NEHEMIA

1 Nehemia,* Hakalia binyumu ɔ munyuhi ji nɛ ɔmɛ nɛ: E ba mi kaa ngɛ Kislev* nyɔhiɔ ɔ mi, ngɛ jeha nɛ ji 20 ɔ mi ɔ, i ngɛ Shushan* nɛ ji matsɛ ma nɛ a fia gbogbo wo he ɔ* mi. 2 Jamɛ a be ɔ mi ɔ, Hanani, nɛ ji ye nyɛminyumu ɔmɛ a kpɛti nɔ kake kɛ nyumu kpa komɛ je Yuda kɛ ba, nɛ i bi mɛ Yuda bi nɛ a piɛ nɛ a je nyɔguɛ tso mi kɛ ho ɔ a he sane, kɛ Yerusalem hu he sane. 3 A de mi ke: “Nihi nɛ a piɛ ngɛ lejɛ ɔ kpokpa a nɔ,* nɛ ji nihi nɛ a je nyɔguɛ tso mi kɛ ho ɔ, a si fɔfɔɛ ɔ hí kulaa, nɛ e ngɛ zo. Yerusalem gbogbo ɔmɛ ku pue si, nɛ a kɛ la sã e we agbo ɔmɛ.”

4 Benɛ i nu munyu nɛ ɔmɛ pɛ ɔ, i hi si nɛ i bɔni ya fomi, nɛ i ye aywilɛho ligbihi fuu, nɛ i ya nɔ nɛ i ha hwɔ, nɛ i sɔle ngɛ hiɔwe Mawu ɔ hɛ mi. 5 I de ke: “Oo Yehowa, hiɔwe Mawu, Mawu kpetekpleenyɛ nɛ he ngɛ gbeye, nɛ́ e yeɔ e somi nɔ, nɛ́ e jeɔ suɔmi nɛ se pui kpo kɛ haa nihi nɛ a suɔ lɛ nɛ́ a yeɔ e kita amɛ a nɔ ɔ, 6 i kpa mo pɛɛ nɛ o ta tue, nɛ́ o bli o hɛngmɛ, nɛ́ sɔlemi nɛ o sɔmɔlɔ ɔ ngɛ sɔlee ha mo nyɔ kɛ pia kɛ ha o sɔmɔli, nɛ ji Israel bi ɔmɛ mwɔnɛ ɔ, o bu tue. I ngɛ yayamihi nɛ Israel bi ɔmɛ pee kɛ si mo ɔ jajee. I kɛ ye tsɛ we ɔ tsuo wa pee yayami. 7 Niinɛ, wa pee yayami kɛ si mo ejakaa o kita amɛ, o fami ɔmɛ, kɛ o kojomi ɔmɛ nɛ o ha wɔ kɛ gu o sɔmɔlɔ Mose nɔ ɔ, wa yi nɔ.

8 “I kpa mo pɛɛ nɛ o kai nɔ́ nɛ o de* o sɔmɔlɔ Mose ɔ: ‘Ke nyɛ yi anɔkuale ɔ, ma gbɛ nyɛ kɛ fĩa ni ɔmɛ a kpɛti. 9 Se ke nyɛ kpale kɛ ba ye ngɔ, nɛ nyɛ ye ye kita amɛ a nɔ ɔ, lɛɛ ke nyɛ gbɛ fĩa zugba a nyagbe he ɔ po, ma ngɔ nyɛ kɛ je lejɛ ɔ kɛ ba he nɛ i hla kaa ye biɛ ɔ nɛ hi ɔ.’ 10 A ji o sɔmɔli kɛ o we bi, nihi nɛ o kɛ o he wami kpetekpleenyɛ ɔ kɛ o nine nɛ he wa a kpɔ̃ mɛ ɔ. 11 Oo Yehowa, i kpa mo pɛɛ nɛ o ta tue kɛ ha o sɔmɔlɔ ɔ sɔlemi ɔ, kɛ o sɔmɔli nɛ a suɔ kaa a maa ye o biɛ ɔ gbeye ɔ a sɔlemi ɔ, nɛ i kpa mo pɛɛ nɛ o ha nɛ o sɔmɔlɔ ɔ nɛ ye manye mwɔnɛ ɔ, nɛ́ o ha nɛ matsɛ ɔ mi mi nɛ sã lɛ ngɛ ye he.”

Jamɛ a be ɔ mi ɔ, i ji matsɛ ɔ dã wolɔ.

2 Ngɛ Nisan* nyɔhiɔ ɔ mi, ngɛ Matsɛ Artaherhes nɔ yemi jeha nɛ ji 20 ɔ mi ɔ, a kɛ wai ma e hɛ mi, nɛ kaa bɔ nɛ i peeɔ daa a, i wo wai ɔ nɔ nɛ i kɛ ha matsɛ ɔ. Se ye hɛ mi pee mɔbɔmɔbɔ. Matsɛ ɔ nɛ mi nɛ ye hɛ mi pee mɔbɔmɔbɔ jã hyɛ. 2 Lɔ ɔ he ɔ, matsɛ ɔ de mi ke: “Mɛni he je nɛ o hɛ mi pee mɔbɔmɔbɔ, pohu pi nɛ o be he wami? Enɛ ɔ lɛɛ, pi nɔ́ ko nɔ́ ko, aywilɛho lɛ o ngɛ yee ngɛ o tsui mi.” Kɛkɛ nɛ i ye gbeye wawɛɛ.

3 Nɛ i de matsɛ ɔ ke: “Matsɛ ɔ se nɛ kɛ! Mɛni he je nɛ e sɛ nɛ ye hɛ mi nɛ pee mɔbɔmɔbɔ be mi nɛ ma, nɛ ji he nɛ a pu ye nɛmɛ ɔmɛ ngɛ ɔ pee ma doku, nɛ́ a kɛ la sã e we agbo ɔmɛ ɔ?” 4 Kɛkɛ nɛ matsɛ ɔ bi mi ke: “Mɛni o ngɛ hlae?” Oya nɔuu nɛ i sɔle ha hiɔwe Mawu ɔ. 5 Nɛ i de matsɛ ɔ ke: “Ke e sa matsɛ ɔ hɛ mi, nɛ o sɔmɔlɔ ɔ hɛ mi ba nyami ngɛ o hɛ mi ɔ, lɛɛ moo wo mi blɔ kɛ ya Yuda, nɛ ji ma nɛ a pu ye nɛmɛ ɔmɛ ngɛ mi ɔ mi, konɛ ma kpale ya po ma a.” 6 Kɛkɛ nɛ matsɛ ɔ, nɛ́ jamɛ a be ɔ mi ɔ, manyɛ ɔ hii si ngɛ e kasa nya a bi mi ke: “Blɔ hiami ɔ maa ngɔ mo be enyɛmɛ, nɛ mɛni be o maa kpale kɛ ba?” Lɔ ɔ he ɔ, e sa matsɛ ɔ hɛ mi kaa e maa wo mi blɔ, nɛ i tsɔɔ lɛ be ɔ.

7 Kɛkɛ nɛ i de matsɛ ɔ ke: “Ke e sa matsɛ ɔ hɛ mi ɔ, e ha nɛ a ha mi sɛ womihi nɛ ma kɛ ya ha amlaalo ɔmɛ nɛ a ngɛ kpokpa nɛ ngɛ Pa a Se* ɔ, konɛ a ha mi blɔ nɛ ma be slɔkee kɛ ya si be nɛ ma ya su Yuda, 8 kɛ sɛ womi nɛ ma kɛ ya ha Asaf, nɛ ji Matsɛ Abɔɔ* ɔ nɔ hyɛlɔ ɔ, konɛ e ha mi tsohi nɛ a kɛ maa pee plai nguahi kɛ ha We* ɔ Mɔ Nɛ He Wa a nya agbo ɔ, kɛ ma a gbogbo ɔmɛ, kɛ we ɔ nɛ ma ya hi mi ɔ.” Lɔ ɔ he ɔ, matsɛ ɔ ha mi sɛ womi ɔmɛ, ejakaa ye Mawu ɔ nine nɛ hi ɔ ngɛ ye nɔ.

9 Nyagbenyagbe ɔ, i ba su amlaalo ɔmɛ nɛ a ngɛ kpokpa nɛ ngɛ Pa a Se ɔ a ngɔ, nɛ i ngɔ matsɛ ɔ sɛ womi ɔmɛ kɛ ha mɛ. Jehanɛ hu ɔ, matsɛ ɔ ha nɛ tabo nya dali kɛ okpɔngɔ nɔ hili piɛɛ ye he kɛ ho. 10 Benɛ Sanbalat, nɛ ji Horon no ɔ kɛ Tobia, Ammon no nɛ e ji sɔmɔlɔ ɔ nu he ɔ, a bua jɔɛ he kulaa kaa nɔ ko ba nɛ́ e ba pee nɔ́ kpakpa ko kɛ ha Israel bi ɔmɛ.

11 Be saii mi ɔ, i ba su Yerusalem, nɛ i hi lejɛ ɔ ligbi etɛ. 12 I te si nyɔ mi, i kɛ nyumuhi bɔɔ nɛ a piɛɛ ye he ɔ, nɛ i de we nɔ ko nɔ́ nɛ ye Mawu ɔ ngɔ kɛ wo ye tsui mi kaa ma pee ha Yerusalem ɔ, nɛ lohwe ko piɛɛ we ye he kaa ja nɔ́ nɛ i hi nɔ ɔ pɛ. 13 Jamɛ a nyɔ ɔ mi ɔ, i je kpo kɛ gu Dɔgba Agbo ɔ mi, nɛ i be ngɛ Sinɔ Ngua a Nyu Hɛngmɛ ɔ hɛ mi kɛ ya La Zu Kuku Agbo ɔ nya, nɛ i ya hyɛ Yerusalem gbogbo ɔmɛ nɛ a ku pue si ɔ kɛ e we agbo ɔmɛ nɛ a kɛ la sã a. 14 Nɛ i be kɛ ho Nyu Hɛngmɛ Agbo ɔ he ya, nɛ i tsa nɔ kɛ ya Matsɛ ɔ Taku ɔ nya, nɛ blɔ nɛ ngɛ lejɛ ɔ klee we nɛ́ lohwe ɔ nɛ i hi nɔ ɔ ma nyɛ maa be. 15 Se i tsa nɔ kɛ gu dɔgba a* mi kɛ kuɔ kɛ ho jamɛ a nyɔ mi ɔ, nɛ i ya nɔ nɛ i hyɛ gbogbo ɔ, nɛ lɔ ɔ se ɔ, i kpale kɛ ba gu Dɔgba Agbo ɔ mi, kɛkɛ nɛ i kpale ye se.

16 Nɔ yeli ɔmɛ a se yeli ɔmɛ li he nɛ i ya, kɛ nɔ́ nɛ i ngɛ pee, ejakaa i de we Yuda bi ɔmɛ, osɔfo ɔmɛ, odehe ɔmɛ, nɔ yeli ɔmɛ a se yeli ɔmɛ, kɛ ní tsuli kpa amɛ nɔ́ ko nɔ́ ko lolo. 17 Nyagbenyagbe ɔ, i de mɛ ke: “Nyɛ na kaa si fɔfɔɛ mi nɛ wa ngɛ ɔ hí kulaa, nɛ nyɛ na kaa Yerusalem pee ma doku nɛ a kɛ la sã e we agbo ɔmɛ. Nyɛɛ ba nɛ waa kpale fia Yerusalem gbogbo ɔmɛ konɛ hɛ mi si puemi nɛ ɔ nɛ ko tsa nɔ.” 18 Lɔ ɔ se ɔ, i de mɛ bɔ nɛ ye Mawu ɔ nine nɛ hi ɔ ngɛ ye nɔ ha, kɛ munyuhi nɛ matsɛ ɔ tu kɛ tsɔɔ mi ɔ. Kɛkɛ nɛ a de ke: “Nyɛ ha nɛ waa te si nɛ waa fia gbogbo ɔ.” Lɔ ɔ he ɔ, a wo a sibi* he wami kɛ ha ní tsumi kpakpa a.

19 Jehanɛ ɔ, benɛ Sanbalat, nɛ ji Horon no ɔ, kɛ Tobia, Ammon no nɛ e ji sɔmɔlɔ ɔ, kɛ Geshem, nɛ ji Arabia no ɔ nu he ɔ, a ye wa he fɛu, nɛ a gbe wa he guɛ, nɛ a de ke: “Mɛni nyɛ ngɛ pee ɔ? Anɛ nyɛ ngɛ matsɛ ɔ hɛ mi atuã tsɔe lo?” 20 Se i ha heto ke: “Hiɔwe Mawu ɔ ji Nɔ nɛ ma ha nɛ waa ye manye, nɛ wɔ nɛ wa ji e sɔmɔli ɔ, wa maa te si, nɛ wa maa fia gbogbo ɔ; se nyɛɛ lɛɛ nyɛ be blɔ fa mi nɔ́ ko, loo blɔ nya ko, loo kaimi nɔ́* ko ngɛ Yerusalem.”

3 Eliashib, nɛ ji osɔfo nɔkɔtɔma a kɛ e nyɛminyumu ɔmɛ, nɛ a ji osɔfo ɔmɛ te si nɛ a ma Jijɔ Agbo ɔ. A tsukɔ he,* nɛ a ma e sinya amɛ; a tsukɔ he hluu kɛ ya su Mea Mɔ ɔ he, kɛ jehanɛ hu kɛ ya su Hananel Mɔ ɔ he. 2 Yeriko nyumu ɔmɛ fia gbogbo ɔ kɛ tsa a nɔ; nɛ Zakur, Imri binyumu ɔ fia gbogbo ɔ kɛ tsa a nɔ.

3 Hasenaa binyumu ɔmɛ ma Pa Mi Lo Agbo ɔ; a ka tsohi wo he, nɛ a ma e sinya amɛ, e he klɔɔklɔɔ ɔmɛ, kɛ e we agbo se lami dade ɔmɛ. 4 Nɛ Meremot, Hakoz binyumu Uria binyumu ɔ dla gbogbo ɔ kɛ tsa a nɔ, nɛ Meshulam, Meshezabel binyumu Berekia binyumu ɔ dla gbogbo ɔ kɛ tsa a nɔ, nɛ Zadok, Baana binyumu ɔ dla gbogbo ɔ kɛ tsa a nɔ. 5 Nɛ Tekoa bi ɔmɛ dla gbogbo ɔ kɛ tsa a nɔ, se a kpɛti nihi nɛ a he biɛ ɔ bɛ a he si konɛ mɛ hu a sɔmɔ a nyɔmtsɛmɛ ɔmɛ.*

6 Yoyada, nɛ ji Pasea binyumu ɔ, kɛ Meshulam, nɛ ji Besodeya binyumu ɔ dla Ma Momo Agbo ɔ; a ka tsohi wo he, nɛ a ma e sinya amɛ, e he klɔɔklɔɔ ɔmɛ, kɛ e se lami dade ɔmɛ. 7 Melatia, nɛ ji Gibeon no ɔ, kɛ Yadon, nɛ ji Meronot no ɔ, nyumuhi nɛ a je Gibeon kɛ Mizpa nɛ a ngɛ kpokpa nɛ ngɛ Pa a Se* ɔ nɔ amlaalo ɔ sisi* ɔ dla gbogbo ɔ kɛ tsa a nɔ. 8 Uziel, Harhaya binyumu ɔ, nɛ ji sika tsu ga ní tsuli ɔmɛ a ti nɔ kake ɔ dla gbogbo ɔ kɛ tsa a nɔ, nɛ Hanania, nɛ ji nu kɛ e he via futuli* ɔmɛ a ti nɔ kake ɔ dla gbogbo ɔ kɛ tsa e nɔ; nɛ a to tɛhi* kɛ ha zugba a hɛ mi ngɛ Yerusalem hluu kɛ ya su Gbogbo Gbajaa a he. 9 Refaya, Hur binyumu ɔ, nɛ ji Yerusalem kpokpa a fã nɔ nɔkɔtɔma a dla gbogbo ɔ kɛ tsa a nɔ. 10 Yedaya, Harumaf binyumu ɔ dla gbogbo ɔ kɛ tsa a nɔ ngɛ lɛ nitsɛ e we ɔ hɛ mi, nɛ Hatush, Hashabneya binyumu ɔ dla gbogbo ɔ kɛ tsa e nɔ.

11 Malkiya, nɛ ji Harim binyumu ɔ kɛ Hashub, nɛ ji Pahat Moab binyumu ɔ dla gbogbo ɔ he fã kpa,* kɛ Flɔɔnɔɔ Ɔmɛ A Mɔ ɔ hulɔ. 12 Nɛ Shalum, Halohesh binyumu ɔ, nɛ ji Yerusalem kpokpa a fã nɔ nɔkɔtɔma a, kɛ e biyi ɔmɛ dla gbogbo ɔ kɛ tsa a nɔ.

13 Hanun kɛ nihi nɛ a ngɛ Zanoa a dla Dɔgba Agbo ɔ; a ma agbo ɔ, nɛ a ma e sinya amɛ, e he klɔɔklɔɔ ɔmɛ, kɛ e we agbo se lami dade ɔmɛ, nɛ a dla gbogbo ɔ kɔni fã* 1,000 hluu kɛ ya su La Zu Kuku Agbo ɔ he. 14 Malkiya, Rekab binyumu ɔ, nɛ ji Bet Hakerem kpokpa a nɔ nɔkɔtɔma a dla La Zu Kuku Agbo ɔ; e ma agbo ɔ, nɛ e ma e sinya amɛ, e he klɔɔklɔɔ ɔmɛ, kɛ e we agbo se lami dade ɔmɛ.

15 Shalun, Kolhoze binyumu ɔ, nɛ ji Mizpa kpokpa a nɔ nɔkɔtɔma a dla Nyu Hɛngmɛ Agbo ɔ; e ma agbo ɔ, nɛ e bu yi, nɛ e ma e sinya amɛ, e he klɔɔklɔɔ ɔmɛ, kɛ e we agbo se lami dade ɔmɛ, nɛ jehanɛ hu ɔ, e dla Taku Nyu Dɔ ɔ he gbogbo ɔ nɛ yaa Matsɛ ɔ Abɔɔ mi ɔ, hluu kɛ ya su Atlakpe ɔ nɛ je David Ma a mi kɛ kple ɔ he.

16 E se ɔ, Nehemia, Azbuk binyumu ɔ, nɛ ji Betzur kpokpa a fã nɔ nɔkɔtɔma a dla gbogbo ɔ kɛ je David Yɔkɔ Ɔmɛ a hɛ mi hluu kɛ ya su taku ɔ nɛ a pee ɔ he, hluu kɛ ya su He Wali Ɔmɛ A We ɔ he.

17 E se ɔ, Levi bi ɔmɛ dla gbogbo ɔ: Rehum, Bani binyumu ɔ lɛ hyɛ a nɔ; nɛ Hashabia, Keila kpokpa a fã nɔ nɔkɔtɔma a dla gbogbo ɔ kɛ tsa a nɔ kɛ ha e kpokpa a. 18 E se ɔ, a nyɛminyumu ɔmɛ dla gbogbo ɔ: Bavai, Henadad binyumu ɔ, nɛ ji, Keila kpokpa a fã nɔ nɔkɔtɔma a lɛ hyɛ a nɔ.

19 Nɛ Ezer, Yeshua binyumu ɔ, nɛ ji Mizpa ma nɔkɔtɔma a dla gbogbo ɔ fã kpa nɛ ngɛ yoku ɔ nɛ a kuɔɔ kɛ yaa Ta Hwumi Níhi A To He nɛ ngɛ Gbogbo Se Pimi Nɔ́ ɔ he ɔ.

20 E se ɔ, Baruk, nɛ ji Zabai binyumu ɔ tsu ní kɛ hɛdɔ, nɛ e dla gbogbo ɔ fã kpa, kɛ je Gbogbo Se Pimi Nɔ́ ɔ he hluu kɛ ya si Eliashib, nɛ ji osɔfo nɔkɔtɔma a we ɔ agbo ɔ nya.

21 E se ɔ, Meremot, Hakoz binyumu Uria binyumu ɔ dla gbogbo ɔ fã kpa, kɛ je Eliashib we ɔ agbo ɔ nya hluu kɛ ya si Eliashib we ɔ nyagbe he ɔ tɔɔ.

22 E se ɔ, osɔfo ɔmɛ nɛ a je Yordan kpokpa a nɔ ɔ* dla gbogbo ɔ. 23 A se ɔ, Benyamin kɛ Hashub dla gbogbo ɔ ngɛ mɛ nitsɛmɛ a we ɔ hɛ mi. A se ɔ, Azaria, Ananiya binyumu Maaseya binyumu ɔ dla gbogbo ɔ ngɛ lɛ nitsɛ e we ɔ kasa nya. 24 E se ɔ, Binui, Henadad binyumu ɔ dla gbogbo ɔ fã kpa, kɛ je Azaria we ɔ he hluu kɛ ya su Gbogbo Se Pimi Nɔ́ ɔ he, hluu kɛ ya si kɔ̃ nya a.

25 E se ɔ, Palal, Uzai binyumu ɔ dla gbogbo ɔ ngɛ Gbogbo Se Pimi Nɔ́ ɔ, kɛ mɔ ɔ nɛ je kpo ngɛ Matsɛ We ɔ he ɔ hɛ mi, yiti je nɔ́ ɔ nɛ ngɛ Bulɔ Yale ɔ mi ɔ. E se ɔ, Pedaya, Parosh binyumu ɔ hu tsa e nɔ.

26 Sɔlemi we ɔ sɔmɔli ɔmɛ* nɛ a hi Ofel ɔ dla gbogbo ɔ hluu kɛ ya su Nyu Agbo ɔ hɛ mi ngɛ puje he, kɛ mɔ ɔ nɛ je kpo ngɛ gbogbo ɔ he ɔ he.

27 A se ɔ, Tekoa bi ɔmɛ dla gbogbo ɔ fã kpa, kɛ je mɔ ngua a nɛ je kpo ngɛ gbogbo ɔ he ɔ hɛ mi hluu kɛ ya su Ofel gbogbo ɔ he.

28 Osɔfo ɔmɛ dla gbogbo ɔ ngɛ Okpɔngɔ Agbo ɔ yi mi, nɔ fɛɛ nɔ dla gbogbo ɔ ngɛ lɛ nitsɛ e we hɛ mi.

29 A se ɔ, Zadok, Imer binyumu ɔ dla gbogbo ɔ nɛ ngɛ lɛ nitsɛ e we ɔ hɛ mi ɔ.

Nɛ e se ɔ, Shemaya, Shekania binyumu ɔ, nɛ ji Puje He Agbo ɔ nya bulɔ ɔ dla gbogbo ɔ kɛ tsa nɔ.

30 E se ɔ, Hanania, Shelemia binyumu ɔ, kɛ Hanun, nɛ ji Zalaf binyumu ekpane ɔ dla gbogbo ɔ fã kpa.

E se ɔ, Meshulam, Berekia binyumu ɔ dla gbogbo ɔ ngɛ lɛ nitsɛ e we asa a hɛ mi.

31 E se ɔ, Malkiya nɛ ji sika tsu ga ní tsuli a kuu ɔ mi no ɔ dla gbogbo ɔ hluu kɛ ya su sɔlemi we ɔ sɔmɔli ɔmɛ* kɛ jua yeli ɔmɛ a we ɔ he, kɛ jehanɛ ɔ hu kɛ je Níhi A Mi Hyɛmi Agbo ɔ hɛ mi hluu kɛ ya su hiɔwe tsu ɔ nɛ ngɛ kɔ̃ nya a he.

32 Nɛ sika tsu ga ní tsuli ɔmɛ, kɛ jua yeli ɔmɛ dla gbogbo ɔ nɛ ngɛ hiɔwe tsu ɔ nɛ ngɛ kɔ̃ nya a kɛ Jijɔ Agbo ɔ a kpɛti ɔ.

4 Jehanɛ ɔ, benɛ Sanbalat nu kaa wa kpale ngɛ gbogbo ɔ fiae ɔ, e mi mi fu, nɛ e dɔ lɛ wawɛɛ, nɛ e ya nɔ nɛ e ye Yuda bi ɔmɛ a he fɛu. 2 Nɛ e de ngɛ e nyɛminyumu ɔmɛ kɛ Samaria tabo ɔ hɛ mi ke: “Mɛni Yuda bi wudɔwudɔ nɛ ɔmɛ ngɛ pee nɛ ɔ? Mɛ nitsɛmɛ a ma nyɛ maa pee nɔ́ nɛ ɔ lo? Anɛ a maa sã afɔlehi lo? A maa ngɔ ligbi kake kɛ gbe nya lo? Anɛ a maa ngɔ tɛhi nɛ la sã mɛ nɛ a ngɛ tsu nɛ hule pue si ɔ mi ɔ kɛ tsu ní ekohu lo?”

3 Jehanɛ ɔ, Tobia, nɛ ji Ammon no ɔ nɛ daa si ngɛ e kasa nya a de ke: “Ke kɔkɔbo po kuɔ tɛ gbogbo nɛ a ngɛ fiae ɔ, e maa ku lɛ kɛ pue si.”

4 Oo wa Mawu, moo bu tue, ejakaa a ngɛ wa he guɛ gbee, mo ha nɛ wa he guɛ nɛ a ngɛ gbee ɔ nɛ e kpa kɛ bu mɛ nitsɛmɛ a yi, nɛ́ o ha nɛ a nuu mɛ nyɔguɛ kɛ ho ma kpa nɔ ya. 5 Koo ha a fɔ yemi ɔ nɔ, nɛ ko ha nɛ a tsu a yayami ɔ ngɛ o hɛ mi hulɔ, ejakaa a jɛ tsu mali ɔmɛ.

6 Lɔ ɔ he ɔ, wa ya nɔ nɛ wa fia gbogbo ɔ, nɛ gbogbo ɔ tsuo nya kpe, nɛ wa kpale fia kɛ ya si e hiɔwe yami ɔ mi fã, nɛ ni ɔmɛ ya nɔ nɛ a kɛ a tsui wo ní tsumi ɔ mi.

7 Jehanɛ ɔ, benɛ Sanbalat, Tobia, Arabia bi ɔmɛ, Ammon bi ɔmɛ, kɛ Ashdod bi ɔmɛ ná nɛ a nu kaa Yerusalem gbogbo ɔmɛ nɛ wa ngɛ dlae ɔ ngɛ nɔ yae, nɛ wa ngɛ puɔ ɔmɛ tsie ɔ, a mi mi fu wawɛɛ. 8 A pee kake nɛ a so konɛ a ba nɛ a kɛ Yerusalem nɛ ba hwu ta, nɛ́ a ha nɛ ma a mi nɛ pee basabasa. 9 Se wa sɔle kɛ ha wa Mawu ɔ, nɛ a he je ɔ, wa to buli, nɛ a bu wa he nyɔ kɛ pia.

10 Se Yuda bi ɔmɛ ngɛ dee ke: “Ní tsuli ɔmɛ* a he wami ta, nɛ ní kokue ɔmɛ hu hiɛ; wa be nyɛe maa fia gbogbo ɔ gblegbleegble.”

11 Nɛ wa he nyɛli ɔmɛ ya nɔ nɛ a de ke: “Loko a maa le loo a maa na wɔ ɔ, wa ma ba sɛ a kpɛti, nɛ wa maa gbe mɛ, nɛ wa ma kpa mɛ ní tsumi ɔ.”

12 Be fɛɛ be nɛ Yuda bi ɔmɛ nɛ a ngɛ a kasa nya a maa ba a, a ba deɔ wɔ si abɔ* ke: “A maa gu he fɛɛ he kɛ ba tua wɔ.”

13 Lɔ ɔ he ɔ, i ngɔ nyumuhi kɛ to gbogbo ɔ se he nɛ zugba a ba si ngɛ ɔ nɛ lejɛ ɔ fɔɔ si heii ɔ, i ngɔ mɛ kɛ to lejɛ ɔ ngɛ weku nya weku nya, nɛ a hɛɛ klaatehi, akplɔhi, kɛ kɛ̃ɛ̃hi. 14 Benɛ i na kaa a ngɛ gbeye yee ɔ, oya nɔuu nɛ i te si, nɛ i de odehe ɔmɛ, kɛ nɔ yeli ɔmɛ a se yeli ɔmɛ, kɛ nihi nɛ piɛ ɔ ke: “Nyɛ ko ye mɛ gbeye. Nyɛ kai kaa Yehowa he kle nɛ e he ngɛ gbeye; nɛ́ nyɛɛ hwu kɛ ha nyɛ nyɛminyumu ɔmɛ, nyɛ binyumu ɔmɛ kɛ nyɛ biyi ɔmɛ, nyɛ yi ɔmɛ kɛ nyɛ we ɔmɛ.”

15 Jehanɛ ɔ, benɛ wa he nyɛli ɔmɛ nu kaa wa le nɔ́ nɛ a ngɛ pee, nɛ jehanɛ hu anɔkuale Mawu ɔ puɛ a yi mi tomi ɔ, wɔ tsuo wa kpale kɛ ya tsu ní ngɛ gbogbo ɔ he. 16 Kɛ je jamɛ a ligbi ɔ kɛ yaa a, ye nyumu ɔmɛ a kpɛti ni fã tsuɔ ní ɔ, nɛ ni fã hɛɛɔ akplɔhi, tsɛ̃ihi, kɛ̃ɛ̃hi, kɛ dade tadehi. Nɛ ma nikɔtɔma amɛ da Yuda we ɔ 17 nɛ́ a ngɛ gbogbo ɔ fiae ɔ tsuo se. Nihi nɛ a tlooɔ tlomi ɔ kɛ a nine kake tsuɔ ní ɔ, nɛ a kɛ a nine kake hu hɛɛɔ ta hwumi ní.* 18 Nɛ tsu mali ɔmɛ a ti nɔ fɛɛ nɔ fĩ klaate kɛ wo e ngmɔngmɔ he be mi nɛ e ngɛ gbogbo ɔ fiae ɔ, nɛ bɛ kpalɔ ɔ daa si ngɛ ye kasa nya.

19 Kɛkɛ nɛ i de odehe ɔmɛ, kɛ nɔ yeli ɔmɛ a se yeli ɔmɛ, kɛ nihi nɛ piɛ ɔ ke: “Ní tsumi ɔ kle nɛ e yi bli, nɛ wa gbɛ fĩa gbogbo ɔ nɔ, nɛ waa kɛ wa sibi wa kpɛti kɛ. 20 Ke nyɛ nu bɛ ɔ he ɔ, nyɛ ba bua nyɛ he nya ngɛ he nɛ wa ngɛ ɔ. Wa Mawu ɔ maa hwu kɛ ha wɔ.”

21 Lɔ ɔ he ɔ, wa ya nɔ nɛ wa tsu ní ɔ be mi nɛ ni fã amɛ hɛɛ akplɔhi, kɛ je makɛ futɛfutɛ kɛ ya si be nɛ dodoehi je kpo. 22 Jamɛ a be ɔ mi ɔ, i de ni ɔmɛ ke: “Nyumu ɔmɛ a ti nɔ fɛɛ nɔ kɛ e tsɔlɔ nɛ hi Yerusalem kɛ ya si je maa na, nɛ a maa bu wa he nyɔ mi, nɛ ke je na a, a ma tsu ní.” 23 Lɔ ɔ he ɔ, i kɛ ye nyɛminyumu ɔmɛ, ye tsɔli ɔmɛ, kɛ buli nɛ a nyɛɛ ye se ɔ, wa ti nɔ ko nɔ ko je we e tade ngɛ e he, nɛ wa ti nɔ fɛɛ nɔ hɛɛ e ta hwumi níhi ngɛ e hiɔ nine mi.

5 Se nyumu ɔmɛ kɛ a yi ɔmɛ kpa ngmlaa wawɛɛ kɛ wo a nyɛmimɛ Yuda bi ɔmɛ. 2 Ni komɛ ngɛ dee ke: “Waa kɛ wa binyumu ɔmɛ kɛ wa biyi ɔmɛ wa he hiɛ. E sa nɛ wa ná ngma* nɛ waa ye konɛ waa hi wami mi.” 3 Ni kpahi hu ngɛ dee ke: “Wa ngɔɔ wa ngmɔhi, kɛ wa wai ngmɔhi, kɛ wa wehi kɛ toɔ awaba konɛ wa ná ngma ngɛ hwɔ be mi.” 4 Ni kpa komɛ hu ngɛ dee ke: “Matsɛ ɔ tó ɔ he je ɔ, wa ya pa sika, nɛ wa ngɔ wa ngmɔ ɔmɛ kɛ wa wai ngmɔ ɔmɛ kɛ to nane mi. 5 Waa kɛ wa nyɛmimɛ ɔmɛ ɔ, he lo kɛ muɔ kake ji wɔ,* nɛ wa bimɛ ɔmɛ ngɛ kaa a bimɛ ɔmɛ nɔuu; se kɛ̃ ɔ, e biɔ nɛ wa ha nɛ wa binyumu ɔmɛ kɛ wa biyi ɔmɛ nɛ a ya sɔmɔ kaa nyɔguɛhi, nɛ wa biyi ɔmɛ ekomɛ po ngɛ sɔmɔe kaa nyɔguɛhi momo. Se wa be he wami nɛ waa kɛ maa po nɔ́ nɛ ɔ se, ejakaa wa ngmɔ ɔmɛ kɛ wa wai ngmɔ ɔmɛ ba pee ni kpahi a níhi.”

6 Benɛ i nu a ngmlaa kpami ɔ kɛ munyu nɛ ɔmɛ ɔ, ye mi mi fu wawɛɛ nitsɛ. 7 Lɔ ɔ he ɔ, i susu ní nɛ ɔmɛ a he ngɛ ye tsui mi, nɛ i kã odehe ɔmɛ kɛ nɔ yeli ɔmɛ a hɛ mi, nɛ i de mɛ ke: “Nyɛ ti nɔ fɛɛ nɔ ngɛ hekpa hee ngɛ lɛ nitsɛ e nyɛmi dɛ.”

Jehanɛ hu ɔ, i to blɔ nya kaa waa pee kpe ngua ko konɛ waa hyɛ munyu nɛ ɔ mi. 8 Nɛ i de mɛ ke: “Wa pee nɔ́ fɛɛ nɔ́ nɛ wa ma nyɛ, nɛ wa he wɔ nitsɛmɛ wa nyɛmimɛ Yuda bi ɔmɛ nɛ a jua mɛ kɛ ho je ma amɛ a mi ya a kɛ ba; se amlɔ nɛ ɔ, nyɛ maa jua nyɛ nitsɛmɛ nyɛ nyɛmimɛ ɔmɛ konɛ a kpale jua mɛ kɛ ha wɔ lo?” Kɛkɛ nɛ a nya mi jɔ, nɛ a nɛ nɔ́ ko nɛ a ma de. 9 Lɔ ɔ se ɔ, i de mɛ ke: “Nɔ́ nɛ nyɛ ngɛ pee ɔ hí. Anɛ e sɛ nɛ nyɛɛ nyɛɛ ngɛ wa Mawu ɔ gbeye yemi mi bɔ nɛ pee nɛ je ma amɛ, nɛ ji wa he nyɛli ɔmɛ nɛ a ko ye wa he fɛu lo? 10 Jehanɛ hu ɔ, i kɛ ye nyɛminyumu ɔmɛ kɛ ye tsɔli ɔmɛ paa mɛ sika kɛ ngma. I kpa nyɛ pɛɛ, nyɛ ha nɛ wa kpa hekpa nɛ wa heɔ ngɛ níhi nɛ wa pa amɛ ɔ a he. 11 I kpa nyɛ pɛɛ, mwɔnɛ ligbi nɛ ɔ, nyɛɛ kpale a ngmɔ ɔmɛ, a wai ngmɔ ɔmɛ, a oliv ngmɔ ɔmɛ, kɛ a we ɔmɛ kɛ ha mɛ, nɛ jehanɛ hu ɔ, mi dlami lafa mi kake* nɛ nyɛ heɔ ngɛ sika, ngma, wai ehe, kɛ nu nɛ nyɛ ha mɛ ɔ he kaa hekpa a, nyɛɛ kpale kɛ ha mɛ.”

12 Kɛkɛ nɛ a de ke: “Wa maa kpale ní nɛ ɔmɛ kɛ ha mɛ, nɛ wa be nɔ́ ko hee ngɛ a dɛ. Wa maa pee kaa bɔ nɛ o de ɔ pɛpɛɛpɛ.” Lɔ ɔ he ɔ, i tsɛ osɔfo ɔmɛ, nɛ i ha nɛ nyumu nɛ ɔmɛ kã kita kaa a maa ye si womi nɛ ɔ nɔ. 13 Jehanɛ hu ɔ, i huanya ye tade ɔ gugue mi,* nɛ i de ke: “Kikɛ nɛ ɔ nɔuu nɛ anɔkuale Mawu ɔ nɛ́ e huanya nyumu fɛɛ nyumu nɛ e yi si womi nɛ ɔ nɔ ɔ kɛ je e we mi kɛ e weto níhi a he, nɛ kikɛ nɛ ɔ nɔuu nɛ é huanya jamɛatsɛ ɔ nɛ́ e je mi dɛ gu.” Kɛkɛ nɛ asafo ɔ tsuo de ke: “Amen!”* Nɛ a je Yehowa yi, nɛ ni ɔmɛ pee kaa bɔ nɛ a wo si ɔ.

14 Jehanɛ hu ɔ, kɛ je ligbi nɛ e hla mi kaa ma pee a we amlaalo ngɛ Yuda zugba a nɔ, kɛ je Matsɛ Artaherhes nɔ yemi jeha nɛ ji 20 ɔ mi kɛ ya si jeha nɛ ji 32 ɔ mi, nɛ ji jeha 12 ɔ, i kɛ ye nyɛminyumu ɔmɛ wa ti nɔ ko yi niye ní nɛ e sa kaa a kɛ ha amlaalo ɔ. 15 Se amlaalohi nɛ sɛ ye hlami ɔ pee tlomi kɛ ha ni ɔmɛ, nɛ daa ligbi ɔ, a ngɔɔ sika hiɔ shekel* 40 ngɛ a dɛ kɛ heɔ abolo kɛ wai. Jehanɛ hu ɔ, a tsɔli ɔmɛ wa ni ɔmɛ yi mi. Se imi lɛɛ, i pee we jã, ejakaa i yeɔ Mawu gbeye.

16 Jehanɛ hu ɔ, imi hu i tsu gbogbo ɔ he ní tsumi nɛ ɔ eko, nɛ wa he we ngmɔ ko; ye tsɔli ɔmɛ tsuo bua a he nya ngɛ lejɛ ɔ kɛ ha ní tsumi ɔ. 17 Yuda bi kɛ nɔ yeli ɔmɛ a se yeli 150 yeɔ ní ngɛ ye we okplɔɔ ɔ nɔ, e slo nihi nɛ a je je ma amɛ a mi kɛ ba wa ngɔ ɔ. 18 Daa ligbi ɔ, a gbeɔ na ku kake, jijɔ kakaaka ekpa nɛ a je blɔ hla, kɛ lohwe pɛlitsɛmɛ kɛ haa mi,* nɛ ligbi nyɔngma fɛɛ ligbi nyɔngma a, wa náa wai slɔɔtohi tsuo babauu si kake. Ngɛ enɛ ɔ tsuo se ɔ, i de we ke a ha mi niye ní nɛ e sa kaa a ha amlaalo ɔ, ejakaa sɔmɔmi ɔ pee tlomi ngɛ ni ɔmɛ a kuɛ nɔ momo. 19 Oo ye Mawu, mo kai mi nɛ o pee mi kpakpa ngɛ níhi tsuo nɛ i pee ha nimli nɛ ɔmɛ ɔ he.

6 Jehanɛ ɔ, benɛ a ya de Sanbalat, Tobia, Geshem, nɛ ji Arabia no ɔ, kɛ wa he nyɛli nɛ piɛ ɔ kaa i kpale fia gbogbo ɔ, nɛ blɔ ko be mi hu ɔ (e ngɛ mi kaa kɛ ba si jamɛ a be ɔ mi ɔ, i mɛ agbo ɔmɛ a nya sinya amɛ lolo mohu), 2 oya nɔuu nɛ Sanbalat kɛ Geshem tsɔ nɛ a kɛ sɛ gbi nɛ ɔ ba ha mi ke: “Ha nɛ waa to be konɛ waa kpe ngɛ kɔpe ɔmɛ nɛ ngɛ Ono Dɔ ɔ mi ɔ eko mi.” Se e ji ga nɛ a ngɛ toe konɛ a ye mi awi. 3 Lɔ ɔ he ɔ, i tsɔ tsɔli kɛ ya a ngɔ, nɛ a ya de mɛ ke: “I ngɛ ní tsumi ngua ko tsue, nɛ i be nyɛe nɛ ma kple kɛ ba. Mɛni he je nɛ e sa nɛ a kpa ní tsumi ɔ nɛ ma je he kɛ ba nyɛ ngɔ?” 4 A tsɔ nɛ a kɛ sɛ gbi nɛ ɔ nɔuu ba ha mi si eywiɛ sɔuu, nɛ ngɛ eko fɛɛ eko mi ɔ, imi hu i ha mɛ heto kake ɔ nɔuu.

5 Kɛkɛ nɛ Sanbalat tsɔ e tsɔlɔ ɔ kɛ ba ye ngɔ kɛ jamɛ a sɛ gbi ɔ nɔuu si enuɔne, nɛ e hɛɛ sɛ womi nɛ a sɔu we nya ngɛ e dɛ mi. 6 A ngma ngɛ sɛ womi ɔ mi ke: “A nu ngɛ je ma amɛ a mi, nɛ Geshem hu ngɛ dee ke, o kɛ Yuda bi ɔmɛ ngɛ ga toe nɛ nyɛ tsɔ atuã. Enɛ ɔ he je nɛ nyɛ ngɛ gbogbo ɔ fiae ɔ nɛ; nɛ amaniɛ bɔmi nɛ ɔmɛ tsɔɔ kaa o maa pee a matsɛ. 7 Jehanɛ hu ɔ, o hla gbali konɛ a fiɛɛ o he sane ngɛ Yerusalem tsuo ke, ‘Matsɛ ko ngɛ Yuda!’ Nɛ amlɔ nɛ ɔ, a ma ya bɔ matsɛ ɔ ní nɛ ɔmɛ. Lɔ ɔ he ɔ, moo ba nɛ wa susu he.”

8 Se i tsɔ nɛ a kɛ heto nɛ ɔ ya ha lɛ ke: “Níhi nɛ o ngɛ dee ɔ ekoeko be mi; mo nitsɛ o yi mi* nɛ o je nɛ o ngɛ ní nɛ ɔmɛ dee.” 9 Ejakaa mɛ tsuo a ngɛ mɔde bɔe kaa a maa wo wa he gbeye, nɛ a ngɛ dee ke: “A kɔni mi ma jɔ̃ ngɛ ní tsumi ɔ he, nɛ a be nyɛe ma tsu.” Se i sɔle ke, Mawu, i kpa mo pɛɛ, wo mi he wami.*

10 Kɛkɛ nɛ i ya Shemaya, Mehetabel binyumu Delaya binyumu ɔ we ɔ mi be mi nɛ a tsi e nya ngɛ lejɛ ɔ. E de ke: “Ha nɛ waa to be nɛ wa ya kpe ngɛ anɔkuale Mawu ɔ we ɔ ngɛ sɔlemi we ɔ mi, nɛ́ wa nga sɔlemi we ɔ sinya amɛ, ejakaa a ma nɛ a ba gbe mo. Nyɔ mi nɛ a ma ba gbe mo ɔ nɛ.” 11 Se i de ke: “Nyumu kaa imi ɔ, anɛ e sa nɛ ma tu fo lo? Nyumu kaa imi ɔ, anɛ ma nyɛ ma ya sɛ sɔlemi we ɔ nɛ ye yi nɛ ná wami lo? I be lejɛ ɔ yae!” 12 Kɛkɛ nɛ i yɔse kaa Mawu tsɔ we lɛ, mohu ɔ, Tobia kɛ Sanbalat nɛ a bɔ lɛ apaa kaa e ba tu gbami munyu nɛ ɔ kɛ si mi. 13 A bɔ lɛ apaa konɛ e ba wo ye he gbeye, nɛ́ e ha nɛ ma pee yayami, bɔ nɛ pee nɛ a ná nɔ́ ko nɛ a da nɔ kɛ puɛ ye biɛ, nɛ́ a gbe ye he guɛ.

14 Oo ye Mawu, mo kai Tobia kɛ Sanbalat kɛ níhi nɛ a pee ɔ, nɛ mo kai gbalɔyo Nodia, kɛ gbali kpa amɛ nɛ́ be fɛɛ be ɔ, a ngɛ mɔde bɔe kaa a maa wo ye he gbeye ɔ.

15 Lɔ ɔ he ɔ, a kɛ ligbi 52 gbe gbogbo ɔ fiami nya ngɛ Elul* nyɔhiɔ ɔ we ligbi nɛ ji 25 ɔ nɔ.

16 Benɛ wa he nyɛli ɔmɛ tsuo nu he, nɛ́ mahi nɛ bɔle wɔ ɔ tsuo na a, zo gbe mɛ kpɔtɔɔ,* nɛ a yɔse kaa wa Mawu ɔ yemi kɛ buami nya nɛ wa tsu ní tsumi nɛ ɔ nɛ. 17 Ngɛ jamɛ a be ɔ mi ɔ, Yuda odehe ɔmɛ maneɔ Tobia sɛ womihi fuu, nɛ Tobia haa mɛ heto. 18 Nihi fuu nɛ a ngɛ Yuda a kã lɛ kita kaa a ma fĩ e se, ejakaa e ji Shekania, Arah binyumu ɔ ngatsɛ, nɛ e binyumu Yehohanan ngɔ Meshulam, nɛ ji Berekia binyumu ɔ biyo. 19 Jehanɛ hu ɔ, a deɔ mi ní kpakpahi ngɛ e he be fɛɛ be, nɛ a ya bɔɔ lɛ níhi nɛ i deɔ ɔ. Kɛkɛ ɔ, Tobia maa mane mi sɛ womihi konɛ e kɛ wo ye he gbeye.

7 Benɛ a kpale fia gbogbo ɔ ta pɛ ɔ, i ma sinya amɛ; kɛkɛ nɛ i hla agbo nya buli, lali, kɛ Levi bi ɔmɛ. 2 Nɛ i ngɔ ye nyɛminyumu Hanani kɛ to Yerusalem kaa e hyɛ ma a nɔ, nɛ Hanania, nɛ ji Mɔ ɔ nɔ hyɛlɔ nɔkɔtɔma a hu piɛɛ e he, ejakaa e ji nɔ ko nɛ a ma nyɛ maa fĩa kɛ fɔ e nɔ wawɛɛ, nɛ e yeɔ anɔkuale Mawu ɔ gbeye pe nihi fuu. 3 Lɔ ɔ he ɔ, i de mɛ ke: “Nyɛ ko bli Yerusalem agbo ɔmɛ kɛ ya si be nɛ pu nya maa wa, nɛ be mi nɛ a daa si nɛ a ngɛ ma a he bue ɔ, a nga sinya amɛ, nɛ́ a ngɔ klɔɔklɔɔ ɔmɛ kɛ ngmɛ a mi. Nɛ nyɛ ha nɛ nihi nɛ a ngɛ Yerusalem ɔ nɛ a pee buli, a ti nɔ fɛɛ nɔ nɛ e hi he nɛ e maa hwɔɔ ngɛ ɔ, nɛ nɔ fɛɛ nɔ nɛ e hi lɛ nitsɛ e we hɛ mi.” 4 Jamɛ a be ɔ mi ɔ, ma a kle, nɛ nihi nɛ a ngɛ mi ɔ a he pi, nɛ a ná we nɛ a ma we ɔmɛ hu lolo.

5 Se ye Mawu ɔ ngɔ kɛ wo ye tsui mi kaa ma bua odehe ɔmɛ, kɛ nɔ yeli ɔmɛ a se yeli ɔmɛ, kɛ ni ɔmɛ a nya, nɛ́ ma ngma a biɛ ngɛ a weku kpa nya. Kɛkɛ nɛ i na nihi nɛ a je nyɔguɛ tso mi kɛ ba kekleekle ɔ a weku kpa womi ɔ, nɛ i na nɛ a ngma ngɛ mi ke:

6 Ni nɛ ɔmɛ ji nihi nɛ a ngɛ kpokpa a nɔ nɛ a je* nyɔguɛ tso mi kɛ ba, nihi nɛ Babilon Matsɛ Nebukadnezar nuu mɛ nyɔguɛ, nɛ́ pee se ɔ, a kpale a se kɛ ba Yerusalem kɛ Yuda nɛ a ti nɔ fɛɛ nɔ ho lɛ nitsɛ e ma mi ya a, 7 mɛ ji nihi nɛ a kɛ Zerubabel, Yeshua, Nehemia, Azaria, Raamia, Nahamani, Mordekai, Bilshan, Misperet, Bigvai, Nehum kɛ Baanah ba a nɛ.

Israel nyumu ɔmɛ a yibɔ ji nɛ ɔmɛ nɛ: 8 Parosh binyumu ɔmɛ, 2,172; 9 Shefatia binyumu ɔmɛ, 372; 10 Arah binyumu ɔmɛ, 652; 11 Pahat Moab binyumu ɔmɛ nɛ a ji Yeshua kɛ Yoab a sisi bimɛ ɔ, 2,818; 12 Elam binyumu ɔmɛ, 1,254; 13 Zatu binyumu ɔmɛ, 845; 14 Zakai binyumu ɔmɛ, 760; 15 Binui binyumu ɔmɛ, 648; 16 Bebai binyumu ɔmɛ, 628; 17 Azgad binyumu ɔmɛ, 2,322; 18 Adonikam binyumu ɔmɛ, 667; 19 Bigvai binyumu ɔmɛ, 2,067; 20 Adin binyumu ɔmɛ, 655; 21 Ater binyumu ɔmɛ nɛ a ji Hezekia ninahi, 98; 22 Hashum binyumu ɔmɛ, 328; 23 Bezai binyumu ɔmɛ, 324; 24 Harif binyumu ɔmɛ, 112; 25 Gibeon binyumu ɔmɛ, 95; 26 Betlehem kɛ Netofa nyumu ɔmɛ, 188; 27 Anatot nyumu ɔmɛ, 128; 28 Bet Azmavet nyumu ɔmɛ, 42; 29 Kiriat Yearim, Kefira, kɛ Beerot nyumu ɔmɛ, 743; 30 Rama kɛ Geba nyumu ɔmɛ, 621; 31 Mikmash nyumu ɔmɛ, 122; 32 Betel kɛ Ai nyumu ɔmɛ, 123; 33 Nebo kaketsɛ ɔ nyumu ɔmɛ, 52; 34 Elam kaketsɛ ɔ binyumu ɔmɛ, 1,254; 35 Harim binyumu ɔmɛ, 320; 36 Yeriko binyumu ɔmɛ, 345; 37 Lod, Hadid, kɛ Ono a binyumu ɔmɛ, 721; 38 Senaa binyumu ɔmɛ, 3,930.

39 Osɔfo ɔmɛ ji: Yedaya nɛ e je Yeshua we ɔ mi ɔ binyumu ɔmɛ, 973; 40 Imer binyumu ɔmɛ, 1,052; 41 Pashur binyumu ɔmɛ, 1,247; 42 Harim binyumu ɔmɛ, 1,017.

43 Levi bi ɔmɛ ji: Yeshua binyumu ɔmɛ nɛ a je Kadmiel weku ɔ mi, nɛ a ji Hodeva ninahi, 74. 44 Lali ɔmɛ ji: Asaf binyumu ɔmɛ, 148. 45 Agbo nya buli ɔmɛ ji: Shalum binyumu ɔmɛ, Ater binyumu ɔmɛ, Talmon binyumu ɔmɛ, Akub binyumu ɔmɛ, Hatita binyumu ɔmɛ, kɛ Shobai binyumu ɔmɛ, 138.

46 Sɔlemi we ɔ sɔmɔli ɔmɛ* ji: Ziha binyumu ɔmɛ, Hasufa binyumu ɔmɛ, Tabaot binyumu ɔmɛ, 47 Keros binyumu ɔmɛ, Sia binyumu ɔmɛ, Padon binyumu ɔmɛ, 48 Lebana binyumu ɔmɛ, Hagaba binyumu ɔmɛ, Salmai binyumu ɔmɛ, 49 Hanan binyumu ɔmɛ, Gidel binyumu ɔmɛ, Gahar binyumu ɔmɛ, 50 Reaya binyumu ɔmɛ, Rezin binyumu ɔmɛ, Nekoda binyumu ɔmɛ, 51 Gazam binyumu ɔmɛ, Uza binyumu ɔmɛ, Pasea binyumu ɔmɛ, 52 Besai binyumu ɔmɛ, Meunim binyumu ɔmɛ, Nefushesim binyumu ɔmɛ, 53 Bakbuk binyumu ɔmɛ, Hakufa binyumu ɔmɛ, Harhur binyumu ɔmɛ, 54 Bazlit binyumu ɔmɛ, Mehida binyumu ɔmɛ, Harsha binyumu ɔmɛ, 55 Barkos binyumu ɔmɛ, Sisera binyumu ɔmɛ, Temah binyumu ɔmɛ, 56 Nezia binyumu ɔmɛ, kɛ Hatifa binyumu ɔmɛ.

57 Salomo sɔmɔli ɔmɛ a binyumu ɔmɛ ji: Sotai binyumu ɔmɛ, Soferet binyumu ɔmɛ, Perida binyumu ɔmɛ, 58 Yaala binyumu ɔmɛ, Darkon binyumu ɔmɛ, Gidel binyumu ɔmɛ, 59 Shefatia binyumu ɔmɛ, Hatil binyumu ɔmɛ, Pokeret Hazebaim binyumu ɔmɛ, kɛ Amon binyumu ɔmɛ. 60 Sɔlemi we ɔ sɔmɔli ɔmɛ* tsuo, kɛ Salomo sɔmɔli ɔmɛ a binyumu ɔmɛ a yibɔ ji 392.

61 Nihi nɛ a kuɔ kɛ je Tel Mela, Tel Harsha, Kerub, Adon, kɛ Imer kɛ ho, se a nyɛ we nɛ a le a tsɛmɛ a we ɔ kɛ he nɛ a je, kaa a ji Israel bi loo a pi Israel bi ji: 62 Delaya binyumu ɔmɛ, Tobia binyumu ɔmɛ kɛ Nekoda binyumu ɔmɛ, 642. 63 Nɛ ngɛ osɔfo ɔmɛ a kpɛti ɔ: Habaya binyumu ɔmɛ, Hakoz binyumu ɔmɛ kɛ Barzilai binyumu ɔmɛ. Barzilai nɛ ɔ lɛ e ngɔ yo ngɛ Gilead no Barzilai biyi ɔmɛ a kpɛti nɛ a kɛ a biɛ wo lɛ ɔ nɛ. 64 Nimli nɛ ɔmɛ hla níhi nɛ a ngma kɛ fɔ si ngɛ a he konɛ a le a weku kpa, se a nɛ, lɔ ɔ he ɔ, a kɛ mɛ piɛɛ we osɔfo ɔmɛ* a he. 65 Amlaalo ɔ* de mɛ ke e sɛ nɛ a ye ní klɔuklɔu pe kulaa a eko, kɛ yaa si be nɛ a maa na osɔfo nɛ ma nyɛ maa ngɔ Urim kɛ Tumim kɛ hla níhi a mi.

66 Asafo ɔ tsuo yibɔ ji 42,360, 67 e slo a nyɔguɛ nyumuhi kɛ a nyɔguɛ yihi nɛ a yibɔ ji 7,337; a ngɛ nyumuhi kɛ yihi nɛ a ji lali 245 hulɔ. 68 A we okpɔngɔ ɔmɛ a yibɔ ji 736, a teji okpɔngɔ ɔmɛ a yibɔ ji 245, 69 a we afukpɔngɔ ɔmɛ a yibɔ ji 435, kɛ a teji ɔmɛ a yibɔ 6,720.

70 A tsɛmɛ a we ɔmɛ a nyatsɛmɛ ɔmɛ a ti ni komɛ ha yemi kɛ buami konɛ a kɛ tsu ní ɔ. Amlaalo* ɔ ngɔ sika tsu drakma* 1,000, tsesi 50, kɛ osɔfohi a tade klɔii 530 kɛ to juetli to he ɔ. 71 Nɛ a tsɛmɛ a we ɔmɛ a nyatsɛmɛ ɔmɛ a kpɛti ni komɛ hu ngɔ sika tsu drakma 20,000 kɛ sika hiɔ mina* 2,200 kɛ ya to ní tsumi ɔ he juetli to he ɔ. 72 Nɛ ma bi ɔmɛ nɛ a piɛ ɔ ha sika tsu drakma 20,000, sika hiɔ mina 2,000, kɛ osɔfohi a tade klɔii 67.

73 Nɛ osɔfo ɔmɛ, Levi bi ɔmɛ, agbo nya buli ɔmɛ, lali ɔmɛ, ma bi ɔmɛ a ti ni komɛ, sɔlemi we ɔ sɔmɔli ɔmɛ,* kɛ Israel bi tsuo nɛ a piɛ ɔ* hi a ma amɛ a mi. Benɛ nyɔhiɔ kpaagone ɔ ke e suu ɔ, Israel bi ɔmɛ ba hi a ma amɛ a mi.

8 Kɛkɛ nɛ ni ɔmɛ tsuo kɛ juɛmi kake bua a he nya ngɛ ma a he nya buami he ɔ ngɛ Nyu Agbo ɔ hɛ mi, nɛ a de Ezra, nɛ ji womi ngmalɔ ɔ* kaa e ngɔ Mose Mlaa womi ɔ nɛ Yehowa fã Israel bi ɔmɛ kaa a ye nɔ ɔ kɛ ba. 2 Lɔ ɔ he ɔ, osɔfo Ezra ngɔ Mlaa womi ɔ kɛ ba asafo ɔ, nɛ ji nyumuhi, yihi, kɛ nihi tsuo nɛ a ma nyɛ maa bu munyu tue nɛ a nu sisi ɔ a hɛ mi ngɛ nyɔhiɔ kpaagone ɔ we kekleekle ligbi ɔ nɔ. 3 Nɛ e wo e gbi nɔ kɛ kane womi ɔ ngɛ ma a he nya buami he ɔ ngɛ Nyu Agbo ɔ hɛ mi kɛ tsɔɔ nyumuhi, yihi, kɛ nihi tsuo nɛ a ma nyɛ maa nu sisi ɔ kɛ je mɔtu kɛ ya si piani katakata; nɛ ni ɔmɛ bu Mlaa womi ɔ mi munyu ɔmɛ tue saminya. 4 Nɛ Ezra, nɛ ji womi ngmalɔ ɔ daa si ngɛ kpoku ko nɔ. Kpoku nɛ ɔ, a kɛ tso nɛ pee kɛ ha kpe ɔ peemi; nɛ Matitia, Shema, Anaya, Uria, Hilkia, kɛ Maaseya daa si ngɛ e hiɔ nɔ; nɛ Pedaya, Mishael, Malkiya, Hashum, Hashbadana, Zakaria, kɛ Meshulam daa si ngɛ e muɔ nɔ.

5 Ezra bli womi ɔ mi, nɛ ni ɔmɛ tsuo na kɛ a hɛngmɛ, ejakaa e ya hiɔwe pe ni ɔmɛ tsuo. Benɛ e bli womi ɔ mi ɔ, ni ɔmɛ tsuo te si nɛ a da si. 6 Kɛkɛ nɛ Ezra je Yehowa, anɔkuale Mawu ɔ, nɛ ji Nɔ kpetekpleenyɛ ɔ yi, nɛ ni ɔmɛ tsuo he nɔ ke, “Amen!* Amen!” nɛ a wo a nine nɔ. Lɔ ɔ se ɔ, a kplã si, nɛ a kɛ a hɛ mi bu zugba, nɛ a ja Yehowa. 7 Nɛ Yeshua, Bani, Sherebia, Yamin, Akub, Shabetai, Hodia, Maaseya, Kelita, Azaria, Yozabad, Hanan, kɛ Pelaya nɛ a ji Levi bi ɔ ngɛ ni ɔmɛ Mlaa a sisi tsɔɔe be mi nɛ ni ɔmɛ daa si ɔ. 8 Nɛ a ya nɔ nɛ a wo a gbi nɔ kɛ kane womi ɔ, nɛ ji anɔkuale Mawu ɔ Mlaa a, nɛ a tsɔɔ sisi fitsofitso, nɛ a ha nɛ e mi tɛ̃ heii; lɔ ɔ he ɔ, a ye bua ni ɔmɛ nɛ a nu nɔ́ nɛ a ngɛ kanee ɔ sisi.

9 Nɛ Nehemia nɛ jamɛ a be ɔ mi ɔ, e ji amlaalo ɔ,* kɛ Ezra, nɛ ji osɔfo kɛ womi ngmalɔ ɔ, kɛ Levi bi ɔmɛ nɛ a ngɛ ni ɔmɛ ní tsɔɔe ɔ de ni ɔmɛ tsuo ke: “Mwɔnɛ ligbi nɛ ɔ ji ligbi klɔuklɔu kɛ ha Yehowa, nyɛ Mawu ɔ. Nyɛ ko ye aywilɛho, nɛ nyɛ ko fo ya hulɔ.” Ejakaa ni ɔmɛ tsuo ngɛ ya foe benɛ a nu Mlaa a mi munyu ɔmɛ ɔ. 10 E de mɛ ke: “Nyɛɛ ya nɛ nyɛ ya ye ní kpakpahi,* nɛ́ nyɛɛ nu ní ngɔngɔɛhi, nɛ́ nihi nɛ a be nɔ́ ko ɔ, nyɛ ya ha mɛ niye ní ɔ eko; ejakaa mwɔnɛ ligbi nɛ ɔ ji ligbi klɔuklɔu kɛ ha wa Nyɔmtsɛ ɔ, nɛ nyɛ ko pee mɔbɔmɔbɔ, ejakaa bua jɔmi nɛ Yehowa haa nyɛ ɔ ji nyɛ mɔ nɛ he wa.”* 11 Nɛ Levi bi ɔmɛ ngɛ ni ɔmɛ tsuo a bua woe, nɛ a ngɛ mɛ dee ke: “Nyɛɛ pee dii! ejakaa mwɔnɛ ligbi nɛ ɔ ji ligbi klɔuklɔu, nɛ nyɛ ko pee mɔbɔmɔbɔ.” 12 Lɔ ɔ he ɔ, ni ɔmɛ tsuo je kɛ ho nɛ a ya ye ní, nɛ a nu ní, nɛ a ya ha nihi niye ní ɔ eko, nɛ a nya wawɛɛ nitsɛ, ejakaa a nu munyuhi nɛ a tsɔɔ mɛ ɔ sisi.

13 Nɛ ligbi enyɔne ɔ nɔ ɔ, ni ɔmɛ tsuo a tsɛmɛ a we ɔmɛ a nyatsɛmɛ ɔmɛ, osɔfo ɔmɛ, kɛ Levi bi ɔmɛ ba bua a he nya kɛ bɔle Ezra, nɛ ji womi ngmalɔ ɔ, konɛ a nu Mlaa a mi munyu ɔmɛ a sisi saminya. 14 Kɛkɛ nɛ a na kaa a ngma ngɛ Mlaa a mi kaa Yehowa gu Mose nɔ kɛ fã Israel bi ɔmɛ kaa a hi gbahi a sisi ke a ngɛ gbijlɔ ɔ yee ngɛ nyɔhiɔ kpaagone ɔ mi, 15 nɛ́ a fia adafi kɛ kpa a ma amɛ tsuo a mi kɛ Yerusalem tsuo ke: “Nyɛɛ ya yoku ɔmɛ a nɔ nɛ nyɛ ya ngɔ oliv tso kɔnihi kɛ a he bahi, nu tso kɔnihi kɛ a he bahi, mɔmɔ tso kɔnihi kɛ a he bahi, tã kɔnihi,* kɛ tso kpahi a kɔnihi kɛ a he bahi kɛ ba nɛ a kɛ ba pee gbahi kaa bɔ nɛ a ngma a.”

16 Lɔ ɔ he ɔ, ni ɔmɛ je kpo kɛ ho, nɛ a ya ngɔ tso kɔni ɔmɛ kɛ ba, nɛ a kɛ ba pee gba amɛ kɛ ha a he ngɛ a ti nɔ fɛɛ nɔ tsu yi mi, a yalehi a mi, anɔkuale Mawu ɔ we ɔ yale ɔmɛ a mi, ma a he nya buami he ɔ nɛ ngɛ Nyu Agbo ɔ hɛ mi ɔ, kɛ ma a he nya buami he ɔ nɛ ngɛ Efraim Agbo ɔ hɛ mi ɔ. 17 Lɔ ɔ he ɔ, asafo ɔ tsuo nɛ a kpale kɛ je nyɔguɛ tso mi kɛ ba a ma gbahi, nɛ a hi gba amɛ a sisi, ejakaa Israel bi ɔmɛ yi gbijlɔ ɔ kaa kikɛ nɛ ɔ hyɛ kɛ je Nun binyumu Yoshua be ɔ mi hluu kɛ ba si jamɛ a ligbi ɔ, lɔ ɔ he ɔ, a nya wawɛɛ nitsɛ. 18 Nɛ kɛ je kekleekle ligbi ɔ nɔ kɛ ya si nyagbe ligbi ɔ nɔ ɔ, a kaneɔ anɔkuale Mawu ɔ Mlaa womi ɔ daa ligbi. Nɛ a ye gbijlɔ ɔ ligbi kpaago, nɛ ngɛ ligbi kpaanyɔne ɔ nɔ ɔ, a pee kpe klɛdɛɛ ko kaa bɔ nɛ e biɔ nɛ a pee ɔ.

9 Ngɛ nyɔhiɔ nɛ ɔ we ligbi nɛ ji 24 ɔ nɔ ɔ, Israel bi ɔmɛ bua a he nya; a ha hwɔ kɛ a he kpekpe kɛ a he zu. 2 Kɛkɛ nɛ nihi nɛ a ji Israel bi tutuutu ɔ tsɔ a he ngɛ nibwɔ ɔmɛ tsuo a he, nɛ a da si nɛ a jaje mɛ nitsɛmɛ a he yayami ɔmɛ kɛ a tsɛmɛ ɔmɛ a tɔmi ɔmɛ. 3 Nɛ a te si nɛ a da si ngɛ he nɛ a ngɛ ɔ, nɛ a wo a gbi nɔ kɛ kane Yehowa a Mawu ɔ Mlaa womi ɔ ngmlɛfia etɛ;* nɛ a kɛ ngmlɛfia etɛ hu jaje a he yayami ɔmɛ nɛ a kplã si nɛ a kɛ a hɛ mi bu si ha Yehowa a Mawu ɔ.

4 Yeshua, Bani, Kadmiel, Shebania, Buni, Sherebia, Bani, kɛ Kenani da si ngɛ Levi bi ɔmɛ a kpoku nɛ ya hiɔwe ɔ nɔ, nɛ a wo a gbi nɔ nɛ a kpa ngmlaa kɛ tsɛ Yehowa a Mawu ɔ. 5 Nɛ Levi bi ɔmɛ nɛ ji Yeshua, Kadmiel, Bani, Hashabneya, Sherebia, Hodia, Shebania, kɛ Petahia de ke: “Nyɛɛ te si kɛ da si nɛ nyɛ je Yehowa nyɛ Mawu ɔ yi kɛ je neneene kɛ ya neneene. Nɛ ha nɛ a je o biɛ nɛ hɛ mi ngɛ nyami nɛ́ a wo nɔ kɛ be jɔɔmi kɛ yi jemi tsuo he ɔ yi.

6 “Mo pɛ ji Yehowa; mo lɛ o bɔ hiɔwe ɔmɛ, ee, hiɔwe ɔmɛ a mi hiɔwe ɔ kɛ a tabo ɔ tsuo, kɛ zugba a kɛ níhi tsuo nɛ ngɛ nɔ ɔ, kɛ wo ɔ kɛ níhi tsuo nɛ ngɛ mi ɔ. Nɛ mo lɛ o ha nɛ mɛ tsuo a ngɛ wami mi, nɛ hiɔwe tabo ɔ kplãã si kɛ haa mo. 7 Mo ji Yehowa, anɔkuale Mawu ɔ, mo nɛ o hla Abram nɛ o ngɔ lɛ kɛ je Ur, ngɛ Kaldea bi ɔmɛ a zugba a nɔ, nɛ o ha lɛ biɛ nɛ ji Abraham ɔ nɛ. 8 O na kaa e je e tsui mi nɛ e ye anɔkuale ngɛ o hɛ mi, lɔ ɔ he ɔ, o kɛ lɛ so somi ko kaa o maa ngɔ Kanaan bi, Hit bi, Amor bi, Periz bi, Yebus bi, kɛ Girgash bi ɔmɛ a zugba a kɛ ha lɛ kɛ e nina;* nɛ o ye o si womi ɔmɛ a nɔ, ejakaa dalɔ ji mo.

9 “Benɛ wa nɛmɛ ɔmɛ ngɛ Egipt ɔ, o na a nɔ́ nami ɔ, nɛ o nu ngmlaa nɛ a kpa ngɛ Wo Tsu ɔ he ɔ. 10 Nɛ o pee okadihi kɛ nyakpɛ níhi kɛ si Farao, kɛ e sɔmɔli ɔmɛ tsuo, kɛ nihi tsuo nɛ a ngɛ e zugba a nɔ ɔ, ejakaa o le kaa a wo a he nɔ ngɛ o we bi ɔmɛ a nɔ. O ná biɛ kɛ ha o he nɛ e ngɛ kɛ ba si mwɔnɛ ligbi nɛ ɔ. 11 O gba wo ɔ mi ngɛ a hɛ mi, nɛ a nyɛɛ zugba gbigbli nɔ kɛ po wo ɔ, nɛ o sake nihi nɛ a fiee a se ɔ kɛ wo nyu ɔ sisi kaa tɛ nɛ a fɔ kɛ fɔ nyu nɛ pee hamahama mi. 12 Ke je na a, o ngɔɔ bɔku titima kɛ nyɛɛɔ a hɛ mi, nɛ ke je jɔ ɔ, o ngɔɔ la titima kɛ nyɛɛɔ a hɛ mi konɛ e kpɛ ha mɛ ngɛ blɔ nɛ e sa kaa a gu nɔ ɔ nɔ. 13 Nɛ o kple si kɛ ba Sinai Yoku ɔ nɔ, nɛ o kɛ mɛ tu munyu kɛ je hiɔwe, nɛ o kɛ famihi nɛ a da ha mɛ, o ha mɛ anɔkuale mlaahi,* blɔ tsɔɔmi kpakpahi, kɛ kita kpakpahi. 14 O ha nɛ a le o Hejɔɔmi Ligbi klɔuklɔu ɔ, nɛ o gu o sɔmɔlɔ Mose nɔ kɛ ha mɛ kitahi, blɔ tsɔɔmihi, kɛ mlaahi. 15 Benɛ hwɔ ye mɛ ɔ, o ha mɛ abolo kɛ je hiɔwe, nɛ benɛ kuma ye mɛ ɔ, o ha mɛ nyu kɛ je tɛ sa mi, nɛ o de mɛ ke a ya zugba a nɛ o kã kita* kaa o kɛ ma ha mɛ ɔ nɔ konɛ a ya ngɔ.

16 “Se wa nɛmɛ ɔmɛ wo a he nɔ, nɛ a pee a he nihi nɛ a tue mi ti,* nɛ a bui o kita amɛ tue. 17 A bui mo tue, nɛ a kai we o nyakpɛ ní nguanguahi nɛ o pee ngɛ a kpɛti ɔ, mohu ɔ, a tue mi ti,* nɛ a hla nɔ ko nɛ́ e pee a nyatsɛ konɛ a kpale kɛ ho a nyɔguɛ tso ɔ mi ya ngɛ Egipt. Se o ji Mawu nɛ pee klaalo kaa e kɛ yayami maa ke, o ji mɔbɔ nalɔ kɛ nɔ nɛ e mi mi sãa lɛ,* o mi mi fu we mla, nɛ o suɔmi nɛ se pui ɔ hiɛ babauu, nɛ o kua we mɛ. 18 Benɛ a pee na bi dade amaga a kɛ ha a he nɛ a de ke, ‘Nyɛ Mawu ɔ nɛ e nyɛɛ nyɛ hɛ mi kɛ je Egipt ɔ ji nɛ ɔ nɛ,’ nɛ́ a pee nɔ buimi ní nguanguahi po ɔ, 19 jamɛ a be ɔ mi po o kua we mɛ ngɛ nga a nɔ, akɛnɛ o mɔbɔ nami ɔ hiɛ babauu ɔ he je. Bɔku titima a nɛ nyɛɛɔ a hɛ mi ke je na a ji a nɔ, nɛ la titima a nɛ kpɛɔ haa mɛ ngɛ blɔ nɛ e sa kaa a nyɛɛ nɔ ɔ nɔ ɔ hu ji a nɔ. 20 Nɛ o ngɔ o mumi kpakpa a kɛ ha mɛ konɛ a kɔ nɔ́ se, nɛ o ha we nɛ o mana a nɛ bɔ mɛ, nɛ o ha mɛ nyu benɛ kuma ye mɛ ɔ. 21 O ha mɛ niye ní ngɛ nga a nɔ jeha 40 sɔuu. Nɔ́ ko nɔ́ ko he hia we mɛ. A tade ɔmɛ pee we momo, nɛ a nanewɛɛhi hu fuu we.

22 “O ha mɛ matsɛ yemihi kɛ mahi, nɛ o gba zugba amɛ bɔɔbɔɔbɔɔ, nɛ a ngɔ Sihon zugba a, nɛ ji Heshbon matsɛ ɔ zugba a, kɛ Bashan Matsɛ Og zugba a hulɔ. 23 Nɛ o ha nɛ a binyumu ɔmɛ hiɛ babauu kaa hiɔwe dodoehi. Nɛ o ngɔ mɛ kɛ ba zugba a nɛ o de a nɛmɛ ɔmɛ ke* a ya nɛ a ya ngɔ ɔ nɔ. 24 Lɔ ɔ he ɔ, a binyumu ɔmɛ ya nɛ a ya ngɔ zugba a, nɛ o ba Kanaan bi, nɛ ji nihi nɛ a ngɛ zugba a nɔ ɔ si ngɛ a hɛ mi, nɛ o ngɔ a matsɛmɛ ɔmɛ kɛ zugba a nɔ bi ɔmɛ kɛ wo a dɛ mi, konɛ a pee mɛ nɔ́ nɛ a suɔ. 25 Nɛ a ngɔ mahi nɛ a fia gbogbo wo a he kɛ zugba nɛ baa ní ɔ, nɛ a ngɔ wehi nɛ a hyi tɔ kɛ ní kpakpa slɔɔtohi tsuo, nyu vuhi nɛ a tsua momo, wai ngmɔhi, oliv ngmɔhi, kɛ tsohi babauu nɛ a woɔ yiblii. Lɔ ɔ he ɔ, a ye ní nɛ a tɔ nɛ a plɔke, nɛ a bua jɔ ngɛ o kpakpa peemi babauu ɔ he je.

26 “Se a gbo tue, nɛ a tsɔ o hɛ mi atuã, nɛ a plɛ a se kɛ wo o Mlaa a.* Nɛ a gbe o gbali ɔmɛ nɛ́ a bɔ mɛ kɔkɔ konɛ a kpale kɛ ba o ngɔ ɔ, nɛ a pee nɔ buimi ní nguanguahi. 27 Enɛ ɔ he je ɔ, o ngɔ mɛ kɛ wo a he nyɛli ɔmɛ a dɛ mi, nɛ a ya nɔ nɛ a hao mɛ. Se ngɛ a haomi behi a mi ɔ, a kpaa ngmlaa kɛ tsɛɔ mo, nɛ o nuɔ ngɛ hiɔwe; nɛ ngɛ o mɔbɔ nami babauu ɔ nya a, o jeɔ yi wami heli kɛ haa mɛ konɛ a kpɔ̃ mɛ kɛ je a he nyɛli ɔmɛ a dɛ mi.

28 “Se ke a he mi jɔ mɛ pɛ ɔ, a peeɔ ní yayamihi ngɛ o hɛ mi ekohu, nɛ o ngɔɔ mɛ kɛ woɔ a he nyɛli ɔmɛ a dɛ mi nɛ a yeɔ a nɔ.* Kɛkɛ ɔ, a kpaleɔ kɛ baa nɛ a ba tsɛɔ mo kaa o ye bua mɛ, nɛ o nuɔ ngɛ hiɔwe, nɛ ngɛ o mɔbɔ nami babauu ɔ nya a, o kpɔ̃ mɛ si abɔ. 29 E ngɛ mi kaa o bɔɔ mɛ kɔkɔ konɛ o kɛ kpale mɛ kɛ ba o Mlaa a he mohu lɛɛ, se a woɔ a he nɔ, nɛ a bui o kita amɛ tue; nɛ a pee yayami ejakaa a yi o blɔ tsɔɔmihi nɛ́ ke adesa ye nɔ ɔ, e maa hi wami mi ɔ nɔ. Mohu ɔ, a kplii a tsui nɛ a plɛ a se, nɛ a tue mi ti, nɛ a bui tue. 30 O to o tsui si ha mɛ jehahi babauu, nɛ o ya nɔ nɛ o kɛ o mumi ɔ ye bua o gbali ɔmɛ nɛ a bɔ mɛ kɔkɔ, se a bui tue. Nyagbenyagbe ɔ, o ngɔ mɛ kɛ wo zugba amɛ a nɔ bi ɔmɛ a dɛ mi. 31 Nɛ ngɛ o mɔbɔ nami babauu ɔ nya a, o kpataa we a hɛ mi, nɛ o kua we mɛ hulɔ, ejakaa o ji Mawu mɔbɔ nalɔ nɛ e mi mi sãa lɛ.*

32 “Nɛ jehanɛ ɔ, Oo wa Mawu, Mawu kpetekpleenyɛ nɛ e he wa, nɛ e he ngɛ gbeye, nɛ e yeɔ e somi nɔ, nɛ e jeɔ suɔmi nɛ se pui kpo, koo bu haomihi tsuo nɛ ba waa kɛ wa matsɛmɛ ɔmɛ, wa ma nikɔtɔma amɛ, wa we osɔfo ɔmɛ, wa gbali ɔmɛ, wa nɛmɛ ɔmɛ, kɛ o we bi ɔmɛ tsuo a nɔ kɛ je Asiria matsɛmɛ ɔmɛ a be ɔ mi kɛ ba si mwɔnɛ ligbi nɛ ɔ kaa nɔ́ ko nyafii. 33 O nɔ́ da ngɛ níhi tsuo nɛ ba wa nɔ ɔ blɔ fa mi, ejakaa o ye anɔkuale; se wɔ nɛ wa pee yayami. 34 Nɛ wa matsɛmɛ ɔmɛ, wa ma nikɔtɔma amɛ, wa we osɔfo ɔmɛ, kɛ wa nɛmɛ ɔmɛ lɛɛ, a yi o Mlaa a nɔ, nɛ a bui o kita amɛ kɛ o kaimi* ɔmɛ nɛ o kɛ bɔ mɛ kɔkɔ ɔ hu tue. 35 Benɛ a ngɛ a matsɛ yemi ɔ mi nɛ́ a ngɛ ní kpakpahi fuu nɛ o ha mɛ ɔ mi ngɔɔmi yee, nɛ́ a ngɛ zugba nɛ kle nɛ baa ní nɛ o kɛ ha mɛ ɔ nɔ po ɔ, a sɔmɔ we mo, nɛ a kpale we kɛ ji a ní yayami ɔmɛ a se. 36 Lɔ ɔ he ɔ, o ba nɛ wɔ mwɔnɛ ɔ, wa ji nyɔguɛhi, ee, nyɔguɛhi ngɛ zugba nɛ o kɛ ha wa nɛmɛ ɔmɛ kaa a ye nɔ niba ní kɛ e nɔ ní kpakpahi ɔ nɔ. 37 Wa yayami ɔmɛ a he je ɔ, e nɔ niba ní babauu ɔ peeɔ matsɛmɛ nɛ o kɛ mɛ da wa nya a a nɔ. A yeɔ wa nɔ,* nɛ a yeɔ wa lohwe lɛlɛɛ ɔmɛ a nɔ bɔ nɛ a suɔ, nɛ wa ngɛ nɔ́ nae wawɛɛ nitsɛ.

38 “Enɛ ɔmɛ tsuo a he je ɔ, wa ngɛ somi ko nɛ a ji se soe, nɛ a ngma kɛ wo womi mi, nɛ wa ma nikɔtɔma amɛ, Levi bi ɔmɛ, kɛ wa we osɔfo ɔmɛ sɔu nya kɛ ma nɔ mi.”

10 Ni nɛmɛ nɛ a sɔu somi ɔ nya kɛ ma nɔ mi ɔ ji nɛ ɔmɛ nɛ:

9 Jehanɛ hu ɔ, Levi bi ɔmɛ: Yeshua, nɛ ji Azania binyumu ɔ, Binui nɛ e je Henadad binyumu ɔmɛ a kpɛti ɔ, Kadmiel, 10 kɛ a nyɛminyumuhi nɛ ji Shebania, Hodia, Kelita, Pelaya, Hanan, 11 Mika, Rehob, Hashabia, 12 Zakur, Sherebia, Shebania, 13 Hodia, Bani, kɛ Beninu.

14 Ni ɔmɛ a nyatsɛmɛ ɔmɛ ji: Parosh, Pahat Moab, Elam, Zatu, Bani, 15 Buni, Azgad, Bebai, 16 Adoniya, Bigvai, Adin, 17 Ater, Hezekia, Azur, 18 Hodia, Hashum, Bezai, 19 Harif, Anatot, Nebai, 20 Magpiash, Meshulam, Hezir, 21 Meshezabel, Zadok, Yadua, 22 Pelatia, Hanan, Anaya, 23 Hoshea, Hanania, Hashub, 24 Halohesh, Pilha, Shobek, 25 Rehum, Hashabna, Maaseya, 26 Ahia, Hanan, Anan, 27 Maluk, Harim, kɛ Baana.

28 Nihi nɛ a piɛ ɔ—osɔfo ɔmɛ, Levi bi ɔmɛ, agbo nya buli ɔmɛ, lali ɔmɛ, sɔlemi we ɔ sɔmɔli ɔmɛ,* kɛ nɔ fɛɛ nɔ nɛ e tsɔ e he kɛ je zugba amɛ a nɔ bi ɔmɛ a he nɛ e ba nyɛɛ anɔkuale Mawu ɔ Mlaa a se ɔ, kɛ a yi ɔmɛ, a binyumu ɔmɛ kɛ a biyi ɔmɛ, kɛ nihi tsuo nɛ a ngɛ nile kɛ nɔ́ sisi numi ɔ,* 29 ba piɛɛ a nyɛminyumu ɔmɛ, nɛ ji nyumuhi nɛ a he biɛ ɔ a he, nɛ a ngɔ gbiɛmi kɛ kita kami kɛ fĩ a he kaa a maa nyɛɛ ngɛ anɔkuale Mawu ɔ Mlaa a nɛ a kɛ ha kɛ gu anɔkuale Mawu ɔ sɔmɔlɔ Mose nɔ ɔ nya, nɛ a maa ye Yehowa, wa Nyɔmtsɛ ɔ kita amɛ, e kojomi ɔmɛ, kɛ e blɔ tsɔɔmi ɔmɛ a nɔ sisiisi. 30 Nɛ waa kɛ wa biyi ɔmɛ be zugba a nɔ bi ɔmɛ hae, nɛ wa be a biyi ɔmɛ hu ngɔe kɛ ha wa binyumu ɔmɛ.

31 Ke zugba a nɔ bi ɔmɛ ngɔ a tlomihi kɛ ngma slɔɔtohi tsuo kɛ ba konɛ a ba jua ngɛ Hejɔɔmi Ligbi ɔ nɔ ɔ, wa be nɔ́ ko nɔ́ ko hee ngɛ a dɛ ngɛ Hejɔɔmi Ligbi aloo ligbi klɔuklɔu ko nɔ. Jehanɛ hu ɔ, wa ma ha nɛ zugba a maa jɔɔ e he ngɛ jeha kpaagone ɔ mi, nɛ hiɔhi nɛ nihi hɛɛ wɔ ɔ tsuo waa kɛ maa ke.

32 Jehanɛ hu ɔ, wa ngɔ kɛ fɔ wɔ nitsɛmɛ wa nɔ kaa wa ti nɔ fɛɛ nɔ ma ha shekel* mi dlami etɛ mi kake daa jeha kɛ ha wa Mawu ɔ we* ɔ sɔmɔmi ní tsumi ɔ, 33 kɛ ha abolo nɛ a toɔ ɔ,* ngma afɔle nɛ a sãã daa a, sami afɔle nɛ a sãã daa ngɛ Hejɔɔmi ligbi ɔmɛ kɛ nyɔhiɔ ehe ɔmɛ a nɔ ɔ, kɛ ha nyami behi nɛ a to ɔ, kɛ ha ní klɔuklɔu ɔmɛ, kɛ ha yayami afɔlehi nɛ a sãã kɛ kpataa ha Israel ɔ, jehanɛ hu ɔ, kɛ ha wa Mawu ɔ we ɔ ní tsumihi tsuo.

34 Jehanɛ hu ɔ, wa fɔ sɔ ngɛ lɛ́ nɛ e sa kaa osɔfo ɔmɛ, Levi bi ɔmɛ, kɛ ma mi bi ɔmɛ nɛ́ a ngɔ kɛ ba wa Mawu ɔ we ɔ ngɛ wa tsɛmɛ a we ɔmɛ a nya a he, ngɛ behi nɛ a to ɔ mi daa jeha, konɛ a kɛ slɛ la ngɛ Yehowa wa Mawu ɔ afɔle sami la tɛ ɔ nɔ kaa bɔ nɛ a ngma ngɛ Mlaa a mi ɔ. 35 Wa maa ngɔ wa zugba a nɔ kekleekle yiblii, kɛ tso slɔɔtohi tsuo nɛ a woɔ yiblii ɔ a kekleekle yiblii ɔ hu kɛ ba Yehowa we ɔ daa jeha, 36 nɛ wa maa ngɔ wa kekleekle binyumu ɔmɛ, kɛ wa lohwe lɛlɛɛ ɔmɛ a kekleekle bi ɔmɛ—kaa bɔ nɛ a ngma ngɛ Mlaa a mi ɔ—kɛ wa na amɛ kɛ wa to ɔmɛ a kekleekle bi ɔmɛ kɛ ba. Wa maa ngɔ mɛ kɛ ba wa Mawu ɔ we ɔ, konɛ wa kɛ ba ha osɔfo ɔmɛ nɛ a sɔmɔɔ ngɛ wa Mawu ɔ we ɔ. 37 Jehanɛ hu ɔ, wa maa ngɔ wa kekleekle ngma nɛ a wɛɛ nɛ e bua we, wa yemi kɛ buamihi, tso slɔɔtohi tsuo a nɔ yiblii, wai ehe, kɛ nu kɛ ba ha osɔfo ɔmɛ konɛ a kɛ to wa Mawu ɔ we ɔ nito he tsu ɔmɛ a mi,* nɛ wa maa ngɔ wa zugba a nɔ niba ní mi dlami nyɔngmanyɔngma mi kakaaka hu kɛ ba ha Levi bi ɔmɛ, ejakaa Levi bi ɔmɛ ji nihi nɛ a ngɔɔ mi dlami nyɔngmanyɔngma mi kakaaka a ngɛ wa ma amɛ tsuo nɛ a peeɔ ngmɔ nɛ a lɛɔ lohwehi ngɛ a mi ɔ mi.

38 Nɛ ke Levi bi ɔmɛ ngɛ mi dlami nyɔngmanyɔngma mi kakaaka a ngɔe ɔ, e sa nɛ osɔfo ɔ, nɛ ji Aaron binyumu ɔ nɛ e piɛɛ Levi bi ɔmɛ a he; nɛ e sa nɛ Levi bi ɔmɛ hu nɛ a ngɔ mi dlami nyɔngmanyɔngma mi kakaaka a mi mi dlami nyɔngma mi kake kɛ ba wa Mawu ɔ we ɔ, konɛ a ngɔ kɛ to tsu ɔmɛ a mi* ngɛ nito he ɔ. 39 Ejakaa nito he tsu ɔmɛ a mi* ji hehi nɛ e sa kaa Israel bi ɔmɛ, kɛ Levi bi ɔmɛ a binyumu ɔmɛ nɛ a ngɔ ngma a, wai ehe ɔ, kɛ nu ɔ nɛ a kɛ ba ye bua a kɛ ba, nɛ lejɛ ɔ ji he nɛ jami he ɔ ní ɔmɛ ngɛ, nɛ osɔfo ɔmɛ nɛ a sɔmɔɔ ɔ, agbo nya buli ɔmɛ, kɛ lali ɔmɛ hu ngɛ lejɛ ɔ. Wa be wa Mawu ɔ we ɔ kuae.

11 Jamɛ a be ɔ mi ɔ, ma nikɔtɔma amɛ ngɛ Yerusalem; se nihi nɛ piɛ ɔ fɔ sɔ konɛ a ngɔ nɔ kake ngɛ nimli nyɔngma fɛɛ nimli nyɔngma a kpɛti nɛ́ e ba hi Yerusalem nɛ ji ma klɔuklɔu ɔ mi, konɛ nimli nɛɛ nɛ piɛ ɔ nɛ a hi ma kpa amɛ a mi. 2 Jehanɛ hu ɔ, ni ɔmɛ jɔɔ nyumuhi tsuo nɛ a ngɔ a he kɛ ha faa kaa a maa hi Yerusalem ɔ.

3 Kpokpa a nɔ nikɔtɔmahi nɛ a hi Yerusalem ɔ ji nɛ ɔmɛ nɛ. (Israel bi nɛ piɛ ɔ, osɔfo ɔmɛ, Levi bi ɔmɛ, sɔlemi we ɔ sɔmɔli ɔmɛ,* kɛ Salomo sɔmɔli ɔmɛ a binyumu ɔmɛ hi Yuda ma kpa amɛ a mi, a ti nɔ fɛɛ nɔ hi lɛ nitsɛ e zugba nɔ ngɛ e ma mi.

4 Yuda bi ɔmɛ kɛ Benyamin bi ɔmɛ a kpɛti ni komɛ hu hi Yerusalem.) Ngɛ Yuda bi ɔmɛ a kpɛti ɔ, Ataya, Ataya tsɛ ji Uziah, Uziah tsɛ ji Zakaria, Zakaria tsɛ ji Amaria, Amaria tsɛ ji Shefatia, Shefatia tsɛ ji Mahalalel nɛ je Perez binyumu ɔmɛ a kpɛti ɔ, 5 kɛ Maaseya, Maaseya tsɛ ji Baruk, Baruk tsɛ ji Kolhoze, Kolhoze tsɛ ji Hazaya, Hazaya tsɛ ji Adaya, Adaya tsɛ ji Yoyarib, Yoyarib tsɛ ji Zakaria, Shela no ɔ binyumu ɔ. 6 Perez binyumu ɔmɛ tsuo nɛ a ngɛ Yerusalem ɔ a yibɔ ji 468, nɛ a ji nyumuhi katsɛmɛ.

7 Nɛ Benyamin bi ɔmɛ ji nɛ ɔmɛ nɛ: Sallu, Sallu tsɛ ji Meshulam, Meshulam tsɛ ji Yoed, Yoed tsɛ ji Pedaya, Pedaya tsɛ ji Kolaya, Kolaya tsɛ ji Maaseya, Maaseya tsɛ ji Itiel, Itiel tsɛ ji Yeshaya, 8 nɛ ngɛ e se ɔ, Gabai kɛ Salai, 928; 9 nɛ Zikri binyumu Yoel ji a nɔ hyɛlɔ, nɛ Hasenua binyumu Yuda ji ma nɔ hyɛlɔ ɔ se yelɔ.

10 Ngɛ osɔfo ɔmɛ a kpɛti ɔ: Yedaya, Yoyarib binyumu ɔ, Yakin, 11 kɛ Seraya, Seraya tsɛ ji Hilkia, Hilkia tsɛ ji Meshulam, Meshulam tsɛ ji Zadok, Zadok tsɛ ji Merayot, Merayot tsɛ ji Ahitub, e ji anɔkuale Mawu ɔ we* ɔ hɛ mi nyɛɛlɔ, 12 kɛ a nyɛminyumu ɔmɛ nɛ a tsu we ɔ he ní ɔ, 822; kɛ Adaya, Adaya tsɛ ji Yeroham, Yeroham tsɛ ji Pelalia, Pelalia tsɛ ji Amzi, Amzi tsɛ ji Zakaria, Zakaria tsɛ ji Pashur, Pashur tsɛ ji Malkiya, 13 kɛ e nyɛminyumu ɔmɛ, a tsɛmɛ a we ɔmɛ a nyatsɛmɛ ɔmɛ, 242; kɛ Amashsai, Amashsai tsɛ ji Azarel, Azarel tsɛ ji Azai, Azai tsɛ ji Meshilemot, Meshilemot tsɛ ji Imer, 14 kɛ a nyɛminyumu ɔmɛ nɛ a he wa, nɛ́ a ji nyumu katsɛmɛ, 128; nɛ Zabdiel nɛ e je weku ko nɛ he biɛ mi ɔ ji a nɔ hyɛlɔ.

15 Nɛ ngɛ Levi bi ɔmɛ a kpɛti ɔ: Shemaya, Shemaya tsɛ ji Hashub, Hashub tsɛ ji Azrikam, Azrikam tsɛ ji Hashabia, Hashabia tsɛ ji Buni, 16 kɛ Shabetai kɛ Yozabad, a je Levi bi ɔmɛ a nyatsɛmɛ ɔmɛ a kpɛti, nɛ a hyɛɛ anɔkuale Mawu ɔ we ɔ kpo nɔ blɔ ní tsumi ɔ nɔ; 17 kɛ Matania, Matania tsɛ ji Mika, Mika tsɛ ji Zabdi, Zabdi tsɛ ji Asaf, e ji la nɔ hyɛlɔ, nɔ nɛ e nyɛɛɔ a hɛ mi kɛ la a yi jemi lahi ke a ngɛ sɔlee, kɛ Bakbukia, nɛ ji nɔ enyɔne ngɛ e nyɛminyumu ɔmɛ a kpɛti ɔ, kɛ Abda, Abda tsɛ ji Shamua, Shamua tsɛ ji Galal, nɛ Galal tsɛ ji Yedutun. 18 Levi bi tsuo nɛ a ngɛ ma klɔuklɔu ɔ mi ɔ a yibɔ ji 284.

19 Nɛ agbo nya buli ɔmɛ ji Akub, Talmon, kɛ a nyɛminyumu ɔmɛ nɛ a buɔ agbo ɔmɛ a nya a, 172.

20 Israel bi, osɔfo ɔmɛ, kɛ Levi bi nɛ piɛ ɔ ngɛ Yuda ma kpa amɛ tsuo a mi, nɔ fɛɛ nɔ ngɛ lɛ nitsɛ e zugba nɛ e nine su nɔ kaa gbosi ní ɔ nɔ. 21 Sɔlemi we ɔ sɔmɔli ɔmɛ* ngɛ Ofel, nɛ Ziha kɛ Gishpa lɛ a hyɛɛ sɔlemi we ɔ sɔmɔli ɔmɛ* a nɔ.

22 Levi bi nɛ a ngɛ Yerusalem ɔ a nɔ hyɛlɔ ji Uzi, Uzi tsɛ ji Bani, Bani tsɛ ji Hashabia, Hashabia tsɛ ji Matania, Matania tsɛ ji Mika, e je Asaf binyumu ɔmɛ, nɛ ji lali ɔmɛ a kpɛti; lɛ ji nɔ nɛ hyɛɛ anɔkuale Mawu ɔ we ɔ ní tsumi ɔ nɔ. 23 Matsɛ ɔ kɛ fami ko ha ngɛ a he, nɛ a to blɔ nya kaa a ha lali ɔmɛ níhi nɛ e sa nɛ a ha mɛ ɔ daa ligbi. 24 Nɛ Meshezabel binyumu Petahia, nɛ e je Yuda binyumu Zera binyumu ɔmɛ a kpɛti ɔ ji matsɛ ɔ ga wolɔ* ngɛ sane fɛɛ sane nɛ kɔɔ ma mi bi ɔmɛ a he ɔ mi.

25 Ngɛ a hi he ɔmɛ kɛ a he zugba amɛ a blɔ fa mi ɔ, Yuda bi ɔmɛ a kpɛti ni komɛ hi Kiriat Arba kɛ mahi nɛ bɔle lɛ* ɔ a mi, Dibon kɛ mahi nɛ bɔle lɛ ɔ a mi, Yekabzeel kɛ kɔpehi nɛ bɔle lɛ ɔ a mi, 26 Yeshua, Molada, Betpelet, 27 Hazarshual, Beersheba kɛ mahi nɛ bɔle lɛ* ɔ a mi, 28 Ziklag, Mekona kɛ mahi nɛ bɔle lɛ* ɔ a mi, 29 Enrimon, Zora, Yarmut, 30 Zanoa, Adulam kɛ kɔpehi nɛ bɔle mɛ ɔ a mi, Lakish kɛ zugbahi nɛ bɔle lɛ ɔ a nɔ, kɛ Azeka kɛ mahi nɛ bɔle lɛ* ɔ a mi. A hi* kɛ je Beersheba hluu kɛ ya si Hinom Dɔgba a mi.

31 Nɛ Benyamin bi ɔmɛ hi Geba, Mikmash, Aiya, Betel kɛ mahi nɛ bɔle lɛ* ɔ a mi, 32 Anatot, Nob, Ananiya, 33 Hazor, Rama, Gitaim, 34 Hadid, Zeboim, Nebalat, 35 Lod, kɛ Ono, ga ní tsuli ɔmɛ a dɔgba a mi. 36 Nɛ a ha nɛ Levi bi a kuu komɛ nɛ a ngɛ Yuda a ya hi Benyamin.

12 Ni nɛ ɔmɛ ji osɔfohi kɛ Levi bi nɛ a kɛ Zerubabel, nɛ ji Shealtiel binyumu ɔ, kɛ Yeshua kuɔ kɛ ba: Seraya, Yeremia, Ezra, 2 Amaria, Maluk, Hatush, 3 Shekania, Rehum, Meremot, 4 Ido, Ginetoi, Abiya, 5 Miyamin, Maadia, Bilga, 6 Shemaya, Yoyarib, Yedaya, 7 Sallu, Amok, Hilkia, kɛ Yedaya. Ni nɛ ɔmɛ ji osɔfo ɔmɛ a nyatsɛmɛ kɛ a nyɛminyumuhi ngɛ Yeshua ligbi ɔmɛ a mi.

8 Levi bi ɔmɛ ji Yeshua, Binui, Kadmiel, Sherebia, Yuda, kɛ Matania, nɔ nɛ e kɛ e nyɛminyumu ɔmɛ nyɛɛɔ hɛ mi kɛ laa sina la amɛ ɔ. 9 Nɛ Bakbukia kɛ Unni, nɛ a ji a nyɛminyumu ɔmɛ da a hɛ mi kɛ hwɔɔ.* 10 Yeshua fɔ Yoyakim, nɛ Yoyakim fɔ Eliashib, nɛ Eliashib fɔ Yoyada. 11 Nɛ Yoyada fɔ Yonatan, nɛ Yonatan fɔ Yadua.

12 Ngɛ Yoyakim be ɔ mi ɔ, ni nɛ ɔmɛ ji osɔfo ɔmɛ, a tsɛmɛ a we ɔmɛ a nyatsɛmɛ ɔmɛ: Seraya weku ɔ, Meraya; Yeremia weku ɔ, Hanania; 13 Ezra weku ɔ, Meshulam; Amaria weku ɔ, Yehohanan; 14 Maluki weku ɔ, Yonatan; Shebania weku ɔ, Yosef; 15 Harim weku ɔ, Adna; Merayot weku ɔ, Helkai; 16 Ido weku ɔ, Zakaria; Gineton weku ɔ, Meshulam; 17 Abiya weku ɔ, Zikri; Miniamin weku ɔ, . . . ;* Moadia weku ɔ, Piltai; 18 Bilga weku ɔ, Shamua; Shemaya weku ɔ, Yehonatan; 19 Yoyarib weku ɔ, Matenai; Yedaya weku ɔ, Uzi; 20 Salai weku ɔ, Kalai; Amok weku ɔ, Eber; 21 Hilkia weku ɔ, Hashabia; Yedaya weku ɔ, Netanel.

22 A ngma Levi bi ɔmɛ a tsɛmɛ a we ɔmɛ a nyatsɛmɛ ɔmɛ nɛ a hi si ngɛ Eliashib, Yoyada, Yohanan, kɛ Yadua a ligbi ɔmɛ a mi ɔ a biɛ kɛ fɔ si, kaa bɔ nɛ a pee ngɛ osɔfo ɔmɛ a blɔ fa mi ɔ, hluu kɛ ba si Persia Matsɛ Darius nɔ yemi ɔ mi.

23 A ngma Levi bi nɛ a ji a tsɛmɛ a we ɔmɛ a nyatsɛmɛ ɔmɛ a biɛ ngɛ jamɛ a be ɔ mi yi nɔ sane womi ɔ mi kɛ ba si Eliashib binyumu Yohanan ligbi ɔmɛ a mi. 24 Levi bi ɔmɛ a nyatsɛmɛ ɔmɛ ji Hashabia, Sherebia, kɛ Yeshua, nɛ ji Kadmiel binyumu ɔ, nɛ a nyɛminyumu ɔmɛ daa a hɛ mi nɛ a kɛ jeɔ Mawu yi nɛ a naa lɛ si kaa bɔ nɛ David, nɛ ji anɔkuale Mawu ɔ nɔmlɔ ɔ fã ke a pee ɔ, buli a kuu ngɛ buli a kuu kasa nya. 25 Matania, Bakbukia, Obadia, Meshulam, Talmon, kɛ Akub daa si kɛ ngɛ bue kaa agbo nya buli, nɛ a ngɛ nito he tsu ɔmɛ nɛ ngɛ agbo ɔmɛ a nya a he bue. 26 Ni nɛ ɔmɛ sɔmɔ ngɛ Yoyakim, nɛ ji Yozadak binyumu Yeshua binyumu ɔ ligbi ɔmɛ a mi, kɛ Nehemia, nɛ ji amlaalo ɔ, kɛ Ezra, nɛ ji osɔfo kɛ womi ngmalɔ ɔ* ligbi ɔmɛ a mi.

27 Benɛ a ngɛ Yerusalem gbogbo ɔmɛ a nɔ jɔɔe ɔ, a ya hla Levi bi ngɛ hehi tsuo nɛ a ngɛ ɔ kɛ ba Yerusalem nɛ a kɛ sina lahi, kɛ ayawahi, kpã sakuhi, kɛ sakuhi ba nya. 28 Nɛ lali ɔmɛ a binyumu ɔmɛ* je kpokpa a* nɔ nɛ a ba bua a he nya, a je hehi tsuo nɛ bɔle Yerusalem ɔ, Netofa bi ɔmɛ a hi he ɔmɛ, 29 Bet-gilgal, Geba kɛ jehanɛ ɔ hu Azmavet zugba amɛ a nɔ, ejakaa lali ɔmɛ po hi hehi kɛ ha a he kɛ bɔle Yerusalem kɛ kpe. 30 Nɛ osɔfo ɔmɛ, kɛ Levi bi ɔmɛ tsu a he, nɛ a tsu ni ɔmɛ, agbo ɔmɛ, kɛ gbogbo ɔ he.

31 Lɔ ɔ se ɔ, i kɛ Yuda ma nikɔtɔma amɛ kuɔ kɛ ba gbogbo ɔ yi mi. Jehanɛ hu ɔ, i hla lali a kuu nguanguahi enyɔ konɛ a la sina lahi, kɛ ako sili a kuuhi nɛ a nyɛɛ a se; kuu kake nyɛɛ gbogbo ɔ nɔ ngɛ hiɔ nɔ, nɛ a kɛ a hɛ mi tsɔɔ La Zu Kuku Agbo ɔ. 32 Hoshaya kɛ Yuda ma nikɔtɔma amɛ a kpɛti ni fã nyɛɛ a se, 33 a kɛ Azaria, Ezra, Meshulam, 34 Yuda, Benyamin, Shemaya, kɛ Yeremia. 35 Osɔfo ɔmɛ a binyumu ɔmɛ a kpɛti ni komɛ nɛ a hɛɛ titimati ɔmɛ ɔ piɛɛ a he: Zakaria, nɛ ji Yonatan binyumu ɔ, Yonatan tsɛ ji Shemaya, Shemaya tsɛ ji Matania, Matania tsɛ ji Mikaya, Mikaya tsɛ ji Zakur, Zakur tsɛ ji Asaf, 36 kɛ Zakaria nyɛminyumuhi nɛ a ji Shemaya, Azarel, Milalai, Gilalai, Maai, Netanel, Yuda, kɛ Hanani; a hɛɛ David, nɛ ji anɔkuale Mawu ɔ nɔmlɔ ɔ la fiami ní ɔmɛ; nɛ Ezra, nɛ ji womi ngmalɔ ɔ nyɛɛ a hɛ mi. 37 A je Nyu Hɛngmɛ Agbo ɔ he, nɛ a kuɔ tɛɛ kɛ gu gbogbo ɔ nɛ ngɛ David We ɔ yi nɔ ɔ nɔ kɛ ho David Ma a Atlakpe ɔ he ya, nɛ a tsa nɔ kɛ ho Nyu Agbo ɔ he ya ngɛ puje he blɔ.

38 Lali a kuu nɛ a laa sina la a kake ɔ hu nyɛɛ kɛ gu muɔ nɔ,* nɛ i kɛ ni ɔmɛ a ti ni fã nyɛɛ a se ngɛ gbogbo ɔ nɔ kɛ be ngɛ Flɔɔnɔɔ Ɔmɛ A Mɔ ɔ yi mi kɛ ya su Gbogbo Gbajaa a nɔ, 39 nɛ a tsa nɔ, nɛ a kuɔ kɛ be ngɛ Efraim Agbo ɔ yi mi kɛ ho Ma Momo Agbo ɔ he ya, nɛ a tsa nɔ kɛ ho Pa Mi Lo Agbo ɔ, Hananel Mɔ ɔ, kɛ Mea Mɔ ɔ he ya, nɛ a tsa nɔ kɛ ho Jijɔ Agbo ɔ he ya; nɛ a ba da si ngɛ Buli Agbo ɔ he.

40 Be saii mi ɔ, lali nɛ a laa sina lahi ɔ a kuu enyɔ ɔmɛ ba da si ngɛ anɔkuale Mawu ɔ we ɔ hɛ mi; nɛ imi kɛ nɔ yeli ɔmɛ a nane mi dali ɔmɛ a ti ni fã nɛ piɛɛ ye he ɔ hu ba da lejɛ ɔ, 41 nɛ osɔfo ɔmɛ, nɛ ji Eliakim, Maaseya, Miniamin, Mikaya, Elioenai, Zakaria, kɛ Hanania kɛ a dɛ mi titimatihi, 42 kɛ Maaseya, Shemaya, Eleazar, Uzi, Yehohanan, Malkiya, Elam, kɛ Ezer hu daa si ngɛ lejɛ ɔ. Nɛ lali ɔmɛ nɛ Yezrahia nyɛɛɔ a hɛ mi ɔ wo a gbi nɔ kɛ la wawɛɛ.

43 Jamɛ a ligbi ɔ, a sã afɔlehi babauu nɛ a nya, ejakaa anɔkuale Mawu ɔ ha nɛ a nya kɛ bua jɔmi wawɛɛ nitsɛ. Yi ɔmɛ kɛ jokuɛwi ɔmɛ hu nya, nɛ a nu Yerusalem nyami ɔ he ngɛ se lokoo.

44 Jamɛ a ligbi ɔ, a hla nyumuhi konɛ a hyɛ nito he ɔmɛ nɛ a pee kɛ ha yemi kɛ buami ɔmɛ, kekleekle yiblii ɔmɛ, kɛ mi dlami nyɔngmanyɔngma mi kakaaka amɛ a nɔ. Níhi nɛ a ma ná ngɛ ngmɔhi nɛ bɔle ma amɛ a mi nɛ́ Mlaa a tsɔɔ kaa e sa nɛ a ha osɔfo ɔmɛ kɛ Levi bi ɔmɛ ɔ, e sa nɛ a bua nya kɛ to nito he nɛ ɔmɛ. Nihi nɛ a ngɛ Yuda a nya wawɛɛ akɛnɛ osɔfo ɔmɛ kɛ Levi bi ɔmɛ ngɛ sɔmɔe ɔ he je. 45 Nɛ a bɔni a Mawu ɔ ní tsumi ɔmɛ kɛ a blɔ nya ní tsumi kaa a pee níhi klɔuklɔu ɔ tsumi, nɛ lali ɔmɛ kɛ agbo nya buli ɔmɛ hu pee jã, kaa bɔ nɛ David kɛ e binyumu Salomo fã ke a pee ɔ. 46 Ejakaa kɛ je blema ngɛ David kɛ Asaf ligbi ɔmɛ a mi ɔ, hɛ mi nyɛɛli* ngɛ nɛ a hyɛɛ lali ɔmɛ, kɛ yi jemi kɛ sina lahi nɛ a laa kɛ haa Mawu ɔ nɔ. 47 Nɛ ngɛ Zerubabel ligbi ɔmɛ a mi, kɛ Nehemia ligbi ɔmɛ a mi ɔ, Israel tsuo ngɔɔ níhi kɛ ba haa lali ɔmɛ kɛ agbo nya buli ɔmɛ bɔ nɛ a maa hia daa ligbi. Jehanɛ hu ɔ, a jeɔ Levi bi ɔmɛ a nɔ́ kɛ haa mɛ, nɛ Levi bi ɔmɛ hu jeɔ Aaron nina amɛ a nɔ́ kɛ haa mɛ.

13 Jamɛ a ligbi ɔ, a kane Mose womi ɔ, nɛ ni ɔmɛ nu, nɛ a na nɛ́ a ngma ngɛ mi kaa e sɛ nɛ Amon no ko aloo Moab no ko nɛ e ba anɔkuale Mawu ɔ asafo ɔ mi kɔkɔɔkɔ, 2 ejakaa a kɛ abolo kɛ nyu ba kpee we Israel bi ɔmɛ, mohu ɔ, a bɔ Balaam apaa kaa e ba gbiɛ mɛ. Se wa Mawu ɔ plɛ gbiɛmi ɔ kɛ pee jɔɔmi. 3 Benɛ a nu Mlaa a mi munyu ɔmɛ pɛ ɔ, a bɔni nibwɔ* ɔmɛ tsuo jemi ngɛ Israel bi ɔmɛ a kpɛti.

4 Jehanɛ ɔ, loko nɔ́ nɛ ɔ maa ba a, osɔfo nɛ e hyɛɛ wa Mawu ɔ we* ɔ nito he tsu ɔmɛ* a nɔ ɔ ji Eliashib, e weku no ji Tobia. 5 E je nito he tsu* ngua ko kɛ ha lɛ. Be ko nɛ be ɔ, lejɛ ɔ nɛ a toɔ ní nɛ ɔmɛ ngɛ: ngma afɔle ɔ, ohɛ ɔ, níhi nɛ a kɛ tsuɔ ní ngɛ sɔlemi we ɔ, kɛ ngma* kɛ wai ehe kɛ nu ɔ mi dlami nyɔngmanyɔngma mi kakaaka amɛ nɛ a kɛ haa Levi bi ɔmɛ, lali ɔmɛ, kɛ agbo nya buli ɔmɛ, kɛ yemi kɛ buami nɛ a kɛ haa osɔfo ɔmɛ ɔ.

6 Be nɛ ɔ mi tsuo ɔ, i be Yerusalem, ejakaa i ho matsɛ ɔ ngɔ ya ngɛ Babilon Matsɛ Artaherhes nɔ yemi jeha nɛ ji 32 ɔ mi; nɛ pee se ɔ, i bi matsɛ ɔ kaa e ha mi blɔ nɛ ma je. 7 Kɛkɛ nɛ i ba Yerusalem, nɛ i ba na yayami ngua nɛ Eliashib pee ngɛ Tobia he je, kaa e je nito he tsu ko kɛ ha lɛ ngɛ anɔkuale Mawu ɔ we ɔ yale ɔ mi. 8 Ye bua jɔɛ nɔ́ nɛ ɔ he kulaa, enɛ ɔ he ɔ, i je Tobia tsu mi ní ɔmɛ tsuo kpo kɛ je nito he tsu ɔ mi,* nɛ i sake ngɔ pue he. 9 Lɔ ɔ se ɔ, i fã, nɛ a dla nito he tsu ɔmɛ a mi* nyaii; nɛ i kpale ngɔ anɔkuale Mawu ɔ we ɔ ní ɔmɛ, kɛ ngma afɔle ɔ, kɛ ohɛ ɔ kɛ ya to lejɛ ɔ.

10 I na hu kaa níhi nɛ e sa kaa a ha Levi bi ɔmɛ ɔ, a ha we mɛ, lɔ ɔ he ɔ, Levi bi ɔmɛ kɛ lali ɔmɛ nɛ a tsuɔ ní ɔ je kɛ ho; a ti nɔ fɛɛ nɔ ho lɛ nitsɛ e ngmɔ mi ya. 11 Lɔ ɔ he ɔ, i kã nɔ yeli ɔmɛ a se yeli ɔmɛ a hɛ mi, nɛ i bi mɛ ke: “Mɛni he je nɛ nyɛ kua anɔkuale Mawu ɔ we ɔ?” Kɛkɛ nɛ i bua a nya, nɛ i kpale ngɔ mɛ kɛ ba to a ní tsumi ɔmɛ a nya. 12 Nɛ Yuda bi ɔmɛ tsuo ngɔ ngma kɛ wai ehe kɛ nu ɔ mi dlami nyɔngmanyɔngma mi kakaaka amɛ kɛ ba nito he tsu ɔmɛ a mi. 13 Kɛkɛ nɛ i ngɔ osɔfo Shelemia, Zadok, nɛ ji womi ngmalɔ ɔ* kɛ Pedaya nɛ je Levi bi ɔmɛ a kpɛti ɔ kɛ da nito he tsu ɔmɛ a nya, nɛ Hanan, nɛ ji Matania binyumu Zakur binyumu ɔ ji a se yelɔ, ejakaa a buu nyumu nɛ ɔmɛ kaa nihi nɛ a ma nyɛ maa fĩa kɛ fɔ a nɔ. A ní tsumi ji kaa a ma gba ní ɔmɛ kɛ ha a nyɛminyumu ɔmɛ.

14 Oo ye Mawu, mo kai mi ngɛ nɔ́ nɛ ɔ he, nɛ suɔmi nɛ se pui nɛ i je kpo ngɛ ye Mawu ɔ we ɔ kɛ e he ní tsumi ɔmɛ a* he ɔ, o hɛ ko je nɔ.

15 Jamɛ a be ɔ mi ɔ, i na nihi ngɛ Yuda nɛ a ngɛ wai ngae ngɛ Hejɔɔmi Ligbi ɔ nɔ, nihi nɛ a ngɔɔ ngma nɛ a to glegleegle kɛ baa nɛ a kɛ ba pueɔ tejihi a nɔ, kɛ nihi nɛ a ngɔɔ wai, wai yiblii, fig, kɛ tlomi slɔɔtohi tsuo kɛ baa Yerusalem ngɛ Hejɔɔmi Ligbi ɔ nɔ. Lɔ ɔ he ɔ, i bɔ mɛ kɔkɔ kaa a ko jua ní ngɛ jamɛ a ligbi ɔ nɔ.* 16 Nɛ Tiro bi nɛ a ngɛ ma a mi ɔ ngɔɔ pami lohi kɛ nijua ní slɔɔtohi tsuo kɛ baa, nɛ a ba juaa kɛ haa Yuda bi ɔmɛ ngɛ Yerusalem ngɛ Hejɔɔmi Ligbi ɔ nɔ. 17 Lɔ ɔ he ɔ, i kã Yuda odehe ɔmɛ a hɛ mi, nɛ i de mɛ ke: “Mɛni yayami nyɛ ngɛ pee nɛ ɔ? Nyɛ ngɛ Hejɔɔmi Ligbi ɔ po blee! 18 Anɛ pi nɔ́ nɛ ɔ nɔuu nɛ nyɛ nɛmɛ ɔmɛ pee nɛ wa Mawu ɔ ngɔ haomi nɛ ɔ tsuo kɛ ba wa nɔ, kɛ ma nɛ ɔ hu nɔ ɔ lo? Amlɔ nɛ ɔ, nyɛ ma ha nɛ Mawu mi mi nɛ fu Israel ɔ nya maa wa wawɛɛ ngɛ Hejɔɔmi Ligbi ɔ nɛ nyɛ ble ɔ he je.”

19 Lɔ ɔ he ɔ, benɛ nini ɔmɛ bɔni Yerusalem agbo ɔmɛ a nɔ puemi loko Hejɔɔmi Ligbi ɔ maa je sisi ɔ, oya nɔuu nɛ i fã kaa a nga sinya amɛ. Jehanɛ hu ɔ, i de ke a ko bli sinya amɛ kɛ ya si be nɛ Hejɔɔmi Ligbi ɔ maa be, nɛ i ngɔ imi nitsɛ ye tsɔli ɔmɛ ekomɛ kɛ to agbo ɔmɛ a nya konɛ a ko ngɔ tlomi ko kɛ ba ma a mi ngɛ Hejɔɔmi Ligbi ɔ nɔ. 20 Lɔ ɔ he ɔ, jua yeli ɔmɛ, kɛ nihi nɛ a juaa nijua ní slɔɔtohi tsuo ɔ hwɔ Yerusalem agbo ɔ se si kake loo si enyɔ. 21 Kɛkɛ nɛ i bɔ mɛ kɔkɔ, nɛ i de mɛ ke: “Mɛni he je nɛ nyɛ hwɔ gbogbo ɔ se ɔ? Ke nyɛ pee jã ekohu ɔ, ma fiee nyɛ pani nya.” Kɛ je jamɛ a be ɔ mi ɔ, a bɛ ngɛ Hejɔɔmi Ligbi ɔ nɔ hu.

22 Nɛ i de Levi bi ɔmɛ ke a tsu a he be fɛɛ be nɛ a ba nɛ a ba bu agbo ɔmɛ a nya, konɛ Hejɔɔmi Ligbi ɔ nɛ pee klɔuklɔu. Oo ye Mawu, mo kai mi ngɛ enɛ ɔ hu he, nɛ́ o na mi mɔbɔ, ngɛ o suɔmi babauu nɛ se pui ɔ he je.

23 Jamɛ a be ɔ mi ɔ, i na Yuda bi komɛ hu nɛ a ngɔ Ashdod, Amon, kɛ Moab yihi.* 24 A binyumu ɔmɛ fã tuɔ Ashdod bi ɔmɛ a gbi ɔ, kɛ ni kpahi a gbi, se a ti nɔ ko nɔ ko li bɔ nɛ a tuɔ Yuda bi ɔmɛ a gbi ɔ ha. 25 Lɔ ɔ he ɔ, i kã a hɛ mi, nɛ i gbiɛ mɛ, nɛ i gba nyumu ɔmɛ a ti ni komɛ ma, nɛ i hiaa a yi bwɔmi, nɛ i ha nɛ a ngɔ Mawu biɛ kɛ kã kita. I de mɛ ke: “Nyɛ ko ngɔ nyɛ biyi ɔmɛ kɛ ha a binyumu ɔmɛ, nɛ nyɛ ko ngɔ a biyi ɔmɛ kɛ ha nyɛ binyumu ɔmɛ aloo nyɛ he. 26 Anɛ pi ní nɛ ɔmɛ nɔuu nɛ ha nɛ Israel Matsɛ Salomo pee yayami ɔ lo? Ngɛ je ma amɛ tsuo a kpɛti ɔ, matsɛ ko be nɛ ngɛ kaa lɛ; nɛ e Mawu ɔ suɔ lɛ, enɛ ɔ he ɔ, Mawu wo lɛ Israel tsuo nɔ matsɛ. Se ma se yihi ha nɛ lɛ po e pee yayami. 27 Anɛ e be nyakpɛ kaa nyɛ pee yayami ngua nɛ ɔ, nɛ nyɛ yi wa Mawu ɔ anɔkuale kɛ gu ma se yihi nɛ nyɛ ngɔ ɔ nɔ lo?”

28 Eliashib, nɛ ji osɔfo nɔkɔtɔma a binyumu Yoyada binyumu ɔmɛ a kpɛti nɔ kake ba pee Sanbalat, nɛ ji Horon no ɔ ngatsɛ. Lɔ ɔ he ɔ, i fiee lɛ kɛ je ye kasa nya.

29 Oo ye Mawu, mo kai mɛ, ejakaa a ble osɔfo yemi ɔ, kɛ osɔfo yemi somi ɔ, kɛ Levi bi ɔmɛ.

30 Nɛ i tsu a he ngɛ ma se níhi tsuo nɛ e bleɔ nɔ ɔ he, nɛ i gba ní tsumihi kɛ ha osɔfo ɔmɛ kɛ Levi bi ɔmɛ; a ti nɔ fɛɛ nɔ ho lɛ nitsɛ e sɔmɔmi ní tsumi he ya, 31 nɛ i to blɔ nya konɛ a ngɔ lɛ́ kɛ ba ngɛ behi nɛ a to ɔ mi, nɛ́ a ngɔ kekleekle yiblii hu kɛ ba.

Oo ye Mawu, mo kai mi nɛ o pee mi kpakpa.