MIKA
1 Ngɛ Yuda matsɛmɛ nɛ ji Yotam, Ahaz kɛ Hezekia a yi nɔ ɔ, Yehowa kɛ Mika* nɛ je Moreshet ɔ tu munyu kɛ kɔ Samaria kɛ Yerusalem he kɛ gu nina mi, nɛ e de lɛ ke:
2 “Nyɛ je mahi tsuo, nyɛɛ bu tue!
Oo zugba, kɛ níhi tsuo nɛ ngɛ o nɔ, nyɛ ta tue,
Yehowa ngɛ e sɔlemi we klɔuklɔu ɔ mi.
Nyɛ ha nɛ Nyɔmtsɛ Matsɛ Yehowa nɛ ye odase kɛ si nyɛ.
3 Ejakaa hyɛ! Yehowa je kpo kɛ je e hi he ɔ;
E ma kple si kɛ ba, nɛ e ma ba nyɛɛ zugba a nɔ hehi nɛ a ya hiɔwe ɔ.
4 Yoku ɔmɛ maa sile ngɛ e sisi,
Nɛ dɔgba amɛ a mi ma gba
Kaa hwo gbaku ngɛ la he,
Kaa nyu nɛ a plɛ pue si kɛ je yoku nɛ nya ma si yi mi.
5 Enɛ ɔ tsuo ba ngɛ Yakob atuã tsɔmi ɔ he je,
Ngɛ yayami nɛ Israel we ɔ pee ɔ he je.
Mɛni ji Yakob atuã tsɔmi ɔ?
Anɛ pi Samaria lo?
Nɛ mɛni ji Yuda hehi nɛ a ya hiɔwe ɔ?
Anɛ pi Yerusalem lo?
6 Ma ha nɛ Samaria maa pee ma doku ngɛ nga nɔ,
He ko nɛ a ma du wai tsohi ngɛ;
Ma sake* e tɛ ɔmɛ kɛ pue dɔgba a mi,
Nɛ ma ha nɛ e sisi tomi ɔmɛ maa je kpo.
7 A maa ywia e we amaga amɛ tsuo wɔtsɔwɔtsɔ,
Nɛ a maa sã nike níhi tsuo nɛ e ná kɛ je e he nɛ e kɛ ha a mi ɔ.*
Ma puɛ e we amaga amɛ tsuo.
Ejakaa e bua a nya kɛ je hiɔwo nɛ e ná kɛ je e tuutuu pomi ɔ mi,
Nɛ a maa ngɔ kɛ wo tuutuu poli kpahi hiɔ.”
8 Enɛ ɔ he ɔ, ma fo ya wawɛɛ nɛ ma kpa ngmlaa;
Ma nyɛɛ nane si gu nɛ ma hɛɛ ye he gu.
Ye ya fomi ɔ maa pee kaa nga mi gbehi a nɔ ɔ,
Nɛ ye kɔmɔ yemi ɔ maa pee kaa dugumahi a nɔ ɔ.
9 Ejakaa e pa a be tsaba.
E ba su Yuda tɔɔ.
E tue gblami ɔ ya su ye ma a mi bi ɔmɛ a we agbo ɔ nya tɔɔ, nɛ e ya su Yerusalem hulɔ.
10 “Nyɛ ko fia he adafi ngɛ Gat;
Nyɛ ko fo ya kulaa.
Nyɛ wuwlua si ngɛ zu mi ngɛ Bet Afra.*
11 Nyɛ nihi nɛ nyɛ ngɛ* Shafir, nyɛɛ hɛɛ nyɛ he gu nɛ́ nyɛ ba be kɛ nyɛ he zo ɔ.
Nihi nɛ a ngɛ* Zaanan ɔ ji kpo.
A ma fo ya ngɛ Bet Ezel, nɛ e be nyɛ ye buae hu.
12 Ejakaa nihi nɛ a ngɛ* Marot ɔ hyɛ nɔ́ kpakpa blɔ,
Se, nɔ́ yaya mohu lɛ je Yehowa ngɔ kɛ ba Yerusalem agbo ɔ nya.
13 Oo nyɛ nihi nɛ nyɛ ngɛ* Lakish, nyɛɛ fĩ ta zugba lɛ ɔmɛ kɛ wo okpɔngɔ ɔmɛ a he.
Mo ji Zion biyo ɔ yayami peemi ɔ sisije,
Ejakaa o mi lɛ a na Israel atuã tsɔmi ɔ ngɛ.
14 Enɛ ɔ he ɔ, o ma ha Moreshet Gat blɔ womi nike ní.
Akzib we ɔmɛ ji sisimi níhi kɛ ha Israel matsɛ ɔmɛ.
15 Kpaako ma ngɔ kunimi yelɔ kɛ ba nyɛ nɔ, Oo nyɛ nihi nɛ nyɛ ngɛ* Mareshah.
Israel hɛ mi nyami ɔ maa su Adulam tɔɔ.
16 Nyɛɛ sɛ nyɛ yi kpalokpalo nɛ nyɛ kpa nyɛ kpɛni ngɛ nyɛ bimɛ nɛ nyɛ suɔ mɛ ɔ a he je.
Nyɛɛ sɛ nyɛ yi ɔ kpalokpalo kaa kɔle,
Ejakaa a ngɔ mɛ kɛ je nyɛ he kɛ ho nyɔguɛ tso mi ya.
2 Kpoo ha nihi nɛ a toɔ ga yaya,
Nɛ́ a toɔ yayami peemi he ga ngɛ a sahi a nɔ ɔ!
Ke je na pɛ ɔ, a tsuɔ a ga tomi ɔ he ní,
Ejakaa a ngɛ he wami ɔ nɛ́ a kɛ maa pee jã.
2 A hɛ kɔ̃ɔ nihi a zugba nɔ, nɛ a kpɔ̃ɔ;
A hɛ kɔ̃ɔ nihi a we nɔ, nɛ a ngɔɔ;
A sisiɔ nɔ konɛ a kpɔ̃ e we ngɛ e dɛ
Nɛ́ a nine nɛ su e weto ní nɔ.
3 Lɔ ɔ he ɔ, nɔ́ nɛ Yehowa de ji nɛ ɔ nɛ:
‘Hyɛ, i ngɛ ga ko toe nɛ e kɛ haomi maa ba weku nɛ ɔ nɔ, nɛ a be nyɛe maa je mi.*
Nyɛɛ kɛ he nɔ womi be nyɛɛe hu, ejakaa e ji haomi be.
4 Jamɛ a be ɔ mi ɔ, nihi maa bu abɛ kɛ kɔ nyɛ he,
Nɛ a maa ye kɔmɔ wawɛɛ ngɛ nyɛ he je.
A ma de ke: “A kpata wa hɛ mi kulaa!
E ha nɛ ye we bi ɔmɛ a blɔ fa mi nɔ́ ɔ ya je ni kpahi a dɛ; e kpɔ̃ ngɛ ye dɛ!
E ngɔ wa ngmɔ ɔ kɛ ha nihi nɛ a yi anɔkuale ɔ.”
5 Lɔ ɔ he ɔ, o be nɔ ko nae nɛ e gbla susumi kpa a mi,
Nɛ́ e gba zugba a ngɛ Yehowa asafo ɔ mi.
6 A deɔ ke, “Nyɛ kpa fiɛɛmi!
E sɛ nɛ a tu ní nɛ ɔmɛ a he munyu;
Wa hɛ mi be si puee!”
7 Oo Yakob we, anɛ nihi deɔ ke:
“Yehowa mumi ɔ nyɛ we nɛ e to e tsui si hu lo?
Anɛ lɛ nɛ e tsu ní nɛ ɔmɛ lo?”
Anɛ ye munyu ɔmɛ kɛ nɔ́ kpakpa ba ha we nihi nɛ a nyɛɛɔ ngɛ dami mi ɔ lo?
8 Se lingmi nɛ ɔ, imi nitsɛ ye we bi ɔmɛ te si kaa he nyɛlɔ ko.
Nihi nɛ a bee nɛ a susuɔ kaa a ngɛ slɔkee, kaa nihi nɛ a je ta kɛ ma a,
Nyɛ je a junehi nɛ a ngɛ fɛu kɛ a tade ɔmɛ ngɛ a he.*
9 Nyɛ fie ye ma a mi yi ɔmɛ kɛ je a wehi nɛ a bua jɔ he ɔ a mi;
Nyɛ kpɔ̃ ye hɛ mi nyami ɔ kɛ je a bimɛ ɔmɛ a dɛ kulaa.
10 Tee si nɛ o ho, ejakaa pi he jɔɔmi he ji hiɛ ɔ.
Akɛnɛ e he tsɔ we he je ɔ, hɛ mi kpatami maa ba e nɔ, hɛ mi kpatami ngua nitsɛ.
11 Ke nyumu ko nyɛɛ kɔɔhiɔ kɛ nɔ sisimi se, nɛ e ba ye nyɛ lakpa ke:
“Nyɛ ma ná wai kɛ dã babauu ɔ,”
Lɛɛ, oya nɔuu nɛ nyɛ maa kplɛɛ e nɔ kaa nyɛ gbalɔ!
12 Oo Yakob, bɔ fɛɛ bɔ nɛ ji ɔ, ma bua nyɛ tsuo nyɛ nya;
Ma bua Israelbi nɛ piɛ ɔ a nya kokooko.
Ma ha nɛ a maa pee kake kaa jijɔ ngɛ to tsu mi,
Kaa to kuu ngɛ a ní yemi he;
E mi maa pee hoo kɛ nimli.’
13 Nɔ nɛ kuɔ blɔ tsimi níhi ɔ maa nyɛɛ a hɛ mi;
Kɛkɛ ɔ, a maa ye a he ngɛ nya tsimi sisi, nɛ a maa gu agbo ɔ mi kɛ je kpo.
A matsɛ ɔ maa nyɛɛ a hɛ mi kɛ gu mi,
Nɛ Yehowa maa pee a yi.
3 I de ke: “I kpa nyɛ pɛɛ, nyɛɛ bu tue, nyɛ Yakob we ɔ nikɔtɔmahi
Kɛ nyɛ Israel we ɔ nikɔtɔmahi.
Anɛ pi nyɛ mohu nɛ e sa nɛ nyɛɛ le nɔ́ nɛ da lo?
2 Se nyɛ nyɛ nɔ́ kpakpa nɛ nyɛ suɔ nɔ́ yaya;
Nyɛ kpɔɔ ye ma a mi bi ɔmɛ a he womi kɛ jeɔ a he nɛ nyɛ kpɔɔ a he lo kɛ jeɔ a wu ɔmɛ a he.
3 Jehanɛ ɔ, nyɛ yeɔ ye ma a mi bi ɔmɛ a he lo
Nɛ nyɛ kpɔɔ a he womi ngɛ a he,
Nyɛ ywiaa a wuhi nɛ nyɛ kuɔ mi dukuduku,
Kaa nɔ́ nɛ a hoo ngɛ buɛ* mi, kaa lo ngɛ buɛ mi.
4 Jamɛ a be ɔ mi ɔ, a ma tsɛ Yehowa nɛ́ e ye bua mɛ,
Se e be a nya mi poe.
Jamɛ a be ɔ mi ɔ, e kɛ e hɛ mi maa laa mɛ,
Ngɛ a yiwutso ní peepee ɔmɛ a he je.
5 Nɔ́ nɛ Yehowa de kɛ si gbali nɛ́ a ha nɛ e ma a mi bi ɔmɛ laa blɔ,
Nɛ́ ke a na nɔ́ ko nɛ a kɛ a lungu maa kɔ̃ ɔ,* a deɔ ke ‘Tue Mi Jɔmi!’
Se ke nɔ ko kɛ nɔ́ ko wui a nya mi ɔ, lɛɛ a deɔ ke, ta maa ba e nɔ ɔ* ji nɛ ɔ nɛ:
6 ‘Je maa jɔ nyɛ; nyɛ be nina ko nae;
Diblii pɛ lɛ maa wo ha nyɛ, nyɛ be klaae hu.
Pu maa nɔ si ngɛ gbali ɔmɛ a nɔ,
Nɛ je nami ma plɛ pee diblii ha mɛ.
7 Ní nali ɔmɛ a hɛ mi ma pue si,
Nɛ klaali ɔmɛ a nine maa nyɛ si.
Mɛ tsuo a maa ha a nya nɔ bwɔmi ɔ nɔ,*
Ejakaa heto ko ji Mawu ngɔ kɛ bɛ.’”
8 Se imi lɛɛ, Yehowa mumi ɔ ha nɛ he wami hyi mi tɔ,
Nɛ dami sane yemi kɛ kã hu hyi mi tɔ,
Konɛ ma kɛ ha nɛ Yakob nɛ le e we atuã tsɔmi ɔ, nɛ Israel hu nɛ le e yayami ɔ.
9 I kpa nyɛ pɛɛ, nyɛɛ bu nɔ́ nɛ ɔ tue, nyɛ Yakob we ɔ nikɔtɔmahi
Kɛ nyɛ Israel we ɔ nikɔtɔmahi,
Nɛ́ nyɛ hiɔ dami sane yemi, nɛ nyɛ kpɛ̃ɔ nɔ́ fɛɛ nɔ́ nɛ da,
10 Nɛ́ nyɛɛ kɛ muɔ si puemi ma Zion, nɛ́ nyɛɛ kɛ nɔ́ nɛ dɛ peemi ma Yerusalem ɔ.
11 E hɛ mi nyɛɛli ɔmɛ* heɔ nyɔ mi ní loko a kojoɔ,
E we osɔfo ɔmɛ tsɔɔ ní ngɛ sika he je,
Nɛ e gbali ɔmɛ hu klaa ngɛ sika* he je.
Se kɛ̃ ɔ, a kɛ a he kpasa Yehowa* nɛ a deɔ ke:
“Anɛ Yehowa piɛɛ we wa he lo?
Haomi ko be wa nɔ bae.”
12 Enɛ ɔ he ɔ, nyɛ he je ɔ,
A ma hu Zion kaa bɔ nɛ a huɔ ngmɔ ɔ,
Yerusalem maa pee ma doku,
4 Ngɛ nyagbe ligbi ɔmɛ a mi ɔ,*
Yehowa we ɔ yoku ɔ
Maa ma si kpɛii ngɛ yoku ɔmɛ a nɔ,
Nɛ a ma wo nɔ kɛ be yoku wawi ɔmɛ a he,
Nɛ je ma amɛ tsuo ma bu yuu kɛ ya he.
2 Nɛ nihi babauu maa ya, nɛ a ma de ke:
“Nyɛɛ ba, nyɛ ha nɛ waa kuɔ kɛ ya Yehowa yoku ɔ nɔ,
Kɛ ya Yakob Mawu ɔ we ɔ.
E maa tsɔɔ wɔ e blɔ ɔmɛ,
Nɛ wa maa nyɛɛ e blɔ ɔmɛ a nɔ.”
Ejakaa mlaa* maa je Zion,
Nɛ Yehowa munyu ɔ maa je Yerusalem.
3 E maa kojo ngɛ je mahi babauu a kpɛti,
Nɛ e ma dla sanehi kɛ ha je mahi nɛ a he wa nɛ a ngɛ tsitsaa a.
A kɛ a klaate ɔmɛ maa sɔ̃ kpakplaahi,
Nɛ a kɛ a we akplɔ ɔmɛ maa sɔ̃ tso he suami hahi.
Je ma ko be klaate nɔ woe kɛ si je ma ko,
Nɛ a be ta hwumi kasee hulɔ.
4 Nɔ fɛɛ nɔ maa hi si ngɛ lɛ nitsɛ e wai tso kɛ e fig tso sisi,
Nɛ nɔ ko nɔ ko be a he gbeye woe,
Ejakaa Yehowa tabohiatsɛ ɔ lɛ de.*
5 Je ma fɛɛ je ma maa nyɛɛ ngɛ e mawu ɔ biɛ mi,
Se wɔɔ lɛɛ, wa maa nyɛɛ ngɛ Yehowa wa Mawu ɔ biɛ mi kɛ ya neneene.
6 Yehowa de ke, “jamɛ a ligbi ɔ,
Ma bua nihi nɛ a ngɛ kpɛ̃ɛe ɔ a* nya,
Nɛ ma bua nihi nɛ a gbɛ fĩa,
Kɛ nihi nɛ i wa mɛ yi mi ɔ a nya.
7 Ma ha nɛ nihi nɛ a ngɛ kpɛ̃ɛe ɔ* maa piɛ,
Nɛ ma ha nɛ nihi nɛ a je mɛ kɛ ho tsitsaa lokoo ya a nɛ́ a pee je ma nɛ he wa;
Nɛ Yehowa maa ye a nɔ matsɛ ngɛ Zion Yoku ɔ nɔ,
Kɛ je amlɔ nɛ ɔ, kɛ yaa neneene.
8 Se mo, mɔ nɛ o poɔ to kuu ɔ he piɛ,
Zion biyo ɔ kpongu ɔ,
O ngɔ lɛ e maa ba, ee, o ngɔ lɛ kekleekle* nɔ yemi ɔ maa ba,
Yerusalem biyo ɔ nɔ́ ji matsɛ yemi ɔ.
9 Nɛ mɛni he je nɛ o ngɛ ngmlaa kpae wawɛɛ jã a?
Anɛ o be matsɛ lo
Aloo o ga woli ɔmɛ tsuo a hɛ mi kpata
Nɛ lɔ ɔ he je nɛ o ngɛ piie wawɛɛ kaa yo nɛ e ngɛ fɔe ɔ?
10 Oo Zion biyo, wuwlua si nɛ o kɛmɛ,
Kaa yo nɛ e ngɛ fɔe,
Ejakaa jehanɛ lɛɛ, o maa je ma a mi nɛ o ma ya hi nga nɔ.
O maa ya Babilon tɔɔ,
Nɛ lejɛ ɔ lɛ a ma kpɔ̃ mo ngɛ;
Lejɛ ɔ lɛ Yehowa ma kpɔ̃ mo ngɛ kɛ je o he nyɛli ɔmɛ a dɛ mi.
11 Amlɔ nɛ ɔ, je mahi babauu ma bua a he nya kɛ wo mo;
A ma de ke, ‘Ha nɛ a ble lɛ,
Nɛ ha nɛ wa hɛngmɛ nɛ e na kaa nɔ́ nɛ ɔ ba Zion nɔ.’
12 Se a li Yehowa juɛmi ɔ,
A nui e yi mi tomi ɔ sisi;*
Ejakaa e ma bua a nya kaa ngma nɛ a poo lɛ ehe nɛ a kɛ yaa ngma fiaami he.
13 Oo Zion biyo, moo te si nɛ o fiaa ngma;
Ejakaa ma tsake o koli ɔmɛ kɛ pee dade,
Nɛ ma tsake o nane kokloto ɔmɛ kɛ pee akɔblee,
O maa ywia nihi babauu,
O maa ngɔ a ní nɛ a gu sisimi blɔ nɔ kɛ ná a kɛ ha Yehowa,
Nɛ o maa ngɔ a níhi tsuo kɛ ha zugba a tsuo nɔ anɔkuale Nyɔmtsɛ ɔ.”
5 “Oo mo biyo nɛ a tua mo,
Amlɔ nɛ ɔ, o kɛ nɔ́ ngɛ o he pooe;
A sa o yi.
A kɛ tso fia Israel kojolɔ ɔ tsitsa.
2 Nɛ mo, Betlehem Efrata,
Mo nɛ́ o klee we kulaa kaa a maa bu mo kɛ piɛɛ Yuda akpehi abɔ* ɔ a he,
O mi lɛ nɔ nɛ maa ye matsɛ ngɛ Israel ha mi ɔ maa je kɛ ba,
E weku kpa ngɛ kɛ je blema tɔɔ, kɛ je blema lokoo.
3 Lɔ ɔ he ɔ, e ma je mɛ ngɔ ha
Kɛ ya si be nɛ yo ɔ nɛ e nu kɔɔmi ɔ ma fɔ.
Nɛ e nyɛminyumu ɔmɛ nɛ a piɛ ɔ maa kpale kɛ ho Israelbi ɔmɛ a ngɔ ya.
4 E maa te si kɛ da si, nɛ e kɛ Yehowa he wami ɔ maa hyɛ a nɔ,
Ngɛ Yehowa e Mawu ɔ biɛ ngua a mi.
Nɛ a maa hi si slɔkee,
Ejakaa amlɔ nɛ ɔ, e we agboje ɔ maa su zugba a nyagbe he ɔmɛ.
5 Nɛ e kɛ tue mi jɔmi maa ba.
Nɛ ke Asiriabi ɔmɛ ba tua wa zugba a, nɛ a naa wa mɔhi nɛ a fia gbogbo wo a he ɔ nɔ ɔ,
Wa maa hla nɔ hyɛli kpaago, ee, nyumuhi kpaanyɔ nɛ́ a ji ma nikɔtɔmahi.*
6 A kɛ klaate maa hyɛ Asiriabi ɔmɛ a zugba a,
Kɛ Nimrod zugba a nɔ ngɛ e we agbo ɔ nya.
Nɛ ke Asiria ba tua wa zugba a nɛ e naa nɔ ɔ,
E ma kpɔ̃ wɔ kɛ je e dɛ mi.
7 Yakob we bi ɔmɛ nɛ a piɛ ɔ maa hi je mahi babauu a kpɛti
Kaa bɔ́ nɛ je Yehowa ngɔ,
Kaa hiɔmi nɛ́ pue ngmɔ níhi a nɔ
Nɛ́ e kɛ e hɛ fɔɛ nɔmlɔ adesa nɔ
Nɛ́ e mlɛ we adesahi a bimɛ hulɔ.
8 Yakob we bi ɔmɛ nɛ a piɛ ɔ maa hi je ma amɛ a kpɛti,
Ngɛ je mahi babauu a kpɛti,
Kaa jata ngɛ nga mi lohwe awi yeli a kpɛti,
Kaa jata wayoo* ngɛ jijɔhi a kuu a kpɛti,
E guɔ a kpɛti nɛ e tuaa mɛ, nɛ e tsɔtlɔɔ a mi;
Nɛ nɔ ko be nɛ e ma kpɔ̃ mɛ.
9 O ma wo o nine nɔ ngɛ o he nyɛli ɔmɛ a nɔ,
Nɛ o he nyɛli ɔmɛ a hɛ mi ma kpata.”
10 Yehowa de ke, “jamɛ a ligbi ɔ,
Ma kpata o we okpɔngɔ ɔmɛ a hɛ mi nɛ ma puɛ o ta zugba lɛ ɔmɛ.
11 Ma kpata mahi nɛ a ngɛ o zugba a nɔ ɔ a hɛ mi
Nɛ ma hule o mahi tsuo nɛ a fia gbogbo wo a he ɔ.
12 Ma ha nɛ kunya nɛ o ngɛ tsue ɔ se maa po,*
Nɛ nihi nɛ a tsuɔ kunya a, a kpɛti nɔ ko be piɛe ngɛ o mi.
13 Ma kpata o we amaga amɛ kɛ o titima amɛ a hɛ mi,
Nɛ o be si kplãe kɛ ha o nine nya ní tsumi ɔmɛ hu.
14 Ma hia o wɔ tso* ɔmɛ kɛ je o mi
Nɛ ma kpata o ma amɛ a hɛ mi.
15 I kɛ abofu kɛ mi mi la maa ye lue
Ngɛ mahi nɛ a bui tue ɔ a nɔ.”
6 I kpa nyɛ pɛɛ, nyɛɛ bu nɔ́ nɛ Yehowa ngɛ dee ɔ tue.
Nyɛɛ te si, nyɛɛ jaje nyɛ sane ɔ ngɛ yoku ɔmɛ a hɛ mi,
Nɛ́ kpongu ɔmɛ nɛ a nu nyɛ gbi.
2 Oo yokuhi, nyɛɛ bu Yehowa sane ɔ tue,
Nyɛ zugba a sisi tomi ɔmɛ, nyɛɛ bu tue,
Ejakaa Yehowa kɛ e we bi ná sane;
Israel lɛ e kɛ maa ye sane ɔ nɛ:
3 “Ye we bi, mɛni i pee nyɛ?
Mɛni i pee nɛ lɔ ɔ ha nɛ pɔ tɔ nyɛ?
Nyɛɛ ye odase kɛ si mi.
4 Ejakaa i je nyɛ kɛ je Egipt zugba a nɔ,
I kpɔ̃ nyɛ kɛ je nyɔguɛ yemi mi;*
I tsɔ Mose, Aaron kɛ Miriam kɛ nyɛɛ nyɛ hɛ mi.
5 Ye we bi, i kpa nyɛ pɛɛ nɛ nyɛ kai ga nɛ Moab matsɛ Balak wo ɔ,
Kɛ heto nɛ Beor binyumu Balaam ha lɛ ɔ
Nyɛ kai nɔ́ nɛ ya nɔ kɛ je Shitim hluu kɛ ya si Gilgal
Bɔ nɛ pee nɛ nyɛɛ le Yehowa dami ní peemi ɔmɛ.”
6 Mɛni ma kɛ ba Yehowa hɛ mi?
Mɛni ma kɛ ba konɛ ma kɛ ba kplã si ngɛ Mawu nɛ ngɛ hiɔwe ɔ hɛ mi?
Anɛ ma ngɔ sami afɔlehi kɛ ba e hɛ mi lo,
Anɛ ma ngɔ na bimɛ nɛ a ye jeha kakaaka kɛ ba lo?
7 Anɛ Yehowa bua maa jɔ agbosu akpehi abɔ a he lo,
Nu nɛ hiɛ babauu akpe nyɔngmahi abɔ he lo?
Anɛ i kɛ ye kekleekle binyumu ma ha ngɛ ye atuã tsɔmi ɔ he je lo,
8 Oo nɔmlɔ adesa, e de mo nɔ́ nɛ hi.
Nɛ mɛni Yehowa ngɛ blɔ hyɛe* kaa o pee?
Lɔ ɔ ji kaa, o maa ye dami sane,* nɛ o maa ye anɔkuale,*
Nɛ́ o kɛ o Mawu ɔ nɛ nyɛɛ ngɛ he si bami mi!
9 Yehowa gbi ngɛ ngmlaa kpae kɛ ngɛ ma a tsɛe;
Nihi nɛ a ngɛ juɛmi ɔ maa ye o biɛ ɔ gbeye.
Nyɛɛ bu tso ɔ kɛ nɔ nɛ to tso ɔ he blɔ nya a tue.
10 Anɛ juɛtli nɛ a gu blɔ nɛ dɛ nɔ kɛ ná a ngɛ yayami peelɔ we ɔ mi lo?
Nɛ efa susumi nɔ́* nɛ sui, nɛ́ a hiɔ hu ngɛ yayami peelɔ we ɔ mi loloolo lo?
11 Ke i kɛ sɛni yaya kɛ baagi nɛ sisimi sɛni tɛ ngɛ mi tsuɔ ní ɔ,
Anɛ ye je mi bami he ma tsɔ lo?*
12 Ejakaa niatsɛmɛ nɛ a ngɛ e mi ɔ peeɔ yiwutso ní,
Nɛ nihi nɛ a ngɛ e mi ɔ yeɔ lakpa;
A lilɛ nɛ ngɛ a nya mi ɔ sisiɔ nɔ.
13 “Enɛ ɔ he ɔ, ma fia mo nɔ́ nɛ ma plaa mo,
Ma ha nɛ o maa pee ma doku ngɛ o yayami ɔmɛ a he je.
14 O maa ye ní, se o be tɔe;
Nɔ́ ko be o muklii mi hie.
Nɔ́ nɛ o je ɔ, o kɛ be yae slɔkee,
Nɛ nɔ́ nɛ o maa tloo kɛ ho ɔ, ma kɛ ha klaate.
15 O ma du ní, se o be nɔ́ ko kpae.
O maa naa oliv yiblii nɔ, se o be nu náe kɛ pee nɔ́ ko;
O maa pee wai ehe, se o be wai ɔ eko nue.
16 Ejakaa nyɛ yeɔ Omri mlaa a nɔ nɛ nyɛ nyɛɛɔ Ahab we ɔ ní peepee ɔ se,
Nyɛɛ kɛ a ga womi ɔmɛ tsuɔ ní.
Enɛ ɔ he je nɛ ma ha nɛ o maa pee he gbeye womi nɔ́
Nɛ ma ha nɛ a ma kpa nyagba kɛ wo nihi nɛ a ngɛ o mi ɔ nɛ;
Nɛ o maa tloo je ma amɛ a he fɛu yemi ɔ.”
7 Kpoo ha mi! I ngɛ kaa nɔ ko nɛ
Ke a bua tso yiblii nya ngɛ mawulɛ be mi
Nɛ a kpɛte ní ngɛ wai yiblii kpami se ɔ,
E ná we wai yiblii sau ɔ eko nɛ e ye,
I ná we fig kekleekle yiblii nɛ ngɛ mi jloe ɔ* eko.
2 Anɔkualetsɛ hɛ mi kpata* kɛ je zugba a nɔ;
Nɔ ko nɔ ko be nɛ da ngɛ adesahi a kpɛti.
Mɛ tsuo a ya woɔ ka konɛ a pue muɔ si.
A ti nɔ fɛɛ nɔ kɛ adlai* daa e nyɛmi.
3 A nine he be kɛ nɔ́ yaya peemi;
Ma nɔkɔtɔma a biɔ nɔ́ ko,
Kojolɔ ɔ biɔ hiɔwo,
Nɔmlɔ ngua a haa nɛ a leɔ nɔ́ nɛ e suɔ,*
Nɛ a blaa kɛ tsuɔ he ní.*
4 Nɔ nɛ hi pe kulaa ngɛ a kpɛti ɔ ngɛ kaa mio,
Nɔ nɛ da pe kulaa ngɛ a kpɛti ɔ, mio piɛ po hi pe lɛ.
O buli ɔmɛ a ligbi kɛ o kojomi ligbi ɔ maa ba.
Amlɔ nɛ ɔ, a tsui maa po.
5 Ko he o huɛ nɛ o ye
Nɛ koo ngɔ o hɛ kɛ fɔ o huɛ nɛ nyu bi ngɛ o kɛ lɛ nyɛ kpɛti ɔ nɔ.
Nɔ nɛ hwɔɔ o gugue mi ɔ, hyɛ o nya nɔ ngɛ e he.
6 Ejakaa binyumu bui e tsɛ,
Biyo teɔ si kɛ woɔ e nyɛ,
Nɛ yogbayo teɔ si kɛ woɔ e nganyɛ;
Nɔ nitsɛ e we mi bimɛ ji e he nyɛli.
7 Se imi lɛɛ, ma ya nɔ ma hyɛ Yehowa blɔ.
Ma to ye tsui si kɛ mlɛ* Mawu nɛ ji ye yi wami helɔ ɔ.
Ye Mawu ɔ maa bu mi tue.
8 Ye he nyɛlɔ,* ko nya ngɛ ye he.
I nɔ si mohu lɛɛ, se ma te si;
E ngɛ mi kaa i ngɛ diblii mi, se Yehowa maa pee ye la.
9 Ma tloo Yehowa abofu ɔ
Ejakaa i pee yayami kɛ si lɛ
Kɛ yaa si be nɛ e maa ye ye sane ɔ, nɛ e maa ye dami sane ha mi.
E ma je mi kɛ ba la a he;
Nɛ ma hyɛ e dami ɔ.
10 Ye he nyɛlɔ ɔ hu maa na,
Nɛ zo maa gbe nɔ nɛ deɔ mi ke:
“Jije Yehowa o Mawu ɔ ngɛ” ɔ?
I kɛ ye hɛngmɛ maa hyɛ lɛ.
Amlɔ nɛ ɔ, a maa naa e nɔ kaa mɔsɔ ngɛ gbɛjegbɛ ɔmɛ a nɔ.
11 E maa pee ligbi nɛ o maa fia o tɛ gbogbo ɔ;
Jamɛ a ligbi ɔ, a ma bli huzu ɔ mi.*
12 Jamɛ a ligbi ɔ, a maa ba o ngɔ
A maa je Asiria kɛ Egipt ma amɛ a nɔ tɔɔ kɛ ba,
A maa je Egipt kɛ ba Pa* a he tɔɔ;
Kɛ je wo nya kɛ ya si wo nya, kɛ je yoku nɔ kɛ ya si yoku nɔ.
13 Nihi nɛ a ngɛ zugba a nɔ ɔ a he je ɔ, e maa pee ma doku,
Ngɛ nɔ́ nɛ a pee ɔ he je.*
14 Moo ngɔ o to tsɔ̃mi tso ɔ kɛ hyɛ o ma a nɔ, o tohi nɛ ji o weto ní ɔ,
Nɔ nɛ lɛ nɔ kake too e hii si ngɛ hue tso ɔ mi, ngɛ zugba kɛ e nɔ tsohi nɛ woɔ yiblii ɔ a kpɛti ɔ.
Ha nɛ a ye ní ngɛ Bashan kɛ Gilead kaa bɔ nɛ e ji ngɛ blema a.
15 “Ma ha nɛ o na nyakpɛ níhi,
Kaa bɔ nɛ e ba benɛ o je Egipt zugba a nɔ ɔ.
16 Je mahi maa na nɛ zo maa gbe mɛ ngɛ a he wami ɔ tsuo se.
A kɛ a nine maa to a nya he;
A tue be nɔ́ nue.
17 A ma lɔ zu kaa sinɔhi;
A maa je kpo kɛ je a he piɛ pomi he ɔmɛ kɛ he domi blibliibli kaa lohwehi nɛ a sãã si ngɛ zugba.
A kɛ he kpokpomi maa ba Yehowa wa Mawu ɔ ngɔ,
Nɛ a maa ye mo gbeye.”
18 Mawu te nɛɛ lɛ ngɛ kaa mo,
Nɛ́ e kɛ tɔmi keɔ, nɛ́ e maa e hɛ kɛ fɔɔ e ma a mi bi* ɔmɛ a kpɛti nihi nɛ a piɛ ɔ a tɔmi ɔmɛ a nɔ?
E hɛɛ we e we abofu ɔ mi kɛ yɛ neneene,
Ejakaa e bua jɔɔ suɔmi nɛ se pui he.
19 E maa na wɔ mɔbɔ ekohu; e maa ye wa tɔmi ɔmɛ a nɔ kunimi.*
O ma sake a yayami ɔmɛ tsuo kɛ fɔ wo ɔ sisi tɔɔ.
20 O maa ye Yakob anɔkuale,
O ma je suɔmi nɛ se pui kpo kɛ tsɔɔ Abraham,
Kaa bɔ nɛ o kã wa nɛmɛ ɔmɛ kita kɛ je blema a.
E ji biɛ Mikael kpiti pomi (nɛ e sisi ji, “Mɛnɔ Ngɛ Kaa Mawu?”) aloo Mikaya kpiti pomi (nɛ e sisi ji, “Mɛnɔ Ngɛ Kaa Yehowa?”)
Ngɛ Hebri gbi mi ɔ, “Ma plɛ.”
Aloo “a maa sã hiɔwo tsuo nɛ e ná kɛ je e tuutuu pomi ɔ mi ɔ.”
Aloo “ngɛ Afra we ɔ mi.”
Ngɛ Hebri gbi mi ɔ, “Mo yo nɛ o ngɛ.”
Ngɛ Hebri gbi mi ɔ, “Yo nɛ ngɛ.”
Ngɛ Hebri gbi mi ɔ, “yo nɛ ngɛ.”
Ngɛ Hebri gbi mi ɔ, “mo yo nɛ o ngɛ.”
Ngɛ Hebri gbi mi ɔ, “mo yo nɛ o ngɛ.”
Ngɛ Hebri gbi mi ɔ, “nyɛ be nyɛe ma je nyɛ kuɛ ngɛ mi.”
Baiblo komɛ de ke “ngɛ a tade ɔmɛ a he.”
Aloo “buɛ nɛ nya kle agbo.”
Baiblo komɛ de ke “ke a na nɔ́ ko nɛ a maa ta a.”
Ngɛ Hebri gbi mi ɔ, “a jɔɔ ta nɔ kɛ siɔ mɛ ɔ.”
Aloo “a maa ha a nya nɔ.”
Ngɛ Hebri gbi mi ɔ, “E nikɔtɔma amɛ.”
Aloo “sika hiɔ.”
Aloo “a deɔ ke a kɛ a he kpasa Yehowa.”
Aloo “sɔlemi we ɔ yoku ɔ.”
Aloo “kaa kpongu kɛ e nɔ tsohi.”
Aloo “Ngɛ ligbi ɔmɛ a nyagbe ɔ mi ɔ.”
Aloo “blɔ tsɔɔmi.”
Ngɛ Hebri gbi mi ɔ, “Yehowa tabohiatsɛ ɔ nya lɛ de.”
Ngɛ Hebri gbi mi ɔ, “yo ɔ nɛ ngɛ kpɛ̃ɛe ɔ.”
Ngɛ Hebri gbi mi ɔ, “yo nɛ e ngɛ kpɛ̃ɛe ɔ.”
Aloo “blema.”
Aloo “e ga womi ɔ sisi.”
Aloo “wɛtso.”
Aloo “hɛ mi nyɛɛli ɔmɛ.”
Aloo “jata ku wayoo kɛ e kuɛ he bwɔmi.”
Ngɛ Hebri gbi mi ɔ, “se maa po ngɛ o dɛ mi.”
Ngɛ Hebri gbi mi ɔ, “nyɔguɛ yemi we mi.”
Aloo “yiblii nɛ je ye mi.”
Aloo “ye klaa he yayami ɔ.”
Aloo “ngɛ bie.”
Aloo “o ko hyɛ nihi a hɛ mi.”
Aloo “o mi mi nɛ jɔ nɛ o kɛ anɔkuale yemi nɛ suɔ nihi.” Ngɛ Hebri gbi mi ɔ, “nɛ́ o maa suɔ suɔmi nɛ se pui.”
Hyɛ Mi Tsɔɔmi Munyu B14.
Aloo “ma pee nɔ ko nɛ sane ko be e he lo.”
Aloo “nɛ ngɛ ye klaa jloe ɔ.”
Aloo “laa.”
Aloo “ya ngua.”
Aloo “nɔ́ nɛ ngɛ e klaa jloe.”
Ngɛ Hebri gbi mi ɔ, “a blaa kɛ loɔ.”
Aloo “Ma ya nɔ ma mlɛ.”
Hebri munyungu nɛ a tsɔɔ sisi ke “he nyɛlɔ” ngɛ hiɛ ɔ tsɔɔ kaa yo he munyu lɛ a ngɛ tue.
Baiblo komɛ de ke “mlaa a maa hi tsitsaa.”
Nɛ ji Yufrate Pa a.
Ngɛ Hebri gbi mi ɔ, “Ngɛ yiblii nɛ a ní peepee ɔ woɔ he je.”
Ngɛ Hebri gbi mi ɔ, “e weto ní ɔ.”
Aloo “e maa naa wa tɔmi ɔmɛ a nɔ.”