YONA
1 Yehowa de Amitai binyumu Yona* ke: 2 “Tee si nɛ o ya ma ngua nɛ ji Nineve ɔ mi, nɛ o ya jaje kojomi sɛ gbi kɛ si lɛ, ejakaa a yiwutso ní peepee ɔ ba su ye hɛ mi.”
3 Se Yona te si nɛ e tu fo kɛ je Yehowa hɛ mi kɛ ho Tarshish ya; e kple kɛ ho Yopa ya nɛ e ya na lɛ ko nɛ yaa Tarshish. Lɔ ɔ he ɔ, e wo hiɔ, nɛ e sɛ lɛ ɔ mi konɛ e kɛ ni ɔmɛ nɛ ho Tarshish ya, nɛ́ e je Yehowa hɛ mi.
4 Kɛkɛ nɛ Yehowa ha nɛ kɔɔhiɔ nɛ nya wa ko fia ngɛ wo ɔ nɔ, kɔɔhiɔ nɛ ɔ nya wa ngɛ wo ɔ nɔ hluu po kaa lɛ ɔ miɔ nɛ e maa ywia. 5 Lɛ hluili ɔmɛ ye gbeye wawɛɛ, nɛ a ti nɔ fɛɛ nɔ bɔni e mawu tsɛmi kaa e ba ye bua lɛ. Nɛ a bɔni ní ɔmɛ jemi kɛ wo wo ɔ mi konɛ lɛ ɔ nɛ pee huyɛhuyɛ. Se Yona lɛɛ e kple kɛ ho lɛ* ɔ sisi ya tɔɔ, nɛ e ya hwɔ si, nɛ e nɔ mahe mi vii. 6 Lɛ hluili ɔmɛ a nɔkɔtɔma a ba e ngɔ ba de lɛ ke: “O ngɛ mahe hwɔe lo? Tee si nɛ o tsɛ o mawu ɔ! Eko ɔ, anɔkuale Mawu ɔ maa na wɔ mɔbɔ nɛ wa hɛ mi be kpatae.”
7 Kɛkɛ nɛ a de a sibi ke: “Nyɛɛ ba, nyɛ ha nɛ waa fɔ sɔ kɛ na nɔ nɛ ha nɛ amanehlu nɛ ɔ ba a.” Lɔ ɔ he ɔ, a fɔ sɔ, nɛ sɔ ɔ ya nɔ Yona nɔ. 8 A de lɛ ke: Wa kpa mo pɛɛ, mo de wɔ, mɛnɔ lɛ ha nɛ haomi nɛ ɔ ba wa nɔ? Mɛni ní tsumi lɛ o tsuɔ, nɛ jije o je? Mɛni ma nɔ lɛ o je, nɛ jije no ji mo?”
9 E de mɛ ke: “Hebrino ji mi, nɛ i jaa Yehowa Mawu nɛ ngɛ hiɔwe ɔ, nɔ nɛ e pee wo ɔ kɛ zugba a.”*
10 Enɛ ɔ ha nɛ nyumu ɔmɛ ye gbeye wawɛɛ pe kekle ɔ po, nɛ a bi lɛ ke: “Mɛni o pee nɛ ɔ?” (Nyumu ɔmɛ ba le kaa e ngɛ fo tue kɛ je Yehowa hɛ mi, ejakaa e de mɛ.) 11 Lɔ ɔ he ɔ, a bi lɛ ke: “Mɛni waa pee mo konɛ wo ɔ he nɛ jɔ ha wɔ?” Ejakaa wo nɔ kɔɔhiɔ ɔ nya ngɛ wae wawɛɛ pe kekle ɔ. 12 E de mɛ ke: “ Nyɛ wo ye nɔ, nɛ nyɛ sake mi ngɔ fɔ wo ɔ mi, kɛkɛ wo ɔ he maa jɔ ha nyɛ; ejakaa i le kaa ye he je nɛ wo nɔ kɔɔhiɔ nɛ nya wa nɛ ɔ ba nyɛ nɔ ɔ nɛ.” 13 Se, nyumu ɔmɛ bɔ mɔde nɛ a hlui lɛ ɔ kɛ a he wami tsuo* kaa a maa su kpo lo, se a nyɛ we, ejakaa wo nɔ kɔɔhiɔ ɔ nya ngɛ wae kɛ ngɛ mɛ woe wawɛɛ.
14 Lɔ ɔ he ɔ, a kpa ngmlaa kɛ tsɛ Yehowa nɛ a de ke: Oo Yehowa, wa kpa mo pɛɛ, ko ha nɛ wa hɛ mi nɛ kpata ngɛ nyumu nɛ ɔ he je!* Koo gbla wa tue ngɛ nɔ ko nɛ sane ko be e he ɔ muɔ he, ejakaa mo Yehowa, nɔ́ nɛ sa o hɛ mi lɛ o peeɔ.” 15 Kɛkɛ nɛ a wo Yona nɔ, nɛ a sake lɛ kɛ fɔ wo ɔ mi; nɛ wo ɔ he jɔ dii. 16 Enɛ ɔ ha nɛ nyumu ɔmɛ ye Yehowa gbeye wawɛɛ, nɛ a sã afɔle kɛ ha Yehowa nɛ a kã lɛ kita.
17 Yehowa fã nɛ lo agbo ko ba mi Yona, nɛ Yona hi lo ɔ muklii mi nyɔ kɛ pia nyɔ kɛ pia ligbi etɛ.
2 Kɛkɛ nɛ Yona sɔle kɛ ha Yehowa ngɛ lo ɔ muklii mi, 2 nɛ e de ke:
“I tsɛ Yehowa ngɛ ye fimi be mi, nɛ e bu mi tue.
I fo ya kɛ je Yɔkɔ* mi tɔɔ* kaa o ye bua mi.
Nɛ o nu ye gbi.
3 Benɛ o sake mi ngɔ fɔ muɔ nɛ mi kuɔ ɔ mi ngɛ wo ɔ sisi tɔɔ ɔ,
Nyu babauu bɔle mi kɛ kpe.
O we oslɔke nɛ nya wa a tsuo kuɔ kɛ pue ye nɔ.
4 Kɛkɛ nɛ i de ke: ‘O fiee mi kɛ je o hɛ mi!
Kɛ ma plɛ kɛ kpale na o sɔlemi we klɔuklɔu ɔ ekohu ha kɛɛ?’
5 Nyu babauu bɔle mi kɛ kpe, nɛ i miɔ nɛ ma gbo;*
Nyu nɛ mi kuɔ ɔ ha ye yi nɔ.
Wosuma* blaa ye yi.
6 I kple kɛ ho yoku ɔmɛ a sisi ya tɔɔ.
Zugba a nya agbo ɔmɛ nga kɛ wo ye yi kɛ yaa neneene.
Se mo Yehowa ye Mawu, o je ye wami kɛ je muɔ ɔ mi.
7 Benɛ ye wami* ngɛ ye dɛ jee ɔ, Yehowa ji nɔ nɛ i kai.
Kɛkɛ nɛ ye sɔlemi ɔ ba su o hɛ mi, e ba su o sɔlemi we klɔuklɔu ɔ.
8 Nihi nɛ a jaa amagahi nɛ a he be se nami ɔ kua nɔ nɛ jeɔ suɔmi nɛ se pui kpo kɛ tsɔɔ mɛ ɔ.*
9 Se i mi lɛɛ, ma la kɛ je o yi, nɛ ma sã afɔle kɛ ha mo.
Kita nɛ i kã a, ma ye nɔ.
Yehowa ngɔ lɛ yi wami hemi jeɔ.”
10 Pee se ɔ, Yehowa fã lo ɔ nɛ e ya vie Yona ngɔ fɔ wo ɔ nya.
3 Kɛkɛ nɛ Yehowa kɛ Yona tu munyu si enyɔne, nɛ e de lɛ ke: 2 “Tee si, yaa Nineve nɛ ji ma ngua a mi nɛ o ya jaje sɛ gbi nɛ i kɛ ha mo ɔ.”
3 Lɔ ɔ he ɔ, Yona bu nɔ́ nɛ Yehowa de lɛ ɔ tue, nɛ e te si nɛ e ho Nineve ya. Nineve ma a kle saminya,* nɛ ligbi etɛ lɛ a kɛ maa nyɛɛ kɛ bɔle ma a. 4 Kɛkɛ nɛ Yona sɛ ma a mi, nɛ e nyɛɛ maa pee ligbi kake. Benɛ e ngɛ nyɛɛe tsuo ɔ, e ngɛ fiɛɛe ke: “E piɛ ligbi 40 pɛ nɛ a ma kpata Nineve ma a hɛ mi.”
5 Ninevebi ɔmɛ he Mawu ye, nɛ a fiɛɛ ke a ha hwɔ nɛ́ a bu kpekpe, kɛ je nɔ nyafii pe kulaa nɔ kɛ ya si nɔ ngua pe kulaa nɔ. 6 Benɛ sɛ gbi ɔ ya su Nineve matsɛ ɔ ngɔɔ, e te si ngɛ e sɛ ɔ mi nɛ e je e matsɛ tade ɔ, nɛ e ngɔ kpekpe kɛ ha e he nɛ e hi si ngɛ lazu mi. 7 Jehanɛ hu ɔ, e ha nɛ a fiɛɛ ngɛ Nineve ke,
“Matsɛ ɔ kɛ e ma nikɔtɔma amɛ ngɛ mlaa woe ke: Nɔmlɔ ko loo lohwe ko nɛ ko sa e nya nɔ́ ko. A ko ye nɔ́ ko nɛ a ko nu nɔ́ ko hulɔ. 8 Nɔ fɛɛ nɔ nɛ ha kpekpe, nɔmlɔ jio, lohwe jio; nɛ́ e sɔle wawɛɛ kɛ tsɛ Mawu, nɛ́ nɔ fɛɛ nɔ nɛ e kpale kɛ je e blɔ yayami ɔmɛ a nɔ nɛ́ e kpa e yiwutso ní peepee ɔmɛ. 9 Mɛnɔ le, eko ɔ anɔkuale Mawu ɔ ma tsake e juɛmi* ngɛ nɔ́ nɛ e to kaa e maa pee ɔ he, nɛ e mi mi fumi ɔ nya maa ba si, konɛ wa hɛ mi nɛ ko kpata!”
10 Benɛ anɔkuale Mawu ɔ na nɔ́ nɛ a pee ɔ, bɔ nɛ a kpale kɛ je a blɔ yayami ɔmɛ a nɔ ha a, e tsake e juɛmi* ngɛ haomi nɛ e de ke e kɛ maa ba a nɔ ɔ he, nɛ e pee we mɛ nɔ́ ko.
4 Se nɔ́ nɛ ɔ ngɔɛ Yona nya kulaa, nɛ e muklii mi fu wawɛɛ nitsɛ. 2 Lɔ ɔ he ɔ, e kɛ hɛdɔ sɔle kɛ ha Yehowa ke: “Oo Yehowa, tse nɔ́ nɛ i de benɛ i ná we nɛ ma je ye zugba a nɔ ɔ ji nɛ ɔ nɛ. Lɔ ɔ he je nɛ i tu fo ke i yaa Tarshish ɔ nɛ; ejakaa i le kaa o ji Mawu nɛ e mi mi sãã lɛ ngɛ nɔ he,* nɛ o naa nɔ mɔbɔ, o mi mi fu we mla, nɛ o suɔmi nɛ se pui ɔ hiɛ babauu, nɛ e dɔɔ mo kaa o kɛ amanehlu maa ba nimli yayamihi a nɔ. 3 Oo Yehowa, amlɔ nɛ ɔ, i kpa mo pɛɛ nɛ o ngɔ ye wami,* ejakaa e hi kaa ma gbo pe nɛ ma hi wami mi.”
4 Yehowa bi lɛ ke: “Anɛ e da ha mo kaa o mi mi fuɔ wawɛɛ lo?”
5 Kɛkɛ nɛ Yona je ma a mi nɛ e ya hi si ngɛ ma a puje he blɔ. E pee gba ko ngɛ lejɛ ɔ nɛ e hi si ngɛ gba a sisi ngɛ hɔ ɔ mi konɛ e hyɛ nɔ́ nɛ maa ba ma a nɔ. 6 Kɛkɛ nɛ Yehowa ha nɛ tɔ tso* ko puɛ kɛ ha Yona yi nɔ, bɔ nɛ pee nɛ pu nɛ ko tsoo lɛ konɛ e he mi nɛ jɔ lɛ. Tɔ tso ɔ nɛ puɛ ɔ ha nɛ Yona bua jɔ wawɛɛ.
7 Se benɛ je ke e naa a, anɔkuale Mawu ɔ ha nɛ gɔgɔ ba ye tɔ tso ɔ, nɛ e gbo. 8 Benɛ pu bɔni tsomi ɔ, Mawu ha nɛ yiti je kɔɔhiɔ ko nɛ dɔ la fia, nɛ pu ɔ sãã Yona yi mi, nɛ e miɔ nɛ e maa hɛli. E ya nɔ nɛ e bi kaa e suɔ nɛ e ma gbo.* E de si abɔ ke, “e hi kaa ma gbo pe nɛ ma hi wami mi.”
9 Mawu bi Yona ke: “Anɛ e da ha mo kaa o mi mi fuɔ wawɛɛ ngɛ tɔ tso ɔ he lo?”
Kɛkɛ nɛ Yona ha heto ke: “I ngɛ he blɔ kaa ye mi mi fuɔ. Ye mi mi fu wawɛɛ nɛ i ná nɛ i gbo.” 10 Se Yehowa de lɛ ke: “Nyɔ kake mi tso nɛ ɔ puɛ nɛ nyɔ kake mi nɔuu lɛ e gbo; o gbo we he dengme ko, nɛ pi mo nɛ o ha nɛ e puɛ, se kɛ̃ ɔ, e gbenɔ dɔ mo. 11 Anɛ e sɛ nɛ imi hu Nineve ma a he sane nɛ dɔ mi lo? Nineve ji ma ngua, nɛ nihi 120,000 kɛ se nɛ́ a li slɔɔto nɛ ngɛ kpakpa kɛ yayami a kpɛti ɔ* lɛ a ngɛ mi, nɛ lohwehi babauu hu ngɛ ma a mi.”
E sisi ji, “Beleku Lahuɛ.”
Aloo “lɛ nɛ ngɛ kaa mɔ.”
Ngɛ Hebri gbi mi ɔ, “nɛ i yeɔ Yehowa Mawu nɛ ngɛ hiɔwe ɔ, nɔ nɛ e pee wo ɔ kɛ zugba a gbeye.”
Aloo “bɔ mɔde kaa a ma hlui lɛ ɔ kɛ gble kɔɔhiɔ mi.
Aloo “ngɛ nyumu nɛ ɔ klaa he je.”
Aloo “Sheol.” Hyɛ Munyu Komɛ A Sisi Tsɔɔmi.
Aloo “Yɔkɔ muklii mi.”
Aloo “Nyu bɔle mi kɛ kpe kɛ ya su ye klaa he.”
E ji hu loo nga ko nɛ ngɛ wo ɔ mi.
Aloo “ye klaa.”
Baiblo komɛ de ke “Nihi nɛ a jaa amagahi nɛ a he be se nami ɔ kua anɔkuale yemi.”
Ngɛ Hebri gbi mi ɔ, “Nineve ji ma ngua kɛ ha Mawu.”
Aloo “e pia e he.”
Aloo “e pia e he.”
Aloo “dlooɔ nɔ.”
Aloo “ye klaa.”
Baiblo komɛ de ke “kumɛlo tso.”
Aloo “suɔ nɛ e klaa nɛ gbo.”
Aloo “nɛ́ a li a hiɔ nɔ kɛ a muɔ nɔ.”