛ mi, konɛ wa hla blɔ tsɔɔmi kɛ je e ngɔ ngɛ blɔ nɛ wa hia a he kɛ ha waa kɛ wa bimɛ ɔmɛ kɛ wa ní ɔmɛ tsuo. 22 E pee mi zo kaa ma bi matsɛ ɔ nɛ e ha wɔ ta buli kɛ okpɔngɔ nɔ hili konɛ a bu wa he ngɛ he nyɛli a he ngɛ blɔ ɔ nɔ, ejakaa wa de matsɛ ɔ ke: “Wa Mawu ɔ nine nɛ e hi ɔ ngɛ nihi tsuo nɛ a hlaa e se blɔ ɔ a nɔ, se nihi tsuo nɛ a kuaa lɛ ɔ, e kɛ e he wami kɛ e we abofu ɔ kpleɔ a nɔ.” 23 Lɔ ɔ he ɔ, wa ha hwɔ, nɛ wa kpa wa Mawu ɔ pɛɛ ngɛ nɔ́ nɛ ɔ he, nɛ e bu wa pɛɛ kpami ɔ tue.

24 Jehanɛ ɔ, i hla osɔfo ɔmɛ a nya dali ɔmɛ a kpɛti nihi 12. Mɛ ji Sherebia kɛ Hashabia, kɛ a nyɛminyumu ɔmɛ a kpɛti nihi nyɔngma. 25 Lɔ ɔ se ɔ, i ngmɛ sika hiɔ ɔ, kɛ sika tsu ɔ, kɛ ní ɔmɛ, nɛ ji níhi nɛ matsɛ ɔ kɛ e ga woli ɔmɛ, kɛ e ma nikɔtɔma amɛ kɛ Israel bi ɔmɛ tsuo nɛ a ngɛ lejɛ ɔ kɛ ha ngɛ wa Mawu ɔ we ɔ he ɔ, nɛ i kɛ ha mɛ. 26 Lɔ ɔ he ɔ, i ngmɛ ní nɛ ɔmɛ, nɛ i kɛ wo a dɛ; sika hiɔ talɛnt* 650, sika hiɔ níhi 100 nɛ maa su talɛnt enyɔ, sika tsu talɛnt 100, 27 sika tsu kplu nyafinyafi 20 nɛ maa su darik* 1,000, kɛ akɔblee kpakpa níhi enyɔ nɛ́ a ngɛ kpɛe, nɛ́ a he jua wa kaa sika tsu.

28 Kɛkɛ nɛ i de mɛ ke: “Nyɛ ngɛ klɔuklɔu ha Yehowa, nɛ ní ɔmɛ hu ngɛ klɔuklɔu, nɛ sika hiɔ ɔ kɛ sika tsu ɔ ji afɔle nɛ je tsui mi faa nɛ a kɛ ha Yehowa, nyɛ nɛmɛ a Mawu ɔ. 29 Nyɛɛ hyɛ ní ɔmɛ a nɔ saminya kɛ ya si be nɛ nyɛ maa ngmɛ mɛ ngɛ osɔfo ɔmɛ a nya dali ɔmɛ, kɛ Levi bi ɔmɛ, kɛ Israel tsɛmɛ a we ɔmɛ a nyatsɛmɛ ɔmɛ a hɛ mi ngɛ Yerusalem ngɛ Yehowa we ɔ tsu ɔmɛ a mi.”* 30 Nɛ osɔfo ɔmɛ kɛ Levi bi ɔmɛ ngɔ sika hiɔ ɔ kɛ sika tsu ɔ kɛ ní ɔmɛ nɛ a ngmɛ kɛ ha mɛ ɔ, konɛ a ngɔ kɛ ba Yerusalem ngɛ wa Mawu ɔ we ɔ.

31 Nyagbenyagbe ɔ, wa hia kɛ je Ahava pa a he ngɛ kekleekle nyɔhiɔ ɔ we ligbi nɛ ji 12 ɔ nɔ, nɛ wa pue Yerusalem blɔ, nɛ wa Mawu ɔ nine ngɛ wa he, nɛ e kpɔ̃ wɔ ngɛ he nyɛli kɛ ka woli a dɛ ngɛ blɔ ɔ nɔ. 32 Lɔ ɔ he ɔ, wa ba su Yerusalem, nɛ wa hi lejɛ ɔ ligbi etɛ. 33 Nɛ ngɛ ligbi eywiɛne ɔ nɔ ɔ, wa ngmɛ sika hiɔ ɔ, kɛ sika tsu ɔ, kɛ ní ɔmɛ ngɛ wa Mawu ɔ we ɔ, nɛ waa kɛ ha Meremot, nɛ ji osɔfo Uriya binyumu ɔ, nɛ nɔ nɛ piɛɛ e he ji Eleazar, nɛ ji Finehas binyumu ɔ, nɛ nihi nɛ a piɛɛ a he ji Levi no Yozabad, nɛ ji Yeshua binyumu ɔ, kɛ Levi no Noadia, nɛ ji Binui binyumu ɔ. 34 A kane nɔ́ fɛɛ nɔ́ nɛ a ngmɛ, nɛ a ngma a jiɔmi kɛ fɔ si. 35 Nihi nɛ a je nyɔguɛ tso mi kɛ ba a ngɔ níhi kɛ ba sã sami afɔlehi ha Israel Mawu ɔ, na ku 12 kɛ ha Israel tsuo, jehanɛ hu waa kɛ agbosu 96, kɛ jijɔ wayo 77 sã sami afɔle, nɛ waa kɛ akpakpo 12 sã yayami afɔle; a kɛ ní nɛ ɔmɛ tsuo sã sami afɔle kɛ ha Yehowa.

36 Lɔ ɔ se ɔ, waa kɛ matsɛ ɔ mlaa amɛ ha matsɛ ɔ kpokpa a nɔ hyɛli ɔmɛ,* kɛ amlaalohi nɛ a ngɛ kpokpa nɛ ngɛ Pa a Se* ɔ nɔ ɔ, nɛ a fĩ ni ɔmɛ a se, nɛ a ha mɛ níhi nɛ a he maa hia kɛ ha anɔkuale Mawu ɔ we ɔ.

9 Benɛ a pee ní nɛ ɔmɛ ta pɛ ɔ, ma nikɔtɔma amɛ ba su ye he, nɛ a de mi ke: “Israel bi ɔmɛ, kɛ osɔfo ɔmɛ, kɛ Levi bi ɔmɛ je we a he kɛ ji zugba amɛ a nɔ bi ɔmɛ, kɛ a ní hiemi* ní ɔmɛ a he, nɛ ji níhi nɛ Kanaan bi, Hit bi, Periz bi, Yebus bi, Ammon bi, Moab bi, Egipt bi, kɛ Amor bi ɔmɛ peeɔ ɔ. 2 A ya ngɔ yihi ngɛ zugba amɛ a nɔ bi ɔmɛ a biyi ɔmɛ a kpɛti kɛ ha mɛ nitsɛmɛ a he kɛ a binyumu ɔmɛ. Amlɔ nɛ ɔ, mɛ nɛ́ a ji nina* klɔuklɔu ɔ ya futu zugba amɛ a nɔ bi ɔmɛ. Nihi nɛ a kɛ a he wo yayami nɛ ɔ mi titli ji ma nikɔtɔma amɛ kɛ nɔ yeli ɔmɛ a se yeli ɔmɛ.”

3 Benɛ i nu nɔ́ nɛ ɔ, oya nɔuu nɛ i gba ye tade ɔ kɛ ye tade klɔii nɛ kɔni be he ɔ, nɛ i hiaa ye yi bwɔmi kɛ ye kpɛni, nɛ ye he mi po, nɛ i hi si. 4 Kɛkɛ nɛ nɔ fɛɛ nɔ nɛ e ngɛ bumi* kɛ ha Israel Mawu ɔ munyu ɔmɛ ɔ ba bɔle mi kɛ kpe ngɛ anɔkuale nɛ́ nihi nɛ a je nyɔguɛ tso mi kɛ ba a yi ɔ he je. Jamɛ a be ɔ mi ɔ, ye he mi po, nɛ i hi si hluu kɛ ya si gbɔkuɛ ngma afɔle sami be ɔ.

5 Nɛ gbɔkuɛ ngma afɔle sami be ɔ, i te si ngɛ ye hɛ mi si puemi ɔ mi kɛ ye he tade kɛ tade klɔii nɛ kɔni be he nɛ́ e gba a, nɛ i kplã si ngɛ ye nakutso nya, nɛ i wo ye ninehi a nɔ kɛ tsɔɔ Yehowa, ye Mawu ɔ. 6 Nɛ i de ke: “Oo ye Mawu, ye hɛ mi pue si, nɛ e ngɛ mi zo pee kaa ma wo ye hɛ nɔ kɛ tsɔɔ mo, ye Mawu, ejakaa wa tɔmi ɔmɛ hiɛ kɛ be nɔ, nɛ wa fɔ yemi ɔ kuɔ kɛ ya su hiɔwe tɔɔ. 7 Kɛ je wa nɛmɛ ɔmɛ a be ɔ mi hluu kɛ ba si mwɔnɛ ligbi nɛ ɔ, wa fɔ yemi ɔ kle; nɛ wa tɔmi ɔmɛ a he je ɔ, a kɛ wɔ, kɛ wa matsɛmɛ ɔmɛ, kɛ wa we osɔfo ɔmɛ wo zugba amɛ a nɔ matsɛmɛ ɔmɛ a dɛ, nɛ nihi kɛ klaate gbe wɔ, wa ya nyɔguɛ tso mi, nihi ha wa ní, nɛ nihi pue wa hɛ mi si kaa bɔ nɛ e ji mwɔnɛ ɔ. 8 Se ngɛ be kpiti nɛ ɔ mi ɔ, Yehowa, wa Mawu ɔ na wɔ mɔbɔ nɛ e ha nɛ a ngmɛɛ wa kpɛti ni komɛ a he, nɛ e ha wɔ sihi he nɛ ngɛ slɔkee* ngɛ e he klɔuklɔu ɔ, konɛ wa hɛngmɛ nɔ nɛ tsɔ, nɛ́ é ha wɔ he jɔmi bɔɔ ngɛ wa nyɔguɛ yemi ɔ mi, Oo wa Mawu. 9 E ngɛ mi kaa nyɔguɛhi ji wɔ mohu lɛɛ, se wa Mawu ɔ kua we wɔ ngɛ wa nyɔguɛ yemi ɔ mi; mohu ɔ, e je e suɔmi nɛ se pui ɔ kpo kɛ ha wɔ ngɛ Persia matsɛmɛ ɔmɛ a hɛ mi, konɛ e ha wɔ he wami bɔ nɛ pee nɛ wa wo wa Mawu ɔ we ɔ nɔ, nɛ́ waa kpale ma we ɔ nɛ e hule ɔ, konɛ e ha wɔ gbogbo nɛ maa po wa he piɛ* ngɛ Yuda kɛ Yerusalem.

10 “Se amlɔ nɛ ɔ, wa Mawu, mɛni wa ma nyɛ ma de ngɛ enɛ ɔ se? Ejakaa wa je o kita amɛ a se, 11 kitahi nɛ o ha wɔ kɛ gu o sɔmɔli, nɛ ji gbali ɔmɛ a nɔ, nɛ́ o de ke: ‘Zugba a nɛ nyɛ yaa nɛ nyɛ ya ngɔ ɔ, e ji zugba nɛ he tsɔ we, ejakaa zugba amɛ a nɔ bi ɔmɛ a he tsɔ we, ngɛ ní hiemi* níhi nɛ a peeɔ, nɛ́ a ha nɛ zugba a nɔ tsuo hyi tɔ kɛ a mu ní peepee ɔmɛ ɔ he je. 12 Lɔ ɔ he ɔ, nyɛ ko ngɔ nyɛ biyi ɔmɛ kɛ ha a binyumu ɔmɛ, nɛ nyɛ ko ngɔ a biyi ɔmɛ kɛ ha nyɛ binyumu ɔmɛ hulɔ; nɛ nyɛ ko pee nɔ́ ko nɛ ma ha nɛ a ná tue mi jɔmi, nɛ́ jehanɛ se hu á ya nɔ, bɔ nɛ pee nɛ nyɛ he nɛ wa, nɛ́ nyɛɛ ye zugba a nɔ ní kpakpa amɛ, nɛ́ zugba a nɛ pee nyɛɛ kɛ nyɛ binyumu ɔmɛ nyɛ nɔ́ kɛ ya neneene.’ 13 Nɛ ngɛ ní nɛ ɔmɛ tsuo nɛ ba wa nɔ ngɛ wa ní yayami ɔmɛ kɛ wa fɔ yemi nɛ kle ɔ tsuo se ɔ—ejakaa mo, wa Mawu, o kɛ wɔ yi ngɛ wa tɔmi ɔ nya, nɛ o ha nɛ wɔ nihi nɛ wa ngɛ hiɛ ɔ wa yi ná wami— 14 anɛ e sa nɛ wa tɔ̃ o kita amɛ a nɔ ekohu, nɛ́ waa kɛ nihi nɛ a peeɔ ní hiemi ní nɛ ɔmɛ nɛ́ sɛ gba si himi mi* lo? Anɛ lɔ ɔ be hae nɛ o mi mi nɛ fu wɔ wawɛɛ nɛ o kpata wa hɛ mi pɛsɛpɛsɛ, nɛ́ nɔ ko nɔ ko be piɛe, aloo nɔ ko yi be wami náe lo? 15 Oo Yehowa, Israel Mawu, dalɔ ji mo, ejakaa wɔ ji nihi nɛ wa piɛ nɛ wa yi ná wami kɛ ba si mwɔnɛ ligbi nɛ ɔ. Amlɔ nɛ ɔ, wa ba o hɛ mi kaa nihi nɛ a ye fɔ, pohu wa be nyɛe maa da o hɛ mi ngɛ si fɔfɔɛ nɛ wa ngɛ mi ɔ he je.”

10 Benɛ Ezra ngɛ sɔlee nɛ e ngɛ a yayami ɔ jajee, nɛ́ e ngɛ ya foe, nɛ́ e buu si ngɛ anɔkuale Mawu ɔ we ɔ hɛ mi ɔ, Israel bi babauu, nɛ ji nyumuhi kɛ yihi, kɛ jokuɛwi ba bua a he nya kɛ bɔle lɛ, ejakaa ni ɔmɛ ngɛ ya foe wawɛɛ nitsɛ. 2 Kɛkɛ nɛ Shekania, nɛ ji Yehiel nɛ e je Elam binyumu ɔmɛ a kpɛti ɔ binyumu ɔ de Ezra ke: “Wa yi wa Mawu ɔ anɔkuale ngɛ ma se yihi nɛ wa ngɔ ngɛ zugba a nɔ bi ɔmɛ a kpɛti ɔ he je. Se ngɛ enɛ ɔ tsuo se ɔ, hɛ nɔ kami ngɛ kɛ ha Israel loloolo. 3 Amlɔ nɛ ɔ, nyɛ ha nɛ waa kɛ wa Mawu ɔ nɛ so somi ko konɛ waa wo yi ɔmɛ tsuo kɛ bimɛ nɛ a fɔ ɔ blɔ kɛ ho ngɛ Yehowa kɛ nihi nɛ a ngɛ bumi* kɛ ha wa Mawu ɔ kita a, a blɔ tsɔɔmi nya. Ha nɛ waa pee kaa bɔ nɛ Mlaa a tsɔɔ ɔ. 4 Tee si, ejakaa o blɔ nya ní tsumi ji nɛ ɔ nɛ, wa piɛɛ o he. O he nɛ wa nɛ o pee sane ɔ he nɔ́ ko.”

5 Kɛkɛ nɛ Ezra te si, nɛ e ha nɛ osɔfo ɔmɛ a nya dali ɔmɛ, Levi bi ɔmɛ, kɛ Israel bi ɔmɛ tsuo kã kita kaa a maa pee nɔ́ nɛ Shekania de ɔ. Lɔ ɔ he ɔ, a kã kita. 6 Jehanɛ ɔ, Ezra te si ngɛ anɔkuale Mawu ɔ we ɔ hɛ mi, nɛ e ho Yehohanan, nɛ ji Eliashib binyumu ɔ tsu ɔ mi* ya. E ngɛ mi kaa e ya lejɛ ɔ mohu lɛɛ, se e yi ní, nɛ e nui nyu, ejakaa e ngɛ aywilɛho yee ngɛ anɔkuale nɛ nihi nɛ a je nyɔguɛ tso mi kɛ ba a yi ɔ he je.

7 Kɛkɛ nɛ a fiɛɛ ngɛ Yuda tsuo kɛ Yerusalem kaa nihi nɛ a je nyɔguɛ tso mi kɛ ba a tsuo nɛ a bua a he nya ngɛ Yerusalem; 8 nɛ ganɔ ɔmɛ kɛ nikɔtɔma amɛ ma nya si kaa nɔ fɛɛ nɔ nɛ e be bae ngɛ ligbi etɛ mi ɔ, a ma kpɔ̃ e níhi tsuo ngɛ e dɛ,* nɛ a ma je lɛ we kɛ je nihi nɛ a kpale kɛ je nyɔguɛ tso mi kɛ ba a, a kpɛti.* 9 Lɔ ɔ he ɔ, Yuda kɛ Benyamin nyumu ɔmɛ tsuo ba bua a he nya ngɛ Yerusalem ngɛ ligbi etɛ pɛ mi, ngɛ nyɔhiɔ nɛɛne ɔ we ligbi nɛ ji 20 ɔ nɔ. Ni ɔmɛ tsuo hii si ngɛ anɔkuale Mawu ɔ we ɔ kpo ɔ nɔ,* nɛ a he ngɛ doe blibliibli, ngɛ sane nɛ ba a, kɛ hiɔmi ngua nɛ ngɛ nɛe ɔ he je.

10 Kɛkɛ nɛ osɔfo Ezra te si nɛ e de mɛ ke: “Nyɛ yi Mawu anɔkuale ejakaa nyɛ ya ngɔ ma se yihi, enɛ ɔ he ɔ, nyɛ ha nɛ fɔ nɛ Israel ye ɔ hiɛ. 11 Amlɔ nɛ ɔ, nyɛɛ jaje nyɛ yayami ɔ kɛ tsɔɔ Yehowa, nyɛ nɛmɛ a Mawu ɔ, nɛ́ nyɛɛ pee e suɔmi nya ní. Nyɛ tsɔ nyɛ he kɛ je zugba a nɔ bi ɔmɛ kɛ ma se yi nɛ ɔmɛ a he.” 12 Kɛkɛ nɛ asafo ɔ tsuo he nɔ, nɛ a kɛ gbi nɛ nya wa de ke: “Wa blɔ nya ní tsumi ji kaa wa maa pee kaa bɔ nɛ o de ɔ pɛpɛɛpɛ. 13 Se ni ɔmɛ a he hiɛ, nɛ hiɔmi nɛmi be ji nɛ ɔ nɛ. Wa be nyɛe maa da si ngɛ kpo nɔ, nɛ waa kɛ ligbi kake loo enyɔ be nyɛe ma tsu sane nɛ ɔ he ní, ejakaa atuã nɛ wa tsɔ ngɛ sane nɛ ɔ mi ɔ nya wa wawɛɛ nitsɛ. 14 Lɔ ɔ he ɔ, wa kpa mo pɛɛ, ha nɛ wa ma nikɔtɔma amɛ nɛ a da asafo ɔ tsuo nane mi; nɛ́ o ha nɛ nihi tsuo nɛ a ngɛ wa ma amɛ a mi nɛ a ngɔ ma se yihi ɔ nɛ a ba ngɛ be nɛ a maa to ɔ mi, á piɛɛ ma fɛɛ ma mi nikɔtɔmahi kɛ kojoli ɔmɛ a he kɛ ba, kɛ yaa si be nɛ wa ma ha nɛ wa Mawu ɔ we abofu nɛ nya wa nɛ ba wa nɔ ngɛ sane nɛ ɔ mi ɔ maa je wa nɔ.”

15 Se Yonatan, nɛ ji Asahel binyumu ɔ, kɛ Yahzeya, nɛ ji Tikva binyumu ɔ kplɛɛ we nɔ́ nɛ ɔ nɔ, nɛ Meshulam kɛ Shabetai nɛ a ji Levi bi ɔ fĩ a se. 16 Se nihi nɛ a je nyɔguɛ tso mi kɛ ba a pee kaa bɔ nɛ a ma nya si ɔ; nɛ osɔfo Ezra kɛ a tsɛmɛ a we ɔmɛ a weku yi ɔmɛ, nɛ ji nihi tsuo nɛ a wo a biɛ ta a kpe ngɛ nyɔhiɔ nyɔngmane ɔ we kekleekle ligbi ɔ nɔ, konɛ a hyɛ sane ɔ mi; 17 nɛ benɛ e ke e suu kekleekle nyɔhiɔ ɔ we kekleekle ligbi ɔ nɔ ɔ, a hyɛ nihi tsuo nɛ a ngɔ ma se yihi ɔ a sane ɔ mi ta. 18 Nɛ a na kaa osɔfo ɔmɛ a binyumu ɔmɛ a kpɛti ni komɛ ngɔ ma se yihi: ngɛ Yehozadak binyumu Yeshua binyumu ɔmɛ kɛ e nyɛminyumu ɔmɛ a kpɛti ɔ, Maaseya, Eliezer, Yarib, kɛ Gedalia. 19 Se a wo si* kaa a maa wo a yi ɔmɛ blɔ kɛ ho, nɛ akɛnɛ a ye fɔ he je ɔ, a ti nɔ fɛɛ nɔ maa ngɔ agbosu kake kɛ ha ngɛ e fɔ yemi ɔ he.

20 Ngɛ Imer binyumu ɔmɛ a kpɛti ɔ, Hanani kɛ Zebadia; 21 nɛ ngɛ Harim binyumu ɔmɛ a kpɛti ɔ, Maaseya, Eliya, Shemaya, Yehiel, kɛ Uziah; 22 nɛ ngɛ Pashur binyumu ɔmɛ a kpɛti ɔ, Elioenai, Maaseya, Ishmael, Netanel, Yozabad, kɛ Eleasa. 23 Nɛ ngɛ Levi bi ɔmɛ a kpɛti ɔ, Yozabad, Shimei, Kelaya (nɛ ji Kelita), Petahia, Yuda, kɛ Eliezer; 24 nɛ ngɛ lali ɔmɛ a kpɛti ɔ, Eliashib; nɛ ngɛ agbo nya buli ɔmɛ a kpɛti ɔ, Shalum, Telem, kɛ Uri.

25 Nihi nɛ a ye fɔ ngɛ Israel bi ɔmɛ a kpɛti ɔ ji nɛ ɔmɛ nɛ; ngɛ Parosh binyumu ɔmɛ a kpɛti ɔ, Ramia, Izia, Malkiya, Miyamin, Eleazar, Malkiya, kɛ Benaya; 26 nɛ ngɛ Elam binyumu ɔmɛ a kpɛti ɔ, Matania, Zakaria, Yehiel, Abdi, Yeremot, kɛ Eliya; 27 nɛ ngɛ Zatu binyumu ɔmɛ a kpɛti ɔ, Elioenai, Eliashib, Matania, Yeremot, Zabad, kɛ Aziza; 28 nɛ ngɛ Bebai binyumu ɔmɛ a kpɛti ɔ, Yehohanan, Hanania, Zabai, kɛ Atlai; 29 nɛ ngɛ Bani binyumu ɔmɛ a kpɛti ɔ, Meshulam, Maluk, Adaya, Yashub, Sheal, kɛ Yeremot; 30 nɛ ngɛ Pahat Moab binyumu ɔmɛ a kpɛti ɔ, Adna, Kelal, Benaya, Maaseya, Matania, Bezalel, Binui, kɛ Manase; 31 nɛ ngɛ Harim binyumu ɔmɛ a kpɛti ɔ, Eliezer, Isshiya, Malkiya, Shemaya, Shimeon, 32 Benyamin, Maluk, kɛ Shemaria; 33 ngɛ Hashum binyumu ɔmɛ a kpɛti ɔ, Matenai, Matatah, Zabad, Elifelet, Yeremai, Manase, kɛ Shimei; 34 ngɛ Bani binyumu ɔmɛ a kpɛti ɔ, Maadai, Amram, Uel, 35 Benaya, Bedeya, Keluhi, 36 Vania, Meremot, Eliashib, 37 Matania, Matenai, kɛ Yaasu; 38 nɛ ngɛ Binui binyumu ɔmɛ a kpɛti ɔ, Shimei, 39 Shelemia, Natan, Adaya, 40 Maknadebai, Shashai, Sharai, 41 Azarel, Shelemia, Shemaria, 42 Shalum, Amaria, kɛ Yosef; 43 nɛ ngɛ Nebo binyumu ɔmɛ a kpɛti ɔ, Yeyel, Matitia, Zabad, Zebina, Yadai, Yoel, kɛ Benaya. 44 Ni nɛ ɔmɛ tsuo ngɔ ma se yihi, nɛ a wo a yi ɔmɛ kɛ a bimɛ ɔmɛ blɔ.