LA

1 Nɔ nɛ e nyɛɛ we ngɛ yiwutsotsɛmɛ a ga womi nya,

Nɛ́ e dɛ si ngɛ yayami peeli a blɔ nɔ,

Nɛ́ e hí si ngɛ he fɛu yeli a sihi he ɔ ngɛ bua jɔmi.

 2 E bua jɔɔ Yehowa mlaa a he,

Nɛ e kaneɔ Mawu mlaa a, nɛ e pueɔ e yi mi tɛ ngɛ he* nyɔ kɛ pia.

 3 E maa pee kaa tso nɛ a du ngɛ pahi a tue,

Tso nɛ woɔ yiblii ngɛ e be nya,

E bahi gbli we.

 4 Yiwutsotsɛmɛ be jã;

A ngɛ kaa jakati* nɛ kɔɔhiɔ muɔɔ kɛ yaa.

 5 Lɔ ɔ he je nɛ yiwutsotsɛmɛ be nyɛe maa da kojomi nya a nɛ;

Nɛ lɔ ɔ hu he je nɛ yayami peeli be nyɛe maa da si ngɛ he nɛ dali bua a he nya ngɛ ɔ nɛ.

 6 Ejakaa Yehowa le níhi nɛ dali peeɔ,

Se yiwutsotsɛmɛ kɛ a ní peepee ɔ tsuo be si hie hu.

2 Mɛni he je nɛ je ma amɛ ngɛ hoo pee,

Nɛ ni ɔmɛ ngɛ yaka níhi a he munyu tue ɔ?*

 2 Zugba a nɔ matsɛmɛ ɔmɛ te da si,

Nɛ nɔ yeli ɔmɛ bua a he nya,* nɛ a pee kake

Ngɔ wo Yehowa kɛ nɔ nɛ e pɔ lɛ nu ɔ* a he.

 3 A deɔ ke: “Nyɛ ha nɛ wa tsɔ a kɔsɔkɔsɔ ɔmɛ ngɛ wa he,

Nɛ wa je a kpã amɛ ngɛ wa he!”

 4 Nɔ nɛ hii si ngɛ matsɛ sɛ ɔ nɔ ngɛ hiɔwe ɔ maa muɔ;

Yehowa maa ye a he fɛu.

 5 Jamɛ a be ɔ mi ɔ, e kɛ mɛ maa tu munyu ngɛ e we abofu ɔ mi,

Nɛ e maa wo a he gbeye ngɛ e we abofu nɛ nya wa a mi;

 6 E ma de ke: “Imi nitsɛ i wo ye matsɛ

Ngɛ Zion, ye yoku klɔuklɔu ɔ nɔ.”

 7 Ma fiɛɛ nɔ́ nɛ Yehowa de ɔ;

E de mi ke: “Ye bi ji mo;

Mwɔnɛ ɔ, i ba pee o tsɛ.

 8 Mo bi mi, nɛ ma ngɔ je ma amɛ kɛ ha mo kaa o weto ní,

Nɛ ma ngɔ zugba a nyagbe he ɔmɛ kɛ ha mo kaa o blɔ fa mi nɔ́.

 9 O kɛ matsɛ tso nɛ a kɛ dade pee maa ywia mɛ,

Nɛ o maa ywia mɛ wɔtsɔwɔtsɔ kaa bɔ nɛ a ywiaa buɛhi ɔ.”

10 Lɔ ɔ he ɔ, amlɔ nɛ ɔ, nyɛ matsɛmɛ, nyɛ kɔ nɔ́ se;

Nyɛ zugba a nɔ kojoli, nyɛɛ kplɛɛ tsɔsemi nɔ.*

11 Nyɛɛ kɛ gbeye yemi nɛ sɔmɔ Yehowa,

Nɛ nyɛɛ kɛ he domi blibliibli nɛ nya.

12 Nyɛɛ wo bi ɔ hɛ mi nyami,* ke pi jã a, Mawu* mi mi ma fu,

Nɛ nyɛ hɛ mi ma kpata ngɛ blɔ ɔ nɔ,

Ejakaa e we abofu ɔ teɔ si si kake too.

 3 Se mo Yehowa, mo ji tsɛ̃i nɛ bɔle mi kɛ kpe,

Mo ji ye hɛ mi nyami kɛ nɔ nɛ woɔ ye yi nɔ.

 4 Ma kpa ngmlaa kɛ tsɛ Yehowa,

Nɛ e ma he mi nɔ ngɛ e yoku klɔuklɔu ɔ nɔ. (Sela)

 5 Ma hwɔ si nɛ ma hwɔ mahe;

Nɛ ma te si slɔkee,

Ejakaa Yehowa yaa nɔ nɛ e yeɔ buaa mi.

 6 Nimli akpe nyɔngmahi abɔ

Nɛ bɔle mi kɛ kpe ɔ, i yi mɛ gbeye.

Ejakaa o maa fiaa ye he nyɛli ɔmɛ a tsitsa nɔ́;

O maa ku yiwutsotsɛmɛ a lungu.

 3 Nyɛ ná nɛ nyɛɛ le kaa Yehowa kɛ nɔ nɛ yeɔ lɛ anɔkuale ɔ maa hi si ngɛ blɔ klɛdɛɛ nɔ;*

Ke i tsɛ Yehowa a, e maa nu.

 5 Nyɛɛ sã dami afɔlehi,

Nɛ nyɛɛ ngɔ nyɛ hɛ kɛ fɔ Yehowa nɔ.

 7 O ha nɛ ye tsui hyi tɔ kɛ bua jɔmi

Pe nihi nɛ a kpa ngma babauu, nɛ́ a ná wai ehe babauu.

 8 Ma hwɔ si, nɛ ma hwɔ mahe ngɛ tue mi jɔmi mi,

Ejakaa mo Yehowa pɛ lɛ o haa nɛ i hiɔ si slɔkee.

5 Oo Yehowa, moo bu ye munyu ɔmɛ tue;

Moo nu ye huu peemi ɔ.

 2 Moo nu ya nɛ i ngɛ foe kɛ ha yemi kɛ buami ɔ,

Oo ye Matsɛ kɛ ye Mawu, ejakaa mo lɛ i ngɛ sɔlee ha.

 3 Oo Yehowa, o maa nu ye gbi mɔtu;

Mɔtu ɔ, ma de mo ye haomi ɔ, nɛ ma hyɛ mo blɔ wawɛɛ.

 4 Ejakaa pi Mawu nɛ nyaa nɔ́ yayami he ji mo;

Nɔ nɛ peeɔ yayami ɔ, o kɛ lɛ be si hie.

O hiɔ nihi tsuo nɛ peeɔ nɔ́ yayami;

 6 O ma kpata lakpatsɛmɛ a hɛ mi.

 7 Se ma ba o we ɔ mi ngɛ o suɔmi babauu nɛ se pui ɔ he je;

Ma kplã si, nɛ ma ngɔ ye hɛ mi kɛ tsɔɔ o sɔlemi we* klɔuklɔu ɔ, ngɛ bumi nɛ mi kuɔ nɛ i ngɛ ha mo kɛ gbeye nɛ i yeɔ mo ɔ he je.

 8 Oo Yehowa, moo nyɛɛ ye hɛ mi ngɛ o dami ɔ mi ngɛ ye he nyɛli ɔmɛ a he je;

Ha nɛ o blɔ ɔ nɔ nɛ tɛ ha mi.

 9 Ejakaa nɔ́ ko be nɛ a deɔ nɛ a ma nyɛ ma he ye;

Nɔ́ ko nɔ́ ko be a mi, ja yayami pɛ;

A kuɛ si ji yɔkɔ nɛ a bli nya;

A kɛ a lilɛ gbeɔ nɔ yi mi.*

10 Se Mawu maa bu mɛ fɔ;

Mɛ nitsɛmɛ a ga tsɔmi ɔmɛ ma ha nɛ a nɔ si.

A tɔmi babauu ɔ he je ɔ, moo fiee mɛ

Ejakaa a tsɔ o hɛ mi atuã.

11 Se nihi tsuo nɛ saa we ngɛ o ngɔ ɔ ma nya;

A ma kpa ngmlaa kɛ bua jɔmi be fɛɛ be.

O be hae nɛ nɔ ko nɛ su a he,

Nɛ nihi nɛ a suɔ o biɛ ɔ ma nya ngɛ o mi.

12 Oo Yehowa, o maa jɔɔ nɔ fɛɛ nɔ nɛ peeɔ nɔ́ nɛ da,

O kɛ o mɔbɔ nami ɔ maa bu a he kaa tsɛ̃i ngua.

6 Oo Yehowa, o kɛ abofu nɛ ko kã ye hɛ mi,

Nɛ o kɛ mi mi fumi nɛ ko tsɔse mi.

 3 Ee, i* hao wawɛɛ,

Oo Yehowa, i ngɛ mo bie ke, kɛ yaa si mɛni be?

 4 Oo Yehowa, moo kpale nɛ o ba kpɔ̃ mi;*

Mo he ye yi wami ngɛ o suɔmi nɛ se pui ɔ he je.

 5 Ejakaa ke nɔ ko gbo ɔ, e be nyɛe maa wo o ta;*

Mɛnɔ ma je o yi ngɛ Yɔkɔ mi?*

 6 Huu nɛ i ngɛ pee ɔ ha nɛ i gbɔjɔ;

Nyɔ mi tsuo ɔ, i pɔɔ ye sa kɛ vonyu;*

I foɔ ya kɛ pɔɔ ye sa a tsɔtsɔɔtsɔ.

 7 Kɔmɔ yemi ɔ ha nɛ ye hɛngmɛ nɔ pee kusuu;

Ye hɛngmɛ hyɛ we nɔ́* ngɛ nihi tsuo nɛ a ngɛ mi haoe ɔ a he je.

 8 Nyɛ nihi tsuo nɛ nyɛ peeɔ ní yayamihi, nyɛɛ je ye nɔ kɛ ya se,

Ejakaa Yehowa maa nu ye ya fomi ɔ he.

 9 Yehowa maa bu ye pɛɛ kpami kɛ ha mɔbɔ nami ɔ tue;

Yehowa ma ha ye sɔlemi ɔ heto.

10 Ye he nyɛli tsuo a hɛ mi ma pue si, nɛ a maa pee basaa;

A kɛ zo maa kpale a se si kake too.

 2 Ke pi jã a, a ma tsɔtslɔɔ ye* mi kaa bɔ nɛ jata peeɔ ɔ,

Nɛ a maa ngɔ mi kɛ ho, nɛ nɔ ko be mi kpɔ̃e.

 3 Oo Yehowa ye Mawu, ke i tɔ̃ ngɛ sane nɛ ɔ mi,

Ke i yi dami sane,

 4 Ke i tɔ̃ nɔ nɛ peeɔ mi kpakpa a nɔ,

Aloo ke i ngɔ ye he nyɛlɔ ní yaka gu ɔ,*

 5 Lɛɛ ha nɛ he nyɛlɔ nɛ fiee ye se nɛ e nine nɛ su ye* nɔ;

Ha nɛ e naa ye wami nɔ kɛ wo zu mi,

Nɛ e ha nɛ ye hɛ mi nyami ɔ nɛ laa ngɛ zu mi. (Sela)

 6 Oo Yehowa, tee si ngɛ o mi mi fumi ɔ mi;

Moo te si kɛ si ye he nyɛli ɔmɛ a we abofu ɔ;

Tee si nɛ o ye bua mi, nɛ́ o hyɛ nɛ a ye dami sane.

 7 Ha nɛ je ma amɛ nɛ a bɔle mo kɛ kpe;

Nɛ o kɛ mɛ maa to ní kɛ je hiɔwe.

Oo Yehowa, moo kojo mi ngɛ ye dami ɔ nya,

Kɛ ye we anɔkuale yemi ɔ nya.

Se mo ha nɛ dalɔ nɛ pi si,

Ejakaa mo ji Mawu nɛ da nɛ e hyɛɛ tsuihi a mi nɛ o naa bɔ nɛ nɔ nuɔ he ha ngɛ e mi tɔɔ.*

11 Mawu ji Kojolɔ nɛ da,

Nɛ Mawu kojoɔ* daa ligbi.

12 Ke nɔ ko pia we e he ɔ, Mawu duɔɔ e klaate ɔ nya;

E dɔɔ e kɛ̃ɛ̃ ɔ mi, nɛ e peeɔ lɛ klaalo.

13 E dlaa e ta hwumi níhi nɛ gbeɔ nɔ ɔ;

E peeɔ e kɛ̃ɛ̃ mi bi nɛ la ngɛ tsoe ngɛ nya a klaalo.

14 Hyɛ nɔ nɛ ngɔ yi wu tso ní peemi he hɔ ɔ;

E ngɔɔ haomi hɔ, nɛ e fɔɔ lakpahi.

15 E tsuaa muɔ, nɛ e haa nɛ e mi kuɔɔ,

Se e nɔɔ muɔ ɔ nɛ lɛ nitsɛ e tsua a mi.

16 Haomi nɛ e kɛ baa a kpaa buɔ lɛ nitsɛ e yi;

E yi wu tso ní peepee ɔ ma kpa bu lɛ nitsɛ e yi.

17 Ma je Yehowa yi ngɛ e dami sane yemi ɔ he je;

Ma la yi jemi lahi* kɛ ha Yehowa, Nɔ Nɛ E Nɔ Kuɔ Pe Kulaa a biɛ ɔ.

8 Oo Yehowa wa Nyɔmtsɛ, hyɛ bɔ nɛ o biɛ ɔ je agbo ngɛ zugba a nɔ tsuo ha;

O ha nɛ o hɛ mi nyami ɔ ya hiɔwe pe hiɔwe ɔmɛ po!*

 2 O ha nɛ he wami je kpo ngɛ jokuɛwi kɛ bimwɔwi a nya

Ngɛ o he nyɛli ɔmɛ a he je,

Konɛ o ha nɛ he nyɛlɔ ɔ kɛ lue yelɔ ɔ nɛ pee dii.

 3 Ke i hyɛ hiɔwe, nɛ i na o nguɛ nya ní tsumi ɔmɛ,

Nyɔhiɔ ɔ kɛ dodoe ɔmɛ nɛ o pee ɔ,

 4 Mɛnɔ ji nɔmlɔ adesa nɛ o susuɔ e he,

Kɛ nɔmlɔ bi nɛ o hyɛɔ e nɔ?

 5 O ha nɛ e ba si bɔɔ pɛ pe hiɔwe bɔfo ɔmɛ,*

Nɛ o kɛ hɛ mi nyami kɛ agboje bu lɛ jlasi.

 6 O ha nɛ e ye o nine nya ní tsumi ɔmɛ a nɔ;

O ngɔ nɔ́ fɛɛ nɔ́ kɛ wo e nane si:

 7 To ɔmɛ kɛ na amɛ tsuo,

Kɛ nga mi lohwe ɔmɛ,

 8 Hiɔwe lohwe pɛlitsɛmɛ kɛ wo mi lo ɔmɛ,

Nɔ́ fɛɛ nɔ́ nɛ nyɛɛɔ ngɛ wo mi.

9 Oo Yehowa, i kɛ ye tsui tsuo ma je o yi;

Ma jaje o nyakpɛ ní tsumi ɔmɛ tsuo kɛ tsɔɔ.

 2 Ma nya, nɛ ma ná bua jɔmi ngɛ o mi;

Mo Nɛ O Nɔ Kuɔ Pe Kulaa, ma la yi jemi lahi* kɛ ha o biɛ ɔ.

 3 Ke ye he nyɛli ɔmɛ kpale a se ɔ,

A ma tɛ si, nɛ a hɛ mi ma kpata ngɛ o hɛ mi.

 4 Ejakaa o fãa ye he nɛ o yeɔ dami sane ha mi;

O hii si ngɛ o matsɛ sɛ ɔ nɔ, nɛ o kojoɔ ngɛ dami nya.

 5 O kã je mahi a hɛ mi, nɛ o kpata yiwutsotsɛmɛ a hɛ mi,

Nɛ o tsu* a biɛ kulaa kɛ yaa neneene.

 6 He nyɛlɔ ɔ hɛ mi kpata kɛ yaa neneene;

O hiaa a ma amɛ kɛ a sipoku,

Nɛ nɔ́ ko be nɛ a kɛ ma kai mɛ hu.

 7 Se Yehowa hii si ngɛ matsɛ sɛ nɔ kɛ yaa neneene;

E kɛ e matsɛ sɛ ɔ ma si kpɛii kɛ ha dami sane yemi.

 8 E maa kojo nihi nɛ a ngɛ zugba a nɔ ɔ* ngɛ dami nya;

E maa kojo je ma amɛ ngɛ dami nya.

 9 Yehowa maa pee wesa he* nɛ ngɛ slɔkee kɛ ha nihi nɛ a waa mɛ yi mi ɔ,

E maa pee wesa he nɛ ngɛ slɔkee ngɛ haomi behi a mi.

10 Nihi nɛ le o biɛ ɔ maa ngɔ a hɛ kɛ fɔ o nɔ;

Oo Yehowa, nihi nɛ a hlaa o se blɔ ɔ, o be mɛ kuae gblegbleegble.

11 Nyɛ la yi jemi lahi kɛ ha Yehowa, nɔ nɛ ngɛ Zion ɔ;

Nyɛ ha nɛ a le níhi nɛ e pee ɔmɛ ngɛ ni ɔmɛ a kpɛti.

12 Ejakaa nɔ nɛ yeɔ a muɔ he lue ɔ kaiɔ mɛ;

E hɛ be nɔ́ nali a ya fomi ɔ nɔ jee.

13 Oo Yehowa, moo na mi mɔbɔ; moo hyɛ haomi nɛ ye he nyɛli kɛ baa ye nɔ ɔ,

Mo nɛ o woɔ ye nɔ kɛ jeɔ gbenɔ agbo ɔmɛ a nya,

14 Konɛ ma jaje níhi nɛ o pee nɛ a sa yi jemi ɔ ngɛ Zion biyo ɔ agbo ɔmɛ a nya,

Nɛ́ ma nya ngɛ yi wami hemi níhi nɛ o pee ɔmɛ a mi.

15 Je ma amɛ nɔ muɔ nɛ mɛ nitsɛmɛ a tsua a mi;

Mɛ nitsɛmɛ a nane du ya nɛ a wo kɛ laa a.

17 Yiwutsotsɛmɛ maa kpale a se kɛ ya Yɔkɔ mi,*

Je ma amɛ tsuo nɛ a hɛ jeɔ Mawu nɔ ɔ maa ya lejɛ ɔ.

18 Se pi daa nɛ nɛ hɛ maa je ohiatsɛmɛ a nɔ;

Nɛ nihi nɛ a he jɔ ɔ hu a hɛ kɛ nɔ fɔmi ɔ se be poe gblegbleegble.

20 Oo Yehowa, ha nɛ gbeye nɛ nu mɛ,

Ha nɛ je ma amɛ nɛ a le kaa nimli adesahi* kɛkɛ ji mɛ. (Sela)

 2 He nɔ womi haa nɛ yiwutsotsɛ fieeɔ nɔ nɛ be yemi kɛ bualɔ ɔ se,

Se gahi nɛ e tsɔɔ ɔ maa du lɛ nitsɛ.

 3 Ejakaa yiwutsotsɛ kɛ níhi nɛ lɛ nitsɛ e suɔ* ɔ fĩaa,

Nɛ e jɔɔ nɔ nɛ hɛ tsuɔ;*

נ [Nun]

E bui Yehowa.

 4 Yiwutsotsɛ woɔ e he nɔ, nɛ e hla we níhi a mi;

E susumi tsuo ji: “Mawu ko be.”

 5 E yeɔ manye ngɛ nɔ́ fɛɛ nɔ́ nɛ e peeɔ ɔ mi,

Se e nui o kojomi ɔmɛ a sisi;

E yeɔ e he nyɛli ɔmɛ tsuo a he fɛu.*

 6 E deɔ ngɛ e tsui mi ke: “I be mimiɛe* gblegbleegble;

Ngɛ yi nɔ fɛɛ yi nɔ nɛ maa ba a mi ɔ,

I be amanehlu nae gblegbleegble.”

 7 Gbiɛmi, lakpa, kɛ nɔ he gbeye womi munyuhi hyi e nya mi tɔ;

Haomi kɛ munyuhi nɛ yeɔ nɔ awi ngɛ e lilɛ sisi.

 8 E woɔ ka ngɛ kɔpehi a mi;

E jeɔ e laami he ɔ kɛ gbeɔ nɔ nɛ sane ko be e he.

10 E tsɛ̃ɛɔ nɔ nɛ e nine su e nɔ ɔ kɛ fɔɔ si;

Nihi nɛ a ní ngɛ mɔbɔ ɔ nɔɔ e dɛ mi.

O ngɔ lɛ nihi nɛ a ní ngɛ mɔbɔ ɔ baa;

Mo ji awusahi* a yemi kɛ bualɔ.

15 Moo ku yiwutsotsɛ kɛ nɔmlɔ yayami ɔ nine,

Konɛ ke o ngɛ e yi wu tso ní peepee ɔ hlae ɔ,

O ko na hu.

18 O maa ye dami sane kɛ ha nihi nɛ a be tsɛmɛ kɛ nihi nɛ a hao,

Bɔ nɛ pee nɛ nɔmlɔ adesa* nɛ zu a kɛ bɔ lɛ ɔ nɛ e ko wo a he gbeye hu.

 2 Hyɛ bɔ nɛ yiwutsotsɛmɛ dɔ a kɛ̃ɛ̃ mi ha;

A ngɔ a kɛ̃ɛ̃ mi bi ɔ kɛ wo kɛ̃ɛ̃ ɔ mi,

Konɛ a hi diblii mi kɛ tsɛ̃ nihi nɛ a da ngɛ a tsui mi ɔ.

 3 Ke a hule sisi tomi ɔmɛ ɔ,*

Mɛni dalɔ ma nyɛ maa pee?”

 5 Yehowa toɔ dalɔ kɛ yiwutsotsɛ tsuo he hɛ wawɛɛ;

E* hiɔ nɔ fɛɛ nɔ nɛ suɔ basabasa peemi.

 6 E maa tsɔ yiwutsotsɛmɛ klamahi;*

E maa ngɔ la kɛ sɔlfa kɛ kɔɔhiɔ nɛ mi dɔ la kɛ gbla a tue.

12 Oo Yehowa, mo he ye yi wami, ejakaa nɔ nɛ yeɔ anɔkuale be hu;

Anɔkualetsɛmɛ ta adesahi a kpɛti.

 2 Nihi yeɔ a sibi lakpa;

A kɛ a nya gbeɔ nihi a yi mi,* nɛ a kɛ nɔ sisimi tsui tuɔ munyu.

 3 Yehowa ma ma nyahi tsuo nɛ gbeɔ nɔ yi mi ɔ

Nɛ e maa po lilɛ nɛ tuɔ fĩami munyuhi kɛ fɔ he,

 4 Nihi nɛ a deɔ ke: “Waa kɛ wa lilɛhi maa ye kunimi.

Waa kɛ wa nya deɔ nɔ́ nɛ wa suɔ;

Mɛnɔ ma nyɛ maa pee wa nyɔmtsɛ?”

 5 Yehowa ke: “Akɛnɛ a waa nihi nɛ a hao ɔ yi mi,

Nɛ́ ohiatsɛmɛ ngɛ huu pee ɔ he je ɔ,

Ma te si nɛ ma pee sane ɔ he nɔ́ ko.”

 6 Yehowa munyu ɔmɛ a he tsɔ;

A ngɛ kaa sika hiɔ nɛ a tsu he si kpaago ngɛ zu flɔɔnɔɔ* mi.

 7 Yehowa ye Mawu, o maa bu a he;

O maa po a ti nɔ fɛɛ nɔ he piɛ kɛ je yi nɔ bi nɛ ɔmɛ a he kɛ ya neneene.

 8 Yiwutsotsɛmɛ yaa nɛ a baa nɛ nɔ́ ko tsi we a nya,

Ejakaa nimli a bimɛ woɔ ní yayami peemi mi he wami.

 2 Kɛ yaa si mɛni be nɛ ma* pee yeyeeye,

Nɛ ma ye kɔmɔ ngɛ ye tsui mi daa ligbi?

Ha nɛ ye hɛngmɛ nɛ na la, konɛ ma ko nɔ gbenɔ mahe mi,

 4 Konɛ ye he nyɛlɔ ɔ nɛ ko de ke: “I ye e nɔ kunimi!”

 5 Imi lɛɛ, i ngɛ hɛ kɛ nɔ fɔmi ngɛ o suɔmi nɛ se pui ɔ mi;

Ye tsui ma nya ngɛ yi wami hemi níhi nɛ o pee ɔmɛ a mi.

A je mi bami puɛ, nɛ a peeɔ ní hiɔmi níhi;

Nɔ ko nɔ ko pee we nɔ́ kpakpa.

 2 Se Yehowa maa e yi si nɛ e hyɛɛ nimli a bimɛ ngɛ zugba a nɔ

Kaa e maa na nɔ ko nɛ kɔɔ nɔ́ se lo, kaa e maa na nɔ ko nɛ hlaa Yehowa se blɔ lo.

 3 Mɛ tsuo a tla blɔ;

Mɛ tsuo pɛpɛɛpɛ a puɛ.

Nɔ ko nɔ ko pee we nɔ́ kpakpa,

Nɔ kake ngmelu po be.

 5 Se sawale maa nu mɛ wawɛɛ,

Ejakaa Yehowa piɛɛ yi nɔ bihi nɛ a peeɔ nɔ́ nɛ da a he.

 6 Yayami peeli, nyɛ bɔɔ mɔde kaa nyɛ ma puɛ nɔ nɛ e ní ngɛ mɔbɔ ɔ blɔ nya tomihi,

Se Yehowa ji e wesa he.

Ke Yehowa bua e we bi nɛ a nuu mɛ nyɔguɛ ɔ a nya kɛ ba a,

Yakob bua nɛ jɔ, Israel nɛ́ nya.

 2 Nɔ nɛ nyɛɛɔ ngɛ anɔkuale mi,*

Nɛ e peeɔ nɔ́ nɛ da,

Nɛ e tuɔ anɔkuale ngɛ e tsui mi.

 3 E kɛ e lilɛ gbi nɔ he guɛ,

E pee we e nyɛmi yayami,

Nɛ e pue we e huɛmɛ a hɛ mi si.*

 4 E yuɔ e he ngɛ yaka nɔmlɔ he,

Se e woɔ nihi nɛ yeɔ Yehowa gbeye ɔ a hɛ mi nyami.

 5 Ke e pa sika ha nɔ ɔ, e he we he kpa,

Nɛ e ngɔɛ nyɔ mi ní nɛ e kɛ po munyu kɛ fɔ nɔ nɛ sane ko be e he ɔ nɔ.

 3 Nɛ ni klɔuklɔu ɔmɛ nɛ a ngɛ zugba a nɔ,

Nihi nɛ a hɛ mi ngɛ nyami ɔ haa nɛ i náa bua jɔmi babauu.”

I be a muɔ afɔle ɔmɛ plɛe kɛ pue zugba kaa dã afɔlehi kɔkɔɔkɔ,

Nɛ a biɛ po ye nya be ta woe.

Bua jɔmi babauu ngɛ o hɛ mi;

Bua jɔmi ngɛ o hiɔ nɔ kɛ yaa neneene.

17 Oo Yehowa, moo bu ye pɛɛ kpami kɛ ha dami sane yemi ɔ tue;

Moo bu ya nɛ i ngɛ foe kɛ ha yemi kɛ buami ɔ tue;

Moo bu ye sɔlemi nɛ lakpa be mi ɔ tue.

 2 Moo ye dami sane ha mi;

O hɛngmɛ nɛ na nɔ́ nɛ da.

 3 O hyɛ ye tsui mi, o kpa ye mi nyɔ mi;

O tsu ye he;

Ke o hyɛ ye mi ɔ, o maa na kaa i tui ga yaya ko,

Nɛ ye nya hu tu we munyu yaya ko.

 4 Ngɛ níhi nɛ adesahi peeɔ ɔ tsuo se ɔ,

O nya mi munyu he je ɔ, i nyɛɛ we ngɛ juli a blɔhi a nɔ.

 5 Ha nɛ ye nane nɛ hi o blɔ ɔmɛ a nɔ

Konɛ ye nane nɛ ko tɔ̃tɔ̃.

 7 Mo je o suɔmi nɛ se pui ɔ kpo ngɛ nyakpɛ blɔ nɔ,

Oo Yi Wami Helɔ, mo nɛ o heɔ nihi nɛ a tuɔ fo kɛ jeɔ nihi nɛ a tsɔɔ o hɛ mi atuã a nya,

Nɛ́ a ba saa we ngɛ o hiɔ nɔ ɔ a yi wami.

 8 Moo bu ye he kaa o hɛngmɛ nɔ anani;*

Ngɔɔ mi kɛ laa ngɛ o pɛli hɔ̃ ɔ sisi.

 9 Moo bu ye he ngɛ yiwutsotsɛmɛ nɛ a tuaa mi ɔ a he,

Kɛ je ye he nyɛli nɛ bɔle mi kɛ kpe ɔ a dɛ mi.*

10 A nui nɔ́ he ha nɔ;*

A kɛ a nya tuɔ he nɔ womi munyuhi;

11 Jehanɛ ɔ, a sa wa yi;

A hlaa blɔ nɔ nɛ a maa gu kɛ tsɛ̃ wɔ kɛ pue si.

12 E ngɛ kaa jata nɛ pee klaalo kaa e ma tsɔtslɔɔ lohwe nɛ e nu lɛ ɔ mi,

E ngɛ kaa jata bi nɛ ngɛ de dae.

13 Oo Yehowa, tee si nɛ o kɛ lɛ nɛ ya kpe, nɛ́ o tsɛ̃ lɛ kɛ fɔ si;

Ngɔɔ o klaate ɔ kɛ kpɔ̃ mi* ngɛ yiwutsotsɛ dɛ;

14 Oo Yehowa, moo ngɔ o nine kɛ kpɔ̃ mi;

Kpɔ̃ mi kɛ je nihi nɛ a ngɛ je* nɛ ɔ mi, nɛ́ a náa a blɔ fa mi nɔ́ ngɛ si himi nɛ ɔ mi ɔ a dɛ mi,

Nihi nɛ o haa nɛ a tɔɔ kɛ ní kpakpahi nɛ o kɛ haa,

Nɛ́ a siɔ gbosi ní kɛ haa a bimɛ babauu ɔ.

15 Se imi lɛɛ, ma hi si kaa dalɔ konɛ ma na o hɛ mi;

Ke ye hɛ tsɛ̃ nɛ i na mo ɔ, ye bua jɔɔ.

Ye Mawu ɔ ji ye tɛsa, e ngɔ lɛ i saa we ngɛ,

Lɛ ji ye tsɛ̃i kɛ ye yi wami hemi koli,* ye wesa he nɛ ngɛ slɔkee.*

 3 I ngɛ Yehowa, nɔ nɛ sa yi jemi ɔ tsɛe,

Nɛ e ma kpɔ̃ mi kɛ je ye he nyɛli ɔmɛ a dɛ mi.

 4 Gbenɔ kpã amɛ bɔle mi kɛ kpe;

Yaka nimli nɛ a ngɛ kaa nyu nɛ ngɛ bee babaaba wo ye he gbeye.

 5 Yɔkɔ* kpã amɛ bɔle mi kɛ kpe;

Gbenɔ klama amɛ kɛ mi ba kpe.

 6 Ngɛ ye haomi be mi ɔ, i tsɛ Yehowa,

I ya nɔ nɛ i fo ya kɛ bi ye Mawu ɔ yemi kɛ buami.

E nu ye gbi ngɛ e sɔlemi we ɔ,

Nɛ ya nɛ i fo kɛ bi yemi kɛ buami ɔ su e tue mi.

 7 Kɛkɛ nɛ zugba a bɔni mimiɛmi, nɛ e hoso;

Yoku ɔmɛ a sisi tomi ɔmɛ hoso

Nɛ a mimiɛ kɛ ya kɛ ba, ejakaa a wo e mi mi la.

 8 Lasuku je e gugwɔ mi,

Nɛ la nɛ sãã nɔ́ je e nya mi;

La ngu hɛuu tso kɛ je e ngɔ.

 9 E ha nɛ hiɔwe nya ba si benɛ e ngɛ si kplee ɔ,

Nɛ diblii kpii ngɛ e nane si.

11 Nɛ e ngɔ diblii kɛ ha e he,

E kɛ ha e he tsuo kɛ kpe kaa bo tsu,

Ngɛ nyu nɛ yu tuu kɛ bɔku kpii mi.

12 E hɛ mi nɛ ngɛ kpɛe ɔ he je ɔ,

Gbiɛ ngo ngu kɛ la ngu hɛuu je bɔku ɔmɛ a mi.

13 Kɛkɛ nɛ Yehowa ha nɛ hiɔwe bɔni simi;

Nɔ Nɛ E Nɔ Kuɔ Pe Kulaa a ha nɛ a nu e gbi

Nɛ gbiɛ ngo ngu kɛ la ngu hɛuu je bɔku ɔ mi kɛ ba.

14 E tsɛ̃ e kɛ̃ɛ̃ mi bi ɔmɛ, nɛ e gbɛ mɛ ngɔ fĩa;

E ha nɛ e we oslabai ɔ gba, nɛ a juɛmi gbɛ.

15 A na pa amɛ* a sisi heii;

Oo Yehowa, ngɛ o hɛ mi kami ɔ kɛ o gugwɔ mi flimi ɔ he je ɔ,

A na zugba a sisi tomi ɔmɛ.

16 E kpa e nine mi kɛ je hiɔwe;

E pɛtɛ ye he nɛ e gbla mi kɛ je nyu nɛ mi kuɔ mi.

17 E kpɔ̃ mi kɛ je ye he nyɛlɔ nɛ he wa a dɛ mi,

Kɛ je ni nɛmɛ nɛ a nyɛɔ mi, nɛ a he wa pe mi ɔ a dɛ mi.

18 A te si kɛ wo mi ngɛ ye amanehlu ligbi ɔ nɔ,

Se Yehowa ye bua mi.

19 E ngɔ mi kɛ ba he ko nɛ ngɛ slɔkee;*

E kpɔ̃ mi, ejakaa e bua jɔ ye he.

20 Yehowa jɔɔ mi ngɛ ye dami ɔ nya;

E woɔ mi hiɔ ngɛ bɔ nɛ ye nine he tsɔ ha a nya.

21 Ejakaa i nyɛɛɔ Yehowa blɔ ɔmɛ a nɔ,

I ji ye Mawu ɔ se nɛ́ lɔ ɔ ba pee yayami ha mi.

22 Ye hɛ ngɛ e kojomi ɔmɛ tsuo a nɔ;

I be ye hɛ mae kɛ fɔ e blɔ tsɔɔmi ɔmɛ a nɔ.

23 Piami ko be ye he hie ngɛ e hɛ mi,

Nɛ ma yu ye he ngɛ yayami he.

24 Yehowa nɛ wo mi hiɔ ngɛ ye dami ɔ nya;

Ngɛ bɔ nɛ ye nine he tsɔ ngɛ e hɛ mi ɔ nya.

25 Nɔ nɛ yeɔ anɔkuale ɔ, o yeɔ lɛ anɔkuale;

Nɔ nɛ piami ko be e he ɔ, o haa nɛ e naa kaa piami ko be o he;

26 Nɔ nɛ he tsɔ ɔ, o haa nɛ e naa kaa o he tsɔ,

Se nɔ nɛ sisiɔ nɔ ɔ, o haa nɛ e naa kaa o le ga.

27 Ejakaa o heɔ nihi nɛ a ní ngɛ mɔbɔ* ɔ a yi wami,

Se o baa he nɔ woli* si.

28 Oo Yehowa, mo lɛ o suɔ ye kane ɔ,

Ye Mawu ɔ haa nɛ ye diblii peeɔ la.

29 Ngɛ o yemi kɛ buami nya a, ma nyɛ ma tua basabasa peeli;

Ngɛ Mawu he wami nya a, ma nyɛ ma tu gbogbo.

30 Anɔkuale Mawu ɔ blɔ ɔ hi kɛ pi si;

Yehowa munyu ɔ, a tsu he.

32 Anɔkuale Mawu ɔ ji nɔ nɛ woɔ mi he wami,

Nɛ e ma ha nɛ ye blɔ ɔ maa hi kɛ pi si.

33 E haa nɛ ye nane peeɔ kaa afugbɛ nane;

E haa nɛ i daa hehi nɛ ya hiɔwe.

34 E tsɔseɔ ye nine kɛ haa ta hwumi;

Ye kɔni ma nyɛ maa dɔ akɔblee kɛ̃ɛ̃ mi.

35 O haa mi o yi wami hemi tsɛ̃i ɔ,

O hiɔ nine ɔ yeɔ kɛ buaa mi,*

Nɛ o he si bami ɔ peeɔ mi nɔmlɔ ngua.

36 O ha nɛ ye nane blɔ ɔ bli gbajaa;

Ye nane* be sanee.

37 Ma fiee ye he nyɛli ɔmɛ a se, nɛ ye nine maa su a nɔ;

I be ye se kpalee kɛ ya si be nɛ a hɛ mi ma kpata pɛsɛpɛsɛ.

38 Nɛ ma fiaa mɛ ní nɛ a be si tee hu;

A maa nɔ ngɛ ye nane nya.

39 O ma ha mi he wami nɛ ma kɛ hwu ta a;

O ma ha nɛ ye he nyɛli ɔmɛ maa nɔɔ si ngɛ ye hɛ mi.

40 O ma ha nɛ ye he nyɛli ɔmɛ maa tu fo ngɛ ye hɛ mi;*

Nɛ ni nɛmɛ nɛ a nyɛɔ mi ɔ, ma kpata a hɛ mi.*

41 A foɔ ya kɛ biɔ yemi kɛ buami, se nɔ ko be nɛ ma he a yi wami;

A foɔ ya kɛ tsɛɔ Yehowa po, se e pui a nya mi.

42 Ma si* mɛ bukɔbukɔ kaa bunyuku nɛ kɔɔhiɔ muɔɔ kɛ yaa;

Ma sake mɛ kɛ pue he kaa mɔsɔ ngɛ gbɛjegbɛ ɔmɛ a nɔ.

44 Amaniɛ bɔmi kɛkɛ nɛ́ a maa nu ɔ ma ha nɛ a maa bu mi tue;

Ma se bi ma ba kplã si ngɛ ye hɛ mi.

45 Ma se bi a kɔni mi ma jɔ̃;*

A maa je a he piɛ pomi he ɔmɛ kɛ ba kɛ he domi blibliibli.

47 Anɔkuale Mawu ɔ yeɔ lue kɛ haa mi;

E baa ni ɔmɛ si kɛ woɔ ye sisi.

48 E kpɔ̃ɔ mi kɛ jeɔ ye he nyɛli nɛ a mi mi fu ɔ a dɛ mi;

O woɔ ye nɔ kɛ yaa tsitsaa nɛ nihi nɛ a tuaa mi ɔ a nine sui ye nɔ;

O heɔ ye yi wami kɛ jeɔ yiwutsotsɛ ɔ dɛ mi.

49 Oo Yehowa, enɛ ɔ he je nɛ ma wo o hɛ mi nyami ngɛ je ma amɛ a kpɛti ɔ nɛ,

Nɛ ma la yi jemi lahi* kɛ ha o biɛ ɔ.

50 E peeɔ ní nguanguahi kɛ heɔ e matsɛ ɔ yi wami;*

E jeɔ suɔmi nɛ se pui kpo kɛ tsɔɔ nɔ nɛ e pɔ lɛ nu ɔ,

Kɛ tsɔɔ David kɛ e nina* kɛ yaa neneene.

19 Nibɔ níhi nɛ ngɛ hiɔwe ɔ ngɛ Mawu hɛ mi nyami ɔ jajee;

Níhi nɛ ngɛ kɔɔhiɔ mi ɔ jajeɔ o nine nya ní tsumi ɔ kɛ tsɔɔ.

 2 Daa ligbi ɔ, a woɔ gbi,

Nɛ nyɔ mi fɛɛ nyɔ mi ɔ, a jeɔ nile kpo.

 3 A de we nɔ́ ko, nɛ munyu ko ji a nya;

A gbi hu a nui.

 4 Se a pɛmi ɔ* ya su zugba a nɔ tsuo,

Nɛ nihi nɛ ngɛ a zugba a nyagbe he ɔmɛ ɔ nu a sɛ gbi ɔ.

E ma bo tsu kɛ ha pu ɔ ngɛ hiɔwe;

 5 E ngɛ kaa ayɛflo huno nɛ je kpo ngɛ yo kpeemi tsu mi kɛ ma;

E nyaa kaa nyumu he walɔ nɛ ngɛ fo nɔ.

 6 E jeɔ kpo ngɛ hiɔwe nyagbe he kake,

Nɛ e bɔleɔ si kɛ yaa hiɔwe nyagbe he kpa;

Nɛ nɔ́ ko nɔ́ ko be nyɛe maa laa e he ngɛ e la dɔmi ɔ nya.

 8 Yehowa fami ɔmɛ da, e haa nɛ nɔ tsui nyaa;

Yehowa mlaa a he tsɔ, e haa nɛ nɔ hɛngmɛ nɔ tsɔɔ.

10 A he ngɛ akɔnɔ pe sika tsu,

Pe sika tsu ngmingmiingmi babauu,*

A ngɔɔ pe hwo, hwo nɛ dɛɛ kɛ jeɔ hwo gbakuhi a mi.

11 A kɛ bɔ o sɔmɔlɔ ɔ kɔkɔ;

Nɔ nɛ e kɛ tsuɔ ní ɔ náa he se babauu.

13 Nɛ koo ngmɛ o sɔmɔlɔ ɔ blɔ nɛ e pee he nɔ womi níhi;

Ko ha nɛ a ye ye nɔ.

Kɛkɛ ɔ, ye he maa su kɛ pi si.

Nɛ ma ye ye he ngɛ yayami nguanguahi a he.*

14 Oo Yehowa, ye Tɛsa kɛ ye Kpɔlɔ,

Ha nɛ ye nya mi munyuhi kɛ ye tsui mi susumi nɛ sa o hɛ mi.

 2 É je e he klɔuklɔu ɔ kɛ ye bua mo

Nɛ́ e je Zion kɛ baa o yi.

 3 É kai afɔlehi nɛ o kɛ ba kaa nike ní ɔ tsuo;

É kplɛɛ o sami afɔle ɔ nɔ.* (Sela)

 4 É ha mo níhi nɛ o tsui suɔ,

Nɛ́ e ha nɛ o blɔ nya tomihi* tsuo nɛ ye manye.

 5 Wa ma kpa ngmlaa kɛ bua jɔmi ngɛ o yi wami hemi níhi nɛ o pee ɔmɛ a he;

Wa ma wo wa aflangaa amɛ a nɔ ngɛ wa Mawu ɔ biɛ mi.

E jeɔ e he klɔuklɔu ɔ ngɛ hiɔwe ɔ kɛ haa lɛ heto

Nɛ e kɛ e hiɔ nine peeɔ ní* nguahi kɛ heɔ e yi wami.

 7 Ni komɛ ngɔɔ a hɛ kɛ fɔɔ ta zugba lɛhi a nɔ, nɛ ni komɛ hu ngɔɔ a hɛ kɛ fɔɔ okpɔngɔhi a nɔ,

Se wɔɔ lɛɛ wa tsɛɔ Yehowa wa Mawu ɔ biɛ ɔ.

 8 A kplɔ* nɛ a nɔɔ si,

Se wɔɔ lɛɛ wa te si, nɛ wa da wa nane nɔ ekohu.

21 Oo Yehowa, o he wami ɔ mi matsɛ ɔ nyaa ngɛ;

Hyɛ bɔ nɛ e nyaa wawɛɛ ngɛ yi wami hemi ní nɛ o pee ɔmɛ a he ha!

 2 O ha lɛ nɔ́ nɛ e tsui suɔ,

Nɛ nɔ́ nɛ e kɛ e nya bi ɔ, o ha lɛ. (Sela)

 3 Ejakaa o jɔɔ lɛ babauu;

O bu lɛ jlasi nɛ a kɛ sika tsu ngmingmiingmi* pee.

 4 E bi mo wami, nɛ o ha lɛ,

O ha lɛ wami se kɛmi,* wami nɛ ngɛ kɛ yaa neneene.

 6 O jɔɔ lɛ kɛ yaa neneene;

O haa nɛ e bua jɔɔ ejakaa o ngɛ e kasa nya.

 7 Ejakaa matsɛ ɔ ngɔɔ e hɛ kɛ fɔɔ Yehowa nɔ;

Nɔ Nɛ E Nɔ Kuɔ Pe Kulaa a suɔmi nɛ se pui ɔ he je ɔ, e be mimiɛe* gblegbleegble.

 8 O nine maa su o he nyɛli ɔmɛ tsuo a nɔ;

O hiɔ nine maa su nihi nɛ a nyɛɔ mo ɔ a nɔ.

10 O ma kpata a sisi bimɛ a* hɛ mi ngɛ zugba a nɔ,

O ma kpata a nina hɛ mi ngɛ nimli a bimɛ a kpɛti.

11 Ejakaa a to kaa a maa pee nɔ́ yayami kɛ si mo;

A tsɔ gahi se e be manye yee.

12 O maa tsɔ o kɛ̃ɛ̃ ɔ* kɛ ma a nɔ,*

Nɛ o ma ha nɛ a maa kpale a se.

Mɛni he je nɛ o ba he we ye yi wami,

Nɛ o kɛ ye kɛmɛmi ɔ he kɛ ɔ?

 2 Ye Mawu, i yaa nɔ nɛ i tsɛɛ mo piani, nɛ o he we nɔ;

Nɛ nyɔ mi hu, i ma we ye nya.

 3 Se o ngɛ klɔuklɔu,

Israel yi jemi ɔ bɔle mo kɛ kpe.*

 4 O nɔ lɛ wa tsɛmɛ ɔmɛ ngɔ a hɛ kɛ fɔ;

A ngɔ a hɛ kɛ fɔ o nɔ, nɛ o ya nɔ nɛ o kpɔ̃ mɛ.

 5 A kpa ngmlaa kɛ tsɛ mo, nɛ o he a yi wami;

A ngɔ a hɛ kɛ fɔ o nɔ, nɛ a nine nyɛ we si.*

 6 Se imi lɛɛ, gɔgɔ ji mi, pi nɔmlɔ ji mi,

Adesahi yeɔ ye he fɛu,* nɛ nihi pueɔ ye hɛ mi si.

 7 Nihi tsuo nɛ a naa mi ɔ yeɔ ye he fɛu;

A muɔɔ mi, nɛ a huanyaa a yi nɛ a yeɔ ye he fɛu ke:

 9 Mo ji nɔ nɛ je mi kɛ je fɔmi kotoku mi,

Benɛ i ngɛ ye nyɛ nyɔ nya a, o ha nɛ i ngɛ slɔkee.

10 Kɛ je ye fɔmi mi tɔɔ nɛ a ngɔ mi kɛ wo o dɛ;*

Kɛ je ye nyɛ fɔmi kotoku mi tɔɔ ɔ, mo ji ye Mawu.

11 Koo je ye he kɛ ya tsitsaa, ejakaa haomi ngɛ ye kasa nya haa,

Nɛ i be yemi kɛ bualɔ kpa ko.

12 Na ku wawi babauu bɔle mi kɛ kpe;

Bashan na kuhi nɛ a he wa a bɔle mi kɛ kpe.

13 A gbɛ a nya mi hatoo kɛ wo mi,

Kaa jata nɛ e ngɛ huãe kɛ ngɛ lohwe nɛ e nu ɔ mi tsɔtslɔɔe.

14 A plɛ mi pue si kaa nyu;

Ye wu ɔmɛ tsuo je a kpɔji nya amɛ.

Ye tsui pee kaa hwo gbaku;

E ngɛ silee ngɛ ye mi tɔɔ.

15 Ye he wami ta, i pee kaa buɛ nɛ ywia;

Ye lilɛ du ye tɛlo ɔmɛ a he;

O ngɔ mi kɛ yaa zu mi nɛ ma gbo.

16 Ejakaa gbehi bɔle mi kɛ kpe;

A sa ye yi kaa bɔ nɛ yayami peeli a kuu peeɔ ɔ,

A ngɛ ye ninehi kɛ ye nanehi kɔɔe kaa bɔ nɛ jatahi peeɔ ɔ.

18 A gba ye tade ɔmɛ ha a he,

Nɛ a fɔ ye tade ɔ nɔ sɔ.

20 Mo he ye* yi wami ngɛ klaate nya,

Mo kpɔ̃ ye wami nɛ he jua wa a* ngɛ gbe ɔmɛ a nguɛ nya;*

21 Mo he ye yi wami ngɛ jata nya mi, kɛ nga mi na ku ɔmɛ a koli ɔmɛ a kpɛ;

Mo ha mi heto, nɛ o he ye yi wami.

22 Ma jaje o biɛ ɔ kɛ tsɔɔ ye nyɛmimɛ ɔmɛ;

Ma je o yi ngɛ asafo ɔ mi.

24 Ejakaa e ma we e hɛ kɛ fɔɛ nɔ nɛ a waa lɛ yi mi ɔ nɔ́ nami ɔ nɔ, nɛ e pee we lɛ tai hulɔ;

E kɛ e hɛ mi laa we lɛ.

25 Ma je o yi ngɛ asafo ngua a mi;

Ma ye ye kita amɛ a nɔ ngɛ ni nɛmɛ nɛ a yeɔ lɛ gbeye ɔ a hɛ mi.

26 Nihi nɛ a he jɔ ɔ maa ye ní nɛ a maa tɔ;

Nihi nɛ hlaa Yehowa se blɔ ɔ ma je e yi.

28 Ejakaa Yehowa nɔ́ ji matsɛ yemi ɔ nɛ;

E yeɔ je ma amɛ a nɔ.

29 Zugba a nɔ niatsɛmɛ ɔmɛ* tsuo maa ye ní nɛ a ma kplã si;

Nihi tsuo nɛ a yaa zu mi ɔ ma kplã si ngɛ e hɛ mi;

A kpɛti nɔ ko nɔ ko be nyɛe nɛ e baa e wami* yi.

30 A sisi bimɛ* ma sɔmɔ lɛ;

A maa sɛɛ Yehowa he ní ha yi nɔ nɛ maa ba a.

 2 E haa nɛ i jɔɔ ye he ngɛ nga mumu nɔ;

E nyɛɛɔ ye hɛ mi kɛ yaa he jɔɔmi hehi nɛ nyu ngɛ.*

 4 E ngɛ mi kaa i nyɛɛɔ dɔgba nɛ mi wo diblii kpii mi mohu lɛɛ,

Se i yi nɔ́ yaya ko gbeye,

Ejakaa o kɛ mi ngɛ;

O to tsɔ̃mi tso ɔ kɛ o dɛma tso ɔ haa nɛ i hiɔ slɔkee.*

O pɔɔ ye yi mi nu;

Ye kplu ɔ hyi banebane.

 6 Niinɛ, kpakpa peemi kɛ suɔmi nɛ se pui maa nyɛɛ ye se ye wami ligbi ɔmɛ tsuo,

Nɛ ma hi Yehowa we ɔ ye wami ligbi ɔmɛ tsuo.

24 Yehowa nɔ́ ji zugba a kɛ nɔ́ fɛɛ nɔ́ nɛ ngɛ nɔ ɔ,

E nɔ́ ji zugba nɛ baa ní ɔ kɛ nihi nɛ a ngɛ nɔ ɔ tsuo.

 2 Ejakaa e to zugba a sisi saminya ngɛ wo ɔ* nɔ,

Nɛ e kɛ ma si kpɛii ngɛ pahi a nɔ.

 3 Mɛnɔ maa kuɔ kɛ ya Yehowa yoku ɔ nɔ,

Nɛ mɛnɔ maa da si ngɛ e he klɔuklɔu ɔ?

 4 Nɔ fɛɛ nɔ nɛ e nine he tsɔ, nɛ́ e tsui mi hu tsɔ,

Nɛ́ e kɛ ye biɛ* kã we lakpa kita,

Nɛ́ e kã we kita kɛ sisi nɔ hulɔ.

 5 Yehowa maa jɔɔ lɛ,

Nɛ Mawu nɛ heɔ e yi wami ɔ maa bu lɛ dalɔ.*

 6 Ni nɛ ɔmɛ ji yi nɔ nɛ hlaa e se blɔ,

Nihi nɛ hlaa kaa a maa na o hɛ mi, Oo Yakob Mawu. (Sela)

 7 Nyɛ agbohi, nyɛ wo nyɛ yi nɔ;

Nyɛ blema sinyahi, nyɛ bli,*

Konɛ Matsɛ nɛ e hɛ mi ngɛ nyami ɔ nɛ sɛ mi!

Lɛ ji Yehowa, nɔ nɛ e he wa wawɛɛ ɔ,

Lɛ ji Yehowa, tatsɛ kpanaa a.

 9 Nyɛ agbohi, nyɛ wo nyɛ yi nɔ;

Nyɛ blema sinyahi, nyɛ bli,

Konɛ Matsɛ nɛ e hɛ mi ngɛ nyami ɔ nɛ sɛ mi!

 2 Ye Mawu, i ngɔ ye hɛ kɛ fɔ o nɔ;

Ko ha nɛ ye hɛ mi nɛ pue si.

 3 Niinɛ, nihi nɛ a ngɔɔ a hɛ kɛ fɔɔ o nɔ ɔ, a ti nɔ ko nɔ ko hɛ mi be si puee,

Se nihi nɛ a tsɔɔ nɔ nɛ e pee we nɔ ko se blɔ ɔ, a hɛ mi ma pue si.

 4 Ao Yehowa, mo ha nɛ ma le o blɔ ɔmɛ;

Tsɔɔ mi o blɔ ɔmɛ.

 5 Ha nɛ ma nyɛɛ ngɛ o we anɔkuale ɔ mi, nɛ́ o tsɔɔ mi ní,

Ejakaa mo ji Mawu nɛ heɔ ye yi wami.

 6 Ao Yehowa, mo kai o mɔbɔ nami kɛ o suɔmi nɛ se pui

Nɛ́ o jeɔ kpo be fɛɛ be ɔ.*

Ao Yehowa, mo kai mi ngɛ o suɔmi nɛ se pui ɔ nya,

Ngɛ o kpakpa peemi ɔ he je.

 9 E ma kudɔ nihi nɛ a he jɔ ɔ konɛ a pee nɔ́ nɛ da,*

Nɛ e maa tsɔɔ nihi nɛ a he jɔ ɔ e blɔ ɔ.

10 Suɔmi nɛ se pui kɛ anɔkuale yemi ngɛ Yehowa blɔ ɔmɛ tsuo a nɔ

Kɛ ha nihi nɛ a yeɔ e somi ɔ kɛ e kaimi ɔmɛ a nɔ ɔ.

11 Ao Yehowa, e ngɛ mi kaa ye tɔmi ɔmɛ kle mohu lɛɛ,

Se o biɛ ɔ he je ɔ, moo ngɔ kɛ ke mi.

13 E* ma ná nɔ́ kpakpa,

Nɛ e sisi bimɛ a* nine maa su zugba a nɔ.

14 Nihi nɛ yeɔ Yehowa gbeye ɔ, mɛ lɛ huɛ bɔmi gbagbanii ngɛ a kɛ lɛ a kpɛti,

Nɛ e haa nɛ a leɔ e somi ɔ.

15 Ye hɛ ngɛ Yehowa nɔ be fɛɛ be,

Ejakaa e ma je ye nane ngɛ ya mi.

16 Mo plɛ o hɛ mi kɛ tsɔɔ mi nɛ o na mi mɔbɔ,

Ejakaa imi nɔ kake pɛ lɛ piɛ, nɛ i be yemi kɛ bualɔ ko.

17 Ye tsui mi haomi ɔmɛ hiɛ babauu;

Mo kpɔ̃ mi ngɛ ye nɔ́ nami ɔ mi.

18 Moo hyɛ ye haomi ɔ kɛ ye nyagba a,

Nɛ́ o ngɔ ye he yayami ɔmɛ tsuo kɛ ke mi.

19 Hyɛ bɔ nɛ ye he nyɛli ɔmɛ a he hiɛ ha,

Kɛ bɔ nɛ a ngɛ mi nyɛe ngmlikiti ha.

21 Anɔkuale yemi kɛ dami nɛ́ po ye he piɛ,

Ejakaa i ngɔ ye hɛ kɛ fɔ o nɔ.

26 Oo Yehowa, moo kojo mi, ejakaa i yeɔ mo anɔkuale;

I ngɛ hɛ kɛ nɔ fɔmi ngɛ Yehowa mi, nɛ ye hɛ kɛ nɔ fɔmi ɔ mimiɛ we.

 2 Oo Yehowa, moo hyɛ ye mi, nɛ o ka mi nɛ o hyɛ;

Moo tsu ye susumi* kɛ ye tsui he.

 3 I pueɔ ye yi mi tɛ ngɛ o suɔmi nɛ se pui ɔ he be fɛɛ be,

Nɛ i nyɛɛɔ ngɛ o we anɔkuale ɔ mi.

 4 I kɛ nɔ sisili bɔɛ,*

Nɛ i yuɔ ye he ngɛ osatotsɛmɛ* a he.

 5 I sume he nɛ yayami peeli bua a he nya ngɛ,

Nɛ i kɛ yiwutsotsɛmɛ bɔɛ.*

 6 Oo Yehowa, ma fɔ ye dɛ kɛ tsɔɔ kaa sane ko be ye he,

Nɛ ma nyɛɛ kɛ bɔle o we afɔle sami latɛ ɔ,

 7 Konɛ ma ha nɛ a nu ye sina a he,

Nɛ́ ma jaje nyakpɛ níhi nɛ o peeɔ ɔ kɛ tsɔɔ.

 8 Yehowa, i suɔ we nɛ o ngɛ mi ɔ,

He nɛ o hɛ mi nyami ɔ ngɛ ɔ.

 9 Koo bɛɛ mi* kɛ piɛɛ yayami peeli a he kɛ ho,

Nɛ koo gbe mi kɛ piɛɛ yiwutsotsɛmɛ* a he hulɔ,

10 Nɛ ji nihi nɛ a kɛ a nine tsuɔ zo ní,

Nɛ́ nyɔ mi ní hyi a hiɔ nine mi tɔ ɔ.

12 Ye nane maa si ngɛ he nɛ ngɛ slɔkee;

Ma je Yehowa yi ngɛ asafo ngua* a mi.

 2 Benɛ nimli yayamihi nɛ a ji ye he nyɛli ba tua mi konɛ a ngɔ ye wami ɔ,

Mɛ nitsɛmɛ a tɛ si nɛ a nɔɔ si.

 3 Ke tabo ba tua mi po,

Ye tsui be poe.

Ke ta ba ná mi ɔ,

Lɔ ɔ po ma ya nɔ nɛ ma ngɔ ye hɛ kɛ fɔ Mawu nɔ.

 4 Nɔ́ kake lɛ i bi ngɛ Yehowa dɛ

—Lɔ ɔ nɛ ma hyɛ blɔ—

Kaa ma hi Yehowa we ɔ ye wami ligbi ɔmɛ tsuo,

Konɛ ma na bɔ nɛ Yehowa hi ha a,

Nɛ́ i kɛ bua jɔmi nɛ hyɛ e sɔlemi we* ɔ.*

 5 Ejakaa e maa ngɔ mi kɛ laa ngɛ e gba a sisi ngɛ haomi ligbi ɔ nɔ;

E maa ngɔ mi kɛ laa ngɛ e bo tsu ɔ mi;

E maa ngɔ mi kɛ da tɛsa nɛ ya hiɔwe nɔ.

 6 Amlɔ nɛ ɔ, i ye ye he nyɛli nɛ a bɔle mi kɛ kpe ɔ nɔ kunimi;

I kɛ bua jɔmi ngmlaa maa sã afɔlehi ngɛ e bo tsu ɔ mi;

Ma la yi jemi lahi* kɛ ha Yehowa.

 7 Oo Yehowa, ke i wo ye gbi nɔ kɛ tsɛ mo ɔ, moo bu mi tue;

Moo na mi mɔbɔ nɛ o he mi nɔ.

Mo ji ye yemi kɛ bualɔ;

Ye Mawu nɛ heɔ ye yi wami, ko kua mi, nɛ ko si mi hulɔ.

10 Ke imi nitsɛ ye tsɛ kɛ ye nyɛ kua mi po ɔ,

Yehowa maa ngɔ mi.

11 Oo Yehowa, moo tsɔɔ mi ní ngɛ o blɔ ɔ nɔ,

Ye he nyɛli ɔmɛ a he je ɔ, moo tsɔɔ mi dami blɔ ɔ.

12 Koo ngɔ mi kɛ wo ye he nyɛli ɔmɛ a* dɛ mi,

Ejakaa lakpa odase yeli te si kɛ wo mi,

Nɛ a ngɛ hlae nɛ a ye mi awi.

13 Ke i be hemi kɛ yemi kaa ma na Yehowa kpakpa peemi ɔ

Ngɛ hɛ kali a zugba a nɔ ɔ, jinɛ jije i ko hi?*

14 Ngɔɔ o hɛ kɛ fɔ Yehowa nɔ;

Moo pee kã, nɛ́ o he nɛ wa.

28 Oo Yehowa, ye Tɛsa, mo lɛ i yaa nɔ nɛ i tsɛɔ;

Koo tsi o tue kɛ wo mi.

Ke o pui ye nya mi ɔ,

Ma pee kaa nihi nɛ a gbo ɔ.*

 2 Ke i plɛ ye hɛ mi kɛ tsɔɔ he nɛ o we klɔuklɔu ɔ se tsu ɔ ngɛ ɔ nɛ i wo ye nine nɔ,

Nɛ i fo ya kɛ tsɛ mo ɔ, moo bu ye pɛɛ kpami ɔ tue,

 3 Koo gbla mi kɛ piɛɛ yiwutsotsɛmɛ, nɛ ji nihi nɛ a peeɔ níhi nɛ yeɔ nɔ awi ɔ a he kɛ ho,

Nihi nɛ a kɛ a nyɛmi nɔmlɔ tuɔ tue mi jɔmi munyuhi, se a tsui mi hyi tɔ kɛ ní yayamihi ɔ.

 4 Moo wo mɛ hiɔ ngɛ a ní peepee ɔmɛ a he,

Ngɛ ní yayamihi nɛ a peeɔ ɔ nya.

Moo wo mɛ hiɔ ngɛ a nine nya ní tsumi ɔmɛ a he,

Ngɛ níhi nɛ a pee ɔmɛ a nya.

 5 Ejakaa a kɛ a juɛmi yɛ níhi nɛ Yehowa pee ɔmɛ a nɔ,

Aloo e nine nya ní tsumi ɔmɛ a nɔ.

 6 A je Yehowa yi,

Ejakaa e nu pɛɛ nɛ i kpa lɛ kaa e ye bua mi ɔ.

 7 Yehowa ji ye he wami kɛ ye tsɛ̃i;

I ngɔ ye hɛ kɛ fɔ e nɔ kɛ ye tsui tsuo.

E yeɔ bua mi, nɛ ye tsui nyaa,

Lɔ ɔ he ɔ, ma la kɛ je e yi.

 8 Yehowa ji he wami kɛ ha e we bi;

E ji he piɛ pomi he, nɛ e heɔ nɔ nɛ e pɔ lɛ nu ɔ yi wami.

29 Nyɛ je Yehowa yi, nyɛ he wali a bimɛ,

Nyɛ je Yehowa yi ngɛ e hɛ mi nyami kɛ e he wami ɔ he je.

 3 A nuɔ Yehowa gbi ɔ ngɛ nyu ɔmɛ a nɔ;

Mawu nɛ hɛ mi ngɛ nyami ɔ wo gbi.

 4 Yehowa gbi ɔ, he wami ngɛ mi;

Yehowa gbi ɔ hɛ mi nyami ngɛ mi.

 5 Yehowa gbi ɔ ngɛ seda tso ɔmɛ kue;

Ee, Yehowa ku Lebanon seda tso ɔmɛ.

 6 E haa nɛ Lebanon* tuɔ kaa na bi,

Nɛ Sirion tuɔ kaa nga mi na ku wayoo.

 7 Yehowa gbi ɔ haa nɛ la kpɛɔ plamplam;

 8 Yehowa gbi ɔ haa nɛ nga mimiɛɔ;

Yehowa haa nɛ Kadesh nga a mimiɛɔ.

 9 Yehowa gbi ɔ haa nɛ afugbɛ tsui poɔ, nɛ e fɔɔ bi,

Nɛ e haa nɛ tsohi taa hue tso ɔmɛ a mi.

10 Yehowa hii si ngɛ matsɛ sɛ nɔ ngɛ nyu babauu ɔ* yi nɔ;

Yehowa hii si ngɛ matsɛ sɛ nɔ kaa Matsɛ kɛ yaa neneene.

30 Oo Yehowa, ma wo o hɛ mi nyami, ejakaa o wo ye nɔ;

O ha we nɛ ye he nyɛli ɔmɛ nɛ a nya ngɛ ye nɔ́ nami ɔ he.

 4 Nyɛ la yi jemi lahi* kɛ ha Yehowa, nyɛ nihi nɛ nyɛ yeɔ lɛ anɔkuale,

Nyɛɛ kɛ sina nɛ ha e biɛ* klɔuklɔu ɔ;

 5 Ejakaa e we abofu ɔ se kɛ we ngɛ nɔ nɔ,

Se e dloomi ɔ hiɔ nɔ nɔ ngɛ nɔ ɔ wami be tsuo mi.

 8 Oo Yehowa, mo lɛ i ya nɔ nɛ i tsɛ;

Nɛ Yehowa ji nɔ nɛ i ya nɔ nɛ i kpa lɛ pɛɛ kaa e na mi mɔbɔ.

11 O tsake ye aywilɛho yemi ɔ kɛ pee domi;

O je kpekpe ɔ ngɛ ye he, nɛ o ngɔ bua jɔmi kɛ ha ye he kaa bo,

12 Konɛ ma la* yi jemi la ha mo, nɛ́ ma ko ma ye nya.

Moo pee yoku nɛ poɔ ye he piɛ,

Ma nɛ he wa, konɛ o he ye yi wami.

 3 Ejakaa mo ji ye tɛsa kɛ ye he piɛ pomi he;

O biɛ ɔ he je ɔ, o maa nyɛɛ ye hɛ mi, nɛ o ma kudɔ mi.

 4 O ma je mi kɛ je ya nɛ a wo kɛ tsɔ mi klama ngɛ laami mi ɔ mi,

Ejakaa mo ji ye gbogbo nɛ he wa.

 6 I sume nihi nɛ a jaa amagahi nɛ a he be se nami,

Se imi lɛɛ, i ngɔ ye hɛ kɛ fɔ Yehowa nɔ.

 7 Ma nya wawɛɛ ngɛ o suɔmi nɛ se pui ɔ mi,

Ejakaa o na ye nɔ́ nami ɔ;

O le ye amanehlu babauu ɔ.*

 8 O ngɔɛ mi kɛ wui ye he nyɛlɔ ɔ dɛ mi,

Mohu ɔ, o ha nɛ i da he ko nɛ ngɛ slɔkee.*

10 Ye si himi mi hyi tɔ kɛ aywilɛho yemi sɔuu,

Nɛ ye jeha amɛ hyi tɔ kɛ kɛmɛmi sɔuu.

Ye he wami nɔ ngɛ gbɔe ngɛ ye tɔmi ɔ he je;

Ye wu ɔmɛ gbɔjɔ.

11 Ye he nyɛli tsuo yeɔ ye he fɛu,

Titli ɔ, ye kpɔ mi bi ɔmɛ.

Nɛ ye huɛmɛ yeɔ mi gbeye;

Ke a na mi ngɛ ma mi ɔ, kɛkɛ a tu fo.

12 A je mi kɛ je a tsui* mi, nɛ a hɛ je ye nɔ, e ngɛ kaa nɔ́ nɛ i gbo;

I pee kaa buɛ nɛ ywia.

13 I nu munyu yayahi fuu nɛ nihi tu kɛ kɔ ye he;

Gbeye níhi bɔle mi kɛ kpe.

Ke a bua a he nya, nɛ a pee kake kɛ wo ye he ɔ,

A soɔ ye yi nɔ konɛ a gbe mi.*

Yiwutsotsɛmɛ a hɛ mi nɛ pue si;

Á ma a nya ngɛ Yɔkɔ* mi.

18 Nyahi nɛ yeɔ lakpa a nɛ a pee dii,

Nyahi nɛ a tuɔ he nɔ womi, fĩami, kɛ nɔ buimi munyuhi kɛ siɔ dalɔ ɔ.

O kɛ to ha nihi nɛ yeɔ mo gbeye ɔ, nihi nɛ saa we ngɛ o ngɔ ɔ,

Nɛ o je lɛ kpo ngɛ adesahi tsuo a hɛ mi.

20 O maa ngɔ mɛ kɛ laa ngɛ laami he ɔ ngɛ o hɛ mi,

Kɛ je adesahi a nɛ a soɔ a yi nɔ ɔ a he;

O maa ngɔ mɛ kɛ laa ngɛ o gba a sisi,

Kɛ je nihi nɛ a jɛɔ nɔ ɔ a he.*

21 Á je Yehowa yi,

Ejakaa e je e suɔmi nɛ se pui ɔ kpo kɛ tsɔɔ mi ngɛ nyakpɛ blɔ nɔ ngɛ ma nɛ a sa yi ko mi.

Yehowa poɔ anɔkualetsɛmɛ a he piɛ,

Se e gblaa nɔ fɛɛ nɔ nɛ woɔ e he nɔ ɔ tue wawɛɛ nitsɛ.

24 Nyɛ nihi tsuo nɛ nyɛ ngɛ Yehowa mlɛe,

Nyɛɛ pee kã nɛ nyɛ tsui nɛ ná he wami.

 2 Nɔ nɛ Yehowa bui lɛ fɔ,

Nɛ lakpa be e mi ɔ ngɛ bua jɔmi.

 5 Nyagbenyagbe ɔ, i jaje ye yayami ɔ kɛ tsɔɔ mo;

I laa we ye tɔmi ɔ nɔ.

 6 Enɛ ɔ he je nɛ nɔ fɛɛ nɔ nɛ yeɔ mo anɔkuale ɔ maa sɔle kɛ ha mo

Be mi nɛ he blɔ ngɛ kaa a maa ba o hɛ mi ɔ nɛ.

 7 O ji laami he kɛ ha mi;

O maa po ye he piɛ ngɛ haomi he.

 9 Koo pee kaa okpɔngɔ aloo teji okpɔngɔ nɛ e nui nɔ sisi,

Nɛ́ ke e hɛ mi pee klamaklama a, ja a wo e nya mi kpa aloo a bɔ lɛ pã kɛ kudɔ lɛ

Loko e maa su nɔ he ɔ.”

10 Yiwutsotsɛ nɔ́ nami hiɛ babauu;

Se nɔ nɛ ngɔɔ e hɛ kɛ fɔɔ Yehowa nɔ ɔ, Mawu suɔmi nɛ se pui ɔ bɔle lɛ kɛ kpe.

11 Nyɛ nihi nɛ nyɛ peeɔ nɔ́ nɛ da, nyɛ nya ngɛ Yehowa mi, nɛ́ nyɛ bua nɛ jɔ;

Nyɛ nihi tsuo nɛ nyɛ da ngɛ nyɛ tsui mi, nyɛ he ose.

 2 Nyɛɛ ngɔ kpã saku kɛ na Yehowa si;

Nyɛɛ ngɔ kpã nyɔngma saku kɛ la yi jemi lahi* ha lɛ.

 3 Nyɛ la la ehe ha lɛ;

Nyɛɛ kɛ he bemi nɛ fia kpã saku ɔmɛ, nɛ nyɛ he ose.

 4 Ejakaa Yehowa munyu ɔ da,

Nɛ nɔ́ fɛɛ nɔ́ nɛ e peeɔ ɔ, a ma nyɛ maa fĩa kɛ fɔ nɔ.

 6 Yehowa munyu nya nɛ a pee hiɔwe ɔ,

Nɛ mumi nɛ je e nya mi ɔ nya nɛ a pee nɔ́ fɛɛ nɔ́ nɛ ngɛ hiɔwe ɔ.*

 7 E buaa wo ɔ nya kaa nyu nɛ a ngɔ gbogbo kɛ tsi lɛ blɔ;

E ngɔɔ nyu babauu nɛ pee hamahama a kɛ toɔ nito hehi.

 9 Ejakaa e tu munyu, nɛ níhi ba;

E fã nɛ níhi da si kpɛii.

10 Yehowa puɛ je ma amɛ a ga tsɔmi ɔmɛ;

E puɛ ma amɛ a yi mi tomi* ɔmɛ.

11 Se yi mi kpɔhi nɛ Yehowa mwɔ ɔ* maa hi si kɛ ya neneene;

Níhi nɛ e ma nya si ngɛ e tsui mi ɔ maa hi si yi nɔhi tsuo.

12 Ma nɛ Yehowa ji a Mawu ɔ ngɛ bua jɔmi,

Nihi nɛ e ngɔ kɛ pee lɛ nitsɛ e weto ní ɔ ngɛ bua jɔmi.

13 Yehowa maa e yi si kɛ hyɛɛ zugba;

E naa nimli a bimɛ tsuo.

14 E ngɛ e hi he ɔ,

Nɛ e hyɛɛ nihi nɛ a ngɛ zugba a nɔ ɔ.

15 Lɛ nɛ e peeɔ nɔ fɛɛ nɔ tsui;

E hyɛɛ a ní tsumi ɔmɛ tsuo a mi.

16 Tabo ngua be nyɛe ma he matsɛ ko matsɛ ko yi wami;

Pi he wami ngua nɛ nyumu he walɔ ngɛ ɔ nɛ heɔ e yi wami.

17 Ke o ngɔ o hɛ kɛ fɔ okpɔngɔ nɔ kaa e ma he o yi wami ɔ,* o sisi o he;

E he wami ngua a be nyɛe ma kpɔ̃ mo.

18 Hyɛ! Yehowa hɛngmɛ ngɛ nihi nɛ a yeɔ lɛ gbeye ɔ a he,

Nihi nɛ hyɛɛ e suɔmi nɛ se pui ɔ blɔ ɔ, e hyɛɛ a nɔ,

19 Konɛ e kpɔ̃ mɛ* kɛ je gbenɔ mi,

Nɛ́ e baa a yi ngɛ hwɔ be mi.

21 Wa tsui nyaa ngɛ e mi,

Ejakaa wa ngɛ hɛ kɛ nɔ fɔmi ngɛ e biɛ klɔuklɔu ɔ mi.

22 Oo Yehowa, o suɔmi nɛ se pui ɔ nɛ hi wa nɔ,

Be mi nɛ wa yaa nɔ nɛ wa hyɛɛ mo blɔ ɔ.

34 Ma je Yehowa yi be fɛɛ be;

Ye nya ma je e yi daa.

 2 Ma* fĩa ngɛ Yehowa mi;

Nihi nɛ a he jɔ ɔ maa nu, nɛ a ma nya.

 3 Nyɛɛ piɛɛ ye he nɛ wa wo Yehowa nɔ gojoo;

Nyɛ ha nɛ waa pee kake kɛ wo e biɛ ɔ nɔ gojoo.

 5 Nihi nɛ a ngɔ a hɛ kɛ fɔ e nɔ ɔ ná bua jɔmi;

A hɛ mi be si puee kɔkɔɔkɔ.

 7 Yehowa bɔfo ɔ poɔ nihi tsuo nɛ yeɔ Mawu gbeye ɔ a he piɛ,

Nɛ e kpɔ̃ɔ mɛ.

 8 Nyɛɛ ka* nɛ nyɛɛ hyɛ, nɛ nyɛ maa na kaa Yehowa hi;

Nɔ nɛ saa we ngɛ e ngɔ ɔ ngɛ bua jɔmi.

 9 Nyɛɛ ye Yehowa gbeye, nyɛ e ni klɔuklɔu ɔmɛ tsuo,

Ejakaa nihi nɛ yeɔ lɛ gbeye ɔ, nɔ́ ko hia we mɛ.

10 Jatahi nɛ a he wa* po, hwɔ yeɔ mɛ,

Se nihi nɛ hlaa Yehowa se blɔ ɔ, nɔ́ kpakpa ko be mɛ bɔe.

11 Ye bimɛ, nyɛɛ ba nɛ nyɛ ba bu mi tue;

Ma tsɔɔ nyɛ Yehowa gbeye yemi.

12 Ke o suɔ kaa o ná bua jɔmi ngɛ si himi mi,

Nɛ́ o se nɛ kɛ ngɛ je mi, nɛ o bua nɛ jɔ ɔ,

13 Lɛɛ mo kudɔ o lilɛ ngɛ nɔ́ yayami he,

Nɛ́ o hyɛ o nya nɔ ngɛ lakpa yemi he.

14 Je o he ngɛ nɔ́ yayami he, nɛ́ o pee nɔ́ kpakpa;

Hla tue mi jɔmi se blɔ, nɛ o di se.

15 Yehowa hɛngmɛ ngɛ dali a he,

Nɛ e tue nuɔ ya nɛ a foɔ kɛ biɔ yemi kɛ buami ɔ.

16 Se nihi nɛ peeɔ ní yayamihi ɔ, Yehowa jeɔ e hɛ kɛ piɔ mɛ,

Konɛ e ha nɛ a biɛ nɛ laa ngɛ zugba a nɔ.

17 Dali kpa ngmlaa, nɛ Yehowa nu;

E kpɔ̃ mɛ ngɛ a haomi ɔmɛ tsuo a mi.

18 Yehowa ngɛ nihi nɛ a tsui ku ɔ a kasa nya haa;

E heɔ nihi nɛ a kɔni mi jɔ̃* ɔ a yi wami.

19 Dalɔ nɔ́ nami* hiɛ babauu,

Se Yehowa kpɔ̃ɔ lɛ kɛ jeɔ lɛ tsuo mi.

20 E buɔ e wu ɔmɛ tsuo a he;

Kake ngmelu po ku we.

21 Haomi maa gbe yiwutsotsɛ;

Nihi nɛ a nyɛɔ dalɔ ɔ, a maa bu mɛ fɔ.

22 Yehowa baa e sɔmɔli a wami yi;*

Nihi nɛ saa we ngɛ e ngɔ ɔ, a be a ti nɔ ko fɔ bue.

35 Oo Yehowa, moo fã ye he ngɛ sane nɛ nihi nɛ teɔ si kɛ woɔ mi ɔ kɛ mi ngɛ yee ɔ mi;

O kɛ nihi nɛ a kɛ mi ngɛ hwue ɔ nɛ hwu.

 2 Wo o tsɛ̃i nyafii* ɔ kɛ tsɛ̃i ngua a,

Nɛ́ o te si nɛ o fã ye he.

 5 Á pee kaa tsakati ngɛ kɔɔhiɔ mi;

Yehowa bɔfo ɔ nɛ fiee mɛ kɛ ho.

 6 Ke Yehowa bɔfo ɔ ngɛ a se fiee ɔ,

A blɔ ɔ nɔ nɛ wo diblii, nɛ e nɔ nɛ sane.

 7 Ejakaa a wo ya ngɛ laami mi nɛ a kɛ nu mi be mi nɛ i pee we mɛ nɔ́ ko;

A tsua muɔ konɛ a kɛ nu mi* be mi nɛ i pee we mɛ nɔ́ ko.

 8 Haomi nɛ ba a nɔ tlukaa;

Ya nɛ a wo ngɛ laami mi ɔ nɛ du mɛ nitsɛmɛ;

Á nɔ mi nɛ a hɛ mi nɛ kpata.

 9 Se ma* nya ngɛ Yehowa mi;

Ye bua maa jɔ ngɛ yi wami hemi níhi nɛ e pee ɔmɛ a mi.

O kpɔ̃ɔ nihi nɛ a be yemi kɛ bualɔ ɔ ngɛ nihi nɛ a he wa pe mɛ ɔ a dɛ mi,

O kpɔ̃ɔ nihi nɛ a be yemi kɛ bualɔ kɛ ohiatsɛmɛ ngɛ nihi nɛ a juɔ mɛ ɔ a dɛ mi.”

11 Odase yeli nɛ a ji yiwutsotsɛmɛ ba yeɔ odase kɛ siɔ mi,

Nɛ a ba biɔ mi níhi nɛ i li he nɔ́ ko.

12 A peeɔ mi yayami kɛ toɔ kpakpa nane mi,

Nɛ a haa nɛ i* yeɔ aywilɛho kaa nɔ ko nɛ nɔ gbo lɛ.

13 Se benɛ a be he wami ɔ, i ha kpekpe;

I ha hwɔ kɛ ye ye he* awi,

Nɛ benɛ a ha we ye sɔlemi ɔ heto ɔ,*

14 I nyɛɛ kɛ ya kɛ ba, nɛ i ye kɔmɔ kaa bɔ nɛ ma pee ha ye huɛ aloo ye nyɛmi ɔ;

I kplã si ngɛ aywilɛho yemi mi kaa nɔ nɛ ngɛ e nyɛ nɛ gbo he aywilɛho yee.

15 Se benɛ i tɛ si ɔ, a nya nɛ a bua a he nya;

A bua a he nya nɛ a wo ye he ka konɛ a fia mi nɔ́;

A gbe ye he guɛ, nɛ a ma we a nya.

16 Nihi nɛ yi Mawu gbeye ɔ yeɔ ye he fɛu nɛ a muɔɔ mi,*

A kpeɔ a lungu nya kɛ woɔ mi.

Mo kpɔ̃ mi* kɛ je a tuami ɔmɛ a mi,

Mo kpɔ̃ ye wami* nɛ he jua wa a kɛ je jatahi* a dɛ mi.

18 Kɛkɛ ɔ, ma na mo si ngɛ asafo ngua a mi;

Ma je o yi ngɛ nimli babauu ɔ a kpɛti.

19 Ko ha nɛ nihi nɛ i ba pee a he nyɛlɔ yaka gu ɔ nɛ a nya ngɛ ye nɔ́ nami ɔ he;

Ko ha nɛ nihi nɛ a nyɛɔ mi yaka gu ɔ nɛ a ye ye he fɛu.*

20 Ejakaa a tui tue mi jɔmi munyuhi,

Mohu ɔ, a toɔ ga yaya kɛ siɔ nihi nɛ a suɔ tue mi jɔmi ngɛ zugba a nɔ ɔ.

21 A gbɛɔ a nya mi hatoo kɛ tuɔ munyu kɛ siɔ mi,

A deɔ ke: “Ɛhɛɛ! Ɛhɛɛ! Waa kɛ wa hɛngmɛ na.”

23 Moo bu mi tue nɛ o te si nɛ o ba fã ye he,

Yehowa, ye Mawu, moo fã ye he ngɛ sane nɛ i ná a mi.

24 Ao Yehowa ye Mawu, moo kojo mi ngɛ o dami ɔ nya;

Ko ha nɛ a nya ngɛ ye nɔ́ nami ɔ he.

26 Nihi nɛ a nyaa ngɛ ye nɔ́ nami ɔ he ɔ,

Ha nɛ zo nɛ gbe mɛ tsuo, nɛ a hɛ mi nɛ pue si.

27 Se nihi tsuo nɛ a bua jɔɔ dami ní nɛ i pee ɔ he ɔ, a kɛ bua jɔmi nɛ he ose;

Be fɛɛ be ɔ, a de ke:

28 Nɛ ye lilɛ maa jaje dami ní nɛ o pee ɔ,*

Nɛ e ma je o yi ngɛ ligbi ɔ mi tsuo.

36 Nɔ́ yayami kudɔɔ yiwutsotsɛ tsui;

Mawu gbeye yemi be e mi.*

 2 Ejakaa e buɔ e he kaa e he hia tsɔ̃,

Nɛ e nɛ e tɔmi ɔ nɛ́ e ma kpa jã peemi.

 3 E nya mi munyu yeɔ nɔ awi nɛ e sisiɔ nɔ;

E kɔ we nɔ́ se konɛ e maa pee nɔ́ kpakpa.

E nyɛɛɔ ngɛ blɔ nɛ hí nɔ;

E kua we nɔ́ yayami.

 5 Oo Yehowa, o suɔmi nɛ se pui ɔ ya su hiɔwe tɔɔ,

O we anɔkuale yemi ɔ su bɔku ɔ mi.

 6 O dami ɔ ngɛ kaa yoku gojogojoohi;*

O kojomi ɔmɛ ngɛ kaa nyu babauu nɛ mi kuɔ.

 8 A nuɔ o we ɔ mi ní kpakpahi babauu* ɔ nɛ a tɔɔ,

Nɛ o haa nɛ a nuɔ o bua jɔmi nɛ beɔ kaa pa a.

 9 O ngɔ lɛ wami jeɔ;

O la a lɛ haa nɛ wa naa la.

10 Yaa nɔ nɛ o je o suɔmi nɛ se pui ɔ kpo kɛ tsɔɔ nihi nɛ a le mo ɔ,

Nɛ o je o dami ɔ kpo kɛ tsɔɔ nihi nɛ a da ngɛ a tsui mi ɔ.

11 Ko ha nɛ he nɔ woli a nane nɛ naa ye nɔ,

Aloo yiwutsotsɛmɛ a nine nɛ fiee mi kɛ ho.

12 Lejɛ ɔ nɛ yayami peeli ɔmɛ nɔ si ngɛ;

A tsɛ̃ mɛ kɛ ko si nɛ a be nyɛe maa te si hu.

37 O mi mi nɛ ko fu* ngɛ yiwutsotsɛmɛ a he je,

Nɛ o hɛ hu nɛ ko kɔ̃ yayami peeli a nɔ.

 2 E be kɛe kulaa nɛ a ma gbli kaa nga,

Nɛ a ma ngla kaa bɔ nɛ nga mumu nglaa a.

 3 Ngɔɔ o hɛ kɛ fɔ Yehowa nɔ nɛ o pee nɔ́ kpakpa;

Moo hi zugba a nɔ nɛ o ye anɔkuale.

 4 O bua nɛ jɔ wawɛɛ ngɛ Yehowa mi,*

Nɛ e ma ha mo níhi nɛ o tsui suɔ.

 5 Tuu o blɔ ɔ kɛ wo Yehowa dɛ;*

Ngɔɔ o hɛ kɛ fɔ e nɔ, nɛ e ma tsu níhi a he ní ha mo.

 6 E ma ha nɛ o dami ɔ ma kpɛ kaa mɔtu pu la,

Nɛ o dami sane yemi ɔ hu ma kpɛ kaa pu nɛ ngɛ tsoe piani katakata.

 7 Pee dii ngɛ Yehowa hɛ mi,

Nɛ́ o hyɛ lɛ blɔ wawɛɛ.*

Ke nɔ ko to ga yaya nɛ e nyɛ tsu he ní ɔ,

Ko ha nɛ lɔ ɔ nɛ wo o mi mi la.

 8 Ha abofu se nɛ po, nɛ́ o ngmɛɛ mi mi fumi he;

O mi mi nɛ ko fu nɛ o ba pee yayami.*

 9 Ejakaa a ma kpata yayami peeli a hɛ mi,

Se nihi nɛ ngɔɔ a hɛ kɛ fɔɔ Yehowa nɔ ɔ, a nine maa su zugba a nɔ.

10 E piɛ bɔɔ pɛ nɛ yiwutsotsɛmɛ* be si hie hu;

O maa hyɛ a hi he ɔmɛ,

Se o be mɛ nae.

11 Se nihi nɛ a he jɔ ɔ, a nine maa su zugba a nɔ,

Nɛ a bua maa jɔ wawɛɛ ejakaa a ma ná tue mi jɔmi nitsɛnitsɛ.

12 Yiwutsotsɛ soɔ dalɔ yi nɔ;

E kpeɔ e lungu nya kɛ woɔ lɛ.

13 Se Yehowa maa muɔ lɛ,

Ejakaa e le kaa e be maa ba.

14 Yiwutsotsɛmɛ hiaa a klaate ɔmɛ, nɛ a dɔɔ a kɛ̃ɛ̃ ɔmɛ

Konɛ a kɛ ha nɛ nihi nɛ a waa mɛ yi mi kɛ ohiatsɛmɛ nɛ a nɔ si,

Nɛ́ a gbe nihi nɛ a blɔ da a.

15 Se a klaate ɔmɛ maa gbɔ mɛ nitsɛmɛ a tsui mi;

A kɛ̃ɛ̃ ɔmɛ maa ku.

16 Nɔ́ ko bɔbɔyoo nɛ dalɔ ngɛ ɔ

Hi pe ní babauu nɛ yiwutsotsɛmɛ ngɛ.

17 Ejakaa yiwutsotsɛmɛ a he wami maa ta,

Se Yehowa maa ye bua dali.

18 Yehowa le nɔ́ nɛ nɔ nɛ piami ko be e he ɔ ngɛ mi gblee,*

Nɛ a weto ní maa hi si kɛ maa ya neneene.

19 A hɛ mi be si puee ngɛ haomi be mi;

Hwɔ be mi ɔ, a ma ná ní babauu ma ye.

20 Se yiwutsotsɛmɛ a hɛ mi ma kpata;

Yehowa he nyɛli maa laa kaa bɔ nɛ nga mumu nglaa a;

A maa laa kaa lasuku.

21 Yiwutsotsɛ paa nɔ́, nɛ e wui,

Se dalɔ mi mi jɔ,* nɛ e haa nɔ nɔ́.

22 Nihi nɛ Mawu jɔɔ mɛ ɔ, a nine maa su zugba a nɔ,

Se nihi nɛ e gbiɛ mɛ ɔ, a hɛ mi ma kpata.

23 Ke Yehowa bua jɔ nɔ ko blɔ he ɔ

E kudɔɔ jamɛatsɛ ɔ nane hiami.*

24 E ma nyɛ maa nɔ si, se e be lejɛ ɔ tlɔe,

Ejakaa Yehowa maa pɛtɛ e nine he kɛ wo e nɔ.*

25 Kɛ je ye nihe mi kɛ ba si ye bwɔmi si nɛ ɔ,

I nɛ kaa Mawu kua dalɔ ko gblee,

Nɛ e bimɛ hu, i nɛ kaa a ngɛ niye ní* bae.

26 Be fɛɛ be ɔ, e paa nɔ́ ha nɔ faa,

Nɛ Mawu maa jɔɔ e bimɛ.

27 Je o he kɛ je nɔ́ yayami he, nɛ́ o pee nɔ́ kpakpa,

Nɛ o maa hi si kɛ maa ya neneene.

28 Ejakaa Yehowa suɔ dami sane yemi,

Nɛ e be nihi nɛ a yeɔ lɛ anɔkuale ɔ kuae.

E maa bu a he be fɛɛ be;

Se yiwutsotsɛmɛ a sisi bimɛ lɛɛ, a hɛ mi ma kpata.

29 Dali a nine maa su zugba a nɔ,

Nɛ a maa hi nɔ kɛ ya neneene.

30 Dalɔ nya tuɔ juɛmi munyu,*

Nɛ e lilɛ tuɔ dami sane yemi he munyu.

31 E Mawu ɔ mlaa a ngɛ e tsui mi;

Ke e ngɛ nyɛɛe ɔ, e be sanee.

32 Yiwutsotsɛ hwɔɔ dalɔ,

Nɛ e hlaa kaa e maa gbe lɛ.

33 Se Yehowa be e he ngmɛɛe kɛ wo jamɛatsɛ ɔ dɛ mi,

Nɛ ke e kojo lɛ hu ɔ, e be lɛ fɔ bue.

34 Ngɔɔ o hɛ kɛ fɔ Yehowa nɔ nɛ o nyɛɛ e blɔ ɔ nɔ,

Nɛ e ma wo o nɔ konɛ o nine nɛ su zugba a nɔ.

35 I na nɔmlɔ yayami ɔ nɛ ji yiwutsotsɛ ɔ,

Nɛ́ e ngɛ si hae kaa tso nɛ bɔ kusuu ngɛ zugba nɛ e puɛ ngɛ nɔ ɔ nɔ.

36 Se si kake too ɔ, e laa nɛ a nɛ lɛ hu;

I ya nɔ nɛ i hla lɛ, se i nɛ lɛ.

37 Moo to nɔ nɛ piami ko be e he* ɔ he hɛ,

Nɛ́ o hɛngmɛ nɛ hi dalɔ he,

Ejakaa jamɛatsɛ ɔ ma ná tue mi jɔmi hwɔɔ se.

38 Se a ma kpata nihi tsuo nɛ a tɔ̃ɔ mlaa nɔ ɔ a hɛ mi;

A ma kpata yiwutsotsɛmɛ a hɛ mi.

39 Dali a yi wami hemi jeɔ Yehowa ngɔ;

Lɛ ji a wesa he ngɛ haomi be mi.

E ma kpɔ̃ mɛ ngɛ yiwutsotsɛmɛ a dɛ mi, nɛ e ma he a yi wami,

Ejakaa a sa we ngɛ e ngɔ.

38 Oo Yehowa, ko kã ye hɛ mi ngɛ o we abofu ɔ mi,

Nɛ ko tsɔse mi ngɛ o mi mi la a mi hulɔ.

 2 Ejakaa o kɛ̃ɛ̃ mi bi ɔmɛ gbu kɛ sɛ ye mi tɔɔ,

Nɛ o nine nyɛɔ ye nɔ.

 4 Ejakaa ye tɔmi ɔmɛ laa ye yi;

A ngɛ kaa tlomi nɛ jiɔ, a jiɔ tsɔ pe bɔ nɛ ma nyɛ ma tloo.

 5 Ye kuasia jemi ɔ he je ɔ,

Ye pa amɛ sa, nɛ a ngɛ fu jee.

 6 I hao nɛ ye ní pee mɔbɔ wawɛɛ nitsɛ;

I kɛ aywilɛho yemi nyɛɛ kɛ bɔle si ligbi ɔ tsuo.

 7 Ye he mi ngɛ mi sããe;*

Ye nɔmlɔ tso ɔ tsuo be he wami.

 8 Ye nɔmlɔ tso ɔ nui nɔ́ he hu, nɛ i kuɔ kulaa;

Ye tsui nɛ hao ɔ he je ɔ, i kɛmɛɔ wawɛɛ.*

 9 Oo Yehowa, níhi tsuo nɛ i suɔ ɔ, o le,

Nɛ ye huu peemi ɔ hu, o nu.

10 Ye tsui siɔ wawɛɛ, ye he wami ta,

Nɛ ye hɛngmɛ hyɛ we nɔ́ hu.

11 Ye huɛmɛ kɛ ye nyɛmimɛ kua mi ngɛ ye hiɔ ɔ he je,

Nɛ nihi nɛ a hɛ kɛ su ye he wawɛɛ ɔ po tsɔ a he kɛ je ye he.

12 Nihi nɛ a ngɛ hlae nɛ a ngɔ ye wami ɔ* tsɔɔ mi klama;

Nihi nɛ a ngɛ mɔde bɔe kaa a maa ye mi awi ɔ tuɔ blɔ nɔ nɛ a maa gu kɛ pee jã a he munyu;

A tuɔ lakpa munyuhi ligbi ɔ tsuo.

13 Se imi lɛɛ i pee kaa tuekpokutsɛ, i be tue bue;

I pee kaa mumui, i be ye nya mi pae.

14 I pee kaa nɔ ko nɛ nui nɔ́

Nɛ́ nɔ́ ko be e nya mi nɛ e ma de kɛ fã e he.

15 Ejakaa mo Yehowa, mo lɛ i ngɛ blɔ hyɛe,

Nɛ o he mi nɔ, Oo Yehowa ye Mawu.

16 Ejakaa i de ke: “A ko nya ngɛ ye nɔ́ nami ɔ he je,

Nɛ ke i sane hu ɔ, a ko wo a he nɔ ngɛ ye nɔ.”

17 Jinɛ i miɔ nɛ ma nɔ si,

Be fɛɛ be ɔ, i ngɛ piie.

18 I jaje ye tɔmi ɔ;

Ye yayami ɔ hao mi.

19 Se ye he nyɛli ɔmɛ ngɛ gbugbuugbu* nɛ a he wa,*

Nihi nɛ nyɛɔ mi yaka gu ɔ a he ba hiɛ.

20 A peeɔ mi yayami kɛ toɔ kpakpa nɛ i pee ɔ nane mi;

A ngɛ ye nya tsie konɛ ma ko di nɔ́ kpakpa se.

22 Oo Yehowa, ye yi wami helɔ,

O he nɛ sɔ kɛ ba ye bua mi.

39 I de ke: “Ma hyɛ ye nane nya

Konɛ i kɛ ye lilɛ nɛ ko pee yayami.

Be abɔ nɛ yiwutsotsɛ ngɛ ye hɛ mi ɔ,

Ma fĩ ye nya kɛ po ye nya he piɛ.”

 2 I ma ye nya nɛ i pee dii;

I tui nɔ́ kpakpa po he munyu,

Se ye piimi ɔ nya wa.

 4 “Ao Yehowa, moo ye bua mi konɛ ma le bɔ nɛ ye nyagbe maa hi ha,

Kɛ ligbi abɔ nɛ ma ye,

Konɛ ma le bɔ nɛ ye wami ngɛ kpiti* ha.

 5 Niinɛ, o ha nɛ ye ligbi ɔmɛ pi kulaa;*

Nɛ ye wami ligbi ɔmɛ ɔ, pi nɔ́ ko kulaa ngɛ o hɛ mi.

 9 I pee dii;

I nyɛ we nɛ ma bli ye nya,

Ejakaa mo lɛ o ha nɛ e ba jã.

11 O gblaa adesa tue kɛ tsɔseɔ lɛ ngɛ e tɔmi he je;

O kpataa e níhi nɛ a he jua wa a hɛ mi kaa bɔ nɛ wɔyewɔye puɛɔ nɔ́ ɔ.

12 Ao Yehowa, moo bu ye sɔlemi ɔ tue,

Moo nu ya nɛ i ngɛ foe kɛ ngɛ yemi kɛ buami bie ɔ.

Ejakaa nubwɔ kɛkɛ ji mi ngɛ o hɛ mi,

I ngɛ kaa blɔ hialɔ nɛ bee kɛ yaa* kaa ye nɛmɛ ɔmɛ.

13 Mo je o we abofu hɛngmɛ ɔ ngɛ ye nɔ konɛ ye bua nɛ jɔ,

Loko ma ba gbo, nɛ́ a be mi nae hu.”

40 I hyɛ Yehowa blɔ wawɛɛ nitsɛ,*

Nɛ e ta tue ha mi,* nɛ e nu ya nɛ i fo kɛ bi yemi kɛ buami ɔ.

 2 E wo ye nɔ kɛ je muɔ kɛ e mi nyu babauu mi,

Kɛ je mɔsɔ nɛ mi ti ɔ mi.

Nɛ e ngɔ ye nane kɛ ma tɛsa nɔ;

E ha nɛ ye nane ma si saminya.

 3 Kɛkɛ nɛ e ngɔ la ehe ko kɛ wo ye nya,

Yi jemi la kɛ ha wa Mawu ɔ.

Nihi fuu maa na nɔ́ nɛ Mawu pee ɔ, nɛ a maa ye gbeye

Nɛ a kɛ a hɛ maa fɔ Yehowa nɔ.

 4 Nɔ nɛ ngɔɔ e hɛ kɛ fɔɔ Yehowa nɔ

Nɛ́ e kɛ e hɛ fɔɛ atuã tsɔli aloo lakpatsɛmɛ a nɔ ɔ ngɛ bua jɔmi.

 5 Hyɛ níhi sɔuu nɛ o pee,

Oo Yehowa ye Mawu,

O ní tsumi ɔmɛ ngɛ nyakpɛ nɛ o susuɔ wa he wawɛɛ.

Nɔ ko be nɛ a kɛ lɛ maa to o he;

Ke i ke ma tu a he munyu aloo ma de ɔ,

A maa hiɛ babauu tsɔ pe bɔ nɛ ma nyɛ ma de!

 6 Afɔle kɛ nike ní ɔ, o sume,*

Se o bli ye tue konɛ ma nu nɔ́.

 8 Oo ye Mawu, ye bua jɔɔ o suɔmi nya ní peemi he,

Nɛ o mlaa a ngɛ ye tsui mi tɔɔ.

Oo Yehowa, kaa bɔ nɛ mo nitsɛ o le ɔ,

Hyɛ! i ma we ye nya.

Ye tɔmi ɔmɛ hiɛ babauu ngɛ ye nɔ, nɛ i nyɛ we nɛ ma na ye blɔ ɔ;

A hiɛ babauu pe ye yi bwɔmi po,

Nɛ ye kã nya ta.

14 Nihi tsuo nɛ a ngɛ hlae nɛ a gbe mi ɔ,*

Zo nɛ gbe mɛ nɛ a hɛ mi nɛ pue si.

Nihi nɛ a ngɛ hlae nɛ ma na nɔ́ ɔ,

Á kɛ hɛ mi si puemi nɛ kpale a se.

16 Se nihi nɛ hlaa o se blɔ ɔ,

Ha nɛ a nya, nɛ́ a bua nɛ jɔ ngɛ o mi.

17 Se ohiatsɛ kɛ nɔ nɛ be yemi kɛ bualɔ ji mi;

Yehowa o hɛ nɛ hi ye he.

Mo ji ye yemi kɛ bualɔ kɛ ye kpɔlɔ;

Ye Mawu, koo to tsle.

41 Nɔ fɛɛ nɔ nɛ e susuɔ nɔ nɛ e ní ngɛ mɔbɔ ɔ he ɔ ngɛ bua jɔmi;

Yehowa ma kpɔ̃ lɛ ngɛ haomi be mi.

A ma tsɛ lɛ ke nɔ nɛ e ngɛ bua jɔmi ngɛ zugba a nɔ;

O be hae nɛ nɔ́ nɛ e he nyɛli* ngɛ hlae kaa e ba e nɔ ɔ nɛ ba mi kɔkɔɔkɔ.

 3 Yehowa maa hyɛ e nɔ ngɛ e hiɔ sa nɔ;

Be mi nɛ e be he wami ɔ, o ma tsake e sa a kulaa.

E ba hlaa ye he sane yaya konɛ e ya sɛɛ;

Lɔ ɔ se ɔ, e yaa nɛ e ya gbɛɔ kɛ fĩaa.

 7 Nihi tsuo nɛ a nyɛɔ mi ɔ kɛ a sibi tuɔ munyu kusikusi;

A toɔ ga yaya ngɛ ye he nɛ a deɔ ke:

 8 “Nɔ́ yaya ba e nɔ;

Amlɔ nɛ ɔ nɛ e nɔ si ɔ, e be si tee hu.”

 9 Nɔ nɛ tue mi jɔmi ngɛ i kɛ lɛ wa kpɛti, nɛ́ i kɛ ye hɛ fɔ e nɔ,

Nɛ́ e yeɔ ye niye ní ɔ, lɛ po e te si kɛ wo mi.*

10 Se moo na mi mɔbɔ nɛ o wo ye nɔ, Oo Yehowa,

Konɛ ma gbla a tue ngɛ nɔ́ nɛ a pee ɔ he.

12 Imi lɛɛ o piɛɛ ye he ngɛ ye we anɔkuale yemi ɔ he je;

O ma ha nɛ ma hi o hɛ mi kɛ ya neneene.

13 A je Yehowa, Israel Mawu ɔ yi

Kɛ ya neneene.*

42 Oo Mawu, kaa bɔ nɛ afugbɛ hlaa nyu dɔhi a se blɔ ɔ,

Jã kɛ̃ nɛ i* hlaa o se blɔ.

 3 Ye vonyu ji ye niye ní nyɔ kɛ pia;

Ligbi ɔ mi tsuo ɔ, nihi yeɔ ye he fɛu ke: “Jije o Mawu ɔ ngɛ?”

 4 I kaiɔ ní nɛ ɔmɛ, nɛ i deɔ mo ye tsui mi susumihi tsuo,*

Ejakaa sa a, i kɛ nihi babauu nyɛɛɔ;

Jinɛ i nyɛɛɔ blɛuu ngɛ a hɛ mi kɛ yaa Mawu we ɔ,

Kɛ ose hemi kɛ si nami,

Kaa nimli asafo nɛ a ngɛ gbijlɔ yee.

Ma mlɛ Mawu,

Ejakaa loloolo ɔ, ma ya nɔ nɛ ma je e yi kaa ye Yi Wami Helɔ Ngua.

Lɔ ɔ he je nɛ i kaiɔ mo,

Ngɛ Yordan zugba a nɔ, kɛ Hermon yoku ɔmɛ a nɔ,

Kɛ Mizar Yoku* ɔ nɔ ɔ nɛ.

 7 Nyuhi nɛ a mi kuɔ woɔ a gbi nɔ, nɛ nyuhi nɛ a mi kuɔ heɔ nɔ

Ngɛ o nyu nɛ ngɛ si puee ɔ pɛmi nya.

 8 Ke je na a, Yehowa ma je e suɔmi nɛ se pui ɔ kpo kɛ tsɔɔ mi,

Nɛ ke je jɔ ɔ, ma la e la a—ma sɔle kɛ ha Mawu nɛ haa mi wami ɔ.

10 Ye he nyɛli kɛ nɔ gbemi munyuhi bɔɔ mi ahlua;*

Ligbi ɔ mi tsuo ɔ, a yeɔ ye he fɛu ke: “Jije o Mawu ɔ ngɛ?”

Ma mlɛ Mawu,

Ejakaa loloolo ɔ, ma ya nɔ nɛ ma je e yi kaa ye Yi Wami Helɔ Ngua kɛ ye Mawu.

43 Oo Mawu, moo kojo mi,

Moo fã ye he ngɛ sane nɛ ma nɛ yi anɔkuale ɔ kɛ mi ngɛ yee ɔ mi.

Ha nɛ a ba nyɛɛ ye hɛ mi;

Ha nɛ a kudɔ mi kɛ ya o yoku klɔuklɔu ɔ nɔ, kɛ o bo tsu ngua a he.

 4 Kɛkɛ ɔ, ma ba Mawu afɔle sami latɛ ɔ he,

Ma ba Mawu, nɔ nɛ haa mi bua jɔmi babauu ɔ ngɔ.

Ma mlɛ Mawu,

Nɛ ma ya nɔ nɛ ma je e yi kaa ye Yi Wami Helɔ Ngua kɛ ye Mawu.

44 Oo Mawu, wa nu kɛ wɔ nitsɛmɛ wa tue,

Wa nɛmɛ ɔmɛ de wɔ

Níhi nɛ o pee ngɛ a be ɔ mi,

Nɛ ji níhi nɛ o pee blema lokoo ɔ.

 2 O kɛ o nine fiee je mahi,

Nɛ o to wa nɛmɛ ɔmɛ si ngɛ lejɛ ɔ.

 3 Pi mɛ nitsɛmɛ a klaate nɛ a kɛ ngɔ zugba a,

Nɛ pi mɛ nitsɛmɛ a kɔni nɛ ha nɛ a ye kunimi.

Se mohu ɔ, o hiɔ nine, kɛ o kɔni, kɛ o hɛ mi la a lɛ ha nɛ a ye kunimi ɔ nɛ,

Ejakaa o bua jɔ a he.

 4 Oo Mawu, mo ji ye Matsɛ;

Mo fã* nɛ Yakob nɛ ye kunimi kɛ pi si.*

 5 Wa maa kpale wa he nyɛli ɔmɛ ngɛ o he wami nya;

Wa maa naa nihi nɛ teɔ si kɛ woɔ wɔ ɔ a nɔ ngɛ o biɛ mi.

 6 Ejakaa i kɛ ye hɛ fɔɛ ye kɛ̃ɛ̃ ɔ nɔ,

Nɛ ye klaate ɔ be nyɛe ma he ye yi wami.

 7 Mo lɛ o he wa yi wami ngɛ wa he nyɛli ɔmɛ a dɛ,

Mo lɛ o pue nihi nɛ nyɛɔ wɔ ɔ a hɛ mi si.

 8 Wa ma je Mawu yi daa ligbi,

Nɛ wa ma je o biɛ ɔ yi kɛ ya neneene. (Sela)

 9 Se amlɔ nɛ ɔ, o sake wɔ fɔ he nɛ o pue wa hɛ mi si,

Nɛ o kɛ wa tabo ɔmɛ yɛ ta hu.

10 O yaa nɔ nɛ o haa nɛ wa tuɔ wa he nyɛli ɔmɛ a nya fo;

Nihi nɛ a nyɛɔ wɔ ɔ ngɔɔ nɔ́ fɛɛ nɔ́ nɛ a suɔ.

11 O ngɔɔ wɔ kɛ haa wa he nyɛli ɔmɛ konɛ a ye wɔ kaa jijɔhi;

O gbɛ wɔ kɛ fĩa je ma amɛ a mi.

12 O juaa o we bi ɔmɛ kɛ jua nɛ ba si kulaa;

O ná we juami nɛ o jua mɛ ɔ he se.*

13 O ha nɛ wa kpɔ mi bi ɔmɛ gbeɔ wa he guɛ,

O ha nɛ nihi tsuo nɛ bɔle wɔ ɔ muɔɔ wɔ, nɛ a yeɔ wa he fɛu.

14 O ha nɛ wa pee nihi nɛ bumi be a he* ngɛ je ma amɛ a kpɛti,

A hyɛɛ wɔ nɛ a mimiɛɔ a yi.

15 Daa ligbi ɔ, ye hɛ mi pueɔ si,

Nɛ zo gbeɔ mi kpɔtɔɔ

16 Ngɛ a we ahlua bɔmi ɔmɛ kɛ a jɛmi ɔmɛ a he je,

Ngɛ wa he nyɛlɔ ɔ nɛ ngɛ lue yee ɔ he je.

17 Ní nɛ ɔmɛ tsuo ba wa nɔ, se wa hɛ ji o nɔ,

Nɛ wa ji somi nɛ o kɛ wɔ so ɔ se

18 Wa tsui gba we kɛ ji o he;

Wa nane hu gba we kɛ ji o blɔ ɔ nɔ.

19 Se o ku wɔ ngɔ pue si ngɛ nga mi gbehi a hi he;

O kɛ diblii kpii ha wa nɔ.

20 Ke wa hɛ je wa Mawu ɔ biɛ nɔ

Aloo wa gbɛ wa nine mi nɛ wa sɔle ha ma se mawu ko ɔ,

21 Anɛ Mawu be nae lo?

22 O he je ɔ, daa ligbi ɔ, a gbeɔ wɔ nɛ wa gboɔ;

A bu wɔ kaa jijɔhi nɛ a yaa gbe.

25 Ejakaa a ba wɔ* si kɛ su zugba;

A nyɛ wa nɔmlɔ tso ɔmɛ a nɔ kɛ wo zugba.

 3 Oo he walɔ, fĩ o klaate ɔ kɛ wo o ngmɔngmɔ he,

Ngɛ o hɛ mi nyami kɛ o we agboje ɔ mi.

 4 Nɛ́ o ya ye kunimi* ngɛ o we agboje ɔ mi;

Moo hi o we okpɔngɔ ɔ nɔ ngɛ anɔkuale kɛ he si bami kɛ dami mi,

Nɛ o hiɔ nine ma tsu* ní gbeyegbeyehi.

 5 O kɛ̃ɛ̃ mi bi ɔmɛ a nya ba, nɛ a haa nɛ mahi nɔɔ si ngɛ o hɛ mi;

A gbɔɔ matsɛ ɔ he nyɛli ɔmɛ a tsui mi.

 6 Mawu ji o matsɛ sɛ kɛ yaa neneene;

O matsɛ tso ɔ ji dami* matsɛ tso.

 8 Mimɛ kɛ aloe tso kɛ kasia tso he via liliili ngɛ o tade ɔmɛ tsuo a mi;

Kpã sakuhi nɛ a fiaa ngɛ matsɛ we ngua nɛ a kɛ suɔ wu pee ɔ mi ɔ haa nɛ o nyaa.

10 Oo biyo, moo bu tue, ta tue nɛ́ o nu;

O hɛ nɛ je o we bi ɔmɛ kɛ o tsɛ we ɔ nɔ.

11 Nɛ matsɛ ɔ hɛ ma ja ngɛ o he fɛu ɔ he,

Ejakaa lɛ ji o nyɔmtsɛ,

Lɔ ɔ he ɔ, mo kplã si ha lɛ.

12 Tiro biyo ɔ maa ngɔ nike ní kɛ ba;

Nyumuhi a kpɛti niatsɛmɛ pe kulaa a maa suɔ kaa a hɛ mi nɛ ba nyami ngɛ o hɛ mi.

13 Matsɛ ɔ biyo ɔ hɛ mi ngɛ nyami wawɛɛ ngɛ matsɛ we ɔ;*

A kɛ sika tsu kpã lo níhi kɛ wo e tade ɔ mi.

15 A maa ngɔ mɛ kɛ ba kɛ nyami kɛ bua jɔmi;

A maa sɛ matsɛ we ɔ.

46 Mawu ji wa wesa he kɛ wa he wami,

Wa ma nyɛ ma ná yemi kɛ buami ngɛ e ngɔ be fɛɛ be ngɛ haomi behi a mi.

 2 Lɔ ɔ he je nɛ ke zugba a mimiɛ,

Nɛ yokuhi hia kɛ ya pue wo ɔ sisi po, wa be gbeye yee ɔ nɛ.

 3 Ke wo nyu babauu ɔ gli, nɛ e fia hwɔli po,

Ke wo ɔ pee hamahama, nɛ lɔ ɔ ha nɛ yokuhi hoso po, wa be gbeye yee. (Sela)

 4 Pa ko ngɛ kɛ e kɔnihi fuu nɛ haa nɛ Mawu ma a nyaa,

Nɔ Nɛ E Nɔ Kuɔ Pe Kulaa a bo tsu ngua nɛ ngɛ klɔuklɔu ɔ.

 6 Je ma amɛ gli, nɛ a kpata matsɛ yemi ɔmɛ a hɛ mi;

E wo e gbi nɔ, nɛ zugba a sile.

 7 Yehowa tabohiatsɛ ɔ kɛ wɔ ngɛ;

Yakob Mawu ɔ ji wa wesa he* nɛ ngɛ slɔkee. (Sela)

 8 Nyɛɛ ba nɛ nyɛ ba hyɛ níhi nɛ Yehowa pee ɔ,

Nyɛ ba hyɛ nyakpɛ níhi nɛ e pee ngɛ zugba a nɔ ɔ.

E kuɔ kɛ̃ɛ̃ mi bihi kɛ akplɔhi a mi;

E kɛ la sãã tabuli a zugba lɛhi.*

A ma wo ye nɔ ngɛ je ma amɛ a kpɛti;

A ma wo ye nɔ ngɛ zugba a nɔ.”

11 Yehowa tabohiatsɛ ɔ kɛ wɔ ngɛ;

Yakob Mawu ɔ ji wa wesa he nɛ ngɛ slɔkee. (Sela)

 2 Ejakaa Yehowa, Nɔ Nɛ E Nɔ Kuɔ Pe Kulaa a he ngɛ nyakpɛ;

Lɛ ji Matsɛ ngua nɛ yeɔ zugba a tsuo nɔ.

 3 E ngɔɔ mahi kɛ woɔ wa sisi;

E ngɔɔ je mahi kɛ woɔ wa nane si.

 4 E hlaa wa weto ní kɛ haa wɔ,

Weto ní nɛ Yakob, nɔ nɛ e suɔ ɔ kɛ fĩaa a. (Sela)

 5 Mawu kuɔ kɛ ho be mi nɛ a kɛ bua jɔmi ngɛ ose hee;

Yehowa kuɔ kɛ ho be mi nɛ a ngɛ bɛ* kpae.

 7 Ejakaa Mawu ji zugba a tsuo nɔ Matsɛ;

Nyɛ la yi jemi lahi, nɛ nyɛ kɔ nɔ́ se.

 9 Ma amɛ a hɛ mi nyɛɛli ɔmɛ bua a he nya,

A kɛ Abraham Mawu ɔ we bi ɔmɛ.

48 Yehowa kle nɛ e sa yi jemi nɛ pe kulaa

Ngɛ wa Mawu ɔ ma a mi, ngɛ e yoku klɔuklɔu ɔ nɔ.

 2 Matsɛ Ngua a ma a

Ji Zion Yoku ɔ nɛ ngɛ yiti je tɔɔ ɔ nɛ;

E maa si glouu kɛ e he fɛu, nɛ e haa nɛ zugba a tsuo náa bua jɔmi.

 3 Mawu ha nɛ a le ngɛ e mɔhi nɛ a he wa a mi

Kaa lɛ ji wesa he* nɛ ngɛ slɔkee.

 4 Ejakaa hyɛ! matsɛmɛ bua a he nya;*

A pee kake kɛ ba.

 6 A he do blibliibli ngɛ lejɛ ɔ,

A gbo dengme kaa yo nɛ ngɛ fɔe.

 8 Níhi nɛ wa nu ɔ, amlɔ nɛ ɔ, wɔ nitsɛmɛ wa na

Ngɛ Yehowa tabohiatsɛ ɔ ma a mi, ngɛ wa Mawu ɔ ma a mi.

 9 Oo Mawu, wa susuɔ o suɔmi nɛ se pui ɔ he

Ngɛ o sɔlemi we ɔ mi.

10 Oo Mawu, kaa bɔ nɛ e ji ngɛ o biɛ ɔ blɔ fa mi ɔ, o yi jemi ɔ

Suɔ zugba a nyagbe he ɔmɛ.

11 Zion Yoku ɔ nɛ nya,

Yuda ma amɛ* a bua nɛ jɔ ngɛ o kojomi ɔmɛ a he je.

12 Nyɛɛ bɔle Zion; nyɛɛ nyɛɛ kɛ bɔle lɛ kɛ kpe;

Nyɛɛ kane e mɔ ɔmɛ.

Nyɛ kpa e mɔhi nɛ a he wa a si,

Konɛ nyɛ nyɛ nɛ nyɛɛ tu he munyu kɛ tsɔɔ yi nɔhi nɛ maa ba hwɔɔ se ɔ.

Nyɛ nihi tsuo nɛ nyɛ ngɛ je ɔ mi,* nyɛ ta tue,

 2 Nimli nɛ a ba si kɛ nimli nɛ a nɔ kuɔ,*

Niatsɛmɛ kɛ ohiatsɛmɛ tsuo.

 3 Imi nitsɛ ye nya maa tu juɛmi munyuhi,

Nɛ níhi nɛ i susuɔ he ngɛ ye tsui mi ɔ maa tsɔɔ kaa i ngɛ nɔ́ sisi numi.

 4 Ma bu abɛ tue saminya;

Ma fia saku kɛ tsɔɔ ye we ajo ɔ sisi.

 5 Mɛni he je nɛ e sa kaa ma ye gbeye ngɛ haomi behi a mi,

Ke nihi nɛ a bɔɔ mɔde kaa a ma kpata ye hɛ mi ɔ a ní yayami* ɔmɛ bɔle mi kɛ kpe ɔ?

 6 Nihi nɛ a kɛ a hɛ fɔɔ ní nɛ a ná a nɔ

Nɛ́ a kɛ a ní babauu ɔ fĩaa a,

 7 A ti nɔ ko be nyɛe ma kpɔ̃ e nyɛmi,

Nɛ a ti nɔ ko be nyɛe ma ha Mawu kpɔmi nɔ́ ko ngɛ e nyɛmi he hulɔ,

 8 (Kpɔmi nɔ́ nɛ e sa kaa a ha ngɛ a wami* he ɔ he jua wa wawɛɛ,

Nɛ a be nyɛe maa wo gblee);

 9 Konɛ e hi si kɛ ya neneene nɛ e ko na muɔ* ɔ.

10 E naa kaa juɛmitsɛmɛ po gboɔ;

Kuasia kɛ nɔ nɛ susuu we nɔ́ he tsuo a hɛ mi kpataa,

Nɛ a jeɔ níhi nɛ a ná a he kɛ haa ni kpahi.

11 Ngɛ a tsui mi ɔ, a suɔ nɛ a we ɔmɛ nɛ hi si kɛ ya neneene,

Nɛ a suɔ nɛ a bo tsu ɔmɛ nɛ hi si yi nɔhi tsuo.

12 Se adesa nɛ a wo e hɛ mi nyami po be si hie daa;

E ngɛ kaa lohwehi nɛ a gboɔ ɔ nɔuu.

13 Blɔ nɛ kuasiahi

Kɛ nihi nɛ nyɛɛɔ a se, nɛ a bua jɔɔ a yaka munyu ɔmɛ a he ɔ nyɛɛ nɔ ji nɛ ɔ nɛ. (Sela)

Gbenɔ maa hyɛ a nɔ;

Dali maa ye a nɔ mɔtu.

A nɔmlɔ tso ɔ ma puɛ kulaa;

Yɔkɔ* maa pee a we mi, se pi matsɛ we.

15 Se Mawu ma kpɔ̃ mi* kɛ je Yɔkɔ* dɛ,

Ejakaa e maa gbla mi kɛ ya he nɛ ngɛ slɔkee. (Sela)

16 Koo ye gbeye kaa nɔ ko ngɛ ní babauu náe,

Kaa e we mi afɛu níhi ngɛ hiɛe,

17 Ejakaa ke e gbo ɔ, e be nyɛe maa ngɔ nɔ́ ko nɔ́ ko kɛ ya;

E hɛ mi nyami ɔ kɛ lɛ be yae.

20 Nɔmlɔ nɛ e nui nɔ́ nɛ ɔ sisi ɔ, ke a wo e hɛ mi nyami po,

E ngɛ kaa lohwehi nɛ a gboɔ ɔ nɔuu.

50 Yehowa, mawuhi a Mawu ɔ* tu munyu;

E tsɛɔ zugba a

Kɛ jeɔ puje he kɛ ya siɔ pusinɔ he.

La nɛ sãã nɔ́ ngɛ e hɛ mi,

Nɛ kɔɔhiɔ nɛ nya wa fiaa kɛ bɔleɔ lɛ.

 4 E tsɛ hiɔwe kɛ zugba a kɛ ba,

Konɛ e kojo e we bi ɔmɛ. E de ke:

 5 “Nyɛ bua nihi nɛ a yeɔ mi anɔkuale ɔ a nya kɛ ba ye hɛ mi,

Nihi nɛ a kɛ mi soɔ kɛ guɔ afɔle sami nɔ ɔ.”

 6 Hiɔwe jajeɔ e dami ɔ,

Ejakaa Mawu nitsɛ ji Kojolɔ. (Sela)

 7 “Ye we bi, nyɛɛ bu tue nɛ ma tu munyu;

Israel, ma ye odase kɛ si mo.

 8 Pi o we afɔle sami ɔmɛ a he je nɛ i kãa o hɛ mi ngɛ,

Nɛ pi o sami afɔle ɔmɛ nɛ ngɛ ye hɛ mi daa a hu a he je.

 9 E he hia we nɛ ma ngɔ na ku ngɛ o we ɔ mi,

Aloo apletsihi* ngɛ o to piɛ ɔmɛ a mi.

10 Ejakaa hue tso mi lohwe fɛɛ hue tso mi lohwe ɔ, ye nɔ́,

Lohwehi nɛ a ngɛ yoku ɔmɛ tsuo a nɔ ɔ, ye níhi ji mɛ.

11 I le yokuhi a nɔ lohwe pɛlitsɛmɛ tsuo;

Nga mi lohwehi nɛ a li a yibɔ ɔ tsuo, ye níhi.

12 Ke hwɔ ngɛ mi yee ɔ, i be mo dee,

Ejakaa zugba a kɛ nɔ́ fɛɛ nɔ́ nɛ ngɛ nɔ́ ɔ, ye nɔ́.

13 Anɛ ma ye na kuhi a lo,

Nɛ ma nu apletsihi a muɔ lo?

14 Ngɔɔ sina kɛ ha Mawu kaa afɔle nɛ o sã ha lɛ,

Nɛ o ye kitahi nɛ o kã Nɔ Nɛ E Nɔ Kuɔ Pe Kulaa a nɔ;

15 Mo tsɛ mi ngɛ haomi be mi.

“Mɛnɔ ha mo he blɔ kaa o jaje ye blɔ tsɔɔmi ɔmɛ

Aloo o tu ye somi ɔ he munyu?

17 Ejakaa o hiɔ tsɔsemi,*

Nɛ o yaa nɔ nɛ o plɛɔ o se kɛ woɔ ye munyu ɔmɛ.*

18 Ke o na julɔ ɔ, o bua jɔɔ e he,*

Nɛ o kɛ gba puɛli bɔɔ.

19 O kɛ o nya gbɛɔ nɔ́ yayami kɛ fĩaa,

Nɛ lakpa ngɛ o lilɛ nɔ.

20 O hiɔ si nɛ o tuɔ munyu kɛ siɔ mo nitsɛ o nyɛmi;

O gbeɔ mo nitsɛ o nyɛbi he guɛ.”

21 Benɛ o pee ní nɛ ɔmɛ ɔ, i pee dii,

Lɔ ɔ he ɔ, o susu kaa ma pee kaa mo.

Se amlɔ nɛ ɔ lɛɛ ma kã o hɛ mi,

Nɛ ma tsɔɔ mo sane nɛ i ngɛ kɛ si mo.

22 I kpa nyɛ pɛɛ nɛ nyɛ susu nɔ́ nɛ ɔ he, nyɛ nihi nɛ nyɛ hɛ je Mawu nɔ ɔ,

Ke pi jã a, ma tsɔtslɔɔ nyɛ mi, nɛ nɔ ko nɔ ko be nyɛe ma kpɔ̃ nyɛ.

23 Nɔ nɛ ngɔɔ sina kɛ haa kaa afɔle nɛ e sã a, e woɔ ye hɛ mi nyami,

Nɛ nɔ nɛ e yaa nɔ nɛ e peeɔ nɔ́ nɛ da a,

Ma ha nɛ́ e na Mawu yi wami hemi ɔ.”

 2 Mo fɔ ye tɔmi ɔ ngɛ ye he kulaa,

Nɛ o tsu ye yayami ɔ ngɛ ye he.

 3 Ejakaa i le ye tɔmi ɔmɛ saminya,

Nɛ ye yayami ɔ ngɛ ye hɛ mi* be fɛɛ be.

 4 Mo, mo tutuutu* lɛ i pee yayami kɛ si;

Nɔ́ nɛ i pee ɔ ji yayami ngɛ o hɛ mi.

Lɔ ɔ he ɔ, ke o tu munyu ɔ, e da,

O kojomi ɔ da.

 5 Hyɛ! Tɔmi ngɛ ye he nɛ a kɛ fɔ mi,

Nɛ ye nyɛ ngɔ ye hɔ ngɛ yayami mi.*

 6 Hyɛ! O bua jɔɔ anɔkuale yemi nɛ ngɛ nɔmlɔ tsui mi ɔ he;

Moo tsɔɔ mi ní konɛ ma ná nile tsui.

 7 Ngɔɔ hisopo kɛ tsu ye he ngɛ ye yayami ɔ he konɛ ye he nɛ tsɔ;

Mo fɔ ye he konɛ ma hiɛ futaa pe snoo.

 8 Ha nɛ ma nu ose hemi kɛ nyami he,

Konɛ ye wuhi nɛ o ywia a nɛ a nya.

 9 Mo je o hɛ ngɛ ye yayami ɔmɛ a he,

Nɛ́ o tsu ye tɔmi ɔmɛ tsuo.

10 Oo Mawu, moo bɔ tsui nɛ mi tsɔ ha mi,

Nɛ́ o ngɔ mumi ehe, mumi nɛ ma ha nɛ ma pee nɔ́ nɛ da be fɛɛ be* kɛ wo ye mi.

11 Ko sake mi kɛ je o hɛ mi kɛ fɔ he;

Nɛ ko je o mumi klɔuklɔu ɔ ngɛ ye nɔ.

12 Ha nɛ ma ná bua jɔmi ngɛ o yi wami hemi ɔ mi ekohu;

Ha nɛ ma ná suɔmi ɔ kaa ma bu mo tue.*

13 Nihi nɛ a tɔ̃ɔ ɔ, ma tsɔɔ mɛ o blɔ ɔmɛ,

Konɛ yayami peeli nɛ a kpale kɛ ba o ngɔ.

14 Oo Mawu, ye Mawu nɛ heɔ ye yi wami, mo kpɔ mi kɛ je muɔ he fɔ yemi mi,

Konɛ ye lilɛ kɛ bua jɔmi nɛ jaje o dami ɔ.

15 Oo Yehowa, mo bli ye nya,

Konɛ ye nya nɛ jaje o yi jemi ɔ.

16 Ejakaa o sume afɔle, kaa o suɔ ɔ, jinɛ i ko ha mo;

O bua jɔɛ sami afɔle he.

17 Afɔlehi nɛ Mawu bua jɔ he ji mumi nɛ hao;*

Oo Mawu, tsui nɛ e kuɔ nɛ e hao ɔ, o be lɛ kuae.

18 Ngɛ o mɔbɔ nami ɔ nya a, moo pee Zion kpakpa;

Moo fia Yerusalem gbogbo ɔmɛ.

19 Kɛkɛ ɔ, o bua maa jɔ dami afɔle ɔmɛ,

Sami afɔle ɔmɛ, kɛ afɔlehi nɛ a ngɔɔ lɛ tsuo kɛ haa a he;

Nɛ a maa sã na kuhi ngɛ o we afɔle sami latɛ ɔ nɔ.

 2 O lilɛ nɛ nya ba kaa yi sɛmi ha a

Toɔ ga yayahi, nɛ e sisiɔ nɔ.

 3 O suɔ nɔ́ yayami pe nɔ́ kpakpa,

O suɔ lakpa yemi pe munyu nɛ da tumi. (Sela)

 4 Oo mo lilɛ nɛ o sisiɔ nɔ,

O bua jɔɔ munyu fɛɛ munyu nɛ yeɔ nɔ awi ɔ he!

 5 Enɛ ɔ he je nɛ Mawu maa gbla mo kɛ fia si si kake nyɔngloo ɔ nɛ;

E ma sa mo, nɛ e ma je mo kɛ je o bo tsu ɔ he;

E maa hia mo kɛ je hɛ kali a zugba a nɔ. (Sela)

 6 Dali maa na, nɛ a nya maa kpɛ a he,

Nɛ a maa muɔ lɛ.

 7 A ma de ke: “Hyɛ, nyumu nɛ ɔ ngɔɛ Mawu kɛ pee we e wesa he,*

Mohu ɔ, e ngɔ e hɛ kɛ fɔ ní babauu nɛ e ngɛ ɔ nɔ,

Nɛ e ngɔ e hɛ kɛ fɔ* ga yayamihi nɛ lɛ nitsɛ e to ɔ nɔ.”*

 8 Se ma pee kaa oliv tso nɛ bɔ kusuu ngɛ Mawu we ɔ;

I ngɔ ye hɛ kɛ fɔ Mawu suɔmi nɛ se pui ɔ nɔ kɛ yaa neneene.

 9 Ma je o yi kɛ ya neneene ngɛ nɔ́ nɛ o pee ɔ he je;

Ngɛ nihi nɛ a yeɔ mo anɔkuale ɔ a hɛ mi ɔ,

Ma ngɔ ye hɛ kɛ fɔ o biɛ ɔ nɔ, ejakaa e hi.

A je mi bami puɛ, nɛ a peeɔ níhi nɛ a hiɔ;

Nɔ ko nɔ ko pee we nɔ́ kpakpa.

 2 Se Mawu maa e yi si nɛ e hyɛɛ nimli a bimɛ ngɛ zugba a nɔ

Kaa e maa na nɔ ko nɛ kɔɔ nɔ́ se lo, kaa e maa na nɔ ko nɛ hlaa Yehowa se blɔ lo.

 3 Mɛ tsuo a tla blɔ;

Mɛ tsuo pɛpɛɛpɛ a puɛ.

Nɔ ko nɔ ko pee we nɔ́ kpakpa,

Nɔ kake ngmelu po be.

 5 Se sawale maa nu mɛ wawɛɛ,

Sawale nɛ eko nui mɛ jã hyɛ maa nu mɛ,*

Ejakaa Mawu maa gbɛ nihi nɛ a tuaa mo* ɔ a wuhi kɛ fĩa.

Ke Yehowa bua e we bi nɛ a nuu mɛ nyɔguɛ ɔ a nya kɛ ba a,

Yakob bua nɛ jɔ, Israel nɛ nya.

54 Ao Mawu, o biɛ ɔ nɛ́ he ye yi wami,

Nɛ o ngɔ o he wami ɔ kɛ fã ye he.

 2 Ao Mawu, moo bu ye sɔlemi tue;

Mo ta tue kɛ ha munyuhi nɛ jeɔ ye nya a.

 3 Ejakaa nibwɔhi teɔ si kɛ woɔ mi,

Nɛ yiwutsotsɛmɛ hlaa kaa a maa gbe mi.*

 4 Hyɛ! Mawu ji ye yemi kɛ bualɔ;

Yehowa kɛ nihi nɛ a fĩɔ ye* se ɔ ngɛ.

 5 E kɛ ye he nyɛli ɔmɛ a ní yayami ɔmɛ maa wo mɛ nitsɛmɛ hiɔ;

Mo kpata a hɛ mi,* ngɛ o we anɔkuale yemi ɔ nya

 7 Ejakaa e heɔ ye yi wami ngɛ haomihi tsuo a mi,

Nɛ ke a ngɛ ye he nyɛli ɔmɛ a nɔ kunimi ye ɔ, ma na.

55 Ao Mawu, moo bu ye sɔlemi tue,

Nɛ pɛɛ nɛ i ngɛ kpae kaa o na mi mɔbɔ ɔ, ko ma o hɛ kɛ fɔ nɔ.*

Ye haomi ɔ ha nɛ ye he mi jɔɛ mi,

Nɛ i pee basaa

 3 Ngɛ nɔ́ nɛ he nyɛlɔ ɔ ngɛ dee,

Kɛ yi mi nɛ yiwutsotsɛ ɔ ngɛ mi wae ɔ he je.

Ejakaa a kɛ haomi babauu baa ye nɔ,

Nɛ a kɛ abofu ná ye he ninyɛ.

 4 Ye tsui ngɛ mi yee ngɛ ye mi,

Nɛ gbenɔ he gbeye nu mi.

 5 Gbeye nu mi, nɛ ye he do blibliibli,

Nɛ i hoso.

 8 I ko ya sa we ngɛ he ko esɔesɔ

Kɛ je kɔɔhiɔ vuguvugu ɔ nya, kɛ je ahumi nɛ nya wa wawɛɛ ɔ nya.”

 9 Oo Yehowa, mo futu a yi mi, nɛ́ o puɛ a yi mi tomi ɔmɛ,*

Ejakaa i na basabasa peemi kɛ pɛ ngɛ ma a mi.

10 A nyɛɛɔ ma a gbogbo ɔmɛ a yi mi kɛ bɔleɔ si nyɔ kɛ pia;

Yayami kɛ haomi ngɛ ma a mi.

11 Haomi ngɛ ma a mi;

Yi mi wami kɛ nɔ sisimi se pui ngɛ ma a he nya buami he ɔ.

12 Pi he nyɛlɔ nɛ ngɛ mi ahlua bɔe ɔ;

Kaa he nyɛlɔ ɔ, jinɛ i ko da nya.

Pi he nyɛlɔ nɛ te si kɛ wo mi ɔ;

Kaa he nyɛlɔ ɔ, jinɛ i ko laa ye he ngɛ e he.

13 Se e ya pee mo, ye juã nyumu,*

Imi nitsɛ ye huɛ nɛ i le lɛ saminya.

14 Jinɛ wa ji huɛmɛ nɛ nyu bi ngɛ wa kpɛti;

Jinɛ wa piɛɛɔ nihi babauu a he, nɛ wa nyɛɛɔ kɛ yaa Mawu we ɔ.

Ha nɛ á kple kɛ ho Yɔkɔ* mi ya hɛ ngmengmle;

Ejakaa yayami kɛ mɛ ngɛ, nɛ e ngɛ a mi.

16 Se imi lɛɛ, ma kpa ngmlaa kɛ tsɛ Mawu,

Nɛ Yehowa ma he ye yi wami.

17 Mɔtu, piani, kɛ gbɔkuɛ ɔ, i haoɔ nɛ i kɛmɛɔ,*

Nɛ e nuɔ ye gbi.

18 E ma kpɔ̃ mi, nɛ e ma ha mi* tue mi jɔmi ngɛ nihi nɛ a kɛ mi ngɛ hwue ɔ a he,

Ejakaa nimli babauu ba tua mi.

19 Mawu maa nu ye kue fami ɔ, nɛ e kɛ mɛ maa hwu,

Lɛ nɛ e hii si ngɛ matsɛ sɛ nɔ kɛ je blema lokoo. (Sela)

Nihi nɛ a yi Mawu gbeye ɔ

Ma kua kaa a maa pee tsakemi.

20 E* tua nihi nɛ tue mi jɔmi ngɛ e kɛ mɛ a kpɛti ɔ;

E yi somi nɛ e kɛ mi so ɔ nɔ.

21 E munyuhi ngɛ tlotlootlo pe bɔta,

Se pɛ ngɛ e tsui mi.

E munyuhi haa nɛ nɔ he jɔɔ lɛ pe nu,*

Se a ngɛ kaa klaatehi nɛ a hia.

22 Ngɔɔ o tlomi ɔ kɛ fɔ Yehowa nɔ,

Nɛ e maa baa o yi.

 2 Daa ligbi ɔ, ye he nyɛli ɔmɛ yaa nɔ nɛ a kɔ̃ɔ mi;

Nihi fuu kɛ he nɔ womi ngɛ hwue kɛ ngɛ mi sie.

 4 I ngɔ ye hɛ kɛ fɔ Mawu nɔ, ma na lɛ si ngɛ e munyu ɔ he je,

Mawu nɔ lɛ i ngɔ ye hɛ kɛ fɔ; i yi gbeye.

 5 Daa ligbi ɔ, a haoɔ mi;

A susumi pɛ ji kaa á ye mi awi.

 6 A laa a he konɛ a tua mi;

A ngɛ ye nane hiami tsuo hyɛe,

Kɛ yi mi tomi ɔ kaa a maa gbe mi.*

10 I ngɔ ye hɛ kɛ fɔ Mawu nɔ, ma na lɛ si ngɛ e munyu ɔ he je,

I ngɔ ye hɛ kɛ fɔ Yehowa nɔ, ma na lɛ si ngɛ e munyu ɔ he je,

11 Mawu nɔ lɛ i ngɔ ye hɛ kɛ fɔ; i yi gbeye.

12 Oo Mawu, kitahi nɛ i kã mo ɔ, ma ye a nɔ;

Ma na mo si.

13 Ejakaa o kpɔ̃ mi* kɛ je gbenɔ dɛ mi,

Nɛ o ha we nɛ ye nane nɛ tɛ nɔ́,

Konɛ ma ya nɔ nɛ ma hi wami mi, nɛ ma nyɛɛ ngɛ Mawu hɛ mi.

57 Naa mi mɔbɔ, Ao Mawu, naa mi mɔbɔ,

Ejakaa o ngɔ lɛ i* sa we ngɛ,

Nɛ o pɛli hɔ̃ ɔ sisi lɛ i sa we ngɛ kɛ yaa si be nɛ haomi ɔmɛ maa be.

 2 I tsɛ Mawu, Nɔ Nɛ E Nɔ Kuɔ Pe Kulaa a,

Anɔkuale Mawu ɔ, nɔ nɛ haa nɛ ye haomi ɔmɛ a se poɔ ɔ.

 4 Jatahi bɔle mi* kɛ kpe;

E biɔ nɛ ma hwɔ nihi nɛ a ngɛ hlae nɛ a mi mi ɔ a kpɛti,

Nihi nɛ a lunguhi ngɛ kaa akplɔhi kɛ kɛ̃ɛ̃ mi bihi,

Nɛ́ a lilɛ ngɛ kaa klaate nɛ nya ba a.

 5 Oo Mawu, á wo o nɔ gojoo kɛ be hiɔwe ɔmɛ a he;

Á na o hɛ mi nyami ɔ ngɛ zugba a nɔ tsuo.

 6 A wo ya konɛ e du ye nane;

Haomi ha nɛ i* gbɔjɔ.

A tsua muɔ ngɛ ye hɛ mi,

Se mɛ nitsɛmɛ a nɔ mi. (Sela)

 7 I* fĩ si kpɛii, Oo Mawu,

I fĩ si kpɛii.

 9 Oo Yehowa, ma je o yi ngɛ ma amɛ a mi;

Ma la yi jemi lahi* ha mo ngɛ je ma amɛ a kpɛti.

10 Ejakaa o suɔmi nɛ se pui ɔ kle kɛ su hiɔwe lokoo,

Nɛ o we anɔkuale yemi ɔ su bɔku ɔmɛ a mi tɔɔ.

11 Oo Mawu, á wo o nɔ gojoo kɛ be hiɔwe ɔmɛ a he;

Á na o hɛ mi nyami ɔ ngɛ zugba a nɔ tsuo.

 2 Dɛbi, mohu ɔ, níhi nɛ dɛ he ga nyɛ toɔ ngɛ nyɛ tsui mi,

Nɛ nyɛ peeɔ yi wu tso ní ngɛ zugba nɛ ɔ nɔ.

 3 Yiwutsotsɛmɛ tla blɔ* kɛ je a fɔmi* mi tɔɔ;

A laa blɔ, nɛ a ji lakpatsɛmɛ kɛ je benɛ a fɔ mɛ.

 4 A duɔ ngɛ kaa sinɔhi a duɔ;

A tue nui nɔ́, a ngɛ kaa blika* nɛ e tsi e tue.

 5 E nui kunya yeli a gbi,

Ke a he be ngɛ kablɛ fimi mi kaa mɛni po.

 8 Á pee kaa ahua nɛ nyu ngɛ e mi tae;

Kaa bi nɛ gbo ngɛ e nyɛ mi mi loko a fɔ lɛ, nɛ́ e nɛ pu gblee.

 9 Loko mio tso* ɔ ma ha nɛ nyɛ buɛ ɔmɛ nɛ dɔ la a,

E maa ngɔ kɔɔhiɔ nɛ nya wa kɛ bɛɛ tso kɔni mumu ɔ kɛ nɔ́ nɛ ngɛ sãe ɔ tsuo kɛ ho.

10 Dalɔ ma nya, ejakaa e na Mawu lue yemi ɔ;

E nane he maa pɔ kɛ yiwutsotsɛ muɔ.

59 Ao ye Mawu, mo kpɔ̃ mi ngɛ ye he nyɛli ɔmɛ a dɛ mi;

Moo po ye he piɛ ngɛ nihi nɛ teɔ si kɛ woɔ mi ɔ a he.

 2 Mo kpɔ̃ mi ngɛ nihi nɛ a peeɔ yi wu tso ní ɔ a dɛ mi,

Nɛ́ o he ye yi wami kɛ je yiwutsotsɛmɛ* a dɛ.

 3 Hyɛ! A woɔ ye* he ka;

Oo Yehowa, nihi nɛ a he wa tuaa mi,

Be mi nɛ i tsɔ we atuã nɛ́ i pee we yayami ko hulɔ.

 6 Gbɔkuɛ fɛɛ gbɔkuɛ ɔ, a kpaleɔ a se kɛ baa;

A huãã* kaa gbehi, nɛ a nyɛɛɔ blɛuu kɛ bɔleɔ ma a.

 7 Hyɛ, nɔ́ yaya jeɔ* a nya mi kɛ baa;

A nya mi munyu* ngɛ kaa klaate,

Ejakaa a deɔ ke: “Mɛnɔ ngɛ tue bue?”

 8 Se mo Yehowa, o maa muɔ mɛ;

O maa ye je ma amɛ tsuo a he fɛu.

 9 Oo ye Mawu, mo ji ye He Wami, ma ya nɔ nɛ ma hyɛ mo blɔ;

Ejakaa mo ji ye wesa he* nɛ ngɛ slɔkee.

10 Mawu ɔ nɛ jeɔ suɔmi nɛ se pui kpo kɛ tsɔɔ mi ɔ maa ye bua mi;

Mawu ma ha nɛ ma na ye he nyɛli ɔmɛ a nɔ kunimi nɛ a maa ye ɔ.

Mo ha nɛ a wo lalaalo ngɛ o he wami ɔ nya;

Oo Yehowa, wa tsɛ̃i, mo ha nɛ a nɔ si.

12 Ngɛ yayami nɛ a kɛ a nya peeɔ, kɛ a nya mi munyu he je ɔ,

Ha nɛ a he nɔ womi ɔ nɛ pee klama nɛ e du mɛ,

Ngɛ gbiɛmi kɛ nɔ sisimi munyuhi nɛ a tuɔ ɔ he je.

13 Mo kpata a hɛ mi ngɛ o we abofu ɔ mi;

Mo kpata a hɛ mi konɛ a laa gbidigbidi;

Ha nɛ a le kaa Mawu lɛ ngɛ Yakob nɔ yee, nɛ e ngɛ nɔ yee kɛ yaa su zugba a nyagbe he ɔmɛ. (Sela)

14 Ha nɛ a kpale a se kɛ ba gbɔkuɛ;

Ha nɛ a huã* kaa gbehi, nɛ́ a nyɛɛ blɛuu kɛ bɔle ma a.

15 Ha nɛ a wo lalaalo kɛ hla niye ní;

Ko ha nɛ a tɔ loo a ná hi he.

16 Se imi lɛɛ, ma la la nɛ kɔɔ o he wami ɔ he;

Mɔtu ɔ, i kɛ bua jɔmi maa tu o suɔmi nɛ se pui ɔ he munyu.

Ejakaa mo ji ye wesa he nɛ ngɛ slɔkee,

Kɛ he nɛ i tuɔ fo kɛ yaa ngɛ ye haomi be mi.

17 Oo Mawu, mo ji ye He Wami, ma la yi jemi lahi* ha mo,

Ejakaa Mawu ji ye wesa he nɛ ngɛ slɔkee, Mawu ɔ nɛ jeɔ suɔmi nɛ se pui kpo kɛ tsɔɔ mi ɔ.

 4 Mo ha* nihi nɛ a yeɔ mo gbeye ɔ okadi ko

Konɛ a tu fo, nɛ́ a je kɛ̃ɛ̃ ɔ nya. (Sela)

 5 Bɔ nɛ pee nɛ a kpɔ̃ o suɔli ɔmɛ ɔ,

Moo ngɔ o hiɔ nine kɛ he wa yi wami, nɛ́ o ha wa sɔlemi ɔ heto.

“Ma nya, ma ngɔ Shekem kɛ ha kaa weto ní,

Nɛ ma susu Sukot Dɔgba a kɛ ha nihi.

 7 Ye nɔ́ ji Gilead kaa bɔ nɛ ye nɔ́ ji Manase ɔ,

Nɛ Efraim ji dade pɛɛ* kɛ ha ye yi;

Yuda ji ye hɛ mi nyɛɛlɔ tso.

10 Oo Mawu, pi mo nɛ o kua wɔ ɔ lo?

Wa Mawu, pi mo nɛ o kɛ wa tabo ɔmɛ yɛ ta hu ɔ lo?

11 Moo ye bua wɔ ngɛ wa haomi ɔ mi,

Ejakaa yi wami hemi nɛ je adesa ngɔ ɔ ji yaka.

12 Mawu ma ha wɔ he wami,

Nɛ e maa naa wa he nyɛli ɔmɛ a nɔ.

 2 Ke ye tsui hao ɔ,*

Ma kpa ngmlaa kɛ tsɛ mo kɛ je zugba a nyagbe he ɔmɛ.

 3 Ejakaa mo ji ye wesa he,

Mo ji mɔ nɛ he wa nɛ poɔ ye he piɛ ngɛ he nyɛli a he.

 4 Ma to o bo tsu ɔ mi kɛ ya neneene;

Ma sa we ngɛ o pɛli ɔmɛ a sisi. (Sela)

 6 O maa ngɔ ligbihi kɛ piɛɛ matsɛ ɔ ligbi ɔmɛ a* he,

Nɛ e maa ya nɔ nɛ e maa hi si yi nɔhi babauu.

 7 E maa hi si ngɛ matsɛ sɛ nɔ* kɛ ya neneene ngɛ Mawu hɛ mi;

Moo dloo* lɛ suɔmi nɛ se pui kɛ anɔkuale yemi konɛ a bu e he.

 8 Kɛkɛ ɔ, ma la yi jemi lahi* kɛ ha o biɛ ɔ kɛ ya neneene,

Be mi nɛ i yeɔ kitahi nɛ i kã amɛ a nɔ daa ligbi ɔ.

 2 Niinɛ, lɛ ji ye tɛsa kɛ ye yi wami helɔ, ye wesa he* nɛ ngɛ slɔkee;

I be mimiɛe nɛ́ ma nɔ si kɔkɔɔkɔ.

 4 Ejakaa a soɔ konɛ a tsɛ̃ lɛ kɛ je e blɔ he nɛ nɔ kuɔ ɔ* kɛ ba nɔ si;

A bua jɔ lakpa yemi he.

 5 Niinɛ, i peeɔ dii kɛ mlɛɔ Mawu.*

Ejakaa hɛ kɛ nɔ fɔmi nɛ i ngɛ ɔ je e ngɔ.

 6 Niinɛ, lɛ ji ye tɛsa kɛ ye yi wami helɔ, ye wesa he nɛ ngɛ slɔkee;

I be mimiɛe kɔkɔɔkɔ.

 9 Nimli a bimɛ ngɛ kaa gugwɔ mi kɔɔhiɔ,

Adesahi a bimɛ ji yaka níhi.

10 Nyɛ ko ngɔ nyɛ hɛ kɛ fɔ amimi yemi nɔ,

Nɛ nyɛ ko ngɔ nyɛ hɛ kɛ fɔ jumi nɔ kɛ sisi nyɛ he hulɔ.

12 Jehanɛ hu ɔ, Oo Yehowa, o nɔ́ ji suɔmi nɛ se pui,

Ejakaa o woɔ nɔ fɛɛ nɔ hiɔ ngɛ e ní peepeehi a nya.

Ye hɛ nɛ ngɛ jae ngɛ o he sɔuu he je ɔ, i* pee gbedee

Ngɛ zugba nɛ gbli kadokado, nɛ́ nyu be nɔ ɔ nɔ.

 2 Lɔ ɔ he ɔ, i na mo ngɛ he klɔuklɔu ɔ;

I na o he wami ɔ kɛ o hɛ mi nyami ɔ.

 3 Akɛnɛ o suɔmi nɛ se pui ɔ hi pe wami he je ɔ,

Imi nitsɛ ye nya maa wo o hɛ mi nyami.

 4 Lɔ ɔ he ɔ, ma je o yi ye wami be tsuo;

O biɛ mi ma wo ye nine nɔ ngɛ.

 5 I* tɔ kɛ níhi nɛ a hi pe kulaa, kɛ ní kpakpahi nɛ pe kulaa,*

Enɛ ɔ he ɔ, ye nya ma je o yi kɛ bua jɔmi.

 6 I kaiɔ mo ngɛ ye sa nɔ;

I susuɔ o he nyɔ ɔ mi tsuo.

 7 Ejakaa mo ji ye yemi kɛ bualɔ,

Nɛ i heɔ ose ngɛ o pɛli hɔ̃ ɔ sisi.

 8 I* mɛtɛ o he;

O hiɔ nine ɔ pɛtɛɛ ye he wawɛɛ.

 9 Se nihi nɛ a ngɛ hlae nɛ a ma kpata ye wami* hɛ mi ɔ

Ma kple kɛ ya zugba a sisi tɔɔ.

10 A ma gbo ngɛ klaate nya;

A maa pee nga mi gbehi* a niye ní.

Nɔ fɛɛ nɔ nɛ ngɔɔ Mawu kɛ kãa kita a bua maa jɔ wawɛɛ,*

Ejakaa a ma ma lakpatsɛmɛ a nya.

 2 Moo bu ye he ngɛ ye yi nɔ nɛ yiwutsotsɛmɛ ngɛ soe ɔ he,

Ngɛ yayami peeli babauu ɔ a he.

 3 A duɔ a lilɛ nya kaa klaate;

A peeɔ a munyuhi nɛ yeɔ nɔ awi ɔ klaalo kaa kɛ̃ɛ̃ mi bihi,

 4 Konɛ a tsɛ̃ nɔ nɛ sane ko be e he ɔ kɛ je a laami he ɔmɛ;

A tsɛ̃ɔ lɛ si kake too, nɛ a yi gbeye.

 5 A ngmɛɛ we a yi mi tomi yayami ɔ he;*

A susuɔ bɔ nɛ a maa laa a klama amɛ a nɔ ha a he.

 6 A hlaa blɔ ehehi nɛ a maa gu nɔ kɛ pee ní yayamihi;

A kɛ hɛ mi tɛmi toɔ ga ngɛ laami mi;

A ti nɔ fɛɛ nɔ tsui mi susumi ɔ, nɔ ko nɔ ko li.

 7 Se Mawu ma tsɛ̃ mɛ kɛ̃ɛ̃;

Kɛ̃ɛ̃ mi bi maa plaa mɛ tlukaa.

 8 Mɛ nitsɛmɛ a nya mi munyu* ma ha nɛ a hɛ mi nɛ kpata;

Nihi tsuo nɛ maa na a ma mimiɛ a yi.

 9 Kɛkɛ ɔ, nihi tsuo maa ye gbeye,

Nɛ a maa jaje nɔ́ nɛ Mawu pee ɔ,

Nɛ a ma kɔ níhi nɛ e pee ɔ se.

10 Dalɔ ma nya ngɛ Yehowa mi, nɛ e maa sa we ngɛ e ngɔ;

Nihi nɛ a da ngɛ a tsui mi ɔ ma ná bua jɔmi wawɛɛ.*

65 Oo Mawu, yi jemi ngɛ mo mlɛe ngɛ Zion;

Wa maa ye kitahi nɛ wa kã mo ɔ nɔ.

 3 Ye tɔmi ɔmɛ hiɛ ngɛ ye nɔ tsɔ,

Se o kɛ wa tɔmi ɔmɛ keɔ wɔ.

 4 Nɔ nɛ o hla nɛ o ngɔ lɛ kɛ ba o kasa nya

Konɛ e ba hi o sɔlemi we ɔ yale ɔ mi ɔ ngɛ bua jɔmi.

Wa maa tɔ kɛ ní kpakpahi nɛ a ngɛ o we ɔ,

O sɔlemi we* klɔuklɔu ɔ.

 5 O kɛ dami ní peepeehi nɛ a ngɛ gbeye ma ha wɔ heto,

Oo Mawu, wa yi wami helɔ;

Mo ji zugba a nyagbe he ɔmɛ tsuo

Kɛ nihi nɛ a ngɛ wo se tsitsaa lokoo ɔ a Hɛ Kɛ Nɔ Fɔmi.

 6 O* ngɔ yoku ɔmɛ kɛ ma si kpɛii ngɛ o he wami ɔ nya;

O* wo he wami kaa tade.

 7 O* jɔɔ wo nɛ gli ɔ he,

O jɔɔ e we oslɔkehi nɛ ngɛ kue ɔ, kɛ je ma amɛ a hoo peemi ɔ he.

 8 Sawale maa nu nihi nɛ a ngɛ hehi nɛ kɛ ɔ ngɛ o we okadi ɔmɛ a he je;

O ma ha nɛ nihi nɛ a ngɛ puje he kɛ ya si pusinɔ he ɔ ma he ose.

 9 O hyɛɔ zugba a nɔ,

O haa nɛ e baa ní babauu, nɛ e hi saminya.*

Pa nɛ je Mawu ngɔ ɔ hyi tɔ kɛ nyu;

O haa mɛ ngma,

Ejakaa jã nɛ o pee zugba a.

10 O haa nɛ nyu hyiɔ nyu dɔhi nɛ a gba a mi, nɛ o haa nɛ zugba a nɛ a futu ɔ nɔ daa;

O haa nɛ hiɔmi nɛɔ kɛ pueɔ zugba a nɔ konɛ e he nɛ jɔ; o jɔɔ zugba a nɛ níhi waa ngɛ nɔ.

11 O ngɔ o kpakpa peemi ɔ kɛ bu jeha a jlasi;

O blɔ ɔ nɔ hyi kɛ ní babauu.*

12 Nga mumu sɔuu lɛ* ngɛ lohwehi a ní yemi hehi nɛ ngɛ nga a nɔ ɔ,

Nɛ bua jɔmi ha kpongu ɔmɛ a nɔ.

13 Lohwehi a ní yemi he ɔ hyi tɔ kɛ tohi sɔuu,

Nɛ ngma ha dɔgba amɛ a mi.

O he wami kpetekpleenyɛ ɔ he je ɔ,

O he nyɛli ɔmɛ a he maa do blibliibli ngɛ o hɛ mi.

 4 Zugba a tsuo ma kplã si ha mo;

A ma la yi jemi lahi ha mo;

A ma la yi jemi lahi ha o biɛ ɔ.” (Sela)

 6 E ha nɛ wo ɔ plɛ pee zugba gbigbli;

A nyɛɛ kɛ po pa a.

 8 Nyɛ je mahi, nyɛ je wa Mawu ɔ yi,

Nɛ́ nyɛ ha nɛ a nu e yi jemi ɔ he.

 9 E haa nɛ wa* hiɔ wami mi;

E ha we nɛ wa nane nɛ tɛ nɔ́.*

10 Ejakaa mo Mawu, o kpa wa mi;

O tsu wa he kaa bɔ nɛ a tsuɔ sika hiɔ he ɔ.

11 O ha nɛ o ya a du wɔ;

O ngɔ tlomi nɛ jiɔ kɛ fɔ wa nɔ.*

12 O ngmɛ nɔmlɔ adesa blɔ nɛ e ye wa* nɔ;

Wa gu la kɛ nyu mi;

Lɔ ɔ se ɔ, o ngɔ wɔ kɛ ba he nɛ he jɔmi ngɛ.

13 Ma ngɔ sami afɔlehi kɛ ba o we ɔ;

Ma ye kitahi nɛ i kã mo ɔ nɔ,

14 Níhi nɛ i kɛ ye nya wo si

Nɛ́ i kɛ ye nya de benɛ i ngɛ haomi mi ɔ.

15 Ma ngɔ lohwehi nɛ a wo zɔ kɛ sã sami afɔlehi ha mo;

Ma ngɔ agbosuhi kɛ sã afɔle ha mo.

16 Nyɛ nihi tsuo nɛ nyɛ yeɔ Mawu gbeye, nyɛ ba bu tue

Nɛ́ ma de nyɛ nɔ́ nɛ e pee ha mi.*

17 I kɛ ye nya tsɛ lɛ,

Nɛ i kɛ ye lilɛ wo e hɛ mi nyami.

18 Kaa i ngɔ nɔ́ yaya ko kɛ to ngɛ ye tsui mi ɔ,

Jinɛ Yehowa ko bui mi tue.

19 Se Mawu nu;

E bu ye sɔlemi ɔ tue.

20 Á je Mawu, nɔ nɛ e tsi we e tue kɛ wui ye sɔlemi ɔ,

Nɛ́ e je we e suɔmi nɛ se pui ɔ hu ngɛ ye nɔ ɔ yi.

67 Mawu maa na wɔ mɔbɔ, nɛ e maa jɔɔ wɔ;

E ma ha nɛ e hɛ mi ma kpɛ ngɛ wa nɔ, (Sela)

 2 Konɛ a le o blɔ ɔ ngɛ zugba a nɔ tsuo,

Yi wami hemi níhi nɛ o peeɔ ngɛ je ma amɛ tsuo a kpɛti ɔ.

 3 Oo Mawu, ha nɛ mahi nɛ a je o yi;

Ha nɛ ma amɛ tsuo nɛ a je o yi.

 4 Ha nɛ je mahi nɛ a nya nɛ a he ose,

Ejakaa o maa kojo ma amɛ ngɛ dami nya.

 5 Oo Mawu, ha nɛ mahi nɛ a je o yi;

Ha nɛ ma amɛ tsuo nɛ a je o yi.

 6 Zugba a maa ba ní;

Mawu, wa Mawu ɔ maa jɔɔ wɔ.

 7 Mawu maa jɔɔ wɔ,

Nɛ nihi nɛ a ngɛ zugba a nɔ he fɛɛ he ɔ maa ye lɛ gbeye.*

68 Mawu nɛ te si, e he nyɛli ɔmɛ nɛ a gbɛ kɛ fĩa,

Nɛ nihi nɛ a nyɛɔ lɛ ɔ nɛ a tu fo kɛ je e hɛ mi.

 2 Moo fiee mɛ kɛ ho kaa bɔ nɛ kɔɔhiɔ muɔɔ lasuku kɛ yaa a;

Yiwutsotsɛmɛ a hɛ mi nɛ kpata ngɛ Mawu hɛ mi,

Kaa bɔ nɛ hwo gbaku sileɔ ngɛ la he ɔ.

 3 Se dali lɛɛ, a nya;

A bua nɛ jɔ kɛ be nɔ ngɛ Mawu hɛ mi;

A nya kɛ bua jɔmi babauu.

 5 Mawu nɛ ngɛ e hi he klɔuklɔu ɔ

Ji nihi nɛ a be tsɛmɛ a tsɛ, kɛ yalɔyihi a he piɛ polɔ.*

 6 Mawu haa nihi nɛ a be nɔ ko ɔ we nɛ a hiɔ mi;

E jeɔ nihi nɛ a wo mɛ tsu ɔ, nɛ e haa nɛ a yeɔ manye.

 7 Oo Mawu, benɛ o nyɛɛ o we bi ɔmɛ a hɛ mi,

Benɛ o nyɛɛ kɛ gu nga a nɔ ɔ, (Sela)

 8 Zugba a mimiɛ;

Hiɔwe nɛ nyu kɛ pue si* ngɛ Mawu he je;

Sinai yoku nɛ ɔ mimiɛ ngɛ Mawu, Israel Mawu ɔ he je.

 9 Oo Mawu, o ha nɛ hiɔmi nɛ babaaba;

O ha o we bi* nɛ pɔ tɔ mɛ ɔ he wami ehe.

10 A hi bo tsuhi a mi;

Oo Mawu, o kpakpa peemi ɔ he je ɔ, o ha ohiatsɛmɛ níhi nɛ a hiaa.

11 Yehowa kɛ fami ɔ ha;

Yihi nɛ a jajeɔ sane kpakpa a ji tabo ngua.

13 E ngɛ mi kaa nyɛ hwɔɔ si ngɛ sito he ɔ ngɛ la amɛ* a kpɛti mohu lɛɛ,

Se lejɛ ɔ lɛ nyɛ maa na beleku lahuɛ kɛ e he sika hiɔ pɛlihi,

Kɛ e he sika tsu ngmingmiingmi tsɛlihi ngɛ.

14 Benɛ Ope ɔ gbɛ zugba a nɔ matsɛmɛ ɔmɛ kɛ fĩa a,

Snoo nɛ ngɛ Zalmon yoku ɔ nɔ.*

15 Bashan yoku ɔ ji Mawu yoku;*

Bashan yoku ɔ ji yoku gojogojoohi nɛ a tsa.

16 Nyɛ yoku gojogojoohi nɛ tsa, mɛni he je nɛ nyɛɛ kɛ hɛ tsumi

Ngɛ yoku ɔ nɛ Mawu hla kaa* e hi he ɔ hyɛe ɔ?

18 Oo Yah wa Mawu, o kuɔ kɛ ya he nɛ ya hiɔwe;

O ngɔ nyɔguɛhi kɛ ho;

O ngɔ nimli a mi nike ní kɛ ho,

Ee, nihi nɛ a tue mi ti po piɛɛ a he, konɛ a hi a kpɛti.

19 A je Yehowa, nɔ nɛ tlooɔ wa tlomi ɔmɛ daa ligbi ɔ yi,

Anɔkuale Mawu nɛ ji wa yi wami helɔ ɔ. (Sela)

20 Anɔkuale Mawu ɔ ji Mawu nɛ heɔ wa yi wami;

Nɛ Yehowa nɛ ji Nyɔmtsɛ Matsɛ ɔ jeɔ wɔ kɛ jeɔ gbenɔ mi.

21 Ee, Mawu maa ywia e he nyɛli ɔmɛ a yi,

E maa ywia nɔ fɛɛ nɔ nɛ yaa nɔ* ngɛ e fɔ yemi mi ɔ yi.

22 Yehowa de ke: “Ma ngɔ mɛ kɛ je Bashan kɛ ba;

Ma ngɔ mɛ kɛ je wo ɔ sisi tɔɔ kɛ ba,

23 Konɛ o nane nɛ wu muɔ,

Nɛ́ o gbe ɔmɛ a lilɛ nɛ lɔ he nyɛli ɔmɛ a muɔ.”

24 Oo Mawu, a na o we ako simi ɔ,

Ako nɛ ye Mawu ɔ, ye Matsɛ ɔ siɔ kɛ yaa he klɔuklɔu ɔ.

25 Lali ɔmɛ nyɛɛ hɛ mi, la fiali nɛ a ngɛ kpã sakuhi fiae nyɛɛ a se;

Yihewi ɔmɛ ngɛ a kpɛti nɛ a ngɛ akasawa fiae.

26 Nyɛ je Mawu yi ngɛ asafo ngua a mi;*

Nyɛ nihi nɛ nyɛ je Israel Je He ɔ, nyɛ je Yehowa yi.

27 Lejɛ ɔ nɛ Benyamin, nɛ ji jokuɛ kulaa a baa mɛ si ngɛ,

Jã nɛ e ji ngɛ Yuda ma nikɔtɔma amɛ kɛ a we asafo nɛ́ a kpaa ngmlaa a blɔ fa mi,

Zebulun ma nikɔtɔma amɛ, kɛ Naftali ma nikɔtɔma amɛ hu piɛɛ he.

29 O sɔlemi we ɔ nɛ ngɛ Yerusalem ɔ he je ɔ,

Matsɛmɛ maa ngɔ nike níhi kɛ ba ha mo.

30 Mo kã lohwe awi yeli nɛ a ngɛ glãhi a mi ɔ a hɛ mi,

Na kuhi babauu kɛ a bimɛ,

Kɛ yaa si be nɛ ma amɛ maa ngɔ sika hiɔ kɛ ba nɛ a ma ba kplã si.*

31 A maa ngɔ akɔblee* níhi kɛ je Egipt kɛ ba;*

Kush maa ngɔ nike níhi kɛ ba ha Mawu esɔesɔ.

32 Oo zugba a nɔ matsɛ yemihi, nyɛ la ha Mawu,

Nyɛ la yi jemi lahi* kɛ ha Yehowa, (Sela)

E we agboje ɔ ngɛ Israel nɔ,

Nɛ e he wami ɔ hu ngɛ bɔku ɔmɛ a mi.

Lɛ ji Israel Mawu,

Nɔ nɛ haa ma a nyɛmi kɛ he wami ɔ nɛ.

I ya je nyu nɛ mi kuɔ mi,

Nɛ pa nɛ ngɛ bee babaaba sa mi kɛ ho.

 3 I kpã ngmlaa kɛ tsɛ hluu nɛ pɔ tɔ ye he;

Ye gbi fĩa.

 4 Nihi nɛ a nyɛɔ mi yaka gu ɔ

A he hiɛ babauu pe ye yi bwɔmi.

Nihi nɛ a ngɛ hlae nɛ a gbe mi,

Ye he nyɛli nɛ a tsɔɔ nɔ se blɔ ɔ,* a he ba hiɛ babauu.

 5 Oo Mawu, o le ye kuasia jemi ɔ,

Nɛ ye fɔ yemi ɔ fɔɔ si paa ngɛ o hɛ mi.

 6 Zo nɛ ko gbe nihi nɛ a kɛ a hɛ fɔ o nɔ ɔ ngɛ ye he je,

Oo Nyɔmtsɛ Matsɛ, Yehowa tabohiatsɛ.

Nihi nɛ hlaa o se blɔ ɔ a hɛ mi nɛ ko pue si ngɛ ye he je,

Oo Israel Mawu.

 7 A gbeɔ ye he guɛ ngɛ o he je;

Ye hɛ mi pue si kpɔtɔɔ.

 8 I ba pee nubwɔ kɛ ha ye nyɛminyumu ɔmɛ,

Ma se no kɛ ha ye nyɛ binyumu ɔmɛ.

 9 Suɔmi nɛ i ngɛ kɛ ha o we ɔ ngɛ kaa la nɛ ngɛ tsoe ngɛ ye mi,

O he guɛ nɛ nihi gbeɔ ɔ ba pue ye nɔ.

10 Benɛ i ba ye he si* nɛ i ha hwɔ ɔ,*

A gbe ye he guɛ ngɛ lɔ ɔ he je.

11 Benɛ i ngɔ kpekpe kɛ pee ye tade ɔ,

I ba pee he fɛu yemi* nɔ́ kɛ ha mɛ.

12 Ye he munyu sɔuu nɛ nihi nɛ a hii si ngɛ ma a gbo ɔ nya a tuɔ,

Nɛ imi ji la ngɛ dã tɔli a nya.

13 Se ha ye sɔlemi ɔ nɛ su o ngɔ

Ngɛ be nɛ sa mi, Oo Yehowa.

Ye Mawu, ngɛ o suɔmi babauu nɛ se pui ɔ nya a,

Mo he mi nɔ, nɛ o tsɔɔ kaa o ji yi wami helɔ nɛ yeɔ anɔkuale.

14 Mo kpɔ̃ mi kɛ je mɔsɔ ɔ mi;

Ko ha nɛ ma pu.

Mo kpɔ̃ mi kɛ je nihi nɛ a nyɛɔ mi ɔ a dɛ,

Kɛ nyu nɛ mi kuɔ ɔ mi.

15 Ko ha nɛ nyu babauu nɛ ngɛ bee babaaba a nɛ sa mi kɛ ho,

Aloo muɔ voo ɔ nɛ mi mi,

Aloo vu* ɔ nɛ nga e nya kɛ wo ye yi.

Ngɛ o mɔbɔ nami babauu ɔ nya a, mo plɛ o hɛ nɛ o hyɛ mi,

17 Nɛ koo ngɔ o hɛ mi kɛ laa o sɔmɔlɔ ɔ.

18 Moo su ye he nɛ o kpɔ̃ mi;*

Mo kpɔ̃ mi ngɛ ye he nyɛli ɔmɛ a he je.

I hyɛ blɔ kaa nɔ ko maa na mi mɔbɔ lo, se i nɛ nɔ ko,

I hyɛ kaa nɔ ko maa wo ye bua lo, se i nɛ nɔ ko.

21 Se a ha mi duɔ* ngɛ niye ní nane mi,

Nɛ a ha mi wai nɛ kuã ke ma nu kɛ gbe kuma.

22 A we okplɔɔ ɔ nɛ pee klama nɛ du mɛ,

Nɛ a nɔ yami ɔ nɛ pee klama ha mɛ.

23 Ha nɛ a hɛngmɛ nɔ nɛ wo diblii konɛ a ko hyɛ nɔ́,

Nɛ́ a gbongu nɛ mimiɛ be fɛɛ be.

24 Plɛ o we abofu ɔ kɛ pue a nɔ,

Nɛ́ o we abofu nɛ nya wa a nɛ ná mɛ.

25 Ha nɛ a sito he* ɔ nɛ pee ma doku;

Nɔ ko nɔ ko nɛ ko hi a bo tsu ɔmɛ a mi.

26 Ejakaa a fieeɔ nɔ nɛ o fia lɛ nɔ́ ɔ se,

Nɛ a yaa nɔ nɛ a tuɔ nihi nɛ o plaa mɛ ɔ a piimi ɔ he munyu.

27 Ha nɛ a fɔ yemi ɔ nɛ kle agbo,

Nɛ́ a ko ná o dami ɔ mi blɔ fa mi nɔ́.

28 Á gbɛ* a biɛ ngɛ hɛ kali a womi* ɔ mi,

Nɛ a ko ngma a biɛ kɛ piɛɛ dali a he.

30 Ma la yi jemi lahi kɛ ha Mawu biɛ ɔ,

Nɛ i kɛ sina ma wo e nɔ gojoo.

31 Yehowa bua maa jɔ enɛ ɔ he pe na ku,

Pe na ku wayoo kɛ e yi mi kolihi kɛ e nane koklotohi.

33 Ejakaa Yehowa buɔ ohiatsɛmɛ tue,

Nɛ e be e nihi nɛ a nuu mɛ nyɔguɛ ɔ kuae.

34 Hiɔwe kɛ zugba nɛ je e yi,

Wo kɛ nɔ́ fɛɛ nɔ́ nɛ yaa nɛ baa ngɛ a mi ɔ nɛ je e yi.

35 Ejakaa Mawu ma he Zion yi wami,

Nɛ e maa kpale po Yuda ma amɛ,

Nɛ a maa hi lejɛ ɔ, nɛ a nine maa su nɔ.*

36 E sɔmɔli ɔmɛ a sisi bimɛ ɔmɛ a nine maa su nɔ,

Nɛ nihi nɛ a suɔ e biɛ ɔ maa hi nɔ.

70 Ao Mawu, mo he ye yi wami.

Ao Yehowa, moo ye oya nɛ o ba ye bua mi.

 2 Nihi nɛ a ngɛ hlae nɛ a gbe mi ɔ,*

Zo nɛ gbe mɛ nɛ a hɛ mi nɛ pue si.

Nihi nɛ a ngɛ hlae nɛ ma na nɔ́ ɔ,

Á kɛ hɛ mi si puemi nɛ kpale a se.

 4 Se nihi nɛ hlaa o se blɔ ɔ,

Ha nɛ a nya, nɛ a bua nɛ jɔ ngɛ o mi.

 5 Se ohiatsɛ kɛ nɔ nɛ be yemi kɛ bualɔ ji mi;

Ye Mawu, ba je ngmlaa ha mi esɔ.

Mo ji ye yemi kɛ bualɔ kɛ ye kpɔlɔ;

Yehowa ye Mawu, koo to tsle.

 3 Moo pee o he tɛsa nɛ he wa ha mi,

He nɛ ma nyɛ ma ya be fɛɛ be.

Mo fã konɛ a he ye yi wami,

Ejakaa mo ji ye tɛsa kɛ ye he piɛ pomi he.

 4 Oo ye Mawu, mo kpɔ̃ mi ngɛ yiwutsotsɛ dɛ mi,

Ngɛ nɔ nɛ ngɛ mi yi mi wae yaka gu ɔ dɛ mi.

 5 Ejakaa mo ji ye hɛ kɛ nɔ fɔmi, Oo Nyɔmtsɛ Matsɛ Yehowa;

Kɛ je ye nihe mi tɔɔ nɛ i ngɔ ye hɛ kɛ fɔ o nɔ.

 6 I ngɔ ye hɛ kɛ fɔ o nɔ kɛ je ye fɔmi mi tɔɔ;

Mo lɛ o je mi kɛ je ye nyɛ fɔmi kotoku mi.

 7 I ba pee kaa nyakpɛ nɔ́ ko kɛ ha nihi fuu,

Se mo ji ye wesa he nɛ he wa.

 8 Ye nya mi hyi tɔ kɛ o yi jemi;

I tuɔ o hɛ mi nyami ɔ he munyu ligbi ɔ tsuo.

 9 Ko sake mi kɛ fɔ he ngɛ ye bwɔmi si;

Ko kua mi ke ye he wami ta.

10 Ye he nyɛli ɔmɛ tuɔ munyu kɛ siɔ mi,

Nɛ nihi nɛ a ngɛ hlae nɛ a gbe mi ɔ* soɔ ye yi nɔ,

11 A deɔ ke: “Mawu kua lɛ.

13 Nihi nɛ a teɔ si kɛ woɔ mi ɔ,*

Zo nɛ gbe mɛ nɛ a hɛ mi nɛ kpata.

Nihi nɛ a ngɛ hlae nɛ ma na nɔ́ ɔ,

Zo nɛ gbe mɛ nɛ́ a hɛ mi nɛ pue si.

14 Se imi lɛɛ, ma ya nɔ nɛ ma mlɛ;

Ma ha nɛ o yi jemi ɔ maa hiɛ.

15 Ye nya maa jaje o dami ɔ,

Ye nya maa jaje yi wami hemi níhi nɛ o pee ɔ ligbi ɔ tsuo,

Pohu a hiɛ babauu pe bɔ nɛ ye juɛmi maa kpe he.*

16 Ma ba tu níhi nɛ o kɛ o he wami pee ɔ he munyu,

Nyɔmtsɛ Matsɛ Yehowa;

Ma wo o dami ɔ ta, mo pɛ o dami ɔ.

17 Ye Mawu, o tsɔɔ mi ní kɛ je ye nihe mi tɔɔ,

Nɛ kɛ ba si amlɔ nɛ ɔ, i yaa nɔ nɛ i jajeɔ o nyakpɛ ní tsumi ɔmɛ.

Mo ha nɛ ma tu o he wami* ɔ he munyu kɛ tsɔɔ yi nɔ nɛ nyɛɛ se ɔ,

Kɛ o we agboje ɔ he munyu kɛ tsɔɔ nihi tsuo nɛ maa ba a.

19 Oo Mawu, o dami ɔ ya su hiɔwe tɔɔ;

O pee ní nguanguahi;

Ye Mawu, mɛnɔ lɛ ngɛ kaa mo?

20 E ngɛ mi kaa o ha nɛ i kɛ haomi kɛ amanehlu babauu kpe mohu lɛɛ,

Se mo ha mi he wami ekohu;

Mo je mi kɛ je zugba a sisi tɔɔ.*

21 Mo ha nɛ ye we agboje ɔ nɛ pue nɔ,

Nɛ́ o po ye he piɛ, nɛ o wo ye bua.

22 Kɛkɛ ɔ, ma ngɔ kpã saku kɛ je o yi,

Ngɛ o we anɔkuale yemi ɔ he je, Oo ye Mawu.

Ma ngɔ saku kɛ la yi jemi lahi* kɛ ha mo,

Oo Israel Nɔ Klɔuklɔu.

23 Ye nya ma he ose be mi nɛ i ngɛ yi jemi lahi lae ha mo ɔ,

Ejakaa o he ye yi wami.*

24 Ye lilɛ maa tu o dami ɔ he munyu* ligbi ɔ tsuo,

Ejakaa nihi nɛ a ngɛ ye hɛ mi kpatami hlae ɔ, zo maa gbe mɛ, nɛ a hɛ mi ma pue si.

72 Oo Mawu, ngɔɔ o kojomi ɔmɛ kɛ ha matsɛ ɔ,

Nɛ́ o ngɔ o dami ɔ kɛ dloo matsɛ ɔ binyumu ɔ.

 2 É fã o we bi ɔmɛ a he ngɛ dami nya,

Nɛ́ e kɛ dami sane yemi nɛ fã nihi nɛ a ní ngɛ mɔbɔ ɔ a he.

 3 Yoku ɔmɛ nɛ á ngɔ tue mi jɔmi kɛ ba ha ni ɔmɛ,

Nɛ kpongu ɔmɛ nɛ a ngɔ dami kɛ ba.

 4 É fã ni ɔmɛ a kpɛti nihi nɛ a ní ngɛ mɔbɔ ɔ a he,*

É he ohiatsɛ bimɛ a yi wami,

Nɛ e kpata ojo fialɔ hɛ mi.

 5 Be abɔ nɛ pu ngɛ nɛ ɔ, a maa ye mo gbeye,

Be abɔ nɛ nyɔhiɔ ɔ hu ngɛ nɛ ɔ, a maa ye mo gbeye

Yi nɔhi tsuo.

 6 E maa pee kaa hiɔmi nɛ nɛɔ pueɔ nga nɛ a poo nɔ ɔ nɔ,

Kaa hiɔmi nɛ nɛɛ pueɔ zugba a nɔ.

 7 Ngɛ e ligbi ɔmɛ a mi ɔ, dalɔ maa bɔ,*

Nɛ tue mi jɔmi maa hi he fɛɛ he kɛ yaa si nyɔhiɔ be si hie hu.

 8 E maa ye nihi a nɔ* kɛ je wo nya hiɛ kɛ ya si wo nya hiɛ,

Kɛ je Pa* a nya kɛ ya si zugba a nyagbe he ɔmɛ hulɔ.

 9 Nga kplanaa nɔ bi ɔmɛ ma kplã si ngɛ e hɛ mi,

Nɛ e he nyɛli ɔmɛ a nya ma wu zu.

11 Matsɛmɛ ɔmɛ tsuo ma kplã si ngɛ e hɛ mi,

Nɛ je ma amɛ tsuo ma sɔmɔ lɛ.

12 Ejakaa e ma kpɔ̃ ohiatsɛ nɛ foɔ ya kɛ biɔ yemi kɛ buami ɔ,

Kɛ nɔ nɛ e ní ngɛ mɔbɔ, kɛ nɔ fɛɛ nɔ nɛ be yemi kɛ bualɔ ɔ.

13 E mi mi maa sã lɛ ngɛ nɔ nɛ e ní ngɛ mɔbɔ kɛ ohiatsɛ he,

Nɛ e ma he ohiatsɛmɛ a* yi wami.

14 E ma kpɔ̃ mɛ* kɛ je yi mi wami kɛ basabasa peemi mi,

Nɛ a muɔ he jua maa wa ngɛ e hɛ mi.

Á sɔle ha lɛ be fɛɛ be,

Nɛ a jɔɔ lɛ ligbi ɔ tsuo.

16 Ngma maa ba babauu ngɛ zugba a nɔ;

Yoku ɔmɛ a nɔ ma hyi tɔ kɛ ngma.

E tso yiblii maa ba kaa Lebanon nɔ́ ɔ,

Nɛ ma amɛ a mi ma hyi tɔ kɛ nimli kaa nga.

17 E biɛ nɛ hi si kɛ ya neneene,

Nɛ́ e biɛ nɛ pɛ be abɔ nɛ pu ngɛ ɔ.

Nihi nɛ́ a gu e nɔ kɛ ná jɔɔmi ha a he;

Je mahi tsuo nɛ́ a tsɛ lɛ ke bua jɔmi.

18 A je Yehowa Mawu, Israel Mawu ɔ yi,

Nɔ nɛ lɛ pɛ lɛ e peeɔ nyakpɛ níhi ɔ.

19 A je e biɛ nɛ hɛ mi ngɛ nyami ɔ yi kɛ ya neneene,

Nɛ e hɛ mi nyami ɔ nɛ hyi zugba a nɔ tsuo.

 2 Imi lɛɛ, e piɛ nguɛ nya nɛ ye nane tla blɔ;

E piɛ bɔɔ nɛ ye nane sane.

 3 Ejakaa ye hɛ kɔ̃ he nɔ woli* a nɔ

Benɛ i na kaa yiwutsotsɛmɛ ngɛ tue mi jɔmi ɔ.