HOSEA
1 Yehowa kɛ Beeri bi Hosea* tu munyu ngɛ Yuda matsɛmɛ nɛ ji Uzia, Yotam, Ahaz kɛ Hezekia a be ɔ mi, kɛ jehanɛ se hu, ngɛ Yoash bi Yeroboam, nɛ ji Israel matsɛ ɔ be ɔ mi. 2 Benɛ Yehowa kɛ Hosea bɔni munyu tumi ɔ, Yehowa de Hosea ke: “Yaa nɛ o ya ngɔ tuutuu yo,* nɛ o ma ná ajuama bimɛ, ejakaa tuutuu pomi* he je ɔ, zugba a kpale kɛ je Yehowa se kulaa.”
3 Enɛ ɔ he ɔ, e ya nɛ e ya ngɔ Diblaim biyo nɛ a tsɛɔ lɛ Gomer, e ngɔ hɔ nɛ e fɔ binyumu ha lɛ.
4 Kɛkɛ nɛ Yehowa de lɛ ke: “Wo lɛ biɛ ke Yezreel,* ejakaa e be kɛe kulaa nɛ ma ha nɛ Yehu we ɔ nɛ bu Yezreel muɔ si puemi ɔ he akɔtaa, nɛ ma ha Israel we ɔ matsɛ yemi ɔ se maa po. 5 Jamɛ a ligbi ɔ, ma ku Israel kɛ̃ɛ̃ ɔ mi ngɛ Yezreel Dɔgba a mi.”
6 E ná mi ekohu nɛ e fɔ biyo. Nɛ Mawu de lɛ ke: “Wo lɛ biɛ ke Lo Ruhama,* ejakaa i be Israel we ɔ mɔbɔ nae hu, bɔ fɛɛ bɔ nɛ ji ɔ, ma fiee mɛ kɛ ho. 7 Se ma na Yuda we ɔ mɔbɔ, nɛ imi Yehowa a Mawu ɔ, ma he a yi wami; tsa pi kɛ̃ɛ̃ loo klaate loo ta loo okpɔngɔhi loo okpɔngɔ nɔ hili nɛ ma kɛ he a yi wami.”
8 Benɛ Gomer po Lo Ruhama nyɔ ɔ, e ná mi ekohu, nɛ e fɔ binyumu. 9 Kɛkɛ nɛ Mawu de ke: “Wo lɛ biɛ ke Lo Ami,* ejakaa pi ye we bi ji nyɛ, nɛ imi hu pi nyɛ Mawu ji mi.
10 “Nɛ Israelbi ɔmɛ* a he maa hiɛ kaa wo nya zia nɛ a be nyɛe ma susu loo a kane. Nɛ he nɛ a de mɛ ngɛ ke ‘Pi ye we bi ji nyɛ’ ɔ, lejɛ ɔ nɔuu nɛ a ma de mɛ ngɛ ke ‘Mawu hɛ kalɔ ɔ bimɛ ji nyɛ.’ 11 Nɛ a ma bua Yudabi ɔmɛ kɛ Israelbi ɔmɛ a nya nɛ a pee kake, nɛ a maa hla hɛ mi nyɛɛlɔ kake kɛ ha a he nɛ a maa je zugba a nɔ, ejakaa Yezreel ligbi ɔ maa pee ligbi ngua.
2 Nyɛ de nyɛ nyɛminyumu ɔmɛ ke, ‘Ye we bi!’*
Nɛ nyɛ de nyɛ nyɛmiyi ɔmɛ ke, ‘Mo yo nɛ a na mo mɔbɔ!’*
2 Nyɛɛ tu munyu kɛ si nyɛ mami; nyɛɛ tu munyu kɛ si lɛ,
Ejakaa tsa pi ye yo ji lɛ, nɛ imi hu tsa pi e huno ji mi.
Ha nɛ e kpa e tuutuu pomi ɔ*
Nɛ́ e je e gba puɛmi ɔ kɛ je e nyɔ ɔmɛ a kpɛ,
3 Ke pi jã a, ma kpa bo ngɛ e he, nɛ e he maa fɔ si gu kaa ligbi nɛ a fɔ lɛ ɔ,
Ma ha nɛ e maa pee kaa nga nɔ,
Ma ha nɛ e maa pee kaa zugba nɛ nyu be nɔ
Nɛ ma ha nɛ kuma maa gbe lɛ.
4 Nɛ e bimɛ hu, i be mɛ mɔbɔ nae,
Ejakaa a ji ajuama bimɛ.
5 A mami bɔ ajuama.
Nɔ nɛ e ngɔ a hɔ ɔ pee zo ní, ejakaa e de ke,
‘Ma ya nyɛɛ nihi nɛ a suɔ mi wawɛɛ ɔ a se,
Nihi nɛ a haa mi ye abolo kɛ ye nyu,
Ye lohwe he bwɔmi kɛ ye klala, ye nu kɛ ye dã a.’
6 Enɛ ɔ he ɔ, i kɛ mio maa po piɛ kɛ tsi mo blɔ;
Nɛ ma fia tɛ gbogbo kɛ tsi lɛ blɔ,
Konɛ e ko na blɔ.
7 E maa fiee nihi nɛ a suɔ lɛ wawɛɛ ɔ a se, se e be mɛ náe;
E ma hla mɛ, se e be mɛ nae.
Kɛkɛ ɔ, e ma de ke, ‘Ma kpale kɛ ya ye kekle huno ɔ ngɔ,
Ejakaa jamɛ a be ɔ mi ɔ, níhi a mi hi ha mi pe amlɔ nɛ ɔ.’
8 E yɔse we kaa imi lɛ i ha lɛ ngma,* wai ehe, kɛ nu ɔ,
Nɛ imi lɛ i ha lɛ sika hiɔ babauu
Kɛ sika tsu nɛ a kɛ tsu ní ngɛ Baal jami mi ɔ.
9 ‘Enɛ ɔ he ɔ, ma kpale ye se nɛ ma ba ngɔ ye ngma a ngɛ e be mi
Kɛ ye wai ehe ɔ ngɛ e be mi,
Nɛ ma kpɔ̃ ye lohwe he bwɔmi kɛ ye klala a nɛ e kɛ haa e he ɔ ngɛ e dɛ.
10 Jehanɛ ɔ, ma ha nɛ e hehi nɛ e sɛ kaa a naa a maa je kpo ngɛ nihi nɛ a suɔ lɛ wawɛɛ ɔ a hɛ mi,
Nɛ nyumu ko be nyɛe ma kpɔ̃ lɛ ngɛ ye dɛ mi.
11 Ma ha nɛ e bua jɔmi ɔ tsuo se maa po,
E gbijlɔ ɔmɛ, e nyɔhiɔ ehe ɔmɛ, e hejɔɔmi ligbi ɔmɛ kɛ e nyami be ɔmɛ tsuo a se maa po.
12 Nɛ ma puɛ e wai tsuo ɔmɛ kɛ e fig tso ɔmɛ nɛ e de ngɛ a he ke:
“Ní nɛ ɔmɛ ji ye hiɔwo nɛ nihi nɛ a suɔ mi wawɛɛ ɔ kɛ ha mi” ɔ;
Ma ha nɛ a ma plɛ pee hue tso,
Nɛ nga mi lohwe awi yeli ma kpata a hɛ mi.
13 Ma ha nɛ e maa bu ligbihi nɛ e sã afɔlehi kɛ ha Baal amaga amɛ ɔ he akɔtaa,
Benɛ e kɛ e nguɛ níhi kɛ e junehi dla e he nɛ e fiee nihi nɛ a suɔ lɛ wawɛɛ ɔ a se,
Nɛ́ imi lɛɛ, e hɛ je ye nɔ ɔ,’ Yehowa lɛ de.
14 ‘Enɛ ɔ he ɔ, ma plɛ e yi mi,
Ma ngɔ lɛ kɛ ya nga a nɔ,
Nɛ i kɛ lɛ maa tu munyu konɛ e ta e tsui he.
15 Kɛ je jamɛ a ligbi ɔ nɔ kɛ yaa a, ma kpale e wai ngmɔ ɔ se kɛ ha lɛ,
Nɛ i kɛ Akor Dɔgba a hu ma ha lɛ kaa he nɛ e maa gu kɛ ná hɛnɔkami;
E ma he nɔ ngɛ lejɛ ɔ kaa bɔ nɛ e pee ngɛ e yihe mi ɔ,
Kaa ligbi ɔ nɛ e je Egipt zugba a nɔ kɛ ba a.’
16 Yehowa de ke, ‘Ngɛ jamɛ a ligbi ɔ nɔ ɔ,
O ma tsɛ mi ke Ye huno, nɛ o be mi tsɛe hu ke Ye nyɔmtsɛ.’*
17 ‘Ma je Baal amaga amɛ a biɛ kɛ je e nya mi,
Nɛ a be a biɛ kaie hu.
18 Jamɛ a ligbi ɔ, i kɛ nga mi lohwe awi yeli,
Kɛ hiɔwe lohwe pɛlitsɛmɛ kɛ lohwehi nɛ a sãã si ngɛ zugba a nɔ maa so ngɛ ye we bi ɔmɛ a he je;
Ma je kɛ̃ɛ̃ kɛ klaate kɛ ta kɛ je zugba a nɔ,
Nɛ ma ha nɛ a hi si slɔkee.
19 Ma ngɔ mo kaa ye yo kɛ ya neneene;
I kã kita kaa i kɛ mo maa hi si ngɛ dami kɛ dami sane yemi mi,
Nɛ ma je suɔmi nɛ se pui kpo kɛ tsɔɔ mo nɛ ma na mo mɔbɔ.
20 I kã kita kaa ma ye mo anɔkuale,
Nɛ bɔ fɛɛ bɔ nɛ ji ɔ, o maa le Yehowa.’
21 Yehowa de ke, ‘Jamɛ a ligbi ɔ, ma ha heto,
Ma ha hiɔwe heto,
Nɛ hiɔwe hu ma ha zugba a heto;
22 Nɛ zugba a ma ha ngma a, wai ehe ɔ, kɛ nu ɔ heto;
Nɛ mɛ hu a ma ha Yezreel* heto.
23 Ma du lɛ kaa wu kɛ ha ye he ngɛ zugba a nɔ,
Nɛ nɔ nɛ a nɛ lɛ mɔbɔ ɔ, ma na lɛ mɔbɔ;*
Nɛ ma de nihi nɛ pi ye we bi* ji mɛ ɔ ke: “Ye we bi ji nyɛ,”
Nɛ mɛ hu a ma de ke: “Mo ji ye Mawu.”’”
3 Kɛkɛ nɛ Yehowa de mi ke: “Moo kpale ya nɛ o ya suɔ yo nɛ nyumu kpa suɔ lɛ nɛ e ji gba puɛlɔ ɔ, kaa bɔ nɛ Yehowa suɔ Israelbi ɔmɛ benɛ a ya nyɛɛ mawu kpahi a se nɛ a suɔ wai yiblii gbigbli keekihi ɔ.”*
2 Lɔ ɔ he ɔ, i ngɔ sika hiɔ 15 kɛ barli homa* susumi nɔ́ kake kɛ fã kɛ he lɛ kɛ ha ye he. 3 Kɛkɛ nɛ i de lɛ ke: “O maa pee ye nɔ́ ligbihi babauu. Ko ya bɔ ajuama, nɛ o kɛ nyumu kpa nɛ ko ná bɔmi, nɛ imi hu i kɛ mo maa hi si jã.*
4 Ejakaa Israelbi ɔmɛ maa hi si be babauu* nɛ́ a be matsɛ, loo ganɔ, a be afɔle sãe, a be wɔ titima hie, a be efɔd kɛ terafim amagahi* hie. 5 Pee se ɔ, Israelbi ɔmɛ maa kpale a se kɛ ba, nɛ a ma ba hla Yehowa, a Mawu ɔ kɛ David, nɛ ji a matsɛ ɔ. Ngɛ nyagbe ligbi ɔmɛ a mi ɔ, a kɛ he domi blibliibli maa ba Yehowa hɛ mi ngɛ e kpakpa peemi ɔ he je.
4 Oo Israelbi, nyɛɛ bu Yehowa munyu tue,
Yehowa kɛ nihi nɛ a ngɛ zugba a nɔ ɔ ná sane,
Ejakaa anɔkuale yemi kɛ suɔmi nɛ se pui kɛ Mawu he nile be zugba a nɔ.
2 Lakpa kita kami kɛ lakpa yemi kɛ nɔ gbemi
Kɛ jumi kɛ gba puɛmi pɔ he wawɛɛ,
Nɛ muɔ si puemi nyɛɛ muɔ si puemi se.
3 Lɔ ɔ he je nɛ zugba a maa ye aywilɛho
Nɛ nihi nɛ a ngɛ nɔ ɔ a hɛ mi ma kpata a nɛ;
Nga mi lohwe awi yeli kɛ hiɔwe lohwe pɛlitsɛmɛ,
Kɛ wo mi lohi po, a hɛ mi ma kpata.
4 Se nɔ ko kɛ nɔ ko kó gbla nɔ́ mi, nɛ nɔ ko kó kã nɔ ko hɛ mi,
Ejakaa o we bi ɔmɛ ngɛ kaa nihi nɛ a kɛ osɔfo gblaa nɔ́ mi.
5 Lɔ ɔ he ɔ, o ma tɛ nɔ́ piani katakata,
Nɛ o kɛ gbalɔ ɔ tsuo ma tɛ nɔ́, kaa nɔ́ nɛ je jɔ.
Nɛ ma ha nɛ o yayo ma ma e nya.*
6 Ye we bi ɔmɛ ma ma a nya,* ejakaa a be nile.
Akɛnɛ o kua nile he je ɔ,
Imi hu ma kua mo nɛ o be sɔmɔe kaa osɔfo ha mi hu;
Nɛ akɛnɛ o hɛ je o Mawu ɔ mlaa a* nɔ he je ɔ,
Imi hu, ye hɛ maa je o bimɛ ɔmɛ a nɔ.
7 Si abɔ nɛ a he ngɛ hiɛe ɔ, si abɔ nɛ a ngɛ yayami pee kɛ ngɛ mi sie.
Ma tsake a hɛ mi nyami kɛ pee hɛ mi si puemi.*
8 A náa yayami nɛ ye we bi peeɔ ɔ he se,
Nɛ a suɔ kaa ye we bi nɛ ya nɔ nɛ a hi yayami pee kpamisaa.*
9 Nɔ́ nɛ maa ba ni ɔmɛ a nɔ ɔ, lɔ ɔ nɔuu lɛ maa ba osɔfo ɔ nɔ;
Ma ha nɛ a bu a je mi bami ɔ he akɔtaa,
Nɛ ma ngɔ nɔ́ nɛ maa je a ní peepee ɔ mi kɛ ba a kɛ ba a nɔ.
10 A maa ye ní, se a be tɔe.
A maa bɔ ajuama,* se a be fɔe,
Ejakaa a kɛ Yehowa pee we nɔ́ ko.
12 Ye we bi ya biɔ ní ngɛ tso amagahi a ngɔ,
A peeɔ nɔ́ nɛ a dɛma tso* deɔ mɛ ke a pee ɔ;
Ejakaa ajuama bɔmi mumi ɔ haa nɛ a tlaa blɔ,
Nɛ a we ajuama bɔmi ɔ he je ɔ, a sume nɛ a ba a he si kɛ ha Mawu.
13 A sãã afɔle ngɛ yoku ɔmɛ a yi mi,
Nɛ a haa nɛ afɔle sami lasuku jeɔ ngɛ kpoku ɔmɛ a nɔ,
Ngɛ oak tsohi kɛ storaks tsohi kɛ tso ngua fɛɛ tso ngua sisi,
Ejakaa a hɔ̃ ɔ hi saminya.
Lɔ ɔ he je nɛ o biyi ɔmɛ bɔɔ ajuama
Nɛ o nganyɛ ɔmɛ puɛɔ gba a nɛ.
14 I be o biyi ɔmɛ a tue gblae ngɛ a tuutuu pomi ɔ* he je,
Nɛ i be o nganyɛ ɔmɛ a tue gblae ngɛ a gba puɛmi ɔ he je.
Ejakaa nyumu ɔmɛ kɛ tuutuu yi ɔmɛ yaa he ko banee
Nɛ a kɛ tuutuu poli* ɔmɛ ya sãã afɔle;
Nimli kaa kikɛ nɛ́ a be nɔ́ sisi numi ɔ a hɛ mi ma kpata.
15 Oo Israel, e ngɛ mi kaa o ngɛ tuutuu poe* mohu lɛɛ,
Se ko ha nɛ Yuda nɛ ye fɔ.
Nyɛ ko ya Gilgal loo Bet Aven,
Nɛ nyɛ ko kã kita ke, “Be abɔ nɛ Yehowa ngɛ nɛ ɔ!’
16 Ejakaa Israel tue mi ti kaa na nɛ e tue mi ti.
Anɛ Yehowa maa hyɛ a nɔ kaa bɔ nɛ a hyɛɔ agbosu wayo nɔ ngɛ lohwehi a ní yemi he nɛ ngɛ nga nɔ ɔ lo?*
17 Efraim kɛ amagahi ya bɔ.
Lɔ ɔ he ɔ, nyɛ ngmɛɛ e he!
Nɛ e nɔ yeli ɔmɛ* suɔ hɛ mi si puemi wawɛɛ.
19 Kɔɔhiɔ ma koklo lɛ kɛ wo e pɛli ɔmɛ a mi,*
Nɛ zo maa gbe mɛ ngɛ afɔle nɛ a sãã amɛ a he.”
5 “Nyɛ osɔfohi, nyɛɛ bu munyu nɛ ɔ tue,
Nyɛ Israel we, nyɛɛ bu tue saminya,
Matsɛ we, nyɛɛ bu tue,
Ejakaa kojomi ɔ kɔɔ nyɛ he;
Nyɛ ji klama kɛ ha Mizpa
Kɛ ya nɛ a kɛ ha Tabor nɔ.
3 I le Efraim,
Nɛ Israel hu laa we ngɛ ye hɛ mi.
Ejakaa mo Efraim, amlɔ nɛ ɔ, o kɛ o he wo ajuama bɔmi mi;
Israel ble e he.
4 A ní peepee ɔmɛ ngmɛ́ mɛ blɔ nɛ a kpale kɛ ba a Mawu ɔ ngɔ,
Ejakaa ajuama bɔmi mumi ngɛ a mi;
Nɛ a kɛ Yehowa pee we nɔ́ ko.
5 Israel he nɔ womi ɔ ye odase kɛ si lɛ;*
Israel kɛ Efraim tsuo a tɔmi ɔ ha nɛ a nane tɔ̃tɔ̃,
Nɛ Yuda kɛ mɛ tsuo a nane tɔ̃tɔ̃.
6 A kɛ a to ɔmɛ kɛ a na amɛ ya konɛ a ya hla Yehowa,
Se a nɛ́ lɛ.
Ejakaa e hɛ e he kɛ je a he.
7 A je Yehowa se,
Ejakaa a fɔ ma se bimɛ.
Amlɔ nɛ ɔ, nyɔhiɔ kake ma kpata a kɛ a blɔ fa mi ní ɔmɛ* a hɛ mi.*
8 Nyɛ kpa koli ngɛ Gibea, nyɛ kpa titimati ngɛ Rama!
Nyɛ he ta ose ngɛ Bet Aven; oo Benyamin, moo nyɛɛ a hɛ mi!
9 Oo Efraim, o maa pee he gbeye womi nɔ́ ngɛ tue gblami ligbi ɔ nɔ.
I ha nɛ a le nɔ́ nɛ maa ba kokooko ngɛ Israel wɛtso ɔmɛ a mi.
10 Yuda ganɔ ɔmɛ ngɛ kaa nihi nɛ a ngɛ huzu hɛe.
Ma plɛ ye mi mi la a kɛ pue a nɔ kaa nyu.
11 A wa Efraim yi mi, kojomi nɛ a kojo lɛ ɔ ha nɛ e kuɔ,
Ejakaa e fia e pɛɛ si kaa e maa nyɛɛ e he nyɛli ɔmɛ a se.
12 Lɔ ɔ he ɔ, i pee kaa wɔyewɔye kɛ ha Efraim
Nɛ i pee kaa nɔ́ nɛ sa kɛ ha Yuda we ɔ.
13 Benɛ Efraim na e hiɔ ɔ, nɛ Yuda hu na e pa a,
Efraim ho Asiria ya, nɛ e tsɔ kɛ ya matsɛ ngua ko ngɔ.
Se e nyɛ we nɛ e tsa nyɛ hiɔ ɔ ha nyɛ,
Nɛ e nyɛ we nɛ e ha nɛ nyɛ pa a nɛ gbo.
14 Ejakaa ma pee kaa jata wayo kɛ ha Efraim,
Nɛ ma pee kaa jata* nɛ he wa kɛ ha Yuda we ɔ.
Imi nitsɛ ma tsɔtslɔɔ a mi nɛ ma je kɛ ho;
Ma ngɔ mɛ kɛ ho, nɛ nɔ ko nɔ ko be nyɛe ma kpɔ̃ mɛ.
15 Ma je kɛ ho, nɛ ma kpale kɛ ho ye hi he ɔ ya kɛ ya si be nɛ a maa tloo nɔ́ nɛ maa je a tɔmi ɔ mi kɛ ba a,
Nɛ lɔ ɔ se ɔ, a ma ba hla ye hɛ mi dloomi.*
Ke a ngɛ nɔ́ nae ɔ, a ma hla ye se blɔ.”
6 “Nyɛɛ ba, nyɛ ha nɛ waa kpale kɛ ya Yehowa ngɔ,
Ejakaa e tsɔtslɔɔ wa mi, se e ma tsa wɔ.
E plaa wɔ, se e maa fĩ wa pa amɛ a nɔ ha wɔ.
2 Ngɛ ligbi enyɔ se ɔ, e ma ha nɛ wa ná he wami ekohu,
Ngɛ ligbi etɛne nɔ ɔ, e ma wo wa nɔ,
Nɛ wa maa hi si ngɛ e hɛ mi.
3 Wa maa le Yehowa, waa kɛ hɛdɔ ma hla lɛ konɛ waa le lɛ.
Kaa bɔ nɛ je naa be fɛɛ be ɔ, jã kɛ̃ nɛ bɔ fɛɛ bɔ nɛ ji ɔ, e maa je kpo;
E maa ba wa ngɔ kaa hiɔmi nɛ ngɛ nɛe,
Kaa gbiɛ nyu nɛ haa nɛ zugba pɔɔ.”
4 “Mɛni ma pee mo, Efraim?
Mɛni ma pee mo, Yuda?
Ejakaa o suɔmi nɛ se pui ɔ ngɛ kaa mɔtu bɔku,
E ngɛ kaa bɔ́ nɛ́ e kɛ we kɛkɛ e laa.
5 Enɛ ɔ he je nɛ ma gu gbali ɔmɛ a nɔ kɛ poo mɛ pue si ɔ nɛ;
I kɛ ye nya mi munyu maa gbe mɛ.
Nɛ kojomi nɛ maa ba o nɔ ɔ ma kpɛ kaa la.
6 Ejakaa suɔmi nɛ se pui* ji nɔ́ nɛ saa ye hɛ mi, se pi afɔle sami,
Nɛ Mawu he nile hu ji nɔ́ nɛ saa ye hɛ mi, se pi sami afɔlehi.
7 Se a yi somi ɔ nɔ kaa nimli adesahi.
Lejɛ ɔ lɛ a je ye se ngɛ.
8 Gilead ji yiwutsotsɛmɛ a ma,
Ma a mi hyi tɔ kɛ muɔ si puemi.
9 Osɔfohi a kuu ɔ ngɛ kaa ojo fiali a kuu nɛ a woɔ nɔ he ka.
A gbeɔ nɔ ngɛ shekem blɔ ɔ nɔ,
A ní peepee ɔ ji zo nɔ́.
10 I na nɔ́ ko ngɛ Israel we ɔ nɛ ha nɛ ye he mi po.
Lejɛ ɔ lɛ Efraim bɔ ajuama ngɛ;
Israel ble e he.
11 Jehanɛ se hu ɔ, mo Yuda, a to ní kpami be kɛ fɔ si ha mo,
Be nɛ ma bua ye we bi nɛ a nuu mɛ nyɔguɛ ɔ a nya kɛ ba ekohu ɔ.”
7 “Be fɛɛ be nɛ ma pee kaa ma tsa Israel ɔ,
Kɛkɛ ɔ, Efraim tɔmi ɔ je kpo,
Nɛ Samaria yiwutso ní peepee ɔ hu jeɔ kpo.
Ejakaa a ji nɔ sisili;
Juli ywiaa kɛ sɛɔ mi, nɛ ojo fiali a kuu haa ní ngɛ gbɛjegbɛ ɔmɛ a nɔ.
2 Se a de we ngɛ a tsui mi kaa ma kai a yiwutso ní peepee ɔmɛ tsuo.
Amlɔ nɛ ɔ, a ní peepee ɔ bɔle mɛ kɛ kpe;
Lɛ tsuo fɔɔ si paa ngɛ ye hɛ mi.
3 A kɛ a yiwutso ní peepee ɔ haa nɛ matsɛ ɔ bua jɔɔ,
Nɛ a kɛ a nɔ sisimi ɔ haa nɛ ma nikɔtɔma amɛ a bua jɔɔ.
4 Mɛ tsuo a ji gba puɛli,
A ngɛ tsoe kaa la nɛ abolo sãlɔ slɛ ngɛ flɔɔnɔɔ mi,
Nɔ nɛ ke e pɔtɔ mamu ɔ ta a, e klɛ we la a mi kɛ ya si be nɛ mamu ɔ ma fu ɔ.
5 Ngɛ wa matsɛ ɔ ligbi ɔ nɔ ɔ, ma nikɔtɔma amɛ nu hiɔ,
Wai ha nɛ a mi mi fu.
E kpa e nine mi kɛ ta he fɛu yeli a dɛ mi.
6 Ejakaa a kɛ tsui nɛ tsoɔ kaa flɔɔnɔɔ mi la lɛ baa.*
Nyɔ mi tsuo ɔ, abolo sãlɔ hwɔɔ si;
Ke e su mɔtu ɔ, flɔɔnɔɔ ɔ mi la a tsoɔ kaa la nɛ ngɛ tsoe gegeege.
7 Mɛ tsuo a dɔ la kaa flɔɔnɔɔ,
Nɛ a tsɔtslɔɔ a nɔ yeli ɔmɛ* a mi.
A matsɛmɛ ɔmɛ tsuo nɔ si;
A kpɛti nɔ ko nɔ ko tsɛ we mi.
8 Efraim kɛ e he futu je ma amɛ.
Efraim ngɛ kaa keeki lokotoo nɛ a plɛ we fã kake.
9 Nibwɔhi gbla e he wami ɔ, se e li.
Nɛ e mua a hu pee futaa, se e yɔse we.
10 Israel he nɔ womi ɔ ye odase kɛ si lɛ,
Se a kpale we kɛ bɛ Yehowa a Mawu ɔ ngɔ,
Nɛ ngɛ enɛ ɔmɛ tsuo se ɔ, a hla we e se blɔ hulɔ.
11 Efraim ngɛ kaa beleku lahuɛ nɛ e biɛɛ nɛ e be juɛmi.*
A kpa ngmlaa kɛ tsɛ Egipt; a ho Asiria ya.
12 He fɛɛ he nɛ a maa ya a, ma bli ye ya a mi kɛ ha a nɔ.
Ma gbla mɛ kɛ ba zugba kaa hiɔwe lohwe pɛlitsɛmɛ.
Ma gbla a tue ngɛ kɔkɔ bɔmi nɛ a kɛ ha a we asafo ɔ nya.
13 Kpoo ha mɛ ejakaa a tu fo kɛ je ye he!
Hɛ mi kpatami nɛ ba a nɔ ejakaa a tɔ̃ ye nɔ!
Jinɛ i pee klaalo kaa ma kpɔ̃ mɛ, se a tu ye he lakpa munyuhi.
14 E ngɛ mi kaa a fo ya ngɛ a sahi a nɔ mohu lɛɛ,
Se a ji a tsui mi kɛ kpa ngmlaa kɛ tsɛ mi kɛ ha yemi kɛ buami,
A kɛ nɔ́ poɔ a he ngɛ a ngma kɛ a wai ehe he je;
A teɔ si kɛ woɔ mi.
15 E ngɛ mi kaa i tsɔse mɛ nɛ i wo a nine mi he wami mohu lɛɛ,
Se a te si kɛ wo mi, nɛ a to ga yaya.
16 A tsake a blɔ, se pi kɛ ya nɔ́ nɛ e nɔ kuɔ nɔ;*
A ngɛ kaa kɛ̃ɛ̃ nɛ e mi jɔ nɛ́ a be nyɛe maa fĩa kɛ fɔ a nɔ.
A ma nikɔtɔma amɛ ma gbo ngɛ klaate nya ejakaa a kɛ a lilɛ tuɔ nɔ buimi munyuhi.
Enɛ ɔ he ɔ, nihi maa ye a he fɛu ngɛ Egipt zugba a nɔ.”
8 “Nyɛɛ ngɔ titimati kɛ ma nyɛ nya he!
Nɔ ko ma Yehowa we ɔ tuami kaa kɔle,
Ejakaa a yi ye somi ɔ nɔ, nɛ a tɔ̃ ye mlaa a nɔ.
2 A kpaa ngmlaa kɛ tsɛɔ mi ke, ‘Ye Mawu, wɔ Israel, wa le mo!’
3 Israel kua nɔ́ kpakpa.
Ha nɛ he nyɛlɔ ɔ nɛ fiee e se.
4 A hla matsɛmɛ, se pi ye nɔ nɛ a gu kɛ pee jã.
A hla ma nikɔtɔmahi, se i kplɛɛ we a nɔ.
A kɛ a sika hiɔ kɛ a sika tsu pee amagahi,
Konɛ a kɛ kpata mɛ nitsɛmɛ a hɛ mi.
5 Oo Samaria, a kua o na bi ɔ.
Ye mi mi fu mɛ wawɛɛ.
Kɛ ya si mɛni be nɛ e he maa wa ha mɛ kaa a maa pee a ní kaa nihi nɛ sane ko be a he?*
6 Enɛ ɔ je Israel.
Ga ní tsulɔ lɛ pee, nɛ pi Mawu ji lɛ;
A maa ku Samaria na bi ɔ dukuduku.
7 Ejakaa kɔɔhiɔ lɛ a ngɛ due ɔ nɛ,
Nɛ a ma kpa ahumi.
Tso ko be nɛ e wo yiblii nɛ e wa;*
Nɔ́ fɛɛ nɔ́ nɛ tsɛ̃ ɔ be hae nɛ a ná mamu.
Ke a ná eko po, nibwɔhi* maa ye lɛ tsuo.
8 A maa mi Israel.
Amlɔ nɛ ɔ, a maa hi je ma amɛ a kpɛti,
Kaa buɛ nɛ a sume.
9 Ejakaa a kuɔ kɛ ho Asiria ya kaa nga mi teji nɛ́ lɛ pɛ e tsɔ e he banee.
Efraim bɔ suɔli apaa.
10 A bɔ mɛ apaa kɛ je je ma amɛ a kpɛti mohu lɛɛ,
Se amlɔ nɛ ɔ, ma bua a nya;
A maa na nɔ́ ngɛ tlomi nɛ matsɛ ɔ kɛ ma nikɔtɔma amɛ kɛ fɔ a nɔ ɔ he je.
11 Efraim ma afɔle sami latɛ babauu, nɛ lɔ ɔ ha nɛ e pee yayami.
A ba pee e we afɔle sami latɛ nɛ e kɛ peeɔ yayami.
12 I ngma mlaahi* fuu kɛ ha lɛ,
Se e bu mɛ kaa nɔ́ ko nɛ se nami be a he.
13 A kɛ nike ní ba haa mi kaa afɔle, nɛ a yeɔ lo ɔ,
Se Yehowa bua jɔɛ he.
Amlɔ nɛ ɔ, e ma kai a tɔmi ɔ, nɛ e maa gbla a tue ngɛ a yayami ɔmɛ a he.
A kpale a se* kɛ ho Egipt ya.
14 Israel hɛ je e Bɔlɔ* ɔ nɔ, nɛ e ma jami hehi,
Nɛ Yuda hu po mahi fuu nɛ a fia gbogbo wo a he,
Se ma tsɔ la kɛ ya e ma amɛ a mi,
Nɛ e maa sã e mɔ ɔmɛ tsuo.
9 “Oo Israel, o bua ko jɔ,
Ko nya kaa bɔ nɛ je ma amɛ peeɔ ɔ.
Ejakaa ajuama bɔmi ha nɛ o je o Mawu ɔ se.
O suɔ hiɔ womi nɛ tuutuu poli náa ngɛ ngma fiaami he fɛɛ ngma fiaami he ɔ.
2 Se ngma fiaami he kɛ wai ngami muɔ ɔ be nyɛe maa lɛ mɛ,
Nɛ wai ehe ma bɔ lɛ.
3 A be nɔ yae nɛ a hi Yehowa zugba a nɔ;
Mohu ɔ, Efraim maa kpale kɛ ya Egipt,
Nɛ a maa ye nɔ́ nɛ he tsɔ we ngɛ Asiria.
4 A be dã plɛe kɛ sã afɔle ha Yehowa hu;
A we afɔle sami ɔ be e hɛ mi sae.
A ngɛ kaa kɔmɔ yemi abolo;
Nɔ fɛɛ nɔ nɛ maa ye ɔ ma ble e he.
Ejakaa a we abolo ɔ, mɛ pɛ a nɔ́;*
E be Yehowa we ɔ bae.
5 Mɛni nyɛ maa pee ngɛ kpe ligbi ɔ nɔ,*
Ngɛ Yehowa gbijlɔ yemi ligbi ɔ nɔ?
6 Ejakaa hyɛ! A maa tu fo ngɛ hɛ mi kpatami he je.
Egipt ma bua a nya, nɛ Memfis maa pu mɛ.
Tɔgɛtɔgɛ maa ngɔ a níhi nɛ a he jua wa nɛ a kɛ sika hiɔ pee ɔ,
Nɛ mio tsohi maa hi a bo tsu ɔmɛ a mi.
7 Kojomi ligbi ɔmɛ maa ba,
Tue gblami ligbi ɔmɛ maa ba,
Nɛ Israel maa le.
A gbalɔ ɔ ma plɛ pee kuasia, nɛ nyumu ɔ nɛ naa ní ɔ maa nu godo;
Akɛnɛ nyɛ tɔmi hiɛ babauu he je ɔ, a maa nyɛ nyɛ wawɛɛ.”
8 Jinɛ Efraim bulɔ ɔ ngɛ Mawu kasa nya.
Se amlɔ nɛ ɔ, e gbali ɔmɛ a blɔ ɔmɛ tsuo ngɛ kaa lohwe pɛlitsɛ nulɔ klama;
Ninyɛ ngɛ e Mawu ɔ we ɔ.
9 A hɛ mi kpata kulaa kaa bɔ nɛ e ba ngɛ Gibea ligbi ɔmɛ a mi ɔ.
E ma kai a tɔmi ɔmɛ nɛ e maa gbla a tue ngɛ a yayami ɔmɛ a he je.
10 “Benɛ i na Israel ɔ, a ngɛ kaa wai yiblii ngɛ nga nɔ.
Benɛ i na nyɛ nɛmɛ ɔ, a ngɛ kaa fig kekleekle yiblii ngɛ fig tso nɔ.
11 Efraim hɛ mi nyami ɔ te kɛ ho kaa lohwe pɛlitsɛ;
A be fɔe, a be hɔ ngɔe nɛ a be mi náe hulɔ.
12 Ke a ná bimɛ nɛ a lɛ mɛ po,
Ma gbe mɛ nɛ ekoeko be piɛe;
Ee, musu tloo mɛ ke i hɛ ye he kɛ je a he!
13 Jinɛ Efraim nɛ a du lɛ ngɛ lohwehi a ní yemi he ɔ ngɛ kaa Tiro;
Se amlɔ nɛ ɔ, e sa nɛ Efraim nɛ je e bimɛ kpo nɛ a gbe mɛ.”
14 Oo Yehowa, ha mɛ nɔ́ nɛ e sa kaa o ha mɛ ɔ;
Ha nɛ a mi nɛ sane nɛ nyɔ nyu nɛ ta a nyɔ mi.
15 “Yayami tsuo nɛ a pee ɔ ya nɔ ngɛ Gilgal, nɛ lejɛ ɔ nɛ i ná ninyɛ ha mɛ ngɛ.
Ma fiee mɛ kɛ je ye we ɔ mi ngɛ yayami nɛ a pee ɔ he je.
I be mɛ suɔe hu;
A ma nikɔtɔma amɛ tsuo a tue mi ti.
16 A maa fiaa Efraim ní.
A sipoku ma gbli, nɛ a be yiblii woe.
Ke a fɔ po ɔ, ma gbe a bimɛ nɛ a suɔ wawɛɛ ɔ.”
17 Ye Mawu ɔ ma kua mɛ,
Ejakaa a bui lɛ tue,
Nɛ a maa wo lalaalo ngɛ je ma amɛ a kpɛti.
10 “Israel ji wai tso yaya,* nɛ woɔ yiblii.
Be abɔ nɛ e yiblii ɔ ngɛ hiɛe ɔ, be abɔ nɛ e we afɔle sami latɛ ɔmɛ ngɛ hiɛe;
Ke e zugba a nɔ niba ní ɔmɛ ngɛ hiɛe ɔ, kɛkɛ e wɔ titima amɛ hu a he ngɛ fɛu pee.
2 A tsui peeɔ osato;*
Amlɔ nɛ ɔ, a maa bu mɛ fɔ.
Nɔ ko ngɛ nɛ e maa ku a we afɔle sami latɛ ɔmɛ nɛ e ma puɛ a wɔ titima amɛ.
3 Amlɔ nɛ ɔ, a ma de ke, ‘Wa be matsɛ ko, ejakaa wa yi Yehowa gbeye.
Nɛ mɛni matsɛ maa pee ha wɔ?’
4 A tuɔ munyu puu, a kãa lakpa kita, nɛ a soɔ somihi;
Enɛ ɔ he ɔ, kojomi nɛ maa ba a ngɛ kaa hu yaya nɛ gbɛ fia gɔta tsɔwi nɛ a ngɛ ngmɔ mi ɔ a mi.
5 Samariabi ɔmɛ maa ye gbeye ngɛ na bi amaga nɛ ngɛ Bet Aven ɔ he je.
E ma mi bi ɔmɛ maa ye e he kɔmɔ,
Kaa bɔ nɛ e ma se mawu ɔ we osɔfo ɔmɛ nɛ a nya ngɛ e he kɛ e hɛ mi nyami ɔ he ɔ hu maa pee ɔ,
Ejakaa e maa je a he kɛ ho nyɔguɛ tso mi ya.
6 A kɛ maa ba Asiria kaa nike ní kɛ ha matsɛ ngua ko.
Efraim hɛ mi ma pue si,
Nɛ zo maa gbe Israel ngɛ ga womi nɛ e bu tue ɔ he je.
7 A ma kpata Samaria kɛ e matsɛ ɔ hɛ mi kokooko,
Kaa tso kɔni nɛ fɔɔ si ngɛ nyu hɛ.
8 A ma kpata hehi nɛ ya hiɔwe nɛ ngɛ Bet Aven, he nɛ Israel pee yayami ngɛ ɔ hɛ mi.
Miohi kɛ mio tsohi maa puɛ ngɛ a we afɔle sami latɛ ɔmɛ a nɔ.
Nihi ma de yoku ɔmɛ ke, ‘Nyɛɛ laa wa nɔ!’
Nɛ a ma de kpongu ɔmɛ ke, ‘Nyɛɛ hule kɛ pue wa nɔ!’
9 Oo Israel, o pee yayami kɛ je Gibea be ɔ mi tɔɔ.
A ya nɔ nɛ a pee jã ngɛ lejɛ ɔ.
Ta nɛ ba nihi nɛ a dɛ ɔ a bimɛ a nɔ ngɛ Gibea a kpataa we a hɛ mi kulaa.
10 Ma gbla a tue ngɛ be nɛ i suɔ mi.
Ke a kɛ a tɔmi enyɔ ɔmɛ kpla a kuɛ ɔ,*
Nihi ma bua a he nya kɛ wo mɛ.
11 Efraim ji na eyo nɛ a tsɔse lɛ nɛ e bua jɔ he kaa e maa fiaa ngma,
Lɔ ɔ he ɔ, i ha we nɛ e kɛ e kuɛ nɛ ngɛ fɛu ɔ nɛ tsu ní.
Amlɔ nɛ ɔ, ma ha nɛ nɔ ko maa hi* Efraim nɔ.
Yuda ma hu, nɛ Yakob ma futu zu ɔ mi kɛ ha lɛ.
12 Nyɛ du ní ha nyɛ he ngɛ dami mi nɛ́ nyɛ kpa suɔmi nɛ se pui.
Nyɛ hu zugba nɛ hi kɛ ha ní dumi kɛ ha nyɛ he
Be mi nɛ be ngɛ nɛ nyɛɛ kɛ ma hla Yehowa se blɔ,
Kɛ ya si be nɛ e maa ba nɛ e ba tsɔɔ nyɛ ní ngɛ dami mi ɔ.
13 Se nyɛ hu yiwutso ní peepee,
Nɛ nyɛ kpa nɔ́ nɛ dɛ,
Nɛ nyɛ ye nɔ sisimi yiblii;
Ejakaa nyɛ ngɔ nyɛ hɛ kɛ fɔ nyɛ nitsɛmɛ nyɛ blɔ ɔmɛ a nɔ,
Nyɛ ngɔ nyɛ hɛ kɛ fɔ nyɛ tatsɛmɛ babauu ɔmɛ a nɔ.
14 Hoo peemi maa te si kɛ wo o we bi ɔmɛ,
Nɛ a ma kpata o mahi nɛ a fia gbogbo kɛ wo a he ɔ tsuo a hɛ mi,
Kaa bɔ nɛ Shalman kpata Arbel we ɔ hɛ mi,
Ngɛ ta ligbi ɔ nɔ, benɛ a kɛ binyɛmɛ kɛ a bimɛ tsuo fiaa si nɛ a ku ɔ.
15 Jã nɛ a maa pee mo, oo Betel, ejakaa nyɛ yayami ɔ hiɛ tsɔ.
Bɔ fɛɛ bɔ nɛ ji ɔ, a ma kpata Israel matsɛ ɔ hɛ mi makɛ.”*
11 “Benɛ Israel ji jokuɛ nyumuyo ɔ, i suɔ lɛ,
Nɛ Egipt lɛ i tsɛ ye binyumu ɔ kɛ je.
2 Be abɔ nɛ a* ngɛ mɛ tsɛe ɔ,
Be abɔ nɛ a ngɛ a he hɛe kɛ ngɛ a he jee.
A ya nɔ nɛ a sã afɔle kɛ ha Baal amaga amɛ
Nɛ a sã afɔlehi kɛ ha amaga amɛ.
3 Se imi lɛ i tsɔɔ Efraim nyɛɛmi, nɛ i wo mɛ ngɛ ye nine bɔkɔ mi;
Se a yɔse we kaa imi lɛ i tsa mɛ.
4 I ya nɔ nɛ i kɛ nimli a kpahi* gbla mɛ, i kɛ suɔmi kpahi gbla mɛ;
Nɛ i ba pee kaa nɔ ko nɛ e jeɔ kuɛpã tso kɛ jeɔ a kuɛ,*
Nɛ i je mi mi jɔmi mi kɛ ha a ti nɔ fɛɛ nɔ niye ní.
5 A be a se kpalee kɛ ya Egipt zugba a nɔ hu, se Asiria maa pee a matsɛ,
Ejakaa a sume kaa a maa kpale kɛ ba ye ngɔ.
6 Klaate maa hi e he poe kɛ wo e ma amɛ
Nɛ e ma puɛ e we agbo se lami dade ɔmɛ, nɛ e ma kpata a hɛ mi ngɛ a ga tsɔmi ɔmɛ a he je.
7 Ye ma a fia e pɛɛ si kaa e be mi anɔkuale yee.
E ngɛ mi kaa a tsɛ mɛ ke a ya hiɔwe no ɔ ngɔ* mohu lɛɛ, se nɔ ko nɔ ko ti si.
8 Oo Efraim, kɛ maa pee kɛɛ nɛ ma ngmɛɛ o he?
Oo Israel, kɛ maa pee kɛɛ nɛ ma je mo kɛ ha?
Kɛ maa pee kɛɛ nɛ i kɛ mo maa ye kaa bɔ nɛ i kɛ Adma ye ɔ?
Kɛ maa pee kɛɛ nɛ ma pee mo kaa Zeboiim?
9 I be ye mi mi fumi nɛ nya wa a kpo jee.
I be Efraim hɛ mi kpatae hu,
Ejakaa Mawu ji mi, tsa pi adesa ji mi,
Imi ji Nɔ Klɔuklɔu ɔ nɛ ngɛ nyɛ kpɛti ɔ nɛ;
Nɛ i kɛ mi mi fumi nɛ nya wa be o nɔ bae.
10 A maa nyɛɛ Yehowa se, nɛ e maa huã kaa jata;
Ke e huã a, e bimɛ ɔmɛ kɛ he domi blibliibli maa je pusinɔ he kɛ ba.
11 A kɛ he domi blibliibli maa je Egipt kɛ ba kaa lohwe pɛlitsɛ,
A maa je Asiria zugba a nɔ kɛ ba kaa beleku lahuɛ;
Nɛ ma ha nɛ a ma ba hi a wehi a mi,” Yehowa lɛ de.
12 Efraim kɛ lakpa yemi bɔle mi kɛ kpe,
Nɛ Israel we ɔ kɛ nɔ sisimi bɔle mi kɛ kpe.
Se Yuda lɛɛ, e kɛ Mawu ngɛ nyɛɛe loloolo,
Nɛ e yeɔ Nɔ Klɔuklɔu Pe Kulaa a anɔkuale.”
12 “Efraim ngɛ kɔɔhiɔ yee.
Daa ligbi ɔ, e fieɔ puje he kɔɔhiɔ ɔ se.
E haa nɛ e lakpa yemi kɛ e yiwutso ní peepee hiɛɔ.
A kɛ Asiria so nɛ a muɔɔ nu kɛ ho Egipt ya.
2 Yehowa kɛ Yuda ná sane;
E ma ha nɛ Yakob nɛ bu e blɔ ɔmɛ a he akɔtaa,
E maa wo lɛ hiɔ ngɛ e ní peepee ɔmɛ a nya.
3 E nu e nyɛminyumu ɔ nane se ja* ngɛ fɔmi kotoku mi,
Nɛ e kɛ Mawu hwu ngɛ e he wami ɔ nya.
4 E ya nɔ nɛ e kɛ bɔfo ko hwu, nɛ e ye manye.
E fo ya nɛ e kpa pɛɛ konɛ e jɔɔ lɛ.”
E na lɛ ngɛ Betel, nɛ lejɛ ɔ lɛ Mawu kɛ wɔ tu munyu ngɛ,
5 Yehowa, Mawu tabohiatsɛ ɔ,
Yehowa ji biɛ nɛ a kɛ kaiɔ lɛ.
6 “Lɔ ɔ he ɔ, moo kpale o se kɛ ya o Mawu ɔ ngɔ,
Moo ya nɔ nɛ o hɛɛ suɔmi nɛ se pui kɛ dami sane yemi mi,
Nɛ́ o ngɔ o hɛ kɛ fɔ o Mawu ɔ nɔ be fɛɛ be.
7 Sisimi sɛnihi ngɛ jua yelɔ ɔ dɛ mi;
E suɔ nɔ sisimi.
8 Efraim yaa nɔ nɛ e deɔ ke, ‘I pee niatsɛ niinɛ;
I ná ní babauu.
Nɛ ngɛ ye dengme gbomi ɔ tsuo mi ɔ, a be tɔmi loo nɔ́ yaya ko nae ngɛ mi.’
9 Se imi ji Yehowa o Mawu ɔ kɛ je Egipt zugba a nɔ tɔɔ.
Ma ha nɛ o hi bo tsuhi a mi ekohu
Kaa bɔ nɛ e ji ngɛ be nɛ a to ɔ mi ɔ.*
10 I kɛ gbali ɔmɛ tu munyu,
I ha nɛ a na ninahi fuu,
Nɛ i kɛ nɔ́ he tomi níhi tsu ní kɛ gu gbali ɔmɛ a nɔ.
11 Nɔ sisimi* kɛ lakpa yemi ngɛ Gilead.
A kɛ na kuhi sãã afɔle ngɛ Gilgal,
Nɛ a we afɔle sami latɛ ɔmɛ pee kaa tɛhi nɛ a bua nya glekuu ngɛ nyu dɔhi nɛ a ngɛ ngmɔ nɔ ɔ a mi.
12 Yakob tu fo kɛ ho Aram* kpokpa a* nɔ ya;
Israel sɔmɔ ngɛ lejɛ ɔ konɛ a ha lɛ yo,
Nɛ e hyɛ tohi a nɔ ngɛ yo he je.
13 Yehowa gu gbalɔ ko nɔ kɛ je Israel kɛ je Egipt,
Nɛ e gu gbalɔ ko nɔ kɛ po e he piɛ.
14 Efraim tɔ̃ tɔmi nɛ hɛdɔ ngɛ he;
E muɔ he fɔ yemi ɔ maa hi e nɔ;
E Nyɔmtsɛ ɔ maa wo lɛ hiɔ ngɛ e he guɛ nɛ e gbe ɔ he je.”
13 Ke Efraim tu munyu ɔ, nihi kpokpoɔ;
Jinɛ e ji nɔmlɔ ngua ngɛ Israel.
Se e ye fɔ ngɛ Baal he je, nɛ e gbo.
2 Amlɔ nɛ ɔ, a kpale pee yayami kɛ piɛɛ he
Nɛ a kɛ a sika hiɔ ɔ pee dade amagahi;
A kɛ ga lemi peeɔ amagahi, kɛ níhi tsuo nɛ ga ní tsuli peeɔ ɔ.
A deɔ mɛ ke, ‘Ha nɛ nihi nɛ a sãã afɔle ɔ nɛ a fĩɔ na bi ɔ nya he.’
3 Lɔ ɔ he ɔ, a maa pee kaa mɔtu bɔku,
Kaa bɔ́ nɛ́ e kɛ we kɛkɛ e laa,
Kaa jakati nɛ ahumi muɔɔ kɛ je ngma fiaami he kɛ yaa,
Kaa lasuku nɛ jeɔ kpo kɛ jeɔ tsu yi mi puɔ mi.
4 Se imi ji Yehowa o Mawu ɔ kɛ je Egipt zugba a nɔ tɔɔ;
O li Mawu kpa ko kaa ja imi,
Nɛ ngɛ ye se ɔ, yi wami helɔ kpa ko be.
5 I le mo ngɛ nga a nɔ, ngɛ zugba nɛ nyu be nɔ ɔ nɔ.
6 A lohwehi a niye mi he ɔmɛ ha nɛ a tɔ,
A tɔ, nɛ a tsui wo e he nɔ.
Nɛ lɔ ɔ he je ɔ, a hɛ je ye nɔ.
7 Ma pee kaa jata wayo kɛ ha mɛ,
Kaa ngatsɛ nɛ wo ka ngɛ blɔ he.
8 Ma tua mɛ kaa osisiblisi nɛ e bimɛ laa,
Nɛ ma fɛ a gugue.*
Nɛ ma tsɔtslɔɔ a mi ngɛ lejɛ ɔ kaa jata;
Nga mi lohwe awi yelɔ ma tsɔtslɔɔ a mi.
9 E ma kpata o hɛ mi, Oo Israel,
Ejakaa o te si kɛ wo mi, o te si kɛ wo o yemi kɛ bualɔ ɔ.
10 Amlɔ nɛ ɔ, jije o matsɛ ɔ ngɛ, konɛ e he o yi wami ngɛ o ma amɛ tsuo a mi,
Nɛ jije o nɔ yeli ɔmɛ* nɛ o de ngɛ a he ke,
‘Ha mi matsɛ kɛ ma nikɔtɔmahi’ ɔ ngɛ?
11 I ha mo matsɛ ngɛ abofu mi,
Nɛ ma ngɔ lɛ kɛ je ngɛ ye mi mi la a mi.
12 A fĩ Efraim tɔmi ɔ;*
A kɛ e yayami ɔ to.
13 Fɔmi mi kɔɔmi maa ba e nɔ.
Se e ji bi nɛ e be juɛmi;
Ke e su be nɛ a ma fɔ lɛ ɔ, e bɛ.
14 Ma kpɔ̃ mɛ kɛ je Yɔkɔ* he wami ɔ dɛ mi.
Ma je mɛ kɛ je gbenɔ mi.
Oo Gbenɔ, jije nɔ́ nɛ o kɛ tsɛ̃ɔ nɔ ɔ ngɛ?
Oo Yɔkɔ, jije nɔ́ nɛ o kɛ puɛɔ ní ɔ ngɛ?
Mi mi sami maa laa ngɛ ye hɛ mi.
15 Ke e bɔ ngɛ glã amɛ a kpɛti po,
Puje he kɔɔhiɔ, nɛ ji Yehowa kɔɔhiɔ ɔ maa ba,
E maa je nga kplanaa a nɔ kɛ ba, nɛ e ma ha nɛ e vu ɔ mi ma gbli nɛ e nyu hɛngmɛ ɔ ma kpa ba mi.
Jamɛ a nɔ ɔ maa muɔɔ e weto ní nɛ a he jua wa a tsuo.
16 A maa bu Samaria fɔ, ejakaa e tsɔ atuã kɛ si Mawu.
A maa nɔɔ si ngɛ klaate nya,
A kɛ a bimɛ ɔmɛ maa fiaa si nɛ a maa ku wɔtsɔwɔtsɔ,
Nɛ a ma gba a yihɔyi ɔmɛ a muklii ɔmɛ.”
14 “Oo Israel, moo kpale kɛ ba Yehowa o Mawu ɔ ngɔ,
Ejakaa o tɔmi ɔ ha nɛ o nane tɔ̃tɔ̃.
2 Moo kpale kɛ ba Yehowa ngɔ kɛ munyu nɛ ɔmɛ,
Mo dɛ lɛ ke, ‘Ngɔɔ wa tɔmi ɔ kɛ ke wɔ nɛ o pɛtɛ nɔ́ kpakpa he,
Nɛ waa kɛ wa nya ma je o yi, kaa bɔ nɛ waa kɛ na ku wawi sãã afɔle ɔ.*
3 Asiria be wa yi wami hee.
Wa be okpɔngɔhi a nɔ hie,
Nɛ wa be wa nine nya ní tsumi ɔmɛ dee hu ke, “Oo wa Mawu!”
Ejakaa mo ji nɔ nɛ naa awusa* mɔbɔ.’
4 Ma tsa mɛ, nɛ a maa ye mi anɔkuale be fɛɛ be.
Ma suɔ mɛ kɛ je ye tsui mi,
Ejakaa ye we abofu ɔ je e nɔ.
5 Ma pee kaa bɔ́ kɛ ha Israel.
E maa pee flɔflɔɔflɔ kaa lili mɔmɔ
Nɛ e sipokuhi maa sɛ zu mi kaa Lebanon tsohi.
6 E kɔni ɔmɛ maa bɔ,
E hɛ mi nyami ɔ maa pee kaa oliv tso,
Nɛ e maa je via kaa Lebanon tso.
7 A maa hi e hɔ̃ ɔ mi ekohu.
A ma du ngma,* nɛ a ma tsɛ̃ flɔflɔɔflɔ kaa wai tso.
E ma he biɛ kaa Lebanon tso.*
8 Efraim ma de ke, ‘Mɛni ekohu lɛ i kɛ amagahi maa pee?’
Ma ha heto nɛ ma hyɛ e nɔ.
Ma pee kaa junipa tso nɛ bɔ kusuu.
Ye nɔ lɛ a maa na o yiblii ɔ ngɛ.”
9 Mɛnɔ ji juɛmitsɛ? Ha nɛ e nu ní nɛ ɔmɛ a sisi.
Mɛnɔ ji ní lelɔ? Ha nɛ e le ní nɛ ɔmɛ.
Ejakaa Yehowa blɔ ɔmɛ da,
Nɛ nɔ nɛ da a maa nyɛɛ ngɛ nɔ;
Se yayami peeli lɛɛ, a ma tɛ si ngɛ nɔ.
E ji biɛ Hoshaya kpiti pomi, nɛ e sisi ji, “Yah He E Yi Wami.”
Aloo “yo nɛ maa bɔ ajuama.”
Aloo “ajuama bɔmi.”
E sisi ji, “Mawu Ma Du Wu.”
E sisi ji, “A Be Lɛ Mɔbɔ Nae.”
E sisi ji, “Pi Ye We Bi Ji Nyɛ.”
Ngɛ Hebri gbi mi ɔ, “Israel binyumu ɔmɛ.”
Hyɛ Ho 1:9 sisi ningma.
Hyɛ Ho 1:6 sisi ningma.
Aloo “ajuama bɔmi ɔ.”
Ngma nɛ a ngɛ tsɔɔe ngɛ hiɛ ɔ ji hwiit, blɛfo kɛ a henɔ ɔmɛ.
Aloo “Ye Baal.”
E sisi ji, “Mawu Ma Du Wu.”
Hyɛ Ho 1:6 sisi ningma.
Hyɛ Ho 1:9 sisi ningma.
Nɛ ji, keekihi nɛ a kɛ tsuɔ ní ngɛ lakpa jami mi ɔ.
Homa kake peeɔ lita 220 (kwat gbigbli 200). Hyɛ Mi Tsɔɔmi Munyu B14.
Aloo “nɛ imi hu i kɛ mo be bɔmi náe.”
Ngɛ Hebri gbi mi ɔ, “ligbihi fuu.”
Aloo “we mi mawuhi.”
Aloo “ma kpata o yayo hɛ mi.”
Aloo “a hɛ mi ma kpata.”
Aloo “blɔ tsɔɔmi ɔ.”
Baiblo komɛ de ke “A tsake ye hɛ mi nyami kɛ pee hɛ mi si puemi.”
Aloo “a woɔ a klaa nɔ kɛ haa yayami peemi.” Hyɛ Munyu Komɛ A Sisi Tsɔɔmi, “Klaa.”
Aloo “A kɛ a he maa wo tuutuu pomi mi vii.”
Ngɛ Hebri gbi mi ɔ, “Jeɔ tsui kɛ jeɔ.”
Aloo “klaali a tso.”
Aloo “a we ajuama bɔmi ɔ.”
Ngɛ Hebri gbi mi ɔ, “jami he tuutuu poli.”
Aloo “ajuama bɔe.”
Ngɛ Hebri gbi mi ɔ, “he ko nɛ ngɛ gbajaa.”
Aloo “dã nɛ a kɛ hwiit pee ɔ.”
Aloo “A kɛ a he woɔ tuutuu pomi mi vii.”
Ngɛ Hebri gbi mi ɔ, “e tsɛ̃i ɔmɛ.”
Aloo “Kɔɔhiɔ maa ngɔ e pɛli ɔmɛ kɛ bɛɛ lɛ kɛ ho.”
Aloo “atuã tsɔli ɔmɛ.”
Aloo “ma gbla mɛ tsuo a tue.”
Ngɛ Hebri gbi mi ɔ, “ngɛ e hɛ mi.”
Aloo “zugbahi.”
Baiblo komɛ de ke “Ngɛ nyɔhiɔ kake mi ɔ, a ma kpata a hɛ mi.”
Aloo “jata ku wayo kɛ e kuɛ he bwɔmi.”
Ngɛ Hebri gbi mi ɔ, “ye hɛ mi.”
Aloo “mɔbɔ nami.”
Baiblo komɛ de ke “Ejakaa ga yaya nɛ a to he je ɔ, ke a ma a, a tsui ngɛ kaa flɔɔnɔɔ.”
Ngɛ Hebri gbi mi ɔ, “kojoli ɔmɛ.”
Ngɛ Hebri gbi mi ɔ, “e be tsui.”
Nɛ tsɔɔ kaa, tsa pi kɛ ya jami nɛ e nɔ kuɔ nɔ.
Aloo “kaa nihi nɛ a he tsɔ.”
Aloo “daa si.”
Aloo “ma se bi.”
Aloo “blɔ tsɔɔmi ɔ.”
Baiblo komɛ de ke “A maa kpale a se.”
Aloo “Peelɔ.”
Aloo “mɛ nitsɛmɛ a klaa nɔ́.”
Aloo “gbijlɔ yemi ligbi nɛ a to ɔ nɔ.”
Aloo “zo mawu ɔ.”
Baiblo komɛ de ke “nɛ e ngɛ si hae.”
Aloo “saneɔ; nɔ da tlotlootlo.”
Nɛ ji, be nɛ a maa tloo a tue gblami ɔ kaa kuɛpã tso ɔ.
Aloo “ma ha nɛ nɔ ko kɛ kuɛpã tso maa fɔ.”
Ngɛ Hebri gbi mi ɔ, “a ma ma e nya.”
Nɛ ji, gbali ɔmɛ kɛ ni kpahi nɛ a tsɔ mɛ kaa a ya tsɔɔ Israel ní ɔ.
Aloo “mi mi jɔmi kpahi,” kaa fɔli a nɔ́.
Ngɛ Hebri gbi mi ɔ, “tsitsa mi.”
Nɛ tsɔɔ kaa, a tsɛ mɛ kɛ ya jami nɛ e nɔ kuɔ mi.”
Aloo “tsui.”
Ngɛ Hebri gbi mi ɔ, “ye mi mi sami ɔ dɔ la.”
Aloo “nane se kpo.”
Baiblo komɛ de ke “ngɛ gbijlɔ yemi be ɔ mi ɔ.”
Aloo “Nyakpɛ níhi; kunya tsumi.”
Aloo “Siria.”
Ngɛ Hebri gbi mi ɔ, “zugba a.”
Ngɛ Hebri gbi mi ɔ, “ma fɛ nɔ́ nɛ ha a tsui nɔ ɔ.”
Ngɛ Hebri gbi mi ɔ, “kojoli ɔmɛ.”
Aloo “A baa Efraim tɔmi ɔ yi.”
Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
Ngɛ Hebri gbi mi ɔ, “waa kɛ wa nya maa pee na ku wawi kɛ sã afɔle ha mo.”
Ngɛ Hebri gbi mi ɔ, “bi nɛ e be tsɛ.”
Ngma nɛ a ngɛ tsɔɔe ngɛ hiɛ ɔ ji hwiit, blɛfo kɛ a henɔ ɔmɛ.
Ngɛ Hebri gbi mi ɔ, “E kaimi ɔ ma hi kaa Lebanon tso.”