YOEL
1 Yehowa de Petuel binyumu Yoel* ke e tu munyu nɛ ɔmɛ:
2 “Nyɛ nikɔtɔmahi, nyɛɛ bu tue,
Nyɛ nihi tsuo nɛ nyɛ ngɛ zugba a nɔ, nyɛɛ bu tue.
Anɛ nɔ́ ko kaa kikɛ ya nɔ hiɛ ngɛ nyɛ yi nɔ,
Loo ngɛ nyɛ nɛmɛ ɔmɛ a yi nɔ lo?
3 Nyɛɛ tu he munyu kɛ tsɔɔ nyɛ bimɛ,
Nɛ nyɛ bimɛ ɔmɛ hu nɛ́ a tu he munyu kɛ tsɔɔ a bimɛ,
Nɛ́ a bimɛ ɔmɛ hu nɛ a tu he munyu kɛ tsɔɔ yi nɔ nɛ maa nyɛɛ se ɔ.
4 Nɔ́ nɛ baalɛhi nɛ a puɛɔ ní ɔ ye nɛ e piɛ ɔ, baalɛhi nɛ a ngɛ pɛli ɔ ba ye;
Nɛ nɔ́ nɛ baalɛhi nɛ a ngɛ pɛli ɔ ye nɛ e piɛ ɔ, baalɛhi nɛ a be pɛli ɔ ba ye;
Nɛ nɔ́ nɛ baalɛhi nɛ a be pɛli ɔ ye nɛ e piɛ ɔ, baalɛhi nɛ a yeɔ ní babauu ɔ ba ye.
5 Nyɛ dã tɔli, nyɛ hɛ nɛ tsɛ̃ nɛ́ nyɛ fo ya!
Nyɛ wai nuli tsuo, nyɛɛ wo yana,
Ejakaa nyɛ be wai dɔkɔdɔkɔ nae nɛ nyɛ maa nu hu.
6 Ejakaa ma ko ba tua ye zugba a, e tabuli ɔmɛ a he wa nɛ a he hiɛ babauu.
A lunguhi ngɛ kaa jata lungu, nɛ a tsitsahi hu ngɛ kaa jata tsitsa wu.
7 A kpata ye wai tso ɔmɛ a hɛ mi, nɛ a ha nɛ ye fig tso ɔmɛ pee tso kpokuhi,
A kpe tso ɔmɛ a he toto tsuo, nɛ a sake mɛ ngɔ pue he,
Nɛ tso kɔni ɔmɛ a he pee futaa.
8 Nyɛɛ wo yana kaa bɔ nɛ yomiyo* buɔ kpekpe kɛ woɔ yana haa nyumu nɛ e ná we nɛ e kpee lɛ lolo nɛ e gbo ɔ.*
9 Ngma afɔle kɛ dã afɔle be Yehowa we ɔ hu;
Osɔfo ɔmɛ, nɛ ji nihi nɛ a sɔmɔɔ Yehowa a ngɛ aywilɛho yee.
10 Ngmɔ ɔ hɛ mi kpata, zugba a ngɛ aywilɛho yee;
Ejakaa ngma* a hɛ mi kpata, wai ehe ɔ gbli, nɛ nu bɛ hu.
11 Ngmɔ huli ɔmɛ a he mi po, wai tso he suali ɔmɛ ngɛ ya foe,
Ejakaa hwiit kɛ barli be;
Nɛ niba ní ɔmɛ a hɛ mi kpata.
12 Wai tso ɔmɛ gbli,
Fig tso ɔmɛ ngla.
Pomegranet tso ɔmɛ, tã amɛ, kɛ aplo ɔmɛ,
Tsohi tsuo nɛ ngɛ ngmɔ ɔ mi ɔ gbli;
Ejakaa ni ɔmɛ a bua jɔmi ɔ plɛ pee hɛ mi si puemi.
13 Nyɛ osɔfohi, nyɛɛ ha kpekpe nɛ nyɛɛ ye aywilɛho;*
Nyɛ nɛ nyɛ sɔmɔɔ ngɛ afɔle sami latɛ ɔ he, nyɛɛ wo yana.
Nyɛ ye Mawu ɔ sɔmɔli, nyɛɛ ba sɔlemi we ɔ nɛ nyɛɛ ha kpekpe nyɔ ɔ mi tsuo;
Ejakaa a kpa ngma afɔle kɛ wai afɔle sami ngɛ nyɛ Mawu ɔ we ɔ.
14 Nyɛ fã ke a ha hwɔ;* nyɛ ha nɛ́ a pee kpe klɛdɛɛ.
Nyɛ bua nikɔtɔma amɛ kɛ zugba a nɔ bi ɔmɛ tsuo a nya
Kɛ ya Yehowa nyɛ Mawu ɔ we ɔ, nɛ nyɛ fo ya kɛ bi Yehowa yemi kɛ buami.
15 Jamɛ a ligbi ɔ maa pee gbeye!
Ejakaa Yehowa ligbi ɔ su si ta,
Jamɛ a ligbi ɔ maa ba kaa hɛ mi kpatami nɛ je Ope ɔ ngɔ!
16 Anɛ niye ní laa we ngɛ wa hɛ mi lo?
Anɛ bua jɔmi kɛ nyami se pui ngɛ wa Mawu ɔ we ɔ lo?
Nito he ɔmɛ fɔɔ si gu.
A hule ngma gba amɛ ngɔ pue si, ejakaa ngma amɛ ngla.
18 Lohwe ɔmɛ po ngɛ kɛmɛe!
Na amɛ ngɛ kpae kɛ ngɛ yae kɛ ngɛ bae, ejakaa a nɛ nga nɛ a ma kpe!
Nɛ to ɔmɛ ngɛ nɔ́ nae.
19 Oo Yehowa, mo lɛ ma tsɛ;
Ejakaa la sã lohwehi a ní yemi he ɔmɛ ngɛ nga a nɔ,
Nɛ la lilɛ sã tsohi tsuo ngɛ nga a nɔ.
20 Nga mi lohwehi po ngɛ o se blɔ hlae,
Ejakaa pa amɛ mii ta,
Nɛ la sã lohwehi a ní yemi hehi nɛ ngɛ nga a nɔ ɔ.
2 “Nyɛ kpa titimati ɔ ngɛ Zion!
Nyɛ kpa ta ngmlaa ngɛ ye yoku klɔuklɔu ɔ nɔ.
Sawale nɛ nu zugba a nɔ bi ɔmɛ tsuo,
Ejakaa Yehowa ligbi ɔ ma! E su si ta!
2 E ji ligbi nɛ diblii maa wo, nɛ́ je mi ma yu tuu,
E ji ligbi nɛ bɔku maa wo, nɛ́ je mi ma yu tuu,
Kaa makɛ la nɛ kpɛ kɛ pue yoku ɔmɛ a nɔ.
Ma ko ngɛ nɛ́ e mi bimɛ a he hiɛ babauu nɛ a he wa.
Ma ko hí si hiɛ nɛ ngɛ kaa lɛ,
Nɛ ma ko be si hie kaa lɛ kɔkɔɔkɔ
Ngɛ yi nɔhi tsuo a mi.
3 La sãã níhi ngɛ e hɛ mi,
Nɛ la sãã níhi ngɛ e se.
Zugba nɛ ngɛ e hɛ mi ɔ ngɛ kaa Eden abɔɔ ɔ,
Se e se blɔ lɛɛ, nga kplanaa,
Nɛ nɔ́ ko nɔ́ ko yi ná we wami ngɛ nɔ.
4 A ngɛ kaa okpɔngɔhi,
Nɛ a tuɔ fo kaa ta okpɔngɔhi.
5 Ke a ngɛ tuue ngɛ yoku ɔmɛ a nɔ ɔ, a nane si hii pɛe kaa ta zugba lɛhi,
A pɛmi ngɛ kaa bɔ nɛ ke nga* ngɛ sãe ngɛ la mi nɛ́ e pɛ́ɔ ɔ.
A ngɛ kaa ma nɛ he wa nɛ e gba ta.
6 Nihi a tsui maa po ngɛ a he je.
Gbeye maa hi nɔ fɛɛ nɔ hɛ mi.
7 A he sɔɔ kɛ tuaa he nyɛlɔ kaa tabuli,
A kuɔɔ gbogbo kaa tabuli,
A ti nɔ fɛɛ nɔ yaa e hɛ mi tɛɛ,
Nɛ a ji a blɔ nɔ.
8 A tsitsɛɛ we a sibi kɛ pue si;
Nɔ fɛɛ nɔ nyɛɔ e blɔ nɔ tɛɛ.
Ke ta hwumi níhi* ha nɛ a kpɛti ni komɛ nɔ si ɔ,
Ni kpa amɛ ji a blɔ nɔ.
9 A tuɔ fo kɛ sɛɛ ma a mi, a maa fo ngɛ gbogbo ɔmɛ a nɔ.
A kuɔɔ we ɔmɛ, a guɔ saflɛ ɔmɛ a mi kaa juli.
10 Zugba mimiɛɔ nɛ hiɔwe hosoɔ ngɛ a hɛ mi.
Pu kɛ nyɔhiɔ wo diblii,
Nɛ dodoe ɔmɛ kpɛ we hu.
11 Yehowa ma wo e gbi nɔ ngɛ e tabo ɔ hɛ mi, ejakaa e tabuli ɔmɛ a he hiɛ babauu.
Nɔ nɛ haa nɛ e munyu baa mi ɔ he kle;
Yehowa ligbi ɔ kle nɛ e ngɛ gbeye wawɛɛ.
Mɛnɔ ma nyɛ maa da nya”?
12 Nɔ́ nɛ Yehowa de ji nɛ ɔ nɛ: “Amlɔ nɛ ɔ po ɔ, nyɛɛ kpale kɛ ba ye ngɔ kɛ nyɛ tsui tsuo,
Kɛ hwɔ hami kɛ ya fomi kɛ yana womi.
13 Nyɛ ha nɛ e hao nyɛ ngɛ nyɛ tsui mi, se pi nyɛ tadehi kɛkɛ nɛ nyɛ ma hia,
Nɛ́ nyɛɛ kpale kɛ ba Yehowa nyɛ Mawu ɔ ngɔ,
Ejakaa e mi mi sãã lɛ ngɛ nɔ he* nɛ e naa nɔ mɔbɔ, e mi mi fu we mla, nɛ e suɔmi nɛ se pui ɔ hiɛ babauu,
Nɛ e ma tsake e juɛmi* ngɛ haomi nɛ e kɛ maa ba a he.
14 Mɛnɔ lɛ le? Eko ɔ, e maa kpale e se, nɛ e ma tsake e juɛmi*
Nɛ e maa jɔɔ nyɛ,
Konɛ nyɛɛ sã ngma afɔle kɛ dã afɔle kɛ ha Yehowa nyɛ Mawu ɔ.
15 Nyɛ kpa titimati ngɛ Zion!
Nyɛ fã ke a ha hwɔ;* nyɛ ha nɛ́ a pee kpe klɛdɛɛ.
16 Mo bua ni ɔmɛ a nya; moo tsu asafo ɔ he.
Bua nyumu nikɔtɔma amɛ a nya; bua jokuɛwi ɔmɛ kɛ bimwɔwi ɔmɛ a nya.
Ha nɛ ayɛflo huno nɛ́ e je kpo ngɛ e se tsu mi, nɛ́ ayɛflo nɛ e je kpo ngɛ e ayɛflo tsu mi.
17 Osɔfo ɔmɛ, nɛ ji nihi nɛ a sɔmɔɔ Yehowa a
Nɛ́ a fo ya ngɛ ablanaa a kɛ afɔle sami latɛ ɔ a kpɛti ke:
‘Oo Yehowa, moo na o we bi mɔbɔ;
Ko ha nɛ o weto ní ɔ nɛ pee he guɛ gbemi nɔ́;
Ko ha nɛ je ma amɛ nɛ a ba ye a nɔ.
Mɛni he je nɛ e sa nɛ je ma amɛ nɛ a bi ke, “Jije a Mawu ɔ ngɛ?”’
18 Kɛkɛ ɔ, Yehowa kɛ hɛdɔ maa po e zugba a he piɛ
Nɛ e mi mi maa sã lɛ ngɛ e we bi a he.
19 Yehowa ma ha e we bi ɔmɛ heto ke:
‘Hyɛ, ma ha nyɛ ngma, kɛ wai ehe, kɛ nu
Nɛ nyɛ maa tɔ wawɛɛ nitsɛ;
I be hae nɛ nyɛɛ pee he guɛ gbemi nɔ́ ngɛ je ma amɛ a kpɛti hu.
20 Ma fiee nɔ nɛ ngɛ yiti je ɔ kɛ je o he;
Ma fiee lɛ kɛ ho zugba gbigblii nɛ fɔɔ si gu nɔ ya,
Nɛ tabo nɛ nyɛɛ e hɛ mi ɔ hɛ mi maa tsɔɔ puje he wo ɔ*
Nɛ e sekpɛ tabo ɔ hɛ mi maa tsɔɔ pusinɔ he wo ɔ.*
E gbogboe ɔ maa je fu kanikani,
E maa je fu kɛ ya si hiɔwe tɔɔ;
Ejakaa Mawu maa pee ní nguahi.’
21 Oo zugba, koo ye gbeye.
O bua nɛ jɔ nɛ́ o nya, ejakaa Yehowa maa pee ní nguahi.
22 Nyɛ nga mi lohwehi, nyɛ ko ye gbeye,
Ejakaa ní yemi hehi nɛ a ngɛ nga a nɔ ɔ maa pee flɔflɔɔflɔ,
Nɛ tso ɔmɛ maa wo yiblii;
Fig tso kɛ wai tso maa wo yiblii babauu.
23 Nyɛ Zionbi, nyɛ nya nɛ nyɛ bua nɛ jɔ ngɛ nɔ́ nɛ Yehowa nyɛ Mawu ɔ maa pee ha nyɛ ɔ he;
Ejakaa e ma ha nɛ gbo nyu maa nɛ ha nyɛ bɔ nɛ sa,
Nɛ e ma ha nɛ gbo nyu kɛ gbiɛ nyu maa nɛ kɛ ha nyɛ kaa sa a.
24 Ngma gbeemi he ɔ ma hyi tɔ kɛ ngma,
Nɛ wai ngami he ɔ ma hyi tɔ kɛ wai, nɛ nu ngami he ɔ hu ma hyi tɔ kɛ nu.
25 Níhi nɛ baalɛhi nɛ a ngɛ pɛli, baalɛhi nɛ a be pɛli, baalɛhi nɛ a yeɔ ní babauu kɛ baalɛhi nɛ a puɛɔ ní
Nɛ a ji ye tabo ngua nɛ i tsɔ kɛ ba nyɛ kpɛti ɔ ba puɛ jehahi babauu ɔ,
Ma to nyɛ nane mi ngɛ he.
26 Nyɛ maa ye ní nɛ nyɛ maa tɔ,
Nɛ nyɛ ma je Yehowa nyɛ Mawu ɔ,
Nɔ nɛ e pee ní nguanguahi kɛ ha nyɛ ɔ biɛ ɔ yi;
Zo be ye ma a gbee hu.
27 Kɛkɛ ɔ, nyɛ ma ná maa le kaa i kɛ Israel ngɛ,
Nɛ imi ji Yehowa nyɛ Mawu ɔ nɛ, nɔ kpa ko be!
Zo be ye ma a gbee hu.
28 Lɔ ɔ se ɔ, ma plɛ ye mumi ɔ ngɔ pue he lo fɛɛ he lo nɔ,
Nɛ nyɛ binyumu ɔmɛ kɛ nyɛ biyi ɔmɛ maa gba,
Nyɛ nimowi ɔmɛ maa nla nlamihi,
Nɛ nyɛ nihewi ɔmɛ maa na ninahi.
29 Ye nyɔguɛ ɔmɛ kɛ ye mawayi ɔmɛ po
Ma plɛ ye mumi ɔ ngɔ pue a nɔ ngɛ jamɛ a be ɔ mi.
30 Nɛ ma ha nɛ a maa na nyakpɛ níhi* ngɛ hiɔwe kɛ zugba a nɔ,
Muɔ, la, kɛ lasuku kpii.
31 Pu ɔ maa wo diblii, nɛ nyɔhiɔ ɔ ma plɛ pee muɔ
Loko Yehowa ligbi ngua nɛ ngɛ gbeye ɔ maa ba.
32 Nɛ nɔ fɛɛ nɔ nɛ e tsɛɔ Yehowa biɛ ɔ, a ma he e yi wami;
Ni komɛ maa je mi slɔkee ngɛ Zion Yoku ɔ nɔ kɛ ngɛ Yerusalem kaa bɔ nɛ Yehowa de ɔ,
Nihi nɛ Yehowa tsɛ mɛ ɔ, mɛ lɛ a yi ná wami.
3 “Hyɛ! jamɛ a be ɔ mi ɔ,
Ke i kpale Yudabi kɛ Yerusalembi nɛ a nuu mɛ nyɔguɛ ɔ kɛ ba a,
2 Ma bua je ma amɛ tsuo hu a nya,
Nɛ i kɛ mɛ ma kple kɛ ba Yehoshafat* Dɔgba a mi.
Ma kojo mɛ ngɛ lejɛ ɔ
Ngɛ níhi tsuo nɛ a pee ye ma Israel nɛ ji ye weto ní ɔ he je,
Ejakaa a gbɛ mɛ ngɔ fĩa je ma amɛ a mi,
Nɛ a gba ye zugba a kɛ ha a he.
3 A fɔɔ sɔ kɛ gbaa ye we bi ɔmɛ kɛ haa a he;
A kɛ jokuɛ nyumuyo tsakeɔ tuutuu polɔ,
Nɛ a juaa jokuɛ yoyo kɛ heɔ wai nɛ a nuɔ.
4 Tiro kɛ Sidon kɛ Filistia kpokpa a tsuo,
Anɛ nyɛ ngɛ nɔ́ ko kɛ si mi lo?
Anɛ i pee nyɛ nɔ́ ko nɛ nyɛ ngɛ lue yee ngɛ he lo?
Ke lue nyɛ ngɛ yee ɔ,
Lɛɛ, i kɛ oya yemi maa to nyɛ nane mi.
5 Ejakaa nyɛ muɔɔ ye sika hiɔ ɔmɛ kɛ ye sika tsu ɔmɛ,
Nɛ nyɛ muɔɔ ye juetli kpakpa amɛ kɛ ya wo nyɛ jami he ɔmɛ;
6 O jua Yudabi ɔmɛ kɛ Yerusalembi ɔmɛ kɛ ha Helabi ɔmɛ,
Bɔ nɛ pee nɛ o je mɛ kɛ je a zugba a he kɛ ya tsitsaa lokoo;
7 Enɛ ɔ he ɔ, ma ha nɛ a maa je he nɛ o jua mɛ kɛ ho ɔ kɛ ba,
Nɛ ma to nyɛ nane mi.
8 Ma jua o binyumu ɔmɛ kɛ o biyi ɔmɛ kɛ ha Yudabi ɔmɛ,
Nɛ a maa jua mɛ kɛ ha Shebabi ɔmɛ, nɛ ji ma nɛ ngɛ tsitsaa lokoo ɔ,
Yehowa nitsɛ lɛ de.
9 Nyɛɛ fiɛɛ ngɛ je ma amɛ a mi ke:
‘Nyɛ dla nyɛ he* kɛ ha ta! Nyɛ ha nɛ nyumu he wali ɔmɛ nɛ a pee klaalo!
Nyɛ ha nɛ tabuli ɔmɛ nɛ a ba hɛ mi, nɛ́ a hia ta!
10 Nyɛɛ ngɔ nyɛ kpakplaa amɛ kɛ pee klaatehi, nɛ́ nyɛɛ ngɔ nyɛ tso he suami ha amɛ kɛ pee akplɔhi.
Nɔ nɛ e he wɛ nɛ e de ke: “Ye he wa.”
11 Nyɛ je mahi nɛ nyɛ bɔle wɔ kɛ kpe, nyɛɛ ba nɛ nyɛ ba ye bua, nyɛ ba bua nyɛ he nya!’”
Oo Yehowa, moo ngɔ o he wali ɔmɛ* kɛ kple kɛ ba lejɛ ɔ.
12 “Je ma amɛ nɛ́ a te si nɛ a ba Yehoshafat Dɔgba a mi;
Ejakaa lejɛ ɔ lɛ ma hi kɛ kojo je mahi nɛ a bɔle si kɛ kpe ɔ.
13 Mo wo o ní kpami ha a, ejakaa ní kpami be su.
Mo kple kɛ ba nɛ o ba naa wai yiblii nɔ, ejakaa wai ngami he ɔ hyi tɔ.
Wai ngami muɔ ɔmɛ hyi tɔ nɛ a ngɛ si pue, ejakaa a yayami ɔmɛ hiɛ babauu.
14 Nimli asafo ngɛ kojomi dɔgba a mi,
Ejakaa e be kɛe nɛ Yehowa ligbi ɔ maa ba ngɛ kojomi dɔgba a mi.
15 Pu kɛ nyɔhiɔ maa wo diblii,
Nɛ dodoe ɔmɛ be kpɛe hu.
16 Nɛ Yehowa maa wo gbi ngɛ Zion,
E ma wo e gbi nɔ ngɛ Yerusalem.
Nɛ hiɔwe kɛ zugba ma hoso;
Se Yehowa maa pee wesa he kɛ ha e we bi,
E maa pee gbogbo nɛ he wa kɛ ha e ma Israel.
17 Nɛ nyɛ ma ná maa le kaa imi ji Yehowa nyɛ Mawu ɔ, nɔ nɛ ngɛ Zion, ye yo klɔuklɔu ɔ nɔ ɔ.
Yerusalem ma ba pee he klɔuklɔu,
Nɛ nibwɔhi* be e mi gue kɛ be hu.
18 Jamɛ a ligbi ɔ, wai nɛ ngɔɔ maa be kɛ je yoku ɔmɛ a nɔ,
Nyɔ nyu ma kple kɛ je kpongu ɔmɛ a nɔ,
Nɛ nyu maa be ngɛ Yuda pa amɛ tsuo a mi.
Nyu hɛngmɛ maa hia kɛ je Yehowa we ɔ,
Nɛ e ma pue Akasia Tso Dɔgba a* mi.
19 Se Egipt maa fɔ si gu,
Nɛ Edom maa pee nga kplanaa,
Ngɛ yi mi nɛ a wa Yudabi ɔmɛ ɔ he je.
A pue nihi nɛ a pee we nɔ́ ko ɔ a muɔ si ngɛ Yudabi ɔmɛ a zugba a nɔ.
20 Se nihi maa hi Yuda
Kɛ Yerusalem yi nɔhi tsuo.
21 Ma bu a muɔ nɛ sane ngɛ he ɔ kaa sane ko be he;
Nɛ Yehowa maa hi Zion.”
E sisi ji “Yehowa ji Mawu.”
Aloo “yiheyo.”
Aloo “haa e huno ɔ.”
Ngma nɛ a ngɛ tsɔɔe ngɛ hiɛ ɔ ji hwiit, blɛfo kɛ a henɔ ɔmɛ.
Aloo “nɛ nyɛ gba nyɛ gugue nɔ ma.”
Ngɛ Hebri gbi mi ɔ, “a nyɛ ngma klɔuklɔu.”
Baiblo komɛ de ke “fig nɛ gbli.”
Aloo “gbli ngɛ a sofi ɔmɛ a sisi.
Nga nɛ a ngɛ tsɔɔe ngɛ hiɛ ɔ ji hwiit kɛ blɛfo kɛ a henɔ ɔmɛ a tsohi nɛ a poo nɛ e piɛ ngɛ ngmɔ nɔ.
Aloo “Ke kɛɛ mi bihi.”
Aloo “e dlooɔ nɔ.”
Aloo “e ma pia e he.”
Aloo “e ma pia e he.”
Ngɛ Hebri gbi mi ɔ, “a nyɛ ngma klɔuklɔu.”
Nɛ ji Wo Gbogboe ɔ.
Nɛ ji Mediterenia Wo ɔ.
Aloo “okadihi.”
E sisi ji “Yehowa Ji Kojolɔ.”
Ngɛ Hebri gbi mi ɔ, “Nyɛɛ tsu nyɛ he.”
Aloo “o tatsɛmɛ ɔmɛ.”
Aloo “ma se bi.”
Aloo “Dɔ ɔ.”