LAHI A MI LA*
1 Lahi a mi la;* Salomo nɔ́ ɔ:
3 O nu ɔmɛ jeɔ via liliili.
O biɛ ɔ ngɛ kaa nu kɛ he via nɛ a plɛ ngɔ pue si.
Enɛ ɔ he je nɛ yihewi ɔmɛ suɔ mo ɔ nɛ.
4 Ngɔɔ mi kɛ ho;* ha nɛ waa tu fo.
Matsɛ ɔ ngɔ mi kɛ ba e se tsu ɔmɛ a mi!
Ha nɛ wa ná bua jɔmi nɛ wa nya.
Ha nɛ waa tu bɔ nɛ o jeɔ suɔmi kpo ha a he munyu* mohu pe wai.
E be nyakpɛ kaa a* suɔ mo.
5 Oo Yerusalem biyihi, i yuɔ, se ye he ngɛ fɛu
Kaa Kedar bo tsu ɔmɛ, kaa bo ɔmɛ nɛ a kɛ pee Salomo bo tsu ɔ.
Ye nyɛ binyumu ɔmɛ a mi mi fu mi;
A pee mi wai ngmɔ ɔmɛ a nɔ hyɛlɔ,
Se imi nitsɛ ye wai ngmɔ ɔ lɛɛ, i nyɛ we nɔ hyɛmi.
7 Mo nɛ́ i* suɔ mo wawɛɛ, mo de mi
Jije o ya haa o to ɔmɛ ní ngɛ?
Jije o haa nɛ a ya buɔ si ngɛ piani katakata?
Mɛni he je nɛ e sa nɛ ma pee kaa yo nɛ ngɔ nɔ́ kɛ ha e hɛ mi*
Ngɛ o huɛmɛ ɔmɛ a to ɔmɛ a kpɛti ɔ?”
8 “Mo yo nɛ o he ngɛ fɛu pe yihi tsuo, ke o li he nɛ e ngɛ ɔ,
Yaa nyɛɛ to ɔmɛ se
Nɛ́ o ya ha o we apletsi tsɔwi ɔmɛ niye ní ngɛ to hyɛli ɔmɛ a bo tsu ɔmɛ a kasa nya.”
9 “Ye suɔlɔ, o ngɛ kaa okpɔngɔ eyo ngɛ okpɔngɔhi nɛ gblaa Farao ta zugba lɛ ɔmɛ a kpɛti.
10 Junehi ha nɛ o tsitsa he pee fɛu,*
Muɛhi nɛ kpla o kuɛ ɔ ha nɛ o kuɛ mi pee fɛu.
11 Wa maa pee sika tsu junehi*
Kɛ a mi sika hiɔ níhi ha mo.”
12 “Ye nu kɛ he via a* ngɛ via jee
Be mi nɛ matsɛ ɔ hii si ngɛ e we okplɔɔ lokotoo ɔ he ɔ.
13 Ye suɔlɔ ɔ ngɛ kaa mimɛ nɛ jeɔ via nɛ hyi baagi tɔ kɛ ha mi,
E hiɔ ye nyɔhi a kpɛ nyɔ mi tsuo.
14 Ye suɔlɔ ɔ ngɛ kaa hena* mɔmɔ sau kake
Ngɛ Engedi wai ngmɔ ɔmɛ a kpɛti kɛ ha mi.”
15 “Hyɛ! Ye suɔlɔ, o he ngɛ fɛu.
Hyɛ! O he ngɛ fɛu saminya. O hɛngmɛ ngɛ kaa beleku lahuɛ hɛngmɛ.”
16 “Hyɛ! Ye suɔlɔ, o he ngɛ fɛu,* nɛ o he ngɛ bua jɔmi.
Ba mumu lɛ maa pee wa sa.
17 Seda tsohi ji wa we ɔ* yi mi tso ngua amɛ,
Junipa tsohi ji wa we ɔ yi bumi tso ɔmɛ.
2 “Bɔ nɛ lili mɔmɔ ngɛ ha ngɛ miohi a kpɛti ɔ,
Jã nɛ ye suɔlɔ ɔ ngɛ ngɛ yihewi ɔmɛ a kpɛti.”
3 “Bɔ nɛ aplo tso ngɛ ngɛ hue tso mi tsohi a kpɛti ɔ,
Jã nɛ ye suɔlɔ ɔ ngɛ ngɛ nihewi ɔmɛ a kpɛti.
I suɔ wawɛɛ kaa ma hi e hɔ ɔ mi,
Nɛ e yiblii ɔ ngɔɔ ha mi.
4 E ngɔ mi kɛ ba we nɛ a ngmɛ okplɔɔ ngɛ mi ɔ mi,*
Nɛ e we aflangaa nɛ ngɛ ye nɔ ji suɔmi.
5 Ngɔɔ wai yiblii gbigbli keekihi kɛ jɔɔ ye tsui he;
Ngɔɔ aplo kɛ baa ye yi,
Ejakaa suɔmi wo mi hiɔ.
6 E muɔ nine ngɛ ye yi sisi,
Nɛ e hiɔ nine fua mi.
7 Oo Yerusalem biyihi, nyɛ kã mi kita,
Nyɛɛ ngɔ nga mi odabɔhi kɛ afugbɛhi kɛ kã mi kita:
Nyɛ ko bɔ mɔde kaa nyɛ ma tle suɔmi si ngɛ ye mi aloo nyɛ maa tsɛ̃ɛ lɛ kɛ ya si be nɛ lɛ nitsɛ e maa te si.
8 I nu ye suɔlɔ ɔ he!
Hyɛ! Lɛ nɛ e ma a nɛ,
E ngɛ yoku ɔmɛ kuɔe, e ngɛ kpongu ɔmɛ tuue.
9 Ye suɔlɔ ɔ ngɛ kaa odabɔ, e ngɛ kaa afugbɛ wayoo.
Lɛ ji nɛ ɔ nɛ, e daa si ngɛ wa gbogbo ɔ se,
E ngɛ saflɛ ɔmɛ a mi hyɛe totooto,
E ngɛ saflɛ puɔ ɔmɛ a mi hyɛe.
10 Ye suɔlɔ ɔ ngɛ munyu tue, e ngɛ mi dee ke:
‘Ye suɔlɔ, tee si,
Ye afɛu yo, ba nɛ waa ho.
11 Hyɛ! Fĩɛ* be ɔ be.
Hiɔmi kpa nɛmi; hiɔmi se po.
13 Fig tso ɔ kekleekle yiblii ɔ fu;
Wai tso ɔmɛ gba mɔmɔ nɛ a ngɛ via jee.
Ye suɔlɔ, tee si nɛ o ba.
Ye afɛu yo, ba nɛ waa ho.
14 Oo ye beleku lahuɛ, mo nɛ o ngɛ tɛ puɔhi a mi ngɛ tɛsa amɛ a he,
Ngɛ puɔhi nɛ a ngɛ kɔ̃ ɔ he ɔ mi,
Ha nɛ ma na mo, nɛ ma nu o gbi,
Ejakaa o gbi ngɔɔ, nɛ o he ngɛ fɛu.’”
15 “Nyɛɛ nuu kɔkɔbo ɔmɛ ha wɔ,
Kɔkɔbo tsɔwi ɔmɛ nɛ a puɛɔ wai ngmɔ ɔmɛ ɔ,
Ejakaa wa wai ngmɔ ɔmɛ gba mɔmɔ.”
16 “Ye nɔ́ ji ye suɔlɔ ɔ, nɛ lɛ hu e nɔ́ ji mi.
E ngɛ e to ɔmɛ a nɔ hyɛe ngɛ lili mɔmɔ ɔmɛ a kpɛti.
17 Oo ye suɔlɔ, moo kpale kɛ ba esɔ
Kaa odabɔ aloo afugbɛ wayoo ngɛ yokuhi nɛ po wa kpɛti ɔ* a nɔ.
Loko kɔɔhiɔ yluduu nɛ fia ngɛ ligbi ɔ mi* nɛ́ nini ɔmɛ nɛ a laa.
3 “Benɛ i ngɛ ye sa a nɔ nyɔ mi ɔ,
I hla nɔ nɛ i* suɔ lɛ ɔ.
I hla lɛ, se i nɛ lɛ.
2 Ma te si nɛ ma ya kpa ma a mi;
Ma ya hla nɔ nɛ i* suɔ lɛ ɔ
Ngɛ gbɛjegbɛ ɔmɛ a nɔ kɛ ma a he nya buami he ɔmɛ.
I hla lɛ se i nɛ lɛ.
3 Buli ɔmɛ nɛ a ngɛ si poe ngɛ ma a mi ɔ na mi.
I bi mɛ ke: ‘Nyɛ na nɔ nɛ i* suɔ lɛ ɔ lo?’
4 Benɛ i be a he bɔɔ pɛ
Kɛkɛ nɛ i na nɔ nɛ i* suɔ lɛ ɔ.
I nu lɛ wawɛɛ, nɛ i ngmɛɛ we e he nɛ e je
Kɛ ya si benɛ i ngɔ lɛ kɛ ba ye yayo we ɔ mi,
Ngɛ nɔ nɛ ngɔ ye hɔ ɔ se tsu ɔ mi.
5 Oo Yerusalem biyihi, nyɛ kã mi kita,
Nyɛɛ ngɔ nga mi odabɔhi kɛ afugbɛhi kɛ kã mi kita:
Nyɛ ko bɔ mɔde kaa nyɛ ma tle suɔmi si ngɛ ye mi aloo nyɛ maa tsɛ̃ɛ lɛ kɛ ya si be nɛ lɛ nitsɛ e maa te si.”
6 “Mɛni lɛ ma ngɛ nga a nɔ kaa lasuku kusuu nɛ ɔ?
Mɛni lɛ ma nɛ a wo lɛ mimɛ kɛ ohɛ,
Kɛ jua yelɔ pauda slɔɔtohi nɛ jeɔ via a?”
7 Hyɛ! Salomo sɛ saminyayoo ɔ ji lɔ ɔ nɛ.
Nyumu he wali 60 bɔle lɛ,
A je Israel nyumu he wali ɔmɛ a kpɛti,
8 Mɛ tsuo a mia kɛ klaate,
A tsɔse mɛ tsuo kɛ ha ta hwumi,
Nɔ fɛɛ nɔ klaate ngɛ e ngmɔngmɔ he
Konɛ a kɛ hwɔɔ ngɛ gbeye níhi nɛ baa nyɔ mi ɔ he je.”
9 “E ji matsɛ sɛ saminyayoo* nɛ Matsɛ Salomo
Ngɔ Lebanon tsohi kɛ pee kɛ ha e he.
10 E kɛ sika hiɔ pee e titima amɛ,
E kɛ sika tsu pee níhi nɛ hɛɛ lɛ ɔ.
E kɛ lohwe he bwɔmi nɛ hɛɛ alamua tu su pee sɛ ɔ mi he nɛ e maa hi ɔ;
Yerusalem biyi ɔmɛ
Je suɔmi mi kɛ dla sɛ ɔ mi saminya.”
11 “Oo Zion biyihi, nyɛɛ je kpo,
Nyɛ ya hyɛ Matsɛ Salomo
Nɛ́ e bu yo kpeemi jlasi nɛ e yayo pee ha lɛ
Ngɛ ligbi nɛ e sɛ gba si himi mi ɔ nɔ,
Ngɛ ligbi nɛ e tsui nya a nɔ.”
4 “Hyɛ! Ye suɔlɔ, o he ngɛ fɛu.
Hyɛ! O he ngɛ fɛu saminya.
O hɛngmɛ ngɛ kaa beleku lahuɛ hɛngmɛ ngɛ o hɛ mi hami nɔ́ ɔ mi.
O yi bwɔmi ngɛ kaa apletsihi a kuu
Nɛ́ a ngɛ Gilead yoku ɔmɛ kplee.
2 O lunguhi ngɛ kaa jijɔhi a kuu nɛ a sã a he bwɔmi
Nɛ́ a du a he ha mɛ kɛ́ we,
Mɛ tsuo a fɔ enyɔɔnyɔ,
Nɛ a ti nɔ kake po bi gbo we.
3 O nya he ngɛ kaa kpã tsutsu,
Nɛ o munyu ngɔɔ.
4 O kuɛ ngɛ kaa David mɔ ɔ,
Mɔ nɛ a kɛ tɛhi nɛ a to mɛ zã nɔ zã nɔ ma,
Nɛ́ a kɛ tsɛ̃i akpe kpla he,
Nɛ́ nyumu he wali a tsɛ̃i lokotoo ɔmɛ tsuo kpla he ɔ.
5 O nyɔ enyɔ ɔmɛ ngɛ kaa odabɔ bimɛ enyɔ,
A ngɛ kaa odabɔ hawi,
Nɛ́ a yeɔ ní ngɛ lili mɔmɔ* ɔmɛ a mi.”
6 “Ma ya mimɛ yoku ɔ nɔ,
Kɛ ohɛ kpongu ɔ nɔ,
Loko kɔɔhiɔ yluduu nɛ fia ngɛ ligbi ɔ mi* nɛ́ nini ɔmɛ nɛ a laa.”
7 “Ye suɔlɔ, o he ngɛ fɛu kɛ pi si,
Sé ko kulaa be o he.
8 Ye we ayɛflo, ha nɛ waa je Lebanon kɛ ho,
Ha nɛ waa je Lebanon.
Mo kple kɛ je Amana* yoku ɔ yi mi,
Kɛ je Senir yoku ɔ yi mi, nɛ ji Hermon yoku ɔ yi mi,
Kɛ je jatahi a laami he ɔmɛ, kɛ ngatsɛhi a yoku ɔmɛ a nɔ.
9 Ye nyɛmiyo, ye we ayɛflo, o nu ye tsui,
O hɛngmɛ nɛ o kɛ hyɛ mi si kake ɔ gbe ye tsui,
Kpɔ nɛ ngɛ o kuɛ ní ɔ nya a ha nɛ ye tsui gbo kulaa.
10 Ye nyɛmiyo, ye we ayɛflo, hyɛ, bɔ nɛ o jeɔ suɔmi kpo ha a ngɛ fɛu!
Suɔmi kpo nɛ o jeɔ ɔ ngɔɔ pe wai,
Nɛ nu nɛ o kpa a jeɔ via pe tsopa kɛ e he via kpahi tsuo!
11 Ye we ayɛflo, hwo gbaku mi hwo dɛɛ ngɛ o nya.
Hwo kɛ nyɔ nyu ngɛ o lilɛ sisi,
Nɛ o tade ɔmɛ a mi he via ngɛ kaa Lebanon he via.
12 Ye nyɛmiyo ɔ, ye we ayɛflo ɔ ngɛ kaa abɔɔ nɛ a ngmɛ nya,
Abɔɔ nɛ a ngmɛ nya, nyu hɛngmɛ nɛ a sɔu nya.
13 O* ngɛ kaa tso ngɛ paradeiso* mi nɛ́ e kɔni ɔmɛ a nɔ hyi tɔ kɛ pomegranet.
Yiblii nɛ hi pe kulaa lɛ ngɛ mi, hena kɛ nardo tsohi,
14 Nardo kɛ safron, glã,* kɛ sinamon,
Kɛ ohɛ tso slɔɔtohi tsuo kɛ mimɛ kɛ aloe,
Kɛ tsopa kɛ he via kpakpahi tsuo ngɛ mi.
15 O ngɛ kaa abɔɔ mi nyu hɛngmɛ, vu kɛ e mi nyu mua,
O ngɛ kaa pahi nɛ a jeɔ Lebanon kɛ beɔ ɔ.
16 Oo yiti je kɔɔhiɔ, o hɛ nɛ tsɛ̃;
Oo woyi je kɔɔhiɔ, ba.
Ba fia blɛuu kɛ pue ye we abɔɔ ɔ nɔ.
Ha nɛ e he via a nɛ gbɛ kɛ fĩa.”
“Ye suɔlɔ ɔ nɛ ba e we abɔɔ ɔ mi
Nɛ e ba ye e mi tso yiblii nɛ hi pe kulaa.”
5 “I sɛ ye we abɔɔ ɔ mi,
Oo ye nyɛmiyo, ye we ayɛflo.
I bua ye mimɛ ɔ kɛ ye tsopa kɛ e he via a nya.
I ye ye hwo gbaku ɔ, kɛ ye hwo ɔ;
I nu ye wai ɔ kɛ ye nyɔ nyu ɔ.”
“Huɛmɛ kpakpahi, nyɛɛ ye ní!
Nyɛɛ nu ní, nɛ́ nyɛɛ de kɛ suɔmi kpo jemi!”
2 “I hwɔ mahe, se ye tsui hwɔ we mahe.
I nu nɛ ye suɔlɔ ɔ ngɛ sinya a sie!”
E ngɛ dee ke: “Ye nyɛmiyo, ye suɔlɔ, mo bli mi,
Ye beleku lahuɛ, ye afɛu yo!
Mo bli mi ejakaa ye yi mi pɔ kɛ bɔ́,
Nyɔ mi bɔ́ pɔ ye yi bwɔmi.”
3 “‘I je ye tade klɔii ɔ momo.
Mɛni he je nɛ ma kpale wo tade?
I fɔ ye nane he momo.
Mɛni he je nɛ ma wo ye nane he mu ekohu?’
4 Ye suɔlɔ ɔ je e nine ngɛ sinya puɔ ɔ mi,
Nɛ ye mi mi sã mi.
5 I te si konɛ ma bli sinya a ha ye suɔlɔ ɔ;
Mimɛ nɛ i kpa ngɛ ye nine he ɔ dɛ,
Mimɛ nyu dɛ ngɛ ye nine nguɛ ɔmɛ a he
Kɛ pue klɔɔklɔɔ ɔ nɔ.
6 I bli sinya a ha ye suɔlɔ ɔ,
Se ye suɔlɔ ɔ je momo, e je.
Benɛ e je ɔ, i hao.*
I hla lɛ, se i nɛ lɛ.
I tsɛ lɛ, se e he we nɔ.
7 Buli ɔmɛ nɛ a ngɛ si poe ngɛ ma a mi ɔ na mi.
A fia mi nɔ́, nɛ a plaa mi.
Gbogbo ɔmɛ a he buli ɔmɛ kpɔ̃ ye hɛ mi hami nɔ́ ɔ ngɛ ye dɛ.
8 Oo Yerusalem biyihi, nyɛ kã mi kita:
Ke nyɛ na ye suɔlɔ ɔ,
Nyɛ de lɛ ke suɔmi wo mi hiɔ.”
9 “Mɛni o suɔlɔ ɔ kɛ pe suɔli kpahi
Mo nɛ́ o he ngɛ fɛu pe yihi tsuo?
Mɛni o suɔlɔ ɔ kɛ pe suɔli kpahi
Nɛ́ lɔ ɔ he je e sa nɛ wa kã mo jamɛ a kita a?”
10 “Ye suɔlɔ ɔ he ngɛ fɛu saminya nɛ e tsuɔ;
E slo lɛ kulaa ngɛ nihi akpe nyɔngma a kpɛti.
11 E yi ngɛ kaa sika tsu, sika tsu ngmingmiingmi.
E yi bwɔmi ngɛ kaa tã kũɔmihi* nɛ́ a ngɛ mimiɛe,
E yi bwɔmi yuɔ kaa kuakualabite.
12 E hɛngmɛhi ngɛ kaa beleku lahuɛhi ngɛ nyu dɔhi a he,
Nɛ́ a ngɛ a he due ngɛ nyɔ nyu mi,
Nɛ́ a maa si ngɛ taku nɛ nyu hyi lɛ banebane he.*
13 E tsitsahi ngɛ kaa sa kɛ e nɔ tsopahi kɛ a he via,
Kaa bahi nɛ a jeɔ via nɛ a bua nya glekuu.
E nya he ngɛ kaa lili mɔmɔhi nɛ́ dɛɛ mimɛ nyu.
14 E ninehi ngɛ kaa sika tsu tɔhi nɛ a kɛ krisolito tɛhi hɔɔ mi.
E mi mi ngɛ kaa suɔ wu nɛ a sa he, nɛ́ a kɛ safiro tɛhi ha he.
15 E nanehi ngɛ kaa titimahi nɛ a kɛ mamaro tɛhi* pee nɛ a ngɔ kɛ ma sika tsu ngmingmiingmi nɔ dami níhi a nɔ.
E he ngɛ fɛu kaa Lebanon, kaa seda tsohi nɛ a nɔ be ɔ.
16 Nɔ́ ngɔngɔɛ ngɛ e nya mi.
Nɛ e he nɔ́ fɛɛ nɔ́ ngɛ akɔnɔ.
Oo Yerusalem biyihi, bɔ nɛ ye suɔlɔ ɔ ngɛ ha ji nɛ ɔ nɛ, nɔ nɛ i suɔ lɛ ɔ ji nɛ ɔ nɛ.”
6 “Jije o suɔlɔ ɔ ho,
Oo mo nɛ o he ngɛ fɛu pe kulaa ngɛ yihi a kpɛti?
Jije o suɔlɔ ɔ gu?
Ha nɛ waa piɛɛ o he kɛ ya hla lɛ.”
2 “Ye suɔlɔ ɔ kple kɛ ho e we abɔɔ ɔ mi ya,
Kɛ ho tsopa kɛ e he via ngmɔ ɔmɛ a mi ya,
Konɛ e ya hyɛ to ɔmɛ a nɔ ngɛ abɔɔ ɔmɛ a mi,
Nɛ́ e bua lili mɔmɔhi* a nya.
3 Ye suɔlɔ ɔ nɔ́ ji mi,
Nɛ ye nɔ́ ji ye suɔlɔ ɔ.
E ngɛ e to ɔmɛ a nɔ hyɛe ngɛ lili mɔmɔ ɔmɛ a kpɛti.”
4 “Ye suɔlɔ, o he ngɛ fɛu kaa Tirza,*
O he ngɛ fɛu kaa Yerusalem,
O he ngɛ gbeye kaa tabuli nɛ a bɔle a we aflangaahi.
5 Mo je o hɛngmɛ kɛ je ye nɔ,
Ejakaa a náa ye nɔ he wami.
O yi bwɔmi ngɛ kaa apletsihi a kuu
Nɛ a ngɛ Gilead kɔ̃ ɔmɛ kplee.
6 O lunguhi ngɛ kaa jijɔhi a kuu,
Nɛ́ a du a he ha mɛ kɛ́ we,
Mɛ tsuo a fɔ enyɔɔnyɔ,
Nɛ a ti nɔ kake po bi gbo we.
7 Bɔ nɛ pomegranet nɛ a gba mi enyɔ ngɛ ɔ,
Jã nɛ o tsitsahi* ngɛ ngɛ o hɛ mi hami nɔ́ ɔ mi.
8 E ngɛ mi kaa i ngɛ Manyɛmɛ 60,
Kɛ yi kpahi 80,
Kɛ yihewi nɛ a li a yibɔ mohu lɛɛ,
9 Se nɔ kake pɛ ji ye beleku lahuɛ, ye afɛu yo.
E ji biyo nɛ e nyɛ suɔ e sane saminya.
Nɔ nɛ fɔ lɛ ɔ fiɛ we e he.*
Yihewi ɔmɛ naa lɛ, nɛ a deɔ lɛ ke e he ba ní pɛ;
Manyɛmɛ kɛ yi kpa amɛ naa lɛ nɛ a jeɔ e yi.
10 ‘Mɛnɔ ji yo nɛ ɔ nɛ e ngɛ kpɛe* kaa makɛ,
Nɛ́ e he ngɛ fɛu kaa nyɔhiɔ nɛ wa,
Nɛ́ e he tsɔ kaa pu la,
Nɛ́ e he ngɛ gbeye kaa tabuli nɛ a bɔle a we aflangaahi ɔ?’”
11 “I kple kɛ ya atĩa* tso abɔɔ ɔ mi
Konɛ ma ya hyɛ ní ehehi nɛ a puɛ ngɛ dɔgba a mi ɔ,*
Konɛ ma hyɛ kaa wai tso ɔ tsɛ̃,
Nɛ pomegranet tso ɔmɛ gba mɔmɔ lo.
13 “Moo kpale kɛ ba, Oo Shulam yo, moo kpale kɛ ba!
Moo kpale kɛ ba, moo kpale kɛ ba!
Ba nɛ waa hyɛ o he fɛu ɔ!”
“Mɛni he je nɛ nyɛ ngɛ Shulam yo ɔ hyɛe gaa kikɛ nɛ ɔ?”
“Kaa nɔ́ nɛ nyɛ ngɛ kuu enyɔ a do hyɛe!”*
7 “Hyɛ bɔ nɛ o nanewɛɛhi ngɛ fɛu ngɛ o tokota a mi ha,
Oo odehe biyo!
O fiɔhi ngɛ fɛu kaa june,
A ngɛ kaa ga ní tsulɔ nine nya ní tsumihi.
2 O langmɔ ngɛ kaa tsesi kokloo.
Wai nɛ a futu nɛ́ ko ta mi gblegbleegble.
O mi mi ngɛ kaa ngma nɛ a bua nya glekuu
Nɛ́ lili mɔmɔhi bɔle lɛ kɛ kpe.
3 O nyɔ enyɔ ɔmɛ ngɛ kaa odabɔ bimɛ enyɔ,
A ngɛ kaa odabɔ hawi.
4 O kuɛ ngɛ kaa mɔ nɛ a ngɔ suɔ wu kɛ ma.
O hɛngmɛhi ngɛ kaa Heshbon taku ɔmɛ
Ngɛ Batrabim agbo ɔ he.
O gugwɔ ngɛ kaa Lebanon mɔ ɔ
Nɛ́ e hɛ mi tsɔɔ Damasko ɔ.
5 O yi maa si ngɛ o kuɛ nɔ kaa Karmel Yoku ɔ,
Nɛ o yi bwɔmi ngɛ kaa lohwe he bwɔmi nɛ hɛɛ alamua tu su.
Bɔ nɛ e pueɔ si ngɛ o nɔ ha a muɔ matsɛ ɔ hɛ.*
6 Hyɛ bɔ nɛ o he ngɛ fɛu ha, hyɛ bɔ nɛ o he ngɛ akɔnɔ ha,
Oo ye weyo nɛ i suɔ, o nɔ be!
7 O nɔmlɔ tso maa si tsa kaa tã,
Nɛ o nyɔhi ngɛ kaa zani sauhi.
8 I de ke, ‘Ma kuɔ tã a
Konɛ ma ya nu e nya tso ɔmɛ.’
O nyɔ ɔmɛ nɛ́ a pee kaa wai yiblii sauhi,
O gugwɔ mi kɔɔhiɔ nɛ́ je via kaa aplo,
9 Nɛ́ o nya mi hu nɛ e pee kaa wai nɛ hi pe kulaa.”
“É kple kɛ be miaa ngɛ ye suɔlɔ ɔ kuɛ si,
É be blɛuu ngɛ nihi nɛ a hwɔ mahe ɔ a nya mi.
10 Ye suɔlɔ ɔ nɔ́ ji mi,
Nɛ ke e nɛ mi ɔ, e nyɛ we si himi.
11 Oo ye suɔlɔ, ba,
Ha nɛ waa je kpo kɛ ho nga a nɔ ya;
Ha nɛ wa ya hi hena tso ɔmɛ a kpɛti.
12 Ha nɛ waa te si mla nɛ waa ho wai ngmɔ ɔmɛ a mi ya,
Ha nɛ wa ya hyɛ ke ji wai tso ɔmɛ tsɛ̃,
Ke ji mɔmɔ ɔmɛ gba,
Nɛ pomegranet tso ɔmɛ gba mɔmɔ.
Lejɛ ɔ nɛ ma je suɔmi kpo kɛ tsɔɔ mo ngɛ.
13 Tso yiblii ɔmɛ ngɛ via jee;
Tso yiblii kpakpa slɔɔtohi tsuo ngɛ wa sinya amɛ a nya.
Tso yiblii ehehi kɛ momohi tsuo,
Ye suɔlɔ, i kɛ to ha mo.
8 “I ná nɛ ye nyɛminyumu ji mo,
Nɔ nɛ e pupɔ ye nyɛ nyɔ ɔ!
Jinɛ ke i na mo ngɛ ma a mi ɔ, ma fĩɔ o nya he,
Nɛ nɔ ko be ye he guɛ gbee.
2 Jinɛ ma nyɛɛ o hɛ mi;
Ma ngɔ mo kɛ ba ye nyɛ we ɔ mi,
Nɔ nɛ e tsɔɔ mi ní ɔ we ɔ mi.
Ma ha mo wai nɛ a wo mi tsopa kɛ e he via nɛ́ o nu,
Pomegranet tso yiblii mi nyu ehe.
3 E muɔ nine maa hi ye yi sisi,
Nɛ e hiɔ nine maa fua mi.
4 Oo Yerusalem biyihi, nyɛ kã mi kita:
Nyɛ ko bɔ mɔde kaa nyɛ ma tle suɔmi si ngɛ ye mi aloo nyɛ maa tsɛ̃ɛ lɛ kɛ ya si be nɛ lɛ nitsɛ e maa te si.”
5 “Mɛnɔ lɛ je nga a nɔ kɛ ngɛ kuɔe kɛ ma
Nɛ́ e kpla e suɔlɔ ɔ he nɛ ɔ?”
“I tsɛ̃ɛ mo ngɛ aplo tso ɔ sisi.
Benɛ o nyɛ hɛɛ o hɔ ɔ, lejɛ ɔ nɛ e nu kɔɔmi ngɛ.
Lejɛ ɔ nɛ nɔ nɛ fɔ mo ɔ nu kɔɔmi ngɛ.
6 Ngɔɔ mi kɛ mɛtɛ o tsui nɔ kaa nɔ́ nya sɔumi nɔ́,
Kaa nɔ́ nya sɔumi nɔ́ ngɛ o kɔni he,
Ejakaa suɔmi ngɛ he wami kaa gbenɔ,
Nɛ ke nɔ ko ngɔ e tsui tsuo kɛ ha nɔ ko ɔ, e nya la hí gbemi kaa bɔ nɛ Yɔkɔ* nya hí kumi ɔ.
E la lilɛ ɔmɛ ji la lilɛ nɛ tsoɔ gegeege, Yah* la lilɛ ɔ.
7 Nyuhi nɛ a pee hamahama be nyɛe maa gbe suɔmi,
Nɛ pahi hu be nyɛe ma fɔ lɛ kɛ ho.
Ke nyumu ko ka kaa e maa ngɔ e we mi níhi tsuo kɛ he suɔmi ɔ,
E maa pee he guɛ gbemi nitsɛnitsɛ.”*
8 “Wa ngɛ nyɛmiyo wayoo ko
Nɛ́ e tui nyɔ lolo.
Mɛni wa maa pee kɛ ha wa nyɛmiyo ɔ
Ngɛ ligbi nɛ a ma ba bi e si ɔ nɔ?”
9 “Ke gbogbo ji lɛ ɔ,
Waa kɛ sika hiɔ maa fia nɔ́ kɛ ma e nɔ,
Se ke sinya ji lɛ ɔ,
Waa kɛ seda tso maa la e se.”
10 “Gbogbo ji mi,
Nɛ ye nyɔ ɔmɛ ngɛ kaa mɔhi.
Lɔ ɔ he ɔ, ngɛ ye suɔlɔ ɔ hɛ mi ɔ, i ngɛ kaa
Nɔ ko nɛ e tue mi jɔ lɛ.
11 Salomo ngɛ wai ngmɔ ko ngɛ Baal Hamon.
E ngɔ wai ngmɔ ɔ kɛ wo nihi a dɛ konɛ a hyɛ nɔ.
Ke a kpa ní ɔ, a ti nɔ fɛɛ nɔ ngɔɔ sika hiɔ akpe kɛ baa.
12 I ngɛ imi nitsɛ ye wai ngmɔ.
Oo Salomo, o nɔ́ ji sika hiɔ akpe* ɔ nɛ,
Nɛ nihi nɛ a hyɛɛ yiblii ɔ nɔ ɔ a nɔ́ ji lafa enyɔ.”
13 “Oo mo nɛ o hi he ji abɔɔ ɔmɛ a mi,
Huɛmɛ ɔmɛ ngɛ mlɛe nɛ a nu o gbi.
Ha nɛ ma nu o gbi.”
14 “Ye suɔlɔ, moo pee mla,
O he nɛ sɔ kaa odabɔ
Aloo afugbɛ wayoo
Nɛ e ngɛ tsopa kɛ e he via yoku ɔmɛ a nɔ.”
Aloo “SALOMO LAHI.”
Aloo “La nɛ pe kulaa.”
Ngɛ Hebri gbi mi ɔ, “E kɛ e nya he fiɔmi ɔmɛ nɛ fĩɔ ye nya he.”
Ngɛ Hebri gbi mi ɔ, “Gblaa mi kɛ nyɛɛ o se.”
Ngɛ Hebri gbi mi ɔ, “Ha nɛ wa je bɔ nɛ o jeɔ suɔmi kpo ha a yi.”
Nɛ ji yihewi ɔmɛ.
Ngɛ Hebri gbi mi ɔ, “pu ɔ lɛ hyɛ mi.”
Aloo “ye klaa.”
Aloo “Mɛni he je nɛ e sa kaa ma ngɔ aywilɛho yemi hɛ mi hami nɔ́ kɛ ha ye hɛ mi.”
Baiblo komɛ de ke, “O tsitsahi ngɛ fɛu ngɛ yi nɛ a gbɔ kpɛti.”
Aloo “sika tsu ní lokotoohi.”
Ngɛ Hebri gbi mi ɔ, “nardo nu ɔ.”
Blɛfo gbi mi ɔ, a tsɛɛ lɛ ke henna.
Aloo “o ji niheyo tsuãa.”
Aloo “we ngua a.”
Aloo “tɔngɔtofoe.”
Ngɛ Hebri gbi mi ɔ, “E ngɔ mi kɛ ba wai we mi.”
Aloo “Hiɔmi nɛmi.”
Aloo “poomi.”
Baiblo komɛ de ke, “yokuhi nɛ a mi gba.” Aloo “Beter yoku ɔmɛ.”
Ngɛ Hebri gbi mi ɔ, “Loko ligbi ɔ nɛ mu.”
Aloo “ye klaa.”
Aloo “ye klaa.”
Aloo “ye klaa.”
Aloo “ye klaa.”
E ji sɛ ko nɛ a ngɔ nɔ́ kɛ ha he nɛ a kɛ tlooɔ matsɛ loo nɔ ko nɛ e nɔ kuɔ.
Aloo “o tue si.”
Aloo “tɔngɔtofoe.”
Ngɛ Hebri gbi mi ɔ, “Loko ligbi ɔ nɛ mu.”
Aloo “Anti-Lebanon.”
Baiblo komɛ de ke, “O he lo.”
Aloo “abɔɔ.”
E ji glã henɔ ko nɛ jeɔ via.
Baiblo komɛ de ke, “Benɛ e tu munyu ɔ, e piɛ nguɛnya nɛ i hɛli.”
Aloo “ta kɔnihi.” Baiblo komɛ de ke, “kaa zani sau.”
Baiblo komɛ de ke, “maa si ngɛ nyu hɛngmɛ ɔmɛ a nya.”
Blɛfo gbi mi ɔ, a tsɛɛ lɛ ke marble.
Aloo “tɔngɔtofoehi.”
Aloo “Afɛu Ma.”
Aloo “o tue si.”
Ngɛ Hebri gbi mi ɔ, “E ji nɔ nɛ he tsɔ nɛ se ko be e he kɛ ha nɔ nɛ fɔ lɛ ɔ.”
Ngɛ Hebri gbi mi ɔ, “nɛ e ngɛ zugba hyɛe.”
E ji tso ko nɛ ngɛ kaa atĩa tso nɛ a duɔ ngɛ Israel.
Aloo “dɔ ɔ nɔ ɔ.”
Aloo “Ye klaa.”
Aloo “ye nihi nɛ a ngɔ a he kɛ ha fa a.”
Aloo “Mahanaim do.”
Aloo “nu matsɛ ɔ tsui.”
Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
“Yah” ji biɛ Yehowa a kpiti pomi.
Baiblo komɛ de ke, “A maa gbe nyumu ɔ he guɛ.”
Ngɛ Hebri gbi mi ɔ, “o nɔ́ ji akpe.”