YESAYA

 2 Oo hiɔwe, bu tue, Oo zugba, ta tue,

Ejakaa Yehowa tu munyu:

“I tsɔse* binyumuhi nɛ a wa,

Se a tsɔ ye hɛ mi atuã.

 3 Na ku le e tsɛ* saminya,

Nɛ teji le he nɛ e nyɔmtsɛ haa lɛ niye ní ngɛ;

Se Israel li mi,*

Imi nitsɛ ye we bi ɔmɛ kɛ nɔ́ sisi numi tsu we ní.”

 4 Musu tloo je ma nɛ peeɔ yayami ɔ,

Nihi nɛ tɔmi ngɛ mɛ gbee ɔ,

Yiwutsotsɛmɛ a ninahi, bimɛ nɛ a puɛ!

A kua Yehowa;

A bui Israel Nɔ Klɔuklɔu ɔ;

A plɛ a se wo lɛ.

Yi ɔ tsuo be he wami,

Nɛ hiɔ nu tsui ɔ tsuo.

He komɛ plaa, he komɛ kpɔ, he komɛ pee pahi nɛ a nɔ fɔɔ si gu

—A tsɔɔ we,* nɛ a fi we a nɔ, nɛ a tui a nɔ nu hulɔ.

 8 A je Zion biyo ɔ he kaa gba ngɛ wai ngmɔ mi,

Kaa gba ngɛ jamatlɛ* ngmɔ mi,

Kaa ma nɛ a sa yi.

 9 Ke pi nɛ Yehowa tabohiatsɛ ɔ ha nɛ wa ti nihi bɔɔ wa yi ná wami ɔ,

Jinɛ wa ko pee kaa Sodom,

Nɛ jinɛ wa ko pee kaa Gomora.

Agbosuhi nɛ nyɛɛ kɛ sãã sami afɔlehi kɛ lohwehi nɛ a plɔke a zɔ ɔ ba ti mi,*

Nɛ ye bua jɔɛ na ku wawi ɔmɛ a muɔ kɛ jijɔ bimɛ kɛ apletsihi a he.

12 Ke nyɛ ba ye hɛ mi ɔ,

Mɛnɔ deɔ nyɛ ke

Nyɛ ba naa ye yale ɔ mi?

Nyɛ yeɔ nyɔhiɔ ehehi, he jɔɔmi ligbihi, nɛ nyɛ tsɛɔ kpehi;

I be kunya he wami nɛ nyɛɛ kɛ tsuɔ ní kɛ nyɛ he nya buami klɔuklɔu ɔmɛ a he tsui.

A ba pee tlomi ha mi;

Pɔ tɔ ye he kɛ a tloomi.

15 Nɛ ke nyɛ gbɛ nyɛ dɛ mi ɔ,

I ngɔɔ ye hɛ mi* kɛ laa nyɛ.

E ngɛ mi kaa nyɛ sɔleɔ babauu mohu lɛɛ,

Se i bui tue;

Nyɛ ninehi a he hyi tɔ kɛ muɔ.

16 Nyɛ fɔ nyɛ he, nyɛ ha nɛ nyɛ he nɛ tsɔ;

Nyɛ je nyɛ ní peepee yayami ɔmɛ kɛ je ye hɛ mi;

Nyɛ kpa nɔ́ yayami peemi.

17 Nyɛɛ kase bɔ nɛ a peeɔ kpakpa ha, nyɛ hla dami sane yemi se blɔ,

Nyɛ tsɔse nɔ nɛ e yi mi wa,

Nyɛ fã he blɔhi nɛ awusa* ngɛ ɔ he,

Nɛ nyɛ fã yalɔyo he.”

“E ngɛ mi kaa nyɛ yayami ɔmɛ tsuɔ tsutsuutsu mohu lɛɛ,

Se ma ha nɛ a hiɛ futaa kaa snoo;

E ngɛ mi kaa a tsuɔ kaa kɔjai* mohu lɛɛ,

Se a maa pee kaa jijɔ he bwɔmi.

19 Ke nyɛ je nyɛ tsui mi nɛ nyɛ bu tue ɔ,

Nyɛ maa ye zugba a nɔ ní kpakpahi.

20 Se ke nyɛ bui tue nɛ nyɛ tsɔ atuã a,

Klaate ma kpata nyɛ hɛ mi,

Imi Yehowa lɛ i de.”

Jinɛ dami sane yemi hyi lɛ tɔ;

Jinɛ dami ngɛ ma a mi,

Se amlɔ nɛ ɔ, nɔ gbeli lɛ a ngɛ mi.

22 O sika hiɔ ɔ plɛ pee sika hiɔ mi mu,

Nɛ a kɛ nyu futu o dã a.*

A yi dami sane kɛ ha awusahi,*

Nɛ a bui yalɔyihi hu a sane tue.

24 Enɛ ɔ he ɔ, anɔkuale Nyɔmtsɛ ɔ, Yehowa tabohiatsɛ ɔ,

Israel He Walɔ ɔ ngɛ dee ke:

“Aa! Ma je ye he nyɛli ɔmɛ kɛ je ye he,

Nɛ ma ye lue ngɛ ye he nyɛli ɔmɛ a nɔ.

25 Ma je ye nine kɛ pi mo,

Ma sile mo, nɛ ma je mu nɛ ngɛ o mi ɔ kɛ je kaa bɔ nɛ jale jeɔ mu ɔ,

Nɛ ma je o mi mu ɔ tsuo.

26 Ma ha mo kojoli ekohu kaa bɔ nɛ e ji kekle ɔ,

Nɛ ma ha mo ga woli ekohu kaa bɔ nɛ e ji kɛ je sisije ɔ.

27 A kɛ dami sane yemi ma kpɔ̃ Zion,

Nɛ a kɛ dami ma kpɔ̃ e mi bi nɛ́ a kpale kɛ ba a.

28 A ma kpata atuã tsɔli ɔmɛ kɛ yayami peeli ɔmɛ a hɛ mi kɛ bla,

Nɛ nihi nɛ a jeɔ Yehowa he ɔ, a hɛ mi ma kpata.

29 Ejakaa tso nguanguahi nɛ nyɛ suɔ ɔ, a he zo maa pee mɛ,

Nɛ nyɛ hɛ mi ma pue si ngɛ abɔɔhi* nɛ nyɛ hla a he je.

30 Ejakaa nyɛ maa pee kaa tso ngua ko nɛ e bahi ngɛ gblie,

Nyɛ maa pee kaa abɔɔ nɛ e nɛ nyu.

31 Nyumu he walɔ maa pee kaa doti kpa,*

Nɛ e ní tsumi ɔ maa pee kaa la nɛ ngɛ pɛ́e;

Lɛ tsuo maa sã gegeege,

Nɛ nɔ ko be nɛ e maa gbe la a.”

 2 Ngɛ nyagbe ligbi ɔmɛ a mi ɔ,*

Yehowa we ɔ yoku ɔ

Maa ma si kpɛii ngɛ yoku ɔmɛ a nɔ,

Nɛ a ma wo nɔ kɛ be yoku wawi ɔmɛ a he,

Nɛ je ma amɛ tsuo ma bu yuu kɛ ya he.

“Nyɛɛ ba, nyɛ ha nɛ waa kuɔ kɛ ya Yehowa yoku ɔ nɔ,

Kɛ ya Yakob Mawu ɔ we ɔ.

E maa tsɔɔ wɔ e blɔ ɔmɛ,

Nɛ wa maa nyɛɛ e blɔ ɔmɛ a nɔ.”

Ejakaa mlaa* maa je Zion,

Nɛ Yehowa munyu ɔ maa je Yerusalem.

 4 E maa kojo je ma amɛ a kpɛti,

Nɛ e ma dla sanehi kɛ ha mahi babauu.

A kɛ a klaate ɔmɛ maa sɔ̃ kpakplaahi,

Nɛ a kɛ a we akplɔ ɔmɛ maa sɔ̃ tso he suami hahi.

Je ma ko be klaate nɔ woe kɛ si je ma ko,

Nɛ a be ta hwumi kasee hulɔ.

 5 Oo Yakob we, nyɛɛ ba,

Nyɛ ha nɛ waa nyɛɛ ngɛ Yehowa la a nya.

 6 Ejakaa o kua o we bi ɔmɛ, Yakob we ɔ,

Ejakaa níhi nɛ a kɛ je Puje He ɔ hyi mɛ tɔ;

A tsuɔ kunya kaa Filistibi ɔmɛ,

Nɛ ma se bi a bimɛ sɔuu ji a kpɛti.

 7 A zugba a nɔ hyi tɔ kɛ sika hiɔ kɛ sika tsu,

Nɛ a li a juetli ɔmɛ a nya.

A zugba a nɔ hyi tɔ kɛ okpɔngɔhi,

Nɛ a li a ta zugba lɛ ɔmɛ a nya.

A kplãã si kɛ haa mɛ nitsɛmɛ a nine nya ní tsumihi,

Kɛ haa nɔ́ nɛ mɛ nitsɛmɛ a nine nguɛhi pee.

 9 Lɔ ɔ he ɔ, adesa kplãã si, nɛ e baa si,

Nɛ o be nyɛe maa ngɔ kɛ ke mɛ.

10 Yaa sɛ tɛsa mi, nɛ o laa o he ngɛ zu mi

Ngɛ Yehowa we abofu nɛ ngɛ gbeye

Kɛ e we agboje kɛ e hɛ mi nyami ɔ he je.

11 A maa ba adesa hɛngmɛ nɛ woɔ e he nɔ ɔ si,

Nɛ a maa ba adesa he nɔ woli si.

E ma nɔ fɛɛ nɔ nɛ e ji he nɔ wolɔ kɛ pupuupu peelɔ ɔ nɔ,

E ma nɔ fɛɛ nɔ nɔ, nɔ nɛ a wo e nɔ jio, nɔ nɛ a ba lɛ si jio,

13 E ma Lebanon seda tso ɔmɛ tsuo nɛ a ya hiɔwe nɛ a wo a nɔ ɔ nɔ,

Kɛ Bashan oak tso ɔmɛ tsuo a nɔ,

14 E ma yokuhi tsuo nɛ a ya hiɔwe ɔ a nɔ,

Kɛ kponguhi nɛ a ya hiɔwe ɔ tsuo a nɔ,

15 E ma mɔ fɛɛ mɔ nɛ ya hiɔwe kɛ gbogbo fɛɛ gbogbo nɛ e he wa a nɔ,

16 E ma Tarshish mele ɔmɛ tsuo a nɔ,

Kɛ lɛhi nɛ a ngɛ fɛu tsuo a nɔ.

17 A maa ba adesa he nɔ womi si,

Nɛ a maa ba adesa he nɔ woli si.

19 Benɛ e maa te si konɛ e ha nɛ zugba a kɛ gbeye yemi nɛ mimiɛ ɔ,

Nihi ma ya sɛ tɛsahi a mi puɔhi a mi,

Kɛ muɔhi nɛ a ngɛ zugba a mi ɔ mi,

Ngɛ Yehowa we abofu nɛ ngɛ gbeye

Kɛ e we agboje kɛ e hɛ mi nyami ɔ he je.

20 Jamɛ a ligbi ɔ, adesahi maa ngɔ a sika hiɔ kɛ a sika tsu mawuhi nɛ se nami be a he

Nɛ́ a pee kɛ ha a he konɛ a kplã si ha mɛ ɔ,

Nɛ a ma ya sake mɛ ngɔ pue he kɛ ha kɔkueatɔhi* kɛ apanihi,*

21 Konɛ a ya sɛ tɛsahi a mi puɔhi a mi,

Kɛ tɛsahi a kpɛ,

Ngɛ Yehowa hɛ mi gbeye yemi

Kɛ e we agboje kɛ e hɛ mi nyami ɔ he je,

Benɛ e maa te si konɛ e ha nɛ zugba a kɛ gbeye yemi nɛ mimiɛ ɔ.

22 Bɔ nɛ pee nɛ e hi ha nyɛ nitsɛmɛ ɔ, nyɛɛ jɔɔ nyɛ hɛ ngɔmi kɛ fɔ nɔmlɔ adesa nɔ,

Nɔ nɛ e ngɛ kaa lɛ nitsɛ e gugwɔ mi kɔɔhiɔ ɔ.*

3 Ejakaa hyɛ! anɔkuale Nyɔmtsɛ ɔ, Yehowa tabohiatsɛ ɔ

Ngɛ yemi kɛ buami fɛɛ yemi kɛ buami, kɛ nɔ́ fɛɛ nɔ́ nɛ a kɛ ba ye bua Yerusalem kɛ Yuda a jee kɛ je,

Yemi kɛ buami tsuo nɛ ji niye ní* kɛ nyu,

 2 Nyumu he walɔ kɛ tatsɛ,

Kojolɔ kɛ gbalɔ, klamɔ kɛ nɔkɔtɔma,

 3 Nimli 50 a nya dalɔ, nɔmlɔ ngua, kɛ ga wolɔ,

Nyakpɛ ní peelɔ nɛ e he be, kɛ kunya yelɔ nɛ e he be.

 4 Ma ha nɛ nyumuwi maa pee a ma nikɔtɔmahi,

Nɛ yi mi enyɔɔnyɔtsɛ* maa ye a nɔ.

 5 Nihi maa wa a sibi yi mi,

Nɔ fɛɛ nɔ maa wa e nyɛmi nɔmlɔ yi mi.

Jokuɛ nyumuyo maa tsuaa nɔmoyo ní,

Nɛ nɔ nɛ bumi be e he maa gbe nɔ nɛ bu ngɛ e he he guɛ.

“I be nyɛ pa tsɔɔlɔ* pee;

I be niye ní aloo tadehi ngɛ ye we ɔ mi.

 8 Ejakaa Yerusalem nane tɔ̃tɔ̃,

Nɛ Yuda nɔ si,

Ejakaa a kɛ a munyu tutui kɛ a ní peepee teɔ si kɛ woɔ Yehowa;

A tsɔ atuã ngɛ nɔ nɛ e hɛ mi ngɛ nyami ɔ hɛ mi.

 9 Bɔ nɛ a pee a hɛ mi ha a yeɔ odase kɛ siɔ mɛ,

Nɛ a jajeɔ a yayami ɔ kaa Sodom;

A kɛ laa we.

10 Nyɛ de dali ɔmɛ ke níhi maa hi ha mɛ;

A maa jɔɔ mɛ ngɛ níhi nɛ a peeɔ ɔ he.*

Haomi maa ba e nɔ,

Ejakaa nɔ́ nɛ e kɛ e nine pee ɔ, a maa pee lɛ jã a nɔuu!

12 Ye we bi ɔmɛ lɛɛ, nihi nɛ a hyɛɔ a nɔ konɛ a tsu ní ɔ peeɔ mɛ basabasa,

Nɛ yihi yeɔ a nɔ.

Ye we bi, nyɛ hɛ mi nyɛɛli ɔmɛ ha nɛ nyɛ ngɛ lalaalo woe,

Nɛ a haa nɛ nyɛ nane tlaa blɔ.

13 Yehowa te si kɛ da si konɛ e jaje e sane ɔ;

E te si kɛ da si konɛ e kojo je ma amɛ.

“Nyɛ sã wai ngmɔ ɔ,

Nɛ ohiatsɛmɛ a níhi nɛ nyɛ ju ɔ ngɛ nyɛ we ɔmɛ a mi.

15 Mɛni he je nɛ nyɛ wa ye we bi ɔmɛ yi mi,

Nɛ nyɛɛ kɛ ohiatsɛmɛ a hɛ mi sa si ngɛ zugba a?” Nyɔmtsɛ Matsɛ Yehowa tabohiatsɛ ɔ lɛ de.

16 Yehowa ngɛ dee ke: “Akɛnɛ Zion biyi ɔmɛ woɔ a he nɔ,

Nɛ́ a woɔ a yi nɔ* kɛ nyɛɛɔ,

Nɛ́ a peeɔ a hɛngmɛ dɔkɔɔ, nɛ́ a tuɔ kɛ yaa kɛ baa,

Nɛ́ a nane si kpawo he gahi pɛɔ ngmleingmlei he je ɔ,

17 Yehowa hu ma ha nɛ sakpa ma pue Zion biyi ɔmɛ a yi mi,

Nɛ Yehowa ma ha nɛ a hɛ nya ma kpa.

18 Jamɛ a ligbi ɔ, Yehowa ma ha nɛ a he fɛu ɔ maa laa: a nane si kpawo he ga amɛ,

Yi fimi ní ɔmɛ, junehi nɛ a pee mɛ kaa nyɔhiɔ nɛ kpaako e ngɛ jee,

19 Tue nya ní ɔmɛ,* nine si ga amɛ, kɛ hɛ mi hami ní ɔmɛ,

20 Jlasi ɔmɛ, nane si kpawo he tsen ɔmɛ, kɛ gugue fimi ní ɔmɛ,

Nu kɛ e he via tɔ ɔmɛ,* kɛ sɛbɛ ɔmɛ,

21 Nguɛ ga amɛ kɛ gugwɔ mi ga amɛ,

22 Gbijlɔ tade klɔii ɔmɛ, tadehi nɛ a woɔ kɛ fɔɔ tade nɔ, tade klɔii ɔmɛ, kɛ sika kotoku ɔmɛ,

23 Dɛ mi ahuhuɛ ɔmɛ, kɛ klala tade ɔmɛ,*

Pɛɛ ɔmɛ kɛ hɛ mi hami ní ɔmɛ.

24 Ngɛ balsam nu nane mi ɔ, nɔ́ nɛ sa nɛ ngɛ fu jee;

Ngɛ mlɛmi fimi nɔ́ nane mi ɔ, kpa;

Ngɛ yi gbɔmi nɛ ngɛ fɛu nane mi ɔ, yi mi nɛ kpa;

Ngɛ tade nɛ he jua wa nane mi ɔ, kpekpe tade;

Nɛ ngɛ he fɛu nane mi ɔ, nɔ kadimi la pa doku.

25 O nyumu ɔmɛ maa nɔ ngɛ klaate nya.

Nɛ o he wali ɔmɛ maa nɔ ngɛ ta mi.

26 A maa ye aywilɛho, nɛ a maa ye kɔmɔ ngɛ e we agbo ɔmɛ a nya,

Nɛ e maa hi si ngɛ zugba nɛ e maa ye aywilɛho.”

“Wa maa ye wɔ nitsɛmɛ wa niye ní*

Nɛ wa ma hla wɔ nitsɛmɛ wa tadehi;

Ha nɛ a ngɔ o biɛ kɛ tsɛ wɔ kɛkɛ

Konɛ e je wa hɛ mi si puemi ɔ kɛ je.”*

5 I kpa nyɛ pɛɛ, nyɛ ha nɛ ma la kɛ ha ye suɔlɔ ɔ,

La nɛ kɔɔ nɔ nɛ i suɔ lɛ ɔ kɛ e wai ngmɔ ɔ he.

E du wai* tso kpakpa ngɛ mi,

E ma mɔ ngɛ ngmɔ ɔ kpɛti,

Nɛ e kpɛ́ wai ngami muɔ ngɛ mi.

Lɔ ɔ se ɔ, e ya nɔ nɛ e hyɛ blɔ kaa e maa wo wai yiblii kpakpa,

Se wai yiblii yaya mohu lɛ e wo.

 3 “Amlɔ nɛ ɔ, nyɛ nihi nɛ nyɛ ngɛ Yerusalem kɛ nyɛ Yuda nyumuhi,

I kpa nyɛ pɛɛ nɛ nyɛɛ kojo i kɛ ye wai ngmɔ ɔ wa kpɛti.

 4 Mɛni ekohu nɛ jinɛ i ko pee kɛ ha ye wai ngmɔ ɔ

Nɛ́ i pee we lolo?

Mɛni he je nɛ benɛ i ngɛ blɔ hyɛe kaa ma ná wai yiblii kpakpa a,

Wai yiblii yaya mohu lɛ e wo ɔ?

 5 Amlɔ nɛ ɔ, i kpa nyɛ pɛɛ, nyɛ ha nɛ ma de nyɛ

Nɔ́ nɛ ma pee ye wai ngmɔ ɔ:

Ma je piɛ nɛ ngɛ he ɔ,

Nɛ a maa sã lɛ butuu.

Ma ku tɛ gbogbo nɛ ngɛ he ɔ kɛ pue si,

Nɛ a maa naa nɔ.

 6 Ma ha nɛ e maa pee zugba nɛ se nami be he;

A be tso ɔmɛ a he suae,* nɛ a be mi hue hulɔ.

Mio tsohi kɛ huhi fuu maa puɛ ngɛ mi,

Nɛ ma fã bɔku ɔmɛ konɛ a ko nɛ hiɔmi kɛ pue nɔ hu.

 7 Yehowa tabohiatsɛ ɔ wai ngmɔ ɔ ji Israel we ɔ;

Yuda nyumu ɔmɛ ji ní nɛ a du ngɛ ngmɔ ɔ mi nɛ e fiɛ we he ɔ nɛ.

E ya nɔ nɛ e hyɛ dami sane yemi blɔ,

Se hyɛ! a yi dami sane;

E hyɛ dami blɔ,

Se hyɛ! nɔ́ nami he ngmlaa mohu lɛ a ngɛ kpae.”

 8 Musu tloo nihi nɛ a ngɔɔ we kake kɛ tsaa we kpa nɔ,

Nɛ́ a ngɔɔ ngmɔ kake kɛ tsaa ngmɔ kpa nɔ

Kɛ ya siɔ be nɛ blɔ be hu,

Nɛ́ nyɛ pɛ lɛ nyɛ hiɔ si ngɛ zugba a nɔ ɔ!

 9 Yehowa tabohiatsɛ ɔ kã kita kɛ wo ye tue mi

Kaa wehi babauu nɛ a kle nɛ a ngɛ fɛu ɔ

Ma plɛ pee nɔ́ nɛ woɔ nɔ he gbeye,

Nɛ nɔ ko nɔ ko be a mi hie.

10 Ejakaa wai ngmɔ kpa nyɔngma* maa ba ní bat* kake pɛ,

Nɛ dumi wu homa* kake maa ba ní efa* kake pɛ.

11 Musu tloo nihi nɛ a teɔ si mɔtu mla nɛ a nuɔ dã nɛ nya wa a,

Nihi nɛ a hiɔ dã he hluu kɛ ya siɔ benɛ diblii woɔ nɛ a deɔ kpɔtɔɔ ɔ!

12 A ngɛ saku kɛ kpa saku,

Akasawa, bɛ, kɛ wai ngɛ a we okplɔɔ ngmɛmi ɔmɛ a sisi;

Se a susuu we níhi nɛ Yehowa pee ɔ he,

Nɛ a nɛ́ e nine nya ní tsumi ɔ.

13 Enɛ ɔ he ɔ, ye we bi ɔmɛ maa ho nyɔguɛ tso mi ya

Ngɛ nile nɛ a be ɔ he je;

Hwɔ maa ye a nyumuhi nɛ a hɛ mi ngɛ nyami ɔ,

Nɛ kuma maa ye a we bi ɔmɛ tsuo.

14 Lɔ ɔ he ɔ, Yɔkɔ* bli lɛ nitsɛ e* mi gbajaa

Nɛ e gbɛ e nya mi hatoo nɛ huzu be he;

Nɛ e hɛ mi nyami ɔ,* e nimli babauu kɛ a he ngmlaa a, kɛ e we okplɔɔ ngmɛmihi nɛ a ngɛ hoo ɔ

Ma kple kɛ sɛ mi kokooko.

15 Nɛ adesa ma kplã si,

A maa ba adesa si,

Nɛ a maa ba he nɔ woli a hɛngmɛ hu si.

16 Yehowa tabohiatsɛ ɔ kojomi* ɔ ma wo e nɔ;

Anɔkuale Mawu ɔ, Nɔ Klɔuklɔu ɔ maa tsu lɛ nitsɛ e he kɛ gu dami nɔ.

17 Nɛ jijɔ bi ɔmɛ maa ye ní kaa nɔ́ nɛ a ní yemi he lɛ a ngɛ;

Ma se bi maa ye ní ngɛ hehi nɛ jinɛ lohwehi nɛ a plɔke yeɔ ní ngɛ ɔ.

18 Musu tloo nihi nɛ a kɛ sisimi kpahi gblaa a fɔ yemi,

Nɛ́ a kɛ zugba lɛ he kpahi gblaa a yayami ɔ;

19 Nihi nɛ a deɔ ke: “Mawu nɛ́ wo e ní tsumi ɔ fo;

E ba mla konɛ waa na.

Israel Nɔ Klɔuklɔu ɔ yi mi tomi* ɔ nɛ ba mi

Konɛ waa le!”

20 Musu tloo nihi nɛ a deɔ ke kpakpa ji yayami, nɛ yayami ji kpakpa,

Nihi nɛ a ngɔɔ diblii kɛ tsakeɔ la, nɛ a ngɔɔ la kɛ tsakeɔ diblii,

Nihi nɛ a kɛ doomi peeɔ ngɔɔmi, nɛ a kɛ ngɔɔmi peeɔ doomi!

21 Musu tloo nihi nɛ a buɔ a he ní leli,

Nihi nɛ a buɔ a he juɛmitsɛmɛ!

22 Musu tloo nihi nɛ a he wa kɛ wai numi,

Kɛ nyumuhi nɛ a he be ngɛ dã nɛ nya wa futumi mi,

23 Nihi nɛ a haa nɛ yiwutsotsɛ yeɔ e he ngɛ nyɔ mi ní he je,

Kɛ nihi nɛ a yi dami sane kɛ ha we dalɔ ɔ!

24 Enɛ ɔ he ɔ, kaa bɔ nɛ la lilɛ sãã nga gbigbli

Nɛ́ nga gbigbli tsoɔ ngɛ la mi ɔ,

A sipoku ɔmɛ maa sa,

Nɛ a mɔmɔ ɔmɛ maa gbɛ kɛ fĩa kaa bunyuku,

Ejakaa a kua Yehowa tabohiatsɛ ɔ mlaa a,*

Nɛ a bui Israel Nɔ Klɔuklɔu ɔ munyu ɔ.

25 Lɔ ɔ he je nɛ Yehowa mi mi fu e we bi ɔmɛ wawɛɛ,

Nɛ e ma wo e nine nɔ kɛ si mɛ, nɛ e maa fia mɛ nɔ́ ɔ nɛ.

Yoku ɔmɛ ma mimiɛ,

Nɛ a gbogboe ɔmɛ maa pee kaa dwɔmi ngɛ gbɛjegbɛ ɔmɛ a nɔ.

Enɛ ɔmɛ tsuo a he je ɔ, e ngmɛɛ we e mi mi fumi ɔ he,

Mohu ɔ, e kpa e nine mi loloolo konɛ e fia mɛ nɔ́.

26 E wo okadi* ko nɔ kɛ tsɔɔ je ma ko nɛ ngɛ tsitsaa;

E kpa nyagba kɛ tsɛ mɛ konɛ a je zugba a nyagbe he ɔmɛ kɛ ba;

Nɛ hyɛ! a ma kɛ fo.

A mlɛmi fimi nɔ́ ɔ mi jɔɛ,

Nɛ a tokota kpa amɛ hu tsɔ we.

28 A kɛ̃ɛ̃ mi bi ɔmɛ tsuo nya ba,

Nɛ a gbla a kɛ̃ɛ̃ ɔmɛ tsuo a mi.*

A we okpɔngɔ ɔmɛ a nane kokloto ɔmɛ ngɛ kaa tɛ nɛ he wa,

Nɛ a zugba lɛ nane ɔmɛ ngɛ kaa kɔɔhiɔ nɛ nya wa.

29 A huãmi ɔ ngɛ kaa jata huãmi;

A huãã kaa jata wawi.*

A maa huã, nɛ a maa nu lohwe nɛ a ngɛ lɛ dae ɔ,

Nɛ a maa ngɔ lɛ kɛ ho, nɛ nɔ ko be nɛ ma kpɔ̃ lɛ.

30 Jamɛ a ligbi ɔ, a maa huã kɛ wo lɛ

Kaa bɔ nɛ wo pɛɛ ɔ.

Nɔ fɛɛ nɔ nɛ e maa hyɛ zugba a maa na diblii kpii;

La a po wo diblii ngɛ bɔku ɔmɛ a he je.

I gbo ta,*

Ejakaa i ji adesa nɛ e nya he tsɔ we,

Nɛ i ngɛ nihi nɛ a nya he tsɔ we a kpɛti;

Ejakaa ye hɛngmɛ na Matsɛ ɔ, Yehowa tabohiatsɛ ɔ nitsɛ!”

A je o fɔ yemi ɔ,

Nɛ a ngɔ o he yayami ɔ kɛ ke mo.”*

‘Nyɛ maa nu si abɔ,

Se nyɛ be sisi nue;

Nyɛ maa na si abɔ,

Se nyɛ be nile ko náe.’

10 Ha nɛ nimli nɛ ɔmɛ a tsui nɛ kplii,

Ha nɛ a tue mi nɛ ti,

Nɛ́ o ha nɛ a hɛngmɛ ɔmɛ nɛ ma,

Konɛ a ko hyɛ kɛ a hɛngmɛ,

Nɛ́ a ko nu kɛ a tue,

Konɛ a tsui nɛ ko nu sisi,

Nɛ́ a ko kpale a se nɛ a tsa mɛ.”

“Kɛ yaa si be nɛ ma amɛ a hɛ mi ma kpata nɛ nɔ ko be a mi hie hu,

Nɛ́ nihi be we ɔmɛ a mi hie hu,

Nɛ́ zugba a hɛ mi ma kpata nɛ e maa pee ma doku;

12 Kɛ yaa si be nɛ Yehowa ma je nihi kɛ ho tsitsaa ya,

Nɛ́ zugba a maa pee ma doku kulaa.

“E be manye yee,

Nɛ e be nɔ bae hulɔ.

 8 Ejakaa Siria yi ji Damasko,

Nɛ Damasko yi ji Rezin.

Ngɛ jeha 65 mi pɛ ɔ,

A maa ywia Efraim dukuduku nɛ e be ma pee hu.

 9 Efraim yi ji Samaria,

Nɛ Samaria yi ji Remalia binyumu ɔ.

Ke nyɛ be hemi kɛ yemi nɛ mi wa a,

Nyɛ be si mae kpɛii.”’”

 6 “Akɛnɛ nimli nɛ ɔmɛ kua Shiloa* nyu nɛ e beɔ blɛuu,

Nɛ a nyaa ngɛ Rezin kɛ jehanɛ se hu Remalia binyumu ɔ he he je ɔ,

 7 Hyɛ! Yehowa maa ngɔ

Pa* a mi nyu babauu nɛ he wa a,

Asiria matsɛ ɔ kɛ e hɛ mi nyami ɔ tsuo kɛ ba a nɔ.

E maa ba e nyu dɔ ɔmɛ tsuo a nɔ,

Nɛ pa a ma hyi nɛ e maa ywia nga

 8 Nɛ e ma ya be ngɛ Yuda.

E ma je ma a, nɛ e maa gu ma a mi kɛ be, nɛ e maa su nɔ kuɛ mi;

E maa gbɛ e pɛlihi a mi kɛ ha o zugba a tsuo nɔ kaa lohwe pɛlitsɛ,

Oo Yimanuel!”*

Nyɛ de nɔ́ nɛ nyɛ suɔ, se e be manye yee,

Ejakaa Mawu kɛ wɔ ngɛ!*

Nɔ́ nɛ a yeɔ lɛ gbeye ɔ, nyɛ ko ye jamɛ a nɔ́ ɔ gbeye;

E ko ha nɛ nyɛ he nɛ do blibliibli.

13 Yehowa tabohiatsɛ ɔ—lɛ ji nɔ nɛ e sa kaa nyɛɛ bu lɛ klɔuklɔu,

Lɛ ji nɔ nɛ e sa kaa nyɛɛ ye lɛ gbeye,

Nɛ lɛ ji nɔ nɛ e sa kaa e ha nɛ nyɛ he nɛ do blibliibli.”

14 E maa pee kaa jami he,

Se e maa pee kaa tɛmi tɛ,

Kɛ nane tɔ̃tɔ̃mi tɛsa

Kɛ ha Israel we enyɔ ɔmɛ tsuo,

E maa pee kaa kpa klama kɛ klama nitsɛ

Kɛ ha nihi nɛ a ngɛ Yerusalem ɔ.

15 A ti nihi babauu a nane ma tɛ nɔ́ nɛ a maa nɔ si nɛ a maa ku;

A maa tsɔ̃ mɛ klama nɛ a maa du.

16 Mo koklo odase ɔ nɛ a ngma a;

Moo sɔu mlaa a* nya ngɛ ye kaseli ɔmɛ a kpɛti!

 2 Nihi nɛ a ngɛ nyɛɛe ngɛ diblii mi ɔ

Na la ngua ko.

Nɛ la kpɛ ha

Nihi nɛ a ngɛ diblii kpii zugba a nɔ ɔ.

 3 O ha nɛ nihi nɛ a ngɛ ma a mi ɔ hiɛ babauu;

O ha nɛ e nyami ɔ kle.

A nya ngɛ o hɛ mi

Kaa bɔ nɛ nihi nyaa ngɛ ní kpami be mi ɔ,

Kaa nihi nɛ a kɛ bua jɔmi ngɛ ta yibu ní gbae.

 4 Ejakaa o ku kuɛpã tso nɛ a kɛ tlooɔ tlomi ɔ dukuduku,

Tso nɛ ngɛ a konɔ ɔ, nɔ nɛ nyɛɔ a nɔ nɛ́ a tsuɔ ní ɔ dɛma tso ɔ,

Kaa bɔ nɛ e ba ligbi nɛ a kpata Midian hɛ mi ɔ.

 5 Tokota fɛɛ tokota nɛ mimiɛɔ zugba ke e ngɛ si sie,

Kɛ tade fɛɛ tade nɛ pɔ tsɔtsɔɔtsɔ kɛ muɔ

Maa pee kaa lɛ ngɛ la mi.

 6 Ejakaa a fɔ bi ha wɔ,

A ha wɔ binyumu;

Nɛ matsɛ yemi* ɔ maa fɔ si ngɛ e konɔ.

 7 E matsɛ yemi* ɔ mi maa hi blie

Nɛ tue mi jɔmi nɛ be nyagbe maa ba,

Ngɛ David matsɛ sɛ ɔ nɔ kɛ e matsɛ yemi ɔ nɔ,

Konɛ e ma si kpɛii, nɛ e hi si daa

Kɛ gu dami sane yemi kɛ dami nɔ,

Kɛ je amlɔ nɛ ɔ kɛ yaa neneene.

 8 Yehowa ngɔ sɛ gbi kɛ ha kɛ bɔ Yakob kɔkɔ,

Nɛ e ba Israel nɔ.

 9 Ni ɔmɛ tsuo maa le

Efraim kɛ nihi nɛ a ngɛ Samaria a,

Nihi nɛ a kɛ he nɔ womi kɛ nɔ buimi tsui deɔ ke:

10 “Blikisihi ku pue si,

Se waa kɛ tɛ nɛ a gba maa fia.

A poo sikamore tsohi kɛ pue si,

Se waa kɛ seda tsohi maa da a nane mi ɔ.”

11 Yehowa ma tle Rezin he nyɛli ɔmɛ si kɛ wo e he,

Nɛ e ma ha nɛ e he nyɛli ɔmɛ ma gli,

12 Siria maa je puje he, nɛ Filistibi ɔmɛ maa je pusinɔ he* kɛ ba,

A maa pa a nya mi nɛ a maa mi Israel.

Enɛ ɔmɛ tsuo a he je ɔ, e ngmɛɛ we e mi mi fumi ɔ he,

Mohu ɔ, e kpa e nine mi loloolo konɛ e fia mɛ nɔ́.

13 Ejakaa ni ɔmɛ kpale we kɛ bɛ nɔ nɛ fiaa mɛ nɔ́ ɔ ngɔ;

A hla we Yehowa tabohiatsɛ ɔ se blɔ.

14 Ngɛ ligbi kake mi ɔ, Yehowa maa po

Yi kɛ hlemi, nɔ́ nɛ e tsɛ̃ kɛ go* kɛ je Israel.

15 Nɔkɔtɔma a kɛ nɔ nɛ a buɔ lɛ wawɛɛ ɔ ji yi ɔ nɛ,

Nɛ gbalɔ ɔ nɛ ngɔɔ lakpa blɔ tsɔɔmi kɛ haa a ji hlemi ɔ nɛ.

16 Nimli nɛ ɔmɛ a hɛ mi nyɛɛli ɔmɛ ha nɛ a ngɛ lalaalo woe,

Nɛ nihi nɛ hɛ mi nyɛɛli ɔmɛ ngɛ a hɛ mi nyɛɛe ɔ a juɛmi gbɛ.

17 Enɛ ɔ he je nɛ Yehowa be nyae ngɛ a nihewi ɔmɛ a he,

Nɛ e be a we awusa* amɛ kɛ a yalɔyi ɔmɛ mɔbɔ nae ɔ nɛ,

Ejakaa mɛ tsuo a ji hemi kɛ yemi kuali kɛ yayami peeli,

Nɛ nya fɛɛ nya ngɛ kuasia munyu tue.

Enɛ ɔmɛ tsuo a he je ɔ, e mi mi nɛ fu ɔ se pui,

Mohu ɔ, e kpa e nine mi loloolo konɛ e fia mɛ nɔ́.

18 Ejakaa yiwutso ní peepee tsoɔ kaa la,

E sãã mio tsohi kɛ ngahi.

E maa wo hue tso nɛ mi ti mi la,

Nɛ lasuku tikɔɔ maa ho hiɔwe ya.

19 Ngɛ Yehowa tabohiatsɛ ɔ mi mi fumi ɔ nya a,

A mɛ zugba a he la,*

Nɛ ni ɔmɛ maa pee kaa lɛ ngɛ la a mi.

20 Nɔ ko maa po niye ní kɛ fɔ si ngɛ hiɔ nɔ,

Se kɛ̃ ɔ, hwɔ maa ye lɛ;

Nɛ nɔ ko maa ye ní ngɛ muɔ nɔ,

Se e be tɔe.

Nɔ fɛɛ nɔ maa ye lɛ nitsɛ e kɔni he lo,

21 Manase maa ye Efraim,

Nɛ Efraim maa ye Manase.

Enɛ ɔmɛ tsuo a he je ɔ, e ngmɛɛ we e mi mi fumi ɔ he,

Mohu ɔ, e kpa e nine mi loloolo konɛ e fia mɛ nɔ́.

10 Musu tloo nihi nɛ a kɛ blɔ tsɔɔmi yaya haa,

Nihi nɛ daa nɛ ɔ, a woɔ mlaahi nɛ a mi wa,

 2 Konɛ ohiatsɛmɛ a nine nɛ ko su níhi nɛ e sa kaa a ná ngɛ mlaa nya a nɔ,

Nɛ́ a ko ye dami sane kɛ ha ye we bi ɔmɛ a kpɛti nihi nɛ a ní ngɛ mɔbɔ ɔ,

A ngɔɔ yalɔyihi kɛ peeɔ kaa ta yibu ní,

Nɛ a ngɔɔ awusahi* kɛ peeɔ kaa níhi nɛ a ha!

 3 Mɛni nyɛ maa pee ngɛ kojomi* ligbi ɔ nɔ,

Benɛ hɛ mi kpatami maa je tsitsaa kɛ ba a?

Mɛnɔ ngɔ lɛ nyɛ maa tu fo kɛ ya bi yemi kɛ buami ngɛ,

Nɛ jije nyɛ ma si nyɛ ní babauu* ɔ ngɛ?

 4 Nɔ́ pɛ nɛ maa ba ji, nyɛ ma sɔ̃ si ngɛ nihi nɛ a wo mɛ tsu ɔ a kpɛti,

Aloo nyɛ maa nɔ ngɛ nihi nɛ a gbe mɛ pue si ɔ a kpɛti.

Enɛ ɔmɛ tsuo a he je ɔ, ngmɛɛ we e mi mi fumi ɔ he,

Mohu ɔ, e kpa e nine mi loloolo konɛ e fia mɛ nɔ́.

 5 “Hyɛ! Asiriano ɔ,

Lɛ ji tso nɛ ma kɛ je ye mi mi fumi ɔ kpo

Kɛ dɛma tso nɛ ngɛ a dɛ mi kɛ ha ye kojomi ɔ!

 6 Ma tsɔ lɛ nɛ e ya tua je ma ko nɛ kua hemi kɛ yemi ɔ,

E ya tua nihi nɛ a wo ye mi mi la a;

Ma fã lɛ konɛ e muɔɔ ta yibu ní babauu nɛ e ha ní fuu,

Nɛ́ e naa a nɔ kaa mɔsɔ ngɛ gbɛjegbɛ ɔmɛ a nɔ.

 7 Se e be gbae kɛ ba blɔ nɛ ɔ nɔ,

Nɛ e tsui be ga ko toe ngɛ blɔ nɛ ɔ nɔ;

Ejakaa e ngɛ e tsui mi kaa e ma kpata nihi a hɛ mi,

Kaa e maa poo je mahi babauu kɛ fɔ he, pi nihi bɔɔ ko.

 8 Ejakaa e deɔ ke,

‘Anɛ ye ma nikɔtɔma amɛ ɔ, pi matsɛmɛ ji mɛ tsuo lo?

10 Ye nine su matsɛ yemihi nɛ amagahi nɛ se nami be a he ngɛ a mi ɔ nɔ,

A we amaga amɛ hiɛ kulaa pe Yerusalem kɛ Samaria ní ɔmɛ!

11 Anɛ i be Yerusalem kɛ e wɔ ɔmɛ hu pee

Kaa bɔ nɛ i pee Samaria kɛ e mawuhi nɛ se nami be a he ɔ lo?’

12 “Ke Yehowa gbe e ní tsumi ɔ tsuo nya ngɛ Zion Yoku ɔ nɔ kɛ Yerusalem ɔ, e maa* gbla Asiria matsɛ ɔ tue ngɛ e nɔ buimi tsui ɔ kɛ e kokotii peemi, kɛ e he nɔ womi hɛngmɛ ɔ he je. 13 Ejakaa e deɔ ke,

‘Ma pee nɔ́ nɛ ɔ kɛ ye nine si wami,

Kɛ ye juɛmi, ejakaa i ji juɛmitsɛ.

Ma je ma amɛ a huzu ɔmɛ,

Nɛ ma ha a juetli ɔmɛ,

Nɛ ma ba nihi nɛ a ngɛ a mi ɔ si kaa he walɔ.

14 Ye nine maa su ma amɛ a níhi a nɔ

Kaa nɔ ko nɛ e kɛ e nine wo lohwe pɛlitsɛ tsu mi;

Nɛ ma bua zugba a tsuo nya

Kaa nɔ ko nɛ e ngɛ hluihi nɛ a kua nya buae!

16 Enɛ ɔ he ɔ, anɔkuale Nyɔmtsɛ ɔ, Yehowa tabohiatsɛ ɔ

Ma ha nɛ e nihi nɛ a kle ɔ maa flaa kanyakanya,

Nɛ e ma ha nɛ la ko maa tso ngɛ e hɛ mi nyami ɔ sisi.

17 Israel La a maa pee la nɛ ngɛ tsoe,

Nɛ e Nɔ Klɔuklɔu ɔ maa pee la lilɛ;

E maa tso nɛ e maa sã e hu ɔmɛ kɛ e mio tso ɔmɛ ngɛ ligbi kake mi.

18 E ma kpata e hue tso ɔ kɛ e abɔɔ kɛ mi tsohi nɛ woɔ yiblii ɔ a hɛ mi nyami ɔ hɛ mi kulaa;*

E maa pee kaa bɔ nɛ hiɔ haa nɛ hiɔtsɛ gbɔjɔɔ ɔ.

19 E hue tso ɔ mi tsohi nɛ maa piɛ ɔ

Be hiɛe kulaa, nɛ jokuɛ nyumuyo ma nyɛ maa kane mɛ.

20 Jamɛ a ligbi ɔ, Israelbi nɛ piɛ ɔ

Kɛ Yakob we ɔ mi bimɛ nɛ a yi ná wami ɔ

Be a he ngɔe kɛ kpasa nɔ nɛ fia mɛ nɔ́ ɔ hu;

Mohu ɔ, a kɛ a he ma kpasa Yehowa,

Israel Nɔ Klɔuklɔu ɔ ngɛ anɔkuale yemi mi.

21 Nihi nɛ a maa piɛ ɔ pɛ lɛ a maa kpale a se,

Yakob sisi bimɛ nɛ maa piɛ ɔ maa kpale kɛ ya Mawu He Walɔ ɔ ngɔ.

22 Oo Israel, e ngɛ mi kaa o we bi ɔmɛ

A he hiɛ kaa wo nya zia* mohu lɛɛ,

Se a kpɛti nihi nɛ a maa piɛ ɔ pɛ lɛ a maa kpale a se kɛ ba.

A ma nya si kaa a ma kpata a hɛ mi kulaa,

Nɛ dami sane yemi maa ha a nɔ.*

23 Ee, hɛ mi kpatami nɛ Nyɔmtsɛ Matsɛ Yehowa tabohiatsɛ ɔ ma nya si ɔ,

A ma tsu he ní ngɛ zugba a nɔ tsuo.

27 Jamɛ a ligbi ɔ, e tlomi ɔ maa je o konɔ,

Nɛ e kuɛpã tso ɔ maa je o kuɛ,

Nɛ kuɛpã tso ɔ maa ku ngɛ nu ɔ he je.”

28 E ba Aiyat,

E gu Migron kɛ be;

E ngɔ e tlomi ɔmɛ kɛ ya ma Mikmash.

29 A po pa a ngɛ pa pomi he ɔ;

A hwɔ Geba kɛ ya si be nɛ je na;

Rama he do blibliibli, Saul ma nɛ ji Gibea tu fo.

E huanya e kɔ̃ ɔ kɛ tsɔɔ Zion biyo ɔ yoku ɔ,

Yerusalem yoku wayo ɔ.

33 Hyɛ! anɔkuale Nyɔmtsɛ ɔ, Yehowa tabohiatsɛ ɔ

Ngɛ tso kɔnihi suae kɛ ngɛ si puee gbiagbia;

E ngɛ tsohi nɛ a ka pe kulaa a pooe kɛ pue si,

Nɛ e ngɛ nihi nɛ a woɔ a he nɔ ɔ si bae.

34 E ngɔ ní tsumi dade* kɛ ngɛ hue tso nɛ mi ti pooe kɛ ngɛ si puee,

Nɛ he walɔ ko maa tsɛ̃ Lebanon kɛ fia si.

11 Tso kɔni ko ma tsɛ̃ kɛ je Yese* tso kpoku ɔ mi,

Nɛ tso nɛ tsɛ̃ kɛ je e sipoku ɔmɛ a mi ɔ maa wo yiblii.

 2 Nɛ Yehowa mumi ɔ maa hi e nɔ,

Juɛmi kɛ nɔ́ sisi numi mumi,

Ga womi kɛ he wami mumi,

Nile kɛ Yehowa gbeye yemi mumi.

E be nɔ́ nɛ e hɛngmɛ naa a nɔ dae kɛ kojo,

Nɛ tsa pi nɔ́ nɛ e tue nu ɔ pɛ nɔ nɛ e maa da kɛ kã hɛ mi.

 4 E maa kojo nihi nɛ a be nɔ́ ko ɔ ngɛ dami nya,

Nɛ e kɛ dami ma kã nihi a hɛ mi kɛ ha nihi nɛ a he jɔ ngɛ zugba a nɔ ɔ.

E kɛ e nya mi tso ɔ maa fia zugba a,

Nɛ e kɛ e nya mi kɔɔhiɔ* maa gbe yiwutsotsɛmɛ.

 5 Dami maa pee mlɛmi fimi nɔ́ ngɛ e mlɛmi,

Nɛ anɔkuale yemi maa pee mlɛmi fimi nɔ́ ngɛ e supa nɔ.

 6 Ogbetee kɛ jijɔ bi maa hi si,*

Nɛ ngatsɛ kɛ apletsi bi maa bu si,

Nɛ na bi kɛ jata* kɛ lohwe nɛ wo zɔ tsuo maa pee kake kɛ hi si;*

Nɛ jokuɛ nyumuyo maa nyɛɛ a hɛ mi.

 7 Na kɛ osisiblisi ma bla kɛ ye ní,

Nɛ a bimɛ ma bla kɛ bu si.

 8 Jokuɛ nɛ a pui lɛ nyɔ ma fiɛ ngɛ blika* muɔ nya,

Nɛ bi nɛ a po lɛ nyɔ maa ngɔ e nine kɛ bu sinɔ duɔtsɛ muɔ nya.

 9 A be awi yee,

Nɛ a be nɔ́ ko hɛ mi kpatae ngɛ ye yoku klɔuklɔu ɔ nɔ tsuo,

Ejakaa bɔ fɛɛ bɔ nɛ ji ɔ, zugba a nɔ ma hyi tɔ kɛ Yehowa he nile

Kaa bɔ nɛ nyu hyi wo ɔ tɔ ɔ.

Je ma amɛ maa ba e ngɔ kɛ ha blɔ tsɔɔmi,*

Nɛ e he jɔɔmi he ɔ hɛ mi maa ba nyami.

13 Efraim hunga jemi ɔ se maa po,

Nɛ a ma kpata nihi nɛ a ná Yuda he ninyɛ ɔ a hɛ mi.

Efraim be Yuda he hunga jee,

Nɛ Yuda hu be Efraim he ninyɛ náe.

14 Nɛ a kɛ oya yemi ma kple si kɛ ba Filistibi ɔmɛ a yoku ɔmɛ a nɔ ngɛ pusinɔ he;*

A maa pee kake kɛ ha nihi nɛ a ngɛ Puje He ɔ a níhi.

A ma wo a nine nɔ ngɛ* Edom kɛ Moab a nɔ,

Nɛ Ammonbi ɔmɛ maa ba a he si ha mɛ.

15 Yehowa ma gba Egipt wo ɔ kɔni* ɔ mi,*

Nɛ e maa fɔ̃ e nine ngɛ Pa* a nɔ.

E maa ngɔ e gugwɔ mi kɔɔhiɔ* nɛ sãã nɔ ɔ kɛ fia lɛ ngɛ e pa kpaago ɔmɛ a mi,*

Nɛ e ma ha nɛ nihi maa wo tokota kɛ nyɛɛ kɛ po.

16 Nɛ blɔ ngua ko maa je Asiria kɛ ba kɛ ha e we bi ɔmɛ a kpɛti nihi nɛ a piɛ ɔ,

Kaa bɔ nɛ e ji ngɛ Israel blɔ fa mi ligbi nɛ e je Egipt zugba a nɔ ɔ.

“Oo Yehowa, i naa mo si,

Ejakaa e ngɛ mi kaa o mi mi fu mi mohu lɛɛ,

Se bɔɔbɔɔbɔɔ ɔ, o we abofu ɔ nya ba si, nɛ o wo ye bua.

Ma ngɔ ye hɛ kɛ fɔ e nɔ, nɛ i be gbeye yee;

Ejakaa Yah* Yehowa lɛ haa mi he wami kɛ nyɛmi,

Nɛ e ba pee ye yi wami helɔ.”

 3 Nyɛɛ kɛ nyami ma sa nyu

Kɛ je yi wami hemi nyu hɛngmɛ ɔmɛ a mi.

“Nyɛɛ na Yehowa si, nyɛɛ wo e biɛ ta,

Nyɛ ha nɛ a le níhi nɛ e pee ɔ ngɛ ni ɔmɛ a kpɛti!

 6 Nyɛ nihi* nɛ́ nyɛ ngɛ Zion, nyɛ kpa ngmlaa nɛ nyɛ nya,

Ejakaa Israel Nɔ Klɔuklɔu ɔ nɛ ngɛ nyɛ kpɛti ɔ kle.”

Nyɛ kpa ngmlaa kɛ tsɛ mɛ, nyɛɛ ngɔ nyɛ nine kɛ pee okadi kɛ tsɛ mɛ,

Konɛ a ba odehe ɔmɛ a we agbo ɔmɛ a nya.

I tsɛ ye tatsɛmɛ ɔmɛ, nɛ ji nihi nɛ a kɛ he nɔ womi nyaa a

Konɛ a ba je ye we abofu ɔ kpo.

 4 Nyɛɛ bu tue! Nimli asafo ko ngɛ yoku ɔmɛ a nɔ;

A ngɛ ngmlaa kpae kaa nimli babauu!

Nyɛɛ bu tue! Matsɛ yemi ɔmɛ ngɛ hoo pee,

Je ma amɛ nɛ a bua a he nya a ngɛ hoo pee!

 5 A je zugba ko nɔ ngɛ tsitsaa kɛ ma,

A je hiɔwe ɔmɛ a nyagbe he ɔ,

Yehowa kɛ e we abofu ta hwumi ní ɔmɛ ma,

Konɛ a ba kpata zugba a tsuo hɛ mi.

 7 Enɛ ɔ he je nɛ ninehi tsuo a mi maa jɔ,

Nɛ gbeye ma ha nɛ adesa fɛɛ adesa tsui maa sile ɔ nɛ.

A hua, nɛ a pii

Kaa yo nɛ e nu kɔɔmi.

A kɛ gbeye hyɛ a sibi a hɛ mi,

Nɛ haomi ha nɛ a hɛ mi tsu paa.

 9 Hyɛ! Yehowa ligbi ɔ ma,

E ma kɛ yi mi wami kɛ abofu kɛ mi mi la tsuo,

Konɛ e ha nɛ zugba a nɛ pee gbeye nɔ́,

Nɛ e kpata zugba a nɔ yayami peeli ɔmɛ a hɛ mi.

10 Ejakaa hiɔwe dodoe ɔmɛ kɛ a kuu* ɔmɛ

Be kpɛe;

Ke pu ɔ je ɔ, e maa wo diblii,

Nɛ nyɔhiɔ ɔ be kpɛe.

11 Ma ha nɛ nihi nɛ a ngɛ zugba a nɔ ɔ maa bu a yayami ɔ he akɔtaa,

Nɛ yiwutsotsɛmɛ hu maa bu a tɔmi ɔ he akɔtaa.

Ma po he nɔ woli a he nɔ womi ɔ se,

Nɛ ma ba yi mi wali a he nɔ womi ɔ si.

12 Ma ha nɛ nimli* a he be hiɛe kulaa, sika tsu nɛ a tsu he maa hiɛ pe mɛ,

Nɛ Ofir sika tsu maa hiɛ pe nimli.

13 Enɛ ɔ he je nɛ ma ha nɛ hiɔwe ɔmɛ ma mimiɛ,

Nɛ zugba a ma hoso, nɛ e maa je e blɔ he,

Ngɛ Yehowa tabohiatsɛ ɔ we abofu ɔ he je, ngɛ e mi mi fumi ligbi ɔ nɔ ɔ nɛ.

14 Nɔ fɛɛ nɔ maa kpale kɛ ho lɛ nitsɛ e we bi a ngɔ ya;

Nɔ fɛɛ nɔ maa tu fo kɛ ho lɛ nitsɛ e zugba nɔ ya,

Kaa odabɔ nɛ ngɛ fo tue kɛ je de dalɔ dɛ mi, kɛ tohi nɛ nɔ ko be nɛ ma bua a nya.

15 Nɔ fɛɛ nɔ nɛ a maa na lɛ ɔ, a kɛ nɔ́ maa gbɔ lɛ,

Nɛ nɔ fɛɛ nɔ nɛ a maa nu lɛ ɔ, e maa nɔ ngɛ klaate nya.

16 A ma tsɔtslɔɔ a bimɛ ɔmɛ a mi ngɛ a hɛ mi,

A maa ha a we ɔmɛ a mi ní,

Nɛ a ma tua a yi ɔmɛ abonua.

17 Hyɛ, i ngɛ Mediabi ɔmɛ tsɔe kɛ wo a he,

Mɛɛ lɛɛ, a bui sika hiɔ kaa nɔ́ ko,

Nɛ a bua jɔɛ sika tsu he.

18 A kɛ̃ɛ̃ ɔmɛ ma tsɔtslɔɔ nihewi a mi;

A mi mi be mɛ sãe ngɛ fɔmi kotoku mi yiblii he,

Nɛ a be jokuɛwi hu mɔbɔ nae.

19 Nɛ Babilon, matsɛ yemi ɔmɛ a kpɛti nɔ́ nɛ hɛ mi ngɛ nyami pe kulaa,*

Kaldeabi ɔmɛ a we afɛu ɔ kɛ nɔ́ nɛ a kɛ woɔ a he nɔ ɔ

Maa pee kaa Sodom kɛ Gomora benɛ Mawu kpata a hɛ mi ɔ.

20 Nɔ ko nɔ ko be e mi hie hu gblegbleegble,

Nɛ e maa pee he ko nɛ nɔ ko be nyɛe maa hi yi nɔhi tsuo.

Arabiano ko be e bo tsu mae ngɛ lejɛ ɔ,

Nɛ to hyɛli hu be hae nɛ a tohi nɛ a jɔɔ a he ngɛ lejɛ ɔ.

21 Nga kplanaa nɔ lohwehi maa bu si ngɛ lejɛ ɔ;

A we ɔmɛ a mi ma hyi tɔ kɛ klomihi.*

Dugumahi maa hi lejɛ ɔ,

Nɛ nga mi apletsihi* maa tuu kɛ ya kɛ ba ngɛ lejɛ ɔ.

22 Lohwehi nɛ a hwɔɔ ma hwɔ wawɛɛ ngɛ e mɔ ɔmɛ a mi,

Nɛ nga mi gbehi ma hwɔ ngɛ e matsɛ wehi nɛ a ngɛ fɛu ɔ mi.

 5 Yehowa ku yiwutsotsɛmɛ a tso ɔ,

E ku nɔ yeli ɔmɛ a dɛma tso ɔ,

 6 Nɔ nɛ e kɛ abofu fiaa mahi kɔ̃ nɛ e kpa we ɔ,

Nɔ nɛ e kɛ abofu kɛ yi mi wami yeɔ je mahi a nɔ nɛ he jɔɔmi be mi ɔ.

 8 Junipa tso ɔmɛ kɛ Lebanon seda tso ɔmɛ po

Ngɛ nyae ngɛ nɔ́ nɛ ba o nɔ ɔ he je.

A ke, ‘Kɛ je be nɛ o nɔ si ɔ,

Tso polɔ ko ba tua we wɔ.’

 9 Yɔkɔ* nɛ ngɛ zugba a sisi ɔ po pee klaalo

Konɛ e kɛ mo nɛ ba kpe ke o ba a.

O he je ɔ, e tsɛ̃ɛ̃ nihi nɛ a gbo nɛ a be he wami ko ɔ,

Zugba a nɔ hɛ mi nyɛɛli nɛ a yi mi wa a* tsuo.

10 Mɛ tsuo a tu munyu nɛ a bi mo ke,

‘Anɛ mo hu o gbɔjɔ kaa wɔ lo?

11 A ha nɛ o he nɔ womi ɔ kple kɛ ba Yɔkɔ* mi,

O kpa saku ɔmɛ a pɛmi ɔ.

Gɔgɔhi ha si ngɛ o sisi kaa sa,

Nɛ pɔpɔlihi ji o heha nɔ́.’

12 Hyɛ bɔ nɛ o je hiɔwe kɛ ba nɔ si ha,

Oo mo nɛ o ngɛ kpɛe, mo makɛ bi!

Hyɛ bɔ nɛ a po mo kɛ fɔ zugba a nɔ ha,

Mo nɛ o yeɔ je ma amɛ a nɔ kunimi!

Ma wo ye matsɛ sɛ ɔ nɔ kɛ ya Mawu dodoe ɔmɛ a yi nɔ,

Nɛ ma hi si ngɛ yoku nɛ a kpeɔ ngɛ nɔ ɔ nɔ,

Ngɛ yiti je hehi nɛ kɛ pe kulaa a.

14 Ma kuɔ kɛ be bɔku ɔmɛ a he;

Ma pee ye he kaa Nɔ Nɛ E Nɔ Kuɔ Pe Kulaa a.’

15 Se a ma kple mo si kɛ ya Yɔkɔ* mi,

Kɛ ya muɔ ɔ mi hehi nɛ a mi kuɔ pe kulaa a.

16 Nihi nɛ a maa na mo ɔ maa hyɛ mo gaa;

A maa hyɛ mo totooto nɛ a ma bi ke,

‘Anɛ nyumu ɔ nɛ hosoɔ zugba a ji nɛ ɔ,

Nɔ nɛ e ha nɛ matsɛ yemi ɔmɛ a he do blibliibli,

17 Nɛ́ e ha nɛ zugba nɛ nihi ngɛ nɔ ɔ pee kaa nga nɔ,

Nɛ́ e kpata mahi nɛ a ngɛ nɔ ɔ hɛ mi,

Nɛ́ e kua ke e be hae nɛ nihi nɛ e wo mɛ tsu ɔ nɛ a ya we mi ɔ ji nɛ ɔ lo?’

18 Je ma amɛ a matsɛmɛ kpa amɛ tsuo,

Ee, mɛ tsuo a hwɔɔ si ngɛ hɛ mi nyami mi,

Nɔ fɛɛ nɔ ngɛ lɛ nitsɛ e yɔkɔ* mi,

19 Se moo lɛɛ o be yɔkɔ, a sake mo ngɔ fɔ he,

Kaa tso nɛ e tsɛ̃ ngɛ tso he* nɛ a kpɔ lɛ fɔ si,

A ngɔ nihi nɛ a kɛ klaate gbe mɛ pue si ɔ kɛ ha o he,

Nihi nɛ a sake mɛ kɛ wo muɔ kɛ e mi tɛhi mi,

Kaa gbogboe nɛ a naa e nɔ.

20 O ya be a he piɛɛe ngɛ yɔkɔ mi,

Ejakaa o kpata mo nitsɛ o zugba a hɛ mi,

O gbe mo nitsɛ o we bi ɔmɛ.

21 Nyɛ dla he ko nɛ nyɛ maa gbe e bimɛ ɔmɛ ngɛ,

Ngɛ a nɛmɛ ɔmɛ a fɔ yemi ɔ he je,

Konɛ a ko te si nɛ a ngɔ zugba a,

Nɛ́ a ko ha nɛ a ma amɛ nɛ hyi zugba a nɔ tɔ.”

“Bɔ nɛ i to ye yi mi ɔ, jã nɛ e maa ba,

Nɛ bɔ nɛ i mwɔ ye yi mi kpɔ ɔ, jã pɛpɛɛpɛ lɛ e maa ba mi.

25 Ma ywia Asiriano ɔ ngɛ ye zugba a nɔ,

Nɛ ma naa e nɔ ngɛ ye yoku ɔmɛ a nɔ.

A ma je e kuɛpã tso ɔ ngɛ a nɔ,

Nɛ a ma je e tlomi ɔ ngɛ a konɔ.”

26 Enɛ ɔ ji yi mi kpɔ nɛ a mwɔ kɛ si zugba a tsuo,

Nɛ enɛ ɔ ji nine nɛ a wo nɔ kɛ si je ma amɛ tsuo.*

27 Ejakaa Yehowa tabohiatsɛ ɔ mwɔ e yi mi kpɔ,

Nɛ mɛnɔ ma nyɛ ma puɛ lɛ?

E kpa e nine mi,

Nɛ mɛnɔ ma nyɛ maa dɔ mi?

29 “Filistia, nyɛ ti nɔ ko nɛ ko nya

Akɛnɛ nɔ nɛ fiaa nyɛ nɔ́ ɔ dɛma tso ɔ ku ɔ he je.

Ejakaa sinɔ duɔtsɛ ko maa je sinɔ ɔ sipoku ɔ mi kɛ ba,

Nɛ e nina maa pee la sinɔ nɛ e tsɛ̃ɔ.*

30 Be mi nɛ nihi nɛ a ní ngɛ mɔbɔ ɔ a kekleekle bimɛ maa ye ní,

Nɛ́ ohiatsɛmɛ maa hwɔ si slɔkee ɔ,

Ma ha nɛ hwɔ maa gbe o sipoku ɔ,

Nɛ a maa gbe nɔ́ nɛ maa piɛ ha mo ɔ.

Ejakaa lasuku ko je yiti je kɛ ma,

Nɛ e tabuli ɔmɛ a kpɛti nɔ ko be nɛ e gblaa e nane si.”

A ma ha mɛ heto kaa Yehowa fia Zion sisi tomi ɔ,

Nɛ e we bi ɔmɛ a kpɛti nihi nɛ a ní ngɛ mɔbɔ ɔ ma ya sa we ngɛ e mi.

Akɛnɛ a kpata e hɛ mi ngɛ nyɔ kake mi he je ɔ,

Ar nɛ ngɛ Moab ɔ pee dii.

Akɛnɛ a kpata e hɛ mi ngɛ nyɔ kake mi he je ɔ,

Kir nɛ ngɛ Moab ɔ pee dii.

 2 E kuɔ kɛ ho We* ɔ kɛ Dibon ya,

Kɛ ho hehi nɛ ya hiɔwe ɔ ya konɛ e ya fo ya.

Mɛ tsuo a foɔ ya boboobo ngɛ a tsu ɔmɛ a yi mi kɛ a ma a he nya buami he ɔmɛ;

A kɛ ya fomi kpleɔ si.

 4 Heshbon kɛ Eleale kpaa ngmlaa wawɛɛ;

A nuɔ a gbi ngɛ Yahaz tɔɔ.

Benɛ a ngɛ Luhit yoku ɔ kuɔe ɔ, a ngɛ ya foe;

Benɛ a ngɛ blɔ nɔ kɛ yaa Horonaim ɔ, a ngɛ ngmlaa kpae ngɛ amanehlu nɛ ba a he je.

 6 Ejakaa Nimrim nyu ɔ tsuo mii ta;

Nga mumu ɔmɛ gbli,

Nga amɛ gbo, nɛ nɔ́ mumu ko po píɛ.

 7 Enɛ ɔ he je nɛ a ngɛ níhi nɛ piɛ ngɛ a nito he ɔmɛ kɛ a ní babauu nɛ a ná a muɔe kɛ yaa a nɛ;

A ngɛ nyɛɛe kɛ po dɔgba a* nɛ tsohi* ngɛ mi ɔ.

Ya boboobo ɔ su Eglaim;

Ya boboobo ɔ su Beerelim.

 9 Dimon nyu ɔ tsuo hyi kɛ muɔ,

Nɛ i ngɛ níhi fuu nɛ ma pee Dimon po pe jã:

Jata ma ba tua Moabbi nɛ a maa tu fo

Kɛ ni nɛmɛ nɛ a maa piɛ ngɛ zugba a nɔ ɔ.

16 Nyɛɛ ngɔ agbosu kɛ ya ha zugba a nɔ yelɔ ɔ,

Nyɛɛ ngɔ kɛ je Sela kɛ gu nga a nɔ

Kɛ ya Zion biyo ɔ yoku ɔ nɔ.

 2 Kaa bɔ nɛ lohwe pɛlitsɛ nɛ a fiee lɛ ngɛ e tsu he ngɛ ɔ,

Jã nɛ Moab biyi ɔmɛ maa pee ngɛ Arnon pa pomi he ɔmɛ.

Yi mi walɔ ɔ nyagbe maa ba,

Hɛ mi kpatami ɔ maa ba nyagbe,

Nɛ nihi nɛ a naa ni kpahi a nɔ ɔ, a hɛ mi ma kpata kɛ je zugba a nɔ.

Nɔ nɛ hii si ngɛ nɔ ngɛ David bo tsu ɔ mi ɔ maa ye anɔkuale;

E kɛ dami sane yemi maa kojo, nɛ e kɛ oya yemi ma tsu dami he ní.”

 6 Wa nu Moab he nɔ womi ɔ he, e woɔ e he nɔ wawɛɛ.

Wa nu e pupuupu peemi ɔ, kɛ e he nɔ womi ɔ, kɛ e we abofu ɔ he;

Se munyu puu nɛ e tuɔ ɔ maa pee yaka.

 7 Lɔ ɔ he ɔ, Moab maa ye aywilɛho ngɛ e we amanehlu he;

Mɛ tsuo a maa ye aywilɛho.

 8 Ejakaa Heshbon kpongu ɔmɛ a nɔ gbli,

Sibma wai tso ɔmɛ gbli,

Je ma amɛ a nɔ yeli ɔmɛ naa e kɔnihi nɛ a wo wai yiblii tsutsu ɔ nɔ;

E kɔni ɔmɛ ya su Yazer tɔɔ;

E kɔni ɔmɛ ka kɛ ya su nga a nɔ.

Oo Heshbon kɛ Eleale, ma ngɔ ye vonyu kɛ pɔ nyɛ,

Ejakaa ngmlaa nɛ a kpaa ngɛ nyɛ mawulɛ be mi tso yiblii he kɛ ngmlaa nɛ a kpaa ngɛ nyɛ ní kpami he ɔ se po.*

10 A ha nɛ bua jɔmi kɛ nyami se po ngɛ zugba kɛ e nɔ tsohi nɛ woɔ yiblii ɔ nɔ,

Nɛ a la we bua jɔmi lahi ngɛ wai ngmɔ ɔmɛ a mi, nɛ jã kɛ̃ nɛ a kpa we ngmlaa ngɛ a mi hulɔ.

Nɔ nɛ naa wai nɔ ɔ naa we wai nɔ ngɛ wai ngami he ɔmɛ hu,

Ejakaa i ha nɛ ngmlaa kpami ɔ se po.

11 Lɔ ɔ he je nɛ ye mi mi ngɛ pɛe ngɛ Moab he,

Kaa kpa saku nɛ a ngɛ fiae ɔ nɛ,

Nɛ i hao ngɛ Kir Hareset he ngɛ ye mi tɔɔ ɔ nɛ.

“Hyɛ! Damasko be ma pee hu,

E ma ba pee ma doku.

 2 A ma kua Aroer ma amɛ;

A maa pee hehi nɛ tohi maa bu si ngɛ,

Nɛ nɔ ko be a he gbeye woe.

 3 Mahi nɛ a fia gbogbo wo a he maa laa ngɛ Efraim,

Nɛ matsɛ yemi maa laa ngɛ Damasko;

Nɛ nihi nɛ a maa piɛ ngɛ Siria a

Maa pee kaa Israelbi* ɔmɛ a hɛ mi nyami,” Yehowa tabohiatsɛ ɔ lɛ de.

 4 “Jamɛ a ligbi ɔ, Yakob hɛ mi nyami ɔ nɔ ma gbɔ,

Nɛ e nɔmlɔ tso kpakpataa a* maa flãã.

 5 Jamɛ a ligbi ɔ maa pee kaa bɔ nɛ ní kpalɔ buaa ngma nɛ daa si nya,

Nɛ́ e kɛ e nine poɔ ngma a,

E maa pee kaa bɔ nɛ a kpɛteɔ ngma ngɛ Refaim Dɔgba a mi ɔ.

 6 Níhi nɛ a ma kpɛte pɛ lɛ maa piɛ,

Kaa bɔ nɛ e ji ke a kplɔ oliv tso yiblii ɔ:

Oliv enyɔ loo etɛ nɛ fu pɛ lɛ piɛɔ ngɛ e kɔni nɛ ya hiɔwe ploplooplo ɔ nɔ,

Oliv eywiɛ loo enuɔ pɛ lɛ piɛɔ ngɛ e kɔnihi nɛ a woɔ yiblii ɔ nɔ,” Yehowa, Israel Mawu ɔ lɛ de.

 9 Jamɛ a ligbi ɔ, e mahi nɛ a fia gbogbo wo a he ɔ maa pee kaa he ko nɛ a kua ngɛ hue tso mi,

Kaa tso kɔni nɛ a kua lɛ ngɛ Israelbi ɔmɛ a hɛ mi;

E ma plɛ pee zugba nɛ se nami be he.

10 Ejakaa o hɛ je Mawu nɛ heɔ o yi wami ɔ nɔ;

O kaii we o Tɛsa nɛ he wa a.

Lɔ ɔ he je nɛ o peeɔ abɔɔhi nɛ a ngɛ fɛu,*

Nɛ o maa nubwɔ tso* ngɛ mi ɔ nɛ.

11 Ngɛ ligbi ɔ mi ɔ, o poɔ piɛ kɛ woɔ o ngmɔ ɔ he,

Mɔtu ɔ, o haa nɛ wu nɛ o du ɔ puɛɔ,

Se ní nɛ a kpa a maa laa ngɛ hiɔ kɛ nɔ́ yeyee nɛ be tsaba ligbi ɔ nɔ.

12 Bu tue! Nimli babauu ngɛ basabasa pee,

A pee hamahama kaa wo!

Je mahi ngɛ hoo pee,

A nya wa kaa nyu babauu nɛ gli!

E ma kã a hɛ mi, nɛ a maa tu fo kɛ ho tsitsaa lokoo ya,

A maa fiee mɛ kaa yokuhi a nɔ tsakati* nɛ kɔɔhiɔ muɔɔ kɛ ya a,

Kaa mio tso* nɛ kɔɔhiɔ nɛ nya wa muɔɔ kɛ yaa.

Nihi nɛ a kpakpaa wa he ní kɛ yaa a, a blɔ fa mi nɔ́ ji nɛ ɔ nɛ,

Nihi nɛ a haa wa ní ɔ, a blɔ fa mi nɔ́ ji nɛ ɔ nɛ.

18 Musu tloo zugba nɛ lohwe tsɔwi a pɛli nya ngɛ pɛe ngɛ nɔ ɔ,

Zugba nɛ ngɛ pahi nɛ ngɛ Etiopia kpokpa a nɔ ɔ!

 2 E tsɔ nihi kɛ gu wo ɔ nɔ,

A hi lɛhi nɛ a kɛ ngɔwu pee mi kɛ po pa a, nɛ e ngɛ dee ke:

“Nyɛ tsɔli nɛ nyɛ he sɔɔ, nyɛɛ ya

Je ma ko nɛ e mi bimɛ ka nɛ a he womi nɔ da,*

Nihi nɛ a yeɔ mɛ gbeye ngɛ he fɛɛ he ɔ a ngɔ,

Nyɛɛ ya je ma ko nɛ he wa nɛ e yeɔ kunimi,*

Nɛ pahi ba fɔ e zugba a kɛ ho ɔ mi.”

 3 Nyɛ nihi tsuo nɛ nyɛ ngɛ zugba a nɔ kɛ nyɛ nihi nɛ nyɛ ngɛ je ɔ mi,

Nɔ́ nɛ nyɛ maa na a maa pee kaa okadi* nɛ́ a wo nɔ ngɛ yoku ɔmɛ a nɔ,

Nɛ nyɛ maa nu nɛ nɔ́ ko ngɛ pɛe kaa titimati nɛ a ngɛ kpae.

“Ma pee dii nɛ ma hyɛ ye hi he nɛ i to sisi ɔ,*

Kaa bɔ nɛ kɔɔhiɔ mi dɔɔ la ke pu ngɛ tsoe ɔ.

Kaa bɔku nɛ́ nɛɔ bɔ ngɛ ní kpami be mi.

 5 Ejakaa loko ní kpami be maa su,

Nɛ́ mɔmɔ ɔmɛ ma kplɔ pue he, nɛ mɔmɔ ɔmɛ ma plɛ pee wai yiblii nɛ ngɛ fue ɔ,

A kɛ tso he suami hahi maa poo e kɔni ɔmɛ,

Nɛ a maa poo e kpa amɛ nɛ a ma sake ngɔ pue he.

 6 A maa je a gbogboe ɔmɛ a he kɛ ha yokuhi a nɔ lohwe pɛlitsɛmɛ nɛ a yeɔ lohwe kpahi ɔ,

Kɛ zugba a nɔ lohwehi.

Lohwe pɛlitsɛmɛ nɛ a yeɔ lohwe kpahi ɔ maa ye a lo ngɛ mawulɛ be ɔ mi,

Nɛ zugba a nɔ lohwe ɔmɛ tsuo maa ye a lo ngɛ ní kpami be ɔ mi.

 7 Jamɛ a be ɔ mi ɔ, a maa ngɔ nike ní kɛ ba ha Yehowa tabohiatsɛ ɔ.

A kɛ maa je je ma nɛ e mi bimɛ ka nɛ a he womi nɔ da a mi,*

A kɛ maa je nihi nɛ a yeɔ mɛ gbeye ngɛ he fɛɛ he ɔ a ngɔ,

A kɛ maa je je ma ko nɛ he wa nɛ e yeɔ kunimi,*

Nɛ pahi ba fɔ e zugba a kɛ ho ɔ mi

Kɛ ba Zion Yoku ɔ nɔ, he nɛ Yehowa tabohiatsɛ ɔ biɛ ngɛ ɔ.”

Egipt mawuhi nɛ a he be se nami ɔ a he maa do blibliibli ngɛ e hɛ mi,

Nɛ Egiptbi ɔmɛ a tsui maa sile ngɛ a mi.

 2 “Ma ha nɛ Egiptbi ɔmɛ maa te si kɛ wo mɛ nitsɛmɛ a he,

Nɛ a kɛ a sibi maa hwu,

Nɔ kɛ e nyɛmi maa hwu, nɔ kɛ e kpɔ mi no maa hwu,

Ma maa hwu kɛ si ma, matsɛ yemi maa hwu kɛ si matsɛ yemi.

 3 Nɛ Egipt juɛmi maa gbɛ,

Nɛ ma puɛ e yi mi tomi ɔmɛ.

E maa ya mawuhi nɛ se nami be a he ɔ a ngɔ,

E maa ya kunya yeli ɔmɛ, ní peeli ɔmɛ kɛ klamɔ ɔmɛ a ngɔ.

 4 Ma ngɔ Egipt kɛ wo nyɔmtsɛ ko nɛ e yi mi wa dɛ mi,

Nɛ matsɛ yiwutsotsɛ ko maa ye a nɔ,” anɔkuale Nyɔmtsɛ ɔ, Yehowa tabohiatsɛ ɔ lɛ de.

 5 Wo ɔ mi nyu ɔ maa si,

Nɛ pa a maa si nɛ e mi ma gbli.

 6 Pa amɛ maa je fu wawɛɛ;

Nilo nyu dɔ ɔmɛ maa fa nɛ a maa si.

 7 Níhi tsuo nɛ a du ngɛ Nilo Pa a tue ɔ, ngɛ Nilo Pa a he ɔ ma ngla,

Nɛ zugba nɛ ngɛ Nilo Pa a he nɛ a du ní ngɛ nɔ ɔ tsuo nɔ ma gbli.

 8 Nɛ pa gbeli nɛ a ngɛ Egipt ɔ maa ye aywilɛho,

Nihi nɛ a fɔɔ gbowe ngɛ Nilo Pa a mi ɔ maa ye kɔmɔ,

Nɛ nihi nɛ a woɔ ya ngɛ pa a nɔ ɔ a he be hiɛe hu.

 9 Nihi nɛ a tsuɔ flaks* he ní

Kɛ nihi nɛ a loɔ klala a, zo maa gbe mɛ.

10 E bo loli ɔmɛ maa hao;

E we apaatsɛmɛ ɔmɛ tsuo* maa ye aywilɛho.

“Ní leli a nina ji mi,

Matsɛmɛ nɛ a hi si blema a nina ji mi ɔ”?

13 Zoan ma nikɔtɔma amɛ je kuasia;

A sisi Nof* ma nikɔtɔma amɛ;

Egipt matsɛmɛ ɔmɛ ha nɛ ma a tla blɔ.

14 Yehowa ha nɛ Egipt juɛmi gbɛ;

Nɛ a ha nɛ Egipt tla blɔ ngɛ nɔ́ fɛɛ nɔ́ nɛ e peeɔ ɔ mi,

Kaa dã delɔ nɛ ngɛ si tatae ngɛ lɛ nitsɛ e vie mi.

15 Egipt be ní tsumi ko nae ma tsu,

Yi jio, hlemi jio, tso kɔni jio, go* jio.

E ma kaa ahumi nɛ ngɛ fiae kɛ je woyi je,

Kɛ je nga kplanaa a nɔ, kɛ je zugba nɛ e nɔ ngɛ gbeye ɔ nɔ.

Nɔ sisilɔ ɔ ngɛ nɔ sisie,

Nɛ nɔ́ puɛlɔ ɔ ngɛ ní puɛe.

I nu kɔɔmi,

Kaa yo nɛ e ngɛ fɔe.

Haomi tsi ye tue;

I pee basaa, lɔ ɔ he ɔ, i hyɛ we nɔ́ hu.

 7 Kɛkɛ nɛ e na ta zugba lɛ nɛ okpɔngɔhi ngɛ gblae,

Ta zugba lɛ nɛ tejihi ngɛ gblae,

Ta zugba lɛ nɛ afukpɔngɔhi ngɛ gblae.

“Oo Yehowa, daa ligbi ɔ, i daa si ngɛ hwɔɔmi mɔ ɔ nɔ,

Nɛ i daa ye blɔ he kɛ hwɔɔ daa nyɔ mi.

10 Oo ye we bi nɛ a sa nyɛ mi kaa ngma,

Nɔ́* nɛ i ná kɛ je ngma fiaami he ɔ,

I de nyɛ nɔ́ nɛ i nu kɛ je Yehowa tabohiatsɛ Israel Mawu ɔ ngɔ ɔ.

O maa hwɔ hue tso mi ngɛ nga kplanaa nɔ nyɔ mi,

Oo Dedan blɔ hiali.

14 Nyɛɛ ngɔ nyu kɛ ba ha nɔ nɛ kuma ngɛ lɛ yee ɔ,

Nyɛ nihi nɛ nyɛ ngɛ Tema zugba a nɔ,

Nɛ́ nyɛɛ ngɔ abolo kɛ ba ha nɔ nɛ ngɛ fo tue ɔ.

15 Ejakaa a tu fo kɛ je klaate nya, kɛ je klaate nɛ a hia ngɔ wo a he ɔ nya,

A tu fo kɛ je kɛ̃ɛ̃ nɛ a gbla mi ɔ nya, nɛ a tu fo kɛ je ta nɛ e mi wa a nya.

 2 Ma nɛ o mi tsuo pee hoo kɛ ngmlaa,

Ma nɛ o mi ngɛ gidigidi, nɛ a ngɛ ose hee ngɛ mi.

Tsa pi klaate nɛ a kɛ gbe o we bi ɔmɛ,

Nɛ a gbo we ngɛ ta mi hulɔ.

A nuu ni nɛmɛ nɛ a na a tsuo nyɔguɛ

E ngɛ mi kaa a tu fo kɛ ho se tsitsaa ya.

 4 Lɔ ɔ he je nɛ i de ke: “Nyɛ je nyɛ he ngɛ ye he,

Nɛ́ ma fo ya wawɛɛ ɔ nɛ.

Nyɛ ko de ke doo nyɛ maa wo ye bua

Ngɛ ye we bi ɔmɛ a biyo ɔ* hɛ mi kpatami ɔ he je.

 5 Ejakaa e ji basabasa peemi, kunimi yemi, kɛ tsui pomi ligbi

Nɛ je Nyɔmtsɛ Matsɛ Yehowa tabohiatsɛ ɔ ngɔ,

Ngɛ Nina Dɔgba a mi.

A ku gbogbo ɔ

Nɛ ni ɔmɛ a ya fomi ɔ ya su yoku ɔ nɔ.

 6 Elambi ɔmɛ wo a kɛ̃ɛ̃ mi bi gbaja a

Nɛ a ma kɛ ta zugba lɛhi kɛ okpɔngɔhi,*

Nɛ Kir je nɔ́ nɛ ha e tsɛ̃i ɔ he ɔ.*

 7 Nɛ o dɔgbahi nɛ a se be ɔmɛ

A mi ma hyi tɔ kɛ ta zugba lɛhi,

Nɛ okpɔngɔ* ɔmɛ ma ba da o we agbo ɔ nya,

 8 Nɛ a ma je Yuda hɛ mi hami nɔ́ ɔ.*

12 Jamɛ a ligbi ɔ, Nyɔmtsɛ Matsɛ Yehowa tabohiatsɛ ɔ

Ma tsɛ nihi konɛ a ba fo ya nɛ a ye aywilɛho,

A ma kpa a yi, nɛ a maa ha kpekpe.

13 Se nyɛ ngɛ nyae nɛ nyɛ ngɛ nyɛ hɛja jee,

Nyɛ gbeɔ nahi, nɛ nyɛ gbeɔ jijɔhi,

Nyɛ yeɔ lo, nɛ nyɛ nuɔ wai

 3 Shihor* ngma* kɛ Nilo niba ní ɔ gu nyuhi babauu nɔ kɛ ba,

Enɛ ɔ ha nɛ e ná ní,

Nɛ e ha je ma amɛ ná he se.

 4 Oo Sidon, zo nɛ gbe mo, mo wo nya ma nɛ o he wa,

Ejakaa wo ɔ de ke:

I nui kɔɔmi hyɛ, nɛ i fɔ we hyɛ,

Nɛ i lɛ́ binyumuwi kɛ biyiwi* hyɛ.”

 5 Nihi maa hao ke a nu amaniɛ bɔmi nɛ kɔɔ Tiro he ɔ

Kaa bɔ nɛ a pee benɛ a nu Egipt he amaniɛ bɔmi ɔ.

 8 Mɛnɔ lɛ to ga nɛ ɔ kɛ si Tiro,

Nɔ nɛ buɔ nihi matsɛ pɛɛ,

Nɛ e jua yeli ɔmɛ ji odehehi,

Nɛ a wo e jua yeli ɔmɛ a hɛ mi nyami ngɛ zugba a tsuo nɔ ɔ?

 9 Yehowa tabohiatsɛ ɔ nitsɛ lɛ to ga nɛ ɔ,

Kaa e ma pue e he nɔ womi ɔ kɛ e he fɛu ɔ hɛ mi si,

Konɛ e pue nihi tsuo nɛ a wo a hɛ mi nyami ngɛ zugba a nɔ ɔ hɛ mi si.

11 E kpa e nine mi ngɛ wo ɔ nɔ;

E mimiɛ matsɛ yemi ɔmɛ.

12 Nɛ e de ke: “Oo Sidon biyo yomiyo,

Mo nɛ a wa mo yi mi, o be nyae hu.

Kaldeabi ɔmɛ lɛ a ha nɛ lejɛ ɔ pee lohwe awi yeli a hi he,

Se pi Asiriabi ɔmɛ.

A ma ma yi sami mɔhi;

A hule Tiro mɔ ngua amɛ,

A hule lɛ pue si butuu.

14 Nyɛ Tarshish melehi, nyɛ fo ya boboobo,

Ejakaa a kpata nyɛ wesa he ɔmɛ a hɛ mi.

Fiaa o saku ɔ saminya;

La lahi fuu,

Konɛ a kai mo.”

Ma a jio, osɔfo ɔmɛ jio,

Sɔmɔlɔ jio, nyɔmtsɛ jio,

Mawayo jio, e nyɔmtsɛ yo jio,

Ní helɔ jio, ní jualɔ jio,

Nɔ nɛ paa nɔ́ jio, nɔ nɛ a pa lɛ nɔ́ jio,

Nɔ nɛ a ye lɛ hiɔ jio, nɔ nɛ e ye hiɔ jio.

 3 Nɔ ko nɔ ko be piɛe ngɛ zugba a nɔ;

A maa mwɔɔ nɔ́ fɛɛ nɔ́ nɛ ngɛ nɔ ɔ,

Ejakaa Yehowa lɛ tu munyu nɛ ɔ.

 5 Nihi nɛ a ngɛ zugba a nɔ ɔ wo zugba a he mu,

Ejakaa a yi mlaa a nɔ,

A tsake blɔ tsɔɔmi ɔ,

Nɛ a yi somi nɛ ngɛ kɛ yaa neneene* ɔ nɔ.

 6 Lɔ ɔ he je nɛ gbiɛmi ɔ ngɛ zugba a hɛ mi kpatae ɔ nɛ,

Nihi nɛ a ngɛ zugba a nɔ ɔ ye fɔ.

Lɔ ɔ he je nɛ nihi nɛ a ngɛ zugba a nɔ ɔ a he pi,

Nɛ e piɛ nihi bɔɔ ko pɛ ɔ nɛ.

 7 Wai ehe ɔ ngɛ aywilɛho yee,* wai tso ɔmɛ ngɛ gboe,

Nihi tsuo nɛ a tsui nyaa a ngɛ ya foe.

 8 Bua jɔmi nɛ akasawa pɛmi ngɔɔ kɛ baa a se po;

Nihi nɛ a jeɔ a hɛja a, a hoo peemi ɔ se po;

Saku pɛmi nɛ ngɔɔ ɔ se po.

 9 A nuɔ wai se a la we kɛ tui he,

Nɛ dã duɔ ha nihi nɛ a nuɔ ɔ.

10 Ma nɛ a je he ɔ kuɔ pue si;

A nga we fɛɛ we nya konɛ nɔ ko nɛ ko sɛ mi.

Bua jɔmi tsuo ta;

Bua jɔmi nɛ ngɛ zugba a nɔ ɔ se po.

12 Ma a plɛ pee ma doku;

A kuɔ agbo ɔ kɛ pue si dukuduku.*

E maa pee kaa oliv tso yiblii nɛ a kplɔ nɛ e piɛ,

Kaa wai yiblii nɛ a kpa sisi nɛ piɛ.

14 A ma wo a gbi nɔ,

A kɛ bua jɔmi ma nya.

15 Lɔ ɔ he je nɛ a ma je Yehowa yi kɛ je puje he ɔ nɛ;

A maa je zugba kpɔhi nɛ a ngɛ wo ɔ nɔ ɔ a nɔ kɛ wo Yehowa Israel Mawu ɔ biɛ ɔ hɛ mi nyami.

Kpo mo ha mi! Nɔ sisili sisi nihi;

Nɔ sisili gu sisimi blɔ nɔ kɛ sisi nihi.”

18 Nɔ fɛɛ nɔ nɛ e maa tu fo kɛ je gbeye ngmlaa nya a maa nɔ muɔ mi,

Nɛ nɔ fɛɛ nɔ nɛ maa je kpo kɛ je muɔ ɔ mi ɔ, klama a maa du lɛ.

Ejakaa a ma bli hiɔwe agbo ɔmɛ,

Nɛ zugba a sisi tomi ɔ ma mimiɛ.

19 Zugba a mi gba;

A hoso zugba a;

Zugba a mimiɛ wawɛɛ.

20 Zugba a ngɛ dedee kaa dã tɔlɔ,

Nɛ e ngɛ mimiɛe kɛ ngɛ yae kɛ ngɛ bae kaa gba nɛ kɔɔhiɔ sɛ mi.

E yayami ɔ jiɔ ngɛ e kuɛ nɔ,

Nɛ e maa nɔ si, nɛ e be nyɛe maa te si hu.

21 Jamɛ a ligbi ɔ, Yehowa maa kojo hiɔwe tabo ɔ,

Kɛ zugba a nɔ matsɛmɛ ɔmɛ ngɛ zugba a nɔ.

22 Nɛ a ma bua a nya

Kaa bɔ nɛ a buaa nihi nɛ a wo mɛ tsu a nya kɛ woɔ tsu womi he ɔ,*

Nɛ a ma nga a yi kɛ wo muɔ ɔ mi;

Ligbihi babauu se ɔ, a ma ba hyɛ mɛ.

23 Zo maa gbe nyɔhiɔ ɔ,

Nɛ pu ɔ hɛ mi ma pue si,

Ejakaa Yehowa tabohiatsɛ ɔ ba pee matsɛ ngɛ Zion Yoku ɔ nɔ kɛ Yerusalem,

E hɛ mi ba nyami ngɛ e we bi ɔmɛ a ma nikɔtɔma amɛ* a hɛ mi.

Ma wo o nɔ gojoo, ma je o biɛ ɔ yi,

Ejakaa o tsu nyakpɛ níhi,

Níhi nɛ o to o yi mi kaa o maa pee kɛ je blema lokoo ɔ;

O ye anɔkuale, nɛ a kɛ hɛ ma nyɛ maa fɔ o nɔ.

 2 Ejakaa o ha nɛ ma a plɛ pee tɛhi nɛ a bua nya,

O ha nɛ ma nɛ a fia gbogbo wo he ɔ hule kɛ pue si butuu.

Ma se bi a mɔ ɔ pee we ma hu;

A be mae hu gblegbleegble.

 3 Lɔ ɔ he je nɛ nihi nɛ a he wa maa wo o hɛ mi nyami ɔ nɛ;

Je ma nɛ yi mi wali ngɛ mi ɔ a ma a maa ye mo gbeye.

 4 Ejakaa o ba pee he piɛ pomi he kɛ ha nihi nɛ a ní ngɛ mɔbɔ ɔ,

Ohiatsɛmɛ a mɔ nɛ he wa ngɛ a hiami be mi,

Wesa he ngɛ hiɔmi kɛ e mi kɔɔhiɔ nya.

Kɛ hɔ ngɛ pu la nya.

Benɛ yi mi wali a we abofu ɔ ngɛ kaa hiɔmi kɛ e mi kɔɔhiɔ nɛ fia kɛ si gbogbo,

 5 Kaa pu la ngɛ zugba nɛ gbli kadokado nɔ ɔ,

O ku ose nɛ nibwɔhi ngɛ hee ɔ nya la.

Kaa bɔ nɛ bɔku tsiɔ pu la nya a,

Jã nɛ o poɔ la nɛ nihi nɛ a yi mi wa laa a se.

 6 Yehowa tabohiatsɛ ɔ maa ngmɛ okplɔɔ kɛ ha je ma amɛ tsuo ngɛ yoku nɛ ɔ nɔ,

A maa ye ní kpakpa,

A maa nu wai kpakpa,*

Niye ní nɛ wu mi zɔ ngɛ mi,

Wai kpakpa nɛ a tsle nɔ.

 7 Ngɛ yoku nɛ ɔ nɔ ɔ, e ma je* nɔ́ nɛ ha ma amɛ tsuo a nɔ ɔ,

Kɛ nɔ́ nɛ a lo kɛ ha je ma amɛ tsuo a nɔ ɔ kɛ je.

 8 E maa mi* gbenɔ kɛ maa ya neneene,

Nɛ Nyɔmtsɛ Matsɛ Yehowa ma tsu nɔ fɛɛ nɔ hɛ mi vonyu.

E ma je zo nɛ gbe e we bi ɔmɛ ɔ kɛ je zugba a nɔ tsuo,

Ejakaa Yehowa nitsɛ lɛ de.

Wa ngɔ wa hɛ kɛ fɔ e nɔ,

Nɛ e ma kpɔ̃ wɔ.

10 Ejakaa Yehowa nine maa hi yoku nɛ ɔ nɔ,

Nɛ a maa naa Moab nɔ ngɛ e hi he ɔ

Kaa nga nɛ a naa nɔ kɛ wo lohwehi a fĩ babauu mi.

11 E maa ngɔ e ninehi kɛ fiaa mi

Kaa bɔ nɛ ke nɔ ko ngɛ silee nɛ e ngɔɔ e nine kɛ fiaa nyu mi ɔ,

Nɛ e maa fɔ e ninehi saminya

Kɛ ba e* he nɔ womi ɔ si.

12 O ma nɛ a fia gbogbo ngɔ wo he ɔ kɛ gbogbo nɛ ya hiɔwe nɛ poɔ o ma a he piɛ ɔ,

E maa ku ngɔ pue si

E maa ku lɛ ngɔ pue zugba, ngɔ pue zugba mi butuu.

 2 Nyɛ bli agbo ɔmɛ konɛ ma nɛ peeɔ nɔ́ nɛ da a nɛ sɛ mi,

Ma nɛ yeɔ anɔkuale ɔ.

 3 O maa bu nihi nɛ a kɛ a he fɔɔ o nɔ kulaa* a he;

O maa ya nɔ nɛ o ma ha mɛ tue mi jɔmi,

Ejakaa o nɔ lɛ a ngɔ a hɛ kɛ fɔ.

 4 Ngɔɔ o hɛ kɛ fɔ Yehowa nɔ kɛ ya daa,

Ejakaa Yah* Yehowa ji Tɛsa nɛ ngɛ kɛ yaa neneene.

E ha nɛ e nɔ si,

E ha nɛ e nɔ zugba;

E ha nɛ e nɔ bunyuku mi.

 6 Nane maa naa e nɔ,

Nihi nɛ a wa mɛ yi mi a nane, nihi nɛ a ní ngɛ mɔbɔ a nane.”

Akɛnɛ o da he je ɔ,

O ma ha nɛ dalɔ blɔ nɔ maa da.

 8 Oo Yehowa, be mi nɛ wa ngɛ o kojomi blɔ ɔ nɔ nyɛɛe ɔ,

Wa ngɔ wa hɛ kɛ fɔ o nɔ.

 9 Nyɔ mi ɔ, ye nɔmlɔ tso ɔ tsuo* hɛ jaa ngɛ o he.

Ee, ye mumi ɔ yaa nɔ nɛ e hlaa mo;

Ejakaa ke o kojo zugba a,

Nihi nɛ a ngɛ zugba a nɔ ɔ kaseɔ dami he ní.

10 Ke a na yiwutsotsɛ mɔbɔ po,

E be bɔ nɛ a peeɔ dami ní ha kasee.*

Ngɛ zugba nɛ dali sɔuu lɛ a ngɛ nɔ ɔ nɔ po ɔ, e maa pee yiwutso ní,

Nɛ e be Yehowa we agboje ɔ nae.

12 Oo Yehowa, o ma ha nɛ wa ma ná tue mi jɔmi

Ejakaa nɔ́ fɛɛ nɔ́ ko nɛ wa pee ɔ

Mo lɛ o pee kɛ ha wɔ.

13 Oo Yehowa, ngɛ o se ɔ, nyɔmtsɛmɛ komɛ hu yeɔ wa nɔ,

Se o biɛ ɔ ta pɛ lɛ wa woɔ.

Ejakaa o je o hɛ kɛ pi mɛ

Konɛ o gu a sisi nɛ a biɛ nɛ laa.

15 Oo Yehowa, o ha nɛ ma a kle,

O ha nɛ ma a kle;

O wo o hɛ mi nyami.

16 Oo Yehowa, benɛ a sɛ haomi mi ɔ, a ba o ngɔ;

Benɛ o tsɔse mɛ ɔ, a sɔle ngɛ a nya he kɛ ha mo.

17 Bɔ nɛ yohɔyo nɛ e miɔ nɛ e ma fɔ ɔ

Nuɔ kɔɔmi nɛ e kpaa ngmlaa a,

Jã nɛ wa ba pee ngɛ o he je, oo Yehowa.

18 Wa ngɔ hɔ, nɛ wa nu kɔɔmi,

Se e pee kaa nɔ́ nɛ wa fɔ kɔɔhiɔ.

Wa ngɔɛ yi wami hemi kɛ bɛ zugba a nɔ,

Nɛ a fɔ we bi ko nɛ e hi zugba a nɔ.

Nyɛɛ te si nɛ nyɛɛ kɛ bua jɔmi nɛ he ose,

Nyɛ nihi nɛ nyɛ ngɛ zu ɔ mi!

Ejakaa bɔ́ nɛ nɛɔ kɛ pueɔ o nɔ ɔ ngɛ kaa makɛ bɔ́,*

Nɛ zugba a ma ha nɛ nihi nɛ a gbo nɛ a be he wami ko ɔ maa ba wami mi.*

20 Ye we bi, nyɛɛ ho, nyɛɛ sɛ nyɛ se tsu ɔmɛ a mi,

Nɛ nyɛ nga nyɛ sinya amɛ ngɛ nyɛ se.

Nyɛɛ laa nyɛ he be bɔɔ ko

Kɛ yaa si be nɛ abofu ɔ maa be.

21 Ejakaa hyɛ, Yehowa je e hi he ɔ kɛ ma

Konɛ e ha nɛ nihi nɛ a ngɛ zugba a nɔ ɔ nɛ a bu a yayami ɔ he akɔtaa,

Nɛ zugba a ma je muɔ si nɛ e pue ɔ kpo

Nɛ zugba a be nihi nɛ e gbe ɔ nɔ laae hu.”

27 Jamɛ a ligbi ɔ, Yehowa maa ngɔ e klaate nɛ e nya ba, nɛ e kle, nɛ e he wa a

Kɛ fia Leviatan,* sinɔ nɛ e he sɔɔ ɔ,

Sinɔ nɛ sãã si langalanga a,

Nɛ e maa gbe wo mi lohwe ngua a.

I buɔ e he nyɔ kɛ pia,

Konɛ nɔ ko nɛ ko ye lɛ awi.

É ba nɛ e kɛ mi nɛ ba dla;

É kɛ mi nɛ ba dla.”

 6 Be ma nɛ Yakob sipoku maa pi si,

Israel ma gba mɔmɔ nɛ e maa bɔ,

Nɛ a ma ha nɛ niba ní ma hyi zugba a nɔ tɔ.

 9 Blɔ nɛ ɔ nɔ a maa gu kɛ kpata kɛ ha Yakob yayami ɔ,

Nɛ ke a je e yayami ɔ kɛ je ɔ, yiblii nɛ e maa wo ji nɛ ɔ nɛ:

E ma ha nɛ afɔle sami latɛ ɔmɛ

Maa pee kaa ayilɔ nɛ a wɛɛ,

Nɛ wɔ tsohi* loo tsopa kɛ e he via sami nɔ́ ko be piɛe.

10 Ejakaa ma nɛ a fia gbogbo ngɔ wo he ɔ mi maa fɔ si gu;

Lohwehi a ní yemi he ɔ maa fɔ si gu, nɛ e maa pee kaa nga kplanaa nɔ.

Na bi maa ye ní ngɛ lejɛ ɔ, nɛ e maa bu si

Nɛ e ma kpe tso ɔmɛ a kɔni ɔmɛ.

11 Ke e kɔni ɔmɛ gbli ɔ,

Yihi ma ba ku,

Nɛ a kɛ ma ya slɛ la

Lɔ ɔ he je nɛ a Bɔlɔ* ɔ be mɛ mɔbɔ nae,

Nɛ nɔ nɛ e bɔ mɛ ɔ mi mi be lɛ sãe ngɛ a he ɔ nɛ.

28 Musu tloo Efraim dã tɔli a matsɛ pɛɛ* ngua a*

Kɛ e hɛ mi nyami nɛ ngɛ fɛu ɔ nɛ ngɛ nglae kaa mɔmɔ nɛ ngɛ gboe,

Nɛ́ e maa si ngɛ ma nɛ ya hiɔwe ɔ nɔ, he nɛ nihi nɛ wai ye a nɔ kunimi ngɛ ɔ!

E kɛ he wami ma sake lɛ kɛ ba fia zugba a nɔ

Kaa gbiɛ ngo ngu nɛ ngɛ nɛe kɛ e mi hiɔwe simi, kaa kɔɔhiɔ nɛ puɛɔ ní,

Kaa hiɔwe simi kɛ hiɔmi nɛ ngɛ nɛe nɛ nyu ɔ ha zugba a nɔ.

 3 A maa naa

Efraim dã tɔli a matsɛ pɛɛ* ngua a nɔ.

 4 Nɛ e hɛ mi nyami nɛ ngɛ fɛu ɔ nɛ ngɛ nglae kaa mɔmɔ nɛ ngɛ gboe

Nɛ́ e maa si ngɛ ma nɛ ya hiɔwe ɔ nɔ ɔ

Maa pee kaa kekleekle fig yiblii ngɛ ahlabata be mi.

 7 Nɛ ni nɛ ɔmɛ hu tla blɔ ngɛ wai he je;

A dã nɛ nya wa amɛ ha nɛ a dedeɔ.

Dã nɛ nya wa ha nɛ osɔfo ɔmɛ kɛ gbali ɔmɛ tla blɔ;

Wai haa nɛ a juɛmi gbɛɔ,

Nɛ dã nɛ nya wa nɛ a nuɔ ɔ haa nɛ a dedeɔ;

A hɛngmɛ nɛ yu ɔ haa nɛ a tlaa blɔ,

Nɛ a kojoɔ ngɛ blɔ nɛ dɛ nɔ.

 8 Ejakaa a we okplɔɔ ɔmɛ a nɔ hyi kpɔtɔɔ kɛ vie

—He ko be nɛ o be vie nae ngɛ.

 9 Mɛnɔ nɛ a maa tsɔɔ lɛ nile?

Nɛ mɛnɔ nɛ a maa tsɔɔ lɛ sɛ gbi ɔ sisi?

Nihi nɛ a po mɛ nyɔ kɛ we,

Nihi nɛ a je mɛ kɛ je nyɔ nya kɛ we ɔ lo?

10 Ejakaa “fami nyɛɛ fami se, fami nyɛɛ fami se,

Susumi kpa kɛ susumi kpa, susumi kpa kɛ susumi kpa,

Bɔɔ ngɛ hiɛ, bɔɔ ngɛ lejɛ.”

“Fami nyɛɛ fami se, fami nyɛɛ fami se,

Susumi kpa kɛ susumi kpa, susumi kpa kɛ susumi kpa,

Bɔɔ ngɛ hiɛ, bɔɔ ngɛ lejɛ,”

Bɔ nɛ pee nɛ ke a ngɛ nyɛɛe ɔ,

A tɛ nɔ́ nɛ a nɔɔ si se nya

Nɛ́ a kuɔ, nɛ́ a du klama, nɛ́ a nuu mɛ.

14 Lɔ ɔ he ɔ, nyɛɛ bu Yehowa munyu ɔ tue, nyɛ fĩali,

Nyɛ nɛ nyɛ yeɔ ma nɛ ɔ nɔ ngɛ Yerusalem,

15 Ejakaa nyɛ deɔ ke:

“Waa kɛ Gbenɔ so,

Nɛ waa kɛ Yɔkɔ* pee kake.*

Ke nyu babauu ɔ bee ɔ,

E be wa he sae,

Ejakaa waa kɛ lakpa pee wa wesa he,

Nɛ waa kɛ lakpa yemi pee wa laami he.

“I kɛ tɛ nɛ a ka nɛ a hyɛ maa fia sisi tomi ɔ ngɛ Zion,

Kɔ nya tɛ nɛ he jua wa nɛ́ a kɛ fia sisi tomi nɛ he wa a.

17 Nɛ ma ha dami sane yemi maa pee susumi kpa,

Nɛ dami maa pee nɔ́ nɛ a kɛ hyɛɛ kaa nɔ́ ko da tlɔmɔɔ.*

Gbiɛ ngo ngu maa bɛɛ lakpa laami he ɔ kɛ ho,

Nɛ nyu maa muɔ e laami he ɔmɛ kɛ ho.

18 A maa po somi nɛ o kɛ Gbenɔ so ɔ mi,

Nɛ kake peemi nɛ ngɛ o kɛ Yɔkɔ* nyɛ kpɛti ɔ be manye yee.

Ke nyu babauu ɔ bee ɔ,

E maa muɔ nyɛ kɛ ho.

19 Be fɛɛ be nɛ e maa be ɔ,

E maa muɔ nyɛ kɛ ho;

Ejakaa e maa be mɔtu fɛɛ mɔtu,

E maa be nyɔ kɛ pia.

20 Ejakaa satso ɔ ka we bɔ nɛ a ma nyɛ maa kpa a he mi ngɛ nɔ,

Nɛ bo nɛ a lo ɔ hu bli we bɔ nɛ a ma nyɛ ma kɛ ha a he.

21 Ejakaa Yehowa maa te si kaa bɔ nɛ e pee ngɛ Perazim Yoku ɔ nɔ ɔ;

E ma maa te si kaa bɔ nɛ e pee ngɛ dɔgba nɛ kɛ Gibeon he kɛ we ɔ mi ɔ,

Konɛ e pee e ní ɔmɛ, e níhi nɛ ngɛ nyakpɛ ɔ,

Konɛ e tsu e ní tsumi ɔ, e ní tsumi nɛ ngɛ nyakpɛ ɔ.

22 Lɔ ɔ he ɔ, nyɛ ko ye e he fɛu,

Konɛ níhi nɛ fi nyɛ ɔ ko hi nyɛ miae wawɛɛ,

Ejakaa i nu kɛ je Nyɔmtsɛ Matsɛ Yehowa tabohiatsɛ ɔ ngɔ kaa

E mwɔ yi mi kpɔ kaa e ma kpata zugba a tsuo* hɛ mi.

23 Nyɛ ta tue, nɛ nyɛɛ bu ye gbi tue;

Nyɛɛ pee totooto nɛ nyɛɛ bu nɔ́ nɛ i ngɛ dee ɔ tue.

25 Ke e dla zugba a hɛ mi ta a,

Anɛ e ya fĩa we kumin yumu nɛ́ e duɔ kumin lo?

Anɛ e ya du we hwiit kɛ ngma kɛ barli* ngɛ a blɔ he

Nɛ e duɔ spɛlt* ngɛ a kɔ nya amɛ lo?

26 Ejakaa e* tsɔɔ lɛ blɔ nɛ da;*

E Mawu ɔ tsɔɔ lɛ ní.

27 Ejakaa a kɛ ngma fiaami tso* fiaa we kumin yumu,

Nɛ a kɛ zugba lɛ nane hu nyɛɛ we kumin nɔ.

Mohu ɔ, tso kpoti lɛ a kɛ fiaa kumin yumu,

Nɛ kumin hu, tso lɛ a kɛ fiaa.

Dɛbi, e fiaa we lɛ hluu;

Nɛ ke e ngɔ e zugba lɛ nɛ okpɔngɔ ngɛ gblae kɛ nyɛɛ nɔ ɔ,

E ha we nɛ e pee bukɔbukɔ.

29 Enɛ ɔ hu je Yehowa tabohiatsɛ ɔ,

Nɔ nɛ e woɔ ga nɛ* ngɛ nyakpɛ,

Nɛ́ e pee ní nguanguahi ɔ* ngɔ.

Nyɛɛ ya nɔ nɛ nyɛɛ ye gbijlɔhi nɛ nyɛ yeɔ daa jeha a;

Nyɛɛ ye jeha fɛɛ jeha.

 2 Se ma ngɔ haomi kɛ ba Ariel nɔ,

E maa ye aywilɛho nɛ e maa ye kɔmɔ,

Nɛ e maa pee kaa Mawu afɔle sami latɛ kɛ ha mi.

 3 Ma ba bɔle mo* kɛ kpe,

Nɛ ma ka tsohi kɛ sa o yi

Nɛ ma pee ma yi sami níhi kɛ wo o he.

 4 A ma je mo ngɔ fia si;

Nɛ o maa tu munyu kɛ je zugba,

Nɛ bunyuku ma ha nɛ munyu nɛ o tuɔ ɔ be kpo jee.

A maa nu o gbi kɛ je zugba

Kaa ní peelɔ gbi,

Nɛ o gbi maa pɛ kɛ je bunyuku ɔ mi kaa lohwe pɛlitsɛ pɛmi.

 5 O he nyɛli ɔmɛ* a he maa hiɛ babauu kaa bunyuku,

Nɛ nihi nɛ a waa mo yi mi ɔ maa hiɛ babauu kaa tsakati* nɛ kɔɔhiɔ muɔɔ kɛ yaa.

 6 Yehowa tabohiatsɛ ɔ maa ngɔ

Hiɔwe simi kɛ zugba mimiɛmi kɛ ngmlaa nɛ nya wa,

Kɛ kɔɔhiɔ nɛ nya wa kɛ ahumi kɛ la nɛ kpataa nɔ́ hɛ mi kɛ kpɔ̃ mo.”

 7 Kɛkɛ ɔ, je mahi babauu nɛ a kɛ Ariel ngɛ ta hwue ɔ

—Nihi tsuo nɛ a kɛ lɛ ngɛ ta hwue ɔ,

Ma yi sami mɔhi nɛ a fia kɛ wo e he ɔ,

Kɛ nihi nɛ a kɛ haomi ngɛ e nɔ bae ɔ—

Maa pee kaa nlami, kaa nina nɛ a na nyɔ mi.

 8 Ee, e maa pee kaa nɔ ko nɛ e ngɛ nlae nɛ e ngɛ ní yee,

Se e hɛ tsɛ̃ kɛ hwɔ,*

Nɛ e maa pee kaa nɔ ko nɛ kuma ngɛ lɛ yee, nɛ́ e nla nɛ e ngɛ nyu nue,

Se e hɛ tsɛ kɛ pɔtɔtɔɛ, nɛ kuma ngɛ lɛ yee kɛ mwɔɔ.*

Jã nɛ e maa ba ngɛ je mahi babauu

Nɛ a kɛ Zion Yoku ɔ ngɛ hwue ɔ a blɔ fa mi.

 9 O he mi nɛ po, nɛ e pee mo nyakpɛ

Nyɛɛ ngɔ nɔ́ kɛ ha nyɛ hɛngmɛ nɔ, nɛ nyɛ hɛngmɛ nɛ yu.

A de, se pi wai nɛ ngɛ mɛ dee

A ngɛ dedee, se pi dã nɛ nya wa nɛ ha nɛ a ngɛ dedee.

10 Ejakaa Yehowa plɛ mahe vii mumi kɛ pue o nɔ;

E ma nyɛ hɛngmɛ, nɛ ji nyɛ gbali ɔmɛ,

Nɛ e ngɔ nɔ́ kɛ ha nyɛ yi nɔ, nɛ ji nyɛ ní nali ɔmɛ.

13 Yehowa ke: “Nimli nɛ ɔmɛ kɛ a nya deɔ ke a jaa mi

Nɛ a kɛ a nya woɔ ye hɛ mi nyami,

Se a tsui lɛɛ, e je ye he kɛ ho se ya tsitsaa;

Nɛ a daa nimli a mlaa nɛ a tsɔɔ mɛ ɔ nɔ kɛ yeɔ mi gbeye.

14 Enɛ ɔ he ɔ, ma ha nɛ nyakpɛ nɔ́ ko maa ba ma nɛ ɔ nɔ ekohu,

Nyakpɛ ní maa nyɛɛ nyakpɛ ní se;

Nɛ juɛmitsɛmɛ ɔmɛ a juɛmi ɔ maa pee yaka,

Nɛ ní leli ɔmɛ a nɔ́ sisi numi ɔ maa laa.”

A peeɔ a ní ɔmɛ ngɛ diblii mi,

Nɛ a deɔ ke: Mɛnɔ lɛ na wɔ?

17 E piɛ bɔɔ nɛ Lebanon ma plɛ pee abɔɔ,

Nɛ a maa bu abɔɔ ɔ kaa hue tso.

18 Jamɛ a ligbi ɔ, tuekpokutsɛmɛ maa nu womi ɔ mi munyuhi,

Nɛ hɛ yuyuili nɛ a ngɛ diblii kpii mi ɔ a hɛngmɛ maa hyɛ nɔ́.

19 Nihi nɛ a he jɔ ɔ ma nya wawɛɛ ngɛ Yehowa mi,

Nɛ ohiatsɛmɛ nɛ a ngɛ ni ɔmɛ kpɛti ɔ ma nya ngɛ Israel Nɔ Klɔuklɔu ɔ mi.

20 Ejakaa nɔ nɛ yi mi wa be si hie hu,

Nɛ fialɔ nyagbe maa ba,

Nɛ nihi tsuo nɛ a peeɔ klaalo kaa a maa ye awi ɔ, a hɛ mi ma kpata,

21 Nihi nɛ a tuɔ lakpa munyu kɛ haa nɛ nihi yeɔ fɔ,

Nɛ a tsɔɔ nɔ nɛ fãa lɛ nitsɛ e he* ngɛ ma a agbo ɔ nya a klama,

Nɛ a guɔ nya sami nɛ se nami be he nɔ kɛ buɔ dalɔ fɔ ɔ.

Zo be Yakob gbee hu,

Nɛ e hɛ mi be si puee hu.*

23 Ejakaa ke e na e bimɛ ɔmɛ

Nɛ a ji ye nine nya ní tsumi ɔ ngɛ e mi ɔ,

A maa wo ye biɛ ɔ hɛ mi nyami;

Ee, a maa wo Yakob Nɔ Klɔuklɔu ɔ hɛ mi nyami,

Nɛ a maa ye Israel Mawu ɔ gbeye.

24 Nihi nɛ a tla blɔ ngɛ a juɛmi mi ɔ maa nu nɔ́ sisi,

Nɛ nihi nɛ a tuɔ nɔ́ he munyu ɔ maa kplɛɛ blɔ tsɔɔmi nɔ.”

30 Yehowa ke: “Musu tloo bi tue gboli,

Nɛ a peeɔ níhi nɛ ji ye ngɔ,

Nɛ a kɛ nihi soɔ somi* nɛ ye mumi ɔ kplɛɛ we nɔ,

Bɔ nɛ pee nɛ a pee yayami kɛ to yayami nɛ a pee ɔ nɔ.

 2 A kpleɔ kɛ yaa Egipt be mi nɛ a de we mi,*

Konɛ a ya laa a he ngɛ Farao he piɛ pomi sisi,*

Nɛ a sa we ngɛ Egipt hɔ ɔ sisi.

 3 Se Farao he piɛ pomi ɔ maa pee zo kɛ ha nyɛ,

Nɛ we nɛ nyɛ ma ya sa ngɛ Egipt hɔ ɔ sisi ɔ maa pee hɛ mi si puemi.

 4 Ejakaa e ma nikɔtɔma amɛ ngɛ Zoan,

Nɛ e tsɔli ɔmɛ ya su Hanes.

 5 Ma nɛ se nami ko ji e mi kɛ bɛ,

Nɛ́ e be nyɛe maa ye bua nɔ, nɛ e he be se nami ko,

Se mohu zo kɛ hɛ mi si puemi lɛ e kɛ baa a,

Ma ha nɛ zo maa gbe mɛ tsuo.”

A gu zugba kɛ e nɔ haomi kɛ nyagba,

Zugba nɛ jata, jata nɛ ngɛ huae ngɛ nɔ,

Zugba nɛ sinɔ, la sinɔ nɛ e tsɛ̃ɔ* ngɛ nɔ ɔ nɔ kɛ ho.

A kɛ ní nɛ a ná a pue tejihi a nɔ

Nɛ a kɛ a tlomi ɔmɛ fɔ afukpɔngɔhi a se mi kpɔ* ɔmɛ a nɔ.

 8 “Amlɔ nɛ ɔ, ho nɛ o ya ngma ngɛ tɛ tɛtlɛɛ nɔ ngɛ a hɛ mi,

Nɛ o ngma ngɛ womi mi

Konɛ e fɔ si kɛ ha hwɔɔ se

Kaa odase nɛ ngɛ daa.

 9 Ejakaa a ji atuã tsɔli, sisimi bimɛ,

Bimɛ nɛ a sume kaa a maa bu Yehowa mlaa* tue.

“Akɛnɛ nyɛ kua munyu nɛ ɔ

Nɛ nyɛɛ kɛ nyɛ hɛ fɔ lakpa kɛ sisimi nɔ

Nɛ nyɛɛ kɛ nyɛ hɛ fɔ ní nɛ ɔmɛ a nɔ he je ɔ,

13 Nyɛ tɔmi ɔmɛ maa pee kaa gbogbo nɛ ku

Kaa gbogbo nɛ ya hiɔwe nɛ e miɔ nɛ e maa ku.

14 E maa ywia kaa zu buɛ ngua,

E maa ywia dukuduku, nɛ a be ngɛyu kake po nae ngɛ mi

Nɛ́ a kɛ maa je la ngɛ latɛ mi

Aloo nɛ a kɛ maa yɛ nyu ngɛ nɔ́ mi.”*

“Ke nyɛ kpale kɛ ba ye ngɔ, nɛ nyɛ pee kpoo ɔ, ma he nyɛ yi wami;

Ke nyɛ pee kpoo nɛ nyɛ ngɔ nyɛ hɛ kɛ fɔ ye nɔ ɔ, nyɛ ma ná he wami.”

17 Nɔ kake maa wo nihi akpe a he gbeye, nɛ a he maa do blibliibli;

Nihi enuɔ maa wo nyɛ he gbeye, nɛ nyɛ maa tu fo

Kɛ yaa si be nɛ nyɛ kpɛti nihi nɛ a maa piɛ ɔ maa pee kaa abalaa tso nɛ maa si ngɛ yoku nɔ,

Kaa okadi tso nɛ maa si ngɛ yoku wayo nɔ.

18 Se Yehowa kɛ tsui si tomi ngɛ mlɛe konɛ e* dloo nyɛ,

Nɛ e maa te si konɛ e na nyɛ mɔbɔ.

27 Hyɛ, Yehowa biɛ ɔ ma kɛ je tsitsaa,

E ma kɛ e mi mi fumi kɛ bɔku nɛ e mi ti kpii.

Abofu hyi e nya mi tɔ,

Nɛ e lilɛ ngɛ kaa la nɛ kpataa nɔ́ hɛ mi.

28 E mumi* ɔ ngɛ kaa pa nɛ hyi kɛ ta nɔ kuɛ si,

Nɛ e ma mimiɛ je ma amɛ ngɛ hɛ mi kpatami nɔ́ mi sami nɔ́ nɔ;*

Nɛ e maa wo a tsitsa mi kpa nɛ́ ma ha nɛ a laa blɔ.

29 Se nyɛ lami ɔ maa pee kaa la nɛ a la nyɔ mi

Ke nyɛ ngɛ nyɛ he dlae* nɛ nyɛɛ ye gbijlɔ ɔ.

O bua maa jɔ ngɛ o tsui mi kaa nɔ ko nɛ

E ngɛ bɛ kpae

Kɛ ngɛ nyɛɛe kɛ yaa Yehowa yoku ɔ nɔ, kɛ yaa Israel Tɛsa a ngɔ.

30 Yehowa ma ha nɛ a maa nu e gbi nɛ́ hɛ mi ngɛ nyami ɔ,

Nɛ e ma je e nine kpo ke e kɛ abofu ngɛ kplee kɛ ma,

Kɛ la nɛ kpataa nɔ́ hɛ mi,

Kɛ hiɔmi kɛ hiɔwe simi kɛ gbiɛngongu.

31 Ejakaa Yehowa gbi ɔ ma ha nɛ Asiria maa ye gbeye wawɛɛ;

E maa fiaa lɛ tso.

32 Be fɛɛ be nɛ Yehowa maa ngɔ

Tue gblami tso kɛ fia Asiria a,

Akasawa kɛ saku pɛmi maa piɛɛ he

Be mi nɛ e woɔ e nine nɔ kɛ siɔ mɛ ngɛ ta mi ɔ.

33 Ejakaa a dla e Tofet* ɔ kɛ fɔ si momo;

A dla lɛ hu kɛ ha matsɛ ɔ.

Hehi nɛ a bua tsohi nya ngɛ ɔ, e ha nɛ e mi kuɔ nɛ e mi bli,

Nɛ la kɛ tsohi babauu ngɛ mi.

Yehowa gugwɔ mi kɔɔhiɔ nɛ ngɛ kaa sɔlfa babaaba a

Ma ha nɛ la maa nɔ mi.

31 Musu tloo nihi nɛ a kpleɔ kɛ yaa Egipt nɛ a ya biɔ yemi kɛ buami,

Nihi nɛ a ngɔɔ a hɛ kɛ fɔɔ okpɔngɔhi a nɔ,

Nihi nɛ a ngɔɔ a hɛ kɛ fɔɔ ta zugba lɛhi a nɔ akɛnɛ a hiɛ babauu ɔ he je,

Nɛ a ngɔɔ a hɛ kɛ fɔɔ ta okpɔngɔhi* a nɔ, akɛnɛ a he wa a he je.

Se a ngɔɛ a hɛ kɛ fɔ we Israel Nɔ Klɔuklɔu ɔ nɔ,

Nɛ a hla we Yehowa se blɔ.

 2 Se lɛ hu e ngɛ nile, nɛ e maa ngɔ haomi kɛ ba,

Nɛ nɔ́ nɛ e de ɔ, e be e nya se kpalee.

E maa te si kɛ wo yayami peeli a we,

Kɛ nihi nɛ a yeɔ kɛ buaa nihi nɛ peeɔ nɔ́ yayami ɔ.

 3 Egiptbi ɔmɛ ɔ, nimli adesahi kɛkɛ ji mɛ, tsa pi Mawu ji mɛ;

A we okpɔngɔ ɔmɛ ɔ, he lo kɛkɛ ji mɛ, tsa pi mumi ji mɛ.

Ke Yehowa kpa e nine mi ɔ,

Nɔ fɛɛ nɔ nɛ e ma ba ye kɛ bua a ma tɛ si,

Nɛ nɔ fɛɛ nɔ nɛ a maa ye kɛ bua lɛ ɔ maa nɔ si;

Mɛ tsuo a hɛ mi ma kpata ngɛ be kake mi.

“Kaa bɔ nɛ jata, jata* nɛ ngɛ he wami huaa ke e nu lohwe ko,

Nɛ́ ke a tsɛ to hyɛli babauu kɛ ba kaa a ba fiee lɛ,

Nɛ́ a ngmlaa kpami ɔ

Aloo huhui nɛ a kpaa a wui e he gbeye ɔ,

Jã nɛ Yehowa tabohiatsɛ ɔ ma kple kɛ ba nɛ e ma ba hwu ta

Ngɛ Zion Yoku ɔ kɛ e kpongu ɔ nɔ.

 8 Nɛ Asiriano ɔ maa nɔ ngɛ klaate nya, pi adesa klaate;

Nɛ klaate nɛ pi adesa nɔ́ ma kpata e hɛ mi.

E maa tu klaate ɔ nya fo,

Nɛ a maa nyɛ e nihewi ɔmɛ a nɔ nɛ a ma tsu ní kpakpataa.

 9 Gbeye kɛkɛ ma ha nɛ e tɛsa a maa laa,

Nɛ okadi tso ɔ ma ha nɛ sawale maa nu e ma nikɔtɔma amɛ,”

Yehowa, nɔ nɛ e la a ngɛ Zion, nɛ e flɔɔnɔɔ ngɛ Yerusalem ɔ lɛ de.

32 Hyɛ! Matsɛ ko maa ye nɔ ngɛ dami mi,

Nɛ ganɔhi maa ye nɔ ngɛ dami sane yemi mi.

 2 Nɛ a ti nɔ fɛɛ nɔ maa pee kaa laami he ngɛ kɔɔhiɔ nya,

He nɛ a ma ya laa ngɛ* ngɛ hiɔmi kɛ e mi kɔɔhiɔ nya,

A maa pee kaa pahi ngɛ zugba kadokado nɔ,

Kaa tɛsa ngua sisi hɔ ngɛ zugba kplanaa nɔ.

 3 Kɛkɛ ɔ, nihi nɛ a hɛngmɛ hyɛɔ nɔ́ ɔ, a hɛngmɛ nɔ be kusuu pee hu,

Nɛ nihi nɛ a tue nuɔ nɔ́ ɔ, a tue maa nu nɔ́ saminya.

 4 Nihi nɛ a yeɔ oya kɛ peeɔ níhi ɔ, a tsui ma susu nile he,

Nɛ nihi nɛ a bubuɔ ɔ,* a lilɛ maa tu munyu luɛluɛɛluɛ, nɛ munyu ɔ mi ma tsɔ.

 5 Nɔ nɛ e be juɛmi ɔ, a be lɛ tsɛe ke nɔ nɛ haa nɔ nɔ́ hu,

Nɛ nɔ nɛ e kɛ mlaa tsu we ní ɔ, a be lɛ tsɛe ke nɔ nɛ e hɛ mi ngɛ nyami;

 6 Ejakaa nɔ nɛ be juɛmi ɔ maa tu kuasia munyu.

Nɛ e tsui maa to ga yayahi,

Konɛ e kɛ wo hemi kɛ yemi kuami mi he wami,* nɛ e tu munyu yaya kɛ si Yehowa,

Nɛ́ e kɛ ha nɛ nɔ nɛ hwɔ ngɛ lɛ yee ɔ* nɛ́ e ko na niye ní nɛ e ye,

Nɛ́ nɔ nɛ kuma ngɛ lɛ yee ɔ nɛ́ e ko na nɔ́ ko nɛ e nu.

 7 Nɔ nɛ e kɛ mlaa tsu we ní ɔ ga tsɔmi ɔmɛ hí;

E woɔ nihi he wami kaa a pee zo ní

Konɛ e ngɔ lakpa munyu kɛ puɛ nɔ nɛ e ngɛ nɔ́ nae ɔ,

Be mi nɛ ohiatsɛmɛ po tuɔ anɔkuale.

 8 Se nɔ nɛ haa nɔ nɔ́ ɔ, nɔ́ hami he lɛ e susuɔ,

Nɛ e yaa nɔ nɛ e* haa nɔ nɔ́.

10 Jeha kake kɛ ligbi bɔɔ komɛ a se ɔ, nyɛ nɛ nɔ́ ko pue we nyɛ tsui nɔ ɔ, nyɛ he maa do blibliibli,

Ejakaa ke wai yiblii kpami be ɔ ke e baa nyagbe ɔ, nyɛ be wai yiblii ko nya buae.

Nyɛ je nyɛ he nɔ́ fɛɛ nɔ́,

Nɛ nyɛɛ ngɔ kpekpe kɛ ha nyɛ mlɛmi.

12 Nyɛ gba nyɛ gugue mi ma, nɛ nyɛɛ ye kɔmɔ

Ngɛ ngmɔ kpakpa amɛ kɛ wai tso nɛ woɔ yiblii ɔ he je.

13 Ejakaa mio tsohi kɛ mio kpahi maa ha ye we bi ɔmɛ a zugba a nɔ;

A maa ha bua jɔmi we ɔmɛ tsuo a nɔ,

Ee, a maa ha ma nɛ a nyaa ngɛ mi ɔ nɔ.

14 Ejakaa a kua mɔ nɛ he wa a;

A kua ma nɛ e mi ngɛ hoo ɔ.

Ofel kɛ hwɔɔmi mɔ ɔ hɛ mi kpata butuu,

Nga mi tejihi ma fiɛ ngɛ lejɛ ɔ,

Nɛ tohi hu maa ye ní ngɛ lejɛ ɔ,

15 Kɛ yaa si be nɛ a ma plɛ mumi kɛ je hiɔwe kɛ pue wa nɔ,

Nɛ́ nga kplanaa ma plɛ pee abɔɔ,

Nɛ́ a maa bu abɔɔ ɔ kaa hue tso.

16 Kɛkɛ ɔ, dami sane yemi maa hi nga kplanaa a nɔ,

Nɛ dami maa hi abɔɔ ɔ mi.

17 Dami nitsɛnitsɛ maa ngɔ tue mi jɔmi kɛ ba,

Nɛ yiblii nɛ dami nitsɛnitsɛ maa wo ji tue mi jɔmi kɛ slɔkee si himi nɛ ngɛ daa.

18 Ye we bi ɔmɛ maa hi he nɛ tue mi jɔmi ngɛ,

He nɛ ngɛ slɔkee, kɛ he jɔɔmi he nɛ tue mi jɔmi ngɛ lejɛ ɔ.

19 Se gbiɛngongu ɔ ma kpata hue tso ɔ hɛ mi,

Nɛ a maa ku ma a tsuo ngɔ pue si butuu.

20 Nihi nɛ a duɔ wu ngɛ pahi a tue

Nɛ a ngmɛɛɔ nahi kɛ tejihi a he ɔ ngɛ bua jɔmi.”

33 Musu tloo mo, mo nɛ o kpataa mahi a hɛ mi, se moo lɛɛ a kpataa we o hɛ mi ɔ;

Mo nɛ o tsɔɔ nihi a se blɔ, se moo lɛɛ a tsɔɔ we o se blɔ ɔ!

Mo ba pee wa kɔni* daa mɔtu,

Ee, mo ba pee wa yi wami helɔ ngɛ haomi be mi.

 4 Kaa bɔ nɛ baalɛhi nɛ a puɛɔ ní wawɛɛ buaa a he nya a, jã nɛ a ma bua o ta yibu ní ɔ nya;

Nihi ma bu yuu kɛ ba nɔ kaa baalɛhi babauu.

 5 A ma wo Yehowa nɔ gojoo,

Ejakaa e ngɛ hiɔwe lokoo.

 6 Lɛ nɛ e ha nɛ nyɛ ngɛ slɔkee ngɛ nyɛ be ɔ mi.

Yi wami hemi, juɛmi, nile, kɛ Yehowa gbeye yemi babauu

—Enɛ ɔ ji e juetli.

 7 Hyɛ, a katsɛmɛ ɔmɛ ngɛ ya foe ngɛ gbɛjegbɛ ɔ nɔ;

Tsɔli nɛ a hɛɛ tue mi jɔmi sɛ gbi ɔ ngɛ ya foe wawɛɛ.

 8 A blɔ ngua amɛ a nɔ fɔɔ si gu;

Nɔ ko nɔ ko nyɛɛ we nane blɔ ɔmɛ a nɔ.

E* yi somi ɔ nɔ;

E kua ma amɛ;

E bui nɔmlɔ adesa fɛɛ.

Sharon ba pee kaa nga kplanaa,

Nɛ Bashan kɛ Karmel kplɔ a bahi ngɔ pue si.

10 Yehowa ke: “Amlɔ nɛ ɔ, ma te si,

Amlɔ nɛ ɔ, ma wo imi nitsɛ ye nɔ gojoo;

Amlɔ nɛ ɔ, ma wo imi nitsɛ ye hɛ mi nyami.

14 Yayami peeli nɛ a ngɛ Zion ɔ ngɛ gbeye yee;

Sawale nu hemi kɛ yemi kuali ɔmɛ:

15 Nɔ nɛ e yaa nɔ nɛ e nyɛɛɔ ngɛ dami mi,

Nɛ e tuɔ anɔkuale,

Nɔ nɛ e sume ojo fiami, kɛ níhi nɛ a gu sisimi blɔ nɔ kɛ ná,

Nɛ e nine kuaa nyɔ mi ní mohu pe nɛ e maa ngɔ,

Nɛ e tsiɔ e tue ke a ngɛ muɔ si puemi he munyu tue,

Nɛ e maa e hɛngmɛ konɛ e ko na nɔ́ yayami ɔ

16 —Lɛ nɛ e maa hi yoku ɔmɛ a yi mi ploplooplo;

Nɛ tɛsahi nɛ he nɛ a ngɛ ɔ yami yee ɔ maa pee e wesa he nɛ ngɛ slɔkee,

A ma ha lɛ niye ní,*

Nɛ e nyu be tae gblegbleegble.”

17 Nɛ o hɛngmɛ maa na matsɛ ko ngɛ e hɛ mi nyami mi;

A maa na zugba ko ngɛ tsitsaa lokoo.

19 O be ma nɛ bui nɔ ɔ nae hu,

Ma nɛ e he wa wawɛɛ kaa o maa nu a gbi sisi,*

Ma nɛ ke a ngɛ munyu tue ɔ, o be sisi nue, ejakaa e ngɛ kaa nɔ́ nɛ a ngɛ bubue ɔ.

O hɛngmɛ maa na Yerusalem, laami he nɛ́ tue mi jɔmi ngɛ ɔ,

Bo tsu nɛ a be jee ngɛ he nɛ e ngɛ ɔ.

A be bo tsu ɔ plɛɛko ɔmɛ hiae gblegbleegble,

Nɛ a be e kpa amɛ ekoeko mi tsɔe.

21 Se Yehowa nɛ ji Mawu kpetekpleenyɛ ɔ

Maa po wa he piɛ ngɛ lejɛ ɔ kaa bɔ nɛ pa loo pa ngua poɔ ma ko he piɛɔ,

He nɛ ta lɛhi babauu be nyɛe maa be ngɛ,

Nɛ mele nguahi be nyɛe ma be ngɛ lejɛ ɔ.

22 Ejakaa Yehowa ji wa Kojolɔ,

Yehowa ji wa Mlaa Wolɔ,

Yehowa ji wa Matsɛ;

Lɛ ji nɔ nɛ e ma he wa yi wami.

23 O kpa amɛ a mi maa jɔ;

A be nyɛe maa hɛɛ abalaa tso ɔmɛ, nɛ a be nyɛe ma bli abalaa amɛ a mi.

Jamɛ a be ɔ, a ma gba ta yibu ní babauu;

Glɔtsɛmɛ po maa muɔɔ babauu.

34 Nyɛ je mahi, nyɛɛ hɛ nyɛ kɛ ba nɛ nyɛ ba bu tue,

Nyɛ mahi, nyɛɛ bu tue.

Zugba a kɛ níhi nɛ ngɛ nɔ ɔ nɛ a bu tue,

Zugba a kɛ e nɔ níhi tsuo.

 2 Ejakaa Yehowa mi mi fu je ma amɛ tsuo,

Nɛ e mi mi fu a tabo ɔ tsuo.

E ma kpata a hɛ mi;

E ma ha nɛ a gbe mɛ.

 3 A ma sake nihi nɛ a gbe ɔ ngɔ pue he,

Nɛ a gbogboe ɔmɛ maa je fu kanikani;*

A muɔ ɔ ma ha nɛ yoku ɔmɛ maa sile.*

 4 Hiɔwe tabo ɔ tsuo maa sa,

Nɛ a ma koklo hiɔwe ɔ kaa womi kpo.

A tabo ɔ ma gbɔjɔ nɛ a maa nɔ si

Kaa bɔ nɛ wai ba nɛ gbli tsɔɔ kɛ fɔɔ si

Nɛ́ fig nɛ mia tsɔɔ kɛ jeɔ fig tso nɔ ɔ.

E ma kple kɛ ba kojo Edom,

Nihi nɛ i ma nya si kaa ma kpata a hɛ mi ɔ.

E he maa pee kɛ zɔ

Kɛ agbosu wawi kɛ apletsi wawi a muɔ,

E he maa pee kɛ agbosuhi a setsomingmɛ he zɔ.

Ejakaa Yehowa ngɛ afɔle ko nɛ e maa sã ngɛ Bozra,

E maa gbe nihi babauu ngɛ Edom zugba a nɔ.

 7 Nga mi na kuhi ma gbo kɛ piɛɛ a he,

Na ku wawi kɛ ní nɛmɛ nɛ a he wa tsuo ma gbo.

A zugba a maa pɔ kɛ muɔ,

Nɛ bunyuku nɛ ngɛ a zugba a nɔ ɔ maa pɔ tsɔtsɔɔtsɔ kɛ zɔ.”

 8 Ejakaa Yehowa ngɛ ligbi nɛ e kɛ maa ye lue,

Jeha nɛ e maa gbla nihi nɛ a pee yayami kɛ si Zion ɔ tue.

 9 E* pa amɛ ma plɛ pee amã,

Nɛ bunyuku nɛ ngɛ e zugba a nɔ ɔ maa plɛ pee sɔlfa,

Nɛ e zugba a ma ba pee kaa amã nɛ ngɛ tsoe.

10 Nyɔ kɛ pia tsuo ɔ, a be gbee;

E lasuku ɔ maa ya nɔ maa kuɔ kɛ ya hiɔwe daa.

E hɛ mi ma kpata yi nɔhi tsuo;

Nɔ ko be bee ngɛ e mi kɛ maa ya neneene.

11 Dɔkɔdɔkɔ nyagagatsɛ kɛ kɔtɔkɔ* maa hi lejɛ ɔ,

Nɛ klomi tuegagatsɛ kɛ kuakualabite maa hi e mi.

Mawu maa ngɔ nɔ́ susumi kpa kɛ kpa nɛ sumui ngɛ nya* kɛ susu zugba a,

Konɛ e kɛ tsɔɔ kaa zugba a maa fɔ si gu nɛ se nami ko be he bae.

12 A be e we odehe ɔmɛ ekoeko matsɛ woe,

Nɛ e ma nikɔtɔma amɛ maa laa pɛsɛpɛsɛ.

13 Miohi maa puɛ ngɛ e mɔhi nɛ a he wa amɛ a mi,

Tɔgɛtɔgɛhi kɛ huhi nɛ miohi ngɛ a he maa puɛ ngɛ e gbogbohi nɛ a he wa amɛ a nɔ.

E ma plɛ pee nga mi gbehi a hwɔ he

Kɛ dugumahi a hi he.

14 Nga kplanaa nɔ lohwehi kɛ lohwehi nɛ a pɛɛ kaa gbehi ma bua a he nya ngɛ lejɛ ɔ,

Nɛ nga mi apletsihi* ma tsɛ a sibi ngɛ lejɛ ɔ.

15 Lejɛ ɔ lɛ sinɔ nɛ e he sɔɔ maa pee e tsu nɛ e maa ngmɛ hlui ngɛ,

E ma pɛ bimɛ, nɛ e ma bua a nya kɛ wo e mi si.

A kpɛti kake po be laae;

A ti nɔ fɛɛ nɔ ma ná e he piɛɛlɔ,

Ejakaa Yehowa nya lɛ fami nɛ ɔ je,

Nɛ e mumi ɔ lɛ bua mɛ tsuo a nya.

17 Lɛ ji nɔ nɛ e fɔ sɔ ɔ kɛ ha mɛ,

Nɛ e ngɔ lɛ nitsɛ e nine kɛ susu he nɛ e kɛ ha mɛ ɔ.*

A maa hi lejɛ ɔ kɛ ya neneene;

A maa hi lejɛ ɔ yi nɔhi tsuo.

35 Nga zugba kpataa kɛ zugba nɛ e gbli kadokado ma nya,

Nɛ nga kplanaa ma ná bua jɔmi nɛ e maa wo mɔmɔhi kaa safron.

 2 Nga kplanaa a maa wo mɔmɔ kokooko;

E ma nya nɛ e ma la kɛ bua jɔmi.

A maa ngɔ Lebanon hɛ mi nyami ɔ,

Kɛ Karmel kɛ Sharon a he fɛu ɔ kɛ ha lɛ.

 3 Nyɛɛ wo ninehi nɛ a gbɔjɔ ɔ mi he wami;

Nɛ nyɛ ha nɛ nakutsohi nɛ a ngɛ mimiɛe ɔ a mi nɛ wa.

Hyɛ! nyɛ Mawu ɔ ma ba ye lue,

Mawu ma ba wo nyɛ he nyɛli ɔmɛ hiɔ.

 5 Jamɛ a be ɔ mi ɔ, hɛ yuyuili a hɛngmɛ ma bli,

Nɛ tuekpokutsɛmɛ a tue maa nu nɔ́.

 6 Jamɛ a be ɔ mi ɔ, glɔtsɛmɛ maa tuu kaa afugbɛ,

Nɛ amuɛtihi a lilɛ ma la kɛ bua jɔmi.

Ejakaa nyu maa hia ngɛ nga nɔ,

Nɛ pahi maa be ngɛ nga kplanaa nɔ.

 7 Zugba nɛ e nɔ gbli ma plɛ pee taku kɛ e mi glãhi,

Nɛ nyu ma tsɛ̃ ngɛ zugba kadokado nɔ.

Nga mumu kɛ glã kɛ ngɔwu maa puɛ

Ngɛ he nɛ nga mi gbehi buɔ si ngɛ.

 8 A maa je blɔ ngua ko ngɛ lejɛ ɔ,

Ee, a ma tsɛ blɔ ɔ ke Blɔ Klɔuklɔu.

A si kɛ ha nihi nɛ e sa kaa a nyɛɛ nɔ ɔ;

Kuasia ko kuasia ko be blɔ tlae kɛ ba blɔ nɛ ɔ nɔ.

 9 Jata ko be lejɛ ɔ hie,

Nɛ lohwe awi yelɔ ko be nɔ bae.

A be mɛ nae ngɛ lejɛ ɔ;

Nihi nɛ a kpɔ̃ mɛ ɔ pɛ lɛ a maa nyɛɛ ngɛ lejɛ ɔ.

A ma nya, nɛ a bua maa jɔ wawɛɛ,

Nɛ aywilɛho yemi kɛ kɔmɔ yemi se maa po.

Mɛnɔ nɔ lɛ o wo o gbi nɔ ngɛ,

Nɛ o pã o hɛ mi kɛ wo ɔ?

24 O gu o sɔmɔli ɔmɛ a nɔ kɛ bɔ Yehowa ahlua, nɛ o de ke,

‘Ma ngɔ ye ta zugba lɛhi babauu ɔ,

Nɛ ma kuɔ kɛ ya yokuhi a yi mi,

Ma ya Lebanon hehi nɛ kɛ pe kulaa a.

25 Ma tsua vuhi, nɛ ma nu nyu;

I kɛ ye nane si ma ha nɛ Egipt pa amɛ* maa mii.’

27 Ma amɛ a mi bi ɔmɛ a he wami maa ta;

A maa ye gbeye, nɛ zo maa gbe mɛ.

A maa pee kaa zugba nɔ hu, kɛ nga mumu,

A maa pee kaa tsu yi mi nga nɛ puje he kɔɔhiɔ ha nɛ e gbli.

28 Se i le o si himi, kɛ o yami kɛ o bami,

Kɛ be nɛ o ná ye he abofu,

29 Ejakaa i nu ye he abofu nɛ o ná kɛ bɔ nɛ o ngɛ huãe ha a.

Lɔ ɔ he ɔ, ma ngɔ ye gbowe ɔ kɛ wo o gugwɔ mi, nɛ ma wo o nya mi kpã,

Nɛ ma kpale mo kɛ gu blɔ nɛ o gu nɔ kɛ ba a nɔ.”

“E be ma nɛ ɔ mi sɛe

Nɛ e be kɛ̃ɛ̃ mi bi ko tsɛ̃e kɛ ya lejɛ ɔ

Nɛ e kɛ tsɛ̃i ko ba be lɛ tuae

Nɛ e be ta hwumi kpoku* ko fiae kɛ wo he.

34 Blɔ nɛ e gu nɔ kɛ ba a, lɔ ɔ nɔ e maa gu kɛ kpale kɛ ho;

E be ma nɛ ɔ mi sɛe,” Yehowa lɛ de.

35 “Ma fã ma nɛ ɔ he, nɛ ma he e yi wami ngɛ imi nitsɛ ye he je,

Kɛ ye sɔmɔlɔ David hu he je.”’”

10 I de ke: “Ma gu Yɔkɔ* agbo ɔmɛ a mi

Ngɛ ye nihe mi.

I be adesa nae hu

Ke i ya piɛɛ nihi nɛ a ngɛ he nɛ nɔ́ ko nɔ́ ko yɛ nɔ ngɛ ɔ a he ɔ.

12 A hia ye hi he ɔ, nɛ a je kɛ je ye he kɛ ho

Kaa to hyɛlɔ bo tsu.

I koklo ye wami kaa bɔ nɛ bo lolɔ kokloɔ bo ɔ;

E po mi ngɔ fɔ he kaa bɔ nɛ a poɔ bo nɛ a lo ta nya kpa ngɛ tso he ɔ.

E yaa nɔ nɛ e kuɔ ye wuhi tsuo a mi kaa jata

Benɛ je ngɛ jɔe nɛ je ngɛ nae ɔ, o ha nɛ i ngɛ nyagbe bae.

14 I ngɛ ya foe kaa nga nɔ odangmɔdangmɔ loo adlɔba;

I ngɛ kɛmɛe kaa beleku lahuɛ.

‘Oo Yehowa, i ngɛ haoe wawɛɛ;

Moo ye bua mi!’*

I kɛ he si bami maa nyɛɛ* ye jeha amɛ tsuo

Ngɛ haomi nɛ i ngɛ haoe* wawɛɛ ɔ he je.

16 Oo Yehowa, ní nɛ ɔmɛ* lɛ haa nɛ adesa fɛɛ adesa hiɔ wami mi,

Nɛ a mi lɛ ye mumi ɔ náa wami ngɛ.

17 Hyɛ! Ngɛ tue mi jɔmi nane mi ɔ, i* ye aywilɛho wawɛɛ;

Se o mɛtɛ ye he,

O je mi kɛ je hɛ mi kpatami muɔ ɔ mi.

18 Ejakaa Yɔkɔ* be nyɛe maa wo o hɛ mi nyami,

Gbenɔ be nyɛe ma je o yi.

19 Nihi nɛ a ngɛ wami mi, nihi nɛ a ngɛ wami mi ɔ pɛ lɛ a ma nyɛ ma je o yi,

Kaa bɔ nɛ ma nyɛ ma pee mwɔnɛ ɔ.

20 Oo Yehowa, mo he ye yi wami,

Nɛ waa kɛ kpa sakuhi maa fia ye la amɛ

Ngɛ Yehowa we ɔ wa wami ligbi ɔmɛ tsuo.’”

 2 “Nyɛɛ tu munyu nɛ e ta Yerusalem tsui he,*

Nɛ nyɛ de lɛ ke, e nyɔguɛ ní tsumi ɔ ba nyagbe,

Nyɛ de lɛ ke, a wo e tɔmi ɔ he hiɔ.

 4 Nyɛ wo dɔgba fɛɛ dɔgba nɔ,

Nɛ́ nyɛɛ ba yoku fɛɛ yoku kɛ yoku wayo fɛɛ yoku wayo si.

Zugba nɛ e nɔ ngɛ tsakatsaka a, nyɛ ha nɛ e nɔ nɛ da.

Nɛ zugba nɛ e nɔ ngɛ googagooga a, nyɛ ha nɛ e nɔ nɛ sɔ.

 5 Yehowa hɛ mi nyami ɔ maa je kpo,

Nɛ he lohi* tsuo maa na,

Ejakaa Yehowa nya lɛ de.”

 7 Nga mumu gbliɔ,

Nɛ mɔmɔ nglaa,

Ejakaa Yehowa woɔ mumi ngɔ* pueɔ a nɔ.

 8 Nga mumu gbliɔ,

Nɛ mɔmɔ nglaa,

Se wa Mawu ɔ munyu ɔ ngɛ kɛ yaa neneene.”

 9 Kuɔɔ kɛ ya yoku nɛ ya hiɔwe nɔ,

Mo yo nɛ o ngɔ sane kpakpa kɛ ma Zion.

Wo o gbi nɔ wawɛɛ,

Mo yo nɛ o ngɔ sane kpakpa kɛ ma Yerusalem.

10 Hyɛ! Nyɔmtsɛ Matsɛ Yehowa maa ba kɛ he wami,

Nɛ e kɛ e kɔni maa ye nɔ.

Hyɛ! Hiɔwo ɔ ngɛ e dɛ,

Nɛ hiɔwo ɔ ngɛ e hɛ mi.

E kɛ e nine ma bua to bi ɔmɛ a nya,

Nɛ e ma wo mɛ ngɛ e gugue mi.

12 Mɛnɔ lɛ e susu wo ɔ mi nyu ɔ tsuo ngɛ e dɛ kɔkɔ mi,

Nɛ e kɛ e nine mi blimi* susu hiɔwe hyɛ?

Mɛnɔ lɛ e bua je ɔ mi tabo zu ɔ nya kɛ wo susumi nɔ́ mi,

Aloo e ngmɛ yoku ɔmɛ

Kɛ yoku wawi ɔmɛ ngɛ sɛni nɔ?

13 Mɛnɔ lɛ e susu Yehowa mumi ɔ hyɛ?*

Nɛ mɛnɔ ma nyɛ maa pee e ga wolɔ nɛ́ e tsɔɔ lɛ ní?

14 Mɛnɔ ngɔ lɛ e yaa konɛ e nu nɔ́ sisi,

Loo mɛnɔ tsɔɔ lɛ dami sane yemi blɔ,

Loo e tsɔɔ lɛ nile,

Nɛ mɛnɔ tsɔɔ lɛ anɔkuale nɔ́ sisi numi?

15 Hyɛ! Je ma amɛ ngɛ kaa nyu kɔyi kake nɛ dɛ kɛ je goga mi,

Nɛ e buɔ mɛ kaa bunyuku ngɛ sɛni nɔ.

16 Lebanon tsuo po be nyɛe ma ha nɛ la nɛ ya nɔ nɛ e tso,*

Nɛ e nga mi lohwe ɔmɛ a he pi kɛ ha afɔle sami.

17 Je ma amɛ tsuo ngɛ kaa nɔ́ ko nɛ be si himi mi ngɛ e hɛ mi;

E buɔ mɛ kaa nɔ́ nɛ pi nɔ́ ko kulaa ji mɛ, kaa nɔ́ ko nɛ se nami be he.

19 Ga ní tsulɔ ngɔɔ dade kɛ peeɔ amaga,*

Dade he ní tsulɔ ngɔɔ sika tsu kɛ kpaa he,

Nɛ e ngɔɔ sika hiɔ kɛ peeɔ kɔsɔkɔsɔ ngɔ woɔ he.

20 E hlaa tso nɛ e kɛ ma ha kaa afɔle,

Tso nɛ be sae.

E hlaa ga ní tsulɔ nɛ he be

Konɛ e pee amaga nɛ be si nɔe.

22 Nɔ ko ngɛ nɛ e hi he ngɛ zugba lokotoo ɔ yi nɔ,

Nɛ nihi nɛ a ngɛ nɔ ɔ ngɛ kaa tukpɛtukpɛhi.

E ngɛ hiɔwe ɔ mi blie kaa bo nɛ mi ti we,

Nɛ e bliɔ mi kaa bo tsu nɛ a maa hi mi.

23 E baa ma nikɔtɔmahi si kulaa,

Nɛ e haa zugba a nɔ kojoli* ba peeɔ nɔ́ ko nɛ se nami be he.

24 A ngɛ kaa tso nɛ a du kɛ we,

Ke a du mɛ nɔuu ɔ,

A sipoku sɛ we zu mi kpakpa ko,

Nɛ kɔɔhiɔ fiaa mɛ kɛ pueɔ si nɛ a gbliɔ,

Nɛ kɔɔhiɔ ɔ muɔɔ mɛ kɛ yaa kaa nga.*

Lɛ ji nɔ nɛ e jeɔ mɛ kpo kaa tabo ngɛ a yibɔ nya;

E kɛ mɛ tsuo a biɛ tsɛɔ mɛ.

Ngɛ e he wami ngua a, kɛ e nyɛmi kpetekpleenyɛ ɔ nya a,

Kake ngmelu po laa we.

27 Oo Yakob, mɛni he je nɛ o tu munyu; Oo Israel, mɛni he je nɛ o de ke,

‘Ye blɔ ɔ laa Yehowa

Nɛ Mawu yi dami sane ha mi’ ɔ?

29 E haa nɔ nɛ pɔ tɔ lɛ he wami,

Nɛ e haa nihi nɛ a gbɔjɔ ɔ* he wami ehe.

30 Pɔ maa tɔ nyumuwi nɛ a ma gbɔjɔ,

Nɛ nihewi ma tɛ si nɛ a maa nɔ si,

31 Se nihi nɛ a ngɔɔ a hɛ kɛ fɔɔ Yehowa nɔ ɔ ma ná he wami ekohu.

A maa tu fo se a he wami nɔ be gbɔe;

A maa nyɛɛ se pɔ be a he tɔe.”

41 “Nyɛɛ pee dii* nɛ nyɛɛ bu mi tue, nyɛ zugba kpɔhi nɛ nyu bɔle nyɛ;

Je ma amɛ nɛ a ná he wami ekohu.

 2 Mɛnɔ lɛ e wo nɔ ko nɔ kɛ je puje he kɛ ba,

Mɛnɔ lɛ e kɛ dami tsɛ lɛ kɛ ba e nane nya,*

Konɛ e ngɔ je ma amɛ kɛ wo e dɛ,

Nɛ́ e ngɔ matsɛmɛ kɛ wo e sisi?

Mɛnɔ lɛ haa nɛ a plɛɔ peeɔ tabo zu ngɛ e klaate nya,

Kaa nga nɛ kɔɔhiɔ muɔɔ kɛ yaa ngɛ e kɛ̃ɛ̃ nya a?

 3 E fieɔ a se, nɛ nɔ́ ko tsi we lɛ blɔ

Ngɛ blɔ nɛ e nane nyɛɛ we nɔ hyɛ ɔ nɔ.

 4 Mɛnɔ lɛ e tsu nɔ́ nɛ ɔ? Mɛnɔ lɛ e pee nɔ́ nɛ ɔ?

Mɛnɔ lɛ e bua yi nɔhi a nya kɛ je sisije?

Imi, Yehowa, imi ji kekleekle nɔ;

Nɛ nyagbe yi nɔhi a mi hu i tsakee we.”

 6 Nɔ fɛɛ nɔ yeɔ kɛ buaa e sibi,

Nɛ e deɔ e nyɛmi ke: “Wlua mo.”

 7 Lɔ ɔ he ɔ, ga ní tsulɔ woɔ dade he ní tsulɔ he wami;

Nɔ nɛ e kɛ hamle fiaa dade nɔ nɛ e peeɔ pɛtɛpɛtɛ ɔ

Woɔ nɔ nɛ e kɛ hamle ngɛ sɔ̃ tɛ nɔ fiaae ɔ he wami.

 8 Se mo Israel, mo ji ye sɔmɔlɔ,

Oo Yakob, mo ji nɔ nɛ i hla,

Ye huɛ Abraham nina,*

 9 I ngɔ mo kɛ je zugba a nyagbe he ɔmɛ,

Nɛ mo lɛ i ngɔ mo kɛ je zugba a nɔ hehi nɛ kɛ ɔ.

I de mo ke, ‘Mo ji ye sɔmɔlɔ;

I hla mo; i kua we mo.

Ma wo mo he wami, ee, ma ye bua mo,

I kɛ ye dami hiɔ nine ɔ maa pɛtɛ o he wawɛɛ.’

12 O ma hla nyumuhi nɛ a kɛ mo ná a, se o be mɛ nae;

Nyumuhi nɛ a kɛ mo ngɛ hwue ɔ maa pee kaa nɔ́ ko nɛ be si himi mi, kaa nɔ́ nɛ pi nɔ́ ko kulaa ji mɛ.

13 Ejakaa imi Yehowa o Mawu ɔ, i ngɛ o hiɔ nine he pɛtɛe,

Imi lɛ i ngɛ mo dee ke, ‘Koo ye gbeye. Ma ye bua mo.’

14 Koo ye gbeye, mo Yakob nɛ o ngɛ kaa pɔpɔli,*

Nyɛ Israel nyumuhi, ma ye bua nyɛ,” Yehowa nyɛ Kpɔlɔ ɔ, Israel Nɔ Klɔuklɔu ɔ lɛ de.

15 “Hyɛ! I pee mo ngma fiaami tso,*

Ngma fiaami nɔ́ ehe kɛ e nya enyɔ.

O maa naa yoku ɔmɛ a nɔ, nɛ a maa ywia wɔtsɔwɔtsɔ

Nɛ o ma ha nɛ yoku wawi ɔmɛ maa pee kaa tsakati.*

16 O maa sa mi,

Nɛ kɔɔhiɔ maa muɔɔ mɛ kɛ ho;

Kɔɔhiɔ nɛ nya wa maa gbɛ mɛ ngɔ fia.

O bua maa jɔ ngɛ Yehowa mi,

Nɛ o maa fĩa ngɛ Israel Nɔ Klɔuklɔu ɔ mi.”

18 Ma ha nɛ pahi maa be ngɛ yoku wawi nɛ a nɔ ngɛ kpataa nɔ,

Nɛ nyu hɛngmɛhi maa be ngɛ dɔgbahi a mi.

Ma ha nɛ nga kplanaa nɔ ma plɛ pee taku kɛ e mi glãhi

Nɛ zugba nɛ nyu be nɔ ɔ ma plɛ pee he nɛ nyu hɛngmɛhi ngɛ.

19 Ma du seda tso

Kɛ akasia tso kɛ mɔmɔ tso kɛ nu tso ngɛ nga kplanaa nɔ.

Ma du junipa tso

Kɛ lazu tso kɛ sipro tso ngɛ nga kplanaa nɔ,

20 Bɔ nɛ pee nɛ nihi tsuo nɛ a na, nɛ a nu

Nɛ a bu tue, nɛ a nu sisi

Kaa Yehowa nine lɛ pee nɔ́ nɛ ɔ,

Nɛ Israel Nɔ Klɔuklɔu ɔ lɛ bɔ.”

Nyɛ de wɔ níhi nɛ ya nɔ blema,*

Konɛ wa susu he* nɛ waa le nɔ́ nɛ maa je mi kɛ ba.

23 Nyɛ de wɔ níhi nɛ maa ya nɔ hwɔɔ se,

Konɛ waa le kaa mawuhi ji nyɛ.

Ee, nyɛɛ pee nɔ́ ko, nɔ́ kpakpa jio, nɔ́ yaya jio,

Konɛ ke wa na a, e pee wɔ nyakpɛ.

24 Hyɛ! Nyɛ ji nɔ́ ko nɛ be si himi mi,

Nɛ níhi nɛ nyɛ bɔ mɔde kɛ pee ɔ hu se nami be a he.

25 I wo nɔ ko nɔ kɛ je yiti je, nɛ e maa ba,

Nɔ ko nɛ́ e maa je puje he nɛ e ma tsɛ ye biɛ ɔ.

E maa naa nɔ yeli* a nɔ kaa zu,

Kaa bɔ nɛ buɛ puɛlɔ naa zu tsuãa nɔ ɔ.

26 Mɛnɔ lɛ e tu nɔ́ nɛ ɔ he munyu kɛ je sisije, bɔ nɛ pee nɛ waa le,

Aloo kɛ je blema lokoo, konɛ wa nyɛ nɛ wa de ke, ‘E munyu da’?

28 Se i ya nɔ nɛ i hyɛ, se i nɛ́ nɔ ko;

Nɔ kake po be a kpɛti nɛ e maa wo ga.

I ngɔ ye mumi ɔ kɛ wo e mi;

E ma ha nɛ je ma amɛ maa na nɔ́ nɛ dami sane yemi ji.

 2 E be ngmlaa kpae, nɛ e be e gbi nɔ woe,

Nɛ e be hae nɛ a nu e gbi ngɛ gbɛjegbɛ ɔ nɔ.

 3 Glã nɛ e mi dɔ ɔ, e be mi kue,

Nɛ kane mi tako nɛ e ngɛ tsoe sulii ɔ, e be gbee.

 4 E be gbɔjɔe, nɛ e kɔni mi be jɔe kɛ yaa si be nɛ e kɛ dami sane yemi maa ba zugba a nɔ;

Zugba kpɔhi nɛ nyu bɔle mɛ ɔ ngɛ e mlaa a* mlɛe.

 5 Nɔ́ nɛ Yehowa, anɔkuale Mawu ɔ,

Nɔ nɛ e bɔ hiɔwe ɔ, nɛ e bli mi ɔ,

Nɔ nɛ e bli zugba a kɛ níhi nɛ ngɛ nɔ ɔ mi,

Nɔ nɛ e ha nɛ nihi nɛ a ngɛ nɔ ɔ woɔ mumi

Nɛ e ha nihi nɛ a nyɛɛɔ ngɛ nɔ ɔ mumi ɔ ngɛ dee ji nɛ ɔ nɛ:

 6 “Imi Yehowa lɛ i tsɛ mo ngɛ dami mi;

I pɛtɛ o nine he wawɛɛ.

Ma po o he piɛ, nɛ o ma ba pee kaa somi ngɛ i kɛ je ma amɛ a kpɛti

Nɛ i kɛ mo maa pee la kɛ ha je ma amɛ,

 7 Konɛ o bli hɛ yuyuili a hɛngmɛ,

Nɛ o je nihi nɛ a wo mɛ tsu ɔ kɛ je tsu womi mi

Nɛ o je nihi nɛ a ngɛ diblii mi ɔ kɛ je tsu womi he.

 8 Imi ji Yehowa. Jã ji ye biɛ;

I kɛ ye hɛ mi nyami ɔ be nɔ ko hae,*

Nɛ i kɛ ye yi jemi ɔ be amaga ko hae.

 9 Hyɛ, kekle ní ɔmɛ ba mi;

Amlɔ nɛ ɔ, i ngɛ ní kpahi dee.

10 Nyɛ la la ehe ha Yehowa,

Nyɛ la yi jemi la kɛ je zugba a nyagbe he ɔmɛ,

Nyɛ nihi nɛ nyɛ nyɛɛɔ wo ɔ nɔ kɛ níhi tsuo nɛ hyi e mi tɔ ɔ,

Nyɛ zugbahi nɛ nyu bɔle nyɛ kɛ nihi nɛ a ngɛ a nɔ ɔ.

11 Nyɛ ha nɛ nga kplanaa a kɛ mahi nɛ a ngɛ nɔ ɔ nɛ a wo a gbi nɔ,

Kɔpehi nɛ ngɛ he nɛ Kedar ngɛ ɔ.

Nihi nɛ a ngɛ tɛsa mi ɔ nɛ́ a he ose kɛ bua jɔmi;

Nɛ a kpa ngmlaa kɛ je yoku ɔmɛ a yi mi.

12 Nyɛ ha nɛ a wo Yehowa hɛ mi nyami

Nɛ a je e yi ngɛ zugbahi nɛ nyu bɔle mɛ ɔ a nɔ.

E ma kpa ngmlaa, ee, e ma kpa ta ngmlaa;

E maa tsɔɔ kaa e ngɛ he wami pe e he nyɛli ɔmɛ.

Ma kɛmɛ, nɛ ma nyɛɛ kɛ ya kɛ ba, nɛ ma wo mumi mlamlaamla ngɛ be kake mi

Kaa yo nɛ e nu kɔɔmi.

15 Ma kpata yokuhi kɛ yoku wawi a hɛ mi

Nɛ ma ha nɛ a nɔ niba níhi ma ngla.

Ma ha nɛ pa amɛ ma plɛ pee zugbahi nɛ nyu bɔle mɛ*

Nɛ ma ha nɛ takuhi nɛ glã puɛ ngɛ a mi ɔ maa si.

16 Ma nyɛɛ hɛ yuyuili a hɛ mi kɛ gu blɔ nɛ a li nɔ ɔ nɔ

Nɛ ma ha nɛ a gu blɔhi nɛ a gui nɔ hyɛ ɔ nɔ.

Ma ha nɛ diblii nɛ ngɛ a hɛ mi ɔ ma plɛ pee la

Nɛ ma ha nɛ zugba nɛ e nɔ ngɛ googagooga a nɔ maa da.

17 Nihi nɛ a ngɔ a hɛ kɛ fɔ amagahi nɛ a hlɔ nɔ,

Nihi nɛ a ngɔ a hɛ kɛ fɔ dade amagahi a nɔ nɛ a deɔ ke: “Nyɛ ji wa mawuhi” ɔ

Maa kpale a se, nɛ zo maa gbe mɛ kpɔtɔɔ.

18 Nyɛ tue kpokutsɛmɛ, nyɛɛ bu tue;

Nyɛ hɛ yuyuili, nyɛɛ hyɛ, nɛ́ nyɛɛ na.

19 Mɛnɔ lɛ e hɛngmɛ yu pe ye sɔmɔlɔ ɔ,

Nɛ e tue tsi kaa nɔ nɛ i tsɔ ɔ?

Mɛnɔ lɛ e hɛngmɛ yu pe nɔ nɛ a wo lɛ hiɔ ɔ,

Nɛ e hɛngmɛ yu pe Yehowa sɔmɔlɔ ɔ?

21 Yehowa dami ɔ he je ɔ,

E suɔ kaa e ma ha nɛ a na bɔ nɛ e mlaa a* nɔ kuɔ, nɛ e hɛ mi ngɛ nyami ha.

22 Se nimli nɛ ɔmɛ ji nihi nɛ a ha a ní, nɛ a muɔɔ a níhi kɛ ho;

A sa mɛ tsuo a yi kɛ wo muɔhi a mi nɛ a kɛ mɛ laa ngɛ tsu womi he ɔmɛ.

A muɔɔ mɛ kɛ ho nɛ nɔ ko be nɛ e ma kpɔ̃ mɛ,

A kɛ mɛ ho nɛ nɔ ko be nɛ e ma de ke: “Kpale mɛ kɛ ba!”

24 Mɛnɔ lɛ e ngɔ Yakob kɛ ha kaa a muɔɔ e níhi

Nɛ e ngɔ Israel kɛ wo ní hali a dɛ mi ɔ?

A kua ke a be e blɔ ɔmɛ a nɔ nyɛɛe,

Nɛ a be e mlaa a* nɔ yee.

25 Lɔ ɔ he ɔ, e ya nɔ nɛ e plɛ e we abofu ɔ,

Kɛ e mi mi fumi ɔ ngɔ pue e nɔ, nɛ e ha nɛ ta nɛ nya wa ba e nɔ.

43 Amlɔ nɛ ɔ, nɔ́ nɛ Yehowa,

Nɔ nɛ e bɔ mo Yakob, nɔ nɛ e puɛ mo Israel ɔ ngɛ dee ji nɛ ɔ nɛ:

 2 Ke o ngɛ nyu mi nyɛɛe ɔ, ma piɛɛ o he,

Nɛ ke o ngɛ pa mi nyɛɛe ɔ, e be o yi laae.

Ke o ngɛ la mi nyɛɛe ɔ, o be sãe,

Nɛ la lilɛ ɔ hu be mo sãe.

 3 Ejakaa imi ji Yehowa o Mawu ɔ nɛ,

Israel Nɔ Klɔuklɔu ɔ, o Yi Wami Helɔ ɔ.

I ngɔ Egipt kɛ ha kaa kpɔmi nɔ́ ngɛ o he,

I ngɔ Etiopia kɛ Seba kɛ ha kɛ kpɔ̃ mo.

 4 Ejakaa o he jua wa ngɛ ye hɛ mi,

I wo o hɛ mi nyami, nɛ i suɔ mo.

Lɔ ɔ he ɔ, ma ngɔ nihi kɛ ha ngɛ o nane mi

Nɛ ma ngɔ je mahi kɛ ha konɛ ma kɛ he o* yi wami.

Ma ngɔ o nina* kɛ je puje he kɛ ba

Nɛ ma bua nyɛ tsuo nyɛ nya kɛ je pusinɔ he.

Ngɔɔ ye binyumu ɔmɛ kɛ je tsitsaa lokoo kɛ ba, nɛ o ngɔ ye biyi ɔmɛ kɛ je zugba a nyagbe he ɔmɛ kɛ ba,

 7 Nɔ fɛɛ nɔ nɛ a ngɔɔ ye biɛ kɛ tsɛɔ lɛ

Kɛ nɔ fɛɛ nɔ nɛ i bɔ lɛ kɛ wo ye hɛ mi nyami ɔ,

Nɔ nɛ i puɛ lɛ, nɛ i pee lɛ ɔ.’

 8 Ngɔɔ nihi nɛ a ngɛ hɛngmɛ se a hyɛ we nɔ́,

Kɛ nihi nɛ a ngɛ tue se a tue nui nɔ́ ɔ kɛ ba.

 9 Je ma amɛ tsuo nɛ́ a bua a he nya ngɛ he kake,

Nɛ ma amɛ nɛ a bua a he nya.

Á ngɔ a we odase yeli kɛ ba konɛ a kɛ ba tsɔɔ kaa a nɔ́ da,

Aloo nihi nɛ́ a nu nɛ a de ke, ‘E ji anɔkuale!’”

10 Yehowa ke, “Nyɛ ji ye we odasehi,

Ee, ye sɔmɔlɔ nɛ i hla,

Konɛ nyɛɛ le, nɛ nyɛ he mi nɛ nyɛɛ ye

Nɛ nyɛɛ nu sisi kaa i tsakee we.

A buɛ Mawu ko kɛ sɛ we ye hlami,

Nɛ ye se hu, eko be.

12 “Imi lɛ i de to, imi lɛ i kpɔ̃ nyɛ, nɛ i ha nɛ a le

Be mi nɛ ma se mawu ko be nyɛ kpɛti.

13 Jehanɛ se hu ɔ, i tsakee we;

Nɛ nɔ ko be nyɛe ma gblɔ nɔ́ ko kɛ je ye dɛ mi.

“Nyɛ he je ɔ, ma tsɔ kɛ ya Babilon nɛ a ma ya ku agbo se lami dade ɔmɛ tsuo kɛ pue si,

Nɛ Kaldeabi ɔmɛ ma fo ya boboobo ngɛ a mele ɔmɛ a mi.

16 Nɔ́ nɛ Yehowa,

Nɔ nɛ e gba blɔ kɛ gu wo ɔ mi

Nɛ́ e gba blɔ kɛ gu nyu nɛ pee hamahama a mi,

17 Nɛ́ e jeɔ ta zugba lɛhi kɛ okpɔngɔhi kpo,

Nɛ́ e jeɔ tabo kɛ tatsɛmɛ nɛ a he wa tsuo kpo ɔ ngɛ dee ji nɛ ɔ nɛ:

18 “Nyɛ ko kai blema ní ɔmɛ,

Nɛ nyɛ ko hi blema ní ɔmɛ a he susue.

19 Hyɛ! I ngɛ nɔ́ ehe ko pee;

Amlɔ nɛ ɔ po e ngɛ kpo jee.

Ma ha nɛ blɔ maa fɔ si ngɛ nga a nɔ

Nɛ pahi maa be ngɛ nga kplanaa a nɔ.

20 Nga mi lohwehi maa wo ye hɛ mi nyami,

Nga mi gbehi kɛ dugumahi maa wo ye hɛ mi nyami,

Ejakaa ma ha nɛ nyu maa ba nga a nɔ,

Nɛ pahi maa hia ngɛ nga kplanaa a nɔ,

Kɛ ha ye ma a, ma nɛ i hla a, konɛ a nu,

21 Ma nɛ i to sisi kɛ ha ye he

Konɛ a je ye yi ɔ.

22 Se mo Yakob, o tsɛ we mi,

Ejakaa mo Israel ɔ, i gbe o nya.

23 O ngɔɛ jijɔ kɛ ba sɛ sami afɔlehi,

Nɛ o kɛ o we afɔle ɔmɛ wui ye hɛ mi nyami.

I nyɛ we o nɔ kaa o ngɔ nike ní ba ha mi,

Nɛ i doo we o nya kaa o ngɔ ohɛ ba ha mi.

24 O kɛ o sika he we glã nɛ jeɔ via ha mi,

Nɛ o ha we nɛ o we afɔle ɔ he zɔ ɔ nɛ́ e tɔ mi.

Mohu ɔ, o ha nɛ o he yayami ɔmɛ jiɔ ngɛ ye kuɛ nɔ

Nɛ pɔ tɔ ye he kɛ o tɔmi ɔmɛ.

25 Imi, imi nitsɛ lɛ i ngɛ o he yayami ɔmɛ* tsue ngɛ ye biɛ ɔ he je ɔ nɛ,

Nɛ i be o tɔmi ɔmɛ kaie hu.

26 Mo kai mi; ha nɛ waa kojo;

Moo bɔ o sane ɔ kɛ tsɔɔ kaa o nɔ́ da.

27 O kekleekle tsɛ ɔ* pee yayami,

Nɛ o nihi nɛ a tuɔ munyu ngɛ o nane mi ɔ* tsɔ atuã kɛ si mi.

28 Lɔ ɔ he ɔ, ma ble nikɔtɔmahi nɛ a ngɛ he klɔuklɔu ɔ,

Nɛ ma ha nɛ a kpata Yakob hɛ mi

Nɛ ma ha nɛ a ma jɛ Israel.

44 “Amlɔ nɛ ɔ, mo Yakob ye sɔmɔlɔ,

Kɛ mo Israel, nɔ nɛ i hla, moo bu tue.

 2 Nɔ́ nɛ Yehowa

O Bɔlɔ ɔ kɛ nɔ nɛ e puɛ mo,

Nɛ e ye bua mo kɛ je fɔmi kotoku mi* ɔ ngɛ dee ji nɛ ɔ nɛ:

‘Koo ye gbeye ye sɔmɔlɔ Yakob,

Kɛ mo Yeshurun,* nɔ nɛ i hla a.

 3 Ejakaa ma plɛ nyu kɛ pue nɔ nɛ kuma ngɛ lɛ yee ɔ* nɔ,

Nɛ ma ha nɛ pahi maa hia ngɛ zugba gbigbli nɔ.

Ma plɛ ye mumi ɔ kɛ pue o nina* nɔ

Nɛ ma nɛ jɔɔmi kɛ pue o sisi bimɛ a nɔ.

 4 A maa puɛ kaa nga mumu,

Kaa tso* ngɛ pahi a tue.

Nɛ nɔ kpa maa ngɔ Yakob biɛ kɛ tsɛ e he,

Nɛ nɔ kpa hu maa ngma ngɛ e nine he ke: “Yehowa nɔ́.”

 6 Nɔ́ nɛ Yehowa,

Israel Matsɛ ɔ kɛ e Kpɔlɔ Yehowa tabohiatsɛ ɔ ngɛ dee ji nɛ ɔ nɛ:

Kaa bɔ nɛ i pee kɛ je benɛ i to blematsɛmɛ ɔmɛ si ɔ,

Ha nɛ e tsɔɔ mi níhi nɛ maa ba hwɔɔ se

Kɛ níhi nɛ maa ya nɔ.

 8 Koo ye gbeye,

Nɛ ko ha nɛ sawale nɛ nu mo.

 9 Nihi tsuo nɛ a peeɔ amagahi ɔ, se nami ko kulaa be a he,

Nɛ se nami ko be a we amaga amɛ a he bae.

A ji a we odasehi, se a* nui nɔ́ ko, nɛ a li nɔ́ ko hulɔ,

Lɔ ɔ he ɔ, zo maa gbe nihi nɛ a pee mɛ ɔ.

10 Mɛnɔ hu lɛ e maa pee mawu ko, aloo dade amaga ko

Nɛ se nami ko be he bae?

E ngɔɔ e hamle ɔmɛ kɛ fiaa dade ɔ nɔ,

E kɛ e he wami tsuɔ he ní.

Lɔ ɔ se ɔ, hwɔ yeɔ lɛ nɛ e he wami nɔ gbɔɔ;

E nui nyu, lɔ ɔ he ɔ, pɔ tɔɔ lɛ.

E hlɔɔ tso ɔ kaa nɔmlɔ,

Nɛ e he hiɔ fɛu kaa nɔmlɔ,

Konɛ e hi wemi.*

E hlaa tso pɔtɛɛ ko, oak tso,

Nɛ e haa nɛ e waa ngɛ tsohi nɛ a ngɛ huetso mi ɔ a kpɛti.

E ngɔɔ eko kɛ slɛɔ la nɛ e hlueɔ;

E slɛɔ la nɛ e sãã abolo.

16 E ngɔɔ tso ɔ fã kɛ slɛɔ la;

E kɛ jamɛ a fã a sãã lo, nɛ e kpeɔ nɛ e tɔɔ.

18 A li nɔ́ ko nɔ́ ko, nɛ a nui nɔ́ ko nɔ́ ko sisi hulɔ,

Ejakaa a hɛngmɛ ma nɛ a hyɛ we nɔ́,

Nɛ a tsui susuu we nɔ́ he.

19 Nɔ ko nɔ ko be nɛ e susuɔ nɔ́ he ngɛ e tsui mi

Nɛ e ngɛ nile loo nɔ́ sisi numi, nɛ e ma de ke:

“I kɛ fã slɛ la,

Nɛ i sã abolo kɛ lo ngɛ la a nɔ nɛ i ye.

21 “Oo Yakob, kɛ mo Israel, kai ní nɛ ɔmɛ,

Ejakaa ye sɔmɔlɔ ji mo.

22 Ma tsu* o he yayami ɔmɛ kaa nɔ́ nɛ bɔku lɛ ha nɔ

Nɛ ma tsu o tɔmi ɔmɛ kaa nɔ́ nɛ bɔku kpii lɛ ha nɔ.

23 Nyɛ hiɔwe, nyɛ he ose kɛ bua jɔmi,

Ejakaa Yehowa je e he wami kpo!

Nyɛ yokuhi, nyɛ he ose kɛ bua jɔmi,

Nyɛ huetsohi kɛ tsohi nɛ a ngɛ nyɛ mi ɔ tsuo!

Ejakaa Yehowa kpɔ̃ Yakob,

Nɛ e je e hɛ mi nyami ɔ kpo ngɛ Israel nɔ.”

24 Nɔ́ nɛ Yehowa o Kpɔlɔ ɔ,

Nɔ nɛ e puɛ mo kɛ je benɛ o ngɛ fɔmi kotoku mi ɔ ngɛ dee ji nɛ ɔ nɛ:

Imi nɔ kake too lɛ i bli hiɔwe ɔ mi,

Nɛ i bli zugba a mi ɔ nɛ.

25 Imi lɛ i haa nɛ nya puu tsɛmɛ* a we okadi ɔ peeɔ yaka,

Nɛ i haa nɛ klaali peeɔ a ní kaa kuasiahi;

Imi lɛ i haa nɛ ní leli a juɛmi gbɛɔ

Nɛ i haa nɛ a nile ɔ plɛɔ peeɔ kuasia jemi;

26 Nɔ nɛ e haa nɛ e sɔmɔlɔ ɔ munyu baa mi

Nɛ e haa nɛ e tsɔli a gbami baa mi pɛpɛɛpɛ;

Nɔ nɛ e ngɛ dee ngɛ Yerusalem he ke, ‘Nihi ma ba hi e mi,’

Nɛ́ e de ngɛ Yuda ma amɛ a he ke, ‘A maa kpale ma mɛ ekohu,

Nɛ ma kpale to e ma doku ɔ sisi ekohu’ ɔ;

27 Nɔ nɛ ngɛ pahi nɛ a mi kuɔ ɔ dee ke, ‘nyɛɛ mii,

Nɛ ma ha nɛ o pa amɛ tsuo ma gbli’ ɔ;

28 Nɔ nɛ e ngɛ dee ngɛ Sirus he ke, ‘E ji ye to hyɛlɔ,

Nɛ e maa pee ye suɔmi nya ní sisiisi’;

Nɔ nɛ e ngɛ dee ngɛ Yerusalem he ke, ‘A maa ma lɛ ekohu,’

45 Nɔ́ nɛ Yehowa ngɛ Sirus, nɔ nɛ e pɔ lɛ nu ɔ,

Nɔ nɛ i pɛtɛ e hiɔ nine he

Konɛ ma kɛ ba je mahi si ngɛ e hɛ mi,

Konɛ ma kɛ kpɔ̃ matsɛmɛ a ta hwumi níhi ngɛ a dɛ,*

Konɛ ma bli agbo enyɔ ɔmɛ ngɛ e hɛ mi,

Bɔ nɛ pee nɛ a ko nyɛ nɛ a ngmɛ agbo mi ɔ ngɛ dee ji nɛ ɔ nɛ:

 2 “Ma nyɛɛ o hɛ mi,

Nɛ ma ba yoku wawi ɔmɛ si.

Ma ywia akɔblee agbo ɔmɛ wɔtsɔwɔtsɔ,

Nɛ ma poo agbo se lami dade ɔmɛ ngɔ pue si.

 3 Ma ngɔ juetlihi nɛ ngɛ diblii mi

Kɛ juetlihi nɛ a kɛ laa ngɛ laami hehi ɔ kɛ ha mo,

Konɛ o ná nɛ o le kaa imi ji Yehowa,

Israel Mawu ɔ, nɔ nɛ ngɔ o biɛ kɛ ngɛ mo tsɛe ɔ nɛ.

 4 Ngɛ ye sɔmɔlɔ Yakob, kɛ Israel nɔ nɛ i hla a he je ɔ,

I ngɔ o biɛ kɛ ngɛ mo tsɛe.

O li mi mohu lɛɛ, se ma wo mo he wami,*

 6 Konɛ nihi nɛ a le

Kɛ je puje he kɛ ya si pusinɔ he

Kaa ye se ɔ, nɔ ko nɔ ko be.

 7 I pee la, nɛ i bɔ diblii,

I haa tue mi jɔmi baa, nɛ i haa nɛ haomi baa;

Imi Yehowa lɛ i ngɛ ní nɛ ɔmɛ tsuo pee.

 8 Mo hiɔwe, nɛɛ nyu kɛ pue zugba;

Ha nɛ bɔku ɔ nɛ e nɛ dami ngɔ pue si.

Ha nɛ zugba a mi nɛ bli nɛ e nɔ nɛ hyi tɔ kɛ yi wami hemi,

Konɛ e ha nɛ dami nɛ ba ngɛ jamɛ a be ɔ mi nɔuu.

 9 Musu tloo nɔ nɛ e kɛ e Bɔlɔ ɔ* sãã nya,

Ejakaa e ngɛ kaa ngɛyu kake

Ngɛ ngɛyuhi nɛ a pueɔ si ngɛ zugba a kpɛti!

“Anɛ o ma bi mi níhi nɛ ma a he sane lo?

Anɛ o ma fã mi ngɛ ye bimɛ ɔmɛ kɛ ye nine nya ní tsumi ɔmɛ a he lo?

Imi nitsɛ ye nine lɛ i kɛ bli hiɔwe ɔ mi,

Nɛ i kɛ fami haa e tabo ɔ tsuo.”

13 “I wo nyumu ko nɔ ngɛ dami mi,

Nɛ ma ha nɛ e blɔ ɔmɛ tsuo maa da.

Lɛ ji nɔ nɛ e maa po ye ma a

Nɛ́ e ma ha nɛ a ngmɛɛ ye we bi nɛ a ngɔ mɛ nyɔguɛ ɔ a he faa nɛ a be sika loo nyɔ mi ní ko hee,” Yehowa tabohiatsɛ ɔ lɛ de.

“Se nɛ Egipt ná a* kɛ Etiopia jua yemi níhi* kɛ Sebabi nɛ a ka gagaaga a

Maa ba o ngɔ, nɛ a ma ba pee o nɔ́.

A maa sɔle ha mo ke, ‘Niinɛ, Mawu kɛ mo ngɛ,

Nɛ nɔ kpa ko be; Mawu kpa ko be.’”

15 Niinɛ, o ji Mawu nɛ́ o laa o he,

Oo Israel Mawu, Kpɔlɔ ɔ.

16 Zo maa gbe mɛ tsuo nɛ a hɛ mi ma pue si;

Amaga peeli ɔmɛ tsuo maa nyɛɛ ngɛ hɛ mi si puemi mi.

18 Ejakaa nɔ́ nɛ Yehowa,

Nɔ nɛ e bɔ hiɔwe ɔ, anɔkuale Mawu ɔ,

Nɔ nɛ e to zugba a sisi, nɔ nɛ e pee zugba a nɛ e kɛ ma si kpɛii,

Nɛ́ e buɛ lɛ ngɔ fɔɛ si yaka gu,* se mohu e bɔ konɛ adesahi nɛ a hi nɔ ɔ ngɛ dee ji nɛ ɔ nɛ:

19 I tui munyu ngɛ laami mi, ngɛ zugba nɛ e nɔ wo diblii nɔ;

I de we Yakob nina* ke;

‘Nyɛ hla ye se blɔ yaka gu.’

Nihi nɛ a hɛɛɔ amagahi nɛ a hlɔ kɛ hii nyɛɛe,

Nɛ́ a sɔleɔ kɛ haa mawuhi nɛ a be nyɛe ma he a yi wami ɔ li nɔ́ ko nɔ́ ko fɛɛ.

Mɛnɔ lɛ e gba nɔ́ nɛ ɔ kɛ fɔ si kɛ je blema

Nɛ e tu he munyu kɛ je blema lokoo?

Ye se ɔ, Mawu kpa ko be;

I ji Mawu nɛ da kɛ Kpɔlɔ, ye se ɔ, nɔ ko be.

22 Zugba a nyagbe he ɔmɛ tsuo, nyɛɛ ba ye ngɔ konɛ nyɛ yi nɛ ná wami,

Ejakaa imi ji Mawu, nɔ kpa ko be.

23 I kã imi nitsɛ ye he kita;

Munyu ɔ je ye nya ngɛ dami mi,

Nɛ e be e se kpalee:

Nakutso fɛɛ nakutso ma kplã si ha mi,

Nɛ lilɛ fɛɛ lilɛ ma kã kita kaa e maa ye anɔkuale,

24 Nɛ e ma de ke, ‘Niinɛ, Yehowa mi lɛ anɔkuale dami kɛ he wami ngɛ.

25 A maa bu Israel nina* tsuo dali ngɛ Yehowa mi,

Nɛ a maa fĩa ngɛ e mi.’”

A ngɔ a we amaga amɛ kɛ pue lohwehi a se mi, a kɛ pue lohwehi nɛ a kɛ muɔɔ tlomi ɔ a nɔ,

Kaa tlomi nɛ mi jiɔ nɛ a kɛ tloo lohwehi nɛ pɔ tɔ a he.

 2 Mɛ tsuo a ma a yi si nɛ a ngɔ a hɛ mi kɛ bu si;

A be nyɛe ma kpɔ̃ tlomi ɔmɛ,*

Nɛ mɛ nitsɛmɛ* hu a ma ya je nyɔguɛ yemi mi

 3 “Oo Yakob we, kɛ nyɛ nihi tsuo nɛ piɛ ngɛ Israel we ɔ, nyɛɛ bu mi tue,

Mo nɛ i ye bua mo kɛ je o fɔmi mi nɛ i hyɛ o nɔ kɛ je fɔmi kotoku mi ɔ.

 4 Ke o bwɔ po, i be tsakee;

Ke o yi bwɔmi hɛ mua po, ma ya nɔ nɛ ma hɛɛ o mi.

 5 Mɛnɔ he nɛ nyɛ maa ngɔ mi kɛ to, aloo nyɛ ma de ke e kɛ mi sɔ, loo e ngɛ kaa imi,

Nɛ wa je wa sibi?

 6 Ni komɛ ngɛ nɛ a plɛɔ sika tsu kɛ jeɔ a sika kpɛɛ mi;

A ngmɛɛ sika hiɔ ngɛ sɛni nɔ.

 7 A woɔ nɔ kɛ fɔɔ a konɔ;

A kɛ ya maa e mahe, nɛ e hiɔ he nɛ a kɛ lɛ ma a pɛ.

A kpaa ngmla kɛ tsɛɔ lɛ, se e pui a nya mi fɛɛ;

E be nyɛe ma kpɔ̃ nɔ ko kɛ je haomi mi.

 9 Nyɛ kai níhi nɛ ya nɔ blema lokoo ɔ,*

Kaa imi ji Mawu,* nɔ kpa ko be.

10 Kɛ je sisije lɛ i gba níhi nɛ maa ba,

Nɛ kɛ je blema lokoo nɛ i de níhi nɛ a bɛ mi lolo.

I de ke, ‘Yi mi kpɔ nɛ i mwɔ* ɔ maa ba mi kokooko,

Nɛ ma pee nɔ́ fɛɛ nɔ́ nɛ i suɔ.’

11 I ngɛ lohwe pɛlitsɛ ko nɛ e yeɔ lohwe kpahi tsɛe kɛ je puje he,

Nɛ i ngɛ nɔ ko tsɛe kɛ je zugba ko nɛ e nɔ kɛ wawɛɛ ɔ nɔ konɛ e ba tsu yi mi kpɔ nɛ i mwɔ ɔ* he ní.

12 Nyɛ nihi nɛ nyɛ tsui ti,* nyɛɛ bu mi tue,

Nyɛ nɛ nyɛɛ kɛ nɔ́ nɛ da peemi he kɛ.

13 I ha nɛ ye dami ɔ su si ta;

E be se tsitsaa,

Nɛ ye yi wami hemi ɔ be se kpɛe.

47 Oo Babilon biyo yomiyo,

Kple si nɛ o ba hi si ngɛ bunyuku mi.

Oo Kaldeabi ɔmɛ a biyo,

Hii si ngɛ zugba mi ngɛ he nɛ matsɛ sɛ be,

Ejakaa nihi be mo hɛɛe dɔdɔɔdɔ nɛ a be mo puae hu.

 4 “Nɔ nɛ ngɛ wɔ kpɔ̃e ɔ,

E biɛ ji Yehowa tabohiatsɛ;

Lɛ ji Israel Nɔ Klɔuklɔu ɔ nɛ.”

 5 Hii si ngɛ lejɛ ɔ dii nɛ o hi diblii mi,

Oo Kaldeabi ɔmɛ a biyo;

A be mo tsɛe hu ke Matsɛ Yemi Ɔmɛ A Yo.*

I ble ye weto ní ɔ,

Nɛ i ngɔ mɛ kɛ wo o dɛ mi.

O susuu we ní nɛ ɔmɛ a he;

O susuu we bɔ nɛ sane ɔ nyagbe ma ji ha a he.

 8 Amlɔ nɛ ɔ, moo bu tue, mo nɛ o suɔ ngɔɔmi yemi,

Mo nɛ o ngɛ slɔkee, nɛ o deɔ ngɛ o tsui mi ke:

Ní nɛ ɔmɛ tsuo maa ba o nɔ wawɛɛ

Ngɛ o kunya yemi kɛ o kablɛ fimi babauu ɔ he je.*

O juɛmi kɛ o nile ɔ lɛ ha nɛ o tla blɔ ɔ nɛ,

Nɛ o deɔ ngɛ o tsui mi ke: “Imi ji imi, nɛ ye se ɔ, nɔ ko be hu.”

11 Se haomi maa ba o nɔ,

Nɛ o kunya yemi ɔ be nyɛe maa tsi nya.*

12 Lɔ ɔ he ɔ, yaa nɔ nɛ o pɛtɛ kablɛ nɛ o fi kɛ kunya nɛ o ye

Kɛ je o jokuɛwi a si ɔ he.

Eko ɔ, o ma ná he se;

Eko ɔ, o kɛ maa wo nihi a he gbeye.

Á te si amlɔ nɛ ɔ, nɛ́ a kpɔ̃ mo,

Nihi nɛ a jaa hiɔwe,* nɛ a hyɛɔ dodoehi a mi,

Nihi nɛ a hyɛɔ nyɔhiɔ ehe

Nɛ́ a deɔ níhi nɛ maa ba o nɔ ɔ.

Tsa pi la nɛ a hlueɔ ji nɛ ɔ,

Nɛ tsa pi la nɛ a hiɔ he ji nɛ ɔ.

15 Jã ji bɔ nɛ o kunya yeli ɔmɛ ma ba pee kɛ ha mo,

Ni nɛmɛ nɛ o kɛ mɛ gbo dengme kɛ je nyɛ jokuɛwi a si ɔ.

48 Oo Yakob we, nyɛɛ bu tue,

Nyɛ nɛ nyɛ ngɔɔ Israel biɛ kɛ tsɛɔ nyɛ he

Nɛ nyɛ je Yuda nyu ɔmɛ a mi,*

Nyɛ nɛ nyɛ ngɔɔ Yehowa biɛ kɛ kãa kita

Nɛ nyɛ tsɛɔ Israel Mawu ɔ,

Se pi ngɛ anɔkuale kɛ dami mi ɔ.

 2 A kɛ ma klɔuklɔu ɔ biɛ tsɛɔ a he,

Nɛ a biɔ Israel Mawu ɔ kaa e ye bua mɛ,

Nɔ nɛ e biɛ ji Yehowa tabohiatsɛ ɔ.

A je imi nitsɛ ye nya,

Nɛ i ha nɛ nyɛ le.

 4 Akɛnɛ i le bɔ nɛ o kuɛ wa ha he je ɔ,

—O kuɛ pani ngɛ kaa dade, nɛ o yi nya ngɛ kaa akɔɔble—

 5 I de mo blema lokoo.

I ha nɛ o nu he loko e ba mi,

Bɔ nɛ pee nɛ o ko nyɛ nɛ o de ke, ‘Ye amaga amɛ lɛ a pee nɔ́ nɛ ɔ;

Ye amagahi nɛ a hlɔ ɔ kɛ ye dade amaga amɛ lɛ a fã nɛ nɔ́ nɛ ɔ ba.’

Kɛ je amlɔ nɛ ɔ kɛ yaa, i ngɛ nyɛ ní ehehi dee,

Laami sanehi nɛ nyɛ nui hyɛ.

 7 Kpaako a ngɛ mɛ bɔe, a be kɛ je blema,

Níhi nɛ mwɔnɛ ɔ pɛ lɛ o ngɛ a he nue,

Bɔ nɛ pee nɛ o ko nyɛ nɛ o de ke, ‘Hyɛ! I le ní nɛ ɔmɛ momo.’

 8 Dɛbi, o nui hyɛ, nɛ o li,

Nɛ kɛ je blema lokoo ɔ, o tue tsi.

Ejakaa i le kaa o sisiɔ nɔ wawɛɛ,

Nɛ a tsɛɔ mo ke yayami peelɔ kɛ je fɔmi mi tɔɔ.

 9 Se ye biɛ ɔ he je ɔ, ma tsi ye mi mi la a nya;

Ye yi je mi ɔ he je ɔ, ma ye ye he nɔ ngɛ o he,

Nɛ i be o hɛ mi kpatae.

11 Imi nitsɛ, imi nitsɛ ye he je ɔ, ma pee nɔ́ nɛ ɔ,

Mɛni he je nɛ e sa kaa ma ngmɛ blɔ nɛ a wo ye he mu?

13 Imi nitsɛ ye nine lɛ fia zugba a sisi tomi ɔ,

Nɛ ye hiɔ nine ɔ lɛ bli hiɔwe ɔ mi.

E maa pee Babilon nɔ́ nɛ e suɔ,

Nɛ e ma wo e nine nɔ ngɛ Kaldeabi ɔmɛ a nɔ.

“Imi Yehowa, imi ji o Mawu,

Nɔ nɛ e ngɛ mo ní tsɔɔe konɛ o ná he se,*

Nɔ nɛ e ngɛ mo blɔ nɛ e sa nɛ o gu nɔ ɔ tsɔɔe.

Lɛɛ o tue mi jɔmi ɔ maa pee kaa pa

Nɛ o dami ɔ maa pee kaa wo oslɔke.

19 O nina* kɛ o sisi bimɛ

Maa hiɛ kaa zia.

E ha nɛ nyu je tɛsa mi kɛ ha mɛ;

E gba tɛsa mi, nɛ nyu je mi babaaba.”

49 Nyɛ zugba kpɔhi nɛ nyu bɔle nyɛ, nyɛɛ bu mi tue,

Nyɛ je mahi nɛ nyɛ ngɛ tsitsaa lokoo, nyɛɛ bu tue.

 2 E ha ye nya pee kaa klaate nɛ nya ba;

E ngɔ mi kɛ laa ngɛ e nine hɔ̃ ɔ sisi.

E ha nɛ i pee kaa kɛ̃ɛ̃ mi bi nɛ nya ba;